Vetrimani : இன்னும் ஒரு கால் நூற்றாண்டு கடக்கட்டும்…..

Image result for 2050

ஒவ்வொரு கால்நூற்றாண்டும் நமக்கு முன்னால் ஏகப்பட்ட மாற்றங்களை உருவாக்கித் தந்து கொண்டே இருக்கிறது. இன்றைய நவீன தொழில்நுட்பம் நாளுக்கு நாள் ஏதோ ஒரு புதுமையை அறிமுகம் செய்து கொண்டே இருக்கிறது. “ஆஹா என்ன புதுமை இது” என வியந்து முடிப்பதற்குள் அந்த புதுமை பழையதாகி நம்மை நோக்கிப் பல்லிளிக்கிறது.

முன்பெல்லாம் மிகப்பெரிய மாற்றம் என்பது ஒரு நூற்றாண்டுக்கு ஒரு முறை நிகழும் சமாச்சாரமாய் இருந்தது. இப்போதோ அது சில ஆண்டுகளின் இடைவெளியிலேயே நிகழ்கிறது. போன ஆண்டு வாங்கிய ஸ்மார்ட்போன் இன்றைக்கு அருங்காட்சியக பொம்மை போல மாறிவிடுகிறது. ஆர்டிபிஷியல் இண்டலிஜென்ஸ், ஆகுமெண்டட் ரியாலிட்டி, மெஷின்லேர்னிங் போன்றவற்றின் கலவை இன்று மனிதர்களின் இடத்தை இயந்திரங்களுக்கு விற்றுக்கொண்டிருக்கிறது.

இப்போது மனிதர்களிடையே இயந்திரங்கள் இயங்கிக் கொண்டிருக்கின்றன. இன்னும் இருபத்து ஐந்து ஆண்டுகளில் இயந்திரங்களின் இடையே மனிதர்கள் வாழ்ந்து கொண்டிருப்பார்கள். வீடுகளிலுள்ள பெரும்பாலான வேலைகளை இயந்திரங்களே செய்யும். மனிதர்களின் சோம்பல் அதிகரிக்கும், அதற்கேற்ப நோய்களும் மனிதர்களின் வாசல்களில் இறக்குமதியாகிக் கொண்டே இருக்கும்.

கொஞ்சம் ஆதிகாலத்துக்குப் போய்ப் பார்ப்போம். மனிதன் விலங்குகளோடும், இயற்கையோடும் இரண்டறக் கலந்து வாழ்ந்தான். பின்னர் கொடிய விலங்குகளை விலக்கி விட்டு, வீட்டு விலங்குகளோடு வாழ ஆரம்பித்தான். விலங்குகள் வாழ்வின் பாகமாயின. பின்னர் கொஞ்சம் கொஞ்சமாக அந்த விலங்குகளை விட்டு விட்டு இயற்கையோடு வாழ ஆரம்பித்தான்.

பின் இயற்கையையும் கொஞ்சம் கொஞ்சமாய் விலக்கி விட்டு செயற்கையில் இன்பம் காண ஆரம்பித்தான். இயற்கையும், விலங்குகளும் விலகிச் செல்ல செயற்கை மெல்ல மெல்ல மனிதனை கபளீகரம் செய்ய ஆரம்பித்தது. இப்போது, செயற்கையின் மயக்கத்தில் அவன் செல்லரித்துக் கொண்டிருக்கிறான். அவனது கரங்களில் வாழ்க்கை, அவசரத்தைத் திணித்து விட்டு நிதானமாய்ச் சிரிக்கிறது.

இன்னும் இருபத்தைந்து ஆண்டுகளில் என்னென்ன நடக்கும் என்பதை கணிப்பதே கடினமாக இருக்கிறது. தொழில்நுட்பத்திலும், அறிவியலிலும் வியப்பின் கதைகளை அடுக்கி வைத்தாலும் வாழ்க்கை கொண்டு வரப்போகிற சில விஷயங்களை நினைத்தால் மனதில் கவலை கூடாரமடித்துக் கொள்கிறது.

கூட்டுக் குடும்பங்கள் தனித்தனி குழுக்களாக வாழ்ந்து வரும் இன்றைய சூழல் இனியும் பலவீனமடையும். தனித்தனிக் குடும்பமே ஒற்றுமையாய் வாழாத சூழல் உருவாகும். வீடுகளில் இருக்கும் ஒரு சில நபர்களையும், தொழில்நுட்பம் கண்ணுக்குத் தெரியாத சீனப் பெருஞ்சுவர்களால் பிரித்து வைக்கும். எங்கே தொடுதலும், அணைத்தலும் இல்லாத உறவுகள் வாழ்கிறதோ அங்கே அன்பும் அன்னியோன்யமும் விலகி, செயற்கைச் சாத்தான் செயர் போட்டு அமர்வான். வருடங்கள் செல்லச் செல்ல குடும்பங்களின் இறுக்கமான இழை பிரிந்து எளிதில் உடையும் நிலையில் அவை நிலைபெறும்.

அன்புக்காகவும், உறவுக்காகவும், ஆறுதலுக்காகவும் தோள்களையும், ஆள்களையும் தேடிய காலம் தேய்ந்து விடும். இன்பத்துக்காகவும், இளைப்பாறவும் இயந்திரங்களைத் தேடும் காலம் நிச்சயம் உருவாகும். அப்போது கண்ணியமான காதலை, கணினி இயந்திரங்கள் இடமாற்றம் செய்யும். ஸ்பரிசத்தின் கவிதையை டிஜிடலின் மென்பொருள்கள் அழித்துச் சிரிக்கும். உறவுகளின் இனிமையை முழுமையாத் தொலைத்த ஒரு தலைமுறை முளைத்தெழும்பும்.

திருமணங்கள் ஆயிரம்கால பந்தங்கள் எனும் நிலை அழிந்தொழிய, அவை பழங்கால சித்தாந்தத்தின் மிச்சங்கள் எனும் கருத்துருவாக்கம் உருவாகும். முடிச்சுகளால் முடங்காத வாழ்க்கையையே மனித மனம் தேடும். அவை கலாச்சாரத்தின் கட்டளைகளையும், வயதுகளின் வரம்புகளையும் கலைத்தெறியும். விட்டுக்கொடுத்தல் எனும் வார்த்தை அகராதியிலிருந்து விலகி விட, விட்டு விலகுதல் என்பதே வெகு சகஜமாய் மாறும்.

“முன்பெல்லாம் ஐம்பது ஆண்டுகள் தம்பதியர் சேர்ந்தே வாழ்ந்தார்களாம்” என வியப்பாய் இளசுகள் பேசித் திரியும். இணைந்து வாழ்கின்ற குடும்பங்கள் அழிந்து வருகின்ற உயிரினங்கள் போல எங்கேனும் ஒன்றிரண்டு அவமானக் குரல்களிடையே அடக்கமாய் வாழ்ந்து முடிக்கும்.

ஆற்றங்கரையில், மாமர நிழலில் ஆர அமர நாவல் வாசித்த இனிமைத் தருணங்களெல்லாம் முழுவதும் விடைபெற்றோட, நாலு வரி நாவல்கள், ரெண்டு வரி கதைகள் என எழுத்துகளெல்லாம் இறுக்கமாகும். ஓடும் ரயிலில் தோன்றி மறையும் காட்சிகள் போல இலக்கியத்தின் சுவை இதயத்தில் நுழையாமல் வெளியேறிச் செல்லும்.

நட்புகள் பெரும்பாலும் டிஜிடல் வசமாகும். வார இறுதிகளில் சந்தித்து, குட்டிச் சுவரில் கதைகள் பேசும் எதிர்காலங்கள் இல்லாமலேயே போகும். கான்ஃபரன்ஸ் போட்டு டிரீட் கொண்டாடும் புதுமைகளே அரங்கேறும். பல இடங்களில் இருந்தாலும் டிஜிடலில் விர்ச்சுவலாய் ஒரே இடத்தில் கலந்து சிரிக்கும் சந்திப்பு தளங்கள் உருவாகும்.

“முன்பெல்லாம் திரைப்படங்களைத் திரையிட தியேட்டர்கள் இருந்துச்சாம் தெரியுமா ?” என எதிர்காலம் பேசிக்கொள்ளும். நினைத்த இடங்களில் படங்களைத் திரையிட்டு ரசிக்கும் விர்ச்சுவல் விழிகள் உருவாகும். விழிகளுக்கு நேரடியாகவே படங்கள் தரவிறக்கம் செய்யப்படும். இமைத்தலைக் கொண்டு எதுவும் செய்யலாம் எனும் புது தொழில்நுட்பம் உருவாகும்.

மனிதர்கள் நடமாடும் இயந்திரங்களாகவே இருப்பார்கள். அவர்களுடைய கண் அசைவுகளும் கவனிக்கப்படும். அவர்களுக்கென எந்த சுதந்திரமும் இருக்காது. அவர்கள் மூச்சு விடுகின்ற எண்ணிக்கையையும் சட்டெனச் சொல்லும் டிஜிடல் சிலந்தி வலை எங்கும் வியாபித்திருக்கும். எல்லாமே ஆட்டோமெடிக் பாதையில் பயணிக்கும். தானாகவே முளைத்து வளரும் தானியங்களைப் போல, தானாகவே ஓடும் ஆட்டோமெடிக் கார்களைப் போல, எல்லாமே தானியங்கியாய் மாறும்.

வர்த்தகமும், பணமும் டிஜிடலின் கைகளில் தஞ்சம் புகும். எதையும் கையில் பார்க்க முடியாத சூழல் உருவாகும். இருப்பதாய்த் தோற்றமளிக்கும் மாயக் கரன்சிகளில் உலகம் புரண்டு படுக்கும். சர்வதேச நிறுவனங்கள் நினைத்தால் யாரை வேண்டுமானாலும் கண நேரத்தில் ஏழையாக்கவோ, கண நேரத்தில் செல்வந்தனாக்கவோ முடியும் எனும் சூழல் உருவாகும்.

நம் வாழ்க்கை நம் கையில் என்பது நகைச்சுவையாய்த் தோன்றும். நம் வாழ்க்கை நம் கையைத் தவிர எல்லாருடைய கைகளிலும் தவித்து வாழும். ஏதோ ஒரு ஏகாதிபத்யச் சிந்தனையின் பகடைக்காய்களாக மானிட வர்க்கம் மாறும். யாருடைய அடையாளத்தையும் முழுமையாய் அழிக்கவும், யாரை வேண்டுமானாலும் புகழில் ஏற்றவும், யாரை வேண்டுமானாலும் புழுதியில் அழுத்தவும் டிஜிடல் தீர்வுகள் மிக எளிதாகும்.

ஆடைகள் என்பவை அவமானம் மறைக்க எனும் சிந்தனை மறையும். ஆடை என்பது அங்கத்தின் விளம்பரப் பலகை எனும் புதிய சிந்தனை வலுப்பெறும். அழகை அங்கீகரிக்கவும், அதை அடையாளப்படுத்தவும், அதை பகிரங்கப்படுத்தவும் ஆடைகள் பயன்படும். எதுவுமே நீண்டகாலத் திட்டங்களாய் இருக்காது. வேகத்தின் விளைநிலங்களாகவே அனைத்தும் மின்னி மறையும்.

நாவினால் பேசிக்கொள்வதை மறந்து போகும் தலைமுறை உருவாகும். விரல்களாலும், சென்சார்களாலும், அசைவுகளாலும் தகவல்களைப் பரிமாறிக் கொள்ளும் புதிய வழிமுறை வியாபிக்கும்.

நின்று நிதானித்து வாழ்க்கையை ரசிப்பவர்களை, அறிவிலிகள் என உலகம் பேசும். கால ஓட்டமெனும் காட்டாற்றில் கட்டையுடன் கட்டிப் புரண்டு சுழல்பவர்களை அகிலம் பாராட்டும். எல்லாம் தலைகீழாய் மாறிய ஒரு புதிய உலகம் சமைக்கப்படும்.

அந்த கால மாற்றத்தின் கடைசிப் படிக்கட்டில் நின்று கொண்டு ஒரு கூட்டம், கடந்த தலைமுறையின் அனுபவங்களை விதைக்கப் போராடும்.

மனிதத்தை விட்டு விடாதீர்கள்,அதுவே வாழ்வின் மகத்துவம் என அவர்கள் கூக்குரலிடுவார்கள். உறவுகளை விட்டு விடாதீர்கள் அன்பின்றி அமையாது உலகு என அவர்கள் போதிப்பார்கள். கடந்த தலைமுறையின் புனிதத்தைப் புதைத்து விடாதீர்கள் என அவர்கள் பதட்டத்துடன் பேசுவார்கள்.

அவர்களைக் கவனிக்கவும் நேரமின்றி, அடுத்த காலாண்டை நோக்கி ஓடிக்கொண்டிருக்கும் வாழும் தலைமுறை !

*

சேவியர்

தன்னம்பிக்கை : திடீர் பணக்காரன் ! 

திடீர் பணக்காரன் ! 

Image result for bank theft

மனதில் கொஞ்சம் தில். கையில் ஒரு துப்பாக்கி. முகத்தை மறைக்க ஒரு கர்ச்சீப். இது போதும் இலட்சாதிபதியாக ! நல்ல மத்தியான நேரமாகப் பார்த்து ஒரு வங்கியில் புக வேண்டியது, வேலை செய்து கொண்டிருக்கும் அப்பாவிப் பணியாளனின் நெற்றியில் துப்பாக்கியை வைக்க வேண்டியது, பணத்தை அள்ளிக் கொண்டு அலேக்காகப் பறக்க வேண்டியது !

திடீர்ப் பணக்காரர் ஆக வேண்டும் எனும் ஆவல் உந்தித் தள்ளும் போது என்னவெல்லாம் நடக்கிறது பாருங்கள் ! விளைவு என்ன என்பதை நான் சொல்லத் தேவையில்லை. அப்படி சுருட்டிய பணம் அவர்களுக்கு எவ்வளவு தூரம் உதவியது என்பதும் நாம் அறிந்ததே !

படிப்படியாய் வாழ்க்கையில் முன்னேறும் வழிகளெல்லாம் பலருக்கும் அலர்ஜியாகிவிட்டது. “ஓவர் நைட் பணக்காரர் ஆக வேண்டும்என்பது அவர்களின் தாரக மந்திரம். அதற்கு கிடைக்கும் வழி லீகலோ, இல்லீகலோ பரவாயில்லை என்பது தான் பதறவைக்கும் உண்மை.

பல்லில்லாத பாட்டியின் காதில் கிடக்கும் பாம்படத்தை அறுப்பதுமுதல், கன கம்பீரமாக இருக்கும் ஏடிஎம் பெட்டியையே தூக்கிச் செல்வது வரை எல்லாமே ஒரே இலட்சியத்தை நோக்கியது தான். “விடிஞ்சா நான் பணக்காரனாகி இருக்கணும் !” !

ஒரு காலத்தில் திடீர்ப் பணக்கார மோகம் உடையவர்கள் லாட்டரிகளை வாங்கிக் குவித்துக் கொண்டிருந்தார்கள். அவர்கள் லாட்டரியுடன் காத்திருந்து காத்திருந்து கடைசியில் சோற்றுக்கே லாட்டரி அடிக்கும் நிலைமைக்கு வந்தார்கள். அப்புறம் சுரண்டல் லாட்டரி வந்தது. சுரண்டிச் சுரண்டி சுண்டு விரல் துண்டானது தான் மிச்சம் ! 

வீட்டில் கொஞ்ச நேரம் டிவி பார்க்க உட்கார்ந்தால் என்ன கிடைக்கிறது மனைவியின் அர்ச்சனையைத் தவிர ? ஊடகங்கள் உருவாக்கி வைத்திருக்கும் அதி பயங்கரமான மாயை ! ஒரு மாய உலகம். ஒரு வகையில் கிராபிக்ஸ் கொண்டு உருவாக்கிய சர்வ சக்தி பொருந்திய சுவர்க்கத்தின் மினியேச்சர்!

அங்கே அட்டகாசமான ஒரு கார் அப்பழுக்கற்ற சாலையில் ஓடுகிறது ! அரை இலட்சம் ரூபாயை எட்டிப் பிடிக்கும் மொபைலுடன் ஒய்யார அழகி தோள் சாய்கிறாள். அரைச் சுவர் அளவு தொலைக்காட்சியில் ஹாக்கி பார்க்கிறார் பாப் கான் கொறிக்கும் பணக்கார மனுஷன். விளம்பரங்களும், சினிமாக்களும் இளைஞர்களின் இளகிய மனதுக்குள் கண்ணி வெடியை வைக்கும் பணியை கட்சிதமாய் செய்து விடுகின்றன.

மாதச் சம்பளத்தில் வீட்டு வாடகை கட்டி, வாயைக் கட்டி வயித்தைக் கட்டி, இல்லாத கரண்டுக்கு பில் கட்டி, போன் பில் கட்டி வாழும் வாழ்க்கையில் இதெல்லாம் சாத்தியமில்லை என நினைக்கிறார்கள் இளைஞர்கள். ஆசைக்கும், நேர்மைக்கும் இடையேயான போராட்டம் உக்கிரமடைகிறது.

பக்குவமான இளைஞர்கள் வெற்றிக்காக நேரான பாதையை தேர்ந்தெடுக்கிறார்கள். அந்த துறையில் கவனம் செலுத்துகிறார்கள். புதுமையாய் என்னென்ன செய்யலாம் என யோசிக்கிறார்கள். வெற்றிகளை அடைகிறார்கள். அந்த வெற்றி ஒரு வருடத்தில் வந்தாலும் சரி, பத்து வருடங்களில் வந்தாலும் சரி. அது அவர்களிடம் தங்குகிறது. மனதை உற்சாகமூட்டுகிறது.

சிலரோ நேர்மையின் மதில் சுவரை எட்டித் தாவி விடுகிறார்கள். அவர்கள் மனித மதிப்பீடுகளை உடைத்து கொள்ளை, வழிப்பறி, ஏமாற்று என தவறான வழியில் செல்கிறார்கள். அதற்கு இடைஞ்சல்கள் வரும்போது கொலை வரைக்கும் போய் விடுகிறார்கள். தவறுகளை சிந்திக்கும் மனிதர்களிடமிருந்து தவறுகளே முளைக்கின்றன. அத்தி மரத்தில் அத்திப் பழங்களே விளையும் என்பதல்லவா விதி !

பணக்காரர்கள் ஆகவேண்டும் எனும் ஆசையை நான் விமர்சிக்கவில்லை. ஆனால் அந்த ஆசையை மட்டும் வைத்துக் கொண்டு வலைகளில் விழுந்து விடுவது தான் ஆபத்தானது ! எப்படியாவது பணக்காரர்கள் ஆக வேண்டும் எனும் உங்களுடைய ஆசையே சிலருடைய முதலீடு தெரியுமா ?

இன்று ஆயிரம் ரூபாய் கட்டுங்கள் அடுத்த வருஷம் ஒரு இலட்சம் ரூபாய் உங்கள் கையில் இருக்கும்  எனும் கோஷங்களுக்கு இன்றைக்கும் வலிமை உண்டு ! அதுஆஸ்திரேலியாவில் திராட்சைத் தோட்டம், அன்டார்டிக்காவில் தேக்குத் தோட்டம்என்றெல்லாம் சர்வதேச முகம் காட்டுவதும் உண்டு. அதை நம்பி பணத்தைக் கட்டி விட்டு கையைப் பிசைந்து நிற்பவர்கள் எக்கச்சக்கம் !

