நல்ல தம்பதியராய் வாழ்வது எப்படி ?

Image result for happy old couple

கணவன் மனைவி உறவு என்பது ஆழமானது. வாழ்க்கையின் அடிப்படை மகிழ்வு கணவன் மனைவி உறவின் ஆரோக்கியத்தில் தான் கட்டியெழுப்பப்படுகிறது என்பதில் ஐயமில்லை. ஆனால் சமீபகாலமாக ஏகப்பட்ட தம்பதியர் மண முறிவு கேட்டு கோர்ட் படியேறுவதை காண்கிறோம். பெரும்பாலான மணமுறிவுகளுக்கான காரணங்களை அலசும்போது வியப்பாக இருக்கிறது. “அடியாத்தீ… இதுக்கெல்லாமா டைவர்ஸ்” என்று பாம்படம் போட்ட பாட்டி கணக்காக நாமும் வியக்க நேரிடுகிறது. “குறட்டை விட்டதற்காக டைவர்ஸ்” எனும் மேலை நாட்டுக் கதைகளெல்லாம் ஒரு காலத்தில் நமக்கு வியப்பின் குறியீடு. இப்போது அதை விட உப்பு சப்பில்லாத காரணத்துக்கெல்லாம் நம் நாட்டில் டைவர்ஸ் நடக்கிறது !

தமிழனாக எதுக்கெல்லாம் பெருமைபடுவது என்பதற்கு அளவே இல்லாமல் போய்விட்டது. இந்தியாவிலேயே அதிக மணமுறிவு எனும் பெருமையும் இப்போது நமது தலையில் ஒரு முள் கிரீடமாய் வந்து அமர்ந்திருக்கிறது.

“இந்த பொண்ணுங்களைப் புரிஞ்சுக்கவே முடியல” எனும் ஆண்களின் புலம்பலும், “இந்தப் பசங்க புரிஞ்சுக்கவே மாட்டேங்கறாங்க” எனும் பெண்களின் புலம்பலும் ஒரு வட்டத்தில் ஓடிக் கொண்டே இருக்கின்றன. ஆண்களிடமும், பெண்களிடமும் தனித்தனியே பேசிப் பாருங்கள். பெரும்பாலும், “நான் வேற என்னத்த எதிர்பாக்கறேன்…” என்று சொல்லி சின்னச் சின்ன விஷயங்களைத் தான் பட்டியலிடுவார்கள்.

அப்படிப்பட்ட புலம்பல்களையும், எதிர்பார்ப்புகளையும், அலசி ஆராய்ந்து வல்லுனர்களும், அனுபவஸ்தர்களும் தரும் குறிப்புகள் இவை ! உறவுகள் வலுப்பட வாழ்த்துகள்.

நேரம் ஒதுக்குங்கள்

“அவருக்கென்ன, ஆபீஸே கதின்னு கட்டிகிட்டு அழுவாரு” என மூக்கால் அழும் மனைவியர் ரொம்ப சாதாரணம். அதே நேரத்தில் பெரும்பாலான ஆண்களின் மனதிலும் அதே போன்ற ஒரு குரல் எழும்பும். “அவளுக்கென்ன, குழந்தை, சீரியல், அது இதுன்னு  அவளோட விருப்பங்கள் தான் எப்போதும்” !  என்பது போன்ற மன ஓசையில் அது கேட்கும்.

தன் இணைக்காகவென தனியே ஸ்பெஷலாக நேரம் ஒதுக்குவது குடும்ப வாழ்க்கையின் அடிப்படை விஷயம். இதில் மாறி மாறி குற்றம் சொல்லிக் கொண்டிருந்தால் தோற்றுப் போவது தாம்பத்யம் தான். அப்படி ஒரு ஸ்பெஷல் நேரம் கிடைப்பதற்காக ஒரு சீரியலை கட் செய்வதோ, ஐ.பி.எல் மேட்சை ஆஃப் பண்ணி வைப்பதோ தாம்பத்யத்தைத் தழைக்க வைக்கும் !

ஒருவருக்கு நேரம் இருக்கும் போது அடுத்த நபர் நேரத்தை கொஞ்சம் அட்ஜஸ்ட் செய்து இணைந்து நேரம் செலவிடப் பழகவேண்டும். அதை விட்டு விட்டு, “நான் பிரியா இருக்கும்போ நீ பிஸியாயிடறே, நான் பிஸியா இருக்கும்போ நீ ஃபிரீ ஆயிடறே” என புலம்புவதிலும் அர்த்தம் இல்லை. இணைந்து அதிக நேரம் செலவிடும் தம்பதியர் வாழ்க்கையில் சிக்கல்கள் வருவதில்லை. வந்தாலும் அவை நீள்வதில்லை.

உங்கள் பெற்றோர், தாத்தா பாட்டிகளிடம் கேட்டுப் பாருங்கள். மாலை வேளைகளில் கூட்டமாய் முற்றத்தில் அமர்ந்து கதையளக்கும் காலங்களை அசை போடுவார்கள். அந்த உரையாடல்கள் தான் அவர்களுடைய குடும்ப வாழ்க்கையை பலப் படுத்திக் கொண்டிருந்தது எனும் உண்மை உணருங்கள் !


மரியாதை மனதில் மட்டுமல்ல !

 

மரியாதை என்றதும் ஏதோ, “ஐயா”, “அம்மா” என்றெல்லாம் அழைக்கச் சொல்வேனென யாரும் டென்ஷன் ஆக வேண்டாம். சொல்ல வரும் விஷயம் வேறு ! பெரும்பாலான தம்பதியர் திருமணம் ஆனதும், கணவனோ, மனைவியோ இவர் நமக்கானவர் தானே எனும் எண்ணத்தில் அலட்சியமாய் இருந்து விடுவதுண்டு. “இவரையெல்லாம் ஸ்பெஷலாய்க் கவனிக்கத் தேவையில்லை” எனும் எண்ணமும் மனதில் எழுவதுண்டு. இந்த சின்ன சிந்தனையே பல வேளைகளில் டைவர்ஸ் வரை போய் கண்ணைக் கசக்கும் !

காதல் திருமணங்கள் தோல்வியில் முடிகிறதெனில் இந்த காரணம் மிக முக்கியமானது ! என தைரியமாய் அடிக்கோடிட்டுக் கொள்ளுங்கள். “இதெல்லாம் மனைவியோட கடமைகள் தானே,” என கணவர்கள் அலட்சியமாய் திரிய வேண்டாம். “இதெல்லாம் கணவன் செய்ய வேண்டிய விஷயங்கள் தான், இதில என்ன ஸ்பெஷன் ?” என மனைவிகள் அலட்சியப் படுத்தவும் வேண்டாம். உங்கள் இணைக்கு ஏற்ற அங்கீகாரங்களைக் கொடுங்கள். செயல்களுக்கான மரியாதையையும் கொடுங்கள்.

உதவிகள் செய்கையில் சொல்கின்ற நன்றியில் ஆனாலும் சரி, பேசுகையில் எழுகின்ற புன்னகையில் ஆனாலும் சரி, முடிவுகளில் கலந்தாலோசிக்கும் மனநிலையிலும் சரி. “உன்னை நான் மதிக்கிறேன். உன்னுடைய பங்களிப்புக்கு நான் மரியாதை செலுத்துகிறேன்” எனும் தொனி எழட்டும் ! அது உங்கள் மணவாழ்க்கையை உற்சாகமாக செயல்பட வைக்கும்.

ரசனையை மதியுங்கள்.

கணவனுக்குப் பிடித்த விஷயங்கள் மனைவிக்குப் பிடித்திருக்க வேண்டுமென்பதில்லை. அதே போல மனைவிக்குப் பிடித்த விஷயங்கள் கணவனுடைய ரசனைக்குரியதாய் இருக்க வேண்டுமென்பதுமில்லை. ஆனால் அடுத்தவர் ரசனைக்கு மரியாதை செலுத்துங்கள். அது ரொம்ப முக்கியம்.

“ஆமாம்.. இவளுக்கு எப்பவும் படம் வரையறதே பொழப்பா போச்சு.” என கிண்டலடிப்பதிலோ. “ஆமா, இவரு ஜிம்முக்கு போய் கும்முன்னு இருந்து என்ன பிரயோசனம். வேற வேலையே இல்லையா ?” என நக்கலடிப்பதிலோ எந்த பயனும் இருக்கப் போவதில்லை.

அடுத்த நபருடைய விருப்பங்களையும் ரசனைகளையும் உற்சாகமாய் ஊக்கப்படுத்துங்கள். ஊனப்படுத்தாதீர்கள். “இந்த வயசுலயும் உனக்கு இப்படி ஒரு கலை தாகம் இருக்கே. சூப்பர், ரொம்ப நல்லா இருக்கு என உற்சாகமூட்டுங்கள்”. வீடுகளில் உற்சாகம் கிடைக்காதவர்கள் கலைஞர்களாகவோ, வெற்றியாளர்களாகவோ மாறுவதில்லை. அப்படியே மாறினாலும் அது அவர்களுக்கு முழு நிறைவைத் தருவதில்லை.

உங்கள் வாழ்க்கைத் துணையின் விருப்பங்களை மதியுங்கள். அவர்களுடைய ரசனைகளை ஊக்கப்படுத்துங்கள். அந்த ரசனைகளை அவர்கள் வளர்த்தெடுக்க, உங்களுடைய நேரத்தையும், உழைப்பையும், ஆதரவையும் கொடுங்கள். குடும்ப உறவு பலப்படும். அதை விட்டுவிட்டு அடுத்தவர்களுடைய ரசனைகளை விமர்சித்துத் திரிந்தால் காயங்கள் மட்டுமே கடைசியில் மிஞ்சும்.

குடும்பம் வேறு, கூட்டுக் குடும்பம் வேறு !

 

உங்கள் குடும்பம் என்பது நீங்களும், உங்கள் வாழ்க்கைத் துணையும், குழந்தைகளும் தான். மற்ற அனைவரும் உங்கள் குடும்பம் எனும் உள் வட்டத்துக்கு வெளியே வரையப்பட்டிருக்கும் வட்டங்கள் தான். எனவே உங்களுடைய முதல் கவனமும், முன்னுரிமையும் உங்கள் குடும்பத்தைக் கட்டியெழுப்புவதில் இருக்கட்டும். அதுவே குடும்ப உறவை வலுப்படுத்தும்.

“எங்க அம்மா சொன்னாங்க”, “ உங்க அம்மா முகத்தை திருப்பிக் கிட்டாங்க” என்றெல்லாம் உப்பு சப்பில்லாத காரணங்களுக்காக வாக்குவாதங்கள் செய்தால், அவை மனதுக்குள் போய் சம்மணமிட்டு அமர்ந்து கொள்ளும். அதன் பின் யார் பெரியவர், யாருக்கு அதிக பவர், யாரை மதிப்பது, யாரை தாக்குவது என்றெல்லாம் சிந்தனைகள் தாறுமாறாய் ஓடும்.

பிறரை மதிப்பதும், நேசிப்பதும் மனிதனுக்கே இருக்க வேண்டிய இயல்புகள். அதே நேரத்தில் தனது குடும்பத்தை நல்வழியில் கட்டியெழுப்புவதே கணவன் மனைவியின் முதன்மைப் பணி என்பதில் எந்த விதமான சமரசமும் வேண்டாம். எனவே உங்கள் குழந்தைகளுக்கு ஒரு நல்ல முன்மாதிரிகையான தம்பதியராய் வாழ்வதில் ஆர்வம் காட்டுங்கள்.

ஒன்றை நினைவில் கொள்ளுங்கள். குழந்தைகள் எப்போதுமே தங்கள் பெற்றோர் என்ன செய்கிறார்களோ அதையே கவனித்து பின்பற்றும். நீங்கள் “உங்கம்மா, எங்கம்மா” என சண்டை போட்டால் அதையே குழந்தைகளும் கற்றுக் கொண்டு உங்களுக்கு ஷாக் டிரீட்மென்ட் தரும் !

தனியே, தன்னந்தனியே !

திருமணமாகி ஒரு குழந்தை பிறந்து விட்டால் அப்புறம் குழந்தை அம்மாவின் கையில் ஒரு பச்சை போல குத்தப்பட்டுவிடுவது இயல்பு. அப்புறம் குழந்தை இல்லாமல் தம்பதியரை எங்கேயும் வெளியே பார்க்கவே முடியாது ! அது தப்பு என்கின்றனர் வல்லுனர்கள்.

கணவன் மனைவி உறவு வலுப்பட அவ்வப்போது தனியே தன்னந்தனியே வெளியே போய் வாருங்கள் என்கின்றனர். தனியே மனைவியை அழைத்துக் கொண்டு பீச்சில் போய் சுண்டல் வாங்குவது, குறைந்த பட்சம் காற்று வாங்குவது, ஒரு ஹோட்டலுக்குப் போய் ரிலாக்ஸாக அமர்ந்து எதையாச்சும் சாப்பிட்டுக் கொண்டே “கடலை” போடுவது என தனிப்பட்ட பிரியமான நிமிடங்கள் அவசியம்.

ஜோடியாகப் போய் சினிமா பார்ப்பதைத் தவிர்ப்பது நல்லது. அது ஒரு வகையில் வீட்டிலிருந்து சீரியல் பார்ப்பது போலத் தான். நீங்கள் போய் உட்கார்ந்து கொட்டக் கொட்ட சினிமா திரையை வெறித்துக் கொண்டே இருப்பீர்கள். அதற்குப் பதிலாக பார்க், பீச், காட்சியகங்கள் போன்ற இடங்களுக்கு போகலாம். அது உங்கள் துணை மீது தனிக்கவனம் செலுத்த உதவும்.

குழந்தைகளை ஒரு நாள் அம்மா அப்பாவிடமோ, உறவினர்களிடமோ விட்டு விட்டு ஒரு ரொமான்டிக் டவுண்ட் அப் செய்யுங்கள். உங்களுடைய காதலை மீட்டெடுக்கும் தருணங்கள் மிகவும் அவசியமானவை. உறவு பலப்படவும், காதல் ஆழமடையவும், குடும்ப வாழ்க்கை உறுதிப்படவும் இத்தகைய ரம்மியமான தனிமைப் பொழுதுகள் நல்லவை.  அதற்கான சூழலை உருவாக்கிக் கொள்ளுங்கள் !

இனிய ஆச்சரியங்கள் அவசியம் !

கல்யாணத்துக்கு முன்னாடி காதலர்கள் ரொம்பவே கிரியேட்டிவ் மனசோட இருப்பாங்க. “எதைக் கொடுத்து ஆளைக் கவுக்கலாம்”, “என்ன பரிசு கொடுத்து அசத்தலாம்” என்ற நினைப்பிலேயே அவர்களுடைய பெரும்பாலான பொழுது ஓடியே போய்விடும். “நம்ம ஆளு இருமிய நாள் இது” என சர்வ தினங்களையும், மணிகளையும், ஏன் நிமிடங்களையும் கூட நெஞ்சுக்குள் கல்வெட்டாய் செதுக்கி வைப்பார்கள்.

திருமணம் முடிந்துவிட்டால் எல்லாம் பரணில் போடப்படும். பிறந்த நாளே மறந்த நாளாகிப் போகும். “முன்னாடியெல்லாம் நம்மாளுக்கு நம்ம மேல கரிசனை அதிகம். இப்பல்லாம் நாம முக்கியமில்லாம போயிட்டோம்” என கணவனும், மனைவியும் கவலை கொள்ள இது ஒரு முக்கியமான காரணம் !

அதற்கு என்ன செய்யவேண்டுமென கேட்டால், ‘பிறந்த நாள், திருமண நாள் இவற்றையெல்லாம் நினைவில் வைத்து பரிசு கொடுக்க வேண்டும், வாழ்த்து சொல்ல வேண்டும்’ என நீங்கள் சொன்னால் நீங்கள் சாதாரண தம்பதி !

அதை விட ஒரு படி மேலே போய், உங்க ஆள் நினைக்காத நேரத்தில் ஏதேனும் வாங்கிக் கொடுத்து அசத்த வேண்டும். “கடைக்குப் போனேன், இந்த கம்மல் பார்த்தேன். உனக்கு சூப்பரா இருக்கும்ன்னு தோணிச்சு, சட்டுன்னு வாங்கிட்டேன்”. “இந்த வாட்ச் உங்க கைக்கு நல்லா இருக்கும்னு தோணிச்சு, அதான் வாங்கிட்டு வந்தேன்” என்று அவ்வப்போது ஒரு இனிய ஆச்சரியம் கொடுத்துப் பாருங்கள். உங்கள் திருமண வாழ்க்கை முறுக்குக் கம்பிகளை விட இறுக்கமானதாய் மாறிவிடும்.

இனிய ஆச்சரியங்களை காஸ்ட்லி பரிசுகள் மூலம் தான் கொடுக்க வேண்டுமென்பதில்லை. அவ்வப்போது ஒரு நன்றி சொல்வது, ஒரு சாக்லேட் வாங்கிக் கொடுப்பது, ஒரு பூ வாங்கிக் கொடுப்பது என எந்த விதத்திலும் இருக்கலாம் என்பதை நினைவில் கொள்ளுங்கள்.

கை கொடுக்கும் கை

மனைவிகளுக்கு உரிய மிகப்பெரிய குற்றச்சாட்டுகளில் ஒன்று, “வீட்ல எதையுமே செய்ய மாட்டேங்கறாரு” என்பது. கணவர்களோ, “சொல்ற எல்லா வேலையும் செய்றோமில்ல” என்பார்கள். “இதெல்லாம் சொல்லாமலேயே செய்யணும்” என பதில் பாட்டு வரும். இந்த உரையாடல் இப்படியே நீண்டு, ஒரு சின்ன சண்டையாகி, “இனிமே நீ சொல்றதையும் செய்யப்போறதில்லை” என ஈகோ இடித்து நிற்கும் !

இதை ரொம்ப சிம்பிளாகக் கையாளலாம். மனதில் இருக்கும் வேறு ஏதோ ஒரு எரிச்சலை பரஸ்பரம் எறிந்து விளையாடுவதை முதலில் நிறுத்த வேண்டும். “ இதைச் செய்யுங்கள் “  என ஒரு வேலையைக் கொடுப்பதில் ஒன்றும் குறைந்து போவதில்லை. அப்படியே ஒரு வேலை உங்கள் கண் முன்னால் கிடந்தால் அதை தானாகவே முன்வந்து செய்வதிலும் தப்பேதும் இல்லை.

இப்படி இரண்டு பேருமே வேலைகளைப் பகிர்ந்து கொள்ளும் போது அன்பு தழைக்கும். “ஏதாச்சும் வேலையிருக்கா” என்று கேட்டால், “எவ்ளோ இருக்கு, தேடிப் புடிச்சு செய்யுங்க” என்று சொல்லி எரிச்சலூட்டாமல் ஒரு சக நண்பனைப் போல பழகுங்கள். வேலைகளைப் பகிர்ந்து கொள்ளுங்கள்.

தனது மனைவி தனது பணிகளில் உதவுகிறாள் என்பதில் கணவன் மிகவும் புளகாங்கிதம் அடைவான். தனது கணவன் தனக்கு ஒத்தாசை செய்கிறார் என்பதில் மனைவிகள் ரொம்பவே பெருமிதம் அடைவார்கள்.

அப்புறமென்ன, கை கொடுக்கும் கையாய் இணைந்து செயல்படுங்கள். குடும்ப வாழ்க்கை ஆலமரம் கணக்கா செழித்து வளரும் !

செவிமடுங்கள் !

பேசுவது எல்லோருக்கும் ரொம்பப் பிடித்தமான விஷயம். பால்ய கால கதைகள் முதல், நேற்றைக்கு சீரியலில் நடந்த விஷயம் வரை அலசிக் காயப் போடுவதில் அப்படி ஒரு அலாதி இன்பம். ரொம்ப நல்லது ! பேசுவது மன அழுத்தத்தை ரொம்பவே குறைக்கும் என்கின்றனர் வல்லுனர்கள்.

நியூட்டனின் மூன்றாம் விதி தெரியும் தானே ? “எல்லா விசைக்கும் சமமான எதிர் விசை ஒன்று உண்டு”. அப்படி இருந்தால் தான் ஒரு சமநிலை கிடைக்கும். நீங்கள் எப்போதும் பேசிக்கொண்டே இருந்தால் அந்த சமநிலை பாதிக்கப்படும். பேசுவதும் கேட்பதும் கலந்த மனநிலையே நமக்கு அழகு ! எனவே கேளுங்கள்.

உங்கள் வாழ்க்கைத் துணைக்கு உங்களிடம் சொல்ல ஏராளம் கதைகள் இருக்கும். அன்றைய தினம் நடந்த நிகழ்ச்சிகளையோ, சோகங்களையோ, மகிழ்வுகளையோ எதையேனும் சொன்னால் கேளுங்கள். உன்னிப்பாகக் கேளுங்கள். சும்மா டிவி பார்த்துக்கொண்டோ, செய்தித் தாள் வாசித்துக் கொண்டோ, செல்போன் நோண்டிக்கொண்டோ கேட்பது போல பாவனை செய்ய வேண்டாம்.

