TOP 10 : மிரட்டும் பேய்கள்

Image result for bloody mary in the mirror

பேய் என்றால் படையும் நடுங்கும். நம்ம ஊரில் சங்கிலிக் கருப்பன், கொம்பன் அப்படி இப்படி ஏகப்பட்ட பேய்கள் உண்டு. இதைவிட பல சுவாரஸ்யமான கதைகள் சர்வதேச அளவில் உண்டு. இந்தியாவுக்கு வெளியே உள்ள பேய்கள் எப்படி ? அவற்றில் சுவாரஸ்யமான பத்து வகை பேய்கள் இந்த வாரம்.

  1. பிளடி மேரி

வீட்டிலிருக்கும் விளக்கையெல்லாம் அணைத்து விடுங்கள். ஒரு மெல்லிய மெழுகுவர்த்தி மட்டும் எரியட்டும். ஒரு பெரிய நிலைக்கண்ணாடியின் முன்னால் நின்று கொண்டு “பிளடி மேரி” என்று மூன்று முறை சொன்னால் கண்ணாடியில் பேய் நின்று பல்லிளிக்கும். அப்படியே உங்கள் கண்களையெல்லாம் பிடுங்கிக் கொன்று விடும் என ஒரு திகில் பேய் மேலை நாடுகளில் உலவுகிறது.

தனது பிள்ளைகளையெல்லாம் கொன்ற பேயாம் இது. பொதுவாக குழந்தைகள் பாத்ரூமில் இருட்டில் நின்று இப்படிச் சொன்னால் பேய் வருமாம். கொஞ்சம் வித்தியாசமான பேய் தான். இந்தப் பெயர் பிடித்துப் போனதால் தான் அமெரிக்காவில் உற்சாகபான மிக்ஸ் ஒன்றுக்கு அந்தப் பேயின் பெயரையே வைத்து விட்டார்கள்.

  1. பிளையிங் டச் மேன்

பேய்களில் மிகவும் வித்தியாசமானது இது. இது ஒரு கப்பல். ! ஆம் கரையிலும் போகாமல் எப்போதும் கடலிலேயே இருக்கும் படி சாபம் வாங்கிய கப்பலாம். கப்பல் பயணிகளுக்குத் தான் இந்த பேயைக் கண்டால் பயம். அவ்வப்போது ஆங்காங்கே தோன்றி கப்பல்களையே அமுக்கி விடும். அடப் போங்கப்பா இதெல்லாம் கடலில் தெரியும் கானல் பிம்பங்கள் என சிலர் சொன்னாலும் பார்த்தவர்கள் அடித்துச் சொல்கிறார்கள் வெளிச்சத்தோடு வரும் இந்த கப்பலைப் பற்றிய கதைகளை !

பல பயணிகளின் குறிப்புகளில் இந்த கப்பல் இருக்கிறது. இங்கிலாந்தின் ஐந்தாம் ஜார்ஜ் மன்னர் இதை நேரடியாகப் பார்த்திருக்கிறார். சட்டென தோன்றி வெளிச்சமாய் கண்களுக்கு முன்னாலேயே மறைந்து விடும் இந்தக் கப்பல். 16ம் நூற்றாண்டின் பிற்பகுதியில் ஆரம்பமான இந்த பேய்க் கப்பல் புராணம், இன்னும் பீதி கிளப்புவதை நிறுத்தவில்லை. போய்க்கொண்டே இருக்கிற‌து.

  1. பிளினி

கி.பி 50ல் இளைய பிளினி எனும் ஒரு பேய் மஹா அட்டகாசம் செய்தது. கிரேக்க நாட்டின் முக்கிய நகரமான ஏதென்ஸில். அந்தப் பேய் சங்கிலிகளால் பிணைக்கப்பட்டிருக்கும். இந்தப் பேயின் அட்டகாசத்தை யாராலும் அடக்க முடியவில்லை. மந்திரம், தந்திரம், வித்தைகள் எதுவுமே இந்தப் பேயின் முன்னால் செல்லுபடியாகவில்லை. எந்த பாச்சாவும் பலிக்கவில்லையே என குழம்பிய மக்களுக்கு ஒருவர் அறிவுரை சொன்னார். அதன்படி, அங்கிருந்த கல்லறைகளைத் தோண்டினார்கள். ஒரு கல்லறையில் சங்கிலிகளுடன் கூடிய ஒரு எலும்புக் கூடைக் கண்டார்கள். அந்த எலும்புக் கூட்டின் சங்கிலிகளை அவிழ்ந்து. மரியாதையுடன் மறு அடக்கம் செய்த பின் ஆவி சந்தோசமாகிவிட்டதாம் ! அப்புறம் அந்த பிளினி பேயை யாரும் பார்க்கவில்லை.

பொதுவாகவே பண்டைய கிரேக்கர்களுக்கு பேய் நம்பிக்கை ஜாஸ்தி. கல்லறைகளில் பேய் உலவும் என்பதை சந்தேகத்துக்கு இடமின்றி நம்பினார்கள். பேய்கள் வந்து நாட்டிலுள்ள மக்களைக் கொல்லாதிருக்க ஒரு ஏற்பாடு செய்தார்கள். அதாவது ஆண்டுக்கு ஒருமுறை பேய்களுக்கு ஒரு மெகா விருந்து. எல்லா பேய்களுக்கும் ‘இன்விடேஷன்’ அனுப்பப்படும். இப்படி எல்லா பேய்களும் வந்து அந்த விருந்தைச் சாப்பிட்டால் அடுத்த வருஷம் விருந்து வரும் வரை பேய்கள் ரெஸ்ட் எடுக்குமாம்

பா ஜியோ கை

பெயரைக் கேட்டாலே புரிந்திருக்கும் இது ஒரு சீன பேய் என்று. சூதாடுபவர்களுக்கு இந்த பேயைப் பற்றி நன்றாகத் தெரியும். இந்த பேய்களுக்கு முருங்கை மரமல்ல, வாழை மரம் தான் ஃபேவரிட். அதன் கீழே தான் தங்கும். கையில் ஒரு குழந்தையும் இருக்கும். திகில் கிளப்பும் இந்தப் பேயை விரட்ட ஒரே ஒரு வழி தான் உண்டு.  ஒரு நீளமான சிவப்புக் கயிறை எடுத்து, அதன் ஒரு முனையை வாழை மரத்திலும், மறு முனையை நீங்கள் படுக்கும் கட்டிலிலும் கட்டவேண்டும். வாழை மரத்தில் கயிறோடு சேர்த்து சில ஊசிகளையும் குத்தி வைக்கவேண்டும்.

இப்போது அந்தப் பேய் கயிற்றைப் பிடித்துக் கொண்டு கட்டிலில் படுத்திருப்பவரிடம் தன்னை விடுவிக்குமாறு கெஞ்சும். அப்போது கட்டிலில் படுத்திருப்பவர், விடுவிக்கிறேன் எனக்கு முதல் பரிசு விழப்போகும் லாட்டரி நம்பர் சொல்லு என்றால் பேய் சரியாகச் சொல்லும் !  இது சீனா பேய். இப்படி சூதாட்ட விஷயத்தில் எல்லா விஷயங்களையும் புட்டுப் புட்டு வைப்பதால் தைரியசாலி விளையாட்டு வீரர்களுக்கு இந்தப் பேய் பணம் கொட்டும் பேய்.

சீனாவில் லூனார் காலண்டரின் ஏழாவது மாதத்தின் பதினைந்தாவது நாள் பேய் தினம் கொண்டாடுகிறார்கள். பேய்களுக்கு படைப்பது தான் இந்த தினத்தின் ஸ்பெஷல். டயா டீ லோஸ் முரீடோஸ் என மெக்ஸிகர்கள் கொண்டாடுவதும் ஏறக்குறைய இதே கான்சப்ட் தான் என்பது கூடுதல் தகவலுக்காக.

