TOP 10 : வரலாற்றுச் சதிகள்.

 

Image result for john wilkes booth

இதெல்லாம் அரசியல்ல சகஜமப்பா என்பது சதி வேலைக்கு கன கட்சிதம். கூட இருப்பவர்களே குழி பறித்த கதைகள் வரலாற்றையே புரட்டிப் போடும் வலிமை படைத்தவை. நண்பனாய் இருந்து துரோகியானவர்கள், நம்பிக்கையானவர்களாய் நடமாடி நம்பிக்கை துரோகம் செய்தவர்கள், நாட்டையே சுருட்டி உலையில் போட்டவர்கள் என இவர்களுடைய கதைகள் மிரட்டலானவை. அப்படி நடந்த சதி வேலைகளில் ஒரு டாப் 10 லிஸ்ட்.  

  1. புரூட்டஸ்

யாராவது நம்பிக்கைத் துரோகம் செய்தால் “யூ டூ புரூட்டஸ்” என்று சொல்வோம். இந்த உலகப் புகழ் பெற்ற வாக்கியத்தைச் சொன்னவர் த கிரேட் ஜூலியஸ் சீசர். சாவதற்கு சில நிமிடங்களுக்கு முன் அவர் புரூட்டஸைப் பார்த்துச் சொன்ன வார்த்தைகள் இவை.

ஜூலியஸ் சீசரின் நெருங்கிய நண்பர் இந்த புரூட்டஸ். கி.மு 44ல் அவரும் அவருடன் சுமார் ஐம்பது பேருமாகச் சேர்ந்து ஜூலியஸ் சீசரைத் தாக்கிக் கொன்றார்கள். ரோம அரசில் ஜூலியஸ் சீசருக்கு எழுந்த அபரிபிதமான புகழ் தன்னை வளர விடாதோ எனும் பொறாமை தான் இந்த சதியின் ஆதாரம்.

யார் என்னை தாக்கினாலும் புரூட்டஸ் என்னோடு இருப்பான் எனும் ஜூலியஸ் சீசரின் நம்பிக்கைக்கு விழுந்த சாவுமணி அது. அந்த அதிர்ச்சி தான் அந்த வார்த்தைகளில் வெளிப்பட்டது.

  1. லீ ஹார்வி ஆஸ்வால்ட்  

யாருப்பா இவன் என பெயரைக் கேட்டால் குழம்புவோம். இவன் தான் அமெரிக்க ஜனாதிபதியான ஜான் எஃப் கென்னடியைக் கொன்றவன். 1963 நவம்பர் 22ல் இந்த கொலையை இவன் நிகழ்த்தினான்.

உலகிலேயே ஒரு கொலை அதிக சர்ச்சைகளுடன் ஓடுகிறதென்றால் அது கென்னடியின் மரணம் தான். இன்னும் அவருடைய கொலை குறித்த விவாதங்களும், சர்ச்சைகளும், சந்தேகங்களும் ஓயவில்லை. எட்டாவது மாடியில் இருந்து கொண்டு ஜஸ்ட் லைக் தேட் கென்னடியைச் சுட்டேன் என்றான் இவன். இன்னும் இவன் சொல்வது உண்மை என ஏற்றுக்கொள்ளாத மக்கள் எக்கச்சக்கம். எப்படியோ, கென்னடி கொல்லப்பட்டார் என்பது மட்டும் கசப்பான நிஜமாகிப் போனது.

  1. அந்திரே லுகோவாய்

ரஷ்யாவின் பாதுகாப்பு அதிகாரி அலெக்சாண்டர் வால்டரோவிட்ச் ( Alexander Valterovich ) ஐக் கொலை செய்தவர் இவர் தான். சரி, அதில் என்ன ஸ்பெஷல். ஒரு கொலை தானே என நினைக்கலாம். விஷயம் இருக்கிறது. அவர் கொல்லப்பட்டது போலோனியம் 210 எனும் விஷத்தினால். இது அணு விஷம் !

உலகிலேயே நியூக்ளியர் விஷத்தினால் ஒருவர் கொல்லப்படுவது இதுவே முறை. 2006 நவம்பர் 1ம் தியதி இவர் இறந்து போனார். அந்திரே இவருடன் அமர்ந்து குடித்த தேனீரில் இந்த விஷம் கலக்கப்பட்டிருந்ததாம். மூன்று முறை அலெக்ஸாண்டரைச் சந்தித்து, மூன்று முறையும் தந்திரமாய் விஷம் கொடுத்திருக்கிறார். அந்திரேவும்  சாதாரண ஆளில்லை. ரஷ்யாவின் முக்கிய அரசியல் புள்ளிகளில் ஒருவர் ! அரசியல்வாதியல்லவா “எல்லாம் வெளிநாட்டுச் சதி..”  என்று சொல்லிக்கொண்டிருக்கிறார்.

  1. பெலிக்ஸ் யுசோபோவ்  

ராஸ்புடின்( Grigori Rasputin) பற்றிக் கேள்விப்பட்டிருப்பீர்கள். 1869 ஜனவரி 22ல் ரஷ்யாவில் பிறந்தவர். இவரை மக்கள் கடவுளாகக் கொண்டாடினார்கள். இவரிடம் ஏதோ ஆன்மீக சக்தி இருப்பதாகவும், குணமளிக்கும் மேஜிகல் பவர் இருப்பதாகவும் பம்மினார்கள். இது போதாதா, உருவாகி விட்டது இவருக்கென்று ரசிகர் படையும், சீடர் படையும்.

ஆனால் ராஸ்புடின் ஒரு சின்ன தப்பு பண்ணி விட்டார். மன்னன் இரண்டாம் நிக்கோலஸின் மனைவியுடன் ரகசிய ஸ்னேகிதனாய் இருந்திருக்கிறார். விடுவார்களா ? இளவரசர் பெலிக்ஸ் யுசோபோவ் தன் சகாக்களுடன் வந்து ராஸ்புடினைத் தீர்த்துக் கட்டினார்.

இவர் கொல்லப்பட்ட விதம் தான் இதில் ஹைலைட். முதலில் அவருக்கு விஷம் வைத்திருக்கிறார்கள். ஆள் சாகவில்லை, பின் தலையில் சுட்டிருக்கிறார்கள் அப்படியும் சாகவில்லை. எஸ்கேப் ஆக முயன்றவரை மீண்டும் மூன்று முறை சுட்டிருக்கிறார்கள். ஊஹூம். அப்புறம் மீண்டும் அடித்து சட்னியாக்கிப் பார்த்திருக்கிறார்கள். ஆள் கண் விழித்து “நீங்க ரொம்ப மோசம்” என்றிருக்கிறார்.

நடுநடுங்கிப் போனவர்கள் அவரை மீண்டும் பின்னோ பின்னென்று பின்னி, கோணியில் கட்டி உறைந்த ஐஸ் நதியில் போட்டு விட்டார்கள். மூன்று நாளுக்குப் பின் பாடி மேலே வந்தது.

போஸ்ட்மார்ட்டம் ரிப்போர்ட் பார்த்தவர்கள் பதறினார்கள். காரணம் அவர் ஐஸ் நதியிலிருந்து வெளியே வர ரொம்பவே முயற்சி செய்தார் என்று கூறப்பட்டிருந்தது !

  1. ஜாண் வைக்ஸ் பூத்

ஒரு அரசியல் கொலை மூலம் உலகப் புகழ் பெற்றவர் இந்த ஜாண் வைக்ஸ் பூத். இவர் கொன்ற நபர் ஆபிரகாம் லிங்கன்.

ஏப்பிரல் 14 ம் நாள் 1865ம் ஆண்டு இந்தச் சதி நடந்தது. வாஷிங்டனிலுள்ள ஃபோர்ட் திரையரங்கில் வைத்து பின்னந்தலைக்கு மிக அருகே துப்பாக்கியை வைத்து சுட்டார். எல்லாம் அரசியல் காழ்ப்புணர்ச்சி தான் காரணம். இந்தச் சதியில் லிங்கனின் அரசவை உயரதிகாரிகள் பலருக்கும் தொடர்பு இருந்தது. ஒருவகையில் “எதிர்கட்சிகளின் சதி” என்பது இவர் விஷயத்தில் பொருந்தும்.

அமெரிக்காவின் ஜனாதிபதிகளில் படுகொலை செய்யப்பட்ட முதல் மனிதர் ஆபிரகாம் லிங்கன் தான்.

  1. பல்தாசர் ஹ்ஜெரால்ட்

உலக வரலாற்றில் முதன் முறையாக கைத்துப்பாக்கியைப் பயன்படுத்தி ஒரு தலைவரை போட்டுத் தள்ளிய நிகழ்வு இது தான். அமைதியான வில்லியஸ் என அறியப்படும் முதலாம் வில்லியம் தெற்கு பிரான்சில் டச் போராளிகளின் தலைவராக 1544ல் பொறுப்பேற்றவர். இவருடைய செயல்பாடுகள் நெதர்லாந்து ஸ்பெயின் நாடுகளை ஆண்ட மன்னன் இரண்டாம் பிலிப்புக்கு மிகப்பெரிய குடைச்சல். எப்படியாவது இவனை ஒழித்துக் கட்டவேண்டும் என முடிவெடுத்தார்.

என்னன்னவோ வேலைகள் செய்தும் எதுவும் வெற்றியடையவில்லை. அவனைக் கொல்பவருக்கு இருபத்தாயிரம் ரூபாய் தருவேன் என பரிசு அறிவித்தான். அந்தப் பரிசுப்பணத்துக்காக பலர் முயன்றார்கள். அப்போது அது மிகப்பெரிய பணம். வெற்றியடைந்தது ஜெரால்ட் தான். ரகசியமாக அவருடைய வீட்டு மாடிக்குச் சென்று, திடீரென அவருக்கு முன்னால் தோன்றி மூன்று முறை சுட்டு அவரை வீழ்த்தினான்.

  1. ஆல்பிரட் ரெட்

ஆல்பிரட் ரெட் ! முதலாம் உலகப் போர் காலத்தில் வாழ்ந்தவர். ஆஸ்திரிய நாட்டு உயரதிகாரியான இவர் ஒரு ரஷ்ய உளவாளி. யாருக்குமே கொஞ்சமும் சந்தேகம் வராதபடி இவருடைய வாழ்க்கை இருந்தது அதிசயம் தான். கூடவே பிரான்சுக்கும், இத்தாலிக்கும் கூட இரட்டை உளவாளியாய் வாழ்ந்தார் எனும் குற்றச்சாட்டும் இவர் மீது உண்டு.

ஆஸ்திரியாவின் போர் யுத்திகளையும், திட்டங்களையும் ரஷ்யாவுக்குக் கொடுத்து ஆஸ்திரியா நாட்டுக்கு மிகப்பெரிய சதி வலையாக இருந்தவர் இவர். பல நாடுகளுக்கு எதிரான ரகசியங்களை ரஷ்யாவுக்குக் கொடுத்து அந்த ரகசியங்களை விற்றதன் மூலம் ரஷ்யாவின் வலிமையை உணர்த்தியவர்.

ரஷ்யாவின் படை பலத்தைப் பற்றி தவறான தகவல்களைக் கொடுத்து ஆஸ்திரியப் படையை எதிரிகளின் கையில் சிக்க வைத்தது இவர் செய்த கொடுமைகளில் முதன்மையானது. இதன் மூலம் சுமார் ஐந்து இலட்சம் ஆஸ்திரிய வீரர்கள் கொல்லப்பட்டனர்.

வரலாற்றின் மிகப்பெரிய சதிகளில் இவரது சதி மிக முக்கியமானது. இவரது குட்டு வெளிப்பட்டபோது சட்டென தற்கொலை செய்து கொண்டு செத்துப் போனார்.

  1. ஜான் வால்கர்

அமெரிக்காவின் கடற்படை உயரதிகாரியாக பணியாற்றியவர் ஜான் வால்கர். அவர் ஒரு ரஷ்ய உளவாளி என்பது யாருக்குமே தெரியவில்லை. எல்லோருடைய கண்களிலும் மண்ணைத் தூவி மிக வெற்றிகரமான தலைவராக பிலிம் காட்டி வந்தார் இவர். 1968 முதல் 1985 வரையிலான காலத்தில் தான் இவருடைய உளவு வேலைகள் படு தீவிரமாய் இருந்தன. சுமார் பத்து இலட்சத்துக்கும் மேற்பட்ட ரகசிய தகவல்களை இவர் ரஷ்யாவுக்கு ஏற்றுமதி செய்து அமெரிக்காவை பலவீனப்படுத்தினார்.

1976ம் ஆண்டு வேலையிலிருந்து அவர் ரிட்டயர்ட் ஆகும்வரை யாருக்குமே அவருடைய விஷயம் தெரியவில்லை. அவரை போட்டுக் கொடுத்து புண்ணியம் கட்டிக்கொண்டது வேறு யாருமல்ல, அவருடைய சொந்த மனைவி. ரிட்டயர் ஆன கையோடு டைவர்ஸும் வாங்கிக் கொண்டார் வால்கர். கடுப்பாகிப் போன மனைவி இவரைப் பற்றிய விஷயங்களையெல்லாம் உளவுத் துறைக்குத் தெரிவித்தார்.

“டைவர்ஸ் ஆன டென்ஷன்ல அந்தம்மா உளறுது” என்று தான் முதலில் நினைத்தார்கள். இவர் மீது யாரும் சந்தேகப்படவில்லை. ஆனால் தோண்டத் தோண்ட விஷயங்கள் விஸ்வரூபமாய் வெளியே வந்தன. அமெரிக்க வரலாற்றிலேயே கிடுகிடுக்க வைத்த நிகழ்வாய் மாறிப் போனது !

  1. ஜேம்ஸ் அமிஸ்டாட் லஃபயேட்டே

கருப்பினத்தைச் சேர்ந்த இவர் ஒரு அமெரிக்க உளவாளி ! பிரிட்டனுக்கு எதிராக சதுரங்கக் காய்களை நகர்த்த இவர் சொன்ன தகவல்கள் தான் உதவின. அமெரிக்காவின் மிகப்பெரிய பலமாக 1780களில் இவர் இருந்தார். இதில் சுவாரஸ்யம் என்னவென்றால் இவரை ஒரு பிரிட்டிஷ் உளவாளியாக அமெரிக்கா சித்தரித்தது தான். அதை உண்மையென்று நம்பிய பிரிட்டிஷ் படைகள் இவரை தங்கள் வியூக உரையாடல்களில் கலந்து கொள்ள வைத்தன. தகவல்களை அள்ளி அள்ளிக் கொடுத்தன.

எல்லாவற்றையும் கேட்டு, குறிப்பெடுத்து அப்படியே அமெரிக்க உளவாளிகளிடம் கொடுத்து கன கட்சிதமாய்  நம்பிக்கை துரோகம் செய்தார். அது தானே உளவாளிகளின் வேலை ! அமெரிக்காவுக்கு பல வெற்றிகள் இதன் மூலம் கிடைத்தன.

உளவு வேலைகளெல்லாம் முடிந்தபின் போதுமடா சாமி என  விவசாயத்துக்குத் திரும்பி மிகப்பெரிய விவசாயி ஆனார். அரசு இவருக்கு வசதிகள் எல்லாம் செய்து கொடுத்தது !

  1. தியோடர் ஹால்

அமெரிக்காவின் முதலாவது மற்றும் இரண்டாவது அணு ஆயுதத்தைத் தயாரித்ததில் இவன் கை உண்டு. அதற்காக அமெரிக்கா இவனைக் கொண்டாடியது. யாருக்கும் தெரியாத ஒரு ரகசியப் பக்கம் இவனிடம் இருந்தது. இவன் ரஷ்ய அணு உளவாளி எனும் ரகசியம் தான் அது. ஜப்பானை நாசக் கோட்டையாக்கிய அணு ஆயுதத்தின் ரகசியத்தை அக்கு வேறு ஆணி வேறாய் சோவியத் உளவுத் துறைக்கு கொடுத்தான் இவன்.

தனது எழுபத்து நான்காவது வயதில் கேன்சர் நோயினால் இறந்து போனார். அமெரிக்கா மட்டுமே அணு ஆயுதம் வைத்திருப்பது உலகிற்கு ஆபத்து. உலகின் பல நாடுகளும் அதை வைத்திருக்க வேண்டும். அல்லது யாருமே வைத்திருக்கக் கூடாது. அந்த சிந்தனையில் தான் நான் அணு ஆயுத ரகசியத்தை ரஷ்யாவுக்குக் கொடுத்தேன் என்றார் இவர்.

Advertisements

TOP 10 : தொலைக்காட்சித் தொடர்கள்

Image result for the moment of truth series

உலக அளவில் தொலைக்காட்சி நிகழ்ச்சிகளெல்லாம் எப்படி இருக்கின்றன ? நம்ம ஊர் டிவி போல அழுகாச்சி தொடர்களாலும், இளமை ஆட்டங்களாலும் நிரம்பியிருக்கிறதா ? இல்லை ஏதேனும் புதுமை இருக்கிறதா ? சர்வதேச சானல்களை புரட்டி எடுத்ததில் சுவாரஸ்யமாய்க் கிடைத்த பத்து நிகழ்ச்சிகள் இவை.

  1. ஹாண்டிங்  

காஞ்ஜுரிங் போல சினிமா விஷயமல்ல இது. உண்மையிலேயே பேய்களைப் பார்த்தவர்களின் பதறடிக்கும் வாக்குமூலம். ” இரத்தத்தை உறைய வைக்கும், மயிற்கூச்செரிய வைக்கும்”  என்றெல்லாம் அடைமொழி கொடுக்கலாம் இந்த சீரியலுக்கு. பேய்களின் அட்டகாசம், பேய் ஓட்டுவது, பேயை வரவழைப்பது, காட்சி தெரிவது என திடுக் திடுக் நிமிடங்களைப் பதிவு செய்வது தான் இந்த நிகழ்ச்சியின் சிறப்பம்சம். கற்பனை கலக்காத அக்மார்க் உண்மைகளுக்கு மட்டுமே இதில் அனுமதி என்கின்றனர் நிகழ்ச்சியை நடத்துபவர்கள்.

பேய்களை நேரில் பார்த்தவர்கள் அந்த நிகழ்ச்சியை விளக்கும் போது அவர்களுடைய கண்களின் மின்னும் பேய் பயமே நிகழ்ச்சியின் ஹைலைட். அமெரிக்கா, கனடா, இங்கிலாந்து, அயர்லாந்து, தைவான் என உலகின் பல இடங்களிலும் பறந்து பறந்து நிகழ்ச்சி தயாராக்குவது இன்னொரு ஸ்பெஷல். நிஜமாய் பேய்களைப் பார்த்தவர்களின் காட்சி விவரணைகள் நமது முதுகெலும்பில் ஐஸ் நதியை ஓட வைக்கிறது !

  1. டெஸ்ட்ராய்ட் இன் செகண்ட்ஸ்

கொஞ்சம் கூட எதிர்பாக்கல, சட்டுன்னு நடந்து போச்சுஎன சொல்கிறோமல்லவா ? அந்த ஒன்லைன் தான் இந்த நிகழ்ச்சியின் மையம். ரன்வேயில் சாதாரணமாய் ஓடிக்கொண்டிருக்கும் விமானம் சட்டென தீப்பிடிக்கும். வேகமாய் போய்க்கொண்டிருக்கும் படகுகள் எதிர்பாராமல் மோதிச் சிதறும். ரேஸ் கார்கள் இரண்டு மோதி வெடிக்கும். அமைதியாக இருக்கும் இடத்தில் திடீரென வெடி குண்டு வெடிக்கும். இவையெல்லாம் இந்த நிகழ்ச்சியின் சில சாம்பிள்கள்.   

பார்வையாளனின் மனதில் அதிர்ச்சிக் கண்ணிவெடியை வெடிக்க வைத்து, நிகழ்ச்சியின் பின்னணியை விரிவாக அலசுவது இந்த நிகழ்ச்சி. கற்பனை, கிராபிக்ஸ் கலக்காத உண்மை சம்பவங்கள் மட்டுமே இதில் இடம்பெறும். இதன் குறையாத திரில்லுக்கு எக்கச்சக்கமாய் ரசிகர்கள். செம ஹிட் நிகழ்ச்சியாய் அமெரிக்காவில் சில ஆண்டுகளுக்கு முன் ஓடிக்கொண்டிருந்த இந்த நிகழ்ச்சியை மீண்டும் துவங்கலாமா என யோசித்துக் கொண்டிருக்கின்றனர்.  

