வை ஜாக்கிங், புதிய அச்சுறுத்தல்

Image result for wi-jackingவைஃபை இல்லாத வாழ்க்கையை இப்போது நினைத்துப் பார்க்க முடிவதில்லை. “எங்கெங்கு காணினும் வைஃபையடா” எனுமளவுக்கு விமான நிலையங்கள், ரயில்வே நிலையங்கள்,ஹோட்டல்கள், உணவு விடுதிகள் என எல்லா இடங்களிலும் வைஃபை வசதிகள் இருக்கின்றன. 

பொது இடங்களில் இருக்கும் வைஃபைகள் பாதுகாப்பானவை அல்ல என்பது நாம் அறிந்ததே. அதனால் தான் பொது இடங்களிலுள்ள வைஃபையைப் பயன்படுத்த வேண்டாம் என்று எச்சரிக்கைகள் நமக்கு தொடர்ந்து விடுக்கப்படுகின்றன. அப்படியே பயன்படுத்தினாலும், அதைக்கொண்டு முக்கியமான வங்கிப் பரிவர்த்தனைகள் போன்றவற்றை நடத்தக் கூடாது. 

பொது இடங்களிலுள்ள வைஃபையை எக்காரணம் கொண்டும் ‘ஆட்டோ கனெக்ட்’ மோடில் சேமிக்கக் கூடாது. அது போல பொது இட வைஃபைக்களைப் பயன்படுத்திய பின் நமது பிரவுசர்களில் இருக்கின்ற குக்கிகளையும், ஹிஸ்டரியையும் முழுதாக அழித்து விடவேண்டும். 

பொது இடங்களில் இருக்கின்ற வைஃபைகளைப் பயன்படுத்துவது ஆபத்தானது எனும் புரிதல் இப்போது பெரும்பாலானவர்களுக்கு உண்டு. எனவே அதற்குரிய முன்னெச்சரிக்கை நடவடிக்கைகளை அவர்கள் எடுத்து விடுகின்றனர். 

ஆனால் வீட்டில் வந்து வைஃபையை இணைக்கும் போது, ‘ஆஹா இது நமக்கே நமக்கான வைஃபை. இதில் எவனும் நுழைய முடியாது’ எனும் இறுமாப்புடன் வேலையைத் தொடங்குவோம். 

வீட்டில் நாம் நுழையும் முன் நம்முடைய போன்கள் ஆட்டோமெடிக்காக நம்முடைய வைஃபையுடன் இணைந்து விடுகின்றன‌. லேப்டாப், டேப்லெட் என எல்லாமே எப்போதும் வைஃபையுடன் இணைந்து தான் இருக்கின்றன. 

‘இதுவும் பாதுகாப்பு இல்லையப்பா’ என நம்முடைய நம்முடைய நம்பிக்கையின் உச்சந்தலையில் சுத்தியல் கொண்டு அடித்துச் சொல்கிற விஷயம் தான் இந்த வை ஜாக்கிங். அதாவது நாம் பாஸ்வேர்ட் கொடுத்து பாதுகாப்பாய் வைத்திருக்கின்ற நமது வைஃபை கூட மிக எளிதான தாக்குதலுக்கு உள்ளாகலாம் என்பதே வை ஜாக்கிங் சொல்கிற செய்தி. 

நமது வீட்டுக்குப் பக்கத்தில் இருக்கின்ற நபர்கள் நினைத்தால் நமது வீட்டிலுள்ள வைஃபைக்குள் நுழைய முடியும். நமது வீட்டு வைஃபையை அவர்கள் விருப்பம் போல  பயன்படுத்த முடியும் என்பது தான் ஆரம்ப அதிர்ச்சி. 

“எனக்கு தான் ஆயிரம் ஜிபி லிமிட் இருக்கே, அடுத்த வீட்டுக்காரர் கொஞ்சம் எடுத்துட்டு போகட்டும்” என சும்மா இருந்து விட முடியாது.  வீட்டுக்குள் நுழையும் திருடன் கொஞ்ச நேரம் ஓய்வெடுத்து விட்டு போவதில்லை. கையில் கிடைப்பதையெல்லாம் சுருட்டி எடுத்துக் கொண்டு தான் போவான். அதே போல, நமது நெட்வர்க்குக்குள் ஒருவர் நுழைந்து விட்டால் நமது கணினி, மொபைல் என எந்த கருவியில் இருக்கின்ற எந்தத் தகவல்களையும் திருடி விடுகின்ற வாய்ப்பு உண்டு.

இப்போதெல்லாம் நம்முடைய  பரம ரகசிய விஷயங்கள் கூட மொபைலிலோ, கணினியிலோ தான் ஓய்வெடுக்கும். நமது நெட்வர்க்கிற்குள் நுழைகின்ற நபரிடம் நமது வங்கிக் கணக்கின் விவரங்கள், பாஸ்வேர்ட் போன்றவை கிடைத்தால் நமது வங்கியை துடைத்து சுத்தம் செய்து விடுவார்கள். அதே போல தனிப்பட்ட விஷயங்களைத் திருடிக் கொண்டால் அதன் மூலம் நமக்கு தேவையற்ற மன உளைச்சலோ, பெரும் நஷ்டமோ  உருவாக்கலாம். 

இது எப்படி நடக்கிறது ? நாம் வீடுகளில் பயன்படுத்துகின்ற பிரவுசர்களில் ‘பாஸ்வேர்ட்’ ஆட்டோ சேவ் ஆக இருக்கும். நமது மொபைலில் ஜிமெயில், யூடூப் போன்ற பல தளங்களில் நமது பயனர் ஆட்டோமெடிக்காக கணெக்ட் ஆகிவிடுவதைக் கவனித்திருப்பீர்கள். 

இந்த பயனர் எண், பாஸ்வேர்ட் இவையெல்லாம் பிரவுசரில் இருக்கும். இதற்கும் நமது  வீடுகளில் இருக்கும் மோடத்துக்கும் இடையேயான தகவல் பரிமாற்றம் அன்.என்கிரிப்டர் ஹைச்.டி.டி.பி அதாவது ‘குறியீடுகளாய் மாற்றப்படாத நேரடியான தகவல் பரிமாற்றமாய்’ இருக்கும்.  

நமது மோடத்திற்கு நமது மொபைலையோ கணினியையோ இணைக்கும் ‘இன்டர்நெட் பாஸ்வேர்ட்’ தகவல்கள் கூட இப்படித் தான் இருக்கும். இந்த பிரவுசர் ‘ஆட்டோசேவ்’  மற்றும் ‘அன்.என்கிரிப்டட்’ தகவல் பரிமாற்றம் இரண்டும் சேர்ந்து தான் நமது வைஃபை இணைப்பை வலுவிழக்க வைக்கின்றன. 

இதைப் பயன்படுத்தி வெளியிலிருக்கும் ஒருவர் நமது கணினியில் ஒரு பிரவுசரை லோட் செய்வார்கள். அது நமது இணைய பாஸ்வேர்ட் தகவல்களை பிறருக்கு அனுப்பி வைக்கும். மிக எளிய வகையில் இந்த ஹேக்கிங் நடக்கும். மிகப்பெரிய பாதிப்பை உருவாக்கும்.  

ஸ்யூயர் கிளவுட் நிறுவனத்தின் ஆராய்ச்சியாளரான எலியட் தாம்சன் என்பவர் இந்த அச்சுறுத்தலை முதன் முதலாய் கண்டுபிடித்துச் சொன்னது கடந்த மார்ச் மாதம். பல மாதங்களுக்குப் பிறகு இப்போது அந்த வைஜாக்கிங்கின் வீரியம் நிறுவனங்களுக்கும், மக்களுக்கும் புரிய ஆரம்பித்திருக்கிறது. 

சில நிறுவனங்கள் தங்களுடைய பிரவுசர்களிலுள்ள ஆட்டோ சேவ் ஆப்ஷனை விலக்க முடிவு செய்திருக்கின்றன.

இந்த வைஜாக்கிங் நடக்க வேண்டுமெனில் சில விஷயங்கள் நடந்திருக்க வேண்டும். அவற்றை அறிந்து கொள்வது நாம் பாதுகாப்பாக இருக்க உதவும். 

முதலில் நமது வைஃபை ஆன் நிலையில் இருக்கும் போது தான் இந்த தாக்குதல் நடக்கும். இரண்டாவது, நாம் முன்பு எப்போதாவது வேறு ஒரு பொது வைஃபையில் இணைந்திருக்க வேண்டும். அது ஆட்டோ ரிகனக்ட் ஆஃப்ஷனில் இருக்க வேண்டும். மூன்றாவது குரோம், ஓப்பேரா போன்ற பிரவுசர்களைப் பயன்படுத்தியிருக்க வேண்டும். நான்காவது, நமது போனில் வைஃபை தானாக இணையும் விதத்தில் இருக்க வேண்டும். 

இவை எல்லாமே சர்வ சாதாரணமாய் இருக்கக் கூடிய விஷயங்கள். எனவே தான் இந்த அச்சுறுத்தல் பற்றிய விழிப்புணர்வு நமக்கு அவசியமாகிறது. 

சரி, இதிலிருந்து தப்பிப்பது எப்படி ?

1. இன்காக்னிடோ மோட் தெரியுமா ? பிரவுசரில் உள்ள ஒரு ஆப்ஷன் இது. இதில் நுழைந்தால் நமது பாஸ்வேர்ட் போன்ற தகவல்கள் சேமிக்கப்படாது. அதைப் பயன்படுத்துவது பாதுகாப்பானது. இதை பிரைவட் பிரவுசிங் என்றும் சொல்வார்கள்.

2. பழைய வெர்ஷன் பிரவுசர்களையெல்லாம் மாற்றி புதியவற்றை இன்ஸ்டால் செய்யுங்கள். 

3. உங்களுடைய எல்லா பிரவுசர்களிலுமிருந்தும் ஹிஸ்டரி, குக்கீஸ் போன்றவற்றை அழியுங்கள்.

4. நெட்வர்க் ஆட்டோகனெக்ட் ஆஃஷனை அழித்து விடுங்கள். 

5. பொது இட வைஃபைகளைத் தவிருங்கள். 

6. பர்சனல் ஃபயர் வால் எனப்படும் பாதுகாப்பு வளையத்தை உங்களுடைய வீட்டு நெட்வர்க்கிலும் இணையுங்கள். 

7. வைஃபை மோடத்தை சுவர் அருகிலோ, சன்னல் அருகிலோ வைக்காமல் வீட்டிற்கு உள்ளே வையுங்கள். வெளியிட இணைப்பு அச்சுறுத்தலை அது கொஞ்சம் குறைக்கும். 

8. ரொம்ப பாதுகாப்பு அவசியமெனில் விபிஎன் பயன்படுத்தலாம். நெட்வர்க்கை அது அதிக பாதுகாப்பு உடையதாக்கும்.

9. உங்கள் வைஃபை ரவுட்டரை பரிசோதியுங்கள். செக்யூர்ட், என்கிரிப்டட் நிலையில் அது இல்லையேல் மாற்றுங்கள்.

10. இவ்வளவையும் செய்தபின் உங்களுடைய நெட்வர்க் பாஸ்வேர்டை உடனடியாக மாற்றுங்கள். ஏற்கனவே உங்கள் வைஃபையை யாரேனும் கவர்ந்திருந்தால் பாஸ்வேர்ட் மாற்றுவது ஒன்றே வழி. 

*

thanthi

Advertisements

ஐபோன் வரலாறு !

Image result for iPhone history

வரலாற்றில் பல விஷயங்கள் நம்மை வியக்க வைக்கும். சில விஷயங்கள் தான் வரலாற்றையே வியக்க வைக்கும். அப்படி தொழில்நுட்ப வரலாற்றை வியக்க வைத்த ஒரு விஷயம் தான் ஐபோன் ! மொபைப் புரட்சியை மிக எளிதாக ஐபோனுக்கு முன், ஐபோனுக்குப் பின் என இரண்டாகப் பிரித்து விடலாம். இன்றைய ஸ்மார்ட் போன்களில் காணப்படும் அம்சங்கள் எல்லாம் ஏதோ ஒரு வகையில் ஐபோனின் பாதிப்பு என்பதை மறுக்க முடியாது.

“இதோ ஐபோன்” என ஸ்டீவ் ஜாப்ஸ் 2007ம் ஆண்டு அறிவித்த போது அந்த போன் இப்படி ஒரு டிஜிடல் சுனாமியை உருவாக்கும் என யாரும் எதிர்பார்த்திருக்க முடியாது. 3.5 இன்ச் திரையுடன், ‘இது தொடக்கம் தான்’ எனும் பஞ்ச் லைனுடன் அது அறிமுகமானது. இன்றைக்கு சுமார் 130 கோடிக்கு மேல் ஐபோன்களை விற்று உலகிலேயே மொபைல் நிறுவன சக்கரவர்த்தியாய் அமர்ந்திருக்கிறது ஆப்பிள் நிறுவனம். ஆப்பிள் நிறுவனத்தை தூக்கி நிறுத்திய விஷயம் ஐபோன் என்பதில் எள் முனையளவும் சந்தேகம் வேண்டாம். இன்றைய தேதியில், நிறுவனத்தின் வருமானத்தில் பாதிக்கு  மேல் ஐபோன் விற்பனையினால் தான் கிடைக்கிறது.

2007ம் ஆண்டு ஜனவரி 9ம் தியதி ஆப்பிள் ஐபோன் குறித்த அறிவிப்பு வெளியிடப்பட்டது. அது குறித்த தகவல்கள் மக்களை தூங்க விடாமல் செய்தன. ஜூன் 29ம் தியதி ஐபோன் கடைகளுக்கு வந்தபோது மக்கள் சினிமா டிக்கெட்டுக்கு காத்திருப்பது போல காத்திருந்து வாங்கினார்கள். அந்த வார இறுதியில் மட்டும் விற்ற ஐபோன்களின் எண்ணிக்கை இரண்டு இலட்சத்து எழுபதாயிரம் ! சில மாதங்களிலேயே அது பத்து இலட்சமாக எகிறியது. 

அடுத்த ஆண்டு 3ஜி அறிமுகமானது ! ஐபோனின் வளர்ச்சியை அடுத்த கட்டத்துக்கு அது சட்டென கொண்டு சென்றது. காரணம் ‘ஆப் ஸ்டோர்’ அப்போது தான் அறிமுகப்படுத்தப்பட்டது. உலகெங்கும் உள்ள பல இலட்சம்  கணினி ஆப் டெவலப்பர்களுக்கு புத்துணர்ச்சி கொடுத்த நிகழ்வு அது. அது தான் மொபைலாக இருந்த ஐபோனை ஒரு குட்டி கணினியாக மாற்றியது.  

அதன் பின் ஆண்டு தோறும் ஐபோன் ஒரு புதிய வடிவத்தை வெளியிடுவதும், மக்கள் கால்கடுக்கக் காத்திருந்து  வாங்குவதும் வாடிக்கையாகி விட்டது. 

ஆரம்பம் முதலே கேமராவில் பார்வையை செலுத்தி வருகின்ற ஐபோன் வெர்ஷன் 4 வந்த போது செல்ஃபி கேமராவையும், எச்.டி வீடியோ ரிக்கார்டிங்கையும் அறிமுகப்படுத்தியது. உலகெங்கும் செல்ஃபி ஜூரம் பற்றிக்கொள்ள பிள்ளையார் சுழி போட்ட நிகழ்வு அது. கேமராவின் தரத்தைப் பொறுத்தவரை ஐபோன் தான் இப்போதும் முதலிடத்தில் இருக்கிறது. ஐடியூன்ஸ், சிரி, பெரிய திரை, 3டி டச் என புதுமைகளை புகுத்துவதிலும் ஐபோன் தான் முதலிடத்தில் இருக்கிறது ! 

