காதல் மொழிகள் ஐந்து !

காதல் மொழிகள் ஐந்து !

THE FIVE LOVE LANGUAGES

Image result for Romantic couple

“என்ன சொன்னாலும் என் பொண்டாட்டி புரிஞ்சுக்கவே மாட்டேங்கறா” என புலம்பாத கணவர்களையும், “அவருக்கு என்னிக்கு இதெல்லாம் புரியப் போவுது” என புலம்பாத மனைவியரையும் கண்டுபிடிப்பது என்பது தும்பிக்கையில்லாத யானையைக் கண்டுபிடிப்பது போல சிரமமானது.

எல்லா தம்பதியருக்குள்ளும் இருக்கும் ஒரு மிகப்பெரிய சவால் இது. புரிந்து கொள்ளக்கூடிய வாழ்க்கைத் துணை அமைந்தால் வாழ்க்கை அற்புதமாக இருக்கும். மனைவியைப் புரிந்து கொள்ளும் கணவனும், கணவனைப் புரிந்து  கொள்ளும் மனைவியும் அமைவது இறைவன் கொடுத்த வரம் எனலாம்.

ஆனால் பெரும்பாலான குடும்பங்களில் இந்த புரிதல் இருப்பதில்லை. அதனால் நதிபோல நடக்க வேண்டிய குடும்ப வாழ்க்கை சுனாமி பொல சுருட்டி அடிக்கும். சண்டைகளும், சச்சரவுகளும், ஏக்கங்களும், எதிர்பார்ப்புகளும், நிராசைகளுமாய் தான் பொழுதுகள் கடந்து போகும்.

“குடும்ப வாழ்க்கைன்னாலே அப்படித் தான் பாஸ்.. நாம ஒண்ணும் பண்ண முடியாது. இது நம்மளோட விதி”. என புலம்பும் மக்களைப் பார்த்து கேரி சேப்மேன் சொல்கிறார், “விதியாவது மண்ணாவது, இந்த சிக்கலையெல்லாம் சரி பண்றது ரொம்ப ஈஸி”.

“சும்மா காமெடி பண்ணாதீங்க சார்”. என நம்பாமல் பார்க்கும் மக்களுக்காக அவர் எழுதிய புத்தகம் தான் “த ஃபைவ் லவ் லேங்குவேஜஸ்”. தமிழில் ஐந்து காதல் மொழிகள் என சொல்லலாம்.

ஒவ்வொரு மனிதனும் புரிந்து கொள்ளக்கூடிய ஒரு மொழியோ, சில மொழிகளோ இருக்கும். தமிழே தெரியாத ஸ்பெயின் நாட்டுக் காரனிடம் போய், “சௌக்கியமா இருக்கீங்களா” என்று கேட்டால் “டே கே ஸ்பெஸ் அவ்லான்டோ” என்று ஸ்பேனிஷ்வார்கள். “என்ன சொல்றேன்னு எனக்குப் புரியலே” என்பது தான் அதன் பொருள். எல்லோருக்கும் புரியக்கூடிய மொழியில் பேசினால் தான் அந்த பேச்சுக்கு ஒரு அர்த்தம் உண்டு. உரையாடலின் அடிப்படை இது தான். பேசுபவர் எளிமையாய் பேசவேண்டும், கேட்பவர் முழுமையாய் உள்வாங்க வேண்டும். அவ்வளவே.

“கரடியா கத்தறேன்.. கேக்குதா பாரு” என கத்தினாலும் புரியாத மொழியில் பேசினால் புரியாது தான் ? இந்த விஷயத்தைத் தான் அவர் தனது நூலில் எழுதியிருக்கிறார். அந்த நூல் சாதாரண நூல் இல்லை. ஒரு கோடி பிரதிகள் விற்றுத் தீர்ந்த நூல். அமெரிக்காவின் டாப் செல்லிங் லிஸ்டில் பல ஆண்டுகள் ஃபெவிகால் போட்டு அமர்ந்து கொண்ட நூல். உலகெங்கும் சுமார் ஐம்பது மொழிகளில் மொழிபெயர்க்கப்பட்டு கொண்டாடப்பட்ட நூல்.

அதெப்படி சாத்தியம் ? அவ்வளவு பெரிய அப்பாடக்கரா அந்த ஆசிரியர் என தேடினால் கிடைக்கும் விஷயங்கள் சுவாரஸ்யமானது. உளவியலில் டாக்டர் பட்டம், கலையில் முதுகலைப்பட்டம், ஆன்மீக கற்பித்தல் பிரிவில் முதுகலைப்பட்டம் என வாங்கி அடுக்கியவர். சுமார் முப்பது ஆண்டுகள் குடும்ப கவுன்சிலிங் துறையில் முழுமையாக ஈடுபட்டவர், என கிடைக்கின்ற தகவல்கள் அவருடைய நூல் மீதான மரியாதை உயர்த்துகிறது.

அப்படி என்ன தான் சொல்கிறார் ?

ஒவ்வொரு மனிதனுக்கும் ஒரு காதல் மொழி உண்டு. ஒரு தாய்மொழியோடு கூட கொசுறாய் இன்னொரு மொழி இருப்பது போல இரண்டாவது காதல் மொழி ஒன்றும் இருக்கும். மூன்றாவது மொழி கூட சிலருக்கு இருக்கலாம். ஆனால் முதல் இரண்டு மொழிகளும் தான் மிக முக்கியமானவை.

