வெற்றிமணி : மனிதருக்கு எத்தனை முகங்கள்

Image result for people and masks

“யப்பா…. சரியான பச்சோந்தியா தான் இருப்பான் போல. அவன் சொன்னதையே மாத்தி சொல்றான். அன்னிக்கு ஒரு மாதிரி பேசறான் இன்னிக்கு ஒரு மாதிரி பேசறான்”

“என்கிட்டே நல்லவ மாதிரி பேசிட்டு, அவ கிட்டே போய் என்னை பற்றி வேற மாதிரி சொல்லியிருக்கா அவ. இவங்களையெல்லாம் நம்பவே கூடாது. புடவை மாதிரி முகத்தை மாத்திகிட்டே இருக்காங்க”

இப்படிப்பட்ட உரையாடல்களை நாம் அடிக்கடி சந்திக்கிறோம். பல வேளைகளில் நாம் இத்தகைய உரையாடல்களை நிகழ்த்தவும் செய்கிறோம். மக்கள் ஹெல்மெட்டை அணிந்து கொள்வது போல முகங்களை அணிந்து கொள்கிறார்கள் என்பது தான் நமது ஆதங்கம்.

உங்க வீட்ல முகம் பார்க்கும் கண்ணாடி இருக்கா ? அப்படின்னா முதல்ல அந்த கண்ணாடி முன்னாடி போய் நில்லுங்க. அந்த கண்ணாடியில் தெரியும் முகம் ஒரு நாளைக்கு எத்தனை தடவை எப்படியெல்லாம் தன்னோட முகத்தை மாற்றியிருக்கு என்பதை யோசிச்சு பாருங்க. அப்போ புரியும் ! முகங்களை மாற்றுவது என்பது நம்மிடமிருந்து துவங்கியிருக்கிறது எனும் விஷயம்.

காலையில் எழும்பி சுடச்சுட ஒரு கப் தேனீர் குடிக்கும் போது இருக்கின்ற முகம் கொஞ்ச நேரத்தில் காணாமல் போய்விடும். அலுவலக பரபரப்புகளில் இன்னொரு முகம் வந்து அமர்ந்து கொள்ளும். கோபமும் எரிச்சலும் அந்த முகத்தில் படரும். அதே நேரத்தில் ஏதோ ஒரு நண்பனின் தொலைபேசி அழைப்பு வருகிறது என வைத்துக் கொள்ளுங்கள், சட்டென இன்னொரு முகம் வந்து தற்காலிகமாய் அமர்ந்து, அந்த கால் முடிந்தவுடன் காலார நடந்து போய்விடும்.

வீட்டை விட்டு வெளியே கிளம்பும்போது பொதுவெளியில் இன்னொரு முகத்தை எடுத்து அணிந்து கொள்கிறோம். அந்த முகம் நமக்கே பிடிக்காத முகமாய் பல நேரங்களில் அமைந்து விடுகிறது.

அப்படியே வண்டியை அலுவலக பார்க்கிங் லாட்டில் நிறுத்தி விட்டு அலுவலகத்துக்குள் நுழையும் போது அணிவோம் பாருங்கள் ஒரு முகம் அந்த முகம் ஒரு சிறப்பான பணியாளனைப் போல ஜொலிக்கும். அதிலும் குறிப்பாக மேலதிகாரியைச் சந்திக்கும் போது முக்கனியின் சுவையைப் பிழிந்தெடுத்த ஒரு புன்னகையும் மரியாதையும் நம்மிடமிருந்து புறப்படும்.

அலுவகலத்தில் அணிவதற்கென நமக்கு பல பிரத்யேக முகங்கள் உண்டு. ரிசப்சனில் இருப்பவர்கள், செக்யூடிரி பணியாளர்கள், கேன்டீன் ஊழியர்கள், துப்புரவாளர்கள், நமக்குக் கீழே வேலை செய்பவர்கள், நமது உயரதிகாரிகள் என ஒவ்வொருவருக்கும் ஏற்ற வகையில் பல முகங்களைக் கொண்டு திரிகிறோம்.

நிமிடத்துக்கு நிமிடம், சூழலுக்கு ஏற்ப அந்த முகத்தை எடுத்து அணிந்து கொள்கிறோம். சில வேளைகளில் நாம் அணிந்திருக்கின்ற முகம் என்ன என்பதில் நாமே குழம்பிப் போவதும் உண்டு. அலுவலகம் முடிந்து வீடு திரும்பும் போது பிள்ளைகளின் முன்னால் புதிய ஒரு முகம். மனைவியின் முன்னால் இன்னொரு முகம் என நாம் அணிந்து கொள்கிறோம்.

அத்துடன் நமது முகங்களின் சதுரங்கம் முடிவடைவதில்லை. ஆலயத்துக்குள் நுழையும் போது நமக்குள் இருக்கின்ற முகங்களில் புனிதத்தின் அதிகபட்ச சாயலுடைய ஒரு முகத்தை அணிந்து கொள்கிறோம். அந்த முகத்தில் பிழையின் சுருக்கங்கள் கூட இருக்காது. கழுவி வைத்த கடவுளைப் போல அந்த முகங்கள் பளிச்சிடும். கடவுளே கண்களைக் கசக்கிக் கொண்டு குழம்பிப் போகும் நிலமையில் நாம் இருப்போம். ஆலயம் முடிந்தபின் கழற்றி வீசப்படும் அந்த முகங்களின் வேலை அடுத்த ஆலய பிரவேசம் வரை தேவைப்படாது.

இப்படி நண்பர்களுடன் பேசுவதற்கு, தோழிகளிடம் பேசுவதற்கு, ரகசிய உரையாடல்களுக்கு, பொதுவெளி உரையாடல்களுக்கு, மேடைப் பேச்சுகளுக்கு, ஆடைப் பேச்சுகளுக்கு என ஒவ்வோர் மேடைக்கும் தயாராக நாம் அவதாரங்களை அணிந்து கொள்கிறோம்.

இத்தனை முகங்களோடு முட்டி மோதி, முட்டியுடைந்து கிடக்கும் நாம் தான் இன்னொருவர் மீது மிக எளிதாக குற்றம் சுமத்தி விடுகிறோம். அதற்குக் காரணம் இல்லாமல் இல்லை. “நாம் நம்மைப் பற்றிய குறைகளை எளிதில் கண்டுகொள்வதில்லை. பிறருடைய குறைகளையே காண்கிறோம். இதற்குக் காரணம் நாம் நம்மைப் பற்றி உள்ளுக்குள் எழுதி வைக்கின்ற சமாதானங்களே” என்கிறது உளவியல்.

நமது வாழ்க்கையைப் பொறுத்தவரை நாம் செய்கின்ற தவறுகளைக் கூட சரியென்றே மனம் பதிவு செய்கிறது. பளிச் எனத் தெரியும் தவறுகளுக்கு “காரண காரியங்களை” துணைக்கு அழைத்துக் கொள்கிறது. அதே தவறை இன்னொருவர் செய்யும் போது “அவன் ஒரு பச்சோந்தி” என பளிச் என சொல்லி விடுகிறோம். எந்த வித தயக்கமும் இல்லாமல்.

அலுவலகத்தில் இரண்டு வேலைகள் இருக்கின்றன என வைத்துக் கொள்ளுங்கள். ஒருவரை அழைத்து ஏதாவது ஒரு வேலையைச் செய்யச் சொன்னால் இருப்பதில் எளிதான வேலையைத் தான் அவர் செய்வார். ” ரெண்டுமே ஒரே மாதிரி வேலை தான்.. ஒண்ணு கஷ்டம் ஒண்ணு ஈசி என்றெல்லாம் கிடையாது” என தனது தேர்வை நியாயப்படுத்துவார். அதே நேரம், கடினமான வேலை அவருக்குத் தரப்பட்டால், “எனக்கு மட்டும் கஷ்டமான வேலை, அடுத்தவனுக்கு ஈசியான வேலை” என்பார். இது யதார்த்தம். இதை ஆய்வு முடிவுகளும் நிரூபித்திருக்கின்றன. நாம் போலித்தனத்தின் இயல்பில் வளர்கிறோம் என்பதையே இது நிறுவியது.

நண்பர்கள் காரசாரமாக வியர்க்க விறுவிறுக்க, கண்கள் சிவக்க, நரம்புகள் புடைக்க அரசியல் விவாதம் செய்வதைக் கண்டிருப்போம். அதே நண்பர் இன்னொரு தடவை கட்சி மாறி இன்னொருவரை ஆதரிக்கும் போது, சட்டென முகமூடியை மாற்றி நேர் எதிராக தனது கருத்துகளை அள்ளி வீசுவதையும் புன்னகையோடு எதிர்கொள்கிறோம்.

“நானெல்லாம் மதவாதியில்லை. மத நல்லிணக்கம் தான் தேவை. எல்லா மதமும் ஒரே விஷயத்தைத் தான் போதிக்குது.” என்றெல்லாம் பொதுவெளியில் பேசுகின்ற ஒருவர், தான் சார்ந்த மத நிகழ்வுகளில் கலந்து கொள்ளும் போது முற்றிலும் வித்தியாசமான ஒரு மனிதராகப் பரிமளிப்பதை நாம் பார்க்கலாம்.

அமெரிக்க வீதியில் “நான் இந்தியன்” என மார்தட்டிக் கொள்ளும் நாம் அப்படியே மும்பை விமான நிலையத்தில் வந்திறங்கியதும் நான் இந்தியன் அல்ல, நான் தமிழன் என சட்டென ஒரு முகமூடியை அணிந்து கொள்கிறோம். அல்லது குறைந்தபட்சம் சென்னை வந்திறங்கும்போதாவது அதை அணிந்து கொள்கிறோம்.

சூழலுக்கும், ஆட்களுக்கும் தக்கபடி முகத்தை மாற்றுவது போல, பிறருடைய முகத்துக்கு ஏற்றபடி நாம் முகமூடி அணிந்து கொள்வதும் சர்வ சாதாரணமாய் நடக்கும். அதிலும் குறிப்பாக நமது மேலதிகாரிகள், நமது பிரியத்துக்குரியவர்கள் என்ன முகமூடி அணிந்திருக்கிறார்களோ அதன் அடிப்படையிலான முகமூடிகளை நாம் அணிந்து கொள்கிறோம். அதிகாரியின் முடிவுகளை ஆதரிக்கும் முகமூடிகள் நமக்கு பல நேரங்களில் அவசியமாகின்றன. மனைவியின் முடிவுகளுக்கு ஆமோதிக்கும் முகமூடிகள் நமக்கு எப்போதுமே தேவைப்படுகின்றன.

முகமூடிகள் சில நேரங்களில் அழகானவை. காதலியின் விரல்கோர்த்து கடற்கரை மணலில் புரளும் காதலன் சொல்கின்ற கவிதைப் பொய்கள் முகமூடியின் முல்லைப் பூக்கள். எனக்குப் பிடித்தது உன் கண்களும், உன் புன்னகையும் தான் என அவன் சொல்வதில் அக்மார்க் பொய் ஒளிந்திருக்கும். உன் அழகுக்காக நான் உன்னை விரும்பவில்லை, உன்னுடைய குணம் என்னை வசீகரித்துவிட்டது எனும் உரையாடலில் பொய்யின் ஆட்டுக்குட்டிகள் ஓடித் திரியும். அவையெல்லாம் அழகியலின் இழைகள். சிலிர்ப்பு மழையின் முகமூடிகள்.

முகமூடிகள் சில நேரங்களில் அவை அவசியமானவை. வீட்டில் பிஸியாக இருக்கும் நேரத்தில் வந்து நுழைகின்ற பக்கத்து தெரு அங்கிளை விரட்ட முடியாது. “வாங்க அங்கிள் வந்து ரொம்ப நாளாச்சு, நேற்று கூட பேசிட்டிருந்தோம், என்னடா அங்கிளை இன்னும் காணோமேன்னு” என சொல்லும் முகமூடிப் பதிலில் நிச்சயம் உண்மையில்லை. ஆனால் விருந்தோம்பலின் வழிப்பாதையில் அது அவசியம். காயப்படுத்தாத கனிவுப் பயணத்தில் அது அத்தியாவசியம்.

முகமூடிகள் சில நேரங்களில் அருவருப்பானவை. உறவுகளின் இடையே அவை போலியாய் நுழையும் போதும், நம்பிக்கையின் போர்வைகளில் அவை கொடும் நாகங்களாய் நகரும் போதும், அன்பின் அருவிகளில் அவை விஷத்துளிகளாய் கரையும் போதும் முகமூடிகள் அருவருப்பானவை. “சர்வம் மனைவி மயம்” என நடித்து விட்டு இன்னொரு காதலை வளர்ப்பவனின் முகமூடிகள் அவலட்சணமானவை. “கணவனே கண்கண்ட தெய்வம்” என போற்றி விட்டு இன்னொரு ரகசியக் காதலனைக் கொண்டிருக்கும் பெண்ணின் முகமூடிகள் வெறுப்புக்குரியவை. அவை சமூகத்தின் வேர்களிலிருந்து விலக்கப்பட வேண்டியவை.

நமது தேவை, பிறருடைய முகத்தில் இரண்டாம் தோலாக ஒட்டிக் கொண்டிருக்கும் முகமூடியை அடையாளம் காண்பதோ, அறுத்தெறிவதோ அல்ல. நமது மனதில் அலமாரிகளில் நாம் அடுக்கி வைத்திருக்கும் முகமூடிகளில் தேவையற்ற அத்தனை முகமூடிகளையும் ஆழக் கடலில் அமிழ்த்தி விடுவது தான். அதற்கு, நமது பார்வை பிறரைப் பார்க்கும் புறப்பார்வையாய் இல்லாமல், நம்மைப் பார்க்கும் அகப்பார்வையாய் மாற வேண்டும்.

இயேசுவின் வாழ்க்கையில் ஒரு நிகழ்வு உண்டு. இயேசு ஆலய முற்றத்தில் அமர்ந்து மணலில் எதையோ வரைந்து கொண்டிருக்கிறார். அப்போது பாலியல் குற்றத்தில் கையும் களவுமாகப் பிடிபட்டதாய் ஒரு பெண்ணை இயேசுவின் முன்னால் போட்டார்கள் சதிகரர்கள். கூடியிருந்த மக்களின் கையில் கொலைவெறியுடன் மூச்சிரைக்கும் கற்கள். மோசேயின் சட்டப்படி பாலியல் குற்றம் செய்த பெண் கல்லால் எறிந்து கொல்லப்பட வேண்டும். குற்றம் செய்த பெண் தரையில் கிடக்கிறார். இப்போது இயேசுவைப் பார்த்துக் கேட்கிறது கூட்டம். சட்டத்தைப் பின்பற்றி கல்லால் எறியவா ? என்ன சொல்கிறீர் ?

அந்தக் கேள்வி இரு புறமும் கூர்மையான வாள். ‘சரி..எறியுங்கள்’ என்றால் இயேசு அன்பானவர், ஏழைத் தோழன், எளியவர்களின் பாதுகாவலர் எனும் பிம்பம் உடையும். ‘வேண்டாம் விட்டு விடுங்கள்’ என்றால் சட்டத்தை மீறியவர் எனும் தண்டனைக்குரிய குற்றம் வரும். இயேசு அந்தக் கேள்வியைச் சீண்டவில்லை. ஏறெடுத்தும் பார்க்கவில்லை. ஒரே ஒரு வாக்கியம் சொன்னார்.

