மக்கள் டாக்டர். அனிதா !

Image result for ariyalur anitha wallpaper

 

இது
தற்கொலையல்ல !

நிலத்தைக் களவாடிவிட்டு
பயிர்
தற்கொலை செய்தது
என்பீர்களா ?

மழையை மறுதலித்து விட்டு
நதி
தற்கொலை செய்தது
என்பீர்களா ?

கதிரவனைக் கடத்தி விட்டு
நிலா
தற்கொலை செய்தது
என்பீர்களா ?

இது கொலை !

நீட்
என விரல் நீட்டிய‌
நாட்டாமை விரல்களின்
விஷமே
சாகடித்தது !

நம்பிக்கையின்
கிளைகளில் நீர் தெளித்து
வேர்களில்
பாதரசம் பாய்ச்சிய‌
பசப்பு வார்த்தையே
சாகடித்தது

ஏழைகள்
கனவுகள் காணலாம் !
“கனவுகள் மட்டுமே காணலாம்”
எனும்
ஆதிக்க சக்தியின்
ஆணவமே சாகடித்தது !

கூலித் தொழிலாளி
கூனியே நிற்கவேண்டும்
எனும்
போலி நீதியின்
சர்ப்ப நாவுகளே சாகடித்தன !

ஏழை
என்ன தான் செய்வான் ?

பயிர் வாடினால்
உயிர் விடுவான் !

தன்மானம் தகர்ந்தால்
உயிர் விடுவான் !

கனவுகள் உடைந்தால்
உயிர் விடுவான்

விடுவதற்கென
அவனிடம்
சொந்தமாய் இருப்பது
உயிர் மட்டும் தானே !

அவன் என்ன‌
வழக்கு வந்தால்
இங்கிலாந்தில் குடியேறுபவனா ?

கைது வந்தால்
சொகுசு விமானத்தின்
படியேறுபவனா ?

அவன்
மண்ணின் மைந்தன் !

இனியும் இதை
தற்கொலை எனல்
பொருட்குற்றம் !
இது மனிதத்தின் பெருங்குற்றம் !

கடிவாளத்தோடு
காத்திருப்பவனுக்கு
குதிரையை வழங்கு !
பல்லக்கை அல்ல !

அல்லது
வழங்கப் போவது
பல்லக்கு என்பதை
படிக்கும் போதே முழங்கு !

யாம்
சவால்களைக் கண்டு
பின்வாங்குபவர் அல்லர்

வரலாறுகளின்
துவக்கமும்,
வீரத்தின் திலகமும்
தமிழனைத் தாண்டிய பின்பே
ஏழுகடல் தாண்டியது !

அடக்குமுறைகளின்
அடியில்
நசுங்கியே மாள‌
நாங்கள் மண்புழுக்களல்ல‌
வீரத்தின் விழுப்புண்கள் !

சுவரில் எறிந்த
பந்து போல‌
நாங்கள்
விரைவாய் திரும்பும் நாள்
வெகு தொலைவில் இல்லை !

எங்களைப் பொசுக்க‌
நீங்கள் வைத்த‌
அனுமர் வால் நெருப்பில்
நீங்களே
மிரளும் நாள்
வெகு தொலைவில் இல்லை !

அதைக் காண,
மரணத்தின் கோரப்பற்களில்
விதையாய் விழுந்த‌
எம்
சகோதரி இல்லை என்பது மட்டுமே
வலி கூட்டுகிறது !

அந்த வலியே
எங்கள் உணர்வுகளுக்கு
வலு கூட்டுகிறது.

*

 

 

 

 

 

 

 

 

Advertisements

என் ஜன்னலோரச் சிட்டுக்கள்

Image result for Birds in window

அந்த
சாம்பல் நிறக் குருவி
குஞ்சுகளைக்
கூட்டிக் கொண்டு
கூட்டுக்கு வெளியே
பறக்கத் துவங்கியிருக்கிறது.

இந்த சன்னல் திரையின்
கண்கள் வழியே தெரிகிறது,
ஈரத் தரையின்
புற்கள் இடையே
அதன்
அலகுப் பற்கள் அலையும் அழகு,

காணும் பட்டத்தின் பின்
நீளும் வாலாய்,
தாயின் பின்னால்
குஞ்சுகள் தத்தும் அழகு,

உச்சரிக்கும் பூவாய்,
எச்சரிக்கும் காற்றாய்,
தாயை
நச்சரிக்கும் குரலாய்,
காதில் பூச்சொரியும்
கீச்சுக் குரலழகு,

அதன்
சிறகுச் சூட்டில் சிலநேரம்
சிக்கிக் கிடக்கும்
என் குளிர் கண்கள்.