பேசுவதை ஆத்மார்த்தமாய்க் கேட்பது, தம்பதியரிடையே இருக்க வேண்டிய மிக முக்கியமான பண்பு. சொன்னால் நம்புங்கள் ! உங்கள் வாழ்க்கையில் இறுக்கத்தை இந்த ஒரு சின்ன விஷயம் அதிகரிக்கும் என்பது சர்வ நிச்சயம் !

தவறு, தவறு தான் !

பெரும்பாலான சிக்கல்களுக்குக் காரணம் தவறுகளை நியாயப்படுத்த முயல்வது தான். செய்தது தவறு தான் என்று அப்பட்டமாய் தெரிந்தால் கூட அந்தச் செயலுக்கு ஒரு அட்டகாசமான காரணம் இருப்பதைப் போல ஜோடிக்க முயல்வது உறவை பலவீனப்படுத்தும்.

“ஆமா, அது தப்பு தான்.. சாரி” என சொல்வதற்கு பலருக்கும் வாய் வருவதில்லை. காரணம் ஈகோ. இல்லையென்று சொல்பவர்கள் கொஞ்சம் ரீவைன்ட் செய்து ‘எப்போது நீங்கள் செய்த ஒரு தவறை ஒப்புக் கொண்டீர்கள்’ என்று யோசித்துப் பாருங்கள். அப்போது புரியும். இப்போது கூட ‘நான் தப்பே செய்யாதவன்’ என நீங்கள் நினைத்தால் நீங்கள் ஈகோவின் உச்சத்தில் இருக்கிறீர்கள் என்று அர்த்தம்

தவறு செய்யாத மனிதர்கள் இல்லை. மேலதிகாரியிடம் செய்யாத தப்புக்கெல்லாம் மன்னிப்புக் கேட்கக் கூச்சப்படாத நாம் வீட்டில் மட்டும் செய்த தப்புக்கே மன்னிப்புக் கேட்க உலக மகா தயக்கம் காட்டுவோம் இல்லையா ?

இயல்பாய் இருங்கள். தவறு செய்தால் அதைத் தவறு என ஒத்துக் கொள்ளுங்கள். சிலர் தவறே செய்யாவிட்டால் கூட,”சரி பரவாயில்லை இது என்னோட தப்பு தான்” என இன்னும் ஒரு படி மேலே போய் தாழ்மையாய் இருப்பார்கள். அத்தகையவர்களுடைய வாழ்க்கை சூப்பர் ஸ்ட்ராங் ஆக இருக்கும் என்பதில் ஐயமில்லை.

எனவே தப்பை ஒத்துக் கொள்வதில் இம்மியளவும் தயக்கம் வேண்டாம். உங்கள் வாழ்க்கைத் துணையிடம் தானே தவறை ஒத்துக் கொள்கிறீர்கள் ! சந்தோசத்துல பெரிய சந்தோசம் அடுத்தவங்களைச் சந்தோசப் படுத்திப் பார்ப்பது தானே !

பெருமை பேசுவது நல்லது.

இந்த விஷயத்தில் பெண்கள் சூப்பர் ஸ்டார்கள் தான். எப்போதுமே தனது கணவனை பொது இடத்தில் விட்டுக் கொடுக்க மாட்டார்கள். வீட்டில் என்ன தான் போர்க்களம் நடந்தாலும் மற்றவர்களிடம் பேசும்போது கணவன் ஒரு சூப்பர் சாது போல சொல்லி சந்தோசப்படுவார்கள்.

இப்படி தம்பதியர் மாறி மாறி தங்கள் துணையைப் பற்றி நல்லதாகப் பேசும் போது மனதிலும் நல்ல சிந்தனைகள் வளரும். உயர்வுகளும், தாழ்வுகளும் கலந்தே வருவது தான் வாழ்க்கை. அந்த நிலையில் ஒருவரை ஒருவர் தாங்கிப் பிடிக்கும் மனநிலை ஆரோக்கியமானது. ஒருவருடைய பலங்களைப் பற்றி அதிகம் சிந்திப்பதும், அதை கௌரவப் படுத்துவமும் குடும்ப உறவை ஆரோக்கியமாக்கும்.

பலவீனங்களையும், பலங்களையும் கூட்டிக் குழைத்த ஒரு கூட்டாஞ்சோறு தான் வாழ்க்கை.  உங்கள் துணையின் பலத்தை நீங்கள் பெருமையாய் பாருங்கள். அவருடைய பலவீனங்களைப் பற்றி பிறருடன் பேசவே பேசாதீர்கள். பலவீனங்களை பலங்களாக மாற்ற உங்கள் துணைக்கு உதவுங்கள்.

உங்கள் வாழ்க்கைத் துணையின் பலவீனங்களைப் பட்டியலிடத் துவங்கினால் குடும்ப வாழ்க்கை தோல்வியடையும். பெரும்பாலான தவறான உறவுகளுக்கு இத்தகைய மனநிலையே காரணம். எனவே எச்சரிக்கையாய் இருங்கள்.

எந்தச் சூழலிலும் உங்கள் துணை தாழ்வு மனப்பான்மையோ, அவமானமோ ஏற்பட வழி வகுக்காதீர்கள். அது உங்கள் அன்னியோன்யத்தையே அழித்து விடும்.

தீர்ப்பிடாதீர்கள் !

தம்பதியர் செய்யும் மிகப்பெரிய தவறுகளில் ஒன்று தீர்ப்பிடுவது. “உன்னைப் பத்தி எனக்குத் தெரியாதா ? நீ எப்பவுமே அப்படித்தான்” என்பது ஒரு உதாரண வாக்கியம். நீ இப்படித்தான் என்று ஒரு நபரை சொல்வது அந்த நபரை ஊனமாக்கும். ஒருவேளை அந்த திட்டுக்குத் தகுதியில்லாதவர் எனில் அது இரட்டைப் பாதிப்பை உருவாக்கும்.   எல்லோரும் மன திடத்துடன் இத்தகைய விமர்சனங்களை ஏற்றுக் கொள்வதில்லை. எனவே கவனம் தேவை.

எப்போதோ ஒரு தடவை நடந்த தவறை குத்திக் காட்டிக் கொண்டே இருப்பது சிலருக்கு ஒரு சுவாரஸ்யமான அனுபவம். இது ஒரு வகையில் ஒரு மனநோய் என்கின்றனர் உளவியலார். பிறரை காயப்படுத்துவதன் மூலமாக தனது மனசுக்கு மகிழ்ச்சி உருவாக்கிக் கொள்ளும் சேடிஸ்ட் மனநிலையின் வடிவம் இது. இந்த பழக்கம் யாருக்காவது இருந்தால் மூட்டை கட்டி கண்காணாத தேசத்தில் எறிந்து விட்டு அடுத்த வேலையைப் பாருங்கள். இது ரொம்ப டேஞ்சர்.

தவறுகள் நடப்பதும், சண்டைகள் நடப்பதும் இயல்பு. அப்படி நடக்காவிட்டால் தான் ஏதோ பிரச்சினை என்று அர்த்தம். எனவே சின்னச் சின்ன சண்டைகளுக்காக கவலைப்படாதீர்கள். அவற்றை வைத்துக் கொண்டு அடுத்தவரை தீர்ப்பிட்டு ஆறாக் காயத்தை உண்டுபண்ணாதீர்கள். அது உங்களுடைய குடும்ப வாழ்க்கையை ரொம்பவே பலவீனப்படுத்தி விடும்.

விட்டுக் கொடுத்தல்

கொஞ்சம் பழைய காலத்துத் தம்பதியரை சந்தியுங்கள். உங்கள் ஊர் தாத்தா பாட்டியிடம் போய் குடும்ப வாழ்க்கையைப் பற்றி அவ்வப்போது பேசுங்கள். அவர்கள் வாழ்க்கையின் ரகசியங்களைச் சொல்வார்கள். அப்படிச் சொல்லும் விஷயங்களில் நிச்சயமாய் “விட்டுக் கொடுத்தல்” இருக்கும்.

விட்டுக் கொடுத்தல் நீண்டகால குடும்ப வாழ்க்கைக்கு ரொம்ப அவசியம். அதே நேரத்தில் விட்டுக் கொடுத்தலை விருப்பத்துடனும், மகிழ்வுடனும் செய்யவேண்டும். “உனக்காக நான் விட்டுக் கொடுக்கிறேன்” என்று சொல்வது விட்டுக் கொடுத்தலின் அர்த்தத்தையே அழித்து விடும்.

சிலர் விட்டுக் கொடுத்தலை தியாகம் போல செய்வார்கள். அது அவர்களுடைய தலையில் ஒரு கர்வக் கிரீடத்தைச் சூட்டும்., அது தவறு என்பதை நான் சொல்லத் தேவையில்லை. விட்டுக் கொடுத்தல் இயல்பாக நடக்க வேண்டும். ஒரு பிரச்சினையை சுமூகமாகத் தீர்ப்பதிலோ, அடுத்த நபருடைய தன்மானத்தைக் காக்கும் நிலையிலோ எப்படி வேண்டுமானால் அது நிகழலாம்.

எனவே விட்டுக் கொடுத்தல் பழகுங்கள். அது தான் குடும்பத்தின் அன்பையும், கண்ணியத்தையும் கட்டிக் காக்கும். நீண்டகால உறுதியான பந்தத்துக்கும் உத்தரவாதம் நல்கும்.

நோயில் உடனிருத்தல்

நோய்கள் விரும்பத் தகாதவை. ஆனால், உங்களுடைய ஆழமான அன்பைப் பகிர்ந்து கொள்ளக் கிடைக்கும் வாய்ப்புகளாக அவற்றைக் கருதலாம். தீயதிலும் ஒரு நன்மை உண்டு என்று சொல்வதைப் போல ! இத்தகைய தருணங்களில் உங்களுடைய அன்பான கவனிப்பில் உங்கள் துணையின் மனதை வலிமைப்படுத்துங்கள்.

“உடம்பு சரியில்லாம இருந்தப்போ தாங்க என்னோட மனைவியைப் பற்றித் தெரிஞ்சுகிட்டேன்” அல்லது “எனக்கு உடம்பு சரியில்லேன்னதும் லீவ் போட்டு வீட்லயே இருந்து கவனிச்சுகிட்டாரு” என்பன போன்ற உரையாடல்கள் உங்கள் காதலின் ஆழத்தை சொல்லிச் செல்பவை.

உடல் பலவீனமாய் இருந்தாலும் சரி, மன பலவீனமாய் இருந்தாலும் சரி, அந்த சூழலில் உங்கள் வாழ்க்கைத் துணையின் கரம்பற்றி அவர்களுக்கு பணிவிடை செய்யுங்கள். காதலுடன் கவனிப்பதைப் போல அன்பின் ஆழத்தைப் பறைசாற்றும் விஷயங்கள் அதிகம் இல்லை.

எக்காரணம் கொண்டும் நோயாகவோ, பலவீனமாகவோ இருக்கும் போது உங்கள் துணை தனிமையில் வாடும்படி செய்யாதீர்கள். அது அவர்களுடைய மனதைப் புண்படுத்தும். உங்களுடைய குடும்ப வாழ்க்கையையும் பலவீனப்படுத்தும்.

சின்னச் சின்ன விஷயங்களின் கூட்டுத் தொகையே அன்பான வாழ்க்கை. அது பெரிய பெரிய நிகவுகளினால் கட்டியெழுப்பப் படுவதாய் பலரும் நினைத்து விடுகிறார்கள். சின்னச் சின்ன உடல் பலவீனங்களில் கூட உங்களுடைய அன்பையும் கவனிப்பையும் வெளிப்படுத்துங்கள். அது உங்கள் குடும்ப வாழ்க்கையை பலப்படுத்தும்.

தாம்பத்யம் தழைக்கட்டும்

காதலிக்கும் போது காதலர்கள் கரங்கள் இரண்டையும் சேர்த்து காங்கிரீட் போட்டது போல இணை பிரியாமலேயே இருப்பார்கள். கண நேரம் கையை விட வேண்டுமென்றால் கூட அவர்களுக்கு உலக மகா கஷ்டமாய் தோன்றும். சின்னச் சின்ன சில்மிஷங்களில் மனம் சிறகு கட்டிப் பறக்கும்.

அப்படியே திருமணம் நடந்த பிறகும் அந்த உறவு நீடிக்கும். ஹனிமூன் கால சிலிர்ப்புகளும், சந்தோசங்களும் நாளாக நாளாக கொஞ்சம் கொஞ்சமாக குறையத் துவங்கும். அதற்குப் பிறகு கணவன் மனைவியரிடையே சில்மிஷங்களும், சிலிர்ப்புகளும் இடைவெளி விட்டே தொடரும்.

இன்னும் சில ஆண்டுகளுக்குப் பிறகு, குழந்தைகள் பிறந்த பின் அந்த இடைவெளி ஏகப்பட்ட தூரமாகிவிடும். காதலிக்கும் போது இருந்த சிலிர்ப்புகளெல்லாம் காணாமல் போயிருக்கும். படுக்கையறையில் பெரும்பாலும் குறட்டைகளே நிரம்பி வழியும்.

குடும்ப உறவு பலமடைய வேண்டுமெனில், படுக்கையறை பந்தம் ஆரோக்கியமாய் வளர வேண்டும். படுக்கையறை பலமாய் இருக்க, படுக்கையறைக்கு வெளியே தம்பதியரிடம் அன்பும், நிம்மதியும், மகிழ்வும் நிரம்ப வேண்டும். “இனிமே இதெல்லாம் எதுக்கு..” என ஒதுங்கும் மனப்பான்மைகள் கள்ளத் தொடர்புகளுக்கு அழைப்பு விடுக்கும்.

எனவே படுக்கையறை உறவைப் பலப்படுத்துங்கள், அது குடும்ப வாழ்க்கைக்கு ரொம்ப அவசியம்.

சந்தேகம் வேண்டாம்

தம்பதியரிடையே எது வந்தாலும் வராவிட்டாலும் சந்தேகம் மட்டும் வரவே கூடாது ! சந்தேகமே இல்லாமல் இதுதான் வேர்களில் விழும் விஷம் ! ஒரு சின்ன நெருப்புப் புள்ளியாய் விழும் விஷயம் தான் சந்தேகம். அந்த சந்தேகத்துக்கான காரணிகளை முதலில் கண்டறிந்து அதை விலக்க வேண்டியது ரொம்ப அவசியம்.

மனம் திறந்த உரையாடல்கள் சந்தேகத்தை விலக்கும். அதிலும் குறிப்பாக அலுவல் தொடர்பான நண்பர்கள், தோழிகள் போன்றவர்களை தம்பதியர் இருவருமே நன்கு அறிந்து வைத்திருப்பது நல்லது. அது சந்தேகங்களை கொஞ்சம் விலக்க உதவலாம். ஒருவருக்கு சந்தேகம் வருவது போல தோன்றினால் உடனே காச் மூச் என கத்தாமல் நிதானமாய் விளக்க முயலவேண்டும். அதுவே சிறந்த வழி.

“ஆமா ஊர்ல எல்லாருக்கும் அஞ்சுமணிக்கு வேலை முடியுது, இவருக்கு மட்டும் ஒன்பது மணிக்கா” என உசுப்பேத்தி விடும் பெருசுகளையோ, பக்கத்து வீட்டு விஷமிகளையோ தூர ஒதுக்க வேண்டியது முதல் வேலை ! “ஏதோ விஷயம் இருக்கு ..” என ஊகித்துக் கொன்டு துப்பறியும் சாம்புவாக நீங்கள் மாறாமல் இருக்க வேண்டியது இரண்டாவது வேலை.

சந்தேகம் வந்து விட்டால் உங்கள் உரையாடலை அதிகப்படுத்துங்கள். அடுத்த நபருடைய மனநிலையை புரிந்து கொள்ள முயலுங்கள். பதட்டப்படாதீர்கள் ! பொறுமையும், அன்பும் இத்தகைய சூழலில் மிகவும் அவசியம்.

“காமலைக்காரனுக்கு கண்டதெல்லாம் மஞ்சள்” ங்கற பழமொழி எதுல உண்மையோ இல்லையோ, இங்கே சர்வ சத்தியம். சந்தேகத்தோட பார்க்கும்போ செல்போன் சிணுங்கினா கூட சந்தேகம் வரும். சந்தேகத்தை மனதில் வைத்துக் கொண்டிருந்தால் அன்பு பாதிக்கப்படும். உறவு பலவீனப்படும். பிறகு அதற்கும் காரணம் ஏதோ ஒன்று என சந்தேகப்பட ஆரம்பித்து விடுவீர்கள் !

நன்றியும், பாராட்டும் ! 

நம்ம ஊரில் மருந்துக்குக் கூட கிடைக்காத விஷயங்கள் இந்த நன்றியும், பாராட்டும். அதுவும் குடும்பத்துக்கு உள்ளே இவையெல்லாம் பரிமாறப்படுமா என்றால் அது குறிஞ்சிப் பூ போல ரொம்பவே அபூர்வம் என்பதை ஒத்துக் கொண்டு தான் ஆகவேண்டும். “வீட்ல இருக்கிறவங்களுக்கு எதுக்கு நன்றி சொல்லணும் ?” என்று சிலர் வெளிப்படையாகவே பேசுவதும் உண்டு.

இன்னும் சிலர் “சந்திரனுக்கு ராக்கெட் விட்டா மட்டும் தான் பாராட்டுவேன்” கணக்கா ரொம்ப பிகு பண்ணுவார்கள். ‘இதுக்கெல்லாம் எதுக்கு பாராட்டணும். இது அவ வேல தானே’ என முணுமுணுப்பார்கள். மனசே ரிலாக்ஸ் பிளீஸ் ! பாராட்டு என்பது மலையைத் தூக்கிட்டு வந்தா மட்டுமே குடுக்க வேண்டிய சமாச்சாரமல்ல ! அப்படின்னா அனுமாரை மட்டும் தான் நீங்க பாராட்ட முடியும். ஒரு சின்ன வேலையை அழகாகச் செய்தாலே பாராட்டலாம் !

வீடு சுத்தமாய் இருந்தால், சமையல் நடந்தால், தோட்டத்துக்கு தண்ணி ஊற்றினால், கூட மாட ஒத்தாசை செய்தால் என எந்த விஷயத்துக்கு வேண்டுமானாலும் நீங்கள் நன்றிகளையும் பாராட்டையும் கொடுக்கலாம். ஒருபணியைச் செய்தாலே நீங்கள் நன்றி சொல்லலாம். காரணம், குடும்பத்தில் நடக்கும் எல்லா செயல்களிலும் ஒரு அன்பும் கரிசனையும் நிச்சயம் இருக்கும்.

சின்னச் சின்ன விஷயங்களுக்கு நன்றியும், பாராட்டும் சொல்லும் போது தம்பதியரிடையே அன்னியோன்யமும், அன்பும் அதிகரிக்கும். இருவருக்கும் இடையே நல்ல புரிதலும் வளரும்.

இணைந்தே முடிவெடுங்கள்.

கணவன் மனைவியிடையே இறுக்கம் அதிகரிக்க வேண்டுமா ? ஒரு எளிய வழி இது. எல்லா விஷயங்களையும் நீங்கள் இருவரும் சேர்ந்தே முடிவெடுங்கள். ஒரு வீடு வாங்குவது போன்ற பெரிய விஷயம் ஆனாலும் சரி, ஒரு செடி வாங்குவது போன்ற சின்ன விஷயமாய் இருந்தாலும் சரி. இருவருமாக கொஞ்சம் பேசி முடிவெடுத்தால் ரொம்பவே அன்னியோன்யம் வளரும்.

நாம் மதிக்கப்படுகிறோம், நமது ஐடியாக்கள் வரவேற்கப்படுகின்றன என்பது உளவியல் ரீதியாக மனதைத் தெம்பாக்கும் ! இரண்டாவது, எல்லா விஷயங்களிலும் பங்களிப்பு இருக்கும் போது மனம் அதில் ரொம்ப அதிகமாக ஈடுபாடு காட்டும்.

“இந்த விஷயங்களையெல்லாம் பொம்பளைங்க கிட்டே கேக்கக் கூடாது. நாமளா முடிவெடுத்துடணும்” எனும் முனகல்களை கணவர்கள் ஒத்தி வையுங்கள். “ அவருக்கு இந்த விஷயங்களெல்லாம் தெரியாது” எனும் டயலாக்களை மனைவிகள் கொஞ்சம் ஒத்தி வையுங்கள். எந்த முடிவையும் இருவரும் சேர்ந்து இணைந்தே எடுங்கள்.

