விவசாயம் காப்போம்; விவசாயி காப்போம்

விவசாயம் காப்போம்
விவசாயி காப்போம்

Image result for tamil nadu paddy field

மண் !
மனிதனின் முதல் தோழன்
மண்
மனிதனின் கடைசி எதிரி !

கருவறை தாண்டிய பாதங்கள்
மண்ணின் முதுகு மிதித்து
புழுதி பிடித்து
உரண்டு புரண்டு உறவாடுகின்றன !

கல்லறை நோக்கிய பயணங்கள்
மண்ணின் அறை திறந்து
நிரந்தர நித்திரையில்
சலனம் தொலைத்து துயில்கின்றன !

மண் !
மனிதனின் முதல் தோழன்
மண்
மனிதனின் கடைசி எதிரி !

*

கடவுள்
மண்ணின் முதல் விவசாயி !

மனிதன்
கடவுள் படைத்த முதல் விவசாயி !

கடவுள்
மண்ணில் கைதொட்டு
உயிரை உருவாக்கினார் !
மனிதன்
மண்ணில் கைதொட்டு
பயிரை உருவாக்கினான் !

கடவுளே
உலகின் முதல் விவசாயி !
மனிதன்
உலகின் இரண்டாம் விவசாயி.

*

மனிதனுக்கு
கடவுள் தந்த முதல் வேலை
விவசாயம் !

நிலத்தைப் பண்படுத்து !
என்பதே இறைவன் கொடுத்த வேலை
அவனோ
படைப்பைப் பண்படுத்தாமல்
படைத்தவனைப் புண்படுத்தினான்.

ஏதேன் எனும்
மண்ணக சொர்க்கம் விடைபெற்றது
இனி
மண்ணை சொர்க்கமாக்கு
வியர்வையை விலையாக்கு
என
அனுப்பி வைத்தார் ஆண்டவர் !

முதல் விவசாயி
களமிறங்கினான் !
நிலமிறங்கினான்

*

விவசாயி
இறைவன் எனும் முதலாளியின்
முதல் ஊழியன் !

விவசாயம்
மனிதன் எனும் படைப்பாளியின்
முதல் ஊழியம்!

விவசாயம்
ஆதி மனிதனின்
நீதித் தொழில் !

மண்ணின் மைந்தனின்
வியர்வைத் தொழில் !

விழுந்த மனிதன்
உழுத தொழில் !

விவசாயம்
இறைவனால் எழுதப்பட்ட பணி !

விவசாயம்
மனிதனின் முதல் அப்பாயின்ட்மென்ட் லெட்டர் !

இன்று ??

*

இன்று
விவசாயம்,

தற்கொலையின் திறவுகோல் !
பட்டினியில் படுக்கை !
துயரத்தின் இருக்கை !
கண்ணீரின் அருவி !

பயிர்களின் வேர்களில்
புதைபடுகிறான் விவசாயி !

நீரற்ற பூமியில்
வேரற்ற நிலங்களில்
சோறற்ற வயிறுடன்
வதைபடுகிறான் விவசாயி !

வெடித்த வயலின்
வறண்ட நாக்குகளில்
அவனது
உயிரின் கடைசிச் சொட்டும்
உலரத் துவங்குகிறது !

நீர் வற்றிய
ஆறுகளில் அவனது கனவின்
முதல் சுவடும்
களவாடப்பட்டு விட்டது !

ஆறுகள்
நீரைத் தொலைத்தன !
நீரற்ற ஆறுகள்
தம்மையே தொலைத்து விட்டன.

சுயநலச் சுருக்குப் பைகள்
மணலை அகழ்ந்தன !
தன்னல மனங்கள்
ஆக்கிரமித்து நகைத்தன !
விழுகின்ற மழையும்
தங்க இடமின்றி
அழுதழுது அலைந்து திரிகிறது !

இன்று விவசாயம்
நிச்சயத் தோல்வியின்
நிதர்சன வெற்றி !

*

இறைவன்
நீரையும் நிலத்தையும் பிரித்தார் !
மனிதன்
நீரை நிலத்தினில் ஒளித்தான் !

கர்நாடக எல்லையில்
தண்ணீருக்குக் காவல்
தமிழக எல்லையில்
கண்ணீருடன் காவல் !

இறைவன் மழையை
பொதுவாய்ப் பொழிந்தார் !
மனிதன்
பொதுவை தனியே பிரித்தான்

இறைவன் வளங்களை
பொதுவாய் வைத்தார்
மனிதன்
வளங்களை களவில் வைத்தான்.

