TOP 10 : கனவுகளில் உருவான கண்டுபிடிப்புகள்

Image result for periodic table in dream

கனவுகள் ஏன் வருகின்றன எதற்காக வருகின்றன எனும் ஆய்வுகள் ஒரு பக்கம் மும்முரமாக நடந்து கொண்டிருக்கின்றன. “கனவு காணுங்கள்” என இலட்சியத்தைக் குறித்து அப்துல் கலாம் அவர்கள் சொன்னார். பகல் கனவு காணாதீங்க என பெரியவர்கள் அடிக்கடி சொல்கின்றனர். எது எப்படியோ, இந்தக் கனவுகள் பல்வேறு வியப்பூட்டும் விஷயங்களின் முதல் சுவடாய் இருந்திருக்கிறது என்பது பிரமிப்புச் செய்தி. பல கண்டு பிடிப்புகள், பல படைப்புகள் இவையெல்லாம் கனவுகளிலிருந்து கிடைத்திருக்கின்றன. அவற்றில் ஒரு பத்து விஷயங்கள் இந்த வாரம்.

  1. பீரியாடிக் டேபிள்

தனிம அட்டவணை என தமிழில் அழைக்கப்படும் உலகப் புகழ் பெற்ற பீரியாடிக் டேபிள் பற்றி தெரியாத பள்ளிக்கூட குழந்தைகள் இருக்க முடியாது. டிமிட்ரி மென்டலீவ் தான் இதைக் கண்டு பிடித்தவர். வேதியலில் அதீத ஆர்வம் உடைய அவருக்கு அறிவியல் ரீதியாக ஏற்றுக்கொள்ளக் கூடிய ஒரு ஃபார்முலா கண்டுபிடிக்க வேண்டும் என்பது விருப்பமாக இருந்தது. ஆனால் முடியவில்லை.

ஒரு நாள் ஒரு கனவு. கனவில் ஒரு அட்டவணை, அந்த அட்டவணையில் தேவையான எண்களெல்லாம் வந்து நிரம்பிக் கொள்கின்றன. அதை வைத்து என்ன மதிப்பு வேண்டுமானாலும் கண்டு பிடிக்க முடிகிறது. ஆகா என வியக்கிறார். திடீரென முழிப்பு வருகிறது. சற்றும் தாமதிக்காமல் அருகில் கிடந்த பேப்பரில் கனவை அப்படியே கிறுக்கி வைக்கிறார். சந்தோசம் தாங்க முடியவில்லை. பின்னர் முதல் வேலையாக தனது கனவு கான்செப்டை அப்படியே முழுமைப்படுத்துகிறார். பீரியாடிக் டேபிள் ரெடி ! 1869ம் ஆண்டு அந்த தனிம அட்டவணையை வெளியிடுகிறார் அவர். கனவு, அவருடைய கனவை நனவாக்கிக் கொடுத்தது !

  1. ஒரு உலகப் புகழ் பாடல்

ஒரு இசைக்கலைஞர் தூங்கிக் கொண்டிருக்கிறார். நாடி நரம்பு ரத்தம் சதை எல்லாத்திலும் இசை வெறி ஊறிப் போன அவருக்கு கனவில் ஒரு பாடல் ஒலிக்கிறது. அற்புதமான பாடல். காலையில் எழும்பும் போது அந்தப் பாடலை பாடிக்கொண்டே எழும்புகிறார். அது கனவில் கிடைத்த பாடல் என அவருக்கு புரியவில்லை. எங்கேயோ கேட்ட பாடல், கனவில் ஒலித்தது என நினைக்கிறார்.

அந்தப் பாடலை அப்படியே எழுதி டியூன் போடுகிறார். அந்தப் பாட்டை எங்கே கேட்டேன் என மூளையைக் கசக்குகிறார். கண்டு பிடிக்க முடியவில்லை. நண்பர்கள் அனைவரிடமும் கேட்கிறார், யாரும் அந்தப் பாட்டைக் கேட்டதில்லை. பழைய இசை ஆல்பங்களையெல்லாம் புரட்டுகிறார். இசை தெரிந்த அனைவரிடமும் கேட்கிறார் யாருக்கும் தெரியவில்லை. பின்பு தான் அது கனவில் கிடைத்த பாடல் என புரிகிறது. அந்தப் பாடலை அவர்கள் வெளியிடுகின்றனர். அது உலகப் புகழ் பெற்ற பாடலாய் மாறி விடுகிறது.

அந்தப் பாடலைக் கனவில் கண்டவர், பால் மெக்கார்த்தி. பாடல் . எஸ்டர்டே எனும் பாடல். இசைக்குழு, உலகப் புகழ் பெற்ற பீட்டில்ஸ் !!!

  1. டெர்மினேட்டர்

102 டிகிரி காய்ச்சலில் சுருண்டு படுத்திருந்தார் ஜேம்ஸ் கேமரூன். ரோம் நகரில் தனது படம் ஒன்றின் இறுதிகட்ட வேலைகளுக்காக அங்கே வந்திருந்தார். தெரியாத ஊரில் வந்து இப்படி காய்ச்சலில் மாட்டிக் கொண்டோமே என கலங்கத்துடன் படுத்திருந்தார் அவர். அந்த அசாதாரண சூழலில் தூங்கிப் போனார்.

திடீரென ஒரு கனவு. கனவில் ரோபோ ஒன்று சமையலறைக் கத்தியை வைத்துக் கொண்டு நெருப்பும் பிழம்பிலிருந்து தப்பிக்க முயல்கிறது. ரோபோ கொலையாளியின் செயல்கள் கனவில் விரிய விழித்துக் கொண்டார் கேமரூன். அந்தக் கனவு அவரை வசீகரித்தது.

தனது கனவை எழுதினார். அதற்கு கை கால் கண் காது மூக்கு எல்லாம் வைத்தார். உலகையே திரும்பிப் பார்க்க வைத்த‌ டெர்மினேட்டர் கதை ரெடி. அந்த ஒரு கனவு ஜேம்ஸ் கேமரூனுக்குக் கொடுத்த செல்வமும், புகழும் எவ்வளவு என்பது உலகறிந்த கதை !

  1. டுவைலைட்

நியூயார்க்கின் “பெஸ்ட் செல்லர்” லிஸ்டில் சுமார் இரண்டு ஆண்டுகள் இருந்த ஒரு நாவல். உலகில் சுமார் 1.7 கோடி பிரதிகள் விற்ற நாவல். அந்தக் கதைகள் பின்னர் திரைப்படமாகி உலகெங்கும் பல பில்லியன் டாலர்களைச் சம்பாதிக்கவும் செய்தது ! இத்தனைக்கும் காரணமான அந்த நாவலின் கரு கனவிலிருந்து கிடைத்தது என்று சொன்னால் வியப்பான விஷயம் தான்.

ஸ்டெஃபனி மேயர் ஆழ்ந்து தூங்கிக் கொண்டிருந்தபோது ஒரு கனவு வந்தது. வித்தியாசமான காதல் கனவு. கூடவே காதலர்கள் உரையாடவும் செய்கிறார்கள். அந்த மையம் தான் அவரை வசீகரித்தது. அந்தப் புள்ளியைச் சுற்றி அவர் வரைந்த கோலம் தான் டுவைலைட் நாவல். அந்த முதல் நாவலுக்குக் கிடைத்த வரவேற்பு அடுத்தடுத்த பார்ட்களை உருவாக்கியது. இன்றும் இளசுகளின் மனம் கவர்ந்த நாவல்களின் பட்டியலில் அதற்கு ஒரு நிச்சயம் இடம் உண்டு.

  1. ஸீகல்

ஆங்கில நாவல்களோடு பரிச்சயமுள்ளவர்களுக்கு நிச்சயம் தெரிந்திருக்கக் கூடிய பெயர் ஸீகல். ஜோனதன் லிவிங்க்ஸ்டன் சீகல் .. எ ஸ்டோரி எனும் பெயரில் அந்த நாவல் வெளியானது. அது சாதனைக்கு மேல் சாதனை படைத்து உலகிலேயே அதிக விற்பனையான நாவல் எனும் பெயரையும் பெற்றது. அதற்கு முன் சாதனை நாவலாக இருந்த கான் வித் வின்ட் நாவலின் விற்பனையை இது முறியடித்தது.

உளவியல் கலந்த இந்த நாவலின் தலைப்பு எழுத்தாளர் ரிச்சர்ட் பெக் கின் காதுகளில் ஏதோ ஒரு ரீங்காரமாய் விழுந்தது. உடனே நாவலை எழுத ஆரம்பித்தார். அதன் பின் கொஞ்ச காலம் நாவலை கிடப்பில் போட்டார். திடீரென ஒரு கனவு. அந்தக் கனவில் அந்த நாவலுக்கான முடிச்சும், தொடர்ச்சியும் அவருக்குக் கிடைக்க, சட்டு புட்டு என எழுதி முடித்தார். நாவல் உலகப் புகழ் பெற்றது. ஒரு கனவு அவருக்கு கனவு நாவலை முடிக்க உதவியது.

  1. கூகிள்

லேரி பேஜ் படிப்பில் ரொம்ப சுமார். எப்போ வேணும்னாலும் கல்லூரியிலிருந்து வெளியேற்றி விடுவார்கள் எனும் பயமும், குழப்பமும் அவருடைய மனதை அழுத்திக் கொண்டே இருந்தது. அந்த அழுத்தமான சூழலில் ஒரு நாள் ஒரு கனவு கண்டார். அதில் அவர் இன்டர்நெட்டையே முழுமையாய்  ஒவ்வொரு கணினியிலும் தரவிறக்கம் செய்து வைக்கிறார்.

