விரல்களே விளக்குகள்

Image result for nail in wall
எதிர்பாராத
நிகழ்வுகளின் குவியல்,
ஒவ்வோர் எதிர்பார்ப்புகளுக்குமிடையே
முளைத்து வளரும் எதிர்ப்புகள்,
நெருங்க நெருங்க
விலகிச் செல்லும்
தொடு வான இலட்சியங்கள்.
இவற்றின் கலவை தான் வாழ்க்கை !

ரோஜா மேல் பனித்துளி அழகுதான்
ஆனால்
வரப்புகளின் தண்ணீ­ர்தானே வாழ்க்கை.
கனவுகளை
இரவுகளுக்கு ஒத்திவைத்துவிட்டு
நிஜங்களுக்கு முதுகெலும்பு முடைவோம்.

காதல் அழகுதான்,
கவிதை அழகுதான்.
ஆனால்
வறுமையின் அமிலக்குழிக்குள்
வயிற்றுத் தாகம் தானே
அருவியாகிறது ?

மீன்கள் பிடித்துப் பிடித்து
மீந்துபோன வாழ்வில்
மிச்சத்தின் செதில்கள் மட்டுமே.
போதும்.
மீன்கள் சேகரிப்பது தேவை தான்
ஆனாலும்
தூண்டில்கள் தயாராக்குவோம்.

எத்தனை நாள் தான்
ஒற்றைத் தெரசாவும்,
ஒரு காந்தியும் கொண்டே
வரலாறு நகர்த்துவது ?
நூறு கோடி மக்களில்
பெரும்பாலானோர்க்கு
இன்னும் பெயரிடப்படவில்லையே !!!

வெற்றிகளின் பாதையில்
தோல்விகளும் படிக்கட்டுகளே.
தோல்வியின் பாதையில்
வெற்றிகள் கூட படுகுழிகளே…
நமக்குத் தேவையான
முதல் வெற்றி
எங்கே தோல்வியடைகிறோமெனும்
தேடலில் தான்.

கதவுகள், ஜன்னல்கள் எல்லாம்
திறந்துதான் கிடக்கின்றன.
நாம் தான்
சுவரில் அறையப்பட்ட
ஆணிகளாய் இருக்கிறோம்.
*

Advertisements

வெற்றிக்கும், தோல்விக்கும் இடையே ..

வெற்றி தோல்வி பற்றி சிந்தித்தாலே சட்டென நினைவுக்கு வரும் தாமஸ் ஆல்வா எடிசனின் கதை !  ஆயிரக்கணக்கான முறை தோல்வியைத் தழுவிய அவர் கடைசியில் வெற்றிகரமாய் மின்விளக்கைக் கண்டுபிடித்தார். ‘இத்தனை முறை தோற்றுவிட்டீர்களே’ என அவரிடம் கேட்டார்கள். அதற்கு அவர் ‘நான் தோற்றேன் என்று யார் சொன்னது ? எவையெல்லாம் தவறான வழிகள் என்பதைக் கண்டுபிடித்தேன்’ என்றார்.

வெற்றி என்பதும், தோல்வி என்பதும் நமது மனதைப் பொறுத்தது. நமது மதிப்பீடுகளைப் பொறுத்தது. நமது வாழ்க்கையில் நாம் எதை முதன்மைப்படுத்துகிறோம் என்பதைப் பொறுத்தது !

வாழ்க்கையை ஒரு பயணம் என எடுத்துக் கொண்டால், ஒவ்வொரு காலகட்டத்திலும் ஒவ்வொரு விஷயம் நமக்கு இலக்காக இருக்கிறது. ஒவ்வொரு விஷயம் நமக்கு வெற்றியாய் இருக்கிறது. சிறுவயதில் சைக்கிள் ஓட்டுவது வெற்றி என மார்தட்டுவோம். இருபது வயதில் சைக்கிள் ஓட்டுகிறேன் என பீத்திக்கொள்ள முடியாது !

தேர்வில் மதிப்பெண், ஒரு வேலை, திருமணம், குழந்தை வளர்ப்பு, கலைகள் என எல்லாவற்றிலும் நாம் ஒரு விஷயத்தை வெற்றி என கோடு போட்டு வைத்திருக்கிறோம். கோட்டுக்கு இந்தப் பக்கம் வந்தால் வெற்றி, கோட்டுக்கு அந்தப் பக்கம் போனால் தோல்வி என்பதே பெரும்பாலும் நம்முடைய முடிவு.

பெரும்பாலான வேளைகளில் நமது வெற்றியை நிர்ணயிப்பது கூட நாமல்ல. அடுத்தவருடைய தோல்வி தான் ! இன்னொருவரை விட நாம் ஒரு படி மேலே இருப்பதாகக் காட்டி கொள்வது, அல்லது அடுத்தவரை இழுத்து ஒரு படி கீழே தள்ளுவது வெற்றி என கருதிக் கொள்வதுண்டு !

உண்மையில், வெற்றி என்பதும் தோல்வி என்பதும் மாயையே !

வெற்றி என்பதும், தோல்வி என்பதும் வாழ்வின் நிகழ்வுகளுக்கு நாமாகவே இட்டுக் கொண்ட நாமங்கள். மதிப்பெண் பட்டியலில் இந்த இடத்தில் இருந்தால் அது வெற்றி ! பொருளாதாரத்தில் இந்த நிலையில் இருந்தால் அது வெற்றி ! அலுவலகத்தில் இந்த நிலையில் எனில் அது வெற்றி ! கலைகளில் இந்த இருக்கையில் அமர்ந்தால் அது வெற்றி என்றெல்லாம் நாமே மைல்கற்களை போட்டு விடுகிறோம். நமது பயணம் அந்த மைல் கற்களின் வழியாய் போகவில்லையேல் அதைத் தோல்வி என முடிவு செய்து விடுகிறோம்.

வெற்றி என்பது இறைவன் தந்த ஒரு நாளை எப்படி நல்ல முறையில் நாம் செலவிட்டோம் என்பதில் இருக்கிறது. அதே நாளை பிறருக்கு பயனற்ற வகையில் செலவிடும் போது அது தோல்வியாய் மாறிவிடுகிறது ! இப்படிப்பட்ட நாட்களின் கூட்டுத்தொகை நமது வாழ்க்கையின் வெற்றி தோல்வியை பறைசாற்றுகிறது.

