விவசாயம் காப்போம்; விவசாயி காப்போம்

விவசாயம் காப்போம்
விவசாயி காப்போம்

Image result for tamil nadu paddy field

மண் !
மனிதனின் முதல் தோழன்
மண்
மனிதனின் கடைசி எதிரி !

கருவறை தாண்டிய பாதங்கள்
மண்ணின் முதுகு மிதித்து
புழுதி பிடித்து
உரண்டு புரண்டு உறவாடுகின்றன !

கல்லறை நோக்கிய பயணங்கள்
மண்ணின் அறை திறந்து
நிரந்தர நித்திரையில்
சலனம் தொலைத்து துயில்கின்றன !

மண் !
மனிதனின் முதல் தோழன்
மண்
மனிதனின் கடைசி எதிரி !

*

கடவுள்
மண்ணின் முதல் விவசாயி !

மனிதன்
கடவுள் படைத்த முதல் விவசாயி !

கடவுள்
மண்ணில் கைதொட்டு
உயிரை உருவாக்கினார் !
மனிதன்
மண்ணில் கைதொட்டு
பயிரை உருவாக்கினான் !

கடவுளே
உலகின் முதல் விவசாயி !
மனிதன்
உலகின் இரண்டாம் விவசாயி.

*

மனிதனுக்கு
கடவுள் தந்த முதல் வேலை
விவசாயம் !

நிலத்தைப் பண்படுத்து !
என்பதே இறைவன் கொடுத்த வேலை
அவனோ
படைப்பைப் பண்படுத்தாமல்
படைத்தவனைப் புண்படுத்தினான்.

ஏதேன் எனும்
மண்ணக சொர்க்கம் விடைபெற்றது
இனி
மண்ணை சொர்க்கமாக்கு
வியர்வையை விலையாக்கு
என
அனுப்பி வைத்தார் ஆண்டவர் !

முதல் விவசாயி
களமிறங்கினான் !
நிலமிறங்கினான்

*

விவசாயி
இறைவன் எனும் முதலாளியின்
முதல் ஊழியன் !

விவசாயம்
மனிதன் எனும் படைப்பாளியின்
முதல் ஊழியம்!

விவசாயம்
ஆதி மனிதனின்
நீதித் தொழில் !

மண்ணின் மைந்தனின்
வியர்வைத் தொழில் !

விழுந்த மனிதன்
உழுத தொழில் !

விவசாயம்
இறைவனால் எழுதப்பட்ட பணி !

விவசாயம்
மனிதனின் முதல் அப்பாயின்ட்மென்ட் லெட்டர் !

இன்று ??

*

இன்று
விவசாயம்,

தற்கொலையின் திறவுகோல் !
பட்டினியில் படுக்கை !
துயரத்தின் இருக்கை !
கண்ணீரின் அருவி !

பயிர்களின் வேர்களில்
புதைபடுகிறான் விவசாயி !

நீரற்ற பூமியில்
வேரற்ற நிலங்களில்
சோறற்ற வயிறுடன்
வதைபடுகிறான் விவசாயி !

வெடித்த வயலின்
வறண்ட நாக்குகளில்
அவனது
உயிரின் கடைசிச் சொட்டும்
உலரத் துவங்குகிறது !

நீர் வற்றிய
ஆறுகளில் அவனது கனவின்
முதல் சுவடும்
களவாடப்பட்டு விட்டது !

ஆறுகள்
நீரைத் தொலைத்தன !
நீரற்ற ஆறுகள்
தம்மையே தொலைத்து விட்டன.

சுயநலச் சுருக்குப் பைகள்
மணலை அகழ்ந்தன !
தன்னல மனங்கள்
ஆக்கிரமித்து நகைத்தன !
விழுகின்ற மழையும்
தங்க இடமின்றி
அழுதழுது அலைந்து திரிகிறது !

இன்று விவசாயம்
நிச்சயத் தோல்வியின்
நிதர்சன வெற்றி !

*

இறைவன்
நீரையும் நிலத்தையும் பிரித்தார் !
மனிதன்
நீரை நிலத்தினில் ஒளித்தான் !

கர்நாடக எல்லையில்
தண்ணீருக்குக் காவல்
தமிழக எல்லையில்
கண்ணீருடன் காவல் !

இறைவன் மழையை
பொதுவாய்ப் பொழிந்தார் !
மனிதன்
பொதுவை தனியே பிரித்தான்

இறைவன் வளங்களை
பொதுவாய் வைத்தார்
மனிதன்
வளங்களை களவில் வைத்தான்.