  1. டர்ட்டி ஜாப்

தலைப்பை மறுபடியும் வாசிக்க வேண்டாம். உண்மை தான். இப்படியும் ஒரு தொலைக்காட்சி நிகழ்ச்சி இருக்குமா ? என வியக்க வைக்கிறது இந்த நிகழ்ச்சி. யாருமே செய்ய வெறுக்கும், கூச்சப்படும், முகம் சுழிக்கும் வேலைகள் தான் இந்த நிகழ்ச்சியின் கதா நாயகர்கள். நம்ம ஊர் உதாரணம் வேணும்னா சாக்கடை சுத்தம் செய்யறது என்று வெச்சுக்கலாம். வெறுமனே அந்த நிகழ்ச்சியைப் பற்றிமூக்கையும், கேமராவையும்பிடித்துக் கொண்டு பேசுவதல்ல இந்த ஷோ.

இந்த நிகழ்ச்சியை நடத்தும் மைக் ரோவே அந்த கடினமான வேலையில் குதித்து ஒரு நாள் வேலை செய்து அதன் சிரமங்களை சுவாரஸ்யமாய் விளக்குவதால் இந்த நிகழ்ச்சி படு பயங்கர ஹிட். பெரும்பாலும் இப்படிப்பட்ட அழுக்கான வேலை செய்பவர்கள் உற்சாகமாக, ஆனந்தமாக இருக்கிறார்கள். அழுக்கில்லாத வேலை செய்பவர்கள் தான் அழுது வடிகிறார்கள் என்பது இவர் தரும் தத்துவ பளிச் ! சுமார் ஏழு ஆண்டுகள் பட்டையைக் கிளப்பிய இந்த நிகழ்ச்சிக்கு ஒரு சின்ன பிரேக் விட்டிருக்கிறார்கள்.

  1. பிளைண்ட் டேட்

மேலை நாடுகளில் ஏறக்குறைய எல்லா சானல்களிலும் அரைக்கப்படும் ஒரு நிகழ்ச்சி டேட்டிங் ஷோ. நம்ம ஊர்ஜோடி நம்பர் 1” போல இத்தகைய டேட்டிங் ஷோக்களிலும் ஒரு ஜோடி வெற்றி பெறும் ! யூகேவிலுள்ள பிளைண்ட் டேட் ஷோ இதில் முக்கியமானது.  இந்த ஷோவின் சாராம்சம் இது தான். மூன்று பெண்கள் வருவார்கள். அவர்கள் டேட்டிங் செல்ல ஒரு  ஆணை தேர்வு செய்யவேண்டும். ஆளை நேரில் பார்க்க முடியாது, போனில் பேசி தான் தேர்ந்தெடுக்க வேண்டும்.

தேர்வு செய்தபின் நேரில் தரிசனம் தருவார் காதலன். “அடடாஇவனையா செலக்ட் பண்ணினேன்…” எனும் பெருமூச்சுகள் ஆரம்ப சுவாரஸ்யம். அப்புறமென்ன ஜோடிகள் டேட்டிங் செல்ல வேண்டும். அதைவெட்கம் கெட்டகேமரா விடாமல் பின் தொடர்ந்து படம் பிடிக்கும். இதன் ஆஸ்திரேலிய உதாரணம் பெர்பக்ட் மேட்ச் ஷோ. எப்படிப் பட்ட பெயரில் வந்தாலும் இதற்கென குறிப்பிட்ட ரசிகர்கள் இருந்து கொண்டே தான் இருக்கிறார்கள். உலகெங்கும் பல்வேறு பெயர்களில் வலம் வரும் இந்த நிகழ்ச்சி இளசுகளை வசீகரிக்கும் புதுமையும், காமெடியும் கலந்த நிகழ்ச்சி.

  1. இண்டிப்பெண்டண்ட் லென்ஸ்

வாங்க பழகலாம்என பார்வையாளர்களை வசீகரிக்கும் நிகழ்ச்சி இது. திறமையானவர்களுக்குப் பட்டுக் கம்பளம் விரிக்கும் நிகழ்ச்சிகளின் பட்டியலில் இந்த நிகழ்ச்சிக்கு முக்கிய இடம் கொடுக்கலாம். சொல்லப்போனால் இதில் நிகழ்ச்சியை  நடத்துவதே பார்வையாளர்கள் தான்.

அதாவது, பார்வையாளர்கள் எடுக்கும் சிறு சிறு வீடியோ பதிவுகளைக் கொண்டு தான் இந்த நிகழ்ச்சியே அமைக்கப்படுகிறது. கிளிப்பிங்ஸ் எப்படி வேண்டுமானாலும் இருக்கலாம். சில நிமிடங்கள் ஓடும் உங்கள் குழந்தையின் நகைச்சுவை சேட்டையாய் இருக்கலாம். உங்கள் செல்ல நாய்க்குட்டி செய்யும் அறிவு ஜீவித் தனங்களாக இருக்கலாம். எதேர்ச்சையாய் படம் பிடித்த எதிர்பாராத சில சுவாரஸ்ய வீடியோக்களாய் இருக்கலாம், அல்லது திட்டமிட்டே எடுத்த குறு நாடகங்களாகவும் இருக்கலாம்.   சிறந்த படங்களுக்குப் பரிசுகளும் உண்டு என்பது இதன் ஹிட் அம்சம்.

பார்வையாளர்களே இதில் ஹீரோக்கள் என்பதால் மக்களோடு எளிதில் இந்த நிகழ்ச்சி கலந்து விடுகிறது.

  1. ஜஸ்ட் மினிட்

ஒரு நிமிட நேரம் பேசவேண்டும். சொன்ன வார்த்தையைத் திரும்ப சொல்லக் கூடாது, தொடர்ச்சியாகப் பேச வேண்டும், சொல்ல வேண்டிய கருத்தை ஒட்டியே பேசவேண்டும். அட.. இது தான் தெரியுமே ! நம்ம ஊர் ரேடியோக்களில் வரும் நிகழ்ச்சி என சிலாகிக்கிறீர்களா ?. இந்த நிகழ்ச்சியின் முதல் சுவடு 1951ல் யூகேவில் ஆரம்பித்த ஒன் மினிட் பிளீஸ் எனும் நிகழ்ச்சி தான்.

அது பல்வேறு மாறுதல்களைக் கடந்து 1967ல்ஜஸ்ட் மினிட்என்றானது. கிட்டத்தட்ட இப்போதைய வெர்ஷன் அது ! இந்த நிகழ்ச்சி பல்வேறு நாடுகளில் பின்னர் காப்பியடிக்கப்பட்டது என்பதைச் சொல்லவும் வேண்டுமா ?. ஸ்வீடன் நாட்டில் இந்த நிகழ்ச்சியின் பெயர்பா மினூடென் ! “. இந்த நிகழ்ச்சி மக்களுக்குப் பழகப் பழக, சின்னச் சின்னதாய் ஒவ்வொரு நிபந்தனைகளை அதிகரித்து நிகழ்ச்சியை இன்னும் சுவாரஸ்யப்படுத்துகின்றனர்.

  1. மே டே

மேடே மேடே மேடேஎன்று மூன்று தடவை சொன்னால் ஏதோ பெரிய ஆபத்து என்று அர்த்தம். பெரும்பாலும் கப்பல், விமான தகவல் தொடர்பில் இந்த குறியீடு நடத்தப்படும். அந்த பெயரையே இந்த நிகழ்ச்சிக்கு சூட்டிவிட்டார்கள். காரணம், இந்த நிகழ்ச்சி அலசப் போவது அத்தகைய விஷயங்களைத் தான்.

குற்றம்….. !  நடந்தது என்ன?” ரேஞ்சுக்கு நடத்தப்படும் இன்வெஸ்டிகேஷன் ஷோ இது. சுமார் 60 நாடுகளில் இந்த நிகழ்ச்சி ஏதோ ஒரு வடிவில் ஒளிபரப்பாகிறது.

விமான விபத்துகள் குறித்த இன்வெஸ்டிகேஷன் தான் இதன் மையம். விபத்துக்கு முன், விபத்தின் போது, விபத்துக்குப் பின், என பல கட்டங்களாக நிகழ்ச்சி விரியும். பிளாக்பாக்ஸ் தேடுதல் போன்றவற்றை மிக விரிவாக சுவாரஸ்யங்களுடன் விளக்குவது இதன் ஹைலைட். உண்மை சம்பவங்களின் மர்மங்கள் அவிழ்வதில் இருக்கும் சுவாரஸ்யம் வலி மிகுந்தது. அது தான் இந்த நிகழ்ச்சியின் பலம்.

  1. ஒன் வே அவுட்

ஒன் வே அவுட் என்பது சிலிர்க்க வைக்கும் சம்பவங்கள் அடங்கிய நிகழ்ச்சி. “ஐயோ….” என பயத்தில் பார்வையாளர்களைக் கண் மூட வைப்பதே இதன் நோக்கம் !  இந்த நிகழ்ச்சியை நடத்திய ஜோனதன் குட்வின்ரிஸ்க் எடுப்பது எனக்கு ரஸ்க் சாப்பிடற மாதிரிஎன்கிறார். உடல் முழுதும் இரண்டு இலட்சம் தேனீக்களுடன், ஒரு சிறு பெட்டியில் அடைந்து கிடப்பார். கொஞ்சம் அசைந்தாலும் தேனீக்கள் ஜோனதனின் தேனை எடுத்துவிடும். அந்த பெட்டியை ஆடிக்கொண்டிருக்கும் வாஷின் மிஷினின் மேல் வைக்கச் சொல்வார். பார்வையாளர்களோ பதட்டத்தில் மிதப்பார்கள்.

ஒரு ஷோவில் ஒரு பெட்டிக்குள் அடைபட்டு, அந்த பெட்டியை மலை உச்சியிலிருந்து உருட்டி விடச் சொல்வார். நிமிடத்துக்கு 126 முறை உருண்டு வரும் பெட்டியிலிருந்து சிரித்துக் கொண்டே வெளியே வருவார்.  உடைந்து கிடக்கும் கண்ணாடிச் சில் குவியலில் செருப்பில்லாமல் நடப்பார், ஆழமில்லாத ஆற்றில் உயரத்திலிருந்து குதிப்பார் !  இந்த ஷோ நடக்கும் போதெல்லாம் விளம்பரதாரர்களுக்கு வேட்டை தான் ! இப்போதைக்கு இந்த நிகழ்ச்சி கொஞ்சம் ரெஸ்ட் எடுக்கிறது.

  1. மித் பஸ்டர்ஸ்

இதைத் தான் நாங்க காலங் காலமா கடைபிடிக்கிறோம்என பல விஷயங்கள் நம்மிடையே உண்டு.  அதில் பல விஷயங்கள் மூட நம்பிக்கைகள் தான் என்பது பகுத்தறிவாளர்களின் வாதம். இதைத் தான் மித் என்கிறோம். அந்த மித்தை உடைப்பது தான் இந்த நிகழ்ச்சி.

உலகெங்கும் படு வரவேற்பு பெற்ற சுவாரஸ்யமான நிகழ்ச்சி இந்த மித் பஸ்டர்ஸ். அமெரிக்கா துவங்கி மேலை நாடுகள் பலவற்றிலும் இந்த நிகழ்ச்சி நடத்தப்படுகிறது. மூட நம்பிக்கைகள், இண்டர்நெட்டில் உலவும் தில்லாலங்கடி கதைகள், போன்றவற்றின் உண்மைத் தன்மைகளை புரட்டிப் போடும் நிகழ்ச்சி இது. “அடஅப்படியா ?” என வியக்கவும், “அட.. இதையா நான் நம்பிட்டிருந்தேன்என வெட்கப்படவும் வைக்கும் ஷோ இது. மிகுந்த சுவாரஸ்யமான ஒரு மர்ம நாவல் போன்ற இந்த ஷோவுக்கு உலகெங்கும் நல்ல வரவேற்பு.  

  1. மொமண்ட் ஆஃப் ட்ரூத்

மொமண்ட் ஆஃப் ட்ரூத்ஒரு கேள்வி பதில் நிகழ்ச்சி. உலகெங்கும் பல விதங்களில் நடத்தப்படும் செம ஹிட் ஷோ இது! இருபத்து ஒரு கேள்விகள் கேட்கப்படும். அதற்கு கொஞ்சம் கூட கலப்படமில்லாத  “உண்மையான பதிலைச் சொல்ல வேண்டும். பொய் சொன்னால் கருவி காட்டிக் கொடுத்துவிடும். “கோடீஸ்வரன்நிகழ்ச்சி போல கடினமான கேள்விகள் ஏதும் இல்லை.  உங்களுக்கு சர்வ நிச்சயமாய் விடை தெரிந்த சிம்பிள் கேள்விகள் தான்.  !

ஆனால் அதைச் சொல்லி ஜாக்பாட் பரிசுத் தொகையான 5 இலட்சம் டாலர்களை வாங்க ஆளில்லை. காரணம் கேள்விகள் அத்தனை பர்சனல் ! “நேற்று நைட் விமலாவை தள்ளிட்டு கமலா தியேட்டருக்குப் போனியாஎனும் கேள்வி போல சிக்கலில் மாட்டி விடும் கேள்விகளும், “உங்க ஜட்டி கிழிஞ்சிருக்காஎன்பது போன்ற அவமானகரமான கேள்விகளும் இதில் அடக்கம் ! அடக்கடவுளே…  யாருக்கு வேணும் பரிசு ?

TOP 12 : வரலாற்று வில்லன்கள்.

Image result for Rajapaksa

வரலாற்றில் சில தலைவர்களும், சில மனிதர்களும் மாபெரும் வில்லன்களாக உருவெடுப்பதுண்டு. ஒரு குழுவுக்கு ஹீரோவாக இருப்பவர்கள், இன்னொரு குழுவுக்கு வில்லனாக மாறிவிடுகிறார்கள். இன்னும் சிலர் எல்லோருக்குமே வில்லன்கள் தான். இப்படிப்பட்ட வில்லன்களில் ஒரு டாப் 10 பார்வை இந்த வாரம்.

  1. இடி அமீன்

ரொம்பவே அராஜகம் செய்பவர்களுக்கு நாம் இடும் பட்டப் பெயர் இடி அமீன்!   1951ம் ஆண்டு உகாண்டாவின் குத்துச் சண்டைச் சாம்பியனானவர், 1960 வரை தொடர்ந்து சாம்பியனாகவே இருந்தார்.

1925ல் பிறந்த இவர், 1971 முதல் 1979 வரையிலான காலகட்டத்தில் உகாண்டா பிரதமராக இருந்தார். அடக்குமுறை, சர்வாதிகாரம், மனித உரிமை மீறல் என நீங்கள் அதை நினைக்கிறீர்களோ எதையும் விட்டு வைக்காமல் செய்தவர் இவர்.

இவர் குறைந்த பட்சம் ஒரு  5 இலட்சம் பேரையாவது கொன்றிருப்பார் என்பது பொதுவாக ஒத்துக் கொள்ளப்பட்டிருக்கிறது. இவர் மனிதர்களைத் தின்னும் அகோரி டைப் ஆசாமி. இவருடைய ஒரு மனைவியை இவரே தின்று விட்டார் என்றெல்லாம் திடுக் கதைகள் உலவுகின்றன.

வெகு சமீபத்தில் 2003ம் ஆண்டு சவுதி அரேபியாவில் வைத்து இவர் மரணமடைந்தார்,.  இடி அமீன் ஹிட்லரின் தீவிர ரசிகராம் !. ஜாடிக்கேத்த மூடி !

  1. இரண்டாம் லியோபோல்ட்

இருபதாம் நூற்றாண்டின் கொடுமையான கொலையாளிகளில் ஒருவர் இவர். தனது ஆட்சிக் காலத்தில் பத்து இலட்சத்துக்கும் மேற்பட்ட காங்கோலியன் இன மக்களைக் கொன்று குவித்தவர் இவர்.

அவருடைய தந்தை முதலாம் லியோபோல்ட் மண்டையைப் போட்டபின் 1865ல்  பெல்ஜியம் மன்னராகி தனது கடைசி காலம் வரை அதே நிலையில் வாழ்ந்தார். இங்கிலாந்தின் விக்டோரியா மகாராணியின் சொந்தக்காரன் என்பது கொசுறு செய்தி.

மனித உரிமை மீறல்கள் பற்றியெல்லாம் சற்றும் அலட்டிக் கொள்ளாத சுபாவம் இவருக்கு. மக்களுடைய கைகளையும் கால்களையும் வெட்டுவதை ஏதோ நகம் வெட்டுவது போலச் செய்தார். 1885க்கும் 1908 க்கும் இடையேயான இவரது காலத்தில் கொல்லப்பட்டவர்கள் சுமார் 10 இலட்சம் காங்கோலியன்கள் .

ஒருவழியாக, 1909 டிசம்பர் 17ம் தியதி இறந்து போனார். அப்பாடா !

  1. மாக்ஸ்மில்லன் ராபெஸ்பியர்

நாட்டுக்காக படுகொலை செய்வதெல்லாம் புண்ணியம் எனும் கொள்கையுடையவர். பல்லாயிரம் பேருடைய சாவுக்குக் காரணமாகி மனுக்குலத்தின் வில்லன்களில் ஒருவராக பார்க்கப்படுகிறார்.

1978 மேய் மாதம் 6ம் தியதி பிறந்தவர் மேக்ஸ்மில்லன் ராபெச்பியர்.  மன்னன் பதினாறாம் லூயியைக் கொல்லவேண்டும் எனும் கடுமையான பிரச்சாரத்தினால் இவருடைய பெயர் பிரபலமடைந்தது. தப்பி ஓட முயன்ற மன்னன் பிடிபட்டு பின்னர் சாவுக்கும் கையளிக்கப்பட்டான்.

அரசியல் வாழ்க்கைக்குள் நுழைந்த இவருடைய உண்மைக் குணத்தை வெளிச்சம் போட்டுக் காட்டியது பிரஞ்சுப் புரட்சி. புரட்சி முடிவுக்கு வந்த பத்து மாதங்களில் மட்டும் கொல்லப்பட்டவர்களின் எண்ணிக்கை 40,000 என்கிறது வரலாறு. இவருடைய தலைமையில் அமைந்த புரட்சிப் படையினரால் கொல்லப்பட்டவர்கள் இவர்கள்.

மன்னிப்பைத் தூக்கி தூர எறி, ஆயுதத்தை கைகளில் ஏந்து என்பது இவருடைய மாபெரும் முழக்கம். 1794ம் ஆண்டு ஜூலை 28 ம் தேதி கொல்லப்பட்டார்.

  1. மூன்றாம் விலாட்  

குரூரத்தின் உச்சமாய் விளங்கிய ரொமானியாவின் மூன்றாம் விலாட் டுக்கு டிராகுலா என்று பெயர் உண்டு. ரொமானியாவின் வாலாசியாவிலுள்ள மன்னர் இவர். 1431ல் பிறந்து எல்லா கொடுமைகளையும் செய்துவிட்டு 1476ல் உயிரையும் விட்டார்.

இவருடைய ஆட்சிக் காலத்தில் கொல்லப்பட்டவர்கள் நாற்பதாயிரம் முதல் ஒரு இலட்சம் பேர் வரை. எதிரிகளை சித்திரவதை செய்து ரசிக்கும் குரூரமான சைக்கோ மனம் இவருக்கு. கைகளையும் கால்களையும் கூர்மையில்லாத ஆயுதங்களால் வெட்டுவது, உயிருடன் தோலை உரித்து எறிவது, எரியும் நெருப்பில் எறிவது, தலையில் நீளமான ஆணிகளை அடிப்பது, இரண்டு கால்களையும் இரண்டு குதிரைகளில் கட்டி எதிரியைப் பிய்ப்பது, கொதிக்கும் எண்ணையில் போட்டு பொரிப்பது, கண்களை நோண்டி எடுப்பது என அத்தனை கொடுமைகளையும் செய்தார் இவர்.