நைஜீரியன் மெயில்ஏமாற்று வேலை இதில் உலகப் பிரசித்தம். மின்னஞ்சல் திறந்தால் உங்களுக்கு ஒரு மெயில் வந்திருக்கும். “அதிர்ஷ்டப் பிரபுவே, உங்களுக்காக நைஜீரியன் வங்கியில் ஆயிரம் கோடி ரூபாய்கள் காத்திருக்கின்றன. அதை சொந்தமாக்கிக் கொள்ள வெறும் ஐந்து இலட்சம் ரூபாய்களை மட்டும் உடனே கட்டுங்கள்என கடிதம் விரியும். 

ஆயிரம் கோடியா என வாயைப் பிளந்து சைலன்டாகப் போய் பணத்தைக் கட்டி ஏமாந்து போகும் மக்கள் ஏராளம். சமீபத்தில் நமது நாட்டில் கூட ஒருவர் பணத்தைக் கட்டி கண்ணைக் கசக்கிய நிகழ்வு நடந்தது.

என்னோட அக்கவுண்டில் இருக்கும் பணத்தை நான் எடுக்க முடியாது, டிரான்ஸ்பர் தான் செய்ய முடியும். அதற்கு ஒரு நைஜீரியன் அக்கவுண்ட் வேணும்.” அல்லதுஎல்லாம் தங்கமாக இருக்கிறது அதை பணமா மாற்ற கொஞ்சம் முன்பணம் வேண்டும்”, “அல்லது உங்களுக்கு ஒரு கார் பரிசு விழுந்திருக்கிறது, இந்தியாவுக்கு அனுப்ப பேக்கிங் சார்ஜ் அனுப்புங்கோஇப்படி ஏதோ ஒரு விதத்தில் மெயில் வரும். 

சிரித்துக் கொண்டே டிலீட் பட்டனை அமுக்குவது மட்டுமே நீங்கள் செய்ய வேண்டிய ஒரே வேலை. கொஞ்சம் ஏமாந்துமுயற்சி செய்து பார்ப்போமேஎன பணத்தைக் கட்டினால் உங்கள் பணம் காலி. அது உங்களுக்கு திரும்ப வரப் போவதில்லை என எல்லா சாமிகளையும் அடித்து சத்தியம் செய்து விடலாம். 

மத்திய ஐரோப்பாவிலுள்ள ஜெரி பெஸுவஸ்கி எனும் 72 வயது முதியவருக்கும் இப்படி அபத்தம் நேர்ந்தது. அவர் கட்டியது ஆறு இலட்சம் டாலர்கள் ! சுமார் மூன்று கோடி ரூபாய்கள். சம்பாதித்ததையெல்லாம் கட்டி விட்டு கூரையைப் பிய்த்துக் கொண்டு பணம் கொட்டும் என காத்திருந்தார். ஒன்றும் கொட்டவில்லை. பதறி அடித்துக் கொண்டு பெருகுவேயில் இருந்த நைஜீரியன் தூதரகத்துக்கு ஓடினார். 

அவர்களிடம் பேசியபோது தான் இப்படி ஒரு ஏமாற்று வேலை நடந்திருப்பதை அவர் அறிந்தார். அதிர்ச்சியின் உச்சத்துக்கே போன அவர் கையிலிருந்த துப்பாக்கியால் சுட அருகிருந்த அதிகாரி மைக்கேல் அந்த இடத்திலேயே பலியானார் ! தடுக்க வந்தவர்களுக்கும் காயம் ஏற்பட்டது ! திடீர் பணக்காரர் ஆக வேண்டுமென விரும்பியவர் கடைசியில் குற்றவாளியானார் !

வெளிநாட்டிலிருந்து செக் வருகிறது, அப்படியே ஒரு மில்லியன் டாலர் மதிப்புள்ள பாண்ட் பேப்பர் வருகிறது என்றெல்லாம் வரும் மோசடிகள் இந்த வகை தான். ரகசியக் குரலில் உங்களுடைய கதவைத் தட்டும் எதையுமே, “சாரிகெளம்புங்க காத்து வரட்டும்..” என விரட்டியடித்தால் நீங்கள் தப்புவீர்கள். 

என் கையில இரிடியம் இருக்கு. அதை வாங்க ஜெர்மனியிலிருந்து ஒருத்தன் வரான். அதோட மொத்த மதிப்பு இரண்டு இலட்சம் கோடி ரூபாய். அதை டெஸ்ட் பண்ண முதல்ல ஒருத்தன் வருவான். இரிடியத்தை நெல்லுக்கு பக்கத்துல வெச்சா நெல்லை அது இழுத்து எடுக்கும். தீக்கு பக்கத்துல வெச்சா தீ வளையும்இப்படியெல்லாம் கதை சொல்லிக் கொண்டு மோசடி நடத்தும் பலருடைய வழக்குகள் காவல் துறையிடம் உண்டு. 

மின்னல் தாக்கினால் செம்பு இரிடியம் ஆகிவிடும்என இவர்கள் ஷாக் சயின்ஸ் பேசுவார்கள் ! இதையெல்லாம் நம்பிக் கொண்டு மின்னல் தாக்கிய செம்பு குடத்துக்காக வெட்டிக் கொண்ட ஆட்களும் உண்டு. மின்னல் தாக்கட்டும் என வீட்டிலிருக்கும் செம்பு பாத்திரங்களையெல்லாம் மாடியில் விரித்து வைக்கும் அப்பாவிகளும் உண்டு. பணம் பிடுங்கும் ஏமாற்று வேலையன்றி இதில் வேறு ஒன்றும் கிடையாது !

கிரடிட் கார்ட்களை போலியாய் தயாரித்து .டி.எம் களில் பணம் திருடுவதாகட்டும், வங்கியின் பக்கத்தைப் போலியாய் தயாரித்து தகவல் திருடுவதாகட்டும் எல்லாமே திடீர் பணக்காரர்களாக விரும்புபவர்களின் தில்லு முல்லுகளே. 

உஷாராய் இருக்க வேண்டியதும், இத்தகைய வேலைகளில் ஈடுபடாமல் இருக்க வேண்டியதும் அவசியம்.

முன்பணமாக நீங்கள் பணம் கட்டுங்கள். உங்களை மஹாலட்சுமி வந்து சந்திப்பாள் என சத்தியம் செய்யும் சர்வ சங்கதிகளும் ஏமாற்று வேலைகள் தான். எஸ்கேப் ஆகிவிடுங்கள். 

வழக்கத்துக்கு மீறிய சலுகைகள், பயன்கள், லாபம் இதெல்லாம் எச்சரிக்கை மணியை அடிக்கும் விஷயங்கள். உங்களை பணக்காரர் ஆக்குவதே இலட்சியம் என யாரும் நேர்ச்சை செய்திருக்க வாய்ப்பில்லை.  

இணையத்தில் பத்து மடங்கு கவனம் அவசியம். உங்கள் வங்கிக் கணக்கைப் பார்க்கும் போது கூட கவனம் வேண்டும். “உடனே பணம் கொடுஎன அவசரப் படுத்தும் எதையும் சீண்டவே சீண்டாதீர்கள். உதவிகள், நிவாரணங்கள் கொடுப்பதைக் கூட நேரில் கொடுக்கவே முயலுங்கள். நெட்டில் கெட்டவர்கள் உலவ வாய்ப்பு அதிகம் ! வெளிநாட்டில் வேலை எனும் அழைப்புகளை அதீத கவனத்துடன் அணுகுங்கள். தேவைப்பட்டால் அனுபவஸ்தர்கள், காவல்துறை போன்றவர்களின் உதவியை நாடத் தயங்காதீர்கள்.

உழைப்பை நம்புங்கள். திருட்டுத் தனமாய் முன்னேறியவர்களை எக்காரணம் கொண்டும் முன்னுதாரணமாய்க் கொள்ளாதீர்கள். அது உங்கள் தந்தையாகவே இருந்தாலும் தள்ளியே வையுங்கள்.  

வெற்றியை நோக்கி மனதில் நம்பிக்கையும், உற்சாகமும் கொண்டு ஓடுபவர்களை வெற்றி நிச்சயம் சந்திக்கும். பில்கேட்ஸ் கூட ஹார்வேர்ட் பல்கலைக்கழகத்திலிருந்து வெளியேறி, முதல் வேலையான டிராஃப் டேட்டா வில் தோற்று பின்னர் தான் மைக்ரோசாஃட் மன்னனானார். அவர் வெற்றியை நோக்கி இலட்சியங்களுடன் ஓடியவர் !

நாலு வயசு வரை பேச்சு வராமல், ஏழு வயசு வரை எழுதத் தெரியாமல், ஆசிரியர்களும் பெற்றோரும் அரை லூசு என கருதியவர் தான் ஐன்ஸ்டீன். நேராக ஓடிய அவருக்கு நோபல் பரிசு கிடைத்தது !

குறுக்குப் பாதையில் ஓடுபவர்களுக்குக் கிடைக்கும் வெற்றி தளிர் இலைகளைப் போன்றது. விரைவிலேயே காய்ந்து விடும். நேரான பாதையில் ஓடுபவர்களுடைய வெற்றியோ உயர் மலைகளைப் போன்றது ! அது வரலாறுகளின் முகப்புப் பக்கத்தில் கர்வத்துடன் இடம் பெறும் !

குறுக்கு வழி விலக்கு

நேர்மையே நம் இலக்கு !

தன்னம்பிக்கை : நிபந்தனையற்ற அன்பு

நிபந்தனையற்ற அன்பு

Image result for love the handicapped

ரோஸ் பிறக்கும் போதே மாபெரும் குறைபாடுடன் பிறந்தாள். அவளுடைய கால்கள் இரண்டும் செயலிழந்து போன நிலையில் இருந்தன. அவளுக்கு இரண்டு வயதானபோது மருத்துவர்களின் ஆலோசனைப் படி இரண்டு கால்களையும் வெட்டியெடுத்தார்கள். அதன்பின் இடுப்பு வரை மட்டுமே உள்ள அரை மனுஷியானாள் ரோஸ்.

பட்ட காலிலே படும் என்பது போல பட்டுப் போன காலுடன் பிறந்தவளுடைய சகோதரன் மன நலம் பாதிக்கப் பட்டவன். தந்தை அல்சீமர் நோயாளி ! வாழ்க்கை தனக்கு முன்னால் வெறுமையின் சாலையாய் நீண்டிருப்பதைக் கண்டார் ரோஸ். எல்லோரையும் போல இயல்பான வாழ்க்கை வாழ முடியவில்லையே எனும் அழுத்தம் மனதை அழ வைத்தது. 

1997ம் ஆண்டு ரோஸ் ஆட்டோமொபைல் கடை ஒன்றில் பணியாற்றிக் கொண்டிருந்த டேவ் எனும் ஒரு இளைஞனைச் சந்தித்தாள். எல்லோரும் அவளை பரிதாபமாய்ப் பார்த்துக் கொண்டிருந்தபோது டேவ் அவளை சாதாரணமான ஒரு பெண்ணாகப் பார்த்தான். அவளிடம் பரிதாபமாய்ப் பேசாமல் நகைச்சுவையாய்ப் பேசினான். அவளுடைய மனம் மயங்கியது ! ஆனால் கால்கள் இல்லாத பெண்ணைத் திருமணம் செய்வானா? எனும் கேள்வி அவளுடைய நாட்களை பதட்டத்துடன் நகர்த்தியது.

ஆனால் டேவ் அவள்மீது நிபந்தனைகள் ஏதுமற்ற அன்பை வைத்திருந்தார். எதையும் எதிர்பார்க்காத அன்பு அது. 1999ம் ஆண்டு டேவ் ரோசியைத் திருமணம் செய்தார். ரோசியின் மனம் நெகிழ்ந்தது. ரோசிக்கு ஒரு மனநலம் பாதித்த சகோதரன் உண்டு என்பதும், அவருடைய தந்தை நோயாளி என்பதும் டேவின் காதலைக் குறைக்கவில்லை.

கால்கள் இல்லாத ஒரு பெண் குழந்தை பெற முடியுமா எனும் மருத்துவ சிக்கல்களையும் மீறி, இரண்டு குழந்தைகளுக்குத் தாயானார் ரோஸ். அவருடைய கணவர் இன்றும் அமெரிக்காவின் கடைகளுக்கு ஷாப்பிங் செல்லும் போது, தவறாமல் அவரை அழைத்துச் செல்கிறார். மனைவியை முதுகில் சுமந்து சுற்றி வருகிறார். பூங்காக்களில் குழந்தைகளுடன் விளையாடுகிறார். அந்தப் பூங்காவின் மரங்கள் கூட அந்த அன்பின் செயல்களில் புன்னகை பூக்கின்றன ! 

நிபந்தனைகளற்ற அன்பு மிகவும் கடினமானது. அது எந்தவிதமான எதிர்பார்ப்புகளுக்கும் அப்பாற்பட்ட நிலையில் முளைக்கும். அப்படிப்பட்ட அன்பு நிலவுகின்ற குடும்ப வாழ்க்கை மிகவும் அற்புதமானது.

அத்தகைய அன்பு மிகவும் அபூர்வமாகிவிட்டது. பொருளாதாரத்தை அடிப்படையாகக் கொண்டு தான் பெரும்பாலானவர்களின் அன்பு நிர்ணயிக்கப் படுகிறது. “பணம் கிடைத்தால் பாசம். பணம் இல்லாத இடத்தில் அன்பாவது, நட்பாவது” என்பதே பலருடைய சிந்தனையாக இருக்கிறது.

நிபந்தனையற்ற அன்பின் உதாரணமாய் தாயன்பைச் சொல்வார்கள். ஆனால் முழுக்க முழுக்க அப்படிச் சொல்லமுடியுமா என்பதை ‘உசிலம்பட்டி” நிகழ்வுகள் சந்தேகிக்க வைக்கின்றன. 

“ஆம்பள பிள்ளைன்னா வரவு, பொம்பள புள்ளைன்னா செலவு”  என கிராமத்தில் பேசுவதுண்டு. ஒரு குழந்தை பிறந்தால் ஆணா பொண்ணா என்று கேட்பதற்குப் பதிலாக “வரவா, செலவா ?” என்று கேட்பார்கள். ஆண் குழந்தையெனில் ரொம்ப சந்தோசம் என்பார்கள். பெண் குழந்தையெனில் “ஆணோ, பெண்ணோ ஆயுசோட இருக்கட்டும்” என ஒரு மழுப்பல் வாழ்த்துடன் நகர்ந்து விடுவார்கள்.

ஒரு தாய்க்கு தொடர்ந்து பெண்குழந்தைகள் பிறந்தால் அவளுக்கு அவமானப் பேச்சுகள் கணக்கில்லாமல் வரும். “நாலாவது பொம்பளைன்னா நடைக்கல்லையும் பேக்கும்” என்றெல்லாம் கிழவிகள் துக்கம் விசாரிப்பார்கள்.

“எதிர்காலத்தில் தங்களுக்குச் சாப்பாடு போட வேண்டும்” எனும் எதிர்பார்ப்புடன் குழந்தைகளைப் பெற்று வளர்த்துவது கூட ஒருவகையில் எதிர்பார்ப்புடைய அன்பே ! 

எந்தக் குழந்தையாய் இருந்தாலும் சரி, எப்படி இருந்தாலும் சரி என அரவணைத்து வளர்க்கும் பெற்றோர்கள் நிபந்தனையற்ற அன்பின் உதாரணங்கள்.

என்ன தான் தப்புகள் செய்தாலும் மனுக்குலத்தின் மீது அன்பு செலுத்தும் கடவுள் நிபந்தனையற்ற அன்பின் நிரந்தர உதாரணம் !

“நீ இதைச் செய்தால், உன்னை அன்பு செய்வேன்” எனும் அன்பும் நட்பும் உண்மையில் எதிர்பார்ப்புகளின் பாதையில் தான் நடை போடுகின்றன.

தனது குழந்தை மனநலம் பாதித்தவனாய் பிறந்தான் என்பதற்காக நடு வீதியில் விட்டுச் சென்ற பெற்றோரின் கதைகள் உண்டு. அமெரிக்காவில் ஒரு தந்தை தனது குழந்தையை வெளிநாட்டுக்குக் கொண்டு சென்று அங்கேயே விட்டு விட்டு வந்த நிகழ்வு பத்திரிகைகளில் அதிர்ச்சியாய் அலசப்பட்டன.

கேரளாவின் சமீபத்தில் ஒரு நிகழ்வு. மகன் வெளிநாட்டில் இருக்கிறான். அன்னை கேரளாவில் இருக்கிறார். நீண்ட நாட்களுக்குப் பிறகு ஊருக்கு வருவதாய் சொல்கிறான் மகன். அன்னையின் உள்ளம் குதிக்கிறது. ஆனந்தக் கூத்தாடினாள் தாய். ஊருக்கு வந்த மகன் அன்னையையும் அமெரிக்காவுக்கு அழைத்துச் செல்வதாய்க் கூற அவளுடைய ஆனந்தம் இரண்டு மடங்காகிவிட்டது.

மகன் வந்தான். மகிழ்வின் உச்சாணிக் கொம்பில் இருந்தாள் அன்னை. அமெரிக்கா செல்வதற்கான எல்லா ஏற்பாடுகளும் நடந்து கொண்டிருந்தன. அன்னை எதையும் பாக்கி வைக்காமல் எல்லா சொத்துகளையும் விற்று மகனிடம் கொடுத்தாள். 

அமெரிக்கா செல்லும் நாளும் வந்தது. அம்மாவையும் அழைத்துக் கொண்டு விமான நிலையம் சென்றான் மகன். அங்கே ஒரு இருக்கையில் அம்மாவை அமர வைத்து விட்டு எங்கோ சென்றான். பின் அவன் திரும்பி வரவேயில்லை.

விசாரித்தபோது தான் தெரிந்தது. அம்மாவின் சொத்துகளைப் பிடுங்க மகன் திட்டமிட்டு அரங்கேற்றிய நாடகம். தாயை அங்கேயே விட்டு விட்டு விமானம் ஏறி அவன் சென்றது பல மணி நேரங்களுக்குப் பின்பு தான் தெரியவந்தது. அமெரிக்கா செல்ல பாஸ்போர்ட் வேண்டும் என்பது கூட அறியாத ஒரு அப்பாவி அம்மாவை விமான நிலையத்தில் குப்பையைப் போல வீசிவிட்டுச் சென்ற மகன் அன்பு வற்றிப் போன மனதின் உதாரணம்.

நிபந்தனையற்ற அன்பு நிலவும் இடங்கள், பூமியின் சுவர்க்கங்கள் என்பதில் கொஞ்சமும் சந்தேகம் இல்லை. அப்படிப்பட்ட ஒரு சூழலுக்காக உங்கள் மனதையும், செயல்களையும் பக்குவப் படுத்தினால் விண்ணகம் மண்ணகத்தில் வந்தமரும்.

நீங்கள் ஒரு செயலைச் செய்யும் போது அந்தச் செயல் உங்களை எப்படி பாதிக்கும் என்பதை மனதுக்குள் நினைத்துப் பாருங்கள். அந்தச் செயலில் ஏதோ எதிர்பார்ப்பு ஒளிந்திருக்கிறதா என்பதை அலசுங்கள். 

“அவனுக்கு நான் எவ்வளவோ செய்திருக்கேன், அவன் எனக்காக ஒரு நயா பைசா செலவு செஞ்சிருப்பானா ?” எனும் உள் மன புலம்பல்கள் இருந்தால் உங்கள் அன்பு எதிர்பார்ப்புடன் செயல்படுகிறது என்பதைப் புரிந்து கொள்ளுங்கள்.

எதையும் பதிலுக்குத் தர இயலாத மனிதர்களிடம் அன்பு செலுத்தும் போது அந்த அன்பு வலிமையாகிறது. அப்போதும் “நான் ரொம்ப நல்லவாக்கும் எனும் சிந்தனையைத் தலையில் தூக்கி விடாதீர்கள் !”. 