  1. பேய் இரயில்

பேய், கப்பலாய் மட்டும் தான் வருமா ? ரயிலாய் வராதா ? என கேட்பவர்களுக்காக இந்தப் பேய். இது ஒரு ரயில் பேய். ஒரு மாய ரயில். அவ்வப்போது ஆங்காங்கே தெரியும் பேய் ரயில் இது. இங்கிலாந்து மற்றும் அமெரிக்காவில் தான் இந்தக் கதைகள் பிரசித்தம். ஆளில்லாத, உடைந்த நிலையில், புதர் மண்டிக் கிடக்கும் ரயில்வே டிராக்களில் திடுக் என தோன்றி தடதடத்து ஓடும் ரயில் இது. ஆபிரகாம் லிங்கனின் நினைவு நாளில் இது அடிக்கடி தோன்றிய கதைகள் உண்டு. இந்த ரயில் போகும் போது பக்கத்திலிருக்கும் எல்லா கடிகாரங்களும் நின்று விடும் என்பது ஜிலீர் சங்கதி.

இங்கிலாந்திலுள்ள ஒரு ரயில்வே லைன் மூடப்ப்பட்டு பல வருடங்கள் கழிந்தபின் ஹாயாய் போயிருக்கிறது இந்தப் பேய், 1969ல். இந்தப் பேயைப் பிடித்துக் கொண்டு ஏகப்பட்ட கதைகள், திரைப்படங்கள், தொலைக்காட்சி நிகழ்ச்சிகள் என சம்பாதித்தவர்கள் பலர்.

6 நூ குய்

இந்தப் பேய் தான் பொதுவாக நாம் சினிமாக்களிலாவது பார்க்கின்ற பேய். வெள்ளை உடை, நீள முடி உள்ள பெண் பேய். சிவப்பு ஆடை உடுத்திக் கொண்டே செத்துப் போன பெண் தான் இப்படிப்பட்ட பேயாய் அலைவாள் என்பது சீனர்களின் நம்பிக்கை.

“வாழும்போது என்னை கொடுமைப்படுத்தினே இல்லே.. நான் பேயா வந்து உன்னை என்ன பண்றேன் பாரு” என சவால் விடும் பேய்கள் இவை. பெண்கள் பாலியல் வன்முறையினால் கொல்லப்பட்டால், அடக்கத்தின் போது குடும்பத்திலுள்ள எல்லோரும் சிவப்பு ஆடை உடுத்திக் கொண்டு வருவார்கள். அப்படி வந்தால் இந்தப் பேய் சக்தியோடு கிளம்பி தன்னைக் கொன்றவனைப் பழிவாங்கும் என்பது அவர்களுடைய நம்பிக்கை.

  1. ரெஸரக்ஸன் மேரி

ஜெரி பாலஸ் என்பவர் ஒரு அழகிய பெண்ணை அழைத்துக் கொண்டு அவளுடன் டேட்டிங் செய்தார். ஒரு நாள் முழுவதும் அவளுடன் ஆட்டம் பாட்டமென பொழுதைப் போக்கினார். அவளுடைய கையைத் தொட்டால் ஐஸ் கட்டி மாதிரி இருந்தது, அது ஒன்று தான் ஜெரிக்கு வித்தியாசமாய்ப் பட்டது. மாலையில், “சரி கிளம்பறேன், கொஞ்சம் டிராப் பண்ணுங்க” என்று சொல்லி காரில் ஏறினாள். ஜெரி அவளை டிராப் பண்ண சென்ற போது வழியில் குறுக்கிட்டது ஒரு கல்லறைத் தோட்டம். “ஜஸ்ட் ஒன் மினிட்” என்று சொல்லி காரைத் திறந்தவள் சட்டென காணாமல் போய்விட்டார். கல்லறைத் தோட்டத்தின் கதவுகள் அசைந்தன.

மிரண்டு போய் வீட்டுக்கு வண்டியை பறத்திக் கொண்டு வந்தவரிடம் மக்கள் சொல்லியிருக்கிறார்கள், “அடப்பாவி அது ரெஸரக்ஷன் மேரி பேய்டா.. இது கூட தெரியாதா ?”. அமெரிக்காவின் சிகாகோ பகுதியில் மக்களை தொடர்ந்து மிரட்டிக்கொண்டிருக்கும் பேய் இது. 1934ல் ஒரு விபத்தில் இறந்து போன போலந்து நாட்டு இளம்பெண் தான் இந்தப் பேய் என ஒரு கதை உண்டு.

  1. லா லோர்னா

லா லோர்னா என்றால் ஸ்பானிஷ் மொழியில் அழுகின்ற பெண் என்று பொருள். தான் விரும்பிய ஆடவனோடு சேர வேண்டும் என்பதற்காக தனது குழந்தைகளைக் கொன்று விடுகிறாள் ஒரு பெண். ஆனால் பரிதாபம், அந்த ஆடவன் அவளை உதாசீனம் செய்து விடுகிறான். கதிகலங்கிப் போன அந்தப் பெண் தற்கொலை செய்து கொள்கிறாள். அவள் தான் இந்த பேய். அழுது கொண்டே, தனது குழந்தைகளைத் தேடித் திரியும் ஒரு அபலைப் பெண்ணின் குரலாய் இந்தப் பேயின் குரல் இரவு நேரங்களில் வீட்டைச் சுற்றி ஒலிக்கிறது.

சில நேரங்களில் தனியே நடந்து திரியும் குழந்தைகளை தன் குழந்தைகள் என நினைத்து இந்தப் பேய் தூக்கிச் சென்றுவிடுவதும் உண்டு. நெகிழவைக்கும் ஒரு தாயின் அழுகுரலும், அலைந்து திரியும் ஒரு பேயின் மூர்க்கமுமாக இந்தப் பேய் மக்களை மிரட்டிக் கொண்டிருக்கிறது.

  1. ஆனி போலின்

எட்டாம் ஹென்ரியின் இரண்டாவது மனைவி தான் இந்த ஆனி. முதலாம் எலிசபெத் ராணியின் தாய். அதி அற்புத அழகி. அவளுடைய‌ ஒழுக்கத்தின் மீது சந்தேகப்பட்ட கணவன் அவள் மீது இல்லாதது பொல்லாதது எல்லாம் சொல்லி மரண தண்டனை விதித்தான். வாளால் வெட்டிக் கொல்ல வேண்டும் என்பது தண்டனை. கண்கள் கட்டப்பட்ட நிலையில் இருந்தாள் ஆனி. “என் வாளைக் காணோமே” என பேசிக்கொண்டே சரேலென தலையை வெட்டினான் வீரன்.

ஆனி பேயானாள். இங்கிலாந்தில் அவளைப் பேயாய்க் கண்ட சாட்சிகள் எக்கச்சக்கம். அழகிய பெண்ணாக அவளைக் கண்டவர்கள் பலர். தலையில்லாத முண்டமாய் அவளைக் கண்டவர்கள் பலர். இதே மாதிரி தலையில்லாத இன்னொரு பேயும் உண்டு. அதன் பெயர் வூ டோ குய். பொதுவா மரண தண்டனை விதிக்கப்பட்ட பேய்கள் தான் இவை. ராத்திரி கதவைத் தட்டி “என் தலையைப் பாத்தீங்களா பாஸ்” என அப்பாவியாய் கேட்குமாம். சமயத்தில் கையில் தலையை வைத்துக் கொண்டு “கொஞ்சம் பிக்ஸ் பண்ணுங்களேன் பிளீஸ்” என்றும் கேட்குமாம் !

10 த வயிட் லேடி

இது ஹைவே பேய். காரில் போய்க்கொண்டிருக்கும் போது ரோட்டின் நடுவே சட்டென தோன்றி தலைவிரி கோலமாய் நிற்கும் பெண் இவள். பிலிப்பைன்ஸ் நாட்டில் இந்தப் பேய் மிகப்பிரபலம். நடு நிசி தாண்டிய நேரத்தில் யாராவது தனியே பயணம் செய்தால் சொல்லாமல் கொள்ளாமல் பின் சீட்டில் வந்து உட்காரும். அதற்காகவே இரவில் வண்டி நிறைய ஆட்களை ஏற்றிக் கொண்டு தான் பயணம் செய்கின்றனர். இதெல்லாம் கட்டுக்கதை என சிலர் சொன்னாலும், பெரும்பாலான பிலிப்பைன்ஸ் மக்கள் இது உண்மை என்று கற்பூரம் கொளுத்தாமல் சத்தியம் செய்கின்றனர்.