கடலுக்கு அனுப்ப
அனுமதிக்கும் நீர் கூட
தமிழனின்
உடலுக்கு அனுப்ப
அனுமதிக்கவில்லை மனிதன் !

அணைகளில் துயிலும் நீரை,
மனிதனின்
துணைக்கு அனுப்ப
துளியும் விரும்பவில்லை
சுயநல மனிதன் !

பலருக்கு
தண்ணீர் என்பது
அரசியல் சதுரங்கம் !

விவசாயிக்கோ
தண்ணீர் என்பது
இசையின் மிருதங்கம் !

நீரற்ற நிலம்
இசையற்ற கருவியாய்
சலனமற்றுக் கிடக்கிறது !

இறைவன்
படைத்தான் !
மனிதன்
உடைத்தான் !

*

எப்போது விழிப்பாய் தமிழா !
எப்போது விழிப்பாய் மனிதா !

புலம் பெயர்ந்தவன் கூட
புலன் பெயரவில்லை

நீ
நிலம் பெயராமல் இருக்கிறாய்
ஆனால்
நிஜம் உணராமல் இருக்கிறாயே !

வரப்புயர நீருயரும்
பொய்யாகிறதே !
இங்கே வரப்புகள் மட்டும் தானே
உயர்கின்றன !

வளங்கள் அழிகையில்
தலைமுறை அழியும்!
நிலங்கள் அழிகையில்
நிலவாழ்வு அழியும் !

முகசாயம் அழிகையில்
நாடகம் முடியும் !
விவசாயம் அழிகையில்
தேசம் அழியும் !

நிலத்தில் காங்கிரீட் நட்டோம்
மழை விடைபெற்றது !

நிலத்தில் முட்களை நட்டோம்
வளம் விடைபெற்றது !

நிலத்தை கவனிக்காமல் விட்டோம்
உறவு விடைபெற்றது !

இன்று
நிலங்கள் அனாதைகளாகிவிட்டன.
அதன் தொப்புள் கொடிகளுக்கு
நீரில்லை !

ஒளிச்சேர்க்கைக்கு
வழியில்லாமல்
இலைகளெல்லாம் தலையிழந்தன.
மரங்களெல்லாம் களையிழந்தன.

எப்போது விழிப்பாய் தமிழா !
எப்போது விழிப்பாய் மனிதா !

*

ஒன்று படுவோம் !

பூமி என்பது
தன்னலத் தாழ்பாழ்களில்
சிரச்சேதம்
செய்யபடுவதற்கானதல்ல !

பூமி என்பது
வெறுப்புகளின் விதைகளினால்
உயிர்சேதம்
செய்வதற்கானதல்ல !

நீரின்றி அமையாது
நிலம் !
பயிரின்றி அமையாது
உயிர் !

இணையம்
தகவலைத் தரலாம்
வலைத்தளம்
கலைகளைத் தரலாம் !
அரிசியை எங்கே
டவுன்லோட் செய்வது ?
தண்ணீரை எங்கே
தரவிறக்கம் செய்வது ?

ஒன்றுபடுவோம் !

வேர்கள்
நீரில் வித்தியாசம் பார்ப்பதில்லை !
மனிதர்கள் ஏன் பார்க்கவேண்டும் ?

தமிழகப் பசிக்கும்
கர்நாடகப் பட்டினிக்கும்
வித்தியாசம் இல்லை
பகிர்தலில் எதற்கு பதட்டம் ?

ஒன்றுபடுவோம் !

எங்கே விழுந்தாலும்
மழை ஈரமாகவே விழுகிறது !
எங்கே இருந்தாலும்
மனம் ஈரமாகவே இருக்கட்டும் !

நிலம் உலர்வது
மனிதம் உலர்வதின் அடையாளம் !
நிலம் செழிப்பது
மனிதம் செழிப்பதன் உத்தரவாதம் !

ஒன்றுபடுவோம்
உணர்வுகளால் ஒன்றுபடுவோம் !
அரசியல்
நில
இன எல்லைகள் களைவோம் !

மனிதம் என்பது
நமக்குள் இருப்பது
பிறரின் வார்த்தைகளால்
அதை கொல்லாமல் இருப்போம் !

விவசாயம்
வாழவேண்டும் !
விவசாயி
ஆள வேண்டும் !

