விடுமுறை, புதுமுறை !

 

Image result for Holiday indian village

முன்பெல்லாம் கோடை விடுமுறை என்றால் பொட்டியைக் கட்டிக்கொண்டு தூரத்தில் இருக்கும் பாட்டி வீட்டுக்கோ, மாமா வீட்டுக்கோ சென்று கொட்டமடிப்பது தான் உலக மகா சந்தோசமாய் இருந்தது. உறவுகளைப் புதுப்பித்துக் கொள்ளவும், படித்துப் படித்து சோர்ந்து போயிருக்கும் மூளையை கொஞ்சம் ரிலாக்ஸ் பண்ணவும் இந்த விடுமுறை நாட்கள் பயன்பட்டன.

இப்போதெல்லாம் விடுமுறையின் அர்த்தமே தலைகீழாய் மாறிவிட்டது. விடுமுறையை பிஸினஸை வளர்த்துக் கொள்வதற்குக் கிடைத்த ஒரு வாய்ப்பாக நிறுவனங்கள் நினைக்கின்றன.

‘க்ரேஷ் கோர்ஸ்” என்பது ஃபேஷன் வார்த்தையாகி விட்டது. சம்மர் டிராயிங் கோர்ஸ், சம்மர் கராட்டே, சம்மர் கிரிக்கெட், சம்மர் கிட்டார் என எங்கும் திடீர் பயிற்சி நிலையங்கள் படையெடுப்பது இந்த காலத்தில் தான். எப்படியாவது தங்கள் பிள்ளைகளை சகலகலா வல்லவர்களாக்க வேண்டும் என கங்கணம் கட்டிக்கொண்டிருப்பவர்களுக்கு இவையெல்லாம் வசீகர அழைப்புகள். நிறுவனங்கள் அலேக்காக ஒரு பெரிய தொகையையும் சுருட்டிக் கொண்டு கடமைக்கு நாலு விஷயங்களைச் சொல்லிக் கொடுத்து விட்டு கிளம்பி விடுவார்கள்.

இன்னும் சிலருக்கு கோடை விடுமுறை தான் நீட், நுழைவுத் தேர்வுகள் போன்றவற்றுக்கான காலம். ‘ஸ்கூல் திறந்தா தாண்டா நமக்கெல்லாம் நிம்மதி’ என குழந்தைகளை அலற வைக்கின்றன இப்போதைய கோடைகாலங்கள் என்பது தான் கசப்பான உண்மை !

கொஞ்சம் நிதானியுங்கள். குழந்தைகளுடைய உடலுக்கும், மனதுக்கும், மூளைக்கும் இடையே சரியான சமநிலை வேன்டும். யானைகளுக்கே புத்துணர்ச்சி முகாம் வைக்கும் நாம், குழந்தைகளுக்கு வைக்காமல் இருப்பது பிழையல்லவா ?

இந்த கோடை விடுமுறையை, விடுமுறையின் உண்மையான அர்த்தத்துக்கு கூட்டிச் செல்வோம். அது குழந்தைகளின் கல்விக்கும், உடலுக்கும் உற்சாகமூட்டும் !

1. ஏட்டுச் சுரைக்காய் கறிக்கு உதவாது ! குழந்தைகள் நமது மண்ணின் வளத்தையும், தன்மையையும் நமது உண்மையான வாழ்க்கை முறையையும் புரிந்து கொள்ள வேண்டும். அதற்கு அவர்களை தமிழகத்தின் ஏதோ ஒரு குக் கிராமத்துக்குக் கூட்டிச் செல்லுங்கள் !

எளிய மக்களின் வாழ்க்கை எப்படி இருக்கிறது. அவர்கள் எவ்வளவு கள்ளம் கபடமில்லாமல் இருக்கிறார்கள். அவர்கள் எப்படி விவசாயம் செய்கிறார்கள் போன்றவையெல்லாம் அவர்கள் நேரடியாக கண்டு உணரட்டும்.

அவர்களுடைய மனதில் விவசாயத்தைப் பற்றியும், விவசாயிகளைப் பற்றியும், அவர்களுடைய வாழ்க்கை முறை பற்றியும் ஒரு நல்ல புரிதல் கிடைக்கும்.

2. மாட்டு வண்டியில் பிள்ளைகளை கூட்டிச் செல்லுங்கள். வயல் வரப்புகளில் ஆடுகளோடு ஓடி விளையாடச் செய்யுங்கள். கிராம்த்து வீடுகளின் கொல்லைப்புறங்களில் கோழிகளோடு ஓடி விளையாட வையுங்கள். பாதுகாப்பான நீர்நிலைகளுக்குக் கூட்டிச் சென்று நீச்சலடிக்கக் கற்றுக் கொடுங்கள். ஓடைகளில் மீன்களைப் பிடிக்கப் பழக்குங்கள்.

இவையெல்லாம் குழந்தைகளை முற்றிலும் புதிய உலகம் ஒன்றுக்குள் அழைத்துச் செல்லும் என்பதில் எள்ளளவும் சந்தேகமில்லை !

3. நமது ஊருக்கு அருகிலேயே உள்ள ஏதேனும் வரலாற்று இடங்களுக்கு பிள்ளைகளைக் கூட்டிச் செல்லுங்கள். பாரதியார் பிறந்த இடம், கட்டபொம்மன் வாழ்ந்த இடம் இப்படி ஏதாவது. அப்படி போவதற்கு முன் குழந்தைகளுக்கு போகின்ற இடத்தையும், அந்த நபரின் வரலாற்றையும், அந்த இடத்தின் முக்கியத்துவத்தையும் விளக்குங்கள். அப்போது அவர்கள் அந்த இடத்துக்குச் செல்லும் போது அதை உணரவும், உள்வாங்கிக் கொள்ளவும் வசதியாக இருக்கும்.

நமது ஊரிலுள்ள வரலாற்றுப் பின்னணிகளையும், நமது என்பதையும் நமது மண்ணின் சிறப்பையும் குழந்தைகள் அறிந்திருப்பது அவசியம்.

4. உறவுகளால் அமைவது தான் வாழ்க்கை. நான்கு சுவர்களுக்குள், செயற்கைக் குளிருக்குள் முடிந்து போவதல்ல ! எனவே தூரத்துச் சொந்தக்காரர்கள், நெருங்கிய உறவினர்கள், நெருங்கிய நண்பர்கள் ஆகியோரின் வீடுகளுக்குச் சென்று நேரம் செலவிடுவதும், அவர்களை வீட்டுக்கு அழைத்து நேரம் செலவிடுவதும் சிறப்பானது !

வாழ்க்கையின் உன்னதம், உறவுகளின் வலிமையில் தான் இருக்கிறது என்பதை குழந்தைகள் உணரவேண்டியது அவசியம்.

5. டிஜிடல் உலகத்தை விட்டு இந்த கோடை விடுமுறையில் குழந்தைகளை வெளியே கொண்டு வாருங்கள். மொபைலையோ, டேப்லெட்டையோ, லேப்டாப்பையோ, தொலைக்காட்சியையோ பார்த்துக் கொண்டே விடுமுறையை அழிக்கும் கலாச்சாரத்தை மாற்றுங்கள்.

டிஜிடல் தவிர்த்த எந்த விளையாட்டையும் ஊக்கப்படுத்துங்கள்.

6. குழந்தைகளோடு அதிக நேரம் செலவிடுங்கள். பெற்றோரோடு அதிகம் இணைந்திருக்கும் பிள்ளைகள் நல்ல சமூக மதிப்பீடுகளையும், பாதுகாப்பு உணர்வையும் கொண்டிருக்கும் என்கின்றன ஆய்வுகள். அத்தகைய நல்ல ஒரு ஆரோக்கிய உலகுக்குள் குழந்தைகளைக் கூட்டிச் செல்லுங்கள்.

குழந்தைகளோடு குழந்தையாய் விளையாடுங்கள். மண்ணில் புரளுங்கள். படம் கிறுக்குங்கள், தோட்டத்தில் செடி வைத்து பொழுதைப் போக்குங்கள். எதை செய்கிறீர்கள் என்பது உங்கள் விருப்பம், ஆனால் அதை குழந்தைகளோடு இணைந்து செய்யுங்கள்.

7. மனிதநேயத்தைக் குழந்தைகளுக்குள் வளரச் செய்யுங்கள். நம்மை விட நலிந்த நிலையில் நிறைய மக்கள் இருக்கிறார்கள். அவர்களுக்கு உதவுவது சக மனிதனாக நம்முடைய தார்மீகக் கடமை என்பதை அவர்களுக்குப் புரிய வையுங்கள்.

ஒரு மனநலம் பாதிக்கப்பட்டோர் விடுதி, ஒரு குழந்தைகள் காப்பகம், ஒரு முதியோர் இல்லம் போன்றவற்றுக்கு குழந்தைகளைக் கூட்டிச் செல்லுங்கள். குறைந்தபட்சம் இரண்டு மணி நேரங்களை அவர்களோடு செலவிடுங்கள்.

இருப்பதைக் கொண்டு ஆனந்தமாய் இருப்பது எப்படி என்பதையும் பிள்ளைகள் கற்றுக் கொள்வார்கள். பிறருக்கு உதவ வேண்டும் எனும் சிந்தனையையும் பெற்றுக்கொள்வார்கள்.

8. ஒரு நூலகத்துக்கு பிள்ளைகளைக் கூட்டிச் செல்லுங்கள். இன்றைய டிஜிடல் உலகில் நூலகங்கள் அழிந்து வரும் உயிரினங்கள் போல ஆகிவிட்டன. தேடிப்பிடித்து ஒரு லைப்ரரிக்குக் கூட்டிச் செல்லுங்கள். நூலகம் எப்படி இயங்குகிறது, எப்படி நமது வாழ்க்கையை நூல்கள் மாற்றுகின்றன போன்றவற்றை சுவாரஸ்யமாய் விளக்குங்கள்.

நல்ல நூல்களை அறிமுகம் செய்யுங்கள். அவர்களுக்குப் பிடித்த நூல்களை அவர்களோடு சேர்ந்து படியுங்கள். ரசியுங்கள்.

9. குழந்தைகளுக்கு குடும்பப் பொறுப்புகளைக் கொஞ்சம் கற்றுக் கொடுக்கும் காலமாக இது இருந்தால் இன்னும் சிறப்பு. உதாரணமாக குழந்தைகளோடு சேர்ந்து சமைக்கலாம். குழந்தைகளை அழைத்துக் கொண்டு கடைவீதியில் நடக்கலாம். பொருட்களின் விலையை உணரவைக்கலாம்.

அருகிலிருக்கும் போஸ்ட் ஆபீஸ் கூட்டிச் சென்று ஒரு காலத்தில் தபால் துறை எப்படி நமது வாழ்க்கையில் பின்னிப் பிணைந்திருந்தது என்பதை விளக்கலாம்.வீட்டை சுத்தப்படுத்துவது, அழகுபடுத்துவது போன்ற வேலைகளில் அவர்களை ஈடுபடுத்தலாம்.

இவையெல்லாம் அவர்களுக்கு சுவாரஸ்யம் தரும் வகையில் செய்ய வேண்டும். ‘வீட்டை கிளீன் பண்ணுடா’ என்று சொல்லாமல், ‘வா… அந்த அலமாராவை உனக்கு புடிச்ச மாதிரி கிளீன் பண்ணி அடுக்கி வைப்போம்’ என சொல்லுங்கள். இணைந்து செய்வதை குழந்தைகள் ரசிக்கும், இல்லையேல் வெறுக்கும்.

10. குழந்தைகளின் தனித் திறமைகள் என்ன என்பதைக் கண்டறிந்து அதை புடம் போட இந்தக் காலத்தைப் பயன்படுத்தலாம். வரைவது அவர்களின் விருப்பமெனில் அதற்கான உபகரணங்கள் வாங்கி கொடுத்து வரைய வைக்கலாம்.

எழுதுவது அவர்களுடைய விருப்பமெனில் அவர்களுக்குப் பிடித்த விஷயங்களை எழுத வைக்கலாம். இப்படி அவர்களுடைய விருப்பம் எதுவாக இருந்தாலும் அதற்கான களத்தையும், வாய்ப்புகளையும் உருவாக்கிக் கொடுங்கள்.

ஒரு பிளாக் ஆரம்பித்து அவர்களுடைய படைப்புகளை அதில் இணைத்து வைப்பது அவர்களுடைய கலை ஆர்வத்தை ஊக்கப்படுத்தும்.

கோடை காலத்தை செலவிட ஏகப்பட்ட வழிகள் உண்டு. உங்கள் விருப்பப்படி நீங்கள் உங்கள் விடுமுறையைச் செலவிடலாம். ஆனால் அது குழந்தைகளுக்கு டிஜிடல் விலகிய, மனிதம் நெருங்கிய, உற்சாகம் பொங்கிய, உறவுகள் துலங்கிய கோடையாய் இருக்கட்டும் ! விடுமுறை இனிதாகட்டும் !

*

 

Advertisements

TOP 10 : கனவுகளின் சுவாரஸ்யங்கள்

Image result for dreams

கனவுகள் சுவாரஸ்யமானவை. கனவு காண்பது சிலருக்கு பயம் தரும் விஷயம், சிலருக்கு பரவசமூட்டும் விஷயம். சிலர் அழகான கனவுகளைக் காண்பார்கள். சிலருக்கு ஆக்ரோஷமான கனவுகள் வந்து கதவைத் தட்டும். எது எப்படியோ கனவுகள் எல்லோரையும் சந்தித்துக் கொண்டே இருக்கின்றன. கனவுகளுக்கு நாடு, இனம், மொழி வேறுபாடு இல்லை. உயர்ந்தவன் தாழ்ந்தவன் எனும் பாகுபாடு இல்லை. வல்லரசு, நல்லரசு எனும் பேதங்கள் இல்லை. எல்லா மனிதர்களுக்குள்ளும் நுழைந்து விடுகின்றன கனவுகள். இந்த வாரம் அந்த கனவுகளைப் பற்றிய சுவாரஸ்யமான பத்து விஷயங்கள்.

  1. மூளை பரபரப்பாகும்.

இரவில் தூங்கும் போது எல்லா உறுப்புகளும் ஓய்வெடுக்கும் என்பது தான் நாம் கற்றுக் கொண்ட பாடம். ஆனால் கனவுகள் நிகழும் போது மூளை படுபயங்கரமாக வேலை செய்யும் என்கின்றன ஆய்வுகள். அதிலும் குறிப்பாக, தூக்கத்தின் ஒரு நிலையான‌ ரேப்பிட் ஐ மூவ்மென்ட் எனப்படும் விரைவான கண் இயக்க நிலையில் மூளை பயங்கர சுறுசுறுப்படைகிறது. குறிப்பாக காட்சிகளை பகுத்தறியும் மூளையின் பாகம் கனவின் போது வேகமாய் வேலை செய்கிறது.