சில காலம் முன்
சுள்ளி சேகரித்த
காலத்திலேயே எனக்குள்
அது
கூடு கட்டிக் குடியேறி விட்டது.

இப்போது,
தேனீர்,
அலுவல்,
குருவிக் கவனிப்பென்பது
வழக்கமான பழக்கமாகிவிட்டது.

நான்
பேசியதில்லை.
ஆனாலும்
பிரிய நண்பன் போல்
உள்ளுக்குள் தோன்றல்.

அது பேசும் பாஷைகளில்
தமிழை விட
தொன்மை வாடை.
அதன் அழகுக் கழுத்தில்
மலரை விட
மென்மை ஆடை.

மனசில் சிதறும் தானியங்களை
அவை
தரையில் அமர்ந்து
கொத்துகின்றன.

அவை கொத்தித் தின்னும்
அழகில்
என்
மனசின் தானியங்கள்
முளை விடுகின்றன.

அதன்
சத்தங்களின் சரணாலயமாய்
என்
நினைவுச் செடியின்
நீண்ட கிளைகள்.

மனம் மட்டும்
கவனமாய் கவலைப்படும்.

நாளை
சிட்டுக்கள் மீண்டும் வருமோ ?
இல்லை ஏதேனும்
வேடந்தாங்கலை
வேண்டிச் செல்லுமோ ?

மன்னிப்பே தண்டனை.

Image result for forgive

மன்னியுங்கள்.
மன்னிக்கப்படுவீர்கள்.

தவறுகளின் அரிவாள் வீச்சுக்கு
தண்டனையின் கோடரி வீச்சு
தற்காலிகத் தீர்வுகளையே
தந்து செல்லும்.

மாற்றங்களின்
மெழுகுவர்த்திகளை,
மன்னிப்புகள் மட்டுமே கொளுத்தும்.

பயத்தின் மூக்கணாங்கயிறுகளில்
மனக்காளைகள்
பாதி நேரம் மண்டியிட மறுக்கும்.
தப்பிக்கும் சுரங்கம் தோண்ட
மீதி நேரம் தப்புக்கள் செய்யும்.

தூண்டிலில் மாட்டுவதே
மீனுக்குத் தண்டனை.
தொடர்ந்து தூண்டில் தாண்டும்
மீன்களுக்கோ
நெருங்கி வரும் வலை
தெரிய வருவதில்லை.

தண்டனையின் காயம்
இன்னொரு பிழைக்கு
பிள்ளையார் சுழியாவதுண்டு.
மன்னிப்பின் மடியிலோ
மரணம் கூட மகத்துவமானது.

மன்னிப்பு,
குற்ற உணர்வுகளை
வெற்றி கொள்ளும்.
மற்ற உணர்வுகளை கொஞ்சம்
மாற்றியே வைக்கும்.

தண்டனை
அணைகளைக் கட்டும் முயற்சி.
மன்னிப்போ
வாய்க்கால் வெட்டும் முயற்சி.

தண்டனை,
உடல் சார்ந்த உபாதை,
மன்னிப்போ
மனம் சார்ந்த பாதை.

தண்டனை,
ஒற்றை முகத்தோடு
உலகம் பார்க்கும்.
மன்னிப்போ,
இன்னோர் முகத்தோடு
இதயம் பார்க்கும்.

தண்டனை,
உலகம் பேச
உள்ளத்தை ஊமையாக்கி வைக்கும்.
மன்னிப்போ
மனசை மனசோடு
மதிப்பீட்டு மாநாடு நடத்த வைக்கும்.

தண்டனை,
உயிருக்குள்
கூர்க் கத்திகள் கோர்த்து வைக்கும்.
மன்னிப்போ
உணர்வுகளின்
துருக் கறைகளை துலக்கி வைக்கும்.

தண்டனை,
அழுத்தமாய் எழுதமுயலும்
சுதந்திரம்,
மன்னிப்பு,
சுதந்திரமாய் எழுதும் அழுத்தம்.