இணைந்து முடிவெடுப்பதில் உரையாடலும், விட்டுக் கொடுத்தலும், ஆரோக்கியமான விவாதங்களும் எல்லாம் கலந்திருக்கும். விஷயங்களை அலசும் போது தனிப்பட்ட விமர்சனங்கள், தாக்குதல்கள் எல்லாம் கூடவே கூடாது ! அப்புறம் ‘உள்ளதும் போச்சுடா நொள்ளக்கண்ணா’ என புலம்ப வேண்டி வரலாம் !

அடுத்த நபராய் மாறி சிந்தியுங்கள்

கரண்ட் கட் இல்லாத வீடு கூட இருக்கலாம். ஆனா சண்டை இல்லாத வீடு இருக்கவே இருக்காது. ஆனா அந்த சண்டை எவ்ளோ நேரம் நீளுது, எவ்ளோ சீக்கிரம் முடிவுக்கு வருது என்பதை வைத்துத் தான் குடும்பத்தோட வெற்றி நிர்ணயிக்கப்படும்.

சூரியன் அணைவதுக்கு முன்னாடி உங்க கோபங்கள் எல்லாம் அணைந்து போச்சுன்னு வெச்சுக்கோங்க, உங்க குடும்பம் அக்மார்க் அட்டகாசம். அதே சண்டை, கோபம், எரிச்சலோட தூங்கறீங்கன்னா கொஞ்சம் கஷ்டம். மறுநாளும் அதே எரிச்சலோட எழுந்தீங்கன்னா ரொம்பவே கஷ்டம். எனவே சண்டை போடுங்க, ஆனா எவ்ளோ சீக்கிரம் அதை சமரசப் புள்ளியில் இணைத்து சகஜமாக முடியுமோ அதைப் பண்ணுங்கள்.

அதுக்கு ஒரு சிம்பிள் டெக்னிக் இருக்கிறது. எந்த ஒரு சண்டையிலும், விவாதத்திலும் நீங்கள் அடுத்த நபராய் மாறி சிந்திக்க வேண்டும். “அறிவே கிடையாதா உனக்கு” என்று நீங்கள் உங்கள் கணவரைத் திட்டறீங்க என வைத்துக் கொள்ளுங்கள். அந்த வார்த்தை ஒரு சண்டைக்கான முதல் புள்ளியாய் இருக்கலாம். ஒருவேளை இதே வார்த்தையை உங்கள் கணவர் உங்களிடம் சொன்னால் உங்கள் மனநிலை எப்படி இருக்கும் என நினைத்துப் பாருங்கள். “சே.. அப்டி சொல்லியிருக்கக் கூடாது” என உள்மனம் சொல்லும்.

இப்படி  ஒவ்வோர் நிகழ்விலும், ஒவ்வோர் சந்தர்ப்பத்திலும், ஒவ்வோர் விவாதத்திலும் நீங்கள் அடுத்த நபராய் மாறி சிந்தியுங்கள். “எங்க அம்மாவுக்கு போன் பண்ணும்போ அவர் திட்டினா எப்படி இருக்கும் ?”, “என் பிரண்ட் கிட்டே பேசும்போ மனைவி திட்னா எப்படி இருக்கும் ?” என்ற சிந்தனைகள் நிச்சயம் உங்களைப் பக்குவப் படுத்தும்.

இப்படிச் சிந்திப்பதில் இரண்டு நன்மைகள் உண்டு. ஒன்று நீங்கள் திட்டுவதையும், சண்டை போடுவதையும் குறைப்பீர்கள். இரண்டாவது, மன்னிப்புக் கேட்கும் மனதை உருவாக்கிக் கொள்வீர்கள்.

 தொட்டதுக்கெல்லாம் குறையா ?

சிலர் தொட்டதுக்கெல்லாம் குறை சொல்லிக் கொண்டே இருப்பார்கள். நின்னா குற்றம், நடந்தா குற்றம், பேசினா குற்றம் என நச்சரிக்கும் தம்பதியரின் குடும்ப வாழ்க்கை ஒரு நரகம் என்பதில் சந்தேகமே இல்லை. வெளியே சிரித்து ஆனந்தமாய் இருந்தாலும் அந்த கணவனோ மனைவியோ உள்ளுக்குள் மன உளைச்சலிலேயே இருப்பார்கள்.

அப்புறம் தும்மினா கூட, “ஐயோ இது அவருக்குப் பிடிக்குமோ பிடிக்காதோ ? திட்டுவாரோ கத்துவாரோ” என மனதுக்குள் கேள்விகள் ஓடும். எந்த செயலைச் செய்தாலும், “ஐயோ பொண்டாட்டி கத்துவாளோ” எனும் குரல் கணவனுக்குள் ஓடும். இந்த சிந்தனைகள் இருந்தால் இயல்பாக இருக்கவே முடியாது. எப்படா ஆள் வீட்ல இல்லாம இருக்கும், கொஞ்சம் ரிலாக்ஸா இருக்கலாம் என்று தான் மனம் சொல்லும்.

சின்னச் சின்ன விஷயங்களைப் பெரிது படுத்தாமல் இணைந்து செயல்படுவதே ஆரோக்கியமான விஷயம். “கொஞ்சம் செடிக்கு தண்ணி ஊத்தறீங்களா ? ” என்று சொல்வதும் “வீட்ல ஒரு வேலையும் செய்றதேயில்ல, செடிக்கு தண்ணியாவது ஊத்தலாம்ல… வெட்டியா இருக்கிறதுக்கு… எல்லாத்தையும் நானே செய்யணும்ன்னா எப்படி ?” என நீளமான வெடிப்பதும் ஒரே விஷயத்தைத் தான் சொல்கின்றன. ஆனால் இரண்டுக்கும் மலைக்கும் மடுவுக்குமான வித்தியாசம்.

முதலாவது வாக்கியம் மகிழ்வுடன் வேலையைச் செய்ய வைக்கும். இரண்டாவது வாக்கியம் எரிச்சலுடன் வேலையைச் செய்ய வைக்கும். வேலை நடக்கும் ஆனால் அன்னியோன்யம் அகலப்படும். எனவே உங்களுடைய வார்த்தைகளைக் கவனியுங்கள். குறை சொல்லாமல் இருப்பதற்கும், உங்கள் வாக்கியங்களில் கனிவு கலப்பதற்கும் நெருங்கிய தொடர்பு உண்டு.

மனித நேயம் பழகுங்கள்.

குடும்ப வாழ்க்கை என்பது வெறுமனே நான்கு சுவர்களுக்குள் முடிந்து போகும் விஷயமல்ல. குடும்பங்களில் விதைக்கப்படும் செயல்கள் சமூகத்தில் அறுவடையாகும். சமூகத்தோடு ஒத்து வாழாத குடும்பங்கள் வலிமையான குடும்பமாக வளர்வதில்லை. சமூக வீதியில் மக்களோடு நாம் எப்படிப் பழகுகிறோம் என்பதை வைத்தே ஒரு குடும்பத்தின் பெருமை நிலைநாட்டப்படும்.

மனித நேயம் மனதில் நிரம்பி இருக்கும் மக்களுக்கு சமூகத்தோடு வாழ்தல் மிகவும் எளிதாகிவிடுகிறது. சமூகம் என்பது நம்மைச் சுற்றிய மக்களின் கூட்டுத் தொகை தானே ! பக்கத்து நபர்களுக்கு நம்மால் ஆன உதவிகளைச் செய்வது, வேலைக்காரர்களையும் நம்மைப் போன்ற மனிதர்களாய் மதிப்பது, ஏழைகளின் வயிற்றில் அடிக்காமல் இருப்பது போன்ற அடிப்படை விஷயங்களில் நமது மனித நேயம் வெளிப்படும்.

“அவளோட மேக்கப்பைப் பாத்தாலே தெரியல, அவ ஆள் புடிக்கத் தாண்டி போறா என்பன போன்ற பிறருடைய பெயரைக் காயப்படுத்தும் உரையாடல்களை அடிக்கடி கேட்கலாம். இந்த புறணி, பிறர் விமர்சனம், கிசுகிசு, பொல்லாங்கு போன்றவையெல்லாம் சமூக உறவுகளை உடைக்கும் காரணிகள். நல்ல விஷயங்களையே பேசுங்கள். முதலில் உங்களை கிண்டலடிப்பார்கள், பிறகு கொஞ்சமாய் தங்களையே அவர்கள் மாற்றிக் கொள்வார்கள். நீங்கள் மனித நேயம் மிக்கவராய் இருப்பதைப் பார்க்கும் உங்கள் பக்கத்து நண்பர்களும் அதே போல மாறினால் அது ஒரு சமூக மாற்றத்துக்கான ஆனந்த அறிகுறிதான்.

நீங்கள் எப்படியோ அப்படியே உங்கள் பிள்ளைகளும் அப்படித் தான் வளரும். எனவே உங்கள் எதிர்கால சந்ததியை மனித நேயம் மிக்கவர்களாக வளர்க்க வேண்டுமெனில்  நீங்கள் முதலில் மனித நேயம் மிக்கவர்களாய் இருக்க வேண்டும் என்பதை நினைவில் கொள்ளுங்கள் !

பெண்கள் : வீட்டிலிருந்தே வேலை செய்யலாம்

 Image result for Working from home Women

  1. சமையல் திறமை இருந்தால் வீடுகளில் இருந்தபடியே ஊறுகாய், வடகம், அப்பளம் என போட்டுத் தாக்கலாம். காலம் காலமாக நிரூபிக்கப்பட்ட பெண்களுக்கான நவேலை இது.
  2. டே கேர் செண்டர் ஆரம்பிக்கலாம். கணவனும் மனைவியும் அலுவலகம் ஓட, குழந்தைகளை எப்படி கவனிப்பதென கைகளைப் பிசையும் தம்பதியர் தான் உங்கள் கஸ்டமர். பொழுது சிறப்பாகப் போகும், வருமானம் வஞ்சகமில்லாமல் வந்து சேரும் !
  3. நல்ல டைப்பிங் தெரிந்தால் டேட்டா எண்ட்ரி வேலை செய்யலாம். வீட்டில் இருந்தபடியே தரும் ஆவணங்களை கம்ப்யூட்டரில் டைப் செய்து ஏற்றவேண்டும். பெரும்பாலும் அது தான் வேலை !
  4. “ஆன்லைன்” கால் செண்டர் வேலைகள் வீட்டிலிருந்தபடியே கூட செய்ய முடியும். அதற்கான இடங்கள் எங்கே இருக்கின்றன என்பதைக் கண்டறிந்து முயன்றால் பலன் கிடைக்கும்.
  5. டிரான்ஸ்கிரிப்ஷன் ஒரு நல்ல வேலை. ஒலிவடிவில் வரும் பைல்களைக் கேட்டு அதை வார்த்தைகளாக டைப் செய்ய வேண்டும். அது தான் வேலை. ஆனால் என்ன, குரல் சொல்வதைப் என்பதைப் புரிந்து கொள்ள சிறப்புப் பயிற்சி எடுக்க வேண்டியிருக்கும். ஒரு வார்த்தைக்கு இத்தனை காசு என நல்ல லாபம் தரக்கூடிய வேலை.
  6. கைவினைப் பொருட்கள் செய்வதும் நீண்டகாலமாக பெண்கள் வெற்றிகரமாகச் செய்து வரும் ஒரு வேலையே.
  7. வெட்டிங் பிளானர் – என்பது திருமணங்களுக்குத் தேவையான அனைத்தையும் ஏற்பாடு செய்து கொடுக்கும் பணி. கார்ட் எங்கே அச்சடிக்கலாம் முதல் சாம்பார் எங்கே சமைக்கலாம் என்பது வரை பிளான் பண்ணும் வேலை. திறமையான சிலர் வேலைக்கு இருந்தால் மொத்தமாக ஆர்டர் பிடித்து நல்ல லாபம் ஈட்டலாம்.
  8. பிறந்த நாள் கேக் போன்றவை செய்வது ஒரு நல்ல சுவாரஸ்யமான வேலை. கேக் டெக்கரேஷன் பண்ணுவதே ஒரு கலை. அதைக் கற்றுக் கொண்டால் இதில் பிரகாசிக்கலாம். அருகிலுள்ள பேக்கரி, ஹோட்டல் போன்றவற்றை அணுகுவது பயனளிக்கும்.
  9. கார்ட்டூன் போடும் கலை உங்களுக்கு வாய்த்திருக்கிறதா ? பத்திரிகைகளுடன் தொடர்பு வைத்துக் கொண்டு கார்ட்டூனிஸ்டாகக் களமிறங்கலாம்.
  10. நல்ல டிரெய்னிங் திறமை இருந்தால் நிறுவனங்களுக்கு டிரெயினராகப் போகலாம். பல நிறுவனங்கள் தேவைக்கேற்ப நிறுவனங்களுக்குச் சென்று டிரெயினிங் எடுக்கின்றன.
  11. ஃபாஷன் டிசைனிங் – வீட்டிலிருந்தபடியே செய்யக் கூடிய ஒரு நல்ல வேலை. நல்ல கற்பனை வளமும், உலக ஞானமும் இருந்தால் இதில் சாதிக்கலாம்.
  12. செல்லப்பிராணிகளைக் கவனிப்பது, அதற்குப் பயிற்சி கொடுப்பது இவையெல்லாம் நகர்ப்புறங்களில் நல்ல வருவாய் தரக்கூடிய பணி. செல்லப்பிராணிகளுக்குப் பயிற்சி கொடுப்பது ஒரு மணி நேரத்துக்கு சராசரியாக 200 ரூபாய் பெற்றுத் தரும். இதற்கு அருகிலுள்ள பெட் ஷாப் மற்றும் கேனல்களில் தொடர்பு கொள்வது மிகவும் முக்கியமானது.
  13. டெய்லரிங் பெண்களுக்குப் பொருத்தமான வேலை. நன்றாகக் கற்றுக் கொண்டால் வீட்டில் இருந்தபடியே நன்றாகச் சம்பாதிக்கலாம்.
  14. டெய்லரிங் போலவே எம்பிராய்டரி போடுவதும் ஒரு நல்ல வேலை. சரியான பயிற்சி இருக்க வேண்டியது முக்கியம்.
  15. “கிளாஸ் பெயிண்டிங்” இப்போது மிகவும் பாப்புலர். நல்ல கவன சக்தி இருந்தால் போதும். கண்ணாடி பெயிண்டிங்கில் கலக்கலாம்.
  16. ஃபாஷன் ஜூவல்லரி உருவாக்குவது இப்போதைய சூப்பர் பிஸினஸ். வேலையில் இருக்கும் பெண்கள் கூட ஓய்வு நேரங்களில் இதில் இறங்கி நல்ல காசு பார்க்கிறார்கள். இதற்கும் பயிற்சி நிலையங்கள் எக்கச் சக்கமாக உள்ளன.
  17. வீட்டைச் சுற்றி கொஞ்சம் இடம் இருந்தால், நல்ல செடிகளுடன் கூடிய நர்சரி வைக்கலாம்.
  18. வெப் டெவலப்பர் – இப்போதைய ஹாட் வேலைகளில் ஒன்று. வீட்டில் இருந்தபடியே தனியாருக்குத் தேவையான வலைத்தளங்கள் உருவாக்குவது தான் இந்த வேலையே. ஒரு விளம்பரம் கொடுத்தால் வேலை தேடி வர வாய்ப்பு உண்டு.
  19. யோகா நன்றாகத் தெரியுமெனில், ஒரு யோகா டீச்சர் ஆகிவிடுங்கள். உடலுக்கும், மனதுக்கும் பயிற்சி. நல்ல வருமானமும் வரும்.
  20. “புரூஃப் ரீடிங்” , எடிட்டிங் போன்ற வேலைகள் வீட்டிலிருந்தபடியே செய்யலாம். பதிப்பகங்கள், நிறுவனங்களுடன் தொடர்பு இருக்க வேண்டியது அவசியம். இன்றைய இண்டர்நெட் வாழ்க்கை ஆன்லைன் புரூஃப் ரீடிங்கை வளமாக்கியிருக்கிறது.
  21. பல மொழிகளில் உங்களுக்குப் புலமை இருக்கிறதா ? நீங்கள் லக்கி தான். இன்றைக்கு டிரான்ஸ்லேஷன் வேலைக்கு நிறைய தேவை இருக்கிறது ! வீட்டில் இருந்தபடியே செய்யலாம் இதை.
  22. முன்பணம் அனுப்புங்கள், வேலை உங்கள் வீடு தேடி வரும் என வரும் அழைப்புகளை நிராகரியுங்கள். எந்த தொழிலில் இறங்கும் முன்னரும் முழுமையான புரிதலுடன் இறங்குங்கள்.
  23. கிராமப்புறப் பெண்களுக்கு கயிறு திரித்தல், பாய் முடைதல், பனை ஓலையில் கலைப் பொருட்கள் செய்தல் என வாய்ப்புகள் பல.
  24. ஊதுபத்திகள் செய்வது மத நம்பிக்கை இருக்கும் வரை லாபமான பிசினஸ் தான். அதற்குரிய தொழில் நுட்பத்தைக் கற்றுக் கொண்டால் எளிதில் செய்ய முடிகின்ற வேலை தான்.
  25. மிதியடிகள் செய்வது ஒரு நம்பிக்கை தரும் வேலை. துணி, கயிறு, நைலான், என பல்வேறு பொருட்களைக் கொண்டு மிதியடிகள் செய்யலாம். விற்பனைக்கான வழியை முடிவு செய்த பிறகே இதில் இறங்குங்கள்.
  26. இ-பே போன்ற நம்பிக்கையான வலைத்தளங்களில் பொருட்களை வாங்கி விற்பது ஒரு லாபகரமான வேலை. சிறிது நாள் இந்த இ-பே செயல்பாடுகளை உன்னிப்பாகக் கவனித்தபின் களத்தில் இறங்குவது நல்லது.
  27. நீங்களே ஒரு வலைத்தளம் உருவாக்கலாம், அது பிரபலமாகிவிட்டால் விளம்பரங்கள் மூலம் சம்பாதிக்கலாம். அதிலேயே ஆன்லைன் ரேடியோ ஆரம்பிக்கலாம். இவற்றுக்கெல்லாம் விளம்பரங்கள் மட்டுமே வருமானம். எனவே முன் அனுபவம் உடையவர்களைச் சந்தித்து ஆலோசனை பெறுங்கள்.
  28. வீட்டுத் தயாரிப்பாக அழகுப் பொருட்கள், பாட்டி வைத்திய மருந்துகள் போன்றவற்றைத் தயாரிக்கலாம்.
  29. எந்தப் பொருளைத் தயாரிக்க விரும்பினாலும் அதற்குரிய விற்பனை வழிகள் உண்டா என்பதைக் கவனிக்க வேண்டும். அந்தப் பொருள் அந்த சூழலுக்குத் தேவையானது தானா ? அதை மக்கள் வாங்குவார்களா எனும் ஒரு சிறிய அளவிலான சர்வே நடத்துவது மிக முக்கியம்.
  30. எவ்வளவு பணம் தேவைப்படும் என கணக்கிடுங்கள். அதைப் போல இரண்டு முதல் மூன்று மடங்கு வரை பணம் செலவாகும் என்பதை நினைவில் கொள்ளுங்கள்.
  31. தோல்வி குறித்த பயமின்மையும், சரியான தெளிவும், போதிய பண வசதியும் சிறு தொழில்கள் துவங்க முக்கியமான மூன்று தேவைகள்.
  32. இன்சூரன்ஸ் ஏஜெண்ட் ஆவது திறமையானவர்களுக்கு ஒரு நல்ல பிசினஸ்.
  33. கம்ப்யூட்டர் ஹார்ட் வேர் தெரிந்தால் வீட்டிலேயே ரிப்பேர் கடை ஒன்றை ஆரம்பிக்கலாம். இது கம்யூட்டருக்கு என்றல்ல, எந்தெந்த ஏரியாவில் ரிப்பேர் பார்க்கும் திறமை உண்டோ அதிலெல்லாம் நுழையலாம்.
  34. விளம்பர நிறுவனங்களுக்கு டிசைன் செய்து கொடுப்பது, வாசகங்கள் வடிவமைத்துக் கொடுப்பது போன்ற விளம்பர நிறுவனம் சார்ந்த பல வேலைகள்.
  35. பியூட்டி பார்லர் ஒன்றை ஆரம்பிப்பது ஒரு சிறப்பான வருமானம் தரக்கூடிய வேலை. உங்கள் வீடு நல்ல இடத்தில் இருந்தால் ஆரம்பிக்கலாம். அதற்குரிய பயிற்சி எடுக்க வேண்டியது அவசியம்.
  36. அனிமேஷன் வேலைகள் பெரும்பாலும் வீடுகளில் இருந்து செய்யக்கூடிய வகையில் வந்து விட்டன. முன் அனுபவம் உடைய யாரையாவது அணுகினால் நல்ல தகவல்கள் கிடைக்கும்.
  37. குழந்தைகளுக்கு கம்ப்யூட்டர் பயிற்சி கொடுப்பது ஒரு நல்ல வேலை. அளவான வருமானத்துக்கும், பொழுது போக்குக்கும் உத்தரவாதம்.
  38. நல்ல சமையல் கில்லாடியெனில் சமையல் பள்ளி ஒன்றை ஆரம்பித்துப் பாருங்களேன். புதுமையாகவும் இருக்கும், சமைக்கத் தெரியாதவர்களுக்கு நல்ல வழிகாட்டுதலாகவும் இருக்கும் !
  39. பொம்மை செய்வது பெண்களுக்கு எளிதான ஒரு பணி. பொம்மை உருவாக்கும் கம்பெனிகளிடமிருந்து ஆர்டர் பெற்று வீட்டிலேயே பொம்மை தயாரிக்கலாம்.
  40. ஈவண்ட் மேனேஜ்மெண்ட் – இளம் பெண்கள் திறமையாய் செய்யக் கூடிய ஒரு வேலை. பெரிய நிறுவனங்களுடன் கை கோர்த்துக் கொண்டால் இலட்சக்கணக்கில் கூட சம்பாதிக்கலாம் !
  41. பறவைக் கூடுகள், மீன் தொட்டிகள் போன்றவற்றை அழகாக வடிவமைத்து விற்கலாம்.
  42. பொக்கே, பலூன் பொம்மை போன்றவை தயாரிக்கலாம்.
  43. போட்டோ பிரிண்டிங், பிரேமிங் போன்றவை ஆரம்பிக்கலாம். கொஞ்சம் முதலீடு இதற்கு அவசியம்.
  44. வீடு, அலுவலகங்கள் போன்றவற்றின் – இண்டீரியர் டிசைனர் வேலை, இதற்கு அனுபவமும், விருப்பமும், பொறுமையும் தேவை.
  45. செல்லப்பிராணிகளைப் பாதுகாப்பது, ஒரு இடத்திலிருந்து இன்னொரு இடத்துக்கு அனுப்பி வைப்பது, பெட் ஷாப் வைப்பது, டிரெயிங் கொடுப்பது என செல்லப்பிராணிகளைச் சுற்றி நிறைய வேலைகள் செய்யலாம்.
  46. வேலைக்கான வழிகாட்டுதல், ரெஸ்யூம் தயாராக்குதல், கன்சல்டன்சி வைத்தல் என புதியவர்களுக்கு வழிகாட்ட நிறைய வேலைகள்.
  47. போட்டோக்களை வீடியோக்களாக்குவது, வீடியோவில் எடிட்டிங் செய்வது என கம்ப்யூட்டர் சார்ந்த சில வேலைகளைத் திட்டமிடலாம்.

