ஹோலோபோர்டேஷன்

ஹோலோபோர்டேஷன்
வியப்பூட்டும் புதிய தொழில்நுட்பம்
Image result for holoportation
அமெரிக்காவில வேலை வேலைன்னு இருக்கிற பையனை எப்போ தான் பாக்கறது?” என்பது தொலைதூரத்தில் இருக்கும் இந்தியப் பெற்றோரின் புலம்பலாய் இருக்கிறது. தினமும் காலையில் அவர்கள் அமெரிக்கப் பையனின் வீட்டு வரவேற்பறையில் கொஞ்ச நேரம் உட்கார்ந்து பேசிவிட்டு வந்தால் எப்படி இருக்கும் ? அல்லது அமெரிக்க பையன் இங்கே வந்து பெற்றோருடன் டைனிங் டேபிளில் அமர்ந்து கொஞ்ச நேரம் பேசிவிட்டுப் போனால் எபடி இருக்கும்ஒரு அறிவியல் புனை கதை போல இருக்கிறது இல்லையா ?
இப்படி ஒரு விஷயம் நடந்தால் ஒன்று அது மேஜிக்காக இருக்க வேண்டும், அல்லது பேய் பிசாசாக இருக்க வேண்டும் என்று தானே நினைக்கிறீர்கள். அது  ஹோலோபோர்டேஷன் நுட்பமாகவும் இருக்கலாம் என்பது தான் புதிய வியப்பூட்டு செய்தி
தொழில்நுட்பம் நமக்கு முன்னால் நீட்டும் விஷயங்கள் நம்மை தினந்தோறும் வியப்புக்குள் அழைத்துச் சென்று கொண்டிருக்கின்றன. புறாவின் காலில் கடிதம் கட்டி அனுப்பிய செய்தி வரலாறுகளில் உண்டு. திரும்ப அந்த புறா கொண்டு வரும் பதில் செய்தி தான் முதல் கடிதம் சென்று சேர்ந்ததற்கான அத்தாட்சி ! அதற்கு பல மாதங்கள் ஆகும் என்பது தோராயக் கணக்கு.
 அதன் பின் கடிதப் பயன்பாடுகள் வந்தன. இன்லண்ட் லெட்டரிலோ, போஸ்ட் கார்டிலோ மூச்சு முட்ட எழுத்துகளை நிரப்பி அனுப்பிய கதை கடந்த தலைமுறையினருடையது. இன்லண்ட் லெட்டரின் ஓரங்களிலும், போஸ்ட்கார்டின் விலாசப் பகுதியிலும் கூட சிற்றெறும்பு ஊர்வது போல சிறுக சிறுக எழுதப்பட்டிருக்கும் கடிதங்கள் சென்று சேர சில நாட்கள் முதல், சில வாரங்கள் வரை தேவைப்பட்டன
அதன் பின் மொபைல் போன் வந்தது. குறுஞ்செய்திக்கு பேஜரும், அதற்குப் பிறகு எஸ்.எம்.எஸ் சும், மின்னஞ்சல்களும் மாபெரும் புரட்சியையே ஏற்படுத்தி விட்டன. எழுதும் வழக்கம் ஒழிந்து போக டிஜிடலுக்குள் நுழையும் பழக்கம் வந்தது. அதன் பின் வீடியோ உரையாடல் வந்து டைப் பண்ணுவதையும் குறைக்க ஆரம்பித்தது.
தொலை தூரத்தில் இருக்கின்ற நண்பர்களோ, உறவினர்களோ அவர்களை வீடியோவில் பார்த்துப் பேசுவது அடுத்த கட்ட வளர்ச்சியானது. என்ன தான் இது அன்னியோன்யமாக இருந்தாலும் ஒரு டிஜிடல் கட்டத்துக்குள் 2டி நுட்பத்தில் தானே இந்த உரையாடல் நடக்கிறது. இது அப்படியே 3டி நுட்பத்தில், நமக்கு முன்னால் நடந்தால் எப்படி இருக்கும் என மைக்ரோசாஃப்ட் நினைத்ததன் விளைவு தான் இந்த புதுமையின் வரவு.