உங்கள் வாழ்க்கைத் துணைக்கு எந்த காதல் மொழி புரியும் என்பதைக் கண்டு கொள்வதில் இருக்கிறது வாழ்க்கையின் வெற்றி. அப்படிக் கண்டு கொண்டால், அதன்பின்னர் நீங்கள் அந்த மொழியில் உங்கள் வாழ்க்கைத் துணையிடம் பேசலாம். உங்கள் குடும்ப உறவு நெருக்கமாய் வளரும்.

அப்படி என்னென்ன காதல் மொழிகள் ?

  1. பாராட்டு வார்த்தைகள்
  2. தரமான நேரம்
  3. பரிசு பெறுதல்
  4. ஒத்தாசை விரும்புதல்
  5. தொடுதல்

இந்த ஐந்தும் தான் அந்த காதல் மொழிகள். இந்த ஐந்து மொழிகளில் உங்கள் வாழ்க்கைத்துணைக்கு எந்த மொழி புரியும் ? எந்த மொழி பிடிக்கும் ?

  1. பாராட்டு.

சிலருக்கு வார்த்தைகள் மிக முக்கியம். காதலாகிக் கசிந்துருகும் மனம் கணவனுக்கு இருந்தாலும், “நீ ரொம்ப அழகா இருக்கே செல்லம்” என கணவன் ஒரு முறை செல்லமாய்ப் பேசுவதை மிகவும் விரும்புவார்கள். அவர்களுக்கு அடிக்கடி அவர்களுடைய செயல்களைப் பாராட்டுவதோ, அவர்களுடைய குணாதிசயங்களைப் பாராட்டுவதோ, அல்லது உறவு நிலையை பாராட்டுவதோ, தோற்றத்தைப் பாராட்டுவதோ மிகவும் உற்சாகமளிக்கும்.

உங்களுடைய வாழ்க்கைத் துணையின் காதல் மொழி பாராட்டு எனில், உங்களுடைய வாழ்க்கை அதைச் சுற்றி இருக்க வேண்டும். மனைவி வைக்கும் மீன் குழம்பு சூப்பராக இருக்கிறதென ரெண்டு சட்டி குழம்பை காலி பண்ணுவதோடு நின்று விட வேண்டாம். “நீ மீன் குழம்பு வெச்சா மீனுக்கே நாக்குல எச்சில் ஊறும்” ந்னு ரெண்டு பாராட்டு வாக்கியத்தையும் சேர்த்து சொல்லுங்க, வாழ்க்கை அமோகமா இருக்கும்.

  1. தரமான நேரம்.

தரமான நேரம் என்பது ஸ்பெஷலாய் உங்கள் வாழ்க்கைத் துணைக்கு மட்டுமாக நீங்கள் ஒதுக்கும் நேரம். அது டின்னர் முடிந்தபின் மொட்டை மாடியில் போய் அமர்ந்து பேசும் நேரமாய் இருக்கலாம். சாயங்காலம் காலார நடந்து போய் இயற்கையை ரசிக்கும் நேரமாய் இருக்கலாம். அல்லது ஒரு காபி ஷாப் போய் ஒற்றைத் தேனீரை ஒன்றரை மணி நேரம் குடிக்கும் சமயமாகவும் இருக்கலாம். செல்போனை மூர்ச்சையாக்கி, வேறெந்த கவனச் சிதறலுக்கும் இடக் கொடுக்காமல் இருப்பது தான் தரமான நேரம்.

நாலுமணி நேரம் கிரிக்கெட் பார்த்து  விட்டு, “காலைல இருந்தே வீட்ல தானே இருக்கேன்” இதை விட வீட்டுக்கு என்ன நேரம் செலவிடணும் என கேட்பது இதில் சேராது.

இங்கே மனம் விட்டுப் பேசுவதும், மனம் திறந்துக் கேட்பதும் தான் பிரதானம். பெரும்பாலும் பெண்களுக்கு இந்த காதல் மொழி தான் தேவையாக இருக்கும். அத்தகைய வாழ்க்கைத் துணை உங்களுக்கு அமைந்தால் நீங்கள் அவர்களோடு அதிக நேரம் செலவிட வேண்டும். அதை விட்டு விட்டு வேறென்ன செய்தாலும் அவர்கள் திருப்தியடைவதில்லை.

  1. பரிசு

சிலருக்கு பரிசுகள் பெறுவது ஆனந்தமாய் இருக்கும். அந்தப் பரிசின் விலை முக்கியமல்ல, ஆனால் அது கணவனிடமிருந்து கிடைக்கிறது, அல்லது மனைவியிடமிருந்து கிடைக்கிறது எனும் சிந்தனை தான் பெரிது. ஒரு காட்பரீஸ் சாக்லேட்டாகவோ, நாலுசவரன் சங்கிலியாகவோ எப்படி வேண்டுமானாலும் இருக்கலாம்.

எதிர்பாராத நேரத்தில் நீட்டும் ஒரு சின்னப் பரிசு அவர்களை திக்கு முக்காட வைத்து விடும். உறவில் இருக்கும் விரிசலிலெல்லாம் அது சட்டென காங்கிரீட் போட்டு அடைத்து விடும். பரிசு என்பது, “நான் உன்னை நேசிக்கிறேன், நான் உன்னை நினைக்கிறேன்’ என்பதன் வெளிப்பாடாய் அவர்கள் புரிந்து கொள்வார்கள். உங்கள் வாழ்க்கைத் துணையின் காதல் மொழி பரிசு எனில், அதை அடிக்கடி, வித்தியாசம் வித்யாசமாய் கொடுங்கள். தப்பித் தவறி கூட அவர்களுடைய பிறந்த நாள், திருமண நாள் உட்பட எந்த ஸ்பெஷல் டேயையும் பரிசு இல்லாமல் செலவிடாதீர்கள்.