அப்போது தான் பூமி சிரிக்கும்
சோகம் மரிக்கும் !

விவசாயம்
வாழவேண்டும் !
விவசாயி
ஆள வேண்டும் !

அப்போது தான் பூமி சிரிக்கும்
சோகம் மரிக்கும் !

Advertisements

வரப்புயர

Image result for agriculture tamil nadu village

வரப்புயர நீர் உயரும் என்று சொன்னாங்க
வரப்பு மட்டும் உயருது நீரைக் காணல
புதைச்சவெத முளைச்சு வரும் என்று சொன்னாங்க
வெடிச்ச நிலம் காயுது பயிரைக் காணல

மனிதனோட முதல் தோழன் மண்தானே
மண்ணோட மடிமீதே வீழ்ந்தோமே

*

மும்மாரி மழை பொழிந்த
நிலம் அழித்தோம்
ஈரத்தை தரை இறக்கும்
மரம் அழித்தோம்
நீருக்காய் யார் காரோ
கரம் பிடித்தோம்
காவிரியும் கை விரிக்க
தினம் அழிந்தோம்

ஊருக்கே சோறு போட கை நீட்டினோம்
சாவுக்கு வழிசொல்லி கதவடைத்தான்
கடலுக்கும் நீர் செல்ல அனுமதித்தான்
உடலுக்குத் நீர் தரவோ அவன்மறுத்தான்

அணைக்கு நீருண்டு
துணைக்கு நீரில்லை !
இறைவன் கொடுத்தானே
மனிதன் கெடுத்தானே.

விழித்தெழு விழித்தெழு என் தோழா
செயல்படு செயல்படு என் தோழா

*

நாட்டுக்குள்ளே புலம் பெயர்ந்த
இனம் யாமோ
புலன் தனையும் கூடவே யாம்
இழந்தோமோ
வளம் அழிந்தால் தலைமுறையும்
அழியாதோ
நிலம் அழிந்தால் நிலவாழ்வும்
அழியாதோ !

நீரின்றி அமையாது நிலம் என்றேன்
பயிரின்றி அமையாது உயிர் என்றேன்
வேருக்கு நீரினிலே பேதம் இல்லை
வயிற்றுக்குப் பசிதனிலே பேதம் இல்லை

மனிதம் உலர்ந்தால்
நிலமும் உலரும்
மழைக்கென்றும் ஈரமுண்டு
மனதிலும் அதுவருமா ?

விழித்தெழு விழித்தெழு என் தோழா
செயல்படு செயல்படு என் தோழா

*

நயாகரா.

Image result for Niagara
நயாகரா.

இது,
இரு நாடுகளுக்கிடையே பாயும்
ஓர் தண்­ர்ப்பாலம்.

மொழிபெயர்க்க முடியுமா
இந்த
விழிபெயர்க்கும் பிரம்மாண்டத்தை ?

கைக்கெட்டும் தூரத்தில் கனடா
பாதங்களுக்குக் கீழ் அமெரிக்கா,
நடுவில் ஓடும் நயாகரா நீரின்
இருகரங்களில் இரு நாடுகள்.

வானத்தின் ஒருபகுதி
கிழிந்து விழுகிறதா ?

இந்த அருவியின் அடிவாரம்தான்
மேக உற்பத்தியின்
கொள்முதல் நிலையமா ?

கால்வழுக்கி
கீழே விழுகின்ற தண்­ருக்கு
புதுக்கால்கள் பிறப்பதெப்படி ?

புருவங்கள் விழுந்துவிடுமளவுக்கு
விழிகளுக்குள் வியப்புக் கோளங்கள்.

பாறைகளுக்கு இடையே
வானவில் பார்த்ததுண்டா ?

நாடுகளுக்கிடையே
அருவி கிழித்த
அழகிய கவிதையை வாசித்ததுண்டா ?

இருகண்களும் இளைக்குமளவுக்கு
அழகுகளை
அள்ளிக் கொட்டியதுண்டா ?

இல்லையேல்
நயாகராவுக்கு வாருங்கள்.

இங்கேயும்
மழைக்கோட்டுடன் நனைகிறார்கள் பலர்.
முட்டைக்குள் ஒளிந்துகொண்டு
கொக்கரிக்க ஆசைப்படும் சேவல் மனிதர்கள்.

