அகம் திருடுகிறதா முக நூல்

Image result for facebook

சமீப காலமாக தலைப்புச் செய்திகளில் அடித்துத் துவைத்துக் காயப்போடப்பட்ட விவாதப் பொருள் எதுவென்றால் “பேஸ்புக்” என்பதாகத் தான் இருக்கும். பேஸ்புக் தகவல்களைத் திருடுகிறது என்பது முதல், பேஸ்புக் அரசியல் முடிவுகளை நிர்ணயிக்கிறது என்பது வரையிலான தலைப்புகளில் விவாதங்களும், கட்டுரைகளும், வழக்குகளும் உலகெங்கும் நடந்து கொண்டிருக்கின்றன.

பேஸ்புக் நிறுவனத்தின் நிறுவனர் மார்க் ஷக்கன்பர்க் வழக்குக்காகப் கோர்ட் படியேறி தனது நிறுவனத்தைப் பற்றியும், தகவல் பாதுகாப்பு பற்றியும், இப்போது இருக்கின்ற குறைகள் பற்றியும், இனி என்னென்ன செய்யப் போகிறோம் என்பது பற்றியும் வியர்க்க விறுவிறுக்க விளக்கி விட்டார். இருந்தாலும் மக்களிடம் இருக்கின்ற பயமும், தயக்கமும் போனபாடில்லை ! இந்த பயம் நியாயமானதா ?

முதலில் ஒரு விஷயத்தை நாம் புரிந்து கொள்ள வேண்டும். இணைய வெளியில் பாதுகாப்பு எனும் பேச்சுக்கே இடமில்லை ! எப்போது வேண்டுமானாலும், எந்த தகவல் வேண்டுமானாலும் களவாடப்படலாம் என்பதே புரிந்து கொள்ள வேண்டிய அடிப்படை உண்மை.

இன்றைய தொழில்நுட்ப உலகத்தின் அடிப்படை மூலதனம் என்ன தெரியுமா ? “தகவல்கள்” ! நாம் பேஸ்புக்கிலோ, வாட்ஸப்பிலோ, இன்ஸ்டாகிராமிலோ, ஷாப்பிங் தளங்களிலோ அல்லது வேறெந்த இணைய தளங்களிலோ பகிர்கின்ற தகவல்கள் தான் இந்த தொழில் நுட்ப உலகின் மூலதனம். அந்த தகவல்களை அலசி ஆராய்ந்து அதை பிஸினஸாக மாற்றுவது தான் இன்றைய தொழில்நுட்ப உலகின் ‘புராஃபிட் ஸ்ட்ரேட்டஜி’, அதாவது லாப யுத்தி !

நாம் மொபைலில் தரவிறக்கம் செய்கின்ற ஆப்களானாலும் சரி, நாம் வலைத்தளங்களில் செய்கின்ற தேடுதல் ஆனாலும் சரி, சமூக வலைத்தளங்களில் பதிவேற்றுகின்ற தகவல்களானாலும் சரி எல்லாமே வியாபார நோக்கில் தான் அணுகப்படுகின்றன. தகவல் அறிவியல் எனப்படும், டேட்டா சயின்ஸ் தொழில்நுட்பம் இன்றைக்கு கொடிகட்டிப் பறக்கக் காரணம் இந்த தகவல்கள் தான். அடுத்த ஐந்து பத்து ஆண்டுகளுக்கு தொழில் நுட்ப உலக புரட்டிப் போடப் போவதும் இந்த டேட்டா சயின்ஸ் தான் !

பேஸ்புக் நிறுவனமும் தங்களிடம் வருகின்ற அனைத்து தகவல்களையுமே சேமிக்கிறது. அந்த தகவல்களை தகவல் அறிவியலுக்கு உட்படுத்தி ஆளுக்கேற்ற விளம்பரங்களை அனுப்புகிறது. இந்த விளம்பரங்கள் தான் அதன் மூலதனம். பேஸ்புக்கை இலவசமாக நமக்குத் தருகின்ற நிறுவனம் விளம்பரங்கள் மூலம் கடந்த ஆண்டு மட்டும் சம்பாதித்த தொகை இரண்டு இலட்சத்து அறுபத்து இரண்டாயிரம் கோடி ரூபாய்கள் ! இலவசமாய் கிடைக்கின்ற பேஸ்புக்கிற்கு விலை நாம் தான் ! நமது தகவல்கள்தான் !

இதில் இன்னொரு அதிர்ச்சியான விஷயம் என்னவென்றால், உங்களிடம் பேஸ்புக் கணக்கு இல்லையென்றாலும் கூட பேஸ்புக் உங்களுடைய தகவல்களைத் திருட முடியும் என்பது தான் ! உங்களுடைய நண்பர்கள் யாருக்காவது பேஸ்புக் கணக்கு இருந்தால், அவர்களுடைய கான்டாக்ட் மூலமாக உங்களுடைய தகவல்களை பேஸ்புக் நிறுவனம் இழுத்து எடுத்துக் கொள்கிறது ! என்னிடம் பேஸ்புக் கிடையாது அதனால் என்னோட தகவல்கள் பேஸ்புக்கின் கைக்குப் போகாது என யாரும் சொல்ல முடியாது !

அதே போல, பல வலைத்தளங்கள், ஆப்கள் உள்நுழைவதற்கு பேஸ்புக் ஐடியையோ, கூகிள் ஐடியையோ கேட்பதைப் பார்த்திருப்பீர்கள். நீங்கள் ஏதோ ஒரு தகவலை உள்ளீடு செய்து உள்ளே நுழைவீர்கள். அந்த நேரத்தில் உங்களுடைய தகவல்கள் இன்னொருவர் கைக்கு இடம்பெயரும். நாம் அறியாமலேயே இயல்பாக இந்த விஷயம் நடந்து விடும்.

இன்றைய யுகத்தில் இந்தத் தகவல்களெல்லாம் செயற்கை அறிவியல் எனப்படும் ஆர்டிபிஷியல் இன்டெலிஜென்ட், பிக் டேட்டா, இன்டெர்நெட் ஆப் திங்க்ஸ், மெஷின் லேர்னிங் போன்ற தொழில்நுட்பங்களின் கூட்டுக் கலவையில் அலசப்படுகின்றன. பின்னர் ஒரு நபருடைய ரசனைகள், விருப்பங்கள், ஏக்கங்கள், எதிர்பார்ப்புகள் போன்றவற்றையெல்லாம் தகவல்கள் மூலம் தெரிந்து கொண்டு, அந்த நபருக்குத் தேவையான பர்சனலைஸ்ட் விளம்பரங்களைக் கொடுக்கின்றன.

இவை வெறும் விளம்பரங்களை அனுப்புகின்றன எனுமளவில் இதில் பெரிய ஆபத்து இல்லை. ஆனால் அது உங்களைப் பிந்தொடர்ந்து உங்கள் தகவல்களையெல்லாம் சேமிக்கிறது என்பதும், தொடர்ந்து உங்களைக் கண்காணித்துக் கொண்டே இருக்கிறது என்பதும் தான் ஆபத்தானது.