இதன் மூலம் நாகர்கோவிலில் இருக்கும் பெற்றோர், சென்னையில் இருக்கும் பிள்ளைகளை நேரடியாக பார்த்து பேச முடியும். பக்கத்தில் அமர்ந்து அவர்களுடைய உணர்வுகளைப் புரிந்து கொள்ள முடியும். காஷ்மீரில் இருக்கும் ஒருவரும், லண்டனில் இருக்கும் ஒருவரும் நேரடியாக பார்த்து பேசிக்கொள்ள முடியும். டில்லியில் இருக்கும் ஒரு அரசியல் தலைவர் சென்னையில் இருக்கும் ஒரு தலைவரோடு பேச, விமானம் பிடிக்கத் தேவையில்லை. தொழில்நுட்பத்தைப் பிடித்தாலே போதும்
இது சொல்கின்ற நுட்பம் எளிதானது. ஒரு அறையில் மைக்ரோசாஃப்ட் தயாரிப்பான 3டி கேப்சரிங் கருவிகளான கேமராக்களைப் பொருத்த வேண்டும். குறைந்த பட்சம் இரண்டு கேமராக்கள் தேவைப்படும். அதிகம் கேமராக்கள் இருந்தால்  படம் தெளிவானவும் படு யதார்த்தமாகவும் இருக்கும்அந்த காட்சிகளை செய்து கணினி தொடர்ச்சியாய்ப் பதிவு செய்து முப்பரிமாண மாடலாக்கி, தகவல்களை கம்ப்ரஸ் செய்து எங்கே வேண்டுமோ அங்கே அனுப்புகிறதுஇவையெல்லாம் ஒரு சில வினாடிகளில் நடக்கின்றன. சராசரியாக 50 எம்பிபிஎஸ் இணைய வேகம் இதற்கு அவசியம். ஆகுமெண்டர் ரியாலிடி எனும் நுட்பத்தின் அடிப்படையில் இது இயங்குகிறது
எங்கே இந்த காட்சிகள் விரிக்கப்பட வேண்டுமோ அங்கே தலையில் மாட்டும் கண்ணாடி போன்ற ஹோலோலென்ஸ் ஒன்றைப் பயன்படுத்த வேண்டும். இங்கே 3டி கேமராவில் பிடிக்கப்படும் காட்சிகள் தொலைதூரத்தில் இருக்கும் நபர் பயன்படுத்தும் ஹோலோ லென்ஸ் வழியாக யதார்த்தம் சிதையாமல் முன்னால் வந்து நிற்கும். இந்த காட்சிகளையெல்லாம் அப்படியே பதிவு செய்யலாம் என்பதால், ஒருமுறை உரையாடிய உரையாடலை மீண்டும் நமது அறைக்குக் கொண்டு வந்து என்ன நடந்தது என்பதை மீண்டும் நேரடியாகப்  பார்க்கவும் முடியும் என்பது சுவாரஸ்யம்
நாசாவில் பணிபுரியும் ஒரு நபரை மேடையில் நூற்றுக்கணக்கான பார்வையாளருக்கு முன்னால் வரவழைத்து அவருடன் பேசி இந்த தொழில்நுட்பத்தை விளக்கினார்கள். பார்வையாளர்கள் பரவசமடைந்தார்கள். இந்தத் தொழில்நுட்பத்தை நாசாவில் பயன்படுத்தத் துவங்கியிருப்பதாகவும், இதன் மூலம் கோள்களைக் குறித்து மிக துல்லியமான தகவல்களைப் பெற முடியும் என அவர் தெரிவித்தார்.
ஒரு இரு பரிமாண வெளிச்சத் திரையில் இருந்த தகவல் பரிமாற்றத்தை, நமக்கு முன்னால் இயல்பாக, உயிரோட்டமாக உலவும் காட்சிகளாக இந்த தொழில்நுட்பம் மாற்றியிருக்கிறது. வெளிநாட்டிலும், இந்தியாவிலும் உள்ள மக்கள் இணைந்து நடத்தும் அலுவலக கான்பரன்ஸ் விஷயங்கள் எதிர்காலத்தில் இந்த தொழில்நுட்பத்தின் மூலம் ஒரே அறையில் நடக்கும்
