ஏன் தமிழன் அடிவாங்குகிறான் ?

Image result for Tamils history

 

உலகின் மிகப் பழமையான மொழி எனும் பெருமை எம் தமிழ் மொழிக்கு உண்டு. எனில் ஆதி காலத்திலிருந்தே விதையாய் கிளம்பிய மானுட வரலாறு தமிழனுக்கு உண்டு. எந்த மொழியிலும் இல்லாத இலக்கியச் செழுமை தமிழுக்கு மட்டுமே உண்டு. தெய்வீக மொழியான தமிழை அழிக்கவும், ஒழிக்கவும் எந்த  மொழியாலும முடியவில்லை என்பதே உண்மை.

எந்த வரலாற்றுப் பாரம்பரியத்திலும் இல்லாத அளவுக்கு மனித நேயத்தையும், விருந்தோம்பலையும் போதித்து வந்த இனம் தமிழ் இனம். அண்டி வந்த எவரையும் நிராகரிக்காத, அவர்களுக்காக தனது உயிரைக் கூட தருமளவுக்கு தரும சிந்தனையும், விருந்தோம்பலின் விஸ்வரூபமும் கொண்டவர்கள் தமிழர்கள்.

வீட்டுக்கு வந்த நபருக்கு உணவளிக்க அரிசி இல்லையே என கலங்கி, வயலில் விதைத்த விதை நெல்லைத் தோண்டி எடுத்து வந்து சமைத்துக் கொடுத்த கதைகள் நமது வரலாற்றில் உண்டு. அந்தத் தமிழனுடைய மனிதநேயத்தின் மூலக்கூறுகள் இன்னும் அவனுக்குள் உண்டு.

வீரத்தின் விளைநிலமாய் வாழ்ந்தவன் தமிழன். தனது காதலியுடன் கொஞ்சுகையில் கூட அவளுடைய கண்கள் அவனுக்கு வில்லாகவும், வேலாகவும் தான் தெரிந்தன. ஆனால் போர்க்களத்தில் நின்ற போது அம்புகள் பெண்களின் கண்களாகத் தெரியவில்லை. காதலில் கசிந்துருகிய தமிழன் வீரத்தை முன்வைத்தே வாழ்ந்து வந்தான்.

காலத்தால் மூத்த ஓர் அன்னையின் நேசமும், வீரத்தால் மூத்த தொன்மையும் கலந்து வாழ்ந்தவன் தமிழன். அதன் நீட்சியாய் தான் இருக்கிறான் இன்றைய தமிழன்.

இயேசுவின் வீரம் அவருடைய சிலுவை மரணத்தில் வெளிப்பட்டது. அன்னை தெரசாவின் வீரம் அவருடைய கருணையின் அர்ப்பணிப்பில் வெளிப்பட்டது. சிங்களப் படைகள் வெறித்தனத்தில் வேட்டையாடிபோதும் கண்ணியமும், போர்நெறியும் மீறாமல் முன் நின்ற வரலாறு கொண்டவன் எம் தமிழன்.

வீரம் என்பது வன்முறையல்ல. வீரம் என்பது அடுத்தவனை அழித்து அதிலே சிரிக்கும் குரூரமல்ல. வீரம் என்பது மனிதநேயத்தை மறுதலிப்பதல்ல. அதைப் புரிந்தவன் தமிழன். அதனால் தான் தன்னை ஆளவும், தன்னோடு வாழவும் தமிழனல்லாதவன் வந்தாலும் அன்போடு அரவணைக்கிறான்.

முல்லைப் பெரியாறு இல்லையென்றாலும் மலையாளி சகோதரனை தமிழக வீதிகளில் டீ விற்காதே என்று சொல்லி யாரும் அடித்து விரட்டியதில்லை. கன்னட சகோதரன் அகதியைப் போல அலறியடித்து ஓட வேண்டிய சூழல் எழுந்ததில்லை. தமிழனின் வீரம் சகிப்புத் தன்மையில் எழுகிறது. மனிதநேயமும், அன்பும் கலந்த சகிப்புத் தன்மை.

காந்தியடிகள் ஆடை துறந்தது வலிமையின் அடையாளம். தமிழன் நிராகரிப்புகளையும், போராட்டங்களையும், எதிர்ப்புகளையும் சந்தித்தாலும் எல்லை மீறாமல் நிற்பதில் வெளிப்படுகிறது அவனுடைய வீரத்தின் ஆழம்.

தான் மட்டும் வாழவேண்டுமென நினைத்திருந்தால் இன்று தமிழன் உலகை ஆண்டிருப்பான். பிறர் வாழ வேண்டுமென நினைத்ததால் தான் குஞ்சுகளில் மிதி தாங்கும் அன்னையாய் பொறுமை காக்கிறான்.

இது வலிமை என புரிந்து கொள்ளுங்கள் பிற மொழி நண்பர்களே. முறத்தால் புலி விரட்டிய மறத் தமிழச்சியின் பிள்ளைகள் கோழைகளாவதில்லை. அமைதி என்பது அத்துமீறலுக்கான அங்கீகாரமல்ல. ஈட்டிக் காயம் மார்பில் இல்லையேல் எம் அன்னையே எம்மை நிராகரிப்பார். எங்கள் ஈரம் விளையும் நெஞ்சில் நேசம் விதையுங்கள். விரோதம் விளைவிக்க முயலாதீர்கள்.

தமிழன் அடிவாங்குவது அன்பின் வெளிப்பாடே

அடிமைத்தனத்தின் அடையாளமல்ல.

 

Thanks

Vettimani, London & Germany

 

 

 

 

 

 

நிலா 40 !!

 

 

1969

ஆயிற்று நீண்ட நெடிய நாற்பது வருடங்கள். கவிஞர்கள் பேனா உதறி உதறி சலித்துப் போன நிலவில் மனிதன் காலடி எடுத்து வைத்து நடந்து ஜூலை இருபதாம் தியதியுடன் நாற்பது வருடங்கள் முடிந்து விட்டன. நிலாவில் வடை சுடும் பாட்டியைப் போய் பார்த்து வந்த நீல் ஆம்ஸ்ட்ராங்கும், ஆல்டிரினும், மைக்கேல் காலின்ஸும் இப்போது தாத்தாக்களாகிவிட்டார்கள். நீல் ஆம்ஸ்ட்ராங்கிற்கும், மைக்கேல் காலிங்ஸ் க்கும் வயது 78. ஆல்ட்ரின் வயது 79 !

உலகையே வியப்புக்கும், சிலிர்ப்புக்கும், சந்தேகத்துக்கும் உள்ளாக்கிய இந்த “கிரேட்டஸ்ட் வாக்” என அழைக்கப்படும் மனிதனின் முதல் நிலவு நடை உணர்ச்சி பூர்வமாக திரும்பிப் பார்க்கப்பட்டது. நாற்பது ஆண்டுகளுக்கு முன் 1969 ல் இளைஞர்களாக பூமிக்கு வெளியே போய் நிலவைப் பார்த்து வந்தவர்கள் இப்போது முதுமைக்காலத்தில் சந்தித்து தங்கள் இறந்த காலத்தின் பறந்த நினைவுகளைப் புரட்டிப் பார்த்து ஆனந்தமடைந்தார்கள்.

மைக்கேல் காலிங்ஸ் விண்கலத்தில் அமர்ந்து நிலவுக்கு மேலே சுற்றிக் கொண்டிருக்க, பதட்டமும், பயமும், திகிலும் நிறைந்த மனநிலையில் வேற்றுக் கிரகத்துக்குள் ஆம்ஸ்டிராங்கும் ஆல்டிரினும் பாதம் பதித்த நிமிடங்கள் இன்னும் அவர்கள் மனதில் ஒரு சயின்ஸ் பிக்ஷன் படம் போலவே விரிகிறது.

இவர்கள் பயணம் செய்த விண்கலத்தின் தொழில் நுட்பத்தை விட மிகச் சிறந்த தொழில் நுட்பம் இன்றைக்கு நாம் சர்வ சாதாரணமாய் கையில் வைத்துச் சுழற்றும் செல்போனுக்கு உண்டு ! இன்றைக்கு அருங்காட்சியகத்துக்கு மட்டுமே பயன்படக்கூடிய அந்த தொழில் நுட்பத்தைக் கொண்டே நிலவு வரை போய் வந்ததை நினைத்து இப்போது வியக்கின்றனர் இந்த விண்வெளி வீரர்கள்.

ஒரே விண்கலத்தில் நிலவு வரை சென்று திரும்பியிருந்தாலும், நிலத்தில் வந்தபின் தனித் தனியாகிவிட்டார்கள். எப்போதாவது அத்தி பூத்தார்போல சந்தித்துக் கொள்வது தான் இவர்களது வழக்கம். இதற்கு முன் 35வது ஆண்டு நிறைவு விழாவில் சந்தித்துக் கொண்டவர்கள் இப்போது 40வது ஆண்டு நிறைவு விழாவில் கைகுலுக்கிக் கொண்டனர். அவ்வளவு தான்.

ஸ்மித்சோனியன் நிறுவனத்தின் தேசிய விண்வெளி மியூசியத்தில் நடந்த நாற்பதாவது ஆண்டு நிறைவு விழா விண்வெளி ஜாம்பவான்கள், தொழில் நுட்ப வல்லுனர்கள், நாசா ஊழியர்கள் என ஒரு சிறப்பு மிக்க விழாவாக நடந்தது.

இந்த நினைவு கூரலின் சிறப்பு நிகழ்ச்சியாக அமெரிக்க ஜனாதிபதி ஒபாமாவையும் சந்தித்தனர் இந்த மூன்று விண்வெளி வீரர்களும். நிலவு வரை போய்வந்தவர்களின் அருகில் நிற்பதே பரவசமானது என நெகிழ்ந்து போனார் கருப்புத் தங்கம் ஒபாமா.

8“நேற்று நடந்தது போல் இருக்கிறது. ஹவாய் தீவில் என்னுடைய தாத்தாவின் தோளில் அமர்ந்து கொண்டு விண்வெளி வீரர்களை கொடியசைத்து வரவேற்றபோது எனக்கு வயது எட்டு. அமெரிக்கர்கள் தங்கள் கனவை எப்படி நனவாக்குகிறார்கள் என்பதன் மிகச் சிறந்த உதாரணம் இந்தப் பயணம் என்றார் என்னைத் தோளில் தாங்கியிருந்த தாத்தா.” என ஒபாமா மழலைக்கால நினைவுகளை சுவாரஸ்யமாய் நினைவு கூர்ந்தார்.

 

 

 

 

 

ஒபாமாவைச் சந்தித்த விண்வெளி வீரர்கள், அமெரிக்கா மீண்டும் இது போன்ற விண்வெளிப் பயணங்கள் நடத்தவேண்டும். குறிப்பாக செவ்வாயை இலக்காய் வைத்து புதிய புதிய விண்வெளிப் பயணங்கள் நடத்த வேண்டும் என தங்கள் விருப்பத்தையும் வெளியிட்டனர்.

ஏற்கனவே பொருளாதார நெருக்கடியில் தலையைப் பிய்த்துக் கொண்டிருக்கும் ஒபாமா, எதையும் சட்டென ஒத்துக் கொள்ளவில்லை. “ஆகட்டும் பார்க்கலாம்” என நாசூக்காகச் சொல்லியிருக்கிறார். செவ்வாய்ப் பயணத்துக்கு தோராயமாக 150 பில்லியன் டாலர்கள் தேவைப்படும். மக்கள் வேலையில்லாமல் நெருக்கடியில் இருக்கும் போது 150 பில்லியன் டாலர்களை விண்வெளிப் பயணத்துக்கு ஒதுக்கினால் ஒபாமாவின் கதை கந்தல் தான்.