தலை நனையும் கவலையுடன்
நடக்கிறார்கள் பல நாகரீகவாதிகள்.
பாவம்
புல்லாங்குழல் இவர்களுக்கு
உடைந்துபோன மூங்கில்.

ஒவ்வொரு பாறைஇடுக்கிலும்
நயாகரா எழுதிப்போகும் சிம்பொனியை,
ஒட்டுமொத்த ஈரச் சூழலுக்கு
இயற்கை அமைக்கும் பின்னணி இசையை,
எந்த இசைக் கருவியும் இன்னும்
அருவியாய்ப் பொழியவில்லை.

தண்­ரும் தண்­ரும் மோதி மோதியே
கண்களுக்குள் பரவசத் தீ.

கோப்பைகளில் ஊற்றி ஊற்றி
இந்த
நயாகராவை நுகர்ந்துவிட முடியாது.
நயாகரா பொழியும் பிரம்மாண்டச் சாரலும்
தாய் மடி தரும் பிரபஞ்ச அமைதியும்
தலைவைத்தால் மட்டுமே நனையும் சங்கதிகள்.

இன்னும் சில கண்கள் இருந்தால்
அழகின் கொள்ளளவு
அதிகமாகியிருக்கும்,
நயாகராவின் நாட்டிய அரங்கேற்றத்துக்கு
இருகண்கள் என்பது
இருளில் நடப்பது போன்றதே !!

நயாகரா
நான் என்னும் கர்வத்தை
கசக்கிப் பிழிந்துக் கிழித்துப் போடும் .
விரல் தொடும் தூரத்தில்
நேரில் பார்த்தால் மட்டுமே
நெஞ்சக்குழிகளுக்குள் நிஜமாய் தங்கும்.

நயாகரா.
எந்தக் கவிதையும் எழுதிவிட முடியாத
சிலிர்ப்பின் குழந்தை.

நயாகரா.
இது ஒரு காவியத்துக்கான கனத்தின்
ஒரு வார்த்தைக் கவிதை.

பூக்கள் பேசுவதில்லையா ?

Image result for flowers

நான் தான்
பூ பேசுகிறேன்.

மொட்டுக்குள் இருந்தபோதே
முட்டி முட்டிப்
பேசியவைகள் தான்
எல்லாமே.
ஆனாலும்
உங்கள் திறவாச் செவிகளுக்குள்
விழுந்திருக்க வாய்ப்பில்லை.

என்
விலா எலும்புவரை
வண்டுகள் வந்து
கடப்பாரை இறக்கிச் செல்லும்.

வருட வரும்
வண்ணத்துப் பூச்சியும்
மகரந்தம்
திருடித் திரும்பும்.

என்னை
உச்சி மோந்துச் சிரிப்பாள்
இல்லத்தரசி,
ஆனாலும்
அவள் இப்போது
மிதித்து நிற்பது
நேற்றைய ஒரு மலரைத்தான்.

எனக்குப் பிடிக்கவில்லை
இந்த வாழ்க்கை.

தீய்க்குள் புதைக்கப்பட்ட
மெழுகு போலதான்
ஒரு பகலால்
இருட்டிப் போகும்
எனது வாழ்க்கையும்.

மென் கர வருடலும்,
சிறுமியரின் திருடலும்
வாடல் வரையே நீடிக்கும்.

மரணத்தின் போது
மண்டியிட்டழாத சொந்தமெதற்கு
எனக்கு ?

மொட்டாய் முடங்கியபோதே
விரியக் கூடாதென்று
உறுதியாய் இருந்தேன்.
முடியவில்லை.

விரிந்தபின்
வாடக் கூடாதென்று
வீம்பாய் இருந்தேன்
இயலவில்லை.

எதுவும் என்னால்
நிர்ணயிக்கப் படாத வாழ்க்கை
எனக்கெதுக்கு.

ஓரமாய்
நீ அமர்ந்து
கவிதை எழுதிப் போகவா ?

பனி விளையும் பூமி.

Image result for Snow street

வானம்
எப்போது
நீர் இறைப்பதை நிறுத்திவிட்டு
பஞ்சுப் பொதிகளைப்
பட்டுவாடா செய்யத் துவங்கியது ?

இந்த குளிர் விளைச்சலில்
குயில்களுக்குக்
குரலடைப்புப் போராட்டமா?

இலைகளை அவிழ்த்துவிட்டு
மரங்கள் இங்கே
உறைந்த நீரை
உடுத்திக் கொள்கிறதே !!

