தன்னம்பிக்கை : மறுத்தல் உயர்வு தரும்.

தமிழில் நாம் சொல்வதற்குத் தயங்கும் ரொம்பக் கஷ்டமான வார்த்தை என்ன தெரியுமா ? “முடியாதுஎன்பது தான். இந்தியக் கலாச்சாரத்தில்மறுத்துப் பேசுவதுஎன்பது கொஞ்சம் அநாகரீகமானது. “பெரியவங்க சொன்னா மறுத்துப் பேசாதேஎனும் பாட்டி அட்வைஸ்  முதல், “ஐயாவோட பேச்சுக்கு மறுப்பு ஏதுங்கஎனும் கக்கத்தில் துண்டை சொருகும் உழைப்பாளியின் பதில் வரை, மறுத்துப் பேசக் கூடாது என்பதையே போதிக்கிறது.

முடியாதுஎன்று சொல்ல விடாமல் நம்மை பின்னுக்கு இழுக்கும் காரணிகள் பல உண்டு. அந்த நபருடனான நட்பு முறிந்து விடுமோ ? நம்மை நம்பி வந்துக் கேட்கிறார் முடியாது என்பது நல்லாவா இருக்கும் ? முடியாதுன்னு சொல்லிட்டா ரொம்ப வருத்தப்படுவாரே ? ஒருவேளை கோபப்படுவாரோ ? இப்படிப்பட்ட காரணங்கள் தான்சரிஎனும் தலையாட்டல்களுக்குக் காரணமாகிவிடுகிறது. மறுத்துப் பேசாமல் இருப்பது நம்முடைய முதுகின் மேல் சோதனைகள் விக்கிரமாதித்ய வேதாளமாய் வந்தமரக் காரணமாகி விடுகிறது என்பதை நாம் உணர்வதில்லை. 

சரிஎன சொல்வது மிகவும் எளிது. “இதை வாங்கித் தருவீங்களா டாடி ?” என்று மகள் கொஞ்சுவாள். “இந்த வேலையைச் செய்ய முடியுமா ?” எனும் மேலதிகாரி  விண்ணப்பம் வைப்பார். “இதைப் பண்ணுடா பிளீஸ்எனும் நண்பன் கேட்பான். “சரிஎனும் ஒரு வார்த்தைப் பதில் ரொம்பவே எளிது. ஆனால் அந்த ஒரு பதிலுடன் வேலை முடிந்து போவதில்லை. அதன் விளைவால் நடக்கும் நிகழ்ச்சிகள் நமக்குப் பிடிக்காததாகவோ, நம்மால் செய்ய முடியாததாகவோ இருந்து விடுகிறது.

நமக்குப் பிடிக்காத ஒரு விஷயத்தைச் செய்ய நாம் ஒத்துக் கொள்ளும் போது, நமக்குப் பிடித்த ஒரு விஷயத்தைச் செய்யும் வாய்ப்பு தடை பட்டுப் போகிறது. உதாரணமாக, அலுவலகத்தில் அதிகமான வேலை தரப்படுகிறது என்று வைத்துக் கொள்ளுங்கள். “சாரிஇன்னிக்கு முடியாதுஎன்று சொல்வது உங்களுடைய தன்னம்பிக்கையின் அடையாளம். அதை விட்டு விட்டு, “சரி குடுங்கஎன இழுத்துப் போட்டுக் கொண்டால் உங்களுடைய மாலை நேர திட்டங்களெல்லாம் காலி. 

குழந்தை ஏதோ ஒரு பொருளை விரும்பிக் கேட்கிறது. அது தேவையற்றது என நீங்கள் நினைக்கும்போதுமுடியாதுஎன்று சொல்வதே நல்லது. எல்லாவற்றுக்கும் சரி எனும் பதிலைச் சொல்வது குழந்தைகளின் பதின் வயது காலத்தில் பெரும் சிக்கலை உருவாக்கும் என்கின்றனர் உளவியலார்கள். முடியாது என சொல்லி மறுத்து, தோல்வியின் முகத்தையும் குழந்தைகளுக்குக் காட்ட வேண்டியது அவசியம். அது தான் பிற்காலத்தில் தோல்விகள் சகஜம் என்பதைக் குழந்தைகளுக்குப் போதிக்கும். அது தெரியாத இளசுகள் தான் தோல்வி எனும் வார்த்தையைக் கேட்டதும் தற்கொலைக்குத் தயாராகி விடுகிறார்கள். 