ஒருவருக்கொருவர் பார்த்துக் கொள்ள முடியும், பேசிக்கொள்ள முடியும், ‘ஏண்டா டல்லா இருக்கேஎன கேட்டு அவரை ஆறுதல் படுத்த முடியும் என இது தருகின்ற சாத்தியங்கள் மிக அதிகம். தொலைவுகளை அருகாக்குவது மட்டுல்ல, தொலைவுகளே இல்லாமலாக்கும் முயற்சியே இது ! வருகின்ற காட்சிகளை மினியேச்சராக மாற்றி டைனிங் டேபிளுக்கு மேல் அமரவைக்கவும் முடியும் ! இவையெல்லாம் தொழில்நுட்பம் தரும் எக்ஸ்ட்ரா வசதிகள்
அறிவியல் ஆராய்ச்சித் தளத்தில் இந்தத் தொழில்நுட்பம் மிகப்பெரிய அளவில் கைகொடுக்கப் போகிறது. புதிய செயற்கைக் கோள்களை வடிவமைப்பது  முதல் வானில் இருக்கும் விண்வெளி ஆராய்ச்சியாளர்களுடன் நேரடியாகப் பேசுவது வரை இது பயன்படும். இந்த தொழில்நுட்பத்தின் மூலம் யார்வேண்டுமானாலும் நிலவில் கால்வைக்கலாம். நிலவின் நிலத்தை அருகில் இருந்து பார்க்கலாம் ! காலால் மிதிக்கலாம் !
இந்த தொழில்நுட்பத்தின் வரவு டைப் பண்ணி மக்களுக்கு மெசேஜ் அனுப்பும் முறையை விரைவிலேயே ஒழித்து விடும். வீடியோ சேட்டிங் போன்றவையும் வலுவிழந்து போகும். இதன் அடுத்த கட்டமாகஓடும் காரில் இந்த கேமராக்களை அமைத்து வெற்றிகரமாக வெள்ளோட்டம் விட்டிருக்கிறார்கள். காரின் பின் சீட்டில் உங்களுக்கு அருகில் உங்கள் ஆஸ்திரேலிய நண்பரை அமரவைத்து பேசிக்கொண்டே போக முடியும் ! மாய உலகத்தில்
சுருக்கமாகச் சொல்லவேண்டுமெனில் ஒரு நிஜ சம்பவத்துக்குள், ஒரு மாயக் காட்சியை யதார்த்தம் போல நுழைக்க இந்த தொழில்நுட்பம் உதவும்
அறிவியல் புனை கதைகளும், ஹாலிவுட் திரைப்படங்களும்டெலிபொட்டேஷன்எனும் சிந்தனையை பல ஆண்டுகளாக சொல்லி வருகின்றன. ஒரு இடத்திலிருக்கும் நபரை இன்னொரு இடத்துக்கு அப்படியே வினாடி நேரத்தில் அனுப்பி வைப்பது தான் இந்த சிந்தனை. அதாவது சென்னையில் இருக்கும் ஒரு நபர், ஒரு கருவியில் நுழைந்தால் அமெரிக்காவிலிருந்து வெளியே வரலாம் என்பது போல வைத்துக் கொள்ளுங்கள். அந்த சிந்தனையின் முதல் நிலையாக இப்போது காட்சிகளை அனுப்பும் இந்த ஹோலோபோர்டேஷனை வைத்துக் கொள்ளலாம். இது வெற்றியடைந்திருக்கிறது
ஹோலோபோர்டேஷன் மூலம் அனுப்பப்படுகின்ற காட்சிகளை இப்போது பார்க்க மட்டும் தான் முடியும். இதன் அடுத்த கட்டமாக காட்சிகளை தொட்டு உணரவும், வாசனை அறியவும், தட்ப வெப்பநிலைகளை இடம் விட்டு இடம் கடத்தவும் ஆய்வுகள் நடத்தப்பட்டு வருகின்றன. அவை எதிர்காலத்தில் சாத்தியமாகும் என்பதில் சந்தேகமேயில்லை. அப்படி நடக்கும் போது உலகம் நிஜமாகவே ஒற்றைப் புள்ளியில் வந்து சங்கமிக்கும்.
*
சேவியர்