 

  1. ஒத்தாசை

சிலருடைய காதல் மொழி “ஒத்தாசை” எதிர்பார்ப்பது. வேலையில் கூட மாட ஹெல்ப் பண்ணினால் சந்தோசப்படுவார்கள். உங்கள் மனைவியின் காதல் மொழி இதுவானால், “காய்கறி வெட்டவா ?” என கேட்டால் அவர்கள் ரொம்ப சந்தோசப்படுவார்கள். அழுக்காய் கிடக்கும் துணிகளை அள்ளி வாஷிங் மெஷினில் போட்டால் சிலிர்த்து போவார்கள். காயப் போட்ட துணிகளையெல்லாம் எடுத்து அடுக்கி வைத்தால் மகிழ்ந்து போவார்கள்.

அன்புடன் உதவி செய்ய தயாராய் இருப்பதே முக்கியம். இதை சும்மா ஒரு கடமைக்காகச் செய்யக் கூடாது. ஆத்மார்த்தமான அன்புடன் செய்ய வேண்டும் என்பது மிகவும் முக்கியம். இந்தக் காதல் மொழி உடையவர்களிடம் போய், “நீ சூப்பரா காய்கறி வெட்டறே” என பாராட்டு மொழி சொன்னால் “ஆமா… வெட்டியா இருந்துட்டு கருத்து சொல்ல வந்துட்டாரு…” என வெடிப்பார்கள்.

 

  1. தொடுதல்

தொடுதல் என்பது தாம்பத்ய உறவு மட்டுமல்ல. வீட்டில் தினசரி நடக்கும் செயல்களில் கணவன் மனைவியிடையே இருக்கின்ற சின்னச் சின்ன அன்பின் தொடுதல்களை, பாராட்டின் தொடுதல்களை, சில்மிஷத் தொடுதல்களை எல்லாம் இதில் சேர்த்துக் கொள்ளலாம்.

காலை நேரம், குட்மார்னிங் சொல்லி கொடுக்கின்ற முத்தம், வாழ்க்கைத் துணைக்கு ஒருவேளை ஆடி கார் வாங்கிக் கொடுப்பதை விட ஆனந்தம் தரலாம். அப்படியெனில் அவருடைய காதல் மொழி என்ன என்பது உங்களுக்குப் புரிந்திருக்கும்.

இந்த ஐந்து காதல் மொழிகளும் தான் அதி முக்கியமானவை. உங்கள் வாழ்க்கைத் துணைக்கானது எந்த காதல் மொழி என்பதை நீங்கள் கண்டு பிடிக்க வேண்டும். அதற்குத் தக்கபடி நீங்கள் உங்களுடைய காதல் வாழ்க்கையை இயக்க வேண்டும்.

உங்கள் துணைவிக்கு பரிசு தான் காதல் மொழி எனில், “துணி காயப் போடவா ?” என கேட்டால் கடுப்பாவார்கள். “கிளம்புப்பா காத்து வரட்டும் ” என்பார்கள்.

உங்கள் வாழ்க்கைத் துணைவருக்கு பாராட்டு தான் காதல் மொழி எனில் அவரிடம் போய், “வாங்க கொஞ்ச நேரம் பார்க்ல் ல போய் உட்காரலாம்” என்று சொன்னால் பதறிப் போவார்கள். “பார்க்ல என்ன இருக்கு, இங்கே ஓரமா படில உக்காந்துக்கலாமே” என்பார்கள்.

எனவே உங்கள் காதல் பார்ட்னருக்கு எது முதன்மையான காதல் மொழி என்பதைக் கண்டு கொள்ளுங்கள். பாராட்டு ஒருவருடைய காதல் மொழி எனில் அவரை விமர்சிப்பதையோ, கிண்டலடிப்பதையோ தவிருங்கள். பரிசு ஒருவருடைய காதல் மொழி எனில் அவர் தருகின்ற பரிசை உதாசீனம் செய்யாதீர்கள். தனிப்பட்ட நேரம் ஒருவருடைய காதல் மொழியெனில் அவருக்காய் நிறைய நேரம் ஒதுக்குங்கள்.

இந்த மையக் கருத்தைத் தான் அவர் அந்த 135 பக்க நூலில் சுவாரஸ்யமாய் எழுதியிருக்கிறார். “காதலின் அடிப்படை உங்களுக்குப் பிடித்தமானதை அடுத்தவர் செய்ய வேண்டுமென எதிர்பார்ப்பதல்ல, அவருக்குப் பிடித்தமானதை நீங்கள் செய்வது” ! இதையே ஒவ்வொருவரும் செய்தால் குடும்பங்கள் அன்பில் செழிக்கும், உறவில் வளரும்.

இப்போது உங்கள் மனதில் ஓடுகின்ற ஒரே ஒரு கேள்வி இதுவாகத் தான் இருக்கும். என் துணையின் காதல் மொழியை நான் எப்படி கண்டுபிடிப்பது ?. அதற்கு ஒரு சின்ன சோதனை இருக்கிறது. கணவன் மனைவி இருவரும் தனித்தனியே இந்த கீழ்க்கண்ட குட்டித் தேர்வை எழுதுங்கள். ஒவ்வொரு கேள்விக்கும் உங்களுடைய பதிலை டிக் செய்யுங்கள், கடைசியில் அ, ஆ, இ, ஈ எல்லாவற்றையும் தனித்தனியே கூட்டுங்கள். எது அதிக மதிப்பெண் பெறுகிறதோ, அது தான் உங்கள் காதல் மொழி. எது இரண்டாவது அதிக மதிப்பெண் பெறுகிறதோ அது செகன்ட் மொழி.