அந்தக் கனவு அவரை தூங்க விடவில்லை. அது சாத்தியமா என யோசித்தார். எழும்பி உட்கார்ந்து விஷயங்களைக் கூட்டிக் கழித்துப் பார்த்தார். முழுமையாய் தரவிறக்கம் செய்ய முடியாது. ஆனால் லிங்களில் தகவலை செமிக்கலாம் என புரிந்து கொண்டார்.

அந்தக் கனவின் விளைவு தான் கூகிள். இப்போ எதுக்கெடுத்தாலும் கூகிளில் தேடுகிறோமே, அந்த கனவுக்கு தான் நன்றி சொல்ல வேண்டும்.

  1. டின் டின் இன் திபெத்

கார்டூனிஸ்ட் ஹெர்ஜ் டின் டின் மூலம் உலகப் புகழ் பெற்றவர். இவருடைய கதை பல்வேறு திரைப்படங்களாகவும், தொலைக்காட்சி நிகழ்ச்சிகளாகவும், ரேடியோ நிகழ்ச்சிகளாகவும் பல வடிவம் பெற்றவை. அவற்றில் மிகப் பெரிய புகழ் பெற்றது அவருடைய 20வது பாகமான டின் டின் இன் திபெத் கதை.

டின் டின் நினைவுகள் அவரை சுழற்றியடித்துக் கொண்டிருந்த காலத்தில் அவர் ஒரு கனவு கண்டார். அது தான் டின் டின் இன் திபெத் கதை. அவருடைய டாக்டர்களெல்லாம், ஓவரா டின் டின் பற்றி யோசிக்காதீங்க என்றார்கள். அதை மறக்காவிட்டால் உங்களுக்கு சிக்கல் என்றார்கள். ஜெர்ஜ் கவலைப்படவில்லை.தனது கனவை அப்படியே கார்ட்டூனாக்கினார். அவரது டின் டின் இன் திபெத் தயாரானது. உலகப் புகழ் பெற்றது.

8 இன்செப்சன்

கிறிஸ்டோபர் நோலனின் புகழ்பெற்ற திரைப்படம் இன்ஸெப்ஷன். அந்தப் படம் கனவுகளுக்குள்ளே கனவுகள் காண்பதைப் பற்றியது, கனவுகளை செயற்கையாய் உருவாக்குவதைப் பற்றியது. கனவு எது, நிஜம் எது என்பதைத் தெரியாமல் மக்கள் உலவும் படம் இது. இந்தப் படத்தின் இன்ஸ்பரேஷனை கிறிஸ்டோபர் நோலன் பெற்றுக் கொண்டதும் கனவுகளிலிருந்து என்பது ஆச்சரியமான விஷயம்.

இது அவருடைய ஒரு கனவிலிருந்து வந்ததல்ல. பல கனவுகளின் தொகுப்பாக வந்தது. கனவுக்கும், நிஜத்துக்கும் இடையேயான வேறுபாடைக் கண்டுபிடிப்பது என்பதை வைத்து கதையை நெய்தார் கிறிஸ்டோபர் நோலன். அந்தப் படம் மிகப்பெரிய வெற்றியடைந்து நோலனுக்கு உலகப் புகழ் வாங்கித் தந்தது.

  1. சார்பியல் கோட்பாடு

ஐன்ஸ்டீனின் மிகப்பெரிய பார்முலாக்களில் ஒன்று ரிலேட்டிவிட்டி தியரி அதாவது சார்பியல் கோட்பாடு. ஒரு நாள் அவருக்கு ஒரு கனவு வந்தது. மின்சாரம் பாய்ச்சப்பட்டிருக்கும் ஒரு வேலியில் மாடுகள் மேய்ந்து கொண்டிருக்கின்றன. அப்போது அதில் மின்சாரம் இல்லை. விவசாயி வந்து பேட்டரியை மாற்றுகிறார். அப்போது மின்சாரம் பாய்கிறது மாடுகளெல்லாம் ஒரே நேரத்தில் தூக்கி வீசப்படுகின்றன.

அப்போது ஐன்ஸ்டீன் விவசாயியிடம் கேட்கிறார். எப்படி எல்லா மாடுகளும் ஒரே நேரத்தில் தெறித்து விழுகின்றன ? என்று. அவரோ ? இல்லையே ஒன்றன் பின் ஒன்றாகத் தானே விழுந்தன என பதில் சொல்கிறார். ஐன்ஸ்டீன் திடுக்கிட்டு விழிக்கிறார்.

அந்தக் கனவு அவரை புதுமையான கோணத்தில் சிந்திக்க வைக்கிறது. ஒரே விஷயத்தை ஒருவர் சட்டென நிகழ்வதாக‌வும், இன்னொருவர் ஒன்றன் பின் ஒன்றாக நிகழ்வதாகவும் பார்க்க முடியுமா என யோசிக்கிறார். சார்பியல் கோட்பாடு பிறக்கிறது !

10 தையல் மெஷின்

தையல் என்பது மிகப்பெரிய பிரம்ம பிரயர்த்தனமாய் இருந்த காலகட்டம் அது. ஊசியில் நூல் எங்கே கோர்ப்பது என்பதெல்லாம் அப்போது கண்டுபிடிக்கப்படவில்லை. 1845ம் ஆண்டு எலிஸ் ஹோவ் ஒரு கனவு கண்டார்.  அதில் அரசர் ஹோவுக்கு ஒரு நிபந்தனை விதிக்கிறார். 24 மணி மணி நேரத்தில் இதற்கு ஒரு முடிவு எட்டப்படாவிட்டால் மரண தண்டனை. பதறிப் போன ஹோவ் கடுமையாக உழைக்கிறார். முடிவு கிடைக்கவில்லை.

தோல்வியடைந்து அவரை கொலைக்களத்துக்கு கொண்டு செல்கிறார்கள். அப்போது தான் அவர் கவனித்தார். வாளின் தலையில் ஓட்டை போட்டு கைப்பிடி அமைத்திருந்த முறை. பளிச் என ஒரு மின்னல். ஊசிக்கு நூலை எங்கே கோக்கலாம் என ஐடியா கிடைத்தது. ஐயா எனக்கு ஒரு கடைசி சான்ஸ் கொடுங்கள் என கெஞ்சுகிறார். எல்லாம் கனவில் தான். திடுக்கிட்டு விழிக்கிறார். விடியற்காலை நான்குமணி. ஆய்வு கூடம் ஓடிய அவர் தனது கனவை நனவாக்குகிறார். நவீன தையல் கலையின் அடிப்படை அங்கே நிறைவேறியது

தையல் மெஷினை முதலில் கண்டுபிடித்தது இவர் அல்ல, ஆனால் இன்றைய நுட்பத்தைக் கண்டுபிடித்தவர் இவர் தான். அதற்கான காப்புரிமையும் இவரிடமே இருக்கிறது என்பது குறிப்பிடத் தக்கது.

  • Thanks Daily Thanthi
Advertisements

TOP 10 : மூளையின் புத்திசாலித்தனம்

Image result for human brain

மனித மூளை ஒரு அற்புத சாதனம். இறைவனின் படைப்பின் உச்சத்தை உரக்கச் சொல்லும் ஒரு விஷயம்ம. மனித மூளைய ஒத்த ஒரு கருவியைப் படைக்க மனிதனால் இன்று வரை முடியவில்லை. இனிமேலும் சாத்தியமாகப் போவதில்லை. காரணம் அதன் நுட்பங்கள் அந்த அளவுக்கு இருக்கின்றன. நம்முடைய அனுமதி இல்லாமலேயே தினமும் மூளை பல்வேறு விஷயங்களைச் செய்து கொண்டே இருக்கிறது. மூளையைப் பற்றிய வியப்பான பத்து விஷயங்கள் இந்த வாரம்.

  1. தகவல் வடிகட்டல்

தினம் தோறும் நமது கண்கள் மூலமாகவும், காதுகள் மூலமாகவும், உணர்வுகள் மூலமாகவும் பல்வேறு தகவல்களை மூளை சந்தித்துக் கொண்டே இருக்கிறது. அந்த தகவல்கள் எல்லாம் நமக்குத் தேவைப்படுவதில்லை. அத்தகைய தேவையற்ற தகவல்களையெல்லாம் மூளை தானாகவே வெளியேற்றிக் கொண்டே இருக்கிறது.

உதாரணமாக, நாம் இன்றைய தினம் முதலில் சந்தித்த நபர் யார். அவர் என்ன கலர் ஆடை அணிந்திருந்தார். இரண்டாவதாக யாரைப் பார்த்தோம் ? போன்ற தகவல்களையெல்லாம் மூளை பதிவு செய்து வைப்பதில்லை. இதை “செலக்டிவ் அட்டென்ஷன்” என்கிறது விஞ்ஞானம். தேவையற்ற தகவல்களை விலக்கி, தேவையான தகவல்களை சேமிக்கும் அற்புத ஞானம் அதற்கு உண்டு. எனவே சில விஷயங்கள் மறந்து போச்சே என்றால் கவலைப்படாதீர்கள்.

இதே போல கவலையளிக்கும் விஷயங்களை மறந்தும், ஆனந்தமான விஷயங்களை நினைவிலும் வைக்கும் மனம் இருந்தால் ரொம்ப நல்லது இல்லையா ?

  1. இமைத்தல்

மனிதன் இரண்டு முதல் பத்து வினாடிகளுக்கு ஒரு முறை இமைக்கிறான். அதாவது ஒரு நிமிடத்துக்கு 30 முறை வரை விழிகள் இமைத்துக் கொண்டே இருக்கின்றன. நாம் அதைப் பற்றிய கவனமே இல்லாமல் இருப்போம். இதை முழுமையாக செயல்படுத்துவது நமது மூளை தான். நமது கண்ணுக்குத் தேவையான ஈரப்பதம் எப்போதும் இருக்கும் படி பார்த்துக் கொள்வது தான் இதன் முக்கிய வேலை.

