மன அழுத்தம் தவிர்ப்போம்

Image result for stress on Girls

“உலகிலேயே அதிக மன அழுத்தம் இந்தியப் பெண்களுக்குத் தான் !! ”. அதிர்ச்சியாய் இருக்கிறதா ? வளர்ந்த மற்றும் வளரும் நாடுகளில் நடத்தப்பட்ட மிக விரிவான நீல்சன் ஆய்வு ஒன்று தான் இப்படிக் கூறி வெலவெலக்க வைக்கிறது ! சுமார் 87% சதவீதம் இந்தியப் பெண்கள் மன அழுத்தத்தில் உழல்கிறார்களாம் ! பெண்கள் முன்னேற்றத்தில் சீரான வளர்ச்சியையும், வெற்றிகளையும் சந்தித்துவரும் இந்தியாவில் ஏன் இந்த நிலை?

இந்தியப் பெண்கள், அலுவலகங்களில் 21ம் நூற்றாண்டின் புதுமைப் பெண்களாக உலா வருகின்றனர். ஆனால் பெரும்பாலான வீடுகளிலோ கற்காலக் கணவன்களின் சிந்தனைகளின் நிழலிலேயே வாழ்கின்றனர். இரண்டு வேறுபட்ட உலகங்களில் சஞ்சரிக்கும் நிலை அவளுக்கு மன அழுத்தம் தரும் நவீன காரணிகளில் ஒன்று ! இது தவிர குழந்தை, குட்டி, வீடு, வேலை, இத்யாதி இத்யாதி என மன அழுத்தத்துக்கான காரணங்கள் நீங்கள் அறியாததல்ல !

உலகில் மன அழுத்தத்தால் பாதிக்கப்பட்டிருப்பவர்களில் 85 சதவீதம் பேரும் பெண்கள் தான் ! எல்லா இடங்களிலும் வெற்றி வாகை சூடும் பெண்களால் ஏன் மன அழுத்த மதில் சுவரை மட்டும் எகிறிக் குதிக்க முடிவதில்லை ?

முயன்றால் முடியாதது இல்லை  ! கவலையை விடுங்கள் ! வழிகாட்டத் தான் உங்கள் கைகளில் தேவதை இருக்கிறாளே !

  1. நோ சொல்வதும் நாகரீகமே !

இளைச்சவன் தலையில மிளகாய் அரைப்பதில் அலுவலகங்கள் ஒன்றுக்கொன்று சளைத்ததல்ல. உங்கள் தலையில் சக பணியாளர்களோ, உயர் அதிகாரிகளோ ஏகப்பட்ட வேலையைச் சுமத்துகிறார்களா ?

“சாரி, என்னால இவ்ளோ தான் செய்ய முடியும்” என நாகரீகமாக மறுக்கப் பழகுங்கள். ஏற்றுக் கொள்ளும் வேலையை முழுமையாய்ச் செய்து முடிப்பது மன அழுத்தத்தில் விழாமல் காக்கும் வழிகளில் ஒன்று !

ஏகப்பட்ட வேலைகளை ஏற்றுக் கொள்வது, தேவையற்ற மன அழுத்தத்தை வரவேற்பது போல. மறுப்பது நல்ல பழக்கம் தான் ! முதலில் முடியாததாய்த் தோன்றும், பிறகு பழகி விடும்.

“முடியும்னு சொல்ற வேலையை சரியா முடிச்சுக் குடுத்துடுவாங்க” எனும் பெயரையும் நீங்கள் சம்பாதிக்கலாம் !

  1. புதிய கோணம், புத்துணர்வு தரும்.

உங்களுடைய பார்வை ஒவ்வொரு விஷயத்தையும் எப்படி எடுத்துக் கொள்கிறது என்பதைக் கவனியுங்கள். “ஐயோ இதெல்லாம் முடியாது..” என எடுத்த எடுப்பிலேயே தீர்மானிக்கிறதா ? “இதையெல்லாம் செய்யக் கூடாது” என மனம் முரண்டு பிடிக்கிறதா ? கண்டுபிடியுங்கள்.

அலுவலக வேலைகளைப் பொறுத்தவரை கஷ்டமும், சிக்கலும், எரிச்சலும் எழத் தான் செய்யும். ஒரு கஷ்டமான வேலை வந்தால், “இது உங்களை நிரூபிக்க ஒரு வாய்ப்பு” என எடுத்துக் கொள்ளுங்கள். அதை விட்டு விட்டு “கஷ்டத்தை எல்லாம் என் தலையில கட்டிடுவான்” என புலம்ப வேண்டாம் !

  1. மனதுக்கு மாற்று வழி..

 

மன அழுத்தமாக உணரும் தருணங்களில் மனசுக்குப் பிடித்த விஷயங்களைச் செய்வது, மனதை உற்சாகமாக்கும் என்பது உளவியல் பாடம். எனவே எப்போதும் கொஞ்சம் உற்சாகமான விஷயங்களை கை வசம் வைத்திருங்கள்.

அது ஒரு சின்ன பிரேக் எடுத்து ஒரு கதை படிப்பதாகவும் இருக்கலாம், டைரி எழுதுவதாகவும் இருக்கலாம், அல்லது இணையத்தில் உலவுவதாகவும் இருக்கலாம். உங்களுக்கு ஏற்ற, பிடித்த ஒரு ரிலாக்‌சேஷன் கைவசம் இருக்கட்டும்.

ஒன்றுமே இல்லையேல் கண்களை மூடி, உங்களுக்குப் பிடித்த ஒரு இனிமையான சூழலை கற்பனை செய்து கொஞ்ச நேரம் பகல் கனவு காணுங்கள். தப்பில்லை !

  1. உற்சாகமான உடல் அவசியம்

மன அழுத்தம் இல்லாமல் இருக்க வேண்டுமெனில் உடல் உற்சாகமாய் இருக்க வேண்டும் என்கிறது மருத்துவம் ! அதனால் தான் மன அழுத்தம் தவிர்க்க உடற்பயிற்சியை வல்லுனர்கள் பரிந்துரை செய்கிறார்கள்.

உடலில் இரத்த ஓட்டம் சீராக இருந்தால் மனம் உற்சாகமாக இருக்கும். அதற்கு உடற்பயிற்சி கை கொடுக்கும். மூளையிலும், உடலிலும் ஆக்சிஜன் குறைவில்லாமல் இருந்தால் மூளை உற்சாகமாய் இருக்கும். அதற்கு மூச்சுப் பயிற்சி, யோகா, தியானம் போன்றவை கை கொடுக்கும்  ! உடலைப் பேணுவதன் மூலமாக மன அழுத்தத்தை விரட்டும் வழி இது !

  1. மன அழுத்தமும், மருத்துவமும்

நமக்கு மன அழுத்தம் வரும்போது உடல் ஸ்ட்ரெஸ் ஹார்மோன்களை வெளிவிடுகிறது ! இந்த ஹார்மோன்கள் உடலை உலுக்கி எடுக்கின்றன. குருதி அழுத்தத்தை எகிற வைக்கின்றன ! இதயத் துடிப்பை தாறுமாறாய் ஏற்றுகின்றன  ! குருதியில் சர்க்கரை அளவையும் அதிகரிக்கின்றன !

இது அப்படியே படிப்படியாய் தேங்கி, இதய நோய்கள், உடல் பருமன், மன நோய்கள், உடல் வலிகள் என பல்வேறு நோய்களை இழுத்து வரும். இவ்வளவு ஏன் ? பெண்களுக்கு மாதவிலக்கு தாறுமாறாகிப் போகவும் முக்கிய காரணம் மன அழுத்தம் என்கின்றனர் மருத்துவர்கள்.

  1. அதிர்ச்சி மன அழுத்தங்கள் !

ஒரு அதிர்ச்சிகரமான நிகழ்வைப் பார்ப்பதால் வரும் மன அழுத்தத்தை “போஸ்ட் ட்ரமாடிக் ஸ்ட்ரெஸ் டிஸார்டர் – PSTD என்கின்றனர். ரொம்ப மனசுக்குப் பிடித்தமானவர்கள் சட்டென இறந்து போனாலோ, ஒரு விபத்தையோ, வன்முறையையோ நேரில் பார்த்தாலோ, பாலியல் ரீதியான வன்முறையைச் சந்தித்தாலோ, அல்லது இப்படிப்பட்ட ஏதோ ஒரு கடினமான சூழல் காரணமாக உருவாகும் மன அழுத்தம் இது !

ஒருவகையில் துரதிர்ஷ்டவசமான சூழல் இது எனினும், இதிலிருந்து வெளி வரவேண்டியது அவசியம். நல்ல ஆரோக்கியமான நட்புகளை வளர்த்துக் கொள்வதும், பொழுதுபோக்குகளை அரவணைப்பதும், உடற்பயிற்சிகள் மூலம் தன்னம்பிக்கையை வலுவாக்குவதுமே வெளிவரும் வழிகள்.

  1. விட்டு விடுதலே பெற்றுக் கொள்தல் !

“கல்யாண வீடாயிருந்தா நான் தான் மாப்பிளையா இருக்கணும், சாவு வீடா இருந்தா நான் தான் பொணமா இருக்கணும். எந்த இடமா இருந்தாலும் மாலையும் மரியாதையும் எனக்குத் தான் கிடைக்கணும்” எனும் மனநிலை நிம்மதியின் எதிரி.

விட்டுக் கொடுத்தலும், இயல்பாய் வாழ்தலுமே மன அழுத்தத்தை விரட்டும் வழிகள். உங்களை மன அழுத்தத்துக்குள் தள்ளும் விஷயங்கள் என்னென்ன என பட்டியலிடுங்கள். சின்னச் சின்ன விஷயங்களை சரி செய்யுங்கள். தள்ளி விட முடிந்தவற்றை தள்ளி விடுங்கள்.

  1. மன்னியுங்கள் !

மன்னிப்பு மன அழுத்தமற்றவர்களின் தாரக மந்திரம். மன்னிக்கும் மனம் இருப்பவர்களுக்கு மன அழுத்தம் வருவதில்லை. அப்படியே வந்தாலும் அது அவர்களுக்குள் தங்குவதில்லை.

கணவன், பிள்ளைகள், தோழிகள், அலுவலகம், உறவினர்கள் என யார் தப்பு செய்திருந்தாலும் மன்னிக்கப் பழகுங்கள். அதை மனமார செய்யப் பழகுங்கள். மிகவும் கஷ்டமாய் தோன்றும் விஷயம் இது. ஆனால் பழகி விட்டால் ஈகோ இல்லாத இனிய மனம் உங்களுக்குச் சொந்தமாகும்.

  1. ஒழுங்கு நல்லது.

எல்லாவற்றிலும் அரக்கப் பரக்க ஓடி அரையும் குறையுமாய் இருப்பவர்களுக்கு மன அழுத்தம் சர்வ நிச்சயம். எட்டு மணி பஸ்ஸுக்கு 7.59க்கு ஓடுபவர்கள் ரிலாக்ஸாக இருக்க முடியாது. பல விஷயங்கள் இவர்களிடம் ஒழுங்கில்லாமல் இருக்கும்.

உதாரணமாக சாவியை எங்கே வெச்சேன் என 2 நிமிடம், செருப்பு எங்கே என 2 நிமிடம், புக்ஸ் எங்கே என இரண்டு நிமிடம் என எல்லாவற்றுக்கும் டென்ஷனாகி மன அழுத்தத்தை உருவாக்கிக் கொள்வார்கள். ஓடிப் போகும்போ பஸ் கிடைக்காது. அப்புறம் எல்லாத்துக்கும் மாமியார் தான் காரணம்ன்னு முணு முணுப்பில பி.பி இன்னும் எகிறும் !

கொஞ்சம் ஒழுங்கு பழகினால் இருக்கும் நேரத்தை சரியாய்ப் பயன்படுத்த முடியும், நேர மேலாண்மை மன அழுத்தமற்ற வாழ்க்கைக்கு உத்தரவாதம் தரும்.

  1. தூக்கம் முக்கியம்.

விடியற்காலைல எழுந்து ஓடியாடி வேலை செய்பவர்கள் பெண்கள். இரவில் நல்ல ஒரு எட்டு மணிநேர தூக்கம் இல்லாவிட்டால் எல்லாம் போச்சு ! நல்ல ஆழமான தூக்கம் மனதை அடுத்த நாளைக்காய் தயாராக்கும்.

உடலுக்கும், மனதுக்கும், மூளைக்கும் ஓய்வு ரொம்ப அவசியம். சரியாகத் தூங்காவிட்டால் உடல் சோர்வுடன் மனமும் சோர்வடையும். மன அழுத்தம் ஓடி வந்து உட்காரும். சூடாய் ஒரு கப் பால் இரவில் குடிப்பது, டிவி நேரத்தைக் குறைப்பது, மனதை இயல்பாய் வைத்திருப்பது இவையெல்லாம் பெரியவர்கள் சொல்லும் அட்வைஸ்..

  1. பெண் என்பது பெருமை !

“பெண்ணாய்ப் பிறந்து விட்டோமே” எனும் சுய பச்சாதாபம் பலருக்கும் மன அழுத்தத்தைக் கொண்டு வருவதாக ஒரு ஆய்வு சொல்கிறது. பெண் என்பது பெருமைப்பட வேண்டிய சமாச்சாரம். ஒரு மனிதனிடமிருந்து உயிரை வெளியே எடுத்தால் அவன் பிணமாவான். ஒரு பெண்ணிடமிருந்து உயிரை எடுத்தால் அவள் தாயாகிறாள் !  பெண் மட்டுமே அந்தப் பெருமைக்குரியவள் !

மங்கையராய்ப் பிறப்பதற்கே நல் மாதவம் செய்திடல் வேண்டுமம்மா.. என்றே உளமார நினையுங்கள் அதுவே உண்மை. தேவையற்ற மன அழுத்தங்களை நீங்களாக உருவாக்கிக் கொள்ளவேண்டாம் !

  1. எதிர்பார்ப்புகள் குறையட்டும்

இன்றைக்கு உலகில் இருக்கின்ற நோய்களில் 75 முதல் 90 சதவீதம் நோய்களுக்குக் காரணம் மன அழுத்தம் என மிரட்டுகிறது ஆராய்சி ஒன்று ! இந்த மன அழுத்தத்தைக் குறைக்க ஒரு எளிய வழி எதிர்பார்ப்புகளைக் குறைத்துக் கொள்வது தான்.

அடுத்தவர்களோடு நம்மை ஒப்பீடு செய்யாமல் இருந்தாலே பாதி எதிர்பார்ப்புகள் குறைந்து போகும். டிவி சொல்வதைக் கேட்காமல் பெற்றோர் சொல்வதைக் கேட்டால் தேவையற்ற எதிர்பார்ப்புகள் ஓடியே போய்விடும். “எது இல்லாமல் ஒரு மனிதனால் வாழ முடியுமோ, அது இல்லாமல் வாழ்வதே நல்ல வாழ்க்கை” எனும் தலைவர் மொழிகள் மனதில் இருப்பது நல்லது !

  1. வித்தியாசமான காரணங்கள்.

பொதுவான மன அழுத்தங்களுக்கு பல காரணங்கள் உண்டு. ஏமாற்றம், பயம், நிராகரிப்பு, எரிச்சல், ஓவர் வேலை, கடன்,தேர்வு, உறவு, நட்பு இப்படி இந்தப் பட்டியல் நீண்டு கொண்டே போகும். ஆனால் இது மட்டுமல்ல, சில வித்தியாசமான காரணங்கள் கூட மன அழுத்தம் தரலாம்.

உதாரணமாக, சிலருக்கு சத்தம் அலர்ஜியாக இருக்கும். அதிக சத்தம் கேட்டால் டென்ஷனும் மன அழுத்தமும் வந்து சேர்ந்து விடும். சிலருக்கு வெளிச்சம் மன அழுத்தத்தைத் தருமாம். சிலருக்கு சில வாசனைப் பொருட்கள் மன அழுத்தம் தருகின்றனவாம். மன அழுத்தத்துக்கு என்ன காரணம் என்பதை அறிந்து அதை விலக்குங்கள் !

  1. தவறான பழக்கங்கள்.

பெரிய நிறுவனகளிள் அங்கொன்றும் இங்கொன்றுமாக காண முடிகிறது தம்மடிக்கும் பெண்களை ! மேலை நாடுகளில் சர்வ சாதாரணமான இந்தக் காட்சி தமிழகத்திலும் இப்போது காண முடிவது ஒரு அதிர்ச்சி ! நல்ல விஷயங்களில் முன்னேற்றம் இருப்பதே உண்மையான பெண் முன்னேற்றம்.

நிகோடின் மன அழுத்தத்தை அதிகரிக்கும் என்கின்றன பல ஆய்வு முடிவுகள். அப்படியே போதைப் பழக்கம், தண்ணியடிப்பது போன்ற விஷயங்களெல்லாம் “திரில்” என பழக நினைத்தால் மன அழுத்தமும் வந்து தொற்றிக் கொள்ளும் !

  1. நல்ல விஷயங்களில் மன அழுத்தம்

என்ன கொடுமை சரவணன் இது ? நல்ல விஷயங்களில் கூடவா மன அழுத்தம் வரும் ? என நீங்கள் புலம்புவது கேட்கிறது ! வரும் என்பது தான் பதில் !

குறிப்பாக திருமணம் செய்து கொள்ளப் போகிறீர்கள் என வைத்துக் கொள்ளுங்கள். நல்ல விஷயம் தானே ? பலரும் இந்தக் காலகட்டத்தில் மன அழுத்தமாய் இருப்பார்களாம். ஒரு பதவி உயர்வு கிடைக்கிறது என வைத்துக் கொள்ளுங்கள். அப்போதும் மன அழுத்தம் சிலரை வாட்டுமாம்.

இத்தகைய நேரங்களில் தான் பலருக்கு ஆன்மீகம் கைகொடுக்கிறது. அல்லது பெற்றோர், நல்ல நண்பர்கள், வழிகாட்டிகள், பெரியவர்கள் என நம்பிக்கையானவர்களோடான உரையாடல் கை கொடுக்கும் !

  1. தகராறில்லாத தாம்பத்யம்.

கட்டில் வாழ்க்கை ஆரோக்கியமாக இருந்தால் வீட்டில் வாழ்க்கை அழுத்தமற்றதாக இருக்கும். தாம்பத்யம் தகராறாய் இருந்தாலோ வீட்டில் சமநிலை தடுமாறும். இன்றைய வாழ்க்கை முறை அதிக நேரம் வேலை செய்ய வேண்டிய சூழலை உருவாக்குகிறது. ஆனால் அதற்கு விலையாக தாம்பத்யத்தைக் கொடுத்தால் தம்பதியரை மன அழுத்தம் பிடிக்கும்.

கணவன் மனைவி கட்டில் உறவு ஒரு ஸ்ட்ரெஸ் ரிலீவர் என்கின்றனர் மருத்துவர்கள். எனவே கல்யாணம் ஆகி ரொம்ப நாள் ஆச்சு, வேலை இருக்கு, குழந்தை பொறந்துடுச்சு. அது இது என காரணங்கள் சொல்லாமல் தாம்பத்ய வாழ்க்கையைக் கட்டி எழுப்புங்கள்.

  1. தாய்மையா ? கவனம்.

“புள்ளதாச்சி கிட்டே போயாடா இதையெல்லாம் சொல்லுவே.. போக்கத்த பயலே…” என பல்லில்லாத கிழவிகள் பேசுவதை கிராமங்களில் அடிக்கடிக் கேட்கலாம். தாய்மை நிலையில் இருக்கும் பெண்கள் நல்ல இனிமையான விஷயங்களையே கேட்கவேண்டும் என்பார்கள். காரணம் அவர்களுக்கு மன அழுத்தம் வரக் கூடாது என்பது தான்.

மாயோ கிளினிக்ஸ் என்பவர் அமெரிக்காவிலுள்ள ஒரு குழந்தைகள் நல மருத்துவர். “தாய்மை நிலையில் இருக்கும் பெண்கள் மன அழுத்தமடைந்தால் அது குழந்தைகளையும் நேரடியாகப் பாதிக்கும்” என எச்சரிக்கிறார் அவர். அதனால் தான் கர்ப்பகாலத்தில் பெண்கள் நல்ல இசை, நல்ல நூல்கள், நல்ல கவனிப்பு என மனதை இதமாக்கும் விஷயங்கள் பெற்றுக் கொள்வது அவசியம்.

  1. பாசிடிவ் மனநிலை.

மன அழுத்தம் இரண்டு விதம். ஒன்று நமக்கு வெளியே நடக்கும் விஷயங்களால் நமக்கு வருவது. பெரும்பாலும் நம்முடைய கன்ட்ரோலில் அது இருப்பதில்லை. இன்னொன்று நம்முடைய உள்ளுக்குள்ளே எழுவது. இது முழுக்க முழுக்க நமது கட்டுப்பாட்டில் உண்டு. மனம் நேர் சிந்தனைகளினால் வலுவாக இருந்தால் வெளிப்புற செயல்கள் கூட நம்மை அதிகம் பாதிக்காது !