கடலுக்கு அனுப்ப
அனுமதிக்கும் நீர் கூட
தமிழனின்
உடலுக்கு அனுப்ப
அனுமதிக்கவில்லை மனிதன் !

அணைகளில் துயிலும் நீரை,
மனிதனின்
துணைக்கு அனுப்ப
துளியும் விரும்பவில்லை
சுயநல மனிதன் !

பலருக்கு
தண்ணீர் என்பது
அரசியல் சதுரங்கம் !

விவசாயிக்கோ
தண்ணீர் என்பது
இசையின் மிருதங்கம் !

நீரற்ற நிலம்
இசையற்ற கருவியாய்
சலனமற்றுக் கிடக்கிறது !

இறைவன்
படைத்தான் !
மனிதன்
உடைத்தான் !

*

எப்போது விழிப்பாய் தமிழா !
எப்போது விழிப்பாய் மனிதா !

புலம் பெயர்ந்தவன் கூட
புலன் பெயரவில்லை

நீ
நிலம் பெயராமல் இருக்கிறாய்
ஆனால்
நிஜம் உணராமல் இருக்கிறாயே !

வரப்புயர நீருயரும்
பொய்யாகிறதே !
இங்கே வரப்புகள் மட்டும் தானே
உயர்கின்றன !

வளங்கள் அழிகையில்
தலைமுறை அழியும்!
நிலங்கள் அழிகையில்
நிலவாழ்வு அழியும் !

முகசாயம் அழிகையில்
நாடகம் முடியும் !
விவசாயம் அழிகையில்
தேசம் அழியும் !

நிலத்தில் காங்கிரீட் நட்டோம்
மழை விடைபெற்றது !

நிலத்தில் முட்களை நட்டோம்
வளம் விடைபெற்றது !

நிலத்தை கவனிக்காமல் விட்டோம்
உறவு விடைபெற்றது !

இன்று
நிலங்கள் அனாதைகளாகிவிட்டன.
அதன் தொப்புள் கொடிகளுக்கு
நீரில்லை !

ஒளிச்சேர்க்கைக்கு
வழியில்லாமல்
இலைகளெல்லாம் தலையிழந்தன.
மரங்களெல்லாம் களையிழந்தன.

எப்போது விழிப்பாய் தமிழா !
எப்போது விழிப்பாய் மனிதா !

*

ஒன்று படுவோம் !

பூமி என்பது
தன்னலத் தாழ்பாழ்களில்
சிரச்சேதம்
செய்யபடுவதற்கானதல்ல !

பூமி என்பது
வெறுப்புகளின் விதைகளினால்
உயிர்சேதம்
செய்வதற்கானதல்ல !

நீரின்றி அமையாது
நிலம் !
பயிரின்றி அமையாது
உயிர் !

இணையம்
தகவலைத் தரலாம்
வலைத்தளம்
கலைகளைத் தரலாம் !
அரிசியை எங்கே
டவுன்லோட் செய்வது ?
தண்ணீரை எங்கே
தரவிறக்கம் செய்வது ?

ஒன்றுபடுவோம் !

வேர்கள்
நீரில் வித்தியாசம் பார்ப்பதில்லை !
மனிதர்கள் ஏன் பார்க்கவேண்டும் ?

தமிழகப் பசிக்கும்
கர்நாடகப் பட்டினிக்கும்
வித்தியாசம் இல்லை
பகிர்தலில் எதற்கு பதட்டம் ?

ஒன்றுபடுவோம் !

எங்கே விழுந்தாலும்
மழை ஈரமாகவே விழுகிறது !
எங்கே இருந்தாலும்
மனம் ஈரமாகவே இருக்கட்டும் !

நிலம் உலர்வது
மனிதம் உலர்வதின் அடையாளம் !
நிலம் செழிப்பது
மனிதம் செழிப்பதன் உத்தரவாதம் !

ஒன்றுபடுவோம்
உணர்வுகளால் ஒன்றுபடுவோம் !
அரசியல்
நில
இன எல்லைகள் களைவோம் !

மனிதம் என்பது
நமக்குள் இருப்பது
பிறரின் வார்த்தைகளால்
அதை கொல்லாமல் இருப்போம் !

விவசாயம்
வாழவேண்டும் !
விவசாயி
ஆள வேண்டும் !

அப்போது தான் பூமி சிரிக்கும்
சோகம் மரிக்கும் !

விவசாயம்
வாழவேண்டும் !
விவசாயி
ஆள வேண்டும் !

அப்போது தான் பூமி சிரிக்கும்
சோகம் மரிக்கும் !

Advertisements

தொலைந்து போன ஒருவன்..