உலக தகவல் வளர்ச்சி தினம்

Image result for world information day
புறாக்களின் கால்களில் தகவல்களைக் கட்டி அனுப்பிய கதைகள் இப்போது வேடிக்கையாய் இருந்தாலும், வரலாற்றில் அது நிகழ்த்திய பங்களிப்பு மகத்தானது. கடல், மலை கடந்து இன்னொரு ஊருக்கு, இன்னொரு நாட்டுக்கு செய்திகளை அனுப்ப புறாக்கள் தான் பயன்பட்டன.
ஒற்றர்கள் தகவல்களைச் சுமந்து செல்வதில் இருந்த தாமதங்களையும், ‘தகவல் கசிவு’ போன்ற பாதுகாப்பு சிக்கல்களையும் புறாக்கள் சரிசெய்தன. கால்நிலைகளைப் பொருட்படுத்தாமல் அவை கன கட்சிதமாகத் தகவல் பரிமாற்றை நிகழ்த்திக் காட்டின.
வரலாற்றுப் பதிவுகள் நமக்கு தகவல் பரிமாற்றத்தின் பல்வேறு நிலைகளை விளக்கிக் கொண்டே இருக்கின்றன. தோலில் செய்திகளை எழுதி வைப்பது, கல்வெட்டுகளில் செய்திகளைக் கொத்தி வைப்பது, கணிமண் ஓடுகளில் தகவல்களை எழுதி வைப்பது, ஓலைகளில் செய்திகளை பொறித்து வைப்பது என தகவல் வளர்ச்சி ஒவ்வொரு காலத்துக்கும் ஏற்ற வகையில் வளர்ந்து கொண்டே வருகிறது.
தபால் நிலையங்கள், அஞ்சல் துறை போன்றவையெல்லாம் வந்தபின் தகவல் பரிமாற்றங்கள் பெருமளவில் வளர்ச்சியடைந்தன. இதன் வேர்கள் கிமு ஆறாம் நூற்றாண்டில் என்றாலும் கிபி பதினாறாம் நூற்றாண்டில் தான் இது முறைப்படுத்தப்பட்ட ஒரு வடிவத்தை எட்டியது. இந்தியாவில் ஆங்கிலேயரின் ஆட்சிக்காலம் வந்தபின்பு தான் இது வளர ஆரம்பித்தது.
கடந்த தலைமுறை மக்களுக்கெல்லாம் இன்னும் நினைவுகளில் அஞ்சல் நிலையங்கள் நிழலாடும் என்பதில் சந்தேகமில்லை. இன்லண்ட் லெட்டர்களின் ஓரங்களிலும் கிறுக்கி எழுதிய சுவாரஸ்ய நினைவுகள் விலகுவதில்லை. போஸ்ட் கார்ட், போஸ்ட் கவர், இன்லண்ட் லெட்டர் போன்றவை தான் தகவல் பரிமாற்றத்தின் ஒரே ஆயுதமாக வலுவாக இருந்த காலகட்டம் நீளமானது.
தொலைபேசிப் பயன்பாடு வந்தபின் கொஞ்சம் கொஞ்சமாக எழுத்து பரிமாற்றங்கள் குறையத் துவங்கின. இருந்தாலும் ஸ்மார்ட்போன்களின் காலம் வரை அஞ்சல் துறையின் பங்களிப்பு தொடர்ந்து கொண்டே தான் இருந்தது.
தொலைபேசி சேவை இந்தியாவில் 1881 களில் ஆரம்பிக்கப்பட்டபோது இந்திய அளவில் நூறை விடக் குறைவான எண்ணிக்கையில் தான் வாடிக்கையாளர்கள் இருந்தனர். அது படிப்படியாக வளர்ந்து 1990களில் 200 பேருக்கு ஒரு தொலைபேசி எனுமளவில் வந்து நின்றது. இன்றைக்கு ஆளுக்கு ரெண்டு தொலைபேசியை வைத்துக் கொண்டு அலைகின்ற சூழல் உருவாகியிருக்கிறது.
தொலைபேசிக்கும், செல்போன்களுக்குமிடையே நுழைந்த ஒரு தகவல் தொழில்நுட்பம் பேஜர். துரதிர்ஷ்டவசமாக அதன் ஆயுள் மிக மிகக் குறைவாக இருந்தது. பெல்டில் கட்டப்பட்டிருக்கும் ஒரு சின்ன கருவியில் செய்திகள் வரும். இது பெரும்பாலும் நிறுவனங்கள் தங்களுடைய விற்பனை பிரதிநிதிகளுக்கு செய்திகளை அனுப்பும் வகையில் பயன்பட்டது.