விழித்திருக்கும் போது இருப்பதை விட அதிக பிஸியாய் கனவு வேளைகளில் மூளை பிஸியாய் இருப்பதுண்டு என சில ஆய்வுகள் கூறுகின்றன. இரவில் அதிக அழுத்தமான கனவுகள் கண்டால் காலையில் சோர்வாய் இருப்பதன் காரணம் இது தான். எனவே இரவில் முழு ஓய்வு என்பதை கனவுகளைக் கொண்டே அளவிட வேண்டியிருக்கிறது.

  1. கனவு காணுங்கள்.

ஆன்டோ ஜெனிடிக் ஹைபோத்தசிஸ் எனும் ஒரு கோட்பாடு இருக்கிறது. இரவில் கனவு காணும் மூளை வளர்கிறது என்கிறது அந்தக் கோட்பாடு. மனிதனின் அறிவு வளர்ச்சிக்கு கனவுகள் உதவுகின்றன‌ என்கிறது ஒரு ஆய்வு. குழந்தைகள் அதிக நேரம் ரேப்பிட் ஐ மூவ்மென்ட் எனப்படும் கனவு நிலையில் இருப்பதற்கு இது தான் காரணம். ரேப்பிட் ஐ மூவ்மென்ட் என்பதை தமிழில் விரைவான கண் இயக்க நிலை எனலாம். தூங்கும் குழந்தையின் கண்ணைப் பார்க்கும்போது உள்ளே விழி அசைந்து கொண்டிருந்தால் அது தான் விரைவான கண் இயக்க நிலை. குழந்தைகளின் மூளை வளர்ச்சிக்கு இந்த கனவுகள் மிகவும் அவசியம்.

மூளையில் புரோட்டீன் சத்து அதிகரிக்கவும் கனவுகள் உதவுகின்றன. அறிவு வளர்ச்சிக்கு தேவையான மூளையின் பாகங்கள் கனவுகளினால் தூண்டப்படுவதால் மூளை வலுவடைகிறது. எனவே அடுத்த முறை கனவு கண்டால் கவலைப்படாதீர்கள். அறிவு வளர்கிறது என மகிழுங்கள்.

  1. மரத்துப் போதல்

ஸ்பீல் பெராலிசிஸ் எனப்படும் தூக்கத்தில் மரத்துப் போகும் நிலை உலகெங்கும் உண்டு. கனவுகளில் உடல் அப்படியே மரத்துப் போகும். மூளை விழித்திருக்கும், ஆனால் உடல் அசையாது. கைகளைத் தூக்க வேண்டும் என தோன்றும் ஆனால் தூக்க முடியாது. பேச வேண்டும் என தோன்றும் ஆனால் பேச முடியாது. எழும்ப வேண்டும் என தோன்றும் ஆனால் எழும்ப முடியாது.

சிலருக்கு தன்னைச் சுற்றி என்ன நடக்கிறது என தெளிவாய்த் தெரியும். ஆனால் அதுவும் கனவு தான், நிஜம் போல தெரியும். படுத்திருக்கும் அறை, அறையில் மக்கள் நடமாட்டம் என பல விஷயங்கள் அவர்களுக்கு நிஜம் போல கனவில் வரும். இந்த நிலையில் சிலர் வித்தியாசமான ஏலியன் கனவுகளையும் காண்பதுண்டு என்கின்றனர் விஞ்ஞானிகள்.

  1. பாலினமும், கனவுகளும்

ஆண்களும் பெண்களும் கனவுகள் காண்கின்றனர். சரி, இருவருக்கும் ஒரே மாதிரியான கனவுகள் தான் வருகின்றனவா ? உலகெங்கும் இதுகுறித்து பல்வேறு ஆய்வுகள் வெளியாகின. அவை சொல்கின்ற செய்திகள் வியப்பானவை. ஆண்களுக்கும் பெண்களுக்கும் வருகின்ற கனவுகள் அடிப்படையிலேயே ஏகப்பட்ட வித்தியாசங்கள் கொண்டவை. பெரும்பாலும் அவை ஆண், பெண் எனும் இறைவனின் படைப்பின் சூட்சுமத்தின் அடிப்படையிலேயே அமைகின்றன. அதாவது பெண்கள் அதிக எமோஷன், உணர்வு ரீதியான நீண்ட கனவுகளைக் காண்கின்றனர். ஆண்களுக்கு அடிதடி, கார், சேசிங் போன்ற கனவுகளே அதிகம் வருகின்றன.

ஆண்களின் கனவில் 67% ஆண்களே வருகின்றனர். பெண்களின் கனவில் பெண்கள் 50% தான் வருகின்றனர். பாலியல் கனவுகளை 8% மக்கள் காண்கின்றனர். அதுவும் ஆண்களுக்கும் பெண்களுக்கும் வேறு விதமாகவே வருகின்றன. இவையெல்லாம் ஆய்வுகளின் அடிப்படையிலானவை மட்டுமே. இதில் எதிலும் பொருந்தாத மக்களும் நிச்சயம் இருப்பார்கள் என்பதே யதார்த்தம்

  1. காவியக் கனவுகள்

சிலருக்கு காவியக் கனவுகள் வருவதுண்டு. இது கொஞ்சம் அபூர்வம். ஆனால் காவியக் கனவுகள் காணும் பலருடைய வாழ்க்கை அதிரடி மாற்றங்களைச் சந்திக்கிறது. அந்தக் கனவுகள் அவர்களை வெகுவாகப் பாதிக்கின்றன. அந்தக் கனவின் ஒரு பாகமாக அவர்கள் மாறிவிடுகின்றனர். அந்தக் கனவு பல ஆண்டுகள் அவர்களுடைய மனதில் நிழலாடிக் கொண்டே இருக்கின்றன.

ஏதோ மிகப்பெரிய சாதனை செய்தது போல காவியக் கனவு காண்பவர்கள் உணர்வார்கள். ஏதோ ஒன்றைக் கண்டுபிடித்தது போல அவர்கள் மகிழ்வார்கள். காவியக் கனவுகள் பெரும்பாலும் ஒரு நாவலைப் போல ஆனால் நிஜ வாழ்க்கைக்கு சற்றும் சம்பந்தமில்லாததாய் வரும். காவியக் கனவு காண்பவர்கள் இன்செப்சன் படத்தைப் போல, கனவுக்குள் வேறு கனவு காண்பவர்களாகவும் இருப்பார்கள்.

  1. விலங்குகளும், கனவுகளும்

விலங்குகள் என்ன கனவு காண்கின்றன என்பதை இன்னும் மனிதன் கண்டுபிடிக்கவில்லை. ஆனால் விலங்குகள் கனவு காண்கின்றன என்பதை மட்டும் இப்போதைக்கு கண்டுபிடித்திருக்கிறார்கள். ஊர்வன, மற்றும் கொடிய விலங்குகள் கனவு காண்பதைப் பற்றி இன்னும் ஊர்ஜிதப்படுத்தப்படவில்லை. மற்றபடி நாய், பூனை, மான், பறவைகள் என சாதாரணமாய் நமக்குத் தெரிந்த எல்லா விலங்குகளுமே கனவு காண்கின்றன.

பெரும்பாலும் கனவு கண்டு எழுந்ததும் விலங்குகள் தற்காப்பு மனநிலைக்குள் வந்து விடுகின்றன. விலங்குகள் என்ன கனவுகளைக் காண்கின்றன. அவற்றுக்கு எப்போதெல்லாம் கனவுகள் வருகின்றன போன்ற பல ஆய்வுகள் தொடர்ந்து கொண்டே இருக்கின்றன.

  1. கனவும், நிஜமும்

கனவுகள் நாம் தூங்கும் போது நடக்கின்றன. அவற்றோடு நிஜத்தில் அப்போது நடந்து கொண்டிருக்கும் விஷயங்களும் கலந்து விடுவதுண்டு. இதை டிரீம் இன்கார்பரேஷன், அதாவது கனவு இணைப்பு என்பார்கள். உதாரணமாக நீங்கள் ஒரு கனவு கண்டுகொண்டிருக்கிறீர்கள். அந்தக் கனவில் நியூயார்க்கில் காதலியோடு ஆடிப் பாடுகிறீர்கள். அப்போது உங்கள் வீட்டை ஒட்டி ஒரு ஆம்புலன்ஸ் அதிக சத்தம் எழுப்பிக் கொண்டே செல்கிறது என வைத்துக் கொள்ளுங்கள். பெரும்பாலும் உங்களுடைய கனவில் நியூயார்க்கில் ஒரு ஆம்புலன்ஸ் உங்களுக்கு அருகே செல்வது போல வரும் !

அதே போல உங்களுக்கு பயங்கர தாகம் எடுக்கிறது என வைத்துக் கொள்ளுங்கள். கனவில் நீங்கள் தண்ணீர் குடிப்பீர்கள். ஆனால் தாகம் தணியாது. உண்மையிலேயே எழுந்து தண்ணீர் குடித்தபின் தான் தாகம் குறையும். கனவும் நினைவும் இணைகின்ற சுவாரஸ்யமான தருணம் இது. கனவில் உளறும் மக்களின் அருகே சென்று அவர்களோடு பேசிக்கொண்டிருந்தால் அந்த பேச்சுக்கு அவர்கள் பதிலளிப்பது இதன் ஒரு வகை தான்.

  1. கனவுகள் குறியீடுகள்

கனவுகளில் பல விஷயங்களைக் காண்போம். ஆனால் அவை நேரடியாக அந்த பொருளைச் சொல்வதில்லை. ஒரு ஆள் இறந்து போவதைக் கனவில் கண்டால் அந்த நபருக்கு ஆபத்தென்று பொருள் இல்லை. கிராமங்களில் அடிக்கடி சொல்வார்கள், ‘கல்யாணத்தைப் பாத்தா மரணம் ஒண்ணு விழும்’ என்று. ஒரு விஷயத்தை குறியீடுகளால் உணர்த்துகின்றன கனவுகள். இதனால் தான் கனவுகளும் அவற்றின் பயன்களும் என பல்வேறு ஆய்வுகளும், நூல்களும் கனவுகளின் முடிச்சவிழ்க்க முயல்கின்றன.

குழந்தைகள் மூன்று வயதுவரை அவர்களைப் பற்றி கனவுகள் காண்பதில்லை. அதே போல குறட்டை விடும்போது மனிதன் கனவு காண்பதில்லை என இன்னொரு ஆய்வு சொல்கிறது. யாரோ துரத்துவது போல, எங்கிருந்தோ விழுவது போல, தேர்வுக்கு லேட்டாகப் போவது போல இப்படி நாம் காணும் கனவுகள் எல்லாம் குறியீடுகளே.

  1. பார்வையற்றவரின் கனவுகள்

பிறக்கும் போது பார்வையிருந்து, இடையில் பார்வை பறிபோனவர்கள் கனவுகளை காட்சிகளாகக் காண்கின்றனர். ஆனால் பிறவியிலேயே பார்வையிழந்தவர்கள் காட்சிகளைக் காண்பதில்லை. ஆனால் அவர்களுக்கும் கனவுகள் வரும் ! எப்படி ? அவர்களுடைய மற்ற புலன்களான கேட்டல், தொடுதல், உணர்தல் போன்றவற்றின் அடிப்படையில் அவர்களுக்குக் கனவுகள் வருகின்றன.

எல்லோரும் கனவுகளை கலரில் பார்ப்பதில்லை. 12% மக்களுக்குக் கனவுகள் கருப்பு வெள்ளையில் வந்து கடுப்படிக்கும். மற்றவர்களுக்கு கலரில் வந்து கண்சிமிட்டும். ஏன் சிலருக்கு கனவுகள் கருப்பு வெள்ளையாகவும், சிலருக்கு வண்ணமாகவும் வருகின்றன என்பதற்குச் சரியான பதில் இல்லை.

  1. கனவுகள் மறந்துவிடும்

நாம் காணும் கனவுகளில் 50% கனவுகளும் நாம் விழித்த ஐந்து நிமிடத்திலேயே மறந்து விடும். அடுத்த ஐந்து நிமிடத்தில் இன்னொரு 40 சதவீதம் மறந்து விடும். அதிகபட்சம் ஒரு பத்து சதவீதம் தான் நினைவில் நிற்கும். கனவுகளைக் குறிப்பெடுக்க விரும்புபவர்கள் படுக்கையிலேயே பேப்பர் பென்சில் வைத்திருக்க வேண்டும். விழிப்பு வந்ததும் படுக்கையை விட்டு எழும்பாமல், படுத்திருக்கும் அதே நிலையில் படுத்து எழுத வேண்டும் என்கின்றனர் வல்லுநர்கள்.

‘நான் இதுவரைக்கும் பாக்காத ஒரு முகம் தான் என் கனவுல வந்தது’ என நாம் சொல்வதுண்டு. உண்மையில் கனவுக்கு புதிய மனித முகங்களை வரையத் தெரியாது. நமது வாழ்க்கையில் நாம் ஏதோ ஒரு சந்தர்ப்பத்தில் பார்த்த மனித முகங்களே வரும். ஐந்து வயதில் நமக்கு ஒரு மிட்டாய் வாங்கி தந்த நபராய் இருக்கலாம். அல்லது விமானப் பயணத்தில் ஓரமாய் அமர்ந்து பேப்பர் படித்த நபராய் இருக்கலாம். நாம் மறந்து போய் பல வருடங்களான முகங்களும் கனவில் வரும். நாம் அவர்களை புதியவர்கள் என்போம். இதுதான் உண்மை !

 

உலக அதிசயம் : எல் காஸ்டிலோ பிரமிட்

எல் காஸ்டிலோ பிரமிட் என அழைக்கப்படும் இது உண்மையில் படிக்கட்டுகளால் அமைந்த பிரமிடு போன்ற தோற்றமுடைய ஒரு கோட்டையாகும். இது மெக்சிகோ நாட்டில் அமைந்துள்ளது.

இந்தக் கோயில் கோட்டையை மாயன் கலாச்சாரத்தைச் சேர்ந்த மக்கள் கட்டினர். மீசோ அமெரிக்கக் கலாச்சாரப்படி பழைய பிரமிடின் மேல் புதிய பிரமிடு ஒன்றைக் கட்டுவது வழக்கம். அதன் சாட்சியாக நிற்கிறது இந்த பிரமிட்.

கம்பீரமான இந்த ஆலயத்தின் மேலேறினால் இன்றைய உலகம் உற்சாகக் காற்று வீசி வரவேற்கிறது. நாலா பக்கமும் அழகிய காட்சிகள் கண்களுக்கு விருந்தாகின்றன. ஆனால் ஆலயத்தின் உள்பக்கமோ கடந்த காலத்தின் மௌன சாட்சியாய் அமைதியுடனும், வரலாற்றுச் சிதைவுகளுடனும் அமைந்திருக்கிறது.

இட்சா எனும் படை வீரர்கள் குழு ஒன்று கட்டிய நகரே சீச்சென் இட்சா என அழைக்கப்படுகிறது.