நிபந்தனையற்ற அன்பு என்பது உங்கள் குழந்தைக்கு கேட்டதையெல்லாம் வாங்கித் தருவதல்ல. அல்லது தோல்வி என்றால் என்ன என்பதையே அறியாதபடி அவனை வளர்த்துவதுமல்ல. குழந்தைகளை நல்வழிப்படுத்துவதும், அரவணைப்பதும், தண்டிப்பதும் பெற்றோரின் கடமை. அதே நேரத்தில் “இப்படி இருந்தால் தான் நீ அன்பு செய்யப்படுவாய்” எனும் பிம்பத்தையும் உருவாக்காதீர்கள். அது ஒரு தப்பான முன்னுதாரணத்தைக் குழந்தைக்குக் கற்றுக் கொடுக்கும்.

 “இப்படித் தான் இருக்க வேண்டும்” எனும் எதிர்பார்ப்புடன் ஒரு நபரை அணுகும் போது நமது செயல்களும் ஒரு அட்டவணைக்குள் விழுந்து விடுகின்றன. ஒவ்வொருவரையும் அவருடைய இயல்போடே அணுகுவது தான் இயல்பான அன்புக்கு உத்தரவாதம் தரும். 

ஒவ்வொரு சூழலிலும் “இந்த நபருக்கு என்னால் செய்ய முடிந்த அதிக பட்ச அன்பான செயல் என்ன ?” என்பதை நினைத்துப் பாருங்கள். அதன் விளைவுகளோ, பலன்களோ உங்கள் மனதில் எழாமல் இருக்கட்டும். அப்போது உங்கள் அன்பு புனிதமடையும்.

நிபந்தனையற்ற அன்பு உங்களுக்குத் தெரிந்த நபர்கள் எனும் எல்லைக்கு வெளியே உங்களை அழைத்துச் செல்லும். ஏதோ ஒரு வழிப்போக்கருக்கோ, ஏதோ ஒரு ஆதரவு இல்லத்துக்கோ நீங்கள் கொடுக்கும் அன்பு பெரும்பாலும் எதிர்பார்ப்புகளுக்கு அப்பாற்பட்டதாகவே இருக்கும். 

“உள்ளங்கையில் இருக்கும் தண்ணீரைப் போன்றது அன்பு. விரிந்த நிலையில் உங்கள் கை இருக்கும் வரை தண்ணீர் கையிலேயே தங்கும். அதைப் பொத்திக் கொள்ள ஆசைப்பட்டால், விரல்களுக்கிடையே வழிந்து வெளியேறும்.” என்கிறார் சுவாமி விவேகானந்தர்.

சட்டங்களுக்குள்ளும், விதிமுறைகளுக்குள்ளும் நிலவும் அன்பு நிச்சயமாக நிபந்தனையற்ற அன்பல்ல. அது ஒரு கணித சூத்திரம் போல. சரியான மதிப்புகளைப் போட்டால் விடை கிடைக்கும். நிபந்தனையற்ற அன்பு என்பது அப்படியல்ல. அது நல்லோர் மேலும் தீயோர் மேலும் பெய்யெனப் பெய்யும் மழையைப் போன்றது !  

நிபந்தனையற்ற அன்பு வழங்க மிக மிக முக்கியமான தேவை ஈகோவை விரட்டுதல். ஈகோ நிலவும் இடத்தில் அன்பின் காற்று மூச்சுத் திணறும். ஈகோவை விரட்டிப் பாருங்கள் இதமான அன்பு எதிர்பார்ப்பின்று உலவத் துவங்கும்.

ஈகோவுடன் சேர்ந்து கர்வத்தையும் கூட கழற்றி வைத்தீர்களெனில் எதிர்பார்ப்புகளற்ற அன்பு மிக எளிதாய் உங்களுக்குக் கைவரும்.

ஒரு வயதான தம்பதியர் இருந்தனர். மனைவிக்கு நோய். யாரையும் அடையாளம் கண்டு கொள்ள முடியாத அல்சீமர் எனும் நோய். தாத்தா தினமும் காலையில் வருவார். மனைவியுடன் அமர்ந்து காலை உணவு அருந்துவார். நிறைய பேசுவார். மனைவியுடன் நிறைய நேரம் செலவிடுவார். ஆனால் அவர் யார் என்பதே மனைவிக்குத் தெரியாது. காரணம் அல்சீமர் நோய் !

எத்தனை மழையாய் இருந்தாலும், எத்தனை வெயிலாய் இருந்தாலும் என்ன பிரச்சினை வந்தாலும் மனைவியைப் பார்க்க அவர் வராமல் இருந்ததே இல்லை !

தினமும் இதைக் கவனித்து வந்த டாக்டர் ஒரு நாள் கேட்டார். “இந்த தள்ளாத வயசுல நீங்க வரணுமா ? நீங்க யாருன்னே உங்க மனைவிக்குத் தெரியாதே ?”

அவர் சொன்னார் “அவளுக்கு என்னைத் தெரியாமல் இருக்கலாம். ஆனால் எனக்கு அவளைத் தெரியும். அவளை அன்பு செய்யாமல் என்னால் இருக்க முடியாது !”

டாக்டரின் கண்களின் கண்ணீர். நிபந்தனையற்ற அன்பு இப்படி இருக்க வேண்டும். எதையுமே எதிர்பார்க்காமல் உள்ளிருந்து ஊற்றாய் பெருகும் அன்பு. 

அன்பு கிடைக்குமிடத்தில் அன்பு செய்வது சாதாரண அன்பு ! அன்பு கிடைக்காத இடத்திலும் அன்பு செய்வது புனிதமான அன்பு !! வெறுப்பைத் தருபவர்களைக் கூட அன்பு செய்வது தெய்வீகமான அன்பு !

நிபந்தனையின்றி அன்பு செய்

அன்பினாலே அவனி செய் !

தன்னம்பிக்கை : இந்தத் தடைகளைத் தாண்டுங்கள் !

இந்தத் தடைகளைத் தாண்டுங்கள் !

Image result for internet addiction

நதியைக் கவனித்திருக்கிறீர்களா ? சமதளத்தில் மென்மையாக ஓடிக் கொண்டிருக்கும். பாறைகளின் இடையே ஓடும் போது சலசலவென தாவி ஓடும். அருவியில் வருகையில் உடைந்து வீழும். ஆனால் விழுந்த இடத்திலேயே காலொடிந்து கிடப்பதில்லை. ஆக்ரோஷம் கூட்டி இன்னும் அதிக வேகமாய் ஓடும் ! 

தடைகள் இல்லாத பயணமே கிடையாது. தடைகளைத் தாண்டி ஓட வேண்டும். ஐயையோ தடை வந்துவிட்டதே என உடைந்து போய் உட்கார்ந்தால் வெற்றி கிடைக்காது ! தடைகள் வரும்போது, வேகம் குறையலாம், அல்லது தாமதம் நேரலாம். ஆனால் முறியடித்து முன்னேறுவதில் தான் சாதனைகள் அடங்கியிருக்கின்றன !  

இன்றைய இளைஞர்களின் முன்னே நிற்கும் முக்கியமான சிக்கல்களாக இவற்றைச் சொல்லலாம். 

போதை ! இன்று, நேற்றல்ல, எப்போதுமே ஒரு இளைஞனின் வெற்றியை வெட்டிப் போட போதைப் பழக்கம் மட்டுமே போதும். நிகோடினை நுரையீரலுக்கு நேரடியாய் இறக்கி வைக்கும் புகை அதில் முக்கியமான ஒன்று ! பள்ளிக்கூடப் படி தாண்டும் முன்பே பலருக்கும் புகை பழகிவிடுகிறது !  

உலகில் எங்கே என்ன தடை செய்யப்பட்டாலும் அது நம்ம ஊரில் கிடைக்கிறது. இன்றைக்கு இளைஞர்களுக்கு போதை வஸ்துகள் எப்படி கிடைக்கின்றன என இங்கிலாட்ந்தில் ஒரு ஆய்வு நடத்தினார்கள். “நெட்ல எல்லா மேட்டரும் இருக்குஎன 64% இளைஞர்கள் பதில் சொன்னார்கள் !

தீபாவளி போன்ற விழா நாட்களில் டாஸ்மாக் விற்பனை மிரள வைக்கிறதா இல்லையா ?. போதைப் பொருட்களால் உடலுக்கு தீமை என 91% இளைஞர்கள் ஒத்துக் கொள்கின்றனர். ஆனால் அதை விட்டு விலகுவதில்லை.

புற்று நோய், மன அழுத்தம், சிறுநீரகப் பாதிப்பு, மூளை பாதிப்பு, நரம்பு பாதிப்பு என வரிசையாய் அத்தனை நோய்களையும் தந்து செல்லும் போதையைத் தாண்டுவது இளைஞர்கள் செய்ய வேண்டிய முதல் தடை தாண்டல் !

இணைய அடிமைத்தனம் ! உங்களுக்கு ஒரு அடிமை இருக்கிறார் என்று வைத்துக் கொள்ளுங்கள். நீங்கள் என்ன சொன்னாலும் செய்வான். மாடியிலிருந்து குதிக்கச் சொன்னால் கூட குதிப்பான். எஜமானனை மீறி அவன் எதுவும் செய்ய மாட்டான். அவனுக்கு எல்லாமே எஜமானன் தான்.

இப்போது இணைய அடிமைத்தனத்துக்கு வருவோம். சிலருக்கு எல்லாமே இணையம் தான். குறிப்பாக இணையத்தில் பாலியல் சார்ந்த கிளர்ச்சிகளைத் தேடி அலையும் இளைஞர்கள் அந்த வலைக்கு முழு அடிமையாகி விடுகிறார்கள். போதைக்கு அடிமையாவது போல இணையத்துக்கு அடிமையாவதும் ஒரு மிகப்பெரிய பலவீனமே !

இணைய அடிமைகள் அடிமையாகும் இடங்கள் என்னென்ன தெரியுமா ? பாலியல், விளையாட்டு, சமூக வலைத்தளம், வலைப்பூக்கள், மின்னஞ்சல், சேட்டிங், ஷாப்பிங் இவையெல்லாம் தான் !

மருத்துவம் இதை இன்டர்நெட் அடிக்‌ஷன் டிஸார்டர் ( IAD ) என்கிறது. இணையம் எனும் அற்புதமான ஊடகம் சரியாகப் பயன்படுத்தினால் பாற்கடல். அதற்கு அடிமையாகிவிட்டாலோ அதுவே விஷமாகி மாறிவிடும் விஷயம் அது !

இளைஞர்கள் இன்றைக்குத் தாண்ட வேண்டிய இன்னொரு தடை இந்த இணைய அடிமைத்தனம்

வன்முறை சிந்தனை ! வீரத்தையும், சண்டித்தனத்தையும் போட்டுக் குழப்பிக் கொள்ளும் இளைஞர்களிடம் தேவையற்ற வன்முறை சிந்தனை மேலோங்கி இருக்கிறது.  

ஒரு காலத்தில் அமெரிக்கா போன்ற மேலை நாடுகளில் மட்டும் தான் பள்ளி, கல்லூரிகளில் வன்முறை வெறியாட்டம் நடக்கும். இன்று நமது தெருக்களிலும் நடக்கின்றன. அமெரிக்காவில் கல்வி நிலையங்களில் கடந்த பத்து ஆண்டுகளில் நடந்த துப்பாக்கிச் சூடுகள் மட்டும் 147. மொத்த எண்ணிக்கை 359 என்கிறது ஒரு புள்ளி விவரம்.

ஆசிரியையை கத்தியால் குத்திக் கொல்கிறான் மாணவன், ஆசிரியர் அடித்ததால் மாணவனுடைய கை செயலிழந்து விட்டதாய் வேளச்சேரி வீதிப் போராட்டம் நடத்துகிறது. ஆசிரியர் அடித்ததால் மாணவனின் காது கேட்கவில்லை என இன்னோர் மாநிலத்தில் குரல் எழுகிறது.

சமீபத்தில் கள்ளக்குறிச்சி பள்ளி மாணவர்கள் செய்த நிகழ்வு நெகிழ வைத்தது. 50 ஆண்டுகளுக்குப் பின் தங்கள் ஆசிரியர்களையெல்லாம் வரிசையாய் நிற்க வைத்து அவர்கள் காலில் சாஷ்டாங்கமாய் விழுந்தார்கள். பழைய ஆசிரியர்மாணவர் உறவு இப்படி இருந்தது. ஆசிரியர்களிடம் மாணவர்களை பெற்றோர் முழுமையாய் ஒப்படைத்தார்கள். ஆசிரியர்களை தெய்வங்களாய் மதிக்குமளவுக்கு அவர்களுடைய வழிகாட்டல் இருந்தது.

இப்போது எல்லாம் மாறிவிட்டது. ஆசிரியர்களை பாடங்கள் சொல்லித் தரும் பணியாளர்களாய் தான் பெற்றோர் பார்க்கின்றனர். பெரும்பாலான ஆசிரியர்களும் இதை  மாத ஊதியம் தரும் ஒரு வேலையாகத் தான் பார்க்கிறார்கள். மாணவர்களின் மனதில் வன்முறை எண்ணங்கள் பெருக நல்வழிப்படுத்தாத ஆசிரியர்கள் ஒரு காரணம். ஆசிரியர்களுக்கு அந்த உரிமையைக் கொடுக்காத பெற்றோர் இன்னொரு காரணம்.

போதாக்குறைக்கு தொலைக்காட்சிகள், திரைப்படங்கள், போன்றவை வன்முறையையும், அதன் நுணுக்கங்களையும் சொல்லித் தந்து விடுகின்றன. தார்மீகக் கோபம் கொண்டு சமூக அவலங்களுக்கு எதிராகப் போராட வேண்டியது இளைஞனின் பணி. மற்றபடி தேவையற்ற வன்முறை சிந்தனை இளைஞர்கள் தாண்ட வேண்டிய இன்னொரு தடை !

உடல் நலம் பேணாமை ! மேலைநாட்டு பிரச்சினையாய் இருந்தஒபிசிடிஎனும் அதிக உடல் பருமன் இன்றைக்கு வீட்டுக்கு வீடு ! காரணம் ஆரோக்கியமற்ற வாழ்க்கை மற்றும் உணவு முறை ! 

பழைய வாழ்க்கை இளைஞர்களை நடக்க வைத்தது. அவர்கள் உடல் உழைப்பை செலுத்தினார்கள். ஓய்வு நேரத்தில் நீச்சலடித்தார்கள், ஓடியாடி விளையாடினார்கள். உடல் கட்டுக் கோப்பாய் இருந்தது. 

இன்றைக்கு ஒரு கிலோ மீட்டர் தூரத்தில் இருக்கும் அலுவலகத்துக்கே காரோ, பைக்கோ தேவைப்படுகிறது. முதலாவது மாடிக்கு மூச்சிரைக்காமல் போக லிஃப்ட் தேவைப்படுகிறது. ஓய்வு நேரத்தில் ஆடாமல் அசையாமல் தொலைக்காட்சி ! இன்னும் நேரம் கிடைத்தால் வீடியோ கேம், அல்லது இன்டர்நெட்.

இப்படி, உடலானது பராமரிப்பில்லாத ஒரு கூடாரம் போல சிதிலமடைந்துக் கிடக்கிறது. பல இளைஞர்கள் பெயரளவில் இளைஞர்கள், உடலளவில் முதியவர்கள் என்பது தான் உண்மை ! இளைஞர்கள் தாண்ட வேண்டிய இன்னொரு தடை இது !

நாகரீகமின்மை ! மருத்துவ மனை வாசலில் டாக்டருக்காய் கவலையுடன் காத்திருக்கும் இடைவெளியில் ஒலிக்கிறது ஒரு இளைஞனின் தொலைபேசி. “ஒய் திஸ் கொல வெறி கொல வெறி கொல வெறி டி..”. மருத்துவமனையில் பல்வேறு கவலைகளுடனும், துயரங்களுடனும் காத்திருக்கும் மக்களுக்கு எரிச்சலை உருவாக்குகிறது அது ! இளைஞனோ எதையும் கண்டு கொள்ளவில்லை, ஆமை வேகத்தில் தொலை பேசுகிறான் ! 

மருத்துவமனை, நூலகம், தொழுகை கூடங்கள் இவற்றிலெல்லாம் அமைதியைக் கடைபிடிக்க வேண்டும் என்பது அடிப்படை நாகரீகம் ! 

பொது இடத்தில் அமைதியைக் கடை பிடிப்பது. பண்புடன் நடந்து கொள்வது. பெரியவர்களிடம் அன்புடன் நடந்து கொள்வது. சமூகக் கடமையோடு இருப்பது என இளைஞர்கள் கற்க வேண்டிய விஷயங்கள் நிறைய உண்டு.

இந்தக் காலத்துப் பசங்க நாகரீகம் இல்லாதவங்க….” எனும் குற்றச்சாட்டைத் தாண்ட ஒரு  கட்டாயத் தாவல் அவசியம். 

தவறான முன்னுதாரணங்கள் !ஒரு முன்னுதாரணத்தைப் போல நம்மைப் பாதிப்பது எதுவும் இல்லைஎன்கிறார் ஃபிரஞ்ச் மேதை பிரான்கோயிஸ்.  

பண்டைய காலத்தில் குருகுலத்தில் குருவை முன்னுதாரணமாய்க் கொண்டு அறிவிலும் ஞானத்திலும் வளர்ந்தார்கள் நமது தமிழ் இளைஞர்கள். இன்றைக்கு அவர்களுக்கு முன்னுதாரணமாக இருப்பவர்கள் பெரும்பாலும் திரை வசீகரங்களோ, விளையாட்டு வீரர்களோ, அல்லது பணக்கார தலைவர்களோ தான். 

அதிலென்ன தப்பு என்று கேட்பவர்கள் உண்டு. வெற்றியாளர்களின் வாழ்க்கையை அலசி, நல்ல அம்சங்களை எடுத்தால் பாராட்டலாம். ஆனால் பெரும்பாலும் நாம் அவர்களுடைய புகழ் பாடும் சுவரொட்டிகளாக மாறி விடுகிறோம்.

ஒரு நல்ல முன்னுதாரணத்தையும், ஒரு நல்ல வழிகாட்டியையும் கொண்டிருப்பது வெற்றிக் கதவை தொட்டுத் திறக்க அவசியத் தேவை !

தவறான முன்னுதாரணங்களைத் தாண்டி ஓட வேண்டியது இளைஞர்கள் செய்ய வேண்டிய அடுத்த தாவல் !

உறவுகளோடான சிக்கல்கள் :பிரண்ட் என் கூட பேச மாட்டேங்கறாநான் தற்கொலை செய்து கொள்கிறேன்என்று எழுதி வைத்து விட்டு பதின் வயது மாணவி தற்கொலை செய்து கொள்கிறாள். “விடுதியில் மாணவர்கள் கிண்டலடிக்கிறார்கள்என்று சொல்லி விடுதி மாணவன் தூக்கில் தொங்குகிறான். காதலி மறுத்தாள் என அவள் வீட்டு முன்னால் உயிரை மாய்க்கிறான் காதலன்.

இளைஞர்கள் உறவு ரீதியான சிக்கல்களை எதிர்கொள்ளும் பக்குவம் இல்லாமல் இருக்கிறார்களோ என அச்சமாக இருக்கிறது. தனது சாவின் மூலம் இன்னொருவருக்குப் பாடம் புகட்ட நினைக்கும் தவறான மனநிலை இது. நண்பனுக்கு இன்னோர் நண்பன் கிடைப்பான், தோழிக்கு இன்னோர் தோழி, காதலிக்கு இன்னோர் காதலன். இழப்பு என்னவோ இறந்தவனுக்கு மட்டுமே ! இதை இளைஞர்கள் புரிந்து கொள்ள வேண்டும்.