‘ஃபேஸ் ரிககனிஷன்’ எனப்படும் முகத்தை வைத்து அடையாளம் காணும் தொழில்நுட்ப யுத்தியின் படி உங்களுடைய படம் எங்கெல்லாம் இருக்கிறது, யாருடைய தளத்திலெல்லாம் இருக்கிறது, அவர்களுக்கும் உங்களுக்கும் என்ன தொடர்பு, அவர்களுடைய ரசனைகளுக்கும் உங்களுக்கும் என்ன தொடர்பு போன்றவையெல்லாம் தகவல் அறிவியல் அலசும். பிறகு, ‘உங்க பிரண்டுக்கு புடிச்ச இந்த கார், இந்த விலைல வருது.. நீங்க வாங்கலையா’ என ஆசையைத் தூண்டும்.

இதில் அச்சப்படக்கூடிய விஷயம் என்னவென்றால் இந்த தகவல்களும், டேட்டா சயின்ஸும் சேர்ந்து கொண்டு இல்லாத ஒரு பிம்பத்தை இருப்பது போல ஒரு மாயத் தோற்றத்தை உருவாக்க முடியும். இதை உளவியல் யுத்தம் எனலாம். உதாரணமாக ஒரு குறிப்பிட்ட பத்திரிகை தான் உலகிலேயே பெஸ்ட் பத்திரிகை எனும் தோற்ற மயக்கத்தை இதால் உருவாக்க முடியும். ஒரு தேர்தலின் முடிவை மாற்றியமைக்க முடியும் !

பேஸ்புக் தளத்தை விளம்பரம் இல்லாத பணம் கொடுத்து பயன்படுத்தும் தளமாக மாற்றலாமா எனும் யோசனையை நிறுவனர் நிராகரிக்கிறார். அதனால் அவருக்கு ஏகப்பட்ட பயனர் இழப்பு ஏற்படும் என்பதும். இப்போது கிடைத்து வருகின்ற மிகப்பெரிய லாபம் நிச்சயம் கிடைக்காது என்பதும் தான் அதன் காரணம்.

இப்படி மற்றவர்களுடைய தகவல்களை சுருட்டி விளையாடும் மார்க், தனது தகவல்களை மிக ரகசியமாக வைத்திருக்கிறார். அவருடைய பாதுகாப்புக்காகவும், அவருடைய தகவல்களின் பாதுகாப்புக்காகவும் கடந்த ஆண்டு மட்டும் அவர் செலவிட்ட தொகை சுமார் 48 ஆயிரம் கோடி ரூபாய்கள் !

கடைசியாக, பேஸ்புக் உட்பட எந்த சமூக வலைத்தளமும் பாதுகாப்பானது என சொல்ல முடியாது. எதைப் பயன்படுத்தினாலும் அதிக பட்ச செக்யூரிடி ஆப்ஷனைத் தேர்ந்தெடுங்கள். முடிந்தவரை இணையத்தில் தகவல்களைப் பகிராமல் இருப்பது பாதுகாப்பானது ! டிஜிடல் உறவை விட்டு விட்டு, நிஜ உறவுக்குள் வருவது மனிதத்துகும், பாதுகாப்புக்கும் மகத்தானது !

நினைவில் கொள்ள வேண்டிய சில விஷயங்கள்.

1. பேஸ்புக் கணக்கு உங்களிடம் இருக்கிறது என வைத்துக் கொள்ளுங்கள், அதை நீங்கள் டெலீட் செய்தாலும், டி ஆக்டிவேட் செய்தாலும் உங்களுடைய தகவல்கள் அழிக்கப்படும் என்பதற்கு உத்தரவாதம் இல்லை !

2. நீங்கள் வாங்கும் பொருட்களோ, நீங்கள் செல்லும் பயணங்களோ உங்களுடைய நண்பர் வட்டாரத்தில் இருப்பவர்களுக்கு தெரிவிக்கப்படலாம். அது வியாபார யுத்தி. உங்களுடைய தனிமைக்கு எதிரி ! உங்கள் தகவல்களை பிற நிறுவனங்களுக்கோ, ஏன் அரசுக்கோ கூட பகிர்ந்து கொடுக்கலாம்.

3. உங்களுடைய ரசனைகள், உங்களுடைய விருப்பங்கள் போன்றவற்றை உங்களுடைய போட்டோவுடன் சேர்த்து பல இடங்களுக்கும் அனுப்பப்படலாம். நீங்கள் வெளிப்படுத்த விரும்பாத விஷயங்கள் உட்பட.

4. நீங்கள் பேஸ்புக்கை விட்டு வெளியே வந்தாலும் கூட உங்களுடைய இணைய நடமாட்டத்தைக் கவனித்து குக்கிகளில் சேமித்து, பின்னர் நீங்கள் பேஸ்புக் நுழையும் போது அவை பேஸ்புக் தளத்துக்கு பரிமாறப்படலாம்.

5. நீங்கள் ஒரு பொருளை இணையத்தில் தேட ‘டைப் செய்கிறீர்கள்’ பிறகு மனதை மாற்றிக்கொண்டு அதை டெலீட் செய்து விடுகிறீர்கள் என வைத்துக் கொள்ளுங்கள். அந்த தகவலும் சேமிக்கப்பட்டு உங்களைப் பிந்தொடரலாம்.

*

 

Advertisements

கணினி பிரிவில் என்ன படிக்கலாம் ?

Image result for educationகணினி மென்பொருள் பிரிவு தொழில்நுட்ப உலகில் மாபெரும் வளர்ச்சியை நோக்கி சென்று கொண்டிருக்கிறது. கணினி தொழில்நுட்பம் அழிந்து விடும், கணினி படித்தால் வேலை கிடைக்காது, கணினி துறை அவ்வளவு தான், போன்றவையெல்லாம் விஷயம் தெரியாதவர்கள் வைக்கின்ற வாதங்கள். உண்மையில் முன்பெப்போதும் இல்லாத அளவுக்கு கணினி மென்பொருள் துறை செழுமையடைந்திருக்கிறது என்று தான் சொல்ல வேண்டும். ஆனால் ஒரே ஒரு சின்ன வித்தியாசம்.

முன்பெல்லாம் கணினி பிரிவில் ஏதோ ஒரு பட்டப்படிப்போ, டிப்ளமோவோ படித்தால் வேலை கிடைக்கும் எனும் நிலமை இருந்தது. இன்றைக்கு அந்த நிலமை இல்லை. படிப்பு என்பது அடிப்படையான விஷயம். அதைத் தாண்டி கணினி துறையில் நுழையவும் சாதிக்கவும் நல்ல சிந்தனையும், முயற்சிகளும், புதுமையான மனமும் அவசியம். எனவே, கணினி துறையில் நுழைய வேண்டும் என நினைக்கும் மாணவர்கள் தங்களுடைய மனநிலையை கொஞ்சம் மாற்றிக் கொள்ள வேண்டும். புதுமை மனம், சாதிக்கும் ஆர்வம், விடா முயற்சி போன்றவை இல்லையேல் வேறு துறைகளின் மீது பார்வையைச் செலுத்தலாம்.