ஏனென்றால் அமெரிக்காவிலுள்ள 60 சதவீத மக்களும் இதை எதிர்க்கிறார்கள். முதலில் பூமியைக் கவனியுங்கள் மகாராஜாவே !, பிறகு வானத்தைப் பார்க்கலாம் என்பதே அவர்களுடைய ஒட்டுமொத்த குரலொலி. பொருளாதாரம் படுகாயமடைந்து கிடக்கும் போது எதற்கு வெட்டியாய் நிலவுக்கும், செவ்வாய்க்கும் சுற்றிக் கொண்டிருக்க வேண்டும். முதலில் ஆடாமல் அசையாமல் நிற்கப் பழகுங்கள், பிறகு பறக்கப் பழகலாம் என படபடக்கின்றனர் அவர்கள்.

எனினும் நாசா செவ்வாய்க்கான பயணத்தையே அடுத்த மாபெரும் இலக்காக வைத்திருக்கிறது. “கான்ஸ்டலேஷன்” எனப் பெயரிடப்பட்டுள்ள இந்த பயணம் போகும் வழியில் நிலவில் கொஞ்ச நேரம் ஓய்வெடுத்துவிட்டு செவ்வாய்க்குச் செல்லுமாம் ! எனினும் நாசாவின் அடுத்த ஆண்டுக்கான பட்ஜெட்டான 18.6 பில்லியனை வைத்துக் கொண்டு பயணத்தை கற்பனையில் மட்டுமே பார்த்து ரசிக்க முடியும் என்பது தான் உண்மை.

செவ்வாய்ப் பயணம் நிலவுப் பயணத்தை விட பல மடங்கு சிக்கலானது. இப்போது இருக்கும் அதி நவீன டெக்னாலஜியை வைத்துப் பார்த்தால் கூட மனிதன் இங்கிருந்து கிளம்பி செவ்வாய்க்குச் சென்று சேர ஆகும் காலம் குறைந்த பட்சம் ஏழு மாதங்கள். பயணம் செய்பவர்கள் ஏழுமாதங்கள் விண்வெளியில் தாக்குப் பிடிப்பார்களா, தேவையான தண்ணீர் கொண்டு போக முடியுமா போன்றவையெல்லாம் விடை தெரியாத வினாக்கள்.

செவ்வாய்க்குப் போவது ஒரு அற்புதமான விஷயம். செவ்வாயில் இரண்டு நிலவுகள் உள்ளன, அதில் ஒன்றான “ஃபோபோஸ்” எனும் நிலவுக்குப் போவதை நாசா தனது அடுத்த இலக்காக வைத்துக் கொள்ளலாம் என கருத்து சொல்கிறார் முதன் முதலில் நிலவுக்குப் போய் வந்த மைக்கேல் காலின்ஸ்.

ரஷ்யாவுடன் நிகழ்ந்த ஆரோக்கியமான அறிவியல் மோதலே இந்த முதல் நிலவுப் பயணத்தின் மிக முக்கிய காரணம். இந்த பயணம் தான் நாடுகளுக்கிடையே உள்ள போர்க் குணத்தை மாற்றி அறிவியல் போரை தீவிரமாய் நடத்த தூண்டுகோலாய் இருந்தது என ஆரம்பிக்கும் நீல் ஆம்ஸ்ட்ராங், விண்வெளிப் பயணங்களுக்கு விஞ்ஞானிகள் துணிச்சலுடன் முன்வரவேண்டும் என வேண்டுகோள் ஒன்றையும் விடுத்திருக்கிறார்.

நாற்பது ஆண்டுகளுக்கு முந்தைய விண்வெளிப் பயணத்தின் ஒலிகளையும், படங்களையும் நவீன தொழில் நுட்பத்தில் தெளிவாக்கி நாசா தற்போது வெளியிட்டுள்ளது. அப்போதையை வீடியோவிலிருந்து சில சிலிர்ப்பூட்டும் படங்களை ஆண்ட்ரூ செய்கின் எனும் எழுத்தாளர் “நிலவிலிருந்து எழுந்த குரல்கள்” எனும் தனது நூலில் வெளியிட்டு வியப்பை ஏற்படுத்தியுள்ளார். இருபத்து ஓரு மணி நேரம் இவர்கள் நிலவில் செலவிட்ட நிமிடங்கள் குறித்து இந்த நூல் விரிவாகப் பேசுகிறது. இதே எழுத்தாளர் 1986ம் ஆண்டு “எ மேன் ஆன் தி மூன்” எனும் நூலை எழுதி பிரபலமானவர் என்பது குறிப்பிடத்தக்கது.

5

விண்வெளி வீரர்களுக்கு இன்று நிலவு சாதாராண சங்கதியாகிவிட்டது. நிலவில் ஆம்ஸ்ட்ராங் மற்றும் ஆல்டிரின் பாதங்களைத் தொடர்ந்து இன்றுவரை 12 பேர் நிலவின் மீது நடந்திருக்கிறார்கள். 200க்கும் மேற்பட்ட “ஸ்கை வாக்” எனப்படும் விண்வெளிப் பயணங்களும் நடந்திருக்கின்றன.

நாசா விஞ்ஞானிகள் நிலவுப் பயணத்தைப் பற்றி சிலாகித்துப் பேசினாலும், இதெல்லாம் வெறும் கப்சா. அப்போதைய அமெரிக்க ஜனாதிபதி ஜான். எஃப் .கென்னடி நாசாவை வைத்துக் கொண்டு நடத்திய நாடகம் தான் இந்த விண்வெளிப் பயணம். அதற்கான ஆதாரங்கள் இவை இவை என பட்டியலிடும் எதிர்ப்பாளர்களும் இருக்கத் தான் செய்கின்றனர்.

 

தமிழிஷில் வாக்களிக்க…

பசுமை விகடன் கட்டுரை : அடி எடுத்தது அமெரிக்கா, அணி வகுக்குமா உலகம்

untitled

அப்பாடி…! ஒரு வழியாக அமெரிக்காவே மனமிரங்கி, “குளோபல் வாமிங்” குறித்து உருப்படியாக ஒரு தீர்மானத்தை நிறைவேற்றி, உலகத்தையே திரும்பிப் பார்க்க வைத்திருக்கிறது. பின்னே… இத்தனை நாட்களாக உலக அளவில் நடத் தப்பட்ட குளோபல் வாமிங் பிரச்னையில் இருந்து தப்பிப்பது குறித்த மாநாடுகளின்போது, மற்ற நாடுகளின் மீது குற்றச்சாட்டு சேற்றை வாரிப் பூசி, உலகத்தின் சுற்றுச் சூழல் கேடுகளுக்கும் தனக்கும் எந்த சம்பந்தமும் இல்லை என்பதுபோல் “பாவ்லா” காட்டிக் கொண்டிருந்த நாடாயிற்றே!

அமெரிக்க அதிபராக பாரக் ஒபாமா பதவி ஏற்ற பிறகுதான் இந்த நிலையில் கொஞ்சம் மாற்றம் தெரியத் தொடங்கி, தற்போது அவரே முன்மொழிய, அமெரிக்க நாடாளுமன்றத்தின் வாக்கெடுப்பில் வெற்றி பெற்றிருக்கிறது சுற்றுச்சூழல் கேடுகளை ஏற்படுத்தும் விஷயங்களுக்குக் கட்டுப்பாடு விதிக்கும் தீர்மானம். இதன் மூலம் உலகையே அச்சுறுத்திக் கொண்டிருக்கும்

‘குளோபல் வாமிங்” பயங்கரத்துக்கு நல்ல தீர்வு கிடைக் கும் என்ற எதிர்பார்ப்பு ஏற்பட்டுள்ளது!

பூமியின் வெப்ப நிலையானது, இயற்கைக்கு எதிரான மனிதனுடைய செயல்பாடுகள் காரணமாக குறைந்தகால இடைவெளியில் சட்டென அதிகரிப்பதுதான் குளோபல் வாமிங். கொஞ்சம் அறிவியல்ரீதியாகச் சொல்லவேண்டுமெனில்… பூமியானது, நூறு ஆண்டுக்குள் இயல்பான வெப்ப நிலையிலி ருந்து ஒரு டிகிரி செல்சியஸோ அல்லது அதற்கு மேலாகவே வெப்பமடைந்தால் அது “குளோபல் வாமிங்” எனப்படும் சிக்கலுக்குள் வருகிறது எனலாம்.

பூமி, வழக்கத்துக்கு மாறாக இப்படிச் சூடாவதற்கு அறுதியிட்டுச் சொல்ல முடியாத ஆயிரக்கணக்கான காரணங்கள் உண்டு. அவற்றிலி ருந்து முக்கியமான காரணிகளைப் பிரித்தெடுத்து வரிசைப்படுத்தினால்… முதலிடத்தில் நிற்பது கார்பன் டை ஆக்சைடு எனப்படும் கரியமில வாயு. இதன் பரவலைக் கட்டுப்படுத்தினாலே பூமி வெப்பமயமாவதிலிருந்து தடுக்கலாம் என்பது விஞ்ஞானிகளுடைய நம்பிக்கை மற்றும் ஆலோசனை.

உண்மையில், ‘குளோபல் வாமிங்” என்ற வார்த்தைகளைக் கேட்டாலே உலகமே குலைநடுக் கம் கொள்ளவேண்டும். காரணம்… அதன் எதிர் விளைவுகள் அப்படி! இன்றைக்கு மனித குலத்தை அச்சுறுத்திக் கொண்டிருக்கும் சுனாமி, நிலநடுக்கம், பெருமழை, கடும் வறட்சி, கோர புயல், வெப்ப அலை என்று பலவற்றுக்கும் ஒரு வகையில் காரணகர்த்தா… இந்த குளோபல் வாமிங்.

இது, அண்டார்டிகா உள்ளிட்ட பனிப்பிர தேசங்களில் உள்ள பனிப் பாறைகளை உருக வைப்பதன் காரணமாக, கடல் நீர் மட்டம் உயர்ந்து, கடலோர பிரதேசங்களை குறிப்பாக இந்தியா, வங்கதேசம், பர்மா போன்ற நாடுகளின் கடற்கரைகளை விழுங்கிவிடும் என்று எச்சரிக் கிறார்கள் விஞ்ஞானிகள்.

“குளோபல் வாமிங்கின் நேரடி அறிகுறிகளான சுனாமி, புயல், வெப்ப அலை, வெள்ளப் பெருக்கு, காட்டுத் தீ, நில நடுக்கம், பனிமலை உருகுதல், காலநிலை மாற்றம் போன்றவை காரணமாக உலகில் ஆண்டுக்கு மூன்று லட்சம் பேர் உயிரிழக்கின்றனர். மூன்று கோடி மக்கள் பாதிப்படைகின்றனர்” என்கிறது சமீபத்தில் லண்டனின் வெளியான ஆய்வு முடிவு ஒன்று.

“இப்படியே போனால்… 2030 ம் ஆண்டு வாக்கில் ஆண்டுக்கு 5 லட்சம் பேர் இந்த புவி வெப்பத்தினால் உயிரிழப்பார்கள்” என்கிறது பதறடிக்கும் இன்னொரு புள்ளி விவரம்.

“மனிதர்கள் மட்டுமன்றி உலகிலுள்ள பல்வேறு வகை உயிரினங்களும்கூட அழிவுக்கு உள்ளாகும். பூமியின் வெப்பம் 3.5 டிகிரி செல்சியஸ் அதிகரித் தால் 40 முதல் 70% உயிரினங்கள் அழியும் வாய்ப்பு உண்டு” என்கிறது ‘ஐ.பி.சி.சி.” எனப்படும் அகில உலக குழு

லட்சக் கணக்கான உயிர்கள் பலியாவது ஒருபுறமிருக்க, பொருளாதார ரீதியில் ஆண்டுக்கு 125 பில்லியன் டாலர் இழப்பு ஏற்படும். இது, 2030 களில் பல மடங்கு உயர்ந்து, 600 பில்லியனை எட்டும் என மதிப்பிடப்பட்டுள்ளது.