உதாரணமாக, சாலையில் உள்ள டிராபிக் கூட உங்களுக்கு மன அழுத்தம் தரலாம். ஆனால் உங்கள் மனம் ஓத்துக் கொண்டால் மட்டும் ! தாழ்வு மனப்பான்மையில் உழலாமல், பாசிடிவ் மனநிலையுடன் வாழ்க்கையை எதிர்கொள்பவர்கள் இதை எளிதில் வெற்றி கொள்வார்கள்.

மன அழுத்தத்தைக் காரணிகள் 10 சதவீதமும், நமது மனம் 90 சதவீதமும் நிர்ணயிக்கின்றன என்கிறார் சார்லஸ் ஸ்வின்டால் எனும் நிபுணர். எனவே மனதை வலுவாக்குங்கள்.

  1. மூன்று வகை !

மன அழுத்தம் அதனுடைய தன்மை அளவில் மூன்று வகை. அக்யூட் ஸ்ட்ரெஸ் – என்பது திடீரென நிகழும் ஒரு செயல் உங்களுக்குத் தருகிற மன அழுத்தம். இது பெரும்பாலும் தற்காலிகமானது. “இன்னிக்கு வேலை முடிய ரொம்ப லேட் ஆச்சு” டைப் திடீர் டென்ஷன்கள் இந்த வகை. அது நாளை சரியாகும் ! இந்த வகை அழுத்தம் தொடர்ந்து கொண்டே இருந்தால் அது “எபிசாடிக் அக்யூட் ஸ்ட்ரஸ்” ஆக மாறும். “டெய்லி வேலை முடிய லேட் ஆகுது” என்பது போல !

குரோனிக் ஸ்ட்ரெஸ் என்பது கொஞ்சம் டேஞ்சர் வகை. சின்ன வயசிலேயே வறுமை, பட்ட காலிலேயே படும் போல தொடர் தோல்விகள், வேலையே கிடைக்கல போன்ற வகை இது !. டிராமிக் ஸ்ட்ரஸ் – என்பது ஏதோ ஒரு அதிர்ச்சி தந்த மன அழுத்தம்.

எதுவானாலும், மன அழுத்தம் ஆபத்தானது என்பதை உணருங்கள். !

  1. குழந்தைகளும், மன அழுத்தமும்

குழந்தைகள் உங்களை இமிடேட் செய்யும் ! உங்களுடைய வாழ்க்கை முறையையே குழந்தைகளும் பழகும். உங்கள் வீட்டில் அழுத்தமான சூழலா ? குழந்தையையும் அது பாதிக்கும். உங்கள் வீட்டில் சண்டையா ? குழந்தையின் மனதை அது பாதிக்கும். இப்படி குழந்தையின் மன அழுத்தத்தின் முக்கியக் காரணி நீங்களே !

குழந்தைகளை நண்பர்களாகப் பழகுங்கள். “எப்பவும் நீதான் ஃபஸ்டா வரணும்” என்பது போன்ற முட்டாள் தனமான கட்டளைகளை இடாதீர்கள். தோல்வியும் வெற்றியும் சகஜம் எனும் மனநிலையை குழந்தைகளுக்குள் வளர்த்துங்கள். இரண்டையும் கற்று வளரட்டும் பிள்ளைகள்.

  1. நகைச்சுவை உணர்வு நல்லது.

நல்ல நகைச்சுவை உணர்வு உடையவர்களுக்கு மன அழுத்தம் எளிதில் வருவதில்லை. அவர்கள் வாழ்க்கையை ரொம்பவே இயல்பாக எடுத்துக் கொள்வார்கள். ரொம்ப மூடி டைப் ஆபத்தானது.

சிலர் சொல்வார்கள், “என் பையன் ரொம்ப அமைதி, யார் கூடவும் பேச மாட்டான், தான் உண்டு தன் வேலை உண்டுன்னு இருப்பான். சமத்து ! ” என. அது ஆபத்து ! நண்பர்கள், உறவினர்கள், பெற்றோர் என கலகலப்பாக இருக்கும் பிள்ளைகளுக்கு மன அழுத்தம் வராது. கவனியுங்கள் !

நல்ல காமெடி படம் போட்டாச்சும் கொஞ்ச நேரம் சிரிங்க. மன அழுத்தம் ஓடியே போய்விடும் என்கிறார் மனநல நிபுணர் லீ பெர்க்.

  1. வெயிட்டிங் டைம் நல்லது !

எங்கேயாச்சும் போனா “வெயிட்டிங் டைம்” பலருக்கும் எரிச்சல் தரும் விஷயம். அரை மணி நேரம் வரிசையில் காத்திருக்க வேண்டியிருந்தால் அவர்கள் டென்ஷனாகி மன அழுத்தத்தை கூப்பிடுவார்கள்.

மேலை நாடுகளில் மக்கள் அலட்டிக் கொள்வதில்லை. சட்டென ஒரு புத்தகத்தை எடுத்து வாசிக்க ஆரம்பித்து விடுவார்கள். நீங்களும் அதையே செய்யலாமே ? ஒரு புக் படிக்கலாம், அன்றைய தினத்தைப் பற்றி சிந்திக்கலாம், மூச்சுப் பயிற்சி செய்யலாம், ஆன்மீக வாதிகள் செபம் செய்யலாம் எவ்வளவோ செய்யலாமே ! “கறை நல்லது” மாதிரி, “வெயிட்டிங் டைம் நல்லது” என சொல்லிப் பழகலாமே !

  1. நல்லதையே சிந்தியுங்கள்

சிலருக்கு ஒரு கெட்ட பழக்கம் உண்டு. எப்போதாவது நடந்த ஒரு தப்பைப் பற்றியோ தோல்வியைப் பற்றியோ சிந்தித்துக் கொண்டே இருப்பார்கள். எல்லாவற்றையும் அதிலிருந்தே தொடங்குவார்கள். அதற்கு அப்புறம் எவ்வளவோ நல்ல விஷயங்கள் நடந்திருக்கும் அதையெல்லாம் விட்டு விடுவார்கள்.

அந்த மனநிலை உங்களுக்கு இருந்தால் முதலில் அதைத் தூக்கிப் பரணில் போடுங்கள். “நம்மால் மாற்ற முடியாதவைகளைப் பற்றிச் சிந்திக்கக் கூடாது” என்பது மகிழ்ச்சியின் பாலபாடம். அதை மனதில் கொள்ளுங்கள்.

  1. பிறரை நேசியுங்கள்.

பிறரை மகிழ்ச்சிக்குள்ளாக்கும் ஏதேனும் ஒரு செயலை தினமும் செய்ய முயலுங்கள். அது உங்களை உற்சாகமாக்கும். பிறர் நலப் பணிகள் செய்பவர்களுக்கு மன அழுத்தம் எளிதில் வருவதில்லை. உதவி தேவைப்படுபவர்களுக்கு மனமார உதவி செய்து பாருங்கள். மனம் ரொம்ப பிரஷாகும்.

அதே போல உங்களுக்குப் பிடித்தமான செயல் ஒன்றையேனும் தினமும் செய்யுங்கள். எழுதுவது ஒரு நல்ல பொழுது போக்கு. மன அழுத்தத்தை அகற்றும் ஒரு நல்ல வழி அது. அதையும் நீங்கள் செய்யலாம்.

  1. வார இறுதிகள், வரம்

வார இறுதிகளை குடும்பத்தினரோடு முழுக்க முழுக்க செலவிடுங்கள். வெளியே போய் சாப்பிடுவது, கடற்கரையில் போய் விளையாடுவது என நேரத்தைச் செலவிடுங்கள். வார இறுதிகளில் அலுவலக வேலைகளை விட்டுவிடுங்கள். வேலைகள் உங்களுக்காகக் காத்திருக்கும் என்பதே யதார்த்தம்.

அலுவல் நாட்களின் அழுத்தங்களெல்லாம் வார இறுதிகளில் வடிந்து போனால் அடுத்த வாரம் வேலை செய்ய உற்சாகம் கிடைக்கும் என்பதை நினைவில் கொள்ளுங்கள். !

நல்ல தம்பதியராய் வாழ்வது எப்படி ?

Image result for happy old couple

கணவன் மனைவி உறவு என்பது ஆழமானது. வாழ்க்கையின் அடிப்படை மகிழ்வு கணவன் மனைவி உறவின் ஆரோக்கியத்தில் தான் கட்டியெழுப்பப்படுகிறது என்பதில் ஐயமில்லை. ஆனால் சமீபகாலமாக ஏகப்பட்ட தம்பதியர் மண முறிவு கேட்டு கோர்ட் படியேறுவதை காண்கிறோம். பெரும்பாலான மணமுறிவுகளுக்கான காரணங்களை அலசும்போது வியப்பாக இருக்கிறது. “அடியாத்தீ… இதுக்கெல்லாமா டைவர்ஸ்” என்று பாம்படம் போட்ட பாட்டி கணக்காக நாமும் வியக்க நேரிடுகிறது. “குறட்டை விட்டதற்காக டைவர்ஸ்” எனும் மேலை நாட்டுக் கதைகளெல்லாம் ஒரு காலத்தில் நமக்கு வியப்பின் குறியீடு. இப்போது அதை விட உப்பு சப்பில்லாத காரணத்துக்கெல்லாம் நம் நாட்டில் டைவர்ஸ் நடக்கிறது !

தமிழனாக எதுக்கெல்லாம் பெருமைபடுவது என்பதற்கு அளவே இல்லாமல் போய்விட்டது. இந்தியாவிலேயே அதிக மணமுறிவு எனும் பெருமையும் இப்போது நமது தலையில் ஒரு முள் கிரீடமாய் வந்து அமர்ந்திருக்கிறது.

“இந்த பொண்ணுங்களைப் புரிஞ்சுக்கவே முடியல” எனும் ஆண்களின் புலம்பலும், “இந்தப் பசங்க புரிஞ்சுக்கவே மாட்டேங்கறாங்க” எனும் பெண்களின் புலம்பலும் ஒரு வட்டத்தில் ஓடிக் கொண்டே இருக்கின்றன. ஆண்களிடமும், பெண்களிடமும் தனித்தனியே பேசிப் பாருங்கள். பெரும்பாலும், “நான் வேற என்னத்த எதிர்பாக்கறேன்…” என்று சொல்லி சின்னச் சின்ன விஷயங்களைத் தான் பட்டியலிடுவார்கள்.

அப்படிப்பட்ட புலம்பல்களையும், எதிர்பார்ப்புகளையும், அலசி ஆராய்ந்து வல்லுனர்களும், அனுபவஸ்தர்களும் தரும் குறிப்புகள் இவை ! உறவுகள் வலுப்பட வாழ்த்துகள்.

நேரம் ஒதுக்குங்கள்

“அவருக்கென்ன, ஆபீஸே கதின்னு கட்டிகிட்டு அழுவாரு” என மூக்கால் அழும் மனைவியர் ரொம்ப சாதாரணம். அதே நேரத்தில் பெரும்பாலான ஆண்களின் மனதிலும் அதே போன்ற ஒரு குரல் எழும்பும். “அவளுக்கென்ன, குழந்தை, சீரியல், அது இதுன்னு  அவளோட விருப்பங்கள் தான் எப்போதும்” !  என்பது போன்ற மன ஓசையில் அது கேட்கும்.

தன் இணைக்காகவென தனியே ஸ்பெஷலாக நேரம் ஒதுக்குவது குடும்ப வாழ்க்கையின் அடிப்படை விஷயம். இதில் மாறி மாறி குற்றம் சொல்லிக் கொண்டிருந்தால் தோற்றுப் போவது தாம்பத்யம் தான். அப்படி ஒரு ஸ்பெஷல் நேரம் கிடைப்பதற்காக ஒரு சீரியலை கட் செய்வதோ, ஐ.பி.எல் மேட்சை ஆஃப் பண்ணி வைப்பதோ தாம்பத்யத்தைத் தழைக்க வைக்கும் !

ஒருவருக்கு நேரம் இருக்கும் போது அடுத்த நபர் நேரத்தை கொஞ்சம் அட்ஜஸ்ட் செய்து இணைந்து நேரம் செலவிடப் பழகவேண்டும். அதை விட்டு விட்டு, “நான் பிரியா இருக்கும்போ நீ பிஸியாயிடறே, நான் பிஸியா இருக்கும்போ நீ ஃபிரீ ஆயிடறே” என புலம்புவதிலும் அர்த்தம் இல்லை. இணைந்து அதிக நேரம் செலவிடும் தம்பதியர் வாழ்க்கையில் சிக்கல்கள் வருவதில்லை. வந்தாலும் அவை நீள்வதில்லை.

உங்கள் பெற்றோர், தாத்தா பாட்டிகளிடம் கேட்டுப் பாருங்கள். மாலை வேளைகளில் கூட்டமாய் முற்றத்தில் அமர்ந்து கதையளக்கும் காலங்களை அசை போடுவார்கள். அந்த உரையாடல்கள் தான் அவர்களுடைய குடும்ப வாழ்க்கையை பலப் படுத்திக் கொண்டிருந்தது எனும் உண்மை உணருங்கள் !


மரியாதை மனதில் மட்டுமல்ல !

 

மரியாதை என்றதும் ஏதோ, “ஐயா”, “அம்மா” என்றெல்லாம் அழைக்கச் சொல்வேனென யாரும் டென்ஷன் ஆக வேண்டாம். சொல்ல வரும் விஷயம் வேறு ! பெரும்பாலான தம்பதியர் திருமணம் ஆனதும், கணவனோ, மனைவியோ இவர் நமக்கானவர் தானே எனும் எண்ணத்தில் அலட்சியமாய் இருந்து விடுவதுண்டு. “இவரையெல்லாம் ஸ்பெஷலாய்க் கவனிக்கத் தேவையில்லை” எனும் எண்ணமும் மனதில் எழுவதுண்டு. இந்த சின்ன சிந்தனையே பல வேளைகளில் டைவர்ஸ் வரை போய் கண்ணைக் கசக்கும் !

காதல் திருமணங்கள் தோல்வியில் முடிகிறதெனில் இந்த காரணம் மிக முக்கியமானது ! என தைரியமாய் அடிக்கோடிட்டுக் கொள்ளுங்கள். “இதெல்லாம் மனைவியோட கடமைகள் தானே,” என கணவர்கள் அலட்சியமாய் திரிய வேண்டாம். “இதெல்லாம் கணவன் செய்ய வேண்டிய விஷயங்கள் தான், இதில என்ன ஸ்பெஷன் ?” என மனைவிகள் அலட்சியப் படுத்தவும் வேண்டாம். உங்கள் இணைக்கு ஏற்ற அங்கீகாரங்களைக் கொடுங்கள். செயல்களுக்கான மரியாதையையும் கொடுங்கள்.

உதவிகள் செய்கையில் சொல்கின்ற நன்றியில் ஆனாலும் சரி, பேசுகையில் எழுகின்ற புன்னகையில் ஆனாலும் சரி, முடிவுகளில் கலந்தாலோசிக்கும் மனநிலையிலும் சரி. “உன்னை நான் மதிக்கிறேன். உன்னுடைய பங்களிப்புக்கு நான் மரியாதை செலுத்துகிறேன்” எனும் தொனி எழட்டும் ! அது உங்கள் மணவாழ்க்கையை உற்சாகமாக செயல்பட வைக்கும்.

ரசனையை மதியுங்கள்.

கணவனுக்குப் பிடித்த விஷயங்கள் மனைவிக்குப் பிடித்திருக்க வேண்டுமென்பதில்லை. அதே போல மனைவிக்குப் பிடித்த விஷயங்கள் கணவனுடைய ரசனைக்குரியதாய் இருக்க வேண்டுமென்பதுமில்லை. ஆனால் அடுத்தவர் ரசனைக்கு மரியாதை செலுத்துங்கள். அது ரொம்ப முக்கியம்.

“ஆமாம்.. இவளுக்கு எப்பவும் படம் வரையறதே பொழப்பா போச்சு.” என கிண்டலடிப்பதிலோ. “ஆமா, இவரு ஜிம்முக்கு போய் கும்முன்னு இருந்து என்ன பிரயோசனம். வேற வேலையே இல்லையா ?” என நக்கலடிப்பதிலோ எந்த பயனும் இருக்கப் போவதில்லை.

அடுத்த நபருடைய விருப்பங்களையும் ரசனைகளையும் உற்சாகமாய் ஊக்கப்படுத்துங்கள். ஊனப்படுத்தாதீர்கள். “இந்த வயசுலயும் உனக்கு இப்படி ஒரு கலை தாகம் இருக்கே. சூப்பர், ரொம்ப நல்லா இருக்கு என உற்சாகமூட்டுங்கள்”. வீடுகளில் உற்சாகம் கிடைக்காதவர்கள் கலைஞர்களாகவோ, வெற்றியாளர்களாகவோ மாறுவதில்லை. அப்படியே மாறினாலும் அது அவர்களுக்கு முழு நிறைவைத் தருவதில்லை.

உங்கள் வாழ்க்கைத் துணையின் விருப்பங்களை மதியுங்கள். அவர்களுடைய ரசனைகளை ஊக்கப்படுத்துங்கள். அந்த ரசனைகளை அவர்கள் வளர்த்தெடுக்க, உங்களுடைய நேரத்தையும், உழைப்பையும், ஆதரவையும் கொடுங்கள். குடும்ப உறவு பலப்படும். அதை விட்டுவிட்டு அடுத்தவர்களுடைய ரசனைகளை விமர்சித்துத் திரிந்தால் காயங்கள் மட்டுமே கடைசியில் மிஞ்சும்.

குடும்பம் வேறு, கூட்டுக் குடும்பம் வேறு !

 

உங்கள் குடும்பம் என்பது நீங்களும், உங்கள் வாழ்க்கைத் துணையும், குழந்தைகளும் தான். மற்ற அனைவரும் உங்கள் குடும்பம் எனும் உள் வட்டத்துக்கு வெளியே வரையப்பட்டிருக்கும் வட்டங்கள் தான். எனவே உங்களுடைய முதல் கவனமும், முன்னுரிமையும் உங்கள் குடும்பத்தைக் கட்டியெழுப்புவதில் இருக்கட்டும். அதுவே குடும்ப உறவை வலுப்படுத்தும்.

“எங்க அம்மா சொன்னாங்க”, “ உங்க அம்மா முகத்தை திருப்பிக் கிட்டாங்க” என்றெல்லாம் உப்பு சப்பில்லாத காரணங்களுக்காக வாக்குவாதங்கள் செய்தால், அவை மனதுக்குள் போய் சம்மணமிட்டு அமர்ந்து கொள்ளும். அதன் பின் யார் பெரியவர், யாருக்கு அதிக பவர், யாரை மதிப்பது, யாரை தாக்குவது என்றெல்லாம் சிந்தனைகள் தாறுமாறாய் ஓடும்.

பிறரை மதிப்பதும், நேசிப்பதும் மனிதனுக்கே இருக்க வேண்டிய இயல்புகள். அதே நேரத்தில் தனது குடும்பத்தை நல்வழியில் கட்டியெழுப்புவதே கணவன் மனைவியின் முதன்மைப் பணி என்பதில் எந்த விதமான சமரசமும் வேண்டாம். எனவே உங்கள் குழந்தைகளுக்கு ஒரு நல்ல முன்மாதிரிகையான தம்பதியராய் வாழ்வதில் ஆர்வம் காட்டுங்கள்.

ஒன்றை நினைவில் கொள்ளுங்கள். குழந்தைகள் எப்போதுமே தங்கள் பெற்றோர் என்ன செய்கிறார்களோ அதையே கவனித்து பின்பற்றும். நீங்கள் “உங்கம்மா, எங்கம்மா” என சண்டை போட்டால் அதையே குழந்தைகளும் கற்றுக் கொண்டு உங்களுக்கு ஷாக் டிரீட்மென்ட் தரும் !

தனியே, தன்னந்தனியே !

திருமணமாகி ஒரு குழந்தை பிறந்து விட்டால் அப்புறம் குழந்தை அம்மாவின் கையில் ஒரு பச்சை போல குத்தப்பட்டுவிடுவது இயல்பு. அப்புறம் குழந்தை இல்லாமல் தம்பதியரை எங்கேயும் வெளியே பார்க்கவே முடியாது ! அது தப்பு என்கின்றனர் வல்லுனர்கள்.

கணவன் மனைவி உறவு வலுப்பட அவ்வப்போது தனியே தன்னந்தனியே வெளியே போய் வாருங்கள் என்கின்றனர். தனியே மனைவியை அழைத்துக் கொண்டு பீச்சில் போய் சுண்டல் வாங்குவது, குறைந்த பட்சம் காற்று வாங்குவது, ஒரு ஹோட்டலுக்குப் போய் ரிலாக்ஸாக அமர்ந்து எதையாச்சும் சாப்பிட்டுக் கொண்டே “கடலை” போடுவது என தனிப்பட்ட பிரியமான நிமிடங்கள் அவசியம்.