ஐபோன் வெளியாகிய முதல் ஐந்தாறு வருடங்களுக்கு ஆப்பிளுக்கு போட்டியே இல்லை. அதன் பின்பு தான் சந்தையில் குறைந்த விலையில் ஐபோனுக்குப் போட்டியாய் போன்கள் களமிறங்கின. இருந்தாலும் இன்றும் ஐபோனின் வசீகரத்தைக் குறைக்க முடியவில்லை. 

கடந்த ஆண்டு பத்தாவது ஆண்டு விழாவைக் கொண்டாடியை ஆப்பிள், மூன்று ஐபோன்களை வெளியிட்டது ஐபோன் 8, 8 எஸ் மற்றும் ஐபோன் 10. அதில் ஐபோன் 10 முற்றிலும் புதிய வடிவத்தில், புதிய அம்சங்களுடன் அறிமுகமானது. ஐபோன் வரலாற்றின் அடுத்த மிகப்பெரிய மாறுதல் இது என கருதப்படுகிறது. இதன் விலை ஏறக்குறைய ஒரு இலட்சம் என்ற போதிலும், இதுவரை சுமார் மூன்று கோடி ஐபோன் 10 கள்  விற்பனையாகியிருக்கின்றன ! 

விலை அதிகமானாலும் பரவாயில்லை என உலகம் போட்டி போட்டுக்கொண்டு ஐபோனை வாங்க முக்கியமான இரண்டு காரணங்கள் உண்டு. ஒன்று பாதுகாப்பு. இன்னொன்று தரம் ! அந்த இரண்டு விஷயங்களிலும் எப்போதும் சமரசம் செய்து கொள்ளாத நிலை தான் ஆப்பிளின் அசுர பலத்தின் காரணம்.  

தன்னை ஒரு ஐபோன் கம்பெனி என அடையாளப்படுத்துவதில் ஆப்பிள் திருப்தி அடைவதில்லை. அதனால் தான் தொடர்ச்சியாக பல புதிய அம்சங்களை அது கொண்டு வருகிறது. ஐபேட், ஆப்பிள் டிவி போன்றவை அந்த வரிசையில் வருகின்றன.  இப்போது ஆப்பிள் வாட்ச் மீது அது தனிக் கவனத்தை செலுத்துகிறது. ஆப்பிள் கேட்ஜெட்களில் ஆர்டிபிஷியல் இன்டலிஜென்ட் மற்றும் ஆகுமென்டர் ரியாலிடி தொழில்நுட்பங்களை அதிகம் பயன்படுத்துவதில் முனைப்பு காட்டி வருகிறது.  

ஒரு புறம் இப்படி இருந்தாலும் மக்கள் ஐபோனுக்கு அடிமையாகி விடுகிறார்கள் எனும் எதிர்ப்பும் ஒரு புறம் எழுகிறது. அதை சரிசெய்ய ஆப்பிள் நிறுவனமே சில நாட்களுக்கு முன் ஒரு அறிவிப்பை வெளியிட்டது. இனிமேல் நாம் எவ்வளவு நேரம் ஐபோனைப் பயன்படுத்துகிறோம், எந்த ஆப் எவ்வளவு நேரத்தை எடுத்திருக்கிறது போன்ற தகவல்களையெல்லாம் திரையிலேயே அது காட்டப் போகிறது. நம்முடைய போன் பயன்பாட்டை, நாம் குறைக்க வேண்டுமென, போனே நம்மிடம் கூறுவது புதுமை தான் இல்லையா ?

*

சேவியர்

ஹோலோபோர்டேஷன்

ஹோலோபோர்டேஷன்
வியப்பூட்டும் புதிய தொழில்நுட்பம்
Image result for holoportation
அமெரிக்காவில வேலை வேலைன்னு இருக்கிற பையனை எப்போ தான் பாக்கறது?” என்பது தொலைதூரத்தில் இருக்கும் இந்தியப் பெற்றோரின் புலம்பலாய் இருக்கிறது. தினமும் காலையில் அவர்கள் அமெரிக்கப் பையனின் வீட்டு வரவேற்பறையில் கொஞ்ச நேரம் உட்கார்ந்து பேசிவிட்டு வந்தால் எப்படி இருக்கும் ? அல்லது அமெரிக்க பையன் இங்கே வந்து பெற்றோருடன் டைனிங் டேபிளில் அமர்ந்து கொஞ்ச நேரம் பேசிவிட்டுப் போனால் எபடி இருக்கும்ஒரு அறிவியல் புனை கதை போல இருக்கிறது இல்லையா ?
இப்படி ஒரு விஷயம் நடந்தால் ஒன்று அது மேஜிக்காக இருக்க வேண்டும், அல்லது பேய் பிசாசாக இருக்க வேண்டும் என்று தானே நினைக்கிறீர்கள். அது  ஹோலோபோர்டேஷன் நுட்பமாகவும் இருக்கலாம் என்பது தான் புதிய வியப்பூட்டு செய்தி
தொழில்நுட்பம் நமக்கு முன்னால் நீட்டும் விஷயங்கள் நம்மை தினந்தோறும் வியப்புக்குள் அழைத்துச் சென்று கொண்டிருக்கின்றன. புறாவின் காலில் கடிதம் கட்டி அனுப்பிய செய்தி வரலாறுகளில் உண்டு. திரும்ப அந்த புறா கொண்டு வரும் பதில் செய்தி தான் முதல் கடிதம் சென்று சேர்ந்ததற்கான அத்தாட்சி ! அதற்கு பல மாதங்கள் ஆகும் என்பது தோராயக் கணக்கு.
 அதன் பின் கடிதப் பயன்பாடுகள் வந்தன. இன்லண்ட் லெட்டரிலோ, போஸ்ட் கார்டிலோ மூச்சு முட்ட எழுத்துகளை நிரப்பி அனுப்பிய கதை கடந்த தலைமுறையினருடையது. இன்லண்ட் லெட்டரின் ஓரங்களிலும், போஸ்ட்கார்டின் விலாசப் பகுதியிலும் கூட சிற்றெறும்பு ஊர்வது போல சிறுக சிறுக எழுதப்பட்டிருக்கும் கடிதங்கள் சென்று சேர சில நாட்கள் முதல், சில வாரங்கள் வரை தேவைப்பட்டன
அதன் பின் மொபைல் போன் வந்தது. குறுஞ்செய்திக்கு பேஜரும், அதற்குப் பிறகு எஸ்.எம்.எஸ் சும், மின்னஞ்சல்களும் மாபெரும் புரட்சியையே ஏற்படுத்தி விட்டன. எழுதும் வழக்கம் ஒழிந்து போக டிஜிடலுக்குள் நுழையும் பழக்கம் வந்தது. அதன் பின் வீடியோ உரையாடல் வந்து டைப் பண்ணுவதையும் குறைக்க ஆரம்பித்தது.
தொலை தூரத்தில் இருக்கின்ற நண்பர்களோ, உறவினர்களோ அவர்களை வீடியோவில் பார்த்துப் பேசுவது அடுத்த கட்ட வளர்ச்சியானது. என்ன தான் இது அன்னியோன்யமாக இருந்தாலும் ஒரு டிஜிடல் கட்டத்துக்குள் 2டி நுட்பத்தில் தானே இந்த உரையாடல் நடக்கிறது. இது அப்படியே 3டி நுட்பத்தில், நமக்கு முன்னால் நடந்தால் எப்படி இருக்கும் என மைக்ரோசாஃப்ட் நினைத்ததன் விளைவு தான் இந்த புதுமையின் வரவு.
இதன் மூலம் நாகர்கோவிலில் இருக்கும் பெற்றோர், சென்னையில் இருக்கும் பிள்ளைகளை நேரடியாக பார்த்து பேச முடியும். பக்கத்தில் அமர்ந்து அவர்களுடைய உணர்வுகளைப் புரிந்து கொள்ள முடியும். காஷ்மீரில் இருக்கும் ஒருவரும், லண்டனில் இருக்கும் ஒருவரும் நேரடியாக பார்த்து பேசிக்கொள்ள முடியும். டில்லியில் இருக்கும் ஒரு அரசியல் தலைவர் சென்னையில் இருக்கும் ஒரு தலைவரோடு பேச, விமானம் பிடிக்கத் தேவையில்லை. தொழில்நுட்பத்தைப் பிடித்தாலே போதும்
இது சொல்கின்ற நுட்பம் எளிதானது. ஒரு அறையில் மைக்ரோசாஃப்ட் தயாரிப்பான 3டி கேப்சரிங் கருவிகளான கேமராக்களைப் பொருத்த வேண்டும். குறைந்த பட்சம் இரண்டு கேமராக்கள் தேவைப்படும். அதிகம் கேமராக்கள் இருந்தால்  படம் தெளிவானவும் படு யதார்த்தமாகவும் இருக்கும்அந்த காட்சிகளை செய்து கணினி தொடர்ச்சியாய்ப் பதிவு செய்து முப்பரிமாண மாடலாக்கி, தகவல்களை கம்ப்ரஸ் செய்து எங்கே வேண்டுமோ அங்கே அனுப்புகிறதுஇவையெல்லாம் ஒரு சில வினாடிகளில் நடக்கின்றன. சராசரியாக 50 எம்பிபிஎஸ் இணைய வேகம் இதற்கு அவசியம். ஆகுமெண்டர் ரியாலிடி எனும் நுட்பத்தின் அடிப்படையில் இது இயங்குகிறது
எங்கே இந்த காட்சிகள் விரிக்கப்பட வேண்டுமோ அங்கே தலையில் மாட்டும் கண்ணாடி போன்ற ஹோலோலென்ஸ் ஒன்றைப் பயன்படுத்த வேண்டும். இங்கே 3டி கேமராவில் பிடிக்கப்படும் காட்சிகள் தொலைதூரத்தில் இருக்கும் நபர் பயன்படுத்தும் ஹோலோ லென்ஸ் வழியாக யதார்த்தம் சிதையாமல் முன்னால் வந்து நிற்கும். இந்த காட்சிகளையெல்லாம் அப்படியே பதிவு செய்யலாம் என்பதால், ஒருமுறை உரையாடிய உரையாடலை மீண்டும் நமது அறைக்குக் கொண்டு வந்து என்ன நடந்தது என்பதை மீண்டும் நேரடியாகப்  பார்க்கவும் முடியும் என்பது சுவாரஸ்யம்
நாசாவில் பணிபுரியும் ஒரு நபரை மேடையில் நூற்றுக்கணக்கான பார்வையாளருக்கு முன்னால் வரவழைத்து அவருடன் பேசி இந்த தொழில்நுட்பத்தை விளக்கினார்கள். பார்வையாளர்கள் பரவசமடைந்தார்கள். இந்தத் தொழில்நுட்பத்தை நாசாவில் பயன்படுத்தத் துவங்கியிருப்பதாகவும், இதன் மூலம் கோள்களைக் குறித்து மிக துல்லியமான தகவல்களைப் பெற முடியும் என அவர் தெரிவித்தார்.
ஒரு இரு பரிமாண வெளிச்சத் திரையில் இருந்த தகவல் பரிமாற்றத்தை, நமக்கு முன்னால் இயல்பாக, உயிரோட்டமாக உலவும் காட்சிகளாக இந்த தொழில்நுட்பம் மாற்றியிருக்கிறது. வெளிநாட்டிலும், இந்தியாவிலும் உள்ள மக்கள் இணைந்து நடத்தும் அலுவலக கான்பரன்ஸ் விஷயங்கள் எதிர்காலத்தில் இந்த தொழில்நுட்பத்தின் மூலம் ஒரே அறையில் நடக்கும்
ஒருவருக்கொருவர் பார்த்துக் கொள்ள முடியும், பேசிக்கொள்ள முடியும், ‘ஏண்டா டல்லா இருக்கேஎன கேட்டு அவரை ஆறுதல் படுத்த முடியும் என இது தருகின்ற சாத்தியங்கள் மிக அதிகம். தொலைவுகளை அருகாக்குவது மட்டுல்ல, தொலைவுகளே இல்லாமலாக்கும் முயற்சியே இது ! வருகின்ற காட்சிகளை மினியேச்சராக மாற்றி டைனிங் டேபிளுக்கு மேல் அமரவைக்கவும் முடியும் ! இவையெல்லாம் தொழில்நுட்பம் தரும் எக்ஸ்ட்ரா வசதிகள்
அறிவியல் ஆராய்ச்சித் தளத்தில் இந்தத் தொழில்நுட்பம் மிகப்பெரிய அளவில் கைகொடுக்கப் போகிறது. புதிய செயற்கைக் கோள்களை வடிவமைப்பது  முதல் வானில் இருக்கும் விண்வெளி ஆராய்ச்சியாளர்களுடன் நேரடியாகப் பேசுவது வரை இது பயன்படும். இந்த தொழில்நுட்பத்தின் மூலம் யார்வேண்டுமானாலும் நிலவில் கால்வைக்கலாம். நிலவின் நிலத்தை அருகில் இருந்து பார்க்கலாம் ! காலால் மிதிக்கலாம் !
இந்த தொழில்நுட்பத்தின் வரவு டைப் பண்ணி மக்களுக்கு மெசேஜ் அனுப்பும் முறையை விரைவிலேயே ஒழித்து விடும். வீடியோ சேட்டிங் போன்றவையும் வலுவிழந்து போகும். இதன் அடுத்த கட்டமாகஓடும் காரில் இந்த கேமராக்களை அமைத்து வெற்றிகரமாக வெள்ளோட்டம் விட்டிருக்கிறார்கள். காரின் பின் சீட்டில் உங்களுக்கு அருகில் உங்கள் ஆஸ்திரேலிய நண்பரை அமரவைத்து பேசிக்கொண்டே போக முடியும் ! மாய உலகத்தில்
சுருக்கமாகச் சொல்லவேண்டுமெனில் ஒரு நிஜ சம்பவத்துக்குள், ஒரு மாயக் காட்சியை யதார்த்தம் போல நுழைக்க இந்த தொழில்நுட்பம் உதவும்
அறிவியல் புனை கதைகளும், ஹாலிவுட் திரைப்படங்களும்டெலிபொட்டேஷன்எனும் சிந்தனையை பல ஆண்டுகளாக சொல்லி வருகின்றன. ஒரு இடத்திலிருக்கும் நபரை இன்னொரு இடத்துக்கு அப்படியே வினாடி நேரத்தில் அனுப்பி வைப்பது தான் இந்த சிந்தனை. அதாவது சென்னையில் இருக்கும் ஒரு நபர், ஒரு கருவியில் நுழைந்தால் அமெரிக்காவிலிருந்து வெளியே வரலாம் என்பது போல வைத்துக் கொள்ளுங்கள். அந்த சிந்தனையின் முதல் நிலையாக இப்போது காட்சிகளை அனுப்பும் இந்த ஹோலோபோர்டேஷனை வைத்துக் கொள்ளலாம். இது வெற்றியடைந்திருக்கிறது
ஹோலோபோர்டேஷன் மூலம் அனுப்பப்படுகின்ற காட்சிகளை இப்போது பார்க்க மட்டும் தான் முடியும். இதன் அடுத்த கட்டமாக காட்சிகளை தொட்டு உணரவும், வாசனை அறியவும், தட்ப வெப்பநிலைகளை இடம் விட்டு இடம் கடத்தவும் ஆய்வுகள் நடத்தப்பட்டு வருகின்றன. அவை எதிர்காலத்தில் சாத்தியமாகும் என்பதில் சந்தேகமேயில்லை. அப்படி நடக்கும் போது உலகம் நிஜமாகவே ஒற்றைப் புள்ளியில் வந்து சங்கமிக்கும்.
*
சேவியர்