சரி கெட்ட பேய்களைப் பற்றி மட்டுமே சொன்னால் எப்படி, இதோ கொசுறாக ஒரு நல்ல பேய். இதன் பெயர் புனியன். காடுகளில் தான் பொதுவா இது வசிக்கும். காட்டில் வழிதப்பிப் போனால் இந்தப் பேய் வந்து வழி சொல்லுமாம் ! . “ரைட் எடுத்து லெப்ட் கட் பண்ணுங்க மெயின் ரோட் வந்துடும்.!!

TOP 10 : புராண வில்லன்கள்

Image result for asmodeus

புராணங்களிலும், காவியங்களிலும், ஆன்மீக நூல்களிலும் பல வில்லன்கள் உலா வருகின்றனர். நிகழ்கால வில்லன்களுக்கு சவால் விடும் வகையில் அவர்களுடைய வாழ்க்கை இருக்கிறது. புனைவாகவும், நிஜமாகவும் இருக்கும் அத்தகைய இதிகாச, காவிய வில்லன்களில் ஒரு பத்து பேர் இந்த வாரம்.

  • குரோனஸ் (Cronus )

கிரேக்கக் கதைகள் சுவாரஸ்யத்துக்குப் பஞ்சம் வைக்காதவை. கதாநாயகர்களும் வில்லன்களும் நிரம்பி வழியும் கிரேக்கப் புராணங்களில்  மிக முக்கியமான கடவுள் ஸீயஸ். இவருக்கு ஒரு அதி பயங்கர வில்லன் இருந்தான். அது வேறு யாருமல்ல, அவருடைய அப்பா குரோனஸ் தான். குரோனஸ் சர்வ வல்லமை பொருந்திய கடவுளாய் இருந்தான். அந்த பதவியே தந்தையிடமிருந்து அவன் தந்திரமாய்ப் பறித்தது தான். இதனால் குரோனஸின் அம்மாவுக்கு மகன் மீது கடும் கோபம். “ஒர் நாள் உன் பையனே உன்னை வீழ்த்துவான் பாரேன்” என சாபம் கொடுத்துவிடுகிறார்.

விடுவாரா குரோனஸ். தனக்குப் பிறந்த குழந்தைகளையெல்லாம் விழுங்கி ஏப்பம் விட்டான். மனைவி ரேயாவுக்கு மிகுந்த கவலை. அதனால் கடைசியாய் பிறந்த குழந்தையை மட்டும் எப்படியாவது காப்பாற்ற வேண்டும் என நினைத்தாள். குழந்தை பிறந்த செய்தி கேட்டு குழந்தையை விழுங்க வந்தவனிடம், துணியில் ஒரு கருங்கல்லைச் சுற்றிக் கொடுக்க, அவனும் அதை விழுங்கி விடுகிறான்.  அப்படித் தப்பியவர் தான் ஸீயஸ்.

ரேயாவால் தனியே ஒரு குகையில் வளர்க்கப்பட்ட ஸீயஸ் வளர்ந்து பெரியவனாகி வந்த பின் கிளைமேக்ஸ். முதலில் தந்தையை வாந்தியெடுக்க வைத்து வயிற்றிலிருந்த தனது சகோதரர்களையெல்லாம் வெளியே கொண்டு வந்து. தந்தைக்கு எதிராக பல ஆண்டுகள் கடுமையாகப் போராடி வெல்வது மீதி !

ஸீயஸ் கிரேக்கக் கடவுள்களுக்கெல்லாம் மன்னன். வானம் இடி எல்லாமே இவருடைய கட்டுப்பாட்டில் தான் என்பது கிரேக்க நம்பிக்கை. அப்படிப்பட்ட ஸீயஸுக்கே வில்லனாய் வந்த குரோனஸ், கிரேக்க புராணங்களின் முக்கிய வில்லன்.

  • யூதாஸ் இஸ்காரியோத்து

காந்தியைத் தெரிந்தவர்களுக்கெல்லாம் கோட்சேயைத் தெரிவது போல, இயேசுவைத் தெரிந்தவர்களுக்கெல்லாம் தெரிந்த பெயர் யூதாஸ் இஸ்காரியோத். இயேசுவுக்கு நெருங்கிய நண்பர்களாய் இருந்தவர்கள் பன்னிரண்டு பேர். அவர்களில் ஒருவர் இந்த யூதாஸ்.  

இயேசு அன்றைய யூத சட்டங்களுக்கு எதிராகவும், மத வாதிகள், மறை நூல் வல்லுநர்களுக்கு எதிராகவும் தீவிரமாய் முழங்கியவர். இவரைத் தலைவராக்க வேண்டுமென்பது மக்களின் திட்டம். இந்தத் தலைவலியை இல்லாமலாக்க வேண்டும் என்பது மதவாதிகளின் திட்டம். தந்திரமாய் இயேசுவைப் பிடிக்க அவர்கள் பிடித்தது யூதாஸை ! அவனுடைய பணத்தாசை அவர்களுக்கு துருப்புச் சீட்டாகிப் போனது.

படைவீரர்களை அனுப்புகிறோம். ஆளை மட்டும் நீ காட்டிக் கொடுத்தால் போதும். இதோ முப்பது வெள்ளிக்காசு. இவ்வளவு தான் ஒப்பந்தம். “நான் யாரை முத்தமிடுவேனோ அவர் தான் இயேசு. புடிச்சுக்கோங்க” என்றான் யூதாஸ். திட்டம் நிறைவேறியது. இரவில் இயேசு ஜெபித்துக் கொண்டிருந்த இடத்துக்கு யூதாஸ் போனார். இயேசுவை முத்தமிட்டார்.

“நண்பா… முத்தமிட்டா என்னைக் காட்டிக் கொடுக்கிறாய்”  என இயேசு சொன்னதையும் காதில் வாங்காமல் நைசாக நழுவினான் யூதாஸ்.  

  • இப்லிஸ் ( iblis)

இப்லிஸ் இஸ்லாமிய மதத்தின் வில்லன். குரானின் அடிப்படையில் பார்த்தால், கடவுளின் பேச்சைக் கேட்காமல் சுவர்க்கத்திலிருந்து துரத்தப்பட்டவன். கடவுள் ஆதாமைப் படைத்தபின் எல்லா தேவதைகளையும் கூப்பிட்டு ஆதாமுக்கு முன்னால் மண்டியிட்டு வணங்கச் சொன்னார். கடவுளின் பேச்சைத் தட்டாமல் எல்லோரும் ஆதாமைப் பணிந்தனர், ஒருத்தரைத் தவிர. அவர் இப்லிஸ் !

நான் ஒரு தெய்வப் பிறவி. நெருப்பிலிருந்து பிறந்தவன். ஆதாம் ஒரு மனிதப் பிறவி. கேவலம் களி மண்ணிலிருந்து பிறந்தவன். என்னை விடத் தகுதியில் குறைந்த அவனுக்கு முன்னால் நான் மண்டியிடுவதா ? முடியாது என்பதே இப்லிஸ் நிலைப்பாடு.  அப்புறமென்ன கோபம் கொண்ட கடவுள் அவனை அங்கிருந்து துரத்தி விட்டார்.

போகும் போது கடவுளிடம் ஒரு விஷயம் கேட்டான் இப்லிஸ். அதாவது கடைசி காலம் வரை எனக்குத் தண்டனை தராமல் இருந்தால் நான் யார் எனக் காட்டுவேன். பூமியிலுள்ள ஆதாமின் சந்ததியினரை எல்லாம் தீய வழியில் கொண்டு செல்வேன் என்றான். கடவுள் ஒப்புக் கொண்டர். சைத்தான் என பெயரைப் பெற்ற இவன் தான் பின்னர் பாம்பாய் வந்து ஏவாளை ஏமாற்றியதாம். மக்கள் தீய வழியில் செல்கிறார்களெனில் அதன் காரணம் இப்லிஸ் என்பது இஸ்லாமியர்களின் நம்பிக்கை.