இந்த நகரில் அவர்கள் தங்களுடைய கலாச்சாரத்தின் அடையாளமாக பல்வேறு கோயில்கள், நினைவுச் சின்னங்கள், கோட்டைகள் கட்டி தங்களை நிலை நிறுத்தியுள்ளனர்.

இவர்கள் போர்வீரர்களாகவும், கலைஞர்களாகவும் கூடவே வானியல் வல்லுனர்களாகவும் இருந்திருக்கின்றனர்.

சீச்சென் இட்சா என்பதற்கு இட்சாவிலுள்ள கிணற்றின் வாய் என்பது பொருள். வித்தியாசமான பெயராய் இருக்கிறதே என்னும் நமது கேள்விக்கு “மாயன் நாகரீகம் கிணற்றை புனித அடையாளமாகப் பாவிக்கிறது:” எனும் பதில் கிடைக்கிறது.

எல்காஸ்டிலோ கோட்டையில் வடக்குப் படிக்கட்டு வித்தியாசமானது. இந்த படிக்கட்டுகளின் இரண்டு ஓரத்திலும் ஒவ்வோர் பெரிய பாம்புகள் மேலிருந்து கீழாக தரை வரை இருப்பது போல அமைக்கப்பட்டுள்ளது.

சில குறிப்பிட்ட காலங்களில் சூரிய வெளிச்சம் இந்த கோட்டையில் விழும்போது கோட்டையின் நிழல் இந்த படிக்கட்டின் ஓரத்தில் விழுகிறது. வெளிச்சமும் நிழலுமாய் சேர்ந்து இந்த பாம்புகள் உயிருடன் இருப்பது போன்ற அற்புத தோற்றத்தை உருவாக்குகின்றன. இது மாயன் நாகரீக மக்களின் கட்டிடக் கலை அறிவுக்கும், வானியல் அறிவுக்கும் ஒரு துளிச் சான்று எனலாம்.
 

எல் காஸ்டிலோ எனும் ஸ்பானிய வார்த்தைக்கு கோட்டை என்பது அர்த்தம். ஒன்பதாம் நூற்றாண்டில் கட்டப்பட்டிருக்கலாம் எனவும், ஆறாம் நூற்றாண்டில் கட்டப்பட்டிருக்கலாம் எனவும், பதினோராம் நூற்றாண்டிற்கும் பதிமூன்றாம் நூற்றாண்டிற்கும் இடைப்பட்ட ஒரு காலத்தில் இந்த கோட்டை கட்டப்பட்டிருக்கலாம் எனவும் பல்வேறு காலகட்டங்கள் தெரிவிக்கப்பட்டாலும் உறுதி செய்யும் சான்றுகள் ஏதும் கிடைக்கவில்லை.

எனினும் பதிமூன்றாம் நூற்றாண்டிற்கு முன்பே கட்டிய கோட்டை என்பதில் அனைவரும் உடன்படுகின்றனர்.

மாயன் நாகரீகத்தின் அடையாளமாகத் திழகும் சீச்சென் இட்சா நகர் மெக்சிகோவிலுள்ள யூகேடின் மாநிலத்தில் அமைந்துள்ளது. மெரிடாவிலிருந்து சுமார் 120 கிலோ மீட்டர்கள் தொலைவில் இது அமைந்துள்ளது.

மாயன் மக்களிடையே பல கடவுள்கள் இருந்தனர். இந்த கோட்டை அவர்களுடைய குவெட்சால்கோட்டில் என அழைக்கப்படும் இந்த குகுல்சான் கடவுளுக்காக கட்டப்பட்டதாகும். இந்த கடவுள் ஒரு பாம்பு !

“குவெல்டால் கோட்டில்” என்பதற்கு “கடவுளின் அருளை பெற்ற ஞானமுடையவன்” என்று அர்த்தம்.

கி.பி  1920 முதல் 1940க்கு இடைப்பட்ட காலத்தில் மெக்சிக அரசு வாஷிங்டனின் கெண்டகி கல்வி நிறுவனத்தின் மூலம் இந்த கோட்டையைப் புதுப்பித்தது. புதுப்பிக்கப்பட்டது என்பதை விட பெரிய அளவிலான மாற்றம் கொண்டுவரப்பட்டது எனலாம்.

இதன் நான்கு பக்கங்களிலும் அகலமான படிக்கட்டுகள் அமைத்து உச்சிக்குச் செல்லும் வகையில் வடிவமைக்கப்பட்டுள்ளது.

இந்த புதிய வடிவத்தின் உள்ளே பழைய பிரமிடு இருக்கிறது. அங்கே மன்னனின் அரண்மனை அமைந்துள்ளது.

வருடத்தின் முன்னூற்றி அறுபத்து ஐந்து நாட்களையும் குறிக்கும் விதத்தில் இந்த பிரமிட் 365 படிகளைக் கொண்டுள்ளது. பக்கத்துக்கு 91 படிகளாக 364 படிகள். கடைசி மேடை ஒரு படி. என மொத்தம் 365 படிகள் என கணக்கிடப்படுகிறது.

முப்பது மீட்டர் உயரமுள்ள இந்த பிரமிடின் குறுக்கு அகலம் 55.3 மீட்டர்களாகும். இதன் உச்சியில் அமைந்துள்ளது மன்னனுக்கான சிறப்புக் கோயிலாகும்.

இந்த மாயன் நாகரீக அடையாளங்கள் பிற்காலத்தின் தோன்றிய போர்களினால் அழிந்து போயிருந்தாலும் சில அடையாளங்கள் இன்னும் அந்த நாகரீகத்தின் சாட்சியாய் நிமிர்ந்து நிற்பது குறிப்பிடத் தக்கது.

இந்த எல் காஸ்டிலோ பிரமிட் கோயில் சீச்சென் இட்சா நகரின் மையத்தில் அமைந்திருப்பதே இந்த கோயிலின் முக்கியத்துவத்தை வெளிப்படுத்துகிறது.

கி.பி 600 களில் சிச்சின் இட்சா மிகவும் செல்வச் செழிப்பில் மிதந்த ஒரு நாடாக இருந்திருக்கிறது. எனவே இது மன்னர்களின் மனதில் ஒரு சலனத்தை ஏற்படுத்திக் கொண்டே இருந்திருக்கிறது.

கி.பி 987ல் ஏற்பட்ட படையெடுப்புக்குப் பின் மாயன் நாகரீகத்தினரிடையே தொல்டெக் நாகரீகக் கலப்பு ஏற்பட்டிருக்கிறது.

எனவே அதன் பின் சீச்சென் இட்சாவில் நாகரீகக் கலப்பு உருவானது. மாயன் நாகரீகமும் தொல்டெக் நாகரீகமும் கலந்து வெளிப்பட்டன.

கட்டிடம் மொத்தம் ஒன்பது நிலைகளைக் கொண்டுள்ளது. இவை மாயன் நாகரீகத்தின் பாதாள உலகத்தைச் சித்தரிப்பதாக ஆய்வாளர்கள் கருதுகின்றனர். பிரமிடின் நடுப்பகுதியில் அமைந்துள்ள பதின்மூன்று நிலைகள் மேல் உலகத்தைச் சித்தரிக்கிறது எனவும் அவர்கள் கோடிட்டுக் காட்டுகின்றனர்.

மாயன் நாகரீகம் மிகவும் செழிப்பான நாகரீகமாக இருந்திருக்கிறது என்பதன் சாட்சியாக நிற்கிறது இந்த கோட்டை. ஆன்மீகம், தத்துவம், கட்டிடக்கலை, கணிதவியல் என பலவிதமான கோட்பாடுகளை உள்ளடக்கி, மாயன் கலாச்சாரத்தை மௌனமாய் இருந்து உரக்கச் சொல்கிறது இது.

இது ஒம்பது அடுக்குகளுடனும், அடுக்குக்கு பதினெட்டு பாகங்களுடனும் அமைந்துள்ளது. இந்த பதினெட்டு என்பது மாயன் நாகரீகத்திலுள்ள 18 மாதங்களைக் குறிக்கிறது.

இந்த கோட்டையின் மேலிருந்து பார்த்தால் மேற்கு பக்கமாக மாயன் காலத்தைய மிகப்பெரிய பந்து அரங்கம் தென்படுகிறது. மாயன் காலத்தைய மிகப்பெரிய அரங்கமாக இது விளங்கியிருக்கிறது.

கோட்டையின் மேல் மாயன் மக்கள் வழிபட்ட மழை கடவுள் சாக் சிலையாக வடிக்கப்பட்டுள்ளார்.

இந்த கோட்டைக்கு வடக்கே 285 அடி அகலமுடைய கிணறு ஒன்று காணப்படுகிறது. இதை மாயன் மக்கள் புனித அடையாளமாகக் கொண்டிருந்ததாக கருதப்படுகிறது.

மெக்சிகோ நகரில் அமைந்துள்ள இந்த எல்காஸ்டிலோ உலக அதிசயங்களில் ஒன்றாக அமைந்துள்ளது. இதுவே மாயன் கால மக்களின் திறமைக்கும், அவர்களுடைய அடையாளங்களுக்கும் கிடைத்த உலக அங்கீரமாய் கருதிக் கொள்ளலாம்.

 

பின் குறிப்பு:

இப்படி எழுதிக் கொண்டிருக்கையில் அனுமதியில்லாமலேயே கனவுக் கதவு திறந்து உள்ளே வந்தாள் அவள். தேவதைகளுக்குச் சாவிகள் தேவையில்லையே.

எல் காஸ்டிலோ பத்தி எழுதறீங்க.. என்னைப் பற்றி எழுதமாட்டீங்களா வந்த தேவதை கொஞ்சியது.

உலக அதியங்கள் எல்லாம்
கல்லால் ஆனவையடி
இல்லையேல்
உன்னைத் தான்
முதலில் சேர்த்திருப்பார்கள்.

என்றேன்.  தன் மழலை உதடுகளால் முத்தமிட்டு மடியில் அமர்ந்து கொண்டது அந்த  மழலை தேவதை. எல் காஸ்டிலோ உயரமிழந்தது.

 

வறுமையின் உச்சம் : மண்ணை உண்ணும் மக்கள் !!

( இந்த வார தமிழ் ஓசை களஞ்சியம் நாளிதழில் வெளியான கட்டுரை )

ap071225013144.jpg 

வறுமை விவசாயிகள் எலியை சமைத்து உண்டார்கள் என்னும் செய்தி கேட்டு பதறிய தமிழக மனது நமது. வறுமை, மனிதனை எந்த நிலைக்கும் தள்ளும் என்பதை மக்களுக்கு நிரூபித்துக் காட்டியது அந்தத் துயரச் சம்பவம்.

அதை விட பல மடங்கு வறுமையின் கோரப் பிடியில் சிக்கி நலிவுற்ற வாழ்க்கையை வாழும் சமூகம் ஒன்று இருக்கிறது என்பதை அறியும் போது உயிர் பதறுகிறது.

ஹெய்தி அப்படிப்பட்ட வறுமையின் உச்சத்தை சுவாசித்து நகரும் ஓர் நாடு. இங்குள்ள மக்களுக்கு உணவாக இருப்பது மண் !

மிதித்து நடக்கும் மண்ணையே இங்குள்ள மக்கள் உணவாக உண்ணும் கொடுமைக்குத் தள்ளப்பட்டிருக்கின்றனர் என்பதை அறியும் போது மனித நேயம் உள்ள எந்த உயிருமே பதறிப் போகிறது.

ap071225013086.jpg

மண்ணை தூய்மைப்படுத்தி அதனுடன் உப்பைச் சேர்த்து வெயிலில் காய வைத்து அதை உண்டு தங்கள் பசியை அடக்கிக் கொள்ளும் ஒரு துர்பாக்கிய வாழ்க்கையை ஹெய்தி மக்கள் வாழ்ந்து வருகிறார்கள்.

செல்வத்தின் உச்சத்தில் இருக்கும் அமெரிக்காவிலிருந்து வானூர்தி மூலம் பயணித்தால் ஒன்றரை மணி நேரத்தில் ஏழ்மையின் பள்ளத்தாக்கில் கிடக்கும் இந்த நாட்டை அடைந்து விடலாம்.

ஒரு பக்கம் அறிவியலின் உச்சத்திலும், அதிகாரத்தின் உச்சத்திலும், பொருளாதாரத்தின் உச்சத்திலும் நாடுகள் வளர்ந்து கொண்டிருக்க, அதே யுகத்தில் இன்னோர் கோடியில் குறைந்த பட்ச தேவையான உணவு கூட கிடைக்காமல் மக்கள் உழல்வது உலகளாவிய மக்களின் மனித நேயத்தை ஒட்டு மொத்த கேள்விக்குள்ளாக்குகிறது.

இஸ்பேனியாவிலுள்ள கரீபியத் தீவு ஒன்றில் அமைந்துள்ளது இந்த ஹெய்தி. இதன் மொத்தப் பரப்பளவு 27,750 சதுர கிலோமீட்டர்கள். இது கியூபாவிலிருந்து எண்பது கிலோ மீட்டர் தொலைவில் அமைந்துள்ளது.

hispaniolamap.gif

கரீபியன் தீவுகளில் மூன்றாவது பெரிய நாடு இது என்பது குறிப்பிடத் தக்கது. இங்கே சுமார் ஒரு கோடி மக்கள் வாழ்கின்றனர்.

சுமார் எழுபது விழுக்காடு மக்களும் வேலையில்லாமல் அலைபவர்களே. ஹெய்தி மக்களின் சராசரி குடும்ப வருமானம் தினம் ஒன்றுக்கு சுமார் ரூபாய் நாற்பது மட்டுமே.

மிகவும் பின் தங்கிய நாடுகளின் பட்டியலில் அமைந்துள்ள இந்த நாட்டில் வறுமையின் பிடியில் வாழ்க்கையை ஓட்டும் மக்கள் சுமார் எண்பது விழுக்காட்டினர்..

ஹெய்தி நாட்டின் 95 விழுக்காடு பகுதிகளில் இன்னும் மின்சாரம் எட்டிப்பார்க்கவில்லை. சரியான தண்ணீர் வசதி இல்லை. ஹெய்தியின் வறுமையும், வசதியின்மையும் அவர்களை சுகாதாரமற்ற வாழ்க்கை வாழ நிர்ப்பந்தித்துள்ளது.

ஹெய்தியில் எல்லா நோய்களும் காணக்கிடைக்கின்றன. உயிர்கொல்லி நோயான எயிட்ஸ் உட்பட.

நிலையற்ற அரசியல், வறுமையினால் விளைந்த வன்முறைக் கலாச்சாரம், ஊழல் என அனைத்து நிலைகளிலும் கைவிடப்பட்ட சூழலில் தவிக்கிறது இந்த நாடு.

 outside.jpg

ஒருகாலத்தில் இந்த நாடு உலகிலேயே மிகவும் செல்வச் செழிப்புடன் இருந்ததாகவும், 1750 களில் பிரஞ்ச் நாட்டின் செல்வத்தின் பாதி இந்த நாட்டிலிருந்தே பெறப்பட்டதாகவும் வரலாறு கூறுகிறது.