கண்களின் ஓரங்களில் உருவாகும் கண்ணீரை கண்ணுக்கு சரியாக அனுப்பி, அழுக்கை அகற்றி கண்ணை ஆரோக்கியமாக வைத்திருக்க இந்த இமைத்தல் உதவுகிறது. யாராவது சட்டென எதையாவது எடுத்து முகத்தில் எறிந்தால் முதலில் கண்ணை மூடுவது கூட மூளை சட்டென செய்யும் தற்காப்பு நடவடிக்கையே !

  1. நாவின் அசைவு

கமலஹாசனைப் போலவோ, ரஜினிகாந்தைப் போலவோ அசாதாரணமாக மிமிக்ரி செய்யும் மக்களைப் பார்த்திருப்பீர்கள். குறிப்பிட்ட நபர்களின் வார்த்தை உச்சரிப்பை வைத்து அதே போல பயிற்சி எடுத்து பேசுவது தான் இவர்களின் திறமை. ஒவ்வொரு வார்த்தைக்கும், ஒவ்வொரு விதமான உச்சரிப்புக்கும் நமது நாக்கு எப்படி சுழல்கிறது, எப்படி அசைகிறது என்பது தான் மிக முக்கியமான விஷயம். இந்த அசைவுகளையெல்லாம் மூளை தனது அதி அற்புதமான திறமையினால் தாமாகவே முடிவு செய்து கொள்கிறது !

நாம் பேசுகிறோம், ஆனால் நாக்கு எங்கெல்லாம் அசைகிறது என்பதை நாம் கவனிப்பதில்லை. என்ன பேசுகிறோம் என்பதை மட்டும் நாம் கவனித்தால் போதும், எப்படி பேசுகிறோம் என்பதை மூளை முடிவு செய்கிறது. ஒருகுறிப்பிட்ட ஸ்டைலில் நாம் பேச ஆரம்பித்தால் அந்த ஸ்டைலுக்குத் தக்கபடி நாவின் இருப்பிடத்தை மாற்றி அமைத்துக் கொள்ளும் வேலையை மூளை மின்னலென செய்கிறது.

நாம் ஒரு குறிப்பிட்ட வாக்கியத்தைப் பேச ஆரம்பிக்கும் போது, நாம் பேசத் துவங்கும் முன்பே நாக்கு தயாராகி விடுகிறது என்பது வியப்பான விஷயம் இல்லையா ?

  1. உடலின் வெப்ப நிலை

நமது நிலத்தில் எல்லா காலநிலைகளும் மாறி மாறி வருகின்றன. குளிர்காலம், வெயில்காலம், வசந்தகாலம் என வெப்பநிலை மாறி மாறி வருகிறது. இது போதாதென்று அடிக்கடி நாம் ஏசி அறைகளில் போய் அடைபட்டு விடுகிறோம் உடலுக்கு குளிரெடுக்கிறது. வெயிலில் அலைகிறோம் உடல் சூடாகிறது !

நமது உடல் சீராக இயங்க வேண்டுமெனில் நமக்கு 37 டிகிரி சென்டிகிரேட் வெப்பம் உடலில் இருக்க வேண்டும். அப்போது தான் நமது செரிமான அமைப்பு உட்பட உள் உறுப்புகள் எல்லாமே சிறப்பாகச் செயல்படும். அந்த வெப்பத்தை ஊர்ஜிதப்படுத்தும் வேலையை மூளை செய்கிறது. இதை நாம் அறிவதில்லை. சட்டென குளிரும் போது நமது உடலில் முடியெல்லாம் சிலிர்ப்பது வெளி வெப்பத்தை உறிஞ்சி எடுக்கும் ஒரு வழிமுறை. வெயிலில் உடல் வியர்ப்பது அதிக வெப்பம் உடலைத் தாக்காமல் உடலைக் குளிர வைக்கும் முயற்சி. இவை அனைத்தையுமே மூளை தன்னிச்சையாகச் செய்கிறது என்பது வியப்பு.

  1. காட்சிகளை உருவாக்கும்.

சம்பவம் நடந்த அன்றைக்கு நீங்கள் பார்த்த நபர் கண்ணாடி போட்டிருந்தாரா ? வீட்டு சன்னல் உடைந்திருந்ததா ? என வக்கீல் கேட்கிறார் என வைத்துக் கொள்ளுங்கள். அந்த சாட்சிக்காரர் தெளிவாக‌ ஞாபகம் வைத்திருக்காவிட்டால் கண்ணாடி போட்டிருப்பது போலவோ, சன்னல் உடைந்திருப்பது போலவோ மூளையானது காட்சிகளை சட்டென உருவாக்கி நம்மை நம்பவைத்து விடும்.

உளவியலார்கள் எலிசபெத் லோஃப்டஸ் மற்றும் ஜான் பால்மர் இருவரும் செய்த ஆராய்ச்சி மிகப்பிரபலம். அது சொல்லும் விஷயம் இது தான். மூளை தான் கண்ட காட்சியைப் பதிவு செய்து வைக்கிறது. அதனோடு சேர்த்து புதிய தகவல்களை நாம் கொடுக்கும் போது மூளை ஏற்கனவே பதிவு செய்து வைத்திருக்கும் காட்சியை இந்த புதிய தகவல்களுக்குத் தக்கபடி மாற்றி அமைக்கிறது ! நாம் பார்க்காத ஒரு விஷயத்தைக் கூட பார்த்தது போல மாயத் தோற்றம் அமைக்க மூளையால் முடியும்.

காலைல இதே டேபிள் மேல தான் வீட்டுச் சாவியை வைத்தேன் என ஒருவர் சொல்லும் போது மூளை அவர் சொல்வது உண்மை என அவரையே நம்பச் செய்து விடுகிறது. எனவே அடுத்தமுறை யாராவது அப்படிச் சொன்னால் திட்டாதீர்கள். மூளையின் காட்சி உருவாக்கம் தான் அதன் காரணம்.

  1. உடலின் சமநிலை

யாராவது கூப்பிட்டா சட்டுன்னு எழும்பி போறோம். மாடிப்படில ஏறுகிறோம், கீழே குதிக்கிறோம். ஆனா கீழே விழுவதில்லை. நமது உடல் எப்படி சமநிலையை பெற்றுக் கொள்கிறது ? அதைப் பற்றி நாம் சிந்திப்பதே இல்லை. நமது மூளை நமது உடலை சமநிலையில் வைத்திருக்கிறது. நமது கண்கள், மூட்டு இணைப்புகள், தசைகள் உட்பட பல்வேறு உறுப்புகள் மூளைக்கு சிக்னல்களை அனுப்பிக் கொண்டே இருக்கின்றன. அந்த சிக்னல்களை மைக்ரோ வினாடிகளில் அலசி ஆராய்ந்து நமது உடலின் சமநிலைக்கு ஏற்ப நமது உடலின் அமைப்பை மாற்றுகிறது மூளை.

கண்கள் நமக்கு முன்னால் இருக்கும் ஒரு பள்ளத்தைப் பார்க்கிறது. அந்த சிக்னல் மூளைக்குச் சென்று காலை எட்டி வைக்கிறோம். அப்போது உடலின் எடை முன்பகுதிக்குச் செல்கிறது, அப்போது நமது மூட்டுகள் சிக்னலை மூளைக்கு அனுப்புகின்றன. மூளை நமது உடலை அதற்குத் தக்கபடி வளைக்கிறது. இந்த எல்லா வேலைகளையும் மைக்ரோ வினாடியில் செய்து நமது உடலில் சமநிலை தவறாமல் மூளை நம்மை பாதுகாக்கிறது என்பது பிரமிப்பு தான் இல்லையா ?

7 நடுக்கம்

அதிக குளிரான இடத்தில் நிற்கும் போது சட்டென உடல் நடுங்க ஆரம்பிக்கும். சில வேளைகளில் நடுங்காமல் இருக்க வேண்டும் என நினைத்தாலும் முடியாமல் போகும். நடுங்கிக் கொண்டே இருப்போம். இதுவும் மூளையின் செயல்பாடு தான். உடலுக்குத் தேவையான வெப்பம் இல்லாத சூழல் உருவாகும் போது, உடல் மூளைக்கு சிக்னலை அனுப்புகிறது. உடனே மூளை உடலுக்கு நடுக்கத்தைக் கட்டளையிடுகிறது.

நடுக்கம் உடலில் வெப்பத்தை அதிகரிக்க உதவுகிறது. இந்த நடுக்கம் தீரவேண்டுமெனில் நாம் சூடான இடத்திற்குச் செல்ல வேண்டும், அல்லது போர்வைகளால் போர்த்தி உடலை தேவையான வெப்ப நிலைக்குக் கொண்டு வர வேண்டும். நடுக்கம் என்பது உடலை வெப்பமாய் வைத்திருக்க உதவும் பாதுகாப்பு அம்சம் தான். நடுக்கம் வருகிறதெனில், அதற்குக் காரணமான‌ மூளையிலுள்ள ஹைபோதலாமாஸ் பகுதிக்கு தான் நன்றி சொல்ல வேண்டும்.

  1. சிரிப்பு

எங்கே சிரிக்கணும், எங்கே சிரிக்கக் கூடாதுன்னு விவஸ்தை இல்லையா என சிலர் கேட்பதுண்டு. சிரிக்கக் கூடாத இடத்தில் சில வேளைகளில் சிரிப்பு பொத்துக் கொண்டு நம்மை தர்ம சங்கடத்தில் ஆழ்த்தி விடுவதும் உண்டு. இதற்கெல்லாம் காரணம் மூளை தான்.மூளையின் சில இடங்களில் நடக்கின்ற மாற்றங்கள் நமக்கு சிரிப்பை உண்டு பண்ணி விடுகின்றன.