இப்போது, உங்கள் பரீட்சை பேப்பரை உங்கள் வாழ்க்கைத் துணையிடம் கொடுங்கள். அவரிடம் இருப்பதை நீங்கள் வாங்கிக் கொள்ளுங்கள். இப்போது உங்கள் துணையின் காதல் மொழி என்னவென உங்களுக்கே தெரியும்.

அப்புறமென்ன ? கேரி சேப்மேனுக்கு ஒரு பெரிய நன்றி சொல்லிவிட்டு ஆனந்தமான வாழ்க்கையை ஆரம்பிக்க வேண்டியது தான்.

காதல் சோதனை

 

 

ஒவ்வொரு கேள்விக்கும் இரண்டு பதில்கள் கொடுக்கப்பட்டிருக்கின்றன அதில் ஒன்றை  மட்டும் தேர்ந்தெடுங்கள்.

 

 

 

அ  : உன்னிடமிருந்து பாராட்டு பெறுவது  எனக்குப் பிடிக்கும்.

உ : உனது தழுவுததே என் விருப்பம்.

ஆ : என்னோடு தனியே நீ நேரம் செலவிட வேண்டும்

ஈ : எனக்கு நீ உதவி செய்வதே என்மீதான உனது அன்பின் வெளிப்பாடு

இ : நீ பரிசு கொடுக்கும்போது நான் சிலிர்க்கிறேன்

ஆ : உன்னோடு நீண்ட தூரம் நடந்து போகும்போது நான் மகிழ்கிறேன்

ஈ : நீ எனக்கு உதவுவது எனக்குப் பிடிக்கும்

உ : நீ அணைப்பதோ, தொடுவதோ எனக்குப் பிடிக்கும்.

உ : உன் கரங்களில் நான் இருப்பது எனக்குப் பிடிக்கும்

இ : உன் கரங்களால் தரும் பரிசு வாங்குவது எனக்குப் பிடிக்கும்

ஆ : உன்னோடு எங்கேனும் போவது எனக்குப் பிடிக்கும்

உ : உன் கரம் பிடித்திருப்பதே எனக்குப் பிடிக்கும்.

அ : நான் சொல்வதை நீ ஒத்துக் கொள்வது எனக்குப் பிடிக்கும்.

இ : வெளிப்படையாய் நீ எதேனும் பரிசு தருவது எனக்குப் பிடிக்கும்

8.

உ : உன் அருகில் இருப்பது எனக்குப் பிடிக்கும்

அ : நான் அழகாய் இருக்கிறேன் என நீ சொல்வது எனக்குப் பிடிக்கும்.

ஆ : உன்னோடு நேரம் செலவிடுதல் என் விருப்பம்

இ : உன் கையால் பரிசு வாங்குவது என் விருப்பம்

10 :

ஈ : நீ எனக்கு உதவுகையில் உன் காதலை புரிந்து கொள்கிறேன்

அ : நீ என்னைப் பாராட்டுகையில் உன் காதலை அறிந்து கொள்கிறேன்

ஆ : வீட்டு/வேறு வேலைகளை இருவரும் சேர்ந்து செய்வது என் விருப்பம்.

அ : கனிவான வார்த்தைகள் நீ பேசவேண்டுமென்பது விருப்பம்

12

உ : நீ என்னை கட்டியணைக்கையில் நான் முழுமையடைகிறேன்

ஈ : நீ பேசும் வார்த்தைகளை விட நீ செய்யும் செயல்களே எனக்கு முக்கியம்.

அ : உன் பாராட்டு எனக்குப் பிடிக்கும், உன் விமர்சனங்களை வெறுக்கிறேன்

இ : எப்போதேனும் தரும் ஒரு பெரிய பரிசை விட, அடிக்கடி கிடைக்கும் குட்டிக் குட்டிப் பரிசுகள் எனக்குப் பிடிக்கும்.

உ : நீ என்னைத் தொடும்போது நம் அன்யோன்யம் உணர்கிறேன்

ஆ : நாம் சேர்ந்து பேசும்போதோ, சேர்ந்து ஏதேனும் வேலை செய்யும் போதோ நம் அன்யோன்யம் உணர்கிறேன்.

அ: எனது செயல்களை நீ பாராட்டினால் நான் மகிழ்கிறேன்

ஈ : உனக்குப் பிடிக்காததையும் எனக்காக நீ செய்கையில் மகிழ்கிறேன்.

16

உ : நீ என்னைக் கடக்கும்போதெல்லாம் செல்லமாய் தீண்டினால் எனக்குப் பிடிக்கும்.

ஆ : கரிசனையாய் நான் பேசுவதை நீ கேட்பது எனக்குப் பிடிக்கும்

இ : நிஜமாவே நீ தரும் பரிசுகள் என்னை உற்சாகப்படுத்துகின்றன‌

ஈ : தோட்ட வேலை, வீட்டு வேலையில் நீ உதவுவது என்னை உற்சாகப்படுத்துகிறது.