“உங்களில் பாவம் இல்லாதவன், முதல் கல்லை எறியட்டும்”

அவ்வளவு தான். திகைத்துப் போனது கூட்டம். எடுத்த கல்லைக் கொண்டு தங்களைத் தாங்களே எறியும் அவஸ்தை அவர்களுக்கு. எல்லோர் மனக்கண்ணிலும் அவர்களுடைய பாவத்தின் பட்டியல் வந்து நீண்டிருக்கும். அவர்கள் அணிந்திருந்த ‘மதக் காவலர்’ முகமூடி கிழிந்து தொங்கியது. வேறு வழியில்லை. கற்களைப் போட்டு விட்டு விலகிச் சென்றனர்.

இது தான் நம்மை நோக்கி நீட்டப்படும் கேள்வியும். நம்முடைய முகமூடிகள் எத்தனை ? அது யாரையெல்லாம் காயப்படுத்தியிருக்கிறது ? எந்தப் போலித்தனங்களெல்லாம் நம்மை விட்டு அகற்றப்பட வேண்டும் ? சிந்திப்போம்.
முகமூடிகளற்ற முகங்களோடு உறவுகளை நேசிப்போம். வாழ்க்கை அர்த்தப்படும்.

*

சேவியர்

Advertisements

பெண்கள்  : பாதுகாப்பு டிப்ஸ் !

Image result for women safety

ஒரு பெண் என்றைக்கு நடு ரோட்டில் தைரியமாக நடந்து போகிறாரோ அன்றைக்கு தான் உண்மையான சுதந்திரம் நாட்டுக்கு வந்ததாக அர்த்தம் என்றார் மகாத்மா காந்தி. அந்த சுதந்திரம் வருவதற்கு இன்னும் எத்தனை நூற்றாண்டுகள் கடக்க வேண்டும் என தெரியவில்லை. சொந்த அப்பார்ட்மென்டுக்குள்ளேயே, எந்த பாவமும் செய்யாத‌ ஏழு வயது சிறுமி ஹாசினியின் உயிர் பறிக்கப்படுகிறது. ரெயில்வே நிலையத்திலேயே ஒரு படுகொலை அரங்கேறுகிறது. தலித் எனும் காரணத்தால் நந்தினி எனும் பதினாறு வயதுப் பெண் அதிர்ச்சி மரணத்தை சந்திக்கிறார். அச்சம் எங்கும் நிலவுகின்ற காலகட்டம் இது.

“திருடனாய்ப் பார்த்துத் திருந்தாவிட்டால் திருட்டை ஒழிக்க முடியாது” என்பது உண்மை தான். அதற்காக, திருடன் திருந்தும் வரை காத்திருக்கவும் முடியாது. “ரூம் போட்டு யோசிப்பாங்களோ” என வியக்குமளவுக்கு இன்றைக்கு திருடர்களின் புத்தி வேலை செய்கிறது. இந்த மூளையை அப்படியே அலேக்காய் தூக்கிக் கொண்டு போய் ஒரு நல்ல விஷயத்துக்குப் பயன்படுத்தினால் நோபல் பரிசே கிடைக்கவும் வாய்ப்பு உண்டு.

நமது சமூகத்தின் குறைகளைச் சுட்டிக் காட்டும் அதே வேளையில் நாமும் எந்த அளவுக்கு பாதுகாப்பாய் இருக்க முடியுமோ அந்த அளவுக்கு பாதுகாப்பாய் இருக்க வேண்டியது அவசியம். காவல்துறையினர், வல்லுநர்கள், பாதுகாப்பு குழுக்கள் போன்றவர்கள் தொடர்ந்து இத்தகைய அறிவுறுத்தல்களைத் தந்து கொண்டே தான் இருக்கின்றனர்.

  1. அலட்சியம் அகற்றுவோம்

நமக்கு ஒரு கெட்ட பழக்கம் உண்டு. “எங்க ஏரியா ரொம்ப சாதுவான, சமர்த்தான, அமைதியான, புனிதமான ஏரியா. இங்கேயெல்லாம் திருடங்க யாரும் வரமாட்டாங்க” என ஓவரா நம்பி விடுவோம். எல்லா பயணத்துக்கும் ஒரு முதல் சுவடு உண்டு. எல்லா திருட்டுக்கும் ஒரு பலியாடு உண்டு. எனவே ‘இதுவரை நடக்கலை, அதனால இனியும் நடக்காது’ எனும் அசட்டு நம்பிக்கைகள் வேண்டவே வேண்டாம்.

அதிலும் குறிப்பாக, வீடுகளில் தனியாக இருக்கும் பெண்கள் திருடர்களின் கழுகுக் கண்களில் முதலில் விழுந்து விடுவார்கள். எப்படியாவது இவர்களுடைய கவனத்தைத் திசை திருப்பியோ, வலுக்கட்டாயமாய் நுழைந்தோ தாக்குதல் நடத்த வியூகம் வகுப்பார்கள் திருடர்கள்.

எப்போதும் கதவையும், கிரில் கேட்டுகளையும் மூடியே வைத்திருக்க வேண்டும் என்பது பால பாடம். அதிலும் குறிப்பாக இரவு நேரங்களில் கதவிலுள்ள எல்லா பூட்டுகளையும் பூட்டி வைக்க வேண்டும் என்கிறார்கள் காவல் துறையினர். பால்கனி, மாடி கதவுகளுக்கு சிறப்புக் கவனம் செலுத்துங்கள்.

ஒரே கதவில் நாலு தாழ்ப்பாள் இருந்தால் நாலையும் போடுங்கள் ! திருடன் உள்ளே நுழைய எவ்வளவு கஷ்டம் கொடுக்கிறீர்களோ அவ்வளவுக்கு நீங்கள் பாதுகாப்பாய் இருக்கலாம். எனவே அடிப்படை விஷயமான பூட்டு விஷயத்தை மறக்க வேண்டாம்.

  1. வீட்டை பலப்படுத்துவோம்

ஒரு டிவி வாங்க வேண்டுமென்றால் அத்தனை கடைகள் ஏறி, எல்லாவற்றையும் அலசிக் காயப்போட்டு தான் வாங்குவோம். அதே போல தான் ஒரு வாஷிங் மிஷின், ஒரு பிரிட்ஜ் என எல்லா விஷயத்திலும் மண்டையைப் போட்டுக் குடைவோம். ஆனால் பூட்டு விஷயம் வரும்போது மட்டும், பக்கத்தில் இருக்கும் ஹார்ட்வேர்ஸ் கடைக்குப் போய் கம்மி விலையில் ஒரு பூட்டு வாங்கி மாட்டுவோம்.

அந்தப் பூட்டுகளெல்லாம் திருடன் வந்து சத்தமாய் இருமினாலே திறந்து போய்விடும். முதலில் பூட்டுகளில் கவனம் செலுத்துங்கள். நல்ல தரமான பூட்டுகளை வாங்குங்கள். விலை அதிகமாய் இருப்பதைப் பற்றிக் கவலைப்படாதீர்கள். பூட்டு சரியில்லையேல் வீட்டுக்குள் என்ன சமாச்சாரம் இருந்தாலும் அது பாதுகாப்பாய் இருக்காது !

அதே போல ஒருவேளை ஒரு புது வீட்டுக்கு வாடகைக்குப் போனாலோ, குடியேறப் போனாலோ முதல் வேலையாக சகல பூட்டுகளையும் மாற்றுங்கள். பழைய பூட்டுகளைப் பயன்படுத்தாதீர்கள். அதன் சாவிகள் யாரிடம் வேண்டுமானாலும் இருக்கலாம் எனும் எச்சரிக்கை உணர்வு உள்ளுக்குள் இருக்கட்டும்

முன் பக்கக் கதவில் ஒரு லென்ஸ் பொருத்தி வெளியே நடப்பவற்றைப் பார்ப்பது போல அமைப்பது தனிமையாய் இருக்கும் போது ரொம்பவே பாதுகாப்பானது. ரொம்ப சிம்பிள், ஆனா ரொம்பவே பயனுள்ள விஷயம் இது ! அதுவும், அப்பார்ட்மென்ட் போன்ற இடங்களில் தங்குபவர்களுக்கு இது ரொம்பவே அவசியம். வீட்டின் வெளியே நிற்பவர் பக்கத்து வீட்டு நபரா இல்லை, தெரியாத நபரா என்பதைக் கண்டு கொள்ள வசதியாக இருக்கும்.

கதவில் ஒரு சங்கிலி மாட்டி வைப்பது கூடுதல் பயனளிக்கும் !

  1. நள்ளிரவு தந்திரங்கள்.

திருடர்கள் இப்போதெல்லாம் ஏகப்பட்ட புத்தம் புதிய தந்திரங்களோடு களமிறங்குகிறார்கள். அதிலும் பெண்கள் தனியாக இருக்கும் விஷயம் தெரிந்தால் எப்படியாவது அவர்களை ஏமாற்றி கிடைப்பதை லபக்கிக் கொண்டு போக எல்லா வழிகளிலும் முயல்வார்கள்.

நள்ளிரவில் திடீரென உங்கள் வீட்டுக் கொல்லையிலோ, அல்லது வேறு ஏதோ ஒரு பக்கத்திலோ இருக்கும் தண்ணீர் குழாயிலிருந்து தண்ணீர் கொட்டோ கொட்டென கொட்டும். இரவு ஆனதால் அந்த சத்தம் உங்களை எழுப்பியும் விடும்.

“அடடா…. டேப்பை மூட மறந்துட்டேன் போலிருக்கு” என அரக்கப் பரக்க பாதி தூக்கத்தில் கதவைத் திறந்து கொண்டு வெளியே போகாதீர்கள். இதற்காகவே காத்திருக்கும் திருடர்களுக்கு வேலை படு சுலபமாகிவிடும்.

அதே போல இரவில் வெளியே சத்தம் கேட்கிறது, குழந்தை அழுகிறது, லைட் எரிகிறது, பூனை கத்துகிறது என எதுவாய் இருந்தாலும் தனியே வெளியே போகாதீர்கள்.

அதே போல, அதிகாலை வேளைகளில் இரட்டைக் கவனம் அவசியம். திருட்டுகள் அதிகம் நடப்பது அதிகாலை வேளையில் தான். காலையில் நாலுமணிக்கு எழும்பி கொல்லைப் பக்கம் போவது, கதவைத் திறந்து வெளியே வருவது போன்ற நேரங்களில் அலர்ட் அவசியம் . பெரும்பாலும் அந்த நேரங்களில் நமது மூளை ரொம்ப அலர்ட்டாய் இருக்காது !

திருடர்கள் உள்ளே நுழையவோ, கத்தி முனையில் மிரட்டவோ அந்த சில நிமிட அசதியும், கவனமின்மையுமே போதும் ! எனவே அதிகாலை வேளையில் வெளியே வரவேண்டியிருந்தால், முழு பாதுகாப்பு உணர்வுடனும், அளவுக்கு மீறி லைட்களை எரியவிட்டும் வருவதே நல்லது !

கையில் செல்போனை எப்போதுமே வைத்திருப்பது கூடுதல் பிளஸ் !

  1. கர்ட்டன் போடுங்க !

உங்க வீடு, பெரிய பெரிய சன்னல்களுடைய வீடா ? சன்னல்களுக்கு நல்ல கடினமான திரைச்சீலை வாங்கிப் போடுங்கள் ! திரைச்சீலைகளால் ஏகப்பட்ட நன்மைகள் உண்டு.

முதலாவது, உங்கள் வீட்டில் யார் இருக்கிறீர்கள் ? என்னென்ன விலையுயர்ந்த பொருட்கள் இருக்கின்றன போன்ற விஷயங்களெல்லாம் வெளியே இருந்து நோட்டமிடும் நபர்களுக்குத் தெரிய வராது !

இரண்டாவது, சூரிய வெப்பம், தூசு போன்ற விஷயங்களிலிருந்தும் உங்களுக்குப் பாதுகாப்பு. மூன்றாவது, உள்ளே நீங்கள் என்ன செய்கிறீர்கள் என்பதும் வெளியே இருப்பவர்களுக்கு வேடிக்கப் பொருள் ஆகாது. இதுவும் ஒரு பாதுகாப்பு அம்சம் தான், எளிமையான பாதுகாப்பு வழி.

ஒருவேளை உங்கள் வீட்டில் எல்லா பாதுகாப்பையும் மீறி திருடன் நுழைந்து விட்டான் என வைத்துக் கொள்ளுங்கள். சத்தம் போடுங்கள். ! சத்தம் திருடர்களுக்கு அலர்ஜி.

சத்தம் போடும்போது கூட திருடன் திருடன் என கத்தாதீர்கள் என்பது பெரியவர்கள் காட்டும் வழி ! அப்புறம் எப்படிக் கத்துவது ? தீ…தீ என கத்த வேண்டுமாம். திருடன் திருடன் என கத்தினால் உதவிக்கு வர பலரும் பயப்படுவார்கள். ஆனால் தீ தீ என கத்தினால் எல்லோரும் தயங்காமல் ஓடி வருவார்கள். திருடனிடமிருந்தும் தப்பி விடலாம் !

  1. அடுத்த வீட்டு நட்பு

கிராமத்துக்கும் நகரத்தும் இடையேயான மிகப்பெரிய வேறுபாடு கூடி வாழ்தல் தான். ஒரு கிராமத்திலுள்ள மொத்த நபர்களும் ஒருத்தரை ஒருத்தர் தெரிஞ்சு வெச்சிருப்பாங்க. எல்லாருமே சொந்தக்காரங்களாகவோ, நண்பர்களாகவோ இருப்பாங்க. நகரத்துல பக்கத்து வீட்ல யார் இருக்கிறது, எத்தனை பேர் இருக்கிறாங்க, அவங்க பேர் என்ன போன்ற பல விஷயங்கள் தெரியவே தெரியாது.

பக்கத்து வீட்டு நபர் வீட்டைக் காலி பண்ணிட்டுப் போனா கூட நாலு மாசம் கழிச்சு தான் தெரியவரும். இது பாதுகாப்புக்கு கொஞ்சம் இடைஞ்சலான விஷயம். அடுத்த வீட்டு மனிதர்களோடு நல்ல ஆரோக்கியமான நட்பும், அன்பும் கொண்டிருப்பது சிக்கல்களிலிருந்து நம்மை காப்பாற்றும்.

ஒருவருக்கொருவர் உதவுவதும், பாதுகாத்துக் கொள்வதும் பெண்களின் பாதுகாப்பு விஷயத்தில் ரொம்பவே அற்புதமான விஷயங்கள்.

  1. கண்காணிப்பு கேமரா பொருத்துங்கள்.