ஒரு சிரிப்பு பொறிக்கு மூளை வேறு பல இடங்களிலிருந்து கிடைக்கின்ற தகவல்களை இணைத்து அடக்க முடியாத பெரிய‌ சிரிப்பை உருவாக்கி விடுகிறது. மூளை நமது உடல் அசைவுகளையும் மாற்றிவிடுகிறது. மூளையின் சில பகுதிகளை தூண்டும் போது அடக்க முடியாத சிரிப்பு வருவதை விஞ்ஞானிகள் நிரூபித்திருக்கின்றனர். அடுத்த தடவை யாராவது சிரித்தால், மூளையின் சித்து வேலை என சைலன்டாகப் போய்விடுங்கள்.

9 சுவை

சுவை விஷயத்தில் மூளை கொஞ்சம் மக்கு என்பது வியப்பான விஷயம். ஒரு சுவையான உணவைச் சாப்பிடும்ப்போது கண் அந்த உணவைப் பார்த்து மூளைக்கு சிக்னல் அனுப்புகிறது. மூக்கு அந்த வாசனையை அப்படியே மூளைக்கு சிக்னல்கள் மூலம் அனுப்புகிறது. அதை வைத்துத் தான் மூளை சுவை என்ன என நிர்ணயிக்கிறது. அல்லது சரியான சுவையை நாவுக்கு தருகிறது.

கண்களைக் கட்டிக் கொண்டு, மூக்கையும் பொத்திக் கொண்டு ஒரு துண்டு ஆப்பிள் பழத்தைச் சாப்பிட்டாலும், ஒரு துண்டு உருளைக்கிழங்கைச் சாப்பிட்டாலும் எது என்ன என்பதை அறியாமல் மூளை குழம்பிவிடும். வைன் சுவைஞர்கள் என ஒரு பணி உண்டு. வைனை சுவைத்துப் பார்ப்பது தான் அவர்களுடைய வேலை. அவர்களுடைய கண்களைக் கட்டி, மூக்கைப் பொத்தினால் வேலையில் முட்டை மார்க் வாங்கிவிடுவார்கள்.

  1. முகம்

மேகத்தைப் பாத்தேன் அப்படியே ஒரு மனுஷனோட முகம் மாதிரியே இருந்துச்சு. அந்த கல்லு கிடக்கிற ஸ்டைல பாத்தா மனுஷ முகம் மாதிரியே இருக்கு. இப்படியெல்லாம் உரையாடல்கள் கேட்டிருப்போம். இதுவும் மூளையின் சித்து விளையாட்டுகளில் ஒன்று தான். மூளையின் ஒரு பாகம் மனித முகங்களை அடையாளம் காண, பதிவு செய்ய, முக பாவங்களை அறிய என டெடிகேட் செய்யப்பட்டுள்ளது.

மனித வாழ்க்கையில் மனித முகங்களின் குறுக்கீடு தான் அதிகம் எனவே தான் மூளையில் அப்படி ஒரு வசதி. இதன் காரணமாகத் தான் காணும் இடங்களிலெல்லாம் மனித முகங்களை ஒத்த சாயல் இருக்கிறதா என அந்த பகுதி பார்த்துக் கொண்டே இருக்கிறது. இரண்டு புள்ளிகளை வைத்து உற்றுப் பார்த்தால் கூட ஒரு மனித முகம் உங்களுக்குத் தெரியலாம். இனிமேல் நள்ளிரவில் நடு ரோட்டில் ஏதோ முகம் தெரிந்தால், மூளையின் மாயாஜாலம் என நினையுங்கள், பேய் என பதறாதீர்கள்.

*

நன்றி : தினத்தந்தி

 

TOP 10 : திரையில் முதன் முதலாய்

இன்றைய திரையுலகம் அனிமேஷன், மோஷன் கேப்சரிங், கிராபிக்ஸ், நவீன தொழில்நுட்பம் என பல்வேறு நிலைகளில் கொடிகட்டிப் பறக்கிறது. ஆனால் திரையில் இந்த அம்சங்களெல்லாம் முதன் முதலாய் எப்போது தோன்றின ? அவை எப்படி இருந்தன என்பதை அறிந்து கொள்வது சுவாரஸ்யமே. அத்தகைய பத்து சுவாரஸ்யங்கள் இந்த வாரம்.

Image result for la vie et passion to christ

  1. கலர் படம்

முதன் முதலில் கலர் அவதாரம் காட்டிய படம் எனும் பெருமை ஒரு பிரஞ்ச் படத்தையே சாரும். லா வி எட் பேஷன் டு கிரைஸ்ட் என்பது தான் அந்தப் படத்தின் பெயர். இயேசுவின் வாழ்க்கையும், பாடுகளும் என்பது அதன் பொருள். 1903ம் ஆண்டு இந்தப் படம் உருவானது. ஒரே நீள படமாக இல்லாமல் 32 சிறு சிறு பாகங்களாக உருவான படம். இது இயற்கை நிறங்களின் அடிப்படையிலான படம் அல்ல, நிறம் பூசப்பட்ட திரைப்படம்.

இயற்கையான நிறத்தைப் பயன்படுத்தி எடுக்கப்பட்ட படம் ‘வித் அவர் கிங்ஸ் அன்ட் குயீன்ஸ் த்ரோ இந்தியா’ எனும் படம். இந்தியாவில் பிரிட்டிஷ் அரசின் வருகை, வரவேற்பு பற்றிய படம். 1912ம் ஆண்டு இந்தப் படம் வெளியானது. நீமோகலர் தொழில்நுட்பத்தைப் பயன்படுத்தி இந்தப் படம் எடுக்கப்பட்டது. இந்த படம் டாக்குமென்டரி வகையில் சேர்கிறது.

முதல் முழுநீள திரைப்படமாக வெளியான படம் த வேர்ல்ட், த ஃளஷ் அன்ட் த டெவில் எனும் படம். நீமோகலர் முறையில், இயற்கை வர்ணத்தோடு வெளியான முதல் முழு நீள திரைப்படம் எனும் புகழ் இதற்கு உண்டு. 1914ம் ஆண்டு இந்த படம் வெளியானது.

Image result for the man in the dark 3d

  1. முதல் 3டி படம்

3டி என்றதும் நமக்கு மை டியர் குட்டிச் சாத்தான் நினைவுக்கு வரும். உலக அளவில் புவானா டெவில் எனும் படம் தான் முதல் முப்பரிமாணப் படம் எனும் பெருமையைப் பெறுகிறது. 1952ம் ஆண்டு இந்தப் படம் வெளியானது. 1898களில் நடந்த உகாண்டா ரயில்வே கட்டுமானம் தொடர்பான உண்மை நிகழ்வுகளின் பதிவாக இந்தப் படம் அமைந்தது.

முதல் 3டி படத்தை மக்கள் வியப்புடனும், அச்சத்துடனும் பார்த்தார்கள். இதற்கு அடுத்த ஆண்டு த மேன் இன் த டார்க் எனும் 3டி படம் வெளியானது.

Image result for gone with the wind

  1. முதல் நூறு மில்லியன் டாலர் படம்

ஒரு படம் நூறு கோடி சம்பாதிப்பது இப்போதெல்லாம் சர்வ சாதாரணம். அதுவும் ஆங்கிலப் படங்கள் ஆயிரம் கோடி சம்பாதிப்பது வெகு சாதாரணம். அவதார் திரைப்படம் இந்திய மதிப்பில் 19 ஆயிரம் கோடி ரூபாய்கள் வசூலித்துக் கொடுத்த திரைப்படம். கான் வித் த வின்ட் எனும் 1939ம் ஆண்டே 390 மில்லியன் டாலர்கள் சம்பாதித்தது. அதாவது 39 கோடி டாலர்கள். இன்றைய மதிப்பில் பார்த்தால் சுமார் 23 ஆயிரம் கோடி டாலர்கள் என்கின்றனர்.

அப்படிப் பார்த்தால் இன்று வரை உலகிலேயே அதிகம் சம்பாதித்த படம் எனும் பெருமை அவதாருக்கு அல்ல, கான் வித் த வின்ட் திரைப்படத்திற்குத் தான்.

Image result for toy story

  1. முதல் கம்ப்யூட்டர் கிராபிக்ஸ் படம்

டாய் ஸ்டோரி படம் பற்றிக் கேள்விப்பட்டிருப்பீர்கள். உலகப் புகழ் திரைப்படம் அது. 1995ம் ஆண்டு வெளியானது. அதற்கு முன்பும் பல கம்ப்யூட்டர் கிராபிக்ஸ் சார்ந்த தொலைக்காட்சி நிகழ்ச்சிகள் வந்திருக்கின்றன. ஆனால் முழுக்க முழுக்க சி.ஜி.ஐ எனப்படும் கம்ப்யூட்டர் கிராபிக்ஸ் இன்டர்பேஸ் மூலம் கதாபாத்திரங்களை உருவாக்கி, அவர்களை மையப்படுத்தி வந்த முழு நீள திரைப்படம் இது தான்.

27 அனிமேஷன் ஸ்பெஷலிஸ்ட் சேர்ந்து 1.14 இலட்சம் பிரேம்கள் வரைந்து உருவான படம் இது. ஒவ்வொரு பிரேமும் இரண்டு முதல் 15 நாட்கள் வரை செலவிட்டு உருவானது. முதலில் உருவங்களை களிமண்ணினால் உருவாக்கி, அதை கணினியில் இணைத்து அதற்கு அசைவு கொடுத்து உருவான படம் இது. வூடி எனும் இதன் முதன்மைக் கதாபாத்திரத்துக்கு மட்டும் 723 கணிமண் பொம்மைகள் உருவாக்கப்பட்டன. எட்டு இலட்சம் மணி நேர மெஷின் உழைப்பு இந்தப் படத்திற்கு தேவைப்பட்டது. 30 மில்லியன் செலவில் எடுக்கப்பட்டு 375மில்லியன் டாலர்கள் சம்பாதித்துக் கொடுத்த படம் இது.

