Block Chain – 9

பாட்ஸ் & பிளாக் செயின்

Image result for block chain bots

இன்றைய தொழில்நுட்ப உலகில் கொடிகட்டிப் பறக்கும் நுட்பங்களில் ஒன்று பாட்ஸ். இந்த 2019ம் ஆண்டு தொழில் நுட்ப உலகில் கோலோச்சப் போவது பிளாக் செயின் மற்றும் பாட்ஸ் இணைந்த தொழில்நுட்பம் தான் என பல அறிக்கைகள் கற்பூரம் அடிக்காமல் சத்தியம் செய்கின்றன. எனவே இந்த இணையைப் பற்றி அறிந்து கொள்வது அவசியமாகிறது.

அதென்ன பாட்ஸ் என தலையைச் சொறிய வேண்டாம். ரோபாட்ஸ் என்பதின் சுருக்கம் தான் பாட்ஸ். ஆர்டிபிஷியல் இன்டெலிஜென்ட் தொழில்நுட்பத்தை மையமாக வைத்து கட்டமைக்கப்படும் மென்பொருட்களை பாட்ஸ் என சுருக்கமாகச் சொல்லலாம்.

உதாரணமாக பேஸ்புக் போன்ற தளங்களில் உங்களுக்கு தகவல்களைத் தர உரையாடல் (சேட்) வசதிகள் இருக்கும். பயனர்கள் கேட்கும் கேள்விகளுக்கான பதிலை சுடச் சுட அது தரும். அது மென்பொருளின் கைவரிசை என்பது தெரிந்திருக்கும். அதில் இருக்கும் நுட்பம் ஆர்டிஃபிஷியல் இன்டெலிஜென்ட்ஸ் தான். அந்த பாட்ஸ் களை சேட் பாட்ஸ் என்று சொல்வார்கள். அதாவது சேட் செய்ற பாட்ஸ். இப்படி ஒவ்வொரு வேலை செய்யும் பாட் களையும் அந்த செயலோடு இணைத்து அழைப்பார்கள்.

வங்கிகள் போன்ற தளங்களில் இத்தகைய பாட்ஸ்களின் தேவை ரொம்ப அதிகம். வாடிக்கையாளர்களின் கேள்விகளையும், சந்தேகங்களையும் உடனுக்குடன் நிவர்த்தி செய்ய வேண்டியது இத்தகைய தளங்களில் ரொம்ப அவசியம். ஆனால் ஒரு சிக்கல்.

தொழில் நுட்ப உலகில் எதையுமே நம்ப முடிவதில்லையே. இந்த காலகட்டத்தில் “பாட்ஸ்” ஐ மட்டும் எப்படி நம்புவது ? ஒருவேளை நாம் ஒரு வங்கியின் தளத்துக்குச் சென்று பேசும் போது அங்கே நம்முடன் உரையாடுகின்ற பாட்ஸ் உண்மையில் ஒரு உளவாளியாய் இருந்தால் என்ன செய்வது ? உண்மையான வெப்சைட்டைப் போலவே போலிகள் உலவுகின்ற காலத்தில், உண்மையான பாட்ஸைப் போல ஒரு போலி உருவாவதில் ஆச்சரியம் இல்லையே.

உங்களுடைய வங்கிக்கணக்கு, பிறந்த நாள் உட்பட பல விஷயங்களை சேட் பாட்கள் கேட்கும். அவை போலியாய் இருக்கும் பட்சத்தில் நமது தகவல்களெல்லாம் திருடப்பட்டு விடும். அது நமக்கு மிகப்பெரிய இழப்பாக மாறிவிடும். இப்படிப்பட்ட ஒரு ஆபத்தை எப்படித் தவிர்ப்பது ? நமது உரையாடல் பாதுகாப்பாய் தான் இருக்கிறது என்பதை எப்படி ஊர்ஜிதப்படுத்துவது ?

அதற்குத் துணை செய்கிறது பிளாக் செயின் தொழில்நுட்பம். பிளாச் செயினுடன் பாட்ஸ்களை இணைத்தால் தகவல் பரிமாற்றங்கள் பாதுகாப்பாய் இருக்கும். இந்தப் பாதுகாப்புக்காகத் தான் இன்றைக்கு பாட்ஸ்கள் பிளாக் செயின் தொழில்நுட்பத்தோடு கைகுலுக்குகிறது. பல நிறுவனங்கள் ஏற்கனவே பிளாக்செயினுக்குள் கட்டப்பட்ட நிலையில், மற்ற நிறுவனங்களும் மும்முரமாய் பிளாக் செயினை இழுக்க ஆரம்பித்திருக்கின்றன.

பிளாக் செயின் நுட்பம் டிஸ்ட்டிரிபியூட்டர் முறையில் அமைவதால் எத்தனை பரிவர்த்தனைகள் நடந்திருக்கின்றன, உண்மையான பரிவர்த்தனைகள் தானா என்பதையெல்லாம் அந்த வலைப்பின்னல்கள் சான்றளிக்கும். அத்தகைய பணிகளில் அமர பாட்ஸ்கள் சரியான நபர்கள் என்பதில் சந்தேகமில்லை.

இப்போது பிளாக் செயினில் நடக்கின்ற பரிவர்த்தனைகளை சோதித்தறிவது எல்லாம் பெரும்பாலும் ஆட்கள் தான். பாட்ஸ் தொழில்நுட்பம் அதை விரைவில் தத்தெடுத்துக் கொள்ளும். பிளாக் செயினில் நடக்கின்ற ஒவ்வொரு பரிவர்த்தனைகளையும் அலசி ஆராய்ந்து, தேவையான முடிவுகளை எடுக்கும் வகையில் இந்த பாட்ஸ்கள் வடிவமைக்கப்படும். இரண்டு கட்ட பரிசோதனை இதில் நடக்கும். ஒன்று, பாட்ஸ் அங்கீகரிக்கப்பட்ட பாட்ஸ் தானா என்பது. இன்னொன்று, பரிவர்த்தனை சரியானது தானா என்பது. இந்த சோதனைகள் பாட்ஸ், பிளாக்செயின் இணைப்பினால் மட்டுமே சாத்தியமாகும்.

பிளாக் செயினில் பாட்ஸை இணைத்து ‘லாயர் பாட்ஸ்’ ஒன்றை ஸ்டார்ன்ஃபோர்ட் மாணவர் ஒருவர் உருவாக்கியிருந்தார். பார்க்கிங் டிக்கெட்களை அது அலசி ஆராய்ந்து வழக்குகள் ஏற்பதற்குத் தகுதி உடையவை தானா இல்லையா என்பதை கண்டறிந்து சொல்லும். அப்படி அந்த பாட்ஸ் ஒரு இலட்சத்து அறுபதாயிரம் வழக்குகளை திருப்பி அனுப்பியது. பாட்ஸ்களின் பயன்பாடு எல்லா இடங்களிலும் இருக்கலாம் என்பதன் ஒரு சின்ன உதாரணமாக இதைக் கொள்ளலாம்.

இன்னும் ஒரு படி மேலே போய் பிளாக் செயினின் வளர்ச்சியாக பாட் செயின் என ஒரு அமைப்பும் உருவாகியிருக்கிறது. பிளாக் களை வைத்து பிளாக் செயின் உருவாக்குவது போல பாட்ஸ்களை இணைத்து பாட்ஸ் செயின் உருவாக்குவது தான் இதன் எளிமையான சிந்தனை.

உலகெங்கும் தொழில்நுட்பத்தின் கிளைகள் பாட்ஸ்களை அதிக அதிகமாய் முளைப்பித்துக் கொண்டிருக்கும் இந்த காலகட்டத்தில் பாட்ஸ்களை ஒரு பாதுகாப்பான கட்டமைப்புக்குள் கொண்டு வருவது மிக முக்கியமான தேவை. சிறப்பான தரக் கட்டுப்பாட்டை பாட் செயின் தரும் என்கிறார் அந்த சிந்தனையை உருவாக்கிய ராய் மே.

பல நிறுவனங்களிலுள்ள பாட்ஸ்களை ஒரு செயினில் இணைத்து, பாட்ஸ்களின் செயல்பாடுகளை வரையறைக்குள்ளும், பாதுகாப்பான கண்காணிப்புக்குள்ளும் கொண்டுவருவதே இதன் முதன்மை நோக்கம். நம்பிக்கைக்குரிய வகையில் பாட்ஸ்களுக்கு இடையேயான தகவல் பரிமாற்றத்தை உருவாக்குவது இன்றைய சூழலில் மிகவும் முக்கியமானது.

உலகெங்கும் உள்ள நிறுவனங்களில் பல்லாயிரக்கணக்கான பாட்ஸ்கள் இருக்கின்றன. அவை எதிர்காலத்தில் மில்லியன் கணக்கான பாட்ஸ்களாக மாறும். அவற்றின் மூலமாக பல பில்லியன் தகவல்கள் பரிமாறப்படும். அத்தகைய சூழலில் பாட்ஸ்களை கண்காணிக்க வேண்டியதும், வரையறைப்படுத்த வேண்டியதும், பாதுகாப்பாய் வைத்திருக்க வேண்டியதும் அவசியம்.

பாட்ஸ்களெல்லாம் ஒன்றிணையும் போது அவற்றுக்கிடையே உள்ள பரிமாற்றங்களை பிளாக்செயின் நுட்பம் பாதுகாப்பானதாய் மாற்றும். பாட்ஸ்களின் தகவல் பரிமாற்றங்களை அழிக்கவோ, மாற்றவோ முடியாது என்பதால் தகவல் திருட்டு நடக்காது. பாட்ஸ்கள் எந்த நிறுவனத்தைச் சேர்ந்தவை, அவற்றின் நிலை என்ன என்பதையெல்லாம் ஒரு முழுமையான பார்வைக்குள் கொண்டு வரவும் முடியும் என்பதால் அங்கீகாரமற்ற பாட்ஸ்களின் தலையீடு இருக்காது.

பிளாக் செயினும், பாட்ஸ்களும் இணைந்து தொழில்நுட்ப உலகில் ஒரு மிகப்பெரிய மாற்றத்தை உருவாக்கும் என்பதில் சந்தேகமில்லை. கடினமான பரிவர்த்தனைகளுக்கு பாட்ஸ் தொழில்நுட்பத்தை பயன்படுத்தும் பழக்கம் இப்போதே ஆரம்பித்து விட்டது.

உதாரணமாக உங்கள் தொலைக்காட்சியின் வாரன்டி கார்டை பாட்ஸ் மற்றும் பிளாக்செயினில் சேமித்து வத்தால் அது பாதுகாப்பாய் இருக்கும். சில வருடங்களுக்குப் பிறகு அது தேவைப்பட்டால் “என்னோட டிவி வாரன்டி கார்டை குடு” என உங்கள் மொழியிலேயே கேட்டுப் பெற்றுக் கொள்ளலாம். உங்களுடைய கேள்வியை நேச்சுரல் லேங்குவேஜ் பிராசசிங் மூலமாக பாட்ஸ் அலசும். சில கேள்விகளைக் கேட்கும். அதற்குப் பதில் சொன்னால் போதும். தகவல் கடலில் தேடி உங்கள் தகவலை அது எடுத்துக் கொண்டு வரும். இது ஒரு சின்ன உதாரணம்.

இன்சூரன்ஸ் நிறுவனங்களிலும், பணப் பரிவர்த்தனையை மையமாய்க் கொண்டு நடக்கும் எந்த ஒரு நிறுவனத்திலும் பிளாக் செயினின் தேவையும், பங்களிப்பும் கணிசமாய் இருப்பதை அறிவோம். அத்தகைய இடங்களில் இன்னும் தரத்தையும், வேகத்தையும் அதிகப்படுத்த பாட்ஸ் தொழில்நுட்பத்தை இணைக்கின்றனர். அது பரிமாற்றத்தை மிகத் துல்லியமாகப் பதிவு செய்யவும், பண இழப்பு நேரிடாத பரிவர்த்தனைகள் செய்யவும் உதவியாய் இருக்கிறது.

பாட்ஸ்களைக் கற்றுக்கொள்ள இப்போது இணையத்திலும், நூல்களிலும் ஏகப்பட்ட தகவல்கள் இருக்கின்றன. யூடியூப் தளத்தில் நிறைய அறிமுகப் பாடங்கள் இருக்கின்றன. இலவசமாகவே பாட்ஸ் உருவாக்கும் மென்பொருட்கள் கிடைக்கின்றன. பாட்ஸ்களை மாற்றியமைத்துப் பயன்படுத்தும் மென்பொருட்களும் கிடைக்கின்றன. அவற்றைப் பற்றிக் கற்றுக் கொள்வது பயனளிக்கும்.

பிளாக் செயின் தொழில்நுட்பத்தில் சாதிக்க வேண்டும் என விருப்பம் உடையவர்கள் பிளாக் செயினுடன் சேர்த்து பாட்ஸ் தொழில்நுட்பத்தையும் கற்றுக் கொண்டால் வளர்ச்சி கணிசமாக இருக்கும் என்பதில் சந்தேகமில்லை.

Advertisements

பிளாக் செயின் 8

Image result for block chain engineers

பிளாக் செயின் என்பது தகவல்களைப் பல இடங்களில் சேமித்து வைக்கும் நுட்பம் என்பதையும், மிகவும் பாதுகாப்பானது என்பதையும், எப்படி ஒவ்வொரு பிளாக்கும் தங்களுக்குள் தகவல் பரிமாற்றத்தைச் செய்கிறது என்பதையும், எந்தெந்த தளங்களில் இது பயன்படுகிறது என்பதையும் கடந்த வாரங்களில் பார்த்தோம்.