ஒரு இடத்தை அடைவதே வெற்றி என முடிவு செய்து விட்டால், அந்தப் பயணத்தின் இடையில் நடக்கின்ற சுவாரஸ்யங்களை மொத்தமாய் இழந்து விடுவோம். மலையின் உச்சியில் ஒரு வீடு இருக்கிறது என வைத்துக் கொள்ளுங்கள். அந்த உச்சியை அடைவது தான் உங்கள் இலட்சியம் என வைத்துக் கொள்ளுங்கள். அதை இரண்டு விதமாக அணுகலாம்.

ஒன்று, போகும் வழியில் மலையை ரசித்து, மலையின் தலையில் தலையாட்டும் இலைகளை ரசித்து, கானகத்தின் காற்றோடு கதை பேசிச் சிரிக்கும் பெயர் தெரியா மலர்களை ரசித்து, கிளைகளில் தாவும் பறவையின் இறகுகளின் மென்மையை ரசித்து, சரசரக்கும் சருகுகளின் இசையை ரசித்து பயணிக்கலாம்.

அல்லது, வீட்டின் கூரையில் மட்டுமே பார்வையை பதித்து, அர்ஜுனர் வில் போல, கல் முள் எல்லாம் தாண்டி வீட்டை அடையலாம். போகும் வழியில் இருக்கின்ற அத்தனை சுவாரஸ்யங்களையும் நிராகரித்து விடலாம்.

இதில் முதலாவது மனிதன் அந்த வீட்டை அடையாவிட்டாலும் மனதுக்குள் குதூகலமாய் இருப்பான். அவனது பயணம் வெற்றி என அவனுக்குத் தோன்றும். இரண்டாவது மனிதனோ வீட்டை அடைந்தாலும் அது அவனுக்கு விருப்பமானதாய் இல்லை என விரைவிலேயே உணரத் துவங்குவான்.

வெற்றி வண்ணத்துப் பூச்சியைப் பிடிப்பதிலல்ல !

அதை ரசிப்பதில் !

“இலட்சியத்தை நோக்கி ஓடுங்கள். தோல்வியடைந்தால் துவளாதீர்கள். நீடிய பொறுமையுடனும், விடா முயற்சியுடனும் ஓடினால் வெற்றி நிச்சயம்” என்றெல்லாம் மூச்சு முட்ட பேசும் தன்னம்பிக்கை உரைகள் நமக்குத் தேவையற்றவை ! அவை பழைய சித்தாந்தத்தின் பிள்ளைகள்.

ஒரு இலக்கை அடைவதல்ல வெற்றி !

இலக்கு எது என அறிவதில் !! 

மரணப் படுக்கையில் மூச்சை இழுத்து இழுத்து விடும் ஒருவரிடம் கேட்டுப் பாருங்கள். சிக்கலில்லாமல் மூச்சு விடுவதே வாழ்க்கையின் வெற்றி என்பார் !

டயாலிஸிஸ் படுக்கையில், தினமும் அளந்து வைத்த அரை டம்பர் தண்ணீரில் மட்டுமே நாக்கை நனைத்து வாழும் ஒருவரிடம் கேளுங்கள், நிறைய தண்ணீர் குடிப்பதே வாழ்க்கையின் வெற்றி என்பார்.

சாலை கடக்க ஆளை எதிர்பார்த்து கலங்கி நிற்கும் பார்வையிழந்தவர் சொல்வார், உலகைக் காண முடிந்தால் அதுவே மிகப்பெரிய வெற்றி !

மௌனத்தின் தாழ்வாரங்களில் உழலும் பேச்சிழந்தவருக்கோ, ஒரு வார்த்தை பேசுவதே வாழ்க்கையின் ஆகப்பெரிய வெற்றியாய் இருக்கும் !

சற்றே சிந்தித்துப் பார்ப்போம் !

எது வெற்றி ?

மாருதி வைத்திருப்பவர் மெர்சிடிஸ் க்கு மாறுவதா ? கூரை வீடு வைத்திருப்பவர் மாளிகை வீட்டுக்கு இடம் பெயர்வதா ? இல்லை ! வெற்றி என்பது நாம் பயணிப்பதில் இல்லை, நமக்குள் பயணிப்பதில் இருக்கிறது !

நமது பால்யகால நினைவுகளை கொஞ்சம் அசைபோட்டுப் பார்ப்போம் ! எது நமக்கு வெற்றியாய் தெரிந்தது ? எது நமக்கு மகிழ்ச்சியாய் இருந்தது ?

தந்தையின் கரம் பிடித்து வரப்புகளில் நடந்த நாட்கள், கணினியில் விரல் அடித்து கடந்த நாட்களை விட உன்னதமானவை இல்லையா ? அன்னையின் கரம் தொட்டு அமுதுண்ட நாட்கள், ஐந்து நட்சத்திர ஹோட்டல் உணவுகளை விட உன்னதமானவை இல்லையா ? சண்டையிட்டும், அழுதும் திரிந்த சகோதர நாட்கள் அலுவலக கெட் டுகதர்களை விட மகத்துவமானவை இல்லையா ?

எனில் வெற்றி என்பது உயர்தலில் அல்ல, உணர்தலில் !

உறவுகளின் பாசக் கூட்டில் நாட்களை இனிதே கழிக்க முடிந்தால் அது வெற்றி ! மண் வந்த கடவுளான‌ பெற்றோரைப் பாதுகாக்க பாசம் துடித்தால் அது வெற்றி ! தோழர்களின் தேவையில் கேட்காமலேயே கால்கள் ஓடினால் அது வெற்றி ! மனித நேயத்தின் குரல் கண நேரமும் உயிர்ப்புடன் துடித்தால் அது வெற்றி !

எனில், வெற்றி என்பது சேர்ப்பதில் அல்ல, செலவழித்தலில் !