அடிமைத் தனத்தை விரும்பாமல் சுதந்திர வாழ்க்கை வேண்டுமென போராடிய முதல் ஆப்பிரிக்க நாடு ஹெய்தி என்பது குறிப்பிடத் தக்கது.

1804 ம் ஆண்டு இந்த நாடு சுதந்திரக் காற்றைச் சுவாசித்தது. ஆனால் அடிமைத் தனத்தில் இருந்த ஆப்பிரிக்க நாடு சுதந்திரத்தைப் போராடிப் பெற்றுக் கொண்டதைப் பொறுக்க முடியாத அனைத்து மேலை நாடுகளும் ஹெய்தியின் பொருட்களை வாங்காமல் கதவடைத்தனர். இதனால் சுதந்திரமடைந்த ஹெய்தி சிக்கலுக்குள் விழுந்தது.

இது மட்டுமன்றி ஹெய்தியின் நிலமையை சீரிழக்கை வைத்த பிரஞ்ச் நாடு 1838ல் 150 மில்லியன் பிராங்க் களைக் கடனாகக் கொடுத்து, சுமார் எண்பது ஆண்டுகள் அதற்குரிய வட்டியை வசூலித்தும் ஹெய்தியின் பொருளாதார சீரழிவுக்கு முக்கிய காரணியாக விளங்கியது.

ஹெய்தி ஒன்றிணைந்து போராடவில்லை. ஹெய்தியில் நிலவிய குழு மனப்பான்மையும், பிரிவினை சிந்தனைகளும் அதன் வளர்ச்சியைத் தடுத்தன.

இன்றும் கூட ஹெய்தியின் மொத்த செல்வத்தின் 50 விழுக்காடும், அங்குள்ள 1 விழுக்காடு மக்களின் கையிலேயே இருக்கிறது. எனவே செல்வந்தர்களுக்கும், ஏழைகளுக்கும் இடையே நிரப்பிட முடியாத ஒரு மாபெரும் இடைவெளி நிலவுகிறது.

300px-haitiangirl.jpg

வழங்கப்படும் உதவிகள் உரியவர்களுக்குச் சென்று சேராதபடி அரசியல் அமைப்பு ஊழலின் இறுக்கமான பிடிக்குள் இருக்கிறது என்பது இன்னோர் துயரம்.

பிரஞ்ச் கல்வி முறை அடிப்படையில் இங்கே கல்வி பயிற்றுவிக்கப்படுகிறது. சுமார் 60 விழுக்காடு மக்கள் படிப்பறிவில்லாதவர்களாகவே இருக்கிறார்கள். உயர் கல்வி என்பதெல்லாம் அபூர்வக் காட்சிகள். பெரும்பாலான மக்கள் பிரஞ்ச் மொழியையே பேசுகிறார்கள். பிரஞ்ச் மொழி தவிர்த்தால் ஹெய்த்தியன் கிரயோல் எனும் மொழியும் பயிற்றுவிக்கப்படுகிறது.

மக்கள் தொகையும் இங்குள்ள வறுமைக்கு ஓர் முக்கியமான காரணமாகச் சொல்லப்படுகிறது. எனினும், மக்கள் பண்ணைகளில் வேலை செய்து பொருளீட்டவும், குழந்தைகளுடன் வாழும் ஒரு மகிழ்ச்சிக்காகவும் அதிக குழந்தைகளைப் பெறுகிறார்கள்.

சுமார் 95 விழுக்காடு மக்களும் ஆப்பிரிக்க வழித்தோன்றல்களாகவே இருக்கின்றனர். எனவே இங்குள்ள கலாச்சாரத்தில் ஆப்பிரிக்கக் கலாச்சாரத்தின் தாக்கம் அதிக அளவு உள்ளது.

சரியான ஊட்டச் சத்து இன்மையும், கக்கல் கழிச்சல் நோயும் ஹெய்தியில் ஐந்து வயதுக்கு உட்பட்ட குழந்தைகளில் ஐவருக்கு ஒருவர் என்னும் விகிதத்தில் பலி வாங்கிக் கொண்டிருக்கிறது.

மண் பிஸ்கெட்களை உண்பது உடல் நலத்திற்குக் கேடானது எனவும், ஊட்டச் சத்து இழப்புக்கும், வயிற்று வலி, கக்கல் கழிச்சல் நோய்க்கும் இது இட்டுச் செல்லும் எனவும் ஹெய்தியின் சுகாதார அமைச்சர் கபிரியேல் திமோத்தி தெரிவித்துள்ளார்.

ap071225013243.jpg

உலகளாவிய விலை வாசி உயர்வினால் ஹெய்தி பெரும் பாதிப்பைச் சந்தித்து வருகிறது. மக்களின் வருமானத்திற்கும், பொருட்களின் விலைக்கும் இடையே சமநிலையற்ற சூழல் உருவாகி விட்டதால் மக்கள் மண் உணவை சார்ந்து வாழும் நிலைக்கு ஆளாகின்றனர்.

இரண்டாயிரத்து ஏழில் நிகழ்ந்த சூறாவளிச் சீரழிவிற்குப் பின் ஹெய்தியில் பொருட்களின் விலை நாற்பது விழுக்காடு அதிகரித்திருக்கிறது. மக்களின் ஒரு நாள் சராசரி வருமானமான ஒரு டாலரை வைத்துக் கொண்டு அங்கே மூன்று கப் அரிசி வாங்க மட்டுமே முடிகிறது.

இந்த மண் பிஸ்கெட் செய்வதற்குரிய மண் கூட இப்போது அங்கே விலை உயர்வை சந்தித்திருக்கிறது ! நூறு மண் பிஸ்கெட்கள் செய்ய சுமார் ஐந்து டாலர்கள் செலவிட வேண்டியிருக்கிறதாம். எனினும் பிற பொருட்களுடன் ஒப்பிடுகையில் மண் பிஸ்கெட் விலை குறைவு என்பதால் மக்கள் அதை வேறு வழியின்றி உண்கின்றனர்.

ஒற்றுமையும், சரியான அரசியல் அமைப்பும் இல்லாத நாடு எந்த நிலைக்குத் தள்ளப்படும் என்பதற்கு சோகமான ஒரு உதாரணமாக இருக்கிறது ஹெய்தி.

உணவகம் செல்லும்போது கவனிக்க வேண்டிய 10 விஷயங்கள் !

food.jpg

உறவுகளின் நெருக்கம் அதிகரிக்க அனைவரும் ஒன்றாய் அமர்ந்து கூட்டாஞ்சோறு உண்ணும் வாய்ப்பு நகர்ப்புற வாசிகளுக்கு வாய்ப்பதில்லை. அவசரகதியில் இயங்கும் வாழ்க்கை விடியலில் புறப்பட்டு, நள்ளிரவுக்கு சில மணி நேரம் மட்டுமே இருக்கும் போது வீடு வந்து சேரும் மனிதர்களையே தயாரித்திருக்கிறது.

விலைவாசியின் உயர்வும், தாரளமயமாக்கலால் அதிகரித்திருக்கும் ஏற்றத் தாழ்வுகளும் இன்றைக்கு மனிதனின் உழைக்கும் நேரத்தை அதிகப்படுத்தியிருப்பதுடன், கணவன் மனைவி இருவரும் உழைத்தால் மட்டுமே ‘சமாளிக்க’ முடியும் எனுமளவுக்கு சூழலை இறுக்கப்படுத்தியும் இருக்கிறது.

குடும்பத்தினருடன் செலவிடக் கிடைக்கும் ஒரு சில மணி நேரங்களைக் கூட ஊடகங்களின் மலினமான நிகழ்ச்சிகள் வலுக்கட்டாயமாய் பிடுங்கிக் கொள்வதால் குடும்பத்தினருடனான அன்னியோன்னியம் அகன்று கொண்டே வருகிறது.

இந்த வெற்றிடத்தை சிறிதளவேனும் நிரப்ப வேண்டும் எனும் ஆவலில் வார இறுதிகளிலோ, மாதம் ஒருமுறையோ ஏதேனும் ஒரு உணவகத்தில் சென்று உணவருந்தும் பழக்கம் இன்று நகர்ப்புற வாசிகளிடையே வெகுவாகப் பரவி வருகிறது.

வீடுகளில் பார்த்துப் பார்த்து சமைத்து, ஆரோக்கியமானதை மட்டுமே உண்டு வரும் பலரும் உணவகங்களுக்குச் சென்றால் ஒரு பிடி பிடித்து உபாதைகளை உபரியாகப் பெற்று வந்து விடுகின்றனர்.

உணவகங்களுக்குச் செல்லும் போது கீழ்க்கண்ட பத்து விஷயங்களையும் கவனத்தில் கொண்டால், உறவு பலப்படுவதுடன் ஆரோக்கியமும் சிதையாமல் காத்துக் கொள்ள முடியும்.

1. பரபரப்பான உணவகம் எனில் முன் கூட்டியே முன் பதிவு செய்து கொள்ளுங்கள். நேரம், நபர்களின் எண்ணிக்கையை தெளிவாய் சொல்லுங்கள். முன்பதிவு செய்யும்போதே ஏதேனும் கூப்பன் உள்ளதா போன்ற செய்திகளையும் கேட்டுத் தெரிந்து கொள்ளுங்கள். முன்பதிவு செய்துவிட்டால் தாமதம் ஏற்படுத்தாமல் குறித்த நேரத்தில் கண்டிப்பாக செல்லுங்கள். ஒருவேளை முன்பதிவு இல்லாமல் இருந்து காத்திருக்க வேண்டிய சூழல் ஏற்பட்டால் ஒரு மெனு அட்டையை வாங்கி என்ன உண்ணலாம் என்பதை முடிவு செய்து கொள்ளலாம்.
2. உணவுக்கு முன் சூப், ஸ்டார்டர் சாப்பிடும் போது அதிக அடர்த்தியான சூப் அருந்துவதைத் தவிர்க்க வேண்டும். அதிக அடர்த்தியான சூப் பொதுவாக அதிக கொழுப்பு உடையதாக இருக்கும். ஸ்டார்டர் உண்ணும் போது பொரித்த வகையறாக்களை விடுத்து அவித்த பொருட்களைத் தேர்வு செய்து உண்ண வேண்டும். உதாரணமாக நன்றாக பொரித்த கோழியை விட தந்தூரி வகையறாக்கள் நல்லது.
3. ஏதேனும் ஒரு சாலட் தருவியுங்கள். அதிக கிரீம்கள் பூசப்படாத, ஒரு சாலட் உண்பது பின்பு உண்ணப்போகும் உணவின் அளவை ஆரோக்கியமாகக் கட்டுப்படுத்தும்.
4. பெப்சி, கோக் போன்ற குளிர்பானங்களை அறவே தவிருங்கள். அவை உடலுக்கு எந்த விதத்திலும் நன்மை செய்வதில்லை. தண்ணீர் தவிர்த்து ஏதேனும் பானம் அருந்த வேண்டுமென்று விரும்பினால் எலுமிச்சை சாறு குடிக்கலாம், அல்லது ஒரு தேனீர் அருந்தலாம்.
5. உணவு குறித்தோ, அதன் தயாரிப்புப் பொருட்கள், தயாரிக்கும் விதம் குறித்தோ ஏதேனும் தெரியவேண்டுமெனில் தயங்காமல் கேளுங்கள். முழு திருப்தி தராத உணவுகளை உட்கொள்ளாதீர்கள். உங்களுக்கு ஏதேனும் உணவு ஒவ்வாமை உண்டெனில் அதற்குத் தக்க உணவுகளை கவனமாய் கேட்டுத் தெரிந்து கொள்ளுங்கள்.
6. அசைவப் பிரியர்கள் லிவர், சிறுநீரகம் போன்றவற்றை உண்பதை அளவுடன் நிறுத்திக் கொள்ளுங்கள். தோலில் அதிக கொழுப்பு இருக்கும் என்பதை கவனத்தில் கொள்ளுங்கள். வறுத்த ‘கொழுப்பு’   போன்றவற்றின் பக்கம் சாயவே சாயாதீர்கள். முட்டை உண்ணும்போது அவித்த முட்டையின் வெள்ளைக்கருவை மட்டும் உண்ண முடிந்தால் அற்புதம்!உங்களுக்குப் பிடித்தமான உணவு வகைகள் அதிகக் கொழுப்புள்ளவையாக இருந்தால் அதை முழுமையாய் தவிர்க்க வேண்டுமென்பதில்லை. உண்ணும் அளவையேனும் குறைத்துக் கொள்ளுங்கள்.
7. பீட்ஸா சாப்பிடக் கிளம்புகிறீர்கள் எனில் ‘மெல்லிய’ (thin-crust) பீட்சாவை தேர்ந்தெடுங்கள். கூடவே அசைவப் பீட்சாவையும், அதிக சீஸ் (பாலாடை) உள்ள பீட்சாவையும் தவிர்க்க வேண்டுமென்று முடிவெடுங்கள். வாங்கிய எல்லாவற்றையும் தின்று முடிக்கவேண்டிய கட்டாயம் இல்லை. போதும் எனுமளவுக்கு உண்ணுங்கள், மிச்சத்தை வீட்டுக்கு எடுத்துச் செல்லுங்கள்.
8. உண்டு முடித்தபின் ஐஸ்கிரீமை ஒரு கட்டு கட்டுவது எல்லாவற்றுக்கும் பிரச்சனையாய் முடியும். எனவே கடையில் உண்ண பழங்களையே தேர்ந்தெடுங்கள். ஐஸ்கிரீமை தவிர்க்கவே முடியாது என உங்கள் மனம் உங்களை நச்சரித்தால் பழங்களுடன் கலந்து சிறிதளவு உண்ணுங்கள்
9. உங்களுக்கு உணவு பரிமாறுபவர் மீது உங்கள் எரிச்சல்களைக் காட்டாதீர்கள். அன்புடன் பேசுங்கள். நன்றாக உங்களைக் கவனித்துக் கொள்பவர்களுக்கு தயங்காமல் நிறைய டிப்ஸ் கொடுங்கள். அமெரிக்கா போன்ற நாடுகளில் 15 முதல் 25 விழுக்காடு வரை டிப்ஸ் வைப்பது மேஜை நாகரீகமாகக் கருதப்படுகிறது.
10. அவசரப்பட்டு உண்ணாதீர்கள். கைப்பேசிகளை அணைத்து வையுங்கள். மெதுவாக, சுவாரஸ்யமாக பேசிக்கொண்டே உண்ணுங்கள். நன்றாக மெல்லவேண்டும் என்பதை நினைத்துக் கொண்டே உண்ணத் துவங்குங்கள். உணவு அருந்த அதிக நேரம் செலவிடுவது உங்கள் ஆரோக்கியம் பலப்படவும், உறவு பலப்படவும் பேருதவியாய் இருக்கும்.