இன்றைக்கு ‘இன்டெர்நெட் ஆஃப் திங்க்ஸ்” எனப்படும் நவீன தொழில்நுட்பத்தில் இந்த பிளாக் செயின் எப்படி இணைகிறது என்பதை சுருக்கமாகப் பார்க்கலாம்.

இணையம் என்பது தகவல்களின் அடிப்படையில் இயங்கக் கூடிய ஒரு தொழில்நுட்பம். டிஜிடல் தகவல்களே அதன் செயல்பாடுகளை நிர்ணயிக்கின்றன. இப்போது நமக்கு என்ன தேவையென்றாலும் கூகிளில் சென்று தேடுகிறோம், அது எங்கெங்கோ இருக்கின்ற தகவல்களை எல்லாம் அள்ளிக் கொண்டு தருகிறது. எங்கோ ஓரிடத்தில் உள்ளீடு செய்யப்படுகின்ற டிஜிடல் தகவல்களின் அடிப்படையில் தான் இந்த செயல் நடக்கும். எங்கும் பதிவு செய்யப்படாத தகவல்களை கணினி தராது. இதை இன்டர்நெட் ஆஃப் டேட்டா என வைத்துக் கொள்ளலாம்.

அப்படியானால் இன்டர்நெட் ஆஃப் திங்க்ஸ் என்பது என்ன ?. சுருக்கமாகப் புரியும் வகையில் சொல்ல வேண்டுமெனில் உலகிலுள்ள பொருட்களை இணைக்கும் ஒரு இணைய வலை என சொல்லலாம். அதாவது உலகிலுள்ள பொருட்களையும் இணையத்தில் இணைக்கும் வசதி.

உதாரணமாக் அகூகிளில் சென்று என்னோட கார் சாவியை எங்கே வெச்சேன்னு தெரியலை, பாத்து சொல்லு என கேட்டால், கூகிளால் பதில் சொல்ல முடியாது. காரணம் கார் சாவி எந்த ஒரு வகையிலும் இணையத்தோடு இணைக்கப்படவில்லை. ஒருவேளை கார்சாவியில் ஒரு சென்சாரைப் பொருத்தி, அந்த சென்சார் தரும் தகவலை இணையத்தில் சேமித்தால், கார்சாவியை கூகிள் கண்டுபிடித்துக் கொடுக்கும்.

அதாவது, கார்சாவியிலிருந்து வருகின்ற சிக்னல் தகவலைப் பயன்படுத்தி, கூகிள் தனது ஜிபிஎஸ் மூலமாகவோ அல்லது வேறு ஏதாவது நுட்பத்தின் மூலமாகவோ சாவியின் இருப்பிடத்தைக் கண்டு பிடித்துக் கொடுக்கும். இப்படி சாதாரண பொருட்களை இணையத்தோடு இணைக்கும் நுட்பம் தான் இன்டர்நெட் ஆஃப் திங்க்ஸ்.

அந்த தொழில்நுட்பம் இப்போது பிளாக் செயின் தொழில்நுட்பத்தோடு இணைந்து ஒரு புதிய பரிமாணத்தை எட்டியுள்ளது. குறிப்பாக செக்யூரிடி சார்ந்த விஷயங்களில் இந்த இணைப்பு மிகப்பெரிய பலனைக் கொடுத்திருக்கிறது. ஐ.ஓ.டி கருவிகளிலிருந்து பெறப்படுகின்ற தகவல்களைப் பாதுகாப்பாக சேமித்து வைக்க பிளாக் செயின் கை கொடுக்கிறது.

இதன் மூலம் மனித வேலை எதுவும் இல்லாமல், கருவிகளே தங்களுக்குள் பேசிக்கொண்டு, தேவையான விஷயங்களை பரிமாறிக் கொண்டு பயணிக்கின்ற சூழல் உருவாகும். இது மனித தவறுகளை முற்றிலும் அழித்து விடும். ஸ்மார்ட் கான்ட்ராக்ட்களை ஐ.ஓ.டி வலைப்பின்னலிலேயே உருவாக்கி ,மனித பரிசீலனைகள் இல்லாமலேயே மெஷின்களே ஒத்துக் கொள்ளும் நிலை உருவாகும்.

இன்டர்நெட் ஆஃப் திங்க்ஸ் தொழில்நுட்பத்தை பிளாக் செயினில் இணைக்கலாமா எனும் சிந்தனைக்கு சர்வதேச அளவிலான பெரும்பாலான நிறுவனங்கள் வலிமையான ஆதரவுக் கரத்தை நீட்டியிருக்கின்றன. அதை எப்படியெல்லாம் பயனுள்ள வகையில் பயன்படுத்துவது எனும் ஆய்வுகளும் தொடர்ந்து நடந்து கொண்டே இருக்கின்றன.

முதலில் இதன் பாதுகாப்பை உறுதி செய்வதற்காக பிரைவெட் பிளாக் செயினில், இன்டர்நெட் ஆஃப் திங்க்ஸை இணைத்து சில நிறுவனங்கள் முயற்சி மேற்கொண்டு அதில் வெற்றியும் பெற்றிருக்கின்றன. குறிப்பாக மூன்று விஷயங்களில் இந்த முயற்சி பெரும் பயன் அளித்திருக்கிறது. ஒன்று, பாதுகாப்பு. இரண்டு, குறைந்த செலவு. மூன்று, வேகமான செயல்பாடு.

இன்டர்நெட் ஆஃப் திங்க்ஸ் கொண்டு வருகின்ற தகவல்கள் திருடப்படக் கூடியவையாக இருப்பது இன்றைய தொழில்நுட்பத்தின் மிகப்பெரிய சவால். அந்த சவாலைத் தான் பிளாக் செயின் முதலில் மேற்கொள்கிறது.

உதாரணமாக, நிறுவனங்கள் தங்களுடைய இ.ஆர்.பி தகவல்களை எப்போதுமே மிக பாதுகாப்பாக வைத்திருக்க வேண்டுமென விரும்பும். அவை இப்போது இன்டர்நெட் ஆஃப் திங்க்ஸ் தொழில்நுட்பத்துடன் இணைக்கப்பட்டுள்ளன. அவற்றை அப்படியே பிளாக் செயின் கட்டமைப்பில் கட்டி வைத்தால் பாதுகாப்பானது ஊர்ஜிதப்படுத்தப்படும் என்பதே பெரிய நிறுவனங்களின் சிந்தனை.

இன்டர் நெட் ஆஃப் திங்க்ஸ் தொழில்நுட்பம் என்பது தனித்து இயங்க முடியாது. இன்னொரு தொழில்நுட்பத்தோடு இணைந்து தான் எப்போதுமே இயங்கும். பிற நவீன தொழில்நுட்பங்களுக்குத் தேவையான தகவல்களை அளித்துக் கொண்டே இருக்கும். எனவே தான் இன்டர்நெட் ஆஃப் திங்க்ஸ் தொழில்நுட்பத்தோடு பிளாக் செயின் இணையும் போது வளர்ச்சிக்கான வாய்ப்புகள் மிகப் பிரகாசமாக இருக்கின்றன.

இன்றைய மருத்துவமனைகளை எடுத்துக் கொண்டால் அவை ஸ்மார்ட் ஹாஸ்பிடல்ஸ் என உருமாறிக் கொண்டிருக்கின்றன. மருத்துவக் கருவிகள் தகவல்களை ஒன்றுக்கொன்று பரிமாறிக் கொள்ளும் வகையில் வடிவமைக்கப்படுகின்றன. ஐசியு போன்ற அறைகளில் சென்சார்கள் நோயாளியின் உடல் நிலையையும், சூழ்நிலையையும் கவனித்து தகவல்களை மருத்துவர்களுக்கும் கணினிகளுக்கும் ஆட்டோமெடிக்காக அனுப்பிக் கொண்டே இருக்கின்றன.

அதே போல பெரிய டிராபிக் சிக்னல்கள் சென்சார்களின் உதவியுடன் தன்னிச்சையாக டிராபிக் ஒழுங்கை அமைக்கிறது. விதிமீறல்களைப் பதிவு செய்கின்றன. அதற்கான அடுத்த கட்ட நடவடிக்கைகளை எடுக்கின்றன. ஸ்மார்ட்டாக இவை எடுக்கின்ற இந்த முடிவுகளால் டிராபிக் சிக்னல்களெல்லாம் ஸ்மார்ட் சிக்னல்களாக மாறிக் கொண்டிருக்கின்றன. அமெரிக்காவின் பிலடெல்ஃபியா டிராபிக் சிக்னல்கள் முழுவதும் ஸ்மார்ட் சிக்னல்களாக மாறியிருப்பது ஒரு உதாரணம்.

அதே போல வீடுகளும் ஸ்மார்ட் ஹோம்களாக மாறிக் கொண்டிருக்கின்றன. வீட்டின் கதவுகள் உரிமையாளர்களின் முகம் கண்டவுடன் திறக்கின்றன. அறையின் தட்ப வெப்பம் சூழலுக்கு ஏற்ப தன்னை மாற்றிக் கொள்கிறது. வெளிச்சம் தேவைக்கு ஏற்ப தானாகவே மாறிக் கொள்கிறது. டிவி, காபி மெஷின், ஏசி என சர்வமும் சென்சார்கள் மூலமாக இணைந்து கொள்கின்றன.

இப்படி “ஸ்மார்ட்” ஆக மாறிக் கொண்டிருக்கும் எல்லா இடங்களிலும் கோலோச்சும் தொழில்நுட்பம் இந்த ஐ.ஓ.டி எனப்படும் இன்டர்நெட் ஆஃப் திங்க்ஸ் தான். வயர்லெஸ் சென்சார்ஸ் நெட்வர்க் மற்றும் ரேடியோ ஃப்ரீக்வன்சி ஐடன்டிஃபையர் போன்றவை இந்த தொழில்நுட்பத்துக்குத் துணை செய்கின்றன. . Wireless Sensors Networks (WSN) &Radio Frequency Identification (RFID)அதனால் தான் அதன் வீச்சும் தேவையும் அதிகமாக இருக்கிறது. இப்படி இவை சகட்டு மேனிக்கு குவித்துக் கொட்டப்படும் தகவல்களில் ஏராளமான சென்சிடிவ் தகவல்களும் அடக்கம். அவை இப்போது ‘சென்ட்ரலைஸ்ட்’ தகவல் தளங்களில் தான் சேமித்து வைக்கப்படுகின்றன.

இந்த தகவல்கள் திருடப்படுமாயின் அது தனி மனித சுதந்திரத்துக்கு எதிரான ஒரு தாக்கமாகவே அமையும். எனவே தான் இத்தகைய முக்கியமான புராஜக்ட்களை பிளாக் செயின் தொழில்நுட்பத்துடன் இணைக்கும் முயற்சிகள் நடைபெற்று வருகின்றன. இப்போது புரிந்திருக்கும் ஏன் பிளாக் செயினுடன், இன்டர்நெட் ஆஃப் திங்க்ஸ் தொழில் நுட்பம் இணைய விரும்புகிறது என்பதன் அடிப்படை நோக்கம்.

எளிமையாகச் சொல்ல வேண்டுமெனில், நிறுவனங்களிலுள்ள ஒட்டு மொத்தத் தகவல்களைப் பதிவு செய்வதையும், அதை உடனுக்குடன் கணினிக்குக் கொண்டு வருவதையும் இன்டர்நெட் ஆஃப் திங்க்ஸ் கவனித்துக்கொள்ளும். அதை பாதுகாப்பாய் வைப்பதையும், நம்பிக்கைக்குரிய வகையில் பயன்படுத்துவதையும் பிளாக் செயின் எடுத்துக் கொள்ளும். அதற்காக வலுவான ஒரு என்கிரிப்ஷன் நுட்பத்தை அது பயன்படுத்தும். இப்படி இரண்டும் இணையும் போது முழுமையான பலனைப் பெற முடியும்.

பிளாக் செயினைப் படிக்க விரும்பும் மாணவர்களும்,வல்லுநர்களும் இன்நெட் ஆஃப் திங்க்ஸ் குறித்த படிப்பையும் படிப்பது மிகவும் பயனளிக்கும். எப்படியெல்லாம் பிளாக் செயினை பயனுள்ள வகையில் ஐ.ஓ.டி யுடன் இணைக்கலாம் போன்ற தெளிவு அப்போது தான் கிடைக்கும்.

பிளாக் செயின் 7

Image result for block chain engineers

பிளாக் செயின் பற்றி ஆஹா ஓஹோன்னு சொல்றீங்க, சரி ! அதெல்லாம் இருக்கட்டும். இப்போ நான் பிளாக் செயின் தொழில்நுட்பத்துக்குள்ள போணும். அதைக் கத்துக்கணும். பிளாக் செயின் டெவலப்பர் ஆகணும். அதுக்கு என்ன வழி ? இந்த வாரம் அதைப் பற்றி கொஞ்சம் பார்ப்போம்.

நவீன தொழில்நுட்பங்களான ஆர்டிபிஷியல் இண்டலிஜெண்ட், மெஷின் லேர்னிங், பிக் டேட்டா, இண்டர்நெட் ஆஃப் திங்க்ஸ் எல்லாமே கணினி சார்ந்த தொழில்நுட்பங்கள். அதே போல தான் இந்த பிளாக் செயின் தொழில்நுட்பமும் கணினி சார்ந்த தொழில் நுட்பமே.