பாசத்தின் கரம் பிடித்து மகனுக்காகவும், மகளுக்காகவும் உழைக்கும் தந்தை, மனதில் இம்மியளவும் சோர்வு கொள்வதில்லை. பிள்ளைகளில் நலனே அவரது வெற்றி !  நேசத்தில் தினம் நனைந்து அத்தனை வேலைகளையும் இழுத்துப் போட்டுச் செய்யும் அன்னை எரிச்சல் கொள்வதில்லை. பிள்ளைகளின் பசியாற்றுதலே அன்னையின் வெற்றி

!எனில் வெற்றி என்பது அடைதலில் அல்ல, உடைதலில்.

கடைகளிலும், இணையத்திலும் வெற்றிகளுக்கான விதிமுறைகள் ஆயிரக்கணக்கில் உண்டு. தோல்வியிலிருந்து எப்படி வெற்றியை பற்றிக் கொள்ளலாம் என போதிக்கும் நூற்கள் பல்லாயிரக்கணக்கில் உண்டு. அவையெல்லாம் பொருளாதாரத்தின் பல் பிடித்து உங்களை சிம்மாசனம் ஏற்றத் துடிப்பவை !

அவற்றை ஒதுக்குங்கள் ! வெற்றி என்பது இருக்கைகளில் இல்லை இதயத்தில் இருக்கிறது. வெற்றி என்றால் என்ன என்பதை மறு பரிசீலனை செய்வோம். வாழ்வின் அர்த்தத்தைப் புரிந்து கொள்வதிலும், நமது வாழ்க்கையை பிறருக்கு பயனுள்ள வகையில் அமைத்துக் கொள்வதிலும் தான் வெற்றி இருக்கிறது !

கோபத்தை துரத்தி விட்டு அன்பை அணிந்து கொள்ளும் வாழ்வில் வெற்றி இருக்கிறது. சலனத்தை விலக்கி விட்டு உறவுகளை இறுகப் பிடிப்பதில் வெற்றி இருக்கிறது. இறுக்கத்தை உடைத்து விட்டு மன்னிப்பை பகிர்வதில் வெற்றி இருக்கிறது !

உலகம் தருகின்ற அட்டவணைக்குள் அடைபடுவதல்ல வாழ்க்கை ! இறைவன் கொடுத்த சிறகைக் கொண்டு வானம் அடைவதே வாழ்க்கை !

இக்கணம் நமதே !

இவ் எண்ணமே வெற்றி !!

*

 

TOP 10 : தன்னம்பிக்கை நூல்கள்

Image result for chicken soup for the soul first book

தன்னம்பிக்கை நூல்களுக்கு என்றுமே பஞ்சம் இருந்ததில்லை. ஏராளமான நூல்கள் வாசகர்களின் தன்னம்பிக்கையைத் தட்டி எழுப்பும் பணியைச் செய்திருக்கின்றன, செய்து வருகின்றன. அவற்றில் விமர்சகர்களின் பார்வையிலும், வாசகர்களின் பார்வையிலும், விற்பனையின் எண்ணிக்கையிலும் சர்வதேச கவனத்தை ஈர்த்த நூல்கள் ஏராளம். அவற்றிலிருந்து முக்கியமான பத்து நூல்கள் இந்த வாரம்.

  1. The 7 Habits of Highly Effective People

தன்னம்பிக்கை நூல்களின் பட்டியலில் தவறாமல் இடம்பிடிக்கக் கூடிய நூல் இது. 1989ம் ஆண்டு வெளியான இந்த நூல் இந்த குறுகிய கால இடைவெளியிலேயே இரண்டரை கோடி பிரதிகள் எனுமளவில் விற்பனையாகி சாதனை படைத்திருக்கிறது. சர்வதேச‌ அளவில் மிகவும் பிரபலமான, பல மொழிகளில் மொழிபெயர்க்கப்பட்டுள்ள நூல் இது. இதன் பரபரப்பைப் பார்த்து ஆடியோ புக்காகவும் இதை வெளியிட்டார்கள். புனை கதையல்லாத ஒரு நூலுக்கு ஆடியோ வடிவம் வெளியிட்டது இது தான் முதன் முறை.

பணியில் இருப்பவர்கள், நிறுவனங்களில் இருப்பவர்கள், தொழில் நடத்துபவர்கள் போன்றவர்களுக்கு பிரமாதமான வழிகாட்டி. எப்போதும் வருமுன் காப்பவர்களாக இருக்க வேண்டும், இலக்கை மனதில் கொண்டே ஒரு செயலைத் துவங்க வேண்டும், முதலில் தொடங்க வேண்டியதை முதலில் தொடங்கவேண்டும், இருதரப்புக்கும் வெற்றி என்பதை யோசிக்க வேண்டும், புரிந்து கொள்ளுத‌ல் வேண்டும், குழுவாகப் பணிசெய்தல் வேண்டும் எனும் ஏழு விஷயங்கள் மிக விரிவாக, புதுமையாக இந்த நூலில் அலசப்பட்டிருக்கிறது.

  1. Chicken Soup For the Soul

“என்ன ஓவர் பாசிடிவ் ஆக இருக்கே, இதையெல்லாம் பதிப்பிக்க முடியாது” என முதலில் நிராகரிக்கப்பட்ட நூல் தான் இது. பலர் நிராகரித்தபின் ஹைச்.சி.ஐ எனும் ஒரு குட்டி பதிப்பகத்தின் புண்ணியத்தால்  பிரசுரமானது. அதன்பின் பதிப்பாசிரியருக்கு அடித்தது ஜாக்பாட். உலகெங்கும் காட்டுத் தீ போல பற்றிப் படர்ந்தது இதன் விற்பனை. எழுத்தாளர்கள் ஜேக் கேன்ஃபீல்ட் மற்றும் மார்க் ஹேன்சன் இருவரும் உலகப் புகழ் பெற்றனர்.