அடிக்கடி அனைவரும் கூடி ஒன்றாய் நேரத்தைச் செலவிடும் நல்ல பழக்கத்தை வளர்த்துக் கொள்ளுங்கள். உலகில் உறவுகள் தரும் மன நிறைவையும் அர்த்தத்தையும் வேறேதும் தந்துவிடாது என்பதை மனதில் ஆழப் பதியுங்கள்

பெண்கள் மீதான வன்முறை

pen.jpg

இந்த மாத பெண்ணே நீ – இதழில் வெளியான எனது கட்டுரை…

பெண்களின் முன்னேற்றம் இன்று பல துறைகளில் வளர்ந்து வருகிறது என்பதை ஆனந்தத்துடன் ஒத்துக் கொள்ளும் நாம், பெண்களுக்கு எதிரான வன்முறைகள் தீரவில்லை என்பதை அவமானத்துடன் ஏற்றுக் கொள்ளத்தான் வேண்டும்.பெண்கள் மீதான சமூகத் தாக்குதல் முடிந்து போய் பெண்கள் இன்று பாதுகாப்பான சூழலில் இருக்கிறார்கள் என்று நம்பச் செய்வது கூட ஒரு வகையில் ஆணாதிக்கச் சிந்தனையின் தப்பித்தல் வார்த்தைகளே. லண்டன் ஸ்கூல் ஆஃப் எக்கனாமிக்ஸ் தன்னுடைய கட்டுரை ஒன்றில் பெண்கள் ஆண்கள் அளவுக்கு ஊதியம் வாங்க இன்னும் நூற்று ஐம்பது ஆண்டுகள் ஆகும் என்கிறது.

இன்று கலவரங்கள், போர், வன்முறை என எந்த பிரச்சனை நடந்தாலும் அங்கே பெண்களின் பாதுகாப்பு அச்சுறுத்தலுக்கு உள்ளாகிறது. பெண்களின் மீதான பாலியல் வன்முறைக் களமாக பல வன்முறைகள் இருக்கின்றன என்பதற்கு நமது நாட்டிலேயே பல உதாரணங்கள் குறிப்பிட முடியும்.

குறிப்பாக மத சம்பந்தமான வன்முறைகள் நிகழ்கையில் எதிர் மதத்தின் பெண்களைப் பலாத்காரப் படுத்தும் நிகழ்வுகள் நமது நாட்டில் ஏராளமாக நடக்கின்றன. இவை ஒரு வகையில் தாம் சார்ந்த மதத்திற்கும், கடவுளுக்கும் செய்யும் நற்செயல் என்றே மூளைச் சலவை செய்யப்படுகிறது. ஈராக் போரில் அமெரிக்கப் படையினரின் பாலியல் அத்துமீறல்கள் உலகறிந்தவை. இலங்கைப் பிரச்சனையிலும் பெண்கள் அதிகமாக பாலியல் வன்முறைக்கும், படுகொலைக்கும் ஆளாகின்றார்கள் என்பது கண்கூடு.

படிப்பறிவற்ற, அல்லது வறுமையில் உழலும் பெண்களை நோக்கியே பெரும்பாலான அச்சுறுத்தல்கள் நீள்கின்றன. வீட்டு வேலை செய்யும் சிறுமியர் மீதான மீறல்கள் தினசரி நாளிதழ்களின் சிந்துபாத் கதை போல தொடர்ந்து கொண்டே தான் இருக்கிறது.

கிராமங்களிலும், வறுமைக் கோட்டுக்குக் கீழே வாழும் மக்களிடமும் நிகழும் சமத்துவமற்ற பார்வை உயர் மட்டங்களிலும் நிலவுகிறது என்பது கல்வியும், வாழ்க்கைத் தரமும் மனிதனின் அடிப்படை இயல்பை பெருமளவில் மாற்றிவிடவில்லை என்றே கவலைச் செய்தி சொல்கின்றன.

சென்னையில் இயங்கிவரும் குடும்ப நல ஆலோசனை மையங்களில் வருகின்ற பெரும்பாலான பிரச்சனைகள் பெண்கள் ஆண்களின் அடக்குமுறைக்குள் நிற்கவில்லை என்னும் மையத்தையே கொண்டிருக்கின்றன என்கிறார் அலோசனை மையத்தைப் பல ஆண்டுகளாக நடத்தி வரும் ஒருவர்.

பெண்களுக்கு எதிரான வன்முறைகள் பெரும்பாலும் குடும்பம் என்னும் நான்கு சுவர்களுக்குள்ளே தான் நடக்கின்றன என்பது பல ஆய்வுகள் மூலம் நிரூபணமாகியிருக்கின்றன. இப்படிப்பட்ட வன்முறைகள் நடைமுறை வாழ்வின் யதார்த்தம் என்பது போன்ற தோற்றத்தை உருவாக்க முயல்கின்றனர் ஆணாதிக்க சிந்தனையினர். இந்த சிந்தனையை பெண்ணடிமை பழகிப் போன பெண்களும் கொண்டிருப்பது வேதனைக்குரியதாகும்.

கல்வியிலும், தொழில் துறையிலும், பொருளாதார சூழலிலும், வாழ்க்கைத் தரத்திலும் என எல்லா நிலைகளிலும் வளர்வதாகத் தம்பட்டம் அடித்துக் கொள்ளும் நாம் வாழும் இந்த நாட்டில் தான் வருடம் தோறும் சுமார் இருபதாயிரம் இளம் பெண்கள் எரித்துக் கொல்லப்படுகிறார்கள்.

பெண்கள் மீதான வன்முறைகளுக்கு தொன்னூற்று ஐந்து விழுக்காடு ஏதோ ஒரு குடும்ப உறவினரே காரணமாய் இருக்கிறார். பெண்கள் மீதான வன்முறைகளை நடத்துவதில் குடும்பம் முக்கிய பங்கு வகிக்கிறது என்பதை இந்த கருத்துக் கணிப்பு மீண்டும் ஒரு முறை நிரூபித்துக் காட்டுகிறது.

திருமணமாகி கணவனின் வீட்டிற்குள் வரும் பெண் எப்போது வேண்டுமானாலும், எந்த காரணத்திற்காக வேண்டுமானாலும், எந்த விதத்தில் வேண்டுமானாலும் வெளியேற்றப்படலாம் என்னும் அச்சம் காரணமாகவே இத்தகைய பெண்களுக்கு எதிரான வன்முறைகள் வெளிச்சத்துக்கு வராமல் குடும்பச் சுவர்களில் கண்ணீர் துளிகளாய் வழிகின்றன.

‘என் பொண்டாட்டியை அடிக்கக் கூடாதா’ எனும் ஆணாதிக்கக் குரலின் ஆணவமும், ‘உன் புருஷன் தானே அடிச்சான் வேற மனுஷன் இல்லையே ‘ என்னும் பெண்ணடிமை பழகிப்போன குரலும் இந்த சமூகத்தில் பெண்கள் சுயமாய் சிந்தித்து முடிவெடுத்து செயலாற்றும் தன்மையற்றவர்கள் என சித்தரிக்கிறது.அதனால் தான் தமிழக கிராமங்களில் அறுபது விழுக்காட்டிற்கும் அதிகமான பெண்கள் கொடுமைகளுக்கு ஆளாகிறார்கள்.

பிறக்கப் போகும் குழந்தை ஆணா பெண்ணா என்பதைச் சொல்லக் கூடாது எனும் சட்டம் இருந்தபோதிலும் வட இந்தியாவில் பல மருத்துவ மனைகளில் சில குறிப்பிட்ட செய்கைகளின் மூலம் இவர்கள் இதைத் தெரியப்படுத்துவதாக சில ஆண்டுகளுக்கு முன்பே பிரபல பத்திரிகைகள் அம்பலப் படுத்தியிருந்தன.

பிறக்கப் போவது ஆண்குழந்தை என்றால் ஒரு குறிப்பிட்ட நாளில் வந்து பார்க்கும் படி சொல்வதும், லட்டு கொண்டு வாருங்கள் என்று சொல்வதும் என அவர்கள் கொண்டிருந்த செயல்முறை இன்னும் முழுமையாக ஒழிந்தபாடில்லை. இதன் காரணமாகத் தான் இன்னும் நூறு ஆணுக்கு எழுபத்தைந்து பெண்கள் என்னும் விகிதத்தை குஜராத் போன்ற மாநிலங்கள் கொண்டிருக்கின்றன.

தேசிய குடும்பநல அமைப்பு ஒன்று நிகழ்த்திய ஆய்வில் ராஜஸ்தான் மாநிலத்தில் நாற்பத்து ஆறு விழுக்காடு பெண்கள் தங்கள் வாழ்க்கைத் துணைவரால் கொடுமைப்படுத்தப் படுவதாகவும், மத்தியப் பிரதேசத்தில் நாற்பத்தைந்து , திரிபுராவில் நாற்பத்து நான்கு, மணிப்பூரில் நாற்பத்து மூன்று, பீகார் மாநிலத்தில் நாற்பது, தமிழகத்தில் இது நாற்பத்து இரண்டு விழுக்காடு என்றும் அதிர்ச்சிச் செய்தி வெளியிட்டுள்ளது.

அலுவலகங்களிலும் பெண் அலுவலர்களுக்கு நேரிடும் பிரச்சனைகள் பெரும்பாலும் வெளிவராமலேயே போய்விடுகின்றன. மேலதிகாரிகளின் பார்வையும், பேச்சும் காயப்படுத்துவதால் தான் அலுவலகத்தில் பணிபுரியும் பெண்கள் ஆண்களை விட அதிக அளவில் மன அழுத்தம் அடைவதாக ( National Institute for Occupational Safety and Health ) NIOSH தெரிவிக்கிறது.

மன அழுத்த நோய்களுக்கு உள்ளாகும் ஆண்களை விட பெண்கள் இரண்டு மடங்கு அதிகம் என்பது இங்கே கவனிக்கத் தக்கது. இந்த மன அழுத்தம் அவர்களுக்கு பல விதமான நோய்களையும் கொடுக்கின்றன. குறிப்பாக பெண்களுக்கு வரும் மார்பகப் புற்றுநோய் போன்ற நோய்களுக்குக் கூட இவை காரணமாகி விடுகின்றன.

பெண்கள் மீதான வன்முறையும், பெண்களின் விருப்பங்களை நிராகரிக்கும் போக்கும் நமது பழைய கலாச்சாரங்களோடும், இலக்கியங்களோடும் இணைந்தே வளர்ந்திருக்கின்றன. எனவே இந்தக் கொடுமைகளின் வேர்களை வினாடி நேரத்தில் வெட்டி விடுதல் சாத்தியமில்லை.

மதங்களும் பெண்களைப் பார்க்கும் பார்வைக்கும், ஆண்களைப் பார்க்கும் பார்வைக்கும் இடையே மிகப்பெரிய வித்தியாசத்தைக் கொண்டிருக்கின்றன. இதற்குக் காரணம் இந்த மத நூல்கள் எல்லாம் ஆணாதிக்கச் சிந்தனை மட்டுமே அங்கீகரிக்கப் பட்ட சூழலில் எழுதப்பட்டவை என்பதைத் தவிர வேறெதுவாகவும் இருந்து விட முடியாது.

பெண்களின் உடலின் இயற்கைச் சுழற்சிகளையே சகித்துக் கொள்ள முடியாமல், கல்வியறிவில் முன்னேறிய பின்னும் இன்றும் சபரிமலைக்குச் செல்வதற்கும், மசூதிக்குச் செல்வதற்கும் பெண்கள் மறுக்கப்படுகின்ற சூழலே இருக்கிறது.

கடவுளுக்குக் கீழ்ப்படிவது போல கணவருக்கும் கீழ்ப்படியுங்கள் என்று கிறிஸ்தவமும், தன் முகத்தை ஆடவர் கண்டால் கூட பெண்கள் வெட்கப்பட வேண்டும் என புத்த மதமும், பெண்கள் நம்பத்தகாதவர்கள் என்று ரிக் வேதமும், பெண்கள் பாலியல் மோகத்தால் துரோகிகளாகிவிடுவார்கள் என்று மனுதர்மமும் கூறுவது அவை ஆணாதிக்கச் சூழலில் எழுதப்பட்டவை என்பதையே உணர்த்துகின்றன.

பெண்களுக்கு எதிரான கொடுமைகள் இந்தியாவில் மட்டுமன்றி உலகின் பல நாடுகளிலும் நடந்து வருகிறது. ஆஸ்திரேலியாவில் பெண்களுக்கு எதிரான வன்முறை அதிகம் நிகழ்வதாக ஆஸ்திரேலிய ஊடகங்கள் தெரிவிக்கின்றன. ஐநா சபை முதல் இந்தியாவின் நாடாளுமன்றம் வரை இன்னும் பாலின சமநிலை ஏற்படவில்லை என்பதே நிஜம்.

அமெரிக்காவில் தினமும் நான்கு பெண்கள் வன்முறைக்குப் பலியாகிறார்கள். சுமார் ஆறு இலட்சம் பெண்கள் தாங்கள் அலுவலகங்களில் தொந்தரவுக்கு ஆளாவதாக ஆண்டுதோறும் வழக்குப் பதிவு செய்கிறார்கள். இவர்களில் சுமார் இரண்டு இலட்சம் பேர் உடல்காயமும் படுவது குறிப்பிடத் தக்கது. ஆண்டுதோறும் ஒன்றரை இலட்சம் பேர் பாலியல் பலாத்காரம் செய்யப்படுகிறார்கள். இன்னும் பல இலட்சம் பேர் இத்தகைய நிகழ்வுக்குப் பலியானாலும் வெளியே சொல்லாமல் விட்டு விடுகிறார்கள்.

முழுமையான விழிப்புணர்வும், புரிதலும் பரிமளிக்கும் மனங்கள் அதிகரிக்கும் இடங்களில் பெண்களுக்கு எதிரான வன்முறைகள் இல்லாமல் போகின்றன. அத்தகைய சூழலை உருவாக்காமல் மனிதநேயம், உரிமை என்றெல்லாம் வாதிட்டுக் கொண்டிருப்பதில் அர்த்தமில்லை.

0

வெயில் : தவிப்பும், தவிர்ப்பும்

hot.jpg

(இந்தவார தமிழ் ஓசை நாளிதழின் இணைப்பான களஞ்சியம் இதழில் வெளியான எனது கட்டுரை)

மழையின் ஆட்சி முடிவுக்கு வந்து சூரியன் அரியணை ஏறியிருக்கும் தருணம் இது. தினசரி வாழ்வை வியர்வைகளுக்கும், வெப்பத்துக்குமிடையே நடத்திச் செல்லும் நாம் வெயிலைப் பற்றிய ஒரு வித எரிச்சலுடனேயே வெயில் காலத்தை ஆரம்பிக்கிறோம்.