எனவே, கணினி சார்ந்த ஒரு பட்டம் பிளாக் செயின் தொழில்நுட்பத்தைக் கற்றுக் கொள்ள விரும்புபவர்களின் அடிப்படைத் தேவை. ஒருவேளை எம்சிஏ போன்ற முதுகலைப் படிப்பு இல்லாதவர்கள் கணினி இளங்கலையை வைத்துக் கொண்டு பிளாக் செயினுக்குள் நுழையலாம். பி.ஈ போன்ற எஞ்சினியரிங் படிப்பு படித்தவர்களும், எம்.ஈ போன்ற முதுகலை எஞ்சினியரிங் படித்தவர்களும் இதில் தாராளமாக நுழையலாம்.

கணினி மென்பொருள் துறையில் வேலை செய்பவர்கள் அனுபவத்தின் அடிப்படையில் இந்த துறையில் நுழையலாம். ஒருவேளை அவர்கள் கணினி பட்டப்படிப்பு பெறாதவர்களாக இருந்தாலும் பிரச்சினை இல்லை. சுருக்கமாகச் சொல்லவேண்டுமெனில், கணினி பட்டப்படிப்பு அவசியம். அது இல்லாத பட்சத்தில் கணினி மென்பொருள் துறையில் வேலை பார்த்த நல்ல அனுபவங்கள் இருந்தாலும் போதுமானது.

பழைய காலத்தில் ஒரு விதமான ஹேர்ஸ்டைல், ஜீன்ஸ் எல்லாம் வைத்திருந்தோம். பிறகு அவையெல்லாம் பழைய சங்கதிகளாகி, புதிய ஸ்டைல்கள் இடம்பிடித்தன. காலச் சுழற்சியில் பழைய ஸ்டைல்கள் புதிதாக மீண்டும் முளைத்து வரும். இது வாடிக்கை !

அதே போல, சுமார் இருபது ஆண்டுகளுக்கு முன் வெளிவந்த கணினி மென்பொருள் சி++. பிறகு வந்த புதிய தொழில்நுட்பங்களின் அலையில் கொஞ்சம் அமுங்கிக் கிடந்தது. இப்போது மீண்டும் முளைத்து வந்து பிளாக் செயினுக்கு கைகொடுக்கிறது.

பிளாக் செயினில் அதிக சர்வர் சைட் ப்ரோக்ராமிங் தேவைப்படுவதால் இந்த சி++ மென்பொருள் முக்கியமானதாய் மாறிவிட்டது. அந்த மென்பொருளை கற்றுக் கொள்ளுங்கள். அது ரொம்பவே பயனளிக்கும். கணினி பாடம் படிப்பவர்கள் கல்லூரியிலேயே சி++ படித்திருப்பார்கள். எனவே அவர்களுக்கு அது பிரச்சினை இல்லை என்பது குறிப்பிடத்தக்கது.

ஒருவேளை சி++ தெரியாதவர்களெனில் ஜாவா படித்திருந்தாலும் பயனளிக்கும். ஜாவா மென்பொருளும், சி++ மென்பொருளும் ஆப்ஜக்ட் ஓரியண்டட் புரோகிராமிங் கான்செப்ட் என்பது மென்பொருட்களோடு பரிச்சயம் உள்ளவர்களுக்குத் தெரிந்த விஷயம் தான். எனவே சி++ தெரியாதவர்கள் ஜாவா மென்பொருளைக் கற்றுக் கொள்ளலாம்.

கிரிப்டோகிராஃபி (Cryptography) பற்றி தெரிந்து கொள்வது பிளாக் செயின் தொழில்நுட்பத்துக்கு நிச்சயம் கைகொடுக்கும். கிரிப்டோகிராபி தான் பிளாக் செயின் பரிவர்த்தனையின் மையமாய் இழையோடும் விஷயம். எனவே அதைக் குறித்த பயிற்சிகளை எடுக்கலாம். பாதுகாப்பு விஷயங்களைப் பொறுத்தவரை பிளாக் செயின் முன்னிலையில் இருப்பது நாம் அறிந்ததே. கிரிப்டோஎக்கனாமிக்ஸ் பற்றி படிப்பது பிளாக் செயின் பாதுகாப்பு கட்டமைப்புக்கு வலுவூட்டும்.

என்கிரிப்ஷன், டிகிரிப்ஷன் (Encryption, Decryption) தொழில்நுட்பம் இன்றைக்கு மிகப் பெரிய அளவில் மாற்றங்களை அடைந்துள்ளது. தகவல்கள் எல்லாம் டிஜிடல் மயமானதால் அதை பாதுகாக்க இந்த என்கிரிப்ஷன் நுட்பங்கள் தேவைப்படும். இவை மிகப்பெரிய மதிப்பு மிக்கவை. பிட்காயின் பயன்படுத்தும் என்கிரிப்ஷன் அல்காரிதத்தின் விலை 30 ஆயிரம் கோடி என கணிக்கப்பட்டுள்ளது.

அடுத்ததாக, டிஸ்ட் ரிபியூட்டட் கம்ப்யூட்டிங் (distributed computing) பற்றித் தெரிந்து கொள்வதும், அதைக் குறித்த பாடங்களைப் படிப்பதும் பயனளிக்கும். டோரண்ட் இணையதளங்களைப பற்றி நிச்சயம் தெரிந்திருக்கும். அது பீர் டு பீர் (peer-peer) எனப்படும் டிஸ்றிபியூட்டர் முறை தான். ஆனால் டோரண்ட் வசீகரிக்கவில்லை. அதிக பயன்பாடு இருந்தும் அது அதிக அளவு நம்பிக்கைக்குரியதாக மாறவில்லை. காரணம் பீர் கணெக்ஷன் கொடுப்பவர்களுக்கு அது எந்த பயனையும் அளிக்கவில்லை. அதே போல, வைரஸ்கள் நுழைவதை தடுக்க பாதுகாப்பு வசதிகளும் போதுமானதாக இல்லை.

டோரண்ட் என்றாலே இன்றைக்கு எல்லோரும் பயந்தடித்து ஓடக் காரணம் அது ஆபத்தானது எனும் சிந்தனை தான். பாதுகாப்பானதாகவும், பயனுள்ள வகையிலும் அது இருந்திருந்தால் இன்று அது மிகப்பெரிய உயரத்தை எட்டியிருக்கும் என்பதில் சந்தேகமில்லை. இந்த டிஸ்ட்டிரிபியூட்டர் குறித்துப் படித்திருப்பது, அதைக் குறித்து அறிந்திருப்பது இவையெல்லாம் பிளாக் செயின் தொழில்நுட்பத் துறையில் நுழைய விரும்புபவர்களுக்கு நிச்சயம் பயனளிக்கும்.

மெக்கானிசம் டிசைனர்ஸ் குறித்துப்( Mechanism designers ) என்பவர்கள் கிரிப்டோகிராஃபியையும், டிஸ்றிபியூட்டட் கம்ப்யூட்டிங்கையும் இணைக்கின்ற பணியைச் செய்பவர்கள். அதை நோக்கிப் பார்வையைச் செலுத்துவது பிளாக் செயின் துறையில் நுழைய நினைப்பவர்களுக்கு பெரிய உதவியாய் இருக்கும். அறிவியல் துறையில் இருப்பவர்கள் பயாலஜிகல் மெக்கானிசம் பற்றி தெரிந்திருப்பார்கள். நமது உடல் மிகப்பெரிய ஒரு பிளாக் செயின் அமைப்பு. நமது டி.என்.ஏ, உயிரியல் மெக்கானிசம் போன்றவற்றையெல்லாம் தெரிந்து கொண்டவர்கள் எளிதில் பிளாக் செயினையும் புரிந்து கொள்வார்கள்.

ஹைச் டி எம் எல் (HTML) பற்றி தெரியாமல் இருக்க வாய்ப்பு இல்லை. அதைப் படித்து வைத்துக் கொள்ளுங்கள். எளிதான விஷயம். பிளாக் செயின் தொழில்நுட்பத்தில் இந்த ஹைச்.டி.எம்.எல் பயன்படுகிறது. கேஸ்கேடிங் ஸ்டைல் ஷீட் எனப்படும் சி.எஸ்.எஸ் (CSS) பற்றிய அறிவும் உங்களுக்கு பிளாக் செயின் தொழில்நுட்பத்தில் உதவும். அதே போல ஸ்மார்ட் கான்றாக்ட் (Smart Contract) பற்றியும் தெரிந்து வைத்திருங்கள்.

டிஜிடல் சிக்னேச்சர், சிக்னேச்சர் வெரிபிகேஷன் போன்ற விஷயங்களைத் தெரிந்து வைத்திருப்பது பிளாக் செயின் தொழில்நுட்பத்துக்கு உதவும். பிளாக் செயினில் டெவலப்பிங் ஸ்டைலை ‘டிட்டர்மினிஸ்டிக்’ ஸ்டைல் என்பார்கள். அதாவது மாறாத நிலையான ஒரு கட்டமைப்பு. ஒரு பரிவர்த்தனை எப்படி செயல்பட வேண்டுமோ அப்படித் தான் இன்றும் செயல்படும், நாளையும் செயல்படும். அதில் மாற்றம் இருக்காது. அதற்கேற்ப மென்பொருள் எழுதவேண்டும்.

எல்லாவற்றுக்கும் மேலாக எந்த விஷயத்தைக் கற்றுக் கொள்ளப் போனாலும், அந்த தொழில்நுட்பத்தைக் குறித்த தகவல்களை முதலில் சேகரிக்க வேண்டும். இன்றைக்கு பிளாக் செயின் குறித்த கட்டுரைகள், நூல்கள், விளக்கங்கள், வீடியோக்கள், ஆடியோக்கள் என எல்லா இடங்களிலும் வியாபித்திருக்கின்றன. நமது தேவைக்கேற்ப அவற்றைப் பயன்படுத்துவதே புத்திசாலித்தனம். பிளாக் செயின் நுட்பத்தில் நுழையும் முன் இந்த கட்டுரைகள், வீடியோக்கள் பார்த்து அதைக் குறித்த ஒரு புரிதலை உருவாக்கிக் கொள்ள வேண்டும்.

அதன் பின் அதன் பயன்பாடுகள் குறித்த தகவல்களையும் தெரிந்து வைத்திருக்க வேண்டும். நமது டொமைன் பிளாக் செயினுக்கு ஒத்து வருமா இல்லையா என்பதைக் கண்டு கொள்ள இது பயன்படும். எங்கெல்லாம் பிளாக் செயின் பயன்படும், எங்கெல்லாம் பயன்படாது ? எப்படியெல்லாம் பயன்படுத்தலாம் போன்ற விஷயங்களையெல்லாம் தெரிந்து வைத்திருப்பது அவசியம்.

சுருக்கமாக, ஒரு கணினி பட்டப்படிப்பு அல்லது கணினி துறையில் அனுபவம். கூடவே பிளாக் செயின் குறித்த புரிதல், அதன் தேவைகள் குறித்த புரிதல். அத்துடன் சி++, ஜாவா போன்ற மென்பொருள்களின் பரிச்சயம். இவை இருந்தால் போதும் பிளாக் செயினுக்குள் நுழைந்து பிரகாசிக்கலாம்.

பிளாக் செயின் 6

Image result for block chain

நமக்கு ஒரு பழக்கம் உண்டு. புதிதாக ஒரு போன் வந்தால் அதை எப்படியாவது வாங்க வேண்டும் என நினைப்போம். அதே போல தான் தொழில்நுட்ப உலகிலும் பல நிறுவனங்கள் உண்டு. ஒரு புதிய தொழில்நுட்பம் வந்தால், அதை தனது நிறுவனத்தில் பயன்படுத்த வேண்டும் என சட்டென முடிவு செய்து விடுகின்றனர். அப்படிப் பயன்படுத்துவது தான் சந்தைப்படுத்தலுக்கு உதவும் என்பது அவர்களுடைய கணிப்பு. அல்லது ஸ்ட் ராட்டஜி.

புதிய தொழில்நுட்பங்களை ஒரு நிறுவனத்தில் இணைப்பதால் மட்டும் ஒரு நிறுவனம் வளர்ச்சியடைவதில்லை. என்னதான் ஆனானப் பட்ட தொழில்நுட்பமாக இருந்தாலும், சில இடங்களுக்கு ஒத்து வராது. அதைப் புரிந்து கொள்வது மிகவும் அவசியம். நிறுவனத்துக்கு அந்த புதிய தொழில் நுட்பங்கள் பயனளிக்குமா என்பதை முதலில் பார்க்க வேண்டும். நிறுவனத்துக்கு பிளாக் செயின் பயனளிக்குமா என்பதை சில கேள்விகளின் மூலமாகவும், சில அலசல்களின் மூலமாகவும் கண்டுபிடிக்கலாம்.

நிறுவனம் இரண்டுக்கு மேற்பட்ட நிறுவனங்களுடன் ஒப்பந்தம் செய்திருக்கிறதா ? அந்த நிறுவனங்களுக்கிடையேயான பரிவர்த்தனைகளை நிறுவனம் தொடர்ந்து கண்காணித்துக் கொண்டும், அதற்கேற்ப சில முடிவுகளையும் எடுத்துக் கொண்டும் இருக்க வேண்டியிருக்கிறதா ? அப்படியெனில் பிளாக் செயின் ஒரு நல்ல ஆப்ஷனாக இருக்கும். பரிசீலனைக்கு எடுத்துக் கொள்ளலாம். இருந்தாலும் உடனே முடிவு செய்து விட முடியாது. அடுத்த கேள்விக்குத் தாவ வேண்டும்.