அதிகம் விற்பனையாகும் நூல்களில் இதற்கு சிறப்பிடம் உண்டு. உலகிலேயே அதிகம் விற்கப்பட்ட தன்னம்பிக்கை நூல் வரிசை இது தான். இப்போது பல்வேறு எழுத்தாளர்கள் எழுதும் விஷயங்கள் தொகுக்கப்பட்டு வெளியிடப்படுகின்றன. குழந்தைகள், பதின் வயதினர், ஆண்கள், பெண்கள், தம்பதியர் என இப்போது எல்லோருக்கும் தனித் தனியே இந்த நூல் வெளியாகிறது.

  1.  100 ways to boost your self confidence

பார்டன் கோல்ட்ஸ்மித் எழுதிய இந்த நூல் எளிமையாக, நடைமுறை யதார்த்தங்களோடு எழுதப்பட்டுள்ளது. வாசகர்களை மட்டுமன்றி பிற எழுத்தாளர்களையும் கவர்ந்துள்ளது இந்த நூல்.

உனது வாழ்க்கை உனது கையில் எனும் செய்தியோடு இந்த நூல் பயணிக்கிறது. உனக்குள் இருக்கும் திறமைக் கடலைத் திறந்து பார்க்கத் தவறாதே. நீ பிடரி சிலிர்க்கும் சிங்கம் உன்னைக் கூட்டில் தள்ள முடியாதே !  என உள்ளுக்குள் இருக்கும் தன்னம்பிக்கையை இந்த நூல் தட்டி எழுப்புகிறது.

நல்ல குணாதிசயங்களோடு வாழ்வதையும், உறவுகளை வலுப்படுத்துவதையும், தன்னம்பிக்கையோடு செயல்படுவதையும் இந்த நூல் முதன்மைப்படுத்துகிறது.

  1. Awaken the Giant Within

ஆன்டனி ரோபின்ஸ் எழுதிய இந்த நூல் அதிகம் விற்பனையான நூல்களின் பட்டியலில் இடம் பிடித்த நூல். எளிமையும், சுவாரஸ்யமும் நிறைந்த நடை. 1991ம் ஆண்டு வெளியான இந்த நூல் அமெரிக்காவின் அதிக விற்பனையாகும் புத்தகங்களின் பட்டியலில் இருந்த நூல். இதன் பல வடிவங்கள் வெளியாகியிருக்கின்றன.

தன்னம்பிக்கையின் முனையை கூர்தீட்ட விரும்புபவர்கள் நிச்சயம் படிக்கலாம். இந்த நூலைத் தவிர இந்த எழுத்தாளர் எழுதிய‌ பிற நூல்க‌ளில், அன்லிமிடட் பவர் மற்றும் மணி‍:மாஸ்டர் த கேம் எனும் இரண்டு நூல்களும் மிகப் பிரபலம்.

  1. You Can Heal your Life

உங்கள் வாழ்க்கையை எந்த மந்திரக் கோலும் வந்து சரி செய்து விட முடியாது. ஆனால் உங்கள் மனம் அதைச் செய்ய முடியும். உங்கள் பேச்சு முதல் செயல் வரை எப்படி வசீகரமாய் மாற வேண்டும் என்பதை இந்த நூல் விளக்குகிறது. லூயிஸ் ஹே எழுதிய இந்த நாவல் மூன்றரை கோடி பிரதிகளுக்கு மேல் விற்று சாதனை படைத்தது. உலகின் டாப் 10 பெண் எழுத்தாளர் வரிசையில் மூன்றாவதாய் இருக்கிறார் ஆசிரியர், புத்தக விற்பனை எண்ணிக்கையின் அடிப்படையில்.

இந்த புத்தகத்தை எழுதியபோது அவர் அறுபது வயதைத் தாண்டியிருந்தார். வாழ்வின் அனுபவ முடிச்சுகளிலிருந்து நூலில் பல்வேறு தீர்வுகளைச் சொல்லியிருந்தார். குறிப்பாக உடலுக்கும் மனதுக்கும் இடையேயான ஆழமான பிணைப்பு குறித்த அவரது சிந்தனைகள் பெரும் பாராட்டு பெற்றன.

  1. What is holding you Back

சேம் ஹார்ன் எழுதிய இந்த நூல் எப்படி எந்த ஒரு செயலிலும் பளிச் என நமது முத்திரையைப் பதிக்க முடியும் என அக்கு வேறு ஆணி வேறாக விளக்குகிறது. “எது தான் உன்னை வெற்றி பெற விடாமல் தடுக்கிறது” என நம்மையே கேள்வி கேட்க வைத்து, நமது செயல்களை ஒவ்வொன்றாகச் சீர்செய்ய இந்த நூல் வழிகாட்டுகிறது.

ஒவ்வொரு கட்டத்திலும் எப்படி செயல்பட வேண்டும், நமது தோல்விகளை எப்படி பாடங்களாக மாற்றிக் கொள்ள வேண்டும் போன்ற பல விஷயங்களை இந்த நூல் அழகாகவும் சுவாரஸ்யமாகவும் விளக்குகிறது. வாச‌கர்களும், எழுத்தாளர்களும் ஒரு சேர அங்கீகரித்த நூல்களில் இதுவும் ஒன்று.

  1. Have a New You by Friday

உண்மை சுடும் என்பார்கள், உங்களைப் பற்றிய உண்மையெனில் அதும் ரொம்ப அதிகமாகவே சுடும். அந்த உண்மையை நீங்கள் எப்படி ஏற்றுக் கொள்வது ? அங்கிருந்து எப்படி வெற்றியை நோக்கி நகர்வது ? நீங்கள் யார் எனும் நிலையிலிருந்து தொடங்கி எங்கே சென்றடைய வேண்டும் எனும் பயணத்துக்கு இந்த நூல் வழிகாட்டுகிறது.

நம்மை மாற்றிக் கொள்வது தான் மிகப்பெரிய கடினமான விஷயம். அந்த மாற்றத்தை எப்படிச் செய்வது ? எப்படி அதை படிப்படியாய் செயல்படுத்துவது என்பதை இந்த நூல் அழகாகச் சொல்கிறது. முதலில் உங்களைப் பற்றிய உண்மையை அறியுங்கள். உங்களைப் பற்றி நீங்கள் கொண்டிருக்கும் தவறான எண்ணங்களையும், நம்பிக்கைகளையும் விலக்குங்கள் என்கிறது இந்த நூல்.