ஜோடியாகப் போய் சினிமா பார்ப்பதைத் தவிர்ப்பது நல்லது. அது ஒரு வகையில் வீட்டிலிருந்து சீரியல் பார்ப்பது போலத் தான். நீங்கள் போய் உட்கார்ந்து கொட்டக் கொட்ட சினிமா திரையை வெறித்துக் கொண்டே இருப்பீர்கள். அதற்குப் பதிலாக பார்க், பீச், காட்சியகங்கள் போன்ற இடங்களுக்கு போகலாம். அது உங்கள் துணை மீது தனிக்கவனம் செலுத்த உதவும்.

குழந்தைகளை ஒரு நாள் அம்மா அப்பாவிடமோ, உறவினர்களிடமோ விட்டு விட்டு ஒரு ரொமான்டிக் டவுண்ட் அப் செய்யுங்கள். உங்களுடைய காதலை மீட்டெடுக்கும் தருணங்கள் மிகவும் அவசியமானவை. உறவு பலப்படவும், காதல் ஆழமடையவும், குடும்ப வாழ்க்கை உறுதிப்படவும் இத்தகைய ரம்மியமான தனிமைப் பொழுதுகள் நல்லவை.  அதற்கான சூழலை உருவாக்கிக் கொள்ளுங்கள் !

இனிய ஆச்சரியங்கள் அவசியம் !

கல்யாணத்துக்கு முன்னாடி காதலர்கள் ரொம்பவே கிரியேட்டிவ் மனசோட இருப்பாங்க. “எதைக் கொடுத்து ஆளைக் கவுக்கலாம்”, “என்ன பரிசு கொடுத்து அசத்தலாம்” என்ற நினைப்பிலேயே அவர்களுடைய பெரும்பாலான பொழுது ஓடியே போய்விடும். “நம்ம ஆளு இருமிய நாள் இது” என சர்வ தினங்களையும், மணிகளையும், ஏன் நிமிடங்களையும் கூட நெஞ்சுக்குள் கல்வெட்டாய் செதுக்கி வைப்பார்கள்.

திருமணம் முடிந்துவிட்டால் எல்லாம் பரணில் போடப்படும். பிறந்த நாளே மறந்த நாளாகிப் போகும். “முன்னாடியெல்லாம் நம்மாளுக்கு நம்ம மேல கரிசனை அதிகம். இப்பல்லாம் நாம முக்கியமில்லாம போயிட்டோம்” என கணவனும், மனைவியும் கவலை கொள்ள இது ஒரு முக்கியமான காரணம் !

அதற்கு என்ன செய்யவேண்டுமென கேட்டால், ‘பிறந்த நாள், திருமண நாள் இவற்றையெல்லாம் நினைவில் வைத்து பரிசு கொடுக்க வேண்டும், வாழ்த்து சொல்ல வேண்டும்’ என நீங்கள் சொன்னால் நீங்கள் சாதாரண தம்பதி !

அதை விட ஒரு படி மேலே போய், உங்க ஆள் நினைக்காத நேரத்தில் ஏதேனும் வாங்கிக் கொடுத்து அசத்த வேண்டும். “கடைக்குப் போனேன், இந்த கம்மல் பார்த்தேன். உனக்கு சூப்பரா இருக்கும்ன்னு தோணிச்சு, சட்டுன்னு வாங்கிட்டேன்”. “இந்த வாட்ச் உங்க கைக்கு நல்லா இருக்கும்னு தோணிச்சு, அதான் வாங்கிட்டு வந்தேன்” என்று அவ்வப்போது ஒரு இனிய ஆச்சரியம் கொடுத்துப் பாருங்கள். உங்கள் திருமண வாழ்க்கை முறுக்குக் கம்பிகளை விட இறுக்கமானதாய் மாறிவிடும்.

இனிய ஆச்சரியங்களை காஸ்ட்லி பரிசுகள் மூலம் தான் கொடுக்க வேண்டுமென்பதில்லை. அவ்வப்போது ஒரு நன்றி சொல்வது, ஒரு சாக்லேட் வாங்கிக் கொடுப்பது, ஒரு பூ வாங்கிக் கொடுப்பது என எந்த விதத்திலும் இருக்கலாம் என்பதை நினைவில் கொள்ளுங்கள்.

கை கொடுக்கும் கை

மனைவிகளுக்கு உரிய மிகப்பெரிய குற்றச்சாட்டுகளில் ஒன்று, “வீட்ல எதையுமே செய்ய மாட்டேங்கறாரு” என்பது. கணவர்களோ, “சொல்ற எல்லா வேலையும் செய்றோமில்ல” என்பார்கள். “இதெல்லாம் சொல்லாமலேயே செய்யணும்” என பதில் பாட்டு வரும். இந்த உரையாடல் இப்படியே நீண்டு, ஒரு சின்ன சண்டையாகி, “இனிமே நீ சொல்றதையும் செய்யப்போறதில்லை” என ஈகோ இடித்து நிற்கும் !

இதை ரொம்ப சிம்பிளாகக் கையாளலாம். மனதில் இருக்கும் வேறு ஏதோ ஒரு எரிச்சலை பரஸ்பரம் எறிந்து விளையாடுவதை முதலில் நிறுத்த வேண்டும். “ இதைச் செய்யுங்கள் “  என ஒரு வேலையைக் கொடுப்பதில் ஒன்றும் குறைந்து போவதில்லை. அப்படியே ஒரு வேலை உங்கள் கண் முன்னால் கிடந்தால் அதை தானாகவே முன்வந்து செய்வதிலும் தப்பேதும் இல்லை.

இப்படி இரண்டு பேருமே வேலைகளைப் பகிர்ந்து கொள்ளும் போது அன்பு தழைக்கும். “ஏதாச்சும் வேலையிருக்கா” என்று கேட்டால், “எவ்ளோ இருக்கு, தேடிப் புடிச்சு செய்யுங்க” என்று சொல்லி எரிச்சலூட்டாமல் ஒரு சக நண்பனைப் போல பழகுங்கள். வேலைகளைப் பகிர்ந்து கொள்ளுங்கள்.

தனது மனைவி தனது பணிகளில் உதவுகிறாள் என்பதில் கணவன் மிகவும் புளகாங்கிதம் அடைவான். தனது கணவன் தனக்கு ஒத்தாசை செய்கிறார் என்பதில் மனைவிகள் ரொம்பவே பெருமிதம் அடைவார்கள்.

அப்புறமென்ன, கை கொடுக்கும் கையாய் இணைந்து செயல்படுங்கள். குடும்ப வாழ்க்கை ஆலமரம் கணக்கா செழித்து வளரும் !

செவிமடுங்கள் !

பேசுவது எல்லோருக்கும் ரொம்பப் பிடித்தமான விஷயம். பால்ய கால கதைகள் முதல், நேற்றைக்கு சீரியலில் நடந்த விஷயம் வரை அலசிக் காயப் போடுவதில் அப்படி ஒரு அலாதி இன்பம். ரொம்ப நல்லது ! பேசுவது மன அழுத்தத்தை ரொம்பவே குறைக்கும் என்கின்றனர் வல்லுனர்கள்.

நியூட்டனின் மூன்றாம் விதி தெரியும் தானே ? “எல்லா விசைக்கும் சமமான எதிர் விசை ஒன்று உண்டு”. அப்படி இருந்தால் தான் ஒரு சமநிலை கிடைக்கும். நீங்கள் எப்போதும் பேசிக்கொண்டே இருந்தால் அந்த சமநிலை பாதிக்கப்படும். பேசுவதும் கேட்பதும் கலந்த மனநிலையே நமக்கு அழகு ! எனவே கேளுங்கள்.

உங்கள் வாழ்க்கைத் துணைக்கு உங்களிடம் சொல்ல ஏராளம் கதைகள் இருக்கும். அன்றைய தினம் நடந்த நிகழ்ச்சிகளையோ, சோகங்களையோ, மகிழ்வுகளையோ எதையேனும் சொன்னால் கேளுங்கள். உன்னிப்பாகக் கேளுங்கள். சும்மா டிவி பார்த்துக்கொண்டோ, செய்தித் தாள் வாசித்துக் கொண்டோ, செல்போன் நோண்டிக்கொண்டோ கேட்பது போல பாவனை செய்ய வேண்டாம்.

பேசுவதை ஆத்மார்த்தமாய்க் கேட்பது, தம்பதியரிடையே இருக்க வேண்டிய மிக முக்கியமான பண்பு. சொன்னால் நம்புங்கள் ! உங்கள் வாழ்க்கையில் இறுக்கத்தை இந்த ஒரு சின்ன விஷயம் அதிகரிக்கும் என்பது சர்வ நிச்சயம் !

தவறு, தவறு தான் !

பெரும்பாலான சிக்கல்களுக்குக் காரணம் தவறுகளை நியாயப்படுத்த முயல்வது தான். செய்தது தவறு தான் என்று அப்பட்டமாய் தெரிந்தால் கூட அந்தச் செயலுக்கு ஒரு அட்டகாசமான காரணம் இருப்பதைப் போல ஜோடிக்க முயல்வது உறவை பலவீனப்படுத்தும்.

“ஆமா, அது தப்பு தான்.. சாரி” என சொல்வதற்கு பலருக்கும் வாய் வருவதில்லை. காரணம் ஈகோ. இல்லையென்று சொல்பவர்கள் கொஞ்சம் ரீவைன்ட் செய்து ‘எப்போது நீங்கள் செய்த ஒரு தவறை ஒப்புக் கொண்டீர்கள்’ என்று யோசித்துப் பாருங்கள். அப்போது புரியும். இப்போது கூட ‘நான் தப்பே செய்யாதவன்’ என நீங்கள் நினைத்தால் நீங்கள் ஈகோவின் உச்சத்தில் இருக்கிறீர்கள் என்று அர்த்தம்

தவறு செய்யாத மனிதர்கள் இல்லை. மேலதிகாரியிடம் செய்யாத தப்புக்கெல்லாம் மன்னிப்புக் கேட்கக் கூச்சப்படாத நாம் வீட்டில் மட்டும் செய்த தப்புக்கே மன்னிப்புக் கேட்க உலக மகா தயக்கம் காட்டுவோம் இல்லையா ?

இயல்பாய் இருங்கள். தவறு செய்தால் அதைத் தவறு என ஒத்துக் கொள்ளுங்கள். சிலர் தவறே செய்யாவிட்டால் கூட,”சரி பரவாயில்லை இது என்னோட தப்பு தான்” என இன்னும் ஒரு படி மேலே போய் தாழ்மையாய் இருப்பார்கள். அத்தகையவர்களுடைய வாழ்க்கை சூப்பர் ஸ்ட்ராங் ஆக இருக்கும் என்பதில் ஐயமில்லை.

எனவே தப்பை ஒத்துக் கொள்வதில் இம்மியளவும் தயக்கம் வேண்டாம். உங்கள் வாழ்க்கைத் துணையிடம் தானே தவறை ஒத்துக் கொள்கிறீர்கள் ! சந்தோசத்துல பெரிய சந்தோசம் அடுத்தவங்களைச் சந்தோசப் படுத்திப் பார்ப்பது தானே !

பெருமை பேசுவது நல்லது.

இந்த விஷயத்தில் பெண்கள் சூப்பர் ஸ்டார்கள் தான். எப்போதுமே தனது கணவனை பொது இடத்தில் விட்டுக் கொடுக்க மாட்டார்கள். வீட்டில் என்ன தான் போர்க்களம் நடந்தாலும் மற்றவர்களிடம் பேசும்போது கணவன் ஒரு சூப்பர் சாது போல சொல்லி சந்தோசப்படுவார்கள்.

இப்படி தம்பதியர் மாறி மாறி தங்கள் துணையைப் பற்றி நல்லதாகப் பேசும் போது மனதிலும் நல்ல சிந்தனைகள் வளரும். உயர்வுகளும், தாழ்வுகளும் கலந்தே வருவது தான் வாழ்க்கை. அந்த நிலையில் ஒருவரை ஒருவர் தாங்கிப் பிடிக்கும் மனநிலை ஆரோக்கியமானது. ஒருவருடைய பலங்களைப் பற்றி அதிகம் சிந்திப்பதும், அதை கௌரவப் படுத்துவமும் குடும்ப உறவை ஆரோக்கியமாக்கும்.

பலவீனங்களையும், பலங்களையும் கூட்டிக் குழைத்த ஒரு கூட்டாஞ்சோறு தான் வாழ்க்கை.  உங்கள் துணையின் பலத்தை நீங்கள் பெருமையாய் பாருங்கள். அவருடைய பலவீனங்களைப் பற்றி பிறருடன் பேசவே பேசாதீர்கள். பலவீனங்களை பலங்களாக மாற்ற உங்கள் துணைக்கு உதவுங்கள்.

உங்கள் வாழ்க்கைத் துணையின் பலவீனங்களைப் பட்டியலிடத் துவங்கினால் குடும்ப வாழ்க்கை தோல்வியடையும். பெரும்பாலான தவறான உறவுகளுக்கு இத்தகைய மனநிலையே காரணம். எனவே எச்சரிக்கையாய் இருங்கள்.

எந்தச் சூழலிலும் உங்கள் துணை தாழ்வு மனப்பான்மையோ, அவமானமோ ஏற்பட வழி வகுக்காதீர்கள். அது உங்கள் அன்னியோன்யத்தையே அழித்து விடும்.

தீர்ப்பிடாதீர்கள் !

தம்பதியர் செய்யும் மிகப்பெரிய தவறுகளில் ஒன்று தீர்ப்பிடுவது. “உன்னைப் பத்தி எனக்குத் தெரியாதா ? நீ எப்பவுமே அப்படித்தான்” என்பது ஒரு உதாரண வாக்கியம். நீ இப்படித்தான் என்று ஒரு நபரை சொல்வது அந்த நபரை ஊனமாக்கும். ஒருவேளை அந்த திட்டுக்குத் தகுதியில்லாதவர் எனில் அது இரட்டைப் பாதிப்பை உருவாக்கும்.   எல்லோரும் மன திடத்துடன் இத்தகைய விமர்சனங்களை ஏற்றுக் கொள்வதில்லை. எனவே கவனம் தேவை.

எப்போதோ ஒரு தடவை நடந்த தவறை குத்திக் காட்டிக் கொண்டே இருப்பது சிலருக்கு ஒரு சுவாரஸ்யமான அனுபவம். இது ஒரு வகையில் ஒரு மனநோய் என்கின்றனர் உளவியலார். பிறரை காயப்படுத்துவதன் மூலமாக தனது மனசுக்கு மகிழ்ச்சி உருவாக்கிக் கொள்ளும் சேடிஸ்ட் மனநிலையின் வடிவம் இது. இந்த பழக்கம் யாருக்காவது இருந்தால் மூட்டை கட்டி கண்காணாத தேசத்தில் எறிந்து விட்டு அடுத்த வேலையைப் பாருங்கள். இது ரொம்ப டேஞ்சர்.

தவறுகள் நடப்பதும், சண்டைகள் நடப்பதும் இயல்பு. அப்படி நடக்காவிட்டால் தான் ஏதோ பிரச்சினை என்று அர்த்தம். எனவே சின்னச் சின்ன சண்டைகளுக்காக கவலைப்படாதீர்கள். அவற்றை வைத்துக் கொண்டு அடுத்தவரை தீர்ப்பிட்டு ஆறாக் காயத்தை உண்டுபண்ணாதீர்கள். அது உங்களுடைய குடும்ப வாழ்க்கையை ரொம்பவே பலவீனப்படுத்தி விடும்.

விட்டுக் கொடுத்தல்

கொஞ்சம் பழைய காலத்துத் தம்பதியரை சந்தியுங்கள். உங்கள் ஊர் தாத்தா பாட்டியிடம் போய் குடும்ப வாழ்க்கையைப் பற்றி அவ்வப்போது பேசுங்கள். அவர்கள் வாழ்க்கையின் ரகசியங்களைச் சொல்வார்கள். அப்படிச் சொல்லும் விஷயங்களில் நிச்சயமாய் “விட்டுக் கொடுத்தல்” இருக்கும்.

விட்டுக் கொடுத்தல் நீண்டகால குடும்ப வாழ்க்கைக்கு ரொம்ப அவசியம். அதே நேரத்தில் விட்டுக் கொடுத்தலை விருப்பத்துடனும், மகிழ்வுடனும் செய்யவேண்டும். “உனக்காக நான் விட்டுக் கொடுக்கிறேன்” என்று சொல்வது விட்டுக் கொடுத்தலின் அர்த்தத்தையே அழித்து விடும்.

சிலர் விட்டுக் கொடுத்தலை தியாகம் போல செய்வார்கள். அது அவர்களுடைய தலையில் ஒரு கர்வக் கிரீடத்தைச் சூட்டும்., அது தவறு என்பதை நான் சொல்லத் தேவையில்லை. விட்டுக் கொடுத்தல் இயல்பாக நடக்க வேண்டும். ஒரு பிரச்சினையை சுமூகமாகத் தீர்ப்பதிலோ, அடுத்த நபருடைய தன்மானத்தைக் காக்கும் நிலையிலோ எப்படி வேண்டுமானால் அது நிகழலாம்.

எனவே விட்டுக் கொடுத்தல் பழகுங்கள். அது தான் குடும்பத்தின் அன்பையும், கண்ணியத்தையும் கட்டிக் காக்கும். நீண்டகால உறுதியான பந்தத்துக்கும் உத்தரவாதம் நல்கும்.

நோயில் உடனிருத்தல்

நோய்கள் விரும்பத் தகாதவை. ஆனால், உங்களுடைய ஆழமான அன்பைப் பகிர்ந்து கொள்ளக் கிடைக்கும் வாய்ப்புகளாக அவற்றைக் கருதலாம். தீயதிலும் ஒரு நன்மை உண்டு என்று சொல்வதைப் போல ! இத்தகைய தருணங்களில் உங்களுடைய அன்பான கவனிப்பில் உங்கள் துணையின் மனதை வலிமைப்படுத்துங்கள்.

“உடம்பு சரியில்லாம இருந்தப்போ தாங்க என்னோட மனைவியைப் பற்றித் தெரிஞ்சுகிட்டேன்” அல்லது “எனக்கு உடம்பு சரியில்லேன்னதும் லீவ் போட்டு வீட்லயே இருந்து கவனிச்சுகிட்டாரு” என்பன போன்ற உரையாடல்கள் உங்கள் காதலின் ஆழத்தை சொல்லிச் செல்பவை.

உடல் பலவீனமாய் இருந்தாலும் சரி, மன பலவீனமாய் இருந்தாலும் சரி, அந்த சூழலில் உங்கள் வாழ்க்கைத் துணையின் கரம்பற்றி அவர்களுக்கு பணிவிடை செய்யுங்கள். காதலுடன் கவனிப்பதைப் போல அன்பின் ஆழத்தைப் பறைசாற்றும் விஷயங்கள் அதிகம் இல்லை.

எக்காரணம் கொண்டும் நோயாகவோ, பலவீனமாகவோ இருக்கும் போது உங்கள் துணை தனிமையில் வாடும்படி செய்யாதீர்கள். அது அவர்களுடைய மனதைப் புண்படுத்தும். உங்களுடைய குடும்ப வாழ்க்கையையும் பலவீனப்படுத்தும்.

சின்னச் சின்ன விஷயங்களின் கூட்டுத் தொகையே அன்பான வாழ்க்கை. அது பெரிய பெரிய நிகவுகளினால் கட்டியெழுப்பப் படுவதாய் பலரும் நினைத்து விடுகிறார்கள். சின்னச் சின்ன உடல் பலவீனங்களில் கூட உங்களுடைய அன்பையும் கவனிப்பையும் வெளிப்படுத்துங்கள். அது உங்கள் குடும்ப வாழ்க்கையை பலப்படுத்தும்.

தாம்பத்யம் தழைக்கட்டும்

காதலிக்கும் போது காதலர்கள் கரங்கள் இரண்டையும் சேர்த்து காங்கிரீட் போட்டது போல இணை பிரியாமலேயே இருப்பார்கள். கண நேரம் கையை விட வேண்டுமென்றால் கூட அவர்களுக்கு உலக மகா கஷ்டமாய் தோன்றும். சின்னச் சின்ன சில்மிஷங்களில் மனம் சிறகு கட்டிப் பறக்கும்.

அப்படியே திருமணம் நடந்த பிறகும் அந்த உறவு நீடிக்கும். ஹனிமூன் கால சிலிர்ப்புகளும், சந்தோசங்களும் நாளாக நாளாக கொஞ்சம் கொஞ்சமாக குறையத் துவங்கும். அதற்குப் பிறகு கணவன் மனைவியரிடையே சில்மிஷங்களும், சிலிர்ப்புகளும் இடைவெளி விட்டே தொடரும்.