இத்தகைய ஆபத்துக்கள் இருக்கிறது என்றபோதும், துரதிர்ஷ்டவசமாக… விரல்விட்டு எண்ணக்கூடிய அளவிலா னவர்கள் மட்டுமே இதை நினைத்து அலறல் போடுகிறார்கள். மற்றவர்கள் எல்லாம், “பக்கத்து வீட்டுல சாவு” என்று சின்னதாக ஒரு “உச்” போட்டுவிட்டு, தன் வீட்டுக் கதவை மூடிக் கொண்டுவிடும் நகர்ப்புறத்து “அடுக்குமாடி குடியிருப்பு” கலாசாரத்தில் ஊறிப்போனவர்கள் போல, எதைப் பற்றியும் அலட்டிக் கொள்ளாமல் கடந்து போய்க் கொண்டிருக்கிறார்கள்.

பொதுமக்களில் பலரும் விவரம் தெரியாமல், குளோபல் வாமிங் பற்றிய பயமில்லாமல் இருக்கலாம். ஆனால், நாடு களைக் கட்டி ஆளும் அரசியல்வாதிகள் மற்றும் அதிகார வர்க்கத்தினரும் அவ்வாறே கடந்து செல்வதுதான் கொடுமை. “உலகத் தின் இந்த நிலைக்கு நீதான் காரணம்…”, “இல்லையில்லை, நீதான் காரணம்” என்று வளர்ந்த நாடுகளும், வளரும் நாடுகளும் பரஸ்பரம் கைநீட்டி முட்டிக் கொண்ட படியே இருப்பது கொடுமையிலும் கொடுமை!

இந்த நிலையில்தான் அமெரிக்க அதிபர் ஒபாமாவின் முயற்சியினால் சமீபத்தில் அந்தத் தீர்மானம் நிறைவேற்றப்பட்டுள்ளது. இதன் அடிப்படை அம்சங்கள் இரண்டு. ஒன்று, அமெரிக்காவில் கார்பன் பயன்பாட்டைப் படிப்படியாகக் குறைப்பது. இரண்டு, அந்த சக்திக்கு மாற்றாக “க்ரீன் எனர்ஜி” எனப்படும் பசுமை சக்தியை (அல்லது கிளீன் எனர்ஜி எனப்படும் தூய சக்தி) உருவாக்குவது.

அமெரிக்காவில் எந்த அளவுக்கு கார்பன்டை ஆக்சைடைக் குறைக்கவேண்டும் என்பதற்கான வரைமுறைகளும் வெளியிடப்பட்டுள்ளன. தற்போதைக்கு பயன்பாட்டில் இருக்கும் கார்பனின் அளவிலிருந்து 2020 ம் ஆண்டில் 17%, 2030 ம் ஆண்டில் 40%, 2050 ம் ஆண்டில் 83% என்ற அளவில் குறைத்துக் கொள்ளவேண்டும். அதாவது, 2050 ம் ஆண்டில் கார்பனின் பயன்பாடு என்பது 17% என்ற அளவில் மட்டுமே இருக்கவேண்டும் என்று சொல்கிறது 1,200 பக்கங்களில் நிறைவேற்றப்பட்டிருக்கும் அந்த மகா தீர்மானம்.

அதற்குச் செய்ய வேண்டியதெல்லாம் ஒன்றே ஒன்றுதான். தேவையில்லாமல் கார்பன் டை ஆக்ஸைடை வெளியிடும் கார்பன் மற்றும் நிலக்கரி தொழிற்சாலைகளின் தேவையைப் படிப்படியாகக் குறைத்துக்கொண்டு, மாற்று சக்தியாக சூரிய ஒளி, காற்று, தாவரங்கள் போன்றவற்றிலிருந்து சக்தியைப் பெறுவது.

““கேட்பதற்கு எளிதாகத் தோன்றும் இந்தத் தீர்மானத்தில் நடைமுறைச் சிக்கல்கள் ஏரளமாக இருக்கின்றன. நாடு முழுவதும் பரவிக் கிடக்கும் பல்வேறு தொழிற்சாலைகள் சட்டென தற்போதைய நிலையை மாற்றி, வேறு சக்தியைப் பெறுவது எப்படி என்பது புரியாத புதிர். 2020 ம் ஆண்டில் 17% கார்பன் பயன்பாட்டை நிறுத்துவதெல்லாம் பகல் கனவு என்கின்றனர் பலர். எனவேதான் அமெரிக்க அரசிலேயே இந்தத் தீர்மானத்தை பலர் கடுமையாக எதிர்க்கிறார்கள். 219 பேர் ஆதரவாக வாக்களிக்க, 212 பேர் எதிர்த்து வாக்களித்துள்ளனர்.

என்றாலும் அமெரிக்கா நிறைவேற்றியிருக்கும் இந்தத் தீர்மானம், வருகிற டிசம்பர் மாதம் டென்மார்க் நாட்டின் தலைநகர் கோபன்கோஹ னில் நடைபெற உள்ள காலநிலை தொடர்பான அகில உலக மாநாட்டில் எதிரொலிக்கும் என்று எதிர்பார்க்கப்படுகிறது. அமெரிக்காவே களம் இறங்கிவிட்டது என்றால்… அதன் வால்பிடித்து இங்கிலாந்து, கனடா, பிரான்ஸ் என்று பல நாடுகளும் வரிசையாக அணி வகுக்கும். மக்கள் தொகையில் முதலிடத்தில் இருக்கும் சீனா, இந்தியா போன்ற நாடுகள் மீதுதான் குளோபல் வாமிங் விஷயத்தில் உலக நாடுகள் கை நீட்டுகின்றன. எனவே, இந்த நாடுகளுக்கும் நெருக்கடி ஏற்படும். அதன் காரணமாக உலக அளவில் இந்த விஷயத்தில் ஒருமித்த கருத்து ஏற்படவும் வாய்ப்பு இருக்கிறது.

இது இப்படி இருக்க… இப்போது சொல்லப்படும் “குளோபல் வாமிங்” என்ப தெல்லாம் ஒரு மாயை. பூமி வெப்பமடைவதும், பின் குளிர்வதும் பல ஆயிரம் காலமாக நிகழ்வதுதான். கி.பி. 1,000 ம் ஆண்டுகளில் வெப்பமடைந்த பூமி, கி.பி. 1,500 களில் குளிர்ந்தது. இப்போது கி.பி. 2000 ம் ஆண்டுகளில் மீண்டும் வெப்பம் அதிகரிக்கிறது. காலப்போக்கில் குளிர்ந்து விடும்என்று சொல்லும் விஞ்ஞானிகளும் இருக்கத்தான் செய்கிறார்கள்.

இந்த வம்பளப்புகள் ஒருபுறமிருந்தாலும்… வீடு அசுத்தமானால், துடைக்க வேண்டும் என்பது நியதி. அதேதான் பூமிக்கும். அது மாசுபட்டு கிடப்பப்பது கண்கூடு. இது நோயின் அறிகுறி மட்டுமே. இப்போதே விழிப்படையாவிட்டால்… உயிரைப் பறிகொடுக்க வேண்டியிருக்கும் என்பதில் சந்தேகமே இல்லை.

– சேவியர்

தமிழிஷில் வாக்களிக்க விரும்பினால்…

நில் , கவனி, வாக்களி.

ee

நினைவுகள் சில பத்தாண்டுகளுக்கு முன்னால் தாவுகின்றன. அப்போதெல்லாம் “மர்பி” ரேடியோவின் முன்னால் கூட்டம் கூட்டமாக வாக்கு எண்ணிக்கை நிலவரங்களைக் கேட்டபடி அமர்ந்திருந்த காலங்கள் நினைவுக்கு வருகின்றன.

இன்றைக்கு என்ன நடந்தது என்பதை மறு நாள் செய்தித் தாளில் பார்த்தோ, அல்லது ஆறரை மணி ஏழே கால் மணி வானொலி செய்திகளில் கேட்டோ தெரிந்து கொள்ள வேண்டிய நிலை. இன்றைய தேர்தல் பரபரப்புகளோடு ஒப்பிட்டுப் பார்க்கையில் அப்போதைய தேர்தல் முறைகளும், தகவல் பரிமாற்றங்களும் எத்தனை பின்னோக்கியிருந்தது என்பதை சிலிர்ப்புடன் உணர முடிகிறது.

இன்றைய தேர்தல் அப்படியில்லை. ஆறுமணிக்கு ஒருவர் வழுக்கி விழுந்தால், கொஞ்சம் நாகரீகமாகச் சொல்வதென்றால், ஆறுமணிக்கு ஒருவர் மீது செருப்பு வீசப்பட்டால் அடுத்த நிமிடம் எல்லா தொலைக்காட்சி சானல்களிலும் அது முதன்மைச் செய்தியாகிவிடுகிறது. வீசப்பட்ட செருப்புக்கு ஒரு விளம்பரம் தேசிய அளவில் கிடைத்தும் விடுகிறது.

விட்டால், இந்த செருப்பு வீசும் நிகழ்ச்சியை உங்களுக்காத் தொகுத்து வழங்குவது “முனியாண்டி செருப்பு கம்பெனி” என ஸ்பான்சர்ஸ் கூட கிடைப்பார்கள்.

ஊடகத்தின் பிரமிப்பூட்டும் வளர்ச்சியின் பயனாக, ஆளாளுக்கு தனித் தனி சேனலை ஏற்படுத்திக் கொண்டு அதை கிட்டத் தட்ட அரசியல் பிரச்சார மேடையாகப் பயன்படுத்தி வருகின்றனர். சுவரில் போஸ்டர் ஒட்டுவது தேவையற்றுப் போய்விட்டது, எல்லார் வீட்டு வரவேற்பறையிலும் தொலைக்காட்சிப் பெட்டி ஒட்டி வைக்கப்பட்ட பின்.

மக்களின் நாடித் துடிப்பை அரசியல் கட்சிகள் கணிக்கவும், புரிந்து கொள்ளவும், அதற்கேற்ப நாள் தோறும் பல்டியடிக்கப் பழகவும் இந்த ஊடக வளர்ச்சி பெரும் துணை செய்கிறது.

இந்த நாடாளுமன்ற தேர்தல் அறிவிப்புக்கு முந்தைய நாள்வரை எட்டாவது பக்கத்தின் கடைசியில் இடம் பெற்ற “இலங்கையில் யுத்தம்” எனும் செய்தி இன்று எல்லா பத்திரிகைகளிலும் முதல் பக்கத்தில் ஈழமாகவும், ஈரமாகவும் இடம்பெறக் காரணமும் இந்த அரசியல் கணிப்புகள் மட்டுமே.

jjதேர்தல் முடிந்த மூன்றாவது நாளே ஈழமாவது. சோளமாவது எங்கேயாவது ஒரு எஸ்டேட்டில் போய் நிம்மதியா கொஞ்ச நாள் ரெஸ்ட் எடுப்போம் என தலைவர்கள் கழன்று கொள்ளப் போவது மட்டும் அக்மார்க் உண்மை.

இப்போதைக்கு தமிழனின் உயிர் அவர்களுக்கு துருப்புச் சீட்டு. ஈழம் என்று கூட சொல்லக் கூடாது இலங்கை என்று தான் சொல்ல வேண்டும் என கங்கணம் கட்டியிருந்தவர்கள் கூட தனி ஈழம் என தாவியதற்கு 40 ஐத் தவிர வேறு எந்த காரணமும் இல்லை என்பதை அரசியல் கைக்குழந்தைகளும் அறியும்.