கொல்வதற்காகவே ஏதேனும் புதுப் புது ஆயுதங்களையும், வழிமுறைகளையும் கண்டுபிடித்துக் கொண்டிருந்தார் இவர். பத்தாயிரம், முப்பதாயிரம் என இவன் கொத்துக் கொத்தாகக் கொன்று குவித்த வரலாறு குருதி வாசம் வீசுகிறது

ஒரு வழியாக 1976ல் துருக்கியருக்கு எதிரான போரில் இவர் கொல்லப்பட்டார்.

 

  1. அடால்ஃப் ஹிட்லர்

உலக வில்லன்களில் எல்லோருக்கும் தெரிந்தவர் ஹிட்லர். இவரைப் பற்றிச் சொல்ல எதுவுமே இல்லை எனுமளவுக்கு வரலாறு இவரை அலசிக் காயப் போட்டு விட்டது.

ஏறக்குறைய ஒன்றே முக்கால் கோடி பேருடைய சாவுக்குக் காரணமாய் இருக்கிறது ஹிட்லரின் பெயர். அதிலும் யூதர்களுக்குப் பிடிக்காத பெயர்களின் முதலிடம் ஹிட்லருக்குத் தான். ஹிட்லருடைய “ஹிட்” லிஸ்டில் எப்போதுமே யூதர்கள் உண்டு. இவர் கொன்ற யூதர்களின் எண்ணிக்கை குறைந்தபட்சம் அறுபது இலட்சம்.  

1889ம் ஆண்டு ஏப்ரல் 20ல் ஆஸ்திரியாவில் பிறந்த ஜெர்மன் அரசியல்வாதி ஹிட்லர்.. 1920ல் நாசி படையில் சேர்ந்து 1921ல் அதன் தலைவரானான். 1933 முதல் 1945 வரை ஜெர்மனியை ஆண்டார்.  

1945ம் ஆண்டு ஏப்ரல் 30ம் தியதி ஹிட்லர் தன் மனைவியுடன் தற்கொலை செய்து கொண்டு செத்துப் போனார். துப்பாக்கியால் சுட்டால் எங்கே செத்துப் போகமாட்டோமோ எனும் பயத்தில் வாயில் சயனைடைப் போட்டு, கூடவே துப்பாக்கியால் சுட்டுக் கொண்டும் செத்துப் போனார் என்கிறது இவருடைய வரலாறு.

  1. ஜோசப் ஸ்டாலின்

சிலருக்கு ஸ்டாலின் ஒரு ஹீரோ. பலருக்கு ஸ்டாலின் ஒரு வில்லன். இவர் ஹீரோ ஆகக் காரணம் உலகின் பின்னணியில் இருந்த ரஷ்யாவை முன்னணி நாடாகக் கொண்டு வந்த பெருமை இவருக்கு உண்டு. ஆனால் அதற்கு அவர் அளித்த விலை பல இலட்சம் அப்பாவிகளின் உயிர் என்பது தான் அவரை வில்லனாகவும் பார்க்க வைக்கிறது.  

ஸ்டாலினின் இளம்  வயது விருப்பம் சாமியாராய் போவது என்பது சுவாரஸ்யமான தகவல். 1922 முதல் 1953 வரை சோவியத் யூனியனின் கம்யூனிச கட்சியின் ஜெனரல் செக்கரட்டரி அவர் தான். 1924ம் ஆண்டு லெனின் மறைந்ததும் சோவியத் யூனியனின் தலைவரானார்.

இவருடைய காலத்தில் எதிரிகள் எனும் பெயரில் கொல்லப்பட்டவர்கள் பல இலட்சம் பேர். போலந்து மக்களை மட்டும் கணக்கில் கொண்டாலே சுமார் இரண்டரை இலட்சம் வரும் என்கிறது போலந்து நாட்டு வரலாற்றுக் குறிப்பு ஒன்று.

கொள்கைக்காகக் கொலை செய்வது தவறில்லை எனும் கொள்கை கொண்டவர் என ஸ்டாலினைக் குறித்த தகவல்கள் பன்முகம் கொண்டவை. 1953ம் ஆண்டு மார்ச் 5ம் தேதி தனது 74வது வயதில் இறந்தார்.

  1. ஹிரோகிடோ  

ஜப்பானின் மன்னனாக 1926ல் முடிசூட்டப்பட்ட இவருடைய பல முடிவுகள் உலக வரலாற்றிலிருந்து அழிக்க முடியாதவை. சீனாவுடனான போரைத் தீவிரமாக ஆதரித்தவர் இவர். இரண்டாம் உலகப்போருக்கு தீ மூட்டி விட்ட பியர்ல் ஹார்பர் தாக்குதலுக்கு அனுமதி வழங்கியவரும் இவர் தான். ஜப்பானில் அணுகுண்டு போடப்பட்ட உலகத் துயரத்துக்கு ஒருவகையில் இவரும் பொறுப்பாளி ! என இவரைக் குறித்த தகவல்கள் வரலாற்றுச் சிறப்பு மிக்கவை.

1937ம் ஆண்டு ஜப்பான் ராணுவ வீரர்கள் நடத்திய அட்டகாசம் இவரை வில்லாதி வில்லனாக்கியது. ஆறு வார காலங்கள் நீடித்த இந்த ராணுவக் கொடுமை  “ரேப் ஆஃப் நான்கிங்” என்று அழைக்கப்படுகிறது.

இராணுவ வீரர்கள் எல்லோரும் சாவி கொடுத்த வில்லன் ரோபோக்களாகிப் போனார்கள். கொலை, கொள்ளை, கற்பழிப்பு என எல்லா அட்டகாசங்களையும் ராணுவம் செய்தது. குழந்தைகள், பெண்கள் என குவியல் குவியலாக மக்கள் கொல்லப்பட்டனர். எப்படியும் ஒன்றரை இலட்சம் முதல் 3 இலட்சம் பேர் வரை இறந்திருக்கலாம் என சொல்லப்படுகிறது.

  1. போல் போட்

1928 ஆண்டு மேய் மாதம் கம்போடியத் தலைநகர் பக்கத்திலுள்ள ஒரு கிராமத்தில் பிறந்தார்.

போல் போட் 1953ல் கம்பூச்சியன் மக்கள் புரட்சி இயக்கத்தில் சேர்ந்தார். 1975ல் கம்போடியா போல் போட்டின் முழுமையான கட்டுப்பாட்டுக்குள் வந்தது.

அப்போது ஆரம்பித்தது கம்போடியர்களின் கஷ்ட காலம். . முந்தைய அரசு தொடர்பான பணியில் இருந்த அனைவருமே ஈவு இரக்கமின்றி படுகொலை செய்யப்பட்டனர். சுமார் பதினைந்து இலட்சம் மக்கள் பசியினாலும், நோயினாலும் செத்துப் போனார்கள்.

இவர் ஆரம்பித்த S- 21 எனும் சித்திரவதைக் கூடம் பஆண்கள், பெண்கள், குழந்தைகள் என பாகுபாடின்றி சுமார் 20000 பேரை சித்திரவதை செய்து கொலை செய்தது  

இப்படி கொடுமையின் உச்சமாய் இருந்த போல் போட் 1998ல் உயிரிழந்தார்.

9 ராஜபக்ஷே

தீவிரவாத ஒழிப்பு என ராஜபக்ஷே பெயரிட்டழைக்கும் போரை, இன அழிப்பு என தமிழினம் அழைக்கிறது. இலட்சக்கணக்கான தமிழர்களை ரசாயன ஆயுதங்களால் கொன்று குவித்ததாகவும், வெள்ளைக் கொடி காட்டி வந்தவர்களை போர் விதிகளை மீறி கொன்று குவித்ததாகவும், சின்னக் குழந்தைகளையும் பெண்களையும் கொன்று குவித்ததாகவும் இவர் மீது சர்வதேச மன்றத்தில் குற்றச்சாட்டுகள் ஏராளம்.

இவருடைய போர்க்குற்றங்களை நிரூபிக்கும் வீடியோக்கள் சர்வதேச அரங்கிலும், உலகத் தொலைக்காட்சிகளிலும் மிகப்பெரிய அதிர்வலைகளை ஏற்படுத்தியவை. இன்றும் தமிழர்கள் மீது விஷ ஊசி உட்பட பல்வேறு வன்முறைகள் நிகழ்வதாய் குற்றச்சாட்டுகள் எழுகின்றன. சமீபகாலத்தில் உலக அரங்கில் நிகழ்ந்த மாபெரும் படுகொலை இது என்பது குறிப்பிடத்தக்கது.

  1. டோஜோ ஹிடேகி

கொடுங்கோலன் எனும் பட்டியலில் இவரது பெயருக்கு எப்போதுமே டாப் லிஸ்டில் இடம் உண்டு. 1884ல் பிறந்தவர் இவர். ஜப்பானில் ராணுவ ஜெனரலாக பதவயேற்றபின் இவர் சொல்வதெல்லாம் தான் சட்டமானது. பெயரளவுக்கு ராணுவ ஜெனரல் என்றாலும் ஒட்டு மொத்த நாட்டின் கட்டுப்பாடே இவரிடம் தான் இருந்தது.

பிரதமர், அத்தனை அமைச்சரவைகள் எல்லாமே இவருடைய சொற்படி ஆடும் இடங்களாயின. நாஸிகளோடு தொடர்பு வைத்திருந்தவர். ஹிட்லரின் கீழ் உலகமே அடிபணியும் எனும் கனவு அவருக்கு இருந்தது. ஜப்பானுக்கு வெளியே இருந்த ஆசிய நாடுகளோடு இவர் செய்த தேவையற்ற யுத்தங்களில் இறந்து போனவர்கள் சுமார் 50 இலட்சம் !

  1. இரண்டாம் நிக்கோலஸ்

ரஷ்யாவின் கடைசி மன்னர் இவர் தான். 1868ம் ஆண்டு பிறந்த இவர், 1894 முதல் 1917 வரை மன்னராக இருந்தார். இவருடைய செல்லப்பெயரே “பிளடி நிக்கோலஸ்” என்பதை வைத்து இவருடைய குணத்தைப் புரிந்து கொள்ளலாம். வன்முறையின் உச்சகட்டமானவர். உயிர்கள் இவருக்கு கிள்ளுக் கீரைகள் போல.

அரசியலில் தனக்கு எதிராய் முளைப்பவர்கள் யாராய் இருந்தாலும் அவர்களை கிள்ளி எறிவதில் இவருடைய கொடூரமும் ராஜ தந்திரமும் வெளிப்படும். சுமார் 33 இலட்சம் ரஷ்யர்களுடைய மரணத்துக்கு இவருடைய தவறான அணுகுமுறைகளே காரணம் என வரலாறு இவரை குற்றம்சாட்டுகிறது.

  1. ஹோ சி மின்.

வடக்கு வியட்னாமின் ஜனாதிபதியாக இருந்தவர். வன்முறையினாலும், மக்களிடையே அச்சத்தை உருவாக்கியதாலும் அவர் அந்த பதவியை அடைந்தார் என்கிறது வரலாறு. நாட்டை சரிசெய்கிறேன் என இவர் செய்த வேலைகளில் கொல்லப்பட்டவர்கள் சுமார் ஒரு இலட்சத்துக்கும் மேல். இதன் விளைவாக பட்டினியினால் வாடி வதங்கியவர்கள் பத்து இலட்சத்துக்கும் மேல்.

1965ம் ஆண்டு உடல்நலக் குறைவு காரணமாக பதவியிலிருந்து இறங்கினார். 1969ம் ஆண்டு மரணமடைந்தார். அரசியல்வாதி என்பது இவருடைய ஒரு முகம் தான். எழுத்தாளர், பத்திரிகையாளர், கவிஞர் என இவருக்கு பல முகம் உண்டு.

TOP 10 : வித்தியாசமான விலங்குகள்

Image result for frill neck lizard

இந்த உலகம் ஒரு அதிசயப் புதையல். உயிர்களின் புதையல் என்று கூடச் சொல்லலாம். இன்னும் அறியப்படாத கோடிக்கணக்கான விலங்குகளும், நீர்வாழ் உயிரினங்களும் பூமியில் நிச்சயம் உண்டு. கண்டுபிடிக்கப்பட்டவற்றில் வியக்க வைக்கும் புதுமையான பத்து விலங்குகள் இந்த வாரம்.

1
ஹிஸ்பேனியோலன் ஸொலினொடன்

ஹிஸ்பேனியோலா எனும் தீவிலிருந்து கண்டுபிடிக்கப் பட்டதால் இதற்கு இப்படி ஒரு பெயர். பார்ப்பதற்கு எலி போல சாதுவாக இருக்கும். மூக்கு குட்டி தும்பிக்கை போல நீண்டிருக்கும். விரல்கள் கொஞ்சம் வித்தியாசமாய் பறவையின் விரல்களைப் போலிருக்கும். இதன் புலன்களெல்லாம் படு ஷார்ப். கேட்பது, முகர்வதிலெல்லாம் எக்ஸ்பர்ட்.
நன்றாக வளர்ந்தால் இது இரண்டரை அடி நீளம் வரை இருக்கும்.

கொஞ்சம் கொஞ்சம் நிற வேறுபாடு இருந்தாலும், பெரும்பாலும் இது பிரவுன் நிறத்தில் தான் காணப்படுகிறது. அமைதியாய் இருக்கிறதே என்று அருகில் போனால் லபக் என கடித்து விடும். கடித்தால் கடிக்கட்டும் என விட்டு விடவும் முடியாது, காரணம் இதன் பற்களில் இருப்பது கொடிய விஷம் ! இப்போதைக்கு ஹெய்தியிலும், கியூபாவிலும் மட்டும் தான் காணக் கிடைக்கிறது, அதுவும் படு அபூர்வமாக.
2.
கிவா கிர்சுடா

பார்ப்பதற்கு ஹோட்டல்களில் பொரித்து வைத்திருக்கும் லாப்ஸ்டர் போல இருந்தாலும் இது லாப்ஸ்டர் கிடையாது. 2005ம் ஆண்டு கலிபோர்னியாவிலுள்ள ஆராய்ச்சியாளர்களின் கண்ணில் பட்டது இது. பசிபிக் கடலில் சுமார் 2200 மீட்டர் ஆழத்தில் நீந்திக் கொண்டிருந்தது !. அதுவரை இப்படி ஒரு உயிரி இருப்பதே யாருக்கும் தெரியவில்லை.

இதன் நீளம் சுமார் பதினைந்து செண்டீ மீட்டர். உடலெங்கும் பளிச் நிறத்தில் செம்மரியாடு போல அலை பாய்கிறது ரோமம் . இந்த ரோமம் தண்ணீரிலுள்ள விஷத் தன்மை யிலிருந்து இதன் உடலைப் பாதுகாக்க இயற்கை அளித்திருக்கும் வரப்பிரசாதம் என்கின்றனர் விஞ்ஞானிகள். நண்டு வகைகளோடும், லாப்ஸ்டர் வகைகளோடும் இதற்கு கொஞ்சம் தொடர்பு உண்டு என்பது விஞ்ஞானிகளின் கருத்து. இந்த உயிரியைப் பற்றிய ஆய்வுகள் தொடர்ந்து கொண்டிருக்கின்றன.

3

யர்போவா

ஜெர்போவா என வாசிக்கத் தூண்டும் இந்த விலங்கின் பெயர் ஒரு ஒரு அரேபிய வார்த்தை. இதன் சரியான எபிரேய உச்சரிப்பு யர்போவா ! யர்போவாவின் ஸ்பெஷாலிட்டியே அதன் காதுகள் தான். யர்போவா மிக மிக அரிய வகை விலங்கு. இன்னும் எத்தனை காலம் இதன் வாழ்க்கை பூமியில் என்பது மிகப்பெரிய கேள்விக்குறியே. மங்கோலிய, சீன , ஆப்பிரிக்க வறண்ட பகுதிகளில் அவ்வப்போது தென்படுகின்றன.

நீளமான வால், நீண்ட பின்னங்கால்கள், என வியப்பூட்டுகிறது இந்த விலங்கு. நடக்க முன்னங்கால்களை அதிகம் பயன்படுத்தாமல், கங்காருவைப் போல தாவித் தாவி ஓடுவது இதன் சிறப்பு. யாராவது துரத்தினால் இது மின்னல் வேகத்தில் ஓடும். மணிக்கு 24 கிலோ மீட்டர் வேகத்தில் இது பாய்ந்து போகும். அதிக சூடான பாலை நிலங்கள் தான் இதன் வசிப்பிடங்கள்.

காது வெறும் காட்சிக்கானதல்ல, அதற்கு மிகக் கூர்மையான கேட்கும் திறனும் உண்டு. எதிரி எத்தனை தொலைவில் இருந்தாலும் ஒரு மெல்லிய சத்தத்தைக் கூட கேட்டு மறைந்து விடும். அதனால் தான் இதைப் பார்ப்பதே மிகக் கடினமாய் இருக்கிறது. இதன் வாழ்நாட்கள் சுமார் 6 ஆண்டுகள்.

4

ஹே..ஹே..

கூப்பிடுவதற்கு வசதியான பெயர் இதற்கு ! ஹே..ஹே, ஐ…ஐ…. , ஆய்ய்ய், ஆய்ய்ய்ய் என வசதிப்படி அழைக்கிறார்கள் இதை. பார்வைக்கு சாத்தானின் மினியேச்சர் போல இருக்கும் இந்த விலங்கு உண்மையில் பரம‌ சாது. மரங்கொத்திக்கும் இதற்கும் நிறைய ஒற்றுமை உண்டு. இரண்டுமே உணவுக்காக மரப்பட்டைகளையே நாடுகிறது. மரங்கொத்தி அலகினால் மரத்தைக் கொத்தித் துளை உண்டாக்கி புழு பிடிக்கும். இது பற்களினால் மரத்தைக் கடித்து துளை உண்டாக்கி விரல்களால் கிளறி பூச்சி பிடிக்கும்.

மெடகாஸ்கர் பகுதியில் “ஹே..ஹே” என்றால் “எனக்குத் தெரியாது” என்று அர்த்தமாம். இதோட பெயர் என்னன்னு தெரியாதவங்க இந்தப் பெயரை இதற்குப் போட்டு விட்டார்கள். இது ராத்திரியெல்லாம் கொட்டக் கொட்ட நைட் ஷிப்ட் பார்த்து விட்டு பகல் முழுதும் குறட்டை விட்டுத் தூங்கும். இந்த உயிரினம் வேகமாக அழிந்து கொண்டு வரும் உயிரினம் என அறிவிக்கப்பட்டுள்ளது.

5 சாய்கா

குண்டு குண்டாக செம வெயிட்டாக இருக்கும் விலங்கு இது. மானைப் போல இருந்தாலும் இதன் தலையும், மூக்கும், கொம்புகளும் படு பயங்கர வித்தியாசம். வெயில் காலத்தில் மண்ணுக்குள் தனது மூக்கை அடிக்கடி புதைத்து வைத்து குளிர் காயும் ! குளிர் காலத்தில் ஹாயாக காற்றிலிருந்தே வெப்பம் எடுக்கும் ! அழகியல் விதிப்படி சாய்காவிலும் பெண்களுக்கு மட்டும் தான் கொம்பு.

இதன் கொம்புக்கு மகிமை, மருத்துவம் என்றெல்லாம் கதை விட்டு “மண்ணுளிப் பாம்பு” போல சகட்டு மேனிக்கு தேடித் தேடிக் கொல்கிறார்களாம். இது தவிர அதனுடைய தோல், இறைச்சி போன்றவையும் வேட்டைக்குக் காரணமாகிவிடுகின்றன. மங்கோலியா, ரஷ்யா, கஸகஸ்தான் போன்ற நாடுகளின் சில பகுதிகளில் இன்னும் சாகாமல் வாழ்கிறது சாய்கா. படு வேகமாக அழிந்து வருகின்ற உயிரினங்களின் பட்டியலில் இந்த விலங்கும் இருக்கிறது.