Image result for The fall of the nation

  1. முதல் “இரண்டாம் பாகம்” படம்

இப்போதெல்லாம் பார்ட் 2, பார்ட் 3 என படங்கள் வருவது சகஜம். இதன் பிதாமகன் எந்தத் திரைப்படம் என பார்த்தால் 1916ம் ஆண்டு வெளியான “த ஃபால் ஆஃப் எ நேஷன்” படத்தைத் தான் சொல்ல வேண்டும். முந்தைய ஆண்டு வெளியான, பர்த் ஆஃப் எ நேஷன் படத்தின் தொடர்ச்சியாய் அமைந்த கதை இது

தாமஸ் டிக்சன் இயக்கிய இந்தப் படம் பாக்ஸ் ஆபீஸில் பட்டையைக் கிளப்பி மிகப்பெரிய வெற்றியைப் பெற்றது. அப்போதே 10 மில்லியன் டாலர்கள் சம்பாதித்த படம் இது. அமெரிக்காவுக்கு எதிரான கதையம்சம் கொண்ட படம். எனினும் எல்லா அமெரிக்க விமர்சகங்களும் படத்தை வெகுவாகப் பாராட்டின. தொழில்நுட்ப உத்திகள் பலவற்றை பரிசோதித்த படம் இது. குளோஸப், ஜம்ஸ் ஷாட்ஸ், டீப் ஃபோக்கஸ் என பல விஷயங்கள் முதன் முதலாய் இதில் செய்து பார்க்கப் பட்டன.

Image result for el apostol

  1. உலகின் முதல் கார்ட்டூன் படம்

1917ம் ஆண்டு வெளியான எல் அப்போஸ்டல் திரைப்படம் தான் உலகின் முதல் கார்ட்டூன் திரைப்படம். ஒரு மணி நேரம் பத்து நிமிடம் ஓடக்கூடிய இந்த திரைப்படம் ஒரு வினாடிக்கு 14 பிரேம்கள் எனுமளவில் ஓடுமாறு உருவாக்கப்பட்ட‌ படம். மொத்தம் 58 ஆயிரம் பிரேம்கள் பயன்படுத்தப்பட்டன.

இந்தப் படத்தின் எந்த காப்பியும் இப்போது கைவசம் இல்லை என்பது கவலைக்குரிய விஷயம். ஆனால் வெளியான காலத்தில் பிரமிப்பாய் மக்களால் ஏற்றுக் கொள்ளப்பட்ட படம் இது.

Image result for First Special effect

  1. முதல் ஸ்பெஷல் எஃபக்ட்

கம்ப்யூட்டர் கிராபிக்ஸ் இல்லாத காலகட்டம். 1890களில் வெளியான ஒரு படம் அது. தாமஸ் எடிசன் உருவாக்கிய படம். ஸ்காட்லாந்து அரசி கொலை மேடையில் தலையை வைக்கிறார். ஒருவர் வாளை உயர்த்தி அவரது கழுத்தில் இறக்க தலை துண்டாகிறது. அந்த காலத்தில் அந்தக் காட்சியைப் பார்த்த மக்கள் வெலவெலத்தனர். அந்த நடிகை படத்துக்காக தன் உயிரைக் கொடுத்தார் என நினைத்தவர்கள் அனேகர்.

முதன் முதலாய் உருவான ஸ்பெஷல் எபக்ட் காட்சி அது தான். அதை எப்படி எடுத்தார்கள் ? நடிகை வருகிறார். தலையை கொலை மேடையில் வைக்கிறார். கொலைகாரர் வாளை ஓங்குகிறார். அப்படியே எல்லா நடிகர்களும் சிலை போல நிற்கிறார்கள். கேமரா நிறுத்தப்படுகிறது. இப்போது நடிகை மட்டும் விலக ஒரு பொம்மை அந்த இடத்தில் வைக்கப்படுகிறது. மீண்டும் கேமரா இயங்க, கொலைகாரர் கத்தியை இறக்க, நடிகையின் கழுத்து துண்டாகிறது !! அந்த காலத்தில் எல்லா ஸ்பெஷல் எஃபக்ட்களும் இப்படி டிரிக்ஸ் மூலமாகத் தான் உருவாயின என்பது குறிப்பிடத் தக்கது.

Image result for the haunted castle

  1. முதல் திகில், பேய் படம்

1896ம் ஆண்டு வெளியான “த ஹான்டட் கேசில்” திரைப்படம் தான் உலகின் முதல் திகில் படம் என நம்பப்படுகிறது. இப்போது பார்த்தால் காமெடியாகத் தோன்றும் இந்தப் படம் அந்தக் காலத்தில் விழிகளை வியக்க வைத்த படம். பாழடைந்த அரண்மனை ஒன்றில் திடீரென தோன்றும், உருவங்கள், பேய், வவ்வால் பறந்து வந்து மனிதனாவது என காட்சிகள் அமைந்திருந்தன.

வெட்டி, வெட்டி ஒட்டி எடுக்கப்பட்ட இந்தப் படம் அப்போது மிகப்பெரிய மாயாஜாலப் படம் போல காட்சியளித்ததில் வியப்பில்லை. ஜோர்ஜிஸ் மெலிஸ் இயக்கிய இந்தப் படம் தொலைந்து போனதாகவே நம்பப்பட்டது. அதிர்ஷட வசமாக இதன் ஒரு பிரதி நியூசிலாந்தில் 1988ல் கண்டெடுக்கப்பட்டது.

Image result for the sprinkler sprinkled

  1. முதல் காமெடி படம்

ஒரு குட்டிப் படம். 1895ம் ஆண்டு வெளியானது. ஒருவர் செடிக்கு தண்ணீர் ஊற்றுகிறார் ஒரு சிறுவன் பின்னால் வந்து குழாயை மிதிக்கிறான். தண்ணீர் நின்று விடுகிறது. தண்ணீர் ஊற்றுபவர் என்ன ஆச்சு என குழாயை உற்றுப் பார்க்கும் போது சிறுவன் காலை எடுக்கிறான், தண்ணீர் அவர் முகத்தில் பீய்ச்சி அடிக்கிறது. அவர் சிறுவனை விரட்டிப் பிடிக்கிறார். அடிக்கிறார். இவ்வளவு தான் படம்.

த ஸ்பிரிங்க்லர் ஸ்பிரிங்கில்ட் என பெயரிடப்பட்ட இந்தப் படம் தான் உலகின் முதல் காமெடி படம் என நம்பப்படுகிறது. லூமினர் சகோதரர்கள் இந்தப் படத்தை உருவாக்கினார்கள்.

Image result for roundhay garden first movie

  1. உலகின் முதல் படம்

 

உலகின் முதல் படம் எது என்பதில் மாறுபட்ட கருத்துகள் உண்டு. ஆனால் கின்னஸ் உலக சாதனை குறித்து வைத்திருக்கும் படம் 1888ம் ஆண்டு வெளியான ரவுன்டரி கார்டன் காட்சி தான். சில வினாடிகளே ஓடும் காட்சி மட்டுமே கிடைத்திருக்கிறது. ஒரு தோட்டத்தில் சிலர் நடப்பது தான் காட்சி.

லூயி லி பிரின்ஸ் இயக்கிய இந்தப் படம் மோஷன் கேமராவைக் கொண்டு படமாக்கப்பட்டது என்பது சிறப்பு. இதே இயக்குனர் இதற்கு முந்தைய வருடம் ஒரு மனிதன் நடக்கும் படத்தை இயக்கியிருந்தார். அதில் சில ப்ரேம்கள் மட்டுமே கிடைத்திருக்கின்றன. ஓரிரு வினாடிகள் அது ஓடுகிறது.

 

TOP 10 : புகழ் பெறா கண்டுபிடிப்பாளர்கள்

இந்த உலகம் கண்டுபிடிப்புகளினால் வளர்ந்து கொண்டிருக்கிறது. பல்வேறு விஞ்ஞானிகள், ஆய்வாளர்கள், படைப்பாளிகள் தங்களுடைய சிந்தனைகளைக் கூர்தீட்டி பல்வேறு விஷயங்களைக் கண்டுபிடித்து அழியாப் புகழ் பெற்றிருக்கின்றனர். சில படைப்பாளிகள் படைப்பின் கர்த்தாக்களாக இருந்தாலும், பெயர் பெறாமலேயே போய் சேர்ந்திருக்கிறார்கள். அப்படிப்பட்ட கண்டுபிடிப்பாளர்களில் பத்து பேர் இந்த வாரம்.

Image result for friction light

  1. தீப்பெட்டி

சிக்கி முக்கிக் கல்லைக் கொண்டு தீமூட்டிக் கொண்டிருந்தனர் நமது முன்னோர்கள். தீப்பெட்டி வந்தபின் அது மிக மிக எளிதானது. ஒரு உரசலில் தீ பிடிக்கும் மாயாஜாலம் போல ஆகிவிட்டது. 1827களில் இதைக் கண்டுபிடித்தவர் ஜான் வால்கர். திறமைசாலி. வித்தியாசமான சிந்தனைக்குச் சொந்தக்காரர். அதை தனது ஊரில் தயாராக்கி விற்றார். “ஃப்ரிக்ஷன் லைட்” என அதற்குப் பெயரிட்டார். ஆனால் மக்கள் அதை லூசிஃபர் என்றும் சாத்தான் என்றும் அழைத்தார்கள்.