  1. The Breakout Principle

ஹெர்பர்ட் பென்சன் மற்றும் வில்லியம் ப்ரோக்டர் இருவரும் இணைந்து எழுதியிருக்கும் அற்புதமான நூல் இது. மன  அழுத்தம், உடல் சோர்வு, அதிக உழைப்பினால் மூளை கொள்கின்ற அசதி – இவையெல்லாம் இன்றைய உலகில் சர்வ சாதாரணம். ஆனால் அத்தகைய சூழலில் எப்படி வாழ்க்கையை ஆனந்தமாய் நடத்துவது ? என்பதை அழகாகச் சொல்கிறது இந்த நூல்.

மருத்துவத் துறையில் பெற்ற அனுபவத்தை இவர்கள் தங்களுடைய நூலில் வாழ்வியல் அனுபவங்களாக எழுதியிருப்பது நூலுக்கு அதிக பலம் சேர்க்கிறது. மனச் சோர்வு, குழப்பம், மன அழுத்தம் போன்றவற்றில் உழல்பவர்களுக்கு ரொம்பவே பயன் தரும் நூல் இது.

  1. Self Help that works

ஆடம் கான் எழுதிய இந்த நூலின் சிறப்பு ஒரு நாவலைப் போன்ற இனிமையான வாசிப்பு அனுபவம். தன்னம்பிக்கை நூல்களின் ஒரு மிகப்பெரிய சிக்கல் அவற்றை வாசிப்பது பல வேளைகளில் கடினமாக இருப்பது தான். அந்த சிக்கலை இந்த நூலில் உடைத்திருக்கிறார் ஆசிரியர்.

சின்னச் சின்ன அத்தியாயங்கள், எல்லோரும் புரிந்து கொள்ளக் கூடிய விஷயங்கள் என நூலை ஒரு சுகமான வாசிப்புக்குள் கொண்டு வந்திருக்கிறார். விமர்சகர்களின் ஏகோபித்த வரவேற்பைப் பெற்ற நூல்களில் ஒன்று இது எனலாம். எளிமையாகவும், விரைவாகவும் வாசிக்க விரும்புபவர்களுக்கான நூல் இது.  

10 think and grow rich

1937ம் ஆண்டு வெளியான நூல் இது. எழுதியவர் நெப்போலியன் ஹில் எனும் எழுத்தாளர். உலகிலேயே மிக அதிக அளவு தாக்கத்தை ஏற்படுத்திய பொருளாதாரமும், தன்னம்பிக்கையும் கலந்து கட்டி எழுதப்பட்ட நூல் இது தான். சுமார் ஏழு கோடி பிரதிகள் விற்று பெரும் சாதனை படைத்த நூல் இது.

இந்த நூலை எழுதுவதற்கு முன் ஆசிரியர் சுமார் 40 கோடீஸ்வரர்களை ஆராய்ந்து அவர்களுடைய வெற்றியின் வழிகளை அறிந்து இதை எழுதியிருக்கிறார். இந்த நூல் பல நூறு செல்வந்தர்களை உருவாக்கியிருக்கிறது. வாழ்வில் பொருளாதார ரீதியாக வெற்றியடைய வேண்டும் என நினைப்பவர்களுக்கு வரமான‌ நூல் இது.

TOP 10 தன்னம்பிக்கை மனிதர்கள்

Image result for Nick vujicic

உலக அளவில் ஆயிரக்கணக்கானோர் தன்னம்பிக்கையின் உதாரணமாக வாழ்ந்திருக்கிறார்கள், வாழ்ந்து கொண்டிருக்கிறார்கள். அவர்களின் முக்கியமான ஒரு பத்து பேர் இந்த வாரம்.

  1. நிக் வாயிச்சஸ்

கொஞ்சம் கலர் கம்மியா இருந்தாலே குறைபாடு என நினைக்கும் இந்தக் காலத்தில், இரண்டு கைகளும், இரண்டு கால்களும் இல்லாமல் ஒரு மனிதன் வாழ முடியுமா ? வாழ்ந்தாலும் சாதிக்க முடியுமா ? அப்படியே சாதித்தாலும் சர்வதேச அளவில் பிரமிப்பை ஏற்படுத்த முடியுமா ? கோடிக்கணக்கான மக்களுக்கு உற்சாகத்தையும், தன்னம்பிக்கையையும் ஊட்ட முடியுமா ? இந்த அத்தனை கேள்விகளுக்குமான “ஆம்” எனும் பதில் தான் நிக் வாய்ச்சஸின் வாழ்க்கை.

பிறக்கும் போதே இரண்டு கைகளும் இரண்டு கால்களும் இல்லை. தற்கொலை எண்ணங்கள் பல முறை தலை தூக்கியிருக்கின்றன. அவை அனைத்தையும் தாண்டி வாழ்க்கையில் உயரவேண்டும் என தன்னம்பிக்கையைக் கையில் எடுத்தவர். இன்று உலகில் எல்லா நாடுகளிலும் பயணித்து தன்னம்பிக்கை தளர்ந்த மனிதர்களுக்கு ஊக்கம் கொடுத்துக் கொன்ண்டிருக்கிறார். சமீபத்தில் திருமணம் செய்து கொண்டு, குழந்தையும் பெற்றுக் கொண்டிருக்கிறார்.

சம கால தன்னம்பிக்கை மனிதர்களில் தவிர்க்க முடியாதவர். இவருடைய வாழ்க்கை தன்னம்பிக்கை தேடுவோருக்கான உற்சாக டானிக்.

  1. நந்தோ பர்ராடோ

இவரைப்பற்றிக் கேள்விப்பட்டிருக்கிறீர்களா ? தென் அமெரிக்காவின் ஏன்ஸ் மலைப்பகுதியில் ஒரு விமான விபத்து. தப்பிப் பிழைத்தவர்கள் விழுந்தது -37 டிகிரி குளிரில். பாதி பேருக்குப் படுகாயம். சாப்பாடு இல்லை. பிணங்களைத் தான் சாப்பிடவேண்டும் எனும் துரதிர்ஷ்ட சூழல். இந்தச் சூழலில் அகப்பட்டால் நீங்கள் என்ன செய்வீர்கள் ? நான்டோ நம்பிக்கையைத் தளர விடவில்லை. 72 நாட்கள் போராடி, கடும் சவால்களைத் தாண்டி பலரை தப்பிக்க வைத்திருக்கிறார்.