ஒரு காலத்தில் ரொம்ப கஷ்டமாய் இருந்து, இப்போது மிக சகஜமாய் மாறியிருக்கும் ஒரு விஷயம் இந்த சி.சி.டி.வி காமெராக்கள். ஐயாயிரம் ரூபாய் முதலே இந்த வசதி இப்போது வந்திருக்கிறது. உங்கள் வசதிக்கு ஏற்ப எத்தனை கேமராக்கள் வேண்டுமோ அதைப் பொருத்திக் கொள்ளுங்கள்.

நீங்கள் உலகின் எந்த பாகத்தில் இருந்தாலும் உங்களுடைய மொபைலின் மூலமாக உங்கள் வீட்டைக் கண்காணிக்க இது உதவியாக இருக்கும்.

ஒருவேளை அதற்கும் உங்களுக்கு வசதியில்லாத சூழலெனில், போலி கேமரக்களை வாங்கி பொருத்துங்கள். அதாவது பார்வைக்கு கேமரா போல இருக்கும், ஆனால் உண்மையில் கேமரா அல்ல. சில நூறு ரூபாய்களுக்கே இந்த கேமராக்கள் கிடைக்கும் என்பது குறிப்பிடத் தக்கது.

ஒரு வேளை உங்கள் வீட்டில் கார் இருக்கிறதெனில் அதன் ரிமோட் கன்ட்ரோலரை உங்கள் படுக்கையிலேயே வைத்திருங்கள். இரவில் யாரேனும் அத்து மீறி நுழைவதைப் போலத் தோன்றினால் அதிலுள்ள அலாரம் பட்டனை அமுக்குங்கள். உங்கள் கார் கத்தும்.

திருடர்களுக்கு அலர்ஜியான இரண்டு விஷயங்கள் வெளிச்சமும், சத்தமும். அது உங்களைப் பாதுகாப்பாய் வைக்கும் !

கார் இல்லாதவர்களுக்கு, வீட்டுப் பாதுகாப்புக்கான அலாரம் சிஸ்டம்கள் கடைகளிலேயே விற்பனைக்கு வருகின்றன என்பது மகிழ்ச்சியான செய்தி !

  1. வழக்கத்தை விலக்குங்கள்

ஏதோ ரொம்ப பத்திரமா இருப்பதாக நினைத்துக் கொண்டு ஏமாறும் விஷயங்களில் நாமெல்லாம் கில்லாடிகள். வீட்டை விட்டு வெளியே போகும் போது செருப்புக்கு உள்ளேயோ, மிதியடிக்குக் கீழேயோ, தொட்டிச் செடியிலோ எங்கேயாவது சாவியை வைத்து விட்டு உலக மகா பாதுகாப்பாய் இருப்பது போல கற்பனை செய்து கொள்வோம். திருடர்கள் முதலில் சாவியைத் தேடும் இடங்களே இவை தான்.

அப்படியே சாவி இல்லாவிட்டால் திருடன் திரும்பிப் போவான் என்று நினைக்க வேண்டாம், எனவே அடுத்தடுத்த பாதுகாப்பு அம்சங்களும் அவசியம்.

சாவியை யாரும் கணிக்க முடியாத இடத்தில் மறைத்து வைக்கலாம். அல்லது ரொம்பவே நம்பிக்கைக்குரிய நபரிடம் கொடுத்து வைக்கலாம்.

ஒருவேளை அலுவலகத்துக்கு சாவியை எடுத்துப் போனால், கார்சாவி, அலமாரா சாவி, வீட்டுச் சாவி என எல்லா சாவியையும் ஒரே கொத்தில் போட்டு வைக்காதீர்கள். வாலெட் பார்க்கிங் போன்ற இடங்களில் இந்த விஷயத்தில் இரட்டைக் கவனம் அவசியம்.

நகையையும் பணத்தையும் பீரோவிலோ, தலையணைக்கடியிலோ வைத்துக் கொள்வது ஹைதர் கால பழக்கம். இந்த காலத்தில் வங்கி லாக்கர் தான் ஒரே சிறந்த வழி. மாத தவணை கட்ட வேண்டுமே, ஆண்டுக் கட்டணம் உண்டே என்றெல்லாம் முரண்டு பிடிக்காமல் ஒரு லாக்கர் வாங்கிவிடுவது உசிதம் !

வீட்டில் இருக்கும் அலமாராக்களைக் கூட சன்னலோரத்திலோ, வெளிப்பக்கச் சுவரின் அருகிலோ வைக்காதீர்கள். கொஞ்சம் பாதுகாப்பான உள் அறைகளில் வைத்து விடுவது நல்லது !

  1. பக்கமோ, தூரமோ…

பலரும் செய்யும் ஒரு மாபெரும் தவறு “பக்கத்துல தானே போறேன்.. இப்போ வந்துடுவேன்ல..” என வெகு அலட்சியமாய் கதவைத் திறந்து வைத்துக் கொண்டு போவது. பொதுவாக எதிர் தெருவில் இருக்கும் மீன் கடையோ, அடுத்த தெருவில் இருக்கும் காய்கறிக்கடையோ போகும் போது இது நடக்கும் !

கதவைச் சும்மா சாத்திவிட்டுப் போவது, கொல்லைப் பக்கக் கதவைக் கவனிக்காமல் போவது போன்ற பல தவறுகள் நடக்கும். புள்ளிவிவரங்கள் என்ன சொல்கின்றன தெரியுமா ? பெரும்பாலான விபத்துகள் வீட்டுக்குப் பக்கத்தில் தான் நடக்கிறதாம். காரணம் அப்போது தான் ஹெல்மெட் ஏதும் போடாமல் அலட்சியமாக மக்கள் வண்டியை எடுத்துக் கொண்டு போவார்கள்.

அதே போல் தான் திருட்டும். “டெய்லி போறது தானே…” என போகாதீர்கள். தினமும் உங்களைக் கவனிக்கும் ஒருவனுக்கு அந்த ஐந்து நிமிட இடைவெளியே போதுமானது !

கையில் ஒரு செல் போன் இருக்க வேண்டியது இப்போதெல்லாம் தவிர்க்கக் கூடாததாகி விட்டது. கையில் இருக்கும் செல்போனில் உங்கள் ஏரியா காவல் நிலைய எண்கள், ஆம்புலன்ஸ் நம்பர், மருத்துவமனை எண்கள் என எல்லாம் இருக்க வேண்டியது கட்டாயம்.

நம்பிக்கையான நபர்களுடைய எண்கள் “ஸ்பீட் டயல்” செய்ய வசதியாய் இருந்தால் ரொம்ப நல்லது. எமர்ஜன்சி எண், போன் லாக்காகி இருந்தால் கூட தெரிவது போல அமைத்துக் கொள்ளுங்கள்.

 

  1. சந்தேகம் நல்லது.

தெரியாத நபர் விற்பனைக்காகவோ, வேறு ஏதாவது விஷயம் சொல்லிக் கொண்டோ வந்தால் கதவைத் திறக்காமல் இருப்பது புத்திசாலித் தனம். “அம்மா, வாட்டர் ஃபில்டர் சரி பண்ண ஆபீஸ்ல இருந்து வந்திருக்கேன்” என வருவது ஒரு திருட்டு ஐடியா. அந்த நபரை வெளியிலேயே நிற்க வைத்து விட்டு அந்த அலுவலகத்துக்குப் போன் பண்ணி விஷயம் உண்மை தானா என தெரிந்து கொள்ளுங்கள்.

ஏசி சர்வீஸ், வாஷிங் மெஷின் சர்வீஸ் என்பதெல்லாம் கப்சாவாகக் கூட இருக்கலாம். அலுவலக எண்களையெல்லாம் ஒரு இடத்தில் பத்திரமாய் எழுதி வையுங்கள்.

எக்காரணமும் கொண்டும் வருபவனிடமே “உன் ஆபீஸ் நம்மர் என்னப்பா ?” என அப்பாவியாய்க் கேட்காதீர்கள். ஏமாந்து விடுவீர்கள்.

இப்போது புதிது புதிதாக போலியோ ஊசி போடணும், கணக்கெடுக்கணும், ஈபி வேலை செய்யுதா, வாட்டர் டேங்க்ல குளோரின் போடணும் இப்படி என்ன ஐடியாவோடு வந்தாலும் எச்சரிக்கையாய் இருங்கள். ஆண்கள், பெண்கள், இளைஞர்கள், பெரியவர்கள் என யார் வேண்டுமானாலும் இந்த பட்டியலில் இருக்கலாம் !

அதே போல, உங்கள் வாழ்க்கையையும் ஒரு அட்டவணைக்குள் அடக்காதீர்கள்.  “ஷார்ப்பா 8 மணிக்கு கோயில் போவாங்க,, 9.45 க்கு வருவாங்க” என்பது போல ஒரு பக்கா பிளான் போட்டு வாழும் பார்ட்டிகள் எதிராளிக்கு எளிதானவர்கள். எப்போ எங்கே போவாங்க, எப்போ வருவாங்க என்பதே தெரியாதபடி இருப்பது ஒரு வகையில் எதிராளியைக் குழப்பும். ஒரே வழியில் போவது, ஒரே மாதிரி செயல்படுவது இதையெல்லாம் தவிர்த்தல் நலம்.

  1. குரல்கள் ஏமாற்றும்.

வீட்டுக்கு யாராச்சும் தொலைபேசினால் உங்கள் ஜாதகத்தையெல்லாம் அங்கே கூறிக்கொண்டிருக்காதீர்கள். வங்கியிருந்து பேசுகிறேன், இன்சூரன்ஸ் நிலையத்திலிருந்து பேசுகிறேன், டெலபோன் ஆபீஸ்ல இருந்து பேசுகிறேன் என்றெல்லாம் கால்கள் வரக் கூடும். என்ன விஷயம் என்பதை முழுமையாய் கேட்டுத் தெரிந்து கொள்ளுங்கள்.

எக்காரணம் கொண்டும் போனில் உங்களுடைய கார்ட் நம்பர், பாஸ்வேர்ட், பிறந்த நாள், பின் நம்பர் போன்றவற்றையெல்லாம் கொடுக்கவே கொடுக்காதீர்கள். முடிந்தால் போனை கட் பண்ணி நீங்களே மீண்டும் வங்கிக்குத் தொடர்பு கொள்ளுங்கள். பேசுங்கள்.

நீங்கள் வீட்டில் இருக்கிறீர்களா ? தனியாக இருக்கிறீர்களா ? என்பதையெல்லாம் தெரிந்து கொள்ளும் நோக்கில் போன் கால்கள் வரக் கூடும் !

மொபைலிலோ, வீட்டு போனிலோ மிஸ்ட் கால் வந்திருப்பதைப் பார்த்தால் உடனே அந்த எண்ணுக்குத் தொடர்பு கொள்வோம் இல்லையா ? அதில் கூட எச்சரிக்கை தேவை. எதிர் நபர் நமக்குத் தெரியாத நபர் எனில் துவக்கத்திலேயே ‘சாரி.. ராங் நம்பர்” என்று சொல்லி வைத்து விடுங்கள். “நீங்கள் யார், எங்கே இருக்கிறீர்கள்” என மறு முனை விசாரித்தால் பதிலளிக்க மறுத்து விடுங்கள்.

மிஸ்ட் கால்கள் உங்களை தவறை நோக்கி இழுக்கும் தூண்டில்கள். அல்லது உங்கள் வீட்டு ரகசியங்களை அறிந்து திருடத் திட்டமிடும் தில்லாலங்கடி யுத்திகள் என்பதை நினைவில் கொள்ளுங்கள்.

*

நன்றி : பெண்மணி மாத இதழ்

TOP 10 : கனவுகளில் உருவான கண்டுபிடிப்புகள்

Image result for periodic table in dream

கனவுகள் ஏன் வருகின்றன எதற்காக வருகின்றன எனும் ஆய்வுகள் ஒரு பக்கம் மும்முரமாக நடந்து கொண்டிருக்கின்றன. “கனவு காணுங்கள்” என இலட்சியத்தைக் குறித்து அப்துல் கலாம் அவர்கள் சொன்னார். பகல் கனவு காணாதீங்க என பெரியவர்கள் அடிக்கடி சொல்கின்றனர். எது எப்படியோ, இந்தக் கனவுகள் பல்வேறு வியப்பூட்டும் விஷயங்களின் முதல் சுவடாய் இருந்திருக்கிறது என்பது பிரமிப்புச் செய்தி. பல கண்டு பிடிப்புகள், பல படைப்புகள் இவையெல்லாம் கனவுகளிலிருந்து கிடைத்திருக்கின்றன. அவற்றில் ஒரு பத்து விஷயங்கள் இந்த வாரம்.

  1. பீரியாடிக் டேபிள்

தனிம அட்டவணை என தமிழில் அழைக்கப்படும் உலகப் புகழ் பெற்ற பீரியாடிக் டேபிள் பற்றி தெரியாத பள்ளிக்கூட குழந்தைகள் இருக்க முடியாது. டிமிட்ரி மென்டலீவ் தான் இதைக் கண்டு பிடித்தவர். வேதியலில் அதீத ஆர்வம் உடைய அவருக்கு அறிவியல் ரீதியாக ஏற்றுக்கொள்ளக் கூடிய ஒரு ஃபார்முலா கண்டுபிடிக்க வேண்டும் என்பது விருப்பமாக இருந்தது. ஆனால் முடியவில்லை.

ஒரு நாள் ஒரு கனவு. கனவில் ஒரு அட்டவணை, அந்த அட்டவணையில் தேவையான எண்களெல்லாம் வந்து நிரம்பிக் கொள்கின்றன. அதை வைத்து என்ன மதிப்பு வேண்டுமானாலும் கண்டு பிடிக்க முடிகிறது. ஆகா என வியக்கிறார். திடீரென முழிப்பு வருகிறது. சற்றும் தாமதிக்காமல் அருகில் கிடந்த பேப்பரில் கனவை அப்படியே கிறுக்கி வைக்கிறார். சந்தோசம் தாங்க முடியவில்லை. பின்னர் முதல் வேலையாக தனது கனவு கான்செப்டை அப்படியே முழுமைப்படுத்துகிறார். பீரியாடிக் டேபிள் ரெடி ! 1869ம் ஆண்டு அந்த தனிம அட்டவணையை வெளியிடுகிறார் அவர். கனவு, அவருடைய கனவை நனவாக்கிக் கொடுத்தது !

  1. ஒரு உலகப் புகழ் பாடல்

ஒரு இசைக்கலைஞர் தூங்கிக் கொண்டிருக்கிறார். நாடி நரம்பு ரத்தம் சதை எல்லாத்திலும் இசை வெறி ஊறிப் போன அவருக்கு கனவில் ஒரு பாடல் ஒலிக்கிறது. அற்புதமான பாடல். காலையில் எழும்பும் போது அந்தப் பாடலை பாடிக்கொண்டே எழும்புகிறார். அது கனவில் கிடைத்த பாடல் என அவருக்கு புரியவில்லை. எங்கேயோ கேட்ட பாடல், கனவில் ஒலித்தது என நினைக்கிறார்.