உலக தகவல் வளர்ச்சி தினம்

Image result for world information day
புறாக்களின் கால்களில் தகவல்களைக் கட்டி அனுப்பிய கதைகள் இப்போது வேடிக்கையாய் இருந்தாலும், வரலாற்றில் அது நிகழ்த்திய பங்களிப்பு மகத்தானது. கடல், மலை கடந்து இன்னொரு ஊருக்கு, இன்னொரு நாட்டுக்கு செய்திகளை அனுப்ப புறாக்கள் தான் பயன்பட்டன.
ஒற்றர்கள் தகவல்களைச் சுமந்து செல்வதில் இருந்த தாமதங்களையும், ‘தகவல் கசிவு’ போன்ற பாதுகாப்பு சிக்கல்களையும் புறாக்கள் சரிசெய்தன. கால்நிலைகளைப் பொருட்படுத்தாமல் அவை கன கட்சிதமாகத் தகவல் பரிமாற்றை நிகழ்த்திக் காட்டின.
வரலாற்றுப் பதிவுகள் நமக்கு தகவல் பரிமாற்றத்தின் பல்வேறு நிலைகளை விளக்கிக் கொண்டே இருக்கின்றன. தோலில் செய்திகளை எழுதி வைப்பது, கல்வெட்டுகளில் செய்திகளைக் கொத்தி வைப்பது, கணிமண் ஓடுகளில் தகவல்களை எழுதி வைப்பது, ஓலைகளில் செய்திகளை பொறித்து வைப்பது என தகவல் வளர்ச்சி ஒவ்வொரு காலத்துக்கும் ஏற்ற வகையில் வளர்ந்து கொண்டே வருகிறது.
தபால் நிலையங்கள், அஞ்சல் துறை போன்றவையெல்லாம் வந்தபின் தகவல் பரிமாற்றங்கள் பெருமளவில் வளர்ச்சியடைந்தன. இதன் வேர்கள் கிமு ஆறாம் நூற்றாண்டில் என்றாலும் கிபி பதினாறாம் நூற்றாண்டில் தான் இது முறைப்படுத்தப்பட்ட ஒரு வடிவத்தை எட்டியது. இந்தியாவில் ஆங்கிலேயரின் ஆட்சிக்காலம் வந்தபின்பு தான் இது வளர ஆரம்பித்தது.
கடந்த தலைமுறை மக்களுக்கெல்லாம் இன்னும் நினைவுகளில் அஞ்சல் நிலையங்கள் நிழலாடும் என்பதில் சந்தேகமில்லை. இன்லண்ட் லெட்டர்களின் ஓரங்களிலும் கிறுக்கி எழுதிய சுவாரஸ்ய நினைவுகள் விலகுவதில்லை. போஸ்ட் கார்ட், போஸ்ட் கவர், இன்லண்ட் லெட்டர் போன்றவை தான் தகவல் பரிமாற்றத்தின் ஒரே ஆயுதமாக வலுவாக இருந்த காலகட்டம் நீளமானது.
தொலைபேசிப் பயன்பாடு வந்தபின் கொஞ்சம் கொஞ்சமாக எழுத்து பரிமாற்றங்கள் குறையத் துவங்கின. இருந்தாலும் ஸ்மார்ட்போன்களின் காலம் வரை அஞ்சல் துறையின் பங்களிப்பு தொடர்ந்து கொண்டே தான் இருந்தது.
தொலைபேசி சேவை இந்தியாவில் 1881 களில் ஆரம்பிக்கப்பட்டபோது இந்திய அளவில் நூறை விடக் குறைவான எண்ணிக்கையில் தான் வாடிக்கையாளர்கள் இருந்தனர். அது படிப்படியாக வளர்ந்து 1990களில் 200 பேருக்கு ஒரு தொலைபேசி எனுமளவில் வந்து நின்றது. இன்றைக்கு ஆளுக்கு ரெண்டு தொலைபேசியை வைத்துக் கொண்டு அலைகின்ற சூழல் உருவாகியிருக்கிறது.
தொலைபேசிக்கும், செல்போன்களுக்குமிடையே நுழைந்த ஒரு தகவல் தொழில்நுட்பம் பேஜர். துரதிர்ஷ்டவசமாக அதன் ஆயுள் மிக மிகக் குறைவாக இருந்தது. பெல்டில் கட்டப்பட்டிருக்கும் ஒரு சின்ன கருவியில் செய்திகள் வரும். இது பெரும்பாலும் நிறுவனங்கள் தங்களுடைய விற்பனை பிரதிநிதிகளுக்கு செய்திகளை அனுப்பும் வகையில் பயன்பட்டது.
செல்போன் வந்தபின் எஸ்.எம்.எஸ்கள் பேஜரின் தேவையை முழுவதுமாக ஒழித்து விட்டன. அந்தஸ்தின் அடையாளம், செல்வந்தர்களுக்கே உரியது என்றெல்லாம் இருந்த செல்போன்கள் இன்றைக்கு குடிசைகளிலும் நிரம்பியிருக்கின்றன.
இப்போது ஸ்மார்ட்போன்களின் காலம். இணையத்தின் வருகைக்குப் பின் ஸ்மார்போன்களின் சிம்மாசனம் சரியவேயில்லை. ஸ்மார்ட் போன்கள் தின்று ஏப்பம் விட்ட தொழில் நுட்பங்கள் கொஞ்ச நஞ்சமல்ல. இன்லெண்ட் லெட்டர்களை மின்னஞ்சல்கள் விழுங்கின. பேஜர்களை எஸ்.எம்.எஸ்கள் தின்று தீர்த்தன. தந்திச் சேவையை குறுஞ்செய்திகள் இல்லாமல் செய்து விட்டன. கேசட்கள், சிடிக்கள் போன்றவற்றை டிஜிடல் வடிவ எம்பி3 கள் இல்லாமல் செய்து விட்டன. டிவிடிக்களை டிஜிடல் வீடியோக்கள் முழுங்கி விட்டன. வகை வகையாய் வந்து கொண்டிருந்த கேமராக்களை செல்போன்களின் கேமராக்கள் நாடுகடத்தி விட்டன.
இணையமும் , சமூக வலைத்தளங்களும், ஸ்மார்ட் போன்களும் தகவல் வளர்ச்சியை முன்னெப்போதும் இல்லாத அளவுக்கு உயரத்தில் கொண்டு போய் வைத்திருக்கின்றன.
நிகழ்ச்சிகள் நடந்து கொண்டிருக்கும் போதே லைவ் ஆக காண்பிக்க ஃபேஸ்புக் லைவ் உட்பட பல்வேறு செயலிகள் இருக்கின்றன. வெளிநாடுகளில் நடக்கின்ற காதுகுத்து, கல்யாணங்களை ஊரின் கிராமத்து சொந்தங்களும் இப்போது திண்ணையில் அமர்ந்து கொண்டே ரசிக்க முடிகிறது.
வீடியோ சேட்கள் தகவல் பரிமாற்றத்தை உணர்வு ரீதியாக மாற்றியிருக்கிறது. ‘எண்ணை தேய்ச்சு குளிடா’ என தூரதேசத்தில் இருக்கும் மகனுக்கு அம்மா தன் வெற்றிலை வாயோடு செய்தியைச் சொல்ல முடிகிறது. வீட்டில் இருக்கும் குழந்தையோடு அலுவலகத்தில் இருக்கும் அம்மா ‘சாப்டியா ?’ என நலம் விசாரிக்க முடிகிறது. நள்ளிரவு தாண்டிய பொழுதுகளிலும் நட்புகளும், காதல்களும் கவித்துவம் பேசித் திரிய முடிகிறது.
அலெக்ஸா, இன்னிக்கு மழை பெய்யுமா ? சிரி, நுங்கம்பாக்கம் டிராபிக் எப்படி ? கூகிள், நல்லதா ஒரு பாட்டி போடு என இப்போது நமது கேள்விகளுக்குப் பதில் சொல்ல கருவிகள் காது திறந்துக் காத்திருக்கின்றன.
உலகம் முழுவதும் இன்றைக்கு தகவல்கள் நிரம்பியிருக்கின்றன. அவையே நிறுவனங்களுக்கு லாபத்தை கோடி கோடியாய் கொட்டிக் கொடுக்கின்றன. பிக்டேட்டா, இண்டர் நெட் ஆஃப் திங்க்ஸ், மெஷின் லேர்ணிங், ஆர்டிஃபிஷியல் இண்டெலிஜெண்ட் என எல்லாமே இன்றைக்கு தகவல்களின் மேல் கட்டமைக்கப்பட்ட தொழில்நுட்பங்களே.
உலக தகவல் வளர்ச்சி தினத்தில் நாம் மனதில் கொள்ள வேண்டிய ஒரே ஒரு விஷயம், இன்றைக்கு எதுவும் ரகசியமாய் இல்லை என்பது தான். பொதுவெளியில் பேசுகின்ற, பகிர்கின்ற, எழுதுகின்ற எல்லா செய்திகளும் ஏதோ ஒரு தொழில்நுட்பத்தின் காது வழியாக இன்னொரு தொழில்நுட்பத்தின் மனசுக்குள் போய் அமர்ந்து கொள்கிறது. அதை அழிக்க முடியாது, ராவணத் தலை போல வெட்ட வெட்ட முளைத்துக் கொண்டே இருக்கும். விழிப்பாய் இருப்போம் !
*
சேவியர்

ஓடவும் முடியாது, ஒளியவும் முடியாது 

Image result for digital security

வீட்டை விட்டு வெளியே கிளம்பும் போது ஒரு தடவைக்கு நாலு தடவை  பூட்டை இழுத்துப் பார்த்து, கதவைத் தள்ளிப் பார்த்து எல்லாம் பத்திரமாய் இருக்கிறது என திருப்திப்பட்டு விட்டு கிளம்புகிறோம். ஒருவேளை வீடு பத்திரமாய் இருக்கலாம், ஆனால் வெளியே கிளம்பும் நாம் பத்திரமாய் இருக்கிறோமா ? “இல்லை” என்பதே கசப்பான உண்மை !

தொழில்நுட்பத்தின் மூன்றாவது கண் நம்மை கண நேரமும் விடாமல் கண்காணித்துக் கொண்டே இருக்கிறது. இந்த கணம் நீங்கள் எங்கே இருக்கிறீர்கள், என்ன செய்து கொண்டிருக்கிறீர்கள் என்பது மூன்றாவது கண்ணுக்குத் தெரியும். 

உங்களுக்கு என்ன பிடிக்கும் என்ன பிடிக்காது என்பது உங்கள் வாழ்க்கைத் துணையை விட அதிகமாய் அந்த மூன்றாவது கண்ணுக்குத் தெரியும். உங்களுடைய தினசரி நடவடிக்கை என்ன என்பது உங்களை விடத் துல்லியமாய் அந்த மூன்றாவது கண்ணுக்குத் தெரியும். 

சில ஆண்டுகளுக்கு முன்பு வரை போன் பயன்படுத்துவது நமது வசதிக்கான ஒன்றாகவே இருந்தது. ஆனால் இன்று நாம் போன் பயன்படுத்துவது நிறுவனங்களின் வளர்ச்சிக்காக என மாறிப் போய்விட்டது. நாம் எங்கே செல்கிறோம் என்பதையும், நாம் என்ன செய்கிறோம் என்பதையும், நாம் எதை செய்யாமல் விடுகிறோம் என்பதையும் ஸ்மார்ட்போன் டிஜிடல் தகவல்களாக எங்கெங்கோ அனுப்பிக் கொண்டே இருக்கிறது. ஒரு லைவ் கிரிக்கெட் வர்ணனையைப் போல நம்மைப் பற்றிய தகவல்கள் சர்வர்களில் சேமிக்கப்படுகின்றன.

இந்தத் தகவல்கள் தான் நிறுவனங்களின் பணம் காய்க்கும் மரம். இந்த தகவல்கள் தான் தொட்டதையெல்லாம் பொன்னாக்கித் தரும் வரம். இவனிடம் என்ன விற்கலாம், இவனிடம் என்ன பேசலாம், இவனிடமிருந்து நமக்கு என்ன கிடைக்கும் என்பதையெல்லாம் இந்த தகவல்களைக் கொண்டு தான் கணிக்கிறார்கள். அதற்காக இருப்பவை தான் பிக்டேட்டா அனாலிடிக்ஸ், அதற்கான அல்காரிதங்கள் போன்ற தொழில் நுட்பங்களெல்லாம்  

பொதுவாக நிறுவனங்கள் இவற்றையெல்லாம் தங்களுடைய தொழில் வளர்ச்சிக்காகவும், விற்பனை வளர்ச்சிக்காகவும் தான் பயன்படுத்துகின்றன. ஆனால் இந்த தகவல்களைக் கொண்டு என்ன வேண்டுமானாலும் செய்யலாம் எனும் அச்சம் எல்லோரிடமும் உண்டு. குறிப்பாக, இந்த தகவல் திருடப்பட்டால் என்னவாகும் ? அதைக் கொண்டு நமது உடமைகளுக்கோ, உயிருக்கோ ஆபத்து ஏற்பட்டால் என்ன செய்வது எனும் அச்சம் வெகு நியாயமானது.

நமது தேசம் டிஜிடல் பரிவர்த்தனைகளை நோக்கி தீவிரமாய்ப் பயணித்துக் கொண்டிருக்கிறது. இந்தக் கால்கட்டத்தில் நமது ஸ்மார்ட் போன்களே நமக்கு பெரும்பாலான பரிவர்த்தனைகளை நிறைவேற்றித் தருகின்றன. பேடிஎம் ஆகவோ, வங்கிக் கணக்குகளாகவோ, கூகிள் பே யாகவோ ஏதோ ஒரு வடிவத்தில் நமது தகவல்களெல்லாம் ஸ்மார்ட்போன் வழியாகத் தான் பயணமாகின்றன. 

இந்தத் தகவல்களை நாம் பயன்படுத்தும் ஆப்களோ, நமது இணைய சேவை வழங்கு நிறுவனங்களோ, நமது மௌபைல் கம்பெனிகளோ திருடிக் கொள்வதற்கான வாய்ப்புகள் உண்டு. மால்வேர்கள், வாட்ஸப் மெசேஜ்களாகவோ, மின்னஞ்சல் அட்டாச்மெண்ட்களாகவோ நமது ஸ்மார்ட்போன் கதவைத் தட்டிக் கொண்டே இருக்கின்றன. நம்பிக்கையில்லாத லிங்க்களையோ, அட்டாச்மெண்ட்களையோ ஒரே ஒரு முறை கிளிக்கி விட்டால் கூட நமது தகவல்கள் தொலைந்து போக வாய்ப்பு உண்டு

நாம் பலமுறை ஏமாந்து போகக்கூடிய ஒரு இடம் வைஃபை. இலவச வைஃபை அல்லது பொது இடங்களில் கிடைக்கின்ற கட்டண வைஃபைக்கள் பாதுகாப்பற்றவை. நமது மொபைலை அத்தகைய வைஃபையில் இணைத்தால் நமது ஸ்மார்ட்போனில் இருக்கும் எந்தத் தகவலையும் பறிகொடுக்கும் வாய்ப்பு உருவாகும். 