“அழுத்தமாய் சொன்னால்” போர் நிற்கும் என்று தெரிந்தாலும் கூட்டணிக்காக அமைதிகாக்கும் அரசியல் கட்சிகளில் இருதலைக் கொள்ளி எறும்பின் நிலையையும் தமிழகம் நன்கறியும்.

இலங்கைக்கு வெளிப்படையான ஆதரவை சீனா அளிப்பதால், இலங்கையில் சீனாவின் தளம் அமைக்கப்பட்டால் அது இந்தியாவின் பாதுகாப்புக்கு மிகவும் ஆபத்தாகிப் போகும் எனும் பதட்டம் இந்திய ராணுவத்திடம் இருப்பதும் கவனிக்கத் தக்கது.

உணர்ச்சிவசப்பட்டு வாக்களிப்பதில் பேர்போன தமிழக மக்களை எப்படியேனும் உணர்ச்சிக் கொந்தளிப்பில் வைத்திருக்க வேண்டும் எனும் தலையாய கவலை அரசியல் கட்சிகளுக்கு. “போர் நிறுத்தம் கொண்டு வா.. ” எனக் கதறும் அரசியல் கட்சிகள், ஒரு வேளை போர் நிறுத்தம் வந்து விட்டால் உள்ளுக்குள் அதிர்ச்சியடைந்து, “அய்யோ ஓட்டு போய்விட்டதே ..” என கதறினாலும் ஆச்சரியப்படுவதற்கில்லை.

நீ ஒன்று சொன்னால், நான் இன்னொன்று சொல்வேன் என மாறிமாறி தேசியக் கட்சிகளும், மாநிலக் கட்சிகளும் உடுக்கையடிப் பிரச்சாரம் நிகழ்த்துவதில் குழம்பிப் போய் இருப்பவர்கள் பொது மக்கள் மட்டுமே.

காலையில் ஒரு கட்சி மீது மக்களுக்கு இருக்கும் அபிப்பிராயம், மாலையில் மாறிவிடுகிறது. இரண்டு பேருமே அப்படித் தான் என மூன்றாவது நபருக்கு ஓட்டு போடலாமா என யோசிக்கும் மக்களைப் பரவலாக எங்கும் காண முடிகிறது. ஊடகங்களும், இணையமும் அசுர வளர்ச்சியடைந்திருக்கும் இன்றைய சூழலில் ஒரு பொதுப்படையான கருத்துருவாக்கத்தை பரவலாக நிறுவுவதென்பது சாத்தியமில்லை எனும் நிலையே காணப்படுகிறது.

வெறும் மேடைப்பேச்சுகளை மட்டும் வைத்து எந்த அரசியல் வாதியையும் கணிக்க முடியாது. கணிக்கக் கூடாது. அது ஏசி அறையில் இருந்து கொண்டு சென்னையே குளிர்கிறது என்று கணிப்பதற்கு சமம்.

ஒரு தலைவர் வாக்குறுதிச் சுருக்குப் பையைத் திறந்து அள்ளி விடுகிறார் எனில் கொஞ்சம் கவனியுங்கள். சில கேள்விகளை உங்களுக்குள்ளேயே எழுப்புங்கள்.

இந்த தலைவருக்கு இந்தப் பிரச்சினையில் கடந்த மாதம் இருந்த நிலைப்பாடு என்ன ? கடந்த வருடம் இருந்த நிலைப்பாடுkk என்ன ? ஐந்து ஆண்டுகளுக்கு முன் இருந்த நிலைப்பாடு என்ன ?

தொடர்ச்சியாக ஒரே மாதிரியான நிலைப்பாடு கொண்டிருந்தார் எனில், அந்த சிக்கலில் முடிந்த அளவுக்கு தன்னை ஈடுபடுத்திக் கொண்டிருந்தார் எனில் அவருடைய வாக்குறுதி குறைந்த பட்ச நம்பிக்கைக்கு உரியது என கருதிக் கொள்ளலாம்.

இரண்டாவது, அந்த பிரச்சினை சம்பந்தமாக நபர் தந்திருக்கும் வாக்குறுதி நிறைவேற சாத்தியக் கூறுகள் என்னென்ன ?

அந்த தலைவர் ஆதரிக்கும் கட்சி மத்தியில் ஆட்சியமைக்க சாத்தியம் உண்டா ? அந்த தலைவர் ஆதரிக்கும் கட்சியின் தலைமை, உயர் மட்ட தலைவர்கள் அனைவரும் இந்த கொள்கையோடு சற்றேனும் உடன்பாடு உடையவர்கள் தானா ? என சில கேள்விகளை எழுப்புங்கள்.

மூன்றாவதாக, எல்லோமே சரியாய் இருந்தால் சர்வதேச அளவில் இந்த திட்டத்தை அவர்களுடைய ஆட்சிக் காலத்தில் நிறைவேற்ற முடியுமா என யோசியுங்கள். இந்த திட்டத்தை நிறைவேற்ற எந்தெந்த நாடுகளின் ஒத்துழைப்பு வேண்டும், அதற்கான சாத்தியக் கூறுகள் என்னென்ன என்பன போன்றவற்றை ஆராய்தல் மிக முக்கியம்.

நான்காவதாக, இது ஏன் கடந்த காலத்தில் நிகழவில்லை ? அதற்கு எழுந்த முட்டுக் கட்டைகள் என்ன ? அந்த முட்டுக் கட்டைகள் வரும் ஆட்சியில் வருவதற்கான வாய்ப்புகள் என்ன ? என்பதை கவனியுங்கள்.

எல்லாவற்றுக்கும் மேலாக கண்மூடித் தனமாக ஒருவர் தரும் வாக்குறுதியை நோக்கி கேள்விகளை எழுப்புங்கள். “இதை நிறைவேற்ற நீங்கள் வைத்திருக்கும் திட்டத்தை தெளிவாக்குங்கள்” என விசாரியுங்கள்.

நிலவில் நிலம் வாங்கித் தருவேன் என்றவுடன், மொட்டை மாடியில் படுத்துக் கிடந்து நிலவைப் பார்த்துக் கொட்டாவி விட்டால், அடுத்த தேர்தலில் ஆளுக்கு நான்கு நட்சத்திரம் என்ற வாக்குறுதி வந்து சேரும்.

இந்திய நாட்டின் ஒட்டுமொத்த அமைதி, மக்களின் ஒற்றுமை, சுதந்திரம், பாதுகாப்பு உணர்வு, நட்புறவு, சர்வதேச அங்கீகாரம், உள்நாட்டு வளர்ச்சித் திட்டங்கள் என அனைத்தையும் ஆராய்ந்தே யாருக்கு ஓட்டுப் போடுவது என்பதை முடிவெடுங்கள்.

கடைசியாக ஒன்று, குப்பைத் திரைப்படங்களைப் பார்க்க குடும்பத்துடன் மூன்று மணி நேரம் ஒதுக்கும் நாம், இந்த முறை குடும்பத்தினரோடு மூன்று மணி நேரம் அமர்ந்து கலந்துரையாடினாலே நாட்டின் தலைவர் யாராய் இருந்தால் நலம் என்பது புரிந்து போகும்.

முடிவு எடுக்க வேண்டியது நீங்கள் மட்டுமே ! திணிக்கப்பட்ட அபிப்பிராயங்களை வெளியேற்றுங்கள்

வாக்களியுங்கள், இந்தியா செழிக்க வாய்ப்பளியுங்கள்.

நன்றி விகடன்

தவிக்கும் ஜிம்பாவே : ஒரு கோழி முட்டை ஐந்து கோடி டாலர்கள்

ஒரு கோழி முட்டையின் விலை ஐந்து கோடி ரூபாய்கள். அதிர்ச்சியடையாதீர்கள், இது தங்க முட்டைக்கான விலை இல்லை சாதாரண கோழி முட்டைக்குத் தான் இந்த விலை. ஜிம்பாவேயில் !!! இந்த கிரிக்கெட் விளையாட்டைத் தவிர்த்துப் பார்த்தால் நமக்கு அந்த நாட்டைப் பற்றி என்ன தெரியும்

நமது இந்திய நாடு அதிகபட்சமாக சந்தித்த பணவீக்க விழுக்காடு 14 தான். இப்போது சுமார் பன்னிரண்டு விழுக்காடு பணவீக்கத்துக்கே விலைவாசி கண்ணாமூச்சி ஆட்டம் காட்டுகிறது எனில் ஒரு நாட்டின் பணவீக்கம் இருபத்தைந்து இலட்சம் விழுக்காடு என இருந்தால் எப்படி இருக்கும் ? இந்த வரியை இன்னொரு முறை வாசிக்க வேண்டுமென தோன்றுகிறது அல்லவா, சந்தேகம் வேண்டாம் இருபத்தைந்து இலட்சம் விழுக்காடு பணவீக்கம் தான் ! அரசு கணக்குப் படி இருபத்தைந்து இலட்சம் விழுக்காடு பணவீக்கம் என்று புள்ளி விவரங்கள் சொன்னாலும் அதிகாரபூர்வமற்ற புள்ளி விவரமோ இந்த விழுக்காடு ஒருகோடியே ஐம்பது இலட்சம் என பதற வைக்கிறது.

வறுமையின் உச்சம் மனிதர்களை பிழிந்து எடுக்கிறது. பணத்துக்கான மதிப்பு இல்லை. பணம் வெறும் காகிதமாகி விட்டது. குளிரெடுத்தால் மக்கள் நோட்டுக் கட்டுகளை எரிக்கிறார்கள். காரணம், எரிப்பதற்கான விறகுகள் இந்த நோட்டுக் கட்டுகளை விட விலை அதிகம்.

குளியலறையில் கை துடைக்க இவர்கள் பணத்தைத் தான் பயன்படுத்துகிறார்கள். ஒரு பேப்பர் வாங்குவதற்குச் செலவாகும் பணத்தை விட, அந்த பணத்தையே கை துடைக்கும் காகிதமாகப் பயன்படுத்துவது லாபகரம் !

அதிகபட்சம் ஆயிரம் ரூபாய் நோட்டைத் தானே நாம் பார்த்திருக்கிறோம். ஜிம்பாபேவில் கிடைக்கிறது ஐம்பது கோடி ரூபாய் நோட்டு !!! ஆம், ஒரு நோட்டில் அச்சிடப்பட்டுள்ள மதிப்பு ஐம்பது கோடி ஜிம்பாவே டாலர்கள்.

கடைக்குச் சென்று ஒரு முட்டை வாங்கினால் நீங்கள் கொடுக்கவேண்டிய விலை ஐந்து கோடி ஜிம்பாவே டாலர்கள் ! ஒரு கோழி வாங்க வேண்டுமெனில் நீங்கள் ஒரு தள்ளு வண்டியில் தான் பணத்தை அள்ளிச் செல்ல வேண்டும். கட்டுக் கட்டாகக் குவியும் பணத்துக்கு எந்த மதிப்பும் இல்லை.

இது மட்டுமல்ல, அதிர்ச்சிச் செய்திகள் நீண்டு கொண்டே செல்கின்றன. யாரும் பணத்தை எண்ணிப் பார்ப்பதில்லை. பணத்தை எடை போட்டு தான் வாங்குகிறார்கள். இல்லையேல் ஒரு கோழி விற்ற பணத்தை எண்ண ஒரு நாள் தேவைப்படும் !! என்ன ஒரு கொடுமை !!! மக்கள் என்ன செய்வார்கள் ? எப்படி வாழ்வார்கள் ?

எல்லாவற்றுக்கும் காரணம் அதிபர் ராபர்ட் முகாபேயின் தவறான பொருளாதாரக் கொள்கைகள் தான் என குற்றச் சாட்டுகள் நாலாபுறமிருந்தும் எழுகின்றன. தன் இனத்தவர்கள் தவிர மற்றவர்கள் நிலங்களை அரசிடம் ஒப்படைக்க வேண்டும் எனும் சட்டத்தின் நிர்பந்தத்தால் நிலங்களில் உழைத்துக் கொண்டிருந்த இலட்சக்கணக்கான வெள்ளை மக்கள் கொத்து கொத்தாக நாட்டை விட்டு வெளியேறத் துவங்கினர்.