மன்னிப்பு,
விலங்குகளிடமிருந்து
மனிதனை
வித்யாசப்படுத்தும் விருது.
ஆறறிவு மனிதனுக்கு மட்டுமான
ஆத்மார்த்த நன்கொடை.

மன்னியுங்கள்
மன்னிக்கப்படுவீர்கள்.

வேலி..

Image result for theft

திருட்டு,
மனித மனங்களில்
தங்கிவிட்ட இருட்டு.

வீடுகளையும் வீதிகளையும்
வெளிச்சத்தில்
விளக்கி வைத்து விட்டு
இதயங்களை
இருட்டுக்குள்
பதுக்கி வைத்தல் பிழையல்லவா ?

முத்தானாலும்
முள்ளானாலும்
எல்லை தாண்டி எடுக்காதே.

உனக்கானதை மட்டுமே
நீ எடுத்தால்,
நம் கதவுகளுக்குப்
பூட்டு தேவையில்லை,
நம் வீடுகளுக்கோ
கதவே தேவையில்லை.

திருடுதல்
தீயசிந்தனைகளின்
அடையாள அட்டை,
தூயதைக் கெடுத்து
தீயதை எடுத்தல் என்பது
கடலை விடுத்து
உப்பை எடுக்கும் முயற்சியே.

எட்டி உதைக்கும்
அதிக வட்டி,
திருப்பித் தர மறுக்கும்
விரும்பிப் பெற்ற கடன்,
நேரம் சுரண்டும்
கடமைத் தவறல்,
எல்லாம்
திருட்டின் அவதாரங்களே.

உன் வேலியில்
முருங்கை மரம் நிற்கிறது.
நிற்கட்டும்.

அவன் வேலியில் வெள்ளரி
படர்கிறது.
படரட்டும்.

உனக்குள்ளதில் திருப்தி,
பற்றற்றதில் பற்றுக் கொண்ட
புத்தனின் அடுத்த அதிகாரம் தான்.

அது சரி,
திருட்டு இல்லையேல்
வேலிகள் எதற்கு ?

வேலி தாண்டும் பயிர்களும்
எல்லை தாண்டும் உயிர்களும்
ஆசைக் கால்களின்
அழிவு நீளல்களே.

வரவேற்பாளர்

Image result for receptionist

ஆடைகளில் சுருக்கம் விழாமல்,
உதடுகளின் சாயம்
உருகி வழியாமல்,
அலங்காரப் பதுமையாய்
வரவேற்பறையில் நான்.

தொலைபேசிச் சத்தம்
கேட்டுக் கேட்டு என்
காது மடல்கள் ஊமையாகிவிட்டன

போலியாய் சிரிப்பதற்காகவே
எனக்கு
ஊதிய உயர்வு
அவ்வப்போது வருகிறது.

கண்களில் கொஞ்சம்
காமம் கலந்தே
பாதி கண்கள் என்னைப் பார்க்கின்றன.
மீதி கண்கள்
அவசர யுகத்தின் பிரதிநிதிகள்
கடிகாரம் மட்டுமே பார்த்து வாழ்பவர்கள்.

என் குரலுக்குள்
குயில் இருக்கிறதாம் !
எனக்கு இருப்பவை தோகைகளாம் !
வர்ணனை வார்த்தைகளிலும்
புன்னகை மட்டுமே பூக்க வேண்டுமென்னும்
கட்டாயக் கட்டுகளில் நான்.

எனது சின்ன வயது மகள்
மாலையில் மறக்காமல்
மல்லிகை வாங்கி வரச் சொன்னாள்.

பூக்களின் வாசனைகளுக்கிடையே
என்
சராசரி வாழ்க்கையின் எதார்த்தம்
நாசி யை எட்டும் போது
முந்திக் கொண்டு தட்டுகிறது
மீண்டும் அந்த தொலைபேசி.

விரைவாய் மதிய உணவு முடித்து
கிடைக்கும் இடைவேளையில்
சிறிதே இளைப்பாறி
மீண்டும் உதடுகளில் புன்னகை நட்டு
முன்னறை வாசலில் தஞ்சம்.

அமிலச் சாலையில் கழுவப்பட்டு
மொத்த மனசும்
சாயம் போனதாய்த் தோன்றும்,
ஒவ்வொரு
மாலைப் பொழுதுகளிலும்.