அந்தப் பாடலை அப்படியே எழுதி டியூன் போடுகிறார். அந்தப் பாட்டை எங்கே கேட்டேன் என மூளையைக் கசக்குகிறார். கண்டு பிடிக்க முடியவில்லை. நண்பர்கள் அனைவரிடமும் கேட்கிறார், யாரும் அந்தப் பாட்டைக் கேட்டதில்லை. பழைய இசை ஆல்பங்களையெல்லாம் புரட்டுகிறார். இசை தெரிந்த அனைவரிடமும் கேட்கிறார் யாருக்கும் தெரியவில்லை. பின்பு தான் அது கனவில் கிடைத்த பாடல் என புரிகிறது. அந்தப் பாடலை அவர்கள் வெளியிடுகின்றனர். அது உலகப் புகழ் பெற்ற பாடலாய் மாறி விடுகிறது.

அந்தப் பாடலைக் கனவில் கண்டவர், பால் மெக்கார்த்தி. பாடல் . எஸ்டர்டே எனும் பாடல். இசைக்குழு, உலகப் புகழ் பெற்ற பீட்டில்ஸ் !!!

  1. டெர்மினேட்டர்

102 டிகிரி காய்ச்சலில் சுருண்டு படுத்திருந்தார் ஜேம்ஸ் கேமரூன். ரோம் நகரில் தனது படம் ஒன்றின் இறுதிகட்ட வேலைகளுக்காக அங்கே வந்திருந்தார். தெரியாத ஊரில் வந்து இப்படி காய்ச்சலில் மாட்டிக் கொண்டோமே என கலங்கத்துடன் படுத்திருந்தார் அவர். அந்த அசாதாரண சூழலில் தூங்கிப் போனார்.

திடீரென ஒரு கனவு. கனவில் ரோபோ ஒன்று சமையலறைக் கத்தியை வைத்துக் கொண்டு நெருப்பும் பிழம்பிலிருந்து தப்பிக்க முயல்கிறது. ரோபோ கொலையாளியின் செயல்கள் கனவில் விரிய விழித்துக் கொண்டார் கேமரூன். அந்தக் கனவு அவரை வசீகரித்தது.

தனது கனவை எழுதினார். அதற்கு கை கால் கண் காது மூக்கு எல்லாம் வைத்தார். உலகையே திரும்பிப் பார்க்க வைத்த‌ டெர்மினேட்டர் கதை ரெடி. அந்த ஒரு கனவு ஜேம்ஸ் கேமரூனுக்குக் கொடுத்த செல்வமும், புகழும் எவ்வளவு என்பது உலகறிந்த கதை !

  1. டுவைலைட்

நியூயார்க்கின் “பெஸ்ட் செல்லர்” லிஸ்டில் சுமார் இரண்டு ஆண்டுகள் இருந்த ஒரு நாவல். உலகில் சுமார் 1.7 கோடி பிரதிகள் விற்ற நாவல். அந்தக் கதைகள் பின்னர் திரைப்படமாகி உலகெங்கும் பல பில்லியன் டாலர்களைச் சம்பாதிக்கவும் செய்தது ! இத்தனைக்கும் காரணமான அந்த நாவலின் கரு கனவிலிருந்து கிடைத்தது என்று சொன்னால் வியப்பான விஷயம் தான்.

ஸ்டெஃபனி மேயர் ஆழ்ந்து தூங்கிக் கொண்டிருந்தபோது ஒரு கனவு வந்தது. வித்தியாசமான காதல் கனவு. கூடவே காதலர்கள் உரையாடவும் செய்கிறார்கள். அந்த மையம் தான் அவரை வசீகரித்தது. அந்தப் புள்ளியைச் சுற்றி அவர் வரைந்த கோலம் தான் டுவைலைட் நாவல். அந்த முதல் நாவலுக்குக் கிடைத்த வரவேற்பு அடுத்தடுத்த பார்ட்களை உருவாக்கியது. இன்றும் இளசுகளின் மனம் கவர்ந்த நாவல்களின் பட்டியலில் அதற்கு ஒரு நிச்சயம் இடம் உண்டு.

  1. ஸீகல்

ஆங்கில நாவல்களோடு பரிச்சயமுள்ளவர்களுக்கு நிச்சயம் தெரிந்திருக்கக் கூடிய பெயர் ஸீகல். ஜோனதன் லிவிங்க்ஸ்டன் சீகல் .. எ ஸ்டோரி எனும் பெயரில் அந்த நாவல் வெளியானது. அது சாதனைக்கு மேல் சாதனை படைத்து உலகிலேயே அதிக விற்பனையான நாவல் எனும் பெயரையும் பெற்றது. அதற்கு முன் சாதனை நாவலாக இருந்த கான் வித் வின்ட் நாவலின் விற்பனையை இது முறியடித்தது.

உளவியல் கலந்த இந்த நாவலின் தலைப்பு எழுத்தாளர் ரிச்சர்ட் பெக் கின் காதுகளில் ஏதோ ஒரு ரீங்காரமாய் விழுந்தது. உடனே நாவலை எழுத ஆரம்பித்தார். அதன் பின் கொஞ்ச காலம் நாவலை கிடப்பில் போட்டார். திடீரென ஒரு கனவு. அந்தக் கனவில் அந்த நாவலுக்கான முடிச்சும், தொடர்ச்சியும் அவருக்குக் கிடைக்க, சட்டு புட்டு என எழுதி முடித்தார். நாவல் உலகப் புகழ் பெற்றது. ஒரு கனவு அவருக்கு கனவு நாவலை முடிக்க உதவியது.

  1. கூகிள்

லேரி பேஜ் படிப்பில் ரொம்ப சுமார். எப்போ வேணும்னாலும் கல்லூரியிலிருந்து வெளியேற்றி விடுவார்கள் எனும் பயமும், குழப்பமும் அவருடைய மனதை அழுத்திக் கொண்டே இருந்தது. அந்த அழுத்தமான சூழலில் ஒரு நாள் ஒரு கனவு கண்டார். அதில் அவர் இன்டர்நெட்டையே முழுமையாய்  ஒவ்வொரு கணினியிலும் தரவிறக்கம் செய்து வைக்கிறார்.

அந்தக் கனவு அவரை தூங்க விடவில்லை. அது சாத்தியமா என யோசித்தார். எழும்பி உட்கார்ந்து விஷயங்களைக் கூட்டிக் கழித்துப் பார்த்தார். முழுமையாய் தரவிறக்கம் செய்ய முடியாது. ஆனால் லிங்களில் தகவலை செமிக்கலாம் என புரிந்து கொண்டார்.

அந்தக் கனவின் விளைவு தான் கூகிள். இப்போ எதுக்கெடுத்தாலும் கூகிளில் தேடுகிறோமே, அந்த கனவுக்கு தான் நன்றி சொல்ல வேண்டும்.

  1. டின் டின் இன் திபெத்

கார்டூனிஸ்ட் ஹெர்ஜ் டின் டின் மூலம் உலகப் புகழ் பெற்றவர். இவருடைய கதை பல்வேறு திரைப்படங்களாகவும், தொலைக்காட்சி நிகழ்ச்சிகளாகவும், ரேடியோ நிகழ்ச்சிகளாகவும் பல வடிவம் பெற்றவை. அவற்றில் மிகப் பெரிய புகழ் பெற்றது அவருடைய 20வது பாகமான டின் டின் இன் திபெத் கதை.

டின் டின் நினைவுகள் அவரை சுழற்றியடித்துக் கொண்டிருந்த காலத்தில் அவர் ஒரு கனவு கண்டார். அது தான் டின் டின் இன் திபெத் கதை. அவருடைய டாக்டர்களெல்லாம், ஓவரா டின் டின் பற்றி யோசிக்காதீங்க என்றார்கள். அதை மறக்காவிட்டால் உங்களுக்கு சிக்கல் என்றார்கள். ஜெர்ஜ் கவலைப்படவில்லை.தனது கனவை அப்படியே கார்ட்டூனாக்கினார். அவரது டின் டின் இன் திபெத் தயாரானது. உலகப் புகழ் பெற்றது.

8 இன்செப்சன்

கிறிஸ்டோபர் நோலனின் புகழ்பெற்ற திரைப்படம் இன்ஸெப்ஷன். அந்தப் படம் கனவுகளுக்குள்ளே கனவுகள் காண்பதைப் பற்றியது, கனவுகளை செயற்கையாய் உருவாக்குவதைப் பற்றியது. கனவு எது, நிஜம் எது என்பதைத் தெரியாமல் மக்கள் உலவும் படம் இது. இந்தப் படத்தின் இன்ஸ்பரேஷனை கிறிஸ்டோபர் நோலன் பெற்றுக் கொண்டதும் கனவுகளிலிருந்து என்பது ஆச்சரியமான விஷயம்.

இது அவருடைய ஒரு கனவிலிருந்து வந்ததல்ல. பல கனவுகளின் தொகுப்பாக வந்தது. கனவுக்கும், நிஜத்துக்கும் இடையேயான வேறுபாடைக் கண்டுபிடிப்பது என்பதை வைத்து கதையை நெய்தார் கிறிஸ்டோபர் நோலன். அந்தப் படம் மிகப்பெரிய வெற்றியடைந்து நோலனுக்கு உலகப் புகழ் வாங்கித் தந்தது.

  1. சார்பியல் கோட்பாடு

ஐன்ஸ்டீனின் மிகப்பெரிய பார்முலாக்களில் ஒன்று ரிலேட்டிவிட்டி தியரி அதாவது சார்பியல் கோட்பாடு. ஒரு நாள் அவருக்கு ஒரு கனவு வந்தது. மின்சாரம் பாய்ச்சப்பட்டிருக்கும் ஒரு வேலியில் மாடுகள் மேய்ந்து கொண்டிருக்கின்றன. அப்போது அதில் மின்சாரம் இல்லை. விவசாயி வந்து பேட்டரியை மாற்றுகிறார். அப்போது மின்சாரம் பாய்கிறது மாடுகளெல்லாம் ஒரே நேரத்தில் தூக்கி வீசப்படுகின்றன.

அப்போது ஐன்ஸ்டீன் விவசாயியிடம் கேட்கிறார். எப்படி எல்லா மாடுகளும் ஒரே நேரத்தில் தெறித்து விழுகின்றன ? என்று. அவரோ ? இல்லையே ஒன்றன் பின் ஒன்றாகத் தானே விழுந்தன என பதில் சொல்கிறார். ஐன்ஸ்டீன் திடுக்கிட்டு விழிக்கிறார்.

அந்தக் கனவு அவரை புதுமையான கோணத்தில் சிந்திக்க வைக்கிறது. ஒரே விஷயத்தை ஒருவர் சட்டென நிகழ்வதாக‌வும், இன்னொருவர் ஒன்றன் பின் ஒன்றாக நிகழ்வதாகவும் பார்க்க முடியுமா என யோசிக்கிறார். சார்பியல் கோட்பாடு பிறக்கிறது !

10 தையல் மெஷின்

தையல் என்பது மிகப்பெரிய பிரம்ம பிரயர்த்தனமாய் இருந்த காலகட்டம் அது. ஊசியில் நூல் எங்கே கோர்ப்பது என்பதெல்லாம் அப்போது கண்டுபிடிக்கப்படவில்லை. 1845ம் ஆண்டு எலிஸ் ஹோவ் ஒரு கனவு கண்டார்.  அதில் அரசர் ஹோவுக்கு ஒரு நிபந்தனை விதிக்கிறார். 24 மணி மணி நேரத்தில் இதற்கு ஒரு முடிவு எட்டப்படாவிட்டால் மரண தண்டனை. பதறிப் போன ஹோவ் கடுமையாக உழைக்கிறார். முடிவு கிடைக்கவில்லை.

தோல்வியடைந்து அவரை கொலைக்களத்துக்கு கொண்டு செல்கிறார்கள். அப்போது தான் அவர் கவனித்தார். வாளின் தலையில் ஓட்டை போட்டு கைப்பிடி அமைத்திருந்த முறை. பளிச் என ஒரு மின்னல். ஊசிக்கு நூலை எங்கே கோக்கலாம் என ஐடியா கிடைத்தது. ஐயா எனக்கு ஒரு கடைசி சான்ஸ் கொடுங்கள் என கெஞ்சுகிறார். எல்லாம் கனவில் தான். திடுக்கிட்டு விழிக்கிறார். விடியற்காலை நான்குமணி. ஆய்வு கூடம் ஓடிய அவர் தனது கனவை நனவாக்குகிறார். நவீன தையல் கலையின் அடிப்படை அங்கே நிறைவேறியது

தையல் மெஷினை முதலில் கண்டுபிடித்தது இவர் அல்ல, ஆனால் இன்றைய நுட்பத்தைக் கண்டுபிடித்தவர் இவர் தான். அதற்கான காப்புரிமையும் இவரிடமே இருக்கிறது என்பது குறிப்பிடத் தக்கது.

  • Thanks Daily Thanthi

TOP 10 : புகழ் பெறா கண்டுபிடிப்பாளர்கள்

இந்த உலகம் கண்டுபிடிப்புகளினால் வளர்ந்து கொண்டிருக்கிறது. பல்வேறு விஞ்ஞானிகள், ஆய்வாளர்கள், படைப்பாளிகள் தங்களுடைய சிந்தனைகளைக் கூர்தீட்டி பல்வேறு விஷயங்களைக் கண்டுபிடித்து அழியாப் புகழ் பெற்றிருக்கின்றனர். சில படைப்பாளிகள் படைப்பின் கர்த்தாக்களாக இருந்தாலும், பெயர் பெறாமலேயே போய் சேர்ந்திருக்கிறார்கள். அப்படிப்பட்ட கண்டுபிடிப்பாளர்களில் பத்து பேர் இந்த வாரம்.

Image result for friction light

  1. தீப்பெட்டி

சிக்கி முக்கிக் கல்லைக் கொண்டு தீமூட்டிக் கொண்டிருந்தனர் நமது முன்னோர்கள். தீப்பெட்டி வந்தபின் அது மிக மிக எளிதானது. ஒரு உரசலில் தீ பிடிக்கும் மாயாஜாலம் போல ஆகிவிட்டது. 1827களில் இதைக் கண்டுபிடித்தவர் ஜான் வால்கர். திறமைசாலி. வித்தியாசமான சிந்தனைக்குச் சொந்தக்காரர். அதை தனது ஊரில் தயாராக்கி விற்றார். “ஃப்ரிக்ஷன் லைட்” என அதற்குப் பெயரிட்டார். ஆனால் மக்கள் அதை லூசிஃபர் என்றும் சாத்தான் என்றும் அழைத்தார்கள்.

தனது கண்டுபிடிப்பின் மேல் பெரிய மரியாதை வராததால் அதை அவர் காப்புரிமை பெறவில்லை. அப்படியே சர் ஐசக் ஹொல்டன் என்பவருக்கு விற்று விட்டுப் போய்விட்டார். ஹோல்டன் பிஸினஸ் உத்தி தெரிந்தவர். உலகெங்கும் தீப்பெட்டியைக் கொண்டு போய் விற்பனை செய்தார். தீப்பெட்டி அவரை மிகப்பெரிய கோடீஸ்வரர் ஆக்கிவிட்டது. அதனால் ஹோல்டன் தான் தீப்பெட்டி கண்டுபிடித்தவர் எனும் பெயர் இன்றும் நிலவுகிறது. உண்மையில் தீப்பெட்டியைக் கண்டுபிடித்த ஜான் வால்கர் பெயர் வெளிவராமலேயே போய்விட்டது.