எங்கே சென்றாலும் தூக்கி சுமக்கும் ஸ்மார்ட்போன்கள் தங்களது இருப்பிடத்தை எப்போதும் இன்னொரு இடத்துக்கு அனுப்பிக் கொண்டே இருக்கின்றன. ஜியோ லொக்கேஷன் எனப்படும் இந்த தகவல் நமது போனின் இருப்பிடத்தை துல்லியமாய்ச் சொல்லி, நாம் எங்கே இருக்கிறோம் என்பதை பதிவு செய்கிறது. நாம் மட்டுமல்ல, நமக்குப் பக்கத்தில் நமது நண்பர்களின் போன்கள் இருந்தால் எத்தனை பேர் எங்கே இருக்கிறோம் என்பதையெல்லாம் சொல்லிவிடும். 

அப்படின்னா லொக்கேஷனை ஆஃப் பண்ணிடலாம் பிரச்சினையில்லை என நினைப்பீர்கள். அது தான் இல்லை. இப்போது நமது இருப்பிடத்தை வெறும் லொக்கேஷன் சர்வீஸ் மட்டும் கண்டுபிடிப்பதில்லை. ஆஸிலரோ மீட்டர், பாரோ மீட்டர், மேக்னடோமீட்டர் உட்பட பல சென்சார்களும் போனின் இருப்பிடத்தைத் துல்லியமாய் கண்டு சொல்கின்றன. 

அதே போல நாம் மொபைலில் இன்ஸ்டால் செய்யும் ஆப்கள் மிகப்பெரிய ஆபத்தின் திறவு கோலாய் இருக்க வாய்ப்பு உண்டு. ஆப்களை இன்ஸ்டால் செய்யும் போது நாம் அது கேட்கின்ற அனுமதிகளுக்கெல்லாம் ‘ஓகே… ஓகே” என சொல்லிக் கொள்கிறோம். நமது காண்டாட்க், கேமரா போன்றவற்றை இயக்கும் அனுமதியை நாமாகவே கொடுத்து விடுகிறோம். அது போலியான அல்லது பாதுகாப்பற்ற அப் ஆக இருக்கும் பட்சத்தில் நமது தகவல்கள் மிக மிக எளிதாக திருடப்பட்டு விடுகின்றன. 

இப்போது சில புதிய திடுக்கிட வைக்கும் தனிமனித சுதந்திர மீறல்கள் வந்திருக்கின்றன. அதில் ஒன்று கேமரா ஹேக்கிங். நமது மொபைலில் உள்ள கேமராவையோ, நமது கணினியில் உள்ள வெப்கேமையோ தொலைவிலிருந்தே  இயக்குவது. கேமரா இயங்கிக் கொண்டிருப்பது, நமக்குத் தெரியாது. நமது செல்போன் கேமரா காட்டுகின்ற விஷயங்களையெல்லாம் தொலைவிலுள்ள சேமிப்பு தளங்களில் சேமிக்கப்படும். அது எப்படி வேண்டுமானாலும் பயன்படுத்தப்படலாம். 

இன்னொன்று போனிலுள்ள மைக்ரோபோன் மூலமாக நேர்கிறது. நமது உரையாடல்கள் நமக்குத் தெரியாமலேயே காதுகொடுத்துக் கேட்கப்பட்டு இன்னொரு இடத்துக்கு அனுப்பப்படும் ஆபத்து அது. நாம் போனில் பேசுவது மட்டுமல்லாமல், போனை ஆன் பண்ணாமல் பேசுவதைக் கூட ரகசியமாய் ஒட்டுக்கேட்கும் ஆபத்து இதில் உண்டு. கூகிள் ஹோம், அலெக்ஸா, சிரி போன்றவையெல்லாம் எப்போதுமே நமது உரையாடல்களைக் கவனித்துக் கொண்டிருக்கின்றன என்பது நினைவில் இருக்கட்டும். 

ஏற்கனவே ஒருவர் இன்னொருவரிடம் பேசுவதை ரெக்கார்ட் செய்யும் வசதிகள் இருக்கின்றன. மொபைல் நிறுவனங்களோ, ஆப்ஸ்களோ, இணைய சேவை வழங்கும் நிறுவனங்களோ நினைத்தால் யாருடைய பேச்சை வேண்டுமானாலும் ரெக்கார்ட் செய்யலாம் எனும் வசதியை இன்றைய தொழில் நுட்பம் தந்திருக்கிறது. இதனால் எவ்வளவு ரகசியமாய் நாம் கிசுகிசுத்தாலும் அது பொதுவெளியில் வரும்  வாய்ப்பு உண்டு. 

அதே போல நமது சேட்கள், மின்னஞ்சல்கள் எல்லாமே தொழில்நுப்டத்தின் கண்களால் வாசிக்கப்பட்ட பின்பு தான் அடுத்த நபருக்குச் சென்று சேர்கிறது. அடுத்தவருக்கு வருகின்ற லெட்டரைப் படிக்கக் கூடாது எனும் நாகரீகமும், அடுத்தவருடைய பேச்சை ஒட்டுக் கேட்கக் கூடாது எனும் நாகரீகமும் தொழில்நுட்ப உலகில் செல்லாக்காசாகி விட்டன. 

நாம் மொபைலில் எடுக்கின்ற போட்டோக்களை சில ஆப்கள் திருடுகின்றன என சமீபத்தில் ஒரு தொழில்நுட்பக் கட்டுரை சொன்னது. நமது புகைப்படத்தை வைத்து அது எங்கே எப்போது எடுக்கப்பட்டது போன்ற தகவல்களையெல்லாம் தொழில்நுட்பம் புட்டுப் புட்டு வைக்கிறது. 

நவீன செல்போன்களில் ஏகப்பட்ட சென்சாகள் இருக்கின்றன. நமது கை அசைவையும், கண் அசைவையும் கண்காணிக்கும் சென்சார்கள் இருக்கின்றன. நாம் எந்த மாடியில் இருக்கிறோம் என்பதைக் கூட பாரோ மீட்டர்  எனும் சென்சார் அனுப்பும் செய்தியால் அறிய முடியும். சென்சார்களுக்கென ஆப்ஸ் தனி அனுமதி கேட்பதில்லை. எனவே எந்த ஆப் டவுன்லோட் செய்தாலும் இந்த சென்சார்கள் அதனுடன் இணைந்து கொள்ளும். 

நமது செல்போனில் நாம் டைப் செய்யும் விஷயங்களைத் திருடவும், நமது பாஸ்வேர்ட் போன்றவற்றை கண்டறியவும் கூட மென்பொருட்கள் உள்ளன. வெறுமனே மொபைலில் டைப் செய்து விட்டு டெலீட் செய்தால் கூட, எதையெல்லாம் டைப் செய்தோம் எதையெல்லாம் டெலீட் செய்தோம் என்பதையும் தொழில்நுட்பம் குறித்து வைத்துக் கொள்கிறது என்றால் பார்த்துக் கொள்ளுங்கள்.

இப்படி உங்களுடன் கூடவே இருந்து உங்களைப் பற்றிய அத்தனைத் தகவல்களையும் புட்டுப் புட்டு வைக்கின்றன ஸ்மார்ட்போன்களும், அதனுடன் இணைந்த நவீன தொழில்நுட்பங்களும். நாளை உங்களுடைய டிரைவிங் ஸ்பீடுக்குத் தக்கபடி உங்களுடைய கார் இன்சூரன்ஸ் அதிகரிக்கலாம், உங்களுடைய ‘தண்ணி அடிக்கும்’ பழக்கத்துக்கு ஏற்ப உங்களுடைய ஹெல்த் இன்சூரன்ஸ் அதிகரிக்கலாம். ஏன் உங்கள் அலுவலக பெர்ஃபாமன்ஸைக் கூட உங்கள் மொபைல் தரும் டேட்டாவைக் கொண்டே முடிவும் செய்து விடலாம். 

‘ஓடவும் முடியாது, ஒளியவும் முடியாது ஐ வில் பி வாச்சிங்’ என்பது பிக் பாஸை விட தொழில்நுப்டத்துக்கே அதிகம் பொருந்தும். இந்த சூழலில் பாதுகாப்பாய் இருப்பது எப்படி ?

  1. ஸ்மார்ட்போன்களை அங்கும், இங்கும் வைத்துச் செல்லாதீர்கள். பாதுகாப்பாய் வைத்திருங்கள். அவ்வப்போது பேக்கப் எடுத்துக் கொள்ளுங்கள்
  2. புளூடூத், வைஃபை போன்றவற்றை தேவையற்ற நேரங்களில் ஆஃப் செய்தே வைத்திருங்கள்.
  3. மிக மிக அவசியமான ஆப்ஸ் மட்டும் உங்களிடம் இருக்கட்டும். அதுவும் அங்கீகரிக்கப்பட்ட இடங்களிலிருந்து மட்டும் தரவிறக்கம் செய்யுங்கள்.
  4. சந்தேகத்துக்கு இடமான எந்த ஒரு லிங்கையோ, அட்டாச்மெண்டையோ கிளிக்காதீர்கள். 
  5. போனுக்கு கடின பாஸ்வேர்ட் போட்டு மூடி வையுங்கள். ஆப்ஸ்களைப் பயன்படுத்தியபின் முறையாய் எக்ஸிட் செய்யுங்கள். 
  6. பொது வைஃபைகளில் இணையாதீர்கள். அப்படியே இணைய வேண்டிய கட்டாயமான சூழல் வந்தாலும் பண பரிவர்த்தனைகள் நடத்தாதீர்கள். ஆட்டோ லாகின் வசதியை ஆன் செய்யாதீர்கள். 
  7. என்கிரிப்ஷன் வசதி இருக்கின்ற மொபைலெனில் அதைப் பயன்படுத்துங்கள். மொபைலின் ஓஎஸ் அப்டேட்களை உடனுக்குடன் நிறுவுங்கள். 
  8. ஒரு நல்ல ஆன் டி வைரஸ் மென்பொருளை பயன்படுத்துங்கள். தொலைவிலிருந்தே மொபைலில் உள்ளவற்றை அழிக்கும் ‘ரிமோட் வைப்’ ஆப்ஷனைப் பயன்படுத்துங்கள். 
  9. பழைய போனை முடிந்தமட்டும் விற்காமல் இருங்கள், அப்படி விற்கவேண்டிய சூழலெனில் மெமரி கார்ட், சிம்கார்ட், இண்டர்னல் மெமரி அனைத்தையும் ஃபார்மேட் செய்யுங்கள். அழிக்கப்பட்ட படங்களையும், தகவல்களையும் தேவையானால்  மீண்டெடுக்கலாம் என்பதை நினைவில் கொள்ளுங்கள்.
  10. ஜியோடேகிங் ஆப்ஷனை ஆஃப் செய்யுங்கள். செக்யூரிடி செட்டிங்ஸை எப்போதுமே அதிகபட்டமாக வையுங்கள்.

*

சேவியர்

தினத்தந்தி

நில் நிதானி கணினி

Related image

முன்பெல்லாம் கணினியைப் படித்தோம், இன்று கணினியில் படிக்கிறோம். கணினி படிப்பைக் குறித்த பார்வை இன்று இப்படி விரிவடைந்திருக்கிறது. கணினி என்பது இனிமேல் ஒரு தனிப் பாடமல்ல, எந்தப் பாடத்தையும் இணைக்கும் பாலம் என்பதையே புதிய தொழில்நுட்பக் கல்வி நமக்கு எடுத்துக் கூறுகிறது.

சார்லஸ் பேபேஜ் பத்தொன்பதாம் நூற்றாண்டில் கணினியைக் கண்டுபிடித்தபோது அது இத்தகைய விஸ்வரூப வளர்ச்சியடையும் என எதிர்பார்த்திருக்க வாய்ப்பில்லை. கூட்டல் கழித்தல் போடுகின்ற ஒரு கேல்குலேட்டர் போல தான் அதன் முதல் பிரசவம் இருந்தது. அது படிப்படையாக வளர்ச்சியடைந்து, ஆயிரத்து தொள்ளாயிரத்து முப்பத்து ஏழில் முதல் தலைமுறை கணினி உருவானது.எலக்ட்ரானிக் நியூமரிகல் இன்டிகிரேட்டர் அன்ட் கம்ப்யூட்டர் என்பது தான் அப்போதைய பெயர்.

பெயரைப் போலவே அது அளவிலும் மிகப்பெரியதாக இருந்தது. சுமார் பதினெட்டாயிரம் வேக்யூம் டியூப்கள் ஒரு கணினியில் இருந்தன. அதை பாதுகாப்பாக வைக்க சுமார் முக்கால் கிரவுண்ட் நிலம் தேவைப்பட்டது ! அதன் எடை சுமார் முப்பதாயிரம் கிலோ என்றால் பார்த்துக் கொள்ளுங்கள். இன்றைய கணினிகளோடு ஒப்பிடுகையில் வளர்ச்சி வியப்பூட்டுகிறது.

நமது அன்றாட வாழ்க்கையை இன்றைய கணினி யுகம் தலைகீழாய்ப் புரட்டிப் போட்டுவிட்டது என்று சொல்லலாம். குறிப்பாக இணையம் வந்தபின்பு கணினி தொழில்நுட்பம் கரைபுரண்ட காட்டாறுபோல திமிறிப் பாய்ந்து விட்டது. யாரும் எதிர்பார்க்காத அளவுக்கு உலகத்தை ஒற்றை புள்ளியில் கொண்டு வந்து சேர்த்து விட்டது.

திரைகடல் ஓடியும் திரவியம் தேடு என்பதெல்லாம் பழைய கதையாகி, வலைகடல் ஓடி திரவியம் தேடு எனும் புது மொழியில் இன்றைய தொழில்நுட்ப உலகம் பயணிக்கிறது.

‘ஊருக்கு போனதும் கடுதாசி போடுப்பா’ என்று யாரும் இன்றைக்கு சொல்வதில்லை. பயணம் செய்ய ஆரம்பித்த நொடி முதல் ஒவ்வொரு நிமிடமும் நாம் எங்கே இருக்கிறோம் என்பதை ஜிபிஎஸ் டிராக் செய்கிறது. அதை வீட்டிலிருந்தபடியே அம்மாக்கள் கண்டு நிம்மதிப் பெருமூச்சு விடுகிறார்கள்.

இன்லென்ட் என்றால் என்ன ? தபால் நிலையம் என்பது பால் விற்கும் இடைமா ? என்றெல்லாம் கேள்வி கேட்கக்கூடிய புதிய தலைமுறையை இன்றைய கணினி யுகம் உருவாக்கியிருக்கிறது.

பழைய கால திரைப்படங்களில் கிளைமேக்ஸ் காட்சியில் கதாநாயகியை அவளது தந்தை ரயிலிலோ, விமானத்திலோ ஏற்றிக் கொண்டு சென்றுவிடுவார். காதலர்கள் பிரிந்து விடுவார்கள். கண்ணைக் கசக்கிக் கொண்டே பார்வையாளர்களும் பிரிந்து விடுவார்கள். அப்படி ஒரு கிளைமேக்ஸ் வைத்தால் இன்று சிரிப்பார்கள். உலகின் எந்த மூலையில் இருந்தாலும் முகம் பார்த்துப் பேசும் தொழில்நுட்பங்கள் நமது கையடக்கக் கருவிகளில் வந்துவிட்டன.