அ : நான் அழகாயிருக்கிறேன் என நீ சொல்றது எனக்கு ரொம்ப புடிக்கும்

ஆ : என் உணர்வுகளைப் புரிந்து கொள்ள நீ முயல்வது எனக்குப் புடிக்கும்

19

உ : நீ என்னைத் தொடுகையில் நான் பாதுகாப்பாய் உணர்கிறேன்

ஈ : நீ ஒத்தாசைக்கு செய்யும்போது உன் அன்பை உணர்கிறேன்

20

ஈ : நீ எனக்கு அடிக்கடி செய்து தரும் உதவிகள் எனக்குப் பிடிக்கும்

இ : நீயாகவே உருவாக்கித் தரும் பரிசுகள் என்றால் எனக்கு கொள்ளை பிரியம்

21

ஆ : நீ எல்லாவற்றையும் விட்டு விட்டு என்னோடு இருக்கும் பொழுதுகள் என் பிரியத்துக்குரியவை

ஈ : நீ எனக்காக உதவிக்கரம் நீட்டும் பொழுதுகள் என் பிரியத்துக்குரியவை

22

இ : நீ எனது பிறந்த நாளில் பரிசுடன் என்னை வாழ்த்துவது எனக்குப் பிடிக்கும்

அ : நீ அன்பான வார்த்தையை பேச்சிலோ, எழுத்திலோ காட்டும் பிறந்த நாட்கள் எனக்கு ஸ்பெஷல்

23

ஈ : துணிகளை துவைப்பதில், அடுக்குவதில் நீ உதவி செய்வது எனக்குப் பிடிக்கும்

இ : நீ பரிசு தருகையில் நீ என் நினைவாய் இருக்கிறாய் என அறிந்து மகிழ்வேன்

24

இ: எல்லா ஸ்பெஷல் தினங்களையும் நினைவில் வைத்து பரிசு தந்தால் நான் மகிழ்வேன்

ஆ : நான் பேசுவதை அன்பாக நீ கேட்டுக் கொண்டிருந்தால் நான் மகிழ்வேன்

25

ஆ : உன்னோடு பயணம் செய்வது எனக்கு ரொம்ப புடிக்கும்

ஈ : என் தினசரி வேலைகளில் நீ உதவ விரும்புவதே எனக்கு மிகவும் மகிழ்ச்சி

26

உ : எதிர்பாராத நேரத்தில் நீ இடும் முத்தம் எனக்கு ஸ்பெஷல்

இ : காரணமே இல்லாமல் நீ தரும் பரிசு எனக்கு ஸ்பெஷல்

27

அ : நீ என்னை பாராட்டுவது எனக்குப் பிடிக்கும்

ஆ : நீ என் கண்ணைப் பார்த்துப் பேசுவது எனக்குப் பிடிக்கும்

28

இ : உனது பரிசுகள் என்னை சிலிர்ப்பூட்டும்

உ : உனது முத்தம் என்னை சிலிர்ப்பூட்டும்

29

அ : நான் உன்னை நேசிக்கிறேன் என நீ சொல்வது என்னை உற்சாகமூட்டும்

ஈ : நான் கேட்டதும் ஓடி வந்து மகிழ்ச்சியாய் நீ உதவுவது என்னை உற்சாகமூட்டும்

30

உ : தினமும் உன் அரவணைப்பு எனக்கு வேண்டும்

அ : தினமும் உனது பாராட்டு எனக்கு வேண்டும்

மதிப்பெண்களைக் கூட்டுங்கள்

===================================

அ : ………………. பாராட்டு

ஆ : ………………. தரமான நேரம்

இ : ……………….பரிசுகள்

ஈ : ………………..ஒத்தாசை

உ : ………………..தொடுதல்

 

 

 

 

 

 

 

 

கவிதை : வயதானவர்களின் வாழ்க்கை

தலைப்புச் செய்திகளை
மட்டுமே
அவசரமாய் மேய்ந்து வந்த
கண்கள்,
வரி விளம்பரங்களையும்
விடாமல் படிக்கும்.

தொலைக்காட்சியில்
வானிலை அறிக்கை வருகையிலும்
விரல்கள்
ரிமோட் தேடாது.

ஃபேஷன் சானலின்
எண் மறந்து போகும்
நியூஸ் சேனல் எண்
நினைவில் நிற்கும்.

அதிகாலை மூன்றுமணி
தூங்கப் போகும்
நேரமென்பது மாறி,
தூக்கம் வராமல்
எழும்பும் நேரமென்றாகும்.

இந்தக் கால இசை
சத்தம் என்று
சத்தமாய்ப் பேசும்.

இளமைக் கலாட்டாக்கள்
தவறுகளே என்பது
தெரியவரும்

பேசும் போதெல்லாம்
அறிவுரை முறைக்கும்
தத்துவம் தெறிக்கும்

தூங்கும் முன்
மடித்து வைக்கும்
புத்தகத்தில்
ஆன்மீக வாசனை வீசும்.

குடும்ப வாழ்க்கை பலவீனமடைகிறதா ?

(இந்த வார தமிழ் ஓசை நாளிதழின் இலவச இணைப்பான களஞ்சியம் இதழில் வெளியான எனது கட்டுரை)
வாழ்க்கை உறவுகளின் மீது கட்டப்பட்ட புனிதமான ஆலயத்தைப் போன்றது. இந்த ஆலயம் சிதிலமடைகையில் மனித மாண்புகளும், வாழ்வின் புரிதல்களும் அர்த்தமிழந்து போகின்றன.

உயரிய பண்பாடுகளினாலும், அடர்த்தியான கலாச்சார வாழ்க்கை முறையினாலும் உலகின் கவனத்தைக் கவர்ந்த இந்திய குடும்ப வாழ்க்கை முறை சமீபகாலமாகச் சரிவடையத் துவங்கியிருப்பது குடும்ப உறவு முறையில் நம்பிக்கை கொண்டிருப்பவர்களை அதிர்ச்சிக்குள்ளாக்கிருக்கிறது.