கண்களுக்கு
எல்லா இடங்களிலும்
வெள்ளைப் பாசனம்.
வெள்ளைப் பனிகள் விலகிய இடங்களில்
வெள்ள சாசனம்

நிர்வாணச் சாலைகள்
இனிமேல் அடிக்கடி
ஆடை அணியும்.
ஆனாலும்
அரசாங்க துச்சாதனர்களால்
அவசர அவசரமாய் அவிழ்க்கப் படும்.

புல்லின் மேல் பனி
பார்த்திருக்கிறேன்.
பனியில் புதைந்து போன புற்களை
இப்போது தான் பார்க்கிறேன்.

கூரைகளின் மேல்
இன்னோர் குளிர்க்கூரை!!
வாகனங்களின் மேல்
வெள்ளைப் போர்வை.

இது பூமிக்கு வானம் போர்த்தும்
பொன்னாடையா?
இல்லை
பூமியோடு வானுக்குள்ள
பனிப்போரா ?

இந்த கண்டத்தைப் பிடித்து
குளிர்சாதனப் பெட்டிக்குள்
அடைத்தது யார்?

சென்னைச் சூரியனை
சிலநாட்களுக்குக் கடன்வாங்கி
இங்கே
வெப்ப வினியோகம் நடத்தலாமா ?

இல்லை
வியர்வைக்குள் விழுந்துகிடக்கும்
சிங்காரச் சென்னைக்கு
அமெரிக்கக் குளிரை
அனுப்பி வைக்கலாமா ?

வா என் கண்மணி
மனசுக்குள் வெகுவாய்
குளிரெடுக்கிறதென்று
கவிதை எழுதலாமா ?

விரைவாய் சொல்லுங்கள்
விரல்கள் குளிரில்
விறைத்துப் போகிறது !!!

இரவுக் காட்சிகள்

Image result for Man waking in night india

எப்போதும்
பரபரப்பாய் இருக்கும்
அந்தத் தெருவை
இப்போது தான்
இரவில் பார்க்கிறேன்.

அத்தனை சத்தங்களும்
கத்திக் கத்தி
தொண்டை வறண்டதில்
மூலைக்கு மூலை
சுருண்டு கிடக்கின்றன.

கடைகளின் வாசல்களில்
யாராரோ
கோணிக்குள்
வெப்பம் இரந்தும்
கொசுவுக்குப் பயந்தும்
வளைந்து கிடக்கின்றனர்.

தெருநாய்கள் சில
எதையோ துரத்தி
எதற்கோ மோப்பம் பிடித்து,
ஆங்காங்கே
பேரணி நடத்துகின்றன.

காலையில்
கோழிகளை கொன்று குவித்த
அந்த
கசாப்புக் கடை
மரத்துண்டு,
பிசுபிசுப்பு மாறாமல்
நினைவுச் சின்னமாய்
நிற்கிறது.

கிழிந்த கூரைக் குடிசை
தாழ்வாரங்களில்,
ஆமை மார்க்
கொசுவர்த்திகளின் துணையுடன்,
கைலிக் கால்கள்
இந்திய வரைபடம் போன்ற
பாய்களைத் தேய்த்து
படுத்துக் கிடக்கின்றன.

புழுதி முதுகுகளுடன்
முந்தானை முனை கடித்து
நடக்கும்
சேரிக் குழந்தைகள்
குடிசைகளுக்குள்
விரல் கடித்துக் கிடக்கக் கூடும்.

திரையரங்க
இரவுக் காட்சி முடிந்து
வரும் வழியில்,
பகலைப் புரட்டிப் போட்ட
நிஜ இரவுக் காட்சி !
உறங்கிய பின்னும்
விலகும் என்று தோன்றவில்லை.

தவிர்த்திருக்கலாம்
இரு
இரவுக் காட்சிகளையும்.

0

பகடைப் பொருளாதாரம்

Image result for throwing dice

சூதாட்டம் மீதான நாட்டம்
அழிவுகள்
விளையும் தோட்டம்.

நம்பிக்கை வைக்க
ஆயிரம் இடங்கள் இருக்க,
சுற்றும் சக்கரத்தில்
சோம்பேறிக் கூட்டம்
நம்பிக்கை வைக்கும்.

விதைக்காத இடத்தில்
அறுவடை செய்ய,
கனவுகளின் கால்கள்
கோணிகளுடன் காத்திருக்கும்.