சிரித்து வாழவேண்டும் என்று
கவிஞன் சொன்னது என்னிடம் தானோ ?
சிந்தனைகள் விட்டு விட்டு
வட்டமிட
கவலையாய் இருக்கிறது இப்போது.

மூன்று மணிக்கு பேசுகிறேன்
காலையில் கண்வலியுடன்
கணவன் சொன்னான்.
கடிகாரம் இலக்கைத் தொட்டபின்னும்
பயணத்தைத் தொடர,
இதுவரை ஒலித்த தொலைபேசி
இப்போது மட்டும் ஊமையாய் !

 

பகடைப் பொருளாதாரம்

Image result for throwing dice

சூதாட்டம் மீதான நாட்டம்
அழிவுகள்
விளையும் தோட்டம்.

நம்பிக்கை வைக்க
ஆயிரம் இடங்கள் இருக்க,
சுற்றும் சக்கரத்தில்
சோம்பேறிக் கூட்டம்
நம்பிக்கை வைக்கும்.

விதைக்காத இடத்தில்
அறுவடை செய்ய,
கனவுகளின் கால்கள்
கோணிகளுடன் காத்திருக்கும்.

அடுத்தவன்
தோற்க வேண்டும் எனும்
பிரார்த்தனைகளே
இங்கே
ஆண்டவன் மீது
அடுக்கடுக்காய் அடுக்கப்படும்.

அடக்க முடியாத
மனக் குதிரைகள் இங்கே
மீண்டும் மீண்டும்
தலை தெறிக்க ஓடும்.
தவறான ஓடு தளத்தில்.

மாயமான் கனவுகளில்
வேடர்கள்
சிறைப்பிடிக்கப் படும்
கானகம் இது.

வெறும்
கற்பனைகளின் கோட்டையில்
சிம்மாசனம் போடும்
பகல் கனவின்
படுக்கை அறை இது.

ஒரு பானை சோற்றுக்கு
ஒரு கல் பதமென்று
போதையுடன் புலம்பித் திரியும்
வர்ணக் கூடத்தின்
நிறமற்ற வாழ்க்கை இது.

எது எப்படியோ,
முடிவு மட்டும்
சாதகமாய் இருப்பதற்கான
சாத்தியங்கள் இல்லை.

கணிப்பொறி.

Image result for Girl with Computer

என் இனிய கணிணியே.

இவ்வளவு நேரம் தொடர்ச்சியாக
நான்
யார் முகத்தையும் பார்த்ததில்லை.

இவ்வளவு நேரம் யாரோடும்
விரல் தீண்டல் தொடர்ந்ததில்லை.

அதெப்படி
உன்னால் மட்டும் முடிகிறது ?
கண்ணுக்குத் தெரியாத
கணிதச் சுருக்கங்களின் சுளுக்கெடுக்க ?

முகம் மனசின் கண்ணாடி
என்பது
முகமே கண்ணாடியாகிப் போன
உன்னிடம் தானே உண்மையாகிறது ?

பொழுதுகள் மாறினாலும்
முகங்கள் மாறினாலும்
விடைகளை மாற்ற மறுப்பது
நீ மட்டும் தானே.

நீ மட்டும் இல்லையென்றால்
உலகம் ஒருவேளை
காகிதக் கட்டுக்களில்
புதைக்கப் பட்டிருக்கலாம் !!!

நீ மட்டும் இல்லையென்றால்
உலகைப் பிடித்தெடுக்கும்
ஓர் வலை
உருவாகாமலேயே போயிருக்கலாம்.

நீ என்ன செய்வாய் என்று கேட்ட காலம்
போய்விட்டது.
என்ன செய்ய மாட்டாய் என்கிறது
கலியுகம்.

யாரோ பகல் கனவு கண்டால்
அதை
பிரதி எடுத்துக் கொடுக்கிறாய்.
இரவுக் கனவை இரவல் வாங்கி
மென்பொருளாய் மொழி பெயர்க்கிறாய்.

இப்போதெல்லாம்
மனித மொழிகளுக்கிங்கே மரியாதை இல்லை
கணிணி மொழிகளுக்குத் தான்
உலக அங்கீகாரம்.
என்ன..???
விரல்களால் பேச வேண்டும்
அது ஒன்று தான் வித்தியாசம் !!!