மூன்று விஷயங்கள் முக்கியத் தேவை. விமர்சனங்களில் உடைந்து போய்விடாத மனம். அடுத்தவர்களோடு ஒப்பிட்டு தாழ்வு கொள்ளாத மனம். இணைந்து வாழும் ஆனந்த மனம். அவ்வளவு தான். இணைந்து வாழும் இளைஞர்கள் மன அழுத்தமில்லாத வாழ்க்கையை வாழ்கிறார்கள் என்கிறது உளவியல் ! 

உறவுச் சிக்கல்கள், இளைஞர்கள் தாண்டவேண்டிய இன்னொரு தடைக்கல்.

மனம் சார்ந்த சிக்கல்கள்:  இளைஞர்களுடைய மன அழுத்தம் பெரும்பாலும் அடுத்தவர்களால் நிர்ணயிக்கப்படுகிறது. முதல் மார்க் வாங்காவிட்டால் ஏதோ சாவான பாவம் செய்தது போல பிள்ளைகளைப் பார்க்கும் பெற்றோர் உண்டு. விருப்பமில்லாத படிப்புக்காய் தலையணை புத்தகங்களுடன் மன அழுத்தத்தைச் சுமக்கும் மாணவர்கள் உண்டு. 

போதாக்குறைக்கு சினிமா, விளம்பரங்கள், ஊடகங்கள் போன்றவை ஏகப்பட்ட நிர்ப்பந்தங்கள் இடுகின்றன. “உங்கள் வாழ்க்கை இப்படி இருக்க வேண்டும்”, “இந்த வீடு தான் வேண்டும், இந்தக் கார் தான் வேண்டும், இந்த சுற்றுலா வேண்டும்என்றெல்லாம் ஊடகங்கள் சொல்லும் விதிமுறைகள் இளைஞர்களை மன அழுத்தத்தில் தள்ளுவதுண்டு.

தன்னை அறிந்து, தன் ஆழ்மன விருப்பத்துக்கேற்ற ஒரு இலட்சியத்தை அமைத்துக் கொள்வதும், வெற்றியும் தோல்வியும் வாழ்வின் பாகங்கள் என புரிந்து கொள்வதுமே இளைஞர்களின் தேவை.

மன அழுத்தத்தையும் இளைஞர்கள் தாண்டி விட்டால் அவர்கள் வெற்றியின் முற்றத்தை எட்டி விட்டார்கள் என்பதே பொருள்.

துருவான மனதைத் துலக்கு

வெற்றி மட்டுமே இலக்கு

தன்னம்பிக்கை : கூடப் பொறந்த பாசம் !

கிராமப் புறங்களில் சகோதர சகோதரிகளைகூடப் பொறந்ததுகஎன்பார்கள். கூடி வாழ்வதற்காகப் பிறந்தவர்கள் என்பதே அதன் பொருள். அப்படி ஆனந்தமாய்க் கூடி வாழ்வதற்காகப் பிறந்தவர்கள் இன்று எப்படி இருக்கிறார்கள் எனும் கேள்வியை ஒவ்வொருவரும் எழுப்ப வேண்டியது அவசியம்.

சின்ன வயதில் தோப்பிலும், வரப்பிலும், குளத்திலும்  ஆனந்தமாய் குதித்து விளையாடும் சகோதரர்கள் வளர வளர தங்களுடைய பிணைப்பைக் கொஞ்சம் கொஞ்சமாய்க் குறைத்துக் கொள்கிறார்கள்.  இந்த அன்னியோன்யம் முழுமையாய் மறைந்து போய் பல நேரங்களில் வெறுப்பாய் மாறுவது துயரத்தின் உச்சம். 

பொம்மைக்காகவோ, சாக்லெட்டுக்காகவோ சின்ன வயதில் போடும் சண்டைகளின் நீளம் சில நிமிடங்களோ, சில மணி நேரங்களோ தான். வயது ஏற ஏற சண்டைகளின் நீளமும் வளர்ந்து கொண்டே போகிறது. பெரியவர்களானபின் வாரக்கணக்கிலோ, மாதக்கணக்கிலோ பிணக்கு நீடிக்கிறது. சில சமயங்களில் வருடங்களையும் விழுங்கி இது நிரந்தரப் பிரிவாய் நிலைத்தும் விடுகிறது.

அரையடி நிலத்துக்காக அண்ணனை வெட்டும் தம்பி. சொத்துக்காக தம்பியின் குடும்பத்தையே காலி பண்ணும் அண்ணன் என தினசரிகள் குடும்ப உறவின் பலவீனங்களை சோகமாய் எழுதிச் செல்கின்றன.  குடும்ப உறவுகளெல்லாம் பின் வரிசைக்குத் தள்ளப்பட வெறும் பொருளாதார வசீகரங்கள் வாழ்வின் முன் இருக்கைகளை ஆக்கிரமித்துக் கொண்டு விட்டன

சகோதர பாசம் எப்படி இருக்கிறது என இங்கிலாந்தில் ஒரு ஆராய்ச்சி நடத்தினார்கள். அதில் தெரிய வந்தது இது தான். மூன்றில் ஒரு பங்கு சகோதரர்கள் தங்கள் கல்லூரி காலத்திலும் நெருங்கிய ஸ்னேகமாய் இருக்கிறார்கள். இன்னொரு 33 சதவீதம் பேர்ரொம்ப நெருக்கமும் இல்லை, ரொம்பத் தூரமும் இல்லைரேஞ்சுக்கு இருப்பவர்கள். மிச்சமுள்ளவர்களோ தொடர்பில்லாமல் இருப்பவர்கள் அல்லது எதிரிபோலவே முறைத்துக் கொள்பவர்கள். சுருக்கமாகச் சொல்ல வேண்டுமெனில் சுமார் 70 சதவீதம் பேர் ஆழமான சகோதர உறவு இல்லாமல் தான் இருக்கிறார்களாம் !  

குடும்பம் மனிதனின் முதல் தேவை. சகோதரர்கள், சகோதரிகள், பெற்றோர் எனும் உறவுகள் அவர்களுடைய வேர்களைப் போன்றவர்கள். சமூகத்தில் கிளை பரப்பும் மரம் பூக்களையும், கனிகளையும் கிளைகளில் தாங்குகிறது. பிறருடைய பார்வைக்குத் தெரிபவை இந்த பூக்களும் கனிகளும் தான். ஆனால் வேர்களின் பலத்தைப் பொறுத்தே கிளைகளின் வசீகரம் இருக்கும். வெற்றிகளின் பச்சையத்தைத் தாவரங்கள் தயாரிக்க வேர்கள் மண்ணில் இறுக்கமாக இருக்க வேண்டும். தண்ணீரை அவை இலைகளுக்கும் அனுப்பி வைக்க வேண்டும். 

அத்தகைய சகோதர, சகோதரிகள் அமைந்தால் வாழ்க்கை சுவர்க்கமாகும். அவர்களைத் தோல்விகள் அச்சுறுத்துவதில்லை. அவர்கள் தங்களுடைய இளைப்பாறுதலை சகோதரர்களிடமிருந்து பெற்றுக் கொள்கிறார்கள். இங்கே தற்கொலைகள் தலை தூக்குவதில்லை. 

சகோதரர்களிடையே ஆழமான அன்புறவைக் கட்டியெழுப்புவதன் முதல் பங்கு பெற்றோரைச் சார்கிறது. சின்ன வயதில் குழந்தைகளைச் சமமாய்ப் பாவிப்பதும், பகிர்தல் மனப்பான்மையைக் கற்றுக் கொடுப்பதும், தவறுகளைச் சுட்டி காட்டுவதுமாய் நல்ல பெற்றோர் நல்ல குடும்பத்தைக் கட்டி எழுப்புவார்கள். அந்த குடும்பம் சகோதர பாசத்தில் வலுப்படும். 

சின்ன வயதிலேயே குழந்தைகளிடையே வேறுபாடு காட்டி வளர்க்கும் பெற்றோர் தங்களை அறியாமலேயே தவறிழைக்கிறார்கள். குழந்தைகள் வளர்ந்து பெரியவர்களானபின் அவர்களிடையே அந்த வெறுப்புணர்வு பெரிதாகிறது. “நான் தான் பெரியவன்என்றோ, “நானும் பெரியவன் தான்என்றோ ஒருவருக்கொருவர் முறுக்கிக் கொள்ள அடிப்படை குடும்ப பந்தம் உடைந்து போய்விடுகிறது.

குழந்தைகளாக இருக்கும் போதே வாழ்வின் மதிப்பீடுகள், குடும்ப உறவுகள், அன்பு போன்றவற்றின் தேவையைப் போதிக்க வேண்டும். அத்தகைய செயல்களை ஊக்கப்படுத்த வேண்டும். நாம் பெரும்பாலும் குழந்தைகளைப் பாராட்டுவது அவர்கள் தேர்வில் சாதிக்கும்போதோ, அல்லது போட்டிகளில் வெல்லும் போதோ தான். அது தவறு. குழந்தைகள் சகோதர பாசத்துடன் இருப்பதையோ, பகிர்ந்தலில் மிளிர்தலையோ, அன்புச் செயல்கள் செய்வதையோ பாராட்டுங்கள். ஊக்கப்படுத்துங்கள். அவர்களுடைய ஆரோக்கியமான எதிர்காலத்துக்கு அது உதவும்.

கணவன் மனைவியரிடையே உண்மையான அன்பும் ஆழமான குடும்ப உறவும் இருந்தால் குழந்தைகளிடமும் அந்த அன்பு இருக்கும் என்கின்றனர் உளவியலார்கள். பெற்றோரிடையே சண்டை, விவாகரத்து போன்றவை எழும்போது குழந்தைகள் தங்களுக்குள்ளே ஆழமான அன்பை உருவாக்கிக் கொள்ள முடியாமல் போய்விடுகிறது. சகோதரர்களிடையே அன்பாய் இருக்க முடியாத குழந்தைகள் பல வேளைகளில் பள்ளிக்கூடம், கல்லூரி,  அலுவலகம் என தொடரும் இடங்களில் பிறருடனான நட்புறவில் தடுமாறிவிடுகிறார்கள்.

சகோதரர்களிடையே கருத்து வேறுபாடுகள் வருவதில் தவறில்லை. அவை அதிக நேரம் தொடராமல் இருக்க வேண்டும் என்பது தான் முக்கியம். “விட்டுக் கொடுத்தலைக்  கற்றுக் கொள்ள வேண்டியது ரொம்ப முக்கியம். மகிழ்ச்சி என்பது பெற்றுக் கொள்வதிலல்ல, பிறருக்குக் கொடுப்பதில் என்பதைக் குழந்தைகள் முதல் பெரியவர்கள் வரை எல்லோருமே கற்றுக் கொள்ள வேண்டும். 

சகோதரர்களிடையே ஆழமான அன்பு இருப்பது உடலுக்கும் நல்லது என ஆய்வுகள் சொல்கின்றன.” ஆழமான சகோதர உறவு இருந்தால் முதுமையில் உளவியல் பாதிப்புகள் ஏற்படாதுஎன்று ஹார்வேர்ட் பல்கலைக்கழகத்தில் வெளியான ஒரு ஆய்வு தெரிவிக்கிறது. குறிப்பாக அறுபது வயதைத் தாண்டியவர்கள் அமைதியான முதுமையை அனுபவிக்க அவர்களுடைய இளம் வயதில் ஆரோக்கியமான சகோதர உறவு இருந்தால் போதும் என்கிறது இந்த ஆய்வு. 

பெய்லார் பல்கலைக்கழகத்தின் மார்க் மார்மன் என்பவர் சகோதரத்துவம் சார்பான ஆராய்சிகளை மேற்கொள்பவர். “மன அழுத்தமற்ற வாழ்க்கைக்கும், ஆரோக்கியமான இதயத்துக்கும் ஆழமான சகோதர பந்தம் அவசியமானதுஎன்கிறார் இவர்.

உரையாடல்கள் சகோதரர்களிடையே அன்பையும் நெருக்கத்தையும் காப்பாற்றும். இன்றைய தகவல் யுகம் நமக்கு எப்போதும் பிறருடன் தொடர்பில் இருக்கும் வாய்ப்பைத் தருகிறது. அதை நாம் நல்ல முறையில் பயன்படுத்திக் கொள்ளலாம். நண்பர்களுடனோ, காதலருடனோ மணிக்கணக்கில் மெய் மறந்து பேசும் நாம் பல வேளைகளில் ஒரு போன் போட்டு சகோதரனை நலம் விசாரிக்க மறந்து போய்விடுகிறோம். 

நண்பர்களுடன் மன்னிப்பு கேட்டு ஒப்புரவாகும் நாம் சகோதரனுடனான சண்டையை ஒரு மன்னிப்பின் மூலம் தீர்க்க மறுக்கிறோம் என்பதே உண்மை. நமது இதயத்தின் ஆழத்தில் வேர்விட்ட சகோதர பாசம் எந்த நட்பினாலும் நிரப்பி விட முடியாதது. பல ஆண்டுகளாக சண்டையில் இருக்கும் சகோதரனின் வீட்டுக் கதவை ஒரு முறை அன்பினால் தட்டிப் பாருங்கள். நேசத்தின் நீரூற்று அங்கே புறப்படத் தயாராக இருக்கும்.

குடும்ப உறவுகள் உங்களுக்கான வேடந்தாங்கல் போல. மகிழ்வு வரும்போது குடும்பம் அந்த மகிழ்ச்சியை பலமடங்காக்கி உங்கள் சிறகுகளை உயரப் பறக்க வைக்கிறது. சோகம் வரும்போது குடும்பம் அதைத் தனது தோள்களில் ஏந்தி உங்கள் கால்களை இளைப்பாற விடுகிறது. 

ஆத்மார்த்தமான குடும்ப உறவும், அன்பும் இருக்கின்ற வாழ்க்கையில் எது இல்லாவிட்டாலும் ஆனந்தம் நிலை பெறும். குடும்ப அன்பு பலவீனமானால் வேறு என்ன இருந்தாலும் ஓட்டை விழுந்த படகாகவோ, வேர்கள் வெட்டப்பட்ட மரமாகவோ அழிவை  நோக்கியே வாழ்க்கை செல்லும்.

அன்பான சகோதர, சகோதரிகளைப் பெற்றவர்களுக்கு தன்னம்பிக்கை மிக அதிகமாக இருக்கும். வேலையிலோ, கலைகளிலோ அவர்கள் சாதிக்கும் உயரம் அதிகமாக இருக்கும். வலுவான அஸ்திவாரத்தைக் கொண்ட கட்டிடம் போல அவர்களுடைய வாழ்க்கையும் உயரும் என்கின்றனர் குடும்ப நல ஆய்வாளர்கள்.

அன்பு சிறக்க நம்பிக்கை ரொம்ப முக்கியம். சகோதரர்களுக்கிடையே வலுவான ஒரு நம்பிக்கையை நிலைபெறும் போது பிறர் அந்த உறவை உடைக்க முடியாது. தாயின் அன்பைப் போன்ற நம்பிக்கையை சகோதர சகோதரிகளிடையே வைத்துப் பாருங்கள். பிறர் உங்களுடைய பாசக் கூட்டுக்குத் தீ வைக்க நினைத்தாலும் அது உங்களுடைய நம்பிக்கை நதியினால் அணைக்கப்படட்டும்.

மனம் விட்டுப் பேசிச் சிரிப்பது சகோதரர்களிடையேயான அன்புறவைக் கட்டியெழுப்ப உதவும் என்கின்றனர் உளவியலார். பேசும்போது இதயத்தைத் திறந்தும், கேட்கும் போது மனதைத் திறந்தும் வைத்திருப்பதே சகோதரர்களுக்கு இருக்க வேண்டிய உரையாடல் பாணி. 

சேர்ந்து நேரம் செலவிடுங்கள். அடிக்கடி போனில், மின்னஞ்சலில் என பாசத்தைப் பரிமாறிக் கொண்டாலும் அவ்வப்போது சந்தித்து, இணைந்து உண்டு, நினைவுகள் பரிமாறிக் கொள்வது சகோதர பாசத்தை ரொம்பவே வலுவாக்கும்.

சகோதரர்களுடைய தேவையில் கேட்காமலேயே உதவுங்கள். உங்கள் சகோதரரின் இடத்தில் உங்களை வைத்துப் பாருங்கள். அவருடைய வாழ்க்கை ஆனந்தமாய் இருந்தால் மகிழுங்கள். கடினமாய் இருந்தால் உதவுங்கள். இதுவே அடிப்படைக் குணாதிசயம். 

பல சிக்கல்களின் தீர்வு ஒரு சின்னவிட்டுக் கொடுத்தலில்இருக்கிறது. அன்பாய் நெருங்குவதில் இருக்கிறது. ஒரு சின்ன மன்னிப்பில் இருக்கிறது. இதைப் புரிந்து கொள்ளும் போது வாழ்க்கை அழகாகிறது.

 இரண்டு சகோதரர்கள் அருகருகே தோட்டம் அமைத்து பயிர்செய்து வந்தார்கள். தோட்டத்துக்கு இடையே ஒரு சின்ன நதி ஓடியது. பல காலம் அன்பாக வாழ்ந்த சகோதரர்களிடையே திடீரென பிணக்கு. சின்னவன் அண்ணனை ரொம்பவே திட்டி விட்டான். கோபம் கொண்ட அண்ணன் ஒரு பணியாளரை அழைத்து தனது எல்லையில் மதில் கட்டச் சொல்லி விட்டுச் சென்று விட்டார். 

சில நாட்களுக்குப் பின் அவர் திரும்பி வந்து பார்த்தபோது தனது தோட்டத்திலிருந்து தம்பியின் தோட்டத்துக்கு ஒரு பாலம் கட்டப்பட்டிருந்தது. மதிலுக்குப் பதிலாக பாலம் கட்டியிருந்தார் பணியாளர். அண்ணன் அமைதியாக பாலத்தின் மேல் நடந்தார். தூரத்தில் பாலத்தையே பார்த்துக் கொண்டிருந்த தம்பி ஓடோடிச் சென்று அண்ணனைக் கட்டியணைத்தார். “நான் இவ்வளவு திட்டியும் நீ அன்பாக பாலம் கட்டினாயே. நீ என்மேல எவ்ளோ பிரியம் வைத்திருக்கிறாய் அண்ணாஎன கண் கலங்கினார். 

அண்ணன் நெகிழ்ந்தார். தம்பியை இறுக அணைத்துக் கொண்டார். மதிலுக்குப் பதிலாய் பாலம் கட்டிய பணியாளருக்கு மானசீகமாய் நன்றி சொன்னார்.

பாசக் கூடு பின்னுங்கள்

நேசத் தோடு நில்லுங்கள்

Vetrimani : எங்க காலத்துல….

எங்க காலத்துல….
( பழமை பேசுதல் பயன் தருமா ? )

Image result for old man advice

ஒருவனுக்குக் காதல் தோல்வி ! சில ஆண்டுகள் திகட்டத் திகட்டக் காதலித்து விட்டு, வழக்கம் போல தாடியைத் தடவியபடி ஓரமாய் உட்கார வேண்டிய காலம். உட்கார்ந்து உட்கார்ந்து தாடியும் நரைத்துப் போய், கால்களும் மரத்துப் போயிருக்கும் காலத்தில் அவனுடைய கண்ணுக்கு முன்னால் கலியுகக் காதலர்கள் பறந்து திரிகின்றனர். இந்தக் காலத்துக் காதல் புனிதமானது. அது தீண்டாமைக் கொடுமைகளைக் கடந்தது. அது பழைய காதலனுக்குப் புரிவதில்லை.