மேலை நாடுகளில் வெயில் காலம் என்பது வரப்பிரசாதம் போல. பனிப் போர்வைக்குள் கிடக்கும் பூமியை வெயில் வந்து துடைத்துச் செல்லும் அற்புத நிகழ்வாக அவர்கள் அதைப் பார்க்கிறார்கள். வெயில் வந்து விட்டாலே உடலை முழுவதும் போர்த்தி நடக்கும் குளிர் ஆடைகளை உற்சாகமாய்க் கழற்றிவிட்டு நவீன ஆடைகளுக்குத் தாவி விடுகிறார்கள், கடற்கரை விளையாட்டுகள், கடல் குளியல், சுற்றுலாக்கள், விற்பனை வீதிகள் என களை கட்டி விடும்.

நம்மைப் பொறுத்த வரை வெயில் காலம் என்பது வெறுப்புடனே பார்க்கப்படுகிறது. காரணம் அதிகப்படியான வெப்பம். அதை சமன் செய்யுமளவுக்கு இல்லாமல் போன வசந்த, குளிர் காலங்கள். வெயில் காலம் அளவுக்கு அதிகமான வெப்பத்துடனேயே வருகிறது.

வெயில் நாட்களில் உடம்பின் வெப்பம் அதிகரிக்கும்போது அது அதிகப்படியான வெப்பத்தை தோலுக்கு அனுப்புகிறது, தோல் சுற்றுப் புறத்திலுள்ள குளிர்காற்றைக் கொண்டு வெப்பத்தைக் குறைக்கிறது. அல்லது வியர்வை மூலமாக வெப்பத்தை வெளியேற்றுகிறது. ஒரு துளி வியர்வை உடம்பிலுள்ள ஒரு லிட்டர் இரத்தத்தைக் குளிர்விக்கிறது என்பது வியப்பூட்டும் செய்தி.

ஆனால் வியர்க்காத வெயில் வீசும் பிரதேசங்களில் உடல் வெப்பத்தை வெளியேற்ற முடியாமல் உள்ளுக்குள்ளேயே தேங்கிவிடுகிறது. இது ஹீட் ஸ்ட்ரோக் எனப்படும் வெப்பத் தாக்குதலுக்கு உடலைத் தள்ளி உயிருக்கே ஆபத்தான நிலைக்கு மனிதனைக் கொண்டு செல்கிறது. வெளியே உள்ள காற்று வியர்வையையும், உடல் வெப்பத்தையும் உறுஞ்சும் தன்மையற்றிருப்பதே இதன் காரணமாகும்.

சிலருக்கு வியர்க்காத உடல் இயல்பிலேயே அமைந்திருக்கும், அல்லது பிற நோய்களின் தாக்கத்தால் வியர்க்காத தன்மையை உடல் பெற்றிருக்கும். அப்படிப்பட்டவர்கள் தினமும் சிறிது நேரம் குளிர் அறைக்குள் இருக்க முடிந்தால் மிகவும் பயனளிக்கும். குறிப்பாக சர்க்கரை நோய், இதய நோய், குறைந்த இரத்த அழுத்தம் உடையோர் போன்றவர்களின் உடல் வெப்பத்தினால் எளிதில் தாக்குதலுக்கு உள்ளாகும்.

சில மருந்து வகைகள் கூட உடலில் வியர்வைத் தன்மையைக் குறைக்கும் என்று மருத்துவர்கள் குறிப்பிடுகிறார்கள். தொடர் மருத்துவக் கண்காணிப்பில் இருப்பவர்கள் தங்கள் மருத்துவரைக் கலந்தாலோசித்து தங்கள் மருந்தின் தன்மையைக் கண்டுணர்தல் நல்லது. பார்கின்ஸன், உயர் இரத்த அழுத்தம், சில ஒவ்வாமை நோய்கள் போன்றவை அவற்றில் சில.

குறிப்பாக நகர்ப்புறங்களில் கிராமப் புறங்களை விட வெப்பம் மிகவும் அதிகமாக இருக்கும். நகர்ப்புறங்களில் வெப்பம் அதிகமாய் இருப்பதற்கு அங்குள்ள மக்கள் தொகையும், தொழிற்கூடங்களும், போக்குவரத்தும் சில முக்கிய காரணங்களாகும். குளிர்சாதனப் பெட்டி வெளிவிடும் வெப்பமும் நகர்ப்புற சுற்றுச் சூழலை வெப்பப்படுத்துவதாக ஆய்வுகள் தெரிவிக்கின்றன.

நகர்ப்புறங்களில் வெப்பத்தை எதிரொளிக்கும் தன்மையுடைய பொருட்கள் மிகவும் குறைவாகவே இருக்கின்றன. சாலைகள் போன்றவை வெப்பத்தைப் பெருமளவில் கிரகித்துக் கொள்ளும் தன்மை படைத்தவையாக இருப்பதனால் நகருக்கு வெளியே இருக்கும் வெப்பத்தை விட ஐந்து முதல் எட்டு ஃபாரன்கீட் வரை நகருக்குள் வெப்பம் அதிகமாக இருக்கிறது.

அதிகரிக்கும் வெப்பத்தினால் காற்று சூடாகி மேலே எழும்புகையில் அந்த வெற்றிடத்தை நிரப்ப பாயும் காற்று அனல்க் காற்றாகி இம்சிக்கின்றது. அட்லாண்டா போன்ற இடங்களில் இடியுடன் கூடிய மழைக்கு இத்தகைய வெப்பக் காற்றே காரணமாகி விடுகிறது.

நகர்ப்புறங்களில் வெப்பம் அதிகமாக இருப்பதற்கு நாம் கணிப்பது போலவே மரங்களின் குறைவும் ஒரு முக்கியமான காரணம். வெப்பத்தை உள்ளிழுத்து அதை ஆவியாகாமல் தடுக்கும் மரங்களும், நிலப்பரப்பும் குறைவாக இருப்பது வெப்ப அதிகரிப்புக்குக் காரணமாய் இருக்கிறது.

நகர்ப்புறங்களில் வெப்பத்தைக் குறைப்பதற்காக மரம் நடுவதைப் போல, வெப்பத்தை கிரகித்துக் கொள்ளாமல் எதிரொளிக்கும் பொருட்களைக் கொண்டு வீட்டுக் கூரைகள் அமைப்பதை மேல் நாட்டின் வெப்பமான நகரங்களில் பரிந்துரை செய்திருக்கிறார்கள். இதன் மூலம் நகரின் வெப்பம் குறையும் என்பது அவர்களின் கணிப்பு.

வெப்ப காலங்களில் ஃபுட் பாய்சனிங் எனப்படும் உணவு உட்கொள்வதனால் வரும் நோய்கள் மிகவும் அதிகரித்து விடுகின்றன. அதற்கு ஒரு காரணம் பாக்டீரியாக்கள் வெப்ப காலத்தில் வேகமாக வளர்வது. அதுவும் ஈரத்தன்மையுள்ள, வெப்ப நாட்கள் பாக்டீரியாவை மிகவும் வேகமாகப் பரப்புகின்றன. இதனால் உணவுப் பொருட்களில் தொற்றிக் கொள்ளும் பாக்டீரியாக்கள் வெப்பத்தால் சட்டென்று பல மடங்கு பரவி நமது உணவைக் கெடுத்து, அதை உண்ணும் நம்மையும் படுக்க வைத்து விடுகிறது.

பழைய உணவையும், புதிய உணவையும் சேர்த்து வைப்பதும் பாக்டீரியாப் பரவலுக்கு காரணமாகிவிடக் கூடும். சமையலுக்கு முன் சமையலுக்குப் பயன்படுத்தும் பாத்திரங்கள், கத்திகள், அனைத்தையும் மிகவும் சுத்தமாய் வைத்திருத்தல் அவசியம். மாமிச உணவுகளை உண்ணும் போது முழுமையாக சமைக்கப்பட்டிருக்கிறதா என்பதைக் கவனித்து உண்ண வேண்டும். சரியாக வேக வைக்கப்படாத உணவுப் பொருட்கள் பிரச்சனை தரும்.

வெயில் காலங்களில் ஏற்படும் நோய்களுக்கு இன்னொரு காரணம் இந்த காலங்களில் நமக்குத் தேவையான தண்ணீர் கிடைக்காமல் போவது. இதனால் சோர்வு, தலைவலி, எரிச்சல், மன உளைச்சல் போன்ற பல பிரச்சனைகள் நம்மை பிடிக்கின்றன.

வெப்பத்தின் தாக்கம் அதிகமாய் இருக்கும்போது தவிர்க்க முடியாமல் வாங்கிக் குடிக்கும் சுகாதாரமற்ற சாலையோர பானக் கடைகள் நோயையும் சேர்த்தே விற்கின்றன. அவசரமாக நமது உடலின் வெப்பத்தையும், சோர்வையும் நிறுத்துகையில் நிதானமாய் நோயை உள்ளே அனுமதிக்கிறோம் என்பதைக் கவனத்தில் கொள்ள வேண்டும்.

வேனிற்காலத்தில் கைகளை மிகவும் சுத்தமாக வைத்திருக்க வேண்டும். கைகளைக் கழுவாமல் எதையும் உண்ணக் கூடாது. எப்போதெல்லாம் முடியுமோ அப்போதெல்லாம் கைகளைச் சுத்தமான நீரில் கழுவிக் கொள்ள வேண்டும். வெளியே சுத்தமான தண்ணீர் கிடைக்காது என நினைத்தால் முன்னமே தண்ணீரை எடுத்துச் செல்வது அவசியம்.

உணவுகளை உண்ணும்போதும் சரியான வெப்ப நிலையிலேயே உண்பதும் நோயைத் தவிர்க்க உதவும். பதப்படுத்தப்படாத உணவுகளை வெகுநேரம் கழித்து உண்பதைத் தவிர்த்தல் பலனளிக்கும். மருத்துவ அறிக்கைகளின் படி வெயில்காலங்களில் மிச்சமாகும் உணவு இரண்டு மணி நேரம் குளிர்சாதனப் பெட்டிக்கு வெளியே இருந்தாலே அது கெட்டு விடும். எனவே பழைய உணவுகளை உண்கையில் கவனம் தேவை.

கொசுக்களால் பரவும் நோய்களும் வெயில் காலங்களில் சகஜம் எனவே அதற்குரிய பாதுகாப்புடன் இருத்தல் அவசியம்.

போலியோ நோய் வெயில்காலத்தில் பரவும் ஒரு கொடிய நோயாக இருந்தது. 1940 களிலெல்லாம் வெயில்காலங்கள் போலியோவின் பயத்துடனே கழிந்தன. தற்போது அரசுகள் முன்னின்று நடத்தும் போலியோ விழிப்புணர்வினால் அந்த ஆபத்து நீங்கிவிட்டது என்றே சொல்லலாம்.

வெயில்காலத்தில் வெளியில் அதிக நேரம் உலவும் போது நமது உடலின் வெப்பம் அதிகரிக்கிறது. உடல் வெப்பம் குறிப்பிட்ட அளவை விட அதிகரிக்கும்போது உடலின் குளிர்விக்கும் தன்மை வேலை நிறுத்தம் செய்து விடுகிறது. இப்போது நமது உடலுக்கு அவசரத் தேவை தண்ணீர், நிழல். அதை செய்யத் தவறும்போது அது மிகப் பெரிய நோய்களில் கொண்டு போய் நிறுத்தும் அபாயம் உண்டு.

சர்க்கரை நோய், இதய சம்பந்தமான நோய்கள், உயர் இரத்த அழுத்தம், சிறுநீரகக் கோளாறுகள் போன்ற பல நோய்கள் அதிக வெயிலில் அலைபவர்களுக்கு ஏற்படும் என மருத்துவர்கள் எச்சரிக்கிறார்கள்.

வெயிலில் அதிக நேரம் அலைவதும், நேரடியாக சூரிய ஒளியில் நிற்பதும் பல கண்நோய்களுக்கும் காரணமாகி விடுகிறது. அமெரிக்காவில் ஆண்டுதோறும் இருபத்தைந்து இலட்சம் பேர் கண் நோயினால் பாதிக்கப்படுகிறார்கள். இந்த நோய் பெரும்பாலும் வெயில் காலத்தில் வருவது குறிப்பிடத் தக்கது. புற ஊதாக்கதிர்கள் கண்களைப் பாதித்து கண்ணுக்குள் நோயின் வேர்களைப் பதித்துவிட்டால் அது நீண்ட நாட்களுக்கு வெளியே தெரியாமல் இருந்து பிற்காலங்களில் பார்வையையே பறித்து விடும் என எச்சரிக்கிறார் நியூஆர்லாண்ட் கண் மருத்துவ நிபுணர் டாக்டர். மோனிகா.

கண்கள் சிகப்பாகி அரிக்கத் துவங்குவதும் வெயில் கால கண் நோய்களில் ஒன்று. பத்து முதல் பதினைந்து சதவீதம் வரையிலான மக்களுக்கு ஏதேனும் ஒரு நோய் வெயில் காலத்தில் வந்துவிடுவதாக ஆய்வுகள் தெரிவிக்கின்றன. கண் ஒவ்வாமை நோய் உள்ளவர்கள் வெயிலில் அலைவதையும், புழுதியில் விளையாடுவதையும் தவிர்க்க வேண்டும். கண்களைக் குளிர்ச்சியாக வைத்திருக்க வேண்டும். வெள்ளெரிக்காயை சிறு சிறு மெல்லிய வட்ட வடிவமாக வெட்டி கண்களில் வைத்து கண்களைக் குளிரச் செய்வது நமக்குப் பழக்கமான வைத்தியம். வெளிநாடுகளில் ஐஸ்கட்டிகளை கண்களில் வைத்து கண்களைப் புத்துணர்ச்சியாக்குகிறார்கள்.
சீனாவில் வெயில் காலத்தில் இதய நோய்களாலும், வெப்ப நோய்களாலும் ஏராளமானோர் இறந்து விடுவதாகச் சொல்கிறது ஒரு கணக்கெடுப்பு.

அமெரிக்காவில் சில ஆண்டுகளுக்கு முன் நிகழ்த்தப்பட்ட ஒரு ஆய்வில் குழந்தைகளைக் காரில் உட்கார வைத்துவிட்டு பெற்றோர் வெளியே செல்வதால் சுமார் ஐம்பது குழந்தைகள் வெப்ப நோய் தாக்கி இறந்திருக்கிறார்கள் என தெரிய வந்தது. எனவே வெப்ப காலத்தில் நல்ல காற்றோட்டமான இடங்களில் இருப்பது மிகவும் அவசியம் என்பது வலியுறுத்தப் பட்டது. கொஞ்சம் நேரம் தானே என்று அசிரத்தையாய் செய்யும் செயல்கள் மிகப் பெரிய விளைவை ஏற்படுத்திவிடக் கூடும்.

வெயில் காலங்களில் அணியும் உடைகள் வெப்பத்தைக் கிரகித்துக் கொள்ளக் கூடியதாக இல்லாமல் இருப்பதே சிறந்தது. ஆடைகள் உடலை இறுக்கிப் பிடிக்காமல் அணிவதும் மிகவும் அவசியம். மெலிதான வண்ணங்களில் ஆடைகள் அணிவதும் நல்லது.