கணினி மென்பொருள் துறையில் நுழைய அடிப்படையான விஷயம் ஒரு கணினி சார்ந்த பட்டப்படிப்பு. அதில் இன்று வரை எந்த பெரிய மாற்றமும் நிகழவில்லை. நிறுவனங்கள் தங்களுக்குத் தேவையான நபர்களைத் தேடும்போது கணினி சார்ந்த பட்டப்படிப்பு ஒன்றை கட்டாயமாக வைத்திருக்கின்றன. பி.இ கம்ப்யூட்டர் சயின்ஸ், பிடெக், பி.இ ஐடி, எம்.சி.ஏ போன்றவை இந்த அடிப்படை பட்டப்படிப்புகள் என புரிந்து கொள்ளுங்கள்.

இதில் எம்.சி.ஏ எனப்படும் கணினி பயன்பாட்டு அறிவியல் துறை முதுகலைப்படிப்பாகும். அதில் நுழைய முதலில் இளங்கலை கணினியியலோ, இளங்கலை கணிதம்/அறிவியல் போன்ற பட்டப்படிப்போ, பிசிஏ எனப்படும் இளங்கலை கணினி பயன்பாட்டு அறிவியலோ தேவைப்படும். எனவே கணினி துறை சார்ந்த நிறுவனங்களில் வேலைக்கு நுழைய வேண்டும் எனும் ஆர்வம் உடைய மாணவர்கள் ஒரு கணினி சார்ந்த பட்டப்படிப்பு என்பதை முதன்மை நோக்கமாகக் கொண்டிருங்கள்.

கணினி துறை ஒவ்வொரு காலகட்டத்திலும் ஒவ்வொரு விதமான வளர்ச்சியை சந்தித்து வந்திருக்கிறது என சொல்லலாம். கணினி துறை, 90களின் இறுதியில் ஒய்.டூ.கே எனும் கணினி பிரச்சினையை தீர்ப்பதில் ஆர்வம் காட்டியது. பின்னர் டாட்.காம் யுகம் துவங்கியது. நிறுவனங்களெல்லாம் தங்களுக்கென ஒரு வலைத்தளத்தை உருவாக்க மும்முரம் காட்டின. கோப்புகளில் அடங்கிக் கிடந்த தகவல்களெல்லாம் டிஜிடல் முகம் காட்டி இணைய தளங்களில் இடம் பிடித்தன. சில ஆண்டுகளில் இந்த டாட்.காம் தொழில்நுட்பமும் ஓய்வெடுக்க ஆரம்பித்தது.

பின்னர் டிஜிடல் டிரான்ஸ்பர்மேஷன் எனப்படும், நிறுவனங்களை முழுமையாக டிஜிடல் மயமாக்கும் முயற்சிகள் உருவாகின. ஊழியர்களின் வருகைப்பதிவு முதல், நிறுவனத்தின் வரவு செலவு வரை அனைத்தையும் டிஜிடல் மயமாக்கி கணினி துறை பரபரப்பாய் இருந்தது. அதுவும் கொஞ்சம் தளர்ச்சியடைய ஆரம்பித்தது.

பின்னர் ஸ்மார்ட்போன்களின் வருகை மிகப்பெரிய மொபைல் புரட்சிக்கு வித்திட்டது. கணினிகளெல்லாம் தங்களுடைய இருப்பை இழக்க ஆரம்பித்தன. எல்லா வேலைகளையும் மொபைல் செய்து விடும் எனும் நிலை உருவானது. போகிற போக்கில் சில வினாடிகளில் ஒரு விஷயத்தை முடித்து விடலாம் எனும் வசதியை மொபைல் ஆப்கள் உருவாக்கிக் கொடுத்தன. இன்றைக்கு அந்த மொபைல் தொழில்நுட்பமும் வழக்கமான பாணி ஆப் தயாரிப்புகளை விட்டு விலகி விட்டன.

அப்படியானால் இன்றைய தேதியில் கணினி உலகை ஆக்கிரமித்திருப்பவை எவை ? எனும் கேள்வி உங்களுக்குள் எழலாம். அதற்கான விடை செயற்கை அறிவு அல்லது ஆர்டிபிஷியல் இண்டலிஜெண்ட் என தைரியமாகச் சொல்லலாம். ஆர்டிபிஷியல் இண்டலிஜெண்டோடு பிற தொழில்நுட்பங்களும் இணைந்து இன்றைய கணினி யுகத்தை இயக்கிக் கொண்டிருக்கின்றன.

உதாரணமாக, மெஷின் லேர்னிங் தொழில்நுட்பம் ஆர்டிபிஷியல் இண்டலிஜெண்டுடன் இணைந்து இன்றைக்கு ஆளுமை செய்கிறது. இந்த இரண்டு பிரிவுகளிலும் ஏதேனும் ஒரு சான்றிதழ் படிப்போ, டிப்ளமோ படிப்போ படித்திருப்பது இன்றைய தொழில்நுட்ப உலகிற்குள் நுழைய உதவும்.

அடுத்ததாக கணினி உலகில் விஸ்வரூபமெடுத்து வருகின்ற படிப்பு ‘தகவல் அறிவியல்’ எனப்படும் டேட்டா சயின்ஸ் நுட்பம். இன்றைக்கு உலகமே தகவல்களினால் தான் இயங்கிக் கொண்டிருக்கிறது. தகவல்களை எப்படி சேமிப்பது, எப்படி தரம்பிரிப்பது, அதை எப்படிப் பயன்படுத்துவது என்பது தான் இந்த தகவல் அறிவியலின் அடிப்படை நோக்கம். இந்த தகவல் அறிவியலுக்குள் பிக்டேட்டா தொழில்நுட்பமும் அடக்கம் என்பது கவனிக்கத் தக்கது.

வர்த்தகத் துறையை முழுமையான கட்டுப்பாட்டுக்குள் இன்றைக்கு தகவல் அறிவியல் கொண்டு வந்து விட்டது. எந்த பொருளை விற்கவேண்டும், யாரிடம் விற்கவேண்டும், எப்படி விற்கவேண்டும் போன்றவற்றையெல்லாம் இந்த தகவல் அறிவியல் தான் ஆராய்ந்து சொல்கிறது. ஒரு குறிப்பிட்ட பிம்பத்தை மக்களுடைய மனதில் பதிய வைக்கும் உளவியல் வேலையையும் இது கன கட்சிதமாகச் செய்து விடுகிறது. ஒருவகையில் இது உளவியல் யுத்தம் ! இந்த தகவல் அறிவியல் துறையில் அடுத்த சில ஆண்டுகளில் பல இலட்சம் வேலை வாய்ப்புகள் உருவாகும் என்கின்றன ஆய்வுகள்.