வாழவே முடியாது எனும் சூழலிலும், வாழ்ந்தே தீருவேன் என தீர்மானமாய் போராடி ஜெயித்த வாழ்க்கை தான் இவரது. பத்து மதிப்பெண் குறைந்து போனாலே தற்கொலை செய்து கொள்ளும் கோழைகளின் தேசத்தில் நான்டோ பிரமிப்பூட்டும் ஒரு வரலாறு.

  1. ஜெஸிகா கோக்ஸ்

ஜெஸிகா கோக்ஸ் பற்றிக் கேள்விப்பட்டிருப்பீர்கள் என நினைக்கிறேன். இரண்டு கைகளும் இல்லை. ஆனால் மனதில் ஏகப்பட்ட இலட்சியங்கள். அவற்றில் ஒன்று விமானம் ஓட்ட வேண்டும் என்பது. முடவன் கொம்புத் தேனுக்கு ஆசைப்படலாமா என்று கேட்பார்கள். ஆசைப்படலாமே, அதில் என்ன தப்பு ? என கேள்வி கேட்டு சாதித்தி நிற்கிறார் ஜெஸிகா கோக்ஸ்.

கைகள் இல்லாத முதல் பைலட் எனும் பெருமை இவருக்கு உண்டு. எது இல்லாவிட்டாலும் சாதிக்கலாம், சாதிக்க வேண்டும் எனும் மனம் இருந்தால் போதும்.

பில் கேட்ஸ்

பில்கேட்ஸ் என்றதும் கோடீஸ்வர பிம்பம் தான் நமது மனதில் எழும். அவருடைய இன்றைய நிலை அப்படி. ஆனால் அவர் ஒரு சாதாரண தொழியாளியாய் வாழ்க்கையைத் தொடங்கியவர். வாழ்க்கையின் சவால்களைத் தாண்டி தான் இன்று சர்வதேச பிஸினஸ் ஜாம்பவானாக உருவெடுத்திருக்கிறார். பில்கேட்சின் வாழ்க்கை சாதிக்க நினைக்கும் மனிதர்களின் தன்னம்பிக்கை அகராதி.

அபரிமிதமான பணத்தின் ஒரு பகுதியை பிறருக்காய் செலவழிக்கும் இவருடைய பண்பு மதிக்கத்தக்கது. கலவைகளாலான அவருடைய வாழ்க்கை இளைஞர்களுக்கான பாடம். இவரைப் போலவே  ஸ்டீவ் ஜாப்ஸ், லக்‌ஷ்மி மிட்டல், வாலே டின்னுபு, வாரன் பப்ஃபெட் போன்ற பல்வேறு தொழிலதிபர்களின் வாழ்க்கை வரலாறுகள் தன்னம்பிக்கையை வலுவாக்கும் பாடங்கள்.

5

அன்னை தெரேசா

தன்னம்பிக்கை மனிதர்களின் பட்டியலின் அன்னை தெரசாவின் பெயரா என ஆச்சரியப்படலாம். ஆனால் தேசம் விட்டு தேசம் வந்து, பல்வேறு இன்னல்களைத் தாங்கி, ஆயிரக்கணக்கான எதிர்ப்புகளைத் தாண்டி, ஏழைகளின் பணியாளனாய் நின்ற அவருடைய வாழ்க்கை பிரமிப்பூட்டுகிறது. இறை மீது வைத்த நம்பிக்கையும், அந்த நம்பிக்கையை மனதில் ஏற்று தன்னம்பிக்கை வாதியாக பரிமளித்த அவரது வாழ்க்கையும் சிலிர்ப்பூட்டுகிறது.

பிற மதங்களல்ல, கிறிஸ்தவமே அவருடைய பணிக்கு சிவப்புக் கம்பளம் விரிக்கவில்லை. அனைத்தையும் அன்பினால் கடந்தார் அன்னை. தனது முடிவில் ஆழமாய் வேரூன்றி பணி செய்வதன் மாபெரும் முன்னுதாரணமாய்த் திகழ்கிறார் புனித தெரேசா.

6 ஆரோன் ரால்ஸ்டன்

மலையேறுவதில் பிரியம் கொண்ட ஆரோன் அமெரிக்காவிலுள்ள உத்தா மலைப்பகுதியில் மலையேறினார். எதிர்பாராத விதமாக வழுக்கி விழ‌ பாறையிடுக்கில் அவரது கை சிக்கிக் கொண்டது. அந்தக் காலநிலையில் யாரும் மலையேற வருவதும் இல்லை. உதவிக்கு மக்களை அழைத்துப் பார்த்தார். யாரும் இல்லை. ஒரு மணி நேரம், இருமணி நேரம் என ஓடிய மணித்துளிகள் ஒரு நாள், இரண்டு நாள் என நீளத் தொடங்கியது. யாரும் வரவில்லை.

ஐந்து நாட்கள் உதவிக்கு முயன்ற அவர் முன்னால் கடைசியில் இரண்டு வழிகள் தான் இருந்தன. ஒன்று, உயிரை விடுவது. இரண்டு, பாறையில் மாட்டிக் கொண்ட கையை வெட்டி எறிவது. மனதை இரும்பாக்கிக் கொண்டு முடிவெடுத்தார். கையில் இருந்ததோ மழுங்கிப் போன ஒரு கத்தி. அதை வைத்துக் கொண்டு கொஞ்சம் கொஞ்சமாய்க் கையை வெட்டினார். வலி உயிர் போனது. கை கொஞ்சம் கொஞ்சமாய் துண்டாகி விழ, உயிர் தப்பினார். இன்று அவரது வாழ்க்கை தன்னம்பிக்கை தேடும் மனிதர்களுக்கான பாரம். மிரட்டும் தன்னம்பிக்கையும், மன உறுதியும் இவரிடமிருந்து கற்றுக் கொள்ள வேண்டிய பாடங்கள்.