செல்போன் வந்தபின் எஸ்.எம்.எஸ்கள் பேஜரின் தேவையை முழுவதுமாக ஒழித்து விட்டன. அந்தஸ்தின் அடையாளம், செல்வந்தர்களுக்கே உரியது என்றெல்லாம் இருந்த செல்போன்கள் இன்றைக்கு குடிசைகளிலும் நிரம்பியிருக்கின்றன.
இப்போது ஸ்மார்ட்போன்களின் காலம். இணையத்தின் வருகைக்குப் பின் ஸ்மார்போன்களின் சிம்மாசனம் சரியவேயில்லை. ஸ்மார்ட் போன்கள் தின்று ஏப்பம் விட்ட தொழில் நுட்பங்கள் கொஞ்ச நஞ்சமல்ல. இன்லெண்ட் லெட்டர்களை மின்னஞ்சல்கள் விழுங்கின. பேஜர்களை எஸ்.எம்.எஸ்கள் தின்று தீர்த்தன. தந்திச் சேவையை குறுஞ்செய்திகள் இல்லாமல் செய்து விட்டன. கேசட்கள், சிடிக்கள் போன்றவற்றை டிஜிடல் வடிவ எம்பி3 கள் இல்லாமல் செய்து விட்டன. டிவிடிக்களை டிஜிடல் வீடியோக்கள் முழுங்கி விட்டன. வகை வகையாய் வந்து கொண்டிருந்த கேமராக்களை செல்போன்களின் கேமராக்கள் நாடுகடத்தி விட்டன.
இணையமும் , சமூக வலைத்தளங்களும், ஸ்மார்ட் போன்களும் தகவல் வளர்ச்சியை முன்னெப்போதும் இல்லாத அளவுக்கு உயரத்தில் கொண்டு போய் வைத்திருக்கின்றன.
நிகழ்ச்சிகள் நடந்து கொண்டிருக்கும் போதே லைவ் ஆக காண்பிக்க ஃபேஸ்புக் லைவ் உட்பட பல்வேறு செயலிகள் இருக்கின்றன. வெளிநாடுகளில் நடக்கின்ற காதுகுத்து, கல்யாணங்களை ஊரின் கிராமத்து சொந்தங்களும் இப்போது திண்ணையில் அமர்ந்து கொண்டே ரசிக்க முடிகிறது.
வீடியோ சேட்கள் தகவல் பரிமாற்றத்தை உணர்வு ரீதியாக மாற்றியிருக்கிறது. ‘எண்ணை தேய்ச்சு குளிடா’ என தூரதேசத்தில் இருக்கும் மகனுக்கு அம்மா தன் வெற்றிலை வாயோடு செய்தியைச் சொல்ல முடிகிறது. வீட்டில் இருக்கும் குழந்தையோடு அலுவலகத்தில் இருக்கும் அம்மா ‘சாப்டியா ?’ என நலம் விசாரிக்க முடிகிறது. நள்ளிரவு தாண்டிய பொழுதுகளிலும் நட்புகளும், காதல்களும் கவித்துவம் பேசித் திரிய முடிகிறது.
அலெக்ஸா, இன்னிக்கு மழை பெய்யுமா ? சிரி, நுங்கம்பாக்கம் டிராபிக் எப்படி ? கூகிள், நல்லதா ஒரு பாட்டி போடு என இப்போது நமது கேள்விகளுக்குப் பதில் சொல்ல கருவிகள் காது திறந்துக் காத்திருக்கின்றன.
உலகம் முழுவதும் இன்றைக்கு தகவல்கள் நிரம்பியிருக்கின்றன. அவையே நிறுவனங்களுக்கு லாபத்தை கோடி கோடியாய் கொட்டிக் கொடுக்கின்றன. பிக்டேட்டா, இண்டர் நெட் ஆஃப் திங்க்ஸ், மெஷின் லேர்ணிங், ஆர்டிஃபிஷியல் இண்டெலிஜெண்ட் என எல்லாமே இன்றைக்கு தகவல்களின் மேல் கட்டமைக்கப்பட்ட தொழில்நுட்பங்களே.
உலக தகவல் வளர்ச்சி தினத்தில் நாம் மனதில் கொள்ள வேண்டிய ஒரே ஒரு விஷயம், இன்றைக்கு எதுவும் ரகசியமாய் இல்லை என்பது தான். பொதுவெளியில் பேசுகின்ற, பகிர்கின்ற, எழுதுகின்ற எல்லா செய்திகளும் ஏதோ ஒரு தொழில்நுட்பத்தின் காது வழியாக இன்னொரு தொழில்நுட்பத்தின் மனசுக்குள் போய் அமர்ந்து கொள்கிறது. அதை அழிக்க முடியாது, ராவணத் தலை போல வெட்ட வெட்ட முளைத்துக் கொண்டே இருக்கும். விழிப்பாய் இருப்போம் !
*
சேவியர்