தகவல் அறிவியல் என்பது தகவல்களோடு விளையாடும் வேலை. எண்களின் மீதான பரிச்சயம் இதற்கு மிகவும் அவசியம். புள்ளி விவரங்கள், கூட்டல், கழித்தல், அல்காரிதம், கேல்குலஸ், நிகழ்தகவு போன்ற விஷயங்கள் தகவல் அறிவியலின் முதுகெலும்பாக இயங்கக் கூடியவை. இவை எல்லாமே கணிதவியலின் அடிப்படை விஷயங்கள். எனவே, தகவல் அறிவியல் கற்றுக் கொள்ள விரும்புபவர்களுக்கு முதலில் இருக்க வேண்டிய தகுதி, கணிதவியலில் அறிவு. கணித பட்டப்படிப்பு படித்தவர்களுக்கு தகவல் அறிவியல் துறை சற்று எளிதாக இருக்கும் என்பதில் சந்தேகமில்லை

தகவல் அறிவியல் துறையில் சில சான்றிதழ் பட்டங்களைப் பெற்றிருப்பது கணினி துறையில் சாதிக்க வைக்கும். டேட்டா சயின்ஸ், டேட்டா அனலிஸ்ட், எம்.ஐ.எஸ் எக்ஸிக்யூடிவ், ஸ்டாடிஸ்டிஷியன், டேட்டா எஞ்சினியர் என பல்வேறு வகையான பிரிவுகள் தகவல் அறிவியல் துறையில் உண்டு. பல நிறுவனங்கள் தகவல் அறிவியல் துறை சார்ந்த படிப்புகளை நடத்துகின்றன. இந்த துறையில் ஏதேனும் ஒரு படிப்பைப் படிப்பது இது குறித்த ஆழமான அறிவைப் பெற்றுக் கொள்ளவும் கணினி துறையில் சாதிக்கவும் உதவும்.

இண்டர்நெட் ஆஃப் திங்க்ஸ் எனப்படும் ‘பொருட்களின் இணையம்’ , கணினி உலகின் நவீன தொழில்நுட்பங்களில் ஒன்று. சென்சார்களால் கட்டமைக்கப்பட்ட ஆட்டோமெடிக் தீர்வுகளுக்கு இண்டர்நெட் ஆஃப் திங்க்ஸ் இன்றைக்கு பயன்படுகிறது. இதன் இணை நுட்பங்கள் தான் ஆகுமெண்டட் ரியாலிடி, ஸ்மார்ட் ஹோம், ஸ்மார்ட் ஹாஸ்பிடல், ஸ்மார்ட் டிராபிக் சிக்னல் போன்றவை எல்லாமே. இன்றைக்கு கணினி நுட்பம் சார்ந்த பட்டப்படிப்புகளில் இண்டர்நெட் ஆஃப் திங்க்ஸ் பாடம் இருக்கிறது. ஒருவேளை அந்த பாடம் இல்லாத பிரிவுகளை நீங்கள் படித்தால் இது குறித்த ஒரு சான்றிதழ் படிப்போ, டிப்ளமோ படிப்போ கற்றுக் கொள்ளுங்கள். அது நிச்சயம் உங்களுக்கு பயனளிக்கும்.

கவனிக்க வேண்டிய இன்னொரு முக்கியமான அம்சம் டொமைன் ஸ்கில்ஸ் எனப்படும் கள அறிவு. உதாரணமாக, வங்கிப் பிரிவு, ஹெல்த் கேர் பிரிவு, ஆட்டோமொபைல், இன்சூரன்ஸ், ரிடெயில் என பல டொமைன்கள் உள்ளன. இந்த டொமைன் பிரிவுகளைப் பற்றி தெரிந்து வைத்திருப்பது கணினி துறையில் நுழைய பெரும் உதவியாக இருக்கும். பெரும்பாலும் யாரும் கவனிக்காத ஏரியா என்பது இந்த டொமைன் ஸ்கில்ஸ் தான். பெரும்பாலான மாணவர்கள் கணினி மென்பொருள்களைக் கற்றுக் கொள்வதில் தான் ஆர்வம் காட்டுவார்களே தவிர, டொமைன் ஸ்கில்ஸ் பற்றி தெரிந்து கொள்ள ஆர்வம் காட்டுவதில்லை. அல்லது அவர்களுக்குத் தெரிவதில்லை.

இந்த டொமைன் ஸ்கில்ஸ் பயிற்றுவிக்கும் பல நிறுவனங்கள் உள்ளன. அங்கே சேர்ந்து உங்களுக்குப் பிடித்த ஏதேனும் ஒரு பிரிவில் ஒரு படிப்பை நீங்கள் படிக்கலாம். பின்னர் கணினி துறையில் நுழையும் போது அந்த களம் சார்ந்த பிரிவில் உங்களுக்கு வேலை கிடைக்கும் வாய்ப்பு அதிகரிக்கும்.

கேமிங், மற்றும் அனிமேஷன் போன்றவை கணினி மென்பொருள் துறையில் வளர்ந்து வருகின்ற துறைகள். இதற்கு மிகப்பெரிய வர்த்தகம் இருக்கிறது. கற்பனை வளமும், புதுமையாய் எதையேனும் வடிவமைக்க வேண்டும் எனும் சிந்தனையும் இருப்பவர்கள் இந்த துறைகளில் நுழையலாம். திரைத்துறை, விளம்பரத் துறை, ஊடகத் துறை, விளையாட்டுத்துறை போன்ற பல இடங்களில் இந்த அனிமேஷன், டிசைனிங் போன்றவை தேவைப்படும். கம்ப்யூட்டர் கேம்ஸ் மீது அதிக ஆர்வம் உடையவர்கள் இந்த பிரிவுகளில் நிச்சயம் சாதிக்கலாம். இதற்கு பல சான்றிதழ் படிப்புகளும், டிப்ளமோ படிப்புகளும் உள்ளன. இணைய தளங்களிலும் இவை குறித்த படிப்புகள் உள்ளன. இதில் விருப்பம் இருந்தால் இது குறித்து கற்றுக் கொள்வது பயனளிக்கும்.

வெப் டிசைனிங் பற்றி உங்களுக்குத் தெரிந்திருக்கும். இன்றைக்கு வெப்டிசைனிங் புதிய பரிமாணத்தை எட்டியிருக்கிறது. பிகேவியரல் அனாலிசிஸ் எனப்படும் நுட்பத்தோடு தான் இன்றைக்கு வலைத்தளங்கள் வடிவமைக்கப்படுகின்றன. பிக் டேட்டா அனாலிடிக்ஸ், ஆர்டிபிஷியல் இண்டலிஜென்ஸ் போன்றவற்றை வெப் டிசைனிங் தன்னகத்தே கொண்டிருக்கிறது. அவை குறித்த புரிதலோடு படிக்கின்ற வெப் டிசைனிங் படிப்புகள் பயனளிக்கும்.

எத்திகல் ஹேக்கிங் இன்றைக்கு ஒரு புதிய தொழில்நுட்பமாக உருவெடுத்து வருகிறது. இருக்கின்ற ஒரு நெட்வர்க்கை உடைத்து உள்ளே இருக்கின்ற தகவல்களை எடுப்பது தான் இதன் அடிப்படை சிந்தனை. ஒரு நெட்வர்க் எவ்வளவு பாதுகாப்பாக இருக்கிறது என்பதை அறிந்து கொள்ளவும், வலுவற்ற நிலையில் இருந்தால் அதை வலிமையாகக் கட்டமைக்கவும் இந்த எத்திகல் ஹேக்கிங் பணி உதவும். இதற்கான தனிப்பட்ட பயிற்சிகள் பெருமளவில் இல்லை. ஆனால் பாதுகாப்பு குறித்த படிப்புகள், நெட்வர்க் ஹேக்கிங் போன்றவை குறித்த நூல்கள் உங்களுக்கு உதவக் கூடும்.