இன்னும் சில ஆண்டுகளுக்குப் பிறகு, குழந்தைகள் பிறந்த பின் அந்த இடைவெளி ஏகப்பட்ட தூரமாகிவிடும். காதலிக்கும் போது இருந்த சிலிர்ப்புகளெல்லாம் காணாமல் போயிருக்கும். படுக்கையறையில் பெரும்பாலும் குறட்டைகளே நிரம்பி வழியும்.

குடும்ப உறவு பலமடைய வேண்டுமெனில், படுக்கையறை பந்தம் ஆரோக்கியமாய் வளர வேண்டும். படுக்கையறை பலமாய் இருக்க, படுக்கையறைக்கு வெளியே தம்பதியரிடம் அன்பும், நிம்மதியும், மகிழ்வும் நிரம்ப வேண்டும். “இனிமே இதெல்லாம் எதுக்கு..” என ஒதுங்கும் மனப்பான்மைகள் கள்ளத் தொடர்புகளுக்கு அழைப்பு விடுக்கும்.

எனவே படுக்கையறை உறவைப் பலப்படுத்துங்கள், அது குடும்ப வாழ்க்கைக்கு ரொம்ப அவசியம்.

சந்தேகம் வேண்டாம்

தம்பதியரிடையே எது வந்தாலும் வராவிட்டாலும் சந்தேகம் மட்டும் வரவே கூடாது ! சந்தேகமே இல்லாமல் இதுதான் வேர்களில் விழும் விஷம் ! ஒரு சின்ன நெருப்புப் புள்ளியாய் விழும் விஷயம் தான் சந்தேகம். அந்த சந்தேகத்துக்கான காரணிகளை முதலில் கண்டறிந்து அதை விலக்க வேண்டியது ரொம்ப அவசியம்.

மனம் திறந்த உரையாடல்கள் சந்தேகத்தை விலக்கும். அதிலும் குறிப்பாக அலுவல் தொடர்பான நண்பர்கள், தோழிகள் போன்றவர்களை தம்பதியர் இருவருமே நன்கு அறிந்து வைத்திருப்பது நல்லது. அது சந்தேகங்களை கொஞ்சம் விலக்க உதவலாம். ஒருவருக்கு சந்தேகம் வருவது போல தோன்றினால் உடனே காச் மூச் என கத்தாமல் நிதானமாய் விளக்க முயலவேண்டும். அதுவே சிறந்த வழி.

“ஆமா ஊர்ல எல்லாருக்கும் அஞ்சுமணிக்கு வேலை முடியுது, இவருக்கு மட்டும் ஒன்பது மணிக்கா” என உசுப்பேத்தி விடும் பெருசுகளையோ, பக்கத்து வீட்டு விஷமிகளையோ தூர ஒதுக்க வேண்டியது முதல் வேலை ! “ஏதோ விஷயம் இருக்கு ..” என ஊகித்துக் கொன்டு துப்பறியும் சாம்புவாக நீங்கள் மாறாமல் இருக்க வேண்டியது இரண்டாவது வேலை.

சந்தேகம் வந்து விட்டால் உங்கள் உரையாடலை அதிகப்படுத்துங்கள். அடுத்த நபருடைய மனநிலையை புரிந்து கொள்ள முயலுங்கள். பதட்டப்படாதீர்கள் ! பொறுமையும், அன்பும் இத்தகைய சூழலில் மிகவும் அவசியம்.

“காமலைக்காரனுக்கு கண்டதெல்லாம் மஞ்சள்” ங்கற பழமொழி எதுல உண்மையோ இல்லையோ, இங்கே சர்வ சத்தியம். சந்தேகத்தோட பார்க்கும்போ செல்போன் சிணுங்கினா கூட சந்தேகம் வரும். சந்தேகத்தை மனதில் வைத்துக் கொண்டிருந்தால் அன்பு பாதிக்கப்படும். உறவு பலவீனப்படும். பிறகு அதற்கும் காரணம் ஏதோ ஒன்று என சந்தேகப்பட ஆரம்பித்து விடுவீர்கள் !

நன்றியும், பாராட்டும் ! 

நம்ம ஊரில் மருந்துக்குக் கூட கிடைக்காத விஷயங்கள் இந்த நன்றியும், பாராட்டும். அதுவும் குடும்பத்துக்கு உள்ளே இவையெல்லாம் பரிமாறப்படுமா என்றால் அது குறிஞ்சிப் பூ போல ரொம்பவே அபூர்வம் என்பதை ஒத்துக் கொண்டு தான் ஆகவேண்டும். “வீட்ல இருக்கிறவங்களுக்கு எதுக்கு நன்றி சொல்லணும் ?” என்று சிலர் வெளிப்படையாகவே பேசுவதும் உண்டு.

இன்னும் சிலர் “சந்திரனுக்கு ராக்கெட் விட்டா மட்டும் தான் பாராட்டுவேன்” கணக்கா ரொம்ப பிகு பண்ணுவார்கள். ‘இதுக்கெல்லாம் எதுக்கு பாராட்டணும். இது அவ வேல தானே’ என முணுமுணுப்பார்கள். மனசே ரிலாக்ஸ் பிளீஸ் ! பாராட்டு என்பது மலையைத் தூக்கிட்டு வந்தா மட்டுமே குடுக்க வேண்டிய சமாச்சாரமல்ல ! அப்படின்னா அனுமாரை மட்டும் தான் நீங்க பாராட்ட முடியும். ஒரு சின்ன வேலையை அழகாகச் செய்தாலே பாராட்டலாம் !

வீடு சுத்தமாய் இருந்தால், சமையல் நடந்தால், தோட்டத்துக்கு தண்ணி ஊற்றினால், கூட மாட ஒத்தாசை செய்தால் என எந்த விஷயத்துக்கு வேண்டுமானாலும் நீங்கள் நன்றிகளையும் பாராட்டையும் கொடுக்கலாம். ஒருபணியைச் செய்தாலே நீங்கள் நன்றி சொல்லலாம். காரணம், குடும்பத்தில் நடக்கும் எல்லா செயல்களிலும் ஒரு அன்பும் கரிசனையும் நிச்சயம் இருக்கும்.

சின்னச் சின்ன விஷயங்களுக்கு நன்றியும், பாராட்டும் சொல்லும் போது தம்பதியரிடையே அன்னியோன்யமும், அன்பும் அதிகரிக்கும். இருவருக்கும் இடையே நல்ல புரிதலும் வளரும்.

இணைந்தே முடிவெடுங்கள்.

கணவன் மனைவியிடையே இறுக்கம் அதிகரிக்க வேண்டுமா ? ஒரு எளிய வழி இது. எல்லா விஷயங்களையும் நீங்கள் இருவரும் சேர்ந்தே முடிவெடுங்கள். ஒரு வீடு வாங்குவது போன்ற பெரிய விஷயம் ஆனாலும் சரி, ஒரு செடி வாங்குவது போன்ற சின்ன விஷயமாய் இருந்தாலும் சரி. இருவருமாக கொஞ்சம் பேசி முடிவெடுத்தால் ரொம்பவே அன்னியோன்யம் வளரும்.

நாம் மதிக்கப்படுகிறோம், நமது ஐடியாக்கள் வரவேற்கப்படுகின்றன என்பது உளவியல் ரீதியாக மனதைத் தெம்பாக்கும் ! இரண்டாவது, எல்லா விஷயங்களிலும் பங்களிப்பு இருக்கும் போது மனம் அதில் ரொம்ப அதிகமாக ஈடுபாடு காட்டும்.

“இந்த விஷயங்களையெல்லாம் பொம்பளைங்க கிட்டே கேக்கக் கூடாது. நாமளா முடிவெடுத்துடணும்” எனும் முனகல்களை கணவர்கள் ஒத்தி வையுங்கள். “ அவருக்கு இந்த விஷயங்களெல்லாம் தெரியாது” எனும் டயலாக்களை மனைவிகள் கொஞ்சம் ஒத்தி வையுங்கள். எந்த முடிவையும் இருவரும் சேர்ந்து இணைந்தே எடுங்கள்.

இணைந்து முடிவெடுப்பதில் உரையாடலும், விட்டுக் கொடுத்தலும், ஆரோக்கியமான விவாதங்களும் எல்லாம் கலந்திருக்கும். விஷயங்களை அலசும் போது தனிப்பட்ட விமர்சனங்கள், தாக்குதல்கள் எல்லாம் கூடவே கூடாது ! அப்புறம் ‘உள்ளதும் போச்சுடா நொள்ளக்கண்ணா’ என புலம்ப வேண்டி வரலாம் !

அடுத்த நபராய் மாறி சிந்தியுங்கள்

கரண்ட் கட் இல்லாத வீடு கூட இருக்கலாம். ஆனா சண்டை இல்லாத வீடு இருக்கவே இருக்காது. ஆனா அந்த சண்டை எவ்ளோ நேரம் நீளுது, எவ்ளோ சீக்கிரம் முடிவுக்கு வருது என்பதை வைத்துத் தான் குடும்பத்தோட வெற்றி நிர்ணயிக்கப்படும்.

சூரியன் அணைவதுக்கு முன்னாடி உங்க கோபங்கள் எல்லாம் அணைந்து போச்சுன்னு வெச்சுக்கோங்க, உங்க குடும்பம் அக்மார்க் அட்டகாசம். அதே சண்டை, கோபம், எரிச்சலோட தூங்கறீங்கன்னா கொஞ்சம் கஷ்டம். மறுநாளும் அதே எரிச்சலோட எழுந்தீங்கன்னா ரொம்பவே கஷ்டம். எனவே சண்டை போடுங்க, ஆனா எவ்ளோ சீக்கிரம் அதை சமரசப் புள்ளியில் இணைத்து சகஜமாக முடியுமோ அதைப் பண்ணுங்கள்.

அதுக்கு ஒரு சிம்பிள் டெக்னிக் இருக்கிறது. எந்த ஒரு சண்டையிலும், விவாதத்திலும் நீங்கள் அடுத்த நபராய் மாறி சிந்திக்க வேண்டும். “அறிவே கிடையாதா உனக்கு” என்று நீங்கள் உங்கள் கணவரைத் திட்டறீங்க என வைத்துக் கொள்ளுங்கள். அந்த வார்த்தை ஒரு சண்டைக்கான முதல் புள்ளியாய் இருக்கலாம். ஒருவேளை இதே வார்த்தையை உங்கள் கணவர் உங்களிடம் சொன்னால் உங்கள் மனநிலை எப்படி இருக்கும் என நினைத்துப் பாருங்கள். “சே.. அப்டி சொல்லியிருக்கக் கூடாது” என உள்மனம் சொல்லும்.

இப்படி  ஒவ்வோர் நிகழ்விலும், ஒவ்வோர் சந்தர்ப்பத்திலும், ஒவ்வோர் விவாதத்திலும் நீங்கள் அடுத்த நபராய் மாறி சிந்தியுங்கள். “எங்க அம்மாவுக்கு போன் பண்ணும்போ அவர் திட்டினா எப்படி இருக்கும் ?”, “என் பிரண்ட் கிட்டே பேசும்போ மனைவி திட்னா எப்படி இருக்கும் ?” என்ற சிந்தனைகள் நிச்சயம் உங்களைப் பக்குவப் படுத்தும்.

இப்படிச் சிந்திப்பதில் இரண்டு நன்மைகள் உண்டு. ஒன்று நீங்கள் திட்டுவதையும், சண்டை போடுவதையும் குறைப்பீர்கள். இரண்டாவது, மன்னிப்புக் கேட்கும் மனதை உருவாக்கிக் கொள்வீர்கள்.

 தொட்டதுக்கெல்லாம் குறையா ?

சிலர் தொட்டதுக்கெல்லாம் குறை சொல்லிக் கொண்டே இருப்பார்கள். நின்னா குற்றம், நடந்தா குற்றம், பேசினா குற்றம் என நச்சரிக்கும் தம்பதியரின் குடும்ப வாழ்க்கை ஒரு நரகம் என்பதில் சந்தேகமே இல்லை. வெளியே சிரித்து ஆனந்தமாய் இருந்தாலும் அந்த கணவனோ மனைவியோ உள்ளுக்குள் மன உளைச்சலிலேயே இருப்பார்கள்.

அப்புறம் தும்மினா கூட, “ஐயோ இது அவருக்குப் பிடிக்குமோ பிடிக்காதோ ? திட்டுவாரோ கத்துவாரோ” என மனதுக்குள் கேள்விகள் ஓடும். எந்த செயலைச் செய்தாலும், “ஐயோ பொண்டாட்டி கத்துவாளோ” எனும் குரல் கணவனுக்குள் ஓடும். இந்த சிந்தனைகள் இருந்தால் இயல்பாக இருக்கவே முடியாது. எப்படா ஆள் வீட்ல இல்லாம இருக்கும், கொஞ்சம் ரிலாக்ஸா இருக்கலாம் என்று தான் மனம் சொல்லும்.

சின்னச் சின்ன விஷயங்களைப் பெரிது படுத்தாமல் இணைந்து செயல்படுவதே ஆரோக்கியமான விஷயம். “கொஞ்சம் செடிக்கு தண்ணி ஊத்தறீங்களா ? ” என்று சொல்வதும் “வீட்ல ஒரு வேலையும் செய்றதேயில்ல, செடிக்கு தண்ணியாவது ஊத்தலாம்ல… வெட்டியா இருக்கிறதுக்கு… எல்லாத்தையும் நானே செய்யணும்ன்னா எப்படி ?” என நீளமான வெடிப்பதும் ஒரே விஷயத்தைத் தான் சொல்கின்றன. ஆனால் இரண்டுக்கும் மலைக்கும் மடுவுக்குமான வித்தியாசம்.

முதலாவது வாக்கியம் மகிழ்வுடன் வேலையைச் செய்ய வைக்கும். இரண்டாவது வாக்கியம் எரிச்சலுடன் வேலையைச் செய்ய வைக்கும். வேலை நடக்கும் ஆனால் அன்னியோன்யம் அகலப்படும். எனவே உங்களுடைய வார்த்தைகளைக் கவனியுங்கள். குறை சொல்லாமல் இருப்பதற்கும், உங்கள் வாக்கியங்களில் கனிவு கலப்பதற்கும் நெருங்கிய தொடர்பு உண்டு.

மனித நேயம் பழகுங்கள்.

குடும்ப வாழ்க்கை என்பது வெறுமனே நான்கு சுவர்களுக்குள் முடிந்து போகும் விஷயமல்ல. குடும்பங்களில் விதைக்கப்படும் செயல்கள் சமூகத்தில் அறுவடையாகும். சமூகத்தோடு ஒத்து வாழாத குடும்பங்கள் வலிமையான குடும்பமாக வளர்வதில்லை. சமூக வீதியில் மக்களோடு நாம் எப்படிப் பழகுகிறோம் என்பதை வைத்தே ஒரு குடும்பத்தின் பெருமை நிலைநாட்டப்படும்.

மனித நேயம் மனதில் நிரம்பி இருக்கும் மக்களுக்கு சமூகத்தோடு வாழ்தல் மிகவும் எளிதாகிவிடுகிறது. சமூகம் என்பது நம்மைச் சுற்றிய மக்களின் கூட்டுத் தொகை தானே ! பக்கத்து நபர்களுக்கு நம்மால் ஆன உதவிகளைச் செய்வது, வேலைக்காரர்களையும் நம்மைப் போன்ற மனிதர்களாய் மதிப்பது, ஏழைகளின் வயிற்றில் அடிக்காமல் இருப்பது போன்ற அடிப்படை விஷயங்களில் நமது மனித நேயம் வெளிப்படும்.

“அவளோட மேக்கப்பைப் பாத்தாலே தெரியல, அவ ஆள் புடிக்கத் தாண்டி போறா என்பன போன்ற பிறருடைய பெயரைக் காயப்படுத்தும் உரையாடல்களை அடிக்கடி கேட்கலாம். இந்த புறணி, பிறர் விமர்சனம், கிசுகிசு, பொல்லாங்கு போன்றவையெல்லாம் சமூக உறவுகளை உடைக்கும் காரணிகள். நல்ல விஷயங்களையே பேசுங்கள். முதலில் உங்களை கிண்டலடிப்பார்கள், பிறகு கொஞ்சமாய் தங்களையே அவர்கள் மாற்றிக் கொள்வார்கள். நீங்கள் மனித நேயம் மிக்கவராய் இருப்பதைப் பார்க்கும் உங்கள் பக்கத்து நண்பர்களும் அதே போல மாறினால் அது ஒரு சமூக மாற்றத்துக்கான ஆனந்த அறிகுறிதான்.

நீங்கள் எப்படியோ அப்படியே உங்கள் பிள்ளைகளும் அப்படித் தான் வளரும். எனவே உங்கள் எதிர்கால சந்ததியை மனித நேயம் மிக்கவர்களாக வளர்க்க வேண்டுமெனில்  நீங்கள் முதலில் மனித நேயம் மிக்கவர்களாய் இருக்க வேண்டும் என்பதை நினைவில் கொள்ளுங்கள் !

வேலை

Image result for Job searching

 

உழைப்பைக் கழித்தால்
வாழ்க்கை
வடிகட்டியில்
எதுவும் மிஞ்சுவதில்லை.

வாழ்வா சாவா
போராட்டத்தில் மட்டுமே
உயிரைக் கொடுத்து
உழைத்தல் நியாயமில்லை.
வாசலைப் பெருக்குவதிலும்
உன்
திறமையைத் தெரிவி.

விளையாட்டைக் கூட
அலுவலாய் பாவித்தல்
விலக்கி விடு,
அலுவலைக் கூட
விளையாட்டுபோலப் பாவித்தலே
அவசியமானது.

பணி பல்லக்கல்ல
படுத்துத் துயில,
அது தேர்
அதை நீ தான் இழுக்க வேண்டும்.
இழு.

வியர்வை
உடலின் புன்னகை.
தவறாமல் புன்னகை செய்.

பல்கலைக் கழகங்கள்
வேலைக்கான ஒத்திகை மேடைகளல்ல
அவை
தானியங்கி மனிதர்களைத்
தயாரிக்கும்
தயாரிப்பு நிலையம்.

வாசக சாலைக்கும்
வாகன சாலைக்கும் இடையே
பதறாமல் நடக்க
பாதங்களைப் பழக்குமிடம்.

எனவே,
கல்லூரியின் வழியனுப்பல் கதவு
அலுவலக
வரவேற்பறையில்
முடிதல் சாத்தியமில்லை.
கவலை துற.

ஆயுள்கால
அடிமை எண்ணங்களை
உழைப்பு
நிரந்தர வெளியேற்றம் செய்கிறது.
உழை.

செரிக்க மறுக்கும்
உணவைப்போல,
சில பணிகள்
தொண்டைக் குழிக்குள் திணறும்.

வேப்பங்காய் வைத்தியமாய்
சில
உள்நாக்கில் கசக்கும்.

ஆனாலும்,
மனது மட்டும் மனது வைத்தால்
அறுசுவையில் ஒன்றே
கசப்பென்பது புரியும்.

பணி,
பணிவையும் கூடவே
வளர்க்க வேண்டும்.
யாரோ சொல்லக் கேட்டதுண்டு.
“கீழ்ப்படி”,
பிறகே மேல்படி.

வேலை தேடும்
நண்பர்களே,
கவலை வேண்டாம்.
வேலையிலேயே கடினமான வேலை,
வேலை தேடும் வேலை தான்.

மேக்கப் விபரீதம் : அகத்தின் அழகை, முகத்தில் அணிவோம்

Image result for makeup

ஆறே வாரத்தில் சிவப்பழகு ! சிவப்பாய் இருப்பதே அழகு !! என்பதெல்லாம் பெண்களுக்கு எதிராய் வியாபாரிகள் விரிக்கின்ற வசீகர வலைகள். இந்த வஞ்சக வலைகளில் அறிந்தும், அறியாமலும் விழுந்து தத்தளிப்பவர்கள் ஏராளமானோர். ஒரு விதத்தில் சிலந்தி வலையில் சிக்கிக் கொள்ளும் சின்ன ஈயாய் அவர்களுடைய வாழ்க்கை பிடிக்கப்பட்டு விடுகிறது.

அழகின் இலக்கணம் பெண்கள் தான். அவர்களுடைய அழகு அவர்களுடைய செயல்களில், அவர்களுடைய அன்பின், அவர்களுடைய நடவடிக்கைகளில் வெளிப்படுகிறது. அதனால் தான் உலக அளவில் பெண்மையைப் போற்றுவது போல யாரும் ஆண்மையைப் போற்றுவதில்லை !