Thanks : Devathai, Monthly

காதல் மொழிகள் ஐந்து !

காதல் மொழிகள் ஐந்து !

THE FIVE LOVE LANGUAGES

Image result for Romantic couple

“என்ன சொன்னாலும் என் பொண்டாட்டி புரிஞ்சுக்கவே மாட்டேங்கறா” என புலம்பாத கணவர்களையும், “அவருக்கு என்னிக்கு இதெல்லாம் புரியப் போவுது” என புலம்பாத மனைவியரையும் கண்டுபிடிப்பது என்பது தும்பிக்கையில்லாத யானையைக் கண்டுபிடிப்பது போல சிரமமானது.

எல்லா தம்பதியருக்குள்ளும் இருக்கும் ஒரு மிகப்பெரிய சவால் இது. புரிந்து கொள்ளக்கூடிய வாழ்க்கைத் துணை அமைந்தால் வாழ்க்கை அற்புதமாக இருக்கும். மனைவியைப் புரிந்து கொள்ளும் கணவனும், கணவனைப் புரிந்து  கொள்ளும் மனைவியும் அமைவது இறைவன் கொடுத்த வரம் எனலாம்.

ஆனால் பெரும்பாலான குடும்பங்களில் இந்த புரிதல் இருப்பதில்லை. அதனால் நதிபோல நடக்க வேண்டிய குடும்ப வாழ்க்கை சுனாமி பொல சுருட்டி அடிக்கும். சண்டைகளும், சச்சரவுகளும், ஏக்கங்களும், எதிர்பார்ப்புகளும், நிராசைகளுமாய் தான் பொழுதுகள் கடந்து போகும்.

“குடும்ப வாழ்க்கைன்னாலே அப்படித் தான் பாஸ்.. நாம ஒண்ணும் பண்ண முடியாது. இது நம்மளோட விதி”. என புலம்பும் மக்களைப் பார்த்து கேரி சேப்மேன் சொல்கிறார், “விதியாவது மண்ணாவது, இந்த சிக்கலையெல்லாம் சரி பண்றது ரொம்ப ஈஸி”.

“சும்மா காமெடி பண்ணாதீங்க சார்”. என நம்பாமல் பார்க்கும் மக்களுக்காக அவர் எழுதிய புத்தகம் தான் “த ஃபைவ் லவ் லேங்குவேஜஸ்”. தமிழில் ஐந்து காதல் மொழிகள் என சொல்லலாம்.

ஒவ்வொரு மனிதனும் புரிந்து கொள்ளக்கூடிய ஒரு மொழியோ, சில மொழிகளோ இருக்கும். தமிழே தெரியாத ஸ்பெயின் நாட்டுக் காரனிடம் போய், “சௌக்கியமா இருக்கீங்களா” என்று கேட்டால் “டே கே ஸ்பெஸ் அவ்லான்டோ” என்று ஸ்பேனிஷ்வார்கள். “என்ன சொல்றேன்னு எனக்குப் புரியலே” என்பது தான் அதன் பொருள். எல்லோருக்கும் புரியக்கூடிய மொழியில் பேசினால் தான் அந்த பேச்சுக்கு ஒரு அர்த்தம் உண்டு. உரையாடலின் அடிப்படை இது தான். பேசுபவர் எளிமையாய் பேசவேண்டும், கேட்பவர் முழுமையாய் உள்வாங்க வேண்டும். அவ்வளவே.

“கரடியா கத்தறேன்.. கேக்குதா பாரு” என கத்தினாலும் புரியாத மொழியில் பேசினால் புரியாது தான் ? இந்த விஷயத்தைத் தான் அவர் தனது நூலில் எழுதியிருக்கிறார். அந்த நூல் சாதாரண நூல் இல்லை. ஒரு கோடி பிரதிகள் விற்றுத் தீர்ந்த நூல். அமெரிக்காவின் டாப் செல்லிங் லிஸ்டில் பல ஆண்டுகள் ஃபெவிகால் போட்டு அமர்ந்து கொண்ட நூல். உலகெங்கும் சுமார் ஐம்பது மொழிகளில் மொழிபெயர்க்கப்பட்டு கொண்டாடப்பட்ட நூல்.

அதெப்படி சாத்தியம் ? அவ்வளவு பெரிய அப்பாடக்கரா அந்த ஆசிரியர் என தேடினால் கிடைக்கும் விஷயங்கள் சுவாரஸ்யமானது. உளவியலில் டாக்டர் பட்டம், கலையில் முதுகலைப்பட்டம், ஆன்மீக கற்பித்தல் பிரிவில் முதுகலைப்பட்டம் என வாங்கி அடுக்கியவர். சுமார் முப்பது ஆண்டுகள் குடும்ப கவுன்சிலிங் துறையில் முழுமையாக ஈடுபட்டவர், என கிடைக்கின்ற தகவல்கள் அவருடைய நூல் மீதான மரியாதை உயர்த்துகிறது.

அப்படி என்ன தான் சொல்கிறார் ?

ஒவ்வொரு மனிதனுக்கும் ஒரு காதல் மொழி உண்டு. ஒரு தாய்மொழியோடு கூட கொசுறாய் இன்னொரு மொழி இருப்பது போல இரண்டாவது காதல் மொழி ஒன்றும் இருக்கும். மூன்றாவது மொழி கூட சிலருக்கு இருக்கலாம். ஆனால் முதல் இரண்டு மொழிகளும் தான் மிக முக்கியமானவை.

உங்கள் வாழ்க்கைத் துணைக்கு எந்த காதல் மொழி புரியும் என்பதைக் கண்டு கொள்வதில் இருக்கிறது வாழ்க்கையின் வெற்றி. அப்படிக் கண்டு கொண்டால், அதன்பின்னர் நீங்கள் அந்த மொழியில் உங்கள் வாழ்க்கைத் துணையிடம் பேசலாம். உங்கள் குடும்ப உறவு நெருக்கமாய் வளரும்.

அப்படி என்னென்ன காதல் மொழிகள் ?

  1. பாராட்டு வார்த்தைகள்
  2. தரமான நேரம்
  3. பரிசு பெறுதல்
  4. ஒத்தாசை விரும்புதல்
  5. தொடுதல்

இந்த ஐந்தும் தான் அந்த காதல் மொழிகள். இந்த ஐந்து மொழிகளில் உங்கள் வாழ்க்கைத்துணைக்கு எந்த மொழி புரியும் ? எந்த மொழி பிடிக்கும் ?

  1. பாராட்டு.

சிலருக்கு வார்த்தைகள் மிக முக்கியம். காதலாகிக் கசிந்துருகும் மனம் கணவனுக்கு இருந்தாலும், “நீ ரொம்ப அழகா இருக்கே செல்லம்” என கணவன் ஒரு முறை செல்லமாய்ப் பேசுவதை மிகவும் விரும்புவார்கள். அவர்களுக்கு அடிக்கடி அவர்களுடைய செயல்களைப் பாராட்டுவதோ, அவர்களுடைய குணாதிசயங்களைப் பாராட்டுவதோ, அல்லது உறவு நிலையை பாராட்டுவதோ, தோற்றத்தைப் பாராட்டுவதோ மிகவும் உற்சாகமளிக்கும்.

உங்களுடைய வாழ்க்கைத் துணையின் காதல் மொழி பாராட்டு எனில், உங்களுடைய வாழ்க்கை அதைச் சுற்றி இருக்க வேண்டும். மனைவி வைக்கும் மீன் குழம்பு சூப்பராக இருக்கிறதென ரெண்டு சட்டி குழம்பை காலி பண்ணுவதோடு நின்று விட வேண்டாம். “நீ மீன் குழம்பு வெச்சா மீனுக்கே நாக்குல எச்சில் ஊறும்” ந்னு ரெண்டு பாராட்டு வாக்கியத்தையும் சேர்த்து சொல்லுங்க, வாழ்க்கை அமோகமா இருக்கும்.

  1. தரமான நேரம்.

தரமான நேரம் என்பது ஸ்பெஷலாய் உங்கள் வாழ்க்கைத் துணைக்கு மட்டுமாக நீங்கள் ஒதுக்கும் நேரம். அது டின்னர் முடிந்தபின் மொட்டை மாடியில் போய் அமர்ந்து பேசும் நேரமாய் இருக்கலாம். சாயங்காலம் காலார நடந்து போய் இயற்கையை ரசிக்கும் நேரமாய் இருக்கலாம். அல்லது ஒரு காபி ஷாப் போய் ஒற்றைத் தேனீரை ஒன்றரை மணி நேரம் குடிக்கும் சமயமாகவும் இருக்கலாம். செல்போனை மூர்ச்சையாக்கி, வேறெந்த கவனச் சிதறலுக்கும் இடக் கொடுக்காமல் இருப்பது தான் தரமான நேரம்.

நாலுமணி நேரம் கிரிக்கெட் பார்த்து  விட்டு, “காலைல இருந்தே வீட்ல தானே இருக்கேன்” இதை விட வீட்டுக்கு என்ன நேரம் செலவிடணும் என கேட்பது இதில் சேராது.

இங்கே மனம் விட்டுப் பேசுவதும், மனம் திறந்துக் கேட்பதும் தான் பிரதானம். பெரும்பாலும் பெண்களுக்கு இந்த காதல் மொழி தான் தேவையாக இருக்கும். அத்தகைய வாழ்க்கைத் துணை உங்களுக்கு அமைந்தால் நீங்கள் அவர்களோடு அதிக நேரம் செலவிட வேண்டும். அதை விட்டு விட்டு வேறென்ன செய்தாலும் அவர்கள் திருப்தியடைவதில்லை.

  1. பரிசு

சிலருக்கு பரிசுகள் பெறுவது ஆனந்தமாய் இருக்கும். அந்தப் பரிசின் விலை முக்கியமல்ல, ஆனால் அது கணவனிடமிருந்து கிடைக்கிறது, அல்லது மனைவியிடமிருந்து கிடைக்கிறது எனும் சிந்தனை தான் பெரிது. ஒரு காட்பரீஸ் சாக்லேட்டாகவோ, நாலுசவரன் சங்கிலியாகவோ எப்படி வேண்டுமானாலும் இருக்கலாம்.

எதிர்பாராத நேரத்தில் நீட்டும் ஒரு சின்னப் பரிசு அவர்களை திக்கு முக்காட வைத்து விடும். உறவில் இருக்கும் விரிசலிலெல்லாம் அது சட்டென காங்கிரீட் போட்டு அடைத்து விடும். பரிசு என்பது, “நான் உன்னை நேசிக்கிறேன், நான் உன்னை நினைக்கிறேன்’ என்பதன் வெளிப்பாடாய் அவர்கள் புரிந்து கொள்வார்கள். உங்கள் வாழ்க்கைத் துணையின் காதல் மொழி பரிசு எனில், அதை அடிக்கடி, வித்தியாசம் வித்யாசமாய் கொடுங்கள். தப்பித் தவறி கூட அவர்களுடைய பிறந்த நாள், திருமண நாள் உட்பட எந்த ஸ்பெஷல் டேயையும் பரிசு இல்லாமல் செலவிடாதீர்கள்.

 

  1. ஒத்தாசை

சிலருடைய காதல் மொழி “ஒத்தாசை” எதிர்பார்ப்பது. வேலையில் கூட மாட ஹெல்ப் பண்ணினால் சந்தோசப்படுவார்கள். உங்கள் மனைவியின் காதல் மொழி இதுவானால், “காய்கறி வெட்டவா ?” என கேட்டால் அவர்கள் ரொம்ப சந்தோசப்படுவார்கள். அழுக்காய் கிடக்கும் துணிகளை அள்ளி வாஷிங் மெஷினில் போட்டால் சிலிர்த்து போவார்கள். காயப் போட்ட துணிகளையெல்லாம் எடுத்து அடுக்கி வைத்தால் மகிழ்ந்து போவார்கள்.

அன்புடன் உதவி செய்ய தயாராய் இருப்பதே முக்கியம். இதை சும்மா ஒரு கடமைக்காகச் செய்யக் கூடாது. ஆத்மார்த்தமான அன்புடன் செய்ய வேண்டும் என்பது மிகவும் முக்கியம். இந்தக் காதல் மொழி உடையவர்களிடம் போய், “நீ சூப்பரா காய்கறி வெட்டறே” என பாராட்டு மொழி சொன்னால் “ஆமா… வெட்டியா இருந்துட்டு கருத்து சொல்ல வந்துட்டாரு…” என வெடிப்பார்கள்.

 

  1. தொடுதல்

தொடுதல் என்பது தாம்பத்ய உறவு மட்டுமல்ல. வீட்டில் தினசரி நடக்கும் செயல்களில் கணவன் மனைவியிடையே இருக்கின்ற சின்னச் சின்ன அன்பின் தொடுதல்களை, பாராட்டின் தொடுதல்களை, சில்மிஷத் தொடுதல்களை எல்லாம் இதில் சேர்த்துக் கொள்ளலாம்.

காலை நேரம், குட்மார்னிங் சொல்லி கொடுக்கின்ற முத்தம், வாழ்க்கைத் துணைக்கு ஒருவேளை ஆடி கார் வாங்கிக் கொடுப்பதை விட ஆனந்தம் தரலாம். அப்படியெனில் அவருடைய காதல் மொழி என்ன என்பது உங்களுக்குப் புரிந்திருக்கும்.

இந்த ஐந்து காதல் மொழிகளும் தான் அதி முக்கியமானவை. உங்கள் வாழ்க்கைத் துணைக்கானது எந்த காதல் மொழி என்பதை நீங்கள் கண்டு பிடிக்க வேண்டும். அதற்குத் தக்கபடி நீங்கள் உங்களுடைய காதல் வாழ்க்கையை இயக்க வேண்டும்.

உங்கள் துணைவிக்கு பரிசு தான் காதல் மொழி எனில், “துணி காயப் போடவா ?” என கேட்டால் கடுப்பாவார்கள். “கிளம்புப்பா காத்து வரட்டும் ” என்பார்கள்.

உங்கள் வாழ்க்கைத் துணைவருக்கு பாராட்டு தான் காதல் மொழி எனில் அவரிடம் போய், “வாங்க கொஞ்ச நேரம் பார்க்ல் ல போய் உட்காரலாம்” என்று சொன்னால் பதறிப் போவார்கள். “பார்க்ல என்ன இருக்கு, இங்கே ஓரமா படில உக்காந்துக்கலாமே” என்பார்கள்.

எனவே உங்கள் காதல் பார்ட்னருக்கு எது முதன்மையான காதல் மொழி என்பதைக் கண்டு கொள்ளுங்கள். பாராட்டு ஒருவருடைய காதல் மொழி எனில் அவரை விமர்சிப்பதையோ, கிண்டலடிப்பதையோ தவிருங்கள். பரிசு ஒருவருடைய காதல் மொழி எனில் அவர் தருகின்ற பரிசை உதாசீனம் செய்யாதீர்கள். தனிப்பட்ட நேரம் ஒருவருடைய காதல் மொழியெனில் அவருக்காய் நிறைய நேரம் ஒதுக்குங்கள்.

இந்த மையக் கருத்தைத் தான் அவர் அந்த 135 பக்க நூலில் சுவாரஸ்யமாய் எழுதியிருக்கிறார். “காதலின் அடிப்படை உங்களுக்குப் பிடித்தமானதை அடுத்தவர் செய்ய வேண்டுமென எதிர்பார்ப்பதல்ல, அவருக்குப் பிடித்தமானதை நீங்கள் செய்வது” ! இதையே ஒவ்வொருவரும் செய்தால் குடும்பங்கள் அன்பில் செழிக்கும், உறவில் வளரும்.

இப்போது உங்கள் மனதில் ஓடுகின்ற ஒரே ஒரு கேள்வி இதுவாகத் தான் இருக்கும். என் துணையின் காதல் மொழியை நான் எப்படி கண்டுபிடிப்பது ?. அதற்கு ஒரு சின்ன சோதனை இருக்கிறது. கணவன் மனைவி இருவரும் தனித்தனியே இந்த கீழ்க்கண்ட குட்டித் தேர்வை எழுதுங்கள். ஒவ்வொரு கேள்விக்கும் உங்களுடைய பதிலை டிக் செய்யுங்கள், கடைசியில் அ, ஆ, இ, ஈ எல்லாவற்றையும் தனித்தனியே கூட்டுங்கள். எது அதிக மதிப்பெண் பெறுகிறதோ, அது தான் உங்கள் காதல் மொழி. எது இரண்டாவது அதிக மதிப்பெண் பெறுகிறதோ அது செகன்ட் மொழி.

இப்போது, உங்கள் பரீட்சை பேப்பரை உங்கள் வாழ்க்கைத் துணையிடம் கொடுங்கள். அவரிடம் இருப்பதை நீங்கள் வாங்கிக் கொள்ளுங்கள். இப்போது உங்கள் துணையின் காதல் மொழி என்னவென உங்களுக்கே தெரியும்.

அப்புறமென்ன ? கேரி சேப்மேனுக்கு ஒரு பெரிய நன்றி சொல்லிவிட்டு ஆனந்தமான வாழ்க்கையை ஆரம்பிக்க வேண்டியது தான்.

காதல் சோதனை

 

 

ஒவ்வொரு கேள்விக்கும் இரண்டு பதில்கள் கொடுக்கப்பட்டிருக்கின்றன அதில் ஒன்றை  மட்டும் தேர்ந்தெடுங்கள்.

 

 

 

அ  : உன்னிடமிருந்து பாராட்டு பெறுவது  எனக்குப் பிடிக்கும்.

உ : உனது தழுவுததே என் விருப்பம்.

ஆ : என்னோடு தனியே நீ நேரம் செலவிட வேண்டும்

ஈ : எனக்கு நீ உதவி செய்வதே என்மீதான உனது அன்பின் வெளிப்பாடு

இ : நீ பரிசு கொடுக்கும்போது நான் சிலிர்க்கிறேன்

ஆ : உன்னோடு நீண்ட தூரம் நடந்து போகும்போது நான் மகிழ்கிறேன்

ஈ : நீ எனக்கு உதவுவது எனக்குப் பிடிக்கும்

உ : நீ அணைப்பதோ, தொடுவதோ எனக்குப் பிடிக்கும்.