இப்போது இருக்கின்ற சிஸ்டம் எப்படிப்பட்டது ? நீண்டநாள் பயன்படுத்த முடியாத வகையில் இருக்கிறதா ? அதை பயன்பாட்டில் வைத்திருக்க அதிகம் பணம் செலவு செய்ய வேண்டியிருக்கிறதா ? ரொம்பவே கடினமான கட்டமைப்பாக, (காம்ப்ளக்ஸ் ஆர்கிடெக்சர் ) இருக்கிறதா ? அப்படியெனில் ஒருவேளை பிளாக் செயின் கைகொடுக்கலாம். அருத்த நிலை கேள்வியைக் கேட்கலாம்.

இன்றைய மென்பொருள் கட்டமைப்பின் பாதுகாப்பு எப்படி ? எதிரிகளின் தாக்குதலுக்கு எளிதில் இலக்காகுமா ? இப்போது இருக்கின்ற அமைப்பு நிறைய மனித தவறுகள், பிழைகள் நடக்க ஏதுவாக இருக்கிறதா ? ஒருவேளை இன்னொரு அமைப்பு வந்தால் நம்பிக்கையும், வெளிப்படைத் தன்மையும், பாதுகாப்பும் அதிகரிக்கும் என தோன்றுகிறதா ?

அதேபோல இப்போது இருக்கின்ற மென்பொருள் தேவையான வேகத்தில் செயல்படுகிறதா என்பதையும் பார்க்க வேண்டும். தேவையான அளவுக்கு வேகம் இல்லாவிட்டால் மென்பொருளையோ, கட்டமைப்பையோ மாற்ற வேண்டியது காலத்தின் கட்டாயம். அப்படிப்பட்ட சூழலில் பிளாக் செயின் ஒரு நல்ல ஆப்ஷனாக இருக்கலாம்.

நிறுவனம் அதிக அளவு டிஜிடல் பரிவர்த்தனைகளையும், டிஜிடல் சொத்துகளையும் வைத்திருக்கிறதா ? அப்படி இருக்கின்ற டிஜிடல் தகவல்களையெல்லாம் ஒரு நிலையான ரிக்கார்ட் ஃபார்மேட்டில் கொண்டு வர முடியுமா ? என்பதும் பிளாக் செயினை தேர்ந்தெடுப்பதில் மிக முக்கியமான ஒரு தகவல் என்பதை நினைவில் கொள்ளுங்கள்.

இப்படி படிப்படியாகக் கேட்கின்ற கேள்விகள் ஒரு நிறுவனத்துக்கு பிளாக்செயின் வேண்டுமா வேண்டாமா என்பதை முடிவு செய்ய உதவும். நிறுவனத்தை முழுமையாக கேள்விகளால் அலசும்போது பிளாக் செயின் தொழில் நுட்பம் தேவையா இல்லையா எனும் தெளிவு கிடைக்கும்.

சரி, இப்போது உங்களிடம் சில கேள்விகளும் அதற்கான விடைகளும் இருக்கின்றன. உங்களுடைய மென்பொருள் நீங்கள் எதிர்பார்க்கும் வகையில் இல்லை, பிளாக் செயின் பயனளிக்கும் என்பது உங்களுக்கு நிச்சயமாகத் தெரிந்தால் அடுத்த நிலை கேள்விக்குத் தாவுங்கள்.

1. தற்போதைய கட்டமைப்பிலும், மென்பொருளிலும் இருக்கின்ற குறைகள் என்ன ?
2. எப்படிப்பட்ட தீர்வை நான் எதிர்பார்க்கிறேன் ?
3. பிளாக் செயின் அந்த தீர்வைத் தர வலிமையுடையதா ?

இந்த மூன்று கேள்விகளுக்கும் நிச்சயம் விடை இருக்க வேண்டும். நமது எதிர்பார்ப்புகளை நிறைவேற்றும் வகையில் பிளாக் செயின் இருப்பதாக நிச்சயப்படுத்திக் கொண்டால் மட்டுமே அந்த தொழில்நுட்பத்தை நோக்கி உங்கள் பார்வையைச் செலுத்தலாம்.

ஒரு நிறுவனத்துக்கு பிளாக் செயின் வேண்டுமா வேண்டாமா என்பதை முடிவு செய்ய பல சோதனை முறைகளை வைத்திருக்கிறார்கள். பிர்க் மாடல், பிர்க் பிரவுன் பருலாவா மாடல், சூய்சீஸ் மாடல், ஐபிஎம் மாடல், லூயிஸ் மாடல், மார்கன் ஈ பெக் மாடல் என சொல்லிக் கொண்டே போகலாம்.

இவையெல்லாம் ஒரு நிறுவனத்தில் பிளாக் செயின் மாடல் தேவைப்படுமா என்பதைக் கண்டறிய உதவுகின்ற அறிவியல் ரீதியான அணுகுமுறைகள். ஃப்ளோசார்ட், அல்காரிதம் போன்றவற்றின் உதவியுடன் இந்த முடிவை எடுக்க இவை உதவுகின்றன. வெறுமனே ‘நால்லா இருக்கும்ன்னு நினைக்கிறேன்’ என ஒரு தொழில்நுட்ப மாற்றத்தைச் செய்யக் கூடாது. அதை அறிவியல் ரீதியாக பரிசோதித்த பின்பே கால் வைக்க வேண்டும்.

ஏன் இந்த முடிவு இத்தனை முக்கியத்துவம் வாய்ந்தது ? காரணம் ஒரு முறை முடிவெடுத்து விட்டால் அந்த தொழில்நுட்பத்துக்கு நிறைய பணமும், நேரமும் அளிக்க வேண்டியிருக்கும். அதனால் தான் நிதானமான முடிவுகள் தேவைப்படுகின்றன.

பிளாக் செயினில் இரண்டு வகைகள் உண்டு. ஒன்று பெர்மிஷன்லெஸ் பிளாக் செயின். அதாவது அனுமதி தேவையில்லாமல் யார் வேண்டுமானாலும் இணையக்கூடிய பிளாக் செயின் அமைப்பு. பிட்காயின் போன்றவை இத்தகைய பெர்மிஷன்லெஸ் பிளாக்செயினாகத் தான் இருக்கின்றன.

இன்னொரு வகை பிளாக் செயின் பெர்மிஷண்ட் பிளாக்செயின். இதில் பொது நபர்கள் யாரும் இணைய முடியாது. அனுமதி பெற்ற நபர்கள் மட்டுமே இந்த பிளாக் செயினுக்குள் நுழைய முடியும். இதில் ஒரு நபர் கண்காணிப்பாளராகவோ, அனுமதியளிப்பவராகவோ இருந்து பிளாக் செயின் பயன்பாட்டாளரை நிர்வகிப்பார். யாருக்கு என்னென்ன அனுமதி வழங்கலாம் என்பதை அவர் செயல்படுத்துவார்.

அனுமதியற்ற பிளாக் செயின் தான் முதலில் உருவான கான்சப்ட். பிட்காயின் போன்றவை இன்னும் அதே வழியைத் தான் பின்பற்றுகின்றன. அதில் இன்னும் கொஞ்சம் தனிமை சேர்க்க விரும்பியவர்களால் உருவாக்கப்பட்டது தான் இந்த அனுமதியுடைய பிளாக் செயின். பல நிறுவனங்கள் இன்று பெர்மிஷண்ட் பிளாக் செயினைப் பயன்படுத்துகின்றனர். ஒரு வகையில் இது கொஞ்சம் பழைய சென்ட் ரலைஸ்ட் முறை தான். அனுமதியும் கட்டுப்பாடும் ஒரு இடத்தில் இருக்கும்.

ஒரு நிறுவனத்துக்கு பிளாக் செயின் தேவை என முடிவு செய்தால் அடுத்த படி இது தான். எந்த பிளாக்செயின் வேண்டும் ? அனுமதியற்றதா ? அனுமதியுடையதா ?

அடுத்ததாக அவை ஸ்மார்ட் கான்ட் ராக்டை ப் பற்றி சிந்திக்க வேண்டும். பெரும்பாலான நிறுவனங்கள் பிளாக் செயினை வரவேற்கக் காரணமே இந்த ஸ்மார்ட் கான்ட் ராக்ட் தான். ஒப்பந்தமிடப்பட்டுள்ள நிறுவனங்களை ஸ்மார்ட் கான்றாக்ட் மூலம் பிளாக் செயினுக்குள் இணைக்க வேண்டும்.

பல நிறுவனங்கள் தங்களுக்கு இடையே உள்ள இடைநிலை நிறுவனங்களை , புரோக்கர்களை, மாற்றுவதற்காக பிளாக்செயின் தொழில்நுட்பத்தை அங்கீகரிக்கின்றன. இதன் மூலம் நிறுவனங்கள் நேரடியாகக் கைகுலுக்கிக் கொள்ளும் நிலை வரும். தேவையற்ற செலவினங்களை குறைக்க இது பயன்படும்.

இன்றைய தேதியில் ஆர்டிபிஷியல் இண்டெலிஜெண்ட்க்கு அடுத்தபடியாக தொழில்நுட்ப உலகை ஆக்கிரமித்துக் கொண்டிருக்கும் தொழில்நுட்பம் இந்த பிளாக் செயின் தான். அதை ஒரு நிறுவனம் பரிசீலிக்க வேண்டுமா வேண்டாமா என்பதையே நாம் பார்த்தோம்.

இந்த தொழில்நுட்பத்தைக் கற்றுக்கொள்ள என்ன செய்யவேண்டும் ? என்ன படித்திருக்க வேண்டும் ? போன்றவற்றை அடுத்த வாரம் பார்ப்போம்.

( தொடரும் )

பிளாக் செயின் 5

Image result for block chain

பிளாக் செயின் மிக வேகமாக வளர்ந்து வருகிறது என்பதை இரண்டு விஷயங்களால் புரிந்து கொள்ளலாம். ஒன்று, எல்லா நிறுவனங்களும் பிளாக் செயின் படித்தவர்களை வேலைக்கு அமர்த்தத் துவங்கியிருக்கிறது. இரண்டு, பல நிறுவனங்கள் தங்களுடைய புதிய வேலைகளை பிளாக் செயின் அடிப்படையில் தான் செயல்படுத்துகிறது.

இந்த டிரென்ட் விரிவடையும் போது நிறுவனங்களெல்லாம் பிளாக் செயின் வல்லுநர்களை வலைவீசித் தேடும், மிகப்பெரிய அளவில் இந்த தொழில்நுட்பத்துக்கான வேலைவாய்ப்புக் கதவுகள் திறக்கும் என்பதில் சந்தேகமில்லை.

இந்த தொழில்நுட்பம் எந்தெந்த டொமைன்களில் பயன்படுத்தப்படுகிறது, எந்தெந்த வகைகளில் பயன்படுத்தப்படுகிறது என்பதைப் புரிந்து கொண்டால் இதன் வீச்சைப் புரிந்து கொள்ள முடியும்.

சர்வதேச அளவிலான ‘லாஜிஸ்டிக்’ நிர்வாகத்தில் இந்த பிளாக் செயின் தொழில்நுட்பம் வலுவாக நுழைந்திருக்கிறது. லாஜிஸ்டிக் என்றால் வேறொன்றுமில்லை ஒரு இடத்திலிருந்து இன்னொரு இடத்துக்கு பொருட்களையோ, ஆட்களையோ, தகவல்களையோ அனுப்பும் முறை. அதற்கு என்னென்ன கவனிக்க வேண்டும், என்னென்ன செய்ய வேண்டும் , இதை எப்படி நிர்வகிக்க வேண்டும், எப்படி கண்காணிக்க வேண்டும் எனும் சகல விஷயங்களும் இப்போது பிளாக் செயின் நுட்பத்துக்குள் வந்திருக்கிறது.

இதையெல்லாம் வெற்றிகரமாக நிறைவேற்றிக் காட்டிய பெருமை எசன்ஸியா நிறுவனத்தைச் சேரும். அவர்கள் தான் உலகின் முதல் லாஜிஸ்டிக் பிளாக் செயின் தீர்வை உருவாக்கியவர்கள். இன்றைக்கு லாஜிஸ்டிக் துறையில் பிளாக் செயின் தொழில்நுட்பம் வெகுவேகமாகப் பரவிக்கொண்டிருக்கிறது.

வாக்காளர் பெயர்கள் மாயமாய் போவது, வாக்காளர்கள் திடீரென நுழைவது போன்ற சிக்கல்களெல்லாம் வாக்காளர் பட்டியலுக்கு உண்டு. அது குறித்து பல்வேறு சர்ச்சைகள் நம்மைச் சுற்றி எழுவதுண்டு. இத்தகைய சிக்கல்களைச் சரிசெய்ய சுவிட்சர்லாந்து தேர்ந்தெடுத்த நுட்பம் இந்த பிளாக் செயின். யூபோர்ட் நிறுவனம் அந்த கட்டமைப்பையும், மென்பொருளையும் உருவாக்கிக் கொடுத்தது. இதன் மூலம் தவறான வாக்காளர்கள் நுழையாமலும், சரியான வாக்காளர்கள் வெளியேற்றப்படாமலும் இருக்கும் வழி பிறந்திருக்கிறது.