இயல்பிலேயே அழகாய் இருப்பதால் அவர்களுக்கு அழகுணர்ச்சியும் ரொம்ப அதிகம். எதையும் அழகாய்ச் செய்ய ஆசைப்படுவார்கள். ஒரு மொபைல் கவர் வாங்கினால் கூட ஓரத்தில் ஒரு ஸ்டிக்கர் ஒட்டி ஸ்டைலாக்க முயல்வார்கள். இது பெண்கள் சிறுமியராய் இருக்கும்போதே தொடங்கிவிடுகிறது.

ஒரு இளம்பெண்ணின் பையை திறந்து பார்த்தால் அதில் ஒரு மினி அழகுசாதன நிலையமே இருக்கும். ஐபுரோ, ஐ ஷேடோ, ஐ லேஷல், ஐ லைனிங் இப்படி கண்ணுக்கு மட்டுமே ஏகப்பட்ட பொருட்களை வைத்திருப்பார்கள். பெரும்பாலும் விளம்பர உலகின் மாயாஜால பேச்சுகளிலோ, உடன் பழகும் மற்ற பெண்களின் தாக்கத்திலோ விளைந்தவையாய் இருக்கும்.

உளவியல் சொல்லும் ஒரு விஷயத்தை கவனிக்க வேண்டும். “அதிக மேக்கப் போடுவது, தன்னம்பிக்கை இன்மையின் வெளிப்பாடு” என்கிறது அது ! தாழ்வு மனப்பான்மையில் இருந்து வெளியே வர பெண்கள் கையிலெடுக்கும் ஆயுதங்களில் ஒன்றே மேக்கப் என்கின்றது உளவியல். சரி, உளவியல் எதையோ சொல்கிறது என விட்டு விடலாம், ஆனால் உடலியல் என்ன சொல்கிறது தெரியுமா ? அழகுப் பொருட்கள் ஆபத்தானவை !! மிக மிக ஆபத்தானவை !!

இந்த மேக்கப் பொருட்களில் இருக்கும் வேதியல் பொருட்களையும் அமிலப் பொருட்களையும் பட்டியலிட்டுப் பார்த்தால் ஏதோ ஒரு கெமிஸ்ட்ரி லேபில் நுழைந்த‌ ஒரு உணர்வு வருகிறது. அந்த அளவுக்கு எதிலும் அமிலங்கள், அமிலங்கள். இந்த அமிலங்கள் அலர்ஜி முதல் கேன்சர் வரை உருவாக்கும் என்பது தான் பலருக்கும் தெரியாத அதிர்ச்சிச் செய்தி. எல்லாவற்றுக்கும் மேலே, மேக்கப் பொருட்களில் இருக்கும் சில கெமிக்கல்ஸ் பெண்களோட பெண்மைத் தன்மைக்கே கேடு விளைவிக்கும் என்கின்றன ஆய்வுகள்.

இத்தனை ஆபத்தான பொருட்கள் எப்படி சந்தைக்கு வருகின்றன ? எப்படி மக்களை ஏமாற்றுகின்றன ? அரசியல் ரீதியாகச் சொல்லவேண்டுமெனில் ஊழல் எனலாம். சட்ட ரீதியாகச் சொல்ல வேண்டுமெனில் மேக்கப் பொருட்களுக்கு கடுமையான தரக் கட்டுப்பாடு விதிகள், அமைப்புகள் ஏதும் இல்லை என சொல்லலாம்.

உணவுப் பொருளுக்கு இருப்பது போல சரியான தர நிர்ணய அமைப்பு இருந்தால் நிறைய சிக்கல்கள் தீர்ந்து போய் விடும். ஒரு சின்ன உதாரணம் சொல்ல வேண்டுமெனில்,” ஐரோப்பிய யூனியன்ஸ் காஸ்மெடிக் டைரக்டிவ்” அமைப்பு ஆரம்பித்த பின், யூ.கே யில் தரமான மேக்கப் பொருட்கள் மட்டுமே விற்பனைக்கு வருகின்றன என்பதைச் சொல்லலாம்! விஷத் தன்மை எவ்வளவு இருக்கிறது என்பதைப் பார்த்த பிறகே அங்கு அனுமதி வழங்கப்படுகிறது.

அமெரிக்காவில் லிப்ஸ்டிக்கை சோதனை செய்து பார்த்தார்கள். சொன்னா; நம்ப மாட்டீர்கள் 61 சதவீதம் லிப்ஸ்டிக் விஷத்தன்மையோடு இருந்தது. அதிலும் 30 சதவீதம் உதட்டுச் சாயங்களில் மிக அதிக அளவு விஷத்தன்மை இருந்தது. அவையெல்லாம் அமெரிக்காவில் தடை செய்யப்பட்டன.

தினமும் லிப்ஸ்டிக் போடும் பழக்கமுடைய ஒரு பெண் தன்னோட வாழ்நாளில் தன்னை அறியாமலேயே சுமார் நாலரை கிலோ அளவுக்கு லிப்ஸ்டிக்கை சாப்பிடுகிறாராம். இது மனச் சிதைவு, கருச் சிதைவு, சிறுநீரகக் கோளாறு, பெண்மைத் தன்மை இழப்பு இப்படி ஏகப்பட்ட சிக்கல்களை உருவாக்கலாம் என்று எச்சரிக்கிறார் அமெரிக்க ஆராய்ச்சியாளர் பீட்டர் டிங்கில்.

மேலை நாடுகளில் இப்படி. நம்ம ஊரில் ? திருவிழா பொட்டிக் கடை முதல், ரங்கநாதன் தட்டு கடை வரை எங்கும் மலிவு விலை பொருட்கள். பவுடர், பாடி ஸ்ப்ரே, லிப்ஸ்டிக், ஐ புரோ, ஹெயர் ஸ்ப்ரே, டியோடரண்ட், ஷாம்பூ, ஷவர் ஜெல், ஹேண்ட் வாஷ் என எல்லாமே ரொம்ப மலிவான விலைல கிடைக்கும். அந்த மலிவு விலைக்குக் காரணம் அதில் இருக்கும் பொருட்கள் தரமற்ற ஆபத்தான பொருட்கள் என்பது தான். ! இங்கேயெல்லாம் ரொம்ப கட்டுப்பாடான தர நிர்ணயத்தை எதிர்பாக்க முடியாது. சோ, நாம தான் விழிப்பா இருக்கணும்.

மேலை நாடுகளிலெல்லாம் நிராகரிக்கப்படும் விஷத்தன்மையுடைய அழகுசாதனப் பொருட்கள் குறிவைப்பது வளர்ந்து வரும் நாடுகளான இந்தியா போன்ற பெரிய வர்த்தகத் தளங்களைத் தான். சட்டத்தை வளைப்பதோ, புழக்கடை வழியாக வியாபார ஒப்பந்தங்கள் நடப்பதோ இத்தகைய வளரும் அல்லது பிந்தந்திங்கிய நாடுகளில் மிக எளிது. உதாரணமாக, ஸ்வீடன் நாட்டில் தடைசெய்யப்பட்ட பார்மால்டிஹைட் நம்ம ஊர் ஷாம்பூ, ஹேண்ட் வாஷ் எல்லாவற்றிலும் சர்வ சுதந்திரமாய் உலவுவதைச் சொல்லலாம். இது தலைவலிக்கும், அலர்ஜிக்கும் கேரண்டி தரக் கூடிய பொருள்.

பாரபீன்ஸ் மற்றும் பாத்தலேட்ஸ் என்பவை விஷத்தன்மையுடைய இரண்டு பொருட்கள். இவை நமது வாசனைப் பொருட்கள், டியூட்ரன்ட் போன்றவற்றில் அதிகம் உண்டு. இதைத் தொடர்ந்து சுவாசிப்பது உயிருக்கே ஆபத்தானது. இந்தப் பொருட்களை பயன்படுத்தும் மக்களுடைய உடலில் இந்த விஷத் தன்மை இருக்கும். 20 க்கும் 40 வயதுக்கும் இடைப்பட்ட பெண்களின் உடலில் பாரபீன்ஸ் நிறைய இருக்குமாம். இவை ஹார்மோன்களையே சேதப்படுத்திவிடும். அப்படியே மார்பகப் புற்று நோய்க்கும் இதற்கும் நெருங்கியத் தொடர்பு உண்டு என்பது திகில் செய்தி.

இன்றைக்கு சந்தையில் கிடைக்கும் அனைத்து பிரபல டியோடரண்ட்களிலும் புரோப்பலீன் கிளைகோள் எனும் கெமிகல் உண்டு. இது தோலை நாசமாக்கி, இரத்ததில விஷத் தன்மையைக் கலக்கும். கூடவே மூளை, லிவர், சிறுநீரகம் போன்றவற்றுக்கெல்லாம் பாதிப்புகளை உருவாக்கும்.இது மவுத்வாஷ், மற்றும் பற்பசைகளில் கூட உண்டு என்பது பயமுறுத்தும் உண்மை.

சோடியம் லாரில் சல்பேட், சோடியம் லாரத் சல்பேட் இப்படி இரண்டு கெமிகல்ஸ் நுரை தரும் பல மேக்கப் பொருட்கள்ல உண்டு. உதாரணமா ஷாம்பூ, சோப்பு, ஷவர் ஜெல். இது கண்பார்வைக்கு மிகப்பெரிய அச்சுறுத்தல் ! இதே மாதிரி எத்தனோலமின் எனும் வேதியல் பொருளும் இந்த மாதிரி பொருட்களில் உண்டு. இது கிட்னி, லிவர் இரண்டுக்கும் எதிரி. ஐசோபுரோபைல் ஆல்கஹால் ங்கர ஒரு கெமிகல் மன அழுத்தத்தைக் கூட கொண்டு வரும்.

இப்போது ஆயுர்வேதிக், இயற்கை மூலிகைத் தயாரிப்பு, ஆர்கானிக் என்றெல்லாம் முகமூடி போட்டுக்கொண்டு வருகின்ற பொருட்களை கண்ணை மூடிக்கொண்டு நம்பாதீர்கள். எல்லாவற்றிலும் விஷத்தன்மை உண்டு.

வெயில் காலம் வந்தால் உடனே மாயிஸ்ட்ரைஸர் வாங்கிக் கொள்கிறோம். உடலில் அதைத் தேய்த்தால் புற ஊதாக்கதிர்களின் தாக்கத்திலிருந்து பாதுகாக்கலாம் என்றும், உடல் எப்போதும் ஈரப்பதத்துடன் வறட்சியடையாமல் இளமையாய் இருக்கும் எனவும் நம்புகிறோம். உண்மை என்னவெனில் இத்தகைய மாயிஸ்ட்ரைசர்களில் பாரஃபீன்ஸ், மினரல் ஆயில், டிட்டர்ஜன்ட் போன்றவை உண்டு. இவை தோலுக்குள் சென்று தோலை சேதப்படுத்தும் அபாயம் உண்டு. சும்மா வெயிலில் போனால் வைட்டமின் டி ஆவது கிடைக்கும். அது உடலுக்கு ரொம்ப நல்லதும் கூட !

இறைவன் படைப்பில் அனைத்துமே அழகு தான். ரோஜாவுக்கு ஒரு அழகு என்றால், முல்லைக்கு இன்னொரு அழகு, சாமந்திக்கு வேறொரு அழகு. ஒவ்வொரு அழகுமே இறைவனின் படைப்பின் மகத்துவம் தான். இறைவன் தருகின்ற உடலை அப்படியே ஏற்றுக் கொள்வதில் இருக்கிறது பெண்மையின் பலமும், பெண்மையின் தன்னம்பிக்கையும். அப்படி ஏற்றுக் கொள்ளாமல் செய்யும் ஒவ்வொரு செயலுமே ஆபத்து தான். முடியை நேராக்குவோம் என‌ ஹெயர் ஸ்ட்ரெயிட்டனிங் பண்ணுவது கூட பார்மால்டிஹைட் உடலில் நுழையக் காரணமாகி கேன்சரைக் கூட கொண்டு வரும்.

இத்தகைய ஆபத்துகள் குழந்தைப் பொருட்களைக் கூட விட்டு வைப்பதில்லை. குழந்தைகளுக்குப் பயன்படுத்தும் எண்ணை பெரும்பாலும் மினரல் ஆயில் என்கின்றது புள்ளி விவரம் ஒன்று. இந்த மினரல் எண்ணை உடலின் மேல் ஒரு மெல்லிய மெழுகுப் படலத்தை ஏற்படுத்தி தோலின் இயல்புத் தன்மையைப் பாதிக்கிறது. இதை அதிக அளவு பயன்படுத்தும் போது உடல் தனது இயல்பான பணிகளைச் செய்ய முடியாமலும், உடலின் நச்சுத் தன்மையை வியர்வை மூலம் வெளியேற்ற முடியாமலும் சோர்வுறுகிறது. முகப்பூச்சு பயன்படுத்துவது கூட கெடுதலானது எனவும், குறிப்பாக குழந்தைகள் முகப்பூச்சுத் துகள்களை சுவாசிக்க நேர்வதனால் ஆஸ்த்மா போன்ற பல பிரச்சனைகள் வர காரணமாகிறது எனவும் மருத்துவர்கள் தெரிவிக்கின்றனர்.

பதின் வயதுப் பிள்ளைகள், பள்ளிப் பிள்ளைகளுக்கு நகங்களில் கலர் கலராக டிசைன் வரைவது ஃபேஷன். முன்பெல்லாம் ஒரே நிறத்தைப் பூசுவார்கள். இப்போது ஒரே நகத்தில் நான்கைந்து நிறங்களைப் பூசிக் கொள்வது வழக்கம். இந்த நகப்பூச்சுகளில் அசிடோன் இருந்தால் நகத்தை வலுவிழக்கச் செய்யும். தொடர்ந்து அடிக்கும் நிறத்தில் நகப்பூச்சுகள் பூசுவது நகத்தின் வசீகரத்தையும், வலிமையையும் அழித்து விடும் என்பது அதிர்ச்சிகரமான உண்மை.

விளம்பரம் சொல்கின்ற வரையறைகள் தான் அழகு என நம்பும் போது நாம் ஆபத்தை விலை கொடுத்து வாங்குகிறோம். நாம் எப்படி இருக்க வேண்டும் என்பதை ஏன் அவர்கள் நிர்ணயிக்க வேண்டும் ? நாம் கருப்பாய் இருப்பது அழகல்ல என ஏன் அவர்கள் நம்மை கிண்டலடிக்க வேண்டும் ? அதை ஏன் பெண்கள் அப்படியே ஏற்றுக் கொண்டு அவர்களுடைய கல்லாவில் பணத்தைக் கொண்டு கொட்ட வேண்டும் ? சிந்திக்க வேண்டிய விஷயமல்லவா ?

இப்படி அழகு சாதனப் பொருட்களை தொடர்ந்து பயன்படுத்துவது ஒரு வித அடிமை மனநிலைக்குள் நம்மைத் தள்ளி விடுகிறது. பின்னர் அந்த அழகு சாதனப் பொருள் இல்லாமல் ஒரு முழுமை தோன்றுவதேயில்லை. எந்த அழகு சாதன ஷாம்பூக்களும் இல்லாத காலத்தில் நமது பாட்டிமார் நூறு வயதிலும் கருகரு கூந்தலோடு வலம் வந்தனர். இன்றைக்கு பதின் வயது தாண்டியதும் வெண்நரையுடன் தானே உலவுகின்றனர் ? அப்புறம் அதை மாற்ற கூந்தலுக்கு கலர் அடிக்கிறோம். அந்த டையில் பி‍‍.பெனிலைன்டையாமின் இருக்கிறது. அது எக்கச்சக்க பிரச்சினைகளை உடலுக்குக் கொண்டு வருகிறது.

அழகு என்பது என்பது வெளியில் இல்லை ! மனதில் இருக்கிறது. என்னைக் கேட்டால் உலகிலேயே அழகான பெண் அன்னை தெரசா என்பேன். சுருக்கம் நிறைந்த உடல். கூனல் விழுந்த தோற்றம். ஆனால் அவருடைய வார்த்தைகள் ஒவ்வொன்றும் அன்பில் வார்த்தெடுத்தவை. அவருடைய செயல்கள் ஒவ்வொன்றும் கருணையில் குளிப்பாட்டியவை. அவை அன்னையை அழகாக்கிக் காட்டுகின்றன.

“என் அம்மா அழகாயில்லை” என சொல்கின்ற ஏதேனும் ஒரு குழந்தையைக் காட்ட முடியுமா ? அம்மா காட்டுகின்ற அன்பில் தான் குழந்தை அழகின் அர்த்தத்தை அறிந்து கொள்கிறது. அம்மா பூசும் முகப்பூச்சில் அல்ல‌. அதனால் தான் உலகிலேயே ரொம்ப அழகு என் அம்மா தான் என குழந்தைகள் குதூகலித்துச் சொல்லும்.

தாய்மைக்காலத்தில் அழகு சாதனப் பொருட்களை பயன்படுத்தவே பயன்படுத்தாதீர்கள் என மருத்துவர்கள் வலியுறுத்துகின்றனர். டாக்டர் என்ஜெல்மேன் எழுதிய கட்டுரையொன்றில் ஏகப்பட்ட அழகுசாதனப் பொருட்களை பட்டியலிட்டு அவற்றைத் தவிர்க்க வேண்டுமென தாய்மை நிலையிலுள்ள பெண்களைக் கேட்டுக்கொண்டிருக்கிறார். இது கடந்த ஆண்டு உலகின் பிரபல பத்திரிகையான வோக் இதழில் வந்து பரபரப்பைக் கிளப்பியது.

நாம் என்ன நிறத்தில் இருக்க வேண்டும், எந்த எடையில் இருக்க வேண்டும், எந்த உயரத்தில் இருக்க வேண்டும் என்பதை அடுத்த வீட்டு நபர் சொன்னால் எரிச்சலடைகிறோம். அதே விஷயத்தை வரவேற்பறையில் இருக்கும் தொலைக்காட்சி சொன்னால் ஒத்துக் கொள்கிறோம். அதுவும், பிடித்த நடிகரோ நடிகையோ சொன்னால் அவ்வளவு தான். அமெரிக்காவில், லண்டனில் என்று பீலா விட்டால் போயே போச்சு. இதெல்லாம் தேவையா என ஒரு சுய பரிசோதனை செய்து கொள்வோம்.

அமெரிக்காவில் பெண்கள் ஆண்டுக்கு சுமார் 35 மில்லியன் டாலர்களை செலவிட்டு உடலைக் குறைக்கும் முயற்சிகளில் ஈடுபடுகின்றனர். கடைசியில் பலர் அனரோக்ஸா எனும் நோய்க்குள் விழுந்து உயிரையும் இழக்கின்றனர். நம்மை நாமே ஏற்றுக் கொள்ள வேண்டும். நம்மை நாமே ஏற்றுக் கொள்ளாவிட்டால் பிறகு எப்படி அடுத்தவர்கள் ஏற்றுக் கொள்வார்கள் ?

பெண்கள் வெறும் போகப் பொருட்கள். அவர்கள் பிறருடைய கண்களுக்கு வனப்பான உடலோடு வலம் வரவேண்டும் எனும் மனநிலையை விளம்பர உலகம் வலிந்து திணிக்கிறது. அதை பெண்கள் நிராகரிக்க வேண்டும். பெண்கள் இன்று சமூகத்தின் அத்தனை உயரிய இருக்கைகளிலும் கம்பீரமாய் அமர்ந்திருக்கின்றனர். தொழில் நுட்ப உலகம் பெண்களை வியந்து பார்க்கிறது. அழகைக் காட்டி வசீகரிக்க வேண்டிய அவசியம் இன்று இல்லை, அறிவை நீட்டி உலகை வியக்க வைக்கலாம்.

எனவே புற அழகை புறந்தள்ளி, அக அழகை அணிந்து கொள்வோம். அந்த அகத்தின் அழகு முகத்தை அழகாக்கும். அகத்தின் அன்பு முகத்தை எழிலாக்கும். அகத்தின் குணம் முகத்தை வசீகரமாக்கும். அந்த அழகே நிரந்தரம். அதுவே உயர் தரம்.

*

ஐடி நிறுவனங்கள் : இன்றைய நிலமையும், மீளும் வழிகளும்

Image result for IT companies

1990களில் புற்றீசல் போல புறப்பட்டு, படிப்படியாய் வளர்ச்சியடைந்து பிரமிப்பூட்டும் வகையில் நிமிர்ந்து நின்ற ஐடி துறை சமீப காலமாக சரிவைச் சந்தித்து வருகிறது. இந்தச் சரிவு பெரும் சரிவாகி ஐடி நிறுவனங்களை முழுமையாய் அழித்து விடுமோ எனும் அச்சம் மாணவர்களிடையேயும், ஐடி ஊழியர்களிடையேயும் நிலவுகிறது.