எங்க காலத்துல காதல்ன்னா எப்படி தெரியுமா ? என பேச ஆரம்பிப்பார். அப்போதெல்லாம் சன்னல் வழியே தான் கண்கள் பேசிக்கொள்ளும் என்பார். உடனே இளசு ஒன்று, இப்பவும் அப்டித்தான்.. ‘வின்டோஸ்’ வழியே விழிகள் பேசிக்கொள்கிறது என்பார். அப்போதெல்லாம் நாங்க தொட்டுப் பேசறது கூட கிடையாது, என்பார் அவர். அப்பல்லாம் நீங்க பேசறதே இல்லை அப்புறம் என்ன தொட்டுப் பேசறது என்பார் இவர்.

அந்தக் காலத்துல காதல் புனிதமானது என்பார் பழையவர். புனிதமானது எல்லாம் கோயில்ல இருக்கணும், காதல்ல எதுக்கு இருக்கு என்பார் இளையவர். காதலி எழுதற எழுத்துப் பிழையே அழகானதுப்பா என்பார் பழையவர். வீடியோ கால் காலத்துல எதுக்கு எழுத்தும், பிழையும் என்பார் இளையவர். ஒருத்தி கிட்டே மனசைக் கொடுக்கிறது தான் எங்க காலக் காதல் என்பார் அவர். மனசென்ன கடலை மிட்டாயா குடுத்ததும் தீர்ந்து போக என நக்கலடிப்பார் இவர்.

காலங்களின் இடைவெளி எப்போதுமே உரசிக் கொண்டே தான் இருக்கும். இது இன்று நேற்று நடந்ததல்ல. தலை முறை தலைமுறையாக, முந்தைய தலைமுறையைப் பற்றிய புகழ் பாக்கள் ஒலித்துக் கொண்டே தான் இருக்கின்றன. ‘நான் காதலில் கசிந்துருகினேன்’ என ஒருவர் சொல்வதில் அப்படியே உண்மை இருக்க வேண்டுமென்பதில்லை. அவர் காதலில் அடிபட்டு, மிதிபட்டு, விரட்டப்பட்டு, தோற்றுப் போனவராகவும் இருப்பார். தோற்றுப் போன நினைவுகளை மாற்றி, தேற்றிக் கொள்ளும் நினைவுகளுக்காக தனது கனவுக் கதவைத் திறந்து அவர் சுகமான நினைவுகளை உருவாக்குகிறார்.

நாம் பனங்காயில் வண்டி செய்து ஓட்டிய நினைவுகளை பிள்ளைகளிடம் பகிர்ந்து கொள்கிறோம். பிள்ளைகள் நாளை ஃபோர்ட்நைட் வீடியோ கேம் விளையாடுவதைப் பற்றி அடுத்த தலைமுறையிடம் சொல்வார்கள். அவர்கள் விர்ச்சுவல் விளையாட்டுகளின் உயர்நிலை பற்றி தொடரும் தலைமுறைக்குப் பகிர்ந்து கொள்வார்கள். இது ஒரு வாழையடிப் பாதைப் பயணம். தவிர்க்க முடியாத யதார்த்தம்.

காலங்களின் நெடுவீதியைக் கடந்து வந்தவர்கள் தங்களுடைய பயணத்தின் வழியில் தொலைத்தவை ஏராளம் ஏராளம். பால்யத்தின் பரவச நினைவுகள். இளங்காதலின் நிராகரிப்பு நிமிடங்கள். பெற்றோரின் அரவணைப்புக் கணங்கள். நண்பர்களின் குதூகலத் தருணங்கள். கனவுகளின் மகரந்தச் சேர்க்கைகள். என அவர்கள் தொலைத்தவை ஏராளம் ஏராளம். மறைந்து போன மனிதர்களை நேரில் சந்திக்க முடியாதபோது அவர்கள் நினைவுகளின் வழியே கைகுலுக்கிக் கொள்கின்றனர். தொலைந்து போன வருடங்களை மீண்டும் சந்திக்க முடியாதபோது அவர்கள் அந்த ஞாபகங்களின் ஒலியை மறு ஒலிபரப்பு செய்கின்றனர்.

இது ஒரு வகையில் உளவியல் ஆறுதல். என் காலத்தில் எல்லாம் நன்றாக இருந்தது எனும் நம்பிக்கையின் வருடல் அவர்களுக்கு வெப்பத்தின் கணங்களை விட்டு வெளியேற துணை செய்கின்றன. அதனால் தான் பெரியவர்கள் ஆக ஆக அவர்களுடைய பழங்கதைகளின் பகிர்தல் அதிகமாகிக் கொண்டே போகிறது. முதுமை நம்மை உணர்வுகளோடு நெருக்கமாக்கி, உணவுகளிலிருந்து பிரித்தெடுக்கிறது. முதுமை நம்மை உறவுகளோடு இறுக்கமாக்கி, செல்வங்களிலிருந்து விலக்கி வைக்கிறது. அதனால் தான் மனதின் காயங்களுக்கு பழங்கதைகள் மயில்பீலிச் சாமரம் வீசுகின்றன.

அவர்களுடைய காலத்துக்கு ஒரு டைம் மெஷின் மூலம் போய்ப் பார்த்தால் அவர்கள் பட்ட கஷ்டங்களும், அவமானங்களும் வண்டி வண்டியாக கொட்டிக் கிடப்பதைப் பார்க்கலாம். அந்த எதிர்மறை வலிகளையெல்லாம் விலக்கிவிட்டு அவர்கள் பழைய காலத்தின் பாசிடிவ் சிந்தனைகளில் சிக்கிக் கொள்வதன் காரணம் அவர்கள் விரும்பிய வகையில் தங்கள் பால்யத்தை சிந்தனைகளில் நட்டு வைப்பதே. காலப்போக்கில் அவர்களுடைய எதிர் மறை சிந்தனைகள் விலகிப் போவதை ,”ஃபேடிங் அஃபக்ட் பயஸ்” என உளவியலார்கள் கூறுவார்கள்.

பழைய காலத்தில் நம்மை வார்தெடுத்த வலிகளும், நம்மை துவைத்தெடுத்த தோல்விகளும் மறைந்து போக, பழைய காலத்தின் இனிய நினைவுகள் மட்டுமே இதயத்தின் வடிகட்டியில் ஒரு வாசனை திரவியமாய் தங்கி விடுகிறது. அது தான் பெரியவர்களின் பேச்சுகளிலிருந்து சிரிப்பும், சிலிர்ப்புமாய் புறப்படுகிறது. பழைய நினைவுகளைப் பகிரப் பகிர அவை மீண்டும் மீண்டும் மனதில் வலுவடைகின்றன. “அவ சந்திரமுகியா நின்னா, சந்திரமுகியா நடந்தா, சந்திரமுகியைப் பேசினா, சந்திரமுகியாவே மாறிப் போயிட்டா” மாதிரி, பழைய காலத்தை பாசிடிவ் ஆகப் பேசிப் பேசி அதையே உண்மையென மனம் நம்பி அதில் லயிக்க ஆரம்பித்து விடுகிறது.

யாராவது உங்களிடம் அப்படிக் கதைகள் பேசினால் அவர்களருகில் அமர்ந்து அவர்களுடைய பால்யத்தின் கதைகளைக் கேளுங்கள். குறிப்பாக முதியவர்கள் அத்தகைய கதைகளைப் பேசினால், விழிகளில் வியப்பும், இதயத்தில் ரசிப்புமாக அவர்களுடைய கதைகளைக் கேளுங்கள். அதை சிலாகியுங்கள். அதை வியந்து பேசுங்கள். இவையெல்லாம் அந்த முதியவர்களின் மனதில் சொல்லொண்ணா ஆறுதலை மழைபோல இறக்கும். அவர்களுடைய வெறுமையான பொழுதுகள் மகிழ்வினால் நிரப்பப்படும்.

“பழைய கதையைப் பேசாதீங்க” என உதாசீனப்படுத்தும் ஒவ்வொரு கணமும் நாம் அவர்களை காயப்படுத்துகிறோம். அவர்களுடைய அழகிய ஓவியத்தில் கரியைப் பூசுகின்றோம். அது அவர்களுடைய மெல்லிய மனதில் கீறல்களை உருவாக்கி விடுகிறது. அவர்களுடைய உணர்வுகளின் வாய்க்கால்களில் பாறைகளைப் புரட்டி வைக்கிறது. அதற்குப் பதிலாக, “உங்க பால்யத்துல வாழாம போயிட்டேனே” எனும் ஏக்கத்தைப் பதிவு செய்யுங்கள். அவர்களுடைய சிந்தனை வயல்களெங்கும் சிரிப்புகள் விளையும்.

பழங்கதைகள் பேசுவோர் நிகழ்கால யதார்த்தத்தை உதறிவிட்டு தன்னைச் சுற்றிய மனிதர்கள் அனைவரும் கடந்த காலத்தில் தான் வேர்களைப் பதிக்க வேண்டும் என நினைக்கும் போது தான் பிரச்சினை உருவாகிறது. நான் இப்படி இருந்தேன், எனவே நீயும் அப்படித் தான் இருக்க வேண்டும். எனது பால்யம் இப்படி இருந்தது எனவே உனது பால்யமும் இப்படித் தான் இருக்க வேண்டும். எனது வாழ்க்கையில் நான் இத்தகைய முடிவுகளைத் தான் எடுத்தேன், நீங்களும் இத்தகைய முடிவுகளைத் தான் எடுக்க வேண்டும் என கடந்த காலத்தின் சாவிகளால் நிகழ்காலத்தைப் பூட்ட நினைக்கும் போது தான் சிக்கல்கள் உருவாகின்றன.

உலகம் மோசமான நிலையை நோக்கிப் போய்க்கொண்டிருப்பதாக உலகின் 70% மக்கள் நம்புகிறார்கள். அதிலும் குறிப்பாக தங்களுடைய வாழ்க்கையே மோசமாகப் போவதாக 55 சதவீதம் மக்கள் நம்புகின்றனர். அந்த நம்பிக்கை தான் அவர்களை பழைய காலத்தின் இடுக்குகளில் இளைப்பாற வைக்கின்றன. அதனால் தான் பழசைத் தாண்டிய விஷயங்களெல்லாம் தவறு எனும் சிந்தனை அவர்களிடம் முளைக்கிறது. அந்த சிந்தனையை ஊக்குவிப்பது போல பெண்களுக்கும், இளையவர்க்கும் எதிரான வன்முறைகளும், சமூக அவலங்களும் அவர்களை அலட்டுகின்றன.

குறிப்பாக தொழில்நுட்பத்தின் வளர்ச்சி எல்லோர் கைகளிலும் ஆறாவது விரலாக ஒரு ஸ்மார்ட்போனை புதைத்து வைத்திருக்கிறது. அதை அனிச்சைச் செயலாகத் தடவிப் பார்ப்பதை தவறாமல் செய்கிறது இன்றைய தலைமுறை. தொழில்நுட்பம் கொண்டு வந்திருக்கும் வாழ்வியல் மாற்றங்கள் எக்கச்சக்கம். அவற்றையெல்லாம் ஒற்றை உதறலில் அகற்ற நினைப்பது நடக்காத காரியம்.

கடந்த தலைமுறைக்குத் தவறிழைக்கக் கிடைத்த வாய்ப்புகளை விட, இன்றைய சிறுவர்களுக்கு அதிக வாய்ப்பு கிடைக்கிறது. தலையில் துண்டு போட்டு காலைக்காட்சியில் ரகசியப் படம் பார்த்த கதைகளெல்லாம் வரலாறாகிவிட்டன. இப்போது விரல்நுனியில் விரசம் அவர்களுக்கு டிஜிடல் வடிவில் கிடைக்கிறது. இந்த சூழலில் அவர்கள் இதயத்தில் மனிதத்தையும், உடலில் புனிதத்தையும் காக்க நாம் என்ன செய்ய வேண்டும் என யோசிக்க வேண்டும். நான் அப்படி இருந்தேன் என்பதெல்லாம் இங்கே பயனளிக்காது.

எனது தோட்டத்தில் இப்படிப் பூக்கள் விளைந்தன, அதை இப்படிப் பராமரித்தேன். உனது தோட்டத்தில் பூக்கள் விளைவிப்பதும், களைகள் விளைவிப்பதும் உனது விருப்பத்தைப் பொறுத்தது. நான் என் அனுபவத்தைப் பகிர்ந்து கொள்கிறேன் எனுமளவில் இந்தப் பகிர்தல் இருக்கும் போது எல்லம் இனிமையாகிறது.

பழங்கதைகள் பேசுவோரின் உணர்வுகளை மதிப்போம். ஏனெனில் அவர்களது களங்கமற்ற வாழ்க்கையின் அடையாளம் அங்கே தான் நிரம்பியிருக்கிறது. அவர்களின் முதுமை நாட்களில் அவர்களின் இதயம் மகிழ்வில் திளைக்க உதவுவோம். ஏனெனில், முதுமை என்பது நமது வாழ்க்கைப் பாதையிலும் காத்திருக்கும்.

*

சேவியர்

தன்னம்பிக்கை : அழுத்தமற்ற மனமே அழகானது. 

மன அழுத்தம். இன்று எல்லா இடங்களிலும் பரவலாகப் பேசப்படக்கூடிய விஷயம் இதுவாகத் தான் இருக்கும். பேசறவங்க பேசிட்டுப் போகட்டும் என விட்டு விடவும் முடியாது. காரணம் இன்று உலகிலுள்ள நோய்களில் 75 சதவீதம் முதல் 90 சதவீதம் வரை நோய்களுக்கான காரணம் இந்த மன அழுத்தம் தான் என்று சொல்லி அசரடிக்கிறது அமெரிக்க ஆராய்ச்சி ஒன்று. 

மன அழுத்தத்துக்கான காரணங்கள் இவ்ளோ தான் என பட்டியலிட்டுச் சொல்லிவிட முடியாது. ஏமாற்றம், பயம், நிராகரிப்பு, வேலை, குடும்பம் இப்படி மன அழுத்தத்துக்கான காரணிகள் நீண்டு கொண்டே போகும். ரொம்ப சத்தம், அதிக வெளிச்சம் இதெல்லாம் கூட சிலருடைய மன அழுத்தத்தை சகட்டு மேனிக்கு அதிகரித்து விடும் என்கின்றனர் மருத்துவர்கள்.

மன அழுத்தம்னா என்ன ? எனும் கேள்விக்கும் மிகச் சரியான பதிலைச் சொல்லிவிட முடியாது. நம்மை வெளியிலிருந்தோ, உள்ளிருந்தோ தாக்குகின்ற பிரச்சினைகளுக்கு நமது உடலும் மனமும் தருகின்ற பதில் தான் இந்த மன அழுத்தம் என்பது மருத்துவ விளக்கம். டென்ஷன், எரிச்சல், கோபம், கவனமின்மை, சோர்வு, குழப்பம், வேகமான இதயத் துடிப்பு என இந்த மன அழுத்தத்தின் பிள்ளைகள் எக்கச்சக்கம்.

இந்த மன அழுத்தங்களை மொத்தமாகக் கொட்டி நான்கு பெரும் பிரிவுகளாகப் பிரிக்கிறார்கள். முதலில் வருவது யூஸ்ட்ரெஸ்.சட்டென உங்களுக்கு ஒரு லாட்டரி அடித்ததென்று வைத்துக் கொள்ளுங்கள் ? உங்களுக்கு எப்படியிருக்கும் ? அந்த வகை மன அழுத்தம் இந்த வகையில் வருகிறது. படிப்பில் சாதனை செய்வது, தம்பதியர் பெற்றோராவது, கார் வீடு போன்றவை வாங்குவது, விடுமுறைக்கு பிடித்தமான இடத்துக்குச் செல்வது, அல்லது ஒரு திக் திக் திகில் படம் பார்ப்பது. இப்படிப்பட்ட விஷயங்களுக்காய் வருகின்ற அழுத்தம் இந்த வகை. இந்த மன அழுத்தம் கொஞ்சம் சமர்த்து !

இரண்டாவது வகை மன அழுத்தம் டிஸ்ட்ரெஸ் எனப்படுகிறது. திடீரென நேர்கின்ற ஒரு மரணம். பணச் சிக்கல்கள், வேலைப் பழு, உறவுகளுக்கிடையே வருகின்ற சிக்கல், உடல்நலமின்மை போன்றவற்றினால் வருவது தான் இந்த வகை மன அழுத்தம். ரொம்பவே சிக்கலை உண்டாக்கும் இந்த வகை மன அழுத்தத்தை அதன் கால அளவை வைத்து அக்யூட் அல்லது குரோனிக் என இரண்டு வகையாகப் பிரிக்கிறார்கள். அக்யூட் என்றால் கொஞ்ச நேரம் இருக்கும் மன அழுத்தம். குரோனிக் என்பது நீண்ட கால மன அழுத்தம்

ஹைப்பர்ஸ்ட்ரெஸ் என்பது மூன்றாவது வகை. ஒரு மனிதனை அவனுடைய இயலாமையின் எல்லை வரை தள்ளிக் கொண்டே போனால் நிகழ்வது தான் இந்த மன அழுத்தம். வீட்ல பிள்ளைகளைக் கவனித்துவிட்டு, அலுவலகம் ஓடி வேலை செய்து, மீண்டும் வீட்டுக்கு வந்து குடும்பத்தைக் கவனிக்கும் குடும்பத் தலைவிகளுக்கு சர்வ சாதாரணமாய் வருகின்ற மன அழுத்தம் இது. வருகின்ற பணத்தை வைத்துக் கொண்டு வாடகை கொடுக்கவா, குழந்தைகளைப் படிக்க வைக்கவா, சாப்பிடவா என திணறித் திரியும் வறுமைக் கோட்டில் தொங்கிக் கொண்டிருக்கும் மக்களில் பலர் இந்த மன அழுத்தத்தில் வாழ்பவர்கள் தான்.

இன்னொரு  வகை மன அழுத்தம் ஹைப்போஸ்ட்ரெஸ் எனப்படும். இது கொஞ்சம் வித்தியாசமான மன அழுத்தம். “என்னய்யா ஒரேமாதிரி வேலையைச் செய்து செய்து போரடிக்குதுஎன்பவர்களின் மன அழுத்தம் இந்த வகையானது. இவர்களிடம் உற்சாகமோ, சாதிக்கும் வேகமோ, சுறுசுறுப்போ இருக்காது.

அமெரிக்கன் அகாடமி ஆஃப் ஃபேமிலி பிஸிசியன்ஸ்அமைப்பு நடத்திய ஆய்வு ஒன்றில் 89 சதவீதம் மக்கள் தங்களுடைய வாழ்வில் கடுமையான மன அழுத்தத்தைச் சந்தித்திருந்தார்கள் எனும் அதிர்ச்சித் தகவல் வெளியானது. நடுவயது நபர்கள் இத்தகைய கடுமையான மன அழுத்தத்தில் இருந்தால் அவர்களுக்கு உணர்வு ரீதியான நட்பு ரொம்ப அவசியமாம். இல்லையேல் அவர்கள் ஏழு ஆண்டுகளுக்குள் மரணமடையும் வாய்ப்பு அதிகம் என அதிர வைக்கிறது இந்த ஆய்வு. 

மன அழுத்தம் பல்வேறு நோய்களைக் கொண்டு வந்து சேர்க்கிறது. தலை வலி முதல், நெஞ்சு வலி வரை ஏகப்பட்ட நோய்களுக்கும் மன அழுத்தம் காரணமாகி விடுகிறது. தாய்மை நிலையிலிருக்கும் பெண்களுக்கு மன அழுத்தம் வந்தால் அது குழந்தைகளையும் நேரடியாய்ப் பாதிக்கும் என குண்டைத் தூக்கிப் போடுகிறார் அமெரிக்காவின் மருத்துவர் மாயோகிளினிக்ஸ். 