6. ஸ்லெண்டர் லாரிஸ்

இது நம்ம ஊர் விலங்கு. இந்திய இலங்கை சதுப்பு நிலக் காடுகளில் காணப்படுகிறது. அப்படியே இலங்கையிலும் இந்த விலங்கினம் உண்டு. அதைத் தாண்டி உலகின் மற்ற பாகங்களில் இது காணப்படுவதில்லை. இந்த விலங்கு பக்கத்தில் வந்தால் கூட அதைத் தேடித்தான் கண்டு பிடிக்க வேண்டும். அந்த அளவுக்கு தம்மாத்துண்டு சைஸ் விலங்கு இது.
பகலில் தூங்கி விட்டு, இரவில் குழுவினரோடு ஜாலியாக சுற்றித் திரியும் விலங்கினம் இது. வருடத்துக்கு ஒரு முறை தான் குட்டியிடும், பெரும்பாலும் இரட்டைக் குட்டிகளை இடும் என்பது சுவாரஸ்யமானது. அழிந்து வரும் விலங்கினங்களில் ஒன்று. இதன் இருப்பு பூமியிலிருந்து வெகு விரைவிலேயே துடைக்கப்பட்டு விடலாம் என்பது ஆராய்ச்சியாளர்களின் அச்சம்.

7 கிட்னா

விலங்குகள் குட்டி போட்டுப் பாலூட்டும்… வெயிட் வெயிட்… இந்த விலங்கு அந்த வகையில் வராது. இது முட்டையிட்டுக் குஞ்சுபொரிக்கும் வித்தியாசமான விலங்கு. மூக்கு நீண்ட இந்த விலங்கின் பெயர் கிட்னா. எறும்பு தின்னிக்கும் இதற்கும் ஒரு ஒற்றுமை உண்டு என்றால் சரியாகச் சொல்லி விடுவீர்கள். அதே தான் ! இதுவும் எறும்புகளைத் தின்று உயிர் வாழும் விலங்கு தான் ! முள்ளம் பன்றி முடி போல இதன் மேனியெங்கும் குத்தும் முடிகள் நிரம்பியிருக்கும். ஆனால் முள்ளம்பன்றியல்ல.

பல மில்லியன் ஆண்டுகளுக்கு முன்பே இதன் மூதாதையர் இருந்திருக்கின்றனர் என்பது ஸ்பெஷல் செய்தி. இப்போது ஜெனீவா, மற்றும் ஆஸ்திரேலியப் பகுதிகளில் காணப்படுகின்றன. பாதி பாம்பு, பாதி பெண் என ஒரு கிரேக்கக் கடவுள் உண்டு. அதன் பெயரான தின்று வாழும் என்றாலும் இது நமக்குத் தெரிந்த எறும்புத் தின்னி அல்ல ! வித்தியாசமான விலங்குகளின் பட்டியலில் விஞ்ஞானிகளின் பேவரிட் விலங்குகளில் இதுவும் ஒன்று.

8. டார்சியர்

சுமார் நாப்பத்தைந்து மில்லியன் வருடங்களாக இந்த விலங்கின் நீட்சி இருப்பதாய் சொல்கிறது விஞ்ஞானம். ரொம்பவே ஆச்சரியம் தான். பார்த்தால் ரொம்பக் குட்டியாய், புயல்காற்றுக்கே அழியும் இனம் போல தோன்றுகிறது. டார்சியரின் ஸ்பெஷலே அந்த கண்கள் தான். இன்னும் சொல்லப் போனால் அதன் கண்ணும் மூளையும் ஒரே அளவு தான். ஒரு காலத்தில் உலகெங்கும் பரவியிருந்த இந்த விலங்கு இப்போது ஆசியாவின் தென் மேற்குப் பகுதிகளில் காணப்படுகின்றன. அதிலும் குறிப்பாக இந்தோனேஷியா, மலேஷியா மற்றும் பிலிப்பைன்ஸ் காட்டுப்பகுதிகள் தான் இதன் வாழ்விடம்.

இருப்பதே தெரியாமல் பம்மி இருந்து இரையைத் தாவிப் பிடிப்பது தான் இதன் வேலை. ஏதேனும் பூச்சியைக் கண்டால் தாவிப் போய் அதன் மீது விழுந்து அதை அமுக்கும். அப்புறம் அதைச் சாப்பிடும். சமயத்தில் இது பறவைகள், பாம்புகள், பல்லிகளைக் கூட கபளீகரம் செய்து விடும். அதற்கு உறுதுணையாக இருப்பது இதன் நீளமான முன்கால்கள் தான். இந்த விலங்கின் உடலளவு வெறும் பத்து, பதினைந்து சென்டீ மீட்டர் நீளம் தான்.

9 பிரில் கழுத்து ஓணான்

இதற்கான பெயர்க்காரணத்தை நான் சொல்லாமலேயே புரிந்து கொள்வீர்கள். கழுத்தைச் சுற்றி பிரில் இருப்பதால் இதற்கு இந்தப் பெயர் வந்தது. ஆஸ்திரேலியாவில் இதை பை-சைக்கிள் லிசார்ட் என்று அழைக்கிறார்கள். யாரையாவது பயமுறுத்த வேண்டுமென்றால் சட்டென கழுத்தைச் சிலிர்க்கிறது. உடனே சிறகு சட்டென விரிய எதிரே இருக்கும் எதிரிகள் எஸ்கேப். ஆஸ்திரேலியாவிலும் ஜெனீவாவின் சில பகுதிகளிலும் இந்த ஓணான் காணப்படுகிறது.

சுமார் மூன்று அடி நீளம் வரைக்கும் வளர்ந்து மிரட்டும் அளவில் இருப்பது இதன் பலம். மரத்தோடு ஒட்டிக் கொண்டு ஒரு மரக்கிளையைப் போலவே இருந்து இரையைப் பிடிக்கும். உற்றுப் பார்க்காதவரை இப்படி ஒரு ஓணான் ஒட்டிக் கொண்டிருப்பதே தெரியாது.

10. புரோபோசிஸ் குரங்கு

கொஞ்சம் சப்பாத்தி மாவை அதிகமா பெசஞ்சு தொங்க விட்டா மாதிரி ஒரு மூக்கு. இந்த மூக்கை அசிங்கமா நினைக்காதீங்க. இந்த குரங்கு வகையில் இந்த மூக்கு தான் ஹைலைட்டே. மூக்கு பெருசா இருக்கும் ஆண் குரங்குகளின் பின்னால் அசிங்கமா இருக்கேன்னு நினைக்காதீங்க. சப்பாத்தி மாவு போல இருக்கும் இந்த மூக்கு தான் ஹைலைட்டே. எவ்வளவுக்கு பெரிய மூக்கு இருக்கோ, அந்த அளவுக்கு ஐயாவுக்கு “லேடீஸ்” மத்தியில செல்வாக்கு அதிகமாம் ! தெற்காசியத் தீவான பொரீனோ, இந்தோனேஷியா உட்பட உலகின் சில‌ நாடுகளில் இவை காணப்படுகின்றன.

இரண்டரை அடி நீளமும், சுமார் 10 கிலோ எடையும் உள்ள இந்த குரங்கு குடும்பம் குடும்பமாக வாழும். மனிதர்களைப் போன்ற பல இயல்புகள் இந்த குரங்குகளிடமும் உண்டு. படு வேகமாக இந்த குரங்கு இனம் அழிந்து கொண்டு வருவது தான் வேதனையான விஷயம்

TOP 10 : ஏலியன் கதைகள்

Image result for Lake Baikal—Scene Of An Underwater Aliens

உலகெங்கும் ஏலியன்கள் பற்றிய பேச்சு மக்களிடையே சிலிர்ப்பாகவும், வியப்பாகவும் இருந்து வருகிறது. விஞ்ஞானிகள் ஏலியன் தேடுதல் வேட்டையை தொடர்ந்து கொண்டே இருக்கின்றனர். ஹாலிவுட் இயக்குனர்களைப் பொறுத்தவரை அவர்களுடைய கல்லாப்பெட்டியை நிரப்பும் ஒரு ஆபத்பாந்தவனாக எப்போதுமே ஏலியன்கள் இருக்கின்றனர். ஏலியன்கள் பற்றிய தகவல்களில் சுவையான பத்து செய்திகளை இங்கே பார்க்கலாம்.

1. லேக் பாய்க்கல் : கடல் ஏலியன்ஸ்

( Lake Baikal—Scene Of An Underwate Aliens )

சைபீரியாவிலுள்ள பாய்க்கல் எனும் ஏரி மிகப்பிரசித்தம். மிகப்பெரிய ஏரியான இது உலகிலேயே மிகவும் ஆழமானது. இந்த ஏரியில் தண்ணீருக்கு அடியில் ஏலியன் உண்டு என்பது தான் இந்த ஏரியின் பரபரப்புக்குக் காரணம்.

இந்த ஏரியின் மேல் மிகப்பெரிய பறக்கும் தட்டைப் பார்த்தேன் என்று ஒன்றல்ல இரண்டல்ல நூற்றுக்கணக்கானவர்கள் இது வரை சொல்லியிருக்கின்றனர். அதுமட்டுமல்லாமல் ஒல்லியான சின்னச் சின்ன ஏலியன் உருவங்கள் இந்த பறக்கும் தட்டிலிருந்து குதித்து தண்ணீருக்குள் பாய்ந்ததைப் பார்த்தவர்களும் உண்டு.

இந்த தண்ணீருக்கு அடியிலிருந்து சரேலெனக் கிளம்பிய ஒரு பறக்கும் தட்டு மின்னலென வானில் பாய்ந்து போனதாக பதட்டத்துடன் குறிப்பிட்டார், வால்டிமர் அஸாசா எனும் சோவியத் விமானப் படை அதிகாரி ஒருவர். அத்துடன் தீரவில்லை கதை.

இங்கே டைவ் அடித்த வீரர்கள் சிலர் கடலுக்கு அடியில் நவீன மூச்சுக் கருவிகளுடன் சில ஏலியன்கள் சுற்றியதைப் பார்த்து கதிகலங்கிப் போயினர். அந்த ஏலியன்களைப் பிடிக்க பின்னர் முயன்றபோது அவர்கள் கதிர்வீச்சு போன்ற ஆயுதத்தால் சில வீரர்களை அழித்ததும் நடந்தது.

2. ஏலியன் உறவு

பிரேசில் நாட்டில் ஆன்டோனியோ விலாஸ் எனும் ஒரு விவசாயி இருந்தார். தொடர்ச்சியாக சில நாட்கள் வானில் ஒரு பிரகாசமான வெள்ளை ஒளியைப் பார்த்தார். இது நடந்தது 1950ம் ஆண்டு, அப்போது அவருக்கு வயது 23. ஒருநாள் அதிகாலை ஒருமணி அளவில் அவர் அவருடைய பைக்கில் வந்து கொண்டிருந்தபோது ஏலியன்களின் வாகனம் முன்னால் வந்து நின்றது.

தப்பி ஓட நினைத்தவரின் முயற்சிகள் பலிக்கவில்லை. அவரைத் தூக்கிக் கொண்டு முன்னால் நின்ற பறக்கும் தட்டில் போட்டார்கள். அங்கே பல ஏலியன்கள் கூடி இவரை வலுக்கட்டாயமாய் அமர்த்தி இரத்த சாம்பிள்களை எடுத்தார்கள்.

பிறகு அவர் ஒரு அறையில் அடைக்கப்பட்டார். அங்கே அரை மயக்க நிலையில் அவர் அவர் கிடந்தபோது ஒரு ஏலியன் பெண்மணி அவருடன் உறவு கொண்டார். அந்த பறக்கும் தட்டிலிருந்த ஒரு சின்ன கருவியை அவர் திருட்டுத் தனமாக எடுத்துக் கொண்டு வர விரும்பினார். ஆனால் அவரை அவர்கள் தூக்கி வெளியே எறிந்தனர்.

நம்பவே முடியாத இந்த கதை ஏலியன் வரலாற்றுப் பதிவுகளில் கவனமாய்க் குறித்து வைக்கப்பட்டுள்ளது.

3. கண்காணிக்கு ஏலியன் கோட்டை

கான்ஸ்பரஸி தியரி என ஆங்கிலத்தில் அழைக்கப்படும் குறிப்புகள் மிகவும் பிரபலம். அதில் ஒன்று இது. நமது பூமிக்கு மேலே ஒரு மிகப்பெரிய அசுரத்தனமான ஏலியன் விண்கலம் ஒன்று உண்டு. அது பூமியை கண நேரமும் கண்காணித்துக் கொண்டே இருக்கிறது.

சுமார் 13 ஆயிரம் ஆண்டுகளாக இந்த விண்கலம் அங்கேயே இருக்கிறது. பூமியோடு தொடர்பு கொள்வதும், தொடர்பை விலக்கிக் கொள்வதுமாய் இருக்கிறது. இது நினைத்தால் கண நேரத்தில் பூமியோடு போரிட்டு அழிக்க முடியும். என்பது தான் அந்த தியரி.

1899ம் ஆண்டு நிக்கோலா டெஸ்லா எனும் வானியல் அறிஞர் தான் இதை முதலில் கண்டறிந்து சொன்னவர். 1950 களிலும் 60களிலும் இது குறித்த பேச்சு பரபரப்பாய் இருந்தது. சில புகைப்படங்களும் வெளியாகின. அடுத்த உலகப் போர் ஏலியன்களோடு இருக்கலாம் என டெக்லஸ் மெக் ஆர்த்தர் எனும் அமெரிக்க தளபதி குறிப்பிட்டது இதன் பின்னணியில் தான்.

4. ஏலியன் மனிதர்கள்.

ஏலியன்கள் கதைகளில் எப்போதும் புதிராக இருப்பவை ஏலியன்களால் கடத்தப்படும் மனிதர்களைப் பற்றிய கதைகள். திடீரென ஒருநாள் காணாமல் போய், அதன்பின் சிலநாட்களுக்குப் பின் திடீரென பிரசன்னமாகும் மக்களின் கதைகள் எக்கச்சக்கம் உண்டு.

இவர்கள் பெரும்பாலும் வசியம் செய்யப்பட்டு ஏலியன்களின் இடத்துக்குக் கொண்டு போகப்பட்டு மனிதன் பாதி, ஏலியன் மீதி எனும் ஹைபிரிட் வகை மனிதர்களாகத் திரும்பி அனுப்பப்படுவதாக கதைகள் பல உண்டு.

அவர்களில் எடி பேஜ் என்பவருடைய கதை வியப்பானது. வியட்னாமில் டூர் போயிருந்தபோது 11 நாட்கள் காணாமல் போனார். பின்னர் மீண்டும் அவர் தரிசனமானபோது தான் ஒரு ஏலியன் கலந்த கலவை. இது அமெரிக்காவின் சீக்ரெட் மிஷன் என திடுக்கிட வைத்தார்.

இதெல்லாம் கட்டுக்கதை என பலர் சொன்னாலும் சில விஷயங்கள் நம்பலாமோ என எண்ணத்தோன்றுகின்றன. இவருடைய இரத்த வகை இதுவரை இல்லாத புது வகை என்கிறது மருத்துவ அறிக்கை.

உடலில் விலா எலும்புகளின் எண்ணிக்கை அதிகமாக இருக்கிறது, உடல் உள் உறுப்புகளில் மாற்றம் உண்டு. உடல் எலும்புகளில் உலோகங்கள் இருக்கின்றன. மூளை வித்தியாசமாக இருக்கிறது என இவர் குறித்த மர்ம செய்திகளும் அறிக்கைகளும் பிரமிக்க வைக்கின்றன

5. அறிவியல் பார்வை

ஏலியன்கள் எப்படி இருப்பார்கள் என்பதை அறிவியல் பல்வேறு ஆய்வுகளின் மூலம் கணித்து வைத்திருக்கிறது. அதில் முக்கியமான விஷயம் அவர்களுடைய உருவம். அவர்கள் மனிதர்களைப் போல இருக்க சாத்தியமில்லை என்பது ஒரு செய்தி.

எலியன்கள் நிச்சயம் உடல் வலிமை உடையவர்களாக இருக்க வாய்ப்பில்லை. அவர்கள் நோஞ்சான்களாக, தங்களுடைய தொழில்நுட்பக் கருவிகளை இயக்கக் கூடிய அளவு மட்டுமே வலிமை உடையவர்களாக இருப்பார்கள் என்பது இன்னொரு செய்தி.

அவர்களுடைய பேச்சு நம்மைப் போல இருக்காது. அவர்கள் அதிர்வுகளால் பேசுபவர்களாகவும், உடலிலுள்ள சென்சார்களினால் அதைப் புரிந்து கொள்பவர்களாகவும் இருப்பார்கள். இவர்கள் வேகமாக இயங்குபவர்களாகவும், அதீத அறிவுள்ளவர்களாகவும் இருப்பார்கள் என்கிறது இன்னொரு செய்தி.

இப்படி அறிவியல் ஏலியன்களைக் குறித்து செய்திகளை வெளியிட்டு ஆர்வத்தை மேலும் மேலும் தூண்டுகிறது.

6. கிரகங்களும் ஏலியன்களும்

பதினெட்டாம் நூற்றாண்டில் வாழ்ந்த இம்மானுவேல் ஸ்வீடன்போர்க் எனும் தத்துவஞானி மிகப்பிரபலம். நரகத்தைக் குறித்து இவர் கண்ட மூன்று காட்சிகள் இன்றும் பிரபலமாய் இருக்கின்றன. பற்றி எரியும் நாடு போலவும், அச்சுறுத்தும் உருவங்கள் உலவும் இருட்டுக் கானகமாகவும், தங்களைச் சுற்றியிருக்கும் தனிப்பட்ட நரகமாகவும் இவர் காட்சிகளைக் கண்டார்.

இவை தவிர இவர் பிற கிரகங்களில் என்னென்ன இருக்கின்றன என்பதைக் குறித்தும் பல காட்சிகளைக் கண்டு அதை எழுதினார். நிலவில் குழந்தைகளைப் போன்ற மனிதர்கள் உண்டு. அவர்கள் உரத்த குரலில் பேசுவார்கள் என்றும், செவ்வாயிலுள்ள ஏலியன்கள் டெலிபதி மூலம் பேசுவார்கள் என்றும், சனி கிரகத்தில் உள்ளவர்கள் கடவுளை வழிபடுபவர்கள் என்றும், ஜுபிடரில் உள்ளவர்கள் தனித்தனி குடும்பங்களில் வாழ்பவர்கள் என்றும் இவர் எழுதி வைத்திருக்கிறார்.

இவையெல்லாம் கதைகள் என தோன்றினாலும் அதைக் குறித்த நுண்ணிய விளக்கங்களும், அவருடைய கதைகளும் ஏலியன் குறித்த கனவுகளுக்கு தீனி போடுகின்றன.

7. ஏலியன் தொடர்பு

இந்த பிரபஞ்சத்தின் ஏதோ ஒரு மூலையில் இருக்கலாம் என நம்பப்படும் ஏலியன்களோடு தொடர்பு கொள்ள வேண்டுமென மனுக்குலம் தொடர்ந்து முயன்று கொண்டே இருக்கிறது.

இங்கிருந்து ஒரு குரலோ, ஒளியோ, கருவியோ இன்னொரு இடத்துக்குச் செல்ல நூற்றுக்கணக்கான, அல்லது ஆயிரக்கணக்கான ஆண்டுகள் கூட ஆகலாம். ஆகவே இப்போது விஞ்ஞானம் டெலிபதி மூலம் தொடர்பு கொள்ளும் முயற்சிகளைச் செய்கிறது. ஸ்டீவன் கிரீர் என்பவர் அப்படி தொடர்பு கொள்வதில் வெற்றி பெற்றிருப்பதாகச் சொல்கிறார்.

காஸ்மிக் அலைகளின் மூலமாக அதிக மெகாஹெட்ஸ் உள்ள குரல்களை வானுக்கு அனுப்பி ஏலியன்களின் பதில் எதிர்பார்ப்பது இன்னொரு வகை. தொடர்ந்து அத்தகைய பல்வேறு முயற்சிகள் நடந்து கொண்டிருக்கின்றன. அப்படி அனுப்பிய ஒலிகளில் பீத்தோவானின் சிம்பொனியும் அடக்கம்.