சில ஆண்டுகளுக்கு முன்பு
உலகம் உன்னை ஆண்டுகொண்டிருந்தது
இப்போது
நீ ஆட்சியைக் கைப்பற்றி விட்டாய்.

மிட்டாய்க் கடைகளின்
இனிப்புக் கணக்குகள் கூட
நீ இல்லையென்றால் கசந்து போகிறது.

ஏனென்றால்
எங்கள் மூளைக்குச் செல்லும்
முக்கால் வாசி நரம்புகளும்
விரலுக்கும் விழிகளுக்குமாய்
இடம் பெயர்ந்து விட்டது.

எங்கள் மானிட சமூகம்
வைரஸ் வினியோகம் செய்வது,
நோய் தருவதும் மருந்து தருவதும்
நாங்கள் என்பதை
நீ
மறந்துவிடாமல் இருக்கத்தான்.

காலம் மாறிவிட்டது
முன்பு கலப்பை இருந்த இடத்தில்
இப்போது கணிப்பொறி.
முன்பு வரப்புகள் இருந்த இடத்தில்
இப்போது வன்பொருள்கள்.

ஆனாலும் எங்கள் வயிறு
இன்னும்
மென்பொருள் தின்னப் பழகவில்லை.

பெய்யெனப் பெய்யும் பொய்கள்.

 

Image result for Lie

அரிச்சந்திர முலாம் பூசிய
அவசர காலப் பொய்களுக்கே
அமோக விளைச்சல்
இன்று.

உண்மைகளைத் தேடிய
இதயத்தின் சாலைகளெங்கும்
பொய்களின்
பாதத் தடம் மட்டுமே.

வறண்ட வார்த்தைகளை
விற்றுத் தள்ளுகிறது
ஈரமாய்க் கிடக்கும் நாக்கு.

சில பொய்கள்
மௌனத்துக்குப் பின்னால்
மறைந்திருந்து சிரிக்கும்.

சில பொய்கள்
புன்னகைக்குப் பின்னால்
சிரிக்காமல் இருக்கும்.

குலுக்கிய கைகள்
விட்டுப்போன பொய்கள்
விரலிடுக்கில்
பிசுபிசுத்துக் கிடக்கும்.

சில பொய்கள்
தலைமுறைப் பழக்கத்தோடு
வெங்காய ஆடைகளாய்
உருமாறி இருக்கும்.

பொய்க்கால் குதிரைகளை
சில
நிஜக்கால்கள்
நிற்க வைப்பது போல,
பல பொய்கள்
உண்மையின் ஆடைகளை
தற்காப்புக்குப் போர்த்தியே
தைலைநீட்டும்,
உள்ளுக்குள் அவை
நிர்வாணமாய் உலவும்.

பொய்மையும் வாய்மையிடத்து
என்றான் வள்ளுவன்,
தவறாய் புரிந்ததாலோ என்னவோ
பொய்மைகள் மட்டுமே
இன்று
வாய்மையின் இடத்தில்.

சமதளப் படிக்கட்டுகள்

Image result for Appreciation painting

பாராட்டுக்கள்
படுக்கைகளல்ல,
அது
பந்தையக் குதிரையைப்
பயணிக்கச் சொல்லும்
துப்பாக்கிச் சத்தம்.

சேவல்ச் சத்தம்
இரவைக் கழுவியதன்
விழிப்பு மணியோசை.
இன்னொரு தூக்கத்தின்
முன்னுரைத் தாலாட்டல்ல.

பயணங்கள்
பாதைகளையும்,
உன் பாதங்களையும் சார்ந்தது,
அது
மைல் கற்களின் முகம் சார்ந்ததல்ல.

பாராட்டுக்களில்
முகம் கழுவிக்கொள்.
ஆனால்
பாராட்டுக்களின் பள்ளத்தில்
உனக்கு நீயே
கல்லறை கட்ட வேண்டாம்.

பூக்கள் கொடுத்துப்
பழக்கப்பட்டவர்கள் இருக்கிறார்கள்.
முட்கள் சூட்டியே
பழக்கப்பட்டவர்கள் இருக்கிறார்கள்.
நீயோ
செடிகளை மட்டுமே சார்ந்திரு.