  • யங் வான் ( எமன் )

புத்தமதத்திலும் எமன் உண்டு. புத்தமதத்தின் சில பிரிவுகளில் நான்கு எமன்கள் வரை உண்டு. எமனோட வேலை மக்களை நல்வழிப்படுத்த நோயையும், முதுமையையும் , கஷ்டங்களையும் மக்களுக்குக் கொடுப்பது. அப்படியும் அவர்கள் வழிக்கு வராமல் செத்துப் போய்விட்டால் கடைசியில் எமனிடம் தான் வந்தாக வேண்டும். அவர்களை அடுத்து நரகத்தில் எறிவதா, சுவர்க்கத்துக்கு அனுப்புவதா அல்லது மீண்டும் பூமிக்கு அனுப்புவதா என முடிவெடுப்பது இவர் தான்.  

சீன மதத்தில் எமனோட பெயர் யன் வாங். யங் வாங்- கிற்கு சாவின் கடவுள் எனும் பெயர் தான் சீனாவிலும். கொரியன் மொழியில் இவரை யோம்ரா என்கிறார்கள் ஜப்பானியர்கள் யம்மா என அழைக்கின்றனர். எல்லாமே எமனுடைய வேறு வேறு வெர்ஷன்கள் தான். ஆனால் சீனா வகையறாக்களில் எமனுக்கு கெட்டப் வேறு. சிவந்த முகம், பெரிய உருவம், நீளமான தாடி என மிரட்டும் கெட்டப். என்னதான் கடவுளாக இருந்தாலும், நம்ம உயிரை எடுப்பதனால் யங் வாங் கும் சீன மத “வில்லன்” லிஸ்டில் தான் வருகிறார்.

  • சாத்தான்கள் ( Demons )

அதிபயங்கர சக்தி, நினைத்த நேரத்தில் நினைத்த உருவத்தில் வருவது, எங்கே வேண்டுமானாலும் சர்வ சாதாரணமாய் தோன்றுது என சர்வ சக்தி வில்லன் சாத்தான். சாத்தான்கள் என பொதுப்படையாகச் சொல்லப்படும் எல்லாமே வில்லன் வகையறாக்கள் தான். ஒவ்வொரு மதமும் சாத்தானைப் பார்க்கும் பார்வையில் மட்டும் ஏகப்பட்ட வித்தியாசம்.  

கிறிஸ்தவ மதத்தில் சாத்தான்கள் வேறுயாருமல்ல, சுவர்க்கத்திலிருந்து துரத்தப்பட்ட ஏஞ்சல்ஸ் தான் !. சுவர்க்கத்தில் நிரம்பியிருந்த தூதர்களில் மூன்றில் ஒரு பங்கு பேருக்கு புகழ் ஆசை வந்தது. அதனால் அவர்களையும், அவர்களுடைய தலைவன் லூசிபரையும் கடவுள் சுவர்க்கத்திலிருந்து கீழே தள்ளிப் போட்டார். அவர்களெல்லாம் பூமியில் வந்து விழுந்தார்கள் என்பது கிறிஸ்தவக் கதை. இந்து மத நம்பிக்கைப்படி ராட்சதர்கள், அசுரர்கள், வேதாளம், பிசாசுகள் என பல பெயரில் உலவுபவர்களை இந்த டீமன்ஸ் கணக்கில் சேர்க்கலாம்.  

  • ஸ்டிரிகோய் ( Strigoi )

நிறைவேறாத ஆசைகளுடன் செத்துப் போனால் ஆவியாய் அலைவார்கள் எப்பதைக் கேள்விப்பட்டிருக்கிறீர்கள். இதே சமாச்சாரம் தான் ரோம புராணங்களிலும். இங்கே  நிம்மதியற்ற ஆத்மாக்களின் பெயர் ஸ்டிரிகோய். கல்லறைகளில் நிம்மதியாய் உறங்க முடியாமல் எப்போது எழும்பி யாரைப் பிடிக்கலாம் என அலைந்து திரிபவை தான் இவை.

விட்ச் என சொல்வது இந்த ஸ்டிரிகோய் வகைகளின் பெண் வடிவம். மனிதர்கள், விலங்குகள் என கிடைத்த கேப்பில் புகுந்து அட்டகாசம் செய்கின்றன இந்த ஸ்டிரிகோய்கள். சிவப்பு முடி, நீல நிறக் கண்கள், இரண்டு இதயம் என திடுக் திடுக் வடிவத்தை இவற்றுக்குக் கொடுத்திருக்கிறது ரோம மித்தாலஜி.

இந்த ஸ்டிரிகோரிகளிடமிருந்து தப்புவதொன்றும் பெரிய விஷயமில்லையாம். ஒரு பாட்டில் விஸ்கியை அவர்களுடைய கல்லறை அருகே புதைத்து விட வேண்டும். அவை அதைக் குடித்து விட்டு மயங்கிவிடுமாம். அட ! அவன் தானா நீ !! நம்ம ஊரில் பட்டை சாராயம் !  

  • லூகாரூ ( Loogaroo )

லூகாரூ கரீபியன் மித்தாலஜியிலுள்ள ஒரு வில்லன். வில்லன் என்பது தவறு இது ஒரு வில்லி. இதுவும் சாத்தானும் அக்ரீமெண்ட் போட்டுக் கொண்டு மனிதர்களைச் சாவடிப்பது தான் வேலை. சாத்தான் இதற்கு நிறைய மந்திர சக்தியெல்லாம் கொடுத்திருக்கிறது. பதிலுக்கு இது கொடுக்க வேண்டியது மனித இரத்தம். அப்படி கொடுக்காவிட்டால் அவ்வளவு தான், லூகாரூவின் இரத்தத்தையே சாத்தான் குடித்துவிடும். அதனால் எப்படியாவது இரத்தம் வேண்டும் என வெறியுடன் இவை அலைந்து திரியுமாம்.  இராத்திரியில் ஒரு ஒளியையோ, நீல நிற ஒளிப் பந்தையோ, பார்த்தால் அது லூகாரூ தான் என்கின்றனர் கரீபியன்ஸ்.  

சரி இதன் பிடியிலிருந்து எப்படி தப்புவது. வெரி சிம்பிள். வீட்டு வாசலில் ஒரு மூட்டை நெல்லையோ, அரிசியையோ, அல்லது குறைந்த பட்சம் மணலையோ வைக்க வேண்டுமாம். லூகாரூ வீட்டு முன்னால் மூட்டையைப் பார்த்தவுடன் பிரித்து ஒவ்வொன்றாய் எண்ண ஆரம்பிக்குமாம். எண்ணி முடிக்கும் முன் சூரியன் வந்து விடுவான். அடடா ஏமாந்துட்டோமே என லூகாரூவும் ஓடி விடுமாம்.  அட முட்டாள் லூகாரூ ! தினமுமா ஏமாறுவே ?

  • அஸ்மோதேயுஸ் ( Asmodeus)

நரகம் இருக்கிறது என்பதை பெரும்பாலான மதங்கள் ஒத்துக் கொள்கின்றன.  அஸ்மோதேயுஸ் நரகத்திலுள்ள சாத்தான்களின் தலைவன். நரகத்தில் ஏழு சாத்தான் மன்னர்கள் உண்டாம். ஒவ்வொருவருக்கும் பெருமை, பொறாமை, காமம் என ஒவ்வொரு டிபார்ட்மெண்ட்.  அஸ்மோதேயுஸின் டிபார்ட்மெண்ட் காமம்.  இவனுடைய ஆசையெல்லாம் மக்களுடைய காம ஆசையைத் தட்டி எழுப்புவது தான்.

பீச் ஓரங்களில் கைகளைக் கோர்த்து அலையும் காதலர்களிடம் இவனுடைய வேலை வெகு எளிதாய் வொர்க் அவுட் ஆகி விடுகிறது. ஆசையைத் தூண்டி விட்டு மக்கள் தப்பு செய்தால் இவனுக்கு வெற்றி. அவர்களெல்லாம் கடைசியில் இவனுடைய கட்டுப்பாட்டில் உள்ள இரண்டாவது நரகத்துக்கு வந்து சேர்வார்களாம்.

  • இன்குபஸ் ( incubus)

இன்குபஸ் என்பது சுமேரியர்களுடைய வில்லன். இந்த வில்லன் கொஞ்சம் விவகாரமானவன். தூங்கும் பெண்களின் மீது உறவு கொள்ள ஆசைப்பட்டு அலைவான். இந்த வில்லன் குழுவில் வில்லிகளும் உண்டு. அவற்றுக்கு சுகுபஸ் என்பது பெயர்.   வில்லிகள் ஆண்களை நாடுவார்கள். இன்குபஸோ, சுகுபஸோ ஒருத்தரைப் பிடித்து விட்டால் அவருடைய உடல் இளைத்து, ஆரோக்கியம் போய்,  கடைசியில் மரித்து  விடுவார்களாம்.  