ஓடவும் முடியாது, ஒளியவும் முடியாது 

Image result for digital security

வீட்டை விட்டு வெளியே கிளம்பும் போது ஒரு தடவைக்கு நாலு தடவை  பூட்டை இழுத்துப் பார்த்து, கதவைத் தள்ளிப் பார்த்து எல்லாம் பத்திரமாய் இருக்கிறது என திருப்திப்பட்டு விட்டு கிளம்புகிறோம். ஒருவேளை வீடு பத்திரமாய் இருக்கலாம், ஆனால் வெளியே கிளம்பும் நாம் பத்திரமாய் இருக்கிறோமா ? “இல்லை” என்பதே கசப்பான உண்மை !

தொழில்நுட்பத்தின் மூன்றாவது கண் நம்மை கண நேரமும் விடாமல் கண்காணித்துக் கொண்டே இருக்கிறது. இந்த கணம் நீங்கள் எங்கே இருக்கிறீர்கள், என்ன செய்து கொண்டிருக்கிறீர்கள் என்பது மூன்றாவது கண்ணுக்குத் தெரியும். 

உங்களுக்கு என்ன பிடிக்கும் என்ன பிடிக்காது என்பது உங்கள் வாழ்க்கைத் துணையை விட அதிகமாய் அந்த மூன்றாவது கண்ணுக்குத் தெரியும். உங்களுடைய தினசரி நடவடிக்கை என்ன என்பது உங்களை விடத் துல்லியமாய் அந்த மூன்றாவது கண்ணுக்குத் தெரியும். 

சில ஆண்டுகளுக்கு முன்பு வரை போன் பயன்படுத்துவது நமது வசதிக்கான ஒன்றாகவே இருந்தது. ஆனால் இன்று நாம் போன் பயன்படுத்துவது நிறுவனங்களின் வளர்ச்சிக்காக என மாறிப் போய்விட்டது. நாம் எங்கே செல்கிறோம் என்பதையும், நாம் என்ன செய்கிறோம் என்பதையும், நாம் எதை செய்யாமல் விடுகிறோம் என்பதையும் ஸ்மார்ட்போன் டிஜிடல் தகவல்களாக எங்கெங்கோ அனுப்பிக் கொண்டே இருக்கிறது. ஒரு லைவ் கிரிக்கெட் வர்ணனையைப் போல நம்மைப் பற்றிய தகவல்கள் சர்வர்களில் சேமிக்கப்படுகின்றன.

இந்தத் தகவல்கள் தான் நிறுவனங்களின் பணம் காய்க்கும் மரம். இந்த தகவல்கள் தான் தொட்டதையெல்லாம் பொன்னாக்கித் தரும் வரம். இவனிடம் என்ன விற்கலாம், இவனிடம் என்ன பேசலாம், இவனிடமிருந்து நமக்கு என்ன கிடைக்கும் என்பதையெல்லாம் இந்த தகவல்களைக் கொண்டு தான் கணிக்கிறார்கள். அதற்காக இருப்பவை தான் பிக்டேட்டா அனாலிடிக்ஸ், அதற்கான அல்காரிதங்கள் போன்ற தொழில் நுட்பங்களெல்லாம்  

பொதுவாக நிறுவனங்கள் இவற்றையெல்லாம் தங்களுடைய தொழில் வளர்ச்சிக்காகவும், விற்பனை வளர்ச்சிக்காகவும் தான் பயன்படுத்துகின்றன. ஆனால் இந்த தகவல்களைக் கொண்டு என்ன வேண்டுமானாலும் செய்யலாம் எனும் அச்சம் எல்லோரிடமும் உண்டு. குறிப்பாக, இந்த தகவல் திருடப்பட்டால் என்னவாகும் ? அதைக் கொண்டு நமது உடமைகளுக்கோ, உயிருக்கோ ஆபத்து ஏற்பட்டால் என்ன செய்வது எனும் அச்சம் வெகு நியாயமானது.

நமது தேசம் டிஜிடல் பரிவர்த்தனைகளை நோக்கி தீவிரமாய்ப் பயணித்துக் கொண்டிருக்கிறது. இந்தக் கால்கட்டத்தில் நமது ஸ்மார்ட் போன்களே நமக்கு பெரும்பாலான பரிவர்த்தனைகளை நிறைவேற்றித் தருகின்றன. பேடிஎம் ஆகவோ, வங்கிக் கணக்குகளாகவோ, கூகிள் பே யாகவோ ஏதோ ஒரு வடிவத்தில் நமது தகவல்களெல்லாம் ஸ்மார்ட்போன் வழியாகத் தான் பயணமாகின்றன. 

இந்தத் தகவல்களை நாம் பயன்படுத்தும் ஆப்களோ, நமது இணைய சேவை வழங்கு நிறுவனங்களோ, நமது மௌபைல் கம்பெனிகளோ திருடிக் கொள்வதற்கான வாய்ப்புகள் உண்டு. மால்வேர்கள், வாட்ஸப் மெசேஜ்களாகவோ, மின்னஞ்சல் அட்டாச்மெண்ட்களாகவோ நமது ஸ்மார்ட்போன் கதவைத் தட்டிக் கொண்டே இருக்கின்றன. நம்பிக்கையில்லாத லிங்க்களையோ, அட்டாச்மெண்ட்களையோ ஒரே ஒரு முறை கிளிக்கி விட்டால் கூட நமது தகவல்கள் தொலைந்து போக வாய்ப்பு உண்டு

நாம் பலமுறை ஏமாந்து போகக்கூடிய ஒரு இடம் வைஃபை. இலவச வைஃபை அல்லது பொது இடங்களில் கிடைக்கின்ற கட்டண வைஃபைக்கள் பாதுகாப்பற்றவை. நமது மொபைலை அத்தகைய வைஃபையில் இணைத்தால் நமது ஸ்மார்ட்போனில் இருக்கும் எந்தத் தகவலையும் பறிகொடுக்கும் வாய்ப்பு உருவாகும். 