அடுத்தவன்
தோற்க வேண்டும் எனும்
பிரார்த்தனைகளே
இங்கே
ஆண்டவன் மீது
அடுக்கடுக்காய் அடுக்கப்படும்.

அடக்க முடியாத
மனக் குதிரைகள் இங்கே
மீண்டும் மீண்டும்
தலை தெறிக்க ஓடும்.
தவறான ஓடு தளத்தில்.

மாயமான் கனவுகளில்
வேடர்கள்
சிறைப்பிடிக்கப் படும்
கானகம் இது.

வெறும்
கற்பனைகளின் கோட்டையில்
சிம்மாசனம் போடும்
பகல் கனவின்
படுக்கை அறை இது.

ஒரு பானை சோற்றுக்கு
ஒரு கல் பதமென்று
போதையுடன் புலம்பித் திரியும்
வர்ணக் கூடத்தின்
நிறமற்ற வாழ்க்கை இது.

எது எப்படியோ,
முடிவு மட்டும்
சாதகமாய் இருப்பதற்கான
சாத்தியங்கள் இல்லை.

நிலாச் சாயம்

Image result for moon shadow

இன்னும்
வெள்ளை காயாத
நிலாச் சாயம்
என்
மொட்டை மாடி முழுதும்.

நிலவைத் தின்னும்
வேகத்துடன்,
வானில்
வெள்ளை மேகங்கள்
வறண்ட நாக்குகளோடு
அலைகின்றன.

யாரோ
இறுகக்கடித்ததால் தான்
அந்த
நிலவில் கன்னத்தில்
கருப்பு பதிந்திருப்பதாய்
இறந்து போன ஏதேனும்
ஓர் இதிகாசம்
எழுதியிருக்கக் கூடும்.

எதையும் காதில் வாங்காமல்,
எத்தனை முறை
போர்த்தி முடித்தாலும்
முரண்டு பிடித்து,
புரண்டு படுத்து
மேகப் போர்வைக்கு வெளியே
நழுவி விழுகிறது
அந்த
நிலாக் குழந்தை.

சூரியனின் சிவப்பு ஒளியை
உறிஞ்சிக் குடித்து
எப்படி
வெள்ளை ஒளியை
பிரசவித்து நகர்கிறது
இந்த பிள்ளை நிலா ?

கலையக் கலைய
புதிது புதிதாய்
வெள்ளைப் பூக்களை
எப்படி
அள்ளி விதைத்து நடக்கின்றன
இந்த மேகச் செடிகள்.

செதுக்கி வைத்த
உருவம் இன்றி,
நிலைமாறி நிலைமாறி
சப்தமின்றி சிற்பம் செதுக்கி
வானில் தொங்கவிடுகிறதே
இந்த
வெள்ளை தேக மேகங்கள்.

இத்தனை மிருதுவாய்
இதயம் இருந்தால்
எப்படி இருக்கும் ?

ஆனாலும்
கர்ப்பமான கார் மேகமாய்
பாரத்தோடு ஈரமாவதையே
பார்த்து நடக்கிறதே
மானுடம்.

கவிதை எழுத
வந்தவனுக்கு
வானில் ஓர்
கவிதைத் தொகுப்பு.

கண்களை விலக்கி
கவிதையை கலைக்காமல்
இன்னும் அந்த
வெள்ளை இரவில்
விழித்துக் கிடக்கிறேன்.

என் கையில்
கவிதை வந்து
படுக்கக் காத்திருக்கும்
ஓர் வெள்ளைக் காகிதம்.

இதயம் கூடவா இரும்பு ?

Image result for Train accident
இதயம் இரயிலை விட அதிகமாய்
தட தடக்கிறது.
தலைப்புச் செய்தியின் தலையில்
தடம் புரண்ட இரயிலின் படம்.

மழை வந்து மனசை நனைத்த போது
இதயம் முழுதும் பறந்தன
ஓராயிரம் பட்டாம் பூச்சிகள்,
மழையின் கரங்கள் இரயிலை இழுத்தபோது
அத்தனை பூச்சிகளும் செத்துத் தொலைந்தன.

மாலை இரவைத் தேடி ஓடிய கணம்
ஆற்றுக்குள் பாய்ந்து
தற்கொலை செய்துகொள்ள
இரயிலுக்கு எப்படி மனம் வந்தது ?