தனது கண்டுபிடிப்பின் மேல் பெரிய மரியாதை வராததால் அதை அவர் காப்புரிமை பெறவில்லை. அப்படியே சர் ஐசக் ஹொல்டன் என்பவருக்கு விற்று விட்டுப் போய்விட்டார். ஹோல்டன் பிஸினஸ் உத்தி தெரிந்தவர். உலகெங்கும் தீப்பெட்டியைக் கொண்டு போய் விற்பனை செய்தார். தீப்பெட்டி அவரை மிகப்பெரிய கோடீஸ்வரர் ஆக்கிவிட்டது. அதனால் ஹோல்டன் தான் தீப்பெட்டி கண்டுபிடித்தவர் எனும் பெயர் இன்றும் நிலவுகிறது. உண்மையில் தீப்பெட்டியைக் கண்டுபிடித்த ஜான் வால்கர் பெயர் வெளிவராமலேயே போய்விட்டது.

  1. நீராவி எஞ்சின்

நீராவி எஞ்சினைக் கண்டுபிடித்தவர் ஜேம்ஸ் வாட் என்பது எழுதப்பட்ட வரலாறு. பெஞ்சமின் ஃப்ராடி என்பது மறந்து போன வரலாறு. காரணம் அவர் ஒரு அடிமை ! அடிமை நிலையில் அமெரிக்காவில் இருந்த அவர் கடின உழைப்பின் மூலம் தனது பிள்ளைகளைப் படிக்க வைத்தார். சம்பாதிக்கும் பணமெல்லாம் தனது எஜமானுக்கே கொடுக்கும் நிலை அவருக்கு. கிடைத்த வேஸ்ட் பொருட்களை வைத்து அவர் நீராவி எஞ்சினை உருவாக்கினார்.

அமெரிக்க கடற்படையில் பின்னர் சேர்ந்த அவர், நிறைய கண்டுபிடிப்புகளை நிகழ்த்தினார். அவர் அடிமை என்பதால் எதற்கும் காப்புரிமை பெற அவரால் முடியவில்லை. அமெரிக்காவின் முதல் போர் கப்பலில் பயன்படுத்தப்பட்ட நீராவி எஞ்சின் இவரது கண்டுபிடிப்பு தான். கடைசி வரை தனது கண்டுபிடிப்புகளின் மூலம் எந்த பயனையும், புகழையும் பெறாமலேயே மறைந்து போனார் இவர்.

  1. கார்ட் ஐடியா

எல்லோரும் கார்ட் பயன்படுத்துங்கள், அப்போது தான் இந்தியா வல்லரசாகும் என குரல் ஒலித்துக் கொண்டிருக்கும் காலம் இது. அதைப்பற்றி நான் எதுவும் சொல்லப் போவதில்லை. ஆனால் முதன் முதலில் கார்ட் ஐடியாவைக் கண்டுபிடித்தவர் பெயர் ரான் கெலின் என்பவர். இந்தக் கண்டுபிடிப்பின் மூலம் அதிக புகழோ பணமோ இவர் பெறவில்லை.

ஆனால் இவர் மிகப்பெரிய தொழிலதிபர், பேச்சாளர், கண்டுபிடிப்பாளர். அந்த வகையில் நிறைய சம்பாதித்தார். இனிமேல் கார்ட் பயன்படுத்தும் போது ஒரு வினாடி ரான் கெலினையும் மனதில் நினையுங்கள்.

 

  1. ஏ.கே 47

“என்னுடைய மனதில் தாங்க முடியாத வேதனை இருக்கிறது. நான் இதை ஏன் கண்டுபிடித்தேன் என வருந்துகிறேன். இலட்சக்கணக்கான உயிர்களின் சாவுக்கு நான் காரணமாய் இருக்கிறேன் எனும் சிந்தனை என்னை அலட்டுகிறது. என்னை மன்னித்துவிடுங்கள். கடவுளே என்னை மன்னித்துவிடும்” என ஒரு கடிதம் எழுதி ரஷ்யாவிலுள்ள ஒரு சர்ச்சுக்கு அனுப்பினார் மிக்காயேல் கலாஷினோவ். அவரது துயரத்துக்குக் காரணம் அவர் கண்டுபிடித்த ஏ.கே.47. இவர் தனது தாய்நாடான ரஷ்யாவுக்காகத் தான் இதை வடிவமைத்தார். தனக்கு எந்த புகழும், பணமும், காப்புரிமையும் வேண்டாம் என அதை மொத்தமாய் அரசுக்கே அதைக் கொடுத்தும் விட்டார்.

ஆனால் ஏ.கே 47 உலகெங்கும் பரவிவிட்டது. இன்றைய கணக்குபடி பத்து கோடி ஏ.கே.47 துப்பாக்கிகள் உலகில் உள்ளன. பாதுகாப்புக்கு மட்டுமல்லாமல் தீவிரவாதம், சமூக விரோதிகள், கடத்தல்காரர்கள் என எல்லா இடங்களிலும் இது ஆக்கிரமித்து விட்டது. உலகெங்கும் பிரபலமான கண்டுபிடிப்புக்குச் சொந்தக்காரர். ஆனால் அது அழிவுக்கு வித்திட்டதால் கடைசில் மனம் கலங்கி 2013ல் இறந்தார்.

  1. சிப்ஸ்

“யோவ் என்னய்யா பிரஞ்ச் பிரைஸ் கொண்டு வந்திருக்கே.. பெரிசு பெருசா இருக்கு, மொறு மொறுப்பாவும் இல்லை” என கத்தினார் ஒரு கஸ்டமர். சமையல்காரர் ஜார்ஜ் கிரம் கடுப்பாகிப் போனார். சரி ரொம்ப மெல்லிசா சீவுவோம் என உருளைக்கிழங்கை சீவினார். மெல்லிய தூவல்களாய் வந்தது. அதை வறுத்து கொண்டு போய் வைத்தார். அது கஸ்டமருக்குப் பிடித்துப் போக, மக்கள் பலரும் அதைக் கேட்க ஆரம்பித்தனர். சட்டென சிப்ஸ் பிரபலமானது. நடந்தது 1853ம் ஆண்டு.

சரகோட்டா சிப்ஸ் என அதைப் பெயரிட்டு ஒரு கடையையும் திறந்தார் அவர். வியாபாரம் செழித்தது. ஆனால் அவர் செய்த ஒரு தப்பு, எந்த ஒரு காப்புரிமையும் வாங்காமல் போனது. இதனால் எல்லோரும் அவருடைய ஐடியாவைக் காப்பியடிக்க ஆரம்பித்தனர். நிறுவனங்கள் உருளைக்கிழங்கு சிப்ஸ்களை பாக்கெட்களில் அடைத்து விற்று கொழுத்த லாபம் பார்த்தன. ஜார்ஜ் கிரம் மறக்கடிக்கப்பட்டார்.

  1. மௌஸ்

கம்ப்யூட்டர் மௌஸ் எவ்வளவு பிரபலம் என்பது இப்போது எல்லோருக்கும் தெரியும். ஆனால் அதைக் கண்டுபிடித்த எங்கல்பெர்ட் அதை பெரிய விஷயமாகவே நினைக்கவில்லை. தன்னுடைய தனிப்பட்ட பயன்பாட்டுக்காக ஒரு மௌஸை அவர் உருவாக்கி வைத்திருந்தார். பல கண்டுபிடிப்புகளின் சொந்தக்காரரான அவர் 20 கண்டுபிடிப்புகளின் காப்புரிமையை வைத்திருக்கிறார். ஆனால் மௌஸை அவர் கண்டுகொள்ளவே இல்லை. 1968ம் ஆண்டு அவருடைய பல கண்டுபிடிப்புகளை உலகிற்கு விளக்கினார் அப்போதும் மௌஸ் அவரிடமே இருந்தது.

அவர் பணியாற்றிக் கொண்டிருந்த நிறுவனம் நாசூக்காக அந்த மௌஸுக்கான காப்புரிமையை வாங்கியது. பின்னர் அதை ஆப்பிள் நிறுவனத்துக்கு 40 ஆயிரம் டாலர்களுக்கு விற்று மகிழ்ந்தது. அதைக் கண்டுபிடித்தவருக்கு அதிலிருந்து டீ குடிக்க கூட காசு கிடைக்கவில்லை என்பது தான் கசப்பான உண்மை.

  1. ஸ்மைலி

ஒரு மஞ்சள் வட்டம். அதில் இரண்டு கண் வாய். பார்த்தவுடனே மனதில் புன்னகை எழும். அந்த வடிவத்தை வரைந்தவர் பெயர் ஹார்வே பால் என்பது யாருக்கும் தெரிந்திருக்க நியாயமில்லை. ஒரு நிறுவனத்தின் பணிபுரிந்து  கொண்டிருந்த அவர் இந்த ஸ்மைலியை வரைந்தார். 1963ம் ஆண்டு அவருக்கு நிறுவனம் 45 டாலர்கள் கொடுத்து, பாராட்டாய் முதுகில் தட்டிக் கொடுத்தது. அவ்வளவு தான் அவருக்குக் கிடைத்த மரியாதை

நிறுவனமோ, அந்த டிசைனை ஆடை பட்டன்களில் முதலில் பொறித்தது. வரவேற்பு பலமாய் இருந்ததால் அதை அப்படியே டிஷர்ட், போஸ்டர்,பந்து என சகட்டு மேனிக்கு அனைத்திலும் பொறிக்க ஆரம்பித்தனர். பில்லியன் கணக்கில் சம்பாதித்துக் கொட்டிய அந்த ஸ்மைலியை வடிவமைத்தவர் கண்டுகொள்ளப்படவே இல்லை. அவருக்குக் கிடைத்ததெல்லாம் அந்த $45 தான் !

  1. விமானம்

விமானத்தைக் கண்டு பிடித்தது யார் என்று கேட்டால் ரைட் சகோதரர்கள் என்று சொல்வோம். உண்மையில் அவருக்கு முன்பே ஒருவர் விமானம் செய்து ஓட்டிப் பார்த்தார் என்று சொன்னால் வியப்பாக இருக்கும். அந்த மேதையின் பெயர் ரிச்சர்ட் பியர்ஸ். நியூசிலாந்து நாட்டுக்காரரான இவர் ரைட் சகோதரர்கள் தங்கள் விமானத்தை வெள்ளோட்டம் விடுவதற்கும் ஒன்பது மாதங்களுக்கு முன்பே விமானத்தைப் பறக்க விட்டார். ரைட் சகோதரர்கள் விமானம் ஓட்டியது 1903ம் ஆண்டு டிசம்பர் 17ம் தியதி. ரிச்சர்ட் ஓட்டியது அதே ஆண்டு மார்ச் 31ம் தியதி !