நகைச்சுவை உணர்வு இருப்பவர்களுக்கு மன அழுத்தம் எளிதில் வராது. சிலர் எல்லா விஷயங்களையுமே இலகுவாக எடுத்துக் கொள்வார்கள். தேடித் தேடி சிரிப்பவர்கள் அவர்கள். இவர்களுக்கு மன அழுத்தமே இருக்காது என்கிறார் மனோதத்துவ நிபுணர் லீ பெக். 

மன அழுத்தம் குறித்து ஆராய்ச்சிகள் செய்த சார்லஸ் ஸ்விண்டால் என்ன சொல்கிறார் தெரியுமா ? “ மன அழுத்தத்தை சூழ்நிலைகள் பத்து சதவீதமும், அதை நாம் எப்படி அணுகுகிறோம் என்பது 90 சதவீதமும் நிர்ணயிக்கின்றனஎன்கிறார். அதாவது மன அழுத்தம் வேண்டுமா ? வேண்டாமா என முடிவெடுக்க வேண்டியது நாம் தான் என்பது அவருடைய தீர்மானமான முடிவு.

உதாரணமாக, குடும்பத்தில் பிரச்சினை வந்தால்எல்லாமே உன்னால தான்என தப்பைத் தூக்கி அடுத்தவர் தலையில் போடாமல், “நமக்கு ஒரு பிரச்சினை வந்திருக்கு, அதை எப்படித் தீர்ப்பது என்று பார்ப்போம்என அமைதியாய் அணுக வேண்டும். பிரச்சினைகளைத் தோண்டாமல், தீர்வுகளைத் தேடுவது மன அழுத்தமற்ற சூழலுக்கு உத்தரவாதம் என்கிறார் பிரபல அமெரிக்க உளவியலாளர் வில்லார்ட் எஃப் ஹார்லே.

இந்த மன அழுத்தம் சர்வதேச அளவில் எல்லோரையும் பின்னிப் பிணைந்திருப்பதால் தான் ஸ்ட்ரெஸ் மேனேஜ்மெண்ட் எனப்படும் மன அழுத்தத்திலிருந்து விடுபடும் பயிற்சிகளுக்கும் பஞ்சமில்லை. மென்பொருள் நிறுவனங்கள் மூன்று மாதங்களுக்கு ஒரு முறையோ, ஆறு மாதங்களுக்கு ஒரு முறையோ ஊழியர்களை சுற்றுலா, விளையாட்டு, கலை நிகழ்ச்சிகள், சிரிப்பு நிகழ்ச்சிகள் என ஏதாவது செய்து உற்சாகமூட்டுகின்றன. 

உலக பிரபலங்களின் பட்டியலை எடுத்துப் பாருங்கள், கடுமையான மன அழுத்தத்தில் உழன்று அதிலிருந்து வெளிவந்தவர்கள் எக்கச் சக்கம். வின்ஸ்டன் சர்ச்சில், பிரபல நாவலாசிரியர்கள் அகதா கிறிஸ்டி, ஜே.கே ரௌலிங், இளவரசி டயானா, பிரிட்னி ஸ்பியர்ஸ், பெயிண்டிங் பிதா மகன் வான்கோ, ஆபிரகாம் லிங்கன், மார்டின் லூதர், மைக்கேல் ஏஞ்சலோ, ஐசக் நியூட்டன், லியோ டால்ஸ்டாய் என இந்தப் பட்டியல் ரொம்பவே பெருசு. மன அழுத்தத்தைத் தாண்டி வரலாறு படைக்க முடியும் என்பதன் சான்றாக இவர்களெல்லாம் நமக்கு தன்னம்பிக்கை ஊட்டுகிறார்கள்.

மன அழுத்தத்திலிருந்து விடுபட பத்து கட்டளைகள் இவை.

  1. கடைசி நிமிட பரபரப்பை நிறுத்துங்கள். எங்காவது செல்ல வேண்டுமெனில் ஒரு அரை மணி நேரம் முன்னதாகவே கிளம்புவது. காலையில் ஒரு பதினைந்து நிமிடங்கள் முன்னதாகவே எழுந்து விடுவது. பயணத்துக்குத் தேவையானவற்றை முந்தின நாளே எடுத்து வைத்துக் கொள்வது போன்றவற்றை வழக்கமாக்குங்கள். 
  2. ஒரு நேரம் ஒரு வேலையை மட்டும் செய்யுங்கள். எட்டு வேலைகளைப் பற்றி சிந்தித்துக் கொண்டு ஒன்பதாவது வேலையைச் செய்து கொண்டிருந்தால் உங்கள் மன அழுத்தம் அதிகரிக்கும். என்ன செய்ய வேண்டும் என்பதைப் பட்டியலிடுங்கள். மிக முக்கியமான விஷயங்களை முதலில் செய்யுங்கள். எல்லா வேலைகளையும் செய்ய வேண்டுமென்ற கட்டாயமில்லை! போதுமான  ஓய்வு நேரம் உங்கள் பட்டியலில் நிச்சயம் இருக்கட்டும். 
  3. உங்களுக்கு மன அழுத்தம் தரக்கூடிய விஷயங்களை ஒதுக்குங்கள். இரைச்சல், வெளிச்சம், தாமதம், சில வகை வாசனைகள், சில நபர்கள் இத்யாதி..இத்யாதி என இந்தப் பட்டியல் எவ்வளவு பெரியதாக வேண்டுமானாலும் இருக்கலாம். முடிந்தவரை ஒதுக்குங்கள். ஒதுக்க முடியாத சூழல்களில் நீங்களே கொஞ்சம் ஒதுங்கிப் போய் விடுங்கள்.
  4. உடற்பயிற்சி செய்யுங்கள். ஆரோக்கியமான உடல் மன அழுத்தத்தின் எதிரி. உடலில் இரத்த ஓட்டமும், ஆக்ஸிஜன் ஓட்டமும் சீராக இருக்கும் போது உடலில் மன அழுத்தம் வரும் வாய்ப்பு குறைகிறது. எனவே மூச்சுப் பயிற்சி போன்றவையும், வாக்கிங், ஜாகிங் போன்றவையும் உங்கள் தினசரி வேலையில் இடம் பெறட்டும்.
  5. தீய பழக்கங்களைக் கைகழுவி விடுங்கள். புகை மது, போதை போன்றவை மன அழுத்தத்தை அதிகரிக்கும் காரணிகள். 
  6. எதிர்பார்ப்புகளைக் குறைத்துக் கொள்ளுங்கள். திருப்தியடையும் மனநிலை இருந்தால் வாழ்க்கை அழகாகும். குழந்தைகளுக்கு மன அழுத்தம் வருவதில்லை. காரணம் அவர்கள் எதையும் எதிர்பார்ப்பதில்லை. 
  7. ஒரு நல்ல பொழுதுபோக்கைக் கைவசம் வைத்திருங்கள். உங்களுக்கு ரொம்பவே பிடித்த விஷயமாய் அது இருக்கட்டும். உங்களுடைய மனதை உற்சாகமாகவும் ஆனந்தமாகவும் வைத்திருக்க அது உதவும். குழந்தைகளுடன் விளையாடுவது. செல்லப்பிராணிகளுடன் விளையாடுவது என தினமும் கொஞ்ச நேரம் செலவிடுங்கள்.
  8. பாசிடிவ் சிந்தனைகளை மனதில் கொண்டிருங்கள். நடந்து முடிந்த நிகழ்வுகளின் மோசமான பக்கத்தை அடிக்கடி நினைத்துக் கொண்டிருக்காதீர்கள்.  
  9. சின்னச் சின்ன வெற்றிகளைக் கூட கொண்டாடுங்கள். சின்னச் சின்ன வெற்றிகளின் கூட்டுத் தொகையே பெரிய வெற்றி என்பதை மனதில் எழுதுங்கள்.
  10. 10.பிறருடன் நம்மை ஒப்பிட்டுப் பார்ப்பது தேவையற்ற மன அழுத்தத்தைக் கொண்டு வந்து சேர்க்கும். அவர்களுடைய வெற்றி, தோற்றம், அந்தஸ்து, பணம் என எதை ஒப்பிட்டாலும் அது உங்களுக்கு மன அழுத்தத்தையே தரும்.

அழுத்தமற்ற மனதுஇனி

வெற்றிகளே உனது

முதியவர் அறிவுரையும்; இளையவர் அசட்டையும்

Image result for old and young

பைபிளில் ஒரு சுவாரஸ்யமான கதை உண்டு. இஸ்ரேல் நாட்டின் புதிய அரசனாக ‘ரகபெயாம்’ தேர்ந்தெடுக்கப்பட வேண்டும். அவர் சாலமோன் மன்னனின் மகன். அவனைத் தேடி நாட்டிலுள்ள மக்களெல்லாம் வந்தனர். வந்தவர்கள் அவரிடம் விண்ணப்பம் ஒன்றினை வைத்தனர்.

“ உங்கள் தந்தை எங்களுக்கு ரொம்ப கஷ்டத்தைக் குடுத்தாரு. நீங்க எங்களோட கஷ்டத்தைக் கொஞ்சம் குறைச்சீங்கன்னா, நாங்க காலம் பூரா உங்க பணியாளர்களா இருப்போம்” என்பது தான் அந்த விண்ணப்பம்.

“சரி நீங்க போயிட்டு மூணு நாள் கழிச்சு வாங்க” என சொல்லி அனுப்பினார் ரகபெயாம்.

முதலில் அரண்மனையிலுள்ள முதியோர்களைக் கூப்பிட்டு ஆலோசனை கேட்டார். “நீங்க சொல்லுங்க, என்ன பண்ணலாம் ?”

அவர்கள் அவருக்கு நல்ல ஒரு ஆலோசனை சொன்னார்கள். “அரசே..நீங்க கொஞ்சம் இறங்கி வந்து அவர்களுக்கு இரக்கம் காட்டுங்க. அப்போ உங்களுக்கு அவர்கள் பணிந்திருப்பார்கள்” !

பிறகு அவன் அவனுடைய நண்பர்களான இளைஞர்கள் சிலரிடம் ஆலோசனை கேட்டான். அவர்களோ, “என்னது ? பணிஞ்சு போறதா ? உன் வெயிட் என்னாவது ? உங்க கஷ்டத்தை நான் இன்னும் அதிகமாக்குவேன். சாட்டைக்கு பதில் முள் சாட்டை பயன்படுத்துவேன்னு சொல்லுங்க. அது தான் அரசனுக்குரிய மரியாதை” என்றார்கள்.

ரகபெயாம் முதியோரின் வார்த்தையைப் புறக்கணித்து இளைஞர்கள் சொன்னது போல் செய்தான். மக்கள் கிளர்ந்தெழுந்தனர். அவனை விரட்டியடித்து விட்டு இன்னொருவரை தங்களுக்கு அரசராக்கினார்கள்.

முதியோரின் ஆலோசனையைப் புறக்கணித்த ரகபெயாம் அனைத்தையும் இழந்து வாழ்வில் தோல்வியடைந்தான்.

“மூத்தோர் சொல் முழு நெல்லிக்காய், முன்பு கசக்கும் பின்பு இனிக்கும்” என அம்மா அடிக்கடி சொல்வார். பெரியவர்களுடைய வார்த்தைகளுக்கு வலிமை உண்டு. அவை அவர்களுடைய நீண்டகால அனுபவத்தின் வெளிச்சத்தில் வருபவை. அவை அவர்களுடைய தொலை நோக்குப் பார்வையில் வருபவை. அவர்களுடைய அறிவுரைகள் உணர்ச்சி வேகத்தில் உருவானவை அல்ல, அவை பெரும்பாலும் அவர்கள் கற்றுக்கொண்ட பாடங்களிலிருந்து பெறப்படுபவையே..

முதியவர்களோடு இணைந்து வாழ்கின்ற இளையவர்களைப் பார்த்தால் சட்டென கண்டுபிடித்து விடலாம். அவர்களுடைய அணுகுமுறையில் ஒரு கனிவும் தெளிவும் இருக்கும். முதியவர்களோடு வாழாத இளைஞர்களிடம் பரபரப்பும், பதட்டமும் இருக்கும். காரணம் எளிது. முதியவர்கள் வாழ்க்கையை பயணித்து வந்தவர்கள் அவர்களுடைய அனுபவங்களும், அணுகுமுறைகளும் இளைய தலைமுறைக்கு வரம்., அவர்களுடைய கதைகள் வாழ்வியல் பாடங்களை எளிதாக புரிய வைக்கின்றன.

தாத்தா பாட்டிகளோடு வளர்கின்ற குழந்தைகள் விரைவில் பேசுவார்கள், மன பலத்தோடு வளர்வார்கள் என ஆய்வுகள் சொல்கின்றன என்பதையும் இந்த நேரத்தில் கவனத்தில் கொள்ள வேண்டும்.

முதியவர்கள் தான், கடந்த தலைமுறைக்கும் இந்த தலைமுறைக்கும் இடையே பாலமாக இருப்பவர்கள். அந்த பாலம் உடைபடும் போது இரண்டு தலைமுறைக்கு இடையேயான அறிவுப் பகிர்தலும், உணர்வுப் பகிர்தலும் இல்லாமல் போய்விடும் அபாயம் உண்டு. முதியவர்களை அரவணைப்பது ஒன்றே இந்த உறவு நீட்சிக்கான அடிப்படை ஆதாரம் என்பதை உணர்ந்து கொள்வோம்.

பெரும்பாலும் இளைஞர்கள் உதாசீனப்படுத்தக் கூடிய ஒரு விஷயம் கலாச்சார மாற்றம் சார்ந்தது. கதைகளோடும், உரையாடல்களோடும் வளர்ந்த முதியவர்களுக்கு வாட்ஸப்களும், ஃபேஸ்புக் களும் ஜீரணிக்க முடியாத புதுமைகள். இரவு ஒன்பது மணி ஆனவுடன் தூங்கச் செல்லும் முதியவர்களுக்கு அதிகாலை வரை இளசுகள் அடிக்கும் டிஜிடல் அரட்டை ஒத்துக் கொள்ள முடியாத ஒவ்வாமை ! தங்களுடைய வாழ்க்கை முறையோடு ஒப்பிட்டு அவர்கள் காட்டும் பிடிவாதம் இளசுகளுக்கும், முதியவர்களுக்கும் இடையே மனக் கசப்புகளை உருவாக்கி விடுகிறது.

முதியவர்களோடு சேர்ந்து வாழ்தலும், அவர்களுடைய அறிவுரைகளைக் கேட்டலும் இளைஞர்களுக்கு மட்டும் வலுவூட்டும் செயலல்ல, அது முதியவர்களின் நலனுக்கும் நல்லது என்கின்றன ஆய்வுகள். அவர்களுடைய வாழ்க்கை புதுப்பிக்கப்படுவதாக அவை சொல்கின்றன.

அறுபது வயதுக்கு மேற்பட்ட முதியவர்களிடம் கேட்கும் அறிவுரை ஞானமுள்ளதாய் இருக்கும் எனவும், அவர்களே நீண்ட கால திட்டத்தை மனதில் வைத்து அறிவுரை வழங்க முடியும் என்றும் அமெரிக்காவிலுள்ள டெக்சாஸ் பல்கலைக்கழக ஆய்வு ஒன்று தெரிவித்திருந்தது. “இளைஞர்கள் பாஸ்ட் ஃபுட் போல உடனடி பயன் என்பதை மட்டுமே சிந்திக்கின்றனர். ஆராயாமல் முடிவெடுக்கின்றனர். முதியவர்களோ தொலை நோக்குப் பார்வையுடன் முடிவெடுக்கின்றனர்” ஏன்கிறார் இந்த ஆய்வை நடத்திய பேராசிரியர் ‘டாட் மடாக்ஸ்’ .

முதியவர்கள் வாழ்வில் பல தோல்விகளைச் சந்தித்து கடந்து வந்தவர்கள். பல வெற்றிகளையும் சந்தித்து வந்தவர்கள். வெற்றிகள் தந்த பரவசங்களும், தோல்விகள் தந்த பாடங்களும் அவர்களுடைய இதயத்தின் இயங்கு தசைகளெங்கும் இயங்கிக் கிடக்கும் என்பதில் சந்தேகமில்லை. அவர்கள் தவறிய இடங்களில் நாம் விழாமலும், வெற்றிகளில் மமதை கொள்ளாமலும் இருக்க அவை உதவி புரியும்.

அதே நேரத்தில் இளைஞர்களிடம் இருக்கக்கூடிய சக்தி அபரிமிதமானது. அவர்களுக்கு தொழில்நுட்பமும் இன்றைய அறிவியல் வளர்ச்சியும் தந்திருக்கும் வாய்ப்புகள் அலாதியானவை. அவற்றை இளைஞர்கள் அரவணைக்க நினைப்பார்கள். அது பல நேரங்களில் முதியவர்களுக்குப் புரிவதில்லை. புரியாதவற்றை ஒத்துக் கொள்வது அவர்களுக்கு எப்போதுமே எளிதாய் இருப்பதில்லை.

தாங்கள் வாழ்ந்த காலமே பொற்காலம் எனும் சிந்தனையை அவர்களிடமிருந்து பிரித்து விட முடியாது. நாம் முதியவர்கள் ஆகும்போது “நாம் வாழ்ந்த காலமே பொற்காலம்” என நாமும் சொல்வோம் என்பதில் கடுகளவும் சந்தேகம் இல்லை.  அத்தகைய சிந்தனைகளை கொஞ்சம் விலக்கி வைப்பதே இளைஞர்களின் வலிமையை முழுமையாய் பயன்படுத்த வழிவகை செய்யும்.

முதியவர்களோடு இணைவது எளிதாய் நடப்பதில்லை. ஒரே அலைவரிசையில் சிந்தனைகள் இருப்பதில்லை. ஆனால் இணைந்து விட்டால் அந்த நட்பும், உறவும் எளிதில் உடைபடுவதில்லை.

துரதிர்ஷ்டவசமாக இன்றைக்கு முதியவர்கள் கவனிக்கப்படுவதில்லை. அல்லது அவர்களுக்குரிய மரியாதை சரியான அளவில் கிடைப்பதில்லை. கிராமங்கள் முதியோர் இல்லங்களாகிவிட்டன. இளைஞர்கள் வேலை தேடி நகர்ப்புறங்களுக்கு இடம்பெயர்ந்து விட்டனர். நகர்ப்புறங்களில் இருக்கின்ற முதியவர்களுக்காய் சொகுசான முதியோர் இல்லங்கள் தயாராக்கப்படுகின்றன. அவர்களது அனுபவமும், அவர்களது உறவுகளும் தனிமைப்படுத்தப்படுகின்றன.

வலிகளிலேயே கொடுமையான வலி, தான் உயிருக்கு உயிராய் நேசித்த உறவுகளால் உதாசீனப்படுத்தப்படுவது தான். இன்றைக்கு முதியவர்கள் எதிர்பார்ப்பது சொகுசான வாழ்க்கையல்ல, உறவான வாழ்க்கை. முதியவர்களின் அனுபவங்களை கவனிக்காமல் விடுவது, தேசத்தின் பொக்கிஷங்களை துருப்பிடிக்க விடுவதைப் போன்றது.

இன்று நாம் விதைப்பதையே நாளை நாம் அறுவடை செய்வோம். முதுமையை நாம் மதித்தால், நமது முதுமையும் மதிக்கப்படும். அவர்கள் அன்பினாலும் உறவினாலும் கட்டப்பட்டவர்கள். அவர்களை காயப்படுத்துவது நீங்காத சாபத்தை அள்ளித்தரும்.

முதியவர்களின் அனுபவமும், இளைஞர்களின் மனபலமும் இணைந்து விட்டால் சமூக வீதியில் வெற்றிகளுக்குக் குறைவே இருக்காது !