எத்தனை முகங்கள்
சாரலடிக்கும் சன்னலோரம் அமர்ந்து
வேர்க்கடலை கொறித்துக் கொண்டிருந்தனவோ?

எத்தனை குழந்தைகள்
அன்னையின் மடியில் தலைசாய்த்து
இளைப்பாறிக் கொண்டிருந்தனவோ ?

முட்டி முட்டி, மோதி மோதி
விடுப்புக் கிடைத்த வெற்றிக் களிப்பில்
எத்தனை மனிதர்
ஊர்க் கனவில் உறங்கிக் கிடந்தார்களோ ?

அத்தனை கனவுகளையும்
ஒற்றைத் தாழ்ப்பாளில் கொலை செய்ய
இரட்டைத் தண்டவாளங்களுக்கு
இதயம் கூடவா இரும்பு?

நாளை.,
மழை ஊற்றிய பச்சையத்தின் புண்ணியத்தில்
பொட்டல் காடுகள் கூட பூக்கள் விடுக்கும்.
ஆனால்
ஆயுள் கரைத்த அந்த ஆற்றுக் கரையில் மட்டும்
பிணங்கள் மட்டுமே படுத்துக் கிடக்கும்

கணிப்பொறி.

Image result for Girl with Computer

என் இனிய கணிணியே.

இவ்வளவு நேரம் தொடர்ச்சியாக
நான்
யார் முகத்தையும் பார்த்ததில்லை.

இவ்வளவு நேரம் யாரோடும்
விரல் தீண்டல் தொடர்ந்ததில்லை.

அதெப்படி
உன்னால் மட்டும் முடிகிறது ?
கண்ணுக்குத் தெரியாத
கணிதச் சுருக்கங்களின் சுளுக்கெடுக்க ?

முகம் மனசின் கண்ணாடி
என்பது
முகமே கண்ணாடியாகிப் போன
உன்னிடம் தானே உண்மையாகிறது ?

பொழுதுகள் மாறினாலும்
முகங்கள் மாறினாலும்
விடைகளை மாற்ற மறுப்பது
நீ மட்டும் தானே.

நீ மட்டும் இல்லையென்றால்
உலகம் ஒருவேளை
காகிதக் கட்டுக்களில்
புதைக்கப் பட்டிருக்கலாம் !!!

நீ மட்டும் இல்லையென்றால்
உலகைப் பிடித்தெடுக்கும்
ஓர் வலை
உருவாகாமலேயே போயிருக்கலாம்.

நீ என்ன செய்வாய் என்று கேட்ட காலம்
போய்விட்டது.
என்ன செய்ய மாட்டாய் என்கிறது
கலியுகம்.

யாரோ பகல் கனவு கண்டால்
அதை
பிரதி எடுத்துக் கொடுக்கிறாய்.
இரவுக் கனவை இரவல் வாங்கி
மென்பொருளாய் மொழி பெயர்க்கிறாய்.

இப்போதெல்லாம்
மனித மொழிகளுக்கிங்கே மரியாதை இல்லை
கணிணி மொழிகளுக்குத் தான்
உலக அங்கீகாரம்.
என்ன..???
விரல்களால் பேச வேண்டும்
அது ஒன்று தான் வித்தியாசம் !!!

சில ஆண்டுகளுக்கு முன்பு
உலகம் உன்னை ஆண்டுகொண்டிருந்தது
இப்போது
நீ ஆட்சியைக் கைப்பற்றி விட்டாய்.

மிட்டாய்க் கடைகளின்
இனிப்புக் கணக்குகள் கூட
நீ இல்லையென்றால் கசந்து போகிறது.

ஏனென்றால்
எங்கள் மூளைக்குச் செல்லும்
முக்கால் வாசி நரம்புகளும்
விரலுக்கும் விழிகளுக்குமாய்
இடம் பெயர்ந்து விட்டது.

எங்கள் மானிட சமூகம்
வைரஸ் வினியோகம் செய்வது,
நோய் தருவதும் மருந்து தருவதும்
நாங்கள் என்பதை
நீ
மறந்துவிடாமல் இருக்கத்தான்.

காலம் மாறிவிட்டது
முன்பு கலப்பை இருந்த இடத்தில்
இப்போது கணிப்பொறி.
முன்பு வரப்புகள் இருந்த இடத்தில்
இப்போது வன்பொருள்கள்.

ஆனாலும் எங்கள் வயிறு
இன்னும்
மென்பொருள் தின்னப் பழகவில்லை.