8 உலோக ஏலியன்

வெனிசுலா நாடு. 1954ம் ஆண்டு குஸ்டாவோ கோன்சலஸ் மற்றும் போன்ஸ் இருவரும் காரில் பயணம் செய்து கொண்டிருந்தார்கள். ஒரு வளைவில் திரும்பிய போது முன்னால் ஒரு வெளிச்சம் ! நடு ரோட்டில் அப்படி என்ன வெளிச்சம் என வெளியே வந்து பார்த்தார்கள்.

ஒரு பறக்கும் தட்டு. அதிலிருந்து இரண்டு பேர் வெளியே வந்து கொண்டிருந்தார்கள். சின்ன உருவமான இருவரில் ஒருவர் கோன்சலஸ் மீது தாவினான். மெல்லிய உருவம் ஆனால் மிகவும் வலிமையாய் இருந்தது அந்த ஏலியன்.

ஏலியன் அவரைத் தூக்கி பதினைந்தடி உயரத்துக்கு எறிந்தது. சட்டென கத்தியை எடுத்து ஏலியனை வெட்டினார் அவர். ஆனால் ஒரு இரும்பில் பட்டது போல ஒரு சத்தம் வந்தது அவ்வளவு தான்.

சொன்னால் நம்புவார்களோ இல்லையோ எனும் பயத்துடன் போலீஸ் ஸ்டேசன் சென்றார்கள். உள்ளே நடுங்கிக் கொண்டு நின்றிருந்தார் ஒரு போலீஸ்காரர். இவர்கள் பேசும் முன் அவர் ஆரம்பித்தார்.

‘ந..நடந்தது எல்லாத்தையும் நான் பாத்துட்டு தான் இருந்தேன்”

9. குட்டி ஏலியன்கள்

1970 ஆகஸ்ட் 19ம் தியதி. மலேஷியாவின் காட்டுப் பகுதி ஒன்றில் விளையாடிக் கொண்டிருந்தார்கள் சில சிறுவர்கள். திடீரென அவர்களுக்கு முன்னால் ஒரு மீட்டர் தொலைவில் ஒரு குட்டி பறக்கும் தட்டு வந்து இறங்கியது.

அதிலிருந்து ஐந்து பேர் இறங்கினார்கள். அவர்களின் உயரம் வெறும் மூன்று இஞ்ச் தான். குட்டி பொம்மைகள் போல இருந்த அவர்களில் ஒருவர் மஞ்சள் நிற ஆடையும், நான்கு பேர் நீல நிற உடையும் அணிந்திருந்தனர்.

அந்த சிறுவர்களில் ஒருவனான விக்னேஷ்வரன் ஏலியன்களை நெருங்க முயற்சி செய்த போது லேசர் தாக்குதலுக்கு உள்ளானார். இன்றும் மர்மம் நிறைந்த விஷயமாக இந்த நிகழ்வு இருக்கிறது.

10 பல்லி மனிதன்

அல் உபைட் ஈராக்கின் அகழ்வாராய்ச்சி ஆய்வாளர்களுக்கு பொன் விளையும் பூமி. கிமு 5900 க்கும் கிமு 4000 க்கும் இடைப்பட்ட காலத்தின் முன் சுமேரிய கால நாகரீகங்கள் அங்கே புதைந்து கிடக்கின்றன.

அங்கே கிடைத்த பல விஷயங்கள் வியப்பூட்டினாலும், ஒரு விஷயம் குழப்பத்தைக் கொடுக்கிறது. அது பல்லி உருவ மனித உருவம். அது என்ன எனும் கேள்விக்கு விடையில்லை.

அது ஏலியன் உருவம் என்பது முக்கியமான அனுமானங்களில் ஒன்று. அதற்கு வலு சேர்ப்பது போல இருந்தது இத்தாலியிலுள்ள பியர் சான்பிரிடா என்பவர் 1978ம் ஆண்டு சொன்ன நிகழ்வு. அவர் பத்தடி உயரமுள்ள பெரிய பல்லி மனிதர்களைக் கண்டிருக்கிறார். அவர்கள் கையிலிருந்த வெப்பக் கதிரினால் இவரைத் தாக்கியிருக்கிறார்கள்.

பின்பு அந்தப் பகுதியில் சுமார் ஐம்பது இஞ்ச் வரை பெரிய காலடி அடையாளங்கள் தென்பட்டு இவருடைய கூற்றை வலுவாக்கியது.

TOP 10 : ஆவணப்படங்கள்

Image result for man with a movie camera

நேர்மையாகச் சொல்லப்படும் ஆவணப் படங்களுக்கு எப்போதுமே வலிமை அதிகம். உலகெங்கும் ஆயிரக்கணக்கான டாக்குமென்டரிகள் பதிவு செய்யப்படாத விஷயங்களை தொடர்ந்து பதிவு செய்து கொண்டே இருக்கின்றன. அறியப்படாத, ஏதோ ஒரு சுவாரஸ்யத்தை உள்ளடக்கிய பத்து டாக்குமென்டரிகளை இங்கே பார்ப்போம்.

  1. Shoah

1985ம் ஆண்டு வெளியான பிரான்ஸ்..பிரிட்டிஷ் ஆவணப் படம் இது. கிளாட் லான்ஸ்மேன் இதை இயக்கியிருந்தார். பேரழிவிலிருந்து தப்பிய மக்களிடம் நடத்தப்பட்ட உரையாடல்களின் தொகுப்பு தான் இது. விவரிக்க முடியாத உணர்வுகளின் தொகுப்பு என்று சொல்லலாம்.

ரகசிய கேமராக்கள், மைக்ரோபோன்கள் போன்றவற்றையும் இந்த ஆவணப் படத்துக்காகப் பயன்படுத்தியிருந்தார் இயக்குனர். ஒருமுறை கண்டுபிடிக்கப்பட்டு அடித்து நொறுக்கப்பட்டார். சுமார் ஒருமாத காலம் மருத்துவமனையில் இருந்தவர் வெளியே வந்ததும் மீண்டும் தன் பணியைத் தொடர்ந்தார்.

ஜெர்மனியரின் தாக்குதல் நடந்த போலந்து நாட்டுப் பகுதிகளில் தான் இவருடைய ஆவணப் படம் பெரும்பாலும் பயணிக்கிறது.  இரண்டாம் உலகப்போரின் போது கொத்துக் கொத்தாக மக்களை கொன்று குவித்த மரணப் பகுதிகளில் இவருடைய ஆவணப் படம் இரத்தமும், சதையுமாய் உலவுகிறது.

ஒன்பது மணி நேரம் நீளும் இந்த ஆவணப் படம் பல்வேறு விருதுகளைப் பெற்றிருக்கிறது. பிரிட்டிஷ் திரைப்படக் கல்லூரியின் முக்கிய ஆவணப் படங்களின் வரிசையில் இதுவும் இடம்பெற்றிருக்கிறது.

2 The Act Of Killing

இப்படி ஒரு சூழலில் எப்போதும் சிக்கி விடக் கூடாது என பதை பதைக்க வைக்கும் ஒரு ஆவணப் படம் இது. 1965 1966 களில் இந்தோனேஷியாவில் நடந்த கூட்டுப் படுகொலைகள் தான் இதன் களம். அரசுக்கு உடந்தையாக இருந்து செயல்பட்ட கொலையாளிகள் தங்களுடைய அனுபவங்களைப் பகிர்ந்து கொள்கிறார்கள்.

அன்றைக்கு நடந்த அந்த நிகழ்வை அப்படியே மறுபடியும் தத்ரூபமாக படம்பிடித்து காட்டும் போது கொலையாளியே கொலைநடுங்கிப் போய்விடுகிறார். இப்போது தாத்தாவாக இருக்கும் அன்றைய தாதாவான அன்வர் காங்கோ ஆயிரம் பேரை தன் கையாலேயே கொன்றவர்.

படுகொலை செய்ததன் குற்ற உணர்வு ஏதும் அவருடைய முகத்தில் தெரியவில்லை. சற்றே நிதானமாய், நான் பாவியா ? என கேட்கிறார்.

ஜோஷ்வா ஓப்பனேமர் இயக்கத்தில் 2012ல் வெளியான இந்தப் படம் பல்வேறு விருதுகளை அள்ளியது. துயரத்தின் ஒரு பெரிய வரலாற்றுத் துளி இது எனலாம்.

  1. மணப்பெண் கடத்தல்

அப்பா அம்மாவுக்குத் தெரியாமல் ஓடிப் போய் கல்யாணம் பண்ணுவது நம்ம ஊரில் சகஜம். அதே போல காதலித்த பெண்ணை கடத்திக் கொண்டு போய் திருமணம் செய்வதைக் கூட ஆங்காங்கே கேட்கிறோம். அது சட்ட விரோதமாய் இருப்பதால் பெரும்பாலும் அத்தகைய கடத்தல் இங்கே நடப்பதில்லை.

ஆனால் கஜகஸ்தானில் நிலமை வேறு. ஒரு பெண்ணைப் பிடித்திருந்தால் பையனும், அவனுடைய நண்பர்களுமாக போய் அலேக்காக அந்தப் பெண்ணைத் தூக்கி வருகிறார்கள். பையன் வீட்டில் திருமண ஏற்பாடுகளெல்லாம் செய்யப்படுகிறது. பெண் பலவந்தமாய் கல்யாணம் செய்து வைக்கப்படுகிறாள். அதன் பிறகு வேறு வழியில்லாமல் அவள் அவனோடு வாழ்கிறாள்.

இது சட்ட விரோதமாய் இருந்தாலும் அங்கே இதை யாரும் கண்டுகொள்வதில்லை. சகட்டு மேனிக்கு பெண் கடத்தல் நடக்கிறது. அதைத் தான் இந்த “பிரைட் கிட்னாப்பிங் இன் கஜகஸ்தான்” எனும் ஆவணப்படம் விவரிக்கிறது. தாமஸ் மார்டன் என்பவர் அந்த நாடுவழியாகப் பயணித்து இந்த அனுபவங்களை சுடச் சுடப் பதிவு செய்திருக்கிறார்.

4 லேக் ஆஃப் ஃபயர்

நெருப்பு நதி எனும் இந்த ஆவணப் படம் கருக்கலைப்பு எனும் சர்வதேச விவாதப் பொருளைப் பற்றி விரிவாகப் பேசுகிறது. பல்வேறு மதங்கள் கருக்கலைப்பை தீவிரமாக எதிர்க்கின்றன. சில மதங்களும், பிரிவுகளும், பகுத்தறிவாளர்களும் இதை ஆதரிக்கின்றனர்.

2006 வெளியான இந்தப் படத்தை இயக்கியிருந்தவர் டோனி கேய். அமெரிக்காவை மையமாக வைத்து எடுத்திருந்தாலும் இதில் அபார்ஷன் எனும் கருத்து மிக ஆழமாக அலசப்பட்டிருக்கிறது. இரண்டரை மணி நேரம் ஓடும் இந்தப் படத்தில் கருச்சிதைவின் இரண்டு பக்கங்களையும் இயக்குனர் தொட்டிருக்கிறார்.

பதினாறு ஆண்டுகள் செலவிட்டு, தனது கைக் காசிலிருந்து ஆறு  மில்லியன் டாலர்கள் செலவிட்டு இயக்குனர் இந்தப் படத்தை இலட்சியப் படமாக உருவாக்கியிருந்தார். பல்வேறு சர்வதேச விருதுகள், நல்ல விமர்சனங்கள், டாப் ஆவணப் படங்களின் பட்டியலில் இடம் என இது சாதனைகள் பல செய்திருக்கிறது.

5 இடி அமீன், எ செல்ஃப் போர்ட்ராய்ட்

மூன்று இலட்சம் மக்களுடைய சாவுக்குக் காரணமாய் இருந்த ஒரு கொடுங்கோல் தலைவர் எனும் பெயர்  உகாண்டா அதிபராக இருந்த அமீனுக்கு உண்டு. வரலாற்றின் பயங்கரங்களைப் பதிவு செய்த இந்த ஆவணப் படம் இடி அமீனின் இன்னொரு பக்கத்தையும் பதிவு செய்திருக்கிறது. இதை இயக்கியவர் பிரஞ்ச் இயக்குனரான பார்பட் ஸ்க்ரோடர். சிலவற்றை இயக்குனர் ரகசியமாகப் பதிவு செய்திருந்தார்.

இயக்குனர் லண்டனுக்குத் திரும்பி, படத்தைத் திரையிடப்பட்ட போது தான் தன்னை கொஞ்சம் கேவலமாய்ச் சித்தரிக்கப்பட்டிருக்கும் விஷயம் அமீனுக்கு தெரிந்தது. சில காட்சிகளை நீக்க வேண்டுமென இயக்குனருக்குக் கட்டளையிட்டார். அதற்கு இயக்குனர் மறுத்த போது ஒரு பிரஞ்ச் பிரஜையை கடத்திக் கொண்டு போய் மிரட்டி அந்தக் காட்சிகளை நீக்க வைத்தார் அவர்.

இடி அமீன் குறித்த பதிவுகளில் தவிர்க்க முடியாத ஆவணப் படம் இது.

  1. பிஹைன்ட் பார்ஸ்

சான் குயென்டன் என்பது அமெரிக்காவிலுள்ள ஒரு சிறைச்சாலை. மிகக் கடுமையான குற்றவாளிகளால் நிரம்பி வழியும் சிறைச்சாலை இது. கொலை, கொள்ளை, பாலியல் பலாத்காரம் போன்றவற்றை சகட்டு மேனிக்கு செய்து குவித்தவர்கள் தான் இங்கே இருப்பார்கள்.

இந்த சிறைச்சாலைக்குள் புகுந்து இயக்குனர் அவர்களுடைய அனுபவங்களைக் கேட்டறிவதும், அவர்களைக் குறித்த பல்வேறு சுவாரஸ்யங்களைக் கண்டறிவதும் தான் இந்த ஆவணப் படத்தின் நோக்கம்.

லூயிஸ் தியோரக்ஸ் பல்வேறு ஆவணப் படங்களை இயக்கியிருக்கிறார். அதில் இந்த ஆவணப் படம் சிறப்பிடம் பெறுகிறது. பி.பி.சி தயாரிப்பான இந்த ஆவணப்படம் அதிகம் பார்வையிடப்பட்ட ஆவணப் படங்களின் பட்டியலில் இருக்கிறது.

  1. ஓகிகஹாரா / தற்கொலைக் காடு

ஜப்பானின் வடமேற்குப் பகுதியிலுள்ள ஃப்யூஜி மலைப்பகுதியில் இந்த பரந்து விரிந்த காடு இருக்கிறது. 35 சதுர கிலோ மீட்டர் தூரம் பரந்து விரிந்திருக்கும் இந்த காட்டில் அப்படி ஒரு மயான அமைதி நிலவுகிறது. காட்டின் மையப்பகுதி மிகவும் அடர்த்தியானது.

தற்கொலை செய்து கொள்ள முடிவெடுப்பவர்கள் இங்கே வந்து செத்துப் போவது வெகு சகஜம். அதனால் தான் இந்தப் பெயர் இந்த காட்டுக்கு வந்திருக்கிறது. மரங்களில் தொங்கியும், விஷம் குடித்தும், இன்னும் வேறு விதமாகவும் பலர் காட்டின் மடியில் சமாதியாகின்றனர்.

அதிக வயதான முதியவர்களைக் கொண்டு வந்து காட்டில் போட்டு விட்டுப் போகும் கொடுமையும் நடக்கிறது. 2003ம் ஆண்டு 103 உடல்கள் கண்டுபிடிக்கப்பட்டன. இந்தக் காட்டைக் குறித்த விஷயங்களை பதைபதைப்புடன் சொல்லும் ஒரு ஆவணப் படம் இது. மென்மையான இதயம் உடையவர்களுக்கானதல்ல.

8 கானாவின் இணைய குற்றங்கள்

உங்களுக்கு லாட்டரி விழுந்திருக்கிறது உடனே இருபத்தையாயிரம் கட்டுங்கள், இருபது கோடி வந்து சேரும் என மெயில் வந்திருக்கிறதா ? “நீங்க ரொம்ப அழகா இருக்கீங்க, சேட் பண்ணலாமா?” என தூண்டுதல் வந்திருக்கிறதா ? ஒரு நல்ல கம்பெனி இன்வெஸ்ட் பண்ணுங்க நூறு மடங்கு லாபம் உத்தரவாதம் என தூண்டில் நீண்டிருக்கிறதா ? பெரும்பாலும் தென்னாப்பிரிக்க நாடான கானா விலிருந்து வந்திருக்கலாம்.

இணையக் குற்றங்களை அவர்கள் ஷகாவா என பெயரிட்டு அழைக்கிறார்கள். ஆப்பிரிக்காவின் இன்டர்நெட் தலைநகர் என அழைக்கப்படும் கானா தான் இதன் முதுகெலும்பு. குற்றங்கள் செய்யும் முன் போய் மத குருக்களிடம் ஆசீர்வாதமும் வாங்கிக் கொள்கின்றனர்.

தாமஸ் மார்டன் இந்த இடங்களுக்கு நேரடியாகச் சென்று, அங்குள்ள மக்களைச் சந்தித்து இந்த ஆவணப் படத்தை உருவாக்கியிருக்கிறார். குற்றம் செய்பவர்கள் நேரடியாக இந்த படத்தில் தங்கள் வேலைகளைப் பற்றிப் பேசுகிறார்கள். ஒரு சின்ன மின்னஞ்சலின் பின்னணியில் இருக்கும் விஷயங்களெல்லாம் இதில் அலசப்படுகின்றன.

என்னதான் நாம் இவர்களை குற்றவாளிகள் என முத்திரை குத்தினாலும், வறுமையில், வாழ முடியா சூழலும் தான் இவர்களை இந்த நிலமைக்குத் தள்ளி விட்டிருக்கின்றன என்கிறார் இயக்குனர்.

9 பாரன்ஹீட் 9/11

ஆறு மில்லியன் டாலர் செலவில் எடுத்த ஒரு டாக்குமென்டரி படம் எவ்வளவு சம்பாதிக்க முடியும் ? யாரும் எதிர்பாராத அளவுக்கு அதாவது, 222 மில்லியன் டாலர்களைச் சம்பாதிக்க முடியும் என காட்டியது இந்த ஆவணப் படம். விஷயம் அப்படி ! அமெரிக்காவின் இரட்டைக் கோபுரத் தாக்குதல் தான் விஷயம்.

மைக்கேல் மூர் இயக்கத்தில் உருவான இந்த ஆவணப் படத்தில் அமெரிக்க ஜனாதிபதியாய் இருந்த ஜார்ஜ் புஷ்ஷின் நடவடிக்கைகள் கடுமையாய் விமர்சிக்கப்பட்டிருக்கிறது. 2004ம் ஆண்டு கேன்ஸ் விழாவில் திரையிடப்பட்டபோது 20 நிமிடங்கள் அனைவரும் எழுந்து நின்று கைதட்டினார்கள். இது எப்போதும் நிகழ்ந்திராத ஒரு சாதனை.

ஏராளமான விருதுகளையும், பல்வேறு விமர்சனங்களையும் வாங்கிய இது ஆவணப் பட ரசிகர்கள் நிச்சயம் பார்க்க வேண்டிய ஒரு படம்.

  1. Man with a Movie Camera

1929ம் வெளியான படம் என்பது தான் இந்த ஆவணப் படத்தின் ஹைலைட். இன்றைய திரை உருவாக்கத்தின் பல்வேறு டெக்னிக்களை பரிசோதித்துப் பார்த்திருக்கிறது இந்த ஆவணப் படம். இதில் கதை இல்லை, பேச்சு இல்லை, வெறும் இசை மட்டுமே உள்ள ஒரு கருப்பு வெள்ளை படம்.

ஸ்லோ மோஷன், ஃபாஸ்ட் மோஷன், ப்ரீஸ் என பிற்காலத்தில் நுழைந்த பல்வேறு விஷயங்கள் இந்த ஆவணப் படத்தில் இருப்பது வியப்பு. விமர்சகர்களின் ஏகோபித்த வரவேற்பைப் பெற்ற படம் என  இதைச் சொல்லலாம். உலகத்தில் உருவான ஆவணப் படங்களிலேயே டாப் 8 வது இடம் இந்தப் படத்துக்குக் கிடைத்திருக்கிறது.