சரி இன்குபஸ் வந்திருப்பதை எப்படிக் கண்டுபிடிப்பது ? இராத்திரி திடீரென கனவு கண்டு விழிப்பது, தூக்கத்தில் அசைவற்றுப் போவது  உட்பட “வாலிப வயோதிக அன்பர்களே” டாக்டர்கள் சொல்லும் எல்லாமே இதன் அறிகுறிகள் தானாம்தா. சுமேரியர்களிடமுள்ள இந்த நம்பிக்கை ஜெர்மன், பிரேசில், அமேசான் காட்டுப் பகுதிகள், தென் ஆப்பிரிக்கா போன்ற நாடுகளிலும் உண்டாம்.

  • வாம்பையர்

நீண்ட நீண்ட பற்கள். கூரிய நகங்கள். சட்டென சந்தர்ப்பம் கிடைத்தால் கழுத்தைக் கடித்து இரத்தம் குடித்து கோரமாய் சிரிக்கும் உருவம் தான் வாம்பையர். அரைத்த மாவையே அரைக்கும் ஹாலிவுட் திரைப்படங்களுக்குக் கிடைத்த வரப்பிரசாதமாகவும் ஆகிப் போனது இந்த வாம்பையர் பயங்கரங்கள்.  

வாம்பையர் ஒரு அதிபயங்கர வில்லன் என்பதில் பல்வேறு நாடுகள் ஒத்துப் போகின்றன.  வாம்பையர்களுக்கு இரும்புப் பற்கள் உண்டு, அவை குழந்தைகளைக் குறி வைத்து அலையும் என கதைகள் பல்வேறு விதமாய் உலவுகின்றன.  கரீபியன் தீவுகள், அமெரிக்கா , சிலி, கொலம்பியா, ஆசியா, என எல்லா நாடுகளிலும் வாம்பையர் கதைகள் உலவுகின்றன. என்ன, தங்கள் பின்னணிக்குத் தக்கபடி கற்பனை வடிவத்தை மட்டும் மாற்றிக் கொள்கின்றனர்.

TOP 10 : மூளையின் புத்திசாலித்தனம்

Image result for human brain

மனித மூளை ஒரு அற்புத சாதனம். இறைவனின் படைப்பின் உச்சத்தை உரக்கச் சொல்லும் ஒரு விஷயம்ம. மனித மூளைய ஒத்த ஒரு கருவியைப் படைக்க மனிதனால் இன்று வரை முடியவில்லை. இனிமேலும் சாத்தியமாகப் போவதில்லை. காரணம் அதன் நுட்பங்கள் அந்த அளவுக்கு இருக்கின்றன. நம்முடைய அனுமதி இல்லாமலேயே தினமும் மூளை பல்வேறு விஷயங்களைச் செய்து கொண்டே இருக்கிறது. மூளையைப் பற்றிய வியப்பான பத்து விஷயங்கள் இந்த வாரம்.

  1. தகவல் வடிகட்டல்

தினம் தோறும் நமது கண்கள் மூலமாகவும், காதுகள் மூலமாகவும், உணர்வுகள் மூலமாகவும் பல்வேறு தகவல்களை மூளை சந்தித்துக் கொண்டே இருக்கிறது. அந்த தகவல்கள் எல்லாம் நமக்குத் தேவைப்படுவதில்லை. அத்தகைய தேவையற்ற தகவல்களையெல்லாம் மூளை தானாகவே வெளியேற்றிக் கொண்டே இருக்கிறது.

உதாரணமாக, நாம் இன்றைய தினம் முதலில் சந்தித்த நபர் யார். அவர் என்ன கலர் ஆடை அணிந்திருந்தார். இரண்டாவதாக யாரைப் பார்த்தோம் ? போன்ற தகவல்களையெல்லாம் மூளை பதிவு செய்து வைப்பதில்லை. இதை “செலக்டிவ் அட்டென்ஷன்” என்கிறது விஞ்ஞானம். தேவையற்ற தகவல்களை விலக்கி, தேவையான தகவல்களை சேமிக்கும் அற்புத ஞானம் அதற்கு உண்டு. எனவே சில விஷயங்கள் மறந்து போச்சே என்றால் கவலைப்படாதீர்கள்.

இதே போல கவலையளிக்கும் விஷயங்களை மறந்தும், ஆனந்தமான விஷயங்களை நினைவிலும் வைக்கும் மனம் இருந்தால் ரொம்ப நல்லது இல்லையா ?

  1. இமைத்தல்

மனிதன் இரண்டு முதல் பத்து வினாடிகளுக்கு ஒரு முறை இமைக்கிறான். அதாவது ஒரு நிமிடத்துக்கு 30 முறை வரை விழிகள் இமைத்துக் கொண்டே இருக்கின்றன. நாம் அதைப் பற்றிய கவனமே இல்லாமல் இருப்போம். இதை முழுமையாக செயல்படுத்துவது நமது மூளை தான். நமது கண்ணுக்குத் தேவையான ஈரப்பதம் எப்போதும் இருக்கும் படி பார்த்துக் கொள்வது தான் இதன் முக்கிய வேலை.

கண்களின் ஓரங்களில் உருவாகும் கண்ணீரை கண்ணுக்கு சரியாக அனுப்பி, அழுக்கை அகற்றி கண்ணை ஆரோக்கியமாக வைத்திருக்க இந்த இமைத்தல் உதவுகிறது. யாராவது சட்டென எதையாவது எடுத்து முகத்தில் எறிந்தால் முதலில் கண்ணை மூடுவது கூட மூளை சட்டென செய்யும் தற்காப்பு நடவடிக்கையே !

  1. நாவின் அசைவு

கமலஹாசனைப் போலவோ, ரஜினிகாந்தைப் போலவோ அசாதாரணமாக மிமிக்ரி செய்யும் மக்களைப் பார்த்திருப்பீர்கள். குறிப்பிட்ட நபர்களின் வார்த்தை உச்சரிப்பை வைத்து அதே போல பயிற்சி எடுத்து பேசுவது தான் இவர்களின் திறமை. ஒவ்வொரு வார்த்தைக்கும், ஒவ்வொரு விதமான உச்சரிப்புக்கும் நமது நாக்கு எப்படி சுழல்கிறது, எப்படி அசைகிறது என்பது தான் மிக முக்கியமான விஷயம். இந்த அசைவுகளையெல்லாம் மூளை தனது அதி அற்புதமான திறமையினால் தாமாகவே முடிவு செய்து கொள்கிறது !

நாம் பேசுகிறோம், ஆனால் நாக்கு எங்கெல்லாம் அசைகிறது என்பதை நாம் கவனிப்பதில்லை. என்ன பேசுகிறோம் என்பதை மட்டும் நாம் கவனித்தால் போதும், எப்படி பேசுகிறோம் என்பதை மூளை முடிவு செய்கிறது. ஒருகுறிப்பிட்ட ஸ்டைலில் நாம் பேச ஆரம்பித்தால் அந்த ஸ்டைலுக்குத் தக்கபடி நாவின் இருப்பிடத்தை மாற்றி அமைத்துக் கொள்ளும் வேலையை மூளை மின்னலென செய்கிறது.

நாம் ஒரு குறிப்பிட்ட வாக்கியத்தைப் பேச ஆரம்பிக்கும் போது, நாம் பேசத் துவங்கும் முன்பே நாக்கு தயாராகி விடுகிறது என்பது வியப்பான விஷயம் இல்லையா ?

  1. உடலின் வெப்ப நிலை

நமது நிலத்தில் எல்லா காலநிலைகளும் மாறி மாறி வருகின்றன. குளிர்காலம், வெயில்காலம், வசந்தகாலம் என வெப்பநிலை மாறி மாறி வருகிறது. இது போதாதென்று அடிக்கடி நாம் ஏசி அறைகளில் போய் அடைபட்டு விடுகிறோம் உடலுக்கு குளிரெடுக்கிறது. வெயிலில் அலைகிறோம் உடல் சூடாகிறது !