பலவீனமான குடும்ப வாழ்க்கைக்கு மேற்கத்திய நாடுகளை உதாரணம் காட்டிய நிலை இன்று மாறி அடுத்த வீட்டு வாசலை நோக்கி விரல் நீட்டும் நிலை உருவாகி வருகிறது. விவாகரத்து விண்ணப்பங்களோடு வழக்கறிஞர்களைச் சந்திக்கும் நகர்ப்புறவாசிகளின் எண்ணிக்கை நாளுக்கு நாள் அதிகரித்து வருவதாக என்னுடைய வழக்கறிஞர் நண்பர் ஒருவர் புள்ளி விவரங்களோடு விளக்கி அதிர்ச்சியளித்தார்.

ஆழமாய் சிந்திக்கையில் பெரும்பாலான விவாகரத்துக்கள் மிகவும் சாதாரண காரணங்களுக்காகவே கோரப்படுகின்றன. மிக மிக முக்கியமான காரணம் கணவன் மனைவியரிடையே இன்றைக்கு குறைந்து போயிருக்கின்ற உரையாடல்கள்.

மாலை நேரங்களில் ஒன்றாக அமர்ந்து மனம் விட்டுப் பேசும் குடும்பங்களில், ஒன்றாக இரவு உணவு அருந்தி குழந்தைகளோடு அளவளாவும் இல்லங்களில் உறவு விரிசல்கள் பெரும்பாலும் நிகழ்வதேயில்லை. கிராமப் புறங்களில் விவாகரத்து குறைவாய் இருப்பதற்கு இந்த கூட்டுக் குடும்ப வாழ்க்கை முறையும், மனம் விட்டுப் பேசுவதற்கு அவர்களுக்கு வாய்க்கின்ற சந்தர்ப்பங்களுமே காரணமாகி விடுகின்றன.

இன்றைய அவசர உலகின் மாலை நேரங்களை தொலைக்காட்சியின் தொடர்கள் திருடிக் கொண்டிருப்பது இதற்கு ஒரு முக்கியமான காரணம் என்பதையும் மறுக்க முடியாது. இன்றைய தேதியில் ஒளிபரப்பாகும் எந்த ஒரு தொலைக்காட்சித் தொடரிலேனும் பலமான அடித்தளமுள்ள ஒரு குடும்ப உறவு சித்தரிக்கப்படவேயில்லை என்பது வேதனைக்குரிய விஷயம்.

திருமணத்துக்கு முன் தாய்மை அடைவதும், மனைவிக்குத் தெரியாமல் இன்னொரு திருமணம் செய்து கொள்வதும், கணவனுக்குத் தெரியாமல் மனைவி இன்னொருவனை நேசிப்பதும் என தொலைக்காட்சித் தொடர் சித்தரிக்கும் கதா பாத்திரங்கள் எல்லாம் வாழ்வின் மீதான நம்பிக்கையை கேள்விக்குள்ளாக்குகின்றன.

தேவையற்ற சந்தேகங்களையும், ‘இப்படி இருப்பதில் தவறில்லை’ என்னும் சஞ்சல மனப்பான்மைகளையும், இதெல்லாம் சகஜம் போலிருக்கிறது என்னும் கலாச்சாரச் சீரழிவிற்குத் துணைபோகும் எண்ணங்களையுமே இவை பரப்புகின்றன.

கணவன் மனைவிக்கிடையேயான புரிதலும், விட்டுக் கொடுத்தலை தோல்வி என்று கருதாத மனப்பான்மையும் இருத்தலே போதுமானது குடும்ப உறவு பலமடைய. மனைவியின் கருத்துக்களைக் கேட்பது தவறென்று கருதும் ஆணாதிக்க சிந்தனையும், கணவனின் பேச்சைக் கேட்பது பெண்ணடிமையோ என குழம்பும் பெண்களின் மனநிலையும் குடும்ப உறவின் விரிசலுக்கான முக்கிய காரணிகள்.

பொருளாதார, உடலியல் சார்ந்த, முரண்பாடுகளுடைய எந்த பிற சிக்கல்கள் இருந்தாலும் உயரிய புரிதலுடைய குடும்பத்தில் உறவுகள் விரிசலடைவதில்லை என்கிறார் அமெரிக்காவின் பிரபல வழக்கறிஞர் கெஸ்லர்.

புதிதாக திருமணமானவர்களைப் பொறுத்தவரையில் பணம், நேரம், பாலியல் போன்றவை உறவு பலவீனத்துக்கான ஆய்வுகள் தெரிவிக்கின்றன.

அமெரிக்கா போன்ற நாடுகளில் திருமணத்து முன்பாக திருமணத் தயாரிப்பாக உளவியல் மருத்துவரிடமோ, அல்லது பிரத்யேக ஆலோசனை மையங்களிலோ சென்று ஆலோசனை பெற்றுக் கொள்ள பெரும்பாலான பெற்றோர்கள் தங்கள் பிள்ளைகளை ஊக்குவிக்கின்றனர். இது புரிதலுடன் கூடிய மணவாழ்க்கையின் ஆரம்பத்துக்கு உதவும் என்பது அவர்களின் நம்பிக்கை. காரணம் தற்போதைய அமெரிக்கா பலமான குடும்ப உறவுகளைக் கட்டியெழுப்ப முடியாமல் திண்டாடி வருகிறது.