அதே போல இன்றைக்கு பெரிய அளவில் பயன்படுகின்ற விஷயம் கிளவுட் தொழில்நுட்பம். தகவல்களையெல்லாம் தனித்தனியே சேமித்து வைப்பது இந்த காலத்து தொழில்நுட்பத்துக்கு பெரிய அளவில் பயன் தராது. உலகின் எந்த பாகத்திலிருந்தும் எப்போது வேண்டுமானாலும் ‘ஷேர்ட்” முறைப்படி எடுத்துக் கொள்ளக் கூடிய தகவல்களே தேவையானது. அதற்கு கிளவும்ட் கம்ப்யூட்டிங் தொழில்நுட்பம் ரொம்பவே கை கொடுக்கும். கிளவுட் கம்ப்யூட்டிங்கைப் பொறுத்தவரை பல டிப்ளமோ படிப்புகள் இருக்கின்றன. பெரும்பாலான கல்வி நிலையங்கள் கிளவுட் கம்ப்யூட்டிங் சார்ந்த பயிற்சிகளைத் தருகின்றன. அவற்றைப் படித்துப் பயன்பெறலாம்.

எப்போதுமே பயன்படக்கூடிய விஷயங்களில் ஒன்று மென்பொருட்கள். மென்பொருட்கள் குறித்த படிப்பு வீண் போவதில்லை. ஆனால் எந்த தொழில்நுட்பம் சார்ந்த வேலை உங்களுக்கு விருப்பமானது என்பதைப் புரிந்து கொண்டு அது சார்ந்த மென்பொருளைக் கற்பது மிகவும் பயனளிக்கும். உதாரணமாக உங்களுக்கு தகவல் அறிவியல் துறையில் சாதிக்க வேண்டும் எனும் ஆர்வம் இருந்தால் ஆர், மேட்பிளாட்லிப், ரேட்பிட் மைனர், ஹடூப், நரேட்டிவ் சயின்ஸ், பைத்தான் போன்றவற்றைக் கற்றுக் கொள்ளலாம்.

அல்லது பொதுவான மென்பொருள் டெவலப்பர் வேலைகள் உங்களுக்குத் தேவையெனில் ஜாவா, .நெட் போன்றவற்றைக் கற்றுக் கொள்ளலாம். கூடவே ஆரகிள், சீக்வல்சர்வர் போன்ற தகவல் சேமிப்பு மென்பொருட்களைப் பற்றிக் கற்றுக் கொள்ளலாம். மென்பொருள் பயிற்சி நிறுவனங்கள் எல்லா இடங்களிலும் நீக்கமற நிறைந்திருக்கின்றன என்பது நீங்கள் அறிந்ததே.

சுருக்கமாக, கணினி மென்பொருள் துறையில் வாய்ப்புகள் கொட்டிக் கிடக்கின்றன. அதற்காக கணினி பட்டப்படிப்பு ஒன்றைக் கற்றுக் கொள்வதும், நவீன தொழில்நுட்பம் சார்ந்த சான்றிதழையோ, டிப்ளமோ படிப்பையோ முடிப்பதும் தேவையானது !

திட்டமிடுங்கள், வெற்றிகளை பெற்றுக் கொள்ளுங்கள்

*

தினத்தந்தி, வெற்றி நிச்சயம் நூல்

குழந்தைகளையும் குறிவைக்கும் ஆப்ஸ் !

Image result for kids playing with mobile

பிளே கிரவுண்ட் தெரியாது ! ஆனால் பிளே ஸ்டோர் தெரியும் !! இது தான் இன்றைய குழந்தைகளின் நிலை. இப்படி டிஜிடல் விளையாட்டுகளில் சிக்கிக் கிடக்கும் குழந்தைகளைக் குறிவைத்து தகவல் திருட்டுகள் நடக்கின்றன என்பது தான் இப்போதைய அதிர்ச்சித் தகவல். கூகிள் பிளேஸ்டோரில் உள்ள ஆயிரக்கணக்கான ஆப்-கள் அமெரிக்காவின் குழந்தைகள் தகவல் பாதுகாப்பு சட்டமான கோப்பா வை US Children’s Online Privacy Protection Act (Coppa)மீறுகின்றன எனும் கண்டுபிடிப்பு மிகப்பெரிய சர்ச்சையாக உருமாறியிருக்கிறது. இந்தகண்டுபிடிப்பை நிகழ்த்தியிருப்பவர்கள் அமெரிக்காவின் கலிபோர்னியாவிலுள்ள இண்டர்நேஷனல் கம்ப்யூட்டர் சயின்ஸ் இன்ஸ்டிடியூர் ஆய்வாளர்கள்.

இன்றைய தொழில்நுட்ப உலகில் ஸ்மார்ட்போன் செலுத்தும் ஆதிக்கத்தைப் போல வேறெதுவும் செலுத்தவில்லை என்பது தான் உண்மை. பெரும்பாலான மக்களின் பொழுதுகள் குட்டிக் குட்டி வெளிச்சத் திரைகளில் அடங்கிவிடுகின்றன.

எட்டு வயதுக்கும், பதிமூன்று வயதுக்கும் உட்பட்ட ஆறாயிரம் குழந்தைகளை வைத்து ஒரு ஆய்வு சமீபத்தில் நடத்தப்பட்டது. அதில் 54 சதவீதம் குழந்தைகள், தங்கள் பெற்றோர் தங்களைக் கவனிப்பதை விட அதிக நேரம் செல்போனே கதியென கிடப்பதாய் கவலை தெரிவித்திருந்தனர்.

“எங்கள் குழந்தைகளுக்கு நல்ல முன்னுதாரணமாய் தாங்கள் வாழவில்லை” என குற்ற உணர்வோடு இருக்கும் பெற்றோர் எண்பத்து இரண்டு சதவீதம் பேர் ! அதில் ஐம்பத்து இரண்டு சதவீதம் பேர், எத்தனை முயன்றாலும் இந்த ஸ்மார்ட்போன் அடிமைத்தனத்தை விட்டு வெளியே வரமுடியவில்லை என கவலை தெரிவிக்கின்றனர்.

இருபத்து ஐந்து சதவீதம் பெற்றோர் தங்கள் குழந்தைகள் ஸ்மார்ட்போனுக்கு அடிமையாய் இருப்பதாகவும், எப்படியாவது அவர்களை வெளியே கொண்டு வரவேண்டும் எனவும் விரும்புகின்றனர். ஆனால் அவர்களால் முடியவில்லை.

எல்லாவற்றையும் விட கவலைக்குரிய விஷயம் இது தான். “ஸ்மார்ட்போனைத் தான் எங்கள் பெற்றோர் எங்களை விட அதிகம் நேசிக்கிறார்கள்” என முப்பத்து இரண்டு சதவீதம் குழந்தைகள் கவலையுடன் தெரிவித்திருக்கின்றனர்.