நமது உடல் சீராக இயங்க வேண்டுமெனில் நமக்கு 37 டிகிரி சென்டிகிரேட் வெப்பம் உடலில் இருக்க வேண்டும். அப்போது தான் நமது செரிமான அமைப்பு உட்பட உள் உறுப்புகள் எல்லாமே சிறப்பாகச் செயல்படும். அந்த வெப்பத்தை ஊர்ஜிதப்படுத்தும் வேலையை மூளை செய்கிறது. இதை நாம் அறிவதில்லை. சட்டென குளிரும் போது நமது உடலில் முடியெல்லாம் சிலிர்ப்பது வெளி வெப்பத்தை உறிஞ்சி எடுக்கும் ஒரு வழிமுறை. வெயிலில் உடல் வியர்ப்பது அதிக வெப்பம் உடலைத் தாக்காமல் உடலைக் குளிர வைக்கும் முயற்சி. இவை அனைத்தையுமே மூளை தன்னிச்சையாகச் செய்கிறது என்பது வியப்பு.

  1. காட்சிகளை உருவாக்கும்.

சம்பவம் நடந்த அன்றைக்கு நீங்கள் பார்த்த நபர் கண்ணாடி போட்டிருந்தாரா ? வீட்டு சன்னல் உடைந்திருந்ததா ? என வக்கீல் கேட்கிறார் என வைத்துக் கொள்ளுங்கள். அந்த சாட்சிக்காரர் தெளிவாக‌ ஞாபகம் வைத்திருக்காவிட்டால் கண்ணாடி போட்டிருப்பது போலவோ, சன்னல் உடைந்திருப்பது போலவோ மூளையானது காட்சிகளை சட்டென உருவாக்கி நம்மை நம்பவைத்து விடும்.

உளவியலார்கள் எலிசபெத் லோஃப்டஸ் மற்றும் ஜான் பால்மர் இருவரும் செய்த ஆராய்ச்சி மிகப்பிரபலம். அது சொல்லும் விஷயம் இது தான். மூளை தான் கண்ட காட்சியைப் பதிவு செய்து வைக்கிறது. அதனோடு சேர்த்து புதிய தகவல்களை நாம் கொடுக்கும் போது மூளை ஏற்கனவே பதிவு செய்து வைத்திருக்கும் காட்சியை இந்த புதிய தகவல்களுக்குத் தக்கபடி மாற்றி அமைக்கிறது ! நாம் பார்க்காத ஒரு விஷயத்தைக் கூட பார்த்தது போல மாயத் தோற்றம் அமைக்க மூளையால் முடியும்.

காலைல இதே டேபிள் மேல தான் வீட்டுச் சாவியை வைத்தேன் என ஒருவர் சொல்லும் போது மூளை அவர் சொல்வது உண்மை என அவரையே நம்பச் செய்து விடுகிறது. எனவே அடுத்தமுறை யாராவது அப்படிச் சொன்னால் திட்டாதீர்கள். மூளையின் காட்சி உருவாக்கம் தான் அதன் காரணம்.

  1. உடலின் சமநிலை

யாராவது கூப்பிட்டா சட்டுன்னு எழும்பி போறோம். மாடிப்படில ஏறுகிறோம், கீழே குதிக்கிறோம். ஆனா கீழே விழுவதில்லை. நமது உடல் எப்படி சமநிலையை பெற்றுக் கொள்கிறது ? அதைப் பற்றி நாம் சிந்திப்பதே இல்லை. நமது மூளை நமது உடலை சமநிலையில் வைத்திருக்கிறது. நமது கண்கள், மூட்டு இணைப்புகள், தசைகள் உட்பட பல்வேறு உறுப்புகள் மூளைக்கு சிக்னல்களை அனுப்பிக் கொண்டே இருக்கின்றன. அந்த சிக்னல்களை மைக்ரோ வினாடிகளில் அலசி ஆராய்ந்து நமது உடலின் சமநிலைக்கு ஏற்ப நமது உடலின் அமைப்பை மாற்றுகிறது மூளை.

கண்கள் நமக்கு முன்னால் இருக்கும் ஒரு பள்ளத்தைப் பார்க்கிறது. அந்த சிக்னல் மூளைக்குச் சென்று காலை எட்டி வைக்கிறோம். அப்போது உடலின் எடை முன்பகுதிக்குச் செல்கிறது, அப்போது நமது மூட்டுகள் சிக்னலை மூளைக்கு அனுப்புகின்றன. மூளை நமது உடலை அதற்குத் தக்கபடி வளைக்கிறது. இந்த எல்லா வேலைகளையும் மைக்ரோ வினாடியில் செய்து நமது உடலில் சமநிலை தவறாமல் மூளை நம்மை பாதுகாக்கிறது என்பது பிரமிப்பு தான் இல்லையா ?

7 நடுக்கம்

அதிக குளிரான இடத்தில் நிற்கும் போது சட்டென உடல் நடுங்க ஆரம்பிக்கும். சில வேளைகளில் நடுங்காமல் இருக்க வேண்டும் என நினைத்தாலும் முடியாமல் போகும். நடுங்கிக் கொண்டே இருப்போம். இதுவும் மூளையின் செயல்பாடு தான். உடலுக்குத் தேவையான வெப்பம் இல்லாத சூழல் உருவாகும் போது, உடல் மூளைக்கு சிக்னலை அனுப்புகிறது. உடனே மூளை உடலுக்கு நடுக்கத்தைக் கட்டளையிடுகிறது.

நடுக்கம் உடலில் வெப்பத்தை அதிகரிக்க உதவுகிறது. இந்த நடுக்கம் தீரவேண்டுமெனில் நாம் சூடான இடத்திற்குச் செல்ல வேண்டும், அல்லது போர்வைகளால் போர்த்தி உடலை தேவையான வெப்ப நிலைக்குக் கொண்டு வர வேண்டும். நடுக்கம் என்பது உடலை வெப்பமாய் வைத்திருக்க உதவும் பாதுகாப்பு அம்சம் தான். நடுக்கம் வருகிறதெனில், அதற்குக் காரணமான‌ மூளையிலுள்ள ஹைபோதலாமாஸ் பகுதிக்கு தான் நன்றி சொல்ல வேண்டும்.

  1. சிரிப்பு

எங்கே சிரிக்கணும், எங்கே சிரிக்கக் கூடாதுன்னு விவஸ்தை இல்லையா என சிலர் கேட்பதுண்டு. சிரிக்கக் கூடாத இடத்தில் சில வேளைகளில் சிரிப்பு பொத்துக் கொண்டு நம்மை தர்ம சங்கடத்தில் ஆழ்த்தி விடுவதும் உண்டு. இதற்கெல்லாம் காரணம் மூளை தான்.மூளையின் சில இடங்களில் நடக்கின்ற மாற்றங்கள் நமக்கு சிரிப்பை உண்டு பண்ணி விடுகின்றன.

ஒரு சிரிப்பு பொறிக்கு மூளை வேறு பல இடங்களிலிருந்து கிடைக்கின்ற தகவல்களை இணைத்து அடக்க முடியாத பெரிய‌ சிரிப்பை உருவாக்கி விடுகிறது. மூளை நமது உடல் அசைவுகளையும் மாற்றிவிடுகிறது. மூளையின் சில பகுதிகளை தூண்டும் போது அடக்க முடியாத சிரிப்பு வருவதை விஞ்ஞானிகள் நிரூபித்திருக்கின்றனர். அடுத்த தடவை யாராவது சிரித்தால், மூளையின் சித்து வேலை என சைலன்டாகப் போய்விடுங்கள்.

9 சுவை

சுவை விஷயத்தில் மூளை கொஞ்சம் மக்கு என்பது வியப்பான விஷயம். ஒரு சுவையான உணவைச் சாப்பிடும்ப்போது கண் அந்த உணவைப் பார்த்து மூளைக்கு சிக்னல் அனுப்புகிறது. மூக்கு அந்த வாசனையை அப்படியே மூளைக்கு சிக்னல்கள் மூலம் அனுப்புகிறது. அதை வைத்துத் தான் மூளை சுவை என்ன என நிர்ணயிக்கிறது. அல்லது சரியான சுவையை நாவுக்கு தருகிறது.