தென் ஆப்பிரிக்கா நாட்டுக்குச் சென்றவர்களின் கணக்கு மட்டுமே முப்பது இலட்சம் ! உலகின் பல பாகங்களுக்கும் இடம் பெயர்ந்தவர்களின் எண்ணிக்கையே யாருக்கும் தெரியவில்லை. விளைவு ? வெறும் நிலங்கள் விவசாயக் கரங்கள் இல்லாமல் வறண்டது. விவசாயம் படுத்தது !

விவசாயம் செய்ய ஆட்கள் இல்லாமலும், போதிய உற்பத்தி இல்லாமலும் சுமார் எட்டு இலட்சம் டன் கோதுமை விளைவித்துக் கொண்டிருந்த ஜிம்பாவே நிலங்கள் வெறும் ஐம்பதாயிரம் டன் எனுமளவுக்கு உற்பத்தியில் படு வீழ்ச்சி கண்டது.

நாட்டின் வீழ்ச்சியும், அன்னியச் செலாவணி கையிருப்பும் கணிசமாய் குறைந்ததால் ஏற்றுமதி செய்பவர்கள் தங்கள் அன்னியச் செலாவணியில் முப்பது விழுக்காடை ரிசர்வ் வங்கியில் தான் மாற்ற வேண்டும் எனும் கட்டளையை அரசு பிறப்பித்தது. சரியான மாற்று விலை இல்லாததால் ஏற்றுமதியும் பாதிக்கப்பட்டது.

ஏற்கனவே அரசியல் ஊழல் மலிந்து கிடக்கும் ஜிம்பாவே நாட்டில் இந்த சட்டம் கள்ளச் சந்தையில் அன்னியப் பணம் திருட்டுத்தனமாக உலவவும், அரசு அதிகாரிகளின் பைகள் நிரம்பவுமே வழி கோல்கிறது என விமர்சனங்கள் எழுந்தன.

போதாக்குறைக்கு அரசு அலுவலர்களுக்குத் தேவையான பணத்தை அச்சிட்டு வழங்கிக் கொண்டே இருக்கிறது அரசு. அதற்குரிய விளை பொருட்களோ, தங்கக் கையிருப்போ ஏதுமில்லாமல் வெறுமனே அச்சிடப்படும் பணம், பணவீக்கத்தை ராக்கெட் வேகத்தில் உயர்த்துகிறது.

விலைகள் யானை விலை குதிரை விலை எனும் நிலையை எல்லாம் தாண்டி நிலவுக்குப் பக்கத்தில் குடியேறியது. எனவே எல்லா பொருட்களின் விலையையும் பாதியாய்க் குறைக்க வேண்டும் என அரசு புதிய ஒரு சட்டம் இயற்றியது. தொழில் ஸ்தம்பித்தது.

ஜிம்பாவே நாட்டுக்கு வெளிநாட்டுப் பணத்தை வஞ்சகமில்லாமல் வழங்கிக் கொண்டிருந்த துறை புகையிலை ஏற்றுமதி. அது ஆண்டுக்கு அறுபது கோடி அமெரிக்க டாலர்கள் எனும் அளவிலிருந்து சட்டென சறுக்கி நூற்று இருபது கோடி டாலர்கள் எனும் நிலைக்கு விழுந்து விட்டது.

மக்கள் தொகை வழக்கம் போல சீராக ஏறிக் கொண்டிருக்க, வேலையின்மை படு கோரமாக மக்களைத் தீண்டியிருக்கிறது. இன்றைக்கு நாட்டில் இருப்பவர்களில் எண்பது விழுக்காடு மக்களுக்கு வேலை இல்லை !

சுமார் முப்பத்தைந்து ஆண்டு கால வளர்ச்சியை புரட்டிப் போட்டு மக்களை கற்காலத்துக்கு இட்டுச் சென்றிருக்கிறது சமீபத்திய ஆட்சி. உலக மனித உரிமைகள் பட்டியலில் ஏறக்குறைய கடைசி இடத்தில் ஒட்டிக் கொண்டிருக்கிறது இந்த நாடு.

வறுமையின் உச்சத்தினால் மக்களுடைய வாழும் வயதும் படு வேகமாக வீழ்ச்சியடைந்து வருகிறது. நம்புங்கள், ஒரு ஆணின் சராசரி ஆயுள் வெறும் முப்பத்து ஏழு !!! உலக நலவாழ்வு நிறுவன அறிக்கையின் படி இங்கே ஒவ்வோர் வாரமும் வறுமையினாலும், நோயினாலும் உயிரிழக்கும் மக்களின் எண்ணிக்கை 3500 ! ஆனால் உண்மை நிலவரம் பல மடங்கு அதிகம் என உள்ளூர் புள்ளி விவரங்கள் நம்புகின்றன.

கடந்த நான்கு வருடங்களில் மட்டுமே சுமார் ஐந்து இலட்சம் உயிர்களை வறுமையும், நோயும் கொலை செய்திருப்பதாக பல புள்ளி விவரங்கள் தெரிவிக்கின்றன. உயிர் கொல்லி நோயான எயிட்ஸ் அதிகம் பீடித்திருக்கும் நாடு எனும் சிக்கலும் ஜிம்பாவேக்கு இருக்கிறது.

உயிரைத் தக்கவைத்துக் கொள்ள தேவையான உணவு என்பது மட்டுமே பெரும்பாலான மக்களின் ஒரே எதிர்பார்ப்பாக இருக்கிறது. ஆனால் சூழல் அவர்களை அந்த எதிர்பார்ப்புக்கும் தகுதியற்றவர்களாக உருமாற்றியிருக்கிறது. காரணம் இந்த பண வீக்கம் எனும் அசுரக் கொலையாளி.

அரசு முன்னூறு மடங்கு சம்பள உயர்வு கொடுத்தால் கூட கிடைக்கும் பணம் சில வேளை உணவுக்கு மட்டுமே சரியாய் போகிறது எனும் அவல நிலை ! சில ஆண்டுகளுக்கு முன்பு வரை ஒரு வருடம் சாப்பிடத் தேவையான பணத்தைக் கொண்டு இன்றைக்கு வாங்க முடிவது ஒரு கிலோ கத்திரிக்காய் மட்டுமே ! இந்த துர்பாக்கிய நிலை சுமார் அரை கோடி பட்டினி வயிறுகளை உருவாக்கியிருக்கிறது.

ஒரு உதாரணம் சொல்ல வேண்டுமெனில் ஒரு ஆசிரியரின் ஒரு மாத சம்பளம் இப்போதைய ஜிம்பாவே பணவீக்கத்தில் மூன்று துண்டு ரொட்டிகளை வாங்க மட்டுமே பயன்படுகிறது ! நினைத்துப் பார்த்தாலே உயிர் உலுங்குகிறதல்லவா ?

குண்டுகள் வெடித்து, போர்கள் நிகழ்ந்து உலகின் பல இடங்களிலும் மடியும் மக்களை விட அதிக அளவில் ஜிம்பாவே நாட்டில் மக்கள் மடிந்து கொண்டிருக்கின்றனர் என்பது தான் குருதி வடியும் நிஜம். ஆனால் அவர்கள் ஒட்டிய வயிறுகளோடும், நோயின் வலியோடும் குரலெழுப்பத் திராணியற்று மடிகின்றனர். வெடிகுண்டுகளைப் போல ஒலியெழுப்பி உலக நாடுகளின் கவனத்தை இழுக்க இந்த அமைதி மரணங்களால் முடியாததால் இவை கவனிப்பாரற்றுப் புதைபடுகின்றன.

இன்னொன்று எண்ணை வளங்கள் ஏதும் இல்லாத இந்த நாட்டை மேல் நாடுகள் எட்டிப் பார்க்க வேண்டிய தேவையும் இல்லையே ! சுயநலப் பல்லக்குகளில் மட்டுமே பயணிப்பவர்களுக்கு ஜிம்பாவே இது வரை எந்த நாடுமே சந்தித்திராத சிக்கலைச் சந்தித்திருக்கிறது என்பதை யோசிக்கவே நேரமில்லை.

இத்தனைக்கும் ஜிம்பாவே 1980 களில் ஆப்பிரிக்க நாடுகளிலேயே வலுவான நாடாய் இருந்தது. அப்போது ஒரு ஜிம்பாவே டாலரின் மதிப்பு அமெரிக்க டாலரின் மதிப்பை விட ஒன்றரை மடங்கு அதிகம் !!! இப்போது அமெரிக்க டாலரை வாங்குமளவுக்கு மக்களுக்கு வருமானம் இல்லை. புழக்கத்தில் பத்து இலட்சம், ஒரு கோடி, ஐந்து கோடி என நீண்டு ஐம்பது கோடி ரூபாய் நோட்டுகளும் அச்சடிக்கப்பட்டன.

பணத்தின் பின்னால் வால் போல நீண்டு கொண்டே இருந்த பூச்சியங்களால் எந்த பெரிய மாற்றமும் நேரவில்லை மாறாக சிக்கல்கள் அதிகரித்தன. கணினிகள் அத்தனை பூச்சியங்களை வைத்து கணக்கு செய்ய முடியாமல் திணறின. ஏடிஎம் இயந்திரங்கள் செய்வதறியாமல் செயலிழந்தன. பணம் அச்சிடும் காகிதம் அச்சிடப்படும் பணத்தை விட மதிப்பு மிக்கதாய் மாறியதால் நாடுகள் காகிதம் அளிக்கவும் யோசித்தன.

அரசு யோசித்தது நோட்டுகளிலுள்ள பூச்சியங்களில் பத்து பூச்சியங்களை வெட்டுவதாக அறிவித்தது. அதாவது 10,00,00,00,000.00 நோட்டின் மதிப்பு இனிமேல் 1.00 !!! ஆகஸ்டில் நடைமுறைக்கு வந்த அதுவும் பயனேதும் அளிக்கவில்லை. பணவீக்கம் தொடர்ந்து ஏறிக்கொண்டே இருக்கிறது.

இருபத்தைந்து ஆண்டுகளுக்கு முன் ஒரு ஜிம்பாவே டாலர் கொடுத்தால் ஒன்றரை அமெரிக்க டாலர் கிடைக்கும். இப்போதோ சுமார் நாற்பத்தையாயிரம் ஜிம்பாவே டாலர்கள் தேவைப்படுகின்றன. கவனிக்கவும், உண்மையில் ஒரு டாலரின் மதிப்பு நாற்பத்தையாயிரம் ஜிம்பாவே டாலர்கள் கூடவே பத்து பூச்சியங்கள் !!! வாசிக்க முடிகிறதா ?

உண்ணவே உணவில்லாத நிலையில் மக்கள் இருப்பதால் நோய்கள் வந்து விட்டால் சிகிச்சை பெற்றுக் கொள்ளும் நிலையில் வெகு வெகு சொற்ப மக்களே அங்கிருக்கின்றனர்.

பொருளாதாரத்தின் படு பயங்கர வீழ்ச்சி ஜிம்பாவே அரசை மிகப்பெரிய கடனாளியாகவும் உருமாற்றியிருக்கிறது. வெளிநாடுகளிலிருந்து வரும் பணத்தையும் மொகாபேயின் அரசு அடிப்படைத் தேவைகளுக்காய் செலவிடாமல் ஊதாரித்தனமாக ஆயுதங்கள், இராணுவ பலம் என செலவிட்டு வறுமை வயிறுகளை சுடுகாட்டுக்கு அனுப்பிக் கொண்டிருக்கிறது.