அவர்களுடைய அச்சத்துக்குக் காரணம் இல்லாமல் இல்லை. முன்னணி நிறுவனம் ஒன்று 9 ஆயிரம் பேரை வேலையை விட்டு நீக்கப் போவதாகச் சொன்னது. இன்னொரு நிறுவனம் 14 ஆயிரம் பேர்களை வேலையை விட்டுத் தூக்கப் போவதாய் அறிவித்தது. உண்மையில் இந்த நிறுவனங்கள் வெளியேற்றப் போகும் ஊழியர்களின் எண்ணிக்கை பல மடங்கு அதிகம் என உள் வட்டாரங்களில் பேசப்படுகிறது.

இதனால் ஐடி நிறுவனங்களில் வேலை செய்யும் ஊழியர்கள் தங்களுடைய வேலை எந்த நேரத்திலும் பறி போய்விடலாம் எனும் பதட்டத்தில் உள்ளனர். படித்துக் கொண்டிருக்கும் மாணவர்களும், படித்து முடித்து ஐடி கனவுகளோடு திரியும் மாணவர்களும் பெரும் குழப்பத்தில் உள்ளனர்.

ஏன் இந்த நிலமை ? உண்மையிலேயே ஐடி துறை வீழ்ச்சியடைகிறதா ? இந்த சூழலில் நாம் என்ன செய்ய வேண்டும் ?

ஐடி நிறுவனங்கள் மிகப்பெரிய சவாலைச் சந்தித்திருப்பது உண்மை தான். அதில் மாற்றுக் கருத்து இல்லை. சில பல ஆண்டுகளுக்கு முன்பு இருந்தது போல பசுமையான சூழல் இப்போது ஐடி துறையில் இல்லை.

“டாப் லைன்” என நிறுவனங்கள் பெயரிட்டு அழைக்கும் “நிறுவன‌ வருமானம்” சமீபகாலமாக‌ ஐடி நிறுவனங்களில் அதிகரிப்பதில்லை. முன்பெல்லாம் ஆண்டு தோறும் 10 முதல் 30 சதவீதம் வரை வளர்ச்சியை வெகு சாதாரணமாக நிறுவனங்கள் அடைந்து வந்தன. இதனால் ஊழியர்களுக்கு சம்பள உயர்வு, அவர்களுடைய பணி உயர்வு போன்றவை தொடர்ந்து நீடித்துக் கொண்டே இருந்தன.

இப்போது அந்த “டாப் லைன்” அதிகரிப்பது குதிரைக்கொம்பாகி விட்டது. மிகக்கடுமையான போட்டி அதன் முக்கிய காரணம். இந்தியா முன்பு இருந்ததைப் போல “அவுட்சோர்சிங்” பணிகளுக்கான ஆதிக்க நிலமாய் இப்போது இல்லை. மெக்சிகோ, சிலி, அர்ஜென்டீனா, பங்களா தேஷ், வியட்னாம், சீனா என பல நாடுகள் இந்த அவுட்சோர்சிங் பணியில் மல்லுக்கட்டுகின்றன. இதனால் இந்திய நிறுவனங்களின் வருமானத்தை அதிகரிப்பது மாபெரும் சவாலாய் இருக்கிறது.

அதிகரிக்காமல் இருந்தாலும் பரவாயில்லை, இருப்பது அப்படியே நீடித்தால் கூட நன்றாக இருக்கும். ஆனால் அதுவும் நிச்சயமில்லை. போட்டிகளும், அடுத்தவர் பிஸினஸை தன் பக்கம் இழுக்க நினைக்கும் தொழில் தந்திரங்களும் ஆண்டு தோறும் நிறுவனங்களை அலட்டிக் கொண்டே இருக்கின்றன. இருப்பதைத் தக்க வைத்துக் கொள்வதே மாபெரும் சவாலாய் மாறியிருக்கிறது.

இந்த சூழலில் நிறுவனங்கள் கவனம் செலுத்துவது, “பாட்டம் லைன்” எனப்படும் நிகர லாபத்தை. வருமானம் அதிகரிக்காமல் எப்படி லாபத்தை அதிகரிப்பது. அதற்கு ஒரே வழி “செலவுகளைக் குறைப்பது”. ஐடி நிறுவனங்களைப் பொறுத்தவரை செலவுகளைக் குறைக்க மிக எளிய வழி, ஆட்களைக் குறைப்பது தான் ! இது இந்த ஆள் குறைப்புகளுக்கான‌ ஒரு காரணம்.

இரண்டாவது காரணம், தொழில் நுட்ப வளர்ச்சி. தொழில் நுட்பத்தில் ஏற்பட்டுள்ள மாற்றங்கள்.

ஐந்து ஆறு ஆண்டுகளுக்கு முந்தைய தொழில்நுட்பமே இன்றைக்கு பழசாகிப் போச்சு எனுமளவில் தான் ஐடி துறையின் அசுர வளர்ச்சி இருக்கிறது. இன்றைக்கு எல்லாமே “ஆட்டோமேஷன்” பிரிவுக்குள் தீவிரமாய் நுழைந்து விட்டன‌. பத்து பேர் தேவைப்பட்ட வேலைக்கு, ஆட்டோமேஷன் நுட்பம் தெரிந்த ஒன்றோ இரண்டோ நபர்கள் போதும் என்பதே நிலமை !

கூட்டிக் கழித்துப் பார்த்து லாபம் எதுவோ அதைச் செய்வது தான் ஐடி நிறுவனங்களின் திட்டம். லாபம் இல்லையென்றால் அது யாராய் இருந்தாலும் அவர்களுக்கு குட்பை சொல்லி அனுப்பி வைக்க நிறுவனங்கள் தயங்குவதில்லை !

உதாரணமாக, துணி துவைக்க மாதம் ஐயாயிரம் ரூபாய்க்கு ஒரு வேலையாளை நியமிப்பதா ? நாற்பதாயிரம் ரூபாய் கொடுத்து ஒரு மெஷின் வாங்குவதா ? மெஷின் வாங்கினால் எட்டு மாதங்கள் கழிந்து நமக்கு அது லாபம் தர ஆரம்பிக்கும் என கணக்கு போடுகிறோமல்லவா ? அந்த கணக்கைத் தான் நிறுவனங்கள் போடுகின்றன. இதை “ரிட்டன் ஆன் இன்வஸ்ட்மென்ட்” என்கின்றனர். ஒரு செலவைச் செய்தால் அது எப்போது நமக்குப் பயன் தரும் என்பதை மனதில் வைத்து செயல்படுத்துவது.

நவீன தொழில்நுட்பங்கள் ஆதிக்கம் செலுத்தத் துவங்கும் போது இப்போது இருப்பதில் வெறும் 10% ஊழியர்களை மட்டும் வைத்துக் கொண்டே, இன்றைக்கு செய்கின்ற அனைத்து வேலைகளையும் செய்ய முடியும். இன்றைக்கு இருக்கிற லாபத்தையும் பெற முடியும் என சமீபத்திய ஐடி அறிக்கை ஒன்று தெரிவித்திருந்தது. அந்த பத்து சதவீதம் மக்கள் நல்ல சம்பளத்தோடு வேலையில் இருப்பார்கள். அந்த பத்து சதவீதத்தில் இணைவதில் இருக்கிறது ஐடி ஊழியர்களின் வெற்றி !

கடினமாய் வேலை செய்யுங்கள் எனும் தாரக மந்திரத்திலிருந்து, ஸ்மார்ட்டாக வேலை செய்யுங்கள் எனும் ஒரு புதிய மந்திரத்தினூடாக ஐடி பயணிக்கிறது.

இந்த சவாலான சூழலில் ஐடி நிறுவனங்களில் பணி செய்கின்ற ஊழியர்களானாலும் சரி, புதிதாக ஐடி வேலையைத் தேடி வரும் இளைஞர்களானாலும் சரி, அவர்கள் ஐந்து விஷயங்களில் கவனம் செலுத்த வேண்டும்.

1. நவீன நுட்பங்களில் பரிச்சயம்.

“ஒன்றை செய், அதை நன்றே செய்” எனும் கூற்று ஐடி துறையில் கொஞ்சம் கொஞ்சமாய் விலகி வருகிறது. தெரிந்து வைத்திருக்கும் ஒரு விஷயம் சட்டென காலாவதியாகி விட, அதை மட்டுமே தெரிந்த நபர் செய்வதறியாது திகைக்க வேண்டிய சூழல் உருவாகிறது.

“பன்முகத் தன்மை” இன்றைய மிக முக்கியமான தேவை. நவீன தொழில் நுட்பங்களான டிஜிடல் டிரான்ஸ்பர்மேஷன், இன்டர்நெட் ஆஃப் திங்க்ஸ், பிக் டேட்டா, ஆர்டிஃபிஷியல் இன்டலிஜென்ஸ், ரோபோட்டிக்ஸ், ஆகுமென்டர் ரியாலிடி, மொபிலிடி போன்றவற்றில் குறைந்த அளவு பரிச்சயமேனும் இருக்க வேண்டும். ஏதேனும் ஒரு விஷயத்தை நன்றாகப் புரிந்து வைப்பது அவசியம், கூடவே நவீன தொழில் நுட்பங்கள் சிலவற்றையும் தெரிந்து வைத்திருக்க வேண்டும்.

புதிதாக வேலை தேடுபவர்கள் இத்தகைய நுட்பங்களில் சான்றிதழ் பெறுவது அவசியம். ஏற்கனவே பணியில் இருப்பவர்கள் தங்களுடைய திறமையை வளர்த்துக் கொண்டே இருக்க வேண்டியது ரொம்ப ரொம்ப அவசியம்.

2. சூழலுக்கு ஏற்ப பணியாற்றும் தன்மை.
ஐடி துறையின் சவாலான பயணத்தில், “ஃப்ளக்ஸிபிளிட்டி” மிகவும் அவசியம். அதாவது ரொம்ப பிடிவாதமாக இருக்காமல், நிறுவனத்தின் தேவைக்கு ஏற்ப தங்களுடைய விருப்பு வெறுப்புகளை மாற்றி வைக்கும் குணாதிசயம் இருக்க வேண்டும்.

உதாரணமாக, காலை 9 மணி முதல் மாலை 6 மணி வரை தான் வேலை செய்வேன். இந்த குறிப்பிட்ட வேலையை மட்டும் தான் செய்வேன். இந்த இடத்திலிருந்து மட்டும் தான் செய்வேன். என்னுடைய வேலையை மட்டும் தான் செய்வேன், அதை எனக்குப் பிடித்த வகையில் தான் செய்வேன்.. போன்ற பிடிவாதங்கள் உடையவர்கள் நிறுவனங்களில் நிலைக்க முடியாது. கொடுக்கப்படும் வேலை சிறிதோ, பெரிதோ அதில் முழுமையான மனசை வைத்து வேலை செய்யும் ஊழியர்களையே நிறுவனங்கள் இப்போது எதிர்பார்க்கின்றன.

3. நல்ல குணாதிசயம்.

ஐடி நிறுவனங்களின் பார்வை மாறிவிட்டது. “கலைஞனுக்கு கர்வம் இருக்கும்” என்று கலை உலகில் சொல்வது போல, “டெக்னிகலில் ஸ்ட்ராங்” ஆக இருக்கும் ஊழியனுக்கு கர்வம் இருக்கும் என தொழில்நுட்ப உலகில் சொல்வார்கள். அத்தகைய மனநிலை இனிமேல் செல்லுபடியாகாது. தொழில்நுட்பங்களே சில ஆண்டுகளுக்கு ஒரு முறை மாறி வருவதால், “டெக் ஸாவி” எனப்படும் அறிவு ஜீவிகளை விட நல்ல குணாதிசயம் உடையவர்களையே நிறுவனங்கள் எதிர்பார்க்கின்றன.

இன்றைக்கு தொழில்நுட்ப தீர்வுகள் இணையத்திலேயே கிடைக்கின்றன. கேள்விகளுக்கான விடைகளை இணையமே தேடி எடுத்துத் தரும். நல்ல குணாதிசயங்களை இணையம் மூலம் பெற்றுக் கொள்ள முடியாது. எனவே தான் இன்றைய தேவை நல்ல தொழில்நுட்ப பரிச்சயம் என்பதோடு கூட நல்ல குணாதிசயம் எனும் நிலையையும் எட்டியிருக்கிறது.

“இவனுக்கு விஷயம் தெரியும், ஆனா ஆள் சரியில்லை”, ” இவனுக்கு விஷயம் தெரியாது ஆனா கத்துப்பான்” என இரண்டு சூழல் எழுந்தால், இரண்டாவது நபரையே நிறுவனங்கள் தக்க வைத்துக் கொள்ளும் என்பதே எதார்த்தம்.

4. மென் திறமைகள்

இரண்டில் ஒன்றை தேர்வு செய்யச் சொன்னால் எதைத் தேர்ந்தெடுப்பது ? தொழில்நுட்ப ரீதியாக வலிமையான இருவர் இருந்தால் அவரில் ஒருவரை எப்படிப் பிரித்தெடுப்பது ? அத்தகைய சூழல்களில் உதவிக்கு வருவது மென் திறமைகள் ! நல்ல உரையாடல் திறன், நல்ல எழுத்துத் திறன், நல்ல பேரம் பேசும் திறன் போன்றவையெல்லாம் இருந்தால் அவருக்கு அதிக மரியாதை கிடைக்கிறது.

எனவே வேலையில் இருப்பவர்களானாலும் சரி, வேலைக்கு முயற்சி செய்பவர்கள் ஆனாலும் சரி மென் திறமைகளை வளர்த்துக் கொள்வதில் ஆர்வம் காட்ட வேண்டும். அது தான் நிறுவனங்களில் ஒரு ஊழியர் இறுக்கமாய் இருக்க உதவி செய்யும்.

5. இன்னோவேஷன் திறமை

அதாவது புதிது புதிதாக எதையாவது கண்டு பிடிப்பது. அல்லது புதிய ஐடியாக்களை வழங்குவது. வழக்கமாய் செய்து கொண்டிருக்கின்ற செயலை எப்படிச் செய்தால் அதிக லாபம் கிடைக்கும் ? வழக்கமாய் செய்யும் வேலைகளை விரைவாய் செய்வது எப்படி ? வழக்கமான பணிகளை அதிக தரத்தில் செய்வது எப்படி ? இந்த மூன்று நிலைகளில் புதிய புதிய ஐடியா சொல்பவர்களுக்கு நிறுவனத்தில் எப்போதுமே உயர்ந்த இடமும், மரியாதையும் கிடைக்கும்.

அவுட் ஆஃப் பாக்ஸ் திங்கிங் எனப்படும், யாரும் யோசிக்காத ஒரு கோணத்தில் யோசிக்கும் திறமையை வளர்த்துக் கொள்ளுங்கள். அது உங்களுடைய இருப்பைத் தக்க வைத்துக் கொள்ளவும், சவாலான சூழலிலும் உயர்வை எட்டவும் உதவும்.

வாழ்க்கை பூக்களின் பாதை மட்டுமல்ல, அது முட்களின் பாதையும் கூட. பூக்களில் நடக்கும் போது போதையடையாமலும், முட்களில் நடக்கும் போது சோர்வு அடையாமலும் இருந்தால் வாழ்க்கை இனிமையாகும். இலட்சியம் கை வசமாகும். எந்த நிலமையையும் எதிர்கொள்ளும் தன்னம்பிக்கையை இதயத்தில் கொண்டால் தோல்விகளின் முடிவில் வெற்றிகள் துவங்கும்.

*

நன்றி : தினத்தந்தி

காதல் என்பது எதுவரை

Related image

“அவன் யார் கூட எப்படிப் பழகறான்னு தெரியாது. ஆனா என் கூட ரொம்ப அன்பா இருப்பான். எனக்காக உயிரையே குடுப்பான்” என காதலில் கசிந்துருகும் காதலியர் சொல்வதுண்டு.

“மச்சி, அவளோட லவ் சின்சியர்டா. அடுத்தவங்க அவளைப்பற்றி என்ன சொன்னாலும் கவலையில்லை. என்னைப் பொறுத்தவரை அவ அன்பானவடா” என கசிந்துருகும் காதலன் சொல்வதுண்டு.

இத்தகைய அதீத நம்பிக்கைகளும், மனப்பான்மைகளும் தான் காதல் தோல்விகளுக்கும், காதலின் வெளிப்பாடாய் விளையும் திருமணத் தோல்விகளுக்கும் காரணம்.

காதலில் திளைத்திருத்தல் என்பது பூவில் புரளும் வண்டின் ஆனந்தத்துக்கு ஒப்பானது. உலகமே பூக்களின் கூடாரம் என வண்டு கற்ப‌னை செய்து கொள்ளும் கொள்ளும். வண்டு எப்போதுமே கொஞ்சிக் குலவும் என பூக்கள் புரிந்து கொள்ளும். இரண்டுமே தவறென தெரியவரும் போது எதிர்பார்ப்புகளின் ஆணிவேர் ஏமாற்றக் கோடரியால் வெட்டிச் சாய்க்கப்படும். அவ்ளோ தான்பா அவங்க‌ காதல் ! காதல் எவ்ளோ தூரம் போகும்ன்னு நமக்குத் தெரியாதா ? என ஊர் பேசத் தொடங்கும்.

தவறு காதலர்களிடம் தான் இருக்கிறது. தனது காதலன் தவறே இல்லாதவன் என காதலியும், தனது காதலி பிழையற்றவள் என காதலனும் கருதிக் கொள்வதில் பிரச்சினை யின் முதல் முளை துவங்குகிறது. உண்மையோ வித்தியாசமானது !

ஆலயத்துக்குள் பக்திப் பழமாய் நுழையும் மனிதனைப் பார்த்தால் அவன் கழுவி வைத்த கடவுளைப் போல இருப்பான். கூப்பிய கைகளோடும், வெற்றுக் கால்களோடும் அவன் ஆலயத்தின் தாழ்வாரங்களில் அமைதியாய் அலைந்து திரிவான். ஆலயத்தை விட்டு வெளியே வந்ததும், லஞ்சப் பணத்தை எண்ணத் தொடங்குவான். அல்லது தனது ஆன்மீக இதயத்தைக் கழற்றி விட்டு அழுக்கான இதயத்தை அணிந்து கொள்வான். கோயிலுக்குள் ஒருவன் எப்படி இருக்கிறான் என்பதை வைத்து அவன் எப்படிப்பட்டவன் என்பதை அளவிட முடியாது.

அதே போல தான் காதலும் ! காதலில் திளைத்திருக்கும் போது அடுத்த நபருக்காக உயிரை கைகளில் ஊற்றி ஊட்டி விடுவார்கள். இதழ்களில் இதயத்தை இறக்கி வார்த்தைகளாலே வானவில் கட்டுவார்கள். ஆனால் வாழ்வின் எதார்த்தம் எப்போதும் படகு சந்திப்போடு முடிந்து போவதில்லை.

ஒரு மனிதனின் இயல்பு எப்படி என்பதை வைத்தே அவனது காதல் வாழ்க்கையையும் அளவிட வேண்டும். அவன் தனது தாயை நேசிக்கிறானா ? தனது தந்தையை மதிக்கிறானா ? தனது சகோதர சகோதரிகளிடம் பாசமாய் இருக்கிறானா ? நண்பர்களோடு நட்பு பாராட்டுகிறானா ? வீதியில் திரியும் ஒரு ஏழை சகோதரனைக் கூட கருணையோடும், சக மனித மரியாதையோடும் நடத்துகிறானா ? இவையெல்லாம் ஒருவனுடைய காதல் வாழ்க்கையிலும் வெளிப்படும்.

ஒருவனுடைய இயல்பு எதுவோ, அதுவே காதலிலும் பிரதிபலிக்கும். அதைத் தாண்டிய வெளிப்பாடுகள் எல்லாம் போலியே. அம்மாவை அவமதிப்பவன், அப்பாவை நிராகரிப்பவன், சகோதர சகோதரிகளுக்கு இரங்காதவன் காதலிக்கு மட்டும் காற்றில் தாஜ்மஹால் கட்டினால் நம்பாதீர்கள். அந்த மிகைப்படுத்தும் நடிப்பு நிலைப்பதில்லை. அது பனிக்கட்டியின் மீது செய்யும் தூரிகை வண்ணம் போல காலம் கடக்கையில் கரைந்தே மறையும்.

அரளிச் செடியின் கிளைகளில் ரோஜாப் பூக்களை ஒட்டி வைக்கலாம். மாமரத்தின் கிளைகளில் மாதுளம் பழத்தைக் கட்டி வைக்கலாம். ஆனால் நிலைக்குமா ? நிலைப்பதில்லை ! மரத்தின் இயல்பு எதுவோ, அது தான் கனிகளில் வெளிப்படும். செடியின் இயல்பே பூக்களில் வெளிப்படும். அதைத் தாண்டிய மாயாஜாலங்களெல்லாம் காதலர்களின் கண்கட்டு வித்தைகளே.