உண்மையிலேயே நமது உறவுகளின் நெருக்கத்தை உடைக்கும் அளவுக்கு டிஜிடல் வலிமை பெற்று விட்டதா ? குடும்பத்தை விட அதிகமாய் சமூக வலைத்தளங்கள் நம்மை ஆதிக்கம் செலுத்துகின்றனவா ?

நம்முடைய குழந்தைகளை நாம் கவனிக்காவிட்டால் அவர்களை வேறு யாரோ கவனிப்பார்கள். குழந்தைகளை நாம் வனையாவிட்டால் அவர்களை வேறு யாரோ வனைந்து முடிப்பார்கள். அது அவர்களுடைய வாழ்க்கைக்கு மிகப்பெரிய பாதிப்பாகவும், அச்சுறுத்தலாகவும் மாறிவிடும்.

அமெரிக்கா, கனடா போன்ற நாடுகளில் நடத்தப்பட்ட ஆய்வு ஒன்று, ‘பத்து வயது குழந்தைக்கு சாதாரணமாக ஒரு ஸ்மார்ட் போன் சொந்தமாகிவிடுகிறது’ எனும் கண்டுபிடிப்பை வெளியிட்டது. இந்தியாவில் அந்த அளவுக்கு இல்லையெனினும், பெற்றோரின் ஸ்மார்ட்போன்களை சகட்டு மேனிக்கு பயன்படுத்தும் குழந்தைகளின் எண்ணிக்கை மிக அதிகம் ! ஒன்பது வயதுக்குட்பட்ட குழந்தைகள் சராசரியாக தினமும் சுமார் இரண்டரை மணி நேரம் போனில் விளையாடுகின்றன என்கிறது ஒரு புள்ளி விவரம்.

இந்த சூழலில் தான் கூகிள் பிளே ஸ்டோரின் பாதுகாப்பு விதி மீறல் அச்ச உணர்வை அதிகரித்திருக்கிறது. கூகிள் ஆப் ஸ்டோரில் உள்ள குழந்தைகளுக்கான ஆப்ளிகேஷன்களை ஆய்வு செய்ததில் 57 சதவீதம் ஆப் கள் பாதுகாப்பு விதிகளை மீறியிருக்கின்றன. இவை குழந்தைகள் ஆன்லைனில் என்ன செய்கிறார்கள் என்பதைக் கவனிக்கின்றன. இது சட்ட விதிகளுக்கு எதிரானது.

சில ஆப்ளிகேஷன்கள் குழந்தைகளின் இருப்பிடத்தையும், காண்டாக்ட் தகவல்களையும் திருடி அனுப்புகின்றன. சில ஆப்ஸ் தனிநபர் தகவல்களை திருடி வேறு இடங்களுக்கு அனுப்புகின்றன. சில ஆப்கள் விளம்பரங்களுக்காக தகவல்களை அனுப்புகின்றன. என நீள்கிறது இந்தப் பட்டியல். பிரபலமான, சுமார் ஏழரை இலட்சம் தடவைகளுக்கு மேல் தரவிறக்கம் செய்யப்பட்ட ஆப்கள் மட்டுமே இதில் பரிசீலனைக்கு எடுத்துக் கொள்ளப்பட்டன என்பது குறிப்பிடத் தக்கது.

இவையெல்லாம் குழந்தைகளுக்கான ஆப்ளிகேஷன்கள் என்பது தான் கவனிக்கவேண்டிய விஷயம். குழந்தைகளுக்கு கல்வி, பொழுதுபோக்கு, சிந்தனை திறன் வளர்த்தல் என வசீகரிக்கும் ஆப்களின் நிலை தான் இது என்பது கவலையளிக்கிறது.

ஏற்கனவே கூகிள் நிறுவனம் தனிநபர் தகவல்களை மிகப்பெரிய அளவில் சேகரிக்கிறது எனும் சர்வதேச சர்ச்சை உயிர்ப்புடன் இருக்கிறது. அவர்களுடைய பல்லாயிரம் கோடி ரூபாய் பிஸினசின் அடிப்படையே இப்படி சேகரிக்கும் தகவல்கள் தான்.

பாதுகாப்பு விதி முறைகளை மீறும் ஆப்கள் மீது கடுமையான நடவடிக்கை எடுக்கப்படும் என கூகிள் நிறுவனம் இப்போது உறுதியளித்திருக்கிறது. குழந்தைகள், குடும்பங்கள் இவற்றின் பாதுகாப்பின் மீது எந்த விதமான தளர்வுக்கும் இடமில்லை என அது தெரிவித்திருக்கிறது. இருந்தாலும் இது எந்த அளவுக்கு சாத்தியம் என்பது கேள்விக்குறியாகவே உள்ளது.

நமது பிள்ளைகளின் பாதுகாப்பை உறுதி செய்யும் கடமை நம்முடையது. குழந்தைகளுக்கு ஸ்மார்ட் போன் பயன்படுத்தக் கொடுப்பதை முடிந்தவரை தடை செய்வது நல்லது. முடியாத பட்சத்தில் சில விதிமுறைகளையேனும் வைக்க வேண்டியது அவசியம்.

குழந்தைகள் சமூக வலைத்தளங்களில் இருக்கின்றார்கள் எனில், யாருடன் தொடர்பில் இருக்கிறார்கள் ? என்னென்ன உரையாடல் நடத்துகிறார்கள் என்பதைக் கவனிப்பது அவசியம். எக்காரணம் கொண்டும் தனிப்பட்ட தகவல்களைப் பகிரக் கூடாது. தனிப்பட்ட படங்களையும் பகிரக் கூடாது எனக் கட்டுப்பாடு விதியுங்கள். யாரேனும் வழக்கத்துக்கு மாறாகவோ, தவறாகவோ பேசினால் பெற்றோரிடம் தெரியப்படுத்த வேண்டும் என்பதை குழந்தைகளுக்குக் கற்றுக்கொடுங்கள்.

2 லொக்கேஷன் சர்வீஸ், ஜிபிஎஸ் போன்றவற்றை ஆஃப் செய்து வைத்திருக்க வேண்டும். நமது இடத்தை பளிச் எனக் காட்டும் சர்வீஸ்களை தேவைப்படும் போது மட்டும் ஆன் செய்வது உசிதம். செக்யூரிடி செட்டிங் சரியாக இருக்கிறதா என்பதை பெற்றோர் ஊர்ஜிதப்படுத்த வேண்டும். குழந்தைகளின் போன் செயல்பாடுகளைக் கவனிக்கும் ஆப்களையும் நீங்கள் பயன்படுத்தலாம்.

3. குழந்தைகள் ஸ்மார்ட்போனில் பார்க்கும் விஷயங்கள், பகிரும் விஷயங்கள் சரியானவை தானா என்பதைக் கவனிக்க வேண்டும். பாலியல் விஷயங்களைத் தாண்டி வெறுப்பை வளர்க்கும் விஷயங்கள், பிரிவினையை உருவாக்கும் விஷயங்கள், பாகுபாடு உருவாக்கும் விஷயங்கள் போன்றவற்றுக்கும் குழந்தைகளைத் தள்ளியே வையுங்கள். ஸ்மார்ட்போன் பயன்படுத்தும் குழந்தைகள் மிக விரைவாக மன அழுத்தத்துக்குள் விழுந்து விடுவார்கள் என்கின்றன மருத்துவ ஆய்வுகள்.