  1. பீத்தோவான்

பீத்தோவான் என்றாலே இசை மனதுக்குள் எழும். சர்வதேச இசை வரலாற்றில் முடிசூடா மன்னனாய் இருப்பவர் அவர். அந்த இருக்கையும், அவரது வாழ்க்கையும் அவருக்கு இயல்பாய் அமையவில்லை. பல்வேறு தோல்விகளின் முடிவில் தான் அவரது வெற்றி இருந்தது.

காதலித்துப் பார்த்தார், அதில் தோல்வி, மனதை உற்சாகப்படுத்த நினைத்தால் அதிலும் தோல்வி, வாழ்வின் முக்கியமான கட்டத்தில் தனது கேட்கும் திறனையும் இழந்து விட்டார். ‘செவியில்லை இங்கொரு இசை எதற்கு ?” என அவர் பாடவில்லை. செவியில்லா நிலையிலும், சிம்பொனிகளை அமைத்து உலகைப் பிரமிக்க வைத்தார். ஒன்றில் இரு ஒன்றித்திரு எனும் பாடம் அவருடைய வாழ்க்கையிலிருந்து நமக்குக் கிடைக்கிறது.

  1. ஆபிரகாம் லிங்கன்

உலகத் தலைவர்களைப் பற்றிப் பேசும் போது ஆபிரகாம் லிங்கனைப் பற்றி நாம் படிக்காமல் இருப்பதில்லை. அமெரிக்க அதிபராய் இருந்தவர். கருப்பின அடிமைத்தளையை அகற்ற பாடுபட்டவர். மிகச்சிறந்த பேச்சாளர், அற்புதமான நிர்வாகி என இவருக்கு பல பருமைகள். ஆனால் இவருடைய வாழ்க்கை துவக்கம் முதல் இனிமையாக இருக்கவில்லை.

செருப்பு தைக்கும் தொழிலாளியின் மகனாய்ப் பிறந்தார். படிப்பில் ரொம்ப சுமாரான பையன் தான். வீட்டில் வசதிகளும் இல்லை. ஆனாலும் அவருக்குள் ஒரு கனல் இருந்தது. வெள்ளை மாளிகையில் அமரவேண்டும் எனும் தாகம் இருந்தது. அதை நோக்கிய பயணம் அவரை வெற்றியாளராய் உயர்த்தியது. ஆபிரகாம் லிங்கனைப் போன்ற பல்வேறு தலைவர்கள் தன்னம்பிக்கை மனிதர்களாக நிலைக்கிறார்கள். அவர்களுடைய வாழ்க்கை வரலாறுகள் வலுவூட்டும் வழிகாட்டிகள்.

  1. பென் அன்டர்வுட்

இரண்டு வயதில் கேன்சர் நோய் வந்தது, மூன்றாவது வயதில் கண்களை இழந்தான். உலகம் சிறு வயதிலேயே அவனுக்கு இருண்டு போனது. ஐந்தாவது வயதில் குரலை வைத்து பொருட்களை அடையாளம் காணும் கலையை கற்றுக் கொண்டான். அதை எதிரொலி நுட்பம் என்பார்கள். குரல் எழுப்பி, அந்த குரல் பொருளில் பட்டு எதிரொலித்து வருவதைக் கொண்டு பொருட்கள் இருப்பதையும் அவற்றின் அசைவையும் கண்டுபிடிப்பது தான் இந்த நுட்பம்.

இந்த நுட்பத்தை வைத்துக் கொண்டு அவன் பிரமிப்பூட்டும் செயல்கள் செய்தான். நடந்தான், ஓடினான், ஸ்கேட்டிங் செய்தான், சைக்கிள் ஓட்டினான், நீச்சலடித்தான் ! சாலை கடக்கவே தடுமாறும் நிலையிலிருந்து, கண்கள் இருப்பவர்களைப் போலவே நடமாடத் தொடங்கினான் இவன். 19 ஆவது வயதில் உலகிலேயே இந்தக் கலையில் இவன் தான் சூப்பர் எனும் நிலையை அடைந்தான். இவருடைய வாழ்க்கை எந்த சூழலையும் வெற்றிகரமாய் மாற்ற முடியும் என்பதன் உதாரணம்.

  1. ஜே.கே.ரௌலிங்

ஜே.கே ரௌலிங் பெயரைக் கேட்டதும் ஹாரிபாட்டர் நினைவுக்கு வருவதைத் தவிர்க்க முடியாது. அவருடைய நாவலுக்காக பல இலட்சம் முன்பதிவுகள் நடப்பதும், நாவல் வெளியாகும் நாளில் அதிகாலையிலேயே கடைகளில் கிலோமீட்டர் கணக்கில் வரிசை நீள்வதும் பிரமிப்பாய்ப் பேசப்பட்ட விஷயங்கள். அந்த நாவல்களெல்லாம் பின்னர் சினிமாவாக மாறி பில்லியன்களை அள்ளியது. இவர் உட்கார்ந்து கதையெழுதிய ஹோட்டல் அறை அருங்காட்சியகமாய் மாற்றியமைக்கப்பட்டது. உலகெங்கும் இவருக்கு கோடிக்கணக்கான தீவிர ரசிகர்கள் உண்டு.

ஆனால், அவருடைய ஆரம்பகால வாழ்க்கை இனிமையாய் இருக்கவில்லை. மனதில் எழுகின்ற சிந்தனைகளை எழுதி வைக்க அவரிடம் பேப்பர் கூட சில நேரம் இருக்காது. பஸ் டிக்கெட்டின் பின்பக்கமெல்லாம் குறிப்புகளை எழுதி வைப்பார். குளிர்காலத்தில் உட்கார்ந்து எழுத இடம் தேடி காபி கடைகளில் செல்வார். ஒரு காபி வாங்கி வைத்துக் கொண்டு நாள் முழுவதும் உட்கார்ந்து எழுதுவார்.  நாவல் எழுதி முடித்ததும் பிரசுரமானதா என்றால், அதுவும் இல்லை. தனது முதல் நாவலை வெளியிட ஐந்து ஆண்டுகள் படாத பாடு பட்டிருக்கிறார்.