ஒருவன் காதலில் சிறக்க வேண்டுமெனில் அவனுடைய குணாதிசயம் சரியாக இருக்க வேண்டும். என்னதான் விஷத்தண்ணீர் ஊற்றினாலும் ரோஜாப்பூ கருப்பாய் பூக்காது. நிலத்தை மாற்றி நட்டாலும் அல்லிக் கொடியில் அரளிப் பூ பூக்காது. உங்கள் குணாதிசயம் உங்களது உதிரத்தோடு கலந்தது. உதிர்ந்து விடுவதில்லை. அந்த குணாதிசயம் மிக முக்கியம். மனிதத்திலும், மனித நேயத்திலும் கலந்த குணாதிசயம் உங்கள் காதலருக்கு இருந்தால் உங்கள் காதல் என்பது ஆயுள் உள்ளவரை என்பதில் சந்தேகமில்லை.

தெய்வீகக் காதலென்பது கடற்கரையில் கைகோப்பதோ, மாலை நேரத்தில் மயங்கிக் கிடப்பதோ, வாட்ஸப் வாசலில் தோரணம் கட்டுவதோ, தொலைபேசிக் குரலுக்குள் தேன் தடவி அனுப்புவதோ அல்ல. அது ஒரு நீண்டகால பயணத்துக்கான வழித்துணையை பெற்றுக் கொள்வது.

இங்கே கவிதைகள் வரைவது எவ்வளவு அழகானதோ, கவிதையாய் வாழ்வது அதை விட அவசியமானது. காமத்தின் இழைகளில் சிலிர்ப்புகளை நெய்வது எவ்வளவு முக்கியமோ, மௌனத்தின் கரைகளில் மகிழ்ச்சியை நெய்வது அதை விட முக்கியமானது. அதற்கு காதலர்களின் குணாதிசயமும், இயல்பும் முக்கியமாகிறது.

அன்று

சங்கக் காதலில் தமிழன் சிலிர்ப்பூட்டினான்

இன்று

அங்கக் காதலில் சலிப்பூட்டுகிறான் !

காதலைக் கொண்டாடிய தமிழன் இன்று ஏன் காதலைக் கொன்றாடுகிறான் ? காரணம் இருக்கிறது. அன்றைய காதல் தற்காலிகக் கனவுகளில் தனது மாளிகையை அமைக்கவில்லை. நிஜங்களில் பாய் முடைந்து படுத்துக் கிடந்தது. தூரதேசம் செல்லும் காதலனுக்காக ஆண்டுக் கணக்கில் காத்திருந்தது அன்றைய காதல். நெட்வர்க் நாலு நாள் வேலை செய்யாவிட்டாலே காதல் முறிந்து போகிறது இன்று.

காதல் எதுவரை என்பதை காதலர்களே முடிவு செய்கிறார்கள். பாதி வழியில் இறங்கவேண்டுமே என பயணிப்பவர்களும் உண்டு. இறுதிவரை நிலைத்திருப்பவர்களும் உண்டு. காதலில் வெற்றியடைந்தவர்களின் வாழ்க்கையை ஒரு குறுக்கு வெட்டுத் தோற்றத்துக்கு உட்படுத்தினால் அவர்களிடம் சில குணாதிசயங்கள் இருப்பதைக் காணலாம்.

ஒருவரை ஒருவர் மதிக்கும் பண்பு, ஒருவரை அவரது இயல்புகளோடே ஏற்றுக் கொள்ளும் மனம், சுயநல சிந்தனைகளற்ற குணம், சந்தேகம் விலக்கிய நம்பிக்கை, பதட்டம் தரா பாதுகாப்பு உணர்வு, கள்ளமற்ற உரையாடல், யதார்த்தத்தை பார்க்கும் பக்குவம் போன்றவற்றை அவற்றில் முக்கியமானவையாய் சொல்லலாம்.

இதோ மீண்டும் ஒரு காதலர் தினம் வந்திருக்கிறது.

காதலை மீண்டெடுப்போம். மீண்டும் எடுப்போம். சிற்றின்பத்தின் கரைகளில் ஒதுங்கும் நுரைகளாய் அல்ல, பேரின்பத்தின் பிரவாகத்தில் கலந்துவிடும் புத்துணர்ச்சியுடன்.

காதல், வாழ்வின் பாகமல்ல.

வாழ்வே காதலின் பாகம்.

காதலாகவே இருக்கிறது இப் பிரபஞ்சம், கறைபடியாமல் காப்பது மட்டுமே நமது வேலை. காதல் என்பது எதுவரை ? வாழ்க்கை எனும் வட்டத்தின் கடைசி முனை வரை !

Vettimani, London & Germany.

இயேசு சொன்ன உவமைகள் ‍: 1 காய்க்காத அத்திமரம்

காய்க்காத அத்திமரம்

hqdefault

லூக்கா 13 : 6..9

“ஒருவர் தம் திராட்சைத் தோட்டத்தில் அத்திமரம் ஒன்றை நட்டு வைத்திருந்தார். அவர் வந்து அதில் கனியைத் தேடியபோது எதையும் காணவில்லை. எனவே அவர் தோட்டத் தொழிலாளரிடம், ‘பாரும், மூன்று ஆண்டுகளாக இந்த அத்தி மரத்தில் கனியைத் தேடி வருகிறேன்; எதையும் காணவில்லை. ஆகவே இதை வெட்டிவிடும். இடத்தை ஏன் அடைத்துக்கொண்டிருக்க வேண்டும்?’ என்றார். தொழிலாளர் மறுமொழியாக, ‘ஐயா, இந்த ஆண்டும் இதை விட்டுவையும்; நான் இதைச் சுற்றிலும் கொத்தி எருபோடுவேன். அடுத்த ஆண்டு கனி கொடுத்தால் சரி; இல்லையானால் இதை வெட்டிவிடலாம்’ என்று அவரிடம் கூறினார்.”

இயேசு இந்த உவமையைக் கூறியதற்கு ஒரு சின்ன பின்னணி உண்டு. அவர் வாழந்த காலத்து யூத மக்களிடையே ஒரு நம்பிக்கை உண்டு. யாராவது நோய்வாய் பட்டாலோ, யாருக்காவது அகால மரணம் நேரிட்டாலோ ‘அவர்கள் பாவிகள்’ அதனால் தான் இந்த நிலை என மற்றவர்கள் முடிவு கட்டி விடுகிறார்கள்.

தன்னை நீதிமான்களாக காட்டிக் கொள்பவர்கள் தான் உண்மையிலேயே பாவிகள். அவர்கள் மனம் திரும்ப வேண்டும். மனம் திரும்புதலின் கனியை அவர்கள் கொடுக்க வேண்டும் என்பதையே இயேசு இந்த உவமையின் மூலம் விளக்குகிறார்.

திராட்சைத் தோட்டத்தில் அத்தி மரம் என்பதே அத்தி மரத்துக்குக் கிடைக்கும் மிகப்பெரிய வரம். திராட்சைத் தோட்டத்தின் வளங்களையெல்லாம் உறிஞ்சி எடுத்து வளர முடியும். ஏகப்பட்ட இடத்தையும் அதிகரிக்கும். அப்படிப்பட்ட ஒரு அத்தி மரம் கனி கொடுக்காவிட்டால் தோட்ட உரிமையாளருக்கு அதனால் பயன் என்ன ?

இங்கே அத்தி மரம் என்பது யூதர்கள் அல்லாதவர்களுக்குக் கிடைக்கும் மீட்பின் வாய்ப்பு எனலாம். நம்மைப் போன்ற பிற இனத்து மக்கள், கிறிஸ்துவின் மந்தையில் இணைக்கப்பட்டவர்கள் அந்த அத்தி மரம் போன்றவர்கள்.

தோட்ட உரிமையாளர் என்பவர் தந்தையாம் இறைவன். அவரே நம்மை நடுகிறவர். உயிர்களை அனுமதிப்பவர் அவரே. தோட்டக்காரர் மகனாகிய இயேசு கிறிஸ்து.

அத்தி மரத்தில் கனி இருக்கிறதா என்று தேடிக் கொண்டு தந்தையாம் கடவுளே வருகிறார். கனி கொடுக்கும் காலம் வந்த பின்புதான் அவர் வருகிறார். அதுவும் தொடர்ச்சியாக மூன்று பருவங்கள் அவர் வருகிறார். கனிகள் காணப்படவில்லை. எனவே அதை வெட்டி விட முடிவெடுக்கிறார்.

இங்கே. தமது மக்களின் மீது கடவுள் கொள்ளும் அன்பு வெளிப்படுகிறது. கனியைத் தேடி, தானே மனிதனைத் தேடி வரும் எதிர்பார்ப்பு நிறைந்த தந்தையாய் அவர் இருக்கிறார்.

மகனாம் இயேசுகிறிஸ்து நமக்கும் கடவுளுக்குமிடையேயான இடைநிலையாளராய் இருக்கிறார். பரமனாகவும், பரிந்து பேசுபவராகவும் அவரே இருக்கிறார். அவர் தந்தையிடம் நமக்காகப் பரிந்து பேசி ‘இந்த ஆண்டும் இதை விட்டு வையுங்கள்’ என்கிறார்.

இங்கே, இயேசுவின் அளவிட முடியாத அன்பு வெளிப்படுகிறது. இது வரை கனிதராத மரத்தையும் அன்பு செய்கிறார். அது இனியாகிலும் கனி தரும் என எதிர்பார்க்கிறார். அதற்காக ,’சுற்றிலும் கொத்தி எரு போடுவேன்’ என களமிறங்குகிறார்.

இயேசு நாம் கனிகொடுக்க வேண்டுமென இடை விடாமல் பணி செய்கிறார். நாம் வாழ்கின்ற நிலத்தைப் பண்படுத்துகிறார். நாம் வரங்கள் உறிஞ்சும் மரமாய் இருக்க உரத்தை நிரப்புகிறார். ஒரு மரம் கனி கொடுக்க என்னென்ன தேவையோ அனைத்தையும் தொடர்ந்து செய்கிறார்.

இப்போது கனி கொடுக்காமல் இருக்க நம்மிடம் சாக்குப் போக்கு எதுவும் இல்லை. நிலம் சரியில்லை, நீர் கிடைக்கவில்லை போன்ற சால்ஜாப்புகள் இனிமேல் சொல்ல முடியாது. அப்போதேனும் கனி கொடுக்கிறோமா ?

கனி உடைய மரங்களைக் கண்டு பிடிப்பது எளிது. வாசனை காற்றில் மிதந்து வந்து நம்மை அழைக்கும். கனிகளின் வசீகரம் கண்ணில் தோன்றி நம்மை ஈர்க்கும். அல்லது பறவைகள் அந்த மரத்தின் தலையில் வட்டமிடும். கனி கொடுக்கும் வாழ்க்கை, மலை மேல் இருக்கும் ஊரைப் போன்றது. அது மறைவாய் இருக்க முடியாது.

அப்படி எந்த அடையாளமும் இல்லாத வாழ்க்கையை நாம் வாழும் போது நம்மிடம் கனி இல்லை என்று பொருள். எனினும் தந்தை வந்து நம்மிடம் ‘ஒரு கனியாவது’ கிடைக்காதா எனும் ஏக்கத்தோடு தேடுகிறார். கிடைக்கவில்லை.

இனிமேல் இதை வெட்டி விட வேண்டியது தான் என முடிவெடுக்கிறார் தந்தை. இறைவனின் வரங்களையும், அவரிடமிருந்து எல்லா நன்மைகளையும் பெற்று நாம் வளர்கிறோம். அத்தி மரம் போல எல்லா உரத்தையும், நீரையும், காற்றையும், ஒளியையும் வீணாக்குகிறோம். இலைகளையும், கிளைகளையும் கவனிக்கும் அவசரத்தில் கனிகளைப் பற்றிக் கவலைப்படாமல் இருந்து விடுகிறோம்.

கனி கொடுக்காத வாழ்க்கை என்பது நமக்கு மட்டுமான இழப்பல்ல. சமூக இழப்பு. அத்தி மரம் திராட்சைச் செடிகளுக்கான உரத்தைத் தின்று கொழுக்கிறது. அத்தி மரம் இல்லாமல் இருந்திருந்தால் திராட்சையாவது சில கனிகளை அதிகமாய்க் கொடுத்திருக்கும். இப்போது அதுவும் இல்லை.

அத்தி மரம் வெட்டப்படும் என்பது இந்த உவமை சொல்லும் முத்தாய்ப்புச் செய்தி. வாய்ப்புகள் தொடர்ந்து வழங்கப்பட்டுக் கொண்டே இருக்காது. வெட்டப்படும் நாள் ஒன்று உண்டு. இப்போது நடப்பவை கூடுதலாய்க் கிடைத்திருக்கும் காலம். கிருபையின் காலம். இந்த கிருபையின் நாட்களிலாவது கனி தராவிடில் மரம் தறிக்கப்படுவது நிச்சயம்.

கனி கொடுத்தால் விண்ணக வாழ்வாகிய மீட்பு.
கனி தர மறுத்தால் நெருப்பு நரகத்தில் அழிவு.

நமது வாழ்க்கையை மறு பரிசீலனை செய்வோம். நமது வாழ்க்கை கனிதரும் வாழ்வாய் இருக்கிறதா ? நாம் கனிதர இறைமகனின் உதவியை நாடுகிறோமா ? நமது வாழ்க்கை இறைவனுக்கு ஏற்புடையதா இல்லை ஏமாற்றமுடையதா ? பிறரைத் தீர்ப்பிடும் மனநிலையிலிருந்து திருந்தியிருக்கிறோமா ? நம்மை நாமே ஆராய்கிறோமா ?

சிந்திப்போம்.
கனி தருவதே மரத்தின் பணி.
கனி தராவிடில் வாழ்வேது இனி.

*

இயேசு சொன்ன உவமைகள் : 2 : விதைகளும், களைகளும்

Jesus Loves Xavier
( மத்தேயு 13 : 24..30 )

இயேசு அவர்களுக்கு எடுத்துரைத்த வேறு ஓர் உவமை: “விண்ணரசைப் பின்வரும் நிகழ்ச்சிக்கு ஒப்பிடலாம். ஒருவர் தம் வயலில் நல்ல விதைகளை விதைத்தார். அவருடைய ஆள்கள் தூங்கும்போது அவருடைய பகைவன் வந்து கோதுமைகளுக்கிடையே களைகளை விதைத்துவிட்டுப் போய்விட்டான் பயிர் வளர்ந்து கதிர் விட்டபோது களைகளும் காணப்பட்டன. நிலக்கிழாருடைய பணியாளர்கள் அவரிடம் வந்து,

‘ஐயா, நீர் உமது வயலில் நல்ல விதைகளை அல்லவா விதைத்தீர்? அதில் களைகள் காணப்படுவது எப்படி? என்று கேட்டார்கள். அதற்கு அவர், ‘இது பகைவனுடைய வேலை’ என்றார். உடனே பணியாளர்கள் அவரிடம், ‘நாங்கள் போய் அவற்றைப் பறித்துக் கொண்டு வரலாமா? உம் விருப்பம் என்ன?’ என்று கேட்டார்கள்.

அவர், ‘வேண்டாம், களைகளைப் பறிக்கும்போது அவற்றோடு சேர்த்துக் கோதுமையையும் நீங்கள் பிடுங்கிவிடக்கூடும். அறுவடைவரை இரண்டையும் வளர விடுங்கள். அறுவடை நேரத்தில் அறுவடை செய்வோரிடம், ‘முதலில் களைகளைப் பறித்துக் கொண்டு வந்து எரிப்பதற்கெனக் கட்டுகளாகக் கட்டுங்கள். கோதுமையையோ என் களஞ்சியத்தில் சேர்த்து வையுங்கள்’ என்று கூறுவேன்’ என்றார்.”
இயேசுவின் உவமைகள் மிகவும் வசீகரமானவை. எப்போதுமே சாதாரண மக்களின் வாழ்க்கையோடு நெருங்கிய தொடர்புடையவை. பெரிய பெரிய தத்துவார்த்தமான குழப்பங்களை அவர் எப்போதும் சொன்னதேயில்லை. விதைகள், பயிர், பறவை, செடிகள், மேய்ப்பன் என அவருடைய உவமைகள் எப்போதுமே உழைக்கும் வர்க்கத்துக்கு பரிச்சயமான பொருட்கள் மட்டுமே. தன் உவமை எவ்வளவு அழகானது என்பதை விட எவ்வளவு வீரியமாய் மக்களிடம் செல்கிறது என்பதையே அவர் விரும்பினார். கேட்பவர்களுக்கு சட்டென புரிய வேண்டும் என்பதே அவரது நோக்கம்.
இந்த உவமையின் விளக்கத்தையும் இயேசுவே விளக்குகிறார். (மத்தேயு 13 : 37..43 )

““நல்ல விதைகளை விதைப்பவர் மானிடமகன்; வயல், இவ்வுலகம்; நல்ல விதைகள், கடவுளின் ஆட்சிக்குட்பட்ட மக்கள்; களைகள், தீயோனைச் சேர்ந்தவர்கள்; அவற்றை விதைக்கும் பகைவன், அலகை; அறுவடை, உலகின்முடிவு; அறுவடை செய்வோர், வானதூதர். எவ்வாறு களைகளைப் பறித்துத் தீக்கிரையாக்குவார்களோ அவ்வாறே உலக முடிவிலும் நடக்கும்.

மானிட மகன் தம் வானதூதரை அனுப்புவார். அவர்கள் அவருடைய ஆட்சிக்குத் தடையாக உள்ள அனைவரையும் நெறிகெட்டோரையும் ஒன்று சேர்ப்பார்கள்; பின் அவர்களைத் தீச்சூளையில் தள்ளுவார்கள். அங்கே அழுகையும் அங்கலாய்ப்பும் இருக்கும். அப்போது நேர்மையாளர் தம் தந்தையின் ஆட்சியில் கதிரவனைப்போல் ஒளிவீசுவர் கேட்கச் செவியுள்ளோர் கேட்கட்டும்.” என்பது தான் அவருடைய விளக்கம்.
இந்த உவமை நமக்கு பல்வேறு பாடங்களைக் கற்றுத் தருகிறது.

Related image1. இறைமகன் இயேசு விதைக்கின்ற விதைகள் எப்போதுமே நல்ல விதைகள்.

களைகள் சாத்தானின் சந்ததிகள். நாட்டில் நடக்கின்ற கெட்ட விஷயங்களுக்கோ, மனிதனுடைய அசுர சுபாவங்களுக்கோ காரணம் அவர்கள் கடவுளை விட்டு விலகி சாத்தானோடு சகவாசம் வைத்துக் கொள்வது தான்.

உலகில் மனித உயிர்களைப் படைக்கும் சக்தி கடவுளுக்கு மட்டுமே உண்டு. சாத்தானால் உயிர்களை உருவாக்க முடியாது. ஆனால் அந்த உயிர்களுக்குள் தனது சிந்தனையை ஊற்றி வைக்க முடியும். ஏவாளைப் பொய் சொல்லி ஏமாற்றிய அதே சாத்தானின் தந்திரம் இன்றும் அமோக விளைச்சலை அறுவடை செய்கிறது.

இறைவனோடு இணைந்து பயணிக்கும் போது அவர் நட்ட விதைகள் பலனளிக்கத் தவறுவதில்லை.

Related image2. பணியாளர்கள் தூங்குகையில் சாத்தான் நுழைகிறான்.

எப்போதெல்லாம் நமது ஆன்மீக வாழ்க்கை வெளிச்சத்தை விட்டு விலகி இருட்டின் பக்கத்துக்குச் சாய்கிறதோ அப்போது இருட்டின் அரசனான சாத்தான் வலிமையடைகிறான். நமது ஆன்மீக வாழ்வின் தொய்வு, நாம் அவனுக்கு அளிக்கும் வரவேற்புக் கம்பளம்.

நமது பலவீனத்தைப் பயன்படுத்தி அவன் இறைவன் விதைத்த வயலில் நுழைகிறான். விதைகளிடையே களைகளை விதைக்கிறான். சாத்தானுடைய அத்தனை உலக ரீதியிலான ஈர்ப்புகளும் இந்தக் களைகள் எனலாம். அல்லது சாத்தானின் சிந்தனைகளை உள்வாங்கிய மனங்களை களைகள் எனலாம்.

Related image3. கதிர்களே களைகளை வேறுபடுத்துகின்றன.

பயிர் முளைத்த போதோ, மெல்ல மெல்ல வளர்ந்த போதோ பயிர்களிடையே வித்தியாசம் தெரியவில்லை. களைகளும் பயிர்களும் ஒன்றே போலவே இருந்தன. கதிர் விட்ட போது தான் களைகள் கண்டறியப்படுகின்றன.

நமது வாழ்க்கை கனிகொடுக்கிறதா ? கனிகொடுக்காத வாழ்க்கையெனில் களைகளோடு களைகளாய் களையப்படுவோம். நல்ல விதையாய் விழுந்தவர்கள், நல்ல பலனைக் கொடுக்கவேண்டும் என்பதே இறைவனின் விருப்பம்.