4. குழந்தைகள் போன் விளையாட ஒரு குறிப்பிட்ட நேரத்தை ஒதுக்க வேண்டும். அந்த நேரம் தவிர பிற நேரங்களில் டிஜிடல் பொருட்களை அவர்களிடம் கொடுக்கக் கூடாது. பெற்றோரும் குழந்தைகள் இருக்கும் போது போனை கொஞ்சம் ஒதுக்கியே வைக்க வேண்டும். இரவு எட்டு மணிக்கு மேல் எக்காரணம் கொண்டும் போனைப் பயன்படுத்த அனுமதிக்காதீர்கள். காலை 10 மணிக்கு மேல் மாலை எட்டு மணிக்குள் ஒரு குறிப்பிட்ட நேரத்தை அவர்களுக்கு ஒதுக்கலாம்.

5 சமூக வலைத்தளங்கள், ஆப்கள் மூலமாக வருகின்ற ஆபத்துகள் என்னென்ன என்பதை குழந்தைகளுக்கு விளக்கமாகச் சொல்லி விடுங்கள்.

இப்படி சின்னச் சின்ன விஷயங்களில் கவனமாக இருந்தால் பெரிய பெரிய ஆபத்துகளில் விழாமல் குழந்தைகளைக் காப்பாற்ற முடியும். விழிப்பாய் இருப்போம், விழாமல் தடுப்போம்.

*

 

ஆர்வம் அபூர்வம்

Man in Black Hoodie Holding Fire

 

ஆர்வமெனும் ஆற்றில்
தான்
அறிவுத் தாமரை
விரிகிறது.

கேளுங்கள்,
மறுக்கப் பட்டாலும்
மறுதலிக்கப் பட்டாலும்
ஏதேனும்
உங்களுள் ஊன்றப் படுகிறது.

ஆர்வமற்றதும்,
தேடல்களில்லாததுமான
வாழ்க்கை
தனக்குள்ளே ஊனப்படுகிறது.

ஆர்வமில்லாத
குயில்களுக்கு சிறகுகள்
அகலமாவதில்லை,
ஆர்வமற்ற கூட்டுப் புழுக்கள்
வண்ணத்துப் பூச்சியாய்
வடிவ மாற்றம் அடைவதில்லை.

அறிய வேண்டுமெனும்
ஆவல் தானே,

கண்டுபிடிப்புகளின் கண்களை
இமை விலக்கி
இழுக்கின்றன.

வரலாறுகளின் மிச்சங்களை
இடிபாடுகளிலிருந்து
வரவைக்கின்றன.

தன்னை அறியும்
முயற்சிகள்
புனிதர்களையும்,

பிறரை அறியும்
முயற்சிகள்
நல்ல மனிதர்களையும்
தந்திருக்கின்றன.

ஆர்வம் கொள்ளுங்கள்,
ஒரு பக்கத்துக்கு மிகாமல்
எழுதும்
விடைத்தாள்களை விட,
சில
வினாத்தாள்கள் சிறந்தவைகளே.

மானிடச் சட்டங்கள்

Man Walking Near Aligned Lamp Post

 

உன்னைச் சுற்றிய
சட்டங்கள்
உன்னை ஒருவேளை
இமைக்க விடாமல் இறுக்கலாம்.
உனக்காய் நீயே
சட்டங்களைத் தயாரி.

உனக்கான ஆடைகளை
நீயே
தேர்ந்தெடுக்கும் போது,
உனக்கான செருப்புகளை
நீயே
சரிபார்த்து எடுக்கும்போது
உனக்காய் சில
சட்டங்களையும் செய்யலாமே ?

வெளியே பார்.
குருவிகள்,
பல நூறு தலைமுறையாய்
கூடுகளின் வடிவத்தைக்
கூட
மாற்றிக் கட்டவில்லை.

சிங்கங்களும்
சைவமாய்
மாறிக் கொள்ளவில்லை.

நீ மனிதன்,
உன் வாசல்
குகைகளிலிருந்து
பிடுங்கப்பட்டு
நகரத்தில் நடப்பட்டிருக்கிறது.

இது தான் நேரம்,
உனக்கு நீயே சில
சட்டங்களைச் செய்.
அவை
உரிமை மீறாது என
உத்தரவாதம் செய்.

மீறல்களை மட்டுமே
அரசியல் சட்டங்கள் பேசும்.
நீ
மனதின் நீறல்களைப் பேசு.

விலகலைப் பற்றிப் பேசிப் பேசி
விலங்குகளாய்
ஆனது போதும்.
அகலாதிரு என்னும் சட்டமே
அவசியம் இப்போது.

செய்யாதே எனும்
சட்டங்களை விட,
செய்
எனும் சட்டங்களே
மானிட வளர்ச்சிக்குத் தேவை
இப்போது.

இமைதிறந்தால் மட்டுமே
தெரியும்,
உன்னைச் சுற்றிலும்
நீளும் பட்டினிக் கரங்கள்.

நண்பர்கள்

 

Image result for friends gif

உலக வாழ்வின்
உயிர் நாடிகள்.

ஈரமான என்
மெல்லிய சிறகுகளை
உலர்த்தி என்னை
உயரப்பறத்தியவர்கள்.

வேதனை வெயில்
வீசும்போது
ஈர நேசத்தை
என்னுள் தெளிப்பவர்கள்.

மகிழ்ச்சியின்
மறுபதிப்புகள்.

சிதறிய சொற்களுக்குள்
சிரிப்பைப்
புகுத்துபவர்கள்.

வார்த்தைச் சாரலில்
வாழ்க்கைக் காயத்துக்கு
களிம்பு
பூசுபவர்கள்.

நான்
நண்பர்களை
நேசிக்கிறேன்.

என் பாதங்களுக்கு
புதுப்பாதைகளை
அறிமுகப்படுத்தியவர்கள்
நீங்கள்.

என் கண்களுக்கு
பார்வையை
பரிசளித்தவர்கள்
நீங்கள்.

என் கரங்களுக்கு
கவிதை எழுத
கற்றுக்கொடுத்தவர்கள்
நீங்கள்.

அமாவாசை இரவில்
கரம்பிடித்து
என்னை
சூரியத்தெருவுக்குள்
சுவடுபதிக்கச் செய்தவர்கள்
நீங்கள்.

உங்கள்
நினைவுகளில் தான்
என்
நாட்கள் நகர்கின்றன.

நட்பு மட்டும்
எதிர்பார்ப்புகள்
ஏதுமில்லா
அதிசய நேசம்.

நட்புக்குள்
உலகம் சுற்றுகிறது.

தாயின் நேசம்
தந்தையின் பாசம்
பிறப்பின் பந்தம்

காதலியின் நேசம்
உறவினர் பாசம்
தொடர்வின் பந்தம்.

ஆனால்.

உங்கள்
அன்பு மட்டும்
அனைத்தும் அடங்கியது !
எதுவும் இல்லாமல்!!!