Image result for mask manஉங்களால்
புறக்கணிக்கப் படுவேனோ
எனும்
பயம் எனக்கு.

அதனால் தான்
என்
வெள்ளைச்சிறகுகளுக்கு
உள்ளே இருக்கும்
கழுகுக் கால்களை
காட்ட மறுக்கிறேன்.

எனக்குள் வலி வருமோ
எனும் கிலியில் தான்,
என்
நிஜத்தின் நிழலைக் கூட
உங்கள்
விழி விழா தேசத்தில் தான்
விழ வைத்துக்
கொண்டிருக்கிறேன்.

புன்னகைப் பனிக்கட்டிகளை
என்னிரு உதடுகள்
ஏந்திப் பிடித்திருந்தாலும்,
சில
எரிமலைச் சிந்தனைகள்
உள்ளே எரிந்துகொண்டு தான்
இருக்கின்றன !

எப்போதேனும் காட்டவேண்டும்
என்
உண்மை முகத்தை,
போலித்தனமில்லா
ஓர்
நண்பனிடமாவது !.

அதற்கு முன்
தேட வேண்டும் !
எத்தனை முகமூடிகளுக்குப் பின்
என் முகம்
முடங்கிக் கிடக்கிறதென்று !.

தேடல்கள்

Image result for man walking rainy night

எப்போதுமே
ஊட்டப்பட்டு ஊட்டப்பட்டு
தேடல்கள் இல்லாமல் தேய்ந்துவிட்டது
என் மனம்.

என்னுடைய பலங்கள்
அப்பாவின் அடையாள அட்டையால்,
என்னுடைய கல்வி
எதிர்கால வேலை வெளிச்சத்தால்,
என்று,
என் வேர்வைக் துளிக்குள்
நான்
செத்ததறியாமல்
சிரித்துக் கிடந்திருக்கிறேன்.

என்னுடைய காதல் கூட
மாடியின் நீள அகலங்களுக்காய்
நிராகரிக்கப்பட்டது.
பின்,
அம்மாவின் அந்தஸ்தில் எனக்கொரு
பெண் பரிசளிக்கப்பட்டாள்.

என்னுடைய மதம்
பிறந்தபோதே என் பெயரோடு
ஆறாவது விரலாய்
இணைந்தே பிறந்தது.

என் தேடல்களின் வாசல்கள்
திருடப்பட்டுவிட்டதால்,
இன்னும் என் நெஞ்சின் நிலவறைகள்
இருட்டு தின்றபடியே இருக்கின்றன.

என் பிறப்பைப் போலவே
என் தேடலில்லாமலேயே
தொடர்கின்றது என் வாழ்க்கை.

இன்னும் எனக்கு,
என் தேடலில்லாமலேயே தரப்படும்
ஏதோ ஓர் பலிபீடத்தில்,
ஓரு மரணம்

 

தாழ் திறவாய்…

 

Image result for man walking rainy night

 

உண்மை சுடும்.
உண்மை தான்.

நம் கழுத்துக்குக் கீழ்
கத்தி வைக்கப் படும் வரை
ஆயுதம்
மிக அழகானதாய்த் தெரியும்.

துப்பாக்கி முனை
நம்
தொண்டைக் குழிக்குள்
திணிக்கப்படும் வரை
நிலமையின் வீரியம் புரிவதில்லை.

நம் தலைக்குக்
குறிவைக்கப்படும் வரை
காதுகள்
கேட்பவை எல்லாம்
தலைப்புச் செய்திகள் தான்.

தோல்வி,
ஏமாற்றங்கள்,
எதிர் வீட்டைத் தட்டும்போதெல்லாம்
கதவைத் தாழிடுவதை
நிறுத்திக் கொள்வோம்.

நாளை ஒருவேளை
சுண்டுவிரல் நம்மை நோக்கியும்
சூண்டப்படலாம்.

வானம்

Image result for rainy night village

கருப்புக் கொடி பிடித்து
வானம்
கண்ணீ­ர் வடித்துத்
துடித்துக் கொண்டிருந்தது.

சோகத்தின்
தற்கொலை முனையிலிருந்து
குதித்துக் குதித்துச்
செத்துக் கொண்டிருந்தன
மேக வீட்டு மழைக் குழந்தைகள்.

அரவங்களும்
அரவமில்லாமல் இருந்த
அந்த இரவுப் பொழுது,
முகமற்ற நிழல்களோடு
முனகிக் கிடந்தது.

நட்சத்திர ஓட்டைகளையும்
இறக்கி வைத்த
இமை இருட்டு
இறுக்கிக் கட்டியிருந்தது.