நெருங்கிய நண்பர்களுக்கிடையேமறுப்புஇல்லாதபோது பல கெட்ட பழக்கங்கள் வந்து தொற்றிக் கொள்கின்றன. “ஒரு தம் போடுவோம் மச்சிஎனும் போதுவேண்டாம், சாரி.. “ என ஒரு சின்ன மறுப்பைச் சொன்னாலே தப்பித்து விடலாம். “முடியாதுஎன்று சொல்வது நம்மை நாமே மதிப்பதற்குச் சமம் என்கின்றனர் உளவியலார். என்னோட நேரத்தை நான் மதிக்கிறேன் என்பதன் அடையாளம் தான் தேவையற்றவைகளுக்குநோசொல்வது ! அடுத்தவர்கள் சொல்வதற்கெல்லாம் தலையாட்டினால் நீங்கள் அடுத்தவர்களை மதிக்கிறீர்கள், உங்களை மதிக்கவில்லை என்பது தான் ஒருவரிச் செய்தி!ச்ச்ச்

முக்கியமான வேலையில் இருக்கும்போது சிலர் போன் பண்ணி சாவாகாசமாய்ப் பேசத் துவங்குவார்கள். “ஏலே ராசா என்னலே செய்றேஎன ஆரம்பிப்பவர்களிடம் ஒரு நிமிடம் பேசிவிட்டுசாரி.. அப்புறம் பேசலாமா ? கொஞ்சம் பிஸிஎன்று சொல்லக் கூட தயங்குகிறோமா இல்லையா ? 

தன்னுடைய இலட்சியம் என்ன என்பதில் தெளிவாக இருப்பர்களால் எளிதில் மறுப்பைச் சொல்ல முடிகிறது. அரைவேக்காடு மனநிலை உடையவர்கள் பெரும்பாலும் மறுத்துச் சொல்லத் தயங்குகிறார்கள். காரணம், அது சரியா தவறா என்பதே அவர்களுக்குத் தெரிவதில்லை ! 

எல்லாவற்றையும் தலையாட்டிக் கொண்டே ஏற்றுக் கொள்பவர்களுக்கு ஆயுள் ரொம்பக் கம்மி. காரணம் அவர்களிடம் எப்போதுமே மன அழுத்தம் நிரந்தரமாகக் குடிகொண்டிருக்கும். மறுக்காததற்காக தன்மீதான கோபமும், தன்னை இந்த சூழலில் மாட்டி விட்டதற்காக மற்றவர்களிடம் கோபமும் எப்போதும் இவர்களிடம் இருக்கும். கோபம் கொந்தளிக்கும் மனம் நோய்களின் கூடாரம் தானே ! 

முடியாதுஎன்று சொல்வது தவறில்லை எனும் மனநிலை முதல் தேவை. சொல்வதற்கெல்லாம் சரி என தலையாட்டிக் கொண்டிருக்க யாராலும் முடியாது. அமெரிக்கர்கள்நோசொல்வதற்குத் தயங்குவதில்லை என்கிறது ஒரு புள்ளி விவரம். முடியாத விஷயத்தைமுடியாதுஎன்று சொல்லி விட்டுச் சென்று விடுவார்கள். அதே போல நிறுவனங்களின் உயர் அதிகாரிகளும்நோசொல்லத் தயங்குவதில்லை. அதனால் தான் அவர்களுக்கு எப்போதுமே குடும்பத்தைக் கவனிக்க கொஞ்சம் நேரம் கிடைக்கிறது !

சரிஎன ஒத்துக் கொண்டால் அதன் தொடர்ச்சியான விளைவுகள் என்னென்ன என்பதைக் கொஞ்சம் யோசித்துப் பார்க்க வேண்டும். “என்ன, ஒரு அரை மணி நேர வேலை தானே !” என்று பல வேளைகளில் நினைப்போம். அந்த அரை மணி நேரம் அதன் பின் வரக்கூடிய எல்லா வேலைகளையும் பின்னுக்குத் தள்ளும். இதே போல நான்கைந்து அரை மணி நேர வேலை வந்தால் நிலமை என்னவாகும் ? பிஸி..பிஸி.. என ஓடிக்கொண்டே இருக்க வேண்டியது தான். “சாரி.. முடியாதுஎன்று ஒரு மறுப்பை சரியான நேரத்தில் சொன்னால் மற்ற அனைத்துமே அதனதன் இடத்தில் கட்சிதமாய் வந்து அமரும் ! ஒன்றை நினைவில் கொள்ளுங்கள். நேற்றைக்குத் தொலைத்த பணத்தை இன்று மீட்கலாம். ஆனால் நேச்ச்ற்று தொலைத்த நேரத்தை என்றுமே மீட்க முடியாது !

சரி என்று சொல்வதற்கு ஒரு வார்த்தை போதும். சாரி.. என்று சொல்வதற்கு ஒரு சின்ன விளக்கமும் தேவைப்படும். மன்னியுங்கள், ஒரு முக்கியமான வேலையில இருக்கேன் . சாரி, இது எனக்குப் புடிக்காத விஷயம். சாரி, இப்போதைக்கு புதுசா எதையும் ஒத்துக் கொள்ற மாதிரி இல்லை. எனக்கு டைமே இல்லை. இப்போதைக்கு என்னோட கவனத்தை இதுல செலுத்தற மனநிலைல நான் இல்லை. சாரி, இதுபற்றி எனக்கு எதுவும் தெரியாது. சாரி, எனக்கு கொஞ்சம் குடும்பம் சார்ந்த வேலைகள் இருக்கு. சாரி, எனக்கு கொஞ்சம் ரெஸ்ட் வேணும். இப்படி ஏதாவது ஒரு சின்ன காரணம் சொல்லிவிட்டாலே போதுமானது !