மணமுறிவு பிரச்சனைகளின் முடிவு என்று பலர் நினைக்கிறார்கள். அது பெரும்பாலான வேளைகளில் பிரச்சனைகளின் துவக்கம் மட்டுமே. பிரச்சனைகள் வரும்போது எதிர்கொண்டு அதை சுமூகமாக முடிப்பதற்காகத் தான் மனிதர்களுக்கு ஆறாவது அறிவு தரப்பட்டிருக்கிறது. மண முறிவு செய்து கொண்டபின் ஏற்படும் மன அழுத்தமும், அதனால் குழந்தைகளுக்கும் உறவினர்களுக்கும், சார்ந்திருப்போருக்கும் ஏற்படும் மன உளைச்சலும் மண முறிவு செய்தவர்களுக்கு மட்டுமே புரியும் விஷயம்.

மணவாழ்க்கை துன்பத்தை மட்டுமே தரும் குடும்பங்களுக்கு விவாகரத்து ஒரு நோய் நிவாரணி என்று எழும் கோஷங்களை ஐரிஸ் மருத்துவர் டொனாச்சா ஓ ஹோதா கடுமையாக எதிர்க்கிறார். நோயை விடக் கொடுமையான தீர்வு தான் நோய் நிவாரணியா ? என்று அவர் எதிர்கேள்வி விடுக்கிறார்.

அலுவலகங்களின் சுமையை குடும்பங்களுக்குத் தூக்கிச் செல்வதும், அலுவல் அழுத்தங்களை குடும்பத்திலுள்ளவர்கள் மீது காட்டுவதும் கூட உறவு விரிசலுக்குக் காரணமாகி விடுகின்றன. குடும்பம் என்பது சோகங்களை அடுக்கி வைக்கும் சரக்கு அறையோ, எரிச்சல்களை எறிந்து விளையாடும் இடமோ அல்ல. குடும்பம் அலுவலக அழுத்தத்தைக் குறைக்க வேண்டுமே தவிர அலுவலக அழுத்தம் குடும்பத்தைச் சிதைக்கக் கூடாது. இன்றைக்கு மென்பொருள் துறையினரிடையே அதிகரித்து வரும் மணமுறிவுகளுக்கு இதுவே பிரதான காரணம்.

ஜாதகப் பொருத்தம், ஜாதிப் பொருத்தம் பார்க்கும் நமது திருமணங்கள் பெரும்பாலும் தம்பதியரின் இயல்புகளைப் பார்ப்பதில்லை. திருமணத்திற்குப் பிறகு கணவனை மாற்றிவிடலாம் என்று மனைவியும், மனைவியை மாற்றி விடலாம் என்று கணவனும் கருதிக் கொள்வது ஒரு தவறான அணுகுமுறையாகும். மனித குணங்களில் சிலவற்றை மாற்றிவிட முடியும், ஆனால் இயல்பை யாரும் மாற்றி விடமுடியாது.

இந்தியாவில் மணமுறிவு என்பது மிகவும் அரிதாக இருந்த காலம்  மலையேறிவிட்டது. பத்து பதினைந்து ஆண்டுகளுக்கு முன்பு வரை ஆயிரம் பேருக்கு ஐந்து முதல் ஏழுவரை இருந்த இந்த மணமுறிவு, இன்று பல மடங்கு உயர்ந்திருக்கிறது.

மணமுறிவு நிகழ்வதில் ஸ்வீடன் நாடு முதலிடத்தைப் பிடிக்கிறது. இங்கு சுமார் அறுபத்து நான்கு சதவீதம் திருமணங்கள் மணமுறிவில் முடிகின்றன. பெலாரஸ் மற்றும் உக்ரைன் நாடுகளும் ஏறக்குறைய அதே இடத்தில் இருக்கின்றன.

பின்லாந்தில் சுமார் ஐம்பத்து ஆறு சதவீதம் திருமணங்களும், அமெரிக்காவில் சுமார் ஐம்பத்து மூன்று சதவீதம் திருமணங்களும், கனடாவில் நாற்பத்து ஐந்து சதவீதம் திருமணங்களும், பிரான்ஸ் நாட்டில் சுமார் நாற்பத்து மூன்று சதவீதம் திருமணங்களும், சிங்கப்பூரில் சுமார் பத்து சதவீதம் திருமணங்களும், ஜப்பானின் சுமார் இருபத்து ஏழு சதவீதம் திருமணங்களும் மண முறிவில் போய் முடிகின்றன.

அமெரிக்க திருமணங்கள் ஐந்து முதல் எட்டு ஆண்டுகள் வரை சுமூகமாக செல்கின்றன. அமெரிக்காவில் மண முறிவு அதிகமாக இருப்பதைப் போல மறுமணமும் அதிகமாகவே இருக்கிறது. மணமுறிவு செய்பவர்களில் சுமார் எண்பது சதவீதத்தினர் மறுமணம் செய்து கொள்கிறார்கள். முக்கால் வாசி மணமுறிவு வழக்குகளில் பெண்களே விண்ணப்பிக்கிறார்கள் என்கிறது சமீபத்தில் அமெரிக்காவில் நடத்தப்பட்ட ஆய்வு ஒன்று.

ஆய்வுகளின் அடிப்படையில் மண முறிவிற்கான காரணங்களை ஆராய்கையில் தம்பதியினரிடையே போதிய அளவுக்கு உரையாடல்கள் இல்லாமப் போதல், வேறு நபர்கள் மீது எழும் சபலம், மன அழுத்தம், உடல் ரீதியாகவும் மன ரீதியாகவும் பாதிக்கப்படுதல், போதைகளுக்கு அடிமையாதல், அலுவலகத்தில் அதிக நேரம் செலவழித்தல், குடும்ப வாழ்வில் நம்பிக்கையிழத்தல் போன்றவை மிக முக்கியமான காரணங்களாக கோடிடப்படுகின்றன.