சமூக வலைத்தளங்களின் வரவுக்குப் பின்பு உலகின் நட்பு வட்டாரங்களெல்லாம் டிஜிடல் குட்டிச் சுவற்றில் வந்தமர்ந்து விட்டன. அரட்டைகளும், பரிமாற்றங்களும் சாதாரண சங்கதிகளாகிவிட்டன. பள்ளிக்கூட நண்பர்கள், கல்லூரி நண்பர்கள், குடும்ப உறுப்பினர்கள் என உறவுகளின் இழைகள் அனைத்தையும் எப்போது வேண்டுமானாலும் தொடர்பில் கொண்டிருக்கக் கூடிய ஒரு சூழலை கணினி யுகம் நமக்கு உருவாக்கித் தந்திருக்கிறது.

கடந்த தலைமுறைக்கும், இந்த தலைமுறைக்கும் இடையேயான மிகப்பெரிய இடைவெளியாய் இந்த தொழில்நுட்பப் புரட்சியைச் சொல்லலாம். எந்த முன்பதிவுக்கும் அலுவலகம் சென்று வரிசையில் நிற்கத் தேவையில்லை, எந்த பில் கட்டவும் அரசு அலுவலகங்களில் செல்லத் தேவையில்லை, பணத் தேவைக்காய் வங்கிகளில் டோக்கன் வாங்கி நொந்து கொள்ளத் தேவையில்லை, கடிதம் அனுப்ப ஸ்டாம்ப் தேடித் திரியத் தேவையில்லை, ஏன் சாப்பிடுவதற்குக் கூட சமைக்கத் தேவையில்லை எனும் நிலமையை கணினி யுகம் உருவாக்கித் தந்திருக்கிறது.

கேமரா, ரேடியோ, டேப்ரிக்கார்டர், டிவிடி பிளேயர், தபால் நிலையம், வங்கி என சர்வத்தையும் உள்ளடக்கியபடி கணினி நுட்பத்தின் வசீகரமாய் போன்கள் கரங்களில் இருக்கின்றன. இனியும் இவை அடையப் போகின்ற எல்லைகளை நினைத்தால் பிரமிப்பாய் இருக்கிறது.

கணினி யுகம் அழிந்து விடும், கணினி தொழில்நுட்பம் முடிந்து விடும் என்றெல்லாம் ஒவ்வொரு காலகட்டத்திலும் ஊகங்கள் வெளியாவதுண்டு. ஆனால் இதை மட்டும் மனதில் பச்சை குத்திக் கொள்ளுங்கள், “கணினியுகம் என்றைக்குமே அழிந்து விடாது. கூடு விட்டுக் கூடுபாயும் நுட்பம் போல ஒரு தொழில்நுட்பத்திலிருந்து இன்னொரு தொழில்நுட்பம் நோக்கி அது பாய்ந்து கொண்டே இருக்கும்” அவ்வளவு தான் வித்தியாசம்.

உதாரணமாக கணினி முதலில் வந்தபோது அது டைப் செய்யவும், தகவல்களை டிஜிடலாய் சேமிக்கவும் தான் பயன்பட்டது. பின்னர் ஒரு அலுவலகத்தை டிஜிடல் மயமாக்க உதவியது. அது பின்னர் உலக வலையுடன் இணைந்து வலைத்தளங்களின் வளர்ச்சிக்கு அடிகோலியது. பின்னர் வங்கிகளையும், நிறுவனங்களையும் இணைத்தது. பின்னர் மொபைல் தொழில்நுட்பத்துக்குத் தாவியது. வலைத்தளங்களை விட்டு விட்டு ஆப்களை தயாரிக்க நிறுவனங்கள் களமிறங்கின. இப்போது மொபைல்களையும் தாண்டி அணியும் தொழில்நுட்பத்தை நோக்கி நுட்பம் நாலுகால் பாய்ச்சலில் ஓடுகிறது.

ஆர்டிபிஷியல் இன்டலிஜென்ட் எனப்படும் செயற்கை அறிவு தொழில்நுட்பம் இன்றைக்கு மிகப்பிரபலம். கருவிகள் தாங்களாகவே முடிவெடுத்துச் செயல்படும் வகையில் வடிவமைக்கப்படுகின்றன. அத்துடன் மெஷின் லேர்ணிங் தொழில்நுட்பம் இணைந்துவிட்டது. சமீப காலமாக தொழில்நுட்ப உலகை ஆக்கிரமித்திருக்கும் பிக்டேட்டா, கிளவுட் கம்ப்யூட்டிங், ஆகுமென்டட் ரியாலிடி, இன்டர்நெட் ஆஃப் திங்க்ஸ் பிளாக் செயின் போன்றவையெல்லாம் கைகோர்த்து இணைந்து பயணிக்கின்றன.

ஜிம்மி… போய் பேப்பர் எடுத்துட்டு வா என்றது பழைய காலம். “அலெக்ஸா.. இன்னிக்கு என்ன நியூஸ்” என கேட்பது இந்தக் காலம். வீட்டின் வரவேற்பறைகளில் ஜம்மென அமர்ந்திருக்கும் கூகிள் ஹோம்களோ, அமேசான் அலெக்ஸாக்களோ நாம் கேட்கும் கேள்விகளுக்கெல்லாம் அட்சர சுத்தமாய்ப் பதில் சொல்கின்றன. நமக்குத் தேவையான உதவிகளைச் செய்கின்றன. ஆலோசனைகளைச் சொல்கின்றன. இனிமையான பாடலை இசைத்து மனதை இலகுவாக்குகின்றன.

தொழில்நுட்ப உலகம் நம்மை கணினியின் கரங்களில் ஒப்படைத்து விட்டது. கணினியையும், டிஜிடலையும் அவரச அவரசமாய் அரவணைத்துக் கொள்ளும் இந்த சூழலில் நாம் செய்ய வேண்டிய முக்கியமான இரண்டு விஷயங்கள் உண்டு.

ஒன்று, உறவுகளையும் நேசத்தையும் என்றும் டிஜிடல் இழைகளில் கட்ட முடியாது. நேரடியான உரையாடலையும், அன்பின் சந்திப்புகளையும், கரம் கோர்த்த ஆறுதலையும் எந்த கணினியும் இடம் பெயரச் செய்ய முடியாது. அத்தகைய மனிதத்தின் மதிப்பீடுகளை கணினியின் கரங்களுக்கு விற்று விடாதிருப்போம்

இரண்டு, இந்த டிஜிடல் வெளி ஆபத்துகளை உள்ளடக்கியது. எல்லாமே மறைந்திருப்பதைப் போலத் தோற்றமளிக்கும். ஆனால் வெளிப்படையாய் விழித்திருக்கும். இதில் நமது ரகசியத் தகவல்களையோ, படங்களையோ, செய்திகளையோ பகிராதிருப்போம். வெறுப்பின் உரையாடல்களையோ, வன்மத்தின் விவாதங்களையோ செய்யாதிருப்போம்.

இன்று உலகக் கணினி கல்வி தினம். கணினியை கல்வியாய்க் கற்போம், அன்பை உயிருக்குள் வைப்போம்.

*

சேவியர்.

daily thanthi

வெடிக்கும் மொபைல் போன்கள் தடுக்கும் வழிமுறைகள் !

Image result for mobile battery blast

ஒவ்வொரு நாளும் நமது கைகளிலும், பைகளிலும் வெடி மருந்தைச் சுமந்து செல்கிறோமோ எனும் அச்சத்தை உருவாக்குகின்றன சமீபத்திய நிகழ்வுகள். மும்பை உணவகம் ஒன்றில் உணவருந்திக் கொண்டிருந்தவரின் செல்போன் படீரென வெடித்துச் சிதறியது. அதிர்ஷ்டவசமாக அவர் உயிர்தப்பினார். அந்த செல்போனை அவர் கையில் கூட வைத்திருக்கவில்லை, தனது பாக்கெட்டில் தான் வைத்திருந்தார் !

கிராடில் பண்ட் குழுவின் தலைமைச் செயல் அதிகாரி நஸ் ரீன் ஹாசன் கடந்த மாதம் அகால மரணமடைந்தார். இரவில் அவர் தூங்கிக் கொண்டிருந்தபோது போன் வெடித்துச் சிதறியது. அவர் செய்த ஒரே தவறு தூங்கிக் கொண்டிருந்த போது அருகில் மொபைலை சார்ஜ் செய்ய வைத்திருந்தது தான்.

சில மாதங்களுக்கு முன்பு உமா ஓரம் எனும் பதின் வயதுப் பெண் உறவினர் ஒருவருடன் பேசிக்கொண்டிருந்த போது போன் வெடிக்க இறந்து போனார். போன் சார்ஜில் இருந்தபோதே அவர் போன் பேசியது தான் இந்த அசம்பாவிதத்தின் காரணமாய் அலசப்பட்டது.

மொபைல் போனில் இருக்கின்ற விஷயங்களைத் திருடி நமக்கு ஆபத்து ஏற்படுத்துபவர்கள் ஒரு புறம் இருக்க,  இப்படி மொபைல் போன்களே ஆபத்தாய் மாறியிருப்பது மக்களிடையே அதிர்ச்சி அலைகளை உருவாக்கியிருக்கிறது.

பேட்டரி வெடிக்கும் விஷயத்தில், சாம்சங் காலக்ஸி 7 வகை போன்கள் தான் முதலில் அதிகம் பேசப்பட்டன. நிறுவனம் அந்த வகை போன்களில் 25 இலட்சம் போன்களை திரும்ப எடுத்துக் கொண்டது. இப்போது எந்த மொபைலும் பாதுகாப்பில்லை எனுமளவில் எல்லா வகை போன்களும் வெடிக்க ஆரம்பித்திருக்கின்றன.

ஸ்மார்ட் போன்கள் இல்லாத வாழ்க்கை இனிமேல் சாத்தியமில்லை என்று தான் சொல்ல வேண்டும் பாதுகாப்பாக இருப்பது எப்படி என்பதைத் தெரிந்து கொள்வது ஒன்றே இப்போதைக்கு சிறந்த வழி.

  1. போன்களில் பேட்டரி நாசமாகிவிட்டால் அதை மீண்டும் பயன்படுத்தவே பயன்படுத்தாதீர்கள். வேறு பேட்டரி போடும்போது விலையைப் பார்க்காமல் ஒரிஜினல் பேட்டரிகளை மட்டுமே வாங்குங்கள்.
  2. போன் கீழே விழுந்து பாட்டரி அடிபட்டாலோ, அதில் சேதம் ஏற்பட்டிருந்தாலோ, விரிசலோ, கீறலோ, துளையோ ஏற்பட்டாலோ அந்த பேட்டரியை பயன்படுத்தாதீர்கள். அத்தகைய பேட்டரிகள் வெடிக்கும் வாய்ப்பு மிக அதிகம்.
  3. போன்கள் அதிக வெப்பம் படுகின்ற இடத்தில் வைத்திருக்காதீர்கள். முடிந்தவரை நிழலான, குளிரான இடமே அதற்குப் பாதுகாப்பு. அதிக வெப்பம் பேட்டரியின் உள்ளே உள்ள சின்னச் சின்ன செல்களை உடைக்கும். அது பின்னர் பேட்டரி வெடிக்க காரணமாகலாம்.
  4. இரவு முழுவதும் போனை சார்ஜில் போடவே போடாதீர்கள். சில மணி நேரங்கள் மட்டுமே சார்ஜில் வைத்திருங்கள். எக்காரணம் கொண்டும் படுக்கும் அறையில் போனை சார்ஜ் செய்யாதீர்கள். நீண்ட நேரம் சார்ஜ் செய்வது பேட்டரி உள்ளுக்குள் சூடாக காரணமாகிவிடும்.
  5. போன் கவர்களிலும் கவனம் தேவை. .முழுக்க முழுக்க காற்றோட்டம் இல்லாத கவர்களை வாங்கி போனுக்கு மாட்டி விடாதீர்கள்.  வெப்பம் உள்ளேயே தங்கிவிட அது காரணமாகி விடும்.
  6. உங்கள் பேட்டரியின் ஏதோ ஒரு பாகம் மட்டும் அதிக சூடாகிறதெனில் கவனம் தேவை. பேட்டரி செயலிழப்புக்கு அது காரணமாகிவிடும். அத்தகையை பேட்டரிகளை மாற்றி விடுவது நல்லது. குறைந்த பட்சம் சூடாகாமல் பார்த்துக் கொள்வது அவசியம்.
  7. பெரும்பாலான நேரங்களில் ‘டேட்டா’ வை அணைத்து வைத்திருந்தால் போன் சூடாவதைத் தடுக்கலாம். டேட்டா அணைக்கப்பட்ட போன் விரைவிலேயே குளிர் நிலைக்குத் திரும்பி விடும்.
  8. இன்றைக்கு நம்மிடம் புழங்கும், அதி விரைவாக சார்ஜ் செய்யும் பேட்டரிகள், பேட்டரியை சூடாக்கி விடுகின்றன. பவர் அதிகமாக அதிகமாக, பேட்டரியின் வெப்பமும் அதிகரித்துக் கொண்டே தான் இருக்கும். கவனமாய் வாங்குங்கள்.
  9. போன் சூடாக இருக்கும் போது போனை சார்ஜ் செய்யாதீர்கள். அதை அணைத்து வைத்து குளிர வையுங்கள். குளிரான பின்பு மட்டுமே சார்ஜ் செய்யுங்கள்.
  10. சரியான சார்ஜரை மட்டுமே பயன்படுத்துங்கள். உங்கள் போனில் சொருக முடியும் என்கிற எல்லா சார்ஜர்களையும் பயன்படுத்தாதீர்கள். உங்கள் போனுக்குரிய சரியான மின் அளவு தருகின்ற சார்ஜர்களை மட்டுமே பயன்படுத்துங்கள். ஒரிஜினல் சார்ஜர்களே பாதுகாப்பானவை.
  11. சார்ஜ் போட்டுக்கொண்டே பேசுவது, பாட்டு கேட்பது, படம் பார்ப்பது போன்றவை ஆபத்தானவை. சார்ஜ் போடும்போது போனை பயன்படுத்தவே பயன்படுத்தாதீர்கள். அதே போல போனில் இணைக்காமல், சார்ஜரை மட்டுமே ஆன்பண்ணி வைத்திருப்பதையும் தவிருங்கள்.
  12. அதிக வெப்பம் படக்கூடிய இடங்களான, கார் டேஷ்போர்ட், சமையலறை, நேரடியாக சூரிய ஒளி படும் இடங்கள் இங்கெல்லாம் போனை வைக்காதீர்கள். அது ஆபத்தை விலைக்கு வாங்குவது போல.
  13. சார்ஜ் செய்யும் போது போனை ஆஃப் செய்தோ, ஏரோப்ளேன் மோட் போட்டோ, குறைந்த பட்சம் டேட்டாவை ஆஃப் செய்தோ வையுங்கள். பேட்டரி சூடாவதை அது தடுக்கும்.
  14. போனுக்கு அதிக அழுத்தம் கொடுக்காதீர்கள். போன் மீது அமர்வது, அதிக பளுவான பொருட்களை அதன் மீது வைப்பது போன்றவற்றையெல்லாம் தவிருங்கள்.
  15. பவர் பேங்க் பயன்படுத்துவதாக இருந்தால், நல்ல தரமான நிறுவனத் தயாரிப்புகளை மட்டுமே வாங்கிப் பயன்படுத்துங்கள். மலிவாகக் கிடைக்கிறது என்பதற்காக பெயர் தெரியாதவற்றையெல்லாம் வாங்காதீர்கள்.
  16. வைஃபை, புளூடூத் போன்றவற்றை ஆஃப் செய்தே வைத்திருங்கள். தேவையான நேரங்களில் மட்டும் அதை ஆன் செய்யும் பழக்கத்தைக் கொண்டு வாருங்கள்.
  17. போன் ஈரமாக இருந்தாலோ, மழையில் நனைந்திருந்தாலோ அதை சார்ஜ் செய்ய வேண்டாம். அதன் ஈரம் முழுமையாய் உலர்ந்த பின்பே சார்ஜ் செய்யுங்கள்.
  18. பேட்டரிகளைக் கழற்றி மற்ற உலோகங்களோடு இணைத்து வைத்திருக்க வேண்டாம். அதைத் தனியாக, பாதுகாப்பான இடங்களில் வைத்திருங்கள்.
  19. தேவையற்ற ஆப்ஸ் களை அழித்து விடுங்கள். போனில் நிறைய ஆப்ஸ் வைத்திருப்பது போனை சூடாக வைத்திருக்கும். தேவையற்ற ஆப்ஸை அன் இன்ஸ்டால் செய்வது உங்களது போனை கூலாக வைத்திருக்க உதவும்.
  20. வீடியோ சேட், ஜிபிஎஸ், வைஃபை டவுன்லோட் போன்றவை பேட்டரியை அதிகம் பயன்படுத்தும். அதன் பயன்பாட்டைக் குறையுங்கள். செட்டிங்க்ஸ் சென்று எவையெல்லாம் பேட்டரியை அதிகம் பயன்படுத்துகின்றன என்பதைப் பாருங்கள். அதையெல்லாம் நீக்க முடியுமா என பாருங்கள். ‘

இப்படிப்பட்ட சில விஷயங்களைக் கடைபிடித்தால் போன் வெடிக்கும் ஆபத்திலிருந்து தப்பிக்கலாம். விழிப்பாய் இருப்போம், வெடிக்காமல் காப்போம்.