தென்னாப்பிரிக்க அரசு கடந்த வாரம் 300 மில்லியன் அமெரிக்க டாலர்களை கடனாக வழங்க முன்வந்திருக்கிறது. எனினும் இது யானைப்பசிக்கு இடப்பட்ட சோளப்பொரி என்பதில் ஐயமில்லை.

இத்தனைக்கும் ஜிம்பாவே உலகிலேயே செல்வச் செழிப்பு பெற்ற நாடு என்று சொல்லலாம். இரும்பு, நிக்கல், பிளாட்டினம், வைரம், நிலக்கரி, தங்கம் என நாட்டில் உள்ள செல்வம் ஏராளம் ஏராளம். மண்ணுக்குள் புதைந்து கிடக்கும் தங்கம் மட்டுமே போதும் ஜிம்பாவே நாட்டை உலகத்தின் உச்சத்தில் அமர்த்த. தங்கச் சுரங்கங்கள் நன்றாகச் செயல்பட்டால் குறைந்த பட்சம் முப்பதாயிரம் கிலோ தங்கத்தை ஒவ்வோர் ஆண்டும் பெற முடியுமாம். என்ன செய்ய குரங்கு கையில் கிடைத்த பூமாலையாய் கிடக்கின்றன வெளியே எடுக்க முடியாத வளங்கள்.

மொகாபேயின் தவறான கொள்கைகளே அனைத்துக்கும் காரணம் என விமர்சனங்கள் அழுகையில் மொகாபேயோ மழை இல்லை என்றும், சூழல் சரியில்லை, உலகம் கவனிக்கவில்லை என்றும் விரல்களை வேறு வேறு திசைகளில் காட்டிக் கொண்டிருக்கிறார். போதாக்குறைக்கு உணவை ஒரு அரசியல் ஆயுதமாக்கி அதன் இயக்கத்தையும் கட்டுக்குள் வைத்துக் கொண்டிருக்கிறார்.

ஒட்டு மொத்த அதிகாரங்களையும் கட்டுக்குள் வைத்திருக்கும் அரசு ஆபத்தானது என்றும் தேவையான அதிகாரங்களும் தேவைப்படும் இடங்களில் தனியார் உதவியையும் அரசு நாடவேண்டும் என்றும் வலுவான கருத்துகள் நிலவுகின்றன. மிகப்பெரிய அரசியல் மறுமலர்ச்சியும், தெளிவான தேர்தல் அமைப்புகளும், தெளிவான ஜனநாயகப் பார்வையும் ஜிம்பாவே பீனிக்ஸ் பறவையாய் கிளர்ந்தெழவேண்டுமெனில் தேவை என்பதே அரசியல் வல்லுனர்களின் கருத்தாகும்.

குறிப்பாக வெளிநாட்டு முதலீடுகளை ஊக்கப்படுத்துவதும், ஜிம்பாவே நாட்டு வளங்களை கூர்தீட்டி தன்னிறைவை நோக்கிய பயணத்தை மீண்டும் துவங்குவது அவசியம் என்பதே பெரும்பாலானோரின் கருத்தாகும். அதற்கு அடிகோலும் வகையில் ஓர் அரசியல் அதிசயமும் கடந்த வாரம் ஜிம்பாவே நாட்டில் உருவாகியுள்ளது.

அதாவது, தற்போது எதிர்கட்சியாக செயல்படும் கட்சியுடன் கைகோத்து அரசியல் அதிகாரப் பகிர்வுகளை நிகழ்த்தும் ஒரு அரசியல் வெள்ளோட்டம் ஜிம்பாவே நாட்டில் துவங்கியிருக்கிறது. இதன்படி அரசு அதிகாரங்களில் மொகாபேயுடன் எதிர்கட்சித் தலைவர் மார்கன் ஸ்வாங்கிரை என்பவரும் இணைந்து செயல்படுவார். ஐந்து ஆண்டுகளுக்கான இந்த ஆட்சி ஒப்பந்தம் பதினெட்டு மாதங்களுக்கு ஒருமுறை மறு பரிசீலனை செய்யப்படும். இந்த ஒப்பந்தம் கடந்த பதினொன்றாம் தியதி கையெழுத்தானது.

இந்த இந்த மாற்றமேனும் ஜிம்பாவே மக்களின் துயரைத் துடைக்குமா என்பது சுயநலமற்ற ஆட்சிப் பகிர்தல் மற்றும் புரிதலில் இருக்கிறது.

கட்டுரை : பாலை நிலமாகுமா பூகோளம்.

 இந்த வார தமிழ் ஓசை – களஞ்சியம் இதழில் வெளியான எனது கட்டுரை

தண்ணீர் பிரச்சனை என்றதும் சட்டென நம் நினைவுக்கு காவேரியும், முல்லைப் பெரியாறும், சேது சமுத்திரமும் வரக் கூடும். விவசாயத் தோழர்கள் எனில் சில்லென வயல் நனைக்கும் மழையோ, நகர்ப்புற வாசிகள் எனில் தெருமுனையில் நிற்கும் மாநகர தண்ணீர் தொட்டியோ, எப்போதேனும் வரும் கார்ப்பரேஷன் தண்ணீரோ, தண்ணீர் லாரியோ நினைவுக்கு வரலாம். எதைப்பற்றியும் கவலைப்படாத கண்ணாடிக் கட்டிட வாசிகளுக்குக் குறைந்தபட்சம் மினரல் வாட்டராவது நினைவு வரும்.

காவேரியோ, முல்லைப்பெரியாறோ முற்றிலுமாக வற்றிப் போய்விட்டால் என்ன செய்வார்கள் என குதர்க்கமாய் சிந்திப்பவர்களுக்கு அப்படி ஒரு காலம் விரைவில் வரக் கூடும் என எச்சரிக்கை செய்கிறது ஐக்கிய நாடுகளின் சபை.

உலகில் தண்ணீருக்காக மக்கள் தவிக்கப் போகின்றனர். தேவையான அளவு நல்ல தண்ணீர் கிடைக்காமல் உலகம் பாலைவனமாகப் போகிறது. என அதிர்ச்சியூட்டும் அறிக்கைகளை அது வெளியிட்டுக் கொண்டிருக்கிறது.

தற்போதைய உலகின் மக்கள் தொகையின் அடிப்படையில் பார்த்தால், உலக மக்கள் தொகை தற்போதைய ஆறு பில்லியன் எனும் அளவிலிருந்து எட்டரை பில்லியன் எனுமளவுக்கு இன்னும் இருபதே ஆண்டுகளில் அதிகரிக்கப் போகிறதாம். இந்த அதிகப்படியான மக்கள் தொகை தண்ணீரின் தேவையை உலக அளவில் அதிகரிக்கப் போகிறது.

ஒரு ஆண்டுக்கு மூவாயிரம் லிட்டர் எனுமளவில் வளர்ந்த நாடுகளிலுள்ள மக்கள் நல்ல தண்ணீரைப் பயன்படுத்துகின்றனர். அதாவது தினமும் சுமார் எட்டே கால் லிட்டர் தண்ணீர். இந்த அளவை வைத்துப் பார்த்தால், இன்னும் ஒரு இரண்டரை மில்லியன் மக்களுக்குத் தேவையான தண்ணீர் எவ்வளவு தெரியுமா ? சுமார் இரண்டாயிரம் கிலோமீட்டர்  நீளமும், இரண்டாயிரம் கிலோமீட்டர் ஆழமும், இரண்டாயிரம் கிலோமீட்டர் அகலமும் கொண்ட ஒரு மிகப்பெரிய தண்ணீர் கடல்.

கடந்த நூறு ஆண்டுகளில் உலக அளவில் தண்ணீரின் தேவை ஆறு மடங்கு அதிகரித்திருக்கிறது. இனி வரும் காலம் இந்த அளவு வெகு விரைவாக பல மடங்கு உயர்ந்து விடும், காரணம் தேவை அதிகரிப்பு. இன்னும் குறிப்பாகச் சொல்லவேண்டுமெனில் இந்த தேவை 2050 களில் இப்போதைய தேவையிலிருந்து இரண்டு மடங்கு அதிகரிக்கும்.

உலகின் பல பகுதிகளில் இன்றைக்கே தேவையான தண்ணீர் கிடைப்பதில்லை. குறிப்பாக விவசாயத் தேவைக்கான தண்ணீரோ, வளரும் நாடுகளிலுள்ள மக்களுக்குத் தேவையான குடிநீரோ கூட தேவையை விட குறைவாகவே கிடைக்கிறது. இத்தகைய சூழலில் தேவையும் அதிகரிக்கும் போது மனுக்குலம் மிகப்பெரிய சவாலை எதிர்கொள்ள வேண்டிவரும் என எச்சரிக்கிறார் உலக தண்ணீர் மேலாண்மை நிறுவன இயக்குனர் பிராங்க் ரிஜர்ஸ்பன்.
காடுகளை அழிப்பதும், நகர்ப்புறங்களை விரிவுபடுத்தி இயற்கை வளங்களை விலக்குவதும் இன்றைய சூழலை இன்னும் அதிகமாய் சிக்கலுக்குள் ஆளாக்கி விடுகின்றன என்பது நாம் அறிந்ததே. ஒருபுறம் தேவை அதிகரிக்க, மறுபுறம் வரத்தும் குறைவாய் இருக்குமானால் எதிர்பார்ப்பதை விட விரைவாகவே தண்ணீர் பஞ்சம் தலைவிரித்தாடும் என்பதில் சந்தேகமில்லை.

இன்னும் இருபது முப்பது ஆண்டுகளில் தண்ணீருக்கான மிகப்பெரிய சிக்கல் உலக அளவில் உருவாகும் என கணிக்கப்பட்டிருப்பதால், அரசுகள் அதற்குரிய நடவடிக்கையில் இறங்கவேண்டுமென ஐக்கிய நாடுகள் குழு அறிவுறுத்தியுள்ளது.

முன்னெச்சரிக்கை நடவடிக்கையாக நாடுகளில் தண்ணீர் சேமிப்பு, மழை நீர் சேமிப்பு, கடல்நீரை குடிநீராக்குதல், இயற்கை வளங்களை சேமித்தல் என பல்வேறு உயர் நிலை அறிவுறுத்தல்கள் அரசுகளை நோக்கி நீட்டப்படுகையில்,

சிக்கனமாய் தண்ணீரைச் செலவு செய்யுங்கள் என்பதும், தண்ணீரை மாசு படுத்தாதிருங்கள் என்பதும், நீர் வளங்களை அழிக்காதீர்கள் என்பதும் பொதுமக்களை நோக்கி உலகம் நீட்டும் கோரிக்கையாய் இருக்கிறது.

உலக அளவில் தண்ணீர் தேவை அதிகரிக்கும் போது இன்றைக்கு எண்ணைக்காகவும், வளங்களுக்காகவும் நடக்கும் போர் தண்ணீருக்காகவும் நடக்கும் என வல்லுநர்கள் கருதுகின்றனர். உதாரணமாக துருக்கியிலிருந்து சிரியா, ஈராக் போன்ற நாடுகளுக்கு ஈரப்பதத்தைக் கொடுக்கும் திக்ரிஸ், யூப்பிரட்டீஸ் போன்ற நதிகள் கர்நாடகாவின் கைங்கர்யம் போல துருக்கியிலேயே அணைகளுக்குள் அடைக்கப்பட்டால் சிரியாவும், ஈராக்கும் தண்ணீருக்காக தவிக்க வேண்டியிருக்கும்.