எங்கே சென்றாலும் தூக்கி சுமக்கும் ஸ்மார்ட்போன்கள் தங்களது இருப்பிடத்தை எப்போதும் இன்னொரு இடத்துக்கு அனுப்பிக் கொண்டே இருக்கின்றன. ஜியோ லொக்கேஷன் எனப்படும் இந்த தகவல் நமது போனின் இருப்பிடத்தை துல்லியமாய்ச் சொல்லி, நாம் எங்கே இருக்கிறோம் என்பதை பதிவு செய்கிறது. நாம் மட்டுமல்ல, நமக்குப் பக்கத்தில் நமது நண்பர்களின் போன்கள் இருந்தால் எத்தனை பேர் எங்கே இருக்கிறோம் என்பதையெல்லாம் சொல்லிவிடும். 

அப்படின்னா லொக்கேஷனை ஆஃப் பண்ணிடலாம் பிரச்சினையில்லை என நினைப்பீர்கள். அது தான் இல்லை. இப்போது நமது இருப்பிடத்தை வெறும் லொக்கேஷன் சர்வீஸ் மட்டும் கண்டுபிடிப்பதில்லை. ஆஸிலரோ மீட்டர், பாரோ மீட்டர், மேக்னடோமீட்டர் உட்பட பல சென்சார்களும் போனின் இருப்பிடத்தைத் துல்லியமாய் கண்டு சொல்கின்றன. 

அதே போல நாம் மொபைலில் இன்ஸ்டால் செய்யும் ஆப்கள் மிகப்பெரிய ஆபத்தின் திறவு கோலாய் இருக்க வாய்ப்பு உண்டு. ஆப்களை இன்ஸ்டால் செய்யும் போது நாம் அது கேட்கின்ற அனுமதிகளுக்கெல்லாம் ‘ஓகே… ஓகே” என சொல்லிக் கொள்கிறோம். நமது காண்டாட்க், கேமரா போன்றவற்றை இயக்கும் அனுமதியை நாமாகவே கொடுத்து விடுகிறோம். அது போலியான அல்லது பாதுகாப்பற்ற அப் ஆக இருக்கும் பட்சத்தில் நமது தகவல்கள் மிக மிக எளிதாக திருடப்பட்டு விடுகின்றன. 

இப்போது சில புதிய திடுக்கிட வைக்கும் தனிமனித சுதந்திர மீறல்கள் வந்திருக்கின்றன. அதில் ஒன்று கேமரா ஹேக்கிங். நமது மொபைலில் உள்ள கேமராவையோ, நமது கணினியில் உள்ள வெப்கேமையோ தொலைவிலிருந்தே  இயக்குவது. கேமரா இயங்கிக் கொண்டிருப்பது, நமக்குத் தெரியாது. நமது செல்போன் கேமரா காட்டுகின்ற விஷயங்களையெல்லாம் தொலைவிலுள்ள சேமிப்பு தளங்களில் சேமிக்கப்படும். அது எப்படி வேண்டுமானாலும் பயன்படுத்தப்படலாம். 

இன்னொன்று போனிலுள்ள மைக்ரோபோன் மூலமாக நேர்கிறது. நமது உரையாடல்கள் நமக்குத் தெரியாமலேயே காதுகொடுத்துக் கேட்கப்பட்டு இன்னொரு இடத்துக்கு அனுப்பப்படும் ஆபத்து அது. நாம் போனில் பேசுவது மட்டுமல்லாமல், போனை ஆன் பண்ணாமல் பேசுவதைக் கூட ரகசியமாய் ஒட்டுக்கேட்கும் ஆபத்து இதில் உண்டு. கூகிள் ஹோம், அலெக்ஸா, சிரி போன்றவையெல்லாம் எப்போதுமே நமது உரையாடல்களைக் கவனித்துக் கொண்டிருக்கின்றன என்பது நினைவில் இருக்கட்டும். 