*

சேவியர்

Puthiya thalaimurai, July 18

பெண்ணின்றி அமையாது உலகு !

Image result for mother and child

பெண்ணில்லாத உலகத்தைக் கற்பனை செய்து பார்ப்பதே கடினமான ஒன்று ! அது ஒரு வறண்ட பாலையைப் போலவோ, நிழலில்லாத வெயில் சாலையைப் போலவோ மனதுக்குள் அனலாய் படரும்.

பெண்களின் உலகம் அழகானது ! அது உணர்வுகளால் பின்னப்பட்டது. ஆண்களின் உலகம் உழைப்பினாய் ஆனது ! பெண்களின் உலகம் உறவுகளால் ஆனது ! பெண்கள் வசிக்கும் வீடுகள் பூந்தோட்டங்களாகவும், ஆண்கள் மட்டுமே உலவும் வீடுகள் உழவு நிலங்களாகவும் காட்சியளிக்கும்.

எந்த ஒரு ஆணும் முழுமையடைய வேண்டுமெனில் அவன் மூன்று பெண்களின் அரவணைப்பில் வளரவேண்டும். அதில் முதலாவதாக வருபவர் அன்னை ! ஒவ்வோர் மனிதனுக்கும் முதல் காதல் அன்னையோடு தான். கடவுளின் அன்பை, இயற்கையின் அழகை, நேசத்தின் செயலை அவன் அறிமுகம் கொள்வது அன்னையிடம் தான் !

விழியும் விழியும் நேசம் பரிமாறும் அழகை நீங்கள் அன்னை மழலை உறவில் தான் பரவசத்துடன் காண முடியும். புன்னகைக்குள் புதையல் இருப்பதை அந்த அன்னைச் சிரிப்பில் தான் அறிய முடியும். மண்ணை மிதிக்கும் முன் மெல்லிய பாதங்கள் என்னை மிதிக்கட்டும் என கன்னம் நீட்டும் அன்பல்லவா அன்னை !

தொப்புழ் கொடியில் நேசம் ஊற்றி, மழலை வழியில் மடியில் ஏந்தி, சின்ன வயதில் தோளில் தூக்கி, பருவ வயதில் பெருமிதம் சிந்தி, கடைசி வரையில் கண்ணில் சுமப்பவளல்லவா அன்னை ! முதுமையின் முக்கால் படியில் நடக்கும் போதும் அன்னைக்கு பிள்ளை மழலையாய் தான் இருப்பான். அது தான் அன்னை அன்பின் தனித்துவம் ! மறக்க முடியா மகத்துவம்.

அன்னையின் அருகாமையில் இருப்பவன் சொர்க்கத்தின் வாசனையை நுகர்வான். தலைகோதும் அன்னையின் விரல்களில் இருப்பவன் துயரத்தின் தனிமையைத் தாண்டுவான். புன்னகைக்கும் அன்னையின் நிழலில் வாழ்பவன் முழுமையாய் வாழ்க்கையை நேசிப்பான். அன்னை, ஒரு உயிரை உலகிற்கு அறிமுகம் செய்தவள் மட்டுமல்ல !
ஒரு உயிரை உலகாக அறிமுகம் செய்து வைத்தவள்.

நம் மழலைப் பாதங்களை மண்ணில் பதிய வைத்தவள் அன்னையெனில், நமது கரங்களுக்கு சிறகுகளை முளைப்பிக்க வைத்தவள் சகோதரி தான். சகோதரிகளின் குடும்பத்தில் வளர்பவன் நீரோடையின் அருகே வளரும் மரம் போன்றவன். செழிப்பு அவனுக்கு குறைவு படாது. பெண்மையைப் போற்றும் மனிதனாக அவன் வளர்வான்.

தவறு செய்யும் ஆண்களை, ‘அக்கா தங்கச்சி கூட பொறக்கலையா ?’ என்று கேட்பார்கள். காரணம், அக்கா தங்கச்சி கூட பிறந்தவன் ஒழுக்கமானவனாக இருப்பான் எனும் நம்பிக்கை. அக்கா என்பவள் இரண்டாம் அன்னை ! தங்கை என்பவள் மூத்த மகள் ! சகோதரிகளோடு பிறந்தவர்கள் கடவுளின் கருணையை கண்களில் பெற்றவர்கள். பிறரை சகோதரிகளாய் பார்க்கத் தெரிந்தோர் கருணையாம் கடவுளை கண்களில் பெற்றவர்கள்.

வண்ணத்துப் பூச்சியின் அழகிய சிறகாய், பாறை வெளியின் நிழல் கூடாரமாய், தனிமை வெளியின் நம்பிக்கைத் துணையாய் எப்போதும் கூட வருபவர் தான் சகோதரி. பகிர்தலின் புனிதத்தை முதலில் கற்றுத் தருபவள் அவள் தான். விட்டுக் கொடுத்தலின் அழகை புரிய வைப்பவள் அவள் தான். தங்கைக்கு அண்ணனாய் இருப்பது என்பது தேவதைக்கு சிறகாய் இருப்பதைப் போல சுகமானது !

இந்தப் பணத்தில் கடைசியாய் நுழைந்து, கடைசி வரை நடப்பவர் தான் மனைவி ! இறைவன் இணையாய் கொடுக்கும் துணை ! நம் உதிரத்தின் பாகமல்ல, ஆனால் நமக்காய் உதிரம் சிந்த தயாராய் இருப்பவர். தியாகத்தின் முதல் அறிமுகம் ! தன் நிலத்தை விட்டு, தன் தோட்டத்து செடிகளை விட்டு, இடம் பெயர்ந்து போய் இன்னோர் நிலத்தில் வாசம் வீசும் மலர் !

இரண்டறக் கலத்தலின் இல்லற விளக்கம் மனைவி ! பூவாய் வாழ்ந்து இந்த பூமிக்கு புதிய பூக்களைக் கொடுப்பவள் தான் மனைவி. வெளிப்படையான அன்பின் வெளிச்சப் புள்ளி. ஒளிவு மறைவற்ற நேசத்தின் தோழி. உயிருக்குள் உயிரைப் பதியமிடும் உன்னதம் ! உயிரிலிருந்து உயிரை பிரித்தெடுக்கும் பிரமிப்பு. என மனைவியின் அன்பு மகத்தானது !

மனைவியின் மௌனம் யுத்தத்துக்கு சமமான வீரியமானது. மனைவியின் கண்ணீர் பெருங்கடலின் ஆர்ப்பரிப்புக்கு சமமானது. மனைவியின் சிரிப்பு நீள் வானத்தின் பெருமழைக்கு ஒப்பானது. மனைவி என்பவள் மனிதனோடு நடக்கும் இறைவனின் பிம்பம். இமைகளில் இடையிலும் சுமைகளைத் தாங்கும் வலிமை அவளுக்கு உண்டு. ஒரு சின்ன பிரியத்தின் விசாரிப்பில் பிரபஞ்சத்தை பரிசளிக்கும் நேசம் அவளிடம் உண்டு.

பெண்மையே ஆண்மையைக் கட்டியெழுப்புகிறது. மென்மையே வலிமையின் அடிப்படை. இந்தப் பெண்களோடு இரண்டறக் கலந்து வாழ்ந்தவர்கள் வாழ்வின் அழகையும், அர்த்தத்தையும் புரிந்து கொள்கின்றனர் !

என் அம்மாவின் முந்தானை பிடித்து நான் வளர்ந்திருக்கிறேன். புரியாமையின் பொழுதுகளில் அவரோடு வழக்காடியிருக்கிறேன். நான் செய்வதே சரி என பிடிவாதம் பிடித்திருக்கிறேன். சண்டை போட்டிருக்கிறேன். எல்லா சண்டைகளிலும் வெற்றி பெறும் வலிமை இருந்தும், அதை என் உதடுகளில் சூடி புன்னகைக்க வைத்தவர் அம்மா. அப்படித் தான் அம்மாவைப் புரிந்து கொண்டேன்.

எரிச்சலின் பொழுதுகளில், ஏமாற்றங்களின் வீதிகளில், அழுத்தங்களின் அரவணைப்பில் என் ஆயுதங்களையெல்லாம் நிராயுதபாணியான மனைவியை நோக்கி வீசியிருக்கிறேன். புறமுதுகு காட்ட மறுத்த ஈகோவின் சண்டைகளிலும் கலிங்க யுத்தமாய் காயங்களை நிரப்பியிருக்கிறேன். அவை தான் மனைவியை எனக்குப் புரிய வைத்தன‌.

சகோதரியோடு சண்டையிடாத பால்ய தினங்களை எண்ணிவிடலாம். அந்த சிறு வயதுச் சண்டைகள் தான் இன்றைக்கு சண்டையில்லாத பொழுதுகளை உருவாக்கித் தந்திருக்கின்றன. அத்தகைய சண்டைகளில், விவாதங்களில், முரண்டு பிடித்தல்களில் தான் என் சகோதரிகளை நான் புரிந்து கொண்டேன்.

பெண்களோடு இணைந்து வாழும் வாழ்க்கை நமக்கு புரிதலைக் கற்றுத் தருகிறது. பிரியத்தையும் பெற்றுத் தருகிறது.

அன்னை தெரசாவின் புன்னகை மென்மையானது ! அதுவே வலிமையான அன்பின் ஆயுதம் !பேனா மென்மையானது, வலிமையான சிந்தனைகளால் உலகைப் புரட்டும் வலிமை அதற்கு உண்டு. கண்ணீர் மென்மையானது ! மாபெரும் அரசுகளை நிலைகுலைய வைக்கும் வீரியம் அதற்கு உண்டு. பெண்மை மென்மையானது ! ஆண்மையின் வெற்றி தோல்வியை நிர்ணயிக்கும் வல்லமை அதற்கு உண்டு.

அன்னையின் மேகத்தில் துளியாய் உருவாகி, சகோதரி எனும் துளிகளோடு இணைந்தே பயணித்து, மனைவி எனும் மண்வெளியில் இரண்டறக் கலந்து அன்பின் நதியாய்க் கடலை அடைவதே இனிமையான வாழ்க்கை !

பெண்மையை நேசிப்போம் !
நமக்கு நேசத்தைக் கற்றுத் தந்தது அவர்கள் தான் !

பெண்மையை மதிப்போம் !
நம் மதிப்புக்கு அடிப்படை அவர்கள் தான் !!

பெண்மையை போற்றுவோம் !
எந்த ஆண்மையிலும் மெல்லிய பெண்மை உண்டு !

இனிய மகளிர் தின நல்வாழ்த்துகள்

குழந்தைகளையும் குறிவைக்கும் ஆப்ஸ் !

Image result for kids playing with mobile

பிளே கிரவுண்ட் தெரியாது ! ஆனால் பிளே ஸ்டோர் தெரியும் !! இது தான் இன்றைய குழந்தைகளின் நிலை. இப்படி டிஜிடல் விளையாட்டுகளில் சிக்கிக் கிடக்கும் குழந்தைகளைக் குறிவைத்து தகவல் திருட்டுகள் நடக்கின்றன என்பது தான் இப்போதைய அதிர்ச்சித் தகவல். கூகிள் பிளேஸ்டோரில் உள்ள ஆயிரக்கணக்கான ஆப்-கள் அமெரிக்காவின் குழந்தைகள் தகவல் பாதுகாப்பு சட்டமான கோப்பா வை US Children’s Online Privacy Protection Act (Coppa)மீறுகின்றன எனும் கண்டுபிடிப்பு மிகப்பெரிய சர்ச்சையாக உருமாறியிருக்கிறது. இந்தகண்டுபிடிப்பை நிகழ்த்தியிருப்பவர்கள் அமெரிக்காவின் கலிபோர்னியாவிலுள்ள இண்டர்நேஷனல் கம்ப்யூட்டர் சயின்ஸ் இன்ஸ்டிடியூர் ஆய்வாளர்கள்.

இன்றைய தொழில்நுட்ப உலகில் ஸ்மார்ட்போன் செலுத்தும் ஆதிக்கத்தைப் போல வேறெதுவும் செலுத்தவில்லை என்பது தான் உண்மை. பெரும்பாலான மக்களின் பொழுதுகள் குட்டிக் குட்டி வெளிச்சத் திரைகளில் அடங்கிவிடுகின்றன.

எட்டு வயதுக்கும், பதிமூன்று வயதுக்கும் உட்பட்ட ஆறாயிரம் குழந்தைகளை வைத்து ஒரு ஆய்வு சமீபத்தில் நடத்தப்பட்டது. அதில் 54 சதவீதம் குழந்தைகள், தங்கள் பெற்றோர் தங்களைக் கவனிப்பதை விட அதிக நேரம் செல்போனே கதியென கிடப்பதாய் கவலை தெரிவித்திருந்தனர்.

“எங்கள் குழந்தைகளுக்கு நல்ல முன்னுதாரணமாய் தாங்கள் வாழவில்லை” என குற்ற உணர்வோடு இருக்கும் பெற்றோர் எண்பத்து இரண்டு சதவீதம் பேர் ! அதில் ஐம்பத்து இரண்டு சதவீதம் பேர், எத்தனை முயன்றாலும் இந்த ஸ்மார்ட்போன் அடிமைத்தனத்தை விட்டு வெளியே வரமுடியவில்லை என கவலை தெரிவிக்கின்றனர்.

இருபத்து ஐந்து சதவீதம் பெற்றோர் தங்கள் குழந்தைகள் ஸ்மார்ட்போனுக்கு அடிமையாய் இருப்பதாகவும், எப்படியாவது அவர்களை வெளியே கொண்டு வரவேண்டும் எனவும் விரும்புகின்றனர். ஆனால் அவர்களால் முடியவில்லை.

எல்லாவற்றையும் விட கவலைக்குரிய விஷயம் இது தான். “ஸ்மார்ட்போனைத் தான் எங்கள் பெற்றோர் எங்களை விட அதிகம் நேசிக்கிறார்கள்” என முப்பத்து இரண்டு சதவீதம் குழந்தைகள் கவலையுடன் தெரிவித்திருக்கின்றனர்.