*

சேவியர்

பெண்ணின்றி அமையாது உலகு !

Image result for mother and child

பெண்ணில்லாத உலகத்தைக் கற்பனை செய்து பார்ப்பதே கடினமான ஒன்று ! அது ஒரு வறண்ட பாலையைப் போலவோ, நிழலில்லாத வெயில் சாலையைப் போலவோ மனதுக்குள் அனலாய் படரும்.

பெண்களின் உலகம் அழகானது ! அது உணர்வுகளால் பின்னப்பட்டது. ஆண்களின் உலகம் உழைப்பினாய் ஆனது ! பெண்களின் உலகம் உறவுகளால் ஆனது ! பெண்கள் வசிக்கும் வீடுகள் பூந்தோட்டங்களாகவும், ஆண்கள் மட்டுமே உலவும் வீடுகள் உழவு நிலங்களாகவும் காட்சியளிக்கும்.

எந்த ஒரு ஆணும் முழுமையடைய வேண்டுமெனில் அவன் மூன்று பெண்களின் அரவணைப்பில் வளரவேண்டும். அதில் முதலாவதாக வருபவர் அன்னை ! ஒவ்வோர் மனிதனுக்கும் முதல் காதல் அன்னையோடு தான். கடவுளின் அன்பை, இயற்கையின் அழகை, நேசத்தின் செயலை அவன் அறிமுகம் கொள்வது அன்னையிடம் தான் !

விழியும் விழியும் நேசம் பரிமாறும் அழகை நீங்கள் அன்னை மழலை உறவில் தான் பரவசத்துடன் காண முடியும். புன்னகைக்குள் புதையல் இருப்பதை அந்த அன்னைச் சிரிப்பில் தான் அறிய முடியும். மண்ணை மிதிக்கும் முன் மெல்லிய பாதங்கள் என்னை மிதிக்கட்டும் என கன்னம் நீட்டும் அன்பல்லவா அன்னை !

தொப்புழ் கொடியில் நேசம் ஊற்றி, மழலை வழியில் மடியில் ஏந்தி, சின்ன வயதில் தோளில் தூக்கி, பருவ வயதில் பெருமிதம் சிந்தி, கடைசி வரையில் கண்ணில் சுமப்பவளல்லவா அன்னை ! முதுமையின் முக்கால் படியில் நடக்கும் போதும் அன்னைக்கு பிள்ளை மழலையாய் தான் இருப்பான். அது தான் அன்னை அன்பின் தனித்துவம் ! மறக்க முடியா மகத்துவம்.

அன்னையின் அருகாமையில் இருப்பவன் சொர்க்கத்தின் வாசனையை நுகர்வான். தலைகோதும் அன்னையின் விரல்களில் இருப்பவன் துயரத்தின் தனிமையைத் தாண்டுவான். புன்னகைக்கும் அன்னையின் நிழலில் வாழ்பவன் முழுமையாய் வாழ்க்கையை நேசிப்பான். அன்னை, ஒரு உயிரை உலகிற்கு அறிமுகம் செய்தவள் மட்டுமல்ல !
ஒரு உயிரை உலகாக அறிமுகம் செய்து வைத்தவள்.

நம் மழலைப் பாதங்களை மண்ணில் பதிய வைத்தவள் அன்னையெனில், நமது கரங்களுக்கு சிறகுகளை முளைப்பிக்க வைத்தவள் சகோதரி தான். சகோதரிகளின் குடும்பத்தில் வளர்பவன் நீரோடையின் அருகே வளரும் மரம் போன்றவன். செழிப்பு அவனுக்கு குறைவு படாது. பெண்மையைப் போற்றும் மனிதனாக அவன் வளர்வான்.

தவறு செய்யும் ஆண்களை, ‘அக்கா தங்கச்சி கூட பொறக்கலையா ?’ என்று கேட்பார்கள். காரணம், அக்கா தங்கச்சி கூட பிறந்தவன் ஒழுக்கமானவனாக இருப்பான் எனும் நம்பிக்கை. அக்கா என்பவள் இரண்டாம் அன்னை ! தங்கை என்பவள் மூத்த மகள் ! சகோதரிகளோடு பிறந்தவர்கள் கடவுளின் கருணையை கண்களில் பெற்றவர்கள். பிறரை சகோதரிகளாய் பார்க்கத் தெரிந்தோர் கருணையாம் கடவுளை கண்களில் பெற்றவர்கள்.

வண்ணத்துப் பூச்சியின் அழகிய சிறகாய், பாறை வெளியின் நிழல் கூடாரமாய், தனிமை வெளியின் நம்பிக்கைத் துணையாய் எப்போதும் கூட வருபவர் தான் சகோதரி. பகிர்தலின் புனிதத்தை முதலில் கற்றுத் தருபவள் அவள் தான். விட்டுக் கொடுத்தலின் அழகை புரிய வைப்பவள் அவள் தான். தங்கைக்கு அண்ணனாய் இருப்பது என்பது தேவதைக்கு சிறகாய் இருப்பதைப் போல சுகமானது !

இந்தப் பணத்தில் கடைசியாய் நுழைந்து, கடைசி வரை நடப்பவர் தான் மனைவி ! இறைவன் இணையாய் கொடுக்கும் துணை ! நம் உதிரத்தின் பாகமல்ல, ஆனால் நமக்காய் உதிரம் சிந்த தயாராய் இருப்பவர். தியாகத்தின் முதல் அறிமுகம் ! தன் நிலத்தை விட்டு, தன் தோட்டத்து செடிகளை விட்டு, இடம் பெயர்ந்து போய் இன்னோர் நிலத்தில் வாசம் வீசும் மலர் !

இரண்டறக் கலத்தலின் இல்லற விளக்கம் மனைவி ! பூவாய் வாழ்ந்து இந்த பூமிக்கு புதிய பூக்களைக் கொடுப்பவள் தான் மனைவி. வெளிப்படையான அன்பின் வெளிச்சப் புள்ளி. ஒளிவு மறைவற்ற நேசத்தின் தோழி. உயிருக்குள் உயிரைப் பதியமிடும் உன்னதம் ! உயிரிலிருந்து உயிரை பிரித்தெடுக்கும் பிரமிப்பு. என மனைவியின் அன்பு மகத்தானது !

மனைவியின் மௌனம் யுத்தத்துக்கு சமமான வீரியமானது. மனைவியின் கண்ணீர் பெருங்கடலின் ஆர்ப்பரிப்புக்கு சமமானது. மனைவியின் சிரிப்பு நீள் வானத்தின் பெருமழைக்கு ஒப்பானது. மனைவி என்பவள் மனிதனோடு நடக்கும் இறைவனின் பிம்பம். இமைகளில் இடையிலும் சுமைகளைத் தாங்கும் வலிமை அவளுக்கு உண்டு. ஒரு சின்ன பிரியத்தின் விசாரிப்பில் பிரபஞ்சத்தை பரிசளிக்கும் நேசம் அவளிடம் உண்டு.

பெண்மையே ஆண்மையைக் கட்டியெழுப்புகிறது. மென்மையே வலிமையின் அடிப்படை. இந்தப் பெண்களோடு இரண்டறக் கலந்து வாழ்ந்தவர்கள் வாழ்வின் அழகையும், அர்த்தத்தையும் புரிந்து கொள்கின்றனர் !

என் அம்மாவின் முந்தானை பிடித்து நான் வளர்ந்திருக்கிறேன். புரியாமையின் பொழுதுகளில் அவரோடு வழக்காடியிருக்கிறேன். நான் செய்வதே சரி என பிடிவாதம் பிடித்திருக்கிறேன். சண்டை போட்டிருக்கிறேன். எல்லா சண்டைகளிலும் வெற்றி பெறும் வலிமை இருந்தும், அதை என் உதடுகளில் சூடி புன்னகைக்க வைத்தவர் அம்மா. அப்படித் தான் அம்மாவைப் புரிந்து கொண்டேன்.

எரிச்சலின் பொழுதுகளில், ஏமாற்றங்களின் வீதிகளில், அழுத்தங்களின் அரவணைப்பில் என் ஆயுதங்களையெல்லாம் நிராயுதபாணியான மனைவியை நோக்கி வீசியிருக்கிறேன். புறமுதுகு காட்ட மறுத்த ஈகோவின் சண்டைகளிலும் கலிங்க யுத்தமாய் காயங்களை நிரப்பியிருக்கிறேன். அவை தான் மனைவியை எனக்குப் புரிய வைத்தன‌.

சகோதரியோடு சண்டையிடாத பால்ய தினங்களை எண்ணிவிடலாம். அந்த சிறு வயதுச் சண்டைகள் தான் இன்றைக்கு சண்டையில்லாத பொழுதுகளை உருவாக்கித் தந்திருக்கின்றன. அத்தகைய சண்டைகளில், விவாதங்களில், முரண்டு பிடித்தல்களில் தான் என் சகோதரிகளை நான் புரிந்து கொண்டேன்.

பெண்களோடு இணைந்து வாழும் வாழ்க்கை நமக்கு புரிதலைக் கற்றுத் தருகிறது. பிரியத்தையும் பெற்றுத் தருகிறது.

அன்னை தெரசாவின் புன்னகை மென்மையானது ! அதுவே வலிமையான அன்பின் ஆயுதம் !பேனா மென்மையானது, வலிமையான சிந்தனைகளால் உலகைப் புரட்டும் வலிமை அதற்கு உண்டு. கண்ணீர் மென்மையானது ! மாபெரும் அரசுகளை நிலைகுலைய வைக்கும் வீரியம் அதற்கு உண்டு. பெண்மை மென்மையானது ! ஆண்மையின் வெற்றி தோல்வியை நிர்ணயிக்கும் வல்லமை அதற்கு உண்டு.

அன்னையின் மேகத்தில் துளியாய் உருவாகி, சகோதரி எனும் துளிகளோடு இணைந்தே பயணித்து, மனைவி எனும் மண்வெளியில் இரண்டறக் கலந்து அன்பின் நதியாய்க் கடலை அடைவதே இனிமையான வாழ்க்கை !

பெண்மையை நேசிப்போம் !
நமக்கு நேசத்தைக் கற்றுத் தந்தது அவர்கள் தான் !

பெண்மையை மதிப்போம் !
நம் மதிப்புக்கு அடிப்படை அவர்கள் தான் !!

பெண்மையை போற்றுவோம் !
எந்த ஆண்மையிலும் மெல்லிய பெண்மை உண்டு !

இனிய மகளிர் தின நல்வாழ்த்துகள்

மன அழுத்தம் தவிர்ப்போம்

Image result for stress on Girls

“உலகிலேயே அதிக மன அழுத்தம் இந்தியப் பெண்களுக்குத் தான் !! ”. அதிர்ச்சியாய் இருக்கிறதா ? வளர்ந்த மற்றும் வளரும் நாடுகளில் நடத்தப்பட்ட மிக விரிவான நீல்சன் ஆய்வு ஒன்று தான் இப்படிக் கூறி வெலவெலக்க வைக்கிறது ! சுமார் 87% சதவீதம் இந்தியப் பெண்கள் மன அழுத்தத்தில் உழல்கிறார்களாம் ! பெண்கள் முன்னேற்றத்தில் சீரான வளர்ச்சியையும், வெற்றிகளையும் சந்தித்துவரும் இந்தியாவில் ஏன் இந்த நிலை?

இந்தியப் பெண்கள், அலுவலகங்களில் 21ம் நூற்றாண்டின் புதுமைப் பெண்களாக உலா வருகின்றனர். ஆனால் பெரும்பாலான வீடுகளிலோ கற்காலக் கணவன்களின் சிந்தனைகளின் நிழலிலேயே வாழ்கின்றனர். இரண்டு வேறுபட்ட உலகங்களில் சஞ்சரிக்கும் நிலை அவளுக்கு மன அழுத்தம் தரும் நவீன காரணிகளில் ஒன்று ! இது தவிர குழந்தை, குட்டி, வீடு, வேலை, இத்யாதி இத்யாதி என மன அழுத்தத்துக்கான காரணங்கள் நீங்கள் அறியாததல்ல !

உலகில் மன அழுத்தத்தால் பாதிக்கப்பட்டிருப்பவர்களில் 85 சதவீதம் பேரும் பெண்கள் தான் ! எல்லா இடங்களிலும் வெற்றி வாகை சூடும் பெண்களால் ஏன் மன அழுத்த மதில் சுவரை மட்டும் எகிறிக் குதிக்க முடிவதில்லை ?

முயன்றால் முடியாதது இல்லை  ! கவலையை விடுங்கள் ! வழிகாட்டத் தான் உங்கள் கைகளில் தேவதை இருக்கிறாளே !

  1. நோ சொல்வதும் நாகரீகமே !

இளைச்சவன் தலையில மிளகாய் அரைப்பதில் அலுவலகங்கள் ஒன்றுக்கொன்று சளைத்ததல்ல. உங்கள் தலையில் சக பணியாளர்களோ, உயர் அதிகாரிகளோ ஏகப்பட்ட வேலையைச் சுமத்துகிறார்களா ?

“சாரி, என்னால இவ்ளோ தான் செய்ய முடியும்” என நாகரீகமாக மறுக்கப் பழகுங்கள். ஏற்றுக் கொள்ளும் வேலையை முழுமையாய்ச் செய்து முடிப்பது மன அழுத்தத்தில் விழாமல் காக்கும் வழிகளில் ஒன்று !

ஏகப்பட்ட வேலைகளை ஏற்றுக் கொள்வது, தேவையற்ற மன அழுத்தத்தை வரவேற்பது போல. மறுப்பது நல்ல பழக்கம் தான் ! முதலில் முடியாததாய்த் தோன்றும், பிறகு பழகி விடும்.

“முடியும்னு சொல்ற வேலையை சரியா முடிச்சுக் குடுத்துடுவாங்க” எனும் பெயரையும் நீங்கள் சம்பாதிக்கலாம் !

  1. புதிய கோணம், புத்துணர்வு தரும்.

உங்களுடைய பார்வை ஒவ்வொரு விஷயத்தையும் எப்படி எடுத்துக் கொள்கிறது என்பதைக் கவனியுங்கள். “ஐயோ இதெல்லாம் முடியாது..” என எடுத்த எடுப்பிலேயே தீர்மானிக்கிறதா ? “இதையெல்லாம் செய்யக் கூடாது” என மனம் முரண்டு பிடிக்கிறதா ? கண்டுபிடியுங்கள்.

அலுவலக வேலைகளைப் பொறுத்தவரை கஷ்டமும், சிக்கலும், எரிச்சலும் எழத் தான் செய்யும். ஒரு கஷ்டமான வேலை வந்தால், “இது உங்களை நிரூபிக்க ஒரு வாய்ப்பு” என எடுத்துக் கொள்ளுங்கள். அதை விட்டு விட்டு “கஷ்டத்தை எல்லாம் என் தலையில கட்டிடுவான்” என புலம்ப வேண்டாம் !

  1. மனதுக்கு மாற்று வழி..

 

மன அழுத்தமாக உணரும் தருணங்களில் மனசுக்குப் பிடித்த விஷயங்களைச் செய்வது, மனதை உற்சாகமாக்கும் என்பது உளவியல் பாடம். எனவே எப்போதும் கொஞ்சம் உற்சாகமான விஷயங்களை கை வசம் வைத்திருங்கள்.

அது ஒரு சின்ன பிரேக் எடுத்து ஒரு கதை படிப்பதாகவும் இருக்கலாம், டைரி எழுதுவதாகவும் இருக்கலாம், அல்லது இணையத்தில் உலவுவதாகவும் இருக்கலாம். உங்களுக்கு ஏற்ற, பிடித்த ஒரு ரிலாக்‌சேஷன் கைவசம் இருக்கட்டும்.

ஒன்றுமே இல்லையேல் கண்களை மூடி, உங்களுக்குப் பிடித்த ஒரு இனிமையான சூழலை கற்பனை செய்து கொஞ்ச நேரம் பகல் கனவு காணுங்கள். தப்பில்லை !

  1. உற்சாகமான உடல் அவசியம்

மன அழுத்தம் இல்லாமல் இருக்க வேண்டுமெனில் உடல் உற்சாகமாய் இருக்க வேண்டும் என்கிறது மருத்துவம் ! அதனால் தான் மன அழுத்தம் தவிர்க்க உடற்பயிற்சியை வல்லுனர்கள் பரிந்துரை செய்கிறார்கள்.

உடலில் இரத்த ஓட்டம் சீராக இருந்தால் மனம் உற்சாகமாக இருக்கும். அதற்கு உடற்பயிற்சி கை கொடுக்கும். மூளையிலும், உடலிலும் ஆக்சிஜன் குறைவில்லாமல் இருந்தால் மூளை உற்சாகமாய் இருக்கும். அதற்கு மூச்சுப் பயிற்சி, யோகா, தியானம் போன்றவை கை கொடுக்கும்  ! உடலைப் பேணுவதன் மூலமாக மன அழுத்தத்தை விரட்டும் வழி இது !

  1. மன அழுத்தமும், மருத்துவமும்

நமக்கு மன அழுத்தம் வரும்போது உடல் ஸ்ட்ரெஸ் ஹார்மோன்களை வெளிவிடுகிறது ! இந்த ஹார்மோன்கள் உடலை உலுக்கி எடுக்கின்றன. குருதி அழுத்தத்தை எகிற வைக்கின்றன ! இதயத் துடிப்பை தாறுமாறாய் ஏற்றுகின்றன  ! குருதியில் சர்க்கரை அளவையும் அதிகரிக்கின்றன !

இது அப்படியே படிப்படியாய் தேங்கி, இதய நோய்கள், உடல் பருமன், மன நோய்கள், உடல் வலிகள் என பல்வேறு நோய்களை இழுத்து வரும். இவ்வளவு ஏன் ? பெண்களுக்கு மாதவிலக்கு தாறுமாறாகிப் போகவும் முக்கிய காரணம் மன அழுத்தம் என்கின்றனர் மருத்துவர்கள்.

  1. அதிர்ச்சி மன அழுத்தங்கள் !

ஒரு அதிர்ச்சிகரமான நிகழ்வைப் பார்ப்பதால் வரும் மன அழுத்தத்தை “போஸ்ட் ட்ரமாடிக் ஸ்ட்ரெஸ் டிஸார்டர் – PSTD என்கின்றனர். ரொம்ப மனசுக்குப் பிடித்தமானவர்கள் சட்டென இறந்து போனாலோ, ஒரு விபத்தையோ, வன்முறையையோ நேரில் பார்த்தாலோ, பாலியல் ரீதியான வன்முறையைச் சந்தித்தாலோ, அல்லது இப்படிப்பட்ட ஏதோ ஒரு கடினமான சூழல் காரணமாக உருவாகும் மன அழுத்தம் இது !

ஒருவகையில் துரதிர்ஷ்டவசமான சூழல் இது எனினும், இதிலிருந்து வெளி வரவேண்டியது அவசியம். நல்ல ஆரோக்கியமான நட்புகளை வளர்த்துக் கொள்வதும், பொழுதுபோக்குகளை அரவணைப்பதும், உடற்பயிற்சிகள் மூலம் தன்னம்பிக்கையை வலுவாக்குவதுமே வெளிவரும் வழிகள்.

  1. விட்டு விடுதலே பெற்றுக் கொள்தல் !

“கல்யாண வீடாயிருந்தா நான் தான் மாப்பிளையா இருக்கணும், சாவு வீடா இருந்தா நான் தான் பொணமா இருக்கணும். எந்த இடமா இருந்தாலும் மாலையும் மரியாதையும் எனக்குத் தான் கிடைக்கணும்” எனும் மனநிலை நிம்மதியின் எதிரி.