கண்களைக் கட்டிக் கொண்டு, மூக்கையும் பொத்திக் கொண்டு ஒரு துண்டு ஆப்பிள் பழத்தைச் சாப்பிட்டாலும், ஒரு துண்டு உருளைக்கிழங்கைச் சாப்பிட்டாலும் எது என்ன என்பதை அறியாமல் மூளை குழம்பிவிடும். வைன் சுவைஞர்கள் என ஒரு பணி உண்டு. வைனை சுவைத்துப் பார்ப்பது தான் அவர்களுடைய வேலை. அவர்களுடைய கண்களைக் கட்டி, மூக்கைப் பொத்தினால் வேலையில் முட்டை மார்க் வாங்கிவிடுவார்கள்.

  1. முகம்

மேகத்தைப் பாத்தேன் அப்படியே ஒரு மனுஷனோட முகம் மாதிரியே இருந்துச்சு. அந்த கல்லு கிடக்கிற ஸ்டைல பாத்தா மனுஷ முகம் மாதிரியே இருக்கு. இப்படியெல்லாம் உரையாடல்கள் கேட்டிருப்போம். இதுவும் மூளையின் சித்து விளையாட்டுகளில் ஒன்று தான். மூளையின் ஒரு பாகம் மனித முகங்களை அடையாளம் காண, பதிவு செய்ய, முக பாவங்களை அறிய என டெடிகேட் செய்யப்பட்டுள்ளது.

மனித வாழ்க்கையில் மனித முகங்களின் குறுக்கீடு தான் அதிகம் எனவே தான் மூளையில் அப்படி ஒரு வசதி. இதன் காரணமாகத் தான் காணும் இடங்களிலெல்லாம் மனித முகங்களை ஒத்த சாயல் இருக்கிறதா என அந்த பகுதி பார்த்துக் கொண்டே இருக்கிறது. இரண்டு புள்ளிகளை வைத்து உற்றுப் பார்த்தால் கூட ஒரு மனித முகம் உங்களுக்குத் தெரியலாம். இனிமேல் நள்ளிரவில் நடு ரோட்டில் ஏதோ முகம் தெரிந்தால், மூளையின் மாயாஜாலம் என நினையுங்கள், பேய் என பதறாதீர்கள்.

*

நன்றி : தினத்தந்தி

 

TOP 10 : திரையில் முதன் முதலாய்

இன்றைய திரையுலகம் அனிமேஷன், மோஷன் கேப்சரிங், கிராபிக்ஸ், நவீன தொழில்நுட்பம் என பல்வேறு நிலைகளில் கொடிகட்டிப் பறக்கிறது. ஆனால் திரையில் இந்த அம்சங்களெல்லாம் முதன் முதலாய் எப்போது தோன்றின ? அவை எப்படி இருந்தன என்பதை அறிந்து கொள்வது சுவாரஸ்யமே. அத்தகைய பத்து சுவாரஸ்யங்கள் இந்த வாரம்.

Image result for la vie et passion to christ

  1. கலர் படம்

முதன் முதலில் கலர் அவதாரம் காட்டிய படம் எனும் பெருமை ஒரு பிரஞ்ச் படத்தையே சாரும். லா வி எட் பேஷன் டு கிரைஸ்ட் என்பது தான் அந்தப் படத்தின் பெயர். இயேசுவின் வாழ்க்கையும், பாடுகளும் என்பது அதன் பொருள். 1903ம் ஆண்டு இந்தப் படம் உருவானது. ஒரே நீள படமாக இல்லாமல் 32 சிறு சிறு பாகங்களாக உருவான படம். இது இயற்கை நிறங்களின் அடிப்படையிலான படம் அல்ல, நிறம் பூசப்பட்ட திரைப்படம்.

இயற்கையான நிறத்தைப் பயன்படுத்தி எடுக்கப்பட்ட படம் ‘வித் அவர் கிங்ஸ் அன்ட் குயீன்ஸ் த்ரோ இந்தியா’ எனும் படம். இந்தியாவில் பிரிட்டிஷ் அரசின் வருகை, வரவேற்பு பற்றிய படம். 1912ம் ஆண்டு இந்தப் படம் வெளியானது. நீமோகலர் தொழில்நுட்பத்தைப் பயன்படுத்தி இந்தப் படம் எடுக்கப்பட்டது. இந்த படம் டாக்குமென்டரி வகையில் சேர்கிறது.

முதல் முழுநீள திரைப்படமாக வெளியான படம் த வேர்ல்ட், த ஃளஷ் அன்ட் த டெவில் எனும் படம். நீமோகலர் முறையில், இயற்கை வர்ணத்தோடு வெளியான முதல் முழு நீள திரைப்படம் எனும் புகழ் இதற்கு உண்டு. 1914ம் ஆண்டு இந்த படம் வெளியானது.

Image result for the man in the dark 3d

  1. முதல் 3டி படம்

3டி என்றதும் நமக்கு மை டியர் குட்டிச் சாத்தான் நினைவுக்கு வரும். உலக அளவில் புவானா டெவில் எனும் படம் தான் முதல் முப்பரிமாணப் படம் எனும் பெருமையைப் பெறுகிறது. 1952ம் ஆண்டு இந்தப் படம் வெளியானது. 1898களில் நடந்த உகாண்டா ரயில்வே கட்டுமானம் தொடர்பான உண்மை நிகழ்வுகளின் பதிவாக இந்தப் படம் அமைந்தது.

முதல் 3டி படத்தை மக்கள் வியப்புடனும், அச்சத்துடனும் பார்த்தார்கள். இதற்கு அடுத்த ஆண்டு த மேன் இன் த டார்க் எனும் 3டி படம் வெளியானது.

Image result for gone with the wind

  1. முதல் நூறு மில்லியன் டாலர் படம்

ஒரு படம் நூறு கோடி சம்பாதிப்பது இப்போதெல்லாம் சர்வ சாதாரணம். அதுவும் ஆங்கிலப் படங்கள் ஆயிரம் கோடி சம்பாதிப்பது வெகு சாதாரணம். அவதார் திரைப்படம் இந்திய மதிப்பில் 19 ஆயிரம் கோடி ரூபாய்கள் வசூலித்துக் கொடுத்த திரைப்படம். கான் வித் த வின்ட் எனும் 1939ம் ஆண்டே 390 மில்லியன் டாலர்கள் சம்பாதித்தது. அதாவது 39 கோடி டாலர்கள். இன்றைய மதிப்பில் பார்த்தால் சுமார் 23 ஆயிரம் கோடி டாலர்கள் என்கின்றனர்.

அப்படிப் பார்த்தால் இன்று வரை உலகிலேயே அதிகம் சம்பாதித்த படம் எனும் பெருமை அவதாருக்கு அல்ல, கான் வித் த வின்ட் திரைப்படத்திற்குத் தான்.

Image result for toy story

  1. முதல் கம்ப்யூட்டர் கிராபிக்ஸ் படம்

டாய் ஸ்டோரி படம் பற்றிக் கேள்விப்பட்டிருப்பீர்கள். உலகப் புகழ் திரைப்படம் அது. 1995ம் ஆண்டு வெளியானது. அதற்கு முன்பும் பல கம்ப்யூட்டர் கிராபிக்ஸ் சார்ந்த தொலைக்காட்சி நிகழ்ச்சிகள் வந்திருக்கின்றன. ஆனால் முழுக்க முழுக்க சி.ஜி.ஐ எனப்படும் கம்ப்யூட்டர் கிராபிக்ஸ் இன்டர்பேஸ் மூலம் கதாபாத்திரங்களை உருவாக்கி, அவர்களை மையப்படுத்தி வந்த முழு நீள திரைப்படம் இது தான்.

