ஈரம் தொலைத்த இதயம்

Image result for guy sad
பிரிவதற்குப் பிரியப்பட்ட
என் பிரியமானவனே.

வருவாயா என்று
திசைகள் மொத்தத்தையும்
வாசலாய் திறந்து
விழிவிதைத்துக் காத்திருக்கிறேன்

புரியவில்லை எனக்கு.

முல்லை இதழ்களின்
வெள்ளை சிதைய
ஏன்
முள்ளைச் சொருகினாய் ?

இதயம் என்னும்
என்னும் இலவங்காய்
உடையும் வரை விசிறிவிட்டு
உடைந்தபின்
ஏன் விதறிச் சென்றாய் ..

கானல் மட்டுமே
காட்சிக்குள் விழும்
பாலை மணல் வெளியாய்
இந்தப் பாவி மனம்.

துளித் துளியாய்
நேசம் வார்த்து
மொத்தமாய் நீ
உடைத்துச் சென்றதால்
கீறல்களில் உப்பைக் காய்ச்சியதாய்
வெம்மை விரிக்கிறது உயிர்.

உனது விரல்கள் பிடித்து
நடந்தபோது
தொடர்ந்த என் சுவடுகள்
இப்போது
கள்வனைக்கண்ட புள்ளிமானாய்
பதறி நிற்கிறது.

உன் பாதம் பார்த்துக் காத்திருக்கும்
என் பார்வைதேசத்தின் எல்லையில்
கண்­ர்க் குமிழிகள் உடைவதால்
மங்கலாய்க்
கன்னங்களில் கசியுது காதல்.

உனது எண்ணக் குவளைகளில்
குவளையாய் மலர்ந்த நான்
உன் பிரிவால்
ஓணான்கள் ஒளிந்துகொள்ளும்
கள்ளியாய்
உள்ளப்பரப்பில் முள்ளை விளைவிக்கிறேன்..

உன் மேல் விளைந்த காதலில்
மரத்துப் போகத் தெரிந்த மனசுக்கு
நீ விதைத்த காதலை
மறந்து போக மனமில்லாமல்
இறந்துகொண்டிருக்கிறது
உலையில் வீசப்பட்ட ஒற்றை ஆமையாய்.

வெட்கக் குளியலில் வீழ்ந்த துளிகள்

வெட்கத்துடன் பார்க்கும்
குளியலறைக் கண்ணாடியை
களைந்த ஆடையால்
மூடுகிறாள்.

தாமரை
தண்ணீரில் மூழ்குவதாய்
பாத்டப்பில் பாதம் அமிழ்த்தி
பாதரச சிலையாய்
சிலிர்க்கிறாள்.

பிரம்ம ரகசியம் தழுவிய
ஷவர் தண்ணீர்
வெட்கத்துடன் ஓடி மறைகிறது.

சுவர்கள்
வியர்த்து துளித்துளியாய்
வழிகின்றன.

அவ்வப்போது
மூர்ச்சையாகும் சோப்
விரல்களை விட்டு அடிக்கடி
மயங்கி விழுகிறது.

உடைய மறுத்து
உற்றுப் பார்க்கின்றன
குமிழிகள்.

அவள் ரகசியமாய் பாடும்
பாடல்
அறைகளெங்கும் எதிரொலித்து
அவள்
ஈரக் கூந்தலின்
ஓரமாய் வந்தமர்கிறது.

குளித்து முடித்து
தலை துவட்டுகையில்
காது மடல்களில் முத்தமிடுகிறது
மெல்லிய டவல்.

பிரமிப்பு மாளிகையை
மீண்டும்
ஆடைக்குள் அடக்கி
அலட்சியமாய் கதவு கடக்கிறாள்.

ஊரடங்க அமைதி போல
அமைதியாய் கிடக்கிறது
அதிர்ச்சியில்
உறைந்த அறை.

தன்
கடைசிக் கண்ணீர் துளிகளைச்
சொட்டிக் கொண்டிருக்கிறது
ஷவர்.

இணையக் காதல்

internet.jpg

இணையம்,

அட்சக் கோடுகளையும்
தீர்க்கக் கோடுகளையும்
இறுக்கமாய்க் கட்டிவிட்டு,
பூமிப் பந்தை
ஒற்றைப் புள்ளியில்
உட்கார வைத்திருக்கிறது இணையம்.

மடியாத ஆடைகளுக்காய்
மல்லிட்டு,
கண்ணாடியின் கண்களுக்கு முன்
இமைக்காமல் நின்று,
பிம்பங்களோடு
பிடிவாதம் பிடித்து
யாரும் இப்போது காதலிப்பதில்லை.

விரல் தொட்டுக் கசங்கிப் போய்
உதட்டுப் பதிவு
ஒப்பந்த முத்தங்ககளின் மேல்
கையெழுத்திட்டனுப்பும்
காதல் கடிதங்கள்
இப்போதெல்லாம் காணக் கிடைப்பதில்லை.