அரசு சார்ந்த மென்பொருட்கள், அமைப்புகள், நிறுவனங்களெல்லாம் பிளாக் செயினை நோக்கி நகர இத்தகைய உதாரணங்கள் தூண்டுதலாய் இருக்கும் என்பதில் சந்தேகமில்லை.

பேய்மென்ட் துறை மிகப்பெரிய வளர்ச்சியைச் சந்தித்து வருவது நாம் அறிந்ததே. இந்தியாவின் யூபிஐ பேய்மென்ட் சமீப காலமாகா அசுர வளர்ச்சியடைந்து வருகிறது. சமீபத்தில் யூ.பி.ஐ 2.0 வெளியாகி வாடிக்கையாளர்களை வசீகரித்து வருவதும் நாம் அறிந்ததே. இப்போதெல்லாம் ஸ்மார்ட் போன் தவிர வேறெங்கும் நாம் பேமென்ட் செய்வதில்லை. ஜப்பானில் இப்போது மொபைல் பேமென்ட்ஸ் பாதுகாப்பாகவும், வேகமாகவும் நடக்க பிளாக் செயினின் உதவியை நாடியிருக்கிறார்கள். ஜப்பான் வங்கிகள் இந்த நுட்பத்தில் நுழைய ரிப்பில் எனும் நிறுவனம் உதவுகிறது.

இன்சூரன்ஸ் டொமைன் எப்போதுமே வளர்ந்து வருகின்ற ஒரு துறை. அது மெடிக்கல் இன்சூரன்ஸ், ஆட்டோ இன்சூரன்ஸ், ஹெல்த் இன்சூரன்ஸ் என பல வகைகளில் இயங்குகின்றன. இந்த துறையில் பிளாக் செயினின் ஆதிக்கத்தை ஆரம்பித்து வைத்திருக்கிறது அமெரிக்கன் இன்டர்நேஷனல் குரூப் இங்க் எனப்படும் ஏ.ஐ.ஜி. வாடிக்கையாளர்களுக்கு வெளிப்படையான தகவல்கள் அளிப்பது, குறைவான பிரீமியம் வாங்குவது என இந்த நுட்பம் வசீகரிக்க ஆரம்பித்திருக்கிறது.

ஒழுக்கமைக்கப்படாத துறை தான் ரியல் எஸ்டேட் எனலாம். அதையும் பிளாக் செயின் நுட்பத்துக்குள் கொண்டு வந்திருக்கிறது கிவி நாட்டின் பிராப்பி நிறுவனம். இந்த துறையின் முதல் முயற்சி இது எனலாம். எந்த துறைக்கும் பிளாக் செயின் ஒரு வரப்பிரசாதம் என்பதையே இது சொல்லாமல் சொல்கிறது.

மெர்ஸ்க் மிகப்பெரிய ஷிப்பிங் நிறுவனம். உலக அளவில் முன்னணியில் இருக்கின்ற இந்த நிறுவனம் இப்போது பிளாக் செயினை தான் இறுகப் பிடித்திருக்கிறது. மெரைன் லாஜிஸ்டிக்ஸ் எனும் பிரிவு மிக எளிதாகவும், அதிக பயனுள்ள வகையிலும் பிளாக் செயினை பயன்படுத்தக் கூடிய ஒரு துறை. மற்ற ஷிப்பிங் நிறுவனங்களும் இந்த முறையை நோக்கி நகர்கின்றன.

ஹெல்த்கேர் இன்னொரு முக்கியமான துறை. மெட்ரெக் நிறுவனம் தனது மருத்துவ கட்டமைப்பை பிளாக் செயினைக் கொண்டு வெற்றிகரமாக நிறுவியிருக்கிறது. மருத்துவத் தகவல்களைச் சேமிக்க இப்போது பல்வேறு ஹெல்த்கேர் நிறுவனங்கள் பிளாக் செயின் நுட்பத்தை வரவேற்கின்றன. இந்தத் துறை அதிக வேலை வாய்ப்புகளை உருவாக்கும் என்பது திண்ணம்.

எனர்ஜி உருவாக்குதல், பகிர்ந்தளித்தல் போன்ற துறைகளில் இப்போது பிளாக் செயின் நுட்பம் வருகிறது. எஸன்சியா நிறுவனம் வெற்றிகரமாக இதை வெள்ளோட்டம் விட்டிருக்கிறது. இது நமது மின்வாரியத் துறையில் வந்தால் புரட்சிகரமான மாற்றங்கள் நிகழும் என்பது திண்ணம். உதாரணமாக, மின்சாரம் எவ்வளவு செலவிடுகிறோம், அதற்கு என்ன விலை என்பதையெல்லாம் நேரடியாகக் கண்காணிக்கலாம்.

விளம்பரத் துறையிலும் பிளாக் செயின் பாதம் பதித்திருக்கிறது. விளம்பரங்களை கஸ்டமைஸ் செய்து வெளியிடுவதில் இதை பயன்படுத்துகின்றனர். நியூயார்க் இன்டராக்டிவ் விளம்பர பிரிவு இதை செயல்படுத்தத் துவங்கியிருக்கிறது. நியாக்ஸ் எனும் நிறுவனத்தின் உதவியோடு இது உருவாக்கப்பட்டுள்ளது. இன்றைய தொழில்நுட்ப உலகில் விளம்பரத் துறை மிகப்பெரிய உயரத்தில் இருக்கிறது. இன்னும் அது வலுவடைய இந்த தொழில்நுட்பம் கைகொடுக்கும்.

மயோகோய் நெட்வர்க் சீனாவிலுள்ள முக்கியமான நெட்வர்க் நிறுவனம். சீனாவிலுள்ள அரசு வரி சார்ந்த விஷயங்களையெல்லாம் பிளாக் செயின் நுட்பத்துக்குள் கொண்டு வர இந்த நெட்வர்க் உதவி செய்கிறது. அரசின் வரி திட்டங்களும், வரி சார்ந்த தகவல்களும் இந்த பிளாக் செயினுக்குள் வருகின்றன.

ரயில்வேக்களிலும் பிளாக் செயின் நுழைந்திருக்கிறது. ஏற்கனவே ரஷ்யா பிளாக் செயின் நுட்பத்தை கையில் எடுத்திருக்கிறது. தகவல்களை சேமித்து வைக்கவும், அதைக் கொண்டு முடிவுகளை எடுக்கவும் பிளாக் செயினை அவர்கள் நாடுகின்றனர். இந்திய ரயில்வேயும் பிளாக் செயின் நுட்பத்துக்குள் நுழையும் என்பது தவிர்க்க முடியாத ஊகம்.

அமெரிக்காவின் தேசிய பாதுகாப்புத் துறை பிளாக் செயினைத் தான் நம்புகிறது. ‘டிப்பார்ட் மென்ட் ஆஃப் ஹோம்லேன்ட் செக்யூரிடி” யானது கண்காணிப்புக் கேமராக்களிலிருந்து வருகின்ற தகவல்களை பாதுகாக்கவும், அலசவும் இந்த பிளாக் செயின் தொழில்நுட்பத்தைப் பயன்படுத்துகிறது.

இதே போல வேஸ்ட் மேனேஜ்மென்ட், பத்திரிகைத் துறை, கலை, சுற்றுலாத் துறை என எல்லா இடங்களிலும் பிளாக் செயினின் பாதிப்பும், இருப்பும் வலுவடைந்திருக்கிறது.

இதையெல்லாம் விளக்கமாகச் சொல்ல முக்கியமான காரணங்கள் இரண்டு.

1, பிளாக் செயின் தொழில்நுட்பத்துக்குள் நுழைய முடியாது என்கின்ற டொமைன் ஏதும் இல்லை. எல்லா இடங்களிலும் அது நுழைய முடியும்.

2. வேலைவாய்ப்புகளைத் தேடுபவர்கள் தங்களுடைய டொமைன் எதுவோ, அல்லது தங்களுக்குப் பிரியமான டொமைன் எதுவோ அதிலிருந்து விலகாமலேயே இந்த பிளாக் செயின் தொழில்நுட்பத்தில் நுழையலாம்.

( தொடரும் )

பிளாக் செயின் 4

Related image

கடந்த மூன்று வாரங்களாக பிளாக் செயின் என்றால் என்ன என்பதையும் அதன் பயன்களையும் மேலோட்டமாகப் பார்த்தோம். இந்த வாரம் சற்றே உள்நுழைந்து அது எப்படி செயல்படுகிறது என்பதைப் பார்ப்போம்.

பிளாக் செயின் தொழில்நுட்பம் எப்படி இயங்குகிறது என்பதை எளிமையாகப் புரிந்து கொள்ள ஒரு அடிப்படைக் கேள்வியை எழுப்புவோம். பிளாக் செயின் எனும் வார்த்தைக்கு என்ன பொருள் ? பிளாக் என்றால் ஒரு ‘தகவல்கள் அடங்கிய ஒரு பாக்கெட்’என வைத்துக் கொள்ளலாம். செயின் என்றால் சங்கிலி. பிளாக் செயின் என்றால் தகவல்கள் அடங்கிய பாக்கெட்களை இணைக்கின்ற சங்கிலி என்று பொருள்.

பிளாக் செயினில் உள்ள தகவல்கள் பிளாக் பிளாக்காக சங்கிலிகளால் இணைத்துக் கட்டப்பட்டது போல அமைந்திருக்கும். இந்த சங்கிலி உடைபடாமல் பாதுகாக்கப்படும்.

இந்த ஒரு ‘பிளாக்’ ஐ எடுத்துக் கொள்வோம். அதில் என்ன இருக்கும் ? மூன்று பகுதிகள் இருக்கும். ஒன்று, முந்தைய பிளாக்கின் விலாசம் அல்லது ஹேஷ் டேக் இருக்கும். இரண்டு, தொடர்ந்து வருகின்ற பிளாக்கின் விலாசம் அதாவது ஹேஷ் டேக் இருக்கும். மூன்று, அந்த பிளாக்கில் இருக்க வேண்டிய கணக்கு வழக்கு போன்ற ஏதோ தகவல்கள் இருக்கும்.

இது தான் ஒவ்வொரு பிளாக்கிலும் இருக்கக் கூடிய மூன்று பிரிவுகள். முதல் ஹேஷ் தனக்கு முன்னால் இருக்கும் பிளாக் சரியானது தானா என்பதை ஊர்ஜிதப்படுத்தும். யாராவது திருட்டுத்தனமாய் இன்னொரு பிளாக்கை கொண்டு வைக்க நினைத்தால் இந்த ஹேஷ் காட்டிக் கொடுத்து விடும். அதே போல சரியான பிளாக்குக்குப் பதில் தவறான பிளாக்கை சுட்டிக்காட்டும் பிழையிலிருந்தும் தப்பிக்கும்.

இரண்டாவது ஹேஷ், தனக்குப் பின்னால் இருக்க வேண்டிய பிளாக் சரியாக இருக்கிறதா என்பதை உறுதி செய்யும். தேவையற்ற ஒரு பிளாக் இடையில் வருவதையும் தடுக்கும். இதன் மூலம் தகவல்களின் பயணம் சரியான திசையில் நடப்பதை கண்காணிக்கும்.

மூன்றாவதாக இருக்கின்ற இடம் தான் தகவல்களுக்கு. இதில் தான் அந்த பரிவர்த்தனை சார்பான அனைத்துத் தகவல்களும் அமைந்திருக்கும்.

இப்படி ஒவ்வொரு பிளாக்கும் தனக்கு முன்னாலும் பின்னாலும் வருகின்ற தகவல்களை சரிபார்ப்பதால் பிளாக் செயின் முழுவதும் இருக்கின்ற தகவல்கள் சரிபார்க்கப்படும்.

தகவல்களை சேமித்து வைக்கின்ற ஃபைல் ஸ்ட்ரக்சர், டேட்டாபேஸ் என்பன போன்று இல்லாமல் இது ஊர்ஜிதப்படுத்தப்பட்ட தகவல்களின் இணைப்பாக இருப்பது குறிப்பிடத்தக்கது.

இந்த பிளாக் செயினை பிஸினஸ் க்கு பயன்படுத்துவதற்கு நான்கு விஷயங்களை மனதில் கொள்ள வேண்டும். பிஸினஸ் உலகில் இது பிட்காயினைப் போல பொதுவானதாக இல்லாமல் ஒரு குறிப்பிட்ட வலைப்பின்னலுக்குள் தான் இயங்கும் என்பது குறிப்பிடத்தக்கது.

1. பகிரப்படும் லெட்ஜர். லெட்ஜர்கள் பதினைந்தாம் நூற்றாண்டு தொடங்கி, இன்று வரைக்கும் பயன்படுத்தப்பட்டு வருகின்றன. ஒருபக்கம் வரவு, ஒருபக்கம் செலவு என கோடிட்டு எழுதும் லெட்ஜர்கள் மிகப்பிரபலம். புதியது என்னவென்றால் இவை ஒரே நேரத்தில் எல்லோராலும் பார்க்கவும், வாசிக்கவும் முடியும் என்பது தான். கூடவே சுடச்சுட தகவல்கள் இதில் வந்து சேரும் என்பதும் சிறப்பு அம்சம்.

ஒரே ஒரு லெட்ஜர். உண்மைத் தகவல்கள் அடங்கிய லெட்ஜர். இந்த நெட்வர்க்கில் இருக்கின்ற நபர்கள் இந்த லெட்ஜரைப் பிரதி எடுத்துப் பயன்படுத்தலாம்.