இயக்குனர் டெஸிகா வெர்டோவ் சோவியத்தைச் சார்ந்தவர். பல்வேறு விருதுகளையும் பாராட்டுகளையும் அள்ளிய இந்தப் படத்தை பார்ப்பது இனிமையான அனுபவமே.

TOP 10 : வித்தியாசமான‌ புத்தகங்கள்.

Image result for Codex Seraphinianus

எத்தனையோ பிரபலமான புத்தகங்களைப் படித்திருப்போம். அல்லது புத்தகங்களைப் பற்றிப் படித்திருப்போம். ஆனால் இங்கே நாம் பார்க்கப் போகும் நூல்களெல்லாம் வித்தியாசமானவை. அது எப்படி என்பதை நீங்கள் படிக்கும் போது புரிந்து கொள்வீர்கள்.

  1. த ஹேன்ட் தட் சைன்ட் த பேப்பர்

“அந்தக் காகிதத்தில் கையொப்பமிட்ட கை” என்று தமிழில் புரிந்து கொள்ளலாம். இது ஒரு நாவல். உக்ரேனில் பிறந்த, அந்த நாட்டு நாகரீகத்தைக் கொண்ட ஹெலன் டெமிடெங்கோ எனும் பெண் எழுத்தாளர் எழுதிய நாவல். நாசி களால் இலட்சக்கணக்கான யூதர்கள் கொல்லப்பட்ட நிகழ்வில் பங்கு கொண்டவர் இந்த எழுத்தாளர்.

தனது தப்பிப் பிழைத்த அனுபவங்களையும், ஒரு படிப்பறிவற்ற டாக்சி டிரைவரான தந்தையின் நினைவுகளையும், பிழியப் பிழிய எழுதியிருந்த நாவல் மிகப்பெரிய வெற்றியைப் பெற்றது. விற்பனையில் பின்னிப் பெடலெடுத்தது.

பல்வேறு விருதுகளையும் அள்ளிக் கொண்டது. அதன் பின்னர் தான் இந்த நாவலாசிரியர் உக்ரேன் பாரம்பரியத்தைக் கொண்டவர் அல்ல என்பதும் இங்கிலாந்திலிருந்து புலம் பெயர்ந்தவர் என்பதும் அவரது உண்மையான பெயர் ஹெலர் டார்வில்லி என்பதும் தெரிய வந்தது. பல்வேறு நாடுகளின் உயரிய விருதுகளை அள்ளிய இந்த நூல் விருது வழங்கிய ஜாம்பவான்களை அவஸ்தைக்குள்ளாக்கி, மிகப்பெரிய விவாதத்தையும் உருவாக்கியது !

  1. மேலியஸ் மெலிஃபிகாரம்

1486ம் ஆண்டு வெளியான நூல் இது. ஹேமர் ஆஃப் விட்ச்கிராஃப்ட் என ஆங்கிலத்தில் அழைக்கப்படும் இது மாந்திரீகம் தொடர்பானது. இந்த புக்கைப் படித்தால் ஆவிகளைப் பிடிக்க முடியும், அவைகளைக் கட்டுப்படுத்த முடியும் எனும் பேச்சு எங்கும் பரவியது. இதனால் மக்கள் இந்த புத்தகத்தை விழுந்தடித்து வாசித்தனர்.

அடுத்த சில நூற்றாண்டுகளுக்கு இந்த நூல் பதிப்புக்கு மேல் பதிப்பு கண்டு எங்கும் நிரம்பியது. சாத்தானை வெளியேற்றவும், மந்திர தந்திரங்கள் செய்யவும் இந்த நூலை மக்கள் வாசிக்க ஆரம்பித்தனர். ஒரே புத்தகம் நாடுகளையே புரட்டிப் போட்டு எல்லோரையும் நிலைகுலைய வைத்ததென்றால் அது இந்த புத்தகம் தான்.

மந்திரவாதத்திலும் அது சார்ந்த விஷயங்களிலும் ஆர்வமுடையவர்கள் இதை ஒரு வெற்றிகரமான நூலாகப் பார்த்தார்கள். மாந்திரீகம், சாத்தான், கடவுள் எனும் மூன்று விஷயங்களையும் வைத்து இந்த நூல் நகர்கிறது. ஜெர்மனியில் வெளியாகி அந்த நாட்டையே சில நூற்றாண்டுகள் ஆக்கிரமித்திருந்த இந்த நூல் உண்மையிலேயே ஸ்பெஷல் தான்.

  1. வேம்பயர் அகாடமி

ஒரு நூல் வெளியானபின் அது சமூகத்தின் பின் விளைவுகளை ஏற்படுத்தும் என தெரிந்தால் அதைத் தடை செய்வது இயல்பு. ஆனால் ஒரு நூல் வெளியாகும் முன்பே அதைத் தடை செய்வது அபூர்வம். ஒரு நூல் அல்ல, அந்த நூலின் எந்தப் பாகமும் வரக் கூடாது என ஒட்டு மொத்தமாய்  தடைசெய்தது இந்த நூலுக்குத் தான்.

டுவைலைட் படம் பார்த்தீர்களெனில் இதன் கதை புரியும். ஒரு இளம் பெண் வேம்பயர்களை வீழ்த்துவது எப்படி என ஒருவரிடம் பயிற்சி எடுப்பார். அவர்கள் இருவரும் காதலில் விழுவார்கள். அந்த பயிற்சியாளரே இரத்தக் காட்டேறியாக இருப்பார். இப்படித் தான் போகும் கதை !

முதல் புத்தகம் வந்து சக்கை போடு போட்டது. எண்பது இலட்சம் புத்தகங்கள் விற்றுத் தீர்ந்தன. 2009ம் ஆண்டு இதன் மூன்று பாகங்கள் வருவதாக இருந்தது. அதை அமெரிக்காவின் டெக்சாஸ் மாநில அரசு தடை செய்தது. அதாவது நூல் எழுதத் துவங்கும் முன்பே அது தடை செய்யப்பட்டது.

கடந்த ஆண்டும் இதன் ஆறு பாகங்கள் வரவேண்டியது, ஆனால் தடை செய்யப்பட்டது. இப்படியே நூல் எழுதத் துவங்கும் முன்பே தடைசெய்யப்பட்டு வரலாற்றில் இடம்பிடித்து விட்டது இந்த நூல்.

  1. பேபி அன்ட் சைல்ட் கேர்

குழந்தை வளர்ப்பு பற்றிய ஒரு நூல் சுமார் 50,000 குழந்தைகளைப் பலிவாங்கியிருக்கிறது என நினைத்தாலே குலை நடுக்குகிறது இல்லையா ? அப்படி ஒரு தவறான அறிவுரையைக் கொடுத்து இந்த நூல் வரலாற்றில் ஒரு கறையாய் இடம்பிடித்திருக்கிறது.

1946ம் ஆண்டு வெளியான இந்த நூலில் ஒரு அட்வைஸ் கொடுக்கப்பட்டிருந்தது. குழந்தைகளை மல்லாக்க படுக்க வைத்தால் அவர்களுடைய வாந்தியோ, உமிழ்நீரோ தொண்டையில் சிக்கி குழந்தையைக் கொன்று விடும். எனவே குழந்தையை குப்புறப் படுக்க வையுங்கள். என்பது தான் அந்த அட்வைஸ்.

இந்த அட்வைஸை நம்பி பல பெற்றோர் குழந்தைகளைப் பறிகொடுத்து விட்டனர் என்பது தான் துயரம். அப்படிப் படுக்க வைத்தால் முழந்தைக்கு முச்சுத் திணறல் வரும் என்பது தான் யதார்த்தம். அது தொன்னூறுகளில் பெரும்பாலானவர்களுக்குத் தெரிந்திருக்கவில்லை. இதே போல‌ வேறு சில மிகத் தவறான அறிவுரைகளும் இந்த நூலில் இருக்கின்றன.

  1. யூரின் சிகிச்சை

தலைப்பை மறுபடியும் படிக்க வேண்டாம். சிறுநீர் சிகிச்சை தான் நூலின் தலைப்பு. உவ்வே என்பவர்கள் சட்டென அடுத்த தலைப்புக்கு தாவி விடுங்கள். இது பி.பி.பவர்ஸ் என்பவர் மிக சீரியசாக எழுதிய நூல்.

தனது வாழ்க்கையில் தனது சிறுநீரை மருந்தாகக் குடித்து வந்ததாய் ஆசிரியர் விளக்குகிறார். அது என்னென்ன நோய்களைக் குணமாக்கும் என்பதையும், நீண்டகால நோய்கள் வராமல் எப்படித் தடுக்கும் என்பதையும் அவர் விலாவரியாகக் குறிப்பிட்டிருக்கிறார்.

சிறுநீர் மருத்துவம் புதிதல்ல. பழங்காலம் தொட்டே அது பழக்கத்தில் உள்ளது தான். காலில் கல் இடித்து விட்டால் அந்த இடத்தில் சிறுநீர் கழிக்கும் வழக்கம் கிராமங்களில் இன்றும் உள்ளது. “சிறுநீர் மருத்துவம் ரொம்ப நல்லது” என மொரார்ஜி தேசாய் 1978ல் பேசியிருந்தார் !

  1. கேட்ஸ்பி

இது ஒரு நாவல். எழுதியவர் எர்னஸ்ட் வின்சென்ட் ரைட் என்பவர். இந்த நாவலில் 50,000 வார்த்தைகளுக்கு மேல் உண்டு. 1939ம் ஆண்டு வெளியான இந்த நாவல் சுவாரஸ்யமாய் எழுதப்பட்ட ஒரு நாவல். இதில் என்ன ஸ்பெஷல் என்று தானே நினைக்கிறீர்கள் ? இந்த நாவலில் “இ” எனும் ஆங்கில உயிரெழுத்து பயன்படுத்தப்படவேயில்லை.

ஆங்கில உயிரெழுத்துகள் இல்லாமல் வார்த்தைகளைத் தேடிக் கண்டு பிடிப்பதே கஷ்டம். அப்படி இருக்கும் போது ஒரு நாவலையே இவ்வளவு பெரிதாக, சுவாரஸ்யமாக ஒருவர் எழுதியிருக்கிறார் என நினைக்கும் போது வியப்பாக இருக்கிறதல்லவா ?

  1. ஹௌ டு ஷார்ப்பன் பென்சில்ஸ்

பென்சிலை சீவுவது எப்படி ? ஒரு எல்.கே.ஜி பையன் இதற்கு பதில் தருவான். அல்லது ஒரு ஷார்ப்னரை எடுத்து நம்மிடம் தருவான். ஆனால் எப்படி பென்சிலைச் சீவுவது என்பதை ஒருவர் மிக சீரியசாக யோசித்து ஒரு முழு நூலையே எழுதியிருக்கிறார்.

இதுக்கெல்லாமா புக் எழுதுவாங்க ? என வியக்க வைத்த நூல் இது எனலாம். ஒரு உடைந்த பென்சிலோடு இந்த நூலை வாசிக்க ஆரம்பித்தால் அது ஏகப்பட்ட நுணுக்கங்களைக் கற்றுத் தருகிறது.

நகைச்சுவையாகவும், தகவல்களின் குவியலாகவும், சுவாரஸ்யமான நுட்பங்களாலும் நிரப்பியிருக்கும் இந்த நூல் ஒரு ஆச்சரியம்.

8 கில்லர்

ஒரு கொலைகாரனின் கதை தான் இந்த நூல். இதில் விசேஷம் என்னவென்றால் இதை எழுதியதே அந்தக் கொலைகாரன் தான் !

கார்ல் பேன்ஸ்ராம், 1891 ல் பிறந்தவர், அமெரிக்காவையே உலுக்கிய சீரியல் கில்லர். இவர் செய்த கொலைகள் இருபத்து ஒன்று. பாலியல் பலாத்காரங்கள் ஆயிரத்துக்கும் மேல். பலமுறை சிறையில் அடைக்கப்பட்டார், பல முறை தப்பி ஓடினார். தொடர்ந்து கொடூரமான வாழ்க்கை வாழ்ந்தார். 1930ல் மரண தண்டனை பெற்று இறந்தார்.

ஹென்றி லெஸர் எனும் ஜெயிலர் இவர் மீது பரிதாபம் கொன்டார். எனவே அவரிடம் தனது வாழ்க்கை வரலாறை கொஞ்சம் கொஞ்சமாய் எழுதி கொடுத்தார் கொலைகாரர். சிறைகள் மாறிய போதும், தொடர்ந்து கடிதங்கள் எழுதி தனது வாழ்க்கையின் இருண்ட பக்கங்களையெல்லாம்  வெளிப்படுத்தினார்.

1928ம் ஆண்டு முதல் அவர் கடிதங்களை எழுதினாலும், கடைசியில் அனைத்தையும் ஒருங்கிணைத்து ஒரு நூலாக கொண்டு வருவதில் தாமதம் ஏற்பட்டது. தாமதம் என்றால் கொஞ்ச நஞ்சமல்ல, 40 ஆண்டுகள் !!

  1. எ டிரிட்டைஸ் ஆஃப் ஹியூமன் நேச்சர்

ஆல்பர்ட் ஐன்ஸ்டீன் பற்றி அனைவருக்கும் தெரிந்திருக்கும். மிகப்பெரிய அறிவாளி. சிந்தனையில் உலகையே வியக்க வைத்தவர். அவரைப்பற்றி வந்த நூல்களை அடுக்கி வைக்கவே பல நூலகங்கள் தேவைப்படும். அப்படிப்பட்ட ஒரு மனிதரைப் புரட்டிப் போட்ட புத்தகம் ஒன்று உண்டு. அது தான் A Treatise Of Human Nature

ன் எனும் புத்தகம். மனித இயல்பு குறித்த உளவியல் ஆய்வு தான் இந்த நூல்.

இந்த நூல் மூன்று பகுதிகளாக உள்ள பெரிய நூல். படித்தால் தலைசுற்றக்கூடிய அளவில் சிக்கலான இந்த நூலை எழுதியவர் டேவிட் ஹியூம் என்பவர். 1738ல் வெளியான இந்த நூலை ஐன்ஸ்டீன் முழுமையாக வாசித்து சிலாகித்திருக்கிறார். இந்த நூலைப்பற்றி பலமுறை வியந்து பேசியிருக்கிறார்.

ஐன்ஸ்டீனின் சார்பியல் கோட்பாடு உலகப் பிரசித்தம். அந்த சிந்தனையை முழுமைப்படுத்த அவருக்கு உதவியதே இந்த நூல் என்பதை அவர் வெளிப்படையாகவே தெரிவித்திருந்தார்.

  1.  கோடக்ஸ் செராபினியனஸ்

கோடக்ஸ் செராபினியனஸ் எனும் இந்த நூல் உண்மையிலேயே ஒரு வித்தியாசமான நூல். இந்த நூல் முழுக்க முழுக்க கையால் எழுதப்பட்டது. யாருக்குமே புரியாத ஒரு மொழி, யாராலும் புரிந்து கொள்ள முடியாத படங்கள் என இந்த நூலே ஒரு புதிர்களின் புதையல் தான்.

லூகி செராபினி என்பவர் இரண்டு ஆண்டுகள் எழுதிய இந்த நூல் 360 பக்கங்கள் கொண்டது. மனிதர்கள் விலங்குகளாக உருமாறும் விசித்திர கற்பனை நூல் முழுக்க நிரம்பியிருக்கிறது.

இது ஒரு கற்பனை உலகம் குறித்த ஆசிரியரின் பார்வை என்பவர்களும் உண்டு, இது ஏலியன் குறித்தது என்பாரும் உண்டு. எது எப்படியோ, யாரும் இது என்னவென்பதை சரியாகச் சொல்லவில்லை என்பது தான் உண்மை. எழுதிய ஆசிரியர் உட்பட.

நிஜமான பொய்கள்

Image result for King Nero

அட நெஜமாவா சொல்றீங்க ! நம்பவே முடியல என வியக்க வைக்கின்றன சில விஷயங்கள். நாம் நிஜமென நம்பிய விஷயங்கள் பொய் என்பது தெரிந்தால் நமக்குள் எழும் வியப்பு சுவாரஸ்யமானது. அப்படி ஒரு பத்து விஷயங்கள் இந்த வாரம்.

  1. விண்வெளியில் மனிதர்கள் துள்ளுவார்கள்.

ஆமா, விண்வெளியில் மக்கள் துள்ளித் துள்ளிப் போவார்கள் என்று தானே  நினைக்கிறீர்கள் ? ஹாலிவுட் திரைப்படங்கள் உருவாக்கிய மாயை அது. அவர்களுடைய திரைப்படங்களில் விண்வெளியில் குதித்த உடன் வீரர்கள் துள்ளித் துள்ளிப் போவதுண்டு. இதனால் வெற்றிடங்களில் மனிதர்கள் துள்ளுவார்கள் எனும் ஒரு தவறான அபிப்பிராயம் பரவிவிட்டது. அது நிஜமல்ல.

அது போல, விண்வெளியில் ஒரு மனிதன் பதினைந்து முதல் முப்பது வினாடிகள் வரை எந்த உபகரணமும் இல்லாமல் தாக்குப் பிடிக்க முடியும். அதன்பின் ஆக்ஸிஜன் இல்லாத காரணத்தால் வரும் “ஆஸ்பைசியேஷன்” நிலையினால் உயிருக்கு ஆபத்து நேரிடும்.

இனிமேல் காற்றில்லா இடத்தில் பந்து போல வீரர்கள் துள்ளினால் அது பொய் என்று புரிந்து கொள்ளுங்கள்.

  1. நிலவுக்கு ஒரு பக்கம் இருட்டு

எப்போ பாத்தாலும் பூமியில் இருந்து நிலவோட ஒரு பகுதி மட்டும் தான் தெரியுது. எனவே நிலவோட இன்னொரு பகுதி இருட்டு எனும் ஒரு தவறான சிந்தனை பரவலாக உண்டு. பாட்டி வடை சுட்டுக் கொண்டிருப்பது வெளிச்சத்தின் பக்கம். மற்ற பக்கம் இருட்டு. இது தான் அடிக்கடி கேட்கும் விஷயம். அது உண்மையல்ல.

பூமியின் ஈர்ப்பு விசையின் காரணமாகத் தான் நிலா தன்னுடைய ஒரு பக்கத்தை மட்டும் நமக்குக் காட்டுகிறது. இதை டைடல் லாக்கிங் என்பார்கள்.

இனிமேல் நிலவின் முதுகுப் பக்கம் இருட்டு என யாராவது கதை விட்டால் நம்பாதீர்கள்.

  1. ஒரே இடத்தில் மின்னல் மீண்டும் தாக்காது

பலர் இந்த டயலாக்கை அடிக்கடி சொல்வார்கள். ஒருவாட்டி இடி விழுந்த இடத்தில் மறுபடி விழாது. இந்த பேச்சு எப்படி உருவானது என்பதே தெரியாது. ஆனால் இதை நம்பி மின்னல் காலத்தில் ஏற்கனவே மின்னல் தாக்கிய இடத்தில் ஒதுங்காதீர்கள். மறுபடியும் இடி விழும் சாத்தியம் அங்கே தான் அதிகம்.

உயரமான கட்டிடங்கள், மரங்கள் போன்றவையெல்லாம் மின்னலை வரவேற்கும் இடங்கள். ஒருமுறையோடு அவை நின்று போவதில்லை. போனமுறை அங்க போயிட்டேன், இந்த வாட்டி அங்கே போகவேண்டாம் என மின்னல்கள் பேசி முடிவு செய்வதில்லை.

உதாரணமாக அமெரிக்காவின் எம்பயர் ஸ்டேட் பில்டிங் ஒரு ஆண்டுக்கு சராசரியாக இருபத்தைந்து முறை மின்னல் தாக்குகிறது. ஆனால் அதில் பாதுகாப்பு அம்சங்கள் இருப்பதால் கட்டிடத்துக்கு ஆபத்து நேர்வதில்லை.

  1. சீனி சாப்பிட்டால் குழந்தைகள் சுறுசுறுப்பாகும்.