உண்மையிலேயே நமது உறவுகளின் நெருக்கத்தை உடைக்கும் அளவுக்கு டிஜிடல் வலிமை பெற்று விட்டதா ? குடும்பத்தை விட அதிகமாய் சமூக வலைத்தளங்கள் நம்மை ஆதிக்கம் செலுத்துகின்றனவா ?

நம்முடைய குழந்தைகளை நாம் கவனிக்காவிட்டால் அவர்களை வேறு யாரோ கவனிப்பார்கள். குழந்தைகளை நாம் வனையாவிட்டால் அவர்களை வேறு யாரோ வனைந்து முடிப்பார்கள். அது அவர்களுடைய வாழ்க்கைக்கு மிகப்பெரிய பாதிப்பாகவும், அச்சுறுத்தலாகவும் மாறிவிடும்.

அமெரிக்கா, கனடா போன்ற நாடுகளில் நடத்தப்பட்ட ஆய்வு ஒன்று, ‘பத்து வயது குழந்தைக்கு சாதாரணமாக ஒரு ஸ்மார்ட் போன் சொந்தமாகிவிடுகிறது’ எனும் கண்டுபிடிப்பை வெளியிட்டது. இந்தியாவில் அந்த அளவுக்கு இல்லையெனினும், பெற்றோரின் ஸ்மார்ட்போன்களை சகட்டு மேனிக்கு பயன்படுத்தும் குழந்தைகளின் எண்ணிக்கை மிக அதிகம் ! ஒன்பது வயதுக்குட்பட்ட குழந்தைகள் சராசரியாக தினமும் சுமார் இரண்டரை மணி நேரம் போனில் விளையாடுகின்றன என்கிறது ஒரு புள்ளி விவரம்.

இந்த சூழலில் தான் கூகிள் பிளே ஸ்டோரின் பாதுகாப்பு விதி மீறல் அச்ச உணர்வை அதிகரித்திருக்கிறது. கூகிள் ஆப் ஸ்டோரில் உள்ள குழந்தைகளுக்கான ஆப்ளிகேஷன்களை ஆய்வு செய்ததில் 57 சதவீதம் ஆப் கள் பாதுகாப்பு விதிகளை மீறியிருக்கின்றன. இவை குழந்தைகள் ஆன்லைனில் என்ன செய்கிறார்கள் என்பதைக் கவனிக்கின்றன. இது சட்ட விதிகளுக்கு எதிரானது.

சில ஆப்ளிகேஷன்கள் குழந்தைகளின் இருப்பிடத்தையும், காண்டாக்ட் தகவல்களையும் திருடி அனுப்புகின்றன. சில ஆப்ஸ் தனிநபர் தகவல்களை திருடி வேறு இடங்களுக்கு அனுப்புகின்றன. சில ஆப்கள் விளம்பரங்களுக்காக தகவல்களை அனுப்புகின்றன. என நீள்கிறது இந்தப் பட்டியல். பிரபலமான, சுமார் ஏழரை இலட்சம் தடவைகளுக்கு மேல் தரவிறக்கம் செய்யப்பட்ட ஆப்கள் மட்டுமே இதில் பரிசீலனைக்கு எடுத்துக் கொள்ளப்பட்டன என்பது குறிப்பிடத் தக்கது.

இவையெல்லாம் குழந்தைகளுக்கான ஆப்ளிகேஷன்கள் என்பது தான் கவனிக்கவேண்டிய விஷயம். குழந்தைகளுக்கு கல்வி, பொழுதுபோக்கு, சிந்தனை திறன் வளர்த்தல் என வசீகரிக்கும் ஆப்களின் நிலை தான் இது என்பது கவலையளிக்கிறது.

ஏற்கனவே கூகிள் நிறுவனம் தனிநபர் தகவல்களை மிகப்பெரிய அளவில் சேகரிக்கிறது எனும் சர்வதேச சர்ச்சை உயிர்ப்புடன் இருக்கிறது. அவர்களுடைய பல்லாயிரம் கோடி ரூபாய் பிஸினசின் அடிப்படையே இப்படி சேகரிக்கும் தகவல்கள் தான்.

பாதுகாப்பு விதி முறைகளை மீறும் ஆப்கள் மீது கடுமையான நடவடிக்கை எடுக்கப்படும் என கூகிள் நிறுவனம் இப்போது உறுதியளித்திருக்கிறது. குழந்தைகள், குடும்பங்கள் இவற்றின் பாதுகாப்பின் மீது எந்த விதமான தளர்வுக்கும் இடமில்லை என அது தெரிவித்திருக்கிறது. இருந்தாலும் இது எந்த அளவுக்கு சாத்தியம் என்பது கேள்விக்குறியாகவே உள்ளது.

நமது பிள்ளைகளின் பாதுகாப்பை உறுதி செய்யும் கடமை நம்முடையது. குழந்தைகளுக்கு ஸ்மார்ட் போன் பயன்படுத்தக் கொடுப்பதை முடிந்தவரை தடை செய்வது நல்லது. முடியாத பட்சத்தில் சில விதிமுறைகளையேனும் வைக்க வேண்டியது அவசியம்.

குழந்தைகள் சமூக வலைத்தளங்களில் இருக்கின்றார்கள் எனில், யாருடன் தொடர்பில் இருக்கிறார்கள் ? என்னென்ன உரையாடல் நடத்துகிறார்கள் என்பதைக் கவனிப்பது அவசியம். எக்காரணம் கொண்டும் தனிப்பட்ட தகவல்களைப் பகிரக் கூடாது. தனிப்பட்ட படங்களையும் பகிரக் கூடாது எனக் கட்டுப்பாடு விதியுங்கள். யாரேனும் வழக்கத்துக்கு மாறாகவோ, தவறாகவோ பேசினால் பெற்றோரிடம் தெரியப்படுத்த வேண்டும் என்பதை குழந்தைகளுக்குக் கற்றுக்கொடுங்கள்.

2 லொக்கேஷன் சர்வீஸ், ஜிபிஎஸ் போன்றவற்றை ஆஃப் செய்து வைத்திருக்க வேண்டும். நமது இடத்தை பளிச் எனக் காட்டும் சர்வீஸ்களை தேவைப்படும் போது மட்டும் ஆன் செய்வது உசிதம். செக்யூரிடி செட்டிங் சரியாக இருக்கிறதா என்பதை பெற்றோர் ஊர்ஜிதப்படுத்த வேண்டும். குழந்தைகளின் போன் செயல்பாடுகளைக் கவனிக்கும் ஆப்களையும் நீங்கள் பயன்படுத்தலாம்.

3. குழந்தைகள் ஸ்மார்ட்போனில் பார்க்கும் விஷயங்கள், பகிரும் விஷயங்கள் சரியானவை தானா என்பதைக் கவனிக்க வேண்டும். பாலியல் விஷயங்களைத் தாண்டி வெறுப்பை வளர்க்கும் விஷயங்கள், பிரிவினையை உருவாக்கும் விஷயங்கள், பாகுபாடு உருவாக்கும் விஷயங்கள் போன்றவற்றுக்கும் குழந்தைகளைத் தள்ளியே வையுங்கள். ஸ்மார்ட்போன் பயன்படுத்தும் குழந்தைகள் மிக விரைவாக மன அழுத்தத்துக்குள் விழுந்து விடுவார்கள் என்கின்றன மருத்துவ ஆய்வுகள்.

4. குழந்தைகள் போன் விளையாட ஒரு குறிப்பிட்ட நேரத்தை ஒதுக்க வேண்டும். அந்த நேரம் தவிர பிற நேரங்களில் டிஜிடல் பொருட்களை அவர்களிடம் கொடுக்கக் கூடாது. பெற்றோரும் குழந்தைகள் இருக்கும் போது போனை கொஞ்சம் ஒதுக்கியே வைக்க வேண்டும். இரவு எட்டு மணிக்கு மேல் எக்காரணம் கொண்டும் போனைப் பயன்படுத்த அனுமதிக்காதீர்கள். காலை 10 மணிக்கு மேல் மாலை எட்டு மணிக்குள் ஒரு குறிப்பிட்ட நேரத்தை அவர்களுக்கு ஒதுக்கலாம்.

5 சமூக வலைத்தளங்கள், ஆப்கள் மூலமாக வருகின்ற ஆபத்துகள் என்னென்ன என்பதை குழந்தைகளுக்கு விளக்கமாகச் சொல்லி விடுங்கள்.

இப்படி சின்னச் சின்ன விஷயங்களில் கவனமாக இருந்தால் பெரிய பெரிய ஆபத்துகளில் விழாமல் குழந்தைகளைக் காப்பாற்ற முடியும். விழிப்பாய் இருப்போம், விழாமல் தடுப்போம்.

*

 

செல்போன் வெச்சிருக்கீங்களா ?


கைப்பேசிகளைப் பயன்படுத்துவதால் வரும் இன்னல்கள் இவை இவை என நாளொரு மேனியும் பொழுதொரு வண்ணமுமாக ஒரு புறம் ஆராய்ச்சிகள் பயமுறுத்திக் கொண்டே இருக்கின்றன. மறுபுறம், அது குறித்த கவலைகள் ஏதுமற்று இலட்சக்கணக்கான கைப்பேசிகள் பல்வேறு வண்ணங்களிலும், வடிவங்களிலும் தினம் தோறும் விற்பனையாகிக் கொண்டே இருக்கின்றன.

ஆடம்பரம் என கருதப்பட்ட கைப்பேசி இன்று உணவு, உடை, உறைவிடத்துக்கு அடுத்த இடத்தை எட்டிப் பிடித்துள்ளது. வீட்டுக்கு ஒன்று எனும் நிலமை ஆளுக்கு ஒன்று என்றாகி இன்று அலுவலகங்களில் பணிபுரிவோர் ஆளுக்கு இரண்டு கைப்பேசிகளைச் சுமந்து திரியும் நிலைக்கு ஆளாகியிருக்கின்றனர். நவீனம் வசதிகளைத் தரும்போது கூடவே இலவச இணைப்பாக நோய்களையும் தந்து செல்கிறது என்பதை கைப்பேசியின் வரவும் ஊர்ஜிதப்படுத்தியிருக்கிறது.

1972 களில் சோவியத் யூனியன் மின் காந்த அலைகள் உலவும் இடத்தில் பணிபுரியும் மக்களுக்கு வினோதமான நோய்களும், அதற்குரிய அறிகுறிகளும் தெரிவதாக கவலை தெரிவித்தது. அப்போது ஆரம்பித்த இந்த மின்காந்த அலைகளின் பாதிப்பு குறித்த ஆய்வுகள் இன்னும் நீள்கிறது. இந்த கைப்பேசி யுகத்தில் அது மிகவும் வலிமையடைந்திருக்கிறது.

கைப்பேசிகளைப் பயன்படுத்துவோருக்கு மட்டுமல்ல, கைப்பேசிக் கோபுரங்களைச் சுற்றி சுமார் முன்னூறு மீட்டர் சுற்றளவில் வசிக்கும், கைப்பேசியைப் பயன்படுத்தாத மக்களுக்கும் கூட பல விதமான உடல் உபாதைகள் ஏற்படலாம் என்பதையும் பல ஆராய்ச்சிகள் எச்சரிக்கை மணியாக அடித்துள்ளன.

எல்லா நகரங்களின் மூலைகளிலும் கம்பீரமாய் நிமிர்ந்து நிற்கும் இந்த கைப்பேசிக் கோபுரங்கள் அமைதியாக மரணத்தின் நுழைவுச் சீட்டுகளை நகருக்கு வழங்கிக் கொண்டிருக்கிறது என்பது நாம் உணராத நிஜமாக இருக்கிறது.

கைப்பேசியிலிருந்தும், கைப்பேசிக் கோபுரங்களிலிருந்தும் வெளியாகும் எலக்ரோமேக்னட்டிக் அலைகளினால் (மின்காந்த அலை) உருவாகும் எலக்ரோமேக்னட்டிக் ஃபீல்ட் ( மின்காந்த தளம்) EMF தான் இந்த பிரச்சனைகளுக்கெல்லாம் காரணம் என்கின்றன ஆராய்ச்சிகள். எனவே பல்வேறு நாடுகள் குடியிருப்புப் பகுதிகளிலோ, அதை ஒட்டிய பகுதிகளிலோ கைப்பேசிக் கோபுரங்கள் வைக்கத் தடை விதித்திருக்கின்றன. இந்தப் பட்டியலில் இஸ்ரேலும் தற்போது இணைந்துள்ளது.

மனிதர்களை மட்டுமன்றி பறவைகளையும் தாவரங்களையும் கூட இந்த மின்காந்த அலைகள் அழிவை நோக்கி நடத்துகின்றன என்பது துயரத்தைக் கூட்டும் செய்தியாக அமைந்துள்ளது.

நமது தோட்டங்களில் சில ஆண்டுகளுக்கு முன்பெல்லாம் அழையா விருந்தாளியாய் சிறகசைத்துக் கொண்டிருந்த வண்ணத்துப் பூச்சிகளும், பறவைகளும் இன்று காணாமல் போயிருக்கின்றன எனில் அதன் காரணம் கைப்பேசிகளின் கைங்கர்யம் என்கின்றது ஒரு ஆராய்ச்சி.

சுமார் ஐம்பது இலட்சம் பறவைகள் ஆண்டுதோறும் உயிரிழக்க இந்த மின்காந்த அலைகள் காரணமாகின்றன என்கிறது பதறவைக்கும் புள்ளிவிவரம் ஒன்று.

இந்தியாவில் நிகழ்த்தப்பட்ட ஆய்வு ஒன்று இந்த மின்காந்த அலைகளினால் அருகிலுள்ள நிலத்தின் நுண் உயிரிகள் பெரும் பாதிப்புக்குள்ளாகின்றன என கண்டறிந்துள்ளது குறிப்பிடத் தக்கது.

இந்த மின்காந்த அலைகள் மனிதனுடைய மரபணுக்களையும்  ( DNA ) பாதிக்கும் எனும் அதிர்ச்சியூட்டும் ஆய்வு ஒன்றும் தற்போது இரண்டாவது கட்ட ஆராய்ச்சியில் இருக்கிறது. இது நிரூபிக்கப்படுமெனில் இந்த கைப்பேசிகளும், கைப்பேசிக் கோபுரங்களும் அழிக்கப் போவது சமகால மனுக்குலத்தை மட்டுமல்ல, இனிவரும் தலைமுறையும் சேர்த்துதான் எனும் செய்தியையும் கேட்க வேண்டிய நிலை வரும்.

பலர் இவையெல்லாம் கட்டுக்கதை என பிடிவாதம் பிடித்தாலும், கைப்பேசிக் கோபுரங்களை ஒட்டிய பகுதிகளில் பல ஆண்டுகாலம் வாழும் மக்களுக்கு பல்வேறு விதமான நோய்கள் வருவதை பல ஆராய்ச்சிகள் அறிக்கைகளாய் சமர்ப்பித்திருக்கின்றன.

தலைவலி, தூக்கமின்மை, ஞாபக மறதி, துவங்கி விந்தணு பாதிப்பு, அல்சீமர், பார்கின்ஸன், என விரிவடைந்து தற்போது புற்றுநோய், மரபணு பாதிப்பு என உச்ச பட்ச அதிச்சியை தந்திருக்கிறது கைப்பேசித் தொழில் நுட்பம்.