மட்டுமல்லாமல், இன்றைய நவீன விமானத்துக்கும் ரிச்சர்ட் ஓட்டிய விமானத்துக்கும் அதிக ஒற்றுமை உண்டு. ரைட் சகோதரர்களின் விமானம் முற்றிலும் வேறுபட்டது. நவீன விமானத்தின் முன்னோடியான விமானத்தின் சொந்தக்காரரான ரிச்சர்ட் பியர்ஸ் மறக்கடிக்கப்பட்டு, ரைட் சகோதரர்கள் கொண்டாடப்படுவது காலத்தின் கோலம் என்பதைத் தவிர வேறென்ன சொல்ல ?

  1. ரேடியோ

ரேடியோவைக் கண்டுபிடித்தவர் மார்க்கோனி என்பது தான் வரலாறு நமக்குக் கற்றுத் தரும் பாடம். உண்மையிலேயே மார்க்கோனி தான் ரேடியோவை முதன் முதலாய்க் கண்டுபிடித்தாரா என கேட்டால் இல்லை என்பதே வியப்பூட்டும் பதில். நிக்கோலா டெஸ்லா என்பவருக்கே அந்த புகழ் போய் சேர வேண்டும். மார்க்கோனி தனது கண்டுபிடிப்பு என மார்தட்டிக் கொண்ட ரேடியோவைப் பற்றியும், ஒலி அலைகள் பாயும் விதம் பற்றியும் டெஸ்லா ஏற்கனவே எழுதியிருந்தார்.

நிக்கோலா டெஸ்லா வயர்லெஸ் தொழில்நுட்பத்தில் தந்தை என அழைக்கப்படுபவர். மார்க்கோனிக்கு முன்பே ரேடியோ சிக்னல்களை வெற்றிகரமாய் பயன்படுத்தியிருந்தாலும் முந்திக் கொண்டு பெயர் வாங்கிச் சென்றவர் மார்க்கோனி. 1893 ல் டெஸ்லோ கண்டு பிடித்தது, 1895ல் மார்க்கோனியால் சொந்த கண்டுபிடிப்பாய் பதிவு செய்யப்பட்டது.

  1. மின்விளக்கு

மின்விளக்கைக் கண்டுபிடித்தது யார் என்று கேட்டால் தாமஸ் ஆல்வா எடிசன் என சின்னக் குழந்தையும் சொல்லும். அந்த அளவுக்கு மின் விளக்கு நமது வாழ்க்கையோடு பின்னிப் பிணைந்தது. தாமஸ் ஆல்வா எடிசனின் பெயர் எல்லா பாடபுத்தகங்களிலும் அலசி ஆராயப்பட்டது. ஆனால் உண்மையில் மின்விளக்கை முதலில் கண்டறிந்தவர் தாமஸ் ஆல்வா எடிசன் அல்ல ! சர் ஹென்ரி டாவி என்பவர் !

1802ம் ஆண்டு பிளாட்டினம் இழைகளின் ஊடே மின்சாரத்தைச் செலுத்தி மின்விளக்கை உருவாக்கினார் அவர். பிளாட்டினம் வெப்பத்தை அதிகம் உள்ளிழுக்கும் என்பது தான் அதன் காரணம். ஆனால் இது மிக விலையுயர்ந்தது. பெரிய அளவில் விற்பனைக்குரிய வகையில் உருவாக்கும் சாத்தியங்கள் அற்றது. எனவே இது வெற்றியடையவில்லை. அதன்பின் 75 ஆண்டுகளுக்குப் பின்பு 1879ல் தான் தாமஸ் ஆல்வா எடிசனின் மூலம் அது வெற்றியடைந்தது.

By சேவியர் Posted in TOP 10

TOP 10 : கனவுகளின் சுவாரஸ்யங்கள்

Image result for dreams

கனவுகள் சுவாரஸ்யமானவை. கனவு காண்பது சிலருக்கு பயம் தரும் விஷயம், சிலருக்கு பரவசமூட்டும் விஷயம். சிலர் அழகான கனவுகளைக் காண்பார்கள். சிலருக்கு ஆக்ரோஷமான கனவுகள் வந்து கதவைத் தட்டும். எது எப்படியோ கனவுகள் எல்லோரையும் சந்தித்துக் கொண்டே இருக்கின்றன. கனவுகளுக்கு நாடு, இனம், மொழி வேறுபாடு இல்லை. உயர்ந்தவன் தாழ்ந்தவன் எனும் பாகுபாடு இல்லை. வல்லரசு, நல்லரசு எனும் பேதங்கள் இல்லை. எல்லா மனிதர்களுக்குள்ளும் நுழைந்து விடுகின்றன கனவுகள். இந்த வாரம் அந்த கனவுகளைப் பற்றிய சுவாரஸ்யமான பத்து விஷயங்கள்.

  1. மூளை பரபரப்பாகும்.

இரவில் தூங்கும் போது எல்லா உறுப்புகளும் ஓய்வெடுக்கும் என்பது தான் நாம் கற்றுக் கொண்ட பாடம். ஆனால் கனவுகள் நிகழும் போது மூளை படுபயங்கரமாக வேலை செய்யும் என்கின்றன ஆய்வுகள். அதிலும் குறிப்பாக, தூக்கத்தின் ஒரு நிலையான‌ ரேப்பிட் ஐ மூவ்மென்ட் எனப்படும் விரைவான கண் இயக்க நிலையில் மூளை பயங்கர சுறுசுறுப்படைகிறது. குறிப்பாக காட்சிகளை பகுத்தறியும் மூளையின் பாகம் கனவின் போது வேகமாய் வேலை செய்கிறது.

விழித்திருக்கும் போது இருப்பதை விட அதிக பிஸியாய் கனவு வேளைகளில் மூளை பிஸியாய் இருப்பதுண்டு என சில ஆய்வுகள் கூறுகின்றன. இரவில் அதிக அழுத்தமான கனவுகள் கண்டால் காலையில் சோர்வாய் இருப்பதன் காரணம் இது தான். எனவே இரவில் முழு ஓய்வு என்பதை கனவுகளைக் கொண்டே அளவிட வேண்டியிருக்கிறது.

  1. கனவு காணுங்கள்.

ஆன்டோ ஜெனிடிக் ஹைபோத்தசிஸ் எனும் ஒரு கோட்பாடு இருக்கிறது. இரவில் கனவு காணும் மூளை வளர்கிறது என்கிறது அந்தக் கோட்பாடு. மனிதனின் அறிவு வளர்ச்சிக்கு கனவுகள் உதவுகின்றன‌ என்கிறது ஒரு ஆய்வு. குழந்தைகள் அதிக நேரம் ரேப்பிட் ஐ மூவ்மென்ட் எனப்படும் கனவு நிலையில் இருப்பதற்கு இது தான் காரணம். ரேப்பிட் ஐ மூவ்மென்ட் என்பதை தமிழில் விரைவான கண் இயக்க நிலை எனலாம். தூங்கும் குழந்தையின் கண்ணைப் பார்க்கும்போது உள்ளே விழி அசைந்து கொண்டிருந்தால் அது தான் விரைவான கண் இயக்க நிலை. குழந்தைகளின் மூளை வளர்ச்சிக்கு இந்த கனவுகள் மிகவும் அவசியம்.

மூளையில் புரோட்டீன் சத்து அதிகரிக்கவும் கனவுகள் உதவுகின்றன. அறிவு வளர்ச்சிக்கு தேவையான மூளையின் பாகங்கள் கனவுகளினால் தூண்டப்படுவதால் மூளை வலுவடைகிறது. எனவே அடுத்த முறை கனவு கண்டால் கவலைப்படாதீர்கள். அறிவு வளர்கிறது என மகிழுங்கள்.

  1. மரத்துப் போதல்

ஸ்பீல் பெராலிசிஸ் எனப்படும் தூக்கத்தில் மரத்துப் போகும் நிலை உலகெங்கும் உண்டு. கனவுகளில் உடல் அப்படியே மரத்துப் போகும். மூளை விழித்திருக்கும், ஆனால் உடல் அசையாது. கைகளைத் தூக்க வேண்டும் என தோன்றும் ஆனால் தூக்க முடியாது. பேச வேண்டும் என தோன்றும் ஆனால் பேச முடியாது. எழும்ப வேண்டும் என தோன்றும் ஆனால் எழும்ப முடியாது.

சிலருக்கு தன்னைச் சுற்றி என்ன நடக்கிறது என தெளிவாய்த் தெரியும். ஆனால் அதுவும் கனவு தான், நிஜம் போல தெரியும். படுத்திருக்கும் அறை, அறையில் மக்கள் நடமாட்டம் என பல விஷயங்கள் அவர்களுக்கு நிஜம் போல கனவில் வரும். இந்த நிலையில் சிலர் வித்தியாசமான ஏலியன் கனவுகளையும் காண்பதுண்டு என்கின்றனர் விஞ்ஞானிகள்.