இப்போது இஸ்ரேலும், ஜோர்தான் பகுதியும் இணைந்து ஜோர்தான் நதியைப் பாதுகாத்து பயன்படுத்தி வருகின்றனர். எதிர்கால தண்ணீர் சிக்கல் அரசியலாக்கப்பட்டாலோ, சுயநலமாக்கப்பட்டாலோ சிக்கல்கள் உருவாகும் வாய்ப்பு உண்டு. எத்தியோப்பியாவும், எகிப்தும் வருடம் ஒருமுறை கலந்து பேசி தங்கள் தண்ணீர் தேவைகளைக் குறித்தும், பயன்பாடு குறித்தும் விவாதிக்கின்றனர் என்பதும் இங்கே குறிப்பிடத் தக்கது.

போர்களுக்கு முன்பாகவே, தண்ணீர் உலக அளவில் விலையேற்றத்துக்கான முக்கிய காரணமாகப் போகிறது என்பது இன்னோர் கணிப்பு. வறட்சியின் காரணமாக பட்டினியையும், எலிக்கறி உண்ணும் அவலத்தையும் கண்ட நமக்கு அதன் விஸ்வரூப வெளிப்பாட்டை கற்பனை செய்வதே நடுங்கவைக்கும் என்பதில் சந்தேகமில்லை.

அதிலும் குறிப்பாக ஆசியா-பசிபிக் பகுதியில் வாழும் மக்களில் சுமார் ஒரு நூற்று பத்து கோடி பேர் சரியான இப்போதே சரியான தண்ணீர் வசதி இல்லாமல் தான் வாழ்க்கையை நடத்திக் கொண்டிருக்கிறார்கள் என்பது கவனிக்கத் தக்கது.

உலக நலவாழ்வு நிறுவனத்தின் அறிக்கைப் படி உலகில் சுமார் ஐம்பது இலட்சம் மக்கள் ஆண்டுதோறும் சுகாதாரமான தண்ணீர் கிடைக்காததால் மரணத்தைத் தழுவிக் கொண்டிருக்கின்றனர்.

பெரும்பாலான நாடுகள் தண்ணீர் நிர்வாகத்தைச் சரியாக நிர்வகிக்கவில்லை எனவும் ஏனோ தானோவெனும் போக்கையே பல நாடுகளும் தண்ணீர் விஷயத்தில் கடைபிடிக்கின்றன எனவும் உலக நாடுகளின் தண்ணீர் வள ஆலோசகர் பிரிஸ்கோ குற்றம் சாட்டுகிறார்.

இந்தியா போன்ற நாடுகளில் பெருமளவில் நிகழும் காடு அழிப்பு, நாடு விரிவாக்கம், ஏரிகள் அழிப்பு போன்றவை அந்தப் பகுதிகளை வெகு விரைவிலேயே வறட்சிக்குள் தள்ளி பாலை நிலமாக்கி விடுகின்றன.

உலக மக்கள் தொகை அளவின் படி முதலிடத்தில் இருக்கும் சீனா தனது முன்னூறு நகரங்களில் தேவையான குடிநீர் வசதிகள் இல்லை என்பதை ஒத்துக் கொண்டிருக்கிறது. இருக்கின்ற நீர் நிலைகளும் பெரிதும் மாசுபட்டுள்ள நிலையில் சீனாவின் தண்ணீர் சிக்கல் எந்நேரமும் பெரிய அளவில் வெடிக்கலாம் எனும் சூழலே அங்கும் நிலவுகிறது.

மழை கைவிடாத நாடுகளில் நிலமையே இப்படி இருக்கையில் நைல் நதியை மட்டுமே நம்பியிருக்கும் எகிப்தின் நிலமை இன்னும் பரிதாபம். நைல் நதியின் அளவு குறைவதை திகிலுடன் பார்த்துக் கொண்டிருக்கின்றனர் எகிப்திய மக்கள்.

தண்ணீரின் தேவை உலகின் மாசு அதிகரித்தலுக்கு முக்கிய காரணமாகி விடும். குடிநீரைத் தவிர சுத்தமான வாழ்க்கைக்கும், கழிவுப் பொருட்களை அகற்றவும் தேவையான தண்ணீர் இல்லாத சூழல் சுகாதாரமற்ற வாழ்க்கையையே வலுக்கட்டாயமாய் திணிக்கும்.

வழக்கம் போலவே வறுமையானாலும், தண்ணீர் பற்றாக்குறையானாலும் முதலில் பாதிக்கப்படுவது வறுமைக் கோட்டுக்கு கீழே வாழும் நமது சகோதரர்களே. தண்ணீருக்காய் அதிகமான பணம் செலவிட வேண்டிய சூழல் தண்ணீரே இல்லாமல் தவிக்கும் நிலைக்கோ, சுகாதாரமற்ற சூழலுக்கோ இவர்கள் தள்ளப்படுவது தவிர்க்க முடியாததாகி விடுகிறது.

ஏற்கனவே சுகாதாரமற்ற வாழ்க்கை வாழும் நாடுகளில் இது இன்னும் மிகப்பெரிய தாக்கத்தை ஏற்படுத்தும். குறிப்பாக ஆப்பிரிக்கா போன்ற வளர்ச்சியடையாத நாடுகளில் சுமார் நான்காயிரம் குழந்தைகள் தினம்தோறும் கக்கல், கழிச்சல் போன்ற நோய்களால் பலியாகிக் கொண்டிருக்கின்றனர். இந்த சிக்கல் இன்னும் பெருமளவு அதிகரிக்க இந்த தண்ணீர் சிக்கல் காரணமாகிவிடக் கூடும்.

பாலையில் நடப்பவனுக்குத் தான் தெரியும் தண்ணீரின் மகத்துவம். தாகத்தில் தவிக்கும் போது நமக்கு தங்கத்தை விட மதிப்பானது தண்ணீரே. நம்மால் முடிந்த அளவு தண்ணீரைச் சேமிக்கவும், மிச்சப்படுத்தவும் முயல்வது நமது வருங்கால சந்ததிக்கு நாம் வழங்கும் வரமெனக் கொள்ளப்படும்.

சரி… நாம் ஏதேனும் செய்யமுடியுமா ?

1. வீட்டுக் குழாய்களில் எங்கேனும் தண்ணீர் சொட்டுச் சொட்டாய் வழிகிறதா எனப் பாருங்கள். சிறு துளி பெருவெள்ளம். ஏராளமான தண்ணீர், கசிவுகளின் வழியாகத் தான் வீணாகிக் கொண்டிருக்கிறது. ஒரு வினாடிக்கு ஒரு துளி தண்ணீர் என கணக்கிட்டால் வருடத்துக்கு சுமார் எட்டாயிரம் லிட்டர் தண்ணீர் வீணாகிறது.

.
2. முகச் சவரம் செய்யும்போதோ, பல் துலக்கும்போதோ, பாத்திரம் கழுவும் போதோ குழாயைத் திறந்து விடாமல் ஒரு பாத்திரத்தைப் பயன்படுத்துவதும், ஷவரை சரியான முறையில் பயன்படுத்துவதும் வீடுகளில் நிறைய தண்ணீரை மிச்சப்படுத்தும்.

.
3. தேவையானபோது மட்டும் தோட்டத்தில் தண்ணீர் பாய்ச்சுங்கள். தேவையான அளவு. செடிகளின் வேரருகே தண்ணீர் விடுவது அதிக பயன் தரும்.

.
4. செடிகளுக்குத் தண்ணீர் விடும்போது காலையில் விடவேண்டும். அப்படிச் செய்தால் செடிகள் குறைந்த தண்ணீரிலேயே அதிக பயனடையும்.

.
5. வாகனங்களை சுத்தம் செய்யும் போது குழாயிலிருந்து தண்ணீரை மழைபோல அடிக்காமல் இருப்பது தண்ணீரை மிச்சப்படுத்தும். ஒரு பக்கெட் பயன்படுத்தலாம்.

.
6. குழாயைத் திறந்து விட்டுக்கொண்டே காய்கறிகளைக் கழுவுதலைத் தவிருங்கள்.

.
7. வீடுகளில் தண்ணீரைச் சிக்கனமாய் பயன்படுத்துவதைப் போலவே பொது தண்ணீரையும் பயன்படுத்துங்கள். உதாரணமாக பூங்காக்கள், உணவகங்கள், தெருவோர தண்ணீர் குழாய்கள், அலுவலகங்கள்.

.
8. மறுபடியும் பயன்படுத்தக் கூடிய தண்ணீரை வீணாக்காதீர்கள். உதாரணமாக மீன் தொட்டியைக் கழுவும் தண்ணீர் கூட செடிக்கு ஊற்றப்படலாம்.

.
9. வாஷிங் மெஷின் போன்றவற்றைப் பயன்படுத்துகிறீர்கள் எனில் சரியான அளவு துணிகள் சேர்ந்தபின் பயன்படுத்துங்கள்.

.
10. மிக முக்கியமாக, குழந்தைகளுக்கும், நண்பர்களுக்கும் தண்ணீரை சிக்கனமாகப் பயன்படுத்துதல் குறித்த விழிப்புணர்வை ஏற்படுத்துங்கள்

கட்டுரை : வெடிக்கும் உலகம், விழித்தல் அவசியம்

 

( இந்த வார தமிழ் ஓசை களஞ்சியம் இதழில் வெளியானது )

உலகெங்கும் வெடிகுண்டுகள் வெடிப்பது சர்வ சாதாரணமாகி விட்ட சூழல் இது. இலங்கை, ஈராக் என போர் பிரதேசங்களில் நிகழ்ந்து வந்த வெடிகுண்டுகள் இப்போதெல்லாம் எங்கு வேண்டுமாலாலும் வெடிக்கலாம் எனும் சூழல்.

கடந்த ஆண்டு மட்டும் இந்தியாவில் 2765 பேர் தீவிரவாதத் தாக்குதலுக்கு பலியாகியிருக்கின்றனர். இரண்டாயிரத்து ஒன்றாம் ஆண்டு முதல் இரண்டாயிரத்து ஆறாம் ஆண்டு முடிய இந்தியாவில் மட்டும் நிகழ்ந்த தீவிரவாதப் படுகொலைகளின் எண்ணிக்கை சுமார் பதினான்காயிரத்து ஐநூறு என்கிறது SAIR (South Asis Intelligence Review) புள்ளி விவரம்.  

எல்லைகளில் நிகழ்ந்து வந்த தாக்குதல்களும், குண்டு வெடிப்பும் இப்போது அப்பாவி மக்கள் உலவும் பொது இடங்களில் நிகழ்வதுதான் அச்சத்தை அதிகப்படுத்துகிறது. அதிலும் இந்த ஓரிரு வாரங்களில் இந்தியாவில் நிகழ்ந்த தொடர் வெடிகுண்டு தாக்குதல்கள் மக்களை பீதியின் எல்லைக்கே தள்ளியிருக்கிறது. பொதுவிடங்களில் நின்று பேசவும், திரையரங்குகள், விற்பனை நிலையங்கள் போன்ற இடங்களுக்குச் செல்லவும் மக்கள் பெரிதும் தயங்குகின்றனர். காரணம் பெரும்பாலும் தாக்குதலுக்கு உள்ளாகும் இடங்கள் இத்தகையதே.

வெடிகுண்டு ஏற்படுத்தும் பாதிப்புகளை பல அடுக்குகளாகப் பிரிக்கலாம் என்கின்றனர் நிபுணர்கள். முதலாவது குண்டு வெடிக்கும் போது உருவாகும் வெடி அலைகள். வெடிகுண்டு வெடிக்கும் போது சுற்றியிருக்கும் பகுதி மிக அதிக அழுத்தத்துக்குள் தள்ளப்படுகிறது. இது அருகிலிருக்கும் காற்றை மிக அழுத்தத்துடனும், மிக மிக விரைவாகவும் தள்ளுகிறது. இந்த வேகம் ஒலியின் வேகத்தை விட அதிகம் என்பது குறிப்பிடத் தக்கது. ஒரு வினாடியை நீங்கள் ஆயிரக்கணக்காக உடைத்தால் அதில் ஒரு வினாடியில் இந்த அலை பாயும் எனக் கொள்ளலாம். இது தான் சுற்றியிருக்கும் பொருட்களையும் உடைத்து, அருகில் நிற்கும் மனிதர்களையும் கொடூரமாய் தாக்குகிறது.