குறிப்பாக கைப்பேசியைப் பயன்படுத்துவது மூளையை பெருமளவில் பாதிப்புக்கு உள்ளாக்குகிறது என்றும், தலையின் மிருதுவான காது பகுதி வழியாக மூளையை மின்காந்த அலைகள் தாக்குவது எளிது என்றும் ஆராய்ச்சிகள் தெரிவிக்கின்றன. கைப்பேசிகளிலிருந்து வெளியாகும் மின் காந்த அலைகளில் எழுபது விழுக்காடு மூளையைத் தாக்குகின்றனவாம்.

குறிப்பாக மண்டையோடு அதிகம் பலமடையாத குழந்தைகள் இந்த மின்காந்த அலைகளினால் பெரும் பாதிப்பு உள்ளாகும் வாய்ப்பு உண்டு. எனவே தான் குழந்தைகள் கைப்பேசியைப் பயன்படுத்தவே கூடாது என அறுதியிட்டுச் சொல்கின்றனர் மருத்துவர்கள்.

ஸ்பெயினிலுள்ள நரம்பு ஆராய்ச்சிக் கூட ஆய்வு ஒன்று இன்னோர் அச்சுறுத்தலைத் தருகிறது. அதாவது இரண்டு நிமிடம் கைப்பேசியில் பேசும் குழந்தைக்கு அடுத்த ஒரு மணி நேரத்துக்கு மூளை செயல்பாடுகள் பாதிப்படைகின்றனவாம்.

கைப்பேசியைப் பயன்படுத்தும் குழந்தைகளுக்கு நன்னடத்தை மீறல் சிக்கல்களும், உளவியல் சிக்கல்களும் ஏற்படும் வாய்ப்பு அதிகம் எனவும் அதே ஆராய்ச்சி தெரிவிக்கின்றது.

சமீபத்தில் பிரிட்டனில் வெளியான ஆய்வு ஒன்று தாய்மைக்காலத்தில் தாய் கைப்பேசியைப் பயன்படுத்தினால் கருவிலிருக்கும் குழந்தையையும் அது பாதிப்புக்கு உள்ளாக்கும் என திடுக்கிட வைத்தது இங்கே குறிப்பிடத் தக்கது.

ஸ்வீடன் நாட்டு ஆராய்ச்சி ஒன்று பத்து வருடங்கள் கைப்பேசியை உபயோகிக்கும் நபருக்கு காதுக்கும் மூளைக்கும் இடையே புற்று நோய் (acoustic neuroma ) வரும் வாய்ப்பு இரண்டு மடங்கு அதிகரிக்கிறது என நிரூபித்திருக்கிறது.

ஒருமணி நேரம் இந்த மின் அலைகளின் வட்டத்துக்குள் இருக்கும் மனித அணு, சுருக்கம் அடைவதாகவும் ஒரு ஆய்வு தெரிவித்தது.

புகை பிடித்தலினால் வருவதை விட அதிகமான பாதிப்பை இந்த மின்காந்த அலைகள் உருவாக்கும் என்று எச்சரிக்கிறார் புற்றுநோய் ஆய்வில் பல விருதுகள் வாங்கிய மருத்துவர் வினி குரானா. இன்னும் பத்து ஆண்டுகளில் மனுக்குலம் புற்று நோய் மனிதர்களின் புகலிடமாகாமல் தடுக்க வேண்டுமெனில் அதன் முயற்சிகள் இப்போதே ஆரம்பிக்கப்பட வேண்டும் என்கிறார் அவர்.

இதை மெய்ப்பிப்பது போல ஸ்வீடன் நாட்டு ஆய்வு ஒன்று மூளை புற்று நோய்க்கும் அதிக நேரம் கைபேசி பயன்படுத்துதலுக்கு தொடர்பு இருப்பதாகவும், குழந்தைகளுக்கு லுகேமியா நோய் வருதலுக்கும் இந்த மின்காந்த அலைகளுக்கும் நெருங்கிய தொடர்பு இருப்பதாகவும் அறிக்கை ஒன்றை சமர்ப்பித்தது.

கூடவே அதிக மின் காந்த அலைகள் உலவும் இடங்களில் பணி செய்யும் பெண்களுக்கு மார்பகப் புற்று நோய் வரும் ஆபத்து இருப்பதாகவும் இரண்டு ஆய்வுகள் தெரிவித்தன.

ஐரோப்பாவில் நிகழ்த்தப்பட்ட மூன்று முக்கிய ஆய்வுகள் புற்று நோய்க்கும், கைப்பேசிப் பயன்பாட்டுக்கும் இடையேயான தொடர்பை முன்வைத்து நடத்தப்பட்டன. அதில் இரண்டு ஆய்வுகள் சுமார் பத்து ஆண்டுகள் தொடர்ச்சியாக கைபேசி பயன்படுத்தினால் கைபேசியைப் வைக்கும் காதுக்கும் மூளைக்கும் இடையே புற்று நோய் உருவாகும் ஆபத்து இருப்பதை ஊர்ஜிதப்படுத்தியது. இன்னோர் ஆய்வு இருபது வயதுக்கு உட்பட்டவர்கள் கைப்பேசியைப் பயன்படுத்துவது மிகவும் ஆபத்தானது என எச்சரித்தது. இந்த மூன்று ஆய்வுகளுமே உலக நலவாழ்வு நிறுவனத்தால் ஏற்றுக்கொள்ளப்பட்டது என்பது உலகின் கவனத்தை ஈர்த்தது.

இப்படி உலகெங்கும் கைப்பேசிப் பயன்பாடு குறித்த ஆய்வுகள் வெளியாகிக் கொண்டிருப்பதனால், இந்த கைப்பேசிக் கோபுரங்கள் குறித்த விழிப்புணர்வும் மெதுவாக தலைதூக்க ஆரம்பித்திருக்கிறது. பள்ளிக்கூடங்கள், குடியிருப்புப் பகுதிகள், மக்கள் நடமாட்டம் அதிகமுள்ள இடங்கள், வணிக இடங்கள் ஆகியவற்றில் கைப்பேசிக் கோபுரங்கள் வைக்கக் கூடாது என மக்கள் பல்வேறு நாடுகளிலும் போராட்டங்கள் நடத்திக் கொண்டிருக்கின்றனர்.

உலகெங்கும் சுமார் முன்னூற்றைம்பது கோடி கைப்பேசிகள் பயன்பாட்டில் இருப்பதாக கணக்கிடப்பட்டுள்ளது. நவீன யுகத்தின் கண்டுபிடிப்புகள் பல மின்காந்த அலைகளை வெளியிடுகின்றன என்றாலும் உடலுக்கு மிக நெருக்கமாய், ஒரு ஆறாவது விரல் போல கூடவே இருந்து சிக்கலை உண்டாக்குவது கைப்பேசி மட்டுமே.

உலகெங்கும் 80 விழுக்காடு மக்கள் தங்கள் பெரும்பாலான நேரங்களில் கைப்பேசியை தங்கள் அருகிலேயே வைத்திருக்கிறார்கள் என்கிறது புள்ளி விவரம் ஒன்று. அதிலும் பெரும்பாலான நேரங்களில் கைகளிலோ, உடையிலோ கைப்பேசிகள் அமர்ந்து கொள்கின்றன. கைப்பேசி இயக்க நிலையில் இருக்கும் போது எப்போதுமே மின்காந்த அலைகளை வெளிவிட்டுக் கொண்டே இருக்கும் என்பதால் உடல் எப்போதுமே மின்காந்தத் தாக்குதலுக்கு ஆளாகிக் கொண்டே இருக்கிறது.

சிக்னல் கிடைக்காத இடங்களில் இந்த மின் காந்த அலைகள் அதிக தீவிரமுடையதாக இருக்கும். அத்தகைய இடங்களில் கைப்பேசி பயன்படுத்தும் போது மின்காந்த அலை பாதிப்பு அதிகமாக இருக்கும். எனவே கிராமப்புறங்களிலும், சரியான சிக்னல் இல்லாத புற நகர் பகுதிகளில் கைப்பேசியைப் பயன்படுத்துவது அதிக ஆபத்தானதாகிறது.

இன்றைய பதின்வயதுப் பருவத்தினர் எப்போதுமே காதில் ஒட்டவைத்த கைப்பேசிகளுடன் தான் வலம் வருகின்றனர். அவர்கள் கைப்பேசியைக் கைவிடாதிருக்க வணிக நிறுவனங்கள் போட்டி போட்டுக் கொண்டு, ரேடியோ, எம்.பி.3, வீடியோ என அனைத்து வசதிகளையும் கைப்பேசிகளில் அடைத்து பதின் வயதினரை கைப்பேசிகளின் கைப்பாவையாக்கியிருக்கிறது.

அமெரிக்காவில் மட்டுமே சுமார் பன்னிரண்டு கோடி கைப்பேசிகள் ஆண்டுதோறும் குப்பையாக ஒதுக்கப்படுகிறதாம். இப்படி உலகெங்கும் ஒதுக்கப்படும் கைப்பேசிகளில் விஷத்தன்மை வாய்ந்த உலோகங்கள் இருப்பதால் இது ஒரு உலகளாவிய மாசு அச்சுறுத்தலாகவும் உருவெடுத்துள்ளது.

அமெரிக்காவின் தேசிய புற்று நோய் கழகம் கைப்பேசிகள் மற்றும் கைப்பேசிக் கோபுரங்களிலிருந்து வெளியாகும் மின் காந்த அலைகள் மற்றும் ஒலி அலைகள் ஏற்படுத்தும் விளைவுகள் குறித்து விரிவாக ஆய்வது சமூகத்தின் இன்றியமையாய தேவை என குறிப்பிட்டிருக்கிறது.

குறிப்பாக, எவ்வளவு தூரத்தில் கைப்பேசி இருக்கலாம், எவ்வளவு நேரம் பேசலாம், கைப்பேசியின் அளவு எவ்வளவு இருக்கலாம், கோபுரத்திலிருந்து எத்தனை தூரத்தில் வசிப்பிடம் இருக்கலாம் என்றெல்லாம் பல்வேறு வழிகளில் ஆய்வுகள் மேற்கொள்ளவேண்டியது அவசியம் என அறிவுறுத்தியிருக்கிறது.

சுவர்களைக் கூட எளிதில் கடந்து செல்லும் இந்த மின் காந்த அலைகள் மனித உடலில் வெகு எளிதில் கடந்து செல்கின்றன. நம்மை அறியாமலேயே நமக்குள் நுழைந்து திரியும் இந்த மின் காந்த அலைகள் நாம் உணரும் முன்னே நம்மை நோயாளியாக்கி விடுகிறது.

அலுவலகங்களிலும் கணினி மானிட்டர், ஃபேக்ஸ், ஜெராக்ஸ் கருவிகளின் அருகே தொடர்ந்து பணி புரிபவர்கள் இத்தகைய மின்காந்த அலைகளின் அருகே இருக்கும் ஆபத்தைச் சந்திக்கின்றனர்.

கைப்பேசி மட்டுமன்றி மேலும் பல நவீன சாதனங்களும் மின் காந்த அலைகளை வெளியிடுகின்றன. மின்சாரத்தால் தண்ணீர் சூடாக்கும் கருவி, மின் முடி உலர்த்தும் கருவி, மின் படுக்கை, மின் கடிகாரம், மைக்ரோவேவ் அவன், குளிர்சாதனப் பெட்டி, மசாஜர், ஃப்ளாரசண்ட் லைட் என நவீனம் நமது வீடுகளில் நுழைத்துச் சென்ற பொருட்கள் எல்லாமே மின்காந்த அலைகளின் பாதிப்புகளை நமக்குத் தரக் கூடியவையே.

எனவே முடிந்த அளவுக்கு வீடுகளில் மின் பொருட்களை உபயோகிப்பதைத் தவிர்ப்பது நலம். அதாவது மைக்ரோவேவ் அவன் பயன்படுத்தாமல் அடுப்பைப் பயன்படுத்தி பொருட்களைச் சூடாக்குவது, வீட்டைக் கூட்ட வேக்குவம் கிளீனருக்குப் பதில் துடைப்பம் பயன்படுத்துவது, மின் கருவியால் பழங்களைப் பிழிவதைத் தவிர்ப்பது என இயற்கை முறைக்கு மாறும் போது மின் காந்த அலைகளின் தாக்கத்தைக் குறைக்க முடியும்.

கைப்பேசி, கைப்பேசி கோபுர மின்காந்த அலைகள் உடலுக்கு ஊறுவிளைவிப்பவை என்னும் செய்திகள் பல்வேறு ஆய்வுகளின் மூலம் தெரியவந்திருக்கும் வேளையில் அதை மறுத்தும் பல்வேறு அறிக்கைகளும், ஆய்வுகளும் வந்து கொண்டு தான் இருக்கின்றன. எனினும் இந்த மின்காந்த அலைகளினால் எந்த பாதிப்பும் இல்லை எனும் ஆய்வு முடிவு ஒன்றை யாராலும் நிகழ்த்த முடியவில்லை.

மின் காந்த அலைகள் எனும் மௌனக் கொலையாளியின் கைகளிலிருந்து நம்மை நாமே காத்துக் கொள்வதற்கு சில வழிமுறைகள் இருக்கின்றன.

.       கைப்பேசியை நேராக காதில் வைத்துப் பேசாமல் தவிர்க்க, வயர் இணைப்புடன் கூடிய ஹெட்போனைப்  பயன்படுத்துங்கள்.

.       வீட்டில் சாதாரண தொலைபேசி இருந்தால் அதிலேயே பேசுங்கள். கைப்பேசியைப் பயன்படுத்தாதீர்கள்.

.       கைப்பேசியில் ஒலிபெருக்கி வசதி இருந்தால் அதைப் பயன்படுத்துங்கள்.

.       கைப்பேசியில் பேசவேண்டிய கட்டாயம் வரும்போது உரையாடலை மிகச் சுருக்கமாக முடித்துக் கொள்ளுங்கள்.

.       நம் உடலை விட்டு சற்றுத் தூரமாகவே கைப்பேசியை வைத்துவிட்டு பணி செய்யப் பழக வேண்டும்.

.       கைப்பேசியை கைகளிலோ, பாக்கெட்டிலோ வைப்பதற்குப் பதிலாக பையில் வைக்கலாம்.

.       குழந்தையை இடுப்பில் வைத்துக் கொண்டு கைப்பேசியில் பேசாதீர்கள். குழந்தைக்கு அது பாதிப்பை உண்டாக்கும்.

.       இரவில் கைப்பேசியை அணைத்து வைத்து விட்டு தூங்குங்கள். முடியாத சூழல் எனில் முடிந்த அளவு தூரமாக கைப்பேசியை வைத்துவிடுங்கள்.

.       நல்ல சிக்னல் கிடைக்காத இடங்களில் கைப்பேசியைப் பயன்படுத்தாதீர்கள். அதை அணைத்து வைத்துக் கொள்ளுங்கள்.

.       கைப்பேசியை சார்ஜ் செய்யும்போது அதிக மின் காந்த அலைகள் உருவாகும். எனவே அதை அதிகம் பயன்படுத்தாத அறைகளில் சார்ஜ் செய்யுங்கள்.

 
சவால்களும், சாதனைகளும் நிறைந்ததே வாழ்க்கை. அனைத்தையும் ஆய்ந்தறிந்து ஆனந்தமாய் வாழ்வதற்கே மனுக்குலத்துக்குத் தரப்பட்டிருக்கிறது ஆறாவது அறிவு. அரசும், தனிமனிதனும் இந்த மின்காந்த அலை சிக்கல் தொடர்பாக தங்கள் கடமைகளைச் சரிவரச் செய்தால் ஆபத்தின் தீவிரத்திலிருந்து தப்பித்துக் கொள்ள முடியும் என்பதில் ஐயமில்லை.