கடிதத்தைப்,
பட்டு விரல் தொட்ட வினாடியில்
நெற்றியோரம்
வியர்வை அரும்பியதா?
விழிகளோரம் வெட்கம் விளைந்ததா ?
என்பதை
நேரில் தரிசிக்கும் வரமும் வருவதில்லை.

இப்போதெல்லாம்
காதல்
பூங்காக்களில் பூப்பதில்லை.
நிம்மதி கொள்கின்றன பட்டாம் பூச்சிகள்,
பூங்காக்களில் பூக்கள் தான்
பூக்கின்றனவாம்.

கடற்கரையில் கால் படுவதை விட
கணிணிப் பலகையில்
விரல் தொடுவதையே
விரும்புகிறது கல்லூரி வட்டம்.

இணையம் ஊமையாகும்
நாட்களில்
ஐந்து தலை
படபடப்புப் பாம்பொன்று
காதலரை தீண்டித் தொலைக்கும்.

அவசர தொலைபேசி
அழைப்புகளோ
இணையத்தின் இணைப்புகளால்
இருட்டறைக்குள் எறியப்படும்.

காதலியின் கண் கண்டு
கால் நகர்த்தா வார்த்தைகள்
கணிணி கண்டால் தான்
கையசைக்கின்றன.

பட்டென்று பதிலிறுத்தால்
பல்லிடுக்கில் வார்த்தைகள்
படுகாயம் படக்கூடும்.
இணையமோ
பட்டென்றுச் சொல்லென்று
பதட்டத்தைத் தருவதில்லை.

உரசலின் வெப்பத்தை விட
நம்பிக்கையின் சத்தம் தானே
காதலுக்குத் தேவை.

மடிமீது தலைசாய்த்து
மகரந்தங்கள் மயங்காமல்,
விசைப்பலகையில் விரல் இருத்தி
காதலை நிலை நிறுத்தல்
சாத்தியமிங்கே.

இணையம்
வரம்புகளை மீறாமல்
நரம்புகளை மீட்டும் தளமல்லவா.
எல்லை மீறும் முறுக்கு மடல்களை
நில்லென்று நிறுத்துதலும்
சாத்தியமல்லவா.

மின்மடலில் இதயங்கள்
இடம் மாறும்,
மின் அரட்டையில்
மனம் கொஞ்சம் மெருகேறும்.

காதலரே,
இணையாக் காதலையும்
இணையம் இணைக்கும்.

முதல் பார்வையில் தான்
காதல் வருமா,
இனிமேல்
முதல் மடலில் வருமென்று
முழங்கிச் சொல்லுங்களேன்.

முகிலினங்கள் அலைகிறதே
மின்னஞ்சல் மறந்ததுவோ
என
புதிதாய்ப் பாடுங்களேன்.

இணையத்தில் இணைப்புப் பிழை
என
காதல் பொய்யை
நவீனப் படுத்துங்களேன்.

கிறுக்கல் கையெழுத்தென்று
காதல் இங்கே
மறுக்கப் படுவதில்லை
மகிழுங்களேன்.

இணையம் என்பது
இமயம் தான்
ஆனாலும்
காதலரே கவனியுங்கள்,

அருகிலேயே
அழகியொருத்தியை இருத்திக் கொண்டு
நீதான் என் உலகம் என்று
உங்களுக்கு யாரேனும்
வலையில்
வலை விரிக்கக் கூடும்.

கணிப்பொறி வித்தையில்
புகைப்படம் புதுப்பித்து,
நடிகனின் நடையிலே
முடவனும் உங்கள் முன்வரக் கூடும்.

உனக்கனுப்பிய
காதல் கடிதத்தின்
கண் காணாப் பிரதி,
தபால்த் தலைச் செலவின்றி
பல கன்னியரின்
கணிணிச் ஜன்னல்களைக்
காதலுடன் தட்டியிருக்கக் கூடும்.

மாடலிங் தான் தொழிலென்று
மாடசாமியும், தன்
முன் வழுக்கையைத் தடவிக் கொண்டும்
மூச்சு விடாமல்
இருமிக் கொண்டும்,
யாஹூவுக்குள் வசிக்கக் கூடும்.

அவரசக் காதலர்க்கு
ஓர்
அவசிய எச்சரிக்கை.

தெருப் பெயர் மாறினாலும்
தபால்க் காரன் சமாளிப்பான்,
ஓர்
சிறு புள்ளி மாறினாலே
இணையக் காரன் புறக்கணிப்பான்.
நினைவில் கொள்ளுங்கள்.

வாழ்வுக்குத் தேவை இணை.
அதைத் தரும்
இணையத்துக்கு இல்லை இணை !

( சந்தவசந்தம் இணையக் குழுவில் எழுதிய கவியரங்கக் கவிதை. தலைப்பு : இணையத்துக்கு இல்லை இணை. )