உ : உன் கரங்களில் நான் இருப்பது எனக்குப் பிடிக்கும்

இ : உன் கரங்களால் தரும் பரிசு வாங்குவது எனக்குப் பிடிக்கும்

ஆ : உன்னோடு எங்கேனும் போவது எனக்குப் பிடிக்கும்

உ : உன் கரம் பிடித்திருப்பதே எனக்குப் பிடிக்கும்.

அ : நான் சொல்வதை நீ ஒத்துக் கொள்வது எனக்குப் பிடிக்கும்.

இ : வெளிப்படையாய் நீ எதேனும் பரிசு தருவது எனக்குப் பிடிக்கும்

8.

உ : உன் அருகில் இருப்பது எனக்குப் பிடிக்கும்

அ : நான் அழகாய் இருக்கிறேன் என நீ சொல்வது எனக்குப் பிடிக்கும்.

ஆ : உன்னோடு நேரம் செலவிடுதல் என் விருப்பம்

இ : உன் கையால் பரிசு வாங்குவது என் விருப்பம்

10 :

ஈ : நீ எனக்கு உதவுகையில் உன் காதலை புரிந்து கொள்கிறேன்

அ : நீ என்னைப் பாராட்டுகையில் உன் காதலை அறிந்து கொள்கிறேன்

ஆ : வீட்டு/வேறு வேலைகளை இருவரும் சேர்ந்து செய்வது என் விருப்பம்.

அ : கனிவான வார்த்தைகள் நீ பேசவேண்டுமென்பது விருப்பம்

12

உ : நீ என்னை கட்டியணைக்கையில் நான் முழுமையடைகிறேன்

ஈ : நீ பேசும் வார்த்தைகளை விட நீ செய்யும் செயல்களே எனக்கு முக்கியம்.

அ : உன் பாராட்டு எனக்குப் பிடிக்கும், உன் விமர்சனங்களை வெறுக்கிறேன்

இ : எப்போதேனும் தரும் ஒரு பெரிய பரிசை விட, அடிக்கடி கிடைக்கும் குட்டிக் குட்டிப் பரிசுகள் எனக்குப் பிடிக்கும்.

உ : நீ என்னைத் தொடும்போது நம் அன்யோன்யம் உணர்கிறேன்

ஆ : நாம் சேர்ந்து பேசும்போதோ, சேர்ந்து ஏதேனும் வேலை செய்யும் போதோ நம் அன்யோன்யம் உணர்கிறேன்.

அ: எனது செயல்களை நீ பாராட்டினால் நான் மகிழ்கிறேன்

ஈ : உனக்குப் பிடிக்காததையும் எனக்காக நீ செய்கையில் மகிழ்கிறேன்.

16

உ : நீ என்னைக் கடக்கும்போதெல்லாம் செல்லமாய் தீண்டினால் எனக்குப் பிடிக்கும்.

ஆ : கரிசனையாய் நான் பேசுவதை நீ கேட்பது எனக்குப் பிடிக்கும்

இ : நிஜமாவே நீ தரும் பரிசுகள் என்னை உற்சாகப்படுத்துகின்றன‌

ஈ : தோட்ட வேலை, வீட்டு வேலையில் நீ உதவுவது என்னை உற்சாகப்படுத்துகிறது.

அ : நான் அழகாயிருக்கிறேன் என நீ சொல்றது எனக்கு ரொம்ப புடிக்கும்

ஆ : என் உணர்வுகளைப் புரிந்து கொள்ள நீ முயல்வது எனக்குப் புடிக்கும்

19

உ : நீ என்னைத் தொடுகையில் நான் பாதுகாப்பாய் உணர்கிறேன்

ஈ : நீ ஒத்தாசைக்கு செய்யும்போது உன் அன்பை உணர்கிறேன்

20

ஈ : நீ எனக்கு அடிக்கடி செய்து தரும் உதவிகள் எனக்குப் பிடிக்கும்

இ : நீயாகவே உருவாக்கித் தரும் பரிசுகள் என்றால் எனக்கு கொள்ளை பிரியம்

21

ஆ : நீ எல்லாவற்றையும் விட்டு விட்டு என்னோடு இருக்கும் பொழுதுகள் என் பிரியத்துக்குரியவை

ஈ : நீ எனக்காக உதவிக்கரம் நீட்டும் பொழுதுகள் என் பிரியத்துக்குரியவை

22

இ : நீ எனது பிறந்த நாளில் பரிசுடன் என்னை வாழ்த்துவது எனக்குப் பிடிக்கும்

அ : நீ அன்பான வார்த்தையை பேச்சிலோ, எழுத்திலோ காட்டும் பிறந்த நாட்கள் எனக்கு ஸ்பெஷல்

23

ஈ : துணிகளை துவைப்பதில், அடுக்குவதில் நீ உதவி செய்வது எனக்குப் பிடிக்கும்

இ : நீ பரிசு தருகையில் நீ என் நினைவாய் இருக்கிறாய் என அறிந்து மகிழ்வேன்

24

இ: எல்லா ஸ்பெஷல் தினங்களையும் நினைவில் வைத்து பரிசு தந்தால் நான் மகிழ்வேன்

ஆ : நான் பேசுவதை அன்பாக நீ கேட்டுக் கொண்டிருந்தால் நான் மகிழ்வேன்

25

ஆ : உன்னோடு பயணம் செய்வது எனக்கு ரொம்ப புடிக்கும்

ஈ : என் தினசரி வேலைகளில் நீ உதவ விரும்புவதே எனக்கு மிகவும் மகிழ்ச்சி

26

உ : எதிர்பாராத நேரத்தில் நீ இடும் முத்தம் எனக்கு ஸ்பெஷல்

இ : காரணமே இல்லாமல் நீ தரும் பரிசு எனக்கு ஸ்பெஷல்

27

அ : நீ என்னை பாராட்டுவது எனக்குப் பிடிக்கும்

ஆ : நீ என் கண்ணைப் பார்த்துப் பேசுவது எனக்குப் பிடிக்கும்

28

இ : உனது பரிசுகள் என்னை சிலிர்ப்பூட்டும்

உ : உனது முத்தம் என்னை சிலிர்ப்பூட்டும்

29

அ : நான் உன்னை நேசிக்கிறேன் என நீ சொல்வது என்னை உற்சாகமூட்டும்

ஈ : நான் கேட்டதும் ஓடி வந்து மகிழ்ச்சியாய் நீ உதவுவது என்னை உற்சாகமூட்டும்

30

உ : தினமும் உன் அரவணைப்பு எனக்கு வேண்டும்

அ : தினமும் உனது பாராட்டு எனக்கு வேண்டும்

மதிப்பெண்களைக் கூட்டுங்கள்

===================================

அ : ………………. பாராட்டு

ஆ : ………………. தரமான நேரம்

இ : ……………….பரிசுகள்

ஈ : ………………..ஒத்தாசை

உ : ………………..தொடுதல்

 

 

 

 

 

 

 

 

குடும்ப வெற்றியின் ரகசியங்கள் : நேரம் ஒதுக்குங்கள்

நேரம் ஒதுக்குங்கள்

couple talking
நம்பினால் நம்புங்கள், கணவன் மனைவியரிடையே உள்ள பிரச்சினைகளின் மையம் இந்த விஷயம் தான். “எனக்காக அவரு டைம் ஸ்பென்ட் பண்ண மாட்டேங்கறாரு” !

ஆண்களுடைய விருப்பங்களும் பெண்களுடைய விருப்பங்களும் தனித்தனியானவை. ஆண்களுக்கு கிரிக்கெட் மோகம் இருக்கும் போது, பெண்களுக்கு சீரியல் மோகம் இருக்கும். ஆண்கள் தூங்கி ஓய்வெடுக்க விரும்பும் போது பெண்கள் பேசிக்கொண்டிருக்க விரும்புவார்கள். ஆண்களுக்கு ஷாப்பிங் அலர்ஜியாய் இருக்கும். பெண்களுக்கோ அது தான் எனர்ஜியாய் இருக்கும். இப்படி மாறி மாறி இருக்கின்ற ரசனைகள் ஒரு கூரையின் கீழ் வந்து சேர்வது தானே குடும்பம் ! இந்த இடத்தில் ரசனைகள் முட்டிக் கொள்ளாமல் எப்படி இணைந்து பயணிக்கின்றன என்பது தான் கவனிக்க வேண்டிய விஷயம்.

“அவருக்கென்ன, ஆபீஸே கதின்னு கட்டிகிட்டு அழுவாரு” என மனைவி புலம்பினால் உடனே எகிறிக் குதிக்காதீங்க. ஒரு நிமிடம் அப்படியே நின்று நிதானித்துப் பாருங்கள். உண்மையில் எனது நேரத்தில் எத்தனை சதவீதம் வேலைக்காய் அல்லது வேலை சார்ந்த விஷயங்களுக்காய் செலவிடுகிறேன். அந்தப் பட்டியல் உண்மையானதாய் இருக்கணும். நீங்க வீட்டில் உட்கார்ந்து செல்போனில் ரெண்டு மணி நேரம் ஆபீஸ் விஷயங்களை அரட்டையடிக்கிறது கூட இந்த பட்டியல்ல தான் வரணும். !

இப்போ அப்படியே மனைவியர் ஒரு நிமிஷம் யோசிங்க. உங்களுடைய நேரத்தில் கணவனுக்காக ஸ்பெஷலாய் நீங்கள் ஒதுக்கும் நேரம் எவ்வளவு ? சீரியல் பார்ப்பது, வீட்டு வேலைகளில் ஈடுபடுவது, குழந்தைகளைக் கவனிப்பது எனும் விஷயங்களைத் தாண்டியும் நீங்கள் கணவனோடு நேரம் செலவிடுகிறீர்களா என்பது ஒரு குட்டிக் கேள்வி.

எல்லாவற்றையும் விட முக்கியமான விஷயம் ஒன்றுண்டு ! செலவிடும் நேரம் “குவாலிடி டைம்” ஆக இருக்க வேண்டும். அரை மணி நேரம் ரெண்டு பேரும் பேச உக்கார்ந்து குற்றம் சொல்ல ஆரம்பித்தால் எல்லாம் போச்சு. கிடைக்கிற அந்த அரை மணி நேரத்தை எப்படி ஒரு அற்புத நேரமாய் செலவிடுகிறீர்கள் என்பதில் ரொம்பவே கவனமாய் இருங்கள். ஒரு ஐந்து நிமிட உரையாடல் கூட உங்களுடைய ஒரு நாளை ஆனந்தமாக வைத்திருக்க முடியும். ஒரு நிமிட சண்டை கூட உங்களுடைய ஒரு வார கால நிம்மதியை புதைகுழிக்குள் போட்டு மிதிக்கவும் முடியும்.

கணவனும் மனைவியும் மாறி மாறிக் குற்றம் சொல்லத் தொடங்கினால், தோற்றுப் போவது கணவனுமல்ல, மனைவியுமல்ல, தாம்பத்யம் தான். ஒரு ஸ்பெஷல் நேரத்துக்காக ஒரு சீரியலை கட் செய்வதோ, ஐ.பி.எல் மேட்சை ஆஃப் பண்ணி வைப்பதோ தாம்பத்யத்தைத் தழைக்க வைக்கும் !

ரெண்டு பேருக்குமே ஒரு குறிப்பிட்ட நேரம் ஃபிரீயா இருக்க வாய்ப்பு இல்லாத பட்சத்தில் ஒருவர் அட்ஜஸ்ட் செய்து கொள்வது நல்ல பழக்கம். அது ஏதோ ஒரு தியாகம் மாதிரி, “உனக்காக என் வேலையை விட்டுட்டு வந்திருக்கேன். இப்போ பேசு” என சொன்னால் எல்லாம் போச்சு. விட்டுக் கொடுத்தலின் முக்கிய அம்சமே, தான் விட்டுக் கொடுத்தது அடுத்த நபருக்குத் தெரியாமல் இருப்பது தான். அதில் தான் உண்மையான அன்பு ஒளிந்து இருக்கிறது !

அதை விட்டு விட்டு, “நான் பிரியா இருக்கும்போ நீ பிஸியாயிடறே, நான் பிஸியா இருக்கும்போ நீ ஃபிரீ ஆயிடறே” அப்புறம் எப்போ பேசறதாம் ? என புலம்புவதிலும் அர்த்தம் இல்லை. கணவன் மனைவி இணைந்து அதிக நேரத்தைச் செலவிட்டால் அந்த குடும்பங்கள் ஆரோக்கியமாக இருக்கும் என்பது குடும்ப இயலின் பால பாடம் ! அத்தகைய தம்பதியருக்கு வருகின்ற சிக்கல்களெல்லாம் விரைவிலேயே மறைந்து விடுகின்றன. சந்தேகம் இருந்தால் உங்கள் தாத்தா, பாட்டிகளிடம் கேட்டுப் பாருங்கள். எப்போதும் சுற்றிச் சுற்றி வரும் அன்யோன்யமும், சேர்ந்தே ஊட்டி, உண்டு, சிரித்துக் களிக்கும் மாலைப் பொழுதுகளும் தங்களையறியாமலேயே குடும்ப வாழ்க்கையை எத்தனை ஆரோக்கியப் படுத்தியிருக்கின்றன என்பதை !

கணவன் மனைவி சேர்ந்து செலவிட எப்படி டைம் கண்டு பிடிப்பது ? அல்லது நேரத்தை எப்படி உருவாக்குவது ? அதற்கு சில வழி முறைகள் உண்டு.

1. இருவருக்குமே பிடித்தமான ஒரு பொதுவான ஹாபி, அல்லது விருப்பத்தை வைத்துக் கொள்ளுங்கள். சேர்ந்து நேரம் செலவிட இது ஒரு அற்புதமான வழி. அது விடிகாலை ஜாகிங் ஆனாலும் சரி, தோட்டத்தைப் பராமரித்தல் ஆனாலும் சரி, அல்லது இசை, நடனம் எதுவானாலும் சரி, இணைந்தே பயணிக்கும் ஒரு ஹாபி இருவரையும் வெகுவாக இணைக்கும். சேர்ந்து செலவிடும் நேரத்தை உருவாக்கிக் கொடுக்கும் !

2. ஏதோ ஒரு குறிப்பிட்ட நேரத்தை இருவரும் பேசுவதற்காய் ஒதுக்குங்கள். அது காலையில் காஃபி போடும் நேரமானாலும் சரி, மாலையில் ஓய்வாய் இருக்கும் நேரமானாலும் சரி. உங்கள் வேலைக்குத் தக்கபடி ஒரு நேரத்தை ஒதுக்கிப் பாருங்கள். அந்த நேரத்தை உங்கள் மனம் திறந்த பகிர்தலுக்காய் ஒதுக்குங்கள். நிச்சயம் உறவு வலுப்படும்.

3. இணைந்தே பிரார்த்தனை செய்கிறீர்களா ? உங்கள் வாழ்க்கை வலுப்படும் என்பதில் ஐயமில்லை. இறைவனுக்கு முதலிடம் தரும் இல்லங்களில் ஈகோ விலகி விடுகிறது, விட்டுக் கொடுத்தலும், மன்னித்தலும் தவழ்கிறது அதனால் குடும்ப உறவு ஆழமும், அர்த்தமும் அடைகிறது. இணைந்தே பிரார்த்தனை செய்வதும், அடுத்தவருக்காய் பிரார்த்தனை செய்வதும் உறவை வலுப்படச் செய்யும் விஷயங்கள்.

4. மனைவியோ, கணவனோ ஒரு வேலை செய்யும் போது அந்த வேலையைப் பகிர்ந்து செய்யுங்கள். அப்போது ஒரே இடத்தில் ஒரே வேலையைச் செய்யும் போது இருவருமே இணைந்து கொஞ்சம் நேரத்தைச் செலவிடும் சூழல் தோன்றும். அது வேலையைத் தாண்டி சுவாரஸ்யத்தை அதிகரிக்கும் !

5. எல்லா வேலையையும் செய்து முடிச்சப்புறம் தான் குடும்பம், எனும் அக்மார்க் மடத்தனத்தைச் செய்யவே செய்யாதீர்கள். உங்கள் பட்டியலில் குடும்பத்துக்காக நேரம் செலவிடுதல் டாப் 2 க்குள் நிச்சயம் இருக்கட்டும்.

6. இது தொழில்நுட்ப யுகம், சோசியல் நெட்வர்க் காலம். உங்கள் போனிலும், கம்ப்யூட்டரிலும் உள்ள இணையத்தை எட்டிப் பார்க்காமல் இருந்தாலே போதும் கொஞ்சம் நேரத்தை நீங்கள் உங்கள் வாழ்க்கைத் துணைக்காக உருவாக்கி விட முடியும் ! சந்தேகம் இருந்தால் முயற்சி செய்து பாருங்கள்.

7. மாலையில் செய்ய வேண்டிய சில வேலைகளை விடியற்காலையில் முடித்து விட முடியுமா என பாருங்கள். அந்த நேரத்தில் நீங்கள் முக்கியமான சில அலுவல்களை முடித்தால் மாலை நேரம் கொஞ்சம் ரிலாக்ஸ் ஆகவும், குடும்பத்தினருடன் பேசவும் ஒரு வாய்ப்பை உருவாக்கித் தரும்.

8. யார் என்ன கேட்டாலும், “ஓகே…” என தலையாட்டும் பழக்கத்தைக் கடாசுங்கள். குடும்பத்தினருடன் செலவிடும் நேரத்தை தேவையற்ற கமிட்மென்ட்களுக்காக கை கழுவி விடாதீர்கள். மிக முக்கியமான விஷயங்கள் தவிர மற்றவையெல்லாம் “சாரி.. நோ…” எனும் உங்கள் பதிலுடன் விடைபெறட்டும் !

9. தனியே செலவிடும் நேரங்களை சும்மா சினிமா பாக்கவோ, சீரியல் பாக்கவோ செலவிடாதீர்கள். அது ஒருவகையில் தோப்பிலே இருந்தாலும் ஒவ்வொரு மரமும் தனிமரம் தான் – கதை தான். அதை விட, சேர்ந்து நடப்பது, பேசுவது, ஒரு புதிர் விளையாட்டு விளையாடுவது, கேரம் போன்ற விளையாட்டுகள் விளையாடுவது என செலவிட முயலுங்கள்.

10. மனைவிகள் அன்பானவர்கள். நீங்கள் அவர்களுடன் பேசிக்கொண்டே இருக்காவிட்டால் கூட வீட்டில் இருக்கிறீர்கள் எனும் உணர்வே அவர்களுக்கு நிம்மதியையும், பாதுகாப்பையும், நிறைவையும் தருவதுண்டு. எனவே தேவையற்ற நண்பர் சகவாசங்களைக் குறைத்து வார இறுதிகளிலெல்லாம் வீட்டிலேயே இருங்கள்.

டைம் இல்லை என்பதெல்லாம் அக்மார்க் பொய். எல்லோருக்கும் 24 மணி நேரம் தான் உண்டு. அதை எப்படிச் செலவிடுகிறீர்கள் என்பது தான் முக்கியம். அதில் எவ்வளவு மணி நேரம் உங்கள் மனைவிக்காகவோ, கணவனுக்காகவோ ஆனந்தமாய்ச் செலவிடுகிறீர்கள் என்பது தான் கேள்வி !

மீண்டும் ஒரு முறை சொல்கிறேன், அழுத்தமாக. உங்கள் வாழ்க்கைத் துணைக்காக நேரம் ஒதுக்குங்கள், அது ஆரோக்கிய வாழ்வுக்கு அடிப்படை.

 

குழந்தைகளைக் குறிவைக்கும் பாலியல் வன்முறை

13

குகை போன்ற அறைகள் நிரம்பிய பாதாள வீட்டுக்குள் தன் சொந்த மகளையே இருபத்து நான்கு வருடங்களாகப் பூட்டி வைத்து பாலியல் வன்முறை செய்து குழந்தைகளும் பெற்றுக் கொண்ட ஆஸ்திரியாவைச் சேர்ந்த ஒரு கொடூரமான தந்தையின் அதிர்ச்சியூட்டும் செய்தி கடந்த ஆண்டு உலகையே உலுக்கி எடுத்தது.

இந்தியாவில் சமீபத்தில் சாமியாரின் பேச்சைக் கேட்டு செல்வந்தராகவேண்டும் எனும் வெறியில் தனது மகள்களுடனேயே உறவு கொண்டு வாழ்ந்த ஒரு முட்டாள் தந்தையின் மிருக வரலாறு அதிர்ச்சியாய் அலசப்பட்டது.

உலகெங்கும் பரவலாக வரும் இத்தகைய தகாத உறவுகள் பற்றிய செய்திகள், குடும்ப உறவுகள் மீதான நம்பிக்கையை பெருமளவு வலுவிழக்கச் செய்வதுடன், பெற்றோரின் மீது மிகப்பெரிய சுமையையும் சுமத்தி விடுகிறது.