எதன் மீதோ கொண்ட
கோபத்தின் நீர் வடிவமாய்,

யார் மீதோ கொண்ட
மோகத்தின் சத்த முத்தமாய்,

வானம்
நிறுத்தாமல் கத்திக் கொண்டிக்க,
வழக்கமாய் வழியும்
ஓநாய் குரல்களும்
ஓலைக்கிடையே ஒதுங்கி விட்டன.

நிலாச்சோறுக்கு வழியில்லாமல்
தாழ்ப்பாளுக்குள்
தரை நனைய
குடிசைக் குழந்தைகள்
தாயின் புடவைக்குள் நடுங்கின.

முறங்களும், பாய்களும்
தற்காப்புக்கு தகாததானதால்
துடுப்பில்லாமல் ஓடிய
குடிசைப் படகுகளின் பயணிகள்
காங்கிரீட் வானத்துக்காய்
கூடங்கள் தேடி ஓடும் இரவு.

அதிகாரிகளால் நிராகரிக்கப்பட்ட
நதிகளின் நரம்புகளுக்குள்
இரவு முழுவதும்
இரத்தப் பாசனம்.

விடியலை நோக்கி
விடாமல் ஓடிக்கொண்டிருக்கிறது
முரட்டு மழை.

நாளை விடியும் போது,
புதிய வானம்
புதிய பூமியை நோக்கி
கண் சிமிட்டிச் சிரிக்கும்.

எங்கள் கரங்கள் மட்டும்
கருணை மனுக்களோடும்,
கண்­ர் விழிகளோடும்
நிவாரண நிதிப் படிக்கட்டுகளில்
நிர்வாணமாய் நிற்கும்.

 

வெளியேறும் தருணம்.

Image result for man walking rainy night

சாவு
சமத்துவமானது.

எல்லைகளில்லா தேசங்கள்
சொந்தமானவனுக்கும்,
பின்
தேசங்களில்லா எல்லையில்
இளைப்பாறும் நிலை.

பூக்களாகட்டும்,
செடிகளாகட்டும்
வாடிப்போனால் விறகுதான்.
பிறகு வாழ்க்கை,
ஒரே
உலையில் தான்.

ஆட்டம் முடிந்தபின்
žட்டுக் கட்டின்
விலை ஏழு ரூபாய் தான்.

ஆடும் வரை தான்
மதிப்பு,
விழுந்த பின் கேசத்தை
மிதிப்பது தானே மரபு.

பச்சையம் பிரிந்தபின்
இலைகளுக்குள்
ஏது பேதம் ?
மொழிகளும், ஜாதிகளும்
கடலில் விழுந்த
உப்புப் பரலாய்
விரவிக் கரைவது இங்கு தானே.

அத்தனை நாடுகளும்
பிறப்புமுதல் போதிக்கும்
சமத்துவத்தை,
ஏனோ தெரியவில்லை
வெளியேறும் போது தான்
பெற்றுக் கொள்கின்றன.

செத்தவனுக்கு வந்து சேரும்
சர்வதேச
விருது போல.

 

தொடரும் பிரிவுகள்

Image result for seperation

 

உறவுச் சுவரில்
உயிர் ஒட்டிய நாளிலிருந்தே
பிரிவுப் பிசாசின்
கோரப்பற்களில்
ஈரம் மாறா இரத்தத் துளிகள்.

இரு உடல்
ஓருயிராய் பிணைந்து,
ஓருடல்
ஈருயிராய் தாய்மை அணிந்து,
பின்னொரு பொழுதில்
தொப்புள் கொடியின்
நெருக்கம் விட்டபோது
துவங்கிய பிரிவு.

பள்ளிக்கூட
ஆரம்ப நட்பு.
ஆற்றங்கரையில் ஒதுங்கிய
சிறு வயதுச் சங்கதிகள்,
பதின் பருவத்தில்
பயிரான
முகப்பருப் கனவுகள்.

அத்தனை
கானகக் குவியலிலும்
பிரிவைச் சந்திக்காத
பச்சைக் கிளை
ஒன்றையேனும்
பார்க்க இயலவில்லை.

பிரிவுகளில் பின்னால்
ஓடி ஓடி
கால் வலித்த காதல்கள்,

கடல்களைக் கடந்து
கட்டி வைக்கும்
மணல் கோபுரக் கரன்சிகள்,

தாய் நாட்டில்
ஓர் ஓட்டு வீட்டுக்குள்
ஒதுங்கிக் கிடக்கும்
தாய்ப்பாசக் கவலைகள்.

சட்டென்று முடிவடையும்
ஒற்றையடிப்பாதையின்
குறுக்குச் சுவர்
மரணங்கள் !