இந்த லெட்ஜரிலுள்ள தகவல்களில் எந்தெந்த தகவல்களை நாம் பிறருக்குக் காண்பிக்க வேண்டுமோ அதற்குரிய அக்ஸஸ் மட்டும் கொடுத்து நமது தகவலை பாதுகாப்பாக்கலாம்.

2 இந்த நெட்வர்க்கிலுள்ள அனைவருக்கும் தனிப்பட்ட அனுமதிகள் வழங்கப்படும். அனுமதிக்கப்படாத உள்ளே வராமல் தடுக்க இது அவசியம். ஒவ்வொருவருக்கும் எப்படிப்பட்ட அனுமதி வழக்கப்படலாம் ? எந்தெந்த பரிவர்த்தனைகளைப் பார்வையிட அனுமதிக்கலாம் ? என்பன போன்ற விஷயங்களை நிர்ணயித்துக் கொள்வது பிஸினஸுக்குப் பயன்படும்.

உதாரணமாக ஒரு நிறுவனம் இன்னொரு நிறுவனத்துக்கு சரக்கை அனுப்பினால் அந்த இரண்டு நிறுவனங்களும் அந்த முழு டீட்டெயிலைப் பார்க்க முடியும். ஆனால் ஒரு மூன்றாவது நிறுவனம் அதைப் பார்வையிட்டால் இரண்டு நிறுவனங்களும் ஏதோ ஒரு பரிவர்த்தனை செய்திருக்கின்றன என்பதை மட்டுமே புரிந்து கொள்ள முடியும். அவர்கள் பரிவர்த்தனை செய்தது என்ன என்பதைக் கண்டு பிடிக்க முடியாது.

3 வலுவான ஒப்பந்தம். ஒரு பரிவர்த்தனையை பரிசோதித்து சான்றளிக்க சில விதிமுறைகள் உண்டு. அந்த சான்றளிப்பவர் அந்த நெட்வர்க்கின் மொத்த மதிப்பில் ஒரு குறிப்பிட்ட அளவை வைத்திருக்க வேண்டும். இதன் மூலம் சான்றளிப்பவர்களின் எண்ணிக்கையை குறைக்க முடியும். யாரும் தப்பாக சான்றளிக்க முடியாத நிலை உருவாகும். சான்றளிப்பது காஸ்ட்லி வேலை என வரும்போது அந்த சிக்கல் தவிர்க்கப்படும்.

அதே போல ஒரு பரிவர்த்தனையை மூன்று நான்கு பேர் சான்றளிக்க வேண்டும் என்பது பரிவர்த்தனையின் உண்மைத் தன்மையை நிலைநாட்டும்.

அதே போல பிளாக்செயினை பயன்படுத்துவது யார் ? அவர்களுக்கு என்னென்ன அனுமதிகள் வழங்கலாம் என்பதையும் நிறுவனங்கள் முடிவு செய்யலாம். அதற்கான வசதிகளை பிளாக் செயின் நுட்பம் தனக்குள்ளே கொண்டிருக்கிறது.

1. பிளாக் செயின் யூசர். இவர்கள் தான் பயன்பாட்டாளர்கள். பிளாக் செயினுக்குள் நுழையவும் குறிப்பிட்ட பரிவர்த்தனைகளைப் பார்க்கவும் இவர்களுக்கு அனுமதி உண்டு. பிளாக் செயின் நுட்பத்தை மாற்றியமைக்கவோ, மென்பொருள் மாற்றங்கள் செய்யவோ இவர்களுக்கு அனுமதி இல்லை.

2. ரெகுலேட்டர்ஸ். இவர்களுக்கு பயன்பாட்டாளர்களை விட கொஞ்சம் அதிகம் அனுமதிகள் உண்டு. ஒரு நெட்வர்க்கை முழுமையாக பார்க்கும் அனுமதி இவர்களுக்கு உண்டு. பொதுவாக இவர்களுக்கு பரிவர்த்தனைகள் செய்யும் அனுமதி இருக்காது. பார்வையிடும் அனுமதி மட்டுமே இருக்கும்.

3. பிளாக் செயின் டெவலப்பர்கள். இவர்கள் தான் மென்பொருளை உருவாக்குபவர்கள். வலைப்பின்னலுக்கு என்னென்ன ஒப்பந்தங்கள் கொண்டு வரவேண்டும் என்பதை இவர்கள் உருவாக்கித் தருவார்கள். பிளாக் செயின் மென்பொருளை மெயின்டெயின் செய்வது, வலிமையாக்குவது போன்ற அனைத்து வேலைகளையும் செய்யும் அனுமதி இவர்களுக்கு இருக்கும்.

4. பிளாக் செயின் நெட்வர்க் ஆப்பரேட்டர். ஒவ்வொரு பிளாக் செயினுக்கும் ஒரு நெட்வர்க் ஆப்பரேட்டராவது இருக்க வேண்டியது அவசியம். இவர்களுக்கு புதிதாக பிளாக் செயினை உருவாக்கவும், அதை பராமரிக்கவும் அனுமதி இருக்கும். பிலாக் செயினில் ஒரு புதிய பிஸினஸ் ஆரம்பிக்கிறதெனில் அதற்காக ஒரு புதிய பிளாக் செயின் நெட்வர்க்கை இவர்கள் அமைத்துத் தருவார்கள்.

5. சர்டிபிகேட் வழங்குபவர். அனுமதிக்கப்பட்ட வகையில் ஒரு பிளாக் செயின் இயங்க அதற்கு சான்றிதழ்கள் தேவை. அதற்கான சான்றிதழ்களை வழங்குவதும், அதை நிர்வகிப்பதும் இவர்களுடைய பணியாக இருக்கும்.

இப்படி பிளாக்செயினுக்குள் பணியாற்றும் நபர்களும், பயன்படுத்தும் நபர்களும், வேறு வேறு விதமான நிலைகளில் அமைந்த அனுமதிகளைப் பயன்படுத்துவார்கள்.

( தொடரும் )

பிளாக் செயின் : 3

Related image

பிளாக் செயின் தொழில்நுட்பம் எப்படிச் செயல்படும் என்பதை ஒரு சின்ன உதாரணம் மூலம் பார்க்கலாம். ஒரு டிவி தயாரிப்பு நிறுவனம் இருக்கிறது என வைத்துக் கொள்ளுங்கள். முதலில் பல்வேறு பாகங்களை இணைத்து தொலைக்காட்சிகளைச் செய்கிறார்கள். அதன் கணக்கு வழக்குகளை ஒரு இடத்தில் சேமித்து வைப்பார்கள். அதற்கு ஒரு லெட்ஜரை பயன்படுத்துவார்கள்.

பிறகு அந்த தொலைக்காட்சி இன்னொரு இடத்தில் லேபல் ஒட்டுவது, ஸ்டிக்கர் ஒட்டுவது போன்ற வேலைகளுக்குச் செல்லும். அந்த வேலைகளையெல்லாம் அவர்கள் செய்து விட்டு தகவல்களைப் ஒரு லெட்ஜரில் பதிவு செய்வார்கள். அதற்கு அவர்கள் தனியே ஒரு லெட்ஜர் பயன்படுத்துவார்கள்.

பின்பு அது பேக்கிங் செய்யப்படும் இடத்துக்கு அனுப்பப்படும். அவர்கள் அந்த தொலைக்காட்சிகளை அதற்குரிய பாக்ஸ்களில் பேக் செய்து, லேபல் ஒட்டுவார்கள். அங்கே தனியாக ஒரு லெட்ஜர் இருக்கும். அதில் பதிவு செய்யப்படும்.

அதன்பின்னர் அங்கிருந்து டீலர்களுக்குச் செல்லும். டீலர்கள் தங்களுக்கென தனித்தனியே லெட்ஜர்கள் வைத்திருப்பார்கள். அதில் தங்களுடைய கணக்கு வழக்குகளை பதிவு செய்வார்கள். அதன் பின் அது கடைகளுக்குச் செல்லும். அங்கும் தனி லெட்ஜர் பதிவுகள் இருக்கும்.

இந்த ஒரு சின்ன உதாரணத்திலேயே ஐந்து லெட்ஜர்கள் பயன்படுத்தப்படுகின்றன. முதல் லெட்ஜருக்கும் கடைசி லெட்ஜருக்கும் இடையே உள்ள பரிவர்த்தனைகளையெல்லாம் கூட்டிக் கழித்து , டேலி பண்ணி செட்டில்மெண்ட் செய்து முடிப்பது என்பது மிகப்பெரிய ஒரு வேலை. நிறைய நாட்களும், நிறைய ஆட்களும் தேவைப்படும்.

மேலே விளக்கியிருப்பது இப்போது நடைமுறையில் இருக்கின்ற வழக்கமான சப்ளை செயின் பணி. பிளாக் செயின் இதில் ஒரு முக்கியமான மாற்றத்தைக் கொண்டு வருகிறது.

இந்த ஐந்து பகுதிகளையும் ஒரே ஒரு லெட்ஜர் மூலம் அது இணைக்கிறது. ஐந்து பகுதிகள் ஐந்து லெட்ஜர்கள் எனும் முறை மாறி ஐந்து பகுதிகள் ஒரே ஒரு லெட்ஜர் எனும் முறைக்கு இது மாறுகிறது. இந்த ஐந்து பகுதிகளும் ஐந்து நோட் என அழைக்கப்படுகின்றன. இவை எல்லாமே ஒரே ஒரு லெட்ஜரைத் தான் பயன்படுத்துகின்றன. இதனால் ஒரு பொருள் முதலில் உருவாகின்ற இடம் தொடங்கி, கடைசியில் விற்பனையாகும் இடம் வரையுள்ள தகவல்களை உடனுக்குடன் எடுக்க முடியும்.

சில நிமிடங்களுக்கு ஒரு முறை தகவல்கள் அப்டேட் செய்யப்படுவதால் இதன் ஸ்டேட்டஸ் என்ன என்பதை எப்போது வேண்டுமானாலும் பார்த்துக் கொள்ளலாம். இதில் மைய சர்வர் ஏதும் இல்லை. மைய சேமிப்புத் தளமும் இல்லை.

ஒரு நோட் இன்னொரு நோட்க்கு தகவலை பரிமாறிக் கொள்ளும். அப்படி பரிமாறிக் கொள்ளும் தகவல்கள் பொதுவான லெட்ஜரில் பதிவு செய்யப்படுவதால் எந்த நோட் வேண்டுமானாலும் அதை பார்த்துக் கொள்ள முடியும்.

ஒருவர் பதிவு செய்ததை இன்னொருவர் மாற்ற முடியாது. அழிக்கவும் முடியாது. அது பாதுகாப்பான இன்னொரு பதிவின் மூலம் தான் மாற்ற முடியும். இது தான் பிளாக் செயின் கொண்டு வருகின்ற புதுமையான மாற்றம்.

இதில் தகவல்கள் வேகமாகப் பதிவு செய்யப்படும். ஒரே ஒரு இடத்தில், ஒரு தகவல் ஒரே ஒரு முறை என்பது இதன் சித்தாந்தம். காரணம் ஒரு மைய சேமிப்புத் தளம் இதற்கு இல்லை. எந்தவிதமான சோதனை தாமதங்களும் அதனால் ஏற்படாது. பொருட்களை தயாரிப்பது, அனுப்புவது, விற்பது, உடனுக்குடன் அதன் முடிவை தெரிந்து கொள்வது என எல்லா வேலைகளும் மிக மிக வேகமாக நடந்து முடியும்.

செலவும் ரொம்ப கம்மி. காரணம், இடையில் எந்த விதமான இடைத்தரகர்களும் தேவையில்லை. தகவல்கள் தானாகவே ‘நோட்’களுக்கு மாறி மாறிச் செல்லும். ஒரே தகவல் பல இடங்களில் பதிவு செய்யப்படுகின்ற டூப்ளிகேட் சிக்கலைத் தடுக்கும்.

எளிய முறையில் ஆடிட்டிங் வேலைகளை முடித்துக் கொள்ளவும் இந்த முறை கைகொடுக்கும்.

பிஸினஸின் அடிப்படை என்ன என்று கேட்டால் நம்பிக்கை என்று சொல்வார்கள். ஆரம்ப காலத்தில் நம்பிக்கை இல்லாத இரண்டு பேர் சேர்ந்து ஒரு தொழிலைச் செய்யவே மாட்டார்கள். அப்போதெல்லாம் ‘சொன்ன வாக்கு சொன்னது தான்’ எனும் கொள்கைப் பிடிப்பு மக்களிடையே இருந்தது.

இன்று டிரஸ்ட் பட் வெரிஃபை என்பது தான் புது மந்திரம். நம்பு, ஆனாலும் சோதித்தறி என தமிழில் சொல்லலாம். பிளாக்செயின் ஒருவகையில் அதற்கு தீனி போடுகிறது. நடக்கின்ற எல்லா பரிவர்த்தனைகளும் பாதுகாப்பாக பரிசோதித்துக் கொள்ள முடியும் என்பது இதில் மிகப்பெரிய வசதி.

ஒரு வேளை நிறுவனம் ஒரு நபரை இதற்காக வேலைக்கு அமர்த்தினால் அவர் ஒரு இடத்தில் இருந்து கொண்டே ஒட்டு மொத்த பரிவர்த்தனைகளையும் கண்காணிக்கவும், சரிபார்க்கவும் முடியும்.