Related image4. களைகளைக் கண்டால் இறைவனிடம் கேட்போம்.
வயலில் களைகள் ஒன்றிரண்டு காணப்படுவது இயல்பு. அவற்றை பணியாளர்களே பிடுங்கி எறிவது தான் வழக்கம். ஆனால் இங்கே பணியாளர்கள் தலைவனிடம் சென்று முறையிடுகிறார்கள். “நல்ல விதையல்லவா விதைத்தீர்? ” என வியப்புடன் கேட்கின்றனர்.

இது வழக்கத்துக்கு மாறான செயல். இரண்டு விஷயங்கள் இங்கே நமக்குப் புலனாகின்றன. ஒன்று, வயலில் இருந்த களைகள் ஒருவேளை பயிர்களை விட அதிகமாய் இருக்கலாம். அல்லது ஏறக்குறைய சம எண்ணிக்கையில் இருக்கலாம். எது எப்படியோ, வழக்கத்துக்கு மாறான அளவில் அங்கே எக்கச்சக்கமான களைகள் இருந்தன என்பது கண்கூடு.

ஒரு திருச்சபையிலோ, இறைமக்கள் குழுவிலோ களைகள் இருப்பதைக் கண்டால் அதை உடனடியாக இறைவனிடம் தான் சொல்ல வேண்டுமே தவிர அதைக்குறித்த விமர்சனங்களில் ஈடுபடக் கூடாது என்பது ஒரு பாடம்.

Related image5. இரண்டையும் வளரவிடும் இறைவன்.

இறைவனின் பதில் அவருடைய அன்பின் ஆழத்தைக் காட்டுகிறது. பயிர்கள் காயமடைந்து விடக் கூடாது எனும் அவருடைய அளவிலா அன்பு அங்கே வெளிப்படுகிறது. களைகளும், பயிர்களும் இணைந்தே வளரட்டும் என்கிறார்.

அறுவடை என்பது நமது பணியல்ல, அது வான தூதர்களின் பணி. அவர்கள் அதில் எக்ஸ்பர்ட். பயிர்கள் பாதிக்கப்படாமல் களைகளை அறுத்து எறிவது அவர்களுடைய பணி.

களைகளைக் களைதலோ, அவர்களைத் தீர்ப்பிடுவதோ நமது பணியல்ல. பாரபட்சம் இல்லாமல் இறைவனின் அன்பை அறிவிப்பதும், பறைசாற்றுவதுமே நமது பணி. இறைவனின் கட்டளைப்படி வாழ்வதே நமது பணி.

Related image6. தீர்ப்பிடுவது இறைவனே

கடைசி நாள் என்று ஒன்று உண்டு. மரணத்துப் பிந்தைய வாழ்க்கை நிஜம். இதை இன்று அறிவியலும் ஒத்துக் கொள்ளத் தொடங்கியிருக்கிறது. நமது பிரபஞ்சமே ஒரு இரு பரிமான சிமுலேஷன் எனும் வாதங்களும் அதன் நிரூபணங்களும் பரவலாகத் துவங்கியிருக்கின்றன.

கனி கொடுப்பவர்கள் மட்டுமே இறைவனின் அன்பில், பரலோக வாழ்வில் இணைய முடியும். மற்றவர்களுக்கு நரக நெருப்பே முடிவு.

சுருக்கமாக, இந்த வாழ்வில் நமது பயணம் பயிர்களும் களைகளும் கலந்த சூழலிலேயே இருக்கும். விழிப்பாய் இருந்து இறைவனுக்கேற்ற கனிகளைக் கொடுப்பவர்களாக நாம் வாழவேண்டும். இறைவனின் குணாதிசயங்களைப் பிரதிபலிப்பவர்களாக நாம் இருக்க வேண்டும்.

*

இயேசு சொன்ன உவமைகள் ‍ 3 : விதைப்பவன் உவமை


“இறையாட்சியைப் பின்வரும் நிகழ்ச்சிக்கு ஒப்பிடலாம்; நிலத்தில் ஒருவர் விதைக்கிறார். அவர் எதுவும் செய்யாமலே நாள்கள் நகர்ந்து செல்கின்றன. அவருக்குத் தெரியாமல் விதை முளைத்து வளருகிறது. முதலில் தளிர், பின்பு கதிர், அதன் பின் கதிர் நிறைய தானியம் என்று நிலம் தானாகவே விளைச்சல் அளிக்கிறது. பயிர் விளைந்ததும் அவர் அரிவாளோடு புறப்படுகிறார்; ஏனெனில் அறுவடைக் காலம் வந்துவிட்டது” ( மார்க் 4 : 26 .. 29 )

இயேசுவின் உவமைகள் எப்போதுமே உழைப்பாளர்கள், மற்றும் அடித்தட்டு மக்கள் புரிந்து கொள்ளும் வகையிலேயே இருக்கும். இந்த உவமையும் அப்படியே, விதைகளையும், விதைப்பவனையும் இயேசு களமாக தேர்ந்தெடுக்கிறார்.

விதை, இறைவனின் வார்த்தைகள். அந்த வார்த்தைகள் நடப்படும் நிலம் மனித இதயம். விதைக்கப்படும் இறைவார்த்தை மனித மனங்களில் புதைபட்டு, முளைவிட்டுக் கதிராகவும், தானியமாகவும் மாறுகிறது. இந்த மாற்றங்களை கண்கள் காண்பதில்லை இறைவனே காண்கிறார். அதன் பலனை நமக்கு இறைவன் அளிக்கிறார்.

Image result for jesus talking clipart1. விதை இருப்பது அவசியம்.

விதைக்க வேண்டுமெனில் முதல் தேவை, கைவசம் விதைகள் இருப்பது. இன்று இறைவார்த்தை பைபிள் வழியாக நமக்கு இலவசமாகவே கிடைக்கிறது. இறைவார்த்தை எனும் விதைகள் எந்த அளவுக்கு நம்மிடம் இருக்கிறதோ, அந்த அளவுக்கு நாம் நிலங்களில் நட முடியும். எனவே முதல் தேவையாக இறைவார்த்தைகளை தொடர்ந்து படிக்க வேண்டும்.

Image result for jesus talking clipart2. விதைத்தல் அவசியம்

விதைகள் மண்ணில் புதையுண்டால் தான் பலன் தர முடியும். தனியே இருக்கும் விதைகள் முளைகளாவதில்லை. இறைவனின் வார்த்தையும் தனியே இருக்கும் வரை வார்த்தையாகவே இருக்கிறது. அது மனித மனங்களில் பதியனிடப்பட்ட பின்பு தான் உயிர் பெறுகிறது.

இறைவனுடைய வார்த்தைகளை நமது இதயத்திலும், பிறருடைய இதயங்களிலும் விதைக்க வேண்டிய கடமை நமக்கு உண்டு.

Image result for jesus talking clipart3. நிலங்கள் அவசியம்

விதைகள் இருந்தாலும், விதைப்பவன் இருந்தாலும் கூட நிலம் இல்லையேல் அந்த விதைப்பில் எந்த பயனும் இல்லை. எனவே இறைவார்த்தை எனும் விதை நமது இதயங்களில் நுழைவதற்குத் தக்கபடி நமது இதயங்களை உழுது செம்மைப்படுத்தி வைக்க வேண்டியது அவசியம்.

கற்பாறை நிலமாகவோ, வழியோர நிலமாகவோ, முட்புதராகவோ இருக்குமிடத்தில் விதைப்பது பயனளிப்பதில்லை. விதைகள் தான் வீணாகும். எனவே நிலங்களைப் பக்குவப்படுத்தி வைப்பது அவசியம்.

Image result for jesus talking clipart4. காலம் அவசியம்.

விதைத்த உடனே பயனை எதிர்பார்ப்பது மூடத்தனம். விதைகள் பலனளிக்க காலம் தேவைப்படும். அவை வேரிறக்கவும், முளை விடவும், வளரவும் நேரம் தேவைப்படும். அவசரப்படுவதால் எதுவும் நிகழ்ந்து விடப் போவதில்லை. விதைப்பவனைப் போல, விதைக்கும் பணியைச் செய்து விட்டுக் காத்திருக்க வேண்டும்.

Image result for jesus talking clipart5. கட்டாயப்படுத்த முடியாது.

சீக்கிரம் முளைத்து வா என நிலத்தையோ, முளையையோ நாம் கட்டாயப்படுத்தி விட முடியாது. இறைவார்த்தை பயனளிக்க இறைவன் ஒரு திட்டத்தை வைத்திருப்பார். அந்த திட்டத்தின் படியே அனைத்தும் நடக்கும். நம்முடைய அழுத்தங்கள் விதைகளையும், நிலத்தையும் பாழ்படுத்தலாமே தவிர எந்த பயனையும் செய்யாது. எனவே விதைத்தபின் அந்த விதைகளின் மீதோ, நிலத்தின் மீதோ தேவையற்ற அழுத்தங்களை வைக்க வேண்டாம்.

Image result for jesus talking clipart6. விதை முளைப்பது தெரிவதில்லை.

எந்தக் கணத்தின் விதையின் தோடுடுடைத்து முதல் வேர் வெளிக்கிளம்பியது ? எந்த கணத்தில் முதல் இதழ் மெல்ல விரிந்தது ? எந்தக் கணத்தில் மண்ணைக் கீறி முளை வெளியே வந்தது ? யாரும் அறிவதில்லை. இறைவன் ஒருவரே அதை அறிகிறார். எனவே இறைவார்த்தைகளை நாம் விதைத்தபின் அது எப்போது முளைக்கும் என்பது இறைவனின் சித்தத்தையும், நிலத்தின் தன்மையையும் பொறுத்தது மட்டுமே.

Image result for jesus talking clipart7. மூன்று நிலைகள்.

முளையாக, கதிராக, கதிருக்குள் தானியமாக என மூன்று நிலைகளில் விதைகளின் வளர்ச்சி இருக்கும். முளையாக இருப்பது வார்த்தைகளைக் கேட்டு அதை கொஞ்சமாய் வெளிப்படுத்துவது. ஆனால் அந்த முளையினால் பிறருக்கு எந்த பயனும் இல்லை.

இரண்டாவது கதிர். கதிர் பார்வைக்கு பயனளிப்பது போல தோன்றினாலும் உள்ளுக்குள் எதுவும் இருக்காது. ஒருவகையில் வெளிவேடமான வாழ்க்கை என சொல்லலாம். வார்த்தைகளைக் கேட்டு, உள்வாங்கிக் கொள்வதுடன் நின்று விடும். பயனளிக்கும் அந்த கடைசி நிலையை எட்டாமல் போய்விடும்.

மூன்றாவது தானியம் நிரம்பிய கதிர். இது தான் கடைசி நிலை. இது தான் தேவையான நிலை. உள்ளுக்குள் முழுமையடைந்து பிறருக்கு பயனளிக்கும் நிலை. இதுவே நல்ல நிலத்தின் அடையாளம். இத்தகைய நிலைக்கு உயரவேண்டும் என்பதே எதிர்பார்ப்பு.

Image result for jesus talking clipart8. பயனளிப்பது நிலம்

விதைகளை நிலத்தில் போடுகிறோம். விதை தானே பயனளிக்க வேண்டும் ? இங்கே நிலம் பயனளிக்கிறது. இறைவனின் வார்த்தைகள் விழுந்த மனிதர்கள் தான் பயனளிக்கத் துவங்குகிறார்கள். வார்த்தைகள் இருக்கும் இதயங்கள் தங்களுடைய வாழ்க்கையில் அதைப் பிரதிபலித்து பயனளிக்கின்றனர். விதையை நிலத்தின் போட்டாலும், நிலமே பயனளிக்கிறது என்பதை கவனத்தில் கொள்வோம். நமது இதயமெனும் நிலத்தை கவனமாய் பாதுகாப்போம்.

Image result for jesus talking clipart9. அறுவடை பயன்

மனங்கள் பயனளிக்க ஆரம்பிக்கும் போது அந்த விதைகளை விதைத்தவர்கள் பயனடைகின்றனர். நமது இதயமெனும் நிலம் பண்படும் போது அந்த பயன் நமக்குக் கிடைக்கிறது.

விளைச்சலில் காலம் வராவிட்டால் அதனால் பயனில்லை. விதைகள் வளர்ந்து தானியமாய் ஆகும்போது அந்த பயன் இறைவார்த்தைகளைச் சொன்னவனுக்குக் கிடைக்கும்.

Image result for jesus talking clipart10 தூய ஆவியெனும் விதை.

நமது நிலமெனும் மனதில், இறைவார்த்தையெனும் விதைகளைப் போல பரிசுத்த ஆவி எனும் விதைகளை நடுவதையும் இந்த உவமை விளக்குகிறது. தூய ஆவியானவரை இதயத்தில் ஏற்றுக்கொள்ளும் வகையில் நமது இதயத்தைப் பக்குவப்படுத்தி வைத்துக் கொள்ள வேண்டும்.

தூய‌ ஆவியானவர் நம்மிடம் வந்து தங்குவதற்குரிய வகையில் நமது இதயத்தைச் செவ்வையாக வைத்திருந்தால் தூய ஆவியார் வந்து பயனளிக்கும் நிலமாய் நம்மை மாற்றுவார். அப்போது நாம் முழுமையான கனியைக் கொடுக்க முடியும்.

இயேசு சொன்ன உவமைகள் : 4 : கடுகு விதை உவமை

 

“இறையாட்சியை எதற்கு ஒப்பிடலாம்? அல்லது எந்த உவமையால் அதை எடுத்துச் சொல்லலாம்? அது கடுகு விதைக்கு ஒப்பாகும். அது நிலத்தில் விதைக்கப் படும்பொழுது உலகிலுள்ள எல்லா விதைகளையும்விடச் சிறியது.அது விதைக்கப்பட்டபின் முளைத்தெழுந்து எல்லாச் செடிகளையும் விடப் பெரிதாகி, வானத்துப் பறவைகள் அதன் நிழலில் தங்கக் கூடிய அளவுக்குப் பெருங்கிளைகள்விடும்” ( புதிய மொழி பெயர்ப்பு மார்க் 4 : 30, 31, 32 )

தேவனுடைய ராஜ்யத்தை எதற்கு ஒப்பிடுவோம்? அல்லது எந்த உவமையினாலே அதைத் திருஷ்டாந்தப்படுத்துவோம்? அது ஒரு கடுகு விதைக்கு ஒப்பாயிருக்கிறது; அது பூமியில் விதைக்கப்படும்போது பூமியிலுள்ள சகல விதைகளிலும் சிறிதாயிருக்கிறது; விதைக்கப்பட்டபின்போ, அது வளர்ந்து, சகல பூண்டுகளிலும் பெரிதாகி, ஆகாயத்துப்பறவைகள் அதினுடைய நிழலின்கீழ் வந்தடையத்தக்க பெரிய கிளைகளை விடும் என்றார்.
இயேசு இறையாட்சியை இந்த முறை ஒரு கடுகு விதைக்கு ஒப்பிடுகிறார். கடுகு விதையைக் குறித்து வரலாறு பல பதிவுகளைச் சொல்கிறது.

இயேசு வாழ்ந்த பகுதியில் வளர்ந்த கடுகு புதர்கள் சுமார் 30 அடி உயரம் வரை வளரக் கூடியவனவாக இருந்தன என்பது ஒரு செய்தி. மண்ணில் போட்டால் முளைக்கக் கூடிய மிகச்சிறிய விதை கடுகு விதை தான். அதை விடச் சிறிய செடிகள் தானாக வளரும் தன்மையற்றவை என்கிறது ஒரு ஆய்வு.

இறையரசின் துவக்கம் மிகச்சிறிய விதையளவுக்கு இருந்தாலும் அதன் விஸ்வரூபம் அதன் வளர்ச்சியில் தெரியும். ஒரு பழத்தில் இருக்கும் விதைகளை எண்ணிவிட நம்மால் கூடும். ஆனால் ஒரு விதையில் இருக்கும் பழங்களை எண்ணிவிட இறைவனால் மட்டுமே ஆகும். கடுகு விதை கூட கடவுள் நினைத்தால் பறவைகளின் புகலிடமாய் மாறிவிடும்.

Image result for jesus talking clipart1. கடுகுவிதை எனும் தூய ஆவி

தூய ஆவியானவர் நமது இதயத்தில் நடப்படும் போது, பிறரால் அதை அறிந்து கொள்ள முடிவதில்லை. நமது வாழ்க்கையிலும் உடனடியாக பெரிய மாற்றம் வெளியே தெரிவதில்லை. ஒரு விதை இருப்பதையே நிலம் அறிந்து கொள்வதில்லை. அந்த அளவுக்கு சின்னது கடுகு விதை. ஆனால் அது நமக்குள் பதியமிடப்பட்டு வளர்ந்து பெரிதாகும் போது பலருக்கும் பயனளிக்கிறது. பிறருடைய கண்களுக்கு பளிச் என புலப்படுகிறது. நமது செயல்களின் நிழல்களில் பலர் வந்து இளைப்பாற அது வகை செய்கிறது.

Image result for jesus talking clipart2. விதைக்காத விதை பலனளிக்காது.

கடுகு விதை விதைக்கப்பட்டால் மட்டுமே அதன் பயன் தெரியும். விதைக்கப்படாத விதை விரல்களிடையே நழுவி விழுந்தால் கூட வெளியே தெரிவதில்லை. எனவே விதைக்கப்படுதல் மிகவும் முக்கியம். தூய ஆவியானவரை இறைவன் பூமிக்குக் கொடுத்தார். அவர் எங்கும் நிரம்பியிருக்கிறார். அவரை நமது இதயத்தில் நட்டிருக்கிறோமா ? இந்த கேள்வி மிகவும் முக்கியமானது. நாம் நமது அவரை இதயத்தில் நடவேண்டும்.

Image result for jesus talking clipart3. விதைக்கப்பட்ட பின் பயன்

விதைக்கப்பட்ட தூய ஆவியானவர் மறைவாய் இருந்து பயனளிக்க ஆரம்பிக்கிறார். உள்ளுக்குள் வேர் இறக்கி, வெளியே கிளைகளை விரிக்கிறார். அதனால் நமது செயல்கள் வலுவடைகின்றன. பிறர் பார்க்குமளவுக்கு விரிவடைகின்றன. கிளைகள் விரிக்கின்றன. தூய ஆவியானவர் நம்முள் இருந்தால் நமது செயல்களும் நம்மை அறியாமலேயே தூய்மையடைகின்றன. பிறருக்கு பயனுள்ள வகையில் மாறுகின்றன.

Image result for jesus talking clipart4. விதையின் அளவு முக்கியமில்லை.

விதை என்பதை இறை வார்த்தையோடும் ஒப்பிடலாம். இறை வார்த்தை எவ்வளவு சிறியதாக இருந்தாலும் அது நமது மனதில் நடப்படும் போது நமக்குள் முளைத்து வளர்ந்து பயனளிக்கிறது. நமது வாழ்க்கை பின்னர் பிறருக்கு நிழல் தரும் ஒரு செடியாக மாறிவிடுகிறது.

Image result for jesus talking clipart5. விதையின் அடர்த்தி முக்கியம்.

கடுகளவு விசுவாசம் இருந்தால் மலையைப் பெயர்க்கலாம் என்றார் இயேசு. கடுகின் அளவு என்பதை, கடுகின் அடர்த்தி என கொள்ளலாம். ஒரு கடுகு விதையை உடைத்தால் அது தன்னுள் முழுமையான அளவில் நிரம்பியிருக்கும். நமக்குள்ளும் விசுவாசம் என்பது இடைவெளியின்றி, முழுமையாய் நிரம்பியிருந்தால் பெரிய செயல்களைச் செய்ய முடியும்.

Image result for jesus talking clipart6. இயேசுவே விதை

அந்த விதையை இறை வார்த்தையைப் போல, இறைமகனாகவும் நாம் எடுத்துக் கொள்ளலாம். கோதுமை மணி மண்ணில் விழுந்து மடிந்தால் தான் பயனளிக்கும் என அவரே சொல்கிறார். இயேசு பூமிக்கு வந்து ஒரு விதையாக நடப்படுகிறார். அவரது கிளைகளாக திருச்சபை மக்கள் இணைகின்றனர். வளர்கின்ற அந்தத் திருச்சபை ஒரு பெரிய நிழல் தருவாய் வளர்ந்து விடுகிறது.
இந்த உவமை இப்படி பல்வேறு முகம் காட்டி நம்மை வியக்க வைக்கிறது.

சுருக்கமாகச் சொல்ல வேண்டுமெனில் நமது இதயத்தில் இறைவார்த்தையும், தூய ஆவியானவரும் தங்கியிருக்கும் போது நம் வாழ்க்கை அர்த்தமுள்ளதாய் மாறுகிறது. துவக்கம் என்பது கடுகைப் போல சிறிதாய் இருந்தாலும், முடிவு பிறருக்கு நிழல் தரும் மரமாய் விரிவடைகிறது.