சிலருக்கு வெயில் காலத்தில் சில ஒவ்வாமை நோய்கள் வருவதுண்டு. அப்படிப்பட்டவர்கள் அதற்குரிய முன்னேற்பாடு நடவடிக்கைகளைச் செய்து கொள்வது அவசியம்.

வெயில் காலங்களில் புழுதியின் அகோரத் தாண்டவத்தைக் காணலாம், இத்தகைய சூழலில் இருக்கும் ஆஸ்த்மா போன்ற நோயாளிகள் மிகவும் கவனத்துடன் இருத்தல் அவசியம். பெரும்பாலும் புழுதி நிறைந்த இடங்களுக்கு தேவையில்லாமல் செல்வதைத் தவிர்த்தல் நலம் பயக்கும்.

காலணி பயன்படுத்தும் போது காட்டன் சாக்ஸ் பயன்படுத்துவது காலில் தேவையற்ற வியர்வை தேங்கி வரும் நோய்களுக்கும், அலர்ஜிகளுக்கும் நம்மை விலக்கிப் பாதுகாக்கும்.

பிரான்ஸ், ஜெர்மனி, இத்தாலி, ஸ்பெயின், பெல்ஜியம் போன்ற மேலை நாடுகளிலும் சில ஆண்டுகளுக்கு முன் வீசிய வெப்ப அலையினால் பலர் உயிரிழந்திருக்கிறார்கள் என்கிறது உலக நலவாழ்வு நிறுவன அறிக்கை.

வெப்பநோய் தாக்கி யாரேனும் பாதிக்கப்பட்டு மயக்க நிலையில் இருப்பதைக் கண்டால் அவர்களை உடனே நல்ல காற்றோட்டமான இடத்தில் படுக்க வைத்து, தண்ணீரையோ, ஈர துணியையோ கொண்டு முகம், கை கால்களை ஈரப்படுத்த வேண்டும்.

நினைவில் கொள்ளவேண்டிய முக்கியமான விஷயம், எல்லா பானங்களும் உடலின் வெப்பத்தைத் தணிக்காது. எனவே நல்ல சுத்தமான தண்ணீரை அருந்துதலே மிகவும் உயர்வானது. குறிப்பாக குழந்தைகள், மற்றும் வயதானவர்களுக்குப் போதுமான தண்ணீர் கிடைக்கிறதா என்பதை மற்றவர்கள் கவனிக்க வேண்டும்.

இந்திய ஆயுர்வேதிக் அறிவுரைகளைப் பார்த்தால் தினமும் இரண்டு முறை குளிப்பது, காலையில் நேரமே எழும்பி வேலைகளை ஆரம்பிப்பது மதியம் சற்று நேரம் தூங்கி ஓய்வெடுப்பது, இரவு உணவுக்குப் பின் ஒரு மணி நேரத்தில் தூங்கச் செல்வது, அதிக நேரம் கண் விழித்திருப்பதைத் தவிர்ப்பது என நீள்கிறது பட்டியல். ஆயுர்வேதம் இன்றைய அவசர உலகில் திணிக்கப்பட்டுள்ள மேல் நாட்டுப் பானங்களை ஒதுக்குகிறது. இளநீர், நன்னாரி சர்பத், மோர், தண்ணீர், எலுமிச்சை பானம், பார்லி தண்ணீர் போன்றவற்றையே பரிந்துரைக்கிறது. இவை உடலுக்கு நன்மை பயக்கும் என்பது பெரும்பாலானோரின் கருத்து என்பதை மறுப்பதற்கில்லை.

வெயில்காலங்களில் அடிக்கடி உடலுக்கு ஓய்வு கொடுப்பது அவசியம். அதிலும் வெயிலில் அலையும் வேலை செய்பவர்கள் இதை கண்டிப்பாகக் கடைபிடித்தல் வேண்டும். அடிக்கடி நிழலான இடங்களில் சற்று அமர்ந்து தண்ணீர் குடித்துவிட்டு வேலையைத் தொடர்வது நல்லது.

வெயிலினால் அதிகம் பாதிக்கப்படும் தோல் உங்களுக்கு என்று அறிந்தால் அதற்குரிய பூச்சுகளை நீங்கள் பயன்படுத்துவது பாதிப்பைக் குறைக்கும்.

தொப்பியோ, நல்ல குளிர் கண்ணாடியோ அணிவது வெப்பத்திலிருந்து தற்காலிகத் தப்பித்தலைத் தரும்.

குறிப்பாக வெயில் காலங்களில் அதிகம் காய்கறிகளையும், பழங்களையும், பானங்களையும் உணவாகக் கொள்ளவேண்டும். அதிக கொழுப்புள்ள உணவுகளையும், இனிப்பு வகைகளையும் வெயில் காலங்களில் தவிர்க்க வேண்டும். வெயில் காலங்களில் மது அருந்துபவர்கள் அதை நிறுத்துவதும் மிக  முக்கியம். காரணம் மது உடலிலுள்ள ஈரப்பதத்தை குறைத்து ஆபத்தான சூழலை உருவாக்கி விடும். போதைப் பொருட்களையும் அறவே நிறுத்த வேண்டும்.
இரண்டு வயதுக்கும் குறைவான குழந்தைகளை மிகவும் கவனமாகப் பாதுகாக்க வேண்டும். அவர்களுடைய உடல் வெகு வேகமாக வெப்பமடைந்து விடும். எனவே வெப்பமான பகுதிகளில் குழந்தைகளை அழைத்துச் செல்வதையோ, தனியே விளையாட விடுவதையோ தவிர்க்க வேண்டும்.

உடற்பயிற்சி செய்பவர்கள், குறிப்பாக வயதானவர்கள்,  அதிகாலையிலோ அல்லது சூடு குறைந்த இரவிலோ உடற்பயிற்சி செய்ய வேண்டுமென அறிவுறுத்துகின்றனர் மருத்துவர்கள்.

வெயிலில் உலவும் போது சிறிது சிறிதாக உலவுங்கள். கொஞ்சம் கொஞ்சமாக வெயிலுக்கு உடலைப் பழக்குவது வியர்வை போன்றவை சரியான அளவில் வெளியேற்றவும், வெப்பத் தாக்குதலிலிருந்து தப்புவதற்கும் உதவும். ஒரே நாளில் உடலை சட்டென்று வெயிலுக்கு விற்று விடாதீர்கள்.

வெயிலில் அலையும் போது தாகம் எடுக்கட்டும் தண்ணீர் குடிக்கலாம் என்று நினைக்காமல், அடிக்கடி தண்ணீரைக் குடித்துக் கொண்டே இருக்க வேண்டும். ஒரு மணி நேரத்திற்கு ஒரு லிட்டர் தண்ணீரைக் குடிக்கலாம். தண்ணீர் குடிக்கும் போது அதிக குளிரான தண்ணீரைக் குடிக்காமல் சாதாரண குளிர் நிலையிலுள்ள தண்ணீரைக் குடிப்பதே நல்லது.

கடினமான உடையை அணியவே அணியாதீர்கள். நல்ல கதராடையை அணிவது வெப்பத்திலிருந்து நம்மைப் பாதுகாக்கும்.

வெயில்க் காலங்களில் ஒரு நாளைக்கு என்னென்ன செய்யப் போகிறோம் என்பதை முன்கூட்டியே திட்டமிட்டு அதன்படி நடப்பது வெயிலில் தேவையின்றி அலைவதைக் குறைக்கும். காலையில் செய்ய முடிகின்ற வேலைகளை வெயிலுக்கு முன்பே செய்யவும் இந்த திட்டமிடல் உதவும்.

வெயில் காலம் என்பது தவிர்க்க முடியாதது. ஆனால் வெயிலினால் வரும் நோய்கள் நிச்சயம் தடுக்கக் கூடியவையே. வெயில் காலத்தில் கவனிக்க வேண்டிய சிறு சிறு விஷயங்களைக் கவனித்து நடந்தால், வெயில் காலம் என்பது அச்சுறுத்தலாக இல்லாமல் அமைதியாகக் கடந்து செல்லும்.


 

வயிற்றுக்கு என்ன இட வேண்டும் ?

fruit.jpg

( தமிழ் ஓசை நாளிதழ் களஞ்சியம் இணைப்பிதழில் வெளியான எனது கட்டுரை )


இன்றைய அவசர உலகில் மனிதன் அறிவைத் தேடுவதற்கு நேரத்தையும், கவனத்தையும், பணத்தையும் செலவிட்டுக் கொண்டிருக்கிறான். ஆனால் மிகவும் முக்கியமானத் தேவையான ஆரோக்கியமான உடலைப் பேணும் அக்கறை பெரும்பாலானவர்களிடம் இல்லை. ஆரோக்கியமான உணவு, அளவான உடற்பயிற்சி போன்றவை மனிதனின் உடலை மட்டுமல்ல மனதையும் ஆரோக்கியமாக வைத்திருக்க உதவுகின்றன.

இன்று குழந்தைகள் உடல் எடை அதிகரிப்பது ஒரு சர்வதேசப் பிரச்சனை ஆகிவிட்டது. இங்கிலாந்தில் எட்டு வயது சிறுவன் ஒருவன் தொன்னூறு கிலோ எடையுடன் இருந்த செய்தி இங்கிலாந்து ஆரோக்கிய இதழ்களில் அதிர்ச்சியாய் அலசப்பட்டது.

இந்தியாவிலும் குழந்தைகள் தாறுமாறாக எடை அதிகரிப்பது சமீப காலமாக அதிகரித்து வருவதாகவும், பெரியவர்களைத் தாக்கும் நீரிழிவு போன்ற நோய்கள் இன்று  சிறு வயதினரையும் தாக்குவதாகவும் மருத்துவ ஆராய்ச்சிகள் தெரிவிக்கின்றன.

இன்றைக்கு இந்தியாவின் பரவியிருக்கும் மேல் நாட்டு உணவுப் பழக்கவழக்கங்களும், இன்றைய வாழ்க்கை முறையுமே இதன் முக்கிய காரணமாக இருக்கின்றன.

ஓடு விளையாடு பாப்பா என்பதெல்லாம் பாட நூலில் படித்ததுடன் சரி என்னும் நிலமை தான் இன்றைய நகர்ப்புறக் குழந்தைகளுக்கு. சதுர அடிகளில் தீப்பெட்டி போன்ற அறைகளில் வாழும் இவர்கள் பெரும்பாலும் கணினி விளையாட்டையோ, தொலைக்காட்சி நிகழ்ச்சியையோ தான் பொழுதுபோக்காகக் கொண்டிருக்கிறார்கள். உடலுழைப்பைத் தரும் பொழுதுபோக்குகள் பெருமளவு குறைந்து விட்டன.

கிராமங்களிலெல்லாம் ‘கல்லைத் தின்றால் கூட கரையும் வயது’ என்று இளைஞர்களைச் சொல்வார்கள். ஏனெனில் அந்த வயதினர் உண்ணும் எந்தப் பொருளாக இருந்தாலும் அது அவர்களுடைய கடின உழைப்பினால் கரைந்து உடலோடு கலந்து விடுகிறது. வயலிலும், காடு மேடுகளிலும் உழைப்பவர்கள் சராசரியாக ஒரு நாள் பத்து கிலோ மீட்டர் தொலைவாவது நடந்து விடுகிறார்கள். நடத்தல் என்பது வாழ்வின் அங்கமாகி விட்டது அங்கே.

இன்றைய நகர்ப்புற வாழ்க்கை அப்படியல்ல. இப்போது இலகுவான உணவு உட்கொண்டால் கூட அது கரையாமல் உடலில் கொழுப்புச் சத்தாகத் தேங்கிவிடும் அபாயம் உண்டு. காரணம் உடல் உழைப்பு இல்லை. வீட்டிலிருந்து வெளியே இறங்கியவுடன் வாகனம், அலுவலகம் விட்டதும் வீட்டுக்கு வாகனம். வீட்டுக்குள்ளே கட்டிப் போட தொலைக்காட்சி, கணினி. மொத்தத்தில் இருக்கைச் சிலைகள் போல இருக்கும் வாழ்க்கை.

கிராமப் புறங்களைப் பொறுத்தவரை அவர்களுக்கு வாழ்க்கையே உடற்பயிற்சியாகி விடுகிறது. எனவே அவர்கள் தனியாக உடற்பயிற்சி செய்யத்தேவை இல்லை என்றாகிறது. நகர்ப் புறங்களைப் பொறுத்தவரையில் உடற்பயிற்சியை ஒரு பணியாக எடுத்துச் செய்ய வேண்டி இருக்கிறது.

ஆரோக்கியமான உடல் உயரத்துக்கும் எடைக்கும் இடையே ஒரு சூத்திரத்தைக் கொண்டு இயங்குகிறது. உடல்பருமன் சுட்டு எண் என்று இதை அழைக்கிறார்கள். உங்கள் எடையை உங்கள் செண்டீ மீட்டர் உயரத்துடன் இரண்டு முறை வகுத்து பத்தாயிரத்துடன் பெருக்கும்போது கிடைக்கும் எண்ணே உடல் பருமன் சுட்டு எண்.  ( உடலின் எடை)  / ( உயரம் செமீ x உயரம் செமீ ) x 10000.

இந்த விதியின் படி 18.5 க்கும் 25க்கும் இடைப்பட்ட சுட்டு எண் உங்களுக்கு வருகிறது என்றால் நீங்கள் அதிக எடை கொண்டவர் அல்ல. நல்ல ஆரோக்கியமான உடல் அமைப்பைக் கொண்டவர் என்று பொருள். அதற்கு மேல் எனில் உடல் எடை அதிகம் என்று அறிந்து கொள்ள வேண்டும். இந்த அளவு 35 ஐ விட அதிகரித்தால் ஆரோக்கியக் குறைவுக்கான வாய்ப்புகள் மிக அதிகம் எனவும், இந்த எடை மிக மிக அதிகமானது என்பதையும் உணர வேண்டும். அதை சாதாரண நிலைக்குக் கொண்டு வர முயலவேண்டும்.

பீட்சா, சிப்ஸ், கோக், பெப்ஸி, சாக்லேட், பதப்படுத்தப்பட்ட உணவுகள் போன்ற வகையறாக்களை உண்ணும் போது நமது உடலில் அதிகப்படியான கலோரிகள் தேங்குகின்றன. இவற்றை உண்டு விட்டு அதிக உடலுழைப்பைச் செலுத்தாத போது இந்த கலோரிகள் கொழுப்பாக மாறி உடலில் சேர்ந்து விடுகின்றன. இப்படிச் சேரும் கொழுப்பே ஆரோக்கியத்துக்கு எமனாக மாறிவிடுகிறது.

தேவையான சத்துகள் நிறைந்த உணவுப் பொருட்களை, தேவையான நேரத்தில், தேவையான அளவுக்கு உண்பதே சிறந்த உணவுப் பழக்கம் எனலாம்.