இந்த தொழில்நுட்பத்தின் மிகப்பெரிய வரவேற்புக்குக் காரணமாக ஒரு டாப் 5 விஷயங்களைச் சொல் என்றால், கீழ்க்கண்டவற்றைச் சொல்லலாம்.

1. இதை எந்த ஒரு தனி நிறுவனமும் சொந்தம் கொண்டாடவோ, கட்டுப்படுத்தவோ முடியாது. எப்போதுமே தகவல்கள் பொதுவில் இருக்கும். அதற்குரிய இரகசியக் குறியீடுகளைக் கொடுத்து பார்த்துக் கொள்ளலாம். உடனடித் தகவல்கள் இதில் இருக்கும் என்பதால் மிகத் தெளிவான திட்டமிடலுக்கு வெகுவாகக் கைகொடுக்கும்.

2. இதன் பாதுகாப்பு வலிமையானது. இரண்டு நிறுவனங்களுக்கு இடையே ஒப்பந்தம் இருந்தால் மட்டுமே அவர்களுடைய தகவல்களை அவர்கள் பார்த்துக் கொள்ளலாம். பாஸ்வேர்ட் பாதுகாப்பின் கீழ் இவை இருப்பதால் அன்னியர்கள் அனுமதியின்று உள்ளே நுழைய முடியாது. இரண்டு நிறுவனங்களும் தங்களுடைய அடையாளத்தை வெளிப்படுத்தாமலும் இதில் பிஸினஸ் செய்ய முடியும்.

3. யாரும், யாருடைய தகவல்களையும் மாற்ற முடியாது. ஏன், சொந்தத் தகவல்களைக் கூட மாற்ற முடியாது. ஒரு பரிவர்த்தனையை மாற்றியமைக்க அதன் தகவல்களை எடிட் செய்ய முடியாது. இன்னொரு பரிவர்த்தனையால் மட்டுமே சரி செய்ய முடியும். அப்போது இரண்டு பரிவர்த்தனை தகவல்களும் பதிவு செய்யப்படும். உதாரணமாக ஒருவர் ஒரு இலட்சத்துக்குப் பதில் இரண்டு இலட்சம் என பதிவு செய்தால், அதை போய் எடிட் செய்ய முடியாது. ஒரு இலட்சத்தைத் திருப்பி அனுப்பும் இன்னொரு செய்தியைத் தான் செய்ய வேண்டும். அப்படி தான் டேலி செய்ய முடியும்.

4. தகவல்கள் எப்போதும் வெளிப்படையாய் இருக்கும். அதற்காக யார் வேண்டுமானாலும் பார்க்க முடியும் என நினைக்க வேண்டாம். சரியான பாதுகாப்பு தகவல்களோடு தான் உள்ளே நுழைய முடியும். பாதி தகவல்களை ஒளித்து வைத்து, மீதி தகவல்களை பொதுவில் வைக்கும் சமாச்சாரம் இங்கே நடக்காது.

5. அங்கீகரிக்கப்படாத தகவல்களை லெட்ஜரில் ஏற்றவும் முடியாது. அல்காரிதங்களின் உதவியுடன் ஒரு நெட்வர்க்கில் உள்ள நிறுவனங்களின் அங்கீகாரத்தை பிளாக்செயின் தொழில்நுப்டம் பெற வகை செய்யும். அதே போல பிஸினஸ் வளர்ச்சிக்கு ஏற்பவும், அவர்களுடைய சட்டதிட்ட மாற்றங்களுக்கு ஏற்பவும் இந்த பிளாக் செயின் நுட்பத்தில் மாற்றங்களைக் கொண்டு வரவும் முடியும்.

பிளாக் செயின் தொழில்நுட்பம் பற்றிய சுருக்கமான புரிதல் இப்போது உங்களுக்குக் கிடைத்திருக்கும் என நம்புகிறேன்.

வரும் வாரங்களில் சற்றே உள்ளே இறங்கி இந்த தொழில்நுட்பத்தை அலசுவோம்

( தொடரும் )

பிளாக் செயின் 2

பிளாக் செயின் 2

Image result for block chain

முன்பெல்லாம் ஒரு பொருளை வாங்க வேண்டுமெனில் வண்டி கட்டிக்கொண்டு நீண்டதூரம் பயணம் செய்வது சர்வ சாதாரணம். ஆனால் இன்று இருந்த இடத்தில் இருந்து கொண்டே தேவையானவற்றையெல்லாம் வாங்கிவிட முடிகிறது. விற்பவருக்கும் வாங்குபவருக்கும் இடையேயான இடைவெளி குறைந்து குறைந்து இன்று ஏறக்குறைய மறைந்து விட்டது என்று சொல்லலாம்.

ஆன்லைன் பரிவர்த்தனைகள் டிஜிடல் பணத்தை மூலை முடுக்கெல்லாம் சுமந்து செல்கின்றன. தேவையான பொருட்களை அள்ளி வந்து வீடுகளில் தருகின்றன. விற்பவரையும் வாங்குபவரையும் டிஜிடல் கயிறு இறுகக் கட்டுகிறது.

இந்த இன்றைய பரபரப்புப் பயணத்தில் மிக முக்கியமாக கருத்தில் கொள்ள வேண்டிய விஷயங்கள் இரண்டு

1. பாதுகாப்பு
2. வேகம்.

பரிவர்த்தனைகள் பாதுகாப்பாக நடக்கின்றனவா ? அதற்குரிய முன்னெச்சரிக்கை நடவடிக்கைகள் எடுக்கப்பட்டுள்ளனவா ? தகவல்கள் எந்த அளவுக்கு பத்திரமாக உள்ளன ? அதை யாரும் திருடிச்செல்லாதவகையில் பாதுகாப்பு அரண்கள் இருக்கின்றனவா. தகவல்களை யாரும் மாற்றிவிடாதபடி பாதுகாப்பு வளையங்கள் இருக்கின்றனவா ? போன்றவையெல்லாம் பாதுகாப்பு சார்ந்த சில அடிப்படைக் கேள்விகள்.

அதே போல, இந்த பரிவர்த்தனைகள் வேகமாக நடக்குமா ? பணத்தைக் கொடுப்பதானாலும் சரி, திரும்பப் பெறுவதானாலும்ச் சரி எல்லாம் வேகமாக இயங்குகின்றனவா ? தொலைதூரங்கள் இப்போது கூப்பிடு தூரத்தில் வந்து விட்டனவா ? என்பன போன்ற சில அடிப்படைக் கேள்விகள் வேகம் சார்ந்து முன்வைக்கப்படுகின்றன.

வேகம் இல்லாத தொழில்நுட்பத்தை யாரும் சீண்டுவதில்லை. இன்று அனைவருக்கும் வேகமே பிரதானம். உணவு என்றால் ஃபாஸ்ட் புட். காதல் என்றால் உடனடிக் காதல். ஏடிஎம் சில வினாடிகள் மௌனமாய் இருந்தால் நமக்குப் பிடிப்பதில்லை. தொட்டவுடன் ஆப் ஓப்பன் ஆகவில்லையெனில் நாம் சலித்துக் கொள்கிறோம். வேகமே உலகை இயக்குகின்றது.

இந்த இரண்டு விஷயங்களையும் ஏன் அலசுகிறோம் ? அதற்கும் பிளாக் செயினுக்கும் தொடர்பு இருக்கிறது. இந்த இரண்டு விஷயங்களையு முன் வைத்து தான் பிளாக் செயின் கட்டமைப்பு செய்யப்படுகிறது.

உலகெங்கும் இன்று வர்த்தகம் டிஜிடல் மயமானபின் ஆன்லைன் பரிவர்த்தனைகள் சிறுத்தை போல பாய்ந்து முன்னேறுகின்றன. டிஜிடல் பரிவர்த்தனைகளின் எண்ணிக்கை கிடுகிடுவென உயர்ந்து வருகின்றன. தகவல்களின் எண்ணிக்கை அதிகரிக்க அதிகரிக்க அதைப் பாதுகாக்கும் தலைவலியும் அதிகரித்துக் கொண்டே தான் இருக்கும். பிளாக் செயின் ஒருவகையில் அதற்கான ஒரு தீர்வு.

பரிவர்த்தனையில் ஈடுபடுபவர்களுக்கு நம்பிக்கை உருவாக வேண்டுமெனில் அவர்களுடைய பணம் என்னவாகிறது என்பது வெளிப்படையாய் அவர்களுக்குத் தெரியவேண்டும். சின்னச் சின்ன மாற்றங்கள் கூட அவர்களுக்கு எளிதாக தெரிய வேண்டும்.

உலகின் பாதி மக்களுக்கு வங்கிக் கணக்கு கிடையாது. அவர்களும் டிஜிடல் பரிவர்த்தனை செய்வதற்கு ஒரு பொதுவான டிஜிடல் பணம் தேவைப்படுகிறது. அதற்காக உருவான டிஜிடல் பணம் தான் ‘பிட்காயின்’

சில நாடுகளில் தடை செய்யப்பட்டாலும் பொதுவாக மிகவும் பிரபலமான டிஜிடல் கரன்சி பிட்காயின் தான். 2009ம் ஆண்டு ஒரு மர்ம மனிதர் ஷடோஷி நாகமோடோ என்பவரால் இது ஆரம்பிக்கப்பட்டது. அது அவருடைய உண்மையான பெயரா என்பது கூட தெரியாது.

இந்த பிட்காயினுக்கு என்று வங்கிகள் கிடையாது. இதற்கென அச்சிடப்பட்ட பணமோ, காயின்களோ கிடையாது. இது முழுக்க முழுக்க டிஜிடலில் உலா வரும் பணம். இதை பணம் கொடுத்து வாங்கிக் கொள்ளலாம். கனடாவில் பணத்தைக் கொடுத்து, பிட்காயினாக மாற்றும் ஏடிஎம் மெஷினும் வான்கூவரில் நிறுவப்பட்டுள்ளது. இது ஒரு நபர் இன்னொரு நபருக்கு அனுப்பலாம், அவர்களுடைய பிட்காயின் கணக்கில் வைத்துக் கொள்ளலாம்.

சர்வதேச அளவில் இன்று பெரும்பாலான நிறுவனங்கள் பயன்படுத்தும் டிஜிடல் பணமாக இது மாறிவிட்டது. பிட்காயின் துவங்கப்பட்ட 2009களில் இதன் மதிப்பு இந்திய ரூபாயில் சுமார் 20 பைசா. இன்று ஒரு பிட்காயினின் விலை 5 இலட்சம் ரூபாய்கள். அதாவது 2009ம் ஆண்டு வெறும் நான்கு ரூபாய்கள் நீங்கள் பிட்காயினில் முதலீடு செலுத்தியிருந்தால் இன்று நீங்கள் ஒரு கோடி ரூபாய்க்கு அதிபதி. பிட்காயின் சந்தை மதிப்புக்கு ஏற்பவும், பயன்பாட்டுக்கு ஏற்பவும் உயரும், குறையும். ஒரு கட்டத்தில் ஒரு பிட்காயினின் மதிப்பு சுமார் 12 இலட்சம் ரூபாய்கள் என்றும் எகிறியது.

இந்த பிட்காயினை எந்த அரசும் நிர்வகிப்பதில்லை. ஒருவருக்கு ஒருவர் பயன்படுத்தும் பணம் இது. இதிலுள்ள ரகசியக் குறியீடுகள் இதன் பாதுகாப்பை உறுதி செய்கின்றன. ஒரு பிட்காயினை ஒருமுறை தான் பயன்படுத்த முடியும். பிட்காயின்களை வாங்கி கிளவுடிலோ, கணினியிலோ சேமித்து வைத்துக் கொள்ளலாம். லாக்கர் போல. பணத் தட்டுப்பாடு என்று சொல்லி அதிகம் அச்சடிக்கவும் முடியாது, செல்லாக்காசாக்குகிறேன் என யாரும் நள்ளிரவில் அறிக்கை விடவும் முடியாது. அதனால் பணவீக்கம் இதை பாதிக்காது.

இந்தப் பண பரிவர்த்தனைக்கு சிறப்புக் கட்டணங்கள் ஏதும் கிடையாது. இதில் நடக்கின்ற பரிவர்த்தனைகள் எல்லாமே உடனுக்குடன் லெட்ஜரில் பதிவு செய்யப்படும். இதை ஆன்லைனில் பார்க்கலாம். உடனுக்குடன் எல்லோருக்கும் தெரியும் வகையில் இந்த அப்டேட்ஸ் நடக்கும். இதிலுள்ள பண பரிவர்த்தனைகளுக்குப் பின்னால் சிக்கலான கனித ஃபார்முலாக்கள் இருக்கின்றன. இதனால் இதை யாரும் ஹேக் செய்து திருடிவிடவும் முடியாது.

சரி, பிட்காயினைப் பற்றி ஏன் இவ்வளவு விலாவரியாக எழுதுகிறேன் என புரிந்து கொண்டிருப்பீர்கள். இந்த பிட்காயின் வெற்றிக்குப் பின்னால் இருக்கின்ற அந்த மென்பொருள் கட்டமைப்பு இந்த பிளாக் செயின் தான். எதிர்காலத்தில் இந்த பிட்காயின் தான் உலக அளவிலான பண பரிவர்த்தனைகளில் முதலிடத்தில் இருக்கும் என கணிக்கப்பட்டுள்ளது.