இலையுதிர்க் காலங்களெல்லாம்
கிளைகளோடு தான்,
அவை
அடி மரத்துக்குக்
கோடரி வைப்பதில்லை.

பிம்பங்களும்,
நிழல்களும்
உன்னைச் சார்ந்தவையே.
உன் தராசுத்தட்டு
அன்னிய மதிப்பீடுகள் முன்
மண்டியிட வேண்டாம்.

சிட்டுக்களை
சிங்கங்களென்பதும்,
ஆம்பல் செடிகளை
அரளிச்செடிகள் என்பதும்
தற்காலிகத் திரைகள் தான்.
ஆட்டம் துவங்கினால் அவிழ்ந்துவிடும்.

பாராட்டுக்களோடு
கைகுலுக்கு.
அடுத்த பாராட்டுக்காய்
உன்னை புதுப்பித்துக் கொள்.
சாய்வு நாற்காலியில் விழுந்து
ஓய்வு ஊதியம் தேடாதே.

உன் முகத்துக்கு முன் நீளும்
வெள்ளைப் பூக்களையும்,
முதுகுக்கும் பின் பாயும்
விகாரக் கற்களையும்
புன்னகையோடு சேகரி.
நீ விரும்பினாலொழிய
உன் நிழல் உடைந்து போகாது.

அறிக்கைச் சுவரொட்டிகளுக்கு
சிறு புன்னகையை மட்டும்
கையொப்பமாய் இட்டுவிட்டு
உன்
பயணம் தொடரட்டும்.

ஆழ்கடலில்
அலைகள் இருப்பதில்லை.

கிளி ஜோசியம்.

Image result for Kili Josiyam

கிளைகள் வெறிச்சோடிக் கிடக்கும்
அந்த
ஆலமர அடியில்
கூண்டுக்குள் இருக்கிறது அந்தக் கிளி.

வரிசையாய் அடுக்கப்பட்டிருக்கும்
அட்டைகளை,
அலகுகளில் கொத்திக் கலைத்தெடுத்து,
பின்
நெல்மணி கொத்தி நகர்ந்து நிற்கும்.

ஒவ்வோர் அட்டையும்
ஒவ்வோர் பதில் சொல்லும்.
எந்த பதில்
எந்தக் கேள்விக்கு என்ன விடையானாலும்,
கிளிக்குக் கிடைப்பதென்னவோ
மீண்டும் அந்த கம்பி வாழ்க்கை தான்.

பறவைகள் வானத்தில் பறக்கும் போது
புரியாமல் பார்த்து நிற்கும்
பாதி இறகு வெட்டப்பட்ட
அந்த பச்சைக் கிளி.

பூரிக்கும் பூக்களோடு பூ முகம் மோதி,
கவிதைக் காற்றோடு கண் விழித்து
வானுக்கும் பூமிக்குமிடையே
வட்டமிடும் வாழ்க்கை
கட்டளைக் கிளிக்கு மறந்தே விட்டது.

அதன் வாழ்க்கை வரைபடம்
அகிலத்தின் அழகிலிருந்து திருடப்பட்டு
அலகு இடைவெளி அளவுக்கு
சுருக்கி இறுக்கிக் கட்டப்பட்டுவிட்டது.

கூண்டுக்கு வெளியே மூன்றடி,
கூண்டுக்குள் மூன்றடி.
ஆறடிக்குள் அடைபடுவது
மனிதனுக்குப் பின் இந்த தனிமைக் கிளிதானோ ?.

சோகத்தின் சக்கரங்களில்
சுற்றிக்கட்டப்பட்டிருக்கும் மக்களுக்கு,
சலுகைச் சமாதானம் விற்று
சில்லறை தேடிக்கொள்ளும்
சின்ன ஓர் வாழ்க்கை ஜோசியம்.

மனசின் மந்திர அறைகளில்
கவலைகள் முரண்டு பிடித்தாலும்,
கற்றதை ஒப்புவிக்கும் பிள்ளைப் படபடப்பில்
நல்லதைச் சொல்லி
கை நீட்டி நிற்பான் கிளி ஜோசியக்காரன்.

ஏதும் புரியாமல்
அடுத்த கதவு திறப்புக்காக
கம்பி கடித்துக் காத்திருக்கும்
அந்த அழகுக் கிளி.