நாம் ஆரோக்கியமான உணவைத் தேர்ந்தெடுப்பதற்கு முக்கியமான காரணியாக ஏதேனும் பரம்பரை நோய்கள் இருக்கின்றனவா என்பதை அறிந்து கொள்வது அவசியம். சர்க்கரை நோய் போன்ற பரம்பரை நோய்கள் இருக்கும் குடும்பத்தினர் சற்று எச்சரிக்கையுடன் அத்தகைய உணவுப் பொருட்களைத் தவிர்க்க வேண்டும்.

இந்தியர்களின் உணவுப் பழக்கம் பெரும்பாலும் தானியங்களைச் சார்ந்தே உள்ளது. அரிசி, கோதுமை, கேழ்வரகு, சோளம் போன்ற தானியங்களில் புரதச் சத்து அதிக அளவில் கிடைக்கிறது. கால்சியம், இரும்பு போன்ற சத்துக்களும் இதில் கிடைக்கின்றன.

தானியங்களைப் போலவே புரதச் சத்துக்கு பருப்பு வகைகளும் துணை செய்கின்றன. கடலை, துவரை, உளுத்தம், பாசி , பட்டாணி, துவரம் பருப்பு போன்ற பலவகைப் பருப்புகள் புரதச் சத்துக்குப் பயன்படுகின்றன.

முந்திரி, பாதாம், தேங்காய் , நிலக்கடலை, பிஸ்தா, தேங்காய் போன்றவற்றில் கொழுப்பு சத்து அதிகம் எனவே குறைத அளவு பயன்படுத்துவது பயன் தரும்.

கொழுப்பு சத்து வெண்ணெய், நெய், வனஸ்பதி, தாவர எண்ணை போன்றவற்றில் கிடைக்கிறது. கொழுப்பு உடலில் சேர்வது பலவகையான இன்னல்களை உருவாக்கும். எனவே நாம் உண்ணும் உணவில் கொழுப்பு சத்து ஐந்து முதல் பத்து சதத்துக்குள் இருக்குமாறு பார்த்துக் கொள்ள வேண்டும்.

பழங்களில் உயிர்ச்சத்துகள் அதிக அளவில் உள்ளன. கொய்யா, நெல்லிக்காய், திராட்சை போன்றவை வைட்டமின் சி தன்மையை அதிகம் கொண்டுள்ளன. வாழைப்பழங்களில் கார்போ கைட்டிரேட் அதிகம். உலர்ந்த பழங்களில் இரும்புச் சத்து அதிகம். ஆப்பிள் பழம் நார்ச்சத்து மிகுந்தது. ஆப்பிள் எளிதில் செரிமானமாகி விடும் உணவாகவும் இருப்பதால் உடலுக்கு நல்ல சத்து கிடைக்கிறது.

நுரையீரலை வலுப்படுத்தவும், பசியைத் தூண்டவும், இரத்தம் தூய்மையாக்கல், பித்தத் தன்மை மாற்றுதல் போன்ற பல தன்மைகளை நெல்லிக்காய் கொண்டுள்ளது.

கீரை வகைகளே ஆரோக்கிய உணவு என்றதும் நம் கண்களுக்கு முன்னால் வரும். கீரையில் வைட்டமின் சி, இரும்பு, கால்சியம் போன்ற பல சத்துகள் உள்ளன. கீரையை உணவில் சேர்த்துக் கொள்வது மிகவும் பலனளிக்கும்

கிழங்குகள் முக்கியமாக கார்போஹைடிரேட் அதிக அளவில் கொண்டிருக்கின்றன. மரவள்ளிக்கிழங்கில் கால்சியம், உருளைக்கிழங்கில் வைட்டமின் சி, காரட்டில் கரோட்டீன் என பல சத்துகள் இவற்றில் அடங்கியுள்ளன. காய்கறிகளையும் அதிக அளவில் பயன்படுத்துதல் பயனளிக்கும் என்பது நாம் அனைவரும் அறிந்ததே.

பாலில் புரதச் சத்து அதிகம். கொழுப்புச் சத்து குறைவு. மீன்களில் ஏராளமான புரதம், கால்சியம் போன்ற சத்துகள் உள்ளன. இவை இறைச்சியைப் போல கொழுப்புச் சத்து அதிகம் இல்லாததால் பெருமளவு விரும்பப்படுகிறது. இறைச்சி புரதச் சத்து மிகவும் அதிக அளவில் உண்டு.

அவ்வப்போது உண்ணா நோன்பு இருப்பது நம்முடைய உடலின் ஆரோக்கியத்துக்கு உதவுகிறது என்று இன்றைய மருத்துவம் சொல்வதை பல ஆயிரம் ஆண்டுகளுக்கு முன்பே கண்டு சொன்ன பெருமை நமது இந்தியப் பாரம்பரியத்துக்கு உண்டு.

சமீபத்தில் நிகழ்த்தப்பட்ட ஆராய்ச்சிகள் உயிர்ச்சத்து ( வைட்டமின் ) மாத்திரைகள் உட்கொள்வது உடலுக்குக் கேடு என்றும், அதற்குப் பதிலாக அந்த சத்து உள்ள இயற்கை உணவுகளையே உட்கொள்ள வேண்டும் என்று அறிவுறுத்தியிருக்கிறது.

வைட்டமின் எ நமது திசு வளர்ச்சி, பல் அமைப்பு ஒழுங்கு, கண்பார்வை போன்றவற்றுக்குத் தேவையானது. இந்த சத்து குறையும் போது மாலைக் கண்நோய் தாக்கலாம், தோல் தனது மிருதுவான தன்மை இழத்தலும் வைட்டமின் எ குறைபாடின் விளைவுகளே. ரெடினால், கரோடெனாய்ட் எனும் இரண்டு சத்துக்களில் வைட்டமின் எ இருக்கிறது. இது காய்கறிகள், பப்பாளி, பூசணிக்காய், ஆடு, மாடு, நெய், முட்டை போன்றவற்றில் இது கிடைக்கிறது.

வைட்டமின் டி – யைப் பொறுத்தவரை எலும்பை வலுவாக்கும் கால்சியம் இதில் இருக்கிறது. மீன் எண்ணை, முட்டையின் மஞ்சள் கரு, பால் வெண்ணெய், நெய் ஆகியவற்றில் வைட்டமின் டி அதிக அளவில் உள்ளது. வைட்டமின் இ – திசுக்களின் நிலைத்தன்மைக்குப் பயன்படுகிறது. இது காட்டை வகைகளில் அதிகமாக கிடைக்கிறது.

வைட்டமின் சி, ஒரு இன்றியமையாத சக்தி. மூட்டு வீக்கம், ஈறுகள் பலமின்மை, உடல் பலவீனம், எரிச்சல், நோய் எதிர்ப்புச் சக்தி குறைதல், ரத்த சோகை போன்ற பல நோய்களுக்கு இந்த சத்து குறைபாடு காரணமாகி விடுகிறது. எலுமிச்சை, ஆரஞ்ச், நெல்லிக்காய், முட்டைகோஸ் போன்றவற்றில் இந்த சத்து உண்டு. சமைக்காமல் உண்ணும்போது இந்த சத்து நமக்கு முழுமையாகக் கிடைக்கிறது.

பப்பளிப்பழம் போலிக் அமிலம், இரும்புச் சத்து, காப்பர், பொட்டாசியம் என பல சத்துகளை உள்ளடக்கியது. மலிவாய்க் கிடைக்கிறது என்பதற்காகவே உதாசீனப்படுத்தப் படும் பப்பாளிப் பழம் தென்னமெரிக்கா போன்ற நாடுகளில் ஆரோக்கியப் பழம் என்று அழைக்கப்படுகிறது.

எவ்வளவு முடியுமோ அந்த அளவுக்கு சமைக்காத உணவுகளையும் உண்ண வேண்டும். காய்கறிகளை வெட்டி சாலட் செய்வது, பழங்கள் உண்பது போன்றவற்றினால் சத்து முழுமையாக மனிதனுக்குக் கிடைப்பதுடன் உடலும் சுறுசுறுப்படைகிறது. நிறைய தண்ணீர் குடிப்பதும் தேவையற்ற கொழுப்பைக் கரைக்க உதவும்.

சில நூறு ஆண்டுகளுக்கு முன்பு வாழ்ந்த மனிதனை விட இன்றைய மனிதன் இயற்கையை விட்டு விலகிச் சென்றிருப்பதே பல நோய்கள் நெருங்கி வந்திருப்பதன் காரணம் என்பதைப் பல ஆராய்ச்சியாளர்கள் ஒத்துக் கொள்கிறார்கள்.

ஒரு நாளைக்கு எத்தனை கலோரி சத்து தேவை என்பதைக் கணக்கிடவும் ஒரு சூத்திரம் இருக்கிறது. அதாவது நமது உடல் எடையை பத்தால் பெருக்கி, அதனுடன் நமது உடல் எடையை இரண்டு முறை கூட்டி வரும் தொகை நமக்குத் தேவையான கலோரியின் அளவு

அதாவது 70 கிலோ எடையுள்ள ஒரு மனிதருக்கு ( 70 *10 = 700, 700+ 70+70 = 840) 840 கலோரிகள் தேவை. ஒரு சிறு பாட்டில் கோக் குடிக்கும்போது உடலில் சேரும் கலோரியின் எடை சுமார் 100 என்பது கவனிக்கத் தக்கது.

பெண்களுக்குத் தேவையான கலோரி இதிலிருந்து சற்று வேறுபடும். (உடல் எடை x 10) + உடல் எடை. அதாவது எழுபது கிலோ எடையுள்ள ஒரு பெண்ணுக்கு 770 கலோரிகள் தேவைப்படுகின்றன. நல்ல உடல் உழைப்பைச் செலுத்தும் நபர்கள் அதிக அளவில் கலோரிகளை உட்கொள்ளலாம்.

ஒரு கைப்பிடி அளவு வறுத்த கடலையை சும்மா உண்ணும்போது நீங்கள் உடலில் சுமார் இருநூறு கலோரிகளைச் சேர்க்கிறீர்கள் என்பதை நினைவில் கொள்ளுங்கள். பயணத்தின் போதோ, தொலைக்காட்சி பார்க்கும் போதோ கொறிப்பதனால் ஏற்படும் தீமைகளைக் குறித்த விழிப்புணர்வு அவசியம்.

இந்த கலோரி அளவைப் பார்த்து உண்பது பலவேளைகளில் நமக்கு முடியாமல் போகலாம். பொதுவாகப் பார்க்கும்போது, தானிய வகைகள் அதிகமாகவும், காய்கறிகள் பழங்கள் அதைவிட சற்றுக் குறைவாகவும், எண்ணை , இறைச்சி போன்ற கொழுப்புச் சத்துகள் மிக மிகக் குறைவாகவும் பயன்படுத்தும் போதும், அதிக அளவில் சாப்பிடாத போதும் நமக்குத் தேவையான கலோரிகளை மட்டுமே நாம் பெறுகிறோம்.

ஆரோக்கியமான வாழ்வுக்கு உங்களை நீங்களே கேட்க வேண்டிய கேள்விகள் இவைதான். என்ன உண்ணவேண்டும், எப்போது உண்ண வேண்டும், எங்கே உண்ண வேண்டும், எவ்வளவு உண்ண வேண்டும். நம்முடைய வாழ்வில் கலந்து விட்ட நோய்களுக்கு மருத்துவரைத் தேடி ஓட வேண்டிய தேவையை விட்டு விட்டு நம்முடைய அன்றாட வாழ்வின் உணவுப் பழக்கத்தை சற்றே சீர்தூக்கிப் பார்ப்பதன் மூலமாக மிகப் பெரிய நோய்களைத் தவிர்க்க முடியுமெனில் அதைவிடச் சிறந்த வழி ஏது.


 

வேடந்தாங்கல் போயிருந்தேன்.

அபூர்வமான பல பறவையினங்கள் வரும் என்றும், ஒருமுறையேனும் சென்று பார்க்கவேண்டும் என்றும் மனசுக்குள் பலமுறை முடிவெடுத்து முடியாமல் போயி, கடைசியில் போய் வந்தேன் வேடந்தாங்கலுக்கு.

img_2939-small.jpg

சுமார் தொன்னூறு கிலோ மீட்டர் தொலைவில் உள்ளது வேடந்தாங்கல். சுமார் எழுபத்தைந்து ஏக்கர் நிலப்பரப்பில் ஒரு இலட்சத்திற்கும் மேற்பட்ட பறவைகள் வந்து போகும் சரணாலயம் !

img_2964-small.jpg

சென்னையிலிருந்து உள்ளே நுழைந்ததும் மனதை கொள்ளை கொண்ட விஷயம் அருமையான காற்று, சில்லென்ற சூழல். மாலை நேரத்தில் பொழுதைக் கழிக்க பொருத்தமான இடம். அரசும் பார்வையாளர்கள் அமர்ந்து செல்ல நல்ல இருக்கைகளையும், சிறப்பான நிழல் பிரதேசங்களையும் உருவாக்கியிருப்பது மெலிதான வியப்பு. இத்தனைக்கும் நுழைவுக் கட்டணம் பெரியவர்களுக்கு 5, சிறியவர்களுக்கு 2 தான்.

ஆஸ்திரேலியா, பாகிஸ்தான், பர்மா, இலங்கை, வங்காளதேசம் உட்பட பல நாடுகளிலிருந்தும் பறவைகள் வருகின்றன. Herons, Pelicans, Spoonbills, open-billed Storks, Swans, White Ibis, Darters போன்ற அபூர்வமான பறவைகள் எல்லாம் வருமாம். நான் பறவை ஆராய்ச்சியாளன் இல்லை என்பதால் எனக்கு அதெல்லாம் தெரியவில்லை.

img_2929-small.jpg

அழகான ஒரு மாலைப் பொழுதை மனைவியுடனும், மகளுடனும் செலவிட்ட திருப்தி அலாதியானது. அதுவும் மகளின் சிரிப்புக்கும், சிலிர்ப்புக்குமிடையே வேடந்தாங்கல் பறவைகளை நலம் விசாரித்த நிகழ்ச்சி பிரமிப்பு.

img_2941-small.jpg

கணிப்பொறிச் சாளரங்கள் வழியே உலகை ரசிக்கும் வாழ்க்கைக்கு இடையே இயற்கையின் கூடாரத்துக்குள்ளேயே சென்று இயற்கையின் வாசகங்களையும், கவிதைகளையும் விழிபெயர்த்து மனதில் வரைந்து கொண்டது நல்ல ஒரு அனுபவம். பறவைகளோடு பறவைகளாக பறந்து திரிந்து இலேசாகிப் போனது மனசு.

img_2827-small.jpg

பிரமாதமா இருக்கு. இங்கே அடிக்கடி வரவேண்டும் என்று வழக்கம் போல சொல்லிக்கொண்டோ ம். வாழ்நாளில் இப்படி எத்தனையோ இடங்களை மீண்டும் சந்திக்க வேண்டும் என்று சொல்லி பின் சந்திக்காமலேயே இருந்து விடுதல் நம் எல்லோருக்கும் பரிச்சயமானது தானே !