அத்தனை சோதனைகளையும் தன்னம்பிக்கையோடு எதிர்கொண்டதால் தான் இன்று அவர் அழியாப் புகழ் பெற்றிருக்கிறார். இவருடைய தன்னம்பிக்கைப் பயணம் சிலிர்ப்பூட்டுகிறது.

 

கவிதை : தொலை நகரம்

இன்னும் கொஞ்ச தூரம் தான்
கால்களைக் கொஞ்சம்
வலுவாக்கு.

அடுத்தவன் கனவுகளுக்குள்
படுத்துக் கிடக்கும்
உன் பார்வைகளின்
சோர்வகற்று.

அறுவடைக் காலத்தில்
நண்டு பிடிப்பதை விட
கதிர் அறுப்பதல்லவா
அவசியம்,

வா,
இன்னும் கொஞ்ச தூரம் தான்.

அதோ தெரிகிறதே
ஓர் வெளிச்ச பூமி
அங்கு தான் செல்லவேண்டும்.

பரிச்சயமான
பிரதேசமாய் தோன்றுகிறதா ?
அது வேறெங்கும் இல்லை
உன்னுள் தான் இருக்கிறது.

நீதான்
வெகுதூரம் சென்று விட்டாய்.

கவிதை : நிழல் பூசிய நிஜங்கள்

நிஜமே அழகு !!!
இயல்பே அழகு…

தென்னைக்கு இலையும்
ஆலுக்கு விழுதும்
இயற்கை அளித்தஅற்புதப் பரிசுகள்.

தென்னையின் தலையில்
ரோஜாப்பூக்களை
கற்பனை செய்வதே
ஒத்துவரவில்லையே.

படைப்பின் மகத்துவம்
இயல்புகளில்
அடைத்து வைக்கப்பட்டிருக்கிறது.
அதை
போலிச் சாயம் பூசி
புதைத்து விட வேண்டாம்.

புல்லாங்குழலுக்குத் தான்
துளைகள் தேவை,
மிருதங்கத்துக்கு அல்ல.

அத்தனைக் கருவிகளும்
ஒரே இசை தந்தால்
இசையை மீறி
இரைச்சலே தங்கும்.

காற்றின்
அத்தனை துகளிலும்
ஆக்ஸிஜன் ஏறினால்
பச்சையம் தயாரிக்கும்
மூலப்பொருளுக்கு
பயிர் எங்கே பயணமாகும் ?

உன்
பலம் தேடிய பயணம்
தொடர்வதே சிறந்தது,
பிறர் பலம் கண்ட
பயம் அல்ல.

பூவுக்கு
இதழ் அழகென்றால்
கடிகாரத்துக்கு முள் அழகு!

சகதிக்குள் வசிப்பதே
சிப்பிக்கு வசதி!
அது
மேல் மிதக்கும்
தாமரை கண்டு
தாழ்வு கொள்தல் தகுமா ?

புரிந்து கொள்
என் பிரிய நண்பா ..

நீ
யாரையோ பார்த்து
பிரமிக்கும் அதே வினாடியில்,
யாரோ
உன்னைப் பார்த்தும்
பிரமிக்கிறார்கள்.

கவிதை : நீ.. உனக்கான வரம்.

நண்பனே…

உன்னைப் பற்றி
நீயேன்
உயர்வாய் நினைக்கத்
தயங்குகிறாய் ?

மாலுமிகளே
சஞ்சலப் பட்டால்
சுக்கான் பிடிப்பது
சுலபமாயிருக்குமா ?

நீ
சொல்லுமிடம் செல்ல
உன் கால்கள்,
நீ
நீட்டுமிடம் நிற்க
உன் கைகள்
பின் ஏன் தனியன் என்று
தாழிக்குள் தாழ்கிறாய் ?

 

பூக்களின் பெருமையை
வண்டுகள் வாசித்துச்
சொல்லும்,
ஆனால் மொட்டை விட்டு
வெளியே வருவது
பூக்களின் பணியல்லவா ?

தானியம் தின்னும் கலை
தாய்க் கோழி தரும்
ஆரம்பக் கல்வியாகலாம்,
ஆனாலும்
அலகு கொத்துதல்
குஞ்சுகளின் கடமையல்லவா?

 

ஒவ்வோர் மரமும்
ஒவ்வோர் வரம்.
மூங்கில்கள் மட்டுமே
முளைக்குமென்றால்
பூமியின் தேவைகள் தீராது.

தூக்கம் வந்தாலே
சவக்குழிக்குள்
படுத்துக் கொள்ளும்
தாழ்வு எண்ணக் குழிகளை
ஏன்
தொடர்ந்து வெட்டுகிறாய் ?

கூடு கலைந்து போனதால்
தூக்கிலிட்டுக் கொண்ட
தூக்கணாங்குருவியை
நீ
தவமிருந்தாலும் பார்க்க இயலுமா ?

வலை கிழிந்து போனதால்
செத்துப் போக
சம்மதிக்கும்
சிலந்தியை
உன்னால் சந்திக்க இயலுமா ?

ஆறாவது அறிவு
ஆராய்வதற்கு.
அழிவின் வழிகளை
ஆயத்தப் படுத்த அல்ல.

நம்பிக்கை கொள்,
சுற்றிக் கிடக்கும்
சாபங்களை விடுத்து
உனக்குள் இருக்கும்
சாரங்களை வெளிக்கொணர்.

நீ
வைக்க மறுக்கும் நம்பிக்கையை
உன்மேல்
வேறு
யார் வைக்க இயலும் ?

நீ
காற்று.
இலைகள் அசையவில்லையென்று
கவலை எதற்கு.

நீ
தண்ணீர்.
ஆழம் போதாதென்ற
தாழ்வு மனம் எதற்கு ?

உன் தோளில்
நீயே கட்டிவைக்கும்
எந்திரக் கற்களை
இப்போதே எடுத்தெறி.

இல்லையேல்
நாளை
மாலையிட வரும் கைகளுக்கு
உன் தோள்கள்
புலப்படாது.