  1. நீராவி எஞ்சின்

நீராவி எஞ்சினைக் கண்டுபிடித்தவர் ஜேம்ஸ் வாட் என்பது எழுதப்பட்ட வரலாறு. பெஞ்சமின் ஃப்ராடி என்பது மறந்து போன வரலாறு. காரணம் அவர் ஒரு அடிமை ! அடிமை நிலையில் அமெரிக்காவில் இருந்த அவர் கடின உழைப்பின் மூலம் தனது பிள்ளைகளைப் படிக்க வைத்தார். சம்பாதிக்கும் பணமெல்லாம் தனது எஜமானுக்கே கொடுக்கும் நிலை அவருக்கு. கிடைத்த வேஸ்ட் பொருட்களை வைத்து அவர் நீராவி எஞ்சினை உருவாக்கினார்.

அமெரிக்க கடற்படையில் பின்னர் சேர்ந்த அவர், நிறைய கண்டுபிடிப்புகளை நிகழ்த்தினார். அவர் அடிமை என்பதால் எதற்கும் காப்புரிமை பெற அவரால் முடியவில்லை. அமெரிக்காவின் முதல் போர் கப்பலில் பயன்படுத்தப்பட்ட நீராவி எஞ்சின் இவரது கண்டுபிடிப்பு தான். கடைசி வரை தனது கண்டுபிடிப்புகளின் மூலம் எந்த பயனையும், புகழையும் பெறாமலேயே மறைந்து போனார் இவர்.

  1. கார்ட் ஐடியா

எல்லோரும் கார்ட் பயன்படுத்துங்கள், அப்போது தான் இந்தியா வல்லரசாகும் என குரல் ஒலித்துக் கொண்டிருக்கும் காலம் இது. அதைப்பற்றி நான் எதுவும் சொல்லப் போவதில்லை. ஆனால் முதன் முதலில் கார்ட் ஐடியாவைக் கண்டுபிடித்தவர் பெயர் ரான் கெலின் என்பவர். இந்தக் கண்டுபிடிப்பின் மூலம் அதிக புகழோ பணமோ இவர் பெறவில்லை.

ஆனால் இவர் மிகப்பெரிய தொழிலதிபர், பேச்சாளர், கண்டுபிடிப்பாளர். அந்த வகையில் நிறைய சம்பாதித்தார். இனிமேல் கார்ட் பயன்படுத்தும் போது ஒரு வினாடி ரான் கெலினையும் மனதில் நினையுங்கள்.

 

  1. ஏ.கே 47

“என்னுடைய மனதில் தாங்க முடியாத வேதனை இருக்கிறது. நான் இதை ஏன் கண்டுபிடித்தேன் என வருந்துகிறேன். இலட்சக்கணக்கான உயிர்களின் சாவுக்கு நான் காரணமாய் இருக்கிறேன் எனும் சிந்தனை என்னை அலட்டுகிறது. என்னை மன்னித்துவிடுங்கள். கடவுளே என்னை மன்னித்துவிடும்” என ஒரு கடிதம் எழுதி ரஷ்யாவிலுள்ள ஒரு சர்ச்சுக்கு அனுப்பினார் மிக்காயேல் கலாஷினோவ். அவரது துயரத்துக்குக் காரணம் அவர் கண்டுபிடித்த ஏ.கே.47. இவர் தனது தாய்நாடான ரஷ்யாவுக்காகத் தான் இதை வடிவமைத்தார். தனக்கு எந்த புகழும், பணமும், காப்புரிமையும் வேண்டாம் என அதை மொத்தமாய் அரசுக்கே அதைக் கொடுத்தும் விட்டார்.

ஆனால் ஏ.கே 47 உலகெங்கும் பரவிவிட்டது. இன்றைய கணக்குபடி பத்து கோடி ஏ.கே.47 துப்பாக்கிகள் உலகில் உள்ளன. பாதுகாப்புக்கு மட்டுமல்லாமல் தீவிரவாதம், சமூக விரோதிகள், கடத்தல்காரர்கள் என எல்லா இடங்களிலும் இது ஆக்கிரமித்து விட்டது. உலகெங்கும் பிரபலமான கண்டுபிடிப்புக்குச் சொந்தக்காரர். ஆனால் அது அழிவுக்கு வித்திட்டதால் கடைசில் மனம் கலங்கி 2013ல் இறந்தார்.

  1. சிப்ஸ்

“யோவ் என்னய்யா பிரஞ்ச் பிரைஸ் கொண்டு வந்திருக்கே.. பெரிசு பெருசா இருக்கு, மொறு மொறுப்பாவும் இல்லை” என கத்தினார் ஒரு கஸ்டமர். சமையல்காரர் ஜார்ஜ் கிரம் கடுப்பாகிப் போனார். சரி ரொம்ப மெல்லிசா சீவுவோம் என உருளைக்கிழங்கை சீவினார். மெல்லிய தூவல்களாய் வந்தது. அதை வறுத்து கொண்டு போய் வைத்தார். அது கஸ்டமருக்குப் பிடித்துப் போக, மக்கள் பலரும் அதைக் கேட்க ஆரம்பித்தனர். சட்டென சிப்ஸ் பிரபலமானது. நடந்தது 1853ம் ஆண்டு.

சரகோட்டா சிப்ஸ் என அதைப் பெயரிட்டு ஒரு கடையையும் திறந்தார் அவர். வியாபாரம் செழித்தது. ஆனால் அவர் செய்த ஒரு தப்பு, எந்த ஒரு காப்புரிமையும் வாங்காமல் போனது. இதனால் எல்லோரும் அவருடைய ஐடியாவைக் காப்பியடிக்க ஆரம்பித்தனர். நிறுவனங்கள் உருளைக்கிழங்கு சிப்ஸ்களை பாக்கெட்களில் அடைத்து விற்று கொழுத்த லாபம் பார்த்தன. ஜார்ஜ் கிரம் மறக்கடிக்கப்பட்டார்.

  1. மௌஸ்

கம்ப்யூட்டர் மௌஸ் எவ்வளவு பிரபலம் என்பது இப்போது எல்லோருக்கும் தெரியும். ஆனால் அதைக் கண்டுபிடித்த எங்கல்பெர்ட் அதை பெரிய விஷயமாகவே நினைக்கவில்லை. தன்னுடைய தனிப்பட்ட பயன்பாட்டுக்காக ஒரு மௌஸை அவர் உருவாக்கி வைத்திருந்தார். பல கண்டுபிடிப்புகளின் சொந்தக்காரரான அவர் 20 கண்டுபிடிப்புகளின் காப்புரிமையை வைத்திருக்கிறார். ஆனால் மௌஸை அவர் கண்டுகொள்ளவே இல்லை. 1968ம் ஆண்டு அவருடைய பல கண்டுபிடிப்புகளை உலகிற்கு விளக்கினார் அப்போதும் மௌஸ் அவரிடமே இருந்தது.

அவர் பணியாற்றிக் கொண்டிருந்த நிறுவனம் நாசூக்காக அந்த மௌஸுக்கான காப்புரிமையை வாங்கியது. பின்னர் அதை ஆப்பிள் நிறுவனத்துக்கு 40 ஆயிரம் டாலர்களுக்கு விற்று மகிழ்ந்தது. அதைக் கண்டுபிடித்தவருக்கு அதிலிருந்து டீ குடிக்க கூட காசு கிடைக்கவில்லை என்பது தான் கசப்பான உண்மை.

  1. ஸ்மைலி

ஒரு மஞ்சள் வட்டம். அதில் இரண்டு கண் வாய். பார்த்தவுடனே மனதில் புன்னகை எழும். அந்த வடிவத்தை வரைந்தவர் பெயர் ஹார்வே பால் என்பது யாருக்கும் தெரிந்திருக்க நியாயமில்லை. ஒரு நிறுவனத்தின் பணிபுரிந்து  கொண்டிருந்த அவர் இந்த ஸ்மைலியை வரைந்தார். 1963ம் ஆண்டு அவருக்கு நிறுவனம் 45 டாலர்கள் கொடுத்து, பாராட்டாய் முதுகில் தட்டிக் கொடுத்தது. அவ்வளவு தான் அவருக்குக் கிடைத்த மரியாதை

நிறுவனமோ, அந்த டிசைனை ஆடை பட்டன்களில் முதலில் பொறித்தது. வரவேற்பு பலமாய் இருந்ததால் அதை அப்படியே டிஷர்ட், போஸ்டர்,பந்து என சகட்டு மேனிக்கு அனைத்திலும் பொறிக்க ஆரம்பித்தனர். பில்லியன் கணக்கில் சம்பாதித்துக் கொட்டிய அந்த ஸ்மைலியை வடிவமைத்தவர் கண்டுகொள்ளப்படவே இல்லை. அவருக்குக் கிடைத்ததெல்லாம் அந்த $45 தான் !

  1. விமானம்

விமானத்தைக் கண்டு பிடித்தது யார் என்று கேட்டால் ரைட் சகோதரர்கள் என்று சொல்வோம். உண்மையில் அவருக்கு முன்பே ஒருவர் விமானம் செய்து ஓட்டிப் பார்த்தார் என்று சொன்னால் வியப்பாக இருக்கும். அந்த மேதையின் பெயர் ரிச்சர்ட் பியர்ஸ். நியூசிலாந்து நாட்டுக்காரரான இவர் ரைட் சகோதரர்கள் தங்கள் விமானத்தை வெள்ளோட்டம் விடுவதற்கும் ஒன்பது மாதங்களுக்கு முன்பே விமானத்தைப் பறக்க விட்டார். ரைட் சகோதரர்கள் விமானம் ஓட்டியது 1903ம் ஆண்டு டிசம்பர் 17ம் தியதி. ரிச்சர்ட் ஓட்டியது அதே ஆண்டு மார்ச் 31ம் தியதி !

மட்டுமல்லாமல், இன்றைய நவீன விமானத்துக்கும் ரிச்சர்ட் ஓட்டிய விமானத்துக்கும் அதிக ஒற்றுமை உண்டு. ரைட் சகோதரர்களின் விமானம் முற்றிலும் வேறுபட்டது. நவீன விமானத்தின் முன்னோடியான விமானத்தின் சொந்தக்காரரான ரிச்சர்ட் பியர்ஸ் மறக்கடிக்கப்பட்டு, ரைட் சகோதரர்கள் கொண்டாடப்படுவது காலத்தின் கோலம் என்பதைத் தவிர வேறென்ன சொல்ல ?

  1. ரேடியோ

ரேடியோவைக் கண்டுபிடித்தவர் மார்க்கோனி என்பது தான் வரலாறு நமக்குக் கற்றுத் தரும் பாடம். உண்மையிலேயே மார்க்கோனி தான் ரேடியோவை முதன் முதலாய்க் கண்டுபிடித்தாரா என கேட்டால் இல்லை என்பதே வியப்பூட்டும் பதில். நிக்கோலா டெஸ்லா என்பவருக்கே அந்த புகழ் போய் சேர வேண்டும். மார்க்கோனி தனது கண்டுபிடிப்பு என மார்தட்டிக் கொண்ட ரேடியோவைப் பற்றியும், ஒலி அலைகள் பாயும் விதம் பற்றியும் டெஸ்லா ஏற்கனவே எழுதியிருந்தார்.

நிக்கோலா டெஸ்லா வயர்லெஸ் தொழில்நுட்பத்தில் தந்தை என அழைக்கப்படுபவர். மார்க்கோனிக்கு முன்பே ரேடியோ சிக்னல்களை வெற்றிகரமாய் பயன்படுத்தியிருந்தாலும் முந்திக் கொண்டு பெயர் வாங்கிச் சென்றவர் மார்க்கோனி. 1893 ல் டெஸ்லோ கண்டு பிடித்தது, 1895ல் மார்க்கோனியால் சொந்த கண்டுபிடிப்பாய் பதிவு செய்யப்பட்டது.

  1. மின்விளக்கு

மின்விளக்கைக் கண்டுபிடித்தது யார் என்று கேட்டால் தாமஸ் ஆல்வா எடிசன் என சின்னக் குழந்தையும் சொல்லும். அந்த அளவுக்கு மின் விளக்கு நமது வாழ்க்கையோடு பின்னிப் பிணைந்தது. தாமஸ் ஆல்வா எடிசனின் பெயர் எல்லா பாடபுத்தகங்களிலும் அலசி ஆராயப்பட்டது. ஆனால் உண்மையில் மின்விளக்கை முதலில் கண்டறிந்தவர் தாமஸ் ஆல்வா எடிசன் அல்ல ! சர் ஹென்ரி டாவி என்பவர் !

1802ம் ஆண்டு பிளாட்டினம் இழைகளின் ஊடே மின்சாரத்தைச் செலுத்தி மின்விளக்கை உருவாக்கினார் அவர். பிளாட்டினம் வெப்பத்தை அதிகம் உள்ளிழுக்கும் என்பது தான் அதன் காரணம். ஆனால் இது மிக விலையுயர்ந்தது. பெரிய அளவில் விற்பனைக்குரிய வகையில் உருவாக்கும் சாத்தியங்கள் அற்றது. எனவே இது வெற்றியடையவில்லை. அதன்பின் 75 ஆண்டுகளுக்குப் பின்பு 1879ல் தான் தாமஸ் ஆல்வா எடிசனின் மூலம் அது வெற்றியடைந்தது.

TOP 10 : கனவுகளின் சுவாரஸ்யங்கள்

Image result for dreams

கனவுகள் சுவாரஸ்யமானவை. கனவு காண்பது சிலருக்கு பயம் தரும் விஷயம், சிலருக்கு பரவசமூட்டும் விஷயம். சிலர் அழகான கனவுகளைக் காண்பார்கள். சிலருக்கு ஆக்ரோஷமான கனவுகள் வந்து கதவைத் தட்டும். எது எப்படியோ கனவுகள் எல்லோரையும் சந்தித்துக் கொண்டே இருக்கின்றன. கனவுகளுக்கு நாடு, இனம், மொழி வேறுபாடு இல்லை. உயர்ந்தவன் தாழ்ந்தவன் எனும் பாகுபாடு இல்லை. வல்லரசு, நல்லரசு எனும் பேதங்கள் இல்லை. எல்லா மனிதர்களுக்குள்ளும் நுழைந்து விடுகின்றன கனவுகள். இந்த வாரம் அந்த கனவுகளைப் பற்றிய சுவாரஸ்யமான பத்து விஷயங்கள்.

  1. மூளை பரபரப்பாகும்.

இரவில் தூங்கும் போது எல்லா உறுப்புகளும் ஓய்வெடுக்கும் என்பது தான் நாம் கற்றுக் கொண்ட பாடம். ஆனால் கனவுகள் நிகழும் போது மூளை படுபயங்கரமாக வேலை செய்யும் என்கின்றன ஆய்வுகள். அதிலும் குறிப்பாக, தூக்கத்தின் ஒரு நிலையான‌ ரேப்பிட் ஐ மூவ்மென்ட் எனப்படும் விரைவான கண் இயக்க நிலையில் மூளை பயங்கர சுறுசுறுப்படைகிறது. குறிப்பாக காட்சிகளை பகுத்தறியும் மூளையின் பாகம் கனவின் போது வேகமாய் வேலை செய்கிறது.