இந்த ஒரு மாயை எல்லா இடங்களிலும் உண்டு. எல்லா நாடுகளிலும் உண்டு. இது உண்மையா என ஆராய அமெரிக்க ஆய்வாளர்கள் கேரல் என்பவர் தலைமையில் நீண்ட நெடிய ஆய்வுகள் பல மேற்கொண்டார்கள். “அப்படியெல்லாம் ஒண்ணும் இல்லையே” என அடித்துச் சொல்லிச் சென்றன ஆய்வு முடிவுகள்.

ஆனாலும் பெற்றோர்களால் அதை நம்ப முடியவில்லை. சுகர் சாப்டா ரொம்ப ஆக்டிவா இருக்கான் என நினைத்துக் கொள்கின்றனர். எல்லாம் மாயையே.

சோர்வா இருக்கு கொஞ்சம் எக்ஸ்ட்ரா சீனி போட்டு காபி குடிப்போம் என இனிமேல் நினைக்காதீர்கள்.

  1. புலன்கள் ஐந்து

கண்டு, கேட்டு, உணர்ந்து, முகர்ந்து, சுவைக்கும் ஐம்புலன்களே நமக்கு உண்டு என்பது தான் நாம் பொதுவாக படித்த சங்கதி. உண்மையில் நமக்கு இருப்பவை ஐம்புலன்கள் அல்ல என்கின்றன பல்வேறு ஆய்வுகள்.

சில ஆய்வுகள் புலன்கள் இருபத்து ஒன்று என்கின்றன. சமநிலை, வெப்பம், வலி போன்றவையெல்லாம் பெரும்பாலான ஆய்வுகளில் இடம்பெறும் புலன்கள். இவையெல்லாம் ஐம்புலன்களைப் போல தனித்துவமானவை என்பதை அந்த ஆய்வுகள் பக்கம் பக்கமாய் விளக்குகின்றன.

இவைதவிர கற்பனை, நினைவு, பகுத்தறிவு மற்றும் மதிப்பிடுதல் போன்றவற்றை இன்டர்னல் சென்ஸ்கள் அதாவது உட்புலன்கள் என்கின்றனர். அவற்றையும் புலன்களின் வகையில் தான் சேர்க்க வேண்டும் என்பது அவர்களுடைய கோரிக்கை.

  1. வானவில்லுக்கு ஏழு நிறம்

வானவில்லின் நிறங்கள் எத்தனை என்று கேட்டால் சின்னக் குழந்தை கூட ஏழு என்று தன் மழலை வாயால் சொல்லும். அந்த ஏழு வர்ணங்களை நினைவில் வைத்துக் கொள்ள “Roy G. Biv” உசெட் என்றொரு பெயரை பள்ளிக் கூடங்களில் சொல்லித் தருவார்கள். சிவப்பு ஆரஞ்ச் மஞ்சள் பச்சை நீலம் இன்டிகோ, வயலட் எனும் ஏழு நிறங்களையும் அது குறிக்கும்.

உண்மையில் வானவில் என்பது ஒரு நிறப் பூச்சு. மனிதனுடைய கண்கள் தான் அடுக்கடுக்கான நிற வரிசையாய் அதைக் காட்டுகிறது.

ஏழுக்கு மேற்பட்ட நிறங்களை உடைய வானவில்கள் உண்டு. அவற்றை நியூமரி என்று பெயரிட்டு அழைக்கின்றனர். ஒரே வர்ணம் ஒன்றுக்கு மேற்பட்ட தடவை வானவில்லில் தெரிவதும் உண்டு.

எனவே இனிமேல் வானவில்லின் நிறங்கள் எத்தனை என யாரேனும் கேட்டால், “ஏழாகவும் இருக்கலாம்” என்றே சொல்லிக் கொள்ளுங்கள்.

  1. மின்விளக்கை கண்டுபிடித்தவர்

இந்த கேள்விக்கு விடை தாமஸ் ஆல்வா எடிசன் என்பதைத் தான் நமது பள்ளிக்கூடங்கள் சொல்லித் தருகின்றன. ஆனால் அது தவறு என்பது வியப்பான செய்தி. தாமஸ் ஆல்வா எடிசன் மின்விளக்கை வெற்றிகரமாய் கண்டுபிடித்து தனது பெயரை வரலாற்றில் பதித்து வைத்தது 1880ம் ஆண்டு. ஆனால் அதற்கும் 40 ஆண்டுகளுக்கு முன்பே மின்விளக்கை ஒருவர் கண்டுபிடித்து விட்டார். அவர் பெயர் வாரன் டி லே ரு.

பிரிட்டனைச் சேர்ந்த விஞ்ஞானியான இவர் பிளாட்டினம் சுருளை ஒரு வெற்றிடக் குழாயில் வைத்து மின்சாரத்தை அதில் பாயச் செய்தார். பளிச் என எரிந்தது மின் விளக்கு !பிளாட்டினம் அதிக வெப்பத்தைத் தாங்கும் என்பதால் இதைப் பயன்படுத்தினார். ஆனால் அதன் தாக்குப் பிடிக்க முடியாத விலை இந்த விளக்கை பிரபலமில்லாமல் செய்துவிட்டது.

தாமஸ் ஆல்வா எடிசன் பெயர் வாங்கிப் போய்விட்டார். இதே போல பல்வேறு கண்டுபிடிப்புகளை எடிசன்  உள்வாங்கியும், அடியொற்றியும் தான் தனது கண்டுபிடிப்புகளை செய்தார் என பல அறிவியல் ஆய்வாளர்கள் குறிப்பிட்டுள்ளனர்.

8 ரோமும் நீரோ மன்னனும்

ரோம் பற்றி எரிந்து கொண்டிருந்த போது நீரோ மன்னன் பிடில் வாசித்துக் கொண்டிருந்தார். எனும் வாக்கியத்தைக் கேட்காதவர்கள் இருக்க முடியாது. ஆனால் அது உண்மையா எனும் கேள்வி வலுவாக எழுகிறது.

கிபி 64ம் ஆண்டு ஜூலை மாதம் 18, 19 தியதிகளில் தான் ரோமாபுரி பற்றி எரிந்த அந்த நிகழ்வு நடந்தது. அப்போது நீரோ மன்னன் ஒரு பாடல் பாடிக்கொண்டிருந்தார் என ஸ்வெட்டானிஸ் எனும் வரலாற்று ஆய்வாளர் கொளுத்திப் போட்ட திரி தான் இந்த செய்தி பற்றிப் படரக் காரணம்.

ஆனால் கொர்னேலியஸ் டாகிடஸ் எனும் வரலாற்று ஆய்வாளர் அந்தக் காலகட்டத்தைச் சேர்ந்தவர். கவர்னராகவும், கவுன்சிலராகவும், செனட்டராகவும், வரலாற்று ஆய்வாளராகவும் மிளிர்ந்தவர். “ரோம் பற்றி எரிந்தபோது நீரோ மன்னன் பிடில் வாசித்துக்கொண்டிருந்தார்” என்பது மாபெரும் புரளி என்கிறார் அவர்.

டாகிடஸின் குறிப்புகளின் படி நீரோ மன்னன் அந்த நிகழ்வின் போது அதிர்ந்து போய் நிவாரண விஷயங்களை மிகத் துரிதமாக மேற்கொண்டார். பாதிக்கப்பட்டவர்களுக்கு உணவுகளை அளித்தார், தங்குமிடங்களை உருவாக்கி மக்களுக்கு உதவினார். தனது சொந்தப் பணத்தையே கொடுத்து மக்களுக்கு உதவினார்.

எல்லாவற்றுக்கும் மேலாக, பிடில் எனும் இசைக்கருவியின் வரவே பத்தாம் நூற்றாண்டுக்குப் பிறகு தான் என்கிறது வரலாறு ! இனிமே நீரோ மன்னன் கதையை கொஞ்சம் கவனமா தான் பயன்படுத்தணும் போல !

9 வான்கோ தனது காதைத் தானே வெட்டினார்

வான்கோ தனது காதை தானே வெட்டினார். வெட்டிய காதை அப்படியே தனது காதலிக்கு பார்சல் பண்ணினார் என ஒரு கதை உண்டு. ஆனால் உண்மையில் அப்படி ஒரு சம்பவம் நடக்கவே இல்லை.

உண்மையில் நடந்த கதை வேறு. வான்கோவுக்கும் அவரது நண்பர் பால் காகுயின் என்பவருக்கும் இடையே ஒரு சண்டை. வான்கோ கோபத்தினால் ஒரு வைன் கோப்பையை நண்பன் மீது எறிந்தார். நண்பர் தன்னிடமிருந்த வாளை எடுத்து ஒரே சீவு. வான்கோவின் காது கீழே தெறித்தது. இந்த நிகழ்வுகளெல்லாம் வான்கோவின் கடிதங்களிலிருந்து கிடைத்ததாக வரலாற்று ஆய்வாளர் ஹான்ஸ் ஹாஃப்மேன் தெரிவிக்கிறார்.

10 ஏரோப்ளேன்ல போன் பேசினா ஆபத்து

ஏரோப்ளேனில் போகும்போது தவறாமல் கேட்கும் ஒரு அறிவிப்பு ” போனை சுவிட்ச் ஆஃப் பண்ணுங்க’ என்பது தான். விமானத்தில் பயணிக்கும் போது போனில் பேசினால் சிக்னல்கள் பின்னிப் பிணைந்து விமானம் விபத்துக்குள்ளாகும் எனும் அச்சம் பொதுவாகவே உண்டு.

ஆனால் அது உண்மையல்ல. ஃபெடரல் ஏவியேஷன் அட்மினிஸ்ட்ரேஷன் கடந்த கால்நூற்றாண்டு காலமாக விமானத்திலுள்ள அனைவரும் போனை பயன்படுத்தினால் வரும் ரேடியோ பிரீக்வன்சியை விட 100 மடங்கு அதிக வலிமையான அலைகளைக் கொண்டு சோதித்து வருகின்றனர். ஒரு சின்ன சிக்கல் கூட இன்று வரை உருவாகவில்லை. உருவாகப் போவதும் இல்லை.

விமானத்தில் வருகின்ற அறிவிப்புகளைக் கேட்கவும், விமானப் பணியாளர்களின் பணி இடைஞ்சல் வராமல் இருக்கவும், பக்கத்து பயணிகளின் அசௌகரியத்தைத் தவிர்க்கவும் இத்தகைய விதிமுறைகளை விமானங்கள் வைத்திருக்கின்றன என்பது தான் உண்மை.

TOP 10 : விடுபடா மர்மங்கள்

Image result for voynich

இந்த பூமி மர்மங்களின் தேசம். அந்த மர்மங்கள் தான் வாழ்க்கையை சுவாரஸ்யமாக்குகின்றன. எத்தனையோ பேர் விடுவிக்க முயன்றும் முடியாமல் போக்குக் காட்டும் மர்மங்கள் வியக்க வைக்கின்றன. அப்படி விரவிக் கிடக்கும் நூற்றுக் கணக்கான மர்மங்களில் பத்து மர்மங்கள் வை.

  • வாய்னிச் எழுத்துகள்

பதினைந்தாம் நூற்றாண்டுகளில் எழுதப்பட்டதாகக் கருதப்படும் ஒரு நூல் இது. படங்களும், எழுத்துகளும், குறியீடுகளும் நிரம்பியிருக்கும் 240 பக்க நூல். இந்த நூல் சொல்ல வரும் விஷயம் என்ன என்பதை யாராலும் புரிந்து கொள்ள முடியவில்லை.

இடமிருந்து வலமாக, மிகத் தெளிவாக படங்களோடு எழுதப்பட்டிருக்கிறது இந்த நூல். ஆனால் அப்படி ஒரு மொழி எங்கும் இருந்ததேயில்லை.

இது ஏலியன் புத்தகமாக இருக்கலாம் என ஒரு சாரார் நினைக்கின்றனர். இல்லையில்லை, இது மிகப்பெரிய தத்துவ நூல். இதைப் புரிந்து கொள்ளும் போது உலகமே வியந்து பார்க்கும் தத்துவ சிந்தனைகள் கிடைக்கும் என சிலர் வாதிடுகின்றனர். அப்படியெல்லாம் இல்லை இது உலகின் பசுமைப் புரட்சிக்கான ஒரு மாபெரும் விதை. விவசாயம், மருத்துவம் போன்ற அனைத்து விஷயங்களையும் விளக்குகின்ற மாபெரும் புத்தகம் என மற்றொரு சாரார் கருதுகின்றனர்.

இதெல்லாம் யாரோ விளையாட்டுக்காக கிறுக்கி வைத்த நூல், தேவையில்லாம பணமும் நேரமும் செலவிடாதீங்க என வேறு சில அறிஞர்கள் கருத்து தெரிவிக்கின்றனர்.  

இந்த நூல் ஏதேனும் வியப்புகளைக் கொண்டு வருமா, அல்லது புஸ்வாணமாய் போகுமா என்பது புதைந்து கிடக்கும் அதன் புரியாத வார்த்தைகளுக்குத் தான் தெரியும்.

  1. பெர்முடா முக்கோணம்

மர்மங்களைப் பற்றிப் பேசும்போது பெர்முடா முக்கோணத்தைப் பற்றிப் பேசாமல் இருக்க முடியாது. சாத்தானின் முக்கோணம் என்றும் இதை அழைப்பார்கள்.

வட அட்லாண்டிக் கடற்பகுதியிலுள்ள மிகப்பெரிய இடம் அது. பதின்மூன்று இலட்சம் சதுர கிலோ மீட்டர் முதல் முதல் நாற்பது இலட்சம் வரையிலானது. இந்த எல்லைக்குள் வருகின்ற விமானங்கள், கப்பல்கள் பலவும் மாயமான முறையில் காணாமல் போய்விடுவது தான் நீடிக்கின்ற மர்மம்.

மோசமான வானிலையாய் இருக்கலாம் என்றும், ஏலியன்கள் கடத்திச் சென்றதாக இருக்கலாம் என்றும், அந்த இடம் டைம் மெஷின் போல செயல்பட்டு விமானங்களை ஏதோ ஒரு ஆண்டுக்கு கொண்டு சென்றிருக்கலாம் என்றும், அந்த இடத்தில் ஏதேனும் இயற்பியல் மாற்றங்கள் இருக்கலாம் என்றும் ஆளாளுக்கு ஒரு கதையைச் சொல்கின்றனர்.

மிரட்டும் பல்வேறு கதைகளின் தொகுப்பாக இருக்கிறது பெர்முடா முக்கோணம்.

  1. மர்மப் பெண்

1963ம் ஆண்டு அமெரிக்க ஜனாதிபதியா ஜான் எஃப் கென்னடி கொலை செய்யப்பட்டார். அவருடைய கொலை நடந்த நிகழ்வுகளை ஆய்வு செய்த போது புகைப்படங்களில் ஒரு பெண் தென்பட்டார். ரஷ்யப் பெண்கள் அணிவது போன்ற ஒரு ஆடையை அவர் அணிந்திருந்தார்.

கொலை நடந்தபோது மக்கள் அலறி அடித்துக் கொண்டு சிதறி ஓடினார்கள். இவரோ அசால்டாக நின்று கொண்டு தன்னிடமிருந்த கேமராவினால் காட்சிகளைப் பதிவு செய்து கொண்டே இருந்தார். நிறைய இடங்களில், நிறைய கோணங்களில் அவர் தென்பட்டார்.

அந்தப் பெண் யாரென கண்டுபிடிக்க ஆளானப் பட்ட அமெரிக்கா தலைகீழாக நின்றும் முடியவில்லை. அவர் யார், அந்தக் கொலையோடு அவருக்குத் தொடர்பு உண்டா ? என்பது இன்று வரை விடுபடாத மர்மமாகவே இருக்கிறது.

4 பிரிட்ஜ் வாட்டர் முக்கோணம்

அமெரிக்காவின் தென்கிழக்குப் பகுதியில் சுமார் ஐநூற்று இருபது சதுர கிலோமீட்டர்கள் கொண்ட ஒரு மர்ம இடம் இருக்கிறது. இந்த இடத்தைப் பற்றி வருகின்ற கதைகள் சிலிர்க்கவும், பயப்படவும் வைக்கின்றன.

பெரும்பாலான கதைகள் ஏலியன் தொடர்பானவை. திடீரென தோன்றுகின்ற மிகப்பிரகாசமான ஒளிப்பந்து, அந்த இடத்திற்கு நேராக வானில் தெரியும் வெளிச்சம், அசையும் நெருப்பு உருவங்கள் என நேரடியாகப் பார்த்த சாட்சிகள் எக்கச்சக்கம்.

மிகப்பெரிய காலடித் தடங்கள் இந்தப் பகுதியில் தோன்றி அடிக்கடி  மிரள வைக்கின்றன. மனிதனும், மனிதக் குரங்கும் கலந்த ஆஜானுபாகுவான உருவத்தைக் கண்டவர்கள் உண்டு. மிரட்டலான டிராகன் போன்ற பறவையைப் பார்த்தவர்கள் உண்டு. இறகுகள் பன்னிரண்டு அடி வரை நீளமான வித்தியாசமான பறக்கும் ஜந்துக்களைக் கண்டவர்கள் உண்டு.

பதட்டத்தின் பதுங்கு குழியாகவே இன்றும் இருக்கிறது இந்த இடம்.

  1. ஜாம் மினார்

மேற்கு ஆப்கானிஸ்தானில் அமைந்துள்ள இந்த மினார் ஒரு வரலாற்று மர்மத்தைச் சுமந்திருப்பதாக ஆய்வாளர்கள் கருதுகின்றனர். சுமார் அறுபத்தைந்து மீட்டர் உயரத்தில் அமைந்துள்ள இந்த மினார் 1190ம் ஆண்டு கட்டப்பட்டது. சுட்ட செங்கற்கள், மண் போன்றவற்றால் நுணுக்கமான வேலைப்பாடுகளுடன் அமைந்திருக்கிறது.

இத்தனை ஆண்டுகள் தாண்டியும், இன்னும் நிமிர்ந்து நிற்பது இதன் கட்டிடக்கலையை வியக்க வைக்கிறது. 2002ம் ஆண்டு யுனெஸ்கோ பாரம்பரியக் களமாக அறிவிக்கப்பட்ட இந்த கட்டிடத்தில் இஸ்ராமியர்களின் புனித நூலான குரானிலிருந்து வாசகங்கள் குறிக்கப்பட்டிருக்கின்றன.

இந்தியாவின் குதுப்மினார் இதை விடப் பெரியது என்றாலும், ஜாம் மினாரின் வேலைப்பாடுகள் சிறப்புக் கவனம் பெறுகின்றன. இது அழிந்து போன நாகரீகத்தின் அடையாளமா, அல்லது இறைவனைப் புகழ்வதற்காக இஸ்லாமிய மன்னர் அமைத்ததா எனும் கேள்விகள் இதைச் சுற்றி இருக்கின்றன.

மிகப்பெரிய மலைகளுக்கு நடுவே பூமியின் ஆச்சரியக் குறி போல நிமிர்ந்து நிற்கும் இந்த மினார் தனக்குள் வரலாற்று மர்மத்தை ஒளித்தே வைத்திருக்கிறது.

6 தி எமரால்ட் டேப்லெட்

தொட்டதெல்லாம் பொன்னாகும் கதை படித்திருப்பீர்கள். எந்த ஒரு உலோகத்தையும் பொன்னாக மாற்றும் ஆல்கமி எனப்படும் ரகசியம் தான் இந்த எமரால்ட் எழுத்துகளில் இருந்த ரகசியம். “தத்துவ ஞானியின் கல்” எனப்படும் ஒரு பொருளைக் குறித்த ரகசியம் இதில் உண்டு. அது தான் உலோகங்களை பொன்னாக மாற்றும் வித்தையின் முக்கிய அம்சம்.

ஆறாம் நூற்றாண்டுக்கும், எட்டாம் நூற்றாண்டுக்கும் இடைபட்ட காலத்தில் அரேபிய மொழியில் உருவான நூல் இது. இந்த எழுத்துகளைக் குறித்த செய்திகளும், இந்த நூலில் மொழிபெயர்ப்புகளும் மிஞ்சினாலும் இதன் ஒரிஜினல் இப்போது எங்கே இருக்கிறது என்பது மர்மமாகவே இருக்கிறது. இந்த காலத்தில் இதன் ரகசிய முடிச்சை அவிழ்க்க பலர் முயன்றனர். ஆனால் யாரும் வெற்றியடையவில்லை.