  1. பாலினமும், கனவுகளும்

ஆண்களும் பெண்களும் கனவுகள் காண்கின்றனர். சரி, இருவருக்கும் ஒரே மாதிரியான கனவுகள் தான் வருகின்றனவா ? உலகெங்கும் இதுகுறித்து பல்வேறு ஆய்வுகள் வெளியாகின. அவை சொல்கின்ற செய்திகள் வியப்பானவை. ஆண்களுக்கும் பெண்களுக்கும் வருகின்ற கனவுகள் அடிப்படையிலேயே ஏகப்பட்ட வித்தியாசங்கள் கொண்டவை. பெரும்பாலும் அவை ஆண், பெண் எனும் இறைவனின் படைப்பின் சூட்சுமத்தின் அடிப்படையிலேயே அமைகின்றன. அதாவது பெண்கள் அதிக எமோஷன், உணர்வு ரீதியான நீண்ட கனவுகளைக் காண்கின்றனர். ஆண்களுக்கு அடிதடி, கார், சேசிங் போன்ற கனவுகளே அதிகம் வருகின்றன.

ஆண்களின் கனவில் 67% ஆண்களே வருகின்றனர். பெண்களின் கனவில் பெண்கள் 50% தான் வருகின்றனர். பாலியல் கனவுகளை 8% மக்கள் காண்கின்றனர். அதுவும் ஆண்களுக்கும் பெண்களுக்கும் வேறு விதமாகவே வருகின்றன. இவையெல்லாம் ஆய்வுகளின் அடிப்படையிலானவை மட்டுமே. இதில் எதிலும் பொருந்தாத மக்களும் நிச்சயம் இருப்பார்கள் என்பதே யதார்த்தம்

  1. காவியக் கனவுகள்

சிலருக்கு காவியக் கனவுகள் வருவதுண்டு. இது கொஞ்சம் அபூர்வம். ஆனால் காவியக் கனவுகள் காணும் பலருடைய வாழ்க்கை அதிரடி மாற்றங்களைச் சந்திக்கிறது. அந்தக் கனவுகள் அவர்களை வெகுவாகப் பாதிக்கின்றன. அந்தக் கனவின் ஒரு பாகமாக அவர்கள் மாறிவிடுகின்றனர். அந்தக் கனவு பல ஆண்டுகள் அவர்களுடைய மனதில் நிழலாடிக் கொண்டே இருக்கின்றன.

ஏதோ மிகப்பெரிய சாதனை செய்தது போல காவியக் கனவு காண்பவர்கள் உணர்வார்கள். ஏதோ ஒன்றைக் கண்டுபிடித்தது போல அவர்கள் மகிழ்வார்கள். காவியக் கனவுகள் பெரும்பாலும் ஒரு நாவலைப் போல ஆனால் நிஜ வாழ்க்கைக்கு சற்றும் சம்பந்தமில்லாததாய் வரும். காவியக் கனவு காண்பவர்கள் இன்செப்சன் படத்தைப் போல, கனவுக்குள் வேறு கனவு காண்பவர்களாகவும் இருப்பார்கள்.

  1. விலங்குகளும், கனவுகளும்

விலங்குகள் என்ன கனவு காண்கின்றன என்பதை இன்னும் மனிதன் கண்டுபிடிக்கவில்லை. ஆனால் விலங்குகள் கனவு காண்கின்றன என்பதை மட்டும் இப்போதைக்கு கண்டுபிடித்திருக்கிறார்கள். ஊர்வன, மற்றும் கொடிய விலங்குகள் கனவு காண்பதைப் பற்றி இன்னும் ஊர்ஜிதப்படுத்தப்படவில்லை. மற்றபடி நாய், பூனை, மான், பறவைகள் என சாதாரணமாய் நமக்குத் தெரிந்த எல்லா விலங்குகளுமே கனவு காண்கின்றன.

பெரும்பாலும் கனவு கண்டு எழுந்ததும் விலங்குகள் தற்காப்பு மனநிலைக்குள் வந்து விடுகின்றன. விலங்குகள் என்ன கனவுகளைக் காண்கின்றன. அவற்றுக்கு எப்போதெல்லாம் கனவுகள் வருகின்றன போன்ற பல ஆய்வுகள் தொடர்ந்து கொண்டே இருக்கின்றன.

  1. கனவும், நிஜமும்

கனவுகள் நாம் தூங்கும் போது நடக்கின்றன. அவற்றோடு நிஜத்தில் அப்போது நடந்து கொண்டிருக்கும் விஷயங்களும் கலந்து விடுவதுண்டு. இதை டிரீம் இன்கார்பரேஷன், அதாவது கனவு இணைப்பு என்பார்கள். உதாரணமாக நீங்கள் ஒரு கனவு கண்டுகொண்டிருக்கிறீர்கள். அந்தக் கனவில் நியூயார்க்கில் காதலியோடு ஆடிப் பாடுகிறீர்கள். அப்போது உங்கள் வீட்டை ஒட்டி ஒரு ஆம்புலன்ஸ் அதிக சத்தம் எழுப்பிக் கொண்டே செல்கிறது என வைத்துக் கொள்ளுங்கள். பெரும்பாலும் உங்களுடைய கனவில் நியூயார்க்கில் ஒரு ஆம்புலன்ஸ் உங்களுக்கு அருகே செல்வது போல வரும் !

அதே போல உங்களுக்கு பயங்கர தாகம் எடுக்கிறது என வைத்துக் கொள்ளுங்கள். கனவில் நீங்கள் தண்ணீர் குடிப்பீர்கள். ஆனால் தாகம் தணியாது. உண்மையிலேயே எழுந்து தண்ணீர் குடித்தபின் தான் தாகம் குறையும். கனவும் நினைவும் இணைகின்ற சுவாரஸ்யமான தருணம் இது. கனவில் உளறும் மக்களின் அருகே சென்று அவர்களோடு பேசிக்கொண்டிருந்தால் அந்த பேச்சுக்கு அவர்கள் பதிலளிப்பது இதன் ஒரு வகை தான்.

  1. கனவுகள் குறியீடுகள்

கனவுகளில் பல விஷயங்களைக் காண்போம். ஆனால் அவை நேரடியாக அந்த பொருளைச் சொல்வதில்லை. ஒரு ஆள் இறந்து போவதைக் கனவில் கண்டால் அந்த நபருக்கு ஆபத்தென்று பொருள் இல்லை. கிராமங்களில் அடிக்கடி சொல்வார்கள், ‘கல்யாணத்தைப் பாத்தா மரணம் ஒண்ணு விழும்’ என்று. ஒரு விஷயத்தை குறியீடுகளால் உணர்த்துகின்றன கனவுகள். இதனால் தான் கனவுகளும் அவற்றின் பயன்களும் என பல்வேறு ஆய்வுகளும், நூல்களும் கனவுகளின் முடிச்சவிழ்க்க முயல்கின்றன.

குழந்தைகள் மூன்று வயதுவரை அவர்களைப் பற்றி கனவுகள் காண்பதில்லை. அதே போல குறட்டை விடும்போது மனிதன் கனவு காண்பதில்லை என இன்னொரு ஆய்வு சொல்கிறது. யாரோ துரத்துவது போல, எங்கிருந்தோ விழுவது போல, தேர்வுக்கு லேட்டாகப் போவது போல இப்படி நாம் காணும் கனவுகள் எல்லாம் குறியீடுகளே.

  1. பார்வையற்றவரின் கனவுகள்

பிறக்கும் போது பார்வையிருந்து, இடையில் பார்வை பறிபோனவர்கள் கனவுகளை காட்சிகளாகக் காண்கின்றனர். ஆனால் பிறவியிலேயே பார்வையிழந்தவர்கள் காட்சிகளைக் காண்பதில்லை. ஆனால் அவர்களுக்கும் கனவுகள் வரும் ! எப்படி ? அவர்களுடைய மற்ற புலன்களான கேட்டல், தொடுதல், உணர்தல் போன்றவற்றின் அடிப்படையில் அவர்களுக்குக் கனவுகள் வருகின்றன.

எல்லோரும் கனவுகளை கலரில் பார்ப்பதில்லை. 12% மக்களுக்குக் கனவுகள் கருப்பு வெள்ளையில் வந்து கடுப்படிக்கும். மற்றவர்களுக்கு கலரில் வந்து கண்சிமிட்டும். ஏன் சிலருக்கு கனவுகள் கருப்பு வெள்ளையாகவும், சிலருக்கு வண்ணமாகவும் வருகின்றன என்பதற்குச் சரியான பதில் இல்லை.

  1. கனவுகள் மறந்துவிடும்

நாம் காணும் கனவுகளில் 50% கனவுகளும் நாம் விழித்த ஐந்து நிமிடத்திலேயே மறந்து விடும். அடுத்த ஐந்து நிமிடத்தில் இன்னொரு 40 சதவீதம் மறந்து விடும். அதிகபட்சம் ஒரு பத்து சதவீதம் தான் நினைவில் நிற்கும். கனவுகளைக் குறிப்பெடுக்க விரும்புபவர்கள் படுக்கையிலேயே பேப்பர் பென்சில் வைத்திருக்க வேண்டும். விழிப்பு வந்ததும் படுக்கையை விட்டு எழும்பாமல், படுத்திருக்கும் அதே நிலையில் படுத்து எழுத வேண்டும் என்கின்றனர் வல்லுநர்கள்.

‘நான் இதுவரைக்கும் பாக்காத ஒரு முகம் தான் என் கனவுல வந்தது’ என நாம் சொல்வதுண்டு. உண்மையில் கனவுக்கு புதிய மனித முகங்களை வரையத் தெரியாது. நமது வாழ்க்கையில் நாம் ஏதோ ஒரு சந்தர்ப்பத்தில் பார்த்த மனித முகங்களே வரும். ஐந்து வயதில் நமக்கு ஒரு மிட்டாய் வாங்கி தந்த நபராய் இருக்கலாம். அல்லது விமானப் பயணத்தில் ஓரமாய் அமர்ந்து பேப்பர் படித்த நபராய் இருக்கலாம். நாம் மறந்து போய் பல வருடங்களான முகங்களும் கனவில் வரும். நாம் அவர்களை புதியவர்கள் என்போம். இதுதான் உண்மை !