விழித்திருக்கும் போது இருப்பதை விட அதிக பிஸியாய் கனவு வேளைகளில் மூளை பிஸியாய் இருப்பதுண்டு என சில ஆய்வுகள் கூறுகின்றன. இரவில் அதிக அழுத்தமான கனவுகள் கண்டால் காலையில் சோர்வாய் இருப்பதன் காரணம் இது தான். எனவே இரவில் முழு ஓய்வு என்பதை கனவுகளைக் கொண்டே அளவிட வேண்டியிருக்கிறது.

  1. கனவு காணுங்கள்.

ஆன்டோ ஜெனிடிக் ஹைபோத்தசிஸ் எனும் ஒரு கோட்பாடு இருக்கிறது. இரவில் கனவு காணும் மூளை வளர்கிறது என்கிறது அந்தக் கோட்பாடு. மனிதனின் அறிவு வளர்ச்சிக்கு கனவுகள் உதவுகின்றன‌ என்கிறது ஒரு ஆய்வு. குழந்தைகள் அதிக நேரம் ரேப்பிட் ஐ மூவ்மென்ட் எனப்படும் கனவு நிலையில் இருப்பதற்கு இது தான் காரணம். ரேப்பிட் ஐ மூவ்மென்ட் என்பதை தமிழில் விரைவான கண் இயக்க நிலை எனலாம். தூங்கும் குழந்தையின் கண்ணைப் பார்க்கும்போது உள்ளே விழி அசைந்து கொண்டிருந்தால் அது தான் விரைவான கண் இயக்க நிலை. குழந்தைகளின் மூளை வளர்ச்சிக்கு இந்த கனவுகள் மிகவும் அவசியம்.

மூளையில் புரோட்டீன் சத்து அதிகரிக்கவும் கனவுகள் உதவுகின்றன. அறிவு வளர்ச்சிக்கு தேவையான மூளையின் பாகங்கள் கனவுகளினால் தூண்டப்படுவதால் மூளை வலுவடைகிறது. எனவே அடுத்த முறை கனவு கண்டால் கவலைப்படாதீர்கள். அறிவு வளர்கிறது என மகிழுங்கள்.

  1. மரத்துப் போதல்

ஸ்பீல் பெராலிசிஸ் எனப்படும் தூக்கத்தில் மரத்துப் போகும் நிலை உலகெங்கும் உண்டு. கனவுகளில் உடல் அப்படியே மரத்துப் போகும். மூளை விழித்திருக்கும், ஆனால் உடல் அசையாது. கைகளைத் தூக்க வேண்டும் என தோன்றும் ஆனால் தூக்க முடியாது. பேச வேண்டும் என தோன்றும் ஆனால் பேச முடியாது. எழும்ப வேண்டும் என தோன்றும் ஆனால் எழும்ப முடியாது.

சிலருக்கு தன்னைச் சுற்றி என்ன நடக்கிறது என தெளிவாய்த் தெரியும். ஆனால் அதுவும் கனவு தான், நிஜம் போல தெரியும். படுத்திருக்கும் அறை, அறையில் மக்கள் நடமாட்டம் என பல விஷயங்கள் அவர்களுக்கு நிஜம் போல கனவில் வரும். இந்த நிலையில் சிலர் வித்தியாசமான ஏலியன் கனவுகளையும் காண்பதுண்டு என்கின்றனர் விஞ்ஞானிகள்.

  1. பாலினமும், கனவுகளும்

ஆண்களும் பெண்களும் கனவுகள் காண்கின்றனர். சரி, இருவருக்கும் ஒரே மாதிரியான கனவுகள் தான் வருகின்றனவா ? உலகெங்கும் இதுகுறித்து பல்வேறு ஆய்வுகள் வெளியாகின. அவை சொல்கின்ற செய்திகள் வியப்பானவை. ஆண்களுக்கும் பெண்களுக்கும் வருகின்ற கனவுகள் அடிப்படையிலேயே ஏகப்பட்ட வித்தியாசங்கள் கொண்டவை. பெரும்பாலும் அவை ஆண், பெண் எனும் இறைவனின் படைப்பின் சூட்சுமத்தின் அடிப்படையிலேயே அமைகின்றன. அதாவது பெண்கள் அதிக எமோஷன், உணர்வு ரீதியான நீண்ட கனவுகளைக் காண்கின்றனர். ஆண்களுக்கு அடிதடி, கார், சேசிங் போன்ற கனவுகளே அதிகம் வருகின்றன.

ஆண்களின் கனவில் 67% ஆண்களே வருகின்றனர். பெண்களின் கனவில் பெண்கள் 50% தான் வருகின்றனர். பாலியல் கனவுகளை 8% மக்கள் காண்கின்றனர். அதுவும் ஆண்களுக்கும் பெண்களுக்கும் வேறு விதமாகவே வருகின்றன. இவையெல்லாம் ஆய்வுகளின் அடிப்படையிலானவை மட்டுமே. இதில் எதிலும் பொருந்தாத மக்களும் நிச்சயம் இருப்பார்கள் என்பதே யதார்த்தம்

  1. காவியக் கனவுகள்

சிலருக்கு காவியக் கனவுகள் வருவதுண்டு. இது கொஞ்சம் அபூர்வம். ஆனால் காவியக் கனவுகள் காணும் பலருடைய வாழ்க்கை அதிரடி மாற்றங்களைச் சந்திக்கிறது. அந்தக் கனவுகள் அவர்களை வெகுவாகப் பாதிக்கின்றன. அந்தக் கனவின் ஒரு பாகமாக அவர்கள் மாறிவிடுகின்றனர். அந்தக் கனவு பல ஆண்டுகள் அவர்களுடைய மனதில் நிழலாடிக் கொண்டே இருக்கின்றன.

ஏதோ மிகப்பெரிய சாதனை செய்தது போல காவியக் கனவு காண்பவர்கள் உணர்வார்கள். ஏதோ ஒன்றைக் கண்டுபிடித்தது போல அவர்கள் மகிழ்வார்கள். காவியக் கனவுகள் பெரும்பாலும் ஒரு நாவலைப் போல ஆனால் நிஜ வாழ்க்கைக்கு சற்றும் சம்பந்தமில்லாததாய் வரும். காவியக் கனவு காண்பவர்கள் இன்செப்சன் படத்தைப் போல, கனவுக்குள் வேறு கனவு காண்பவர்களாகவும் இருப்பார்கள்.

  1. விலங்குகளும், கனவுகளும்

விலங்குகள் என்ன கனவு காண்கின்றன என்பதை இன்னும் மனிதன் கண்டுபிடிக்கவில்லை. ஆனால் விலங்குகள் கனவு காண்கின்றன என்பதை மட்டும் இப்போதைக்கு கண்டுபிடித்திருக்கிறார்கள். ஊர்வன, மற்றும் கொடிய விலங்குகள் கனவு காண்பதைப் பற்றி இன்னும் ஊர்ஜிதப்படுத்தப்படவில்லை. மற்றபடி நாய், பூனை, மான், பறவைகள் என சாதாரணமாய் நமக்குத் தெரிந்த எல்லா விலங்குகளுமே கனவு காண்கின்றன.

பெரும்பாலும் கனவு கண்டு எழுந்ததும் விலங்குகள் தற்காப்பு மனநிலைக்குள் வந்து விடுகின்றன. விலங்குகள் என்ன கனவுகளைக் காண்கின்றன. அவற்றுக்கு எப்போதெல்லாம் கனவுகள் வருகின்றன போன்ற பல ஆய்வுகள் தொடர்ந்து கொண்டே இருக்கின்றன.

  1. கனவும், நிஜமும்

கனவுகள் நாம் தூங்கும் போது நடக்கின்றன. அவற்றோடு நிஜத்தில் அப்போது நடந்து கொண்டிருக்கும் விஷயங்களும் கலந்து விடுவதுண்டு. இதை டிரீம் இன்கார்பரேஷன், அதாவது கனவு இணைப்பு என்பார்கள். உதாரணமாக நீங்கள் ஒரு கனவு கண்டுகொண்டிருக்கிறீர்கள். அந்தக் கனவில் நியூயார்க்கில் காதலியோடு ஆடிப் பாடுகிறீர்கள். அப்போது உங்கள் வீட்டை ஒட்டி ஒரு ஆம்புலன்ஸ் அதிக சத்தம் எழுப்பிக் கொண்டே செல்கிறது என வைத்துக் கொள்ளுங்கள். பெரும்பாலும் உங்களுடைய கனவில் நியூயார்க்கில் ஒரு ஆம்புலன்ஸ் உங்களுக்கு அருகே செல்வது போல வரும் !

அதே போல உங்களுக்கு பயங்கர தாகம் எடுக்கிறது என வைத்துக் கொள்ளுங்கள். கனவில் நீங்கள் தண்ணீர் குடிப்பீர்கள். ஆனால் தாகம் தணியாது. உண்மையிலேயே எழுந்து தண்ணீர் குடித்தபின் தான் தாகம் குறையும். கனவும் நினைவும் இணைகின்ற சுவாரஸ்யமான தருணம் இது. கனவில் உளறும் மக்களின் அருகே சென்று அவர்களோடு பேசிக்கொண்டிருந்தால் அந்த பேச்சுக்கு அவர்கள் பதிலளிப்பது இதன் ஒரு வகை தான்.

  1. கனவுகள் குறியீடுகள்

கனவுகளில் பல விஷயங்களைக் காண்போம். ஆனால் அவை நேரடியாக அந்த பொருளைச் சொல்வதில்லை. ஒரு ஆள் இறந்து போவதைக் கனவில் கண்டால் அந்த நபருக்கு ஆபத்தென்று பொருள் இல்லை. கிராமங்களில் அடிக்கடி சொல்வார்கள், ‘கல்யாணத்தைப் பாத்தா மரணம் ஒண்ணு விழும்’ என்று. ஒரு விஷயத்தை குறியீடுகளால் உணர்த்துகின்றன கனவுகள். இதனால் தான் கனவுகளும் அவற்றின் பயன்களும் என பல்வேறு ஆய்வுகளும், நூல்களும் கனவுகளின் முடிச்சவிழ்க்க முயல்கின்றன.

குழந்தைகள் மூன்று வயதுவரை அவர்களைப் பற்றி கனவுகள் காண்பதில்லை. அதே போல குறட்டை விடும்போது மனிதன் கனவு காண்பதில்லை என இன்னொரு ஆய்வு சொல்கிறது. யாரோ துரத்துவது போல, எங்கிருந்தோ விழுவது போல, தேர்வுக்கு லேட்டாகப் போவது போல இப்படி நாம் காணும் கனவுகள் எல்லாம் குறியீடுகளே.

  1. பார்வையற்றவரின் கனவுகள்

பிறக்கும் போது பார்வையிருந்து, இடையில் பார்வை பறிபோனவர்கள் கனவுகளை காட்சிகளாகக் காண்கின்றனர். ஆனால் பிறவியிலேயே பார்வையிழந்தவர்கள் காட்சிகளைக் காண்பதில்லை. ஆனால் அவர்களுக்கும் கனவுகள் வரும் ! எப்படி ? அவர்களுடைய மற்ற புலன்களான கேட்டல், தொடுதல், உணர்தல் போன்றவற்றின் அடிப்படையில் அவர்களுக்குக் கனவுகள் வருகின்றன.

எல்லோரும் கனவுகளை கலரில் பார்ப்பதில்லை. 12% மக்களுக்குக் கனவுகள் கருப்பு வெள்ளையில் வந்து கடுப்படிக்கும். மற்றவர்களுக்கு கலரில் வந்து கண்சிமிட்டும். ஏன் சிலருக்கு கனவுகள் கருப்பு வெள்ளையாகவும், சிலருக்கு வண்ணமாகவும் வருகின்றன என்பதற்குச் சரியான பதில் இல்லை.

  1. கனவுகள் மறந்துவிடும்

நாம் காணும் கனவுகளில் 50% கனவுகளும் நாம் விழித்த ஐந்து நிமிடத்திலேயே மறந்து விடும். அடுத்த ஐந்து நிமிடத்தில் இன்னொரு 40 சதவீதம் மறந்து விடும். அதிகபட்சம் ஒரு பத்து சதவீதம் தான் நினைவில் நிற்கும். கனவுகளைக் குறிப்பெடுக்க விரும்புபவர்கள் படுக்கையிலேயே பேப்பர் பென்சில் வைத்திருக்க வேண்டும். விழிப்பு வந்ததும் படுக்கையை விட்டு எழும்பாமல், படுத்திருக்கும் அதே நிலையில் படுத்து எழுத வேண்டும் என்கின்றனர் வல்லுநர்கள்.

‘நான் இதுவரைக்கும் பாக்காத ஒரு முகம் தான் என் கனவுல வந்தது’ என நாம் சொல்வதுண்டு. உண்மையில் கனவுக்கு புதிய மனித முகங்களை வரையத் தெரியாது. நமது வாழ்க்கையில் நாம் ஏதோ ஒரு சந்தர்ப்பத்தில் பார்த்த மனித முகங்களே வரும். ஐந்து வயதில் நமக்கு ஒரு மிட்டாய் வாங்கி தந்த நபராய் இருக்கலாம். அல்லது விமானப் பயணத்தில் ஓரமாய் அமர்ந்து பேப்பர் படித்த நபராய் இருக்கலாம். நாம் மறந்து போய் பல வருடங்களான முகங்களும் கனவில் வரும். நாம் அவர்களை புதியவர்கள் என்போம். இதுதான் உண்மை !

 

காதல் என்பது எதுவரை

Related image

“அவன் யார் கூட எப்படிப் பழகறான்னு தெரியாது. ஆனா என் கூட ரொம்ப அன்பா இருப்பான். எனக்காக உயிரையே குடுப்பான்” என காதலில் கசிந்துருகும் காதலியர் சொல்வதுண்டு.

“மச்சி, அவளோட லவ் சின்சியர்டா. அடுத்தவங்க அவளைப்பற்றி என்ன சொன்னாலும் கவலையில்லை. என்னைப் பொறுத்தவரை அவ அன்பானவடா” என கசிந்துருகும் காதலன் சொல்வதுண்டு.

இத்தகைய அதீத நம்பிக்கைகளும், மனப்பான்மைகளும் தான் காதல் தோல்விகளுக்கும், காதலின் வெளிப்பாடாய் விளையும் திருமணத் தோல்விகளுக்கும் காரணம்.

காதலில் திளைத்திருத்தல் என்பது பூவில் புரளும் வண்டின் ஆனந்தத்துக்கு ஒப்பானது. உலகமே பூக்களின் கூடாரம் என வண்டு கற்ப‌னை செய்து கொள்ளும் கொள்ளும். வண்டு எப்போதுமே கொஞ்சிக் குலவும் என பூக்கள் புரிந்து கொள்ளும். இரண்டுமே தவறென தெரியவரும் போது எதிர்பார்ப்புகளின் ஆணிவேர் ஏமாற்றக் கோடரியால் வெட்டிச் சாய்க்கப்படும். அவ்ளோ தான்பா அவங்க‌ காதல் ! காதல் எவ்ளோ தூரம் போகும்ன்னு நமக்குத் தெரியாதா ? என ஊர் பேசத் தொடங்கும்.