தற்கால ஓய்வுகளாகவும்,
நிரந்தரச் சாய்வுகளாகவும்,
பிரிவுக்கு முன்னாலும்
பின்னாலும்
பிரியாமல் தொடர்பவை
பிரிவுகளே.

பிரிவுகளைப்
பிரியவேண்டுமென்று
மனங்கள் பிரியப்படும்.

ஆனால்,
நிஜத்தின் பாதங்களோ,
அந்த பிரியத்தின்
சந்திப்பிலும்
ஒரு பிரிவைச் சந்திக்கும்.
மன்னிக்க முடியாத இரவு

நலமா

Image result for friends talking

 

நலமா,
எனும் விசாரிப்புகள் தொடரும்.
செவிப்பறைகள்
பதில் வருமுன் பூட்டிக் கொள்ளும்.

உன்னைப் பார்த்ததில்
மனசு மகிழ்கிறது
எனும்போதும்,
கண்கள்
தூக்கக் கலக்கத்தில் விழிக்கும்.

மிச்சமிருப்பதெல்லாம்
சொற்களுக்கும்
பற்களுக்குமான உறவு.

இமைகள் கூட
கண்களை தனிமைச் சிறைக்குள்
தள்ளும் கதவு தான்.

கடிகாரக் கட்டளைகளும்
அதிகார மூச்சிரைப்புகளும்
விரட்டிக் கொன்று விட்டன
சில
வெளிவராத வெளிச்சங்களை.

இன்னும்
எங்கள் விசாரிப்புகள் தொடரும்,
உள்ளீடில்லா வார்த்தைகளோடும்
ஊமையான
செவிகளோடும்.

 

வலிகள்….

Image result for man walking rainy night

 

உன்னிடம் கொஞ்சம்
பேசவேண்டும்.

உன்
அன்றாட அலைச்சல்கள்
நான் அறிகிறேன்.

தண்­ர் இல்லாக்
குளியலறைச் சிக்கல்.

படிக்கட்டும் மிச்சமில்லா
பயண மிரட்டல்கள்,

முகத்துக்கு மூன்றடுக்கு
சாயம் பூசும்
சாலைப் புழுதிகள்,

சூரியனை விட
அதிகமாய்ச் சுடும்
ஆட்டோக் கட்டணங்கள்,

மௌனத்தை
சிலுவையில் அறையும்
சத்த ஆணிகள்,

அங்கீகரிக்காமல் அமுக்கப்படும்
அப்பழுக்கற்ற
திறமைகள்,

பொருளாதாரத்
தோலுரிக்கும்
விலைவாசிப் பாம்புகள்,

எல்லாம்.. எல்லாம்
உன்னை நோக்கிப்
பாயும்
கண்கொத்திப் பாம்புகளே.

இத்தனை கழுகுகள்
உன்னைச் சுற்றிப் பறந்தாலும்,
நீ
உன்
நிதானச் சிறகுகளை மட்டும்
முறித்துப் போடாதே.

ஒரு
புன்னகையில் பூமியை
ஏற்றுக் கொள்.

அதற்கு முன்
உன்
இதயத்துக்குச் சொல்லிவை.

வழியில் செல்லும் வலிகளை
வலிய வாங்கி வைக்கும்
சோக வங்கி
ஆகவேண்டாமென்று.

நேரம்

Image result for fantasy clock

நேரத்தின் முகத்திற்கு
ஓராயிரம் முகங்கள்,

மெல்லிய பூவை
சில்லென வருடி
மயங்கிக் கிடக்கும் வேளையில்
அது
அசுர வேகத்தில் பாயும்.

எதிர்பார்ப்பை
எதிர்கொள்ளும் காலம்
எதிர்துருவத்தில் அமர்ந்து
நகர மறுத்து
நகைக்கும்.

இதய இரைச்சல்
அடங்கும் போதெல்லாம்
சின்ன நடையில்
காயப் படுத்தாமல்
கடந்து செல்லும்.

முகம் கண்டால் மட்டும்
புன்னகைக்கும்
மனிதர் குணமோ,
தனியே இருந்தால்
தூங்கித் தொலைக்கும்
சோம்பேறித் தலைசுற்றல்களோ
அதன்
சுற்றல்களில் இருப்பதில்லை.

அத்தனை முகங்கள்
சூடினாலும்,
என்றும் பிரமிப்பது
இயல்பிலிருந்து மாறாத
அதன் இயல்பே.

இயல்பில் இருப்போருக்கே
‘நேரம்’
வரும் போலிருக்கிறது.