மறுக்கும் போது உங்களுக்கு மாற்று வழி ஏதேனும் தோன்றினால் அதைச் சொல்லலாம். உதாரணமாகநாளைக்குக் காலையில முடியாது, நாளை மறுநாள்னா ஓகே”. அல்லதுஎன்னை விட மாலதி இந்த வேலையைச் சிறப்பாகச் செய்ய முடியும் என நினைக்கிறேன்என்பது போல ஏதோ ஒன்று.  மாற்று வழி சொல்லவேண்டும் என்பது கட்டாயமில்லை.  மனதில் தோன்றினால் மட்டும் சொல்லுங்கள். ! தேவையில்லாத விஷயங்களைச் சொல்லி அது பூமராங் மாதிரி உங்களைத் திரும்பித் தாக்காமல் இருக்க வேண்டும் என்பதைப் பார்த்துக் கொள்ளுங்கள்.

அகஸ்டின் ஓக் மண்டினோ புகழ்பெற்ற ஒரு எழுத்தாளர். அவருடைய பல புத்தகங்கள் விற்பனையில் சாதனை படைத்தவை. அவருடைய கிரேட்டஸ்ட் சேல்ஸ்மேன் இன் வேல்ட் புத்தகம் ஐந்து கோடிக்கு மேல் விற்றுப் பட்டையைக் கிளப்பியது. அவர் எழுத்தாளராவதற்கு முன் வாழ்வில் பல்வேறு சோதனைகளில் சிக்கினார். மிகப்பெரிய குடிகாரராய் மாறினார். கடைசியில் மனதை ஒருமுகப்படுத்தி, குடிக்குநோசொல்லி எழுத்துக்கு வரவேற்புக் கம்பளம் விரித்தார். அது தான் இன்று அவரை உலகப் புகழ்பெற்ற தன்னம்பிக்கை எழுத்தாளர்களின் வரிசையில் அமர வைத்திருக்கிறது. எனவேநோசொல்வது மற்றவர்களோடு மட்டும் என்று நினைத்து விடாதீர்கள். உங்கள் மனம் உங்களை தவறு செய்யத் தூண்டும் போதெல்லாம் கூட எழும்பட்டும் குரல்நோ

சில மின்னஞ்சல்களுக்கு உடனடியாக மறுப்பு எழுதவேண்டுமென்பதில்லை. சைலண்டாக இருந்து விடலாம். மௌனம் என்பது மறுப்பு என்பது தான் மின்னஞ்சல் மொழி. பதிலைத் தாமதப்படுத்துவது, பதிலளிக்காமல் இருப்பது, உடனடியாக நோ சொல்வது எது அந்தச் சூழலுக்குத் தேவை என்பதை நீங்கள் தீர்மானியுங்கள்

உங்களுடைய வேலைகளையெல்லாம் தரம்பிரியுங்கள். எது அதி முக்கியம் என்பது முதல், எது அவசியமற்றது என்பது வரை தரம் பிரியுங்கள். அதனடிப்படையில் உங்கள் பணிகளைச் செய்யுங்கள். எதை மறுக்கவேண்டும் என்பது உங்களுக்கு அப்போது புரியும். மறுத்துப் பேசுவது உங்களுக்கு நல்ல பெயரைத் தான் சம்பாதித்துத் தரும் என்பது தான் உண்மை.  அவரு முடியும்ன்னா முடியும்னு சொல்லுவாரு, சொன்னா முடிச்சிடுவாருஎனும் டயலாக்கை நீங்கள் ஆங்காங்கே கேட்டிருக்க வாய்ப்பு உண்டு ! எல்லாவற்றுக்கும் தலையாட்டுபவர்கள் பெரும்பாலும் இளிச்சவாயன் பட்டத்துக்குள் தாமாகவே போய் சேர்ந்து விடுகிறார்கள்.

உலகின் பணக்காரர்களின் பட்டியலில் மூன்றாவது இடத்தில் இருக்கும் வாரன் பஃபெட் சொல்லும் சேதி சுவாரஸ்யமானது. சாதாரண வெற்றியாளர்களுக்கும், சாதனை வெற்றியாளர்களுக்குமிடையே உள்ள வித்தியாசம் என்ன தெரியுமா ? சாதனை வெற்றியாளர்கள் ஏறக்குறைய எல்லாவற்றுக்கும் நோ சொல்வார்கள்என்கிறார் இவர். முக்கியமானவை தவிர எல்லாவற்றையும் மறுத்துவிட வேண்டும் என்பதே இவரது வெற்றி பார்முலா.  

மறுப்புச் சொல்லிட மறக்கவும் வேண்டாம்

வாழ்வின் இனிமையை துறக்கவும் வேண்டாம்

 

By சேவியர் Posted in Uncategorized

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.