தவறு காதலர்களிடம் தான் இருக்கிறது. தனது காதலன் தவறே இல்லாதவன் என காதலியும், தனது காதலி பிழையற்றவள் என காதலனும் கருதிக் கொள்வதில் பிரச்சினை யின் முதல் முளை துவங்குகிறது. உண்மையோ வித்தியாசமானது !

ஆலயத்துக்குள் பக்திப் பழமாய் நுழையும் மனிதனைப் பார்த்தால் அவன் கழுவி வைத்த கடவுளைப் போல இருப்பான். கூப்பிய கைகளோடும், வெற்றுக் கால்களோடும் அவன் ஆலயத்தின் தாழ்வாரங்களில் அமைதியாய் அலைந்து திரிவான். ஆலயத்தை விட்டு வெளியே வந்ததும், லஞ்சப் பணத்தை எண்ணத் தொடங்குவான். அல்லது தனது ஆன்மீக இதயத்தைக் கழற்றி விட்டு அழுக்கான இதயத்தை அணிந்து கொள்வான். கோயிலுக்குள் ஒருவன் எப்படி இருக்கிறான் என்பதை வைத்து அவன் எப்படிப்பட்டவன் என்பதை அளவிட முடியாது.

அதே போல தான் காதலும் ! காதலில் திளைத்திருக்கும் போது அடுத்த நபருக்காக உயிரை கைகளில் ஊற்றி ஊட்டி விடுவார்கள். இதழ்களில் இதயத்தை இறக்கி வார்த்தைகளாலே வானவில் கட்டுவார்கள். ஆனால் வாழ்வின் எதார்த்தம் எப்போதும் படகு சந்திப்போடு முடிந்து போவதில்லை.

ஒரு மனிதனின் இயல்பு எப்படி என்பதை வைத்தே அவனது காதல் வாழ்க்கையையும் அளவிட வேண்டும். அவன் தனது தாயை நேசிக்கிறானா ? தனது தந்தையை மதிக்கிறானா ? தனது சகோதர சகோதரிகளிடம் பாசமாய் இருக்கிறானா ? நண்பர்களோடு நட்பு பாராட்டுகிறானா ? வீதியில் திரியும் ஒரு ஏழை சகோதரனைக் கூட கருணையோடும், சக மனித மரியாதையோடும் நடத்துகிறானா ? இவையெல்லாம் ஒருவனுடைய காதல் வாழ்க்கையிலும் வெளிப்படும்.

ஒருவனுடைய இயல்பு எதுவோ, அதுவே காதலிலும் பிரதிபலிக்கும். அதைத் தாண்டிய வெளிப்பாடுகள் எல்லாம் போலியே. அம்மாவை அவமதிப்பவன், அப்பாவை நிராகரிப்பவன், சகோதர சகோதரிகளுக்கு இரங்காதவன் காதலிக்கு மட்டும் காற்றில் தாஜ்மஹால் கட்டினால் நம்பாதீர்கள். அந்த மிகைப்படுத்தும் நடிப்பு நிலைப்பதில்லை. அது பனிக்கட்டியின் மீது செய்யும் தூரிகை வண்ணம் போல காலம் கடக்கையில் கரைந்தே மறையும்.

அரளிச் செடியின் கிளைகளில் ரோஜாப் பூக்களை ஒட்டி வைக்கலாம். மாமரத்தின் கிளைகளில் மாதுளம் பழத்தைக் கட்டி வைக்கலாம். ஆனால் நிலைக்குமா ? நிலைப்பதில்லை ! மரத்தின் இயல்பு எதுவோ, அது தான் கனிகளில் வெளிப்படும். செடியின் இயல்பே பூக்களில் வெளிப்படும். அதைத் தாண்டிய மாயாஜாலங்களெல்லாம் காதலர்களின் கண்கட்டு வித்தைகளே.

ஒருவன் காதலில் சிறக்க வேண்டுமெனில் அவனுடைய குணாதிசயம் சரியாக இருக்க வேண்டும். என்னதான் விஷத்தண்ணீர் ஊற்றினாலும் ரோஜாப்பூ கருப்பாய் பூக்காது. நிலத்தை மாற்றி நட்டாலும் அல்லிக் கொடியில் அரளிப் பூ பூக்காது. உங்கள் குணாதிசயம் உங்களது உதிரத்தோடு கலந்தது. உதிர்ந்து விடுவதில்லை. அந்த குணாதிசயம் மிக முக்கியம். மனிதத்திலும், மனித நேயத்திலும் கலந்த குணாதிசயம் உங்கள் காதலருக்கு இருந்தால் உங்கள் காதல் என்பது ஆயுள் உள்ளவரை என்பதில் சந்தேகமில்லை.

தெய்வீகக் காதலென்பது கடற்கரையில் கைகோப்பதோ, மாலை நேரத்தில் மயங்கிக் கிடப்பதோ, வாட்ஸப் வாசலில் தோரணம் கட்டுவதோ, தொலைபேசிக் குரலுக்குள் தேன் தடவி அனுப்புவதோ அல்ல. அது ஒரு நீண்டகால பயணத்துக்கான வழித்துணையை பெற்றுக் கொள்வது.

இங்கே கவிதைகள் வரைவது எவ்வளவு அழகானதோ, கவிதையாய் வாழ்வது அதை விட அவசியமானது. காமத்தின் இழைகளில் சிலிர்ப்புகளை நெய்வது எவ்வளவு முக்கியமோ, மௌனத்தின் கரைகளில் மகிழ்ச்சியை நெய்வது அதை விட முக்கியமானது. அதற்கு காதலர்களின் குணாதிசயமும், இயல்பும் முக்கியமாகிறது.

அன்று

சங்கக் காதலில் தமிழன் சிலிர்ப்பூட்டினான்

இன்று

அங்கக் காதலில் சலிப்பூட்டுகிறான் !

காதலைக் கொண்டாடிய தமிழன் இன்று ஏன் காதலைக் கொன்றாடுகிறான் ? காரணம் இருக்கிறது. அன்றைய காதல் தற்காலிகக் கனவுகளில் தனது மாளிகையை அமைக்கவில்லை. நிஜங்களில் பாய் முடைந்து படுத்துக் கிடந்தது. தூரதேசம் செல்லும் காதலனுக்காக ஆண்டுக் கணக்கில் காத்திருந்தது அன்றைய காதல். நெட்வர்க் நாலு நாள் வேலை செய்யாவிட்டாலே காதல் முறிந்து போகிறது இன்று.

காதல் எதுவரை என்பதை காதலர்களே முடிவு செய்கிறார்கள். பாதி வழியில் இறங்கவேண்டுமே என பயணிப்பவர்களும் உண்டு. இறுதிவரை நிலைத்திருப்பவர்களும் உண்டு. காதலில் வெற்றியடைந்தவர்களின் வாழ்க்கையை ஒரு குறுக்கு வெட்டுத் தோற்றத்துக்கு உட்படுத்தினால் அவர்களிடம் சில குணாதிசயங்கள் இருப்பதைக் காணலாம்.

ஒருவரை ஒருவர் மதிக்கும் பண்பு, ஒருவரை அவரது இயல்புகளோடே ஏற்றுக் கொள்ளும் மனம், சுயநல சிந்தனைகளற்ற குணம், சந்தேகம் விலக்கிய நம்பிக்கை, பதட்டம் தரா பாதுகாப்பு உணர்வு, கள்ளமற்ற உரையாடல், யதார்த்தத்தை பார்க்கும் பக்குவம் போன்றவற்றை அவற்றில் முக்கியமானவையாய் சொல்லலாம்.

இதோ மீண்டும் ஒரு காதலர் தினம் வந்திருக்கிறது.

காதலை மீண்டெடுப்போம். மீண்டும் எடுப்போம். சிற்றின்பத்தின் கரைகளில் ஒதுங்கும் நுரைகளாய் அல்ல, பேரின்பத்தின் பிரவாகத்தில் கலந்துவிடும் புத்துணர்ச்சியுடன்.

காதல், வாழ்வின் பாகமல்ல.

வாழ்வே காதலின் பாகம்.

காதலாகவே இருக்கிறது இப் பிரபஞ்சம், கறைபடியாமல் காப்பது மட்டுமே நமது வேலை. காதல் என்பது எதுவரை ? வாழ்க்கை எனும் வட்டத்தின் கடைசி முனை வரை !

Vettimani, London & Germany.

அலுவலகத்தில் பாலியல் தொல்லை; சமாளிப்பது எப்படி ?

அலுவலகத்தில் பாலியல் தொல்லை

சமாளிப்பது எப்படி ?

Image result for office gender issues

கல்பனா நிமிர்ந்து பார்த்தாள். அவளுக்கு முன்னால் வசீகரக் கண்ணாடிகளுடன் கம்பீரமாய் நின்றிருந்தது அந்த மல்டி நேஷனல் மென்பொருள் நிறுவனம். அவளுடைய கண்களில் கர்வமும், பிரமிப்பும் ஒரு சேர வந்து நிரம்பின. கல்பனாவுக்கு வயது வெறும் இருபத்து ஒன்று தான். இந்த வயதிலேயே ஒரு நல்ல ஐந்திலக்க சம்பளத்தில் அவளுக்கு வேலை.

கம்பெனியில் ஒரு நல்ல புராஜக்டில் அவளுக்கு வேலை ஒதுக்கப்பட்டது.  விரும்பியதை எல்லாம் அடைந்து விட்டது போல கல்பனாவுக்குள் ஒரு பெருமிதம். உற்சாகப் பறவையாய் வலம் வந்தாள் கல்பனா. அவளுடைய டீமில் மொத்தம் பன்னிரண்டு பேர். இவளைத் தவிர இன்னும் இரண்டு பெண்கள். மற்ற ஒன்பது பேரும் ஆண்கள்.

“ஹேய்… ஹவ் ஆர் யூ” போகும் போக்கில் சொல்லிக் கொண்டே போனார் ஜெயராஜ். ஜெயராஜ் தான் அந்த புராஜக்ட் மேனேஜர்.

“ஃபைன் சார்…. “ கல்பனா பதில் சொல்லும் முன் ஜெயராஜ் கொஞ்ச தூரம் முன்னாடியே போய்விட்டான்.

ஜெயராஜ் ஜாலி பேர்வழி. எப்போதும் ஏதாவது பேசி டீம் மெம்பர்களை ரொம்ப உற்சாகத்தில் வைத்திருப்பான். நல்ல ஒரு மேனேஜரிடம் சேர்ந்த நிம்மதியும் அவளுக்கு வந்திருந்தது. டீமில் எல்லோருமே அவளிடம் ரொம்ப அன்பாகப் பழகினார்கள்.

மாதங்கள் இரண்டு உருண்டோடின.

கல்பனா கேண்டினில் தனியாக அமர்ந்து ஜூஸ் குடித்துக் கொண்டிருந்தாள். அவளுடைய சிந்தனையெல்லாம் எங்கோ வட்டமடித்துக் கொண்டிருந்தது.

“ஹே கல்பனா ? எப்படி இருக்கே ? … ஹவ்ஸ் வர்க் கோயிங் ? ” கேட்டுக் கொண்டே பக்கத்தில் வந்து அமர்ந்தாள் ரூபிகா. ரூபிகா அதே நிறுவனத்தில் இன்னொரு பிரிவில் வேலை பார்க்கிறாள். இரண்டு பேரும் திக் பிரண்ட்ஸ்.

“யா.. இட்ஸ் கோயிங்… நீ எப்படி இருக்கே ?” கல்பனா விசாரித்தாள்.

“ஐம் ஃபைன். என்ன ஆச்சுடி உனக்கு ? ரொம்ப டல்லா இருக்கே ?”

“ஹே..நத்திங்….” கல்பனா செயற்கையாய்ப் புன்னகைத்தாள்.

“உன்னை எனக்குத் தெரியாதா ? என்னாச்சு ? வேலை ரொம்ப டைட்டா ? டைட் டெட்லைன்ஸா ? லேட் ஆகுதா ? இல்லே வீட்ல ஏதாச்சும் பிரச்சினையா ?” ரூபிகா கேட்டாள்.

“எப்படி சொல்றதுன்னு தெரியல ரூபி… பட்… “ கல்பனா தலையைக் கவிழ்ந்தாள்.

“என்னடி ? லவ்வா ? “ ரூபி சீண்டினாள்.

“சேச்சே…. லவ்ன்னா நான் கவலைப்படணும்… “ கல்பனா சிரித்தாள்.

“சரி போதும் உன் பில்ட் அப் எல்லாம். விஷயத்தைச் சொல்லு என்ன பிரச்சினை ?” ரூபிகா சட்டென சீரியஸானாள்.

“வெளியே யார் கிட்டேயும் சொல்லாதே ரூபி. இதை எப்படி ஹேண்டில் பண்றதுன்னு தெரியல. அதான் உன் கிட்டே சொல்றேன். கொஞ்ச நாளாவே என்னை ஒருத்தன் டீஸ் பண்ணிட்டே இருக்கான். ஐ…மீன்… யு னோ..…” கல்பனா இழுத்தாள்.

“என்னடி சொல்றே… யூ..மீன் … செக்ஸுயலி ?” ரூபி கேட்க கல்பனா சட்டென நிமிர்ந்தாள். “எப்படிடி நீ கரெக்டா சொல்றே ?”

“நான் இங்கே வந்து நாலு வருஷம் ஆச்சு. நானும் இந்தப் பிரச்சினையை எல்லாம் கடந்து தானே வந்திருக்கேன்…” ரூபி சொல்ல, கல்பனா கையிலிருந்த ஜூஸ் டம்ளரை விரல்களால் சுரண்டிக் கொண்டே பேச ஆரம்பித்தாள்.

“முதல்ல சாதாரணமா தான் பேசினான். அப்புறம் கொஞ்சம் கொஞ்சமா செல்லப் பேரு போட்டு கூப்பிட்டான். நான் கண்டுக்கல. அப்புறம் ஒரு ஜோக் அனுப்பினான், லைட்டா செக்ஸ் ஜோக்… அதுக்கும் நான் ஒண்ணும் சொல்லல, இப்ப என்னடான்னா ரொம்ப ஆபாசமா ஒரு ஜோக் அனுப்பியிருக்கான். “ கல்பனா சொல்லச் சொல்ல அவள் கண்களில் கண்ணீர்.

“ம்…. இது எல்லா பசங்களும் பாலோ பண்ற ஒரு டெக்னிக்… இன்னிக்கும் நீ ஒண்ணும் சொல்லலேன்னு வெச்சுக்கோ, நாளைக்கு வந்து ஒரு ஜோக் அனுப்பினேன் படிச்சியா ன்னு கேப்பான் பாரேன்…” ரூபா சொல்ல கல்பனாவுக்கு கண்களில் மிரட்சி.

“இப்ப என்னடி பண்றது ?”