இரண்டு ஆண்டுகளுக்கு முன் இந்தியாவில் நடத்தப்பட்ட ஆய்வு ஒன்று சுமார் 53 விழுக்காடு குழந்தைகள் குடும்பத்தினரால் பாலியல் தொல்லைக்கு ஆளாகிறார்கள் என திடுக்கிடும் முடிவை வெளியிட்டிருந்தது.

இத்தகைய ஆய்வுகள், நமது சமூகம் குழந்தைகள் மீதான பாலியன் வன்முறையை எத்தனை தூரம் நிகழ்த்தி வருகிறது என்பதையும், எத்தனை அலட்சியமாக அவை இருட்டுக்குள்ளேயே அமிழ்த்தப்படுகின்றன என்பதையும் வெளிச்சம் போட்டுக் காட்டுகின்றன.

உலக குழந்தைகளில் பத்தொன்பது விழுக்காடு மக்கள் நமது இந்திய நாட்டில் இருக்கின்றனர். இந்தியாவிலுள்ள மக்கள் தொகையில் 42 விழுக்காட்டினர் பதினெட்டு வயதுக்கு உட்பட்டவர்கள். ஆனால் உலகோடு ஒப்பிடுகையில் இந்தியாவில் குழந்தைகளை மையப்படுத்தி இன்னும் பாதுகாப்புகளோ, நலவாழ்வுத் திட்டங்களோ தேவையான அளவுக்கு இல்லாதது மிகப்பெரிய அவலம் என்றே சொல்லவேண்டும்.

பெண்குழந்தையைப் பெறுவதே மடியில் நெருப்பைக் கட்டிக் கொண்டு நடப்பதற்கு சமம் என பாட்டிமார் கூறும் கூற்று இன்றைய நேயமற்ற சமூகத்தில் நிதர்சனமாகியிருக்கிறது.

இந்தியாவைப் பொறுத்தவரையில் கூட்டுக் குடும்பங்களில் வாழ்ந்த போது நிகழாத அல்லது வெளிவராத இத்தகைய தவறான பாலியல் வன்முறைகள், குடும்பங்கள் சிறிது சிறிதாய் உடைந்து வாழத் துவங்கிய கலாச்சாரச் சூழலில் தான் கொஞ்சம் கொஞ்சமாக வெளிவரத் துவங்கியிருக்கிறது. எனினும் இத்தகைய சிக்கல்கள் கூட்டுக் குடும்பம், மற்றும் தனியே வாழும் குடும்பம் என பாகுபாடின்றி நிகழ்வது கவனிக்கத் தக்கது.

அண்ணன் தங்கை, தந்தை மகள், வளர்ப்புத் தந்தை மகள் என அதிர்ச்சியூட்டும் பாலியல் உறவுகளும், திருமணங்களும் பெரும்பாலான நாடுகளில் தடை செய்யப்பட்டதாய் இருந்தாலும் சில நாடுகள் அவற்றைக் கண்டு கொள்வதில்லை என்பது திகைப்பூட்டும் உண்மையாகும்.

11
ஜெர்மனியில் சட்டத்துக்கு விரோதமாக திருமணம் செய்து கொண்டு குழந்தை பெற்றுக் கொண்ட பேட்ரிக் மற்றும் சூசன் எனும் அண்ணன் தங்கை தம்பதியர் சட்டத்தை எதிர்த்துப் போராடிய நிகழ்வு 2007ல் நடந்தது. பரபரப்பூட்டிய அந்த வழக்கில் அந்த உறவை தகாததென்றே முடிவு செய்து தீர்ப்பு வழங்கியது ஜெர்மன் அரசு.

பிரேசில், பிரான்ஸ், நெதர்லாந்து போன்ற நாடுகளில் இத்தகைய குடும்ப உறவுகள் அங்கீகரிக்கப் படுகின்றன. அப்படியா என அதிச்சியுடன் பார்க்கும் நம்மை நோக்கி “இந்தியாவில் சொந்த அக்காவின் மகளையே திருமணம் செய்வார்களாமே?” என வியப்புக் கேள்வியை விடுக்கின்றன மேலை நாடுகள்.

அங்கீகரிக்கப்பட்ட, மற்றும் அங்கீகரிக்கப்படாத குடும்ப உறவுகள் ஒருபுறம் இருக்க, குழந்தைகள் மீதான பாலியல் தாக்குதல்கள் மிகப்பெரிய அச்சுறுத்தலாகவும், சர்வதேசச் சிக்கலாகவும் உருவாகியிருக்கிறது. குழந்தைகள் மீதான இத்தகைய பாலியல் தொந்தரவுகள் அவர்களுடைய உடலையும், மனதையும் ஒருசேர பாதிப்புக்கு உள்ளாக்கி விடுகின்றன.

உலகெங்கும் பல்லாயிரம் குழந்தைகள் பாலியல் வன்முறையினால் உயிரையும் இழக்கின்றனர் என்பது அதிர்ச்சியளிக்கும் செய்தியாகும்.

பெரும்பாலான பாலியல் வன்முறைகள் பெரும்பாலும் வீட்டின் நான்கு சுவர்களுக்குள்ளேயே மறைக்கப்பட்டு விடுகின்றன. “வெளியே சொன்னால் நம் குழந்தைக்குத் தான் அவமானம்” எனும் கவலையும், பாலியல் வன்முறையில் ஈடுபட்டவர் குடும்பத்தின் நெருங்கிய நபர் எனும் நிர்பந்தமும் இத்தகைய பாலியல் வன்முறைகள் சட்டத்தின் முன் வராமல் செய்து விடுகின்றன.

உலகில் மூன்று பெண் குழந்தைகளில் ஒன்று பாலியல் வன்முறைக்கு உட்படுத்தப்படுகிறது என்கிறது உலக நலவாழ்வு நிறுவனத்தின் புள்ளி விவரக் கணக்கு. இந்தியாவைப் பொறுத்தவரை ஐம்பது விழுக்காடு பெண் குழந்தைகள் பாலியல் தொந்தரவுகளுக்கு ஆளாகின்றனர் என்கின்றது ஆராய்ச்சியாளர் லூயில் எங்கல்பிரக்ட் அவர்களது ஆய்வு முடிவு.

12

இந்தியாவில் சமீபத்தில் நடத்தப்பட்ட ஒரு ஆய்வில் 48 விழுக்காடு பெண் குழந்தைகள் தாங்கள் ஆண்களாய் பிறக்காததற்காய் வருத்தப்பட்டிருக்கிறார்கள். காரணம் பாலியல் தொந்தரவுகள் !. பெண்களை மதிப்பதாகவும், துதிப்பதாகவும் இனியும் கதை அளந்து கொண்டிருப்பதில் அர்த்தமில்லை.
வல்லரசாக ஆகிக்கொண்டிருக்கிறோம் என ஒருபுறம் கூவிக்கொண்டிருந்தாலும் இன்னொரு பக்கத்தில் குழந்தைகளை பாலியல் தொழிலாளர்களாகப் பயன்படுத்தும் அவலம் இந்தியாவில் தான் மிக மிக அதிகம். மும்பையில் மட்டுமே வருடத்துக்கு 70,000 பெண் குழந்தைகள் பாலியல் பலவந்தத்தில் விழுகிறார்கள் என்கிறார் ஸ்வான்சேட்டன் அமைப்பின் தலைவரான டாக்டர் ரஜத் மித்ரா.

 
இந்தியாவில் ஆந்திரா, அஸ்ஸாம், பீகார், டெல்லி போன்ற இடங்களில் குழந்தைகளுக்கு எதிரான பாலியல் தொல்லைகள் அதிக அளவில் இருப்பதாக இந்திய அரசின் செய்திக்குறிப்பொன்று தெரிவிக்கிறது.

சுமார் 5 இலட்சம் குழந்தைகள் இந்தியாவில் பாலியல் தொழிலில் ஈடுபட்டிருப்பதாக புள்ளிவிவரங்கள் சொல்கின்றன. பல இலட்சம் குழந்தைத் தொழிலாளர்கள் இந்தியா முழுவதும் பரவலாக பணி செய்து கொண்டிருக்கிறார்கள், பல இலட்சம் குழந்தைகள் இந்தியா முழுவதும் ஆதரவின்றி உலவுகின்றனர். எனவே தான் இந்தியா குழந்தைகள் மீதான பாலியல் ஆக்கிரமிப்பு நிலமாகிப் போன துயரம் நேர்ந்திருக்கிறது.

திட்டமிட்டு செயல்படுத்தப்படும் ஆரோக்கியமான பாலியல் கல்வி கூட இல்லாத நமது நாட்டில், சமூகம், குடும்ப உறவுகள் எனும் இருவேறுபட்ட கழுகுக் கண்களிலிருந்து குழந்தைகளைக் காக்கும் கடமை தாயின் தோள்களில் தான் சுமத்தப்பட்டிருக்கிறது.

குழந்தைகளுக்கு அவர்கள் நான்கு வயதாக இருக்கும் போதே பாலியல் வன்முறைகளின் சில கூறுகளை அவர்களுக்கு விளக்கலாம் என்கின்றனர் மருத்துவர்கள்.

மிக முக்கியமாக எது “நல்ல தொடுதல்”, எது “மோசமான தொடுதல்” எது “பாலியல் தொடுதல்” என்பதை குழந்தைகளுக்கு புரிய வைப்பது அன்னையின் கடமையாகும்.

நல்ல தொடுதல் அன்னையின் அரவணைப்பைப் போல ஆனந்தமாய், பாதுகாப்பாய், உற்காசமூட்டுவதாய் இருக்கும். இவை இன்னும் மிச்சமிருக்கும் மனித நேயத்தின் வெளிப்பாடுகள்.

மோசமான தொடுதல் என்பதை அடித்தல், உதைத்தல், காயப்படுத்துதல் போன்ற வலி ஏற்படுத்தும் நிகழ்வுகளாகச் சொல்லிக் கொடுங்கள்.

மூன்றாவதாக மிக முக்கியமான “பாலியல் தொந்தரவுத்” தொடுதல் பற்றி விளக்குங்கள். இந்தியாவில் 72.1 % குழந்தைகள் தங்களுக்கு நேரும் பாலியல் தொந்தரவுகளைப் பற்றி வெளியே யாரிடமும் சொல்வதில்லை என்கிறது அரசு ஆய்வு. எனவே பாலியல் தொடுதல் பற்றிய விழிப்புணர்வை குழந்தைகளிடம் தெளிவாக விளக்கி விடுதல் மிகவும் அவசியமாகிறது.

14

தினமும் குழந்தைகளிடம் அன்றைய தினம் நடந்த செயல்கள், சந்தித்த மனிதர்கள் போன்ற அனைத்தையும் விரிவாக கேட்டு அறியுங்கள். ஏதேனும் பிழை நடந்திருப்பதாக உணர்ந்தால் பதட்டப்படாதீர்கள். முழுமையாய் கேளுங்கள்.

குழந்தை எதைச் சொன்னாலும் முழுமையாய் நம்புங்கள். பாலியல் தொந்தரவுகளை குழந்தைகள் ஒரு போதும் உருவாக்கிச் சொல்வதில்லை என்பதை நினைவில் கொள்ளுங்கள்.
ஏதேனும் “விளையாட்டு” எனும் பெயரில் குழந்தைகள் பெரும்பாலும் ஏமாற்றப்பட்டு பாலியல் தொந்தரவுக்கு ஆளாவதுண்டு என்பதை அன்னையர் கவனத்தில் கொள்ள வேண்டியது மிக அவசியம்.

தாய்க்கும் குழந்தைக்கும் இடையேயான வெளிப்படையான, நட்புறவும் நம்பிக்கையும் கூடிய உரையாடல் மிக மிக முக்கியம். இல்லையேல் குழந்தைகள் தங்கள் பிரச்சனைகளை வெளிப்படுத்தாமலேயே போய்விடும் அபாயம் உண்டு.

சில சூழல் அல்லது சில நபர்களுடைய அருகாமை சந்தேகத்தைத் தருவதாக இருந்தால் அந்த சூழலைத் தவிருங்கள். குறிப்பாக குழந்தை யாருடனாவது நெருங்குவதை விரும்பவில்லையெனில் சுதாரித்துக் கொள்ளுங்கள். அங்கே ஏதேனும் பிழை இருக்கலாம் !

உங்கள் குழந்தைகளை மூன்றாவது நபரிடம், நீங்கள் கூடவே இல்லாதபோது, ஒரு குறிப்பிட்ட நேரத்துக்கும் அதிகமாக செலவிட அனுமதிக்காதீர்கள்.

உங்கள் குழந்தையின் உடல் குழந்தைக்கு மட்டுமே சொந்தமானது. அதை வேறு யாரும் தொடும் உரிமை இல்லை என்பதை வெகு தெளிவாக, அழுத்தமாகவே குழந்தைகளிடம் சொல்லுங்கள். அதை மீறி யாரேனும் தொந்தரவு கொடுத்தால் கண்டிப்பான “நோ” சொல்ல குழந்தைகளைப் பழக்குங்கள்.

குழந்தைகளுடைய நடவடிக்கையில் பதட்டம், கோபம், மன அழுத்தம், சோகம் போன்ற உணர்வுகள் மேலோங்கியிருப்பதைக் கண்டாலோ, உடலில் ஏதேனும் அடையாளங்களைக் கண்டாலோ உஷாராகிவிடுங்கள்.

குழந்தைகளிடம் ஏதேனும் விரும்பத் தகாத நிகழ்வு நடந்தால் யாரைச் சந்திக்க வேண்டும், யாரிடம் பேசவேண்டும் என்பதைச் சொல்லி வையுங்கள்.

குழந்தைகளுக்குத் தன்னம்பிக்கையை வளருங்கள். வீட்டில் பெற்றோர் முன்மாதிரிகையாக இருப்பதும், குழந்தைகளிடம் நேரத்தைச் செலவிட்டு அவர்களுக்கு பாதுகாப்பு உணர்வை வழங்குவதும் மிக மிக முக்கியம்.

குழந்தைகள் தவறு செய்தால் பக்குவமாய் திருத்துங்கள். பிழை செய்வது மனித இயல்பு, அதைத் திருத்துவதில் தான் மனித மாண்பு இருக்கிறது என்பதை உணர்த்துங்கள். இல்லையேல் பிழைகளை உங்களிடமிருந்து மறைக்கும் வழியையே குழந்தைகள் யோசிக்கும்.

திரையரங்கு, பேருந்து, பள்ளிக்கூடம், விளையாட்டுப் பூங்கா போன்ற இடங்களில் கவனமாக இருக்கவேண்டிய வழிமுறைகளை விளக்குங்கள். எதையும் பயமுறுத்தும் விதமாகச் சொல்லாமல் இருப்பது மிகவும் முக்கியம்.

“அம்மா, அப்பாவிடம் சொல்லாதே” என யாராவது ஏதாவது சொன்னார்களா, செய்தார்களா என்பதை குழந்தைகளிடம் கேட்டுத் தெரிந்து கொள்ளுங்கள். பாலியல் விஷயத்தில் வாக்குறுதிகளை உடைப்பதில் எந்தத் தவறும் இல்லை என்பதை குழந்தைகளுக்கு புரியவையுங்கள்.

depressedREX_291x450“அம்மாவிடம் சொல்லுவேன், அப்பாவிடம் சொல்லுவேன் “என பயமுறுத்தி யாராவது தொந்தரவு செய்தார்களா என்பதையும் கேட்டறியுங்கள். இத்தகைய “பிளாக் மெயில்” கள் பெரும்பாலும் தொடர்ச்சியான பாலியல் தொந்தரவுக்குள் குழந்தைகளை இட்டுச் செல்லும்.

யாராவது ஏதாவது அன்பளிப்புகள், இனிப்புகள் தந்தார்களா ? அல்லது தருவதாக வாக்களித்திருக்கிறார்களா என்பதை கேளுங்கள். அப்படியெனில் யார் எதற்காக போன்ற செய்திகளையும் கவனமாய் கேட்டறியுங்கள். அவை பாலியல் தொந்தரவுக்கான முன்னுரையாய் இருக்கலாம்.

படித்தவர், படிக்காதவர், ஏழை, பணக்காரர் என எந்த விதத்திலும் இருக்கலாம் குழந்தைகளைத் தொந்தரவு செய்யும் நபர். எனவே ஒரு பொதுவான எச்சரிக்கை உணர்வை குழந்தைகளுக்கு ஊட்டுதல் அவசியம்.

குழந்தைகளிடம் திடீர் பாசம் பொழியும் உறவினர்கள் யாராவது இருந்தால் அவர்கள் மீது ஒரு கண் வைப்பது அவசியம். குழந்தைகளை கடைக்கு அழைத்துப் போகிறேன், திரையரங்கு அழைத்துச் செல்கிறேன் என முன்வந்தால் நாகரீகமாக தவிர்த்து விடுங்கள்.

ஆபாசப் புத்தகங்கள், படங்கள் போன்றவற்றை குழந்தைகளுக்கு காண்பித்து அவர்களை பாலியல் தொந்தரவுக்கு ஆளாக்குவதும், பின்பு அதை வைத்தே அவர்களை மிரட்டி, பயமுறுத்தி தொடர் தொந்தரவுகளை கொடுப்பதும் பரவலாக நிகழும் செயல் என்பதால் எச்சரிக்கையுடன் கவனித்தல் அவசியம்.

நம்பிக்கைக்குரியவர் அல்லாத நபர், புகைப்படம் வீடியோ போன்றவற்றை எடுத்தால் “வேண்டாம்” என கண்டிப்புடன் மறுக்க குழந்தைகளைப் பழக்குங்கள். தனியே குழந்தைகளை வைத்து தகாத படங்கள் எடுக்கும் நிலையிலிருந்து தப்பிக்கலாம்.

90 விழுக்காடு பாலியல் தொந்தரவுகளும் குழந்தைகளுக்கு நன்கு தெரிந்த நபர்களாலேயே வருகின்றன. எனவே குழந்தைகள் உண்மையை விரைவில் பெற்றோரிடம் தெரிவிப்பது மிகவும் அவசியம். தாயும், மகளுமான மிகவும் தனிமையான சூழலில் நிகழும் உரையாடலே உண்மையை முழுமையாய் வெளிக்கொணரும்.

தன் சிறகின் கீழ் குஞ்சுகளைப் பாதுகாப்பது போல தனது குழந்தைகளைப் பாதுகாக்கும் கடமை அன்னையர்க்கு உண்டு. அதை சரிவரச் செயல்படுத்த குடும்பம் எனும் கட்டமைப்பிற்கு உள்ளேயும் வெளியேயும் அன்னையர் வழிகாட்டிகளாய் இருக்கவேண்டியது அவசியம்.

4_diverse_kids_smiling

பாலியல் தொந்தரவுகள் சில தவறான நம்பிக்கைகளும், உண்மையும்

நம்பிக்கை

குழந்தைகளை பாலியல் தொந்தரவுக்கு ஆளாக்குவது பெரும்பாலும் நமக்குத் தெரியாத நபர்களே ! நமது உறவினர்களும், நண்பர்களும், பக்கத்து வீட்டாரும் பரிசுத்தமானவர்கள்., அவர்கள் இத்தகைய கீழ்த்தரமான செயல்களைச்

உண்மை
90 விழுக்காடு தொந்தரவுகளும் தெரிந்த நபர்களாலேயே வருகின்றன !

4_diverse_kids_smiling

—————————————————————
நம்பிக்கை

எனது குழந்தைகளிடம் ஏற்கனவே இதைப் பற்றி விளக்கிவிட்டேன் எனவே அவர்களுக்கு பாலியல் தொந்தரவுகள் ஏதும் இருக்காது.

உண்மை

குழந்தைகளுக்கு அடிக்கடி இதைக் குறித்து உரையாடுங்கள். குழந்தை எச்சரிக்கையாய் இருந்தாலும் பலவந்தமாகவோ, ஏமாற்றியோ யாரேனும் அவர்களை தொந்தரவு செய்து விட முடியும் என்பதையும் நினைவில் கொள்ளுங்கள்.

4_diverse_kids_smiling

—————————————————————

நம்பிக்கை

எனது குழந்தையுடன் எனக்கு மிக நல்ல நட்புறவு உண்டு. என்ன பாலியல் தொந்தரவு நடந்தாலும் குழந்தை என்னிடம் உடனடியாக சொல்லிவிடும்

உண்மை

குழந்தைகள் பெற்றோருடன் எத்தனை சகஜமான நட்புறவு கொண்டிருந்தாலும் பாலியல் தொந்தரவுகளை சகஜமாகப் பகிர்ந்து கொள்வதில்லை. எனவே தொடர்ச்சியான கவனிப்பும், பராமரிப்பும், பகிர்தலும் அவசியம்

4_diverse_kids_smiling

—————————————————————
நம்பிக்கை

குழந்தைகள் மீதான பாலியல் வன்முறை நகரங்களில் மட்டுமே உண்டு

உண்மை

குழந்தைகள் மீதான பாலியல் வன்முறை கிராமம், நகர்ப்புறம் என எல்லா இடங்களிலும் உண்டு என்பதே உண்மை

4_diverse_kids_smiling

—————————————————————

நம்பிக்கை

திருமணமான, அல்லது நடுவயது தாண்டியவர்கள் மட்டுமே இந்த பாலியல் தொந்தரவு செய்யும் பட்டியலில் வருவார்கள்.

