பூக்களில் உறங்கும் மெளனங்கள்

ஈழம் பதிந்த கண்களில்
ஈரம் பொதிந்த ஏக்கங்கள்.

வீதியில் முளைக்கும்
பூட்ஸ் காலடி ஓசைகள்
வாசல் தாண்டும் வரை
ஈசல் உயிருடன்
ஊசலாடும்
உரிமைகளின் உயிர்கள்.

அமைதிப் பேச்சுகளின்
முடிவுகளைத்
தீர்மானிக்கும்
ஈரமற்ற பீரங்கிகள்.
 
தலைமுறை தாண்டியும்
முறைத்தலை நிறுத்தாத
சிங்களச் சினம்.
அறுபட்ட நாணலாய்
வீதியில் விழுகிறது
செந்தமிழ் இனம்.

வாழும் வசதியுமில்லை
கிரிக்கெட்டிற்காய்
தீக்குளிக்கும் தேசத்தில்
அகதியாகும் தகுதியுமில்லையாம்.

தோட்டாக்களும்,
வெடிகுண்டுகளும்
மரண ஓலங்களும்
ஈழத்தின் தேசிய கீதமென்றாகி விட,

தினம்
வீதியில் போர்ப்பறைச் சத்தங்கள்
எப்படி
பூக்களில் உறங்கும் மெளனங்கள் ?