விட்டுக் கொடுத்தலும், இயல்பாய் வாழ்தலுமே மன அழுத்தத்தை விரட்டும் வழிகள். உங்களை மன அழுத்தத்துக்குள் தள்ளும் விஷயங்கள் என்னென்ன என பட்டியலிடுங்கள். சின்னச் சின்ன விஷயங்களை சரி செய்யுங்கள். தள்ளி விட முடிந்தவற்றை தள்ளி விடுங்கள்.

  1. மன்னியுங்கள் !

மன்னிப்பு மன அழுத்தமற்றவர்களின் தாரக மந்திரம். மன்னிக்கும் மனம் இருப்பவர்களுக்கு மன அழுத்தம் வருவதில்லை. அப்படியே வந்தாலும் அது அவர்களுக்குள் தங்குவதில்லை.

கணவன், பிள்ளைகள், தோழிகள், அலுவலகம், உறவினர்கள் என யார் தப்பு செய்திருந்தாலும் மன்னிக்கப் பழகுங்கள். அதை மனமார செய்யப் பழகுங்கள். மிகவும் கஷ்டமாய் தோன்றும் விஷயம் இது. ஆனால் பழகி விட்டால் ஈகோ இல்லாத இனிய மனம் உங்களுக்குச் சொந்தமாகும்.

  1. ஒழுங்கு நல்லது.

எல்லாவற்றிலும் அரக்கப் பரக்க ஓடி அரையும் குறையுமாய் இருப்பவர்களுக்கு மன அழுத்தம் சர்வ நிச்சயம். எட்டு மணி பஸ்ஸுக்கு 7.59க்கு ஓடுபவர்கள் ரிலாக்ஸாக இருக்க முடியாது. பல விஷயங்கள் இவர்களிடம் ஒழுங்கில்லாமல் இருக்கும்.

உதாரணமாக சாவியை எங்கே வெச்சேன் என 2 நிமிடம், செருப்பு எங்கே என 2 நிமிடம், புக்ஸ் எங்கே என இரண்டு நிமிடம் என எல்லாவற்றுக்கும் டென்ஷனாகி மன அழுத்தத்தை உருவாக்கிக் கொள்வார்கள். ஓடிப் போகும்போ பஸ் கிடைக்காது. அப்புறம் எல்லாத்துக்கும் மாமியார் தான் காரணம்ன்னு முணு முணுப்பில பி.பி இன்னும் எகிறும் !

கொஞ்சம் ஒழுங்கு பழகினால் இருக்கும் நேரத்தை சரியாய்ப் பயன்படுத்த முடியும், நேர மேலாண்மை மன அழுத்தமற்ற வாழ்க்கைக்கு உத்தரவாதம் தரும்.

  1. தூக்கம் முக்கியம்.

விடியற்காலைல எழுந்து ஓடியாடி வேலை செய்பவர்கள் பெண்கள். இரவில் நல்ல ஒரு எட்டு மணிநேர தூக்கம் இல்லாவிட்டால் எல்லாம் போச்சு ! நல்ல ஆழமான தூக்கம் மனதை அடுத்த நாளைக்காய் தயாராக்கும்.

உடலுக்கும், மனதுக்கும், மூளைக்கும் ஓய்வு ரொம்ப அவசியம். சரியாகத் தூங்காவிட்டால் உடல் சோர்வுடன் மனமும் சோர்வடையும். மன அழுத்தம் ஓடி வந்து உட்காரும். சூடாய் ஒரு கப் பால் இரவில் குடிப்பது, டிவி நேரத்தைக் குறைப்பது, மனதை இயல்பாய் வைத்திருப்பது இவையெல்லாம் பெரியவர்கள் சொல்லும் அட்வைஸ்..

  1. பெண் என்பது பெருமை !

“பெண்ணாய்ப் பிறந்து விட்டோமே” எனும் சுய பச்சாதாபம் பலருக்கும் மன அழுத்தத்தைக் கொண்டு வருவதாக ஒரு ஆய்வு சொல்கிறது. பெண் என்பது பெருமைப்பட வேண்டிய சமாச்சாரம். ஒரு மனிதனிடமிருந்து உயிரை வெளியே எடுத்தால் அவன் பிணமாவான். ஒரு பெண்ணிடமிருந்து உயிரை எடுத்தால் அவள் தாயாகிறாள் !  பெண் மட்டுமே அந்தப் பெருமைக்குரியவள் !

மங்கையராய்ப் பிறப்பதற்கே நல் மாதவம் செய்திடல் வேண்டுமம்மா.. என்றே உளமார நினையுங்கள் அதுவே உண்மை. தேவையற்ற மன அழுத்தங்களை நீங்களாக உருவாக்கிக் கொள்ளவேண்டாம் !

  1. எதிர்பார்ப்புகள் குறையட்டும்

இன்றைக்கு உலகில் இருக்கின்ற நோய்களில் 75 முதல் 90 சதவீதம் நோய்களுக்குக் காரணம் மன அழுத்தம் என மிரட்டுகிறது ஆராய்சி ஒன்று ! இந்த மன அழுத்தத்தைக் குறைக்க ஒரு எளிய வழி எதிர்பார்ப்புகளைக் குறைத்துக் கொள்வது தான்.

அடுத்தவர்களோடு நம்மை ஒப்பீடு செய்யாமல் இருந்தாலே பாதி எதிர்பார்ப்புகள் குறைந்து போகும். டிவி சொல்வதைக் கேட்காமல் பெற்றோர் சொல்வதைக் கேட்டால் தேவையற்ற எதிர்பார்ப்புகள் ஓடியே போய்விடும். “எது இல்லாமல் ஒரு மனிதனால் வாழ முடியுமோ, அது இல்லாமல் வாழ்வதே நல்ல வாழ்க்கை” எனும் தலைவர் மொழிகள் மனதில் இருப்பது நல்லது !

  1. வித்தியாசமான காரணங்கள்.

பொதுவான மன அழுத்தங்களுக்கு பல காரணங்கள் உண்டு. ஏமாற்றம், பயம், நிராகரிப்பு, எரிச்சல், ஓவர் வேலை, கடன்,தேர்வு, உறவு, நட்பு இப்படி இந்தப் பட்டியல் நீண்டு கொண்டே போகும். ஆனால் இது மட்டுமல்ல, சில வித்தியாசமான காரணங்கள் கூட மன அழுத்தம் தரலாம்.

உதாரணமாக, சிலருக்கு சத்தம் அலர்ஜியாக இருக்கும். அதிக சத்தம் கேட்டால் டென்ஷனும் மன அழுத்தமும் வந்து சேர்ந்து விடும். சிலருக்கு வெளிச்சம் மன அழுத்தத்தைத் தருமாம். சிலருக்கு சில வாசனைப் பொருட்கள் மன அழுத்தம் தருகின்றனவாம். மன அழுத்தத்துக்கு என்ன காரணம் என்பதை அறிந்து அதை விலக்குங்கள் !

  1. தவறான பழக்கங்கள்.

பெரிய நிறுவனகளிள் அங்கொன்றும் இங்கொன்றுமாக காண முடிகிறது தம்மடிக்கும் பெண்களை ! மேலை நாடுகளில் சர்வ சாதாரணமான இந்தக் காட்சி தமிழகத்திலும் இப்போது காண முடிவது ஒரு அதிர்ச்சி ! நல்ல விஷயங்களில் முன்னேற்றம் இருப்பதே உண்மையான பெண் முன்னேற்றம்.

நிகோடின் மன அழுத்தத்தை அதிகரிக்கும் என்கின்றன பல ஆய்வு முடிவுகள். அப்படியே போதைப் பழக்கம், தண்ணியடிப்பது போன்ற விஷயங்களெல்லாம் “திரில்” என பழக நினைத்தால் மன அழுத்தமும் வந்து தொற்றிக் கொள்ளும் !

  1. நல்ல விஷயங்களில் மன அழுத்தம்

என்ன கொடுமை சரவணன் இது ? நல்ல விஷயங்களில் கூடவா மன அழுத்தம் வரும் ? என நீங்கள் புலம்புவது கேட்கிறது ! வரும் என்பது தான் பதில் !

குறிப்பாக திருமணம் செய்து கொள்ளப் போகிறீர்கள் என வைத்துக் கொள்ளுங்கள். நல்ல விஷயம் தானே ? பலரும் இந்தக் காலகட்டத்தில் மன அழுத்தமாய் இருப்பார்களாம். ஒரு பதவி உயர்வு கிடைக்கிறது என வைத்துக் கொள்ளுங்கள். அப்போதும் மன அழுத்தம் சிலரை வாட்டுமாம்.

இத்தகைய நேரங்களில் தான் பலருக்கு ஆன்மீகம் கைகொடுக்கிறது. அல்லது பெற்றோர், நல்ல நண்பர்கள், வழிகாட்டிகள், பெரியவர்கள் என நம்பிக்கையானவர்களோடான உரையாடல் கை கொடுக்கும் !

  1. தகராறில்லாத தாம்பத்யம்.

கட்டில் வாழ்க்கை ஆரோக்கியமாக இருந்தால் வீட்டில் வாழ்க்கை அழுத்தமற்றதாக இருக்கும். தாம்பத்யம் தகராறாய் இருந்தாலோ வீட்டில் சமநிலை தடுமாறும். இன்றைய வாழ்க்கை முறை அதிக நேரம் வேலை செய்ய வேண்டிய சூழலை உருவாக்குகிறது. ஆனால் அதற்கு விலையாக தாம்பத்யத்தைக் கொடுத்தால் தம்பதியரை மன அழுத்தம் பிடிக்கும்.

கணவன் மனைவி கட்டில் உறவு ஒரு ஸ்ட்ரெஸ் ரிலீவர் என்கின்றனர் மருத்துவர்கள். எனவே கல்யாணம் ஆகி ரொம்ப நாள் ஆச்சு, வேலை இருக்கு, குழந்தை பொறந்துடுச்சு. அது இது என காரணங்கள் சொல்லாமல் தாம்பத்ய வாழ்க்கையைக் கட்டி எழுப்புங்கள்.

  1. தாய்மையா ? கவனம்.

“புள்ளதாச்சி கிட்டே போயாடா இதையெல்லாம் சொல்லுவே.. போக்கத்த பயலே…” என பல்லில்லாத கிழவிகள் பேசுவதை கிராமங்களில் அடிக்கடிக் கேட்கலாம். தாய்மை நிலையில் இருக்கும் பெண்கள் நல்ல இனிமையான விஷயங்களையே கேட்கவேண்டும் என்பார்கள். காரணம் அவர்களுக்கு மன அழுத்தம் வரக் கூடாது என்பது தான்.

மாயோ கிளினிக்ஸ் என்பவர் அமெரிக்காவிலுள்ள ஒரு குழந்தைகள் நல மருத்துவர். “தாய்மை நிலையில் இருக்கும் பெண்கள் மன அழுத்தமடைந்தால் அது குழந்தைகளையும் நேரடியாகப் பாதிக்கும்” என எச்சரிக்கிறார் அவர். அதனால் தான் கர்ப்பகாலத்தில் பெண்கள் நல்ல இசை, நல்ல நூல்கள், நல்ல கவனிப்பு என மனதை இதமாக்கும் விஷயங்கள் பெற்றுக் கொள்வது அவசியம்.

  1. பாசிடிவ் மனநிலை.

மன அழுத்தம் இரண்டு விதம். ஒன்று நமக்கு வெளியே நடக்கும் விஷயங்களால் நமக்கு வருவது. பெரும்பாலும் நம்முடைய கன்ட்ரோலில் அது இருப்பதில்லை. இன்னொன்று நம்முடைய உள்ளுக்குள்ளே எழுவது. இது முழுக்க முழுக்க நமது கட்டுப்பாட்டில் உண்டு. மனம் நேர் சிந்தனைகளினால் வலுவாக இருந்தால் வெளிப்புற செயல்கள் கூட நம்மை அதிகம் பாதிக்காது !

உதாரணமாக, சாலையில் உள்ள டிராபிக் கூட உங்களுக்கு மன அழுத்தம் தரலாம். ஆனால் உங்கள் மனம் ஓத்துக் கொண்டால் மட்டும் ! தாழ்வு மனப்பான்மையில் உழலாமல், பாசிடிவ் மனநிலையுடன் வாழ்க்கையை எதிர்கொள்பவர்கள் இதை எளிதில் வெற்றி கொள்வார்கள்.

மன அழுத்தத்தைக் காரணிகள் 10 சதவீதமும், நமது மனம் 90 சதவீதமும் நிர்ணயிக்கின்றன என்கிறார் சார்லஸ் ஸ்வின்டால் எனும் நிபுணர். எனவே மனதை வலுவாக்குங்கள்.

  1. மூன்று வகை !

மன அழுத்தம் அதனுடைய தன்மை அளவில் மூன்று வகை. அக்யூட் ஸ்ட்ரெஸ் – என்பது திடீரென நிகழும் ஒரு செயல் உங்களுக்குத் தருகிற மன அழுத்தம். இது பெரும்பாலும் தற்காலிகமானது. “இன்னிக்கு வேலை முடிய ரொம்ப லேட் ஆச்சு” டைப் திடீர் டென்ஷன்கள் இந்த வகை. அது நாளை சரியாகும் ! இந்த வகை அழுத்தம் தொடர்ந்து கொண்டே இருந்தால் அது “எபிசாடிக் அக்யூட் ஸ்ட்ரஸ்” ஆக மாறும். “டெய்லி வேலை முடிய லேட் ஆகுது” என்பது போல !

குரோனிக் ஸ்ட்ரெஸ் என்பது கொஞ்சம் டேஞ்சர் வகை. சின்ன வயசிலேயே வறுமை, பட்ட காலிலேயே படும் போல தொடர் தோல்விகள், வேலையே கிடைக்கல போன்ற வகை இது !. டிராமிக் ஸ்ட்ரஸ் – என்பது ஏதோ ஒரு அதிர்ச்சி தந்த மன அழுத்தம்.

எதுவானாலும், மன அழுத்தம் ஆபத்தானது என்பதை உணருங்கள். !

  1. குழந்தைகளும், மன அழுத்தமும்

குழந்தைகள் உங்களை இமிடேட் செய்யும் ! உங்களுடைய வாழ்க்கை முறையையே குழந்தைகளும் பழகும். உங்கள் வீட்டில் அழுத்தமான சூழலா ? குழந்தையையும் அது பாதிக்கும். உங்கள் வீட்டில் சண்டையா ? குழந்தையின் மனதை அது பாதிக்கும். இப்படி குழந்தையின் மன அழுத்தத்தின் முக்கியக் காரணி நீங்களே !

குழந்தைகளை நண்பர்களாகப் பழகுங்கள். “எப்பவும் நீதான் ஃபஸ்டா வரணும்” என்பது போன்ற முட்டாள் தனமான கட்டளைகளை இடாதீர்கள். தோல்வியும் வெற்றியும் சகஜம் எனும் மனநிலையை குழந்தைகளுக்குள் வளர்த்துங்கள். இரண்டையும் கற்று வளரட்டும் பிள்ளைகள்.

  1. நகைச்சுவை உணர்வு நல்லது.

நல்ல நகைச்சுவை உணர்வு உடையவர்களுக்கு மன அழுத்தம் எளிதில் வருவதில்லை. அவர்கள் வாழ்க்கையை ரொம்பவே இயல்பாக எடுத்துக் கொள்வார்கள். ரொம்ப மூடி டைப் ஆபத்தானது.

சிலர் சொல்வார்கள், “என் பையன் ரொம்ப அமைதி, யார் கூடவும் பேச மாட்டான், தான் உண்டு தன் வேலை உண்டுன்னு இருப்பான். சமத்து ! ” என. அது ஆபத்து ! நண்பர்கள், உறவினர்கள், பெற்றோர் என கலகலப்பாக இருக்கும் பிள்ளைகளுக்கு மன அழுத்தம் வராது. கவனியுங்கள் !

நல்ல காமெடி படம் போட்டாச்சும் கொஞ்ச நேரம் சிரிங்க. மன அழுத்தம் ஓடியே போய்விடும் என்கிறார் மனநல நிபுணர் லீ பெர்க்.

  1. வெயிட்டிங் டைம் நல்லது !

எங்கேயாச்சும் போனா “வெயிட்டிங் டைம்” பலருக்கும் எரிச்சல் தரும் விஷயம். அரை மணி நேரம் வரிசையில் காத்திருக்க வேண்டியிருந்தால் அவர்கள் டென்ஷனாகி மன அழுத்தத்தை கூப்பிடுவார்கள்.

மேலை நாடுகளில் மக்கள் அலட்டிக் கொள்வதில்லை. சட்டென ஒரு புத்தகத்தை எடுத்து வாசிக்க ஆரம்பித்து விடுவார்கள். நீங்களும் அதையே செய்யலாமே ? ஒரு புக் படிக்கலாம், அன்றைய தினத்தைப் பற்றி சிந்திக்கலாம், மூச்சுப் பயிற்சி செய்யலாம், ஆன்மீக வாதிகள் செபம் செய்யலாம் எவ்வளவோ செய்யலாமே ! “கறை நல்லது” மாதிரி, “வெயிட்டிங் டைம் நல்லது” என சொல்லிப் பழகலாமே !

  1. நல்லதையே சிந்தியுங்கள்

சிலருக்கு ஒரு கெட்ட பழக்கம் உண்டு. எப்போதாவது நடந்த ஒரு தப்பைப் பற்றியோ தோல்வியைப் பற்றியோ சிந்தித்துக் கொண்டே இருப்பார்கள். எல்லாவற்றையும் அதிலிருந்தே தொடங்குவார்கள். அதற்கு அப்புறம் எவ்வளவோ நல்ல விஷயங்கள் நடந்திருக்கும் அதையெல்லாம் விட்டு விடுவார்கள்.

அந்த மனநிலை உங்களுக்கு இருந்தால் முதலில் அதைத் தூக்கிப் பரணில் போடுங்கள். “நம்மால் மாற்ற முடியாதவைகளைப் பற்றிச் சிந்திக்கக் கூடாது” என்பது மகிழ்ச்சியின் பாலபாடம். அதை மனதில் கொள்ளுங்கள்.

  1. பிறரை நேசியுங்கள்.

பிறரை மகிழ்ச்சிக்குள்ளாக்கும் ஏதேனும் ஒரு செயலை தினமும் செய்ய முயலுங்கள். அது உங்களை உற்சாகமாக்கும். பிறர் நலப் பணிகள் செய்பவர்களுக்கு மன அழுத்தம் எளிதில் வருவதில்லை. உதவி தேவைப்படுபவர்களுக்கு மனமார உதவி செய்து பாருங்கள். மனம் ரொம்ப பிரஷாகும்.

அதே போல உங்களுக்குப் பிடித்தமான செயல் ஒன்றையேனும் தினமும் செய்யுங்கள். எழுதுவது ஒரு நல்ல பொழுது போக்கு. மன அழுத்தத்தை அகற்றும் ஒரு நல்ல வழி அது. அதையும் நீங்கள் செய்யலாம்.

  1. வார இறுதிகள், வரம்

வார இறுதிகளை குடும்பத்தினரோடு முழுக்க முழுக்க செலவிடுங்கள். வெளியே போய் சாப்பிடுவது, கடற்கரையில் போய் விளையாடுவது என நேரத்தைச் செலவிடுங்கள். வார இறுதிகளில் அலுவலக வேலைகளை விட்டுவிடுங்கள். வேலைகள் உங்களுக்காகக் காத்திருக்கும் என்பதே யதார்த்தம்.

அலுவல் நாட்களின் அழுத்தங்களெல்லாம் வார இறுதிகளில் வடிந்து போனால் அடுத்த வாரம் வேலை செய்ய உற்சாகம் கிடைக்கும் என்பதை நினைவில் கொள்ளுங்கள். !