“ஐ டோண்ட் லைக் யுவர் ஆக்டிவிடீஸ்… டிஸ்டர்ப் பண்ணினீங்கன்னா மேனேஜர் கிட்டே கம்ப்ளெயிண்ட் பண்ணுவேன்னு சொல்லு” ரூபா சொல்ல கல்பனா நீண்ட ஒரு பெருமூச்சை விட்டாள்.

“இப்படி ஜோக் அனுப்பினதே என் மேனேஜர் தாண்டி…” கல்பனா சொல்ல ரூபா தலையைச் சொறிந்தாள். “ஓ… அப்போ .. இது கொஞ்சம் சிக்கல் தான். ஆனா சமாளிச்சுடலாம் கவலைப்படாதே ” ரூபா சொன்னாள்.

“இப்படியெல்லாம் நடக்கும்னு நான் நினைக்கவே இல்லை ரூபா. எவ்ளோ பெரிய கம்பெனி ! எவ்ளோ பேர் வேலை பாக்கறாங்க, எல்லாரும் நல்லா படிச்சவங்க ! இப்படியும் சிலரு இருக்காங்களே ?”  கல்பனா சலித்துக் கொண்டாள்.

“இப்படியும் சிலர் இல்ல கல்பனா, சிலரைத் தவிர எல்லாருமே இப்படித் தான். முதல்ல நல்லா பேசுவாங்க. அப்புறம் ஆளுக்குத் தக்கபடி ஒரு திட்டம் வைச்சிருப்பாங்க… “ ரூபா சொல்ல கல்பனா கூர்மையானாள்.

“உன்னை மாதிரி சின்னப் பொண்ணுங்கன்னு வெச்சுக்கோ, ஜோக், கதை, படம்ன்னு நைசா கிளர்ச்சியைத் தூண்டி விட்டு தப்பு பண்ண வெச்சிடுவாங்க. நீ மட்டும் நல்ல ஜோக் ன்னு ஒரு வரி ரிப்ளை பண்ணியிருந்தே , நாளைக்கே உன் பக்கத்துல வந்து உக்காந்து ஜோக் சொல்லுவான். அப்புறம் படம் அனுப்புவான். அப்புறம் தனியே கூட்டிட்டு போய் செக்ஸ் கதை பேசுவான்.. அப்புறம் என்ன உன்னை ஒரேயடியா அமுக்கி எல்லாத்தையும் பண்ணிட்டு போயிடுவான்” கல்பனாவுக்கு பயம் பல மடங்கு அதிகரித்தது.

“ஒருவேளை கல்யாணம் ஆன பொண்ணுன்னு வெச்சுக்கோ, அவங்களையும் விட மாட்டாங்க. முதல்ல கொஞ்ச நாள் ஹஸ்பண்ட் எப்படி இருக்காரு, குழந்தைங்க எப்படி ன்னு பேசுவாங்க. கொஞ்சம் போகப் போக இவ்ளோ லேட்டா போறீங்க அவர் எவ்ளோ நேரம் தான் உங்களுக்காக தூங்காம முழிச்சிட்டிருக்கிறதுன்னு கேப்பாங்க. அதுல என்ன பதில் வருதுங்கறது தான் துருப்புச் சீட்டு அவனுக்கு. அவரு என்ன டெய்லி டயர்டா வந்து தூங்குவாருன்னு சொன்னா, அங்கே அந்த இடத்தை நிரப்பப் பாப்பாங்க” ரூபா சொன்னாள்.

“கல்யாணம் ஆன பொண்ணுங்களுக்குக் கூடவா இப்படி சிக்கல் இருக்கு ?” கல்பனாவின் கேள்வியில் வியப்பு தெரிந்தது.

“அவங்களுக்குத் தான் பிரச்சினை ரொம்பப் பெருசு. ஆண்கள் ரொம்ப திட்டம் போட்டு காய் நகர்த்தற பேர்வழிங்க. பெண்களோட வீக்னெஸ், அவங்க ஹஸ்பண்டோட வீன்கெஸ் இதையெல்லாம் நல்லா அனலைஸ் பண்ணி உங்களை அந்த ஏரியால இம்ப்ரஸ் பண்ண பாப்பாங்க. அதுக்கு ஒரே வழி, இப்படி பேச்சு ஆரம்பிக்கும்போதே என் ஹஸ்பண்ட் எனக்கு கிடைச்சது மிகப் பெரிய கிஃப்ட். அவரை மாதிரி ரொம்ப அன்பா இருக்கிற ஒரு ஆளை நான் பாத்ததே இல்லைன்னு ஒரேயடியா சொல்றது தான். அதையே கடைசி வரைக்கும் மெயிண்டெய்ன் பண்ணணும். நான் அதைத் தானே சொல்லிட்டிருக்கேன் !” ரூபா சிரித்துக் கொண்டே தொடர்ந்தாள்.

“சரி… என்னோட பிரச்சினையை எப்படி ஹேண்டில் பண்றது சொல்லு” கல்பனா அவசரப்பட்டாள்.

“சிம்பிள். நம்ம கம்பெனியோட ஹைச்.ஆர் பாலிஸி பாரு. செக்ஸுவல் ஹராஸ்மெண்ட் அதாவது பாலியல் தொந்தரவு மிகப்பெரிய குற்றம். நீ முதல்ல போய் அவரோட மெயிலுக்கு ஒரு ரிப்ளை பண்ணு. “

“என்னன்னு ? ”

“சார்… ஐ ரெஸ்பக்ட் யு. ஆனா என்னால இதை என்கரேஜ் பண்ண முடியாது. பிளீஸ் டோண்ட் செண்ட் மி சச் மெயில்ஸ்” ன்னு ஒரு மெயில் போடு. அவ்ளோ தான். விஷயம் சிம்பிள்.

“அதுக்கு அப்புறமும் சிக்கல் வந்தா ?”

“வந்தா நம்ம பாலிஸில செக்ஸுவல் ஹராஸ்மெண்ட் ஒரு குற்றம்ன்னு போட்டிருக்கிற இடத்தை அவருக்கு மெயில்ல அனுப்பி விடு. அதுக்கும் அவர் மசியலேன்னா நேரா போய் ஹைச். ஆர் கிட்டே கம்ப்ளெயிண்ட் பண்ணலாம். அவன் வேலை போயிடும். எல்லா கம்பெனியிலயும் இந்த சட்டம் இருக்கு. எந்த ஒரு ஊழியரையும் நிறம், மதம், பாலியல், ஜாதி என எதை வெச்சும் தொந்தரவு செய்யக் கூடாது ! கோர்ட்ல போனா கூட நமக்கு வெற்றி தான்” ரூபா சொல்ல கல்பனா கவனமாய்க் கேட்டுக் கொண்டிருந்தாள்.

“சில விஷயங்களைக் கவனமா தெரிஞ்சுக்கோ கல்பனா. முதல்ல உன் கிட்டே எவிடன்ஸ் இருக்கணும். அந்த மெயில்களையெல்லாம் ஒரு பிரிண்ட் அவுட் எடுத்து பைல் பண்ணி வை. சாட்சி ரொம்ப முக்கியம். ஏன்னா, குற்றம் சாட்டினா உடனே எப்படியாவது அதுல இருந்து தப்பிக்க உன் மேலயே குற்றத்தை திருப்பி விடுவாங்க” ரூபா சொல்ல கல்பனா கலவரமானாள்.

“என் மேலயா ? எப்படி ? நான் தான் ஒன்னுமே சொல்லலையே ?”

“புரமோஷனுக்காக நீ மேனேஜர் கிட்டே ஆபாசமா பேசறேன்னு கூட அவரு தோசையைத் திருப்பிப் போடலாம். பட் கவலைப்படாதே. இந்த எவிடன்ஸ் அப்போ நமக்குக் கை கொடுக்கும்” ரூபா சொன்னாள். கல்பனா அமைதியாய் இருந்தாள்.

“கவலைப்படாதே. இதை முளையிலேயே கிள்ளி எறியறது சுலபம். மேனேஜர் நிறைய வேலை கொடுப்பாரு, புரமோஷன் தரமாட்டாரு, திட்டுவாருன்னெல்லாம் நினைச்சு குழம்பாதே. அதையெல்லாம் அப்புறம் டீல் பண்ணிக்கலாம். இது உன் ஒருத்தியோட பிரச்சினை இல்லை. ஆண்டுக்கு 2 இலட்சம் டீன் ஏஜ் பெண்கள் இந்த பணி இட பாலியல் தொந்தரவுகளினால கடுமையா பாதிக்கப்படறாங்களாம் ! “ ரூபா சொன்னாள்.

“ஓ… மை காட் ! ஐயோ.. கம்பெனிகள் ஏதும் கண்டுக்கறதில்லையா ?” கல்பனா கவலையாய் கேட்டாள்.

“நோ…நோ.. நிர்வாகம் இதுல படு ஸ்டிரிக்ட். நாம வேலைக்கு ஜாயின் பண்ணும்போ ஹராஸ்மெண்ட் அக்ரீமெண்ட்லயும் சைன் பண்றோம், அடிக்கடி நிர்வாகம் நமக்கு சர்குலேஷன் அனுப்புது, என்ன கம்ப்ளெயிண்ட்ன்னாலும் உடனே ஆக்ஷன் எடுக்கறாங்க… ஒரே ஒரு விஷயம், பெண்கள் பலரும் கம்ப்ளெயிண்ட் பண்றதில்லை.. அதான்” ரூபா சொன்னாள்.

“ஏன் கம்ப்ளெயிண்ட் பண்றதில்லை. இதையெல்லாம் வளர விடக் கூடாதில்லையா “ கல்பனா கேட்க ரூபா மெலிதாய் சலித்துக் கொண்டாள்.

“பிரச்சினை நம்ம பெண்கள் கிட்டேயும் இருக்கு. சில பெண்கள் இதை ரொம்ப என்கரேஜ் பண்றாங்க. சிலருடைய குடும்பச் சிக்கல்களுக்கு இது ஒரு வடிகாலா நினைக்கிறாங்க. ஆனா உண்மையில் இது பெரிய சிக்கல்களைத் தான் குடும்ப வாழ்க்கைல உருவாக்கும். இன்னும் சிலர் புரமோஷன், சம்பள உயர்வு, அப்ரைஸல் அது இதுன்னு பயப்பட்டு அமைதியா இருக்காங்க. பட். என்னைப் பொறுத்தவரைக்கும் பிரச்சினை நம்மை டிஸ்டர்ப் பண்ணினா, நேரடியா சொல்லிடணும். கேக்கலேன்னா கம்ப்ளைண்ட் தான்… நோ காம்ப்ரமைஸ்” ரூபா அழுத்தமாய்ச் சொன்னாள்.

“கம்பெனியை விட்டு வெளியே அனுப்பிடுவாங்களா ? எனக்குப் பயமா இருக்கு. நான் வந்து ரெண்டு மாசம் தான் ஆகுது. அதுக்குள்ள வெளியே அனுபினாங்கன்னா என் வாழ்க்கையே பாழாயிடும்” கல்பனா கவலையாய்ச் சொன்னாள்.

“அப்படியெல்லாம் நடக்காது. வெளியே அனுப்பமாட்டாங்க. ஏன்னா சுப்ரீம் கோர்ட்ல போனா கூட நீ தான் ஜெயிப்பே. இந்திய சட்டம் 354ல ஹராஸ்மெண்ட் பத்தி தெளிவாவே சொல்லப்பட்டிருக்கு. உடம்பைத் தொடறது, அல்லது தொடறதுக்கு முயற்சி பண்றது, செக்ஸ் வெச்சுக்கோ புரமோஷன் தரேன்னு சொல்றது, செக்ஸ் படங்களைக் காட்டறது, செக்ஸியா பேசறது , ஏதாச்சும் சைகை காட்டறது.. இதெல்லாமே தப்புன்னு சுப்ரீம் கோர்ட் சொல்லியிருக்கு. மட்டுமல்ல, லேபர் லா, இண்டஸ்ட்ரியல் ஆக்ட் 1946 ன்னு நிறைய சட்ட திட்டங்கள் இதுக்கு எதிரா இருக்கு. இந்த விஷயமெல்லாம் உனக்குத் தெரிஞ்சாலே போதும் உனக்கு தானா தைரியம் வரும். எந்தக் கம்பெனியும் இந்த விஷயத்தை என்கரேஜ் பண்றதில்லை. சோ, இதைப் பற்றி ரொம்பக் கவலைப்படாதே” ரூபா சொன்னாள்.

“உன் கூட பேசினதுல எனக்கு ஒரு புது தெம்பு கிடைச்சிருக்கு. என்ன பண்றதுன்னு தெரியாம குழம்பிட்டிருந்தேன். பேசாம, கம்பெனி மாத்திட்டு போயிடலாமான்னு கூட யோசிச்சேன்…” கல்பனா சொல்ல ரூபா சிரித்தாள்.

“இதுக்கெல்லாம் கம்பெனி மாத்திட்டு போனா மாசத்துக்கு ஒரு கம்பெனி மாற வேண்டியதுதான். இதையெல்லாம் எதிர்க்கிறதில நாம நம்ம வலிமையைக் காட்டணும். தப்பு செய்ய ஆணுக்கு தைரியம் இருக்கும் போது எதிர்க்க ஏன் பெண்ணுக்கு தைரியம் வர மாட்டேங்குது ?. சின்னச் சின்ன சிக்கல்களுக்கெல்லாம் உடைஞ்சு போயிட்டா அப்புறம் நாம படிச்சதுக்கே அர்த்தமில்லை. விழுந்த இடத்துல தான் அருவியோட ஆக்ரோஷம் ஆரம்பமாகும். ஐயோ விழுந்திட்டோமேன்னு அங்கேயே கிடந்து அழறதில்லை. வாழ்க்கையும் அப்படித் தான். முள் இருக்குங்கிறதுக்காக ரோஜாவை யாரும் பறிக்காம இருக்கிறதில்லை. முள்ளே இல்லாத செடியில தான் பூ பறிப்பேன்னு அடம் புடிச்சா ரோஜாவை பறிக்கவே முடியாம போயிடலாம். சோ… ” ரூபா சொல்ல கல்பனா இடைமறித்தாள்.

“போதும் ரூபா… ரொம்ப தேக்ங்ஸ். இப்பவே நாலு பூஸ்ட் குடிச்சா மாதிரி சட்டுன்னு ஒரு தெம்பு வந்திருக்கு எனக்கு. இதை தைரியமா ஹேண்டில் பண்ணனும்ங்கற ஒரு உத்வேகமும் வந்திருக்கு. ரொம்ப ரொம்ப தேங்க்ஸ். சரியான நேரத்துல நீ இங்கே வந்தே” கல்பனா முக மலர்ச்சியுடன் சொன்னாள்.

“மங்கையராய்ப் பிறந்திடவே நல்ல மாதவம் செய்திடல் வேண்டுமம்மா” ரூபா கைகளை விரித்து கண்களை உருட்டி நாடகம் போலப் பேச, கல்பனா சத்தமாய்ச் சிரித்தாள். அந்தச் சிரிப்பில் கவலைகளின் கடைசிச் சொட்டும் காணாமல் போயிருந்தது.

*

சேவியர்