கிறிஸ்தவ மதம் திருமண உறவை புனிதமான உறவாக மையப்படுத்துகிறது. கத்தோலிக்கத் திருச்சபை மணமுறிவைக் கடுமையாக எதிர்க்கிறது. எனினும் கிறிஸ்தவ நாடான அமெரிக்கா மணமுறிவில் முன்னிலையில் இருப்பது ஆன்மீக சிந்தனைகள் மக்களை நெறிப்படுத்தவில்லை என்று தான் சொல்ல வேண்டும்.

மணமுறிவினால் தம்பதியரை விட அதிகம் பாதிப்புக்குள்ளாவது அவர்களுடைய குழந்தைகள் தான். பெரும்பாலும் தந்தையை விட்டு தாயுடன் வாழ்க்கை நடத்தும் பிள்ளைகள் தங்கள் வாழ்வின் நிஜமான அக்கறை கொண்ட ஒரு வழிகாட்டியை இழந்து விடுகிறார்கள். வாழையடி வாழையாக இந்த உறவு விரிசல் குழந்தைகள் மனதிலும் பதிந்து விடுகிறது.

உலகளாவிய புள்ளி விவரங்களுடன் ஒப்பிடுகையில் இந்தியா குடும்ப உறவில் பலமான நாடாகத் தோன்றினாலும் இன்றைய கலாச்சார மாற்றங்கள் தொடருமானால் இன்னும் ஓரிரு தலைமுறைகளுக்குப் பின் இந்த பட்டியலில் இந்தியா இடம் பெறுவதற்கான வாய்ப்புகள் அதிகம்.

உறவுகள் நிலைக்க வேண்டுமானால் அன்றாடம் நிகழும் சிறு சிறு விஷயங்களில் கவனம் செலுத்தினாலே போதுமானது. குடும்பம் என்பது தம்பதியர் தோழர்களாக வாழ்வது. இதில் ஆணாதிக்க சிந்தனைகளோ, ஆண் பெண் பாகுபாடுகளோ எழாமல் பார்த்துக் கொள்தல் அவசியம்.

தம்பதியரிடையே ஆழமான மனம் திறந்த உரையாடல்கள் நிகழ வேண்டியது அவசியம். நிகழும் கருத்து மோதல்களில் பேசும் வார்த்தைகள் தங்கள் வாழ்க்கைத் துணையின் மனதில் ஆறாத வடுவாக மாறிவிடக் கூடும் என்னும் கவனத்தோடு உரையாட வேண்டும். இருபுறமும் கூரான வாளைக் கையேந்தும் கவனத்துடன் வார்த்தைகளை பயன்படுத்தவேண்டும்.

தம்பதியர் வார்த்தைகளாலோ, செயல்களாலோ தங்கள் அன்பை அவ்வப்போது வெளிப்படுத்துவது உறவு ஆழமாக வழி வகுக்கும். அலுவலக வேலைகளுக்கு பாராட்டு எதிர்பார்க்கும் நாம் குடும்பம் சார்ந்த பணிகளைச் செவ்வனே செய்யும் போதும் ஒருவருக்கொருவர் பாராட்டிக் கொள்வதே சரியானதும் கூட.

முடிந்து போன பிரச்சனைகளைப் பற்றி மீண்டும் மீண்டும் பேசாமலிருப்பதே பெரும்பாலான பிரச்சனைகளைத் தீர்த்துவிடும். தேவையற்ற மூட்டைகளைத் தூக்கிச் சுமக்கும் கழுதைகளாக மாறாமல், ஆனந்த நிகழ்வுகளை மனதில் சுமந்து பறந்து திரிவதே சிறந்தது.

தேவையற்ற ஆசைகளுக்கு இடம் கொடாமலும், மற்றவர்களோடு தங்களை ஒப்பீடு செய்யாமலும் இருக்கப் பழக வேண்டும். ஆசைகள் என்பவை கடல் அலைகள் போல ஒன்றைத் தொடர்ந்து இன்னொன்று என விடாமல் வந்து கொண்டே இருக்கும். அவற்றில் விழுந்து விடாமல் நம் மனதை நாமே காத்துக் கொள்வது மிக அவசியம்.

ஒருவருக்கொருவர் புரிந்து நடப்பது மிகவும் முக்கியம். தவறு செய்யாமல் இருப்பது மட்டுமல்ல, தவறு செய்தால் அதை ஏற்றுக் கொள்ளும் துணிச்சலையும் வளர்த்துக் கொள்ளவேண்டும். அதிகாலை முதல் இரவு தூங்குவது வரை தன் வாழ்க்கைத் துணையின் உணர்வுகளுக்கும் மதிப்புக் கொடுத்தே நாட்களை செலவிட வேண்டும்.

இருவருமாக சேர்ந்து உணவு உண்பது, தனியே நடப்பது, மற்றவர் சொல்வதை பொறுமையுடன் கேட்பது போன்ற சிறு சிறு செயல்கள் எல்லாம் உறவின் உறுதிக்கு வலுசேர்க்கும்.

சுருக்கமாகச் சொல்லவேண்டுமெனில், உங்களை உங்கள் வாழ்க்கைத் துணை எப்படி நடத்தவேண்டும் என்று விரும்புகிறீர்களோ, அப்படி நீங்கள் அவர்களை நடத்துங்கள். அது எல்லா பிரச்சனைகளையும் தீர்த்து உங்கள் வாழ்வை அர்த்தமுள்ளதாக்கும்.

·