27 அனிமேஷன் ஸ்பெஷலிஸ்ட் சேர்ந்து 1.14 இலட்சம் பிரேம்கள் வரைந்து உருவான படம் இது. ஒவ்வொரு பிரேமும் இரண்டு முதல் 15 நாட்கள் வரை செலவிட்டு உருவானது. முதலில் உருவங்களை களிமண்ணினால் உருவாக்கி, அதை கணினியில் இணைத்து அதற்கு அசைவு கொடுத்து உருவான படம் இது. வூடி எனும் இதன் முதன்மைக் கதாபாத்திரத்துக்கு மட்டும் 723 கணிமண் பொம்மைகள் உருவாக்கப்பட்டன. எட்டு இலட்சம் மணி நேர மெஷின் உழைப்பு இந்தப் படத்திற்கு தேவைப்பட்டது. 30 மில்லியன் செலவில் எடுக்கப்பட்டு 375மில்லியன் டாலர்கள் சம்பாதித்துக் கொடுத்த படம் இது.

Image result for The fall of the nation

  1. முதல் “இரண்டாம் பாகம்” படம்

இப்போதெல்லாம் பார்ட் 2, பார்ட் 3 என படங்கள் வருவது சகஜம். இதன் பிதாமகன் எந்தத் திரைப்படம் என பார்த்தால் 1916ம் ஆண்டு வெளியான “த ஃபால் ஆஃப் எ நேஷன்” படத்தைத் தான் சொல்ல வேண்டும். முந்தைய ஆண்டு வெளியான, பர்த் ஆஃப் எ நேஷன் படத்தின் தொடர்ச்சியாய் அமைந்த கதை இது

தாமஸ் டிக்சன் இயக்கிய இந்தப் படம் பாக்ஸ் ஆபீஸில் பட்டையைக் கிளப்பி மிகப்பெரிய வெற்றியைப் பெற்றது. அப்போதே 10 மில்லியன் டாலர்கள் சம்பாதித்த படம் இது. அமெரிக்காவுக்கு எதிரான கதையம்சம் கொண்ட படம். எனினும் எல்லா அமெரிக்க விமர்சகங்களும் படத்தை வெகுவாகப் பாராட்டின. தொழில்நுட்ப உத்திகள் பலவற்றை பரிசோதித்த படம் இது. குளோஸப், ஜம்ஸ் ஷாட்ஸ், டீப் ஃபோக்கஸ் என பல விஷயங்கள் முதன் முதலாய் இதில் செய்து பார்க்கப் பட்டன.

Image result for el apostol

  1. உலகின் முதல் கார்ட்டூன் படம்

1917ம் ஆண்டு வெளியான எல் அப்போஸ்டல் திரைப்படம் தான் உலகின் முதல் கார்ட்டூன் திரைப்படம். ஒரு மணி நேரம் பத்து நிமிடம் ஓடக்கூடிய இந்த திரைப்படம் ஒரு வினாடிக்கு 14 பிரேம்கள் எனுமளவில் ஓடுமாறு உருவாக்கப்பட்ட‌ படம். மொத்தம் 58 ஆயிரம் பிரேம்கள் பயன்படுத்தப்பட்டன.

இந்தப் படத்தின் எந்த காப்பியும் இப்போது கைவசம் இல்லை என்பது கவலைக்குரிய விஷயம். ஆனால் வெளியான காலத்தில் பிரமிப்பாய் மக்களால் ஏற்றுக் கொள்ளப்பட்ட படம் இது.

Image result for First Special effect

  1. முதல் ஸ்பெஷல் எஃபக்ட்

கம்ப்யூட்டர் கிராபிக்ஸ் இல்லாத காலகட்டம். 1890களில் வெளியான ஒரு படம் அது. தாமஸ் எடிசன் உருவாக்கிய படம். ஸ்காட்லாந்து அரசி கொலை மேடையில் தலையை வைக்கிறார். ஒருவர் வாளை உயர்த்தி அவரது கழுத்தில் இறக்க தலை துண்டாகிறது. அந்த காலத்தில் அந்தக் காட்சியைப் பார்த்த மக்கள் வெலவெலத்தனர். அந்த நடிகை படத்துக்காக தன் உயிரைக் கொடுத்தார் என நினைத்தவர்கள் அனேகர்.

முதன் முதலாய் உருவான ஸ்பெஷல் எபக்ட் காட்சி அது தான். அதை எப்படி எடுத்தார்கள் ? நடிகை வருகிறார். தலையை கொலை மேடையில் வைக்கிறார். கொலைகாரர் வாளை ஓங்குகிறார். அப்படியே எல்லா நடிகர்களும் சிலை போல நிற்கிறார்கள். கேமரா நிறுத்தப்படுகிறது. இப்போது நடிகை மட்டும் விலக ஒரு பொம்மை அந்த இடத்தில் வைக்கப்படுகிறது. மீண்டும் கேமரா இயங்க, கொலைகாரர் கத்தியை இறக்க, நடிகையின் கழுத்து துண்டாகிறது !! அந்த காலத்தில் எல்லா ஸ்பெஷல் எஃபக்ட்களும் இப்படி டிரிக்ஸ் மூலமாகத் தான் உருவாயின என்பது குறிப்பிடத் தக்கது.

Image result for the haunted castle

  1. முதல் திகில், பேய் படம்

1896ம் ஆண்டு வெளியான “த ஹான்டட் கேசில்” திரைப்படம் தான் உலகின் முதல் திகில் படம் என நம்பப்படுகிறது. இப்போது பார்த்தால் காமெடியாகத் தோன்றும் இந்தப் படம் அந்தக் காலத்தில் விழிகளை வியக்க வைத்த படம். பாழடைந்த அரண்மனை ஒன்றில் திடீரென தோன்றும், உருவங்கள், பேய், வவ்வால் பறந்து வந்து மனிதனாவது என காட்சிகள் அமைந்திருந்தன.

வெட்டி, வெட்டி ஒட்டி எடுக்கப்பட்ட இந்தப் படம் அப்போது மிகப்பெரிய மாயாஜாலப் படம் போல காட்சியளித்ததில் வியப்பில்லை. ஜோர்ஜிஸ் மெலிஸ் இயக்கிய இந்தப் படம் தொலைந்து போனதாகவே நம்பப்பட்டது. அதிர்ஷட வசமாக இதன் ஒரு பிரதி நியூசிலாந்தில் 1988ல் கண்டெடுக்கப்பட்டது.

Image result for the sprinkler sprinkled

  1. முதல் காமெடி படம்

ஒரு குட்டிப் படம். 1895ம் ஆண்டு வெளியானது. ஒருவர் செடிக்கு தண்ணீர் ஊற்றுகிறார் ஒரு சிறுவன் பின்னால் வந்து குழாயை மிதிக்கிறான். தண்ணீர் நின்று விடுகிறது. தண்ணீர் ஊற்றுபவர் என்ன ஆச்சு என குழாயை உற்றுப் பார்க்கும் போது சிறுவன் காலை எடுக்கிறான், தண்ணீர் அவர் முகத்தில் பீய்ச்சி அடிக்கிறது. அவர் சிறுவனை விரட்டிப் பிடிக்கிறார். அடிக்கிறார். இவ்வளவு தான் படம்.

த ஸ்பிரிங்க்லர் ஸ்பிரிங்கில்ட் என பெயரிடப்பட்ட இந்தப் படம் தான் உலகின் முதல் காமெடி படம் என நம்பப்படுகிறது. லூமினர் சகோதரர்கள் இந்தப் படத்தை உருவாக்கினார்கள்.

Image result for roundhay garden first movie

  1. உலகின் முதல் படம்

 

உலகின் முதல் படம் எது என்பதில் மாறுபட்ட கருத்துகள் உண்டு. ஆனால் கின்னஸ் உலக சாதனை குறித்து வைத்திருக்கும் படம் 1888ம் ஆண்டு வெளியான ரவுன்டரி கார்டன் காட்சி தான். சில வினாடிகளே ஓடும் காட்சி மட்டுமே கிடைத்திருக்கிறது. ஒரு தோட்டத்தில் சிலர் நடப்பது தான் காட்சி.

லூயி லி பிரின்ஸ் இயக்கிய இந்தப் படம் மோஷன் கேமராவைக் கொண்டு படமாக்கப்பட்டது என்பது சிறப்பு. இதே இயக்குனர் இதற்கு முந்தைய வருடம் ஒரு மனிதன் நடக்கும் படத்தை இயக்கியிருந்தார். அதில் சில ப்ரேம்கள் மட்டுமே கிடைத்திருக்கின்றன. ஓரிரு வினாடிகள் அது ஓடுகிறது.