இந்த ரகசியத்தைக் கண்டுபிடிப்பவர் உலகையே விலைபேசி விட முடியும் என்பதால் இந்த மர்மத்தின் மீதான தேடல் தொடர்ந்து கொண்டே இருக்கிறது.

7 உறைந்த மனிதர்கள்

இரண்டு பேர் ஒரே மாதிரி ஒரு செயலைச் செய்தாலே, “என்னப்பா ஒரே மாதிரி செய்றே” என்பார்கள். ஒரு கூட்டம் மக்கள் தங்களை அறியாமலேயே அப்படி செய்யும் மர்மம் அடிக்கடி நிகழ்கிறது.

2007ம் ஆண்டு நியூயார்க் நகரின் கிரான்ட் சென்ட்ரல் டெர்மினல் ரயில் நிலையத்தில் இப்படி ஒரு நிகழ்வு நடந்தது. மிகச் சரியாக மணி 2:30 என்றபோது சுமார் இருநூறு பேர் நின்ற இடத்தில், செய்து கொண்டிருந்த வேலையில் அப்படியே உறைந்து நின்றார்கள். முழுதாக ஐந்து நிமிடங்கள் அவர்கள் சிலையைப் போல நின்றார்கள், மற்றவர்கள் தங்கள் பணியை வழக்கம் போல செய்து கொண்டிருந்தனர்.

அமெரிக்கா மட்டுமல்லாமல், பெல்ஜியம், பிரிஸ்டன் இங்கிலாந்து என பல இடங்களில் நடந்த இதே போன்ற மர்ம நிகழ்வை மருத்துவர்கள் “மாஸ் ஹிஸ்டீரியா” என்கின்றனர். ஆனாலும் இந்த மர்மத்தின் உண்மையான காரணம் என்ன என்பது முடிச்சவிழ்க்கப் படாமலேயே இருக்கிறது.

  1. பெர்மேஜா தீவு

மெக்சிகோ அருகில் இருந்த ஒரு தீவு பெர்மேஜோ. 1970 களில் உயிர்ப்புடன் இருந்த தீவு அடுத்த இருபது ஆண்டுகளுக்குப் பின் சட்டென காணாமல் போய்விட்டது. அந்த தீவுடன் சேர்ந்து அந்த தீவு தொடர்பான தகவல்களும், அதிலே இருந்த எண்ணை வளங்கள் பற்றிய தகவல்களும் மாயமாகிவிட்டன.

1535 க்கும், 1775 க்கும் இடைப்பட்ட காலத்திலுள்ள வரைபடங்களில் இந்த தீவு இருக்கிறது, பின் காணாமல் போய் விட்டது. அதன் பின் 1800களின் பிற்பகுதியில் மீண்டும் காணப்பட்டது, இப்போது மீண்டும் மாயமாகியிருக்கிறது ! அந்த தீவு எங்கே போச்சு என்பதைக் கண்டு பிடிக்க மெக்சிகன் அரசு பல கோடி ரூபாய் செலவு செய்து நடத்திய தேடுதல் வேட்டைகளில் எந்த பயனும் கிடைக்கவில்லை.

இதிலுள்ள எண்ணை வளங்களுக்காக இந்த தீவு திட்டமிட்டே மறைக்கப்பட்டதா ? அல்லது இது மிதந்து மிதந்து மூழ்கும் ஏதேனும் விசித்திரத் தீவா ? அல்லது அப்படி ஒரு தீவு இருந்ததே ஒரு தோற்ற மயக்கமா எனும் மர்மக் கேள்விகளுக்கு விடை இன்னும் கிடைக்கவில்லை.

9 ஸ்டார்ரி நைட்

ஓவியத்தில் கரைகடந்த வான்கோவின் மிகப்பிரபலமான ஓவியம் ஸ்டார்ரி நைட். 1889ம் ஆண்டு இதை அவர் வரைந்தார். அப்போது அவருக்கு காது கேட்காது. எனவே அவர் ஒரு ஆலயத்தில் தஞ்சம் புகுந்திருந்தார். அங்கே அவர் தங்கியிருந்த 54 வாரங்களில் 240 ஓவியங்களை வரைந்து தள்ளினார் அவற்றில் ஒன்று தான் இந்த ஸ்டார்ரி நைட்.

அவருடைய ஓவியத்தில் இருப்பது என்னவென்பதை யாரும் அறிந்து கொள்ளவில்லை. அது அவருடைய கற்பனையில் வெளிப்பாடு என்று தான் நினைத்தார்கள். 2006ம் ஆண்டு மெக்சிகோ பல்கலைக்கழகம் அந்த பெயின்டிங்கை ஆய்வு செய்தபோது தான் அதிர்ச்சியளிக்கும் பல விஷயங்கள் தெரிய வந்தன.  

அந்த பெயின்டிங் “கொந்தளிப்பை” ப் பற்றியது. 1940 வரை அறியப்படாமல் இருந்த கொந்தளிப்பின் நுணுக்கங்களை ஐம்பது ஆண்டுகளுக்கு முன்பே மிகத் துல்லியமாக அந்த படத்தில் வரைந்திருந்தார். சின்ன கணிதப் பிழை கூட அதில் இல்லை.

வான்கோ எப்படி அந்த ஓவியத்தை வரைந்தார் ? எப்படி அவருக்கு அந்த கண்டுபிடிக்கப்படாத நுணுக்கங்கள் தெரிந்திருந்தன ? வான்கோவின் ஓவியங்களைப் போலவே அந்த மர்மமும் ஒளிந்தே இருக்கிறது.

10  ஸ்ரௌட் ஆஃப் டுரின்

இது ஒரு லினன் துணியில் பதிந்திருக்கும் ஒரு முகம். சிலுவையில் அறைந்து கொல்லப்பட்ட ஒரு மனிதனின் முகம் என்கின்றனர் ஆய்வாளர்கள். கிறிஸ்தவர்களில் ஒரு பிரிவினர் இது இயேசுவின் உடலைச் சுற்றியிருந்த கல்லறைத் துணி என நம்புகின்றனர். இத்தாலியிலுள்ள திருமுழுக்கு யோவான் ஆலயத்தில் இப்போது இந்த துணி இருக்கிறது.

ஏராளமான அறிவியல் ஆய்வுகள் நடந்தாலும் இதன் மர்மம் விலகவில்லை. எப்படி இந்த முகம் துணியில் பதிந்தது, ஏன் அழியாமல் இருக்கிறது எனும் கேள்விகள் முடியவில்லை. இதே போன்ற ஒன்றை உருவாக்க நினைத்த முயற்சிகள் எல்லாம் தோல்வியில் முடிந்திருப்பது மர்மத்தை இன்னும் விரிவாக்குகிறது.

இன்றும் பல்வேறு மர்மங்களையும், வியப்புகளையும் ஒளித்து வைத்துக் கொண்டு புதிர்களின் வரைபடமாய் இருக்கிறது இந்த துணி.

TOP 10 : மதச் செய்திகள்

Image result for scientology

இந்தியா மதங்களின் தேசம். பல்வேறு மதங்கள் இருந்தாலும் ஒற்றுமையாய் கைகோத்து வாழ கற்றுக் கொடுக்கும் சமூகம் நமக்கு இருக்கிறது. ஆங்காங்கே விஷமிகள் தூவி விடும் விதைகள் கலவரங்களை உருவாக்கினாலும், அதை அடையாளம் கண்டு கொண்டு சட்டென அகற்றி விடும் மனித நேயம் மிக்க மக்கள் நம்மிடையே ஏராளம் உள்ளனர். அதனால் தான் நமது தேசம் உலக மக்கள் அனைவரும் வியக்க வைக்குமளவுக்கு இனிமையாய் இருக்கிறது.

நமக்குத் தெரியாத பல மதம் சார்ந்த விஷயங்கள் உலகெங்கும் கொட்டிக் கிடக்கின்றன. அப்படிப்பட்ட விஷயங்களில் ஒரு பத்து செய்திகள் இங்கே.

  1. கடவுளின் கையெழுத்து.

மனித உடல் ஒரு ஆச்சரியம் என்பது எல்லோருக்கும் தெரியும். மனிதன் இறைவனின் படைப்பு என்பது தான் ஆத்திகர்களின் நம்பிக்கை. அதை நிரூபிக்கும் விதமாகத் தான் மனிதனுடைய உடல் இருக்கிறது. மனித உடலின் வியப்புகளை இன்னும் மனித விஞ்ஞானம் முழுமையாய் புரிந்து கொள்ளவில்லை என்பது தான் நிஜம். மனித மூளையைப் போன்ற ஒரு கணினியையோ, மனித கண்களைப் போன்ற ஒரு கேமராவையோ உருவாக்குதல் சாத்தியமில்லை என்கிறது விஞ்ஞானம்.

மனிதர்கள் 22,000 மரபணுக்களால் ஆனவர்கள். மனித மரபணுக்களில் வெறும் மூன்று சதவீதம் தான் இந்த எண்ணிக்கை. அப்படியானால் மிச்சம் 97% மரபணுக்களில் என்ன எழுதப்பட்டிருக்கிறது. அதில் கடவுளின் கையெழுத்து இருக்கிறது ஒவ்வொரு மனிதனுக்கும் அது தனித்தனியாய் இருக்கிறது. இதை நான் சொல்லவில்லை, கஸகஸ்தானிலுள்ள இரண்டு விஞ்ஞானிகள் 2013ம் ஆண்டு இதைச் சொன்னார்கள். மரபணு ஆராய்ச்சியாளர் பிரான்சிஸ் கோலின்ஸ்கடவுளின் மொழிஎனும் நூலில் இந்த மரபணுக்களில் இருப்பவை கடவுளின் எழுத்துகள் என்கிறார்.

  1. எபியோனைட்ஸ்

ஒரு குழுவினர் இயேசுவே கடவுள் என வழிபட்டார்கள், ஆனால் கிறிஸ்தவர்கள் அல்ல. குழப்பமாக இருக்கிறதா ? முதல் சில நூற்றாண்டுகளில் எபியோனைட்ஸ் என்றொரு மதக் குழு இருந்தது. இவர்களுடைய நம்பிக்கை இயேசு யூதமதத்தின் சட்டங்களைக் கடைபிடித்ததால் கடவுளானார் என்பது தான். கி.பி 70களில் இந்த மதம் ஆரம்பமானது என நம்பப்படுகிறது.

இவர்கள் யூதர்களின் கடவுள் இயேசு என்றும், அவர் இறந்து உயிர்த்தார் என்றும் பறைசாற்றினார்கள். ஆனால் கன்னியிடமிருந்து பிறந்தார், உலக மீட்பர் போன்ற கிறிஸ்தவ தத்துவ சிந்தனைகளை எதிர்த்தனர். காலப்போக்கில் கிறிஸ்தவ சிந்தனைகள் வலுப்பெற்று, நம்பிக்கைகள் பரவலான போது இந்த மதம் கொஞ்சம் கொஞ்சமாய் அழிந்து காணமலேயே போய்விட்டது.

  1.  மணிசேயிஸம்

நான் தான் கடவுளிடமிருந்து அனுப்பப்பட்ட தூதன் என்று சொல்லிக் கொண்ட ஒரு நபர் உருவாக்கிய ஒரு மதம் சட்டென கிளை விட்டுப் பரந்தது. இரண்டாம் நூற்றாண்டின் இறுதியில் இது ஆரம்பமானது. மணி எழுதிய நற்செய்தி தான் இந்த மதத்தின் புனித நூல்.

அறிவைத் தேடு, அதுவே ஆண்டவன் வீடுஎன்பது தான் இந்த மதத்தின் அடிப்படை சித்தாந்தம். நல்ல அறிவைத் தேடி மூளையைச் செழுமையாக்குபவனுக்கு சொர்க்கம் நிச்சயம் என்பது தான் இந்த மதத்தின் கோட்பாடு. சீனா, ரோம் என பல இடங்களில் பரவிய இந்த மதம் காலப்போக்கில் கொள்வாரில்லாமல் தேய்ந்து அழிந்தது. கிபி ஆயிரம் வரை இதன் பதிவுகள் காணப்படுகின்றன.

  1. சாத்தான் வணக்கம்

இதென்னடா புதிய கதை ? எல்லோரும் கடவுளைத் தானே வணங்குவார்கள். கடவுளுக்கு எதிராக இருக்கும் சாத்தானை வணங்குவார்களா ? என வியக்க வேண்டாம். உலகெங்கும் வேர்விட்டு முளைவிட்டுக் கிளைவிட்டு வளர்ந்து வருகின்ற ஒரு மதம் சாத்தான் வழிபாடு.

1948களிலேயே இதன் விதை தூவப்பட்டது, 1966ல் அதிகாரபூர்வமாகசாத்தான் ஆலயம்கட்டப்பட்டு வழிபாடும் துவங்கப்பட்டது. நல்ல மதங்கள் மண்ணில் நல்லவர்களாக வாழ்ந்து, சொர்க்கத்தை அடையச் சொல்கின்றன. சாத்தான் வணக்கமோ, சாத்தானை வணங்கு உலக செல்வங்கள் கிடைக்கும் என அழைப்பு விடுக்கின்றன.

குடும்பங்கள் சிதையவேண்டும், அடுத்தவன் கெட்டுப் போகவேண்டும், உலகம் உருப்படாமல் போகவேண்டும் போன்றவையெல்லாம் இவர்களுடைய பிரார்த்தனைகளில் சில.

  1. ஷங் சி லீ அசோஷியேஷன்

நான் கடவுள்என காலர் தூக்கித் திரியும் மதவாதிகள் அடிக்கடி முளைப்பதுண்டு. தங்களுடைய கூற்றை மெய்ப்பிக்க அவர்கள் ஏதேனும் வித்தைகள் செய்து மக்களை வசீகரிப்பதும் உண்டு. அந்த விதத்தில் ஷங் சி லி வித்தியாசமானவர்.

தன்னிடம் ஏராளம் சக்தி இருப்பதாக இவர் சொல்லிக் கொள்வார். தனது புகைப்படங்களை எடுத்து போட்டோ ஷாப் வேலைகள் செய்து தன்னைச் சுற்றி வானவில்லும், ஒளி வட்டமும் தெரிவதாக மாற்றி விடுவார். இதன் மூலம் ஏராளமான மக்களை ஏமாற்றினார் என்கிறது தைவான் அரசு.

வெறும் போட்டோக்களை வைத்து ஒரு மதத்தை உருவாக்கி அதன் மூலம் பல மில்லியன் டாலர்களை ஒருவர் சம்பாதித்தது வியப்பு தான் !

  1. மார்மன்கள்

வெளிப்பார்வைக்கு மார்மன்கள் கிறிஸ்தவ மதத்தின் கிளை மதம் போலத் தோன்றும். ஆனால் இரண்டும் சம்பந்தமில்லாத இரண்டு மதங்கள். ஜாண் ஸ்மித் என்பவரால் 1820 ல் ஆரம்பிக்கப்பட்டது இந்த மதம். ஜாண் ஸ்மித் இயேசுவையும், கடவுளையும் கண்டதாகவும் அதன் அடிப்படையில் புதிதாய் ஒரு மதத்தை ஆரம்பித்ததாகவும் பிரகடனம் செய்யத் தொடங்கினார்.

தங்கச் சுருள்களில் எழுதப்பட்டிருந்த கடவுளின் வார்த்தைகள் தான் மார்மன்களின் புனித நூல் என அவர் அறிவித்தார். இயேசுவை கண்டதாக ஒரு பதிவும், இயேசுவையும் தூதர்களையும் கண்டதாக ஒரு பதிவும், கடவுளை நெருப்பு தூணாக கண்டதாய் ஒரு பதிவும், கடவுளையும் இயேசுவையும் கண்டதாக ஒரு பதிவும் இவரது கதைகளில் உண்டு. கடைசிக் காட்சியே அவரது தற்போதைய வெர்ஷன் நூலில் உள்ளது.

கடவுள் கட்டளையிட்டார் என்று சொல்லி அவர் செய்த செயல்களில் 14 வயது சிறுமியர் உட்பட 40 பேரை திருமணம் செய்து கொண்டதும் அடக்கம்.

  1. ஏலியன் மதம்

டோரதி மார்ட்டின் எனும் ஒரு பெண் ஒரு மதத்தை ஆரம்பித்தார். அவருக்கு ஏலியன் கிரகத்தோடு தொடர்பு இருந்தது. ஏலியன் கிரகமான கிளாரியோன் எனும் கோளில் இருந்து அவருக்கு அடிக்கடி அமானுஷ்யவிதமாக செய்திகள் வந்து கொண்டிருந்ததாக அவருடையஆதரவாளர்கள் நம்பினர்.

டிசம்பர் 21ம் தியதி 1954ல் உலகம் அழியும் என இவர்கள் பிரச்சாரம் செய்தனர். மக்கள் பலர் இவர்களை நம்ப இவர்களுக்கு வருமானமும் அதிகரித்தது, இவர்களுடைய மதம் பரவவும் தொடங்கியது. ஆனால் என்ன, அவர்கள் சொன்ன நாளில் உலகம் அழியவில்லை.

பிறகு வேறு செய்திகள் வந்ததாகவும், இந்த மதம் தான் உலகைக் காப்பாற்ற வேண்டும் எனவும் அவர்கள் கொள்கை மாற்றினார்கள். 1992ல் டோரதி இறந்ததும் ஏலியன் செய்திகள் வருவதும் நின்று போனது, மதமும் அழிந்து போனது.

  1. மாமி வாட்டா

மாமி வாட்டா வை, கடல் கன்னியின் வடிவம் என்று சொல்லலாம். பாதி பெண், பாதி மீன் தான் இந்தக் கடவுள். நீந்திக் கொண்டிருக்கும் போதோ, கடலில் குளிக்கும் போதோ தண்ணீருக்குள் மூழ்கிப் போவது போல உணர்ந்தால் அது இந்த கடல் தெய்வத்தின் வேலையாம்.

அவளுடைய பக்தர்களை அப்படியே கடலுக்கடியில் இழுத்துக் கொண்டு போய் ஆனந்தமாய் வைத்திருக்குமாம். பிறகு அப்படியே பக்தர்களின் கனவுக்குள் நுழைந்து அவர்களை இனிமையான நினைவுகளுக்குள் கொண்டு செல்லுமாம். ஒரு படி மேலே போய் நினைத்த உருவம் எடுத்துக் கொண்டு வந்து பக்தர்களை சந்திக்கவும் செய்யுமாம்.

  1. ஆல்மெக் மதம்

உலகெங்கும் பல்லாயிரக்கணக்கான மதங்கள் இருந்த சுவடு இல்லாமல் மறைந்து போயிருக்கின்றன. அப்படி ஆயிரம் ஆண்டுகள் வலிமையாய் இருந்த ஒரு மதம் தான் இந்த ஆல்மெக். இன்று அதன் சுவடுகள் இல்லை. கிமு 1400 முதல் கிமு 400 வரை இந்த மதம் இருந்தது.  அதன் பின்பு அந்த மதம் முழுமையாய் அழிந்தது.

இந்த மதம் நமக்கு அறிமுகமான மாயன்கள் மற்றும் ஆஸ்டெக் போன்ற மதங்களின் சாயலிலும், கோட்பாடுகளிலும் இருந்ததாக நம்பப்படுகிறது.

10 சயின்டாலஜி

அறிவியலும், கடவுளும் எப்போதுமே முரண்பட்டவர்கள் எனும் சிந்தனை உண்டு. சயின்டாலஜி அறிவையும், அறிவையும் முன்னிலைப்படுத்தி உருவாக்கப்பட்ட மதம். அறிவியல் புனை கதை எழுத்தாளர் ரான் ஹப்போர்ட் உருவாக்கிய இந்த மதம் இன்று பிரபலம்

சுய அறிவை வளர்த்துக் கொள்ளுங்கள், பயிற்சிகள் கல்வி அறிவியல் இவற்றை வளர்த்துக் கொண்டால் நீங்கள் ஆன்மீகவாதி என்பது தான் இதன் அடிப்படை போதனை.