ஒரு விலைமகள் விழித்திருக்கிறாள்

 

Image result for prostitute india paintingஎன்
படுக்கை விழித்திருக்கிறது…

என் கதவு,
தாழ்ப்பாள் விலக்கிக் காத்திருக்கிறது.
எந்தக் கோவலனால்
அழியப்போகுதோ
இன்றைய என் அலங்காரம்.

உணர்வுகள் எல்லாம்
ரணமாகி,
பின் மரணமாகிப் போயின.
இப்போது இருப்பதெல்லாம்
இரவுக்குக் காத்திருக்கும்
இந்த
தற்கொலைத் தாமரை மட்டும் தான்.

பகலில்
புரவிச் சவாரி செய்யும்
பல பாண்டிய மன்னர்கள்
இரவில் மணிமுடி கழற்றிவிட்டு
என்
கொல்லைப்படி தேடி வருவதுண்டு.

பகலில்
தோளில் கம்பீரமாகும் துண்டு
இரவில் சிலருக்கு இடம்மாறி
தலையிலும் முகத்திலும்
தற்காப்புக்கவசம் ஆவதுண்டு.

மனைவியின் சண்டையும்,
பிரிவின் வலியும்,
சுமந்து சுமந்தே
இந்த உடம்பு
கட்டில் கால்களுக்குள் கசங்கிப் போனது.

இயலாமையில் இதயம்
எரியும் போதெல்லாம்
வயிற்றுத்தீ வந்து
தண்­ணீர் வார்த்துப் போகும்.

கேலிகளின் நீள் நாக்கு குத்தி
காதுகள் கிழியும் போதெல்லாம்
கண்ணீ­ர்க்கால்வாய்கள் ஓடி வந்து
ஒட்டுப்போடும்.

அம்மா
எனும் மழலைக்குரலுடன்
என் முந்தானை முனை இழுக்கும்
மூன்று வயது மூத்தமகன்.

கணவன் வரவுக்காய்
இருண்ட வாசலில் வெளிச்சமாய்
விளக்கேற்றிக் காத்திருக்கும்
என் முகம்.

கனவுகள் அவ்வப்போது வந்து
கதவு திறக்கும் போது
அவிழ்க்க மட்டுமே பழக்கப்பட்ட
ஏதோ ஒரு பாம்புக் குரல் வந்து
முடிச்சிட்டு இழுக்கும்.

மாங்கல்யக் கனவுகளின்
முற்றுப்புள்ளியாய்
என் முந்தானை முடிச்சுகள்
மீண்டும்
கழன்று வீழும்.
*

வெள்ளையடிக்கப்பட்ட

art, beautiful, bloom

வேஷதாரிகளே
உங்கள் அங்கிகளை எப்போதுதான்
அகற்றப் போகிறீர்களோ ?

பொதுவிடங்களில்
உங்கள் உதடுகளுக்கு
மகாத்மாச் சாயம் பூசுகிறீர்கள்
உள்ளுக்குள்
கசாப்புக் கடை நடத்துகிறீர்கள்.

புண்ணியங்கள்
விற்பனை செய்து
புண்ணிய பூமி வாங்குகிறீர்கள்
அங்கே
மனிதாபிமானத்தைப் புதைக்கிறீர்கள்.

தெருச்சந்திப்புகளில்
தகரத்தட்டுகளுக்குச்
சில சில்லறைகள்,
சில
சம்பிரதாயச் சமாதானங்கள்.
உள்ளுக்குள் உங்களுக்கே
பிணவாடை அடிக்கவில்லையா ?

விளம்பரம் செய்து செய்தே
நீங்கள்
புனிதனாகப் பார்க்கிறீர்கள்.

எப்போதேனும்
இடக்கைக்குத் தெரியாமல்
தானம் தந்திருக்கிறீர்களா ?

தோப்புக்கு
விளம்பரம் செய்யாமல்
குருவிகளுக்கு
கூடு கட்டிக் கொடுத்திருக்கிறீர்களா ?

போதுமே.

எட்டாத உயரத்தில்
சிம்மாசனம் செய்தாகிவிட்டது.
புதைந்துபோன
மனிதாபிமானத்தைக்
கொஞ்சம்
தோண்டி எடுக்கத் துவங்குங்களேன்.

உண்மை பொய்யல்ல.

 

Image result for truth

உண்மை பேசுதல்
உன்னதமானது.

‘பொய்மையும் வாய்மையிடத்து’
எப்போதேனும்
பொய்த்து விடலாம்.
எத்தனை காலம் தான்
நிலவைப் பிடித்து
குழந்தைக்குக் கொடுக்கும்
கதைகள் செல்லும் ?

பனிக்கட்டிக்குள் புதைத்த
தீக் கட்டிகள்,
வீரியம் தீர்ந்தாலும்
ஓர் நாள்
வெளிவந்தே தீரும்.

பொய்கள்,
சலுகைச் சமாதானங்கள்.
உண்மைகள் தான்
மனுக்குலத்தின்
மகத்துவம்.

பொய்கள் பெற்றுத் தரும்
வெற்றிகள்
முகத்துக்கு சாயம் பூசும்,
அகத்துக்கோ
அவை காயம் வீசும்.

உண்மை தரும் ஆசனம்
உண்மையில் ஆசனமல்ல.
அவை
இதயத்தை இரணமாக்கும்
இரசாயன இருக்கைகள்.

உண்மையின் தோல்விகள்
பொய்யின் வெற்றிகளை
தோற்கடிக்கும்.

மனசாட்சியைப் பொய்சொல்லி
ஏமாற்றல் இயலாதவரை
பொய்யை கொஞ்சம்
பொறுத்திருக்கச் சொல்லுங்கள்.

உண்மை பேசுங்கள்,
எப்போதேனும்
நீங்கள் நட்ட
பொய்யின் விதை முளைத்தால்
அதன்
உண்மை முகம்
தலை குனியும்.

பின்பு,
உங்கள் உண்மை விதைகளும்
அயலானுக்கு
பொய்க் கிளைகளாகவே
பரிமளிக்கும்.

தொலைந்து போன ஒருவன்..

Image result for mask manஉங்களால்
புறக்கணிக்கப் படுவேனோ
எனும்
பயம் எனக்கு.

அதனால் தான்
என்
வெள்ளைச்சிறகுகளுக்கு
உள்ளே இருக்கும்
கழுகுக் கால்களை
காட்ட மறுக்கிறேன்.

எனக்குள் வலி வருமோ
எனும் கிலியில் தான்,
என்
நிஜத்தின் நிழலைக் கூட
உங்கள்
விழி விழா தேசத்தில் தான்
விழ வைத்துக்
கொண்டிருக்கிறேன்.

புன்னகைப் பனிக்கட்டிகளை
என்னிரு உதடுகள்
ஏந்திப் பிடித்திருந்தாலும்,
சில
எரிமலைச் சிந்தனைகள்
உள்ளே எரிந்துகொண்டு தான்
இருக்கின்றன !

எப்போதேனும் காட்டவேண்டும்
என்
உண்மை முகத்தை,
போலித்தனமில்லா
ஓர்
நண்பனிடமாவது !.

அதற்கு முன்
தேட வேண்டும் !
எத்தனை முகமூடிகளுக்குப் பின்
என் முகம்
முடங்கிக் கிடக்கிறதென்று !.