இதில் நடக்கின்ற ஒரு பரிவர்த்தனையை யாராலும் மாற்ற முடியாது. இது ஒரே ஒரு சர்வரில் சேமிக்கப்படாமல் பகிர்ந்து சேமிக்கும் தொழில்நுட்பத்தைக் கொண்டிருக்கிறது. ஒரு பரிவர்த்தனையை இன்னொரு பரிவர்த்தனியால் மட்டுமே ரிவர்ஸ் செய்ய முடியும். மற்றபடி யாரும் போய் எங்கும் எதையும் மாற்ற முடியாது. இந்த பாதுகாப்பு அமைப்பை ஓரமாய் ஒரு கணினி வைத்துக் கொண்டு ஹேக் செய்வது சாத்தியமில்லை. அதற்கு மிகப்பெரிய அளவிலான அறிவும், திறமையும், கணித சூத்திர பயன்பாடும், அதி நவீன சக்தி வாய்ந்த கணினிகள் கொண்ட லேப்களும் தேவைப்படும். அப்படி முயன்றாலும் இதை உடைக்கலாம் என்பதற்கு எந்த உத்தரவாதமும் இல்லை.

இந்த லெட்ஜர் உடனுக்குடன் அப்டேட் செய்யப்பட்டுக்கொண்டே இருப்பதால் லேட்டஸ்ட் தகவல்கள் அதில் எப்போதும் இருக்கும். பிட்காயின் மூலமாக பொருட்களை அனுப்பும் நிறுவனங்களுக்கு இது மிகப்பெரிய வரம். எந்தெந்த பொருட்கள் எங்கெங்கே செல்கின்றன, என்ன வரவு, என்ன செலவு என அத்தனை விஷயங்களையும் அவர்கள் நேரடியாகப் பார்த்து தெரிந்து கொள்ளலாம். எல்லா வேலையும் முடித்து உட்கார்ந்து கூட்டிக் கழித்து கணக்கு போட்டுப் பார்க்கத் தேவையில்லை.

கடைசியாக ஒன்று, பிட்காயின் தான் பிளாக்செயின் என தப்பாக கணக்கு போடாதீர்கள். பிளாக்செயின் நுட்பத்தில் இயங்கும் ஒரு விஷயம் தான் பிட்காயின். இது தான் பிளாக் செயினை முதன் முதலாய் வெள்ளோட்டம் விட்ட விஷயம் என்பதால் சிறப்புக் கவனம் பெறுகிறது.

பிளாக் செயினுக்கு மேலும் பல பயன்பாடுகள் உள்ளன

( தொடரும் )

பிளாக் செயின் – 1

பிளாக் செயின் – 1

Image result for block chain

புதிய தொலைத்தொடர்புக் கொள்கை 2018 தனது அறிக்கையில், “பிளாக் செயின்” தொழில்நுட்பத்தைப் பயன்படுத்தப் போவதாகவும், அதனால் பல்வேறு பயன்கள் கிடைக்கும் என்றும் அறிவித்தது. குறிப்பாக தேவையற்ற அழைப்புகளைத் தடுப்பது, அழைப்புகளின் தரத்தை அதிகரிப்பது போன்ற பல விஷயங்களைச் செய்ய முடியும் என நம்பிக்கை தெரிவித்திருந்தது.

பத்திரப் பதிவு, நிலப்பதிவு போன்ற விஷயங்களையெல்லாம் பிளாக் செயின் தொழில்நுட்பத்துக்குள் கொண்டு வரவேண்டும் என்றும், அதனால் பல சிக்கல்கள் தீர்ந்து விடும் எனவும் சமீபத்தில் அலசப்பட்டது. போதாக்குறைக்கு அடுத்த இண்டர்நெட் இந்த பிளாக் செயின் தொழில்நுட்பம் தான் என பல கட்டுரைகள் வரிந்து கட்டிக்கொண்டு எழுதின.

நிறுவனங்களெல்லாம் பிளாக் செயின் நுட்பம் தெரிந்தவர்கள் வேண்டும் என அழைக்க ஆரம்பித்திருக்கின்றன. எல்லா வேலை வாய்ப்புத் தளங்களிலும் ‘பிளாக் செயின்’ வேலை வாய்ப்பு கதவுகளை மட்டுமல்லாமல், கூரையையும் திறந்து வைத்துக் காத்திருக்கிறது. புதிய தொழில்நுட்பங்களைப் பற்றிப் பேசினால் பிளாக் செயின் பற்றி யாரும் பேசாமல் இருப்பதில்லை. அந்த அளவுக்கு பிளாக் செயின் எல்லா இடங்களிலும் பேசு பொருளாகிவிட்டிருக்கிறது. இதற்கு மேலும் பிளாக் செயின் பற்றி தெரிந்து கொள்ளாமல் இருப்பது தொழில்நுட்ப பாவம் !

சரி, அதென்ன பிளாக் செயின் ?

பொதுவா இப்படி ஒரு கேள்வி கேட்டு தானே ஆரம்பிப்போம் ? இந்த முறை கொஞ்சம் வித்தியாசமாக “ஏன் பிளாக் செயின் ?” என ஒரு கேள்வி கேட்போம். ஏனென்றால் எல்லா புதிய தொழில் நுட்பங்களும் தேவையின் அடிப்படையில் தான் உருவாகின்றன. எல்லா தொழில்நுட்பங்களும் ஏதோ ஒரு சவாலைச் சரிசெய்யத் தான் உருவெடுக்கின்றன.

அதன் அடிப்படையில், எளிமையாகச் சொல்ல வேண்டுமென்றால், இன்றைக்கு இருக்கின்ற இணையம், கிளையண்ட் -சர்வர் தொழில்நுட்பம் இவற்றிலுள்ள சவால்களை நிவர்த்தி செய்வதற்காக உருவானதே இந்த பிளாக் செயின் தொழில்நுட்பம். குறிப்பாக பாதுகாப்பு குறித்த சவால்களை எதிர்கொள்ள கட்டமைக்கப்படதே இந்த தொழில் நுட்பம்.

ஷடோஷி நகமோடோ என்பவருடைய சிந்தனையில் உதித்த குழந்தை தான் பிளாக் செயின். பிட்காயின் எனப்படும் டிஜிடல் கரன்சிக்காக இந்த சிந்தனையை அவர் வடித்தெடுத்தார். செலவு பண்ணினோமா ? பண்ணலையான்னே தெரியல ? வாங்கினோமா வாங்கலையான்னே தெரியலை ? என்கின்ற அவர்களுடைய அக்கவுண்டிங் சிக்கலை நிவர்த்தி செய்ய இந்த பிளாக் செயின் பயன்பட்டது. 2008ம் ஆண்டு உருவான இந்த நுட்பம் பத்து ஆண்டுகளுக்குப் பிறகு இப்போது தான் பரபரப்படைய ஆரம்பித்திருக்கிறது.

இப்போது நமது மென்பொருட்களெல்லாம் கிளையண்ட் சர்வர் எனும் சிந்தனையின் அடிப்படையில் தான் இயங்குகிறது. உதாரணமாக நாம் ஏடிஎம் மில் பணம் எடுக்கிறோம் என வைத்துக் கொள்ளுங்கள். ஏடிஎம்மில் நமது கார்டை கொடுக்கிறோம். அதிலுள்ள ஒரு ரீடர் நமது அட்டையிலுள்ள தகவல்களையெல்லாம் எடுத்து சுவிட்ச் எனப்படும் மென்பொருளுக்கு அனுப்பும்.

வருகின்ற தகவல்களை ஆராய்ந்து சுவிட்சானது குறிப்பிட்ட சர்வருக்கு தொடர்பு கொள்ளும். அதிலிருந்து தகவல்களைப் பெற்றுக் கொண்டபின் என்னென்ன பணிகளைச் செய்ய வேண்டுமோ அதைச் செயல்படுத்தும். இங்கே முக்கியமான தகவல்கள் எல்லாம் சர்வரில் மட்டுமே இருக்கும் என்பது குறிப்பிடத் தக்கது.

ஒருவேளை இந்த சர்வர் செயலிழந்தாலோ, தற்காலிகமாக வேலை செய்யாமல் போனாலோ மென்பொருள் நிலைகுலையும். ஏடிஎம் வேலை செய்யாது. தாக்குதல்களை நடத்த விரும்புவர்கள் இத்தகைய சர்வர்களைத் தான் குறிவைத்துத் தாக்குவார்கள். ஒரே இடத்தில் சேமித்து வைக்கப்பட்டிருக்கும் தகவல்கள் எப்போதுமே ஆபத்தானவை. அதனால் தான் பெரும்பாலான சர்வர்களுக்கு ஒரு ‘பேக்கப்’ சர்வரை வைத்திருப்பார்கள். ஒண்ணு போச்சுன்னா இன்னொண்ணு பயன்படும். ஒருவேளை இரண்டும் போச்சுன்னா போனது தான் !

இத்தகைய சிந்தனையை முற்றிலும் உடைத்துக் காட்டியது தான் பிளாக் செயின் தொழில்நுட்பம். இதில் தகவல்கள் எல்லாம் பல இடங்களில் வைக்கப்பட்டிருக்கும். ஒன்றின் பிரதியை எடுத்து பல இடங்களில் வைப்பதல்ல. ஒரே விஷயங்களை பல இடங்களில் வைப்பதும், அதை சரியான வகையில் பாதுகாப்பாக இணைப்பதும், தகவல்களை எளிதாய் எடுப்பதும் தான்.

உதாரணமாக ஒரு எக்ஸல் ஷீட் ஆயிரக்கணக்கான பிரதிகளுடன் பல இடங்களில் இருப்பதாக வைத்துக் கொள்ளுங்கள். எதில் யார் என்ன அப்டேட் செய்தாலும் அந்த தகவல் எல்லாருக்கும் சட்டென தெரியும் என கற்பனை செய்து கொள்ளுங்கள். அது தான் பிளாக் செயின் நுட்பத்தின் அடிப்படை. ஒரே நேரத்தில் பலர் இதைப் பயன்படுத்தலாம் என்பதும், பலர் இதில் மாற்றங்களைச் செய்யலாம் என்பதும் சிறப்பம்சம்.

பல இடங்களில் பரவியிருப்பதாலும், ஒரு மையச் சேமிப்புப் பகுதி இல்லாததாலும் இதில் பாதுகாப்பு அதிகம். ஏழு மலைகளைத் தாண்டி ஏழு கடல்களைத் தாண்டி இருக்கின்ற அரக்கனின் கால் கட்டை விரலில் இளவரசியின் உயிர் இருக்கிறது என பழங்கால புனை கதைகள் சொல்லும். அந்தக் கட்டை விரலை வெட்டினால் இளவரசி காலி. அதை தொழில்நுட்ப உலகில் பொருத்திப் பாருங்கள். எங்கோ கண்காணாத தூரத்தில் இருக்கின்ற சர்வரில் இருக்கிறது தகவல்கள் என்றால், அந்த சர்வர் அழிக்கப்பட்டால் எல்லாமே அழிந்து விடும் இல்லையா ?

மாறாக, வெட்ட வெட்ட முளைக்கின்ற ராவணத் தலையோடு பிளாக் செயினை ஒப்பிடலாம். ஒற்றைத் தலையெனில் உயிர் போய்விடும். பல தலைகள் இருப்பதால் ஒன்றை வெட்டினாலும் இன்னொன்று முளைக்கும். எல்லாவற்றையும் ஒரே நேரத்தில் அழிப்பதும் மாற்றுவதும் சாத்தியமில்லை.

சுருக்கமாகச் சொல்ல வேண்டுமெனில் ஒரே இடத்தில் தகவல்களை சேமித்து வைக்காமல், பல இடங்களில் வினியோகிக்கப்பட்டிருக்கும் தகவல்களைக் கொண்டது பிளாக் செயின். இவற்றை ஒன்றோடொன்று இணைப்பதும், இவற்றுக்கு இடையேயான தகவல் பரிமாற்றத்தைப் பாதுகாப்பானதாய் அமைப்பதும் இதன் அடிப்படை தத்துவங்கள்.

பிட்காயின்ஸ் பற்றிக் கேள்விப்பட்டிருப்பீர்கள். கண்ணால் பார்க்க முடியாத டிஜிடல் பணம் தான் தான் பிட்காயின்ஸ். சந்தை மதிப்புக்கு ஏற்ப இதன் மதிப்பு அதிகரித்துக் கொண்டே செல்லும். சர்வதேச அளவில் பயன்படுத்தப்படும் டிஜிடல் பணம் இது. இது சர்வதேச சட்ட விரோத பரிவர்த்தனைகளுக்கும் பயன்படுகிறது என்பதால் சில நாடுகளில் தடை செய்யப்பட்டுள்ளது.

சில ஆண்டுகளுக்கு முன் ரான்சம்வேர் வைரஸ் பாதிப்பு நிகழ்ந்ததை மறந்திருக்க மாட்டீர்கள். உலக அளவில் பல கோடி ரூபாய் இழப்பை அந்த வைரஸ் உருவாக்கியது. அந்த வைரஸ் குற்றவாளிகள் மீட்புத் தொகையாகக் கேட்டது பிட்காயின் டிஜிடல் பணத்தைத் தான் !

ஏன் இந்த பிட்காயினைப் பற்றி அலசுகிறோம் என்றால், உலக அளவில் மிகவும் பாதுகாப்பான நெட்வர்க், மற்றும் மென்பொருள் கட்டமைப்பைக் கொண்டிருக்கும் ஒரு விஷயம் இந்த பிட்காயின் பரிவர்த்தனை தான். இதில் பயன்படுத்தப்பட்டிருக்கும் தொழில்நுட்பம் “பிளாக்செயின்” !