இந்த அலைகளைத் தொடர்ந்து இரண்டாவதாக வருவது அதிர்வு அலைகள். மிக அதிக அழுத்தத்தில், அதிக வெலாசிடி உள்ள அதிர்வு அலைகள் உடலை ஊடுருவி உடலின் பாகங்களைச் சிதைக்கிறது. இந்த அலைகள் தாக்கினால் உடல் மிகப்பெரிய சேதத்தை சந்திப்பது உறுதி.

குண்டு வெடிக்கும்போது அருகில் இருக்கும் கண்ணாடிப் பொருட்களோ, இரும்புப் பொருட்களோ, அல்லது கனமான கூர்மையான பிற பொருட்களோ அதி வேகத்தில் வீசப்படும். இது தான் சற்றுத் தொலைவில் இருப்பவர்களைக் கூட தாக்கி அவர்கள் உயிருக்கு உலை வைக்கிறது.

குண்டு வெடிக்கும் போது ஏற்படும் வெப்பம் அருகில் இருக்கும் பொருட்களை எரித்தும், வெப்ப அலைகளை அருகிலுள்ள பகுதிகளில் நிலவச் செய்தும் முடிந்த மட்டும் பொசுக்கி விடுகிறது.

குண்டு வெடிக்கும்போது நிகழும் இன்னொரு அபாயம் என்னவெனில், வெடிக்கும் போது அதிக அழுத்தமான காற்று வெளித்தள்ளப்படுவதால் அந்த இடத்தில் மிகப்பெரிய வெற்றிடம் ஒன்று உருவாகி விடுகிறது. இந்த வெற்றிடம் அடுத்த வினாடியே அருகிலுள்ள காற்றை உள்ளிழுத்து நிரம்பிக் கொள்கிறது. இப்படி உள்ளிழுக்கும் வலிமை அருகில் இருக்கும் பொருட்களையும் உயிர்களையும் தப்ப விடாமல் செய்துவிடுகிறது.

இவையெல்லாம் குண்டுவெடிக்கும்போது நிகழ்பவை. குண்டு வெடிப்பிற்குக் காரணம் எதுவாக வேண்டுமானாலும் இருக்கலாம். ஆனால் பாதிக்கப்படுவது அதற்கு சற்றும் தொடர்பற்ற மக்கள் என்பது தான் மனித நேயம் உடையவர்களை வேதனைக்குள் தள்ளும் செய்தி.

வன்முறையற்ற, பாதுகாப்பான ஒரு சூழல் அமைய அரசு மற்றும் சம்பந்தப்பட்ட துறைகளின் தெளிவான திட்டமிடுதலும், பாரபட்சமற்ற அணுகுகுறையும் அவசியம். பொதுமக்களின் பங்களிப்பு, விழுப்புணர்வு போன்றவையும் இதில் அவசியம்.

1       உங்களுக்கு அருகில் எங்கேனும் குண்டு வெடித்தாலோ, வெடிக்கும் என தெரிந்தாலோ எதற்கேனும் அடியில், மூடிக்கொண்டு படுப்பது நலம் பயக்கும். இது குண்டு வெடித்தலினால் நிகழும் அலைகளிலிருந்து உங்களை பாதுகாக்கும்.

.
2       உங்களுக்கு ஏதேனும் சந்தேகப்படும்படியான பொருள் தபாலில் வந்தால் அதை அனுப்பியவர் யார் என பாருங்கள். அதில் தொலைபேசி இருந்தால் பேசி தகவல் அறியுங்கள். எதுவும் இல்லையேல் அந்தப் பார்சலை பிரிக்காமல் தனியே ஒரு அறையில் வைத்துப் பூட்டி விட்டு காவல் துறைக்குத் தகவல் அளியுங்கள். மிகவும் நம்பிக்கைக்குரிய நபர் தவிர்த்து யாரிடமிருந்தும் எதுவும் வாங்காதிருங்கள்.

.
3 ஒரு முக்கியமான விஷயம், சந்தேகத்துக்குரிய பார்சல் எங்கே இருந்தாலும் அந்த இடத்திலிருந்து சுமார் 300 மீட்ட இடைவெளியில், ரேடியோ, செல்போன் போன்றவற்றைப் பயன்படுத்தாதீர்கள். முடிந்தவரை மின் பொருட்கள் எதையும் இயக்காதீர்கள்.

.
4 இங்கேயெல்லாம் யார் வருவாங்க? என்பது போன்ற ஓரமான, மக்கள் அதிகம் செல்லாத இடங்களில் ஏதேனும் பார்சல் இருந்தால் உங்கள் சிந்தனை சட்டென விழிப்படையட்டும். பார்சலின் மேல் ஏதேனும் எச்சரிக்கை வாசகங்கள் ஒட்டப்பட்டிருந்தால் உடனே காவல்துறைக்குத் தெரியப்படுத்துங்கள். எக்காரணம் கொண்டும் பார்சலைத் தொடாதீர்கள்.

.
5 வந்திருக்கும் பார்சல் சந்தேகத்துக்குரியதா என்பதை எப்படிக் கண்டுபிடிப்பது ? சில வழிமுறைகள் சொல்கின்றனர் நிபுணர்கள். உதாரணமாக, வந்திருக்கும் பார்சல் வெளிநாட்டிலிருந்து வந்திருந்தாலோ, அனுப்பியவர் விவரம் இல்லாமல் இருந்தாலோ, ஒழுங்கற்ற வடிவத்துடன் இருந்தாலோ, விலாசம் பிழைகளுடன் எழுதப்பட்டிருந்தாலோ, குறிப்பிட்ட நபருக்கு என்று இல்லாமல் தலைவர் இயக்குனர் என பதவிகள் குறிப்பிட்டு அனுப்பப்பட்டிருந்தாலோ, வித்தியாசமான வாசனை வந்தாலோ, ஒயர் போன்றவை தெரிந்தாலோ, அளவுக்கு அதிகமாகவே தபால்தலை ஒட்டப்பட்டிருந்தாலோ, அளவுக்கு அதிகமான எடையுடன் இருந்தாலோ,  எண்ணைப்பசை, பொடி, போன்றவை கசிந்தாலோ, உள்ளிருந்து ஏதேனும் சத்தம் வந்தாலோ அவை பிரச்சினைக்குரியவையாய் இருக்கலாம் என கருதி விழிப்படையுங்கள்.

.
6 ஒருவேளை நீங்கள் ஒரு நிறுவனத்தின் அதிகாரியாய் இருந்தால், யாரேனும் உங்கள் அலுவலகத்துக்கோ, பொது இடத்துக்கோ குண்டு வைத்திருப்பதாக போனில் சொன்னால், அந்த நபர் ஆணா பெண்ணா, அவருடைய குரல், உச்சரிப்பு முறை, பின்னணியில் ஒலிக்கும் சத்தங்கள் இவற்றைக் கவனமுடன் பதிவு செய்யுங்கள். பதட்டப்படவே படாதீர்கள். அந்த நபர் பேசி முடிக்கும் வரை அமைதியாய் கேளுங்கள். அந்த சில வினாடிகளில் நீங்கள் கவனிப்பவை மிகப்பெரிய உதவியாய் இருக்கக் கூடும்.

.
7 கட்டிடத்தில் எங்கேனும் குண்டு வெடித்து தீ பரவினால் முடிந்தமட்டும் தரையோடு குனிந்து வெளியேறுங்கள். வெப்பம் கூரைப் பகுதியில் அதிகமாய் இருக்கும். கட்டிடத்தின் அவசர வாசல்களைப் பயன்படுத்துங்கள். மின் தூக்கிகள் பக்கமே போகாதீர்கள்.

.
8 அலுவலகங்கள், வணிக வளாகங்கள், பெரிய கட்டிடங்கள் போன்ற பகுதிகளைச் சுற்றி அதிக வெளிச்சம் இருக்குமாறு பார்த்துக் கொள்தல் அவசியம். கூடவே கண்காணிப்புக் காமராக்கள் பொருத்துவதும் அவசியம். அலுவலகத்தில் பணிபுரிவோர் இத்தகைய ஆலோசனைகளை அலுவலக தலைமைக்குச் சொல்லலாம்.

.
9 சந்தேகப்படும்படியான நபர் உங்கள் அருகே உலாவுவதைக் கவனித்தால் ரகசியமாய் சற்று நேரம் அந்த நபருடைய நடவடிக்கைகளைப் பாருங்கள். சந்தேகம் வலுத்தால் காவல் துறைக்குத் தகவல் கொடுங்கள். குறிப்பாக பல்பொருள் அங்காடிகள், திரையரங்குகள், சுரங்க நடை பாதைகள் போன்ற இடங்களில் விழிப்பாய் இருங்கள்.

.
10 யாருமே விரும்பாத இடங்களைக் கூட ஒருவர் ரகசியமாய் புகைப்படம் எடுக்கிறார் என்றால் அவர் கவனிக்கப்பட வேண்டியவர். உதாரணமாக ரயில்வே நிலையங்களின் ஓரங்கள், கழிப்பிடங்களின் பின் பக்கம், இப்படி.

.
11 குற்றவாளிகள் பெரும்பாலும் தாங்கள் குற்றவாளிகள் இல்லை என்று காட்டிக் கொள்ள பெரும் பிரயர்த்தனம் மேற்கொள்வார்கள். குறிப்பாக வெயில் காலத்திலும் கோட் சூட்டுடன் நடப்பது, எதேச்சையாய் செய்வது போல சில செயல்களை வேண்டுமென்றே செய்வது இப்படி. விழிப்பாய் இருந்தால் அவர்களை அடையாளம் கண்டு கொள்ளலாம்.

.
12 குற்றம் செய்ய வருபவர்கள் பெரும்பாலும் ஒரு பையோ, சூட்கேசோ ஏதேனும் வைத்திருப்பார்கள். தாங்கள் சாதாரணமானவர்கள் என்பதைக் காட்டிக் கொள்ள மொழுமொழுவென புதிதாய் ஷேவ் செய்திருக்கவும் வாய்ப்பு உண்டு. மிகவும் கூர்மையான பார்வையும், அனைத்தையும் கவனத்துடன் அணுகும் மனப்பான்மையும் அவர்களிடம் இருக்கும். வேக வேகமாக நடப்பார்கள், ஆனால் ஓடவே மாட்டார்கள்.

.
13 ஒரு இடத்தில் பெட்டியை வைத்துவிட்டு சிறிது நேரத்தில் விடுட்டென பெட்டியை எடுக்காமல் பக்கத்தில் இருக்கும் கடைக்குச் செல்வதுபோல ஒருவர் அப்படியே நழுவுகிறார் எனில் கவனம் தேவை !
சமூகவிரோத செயல்களையும், தீவிரவாத நடவடிக்கைகளையும், வெடிகுண்டு போன்ற விரும்பத்தகாத நிகழ்வுகளையும் ஒட்டுமொத்தமாக சமூகத்திலிருந்து கழுவி விட முடியாது. ஆனால் எச்சரிக்கை உணர்வு மக்களிடம் பரவினால் இத்தகைய குற்றங்களைப் படிப்படியாகக் குறைக்க முடியும்.
 
சமூக அக்கறையும், சமூகத்தில் நானும் ஓர் அங்கம் எனும் உணர்வும், சமூகப் பாதுகாப்புக்கு என்னால் இயன்றதைச் செய்யவேண்டும் எனும் பங்களிப்பு உணர்வும் அனைவரிடமும் மிளிர்ந்தால் வன்முறைகள் ஒழிந்து நன்முறைகள் சமூகத்தை வளமாக்கும்.