உண்மை

பதின்வயது வாலிபர்கள் கூட பாலியல் வன்முறையில் ஈடுபடுவார்கள் என்கின்றன புள்ளி விவரங்கள்.

4_diverse_kids_smiling 

—————————————————————

நம்பிக்கை

ஏழை குடும்பங்களில் மட்டுமே பாலியல் தொந்தரவுகள் இருக்கும்.

உண்மை

ஏழை பணக்காரர் எனும் பாகுபாடு இன்றி பாலியல் தொந்தரவுகள் இருக்கும்.

 

4_diverse_kids_smiling

—————————————————————

நம்பிக்கை

மனநோயாளிகள் தான் குழந்தைகள் மீது பாலியல் வன்முறையில் ஈடுபடுவார்கள்.

உண்மை

நல்ல மனநலம், உடல் நலம் உடையவர்களே பெரும்பாலும் இத்தகைய வன் செயல்களில் ஈடுபடுகின்றனர்.

 

4_diverse_kids_smiling

—————————————————————

நம்பிக்கை

குழந்தைகளுக்கு பாலியல் சார்ந்த செயல்களையெல்லாம் பள்ளிக்கூடத்திலேயே சொல்லிக் கொடுக்கின்றனர். எனவே இனிமேல் தனியே நான் எதுவும் சொல்ல வேண்டிய தேவையில்லை.

உண்மை

குழந்தைகளுக்கு இத்தகைய சிக்கல்களைக் குறித்து விளக்கும் பெரிய பொறுப்பு அன்னைக்கு உண்டு. தெளிவாகவும், தொடர்ச்சியாகவும் குழந்தைகளிடம் அனைத்தையும் எடுத்துச் சொல்ல வேண்டியது அன்னையரின் கடமையாகும்.

 

4_diverse_kids_smiling

—————————————————————

நம்பிக்கை

சிறு சிறு பாலியல் தொந்தரவுகள் ஆபத்தற்றவை.

உண்மை

சிறு சிறு தொந்தரவுகள் குழந்தையின் எதிர்காலத்தையே கேள்விக்குள்ளாக்கிவிடும். அவர்களுடைய மனதிலும், உடலிலும், சிந்தனையிலும் பெரும் தாக்கத்தை ஏற்படுத்திவிடும்.

 

4_diverse_kids_smiling

—————————————————————

நம்பிக்கை

பாலியல் தொந்தரவுகள் பெண் குழந்தைகளுக்கு மட்டுமே.

உண்மை

மிக மிகத் தவறு. 6 சிறுவர்களில் ஒரு சிறுவன் பாலியல் தொந்தரவுக்கு ஆளாகிறான் என்கிறது உலக நலவாழ்வு நிறுவன அறிக்கை.

4_diverse_kids_smiling

—————————————————————

நம்பிக்கை

அவர் ரொம்ப நல்லவர், அவர் அப்படியெல்லாம் செய்யமாட்டார், அல்லது தெரியாமல் தவறிழைத்திருப்பார். இனிமேல் நிச்சயம் நடக்காது. பழையவற்றை மனதில் வைத்திருக்கத் தேவையில்லை.

உண்மை

பாலியல் தொந்தரவு செய்பவர்கள் ஒருமுறையுடன் நிறுத்துவதில்லை. அவர்களுடைய சிந்தனை முழுக்க முழுக்க அதைச் சார்ந்தே இருக்கும். அதற்காகவே நல்லவர்களாய் நடமாடுபவர்கள் தான் அதிகம். எச்சரிக்கை அவசியம் !

4_diverse_kids_smiling

—————————————————————

நம்பிக்கை

குழந்தைகளிடம் இதையெல்லாம் பேசாமல் இருப்பதே நல்லது.

உண்மை

குழந்தைகளிடம் மிக விரிவாக, தெளிவாக மீண்டும் மீண்டும் வலியுறுத்தும் விதமாக இவற்றைப் பேசுவது மிகவும அவசியம்.

தமிழிஷ் வாக்களிக்க…

பெண்ணே நீ – இதழில் வெளியான கட்டுரை

 

உடலைப் பேண பத்து கட்டளைகள்

 

ss 

 

உடலை வளமாக வைத்திருக்க வேண்டும் எனும் ஆர்வம் எல்லோரிடமும் காணப்படுவது இயல்பு. அப்படிப்பட்டவர்கள் இந்த பத்து வழிமுறைகளை கடைபிடிப்பது பயனளிக்கும்.

  

  1. தினமும் உடற்பயிற்சி செய்யுங்கள். உடற்பயிற்சி என்பது ஒரு குறிப்பிட்ட நேரத்தில் மட்டும் செய்வதல்ல, தினசரி அலுவல்களுக்கிடையே வாய்ப்புக் கிடைக்கும் போதெல்லாம் உடற்பயிற்சி செய்யலாம். படிகளில் ஏறி இறங்குவது, அடிக்கடி நடப்பது, கண்களுக்கு பயிற்சி கொடுப்பது, கைகால்களை நீட்டி மடக்குவது, மூச்சுப்பயிற்சி என எவ்வளவோ செய்யலாம்.
  2.  

     

  3. தினமும் மூன்று வேளை மூக்கு முட்ட அசைவப் பொருட்களை உடலுக்குள் திணிப்பதை கொஞ்சம் ஒத்தி வையுங்கள். எல்லாம் அளவாய் ஒருப்பதே ஆரோக்கியமானது. தினமும் ஐந்து முறை காய்கறிகள் மற்றும் பழங்களை உண்ணுங்கள். பெரும்பாலானவை வேக வைக்காததாக இருக்க வேண்டியது முக்கியம். சில காய்கறிகள் பாதி வேக வைத்து உண்ணலாம்.  
  4.  

  5. சோர்வாய் இருக்கிறது ஒரு காபி குடிப்போம், போரடிக்கிறது ஒரு காபி குடிப்போம், நண்பர் வந்து விட்டார் ஒரு காபி குடிப்போம் என எதெற்கெடுத்தாலும் காபி அருந்துவதற்கு ஒரு முற்றுப் புள்ளி வையுங்கள். தூய்மையான தண்ணீர், எலுமிச்சை சாறு, செயற்கை இனிப்பு கலக்காத பழச்சாறு, கிரீன் டீ போன்றவற்றை அதற்கு மாற்றாக அருந்தப் பழகுங்கள். 
  6.  

  7. நல்ல பழக்கங்களைக் கொண்டிருப்பது முக்கியம். குறிப்பாக புகைத்தலை முழுமையாய் விட்டு விடுங்கள். மது அருந்துதல், எதிர்மறை எண்ணங்களை வளர்த்தல் போன்ற அனைத்துமே உடலுக்கு ஊறு விளைவிப்பவை. எனவே நல்ல பழக்கங்கள், நல்ல சிந்தனைகள் இவை முக்கியம்.
  8.  

  9. மோசமான கொழுப்பு நிரம்பிய உணவுகளை தூரமாய் ஒதுக்குங்கள். குறிப்பாக, சீஸ், சிப்ஸ், பிரன்ச் பிரைஸ், பீட்சா போன்ற அதிக கொழுப்பு உணவுகளை ஒதுக்கித் தள்ளுங்கள். நலமான வாழ்வுக்கு உடல் எடை அதிகரிக்காமல் பார்த்துக் கொள்ள வேண்டியது அவசியம், அதற்கு தேவையற்ற கொழுப்புப் பொருட்களை ஒதுக்குவது மிக மிக அவசியம்.
  10.  

  11. உணவில் உப்பு சேர்ப்பதை மட்டுப்படுத்துங்கள். அளவுக்கு அதிகமான உப்பு உடலில் பல்வேறு நோய்களைக் கொண்டு வரும். அதிகம் உப்பை உட்கொள்ளும் போது உடலில் சோடியம் அளவு அதிகரிக்கிறது, இது மினரல்களின் சமநிலையைப் பாதிக்கிறது. உயர் குருதி அழுத்தத்துக்குக் கூட இது காரணமாகி விடுகிறது. அதிக உப்பு ரொம்ப ரொம்ப தப்பு என மனதுக்குள் எழுதி வைத்துக் கொள்ளுங்கள். 
  12.  

  13. உண்பதை நன்றாக மென்று உண்ணுங்கள். அதிக நேரம் மென்று உண்ணும் பொருள் உங்கள் உடலுக்கு அதிக பயனளிக்கும். தேவையற்ற கொழுப்பு சேர்வதிலிருந்தும், வாயுத் தொல்லை, செரிமானப் பிரச்சினை போன்ற அனைத்திலிருந்தும் அது உங்களைத் தப்புவிக்கும். நிறைய தண்ணீர் குடியுங்கள். உடலிலுள்ள அசுத்தங்களை வெளியேற்ற அது உதவும். முக்கியமாக, உணவு உண்டபின் குளிர்ந்த நீரைக் குடிக்கவே குடிக்காதீர்கள். மிதமான சூடுள்ள தண்ணீரையே அருந்துங்கள். 
  14.  

  15. இனிப்புப் பொருட்களை உண்பதை அளவுடன் நிறுத்திக் கொள்ளுங்கள். உடலின் சர்க்கரை அளவு அதிகரிக்கும் போது கொழுப்பு, இன்சுலின், டிரைகிளைசெரிட்ஸ் போன்றவற்றின் அளவு உடலில் அதிகரித்து உடலின் எதிர்ப்புச் சக்தியை கொஞ்சம் கொஞ்சமாய் வலுவிழக்கச் செய்யும். நினைவில் கொள்ளுங்கள், நீங்கள் வாங்கும் பொருளில் குளுகோஸ், சுக்ரோஸ், லாக்டோஸ், கார்ன் சுகர் என எழுதப்பட்டிருப்பவை எல்லாம் இனிப்புப் பொருட்களே !
  16.  

     

  17. எலும்புகள் வலிமையாக இருக்க வேண்டியது உடலின் மிக முக்கியமான தேவை. இல்லையேல் ஆஸ்டியோபோரோசிஸ் போன்ற எலும்பு உடைவு நோய் வந்து மிகப்பெரிய சிக்கலை உருவாக்கி விடும். எனவே உடலுக்குக் கால்சியம் சத்து அதிகம் கிடைக்கக் கூடிய உணவுகளை தவறாமல் உண்ணுங்கள். எலும்பின் உறுதியை நீர்த்துப் போகச் செய்யும் குளிர்பானங்களை (கோக், பெப்ஸி வகையறாக்கள்) முழுமையாய் ஒதுங்குங்கள். காலை வெயிலிலும் கொஞ்ச நேரம் உலவுங்கள் வைட்டமின் டி இலவசமாய்க் கிடைக்கும்.
  18.  

  19. தேவையான ஓய்வு, தேவையான தூக்கம், மனதை இலகுவாக்குதல் இவையெல்லாம் மிக மிக முக்கியம். வேலை வேலை என எந்நேரமும் அலையாமல் உடலுக்கும் மனதுக்கும் மகிழ்ச்சியளிக்கும் செயல்களை தினமும் சற்று நேரம் செய்யுங்கள். குடும்பத்தினருடனும், நண்பர்களுடனும் அன்பாகவும், இனிமையாகவும் செலவிடும் நிமிடங்கள் ஆரோக்கிய உடலுக்கும் உத்தரவாதம் !
  20.  

  நன்றி : தமிழ் ஓசை – களஞ்சியம்

குழந்தைகளுக்கு உணவு ஊட்டும் போது…

kid

 

மொட்டை மாடியில் மாலை வேளையில் வெறுமனே காற்று வாங்க செல்லும் போது பார்க்க முடியும் நகரத்து மொட்டை மாடிகள் ஒவ்வொன்றிலும் சாப்பாடு உண்ணச் சொல்லிக் குழந்தைகளைக் கெஞ்சிக் கொண்டிருக்கும் தாய்மார்களை.

 குழந்தைகளுக்கு உணவூட்டும் சிரமம் பெரும்பாலும் தந்தையர் அறியாததே ! மூன்று கண்ணன் வரான் சாப்பிடு என பயமுறுத்தியோ, சாக்லேட் வாங்கித் தரேன் சாப்பிடு என சொல்லி ஆசைகாட்டியோ எப்படியேனும் நாலுவாய் சாப்பிடால் போதும் என அல்லாடும் மனது அன்னையர்க்கே உரியது.

 குழந்தைகளுக்கு உணவு ஊட்டும் தாய்மார்கள் பல விஷயங்களைக் கவனிக்க வேண்டும் என மருத்துவத் துறை வல்லுனர்கள் கூறுகின்றனர்.

 

 

1.

 குழந்தைகள் உணவைச் சிந்திவிட்டால் திட்டுவதோ, அடிப்பதோ, மிரட்டுவதோ கூடாது. கூடவே, குழந்தைகளுக்கு எவ்வளவு உணவு தேவையோ அந்த அளவு மட்டுமே உண்ணப் பழக்குங்கள். போதும் எனுமளவுக்கு உண்டபின் அதிகமாய் உண்ணச் சொல்லிக் கட்டாயப்படுத்த வேண்டாம்.

 2

 

சோறு சாப்பிடு, கீரை சாப்பிடு அப்படி சாப்பிட்டால் சாக்லேட் வாங்கித் தரேன், ஐஸ்கிரீம் வாங்கித் தரேன் என்று சொல்வது தவறு. அப்படிச் சொல்வதனால் சோறு என்பது மோசமான பொருள் என்றும், சாக்லேட் மற்றும் ஐஸ்கிரீம் போன்றவை நல்ல பரிசுப் பொருட்கள் போன்ற ஒரு தோற்றம் குழந்தைகளின் மனதில் பதிந்து விடும். நாட்கள் செல்லச் செல்ல குழந்தைகளுக்கு உணவின் மீதான நாட்டம் குறையவும், இனிப்புகளின் மீதான விருப்பம் மிகைப்படவும் இது ஒரு காரணமாகிவிடுகிறது.

 3

 இனிப்புகளை முழுமையாய் தவிர்க்காதீர்கள். அப்படி மறுக்க மறுக்க குழந்தைகளுக்கு இனிப்புகளின் மீதான ஆர்வம் அதிகரித்துக் கொண்டே வரும். பின்பு வாய்ப்புக் கிடைக்கும் போது வட்டியும் முதலுமாய் சேர்த்து இனிப்பை உண்டு உடல்நலத்தைக் கெடுத்துக் கொள்ளும். எனவே ஒரு குறிப்பிட்ட அளவு இனிப்பு வகையறாக்களை வழங்கி வருவதே சிறப்பானது.

 4

 குறிப்பாக 90/10 முறையைக் கடைபிடிக்க வல்லுநர்கள் வலியுறுத்துகின்றனர். அதாவது 90 விழுக்காடு ஆரோக்கியமான உணவும் மீதி பத்து விழுக்காடு இனிப்பு, பொரியல் போன்றவற்றையும் உண்பதும் நல்லது. அந்த இனிப்பு வகைகளிலும் அதிக கொழுப்பான, செயற்கைப் பொருட்கள் அதிகம் அடங்கியவற்றைத் தவிர்க்கவேண்டும்.

 5

 அதிக கொறித்தல் பொருட்களைக் குழந்தைகளுக்கு வழங்காமல் இருப்பதே நல்லது. குறிப்பாக குழந்தைகளுக்கு சரியான நேரத்தில் உணவு ஊட்டுவதும், சரியான நேரத்தில் தின்பண்டங்கள் கொடுப்பதும் நல்லது. எப்போதும் ஏதேனும் கொறித்துக் கொண்டிருக்கும் குழந்தைகள் ஆரோக்கியமான மதிய உணவையோ, இரவு உணவையோ தேவையான அளவு சாப்பிட மறுக்கும்.

 வீடுகளில் தேவையற்ற உணவுப் பொருட்களை வாங்கி நிறைக்காதீர்கள். உங்களுக்குப் பிடிக்கும் என்பதற்காக நீங்கள் வாங்கி வைக்கும் குளிர்பானமோ, சிப்ஸோ குழந்தை சாப்பிடக் கூடாது என நீங்கள் எண்ணுவதில் அர்த்தமில்லை. குறைந்தபட்சம் குழந்தைகளிடமிருந்து அவற்றை முழுமையாய் மறையுங்கள்.

  

6

 இன்றைக்கு எங்கும் பரவியிருக்கும் குளிர்பானங்கள், பதப்படுத்தப்பட்ட பழச்சாறுகள், எனர்ஜி பானங்கள் போன்றவை குழந்தைகளுக்கு எந்த நன்மையும் தருவதில்லை என்கிறது ஜெர்னல் பீடியாட்ரிக்ஸ் ஆய்வு முடிவு ஒன்று. மாறாக இவை உடல் நலத்தைக் கெடுத்து விடுகிறதாம். எனவே 100 விழுக்காடு பழச்சாறு என்றெல்லாம் கவர்ச்சிகரமாய் வரும் விளம்பரங்களை நம்பி ஏமாந்து விடாதீர்கள்.

 7

 பழச்சாறு போன்றவற்றுக்குப் பதிலாக தண்ணீர் அதிகமாய் அருந்துவதற்குக் குழந்தைகளை உற்சாகப்படுத்துங்கள். எல்லோரும் எல்லாவற்றையும் விரும்பமாட்டார்கள் என்பதும் நமக்கு மிகவும் பிடித்தது இன்னொருவருக்கு சுத்தமாகப் பிடிக்காமல் போகும் என்பதையும் எப்போதும் நினைவில் கொள்ளுங்கள். பிடிக்கவில்லை என்று சொல்வதனால் உங்கள் குழந்தையை திட்டாதீர்கள்.

  

8

 குழந்தைகளுக்கு ஒரே மாதிரியான உணவை கொடுத்து போரடிக்காதீர்கள். ஒரே மாதிரியான உணவைக் கொடுக்க வேண்டி வந்தால் அதன் வடிவத்தையோ, சுவையையோ எதையேனும் வித்தியாசமாய் காண்பியுங்கள். வித்தியாசமானவை குழந்தைகளுக்குப் பிடிக்கும் என்பதையும், பிடித்தமான பாத்திரத்துக்காகவே குழந்தைகள் உணவை உண்பார்கள் என்பதையும் கவனத்தில் கொள்ளுங்கள்.

 9

 ஒரு கடி, ஒரு வாய் என குழந்தைகளை உற்சாகப்படுத்துங்கள். காய்கறி போன்றவற்றை தினமும் கொஞ்சம் கொஞ்சம் உண்ணப் பழக்கினாலே அவை நீண்டகால உணவுப் பழக்கமாய் மாறிவிடும். எனினும், எதையும் அளவுக்கு மீறி வற்புறுத்தாதீர்கள்.

 10

 குழந்தைகளுக்கு பழங்கள், காய்கறிகள் போன்றவற்றை பறவை, பூ, படகு என வித்தியாசமான வடிவங்களில் வெட்டிப் பரிமாறிப் பாருங்கள். குழந்தைகள் வெகுவாக விரும்பி உண்பார்கள்.

 சிறு சிறு சமையல் வேலைகளில் உங்கள் குழந்தைகளை ஈடுபடுத்துங்கள். அவர்களுக்கு உணவின் மீதான நாட்டம் அதிகரிக்கும். நான் கழுவிய காரெட் இது – என்பது போன்ற மன ரீதியான தொடர்பு ஏற்படும்.

 இவற்றில் உங்களுக்கு வசதியான, பிடித்தமான சில வழிகளை முயன்று பாருங்கள். உங்கள் உணவூட்டும் வேலை எளிதாகக் கூடும்.

 

நன்றி : யூத்புல் விகடன்

 

 

 

 

 

எனது நூலுக்கு விருது

xavier11

கிழக்கு பதிப்பகத்தின் வெளியீடாக வந்த எனது “இயேசு என்றொரு மனிதர் இருந்தார் “ எனும் நூலை கடந்த ஆண்டின் சிறந்த நூலாக “தென்னிந்தியத் திருச்சபையின் கிறிஸ்தவ தமிழ் இலக்கியப் பேரவை மற்றும் தமிழிசைப்பள்ளி அமைப்பினர் “ தேர்வு செய்து விருது வழங்கினார்கள்.

இயேசுவின் வாழ்க்கை வரலாற்றை அன்றைய சமூக அரசியல் கலாச்சாரப் பின்னணியில் விவிலிய மொழிக்கு வெளியே விரிவாய் சொன்ன நூல் இது என பல்வேறு தரப்பினரும் மனம் திறந்து பாராட்டியது மனதுக்கு நிறைவளித்தது.

இந்த நூலை எழுதுவதும் ஒரு சவாலான விஷயமாகவே இருந்தது. பைபிளில் இயேசுவின் வாழ்க்கையை நான்கு நற்செய்தியாளர்கள் எழுதியுள்ளனர். ஆனால் அவற்றில் வெளிப்படையான ஆண்டுக் குறிப்புகள் ஏதும் இல்லை.

இயேசுவின் பிறப்பு, இறப்பு, உயிர்ப்பு இவற்றைத் தவிர்த்து நற்செய்தியாளர்கள் பல்வேறு செய்திகளை அவர்களுடைய விருப்பப்படி சொல்கின்றனர்.  இந்த செய்திகளின் தொகுப்பில் எந்த வரிசைப்படி எவை வருகிறது என்பதை கண்டுபிடிக்கவே பெரும்பாலான நேரம் செலவானது. பல்வேறு இறையியல் நண்பர்கள், நூல்கள், ஆன்மீக வழிகாட்டிகள் என பலருடைய உதவியே இந்த நூலின் செய்திகளை கால வரிசைப்படி தொகுக்க பெரிதும் உதவியது.

இந்த நூல், இயேசுவின் வாழ்க்கையைத் தெரிந்த பலருக்கும் கூட சில புதிய தகவல்களைச் சொன்னது எனுமளவில் நிறைவு தந்தது.

நூலுக்குக் கிடைத்த அங்கீகாரம் மனதுக்கு ஆனந்தமளிக்கிறது. இந்த நேரத்தில் நூலை வெளியிட்ட கிழக்குப் பதிப்பகத்துக்கும், நண்பர்கள் பா.ரா, பத்ரி, சொக்கன் ஆகியோருக்கும், உதவிய மற்ற அனைத்து நபர்களுக்கும் நன்றி சொல்லிக் கொள்வது அதை விட அதிகமாய் ஆனந்தமளிக்கிறது.

அப்பாவின் நினைவாக…

வெறும் நான்கு வருடங்கள் தானா ? ஒரு ஆயிரம் வருடங்கள் ஆகியிருக்கும் என்றல்லாவா நினைத்தேன் என்கிறது மனது. ஒரு வழிகாட்டியாய், தோழனாய், தியாகியாய், கடமை தவறாத அப்பாவாய் என எத்தனையோ பரிமாணங்களைக் காட்டிய தந்தை மறைந்தபின் நாட்கள் சுமை இழுக்கும் கழுதையைப் போல பெருமூச்சு விட்டுத் தான் நகர்கிறது.
.
வரப்புகளில் எனை நடக்கப் பழக்கியதும், சர்ப்பக் குளத்தில் நீச்சல் பழக்கியதும், சமூகத்தில் வாழப் பழக்கியதும், சபைகளிலே பேசப்பழக்கியதும் எல்லாம் எல்லாம் என் தந்தை தான். கிராமத்து மண்ணில் கால் மிதிக்கும் போதெல்லாம் என் அப்பா நடந்து திரிந்த சாலை இது என மனது ஈரமாய் அழுகிறது.
.
இப்படி ஒரு வழிகாட்டியே ஒவ்வோர் குழந்தைக்கும் தேவை எனுமளவுக்கு அப்பாவின் வழிகாட்டுதல் இருந்தது. அதிர்ந்து பேசியதில்லை, ஆனால் அவருடைய பேச்சைத் தட்டவேண்டுமென தோன்றியதில்லை. எப்போதேனும் வயதுக் கோளாறினால் தந்தை சொல் தட்டியபின்னும், பொய் சொல்லிப் பணம் வாங்கிய பின்னும் குற்ற உணர்வு தாங்காமல் அழுதிருக்கிறேன். அப்படிப்பட்ட நேசமே எனக்கும் அப்பாவுக்குமான நேசம்.
.
மங்கலாகவும், எல்லாம் மறந்தது போலவும் தோன்றுகிறது. என்னையே நான் அலசி ஆராயும்போதெல்லாம் எனக்கு இருக்கும் இன்றைய சிந்தனைக்கும், மனதுக்கும் காரணம் என் பெற்றோரே என்பதை துளியளவும் மறுக்க முடியாது.
.
சிறுவயதில் ஒருமுறை நாலணா திருடிக் கொண்டு அதைப் பெருமையாக அப்பாவிடமே கொண்டு காட்டினேன். “எங்கிருந்து எடுத்தே” என்று ஒரே ஒரு கேள்வி தான். பக்கத்து வீட்டிலிருந்து என உண்மையைச் சொன்னேன். அடுத்த வினாடியே கையோடு அழைத்துச் சென்று எடுத்த அதே இடத்தில் வைக்கச் செய்து மன்னிப்பு கேட்க வைத்தார். அப்போது நான் ஒன்றாம் வகுப்பா, இரண்டாம் வகுப்பா தெரியவில்லை. ஆனால் அது தான் கடைசியாய் நான் திருடியது என்பது மட்டும் தெரியும்.
.
அப்போது நான் பதின் வயதுகளில். இரண்டு வீட்டாருக்கு இடையே சண்டை நடந்து கொண்டிருந்தது. அப்பா அங்கே விரைந்தார், கூடவே நானும். அடுத்தவர் மனைவியை தரக்குறைவாய் பேசிவிட்டார் ஒருவர் என்பது தான் பிரச்சனை. அப்பா கொஞ்சம் சாந்தமாய் பேசி பிரச்சினையை முடிக்கப் பார்த்தார். அப்பா ஒரு பள்ளிக்கூட தலைமை ஆசிரியராகவும், ஆலயத்தில் மிக முக்கிய நபராகவும் இருந்ததால் அவருடைய பேச்சுக்கு ஊரில் மரியாதை இருந்தது. ஆனால் அன்றைக்கு இருக்கவில்லை. பிரச்சினையை விடுமாறு அப்பா அறிவுறுத்தினார். “ஒன் பொண்டாட்டி எவன் கூடவோ போனா.. என்று ஒருத்தன் சொன்னா நீ சும்மா இருப்பியா “ என அப்பாவை நோக்கி கோபமாய் கத்தினார் அவர். என் பதின் வயது சுருக்கென சிவந்தது. அப்பாவோ அமைதியாக, “நான் சும்மா தான் இருப்பேன். ஏன்னா நான் மத்தவங்களை விட என் பொண்டாட்டியை நம்புபவன்” என்றார். நான் அப்பாவை நிமிர்ந்து பார்த்தேன். வியப்பாய் இருந்தது. அந்த சண்டையும் அங்கே நிறைவுற்றது.
.
ஆலயத்தில் சமாதானக் குழு என ஒரு குழு உண்டு. கிராமத்து மக்கள் எதற்கெடுத்தாலும் முறுக்கிக் கொள்வதனால் உருவான குழு அது. வீடுகளுக்கு இடையே நேரிடும் உறவு விரிசல்களைச் சரி செய்யவும், அனைவரையும் ஒற்றுமைப்படுத்தவும் ஒரு பாலமாக இந்த சமாதானக் குழு செயல்படும். அந்தக் குழுவின் தலைவராக அப்போது இருந்தவர் அப்பா. அது எனது கல்லூரி காலம். ஒருமுறை ஏதோ ஒரு குடும்பச் சிக்கலைச் சரி செய்தது அந்தக் குடும்பத்திலுள்ள ஒருவருக்குப் பிடிக்கவில்லை. அவர் சாலையில் நின்று கொண்டு ஒரு ஞாயிற்றுக் கிழமை காலையில் அப்பாவை தரக்குறையாய் பேசத் துவங்கினார். கடைகளில் இருந்தவர்களும், சாலையில் பேருந்துக்காய் காத்திருந்தவர்களும் எல்லோரும் அப்பாவைப் பார்த்துக் கொண்டிருந்தனர். எனக்கு பொறுக்கவில்லை. ஆனால் எனது கையை அப்பா அழுத்தமாய் பிடித்திருந்தார், எதுவும் சொல்ல வேண்டாம் என்பது போல. சுமார் அரை மணி நேரம் அவர் தனி ஒருவராக கத்திக் கொண்டே இருந்தார். பின் அவருக்கே போரடித்திருக்க வேண்டும் பேச்சின் சுருதியைக் குறைத்து விட்டு அப்பா நின்றிருந்த கடைக்கு அருகில் வந்தார். உடனே அப்பா கடைக்காரரிடம் “ஒரு சர்பத் குடுங்க. “ என்று ஒரு சர்பத் வாங்கி கத்திய நபரிடம் கொடுத்தார். கொடுத்துவிட்டு “ மனசுல என்ன இருந்தாலும் கொட்டிடணும். அப்போ தான் மனசு லேசாகும்.. “ என்றார். அந்த நபர் அதன் பின் பேசவேயில்லை.
.
பெரியவர்களை மரியாதையாய் தான் அழைக்கவேண்டும், ஏழை பணக்காரர் வித்தியாசம் பார்க்கக் கூடாது, பொறுமையே தேவை, உடனடி மன்னிக்கும் மனம் என்றெல்லாம் அவர் கட்டிய மதிப்பீடுகளின் செங்கற்களில் தான் நின்று கொண்டிருக்கிறது எனது வாழ்க்கை எனும் கட்டிடம்.
.
அமெரிக்காவுக்குக் கடைசியாய் அப்பா அனுப்பிய கவிதை இது ( கடிதம் தொலைந்து விட்டது. வரிகளை நினைவிலிருந்து எழுதுகிறேன். எனவே எழுத்துப் பிழைகள் இருக்கலாம் ). எத்தனை தொலைவில் நீ இருந்தாலும் என் நேசத்தில் தான் இருக்கிறார் என அவர் அனுப்பிய மடல். இன்னும் என் நினைவுகளில் ஒலிக்கிறது அப்பாவின் குரல் கவிதையாய்.

ദൂര ദേശ അഭിവാശം എങ്കിലും
സ്നേങമെന്നത് അനര്ധമാകുമോ
സുര്യനേരെ തിക്കിലുതിക്കിലും
സാരസങ്ങള് വിടരുന്നതില്ലയോ

2003ம் வருடம் அப்பாவுக்கு உடல்நிலை சரியில்லை எனும் தகவல் வந்ததும் இந்தியா வந்தேன். நல்லவேளை அப்போது அப்பா பிழைத்துக் கொண்டார். அந்த நிம்மதி மூச்சுக்கு ஓராண்டு நீளமே இருந்தது துயரம் ! 2003ல் எழுதிய கவிதை இது. நினைவுகளின் பரணைத் துடைக்கையில் அகப்பட்டது.
.

படுக்கையில் என் பிரபஞ்சம்

அந்த அழைப்பு
இல்லாதிருந்திருக்க வேண்டும்.

என்னை
கிராமத்தின் வரப்புகளுக்கும்,
அமெரிக்காவின்
வியப்புகளுக்கும்
அனுப்பிய தந்தை பற்றிய செய்தி.

மருத்துவப் படுக்கையில்,
வெளிவராத வார்த்தைகளோடும்
எனைக் காணும்
கனவுகளோடும் அப்பா.

அதுவரை
ஒற்றைப் புள்ளிக்குள்
உறங்கிக் கிடப்பதாய்
தோன்றிய உலகம்,
ஏழு கடல்களை
இடையே இணைத்ததாய்
திடீரென விஸ்வரூபம் கொண்டது.

கடுகு வெடித்து
சஞ்சீவி சரிந்ததாய்,
ஒற்றை வரிச் செய்தி எனக்குள்
சில கிரகங்களை
இறக்கி வைத்தது.

நான்
முதல் முறை இறக்கிறேன்.

சிறு வயது முதலே
செலவழிக்காத
என் கண்ணீர்க் கடல்,
இதயத்துக்குள் உடைந்தது.

வினாடிக்குக் கூட
நீளம் உண்டு என்பதை
விஞ்ஞானிகள் சொல்லி
விளங்கிக் கொள்ளாத நான்,
அப்பாவால்
அறிந்து கொண்டேன்.

இரவுகளில் சோகம்
இரட்டிப்பாகும் என்பதும்,
உண்ணாமல் சிலநாட்கள்
உயிர்வாழ முடியும் என்பதும்,
நான்
பகிர வேண்டிய பாசம்
ஏராளம் என்பதும்,
ஆறாவது அறிவுக்கு
அறிவிக்கப்பட்டது அப்போது தான்.

இறக்கை உதிர்க்கா
உலோகப் பறவை,
மீனம்பாக்கம் சரணாலயத்தில்
சரணடையும் வரை
நரம்புகளெங்கும்
நடுங்கும் நயாகரா
நகர்ந்து கொண்டே இருந்தது.

பேரம் பேசாமல்
வாகனம் அமர்த்தியதும்,
சில்லறை வாங்காமல்
சிதறி ஓடியதும் அப்போது தான்.

வயல்களில்
தானியம் தின்னும் பறவையாய்
தாவித்திரிந்த தந்தையை,
கசக்கிப் போட்ட வேட்டியாய்
கட்டிலில் பார்க்கையில்
நசுங்கியது மனசு.

அவர் அருகே
என் புதிய புத்தகம்.
அதை
விரல்களால் மட்டுமே அவர்
வாசித்துப் பார்த்திருந்தார்.

என்னைக் கண்டதும்
கண்களில் பொங்கும்
ஆனந்த அலைகளை
கரைகளுக்கு அனுப்பவே
இயலாத நிலை.

நல்லவேளை,
அப்பா வீடு திரும்பினார்.

பிரார்த்தனைகள்
அப்பாவை
கட்டிலை விட்டுக் கீழிறக்கி
இருக்கையில்
இருக்க வைத்தது.

பிறிதொரு பொழுதில் கேட்டேன்,
மருத்துவமனைக் கட்டிலில்
என்ன பிரார்த்தித்தீர்கள்.

அப்பா சொன்னார்,

அந்த மரண வேதனையை
சகித்துக் கொள்ள இயலவில்லை,
இறைவன்
நெஞ்சு வலிதந்து என்னை
கொன்று விடட்டும்.
என பிரார்த்தித்தேன்.

நான்
இரண்டாம் முறையாய்
இறந்தேன்.

பெண்களும், மன அழுத்தமும்.

ஒரு பெண்ணை சதாகாலமும் கணவனோ அல்லது சார்ந்திருக்கும் எவரோ திட்டிக்கொண்டே இருந்தால் என்ன நிகழும் ?. அவள் மிக மிகக் கொடிய மன அழுத்த நோய்க்குள் விழுவாள் என்கின்றது சமீபத்திய ஆய்வு ஒன்று.

மன அழுத்த நோயால் பாதிக்கப்படுபவர்களில் எழுபத்து ஐந்து விழுக்காடு மக்கள் பெண்கள் என்பது வெறுமனே புள்ளி விவரங்களைப் பார்த்து கடந்து செல்வதற்கானது அல்ல. அது நமது சமூகத்தின் மீதும், நமது கலாச்சாரக் கட்டமைப்புகளின் மீது கேள்விகளை எழுப்புவதற்கானது.

சமூகக் கட்டமைப்புகள் இன்னும் பெண்ணை முழுமையாய் அவளுடைய கோபத்தை வெளிக்காட்ட அனுமதிக்கவில்லை என்பதே உண்மை. அப்படி தனக்குள்ளேயே அடக்கப்படும் கோபம் மன அழுத்தத்தின் அடிப்படைக் காரணியாகி விடுகிறது.

ஒரு ஆண் தனது மன அழுத்தத்தை கோபத்தின் மூலமாகவோ, அல்லது தனக்கு விருப்பமான ஏதோ ஒரு வழியில் வெளியேற்றி விடுகின்றான். பெண்களுக்கு அத்தகைய வாய்ப்பு மிகக் குறைவாகவே வழங்கப்படுகிறது.

அவள் பெண் என்று கற்காலச் சமூகம் கட்டி வைத்த கோட்டைகளைத் தாண்ட முடியாமல், அதே அட்டவணைக்குள் தான் வாழ வேண்டி இருக்கிறது. இத்தகைய வரையறைகளைத் தாண்டும் போது ஆண்களால் தாங்கிக் கொள்ள முடிவதில்லை. இதுவும் சமீப காலமாக அதிகரித்து வரும் மண முறிவுக்கு ஒரு முக்கியக் காரணம் என்கிறார் சென்னையைச் சேர்ந்த மனநோய் மருத்துவர் ஒருவர்.

தனக்குள்ளேயே வெடித்துத் தன்னை அழிக்கும் மனக் கண்ணி வெடி ஒரு ரகமான மன அழுத்தத்தைப் பெண்களுக்குத் தருகிறது என்றால், தொழில் அழுத்தம், பணி சுமை, சுதந்திரமின்மை என பல செயல்கள் வெளியிலிருந்து தாக்குகின்றன.

பெண்களின் மன அழுத்தத்திற்கு உடலியல் ரீதியாகவும் காரணங்களும் பல உள்ளன. பெண்களுடைய ஹார்மோன்களின் சமநிலை ஆண்களைப் போல இருப்பதில்லை, வெகு விரைவிலேயே அதிக மாற்றத்தை அது சந்திக்கிறது. இயற்கை பெண்ணுக்கு அளித்திருக்கும் மாதவிலக்கு சுழற்சிகள் இதன் முக்கிய காரணமாய் இருக்கின்றன.

தான் பெண்ணாய் பிறந்து விட்டோமே எனும் சுய பச்சாதாபம் பல பெண்களுடைய வாழ்க்கையில் மன அழுத்தத்தைக் கொண்டு வருகின்றதாம். அதற்குக் காரணம் சமூகத்தில் ஒரு ஆணுக்குக் கிடைத்திருக்கும் அங்கீகாரமும், சுதந்திரமும் பெண்ணுக்குத் தரப்படவில்லை என்பதும், அதை எடுக்க முயலும்போது அவள் முரட்டுத் தனமான கருத்துக்களால் முடக்கப்படுகிறாள் என்பதுமே.

நேரடியான மன அழுத்தம் பெரும்பாலும் மனம் சம்பந்தப்பட்டது. நம் மீது திணிக்கப்படுபவையோ, நம்மால் உருவாக்கப்படுபவையோ உள்ளுக்குள் உருவாக்கும் அழுத்தம் அது.

மகிழ்ச்சியாய் இருக்க முடியாத மன நிலை இத்தகைய மன அழுத்தத்தின் ஒரு முகம். ஆனந்தமாய் சுற்றுலா செல்லலாம் என அழைத்தாலும் சலனமில்லாமல் பதிலளிக்கும் மனம் அழுத்தத்தின் படிகளில் அமர்ந்திருக்கிறது என்பதை உணர வேண்டும்.

மறை முகமாய் தாக்கும் மன அழுத்தம் உடல் வலிகளின் காரணமாக வரக் கூடும் என்கின்றனர் மருத்துவர்கள். குறிப்பாக முதுகுவலி, கழுத்துவலி, வயிற்று வலி என வரும் வலிகள் இரவுத் தூக்கத்தைக் கெடுக்கின்றன. நிம்மதியற்ற சூழலையும், பல உபாதைகளையும் தந்து கூடவே மன அழுத்தத்துக்கும் விதையிடுகின்றன.

பெண்களுக்கு இத்தகைய மன அழுத்தம் வருவதற்கு அவர்களுடைய உடல் பலவீனமும் ஒரு முக்கிய காரணமாகி விடுகிறது.

ஒன்று மட்டும் நினைவில் கொள்ள வேண்டியது அவசியம். எந்த ஒரு மன அழுத்தத்தையும் எந்த ஒரு மருந்தும் முழுமையாய் குணமாக்கி விட முடியாது.

நம்மைச் சார்ந்து வாழும் சகோதரிகளின் மன அழுத்தத்திற்கான விதை நம் வார்த்தைகளிலிருந்தோ, செயல்களிலிருந்தோ விழுந்து விடாமல் கவனமாய் இருப்பது ஆண்களின் கடமை.

பெண்களும் சமூகம் என்பது ஆண்கள் மட்டுமான அமைப்பல்ல என்பதை புரிந்து கொள்ள வேண்டும். காற்றடித்தால் மூடிக் கொள்ளும் தொட்டாச்சிணுங்கி மனப்பான்மையிலிருந்து தைரியமாக சமூகத்தின் வீதிகளில் பழமை வாதிகளின் எதிர்ப்புகளுக்குப் பலியாகாமல் நிமிர்ந்து நிற்க வேண்டும்.

புரிதலும், அன்பு புரிதலும் கொண்ட, தேவையற்ற அழுத்தளுக்கு இடம் தராத, சின்ன சுவர்க்கங்களாக குடும்பங்கள் விளங்கினால், மன அழுத்தம் விடைபெற்றோடும் என்பதில் ஐயமேதும் இல்லை.