ஏற்கனவே ஒருவர் இன்னொருவரிடம் பேசுவதை ரெக்கார்ட் செய்யும் வசதிகள் இருக்கின்றன. மொபைல் நிறுவனங்களோ, ஆப்ஸ்களோ, இணைய சேவை வழங்கும் நிறுவனங்களோ நினைத்தால் யாருடைய பேச்சை வேண்டுமானாலும் ரெக்கார்ட் செய்யலாம் எனும் வசதியை இன்றைய தொழில் நுட்பம் தந்திருக்கிறது. இதனால் எவ்வளவு ரகசியமாய் நாம் கிசுகிசுத்தாலும் அது பொதுவெளியில் வரும்  வாய்ப்பு உண்டு. 

அதே போல நமது சேட்கள், மின்னஞ்சல்கள் எல்லாமே தொழில்நுப்டத்தின் கண்களால் வாசிக்கப்பட்ட பின்பு தான் அடுத்த நபருக்குச் சென்று சேர்கிறது. அடுத்தவருக்கு வருகின்ற லெட்டரைப் படிக்கக் கூடாது எனும் நாகரீகமும், அடுத்தவருடைய பேச்சை ஒட்டுக் கேட்கக் கூடாது எனும் நாகரீகமும் தொழில்நுட்ப உலகில் செல்லாக்காசாகி விட்டன. 

நாம் மொபைலில் எடுக்கின்ற போட்டோக்களை சில ஆப்கள் திருடுகின்றன என சமீபத்தில் ஒரு தொழில்நுட்பக் கட்டுரை சொன்னது. நமது புகைப்படத்தை வைத்து அது எங்கே எப்போது எடுக்கப்பட்டது போன்ற தகவல்களையெல்லாம் தொழில்நுட்பம் புட்டுப் புட்டு வைக்கிறது. 

நவீன செல்போன்களில் ஏகப்பட்ட சென்சாகள் இருக்கின்றன. நமது கை அசைவையும், கண் அசைவையும் கண்காணிக்கும் சென்சார்கள் இருக்கின்றன. நாம் எந்த மாடியில் இருக்கிறோம் என்பதைக் கூட பாரோ மீட்டர்  எனும் சென்சார் அனுப்பும் செய்தியால் அறிய முடியும். சென்சார்களுக்கென ஆப்ஸ் தனி அனுமதி கேட்பதில்லை. எனவே எந்த ஆப் டவுன்லோட் செய்தாலும் இந்த சென்சார்கள் அதனுடன் இணைந்து கொள்ளும். 

நமது செல்போனில் நாம் டைப் செய்யும் விஷயங்களைத் திருடவும், நமது பாஸ்வேர்ட் போன்றவற்றை கண்டறியவும் கூட மென்பொருட்கள் உள்ளன. வெறுமனே மொபைலில் டைப் செய்து விட்டு டெலீட் செய்தால் கூட, எதையெல்லாம் டைப் செய்தோம் எதையெல்லாம் டெலீட் செய்தோம் என்பதையும் தொழில்நுட்பம் குறித்து வைத்துக் கொள்கிறது என்றால் பார்த்துக் கொள்ளுங்கள்.

இப்படி உங்களுடன் கூடவே இருந்து உங்களைப் பற்றிய அத்தனைத் தகவல்களையும் புட்டுப் புட்டு வைக்கின்றன ஸ்மார்ட்போன்களும், அதனுடன் இணைந்த நவீன தொழில்நுட்பங்களும். நாளை உங்களுடைய டிரைவிங் ஸ்பீடுக்குத் தக்கபடி உங்களுடைய கார் இன்சூரன்ஸ் அதிகரிக்கலாம், உங்களுடைய ‘தண்ணி அடிக்கும்’ பழக்கத்துக்கு ஏற்ப உங்களுடைய ஹெல்த் இன்சூரன்ஸ் அதிகரிக்கலாம். ஏன் உங்கள் அலுவலக பெர்ஃபாமன்ஸைக் கூட உங்கள் மொபைல் தரும் டேட்டாவைக் கொண்டே முடிவும் செய்து விடலாம். 

‘ஓடவும் முடியாது, ஒளியவும் முடியாது ஐ வில் பி வாச்சிங்’ என்பது பிக் பாஸை விட தொழில்நுப்டத்துக்கே அதிகம் பொருந்தும். இந்த சூழலில் பாதுகாப்பாய் இருப்பது எப்படி ?

  1. ஸ்மார்ட்போன்களை அங்கும், இங்கும் வைத்துச் செல்லாதீர்கள். பாதுகாப்பாய் வைத்திருங்கள். அவ்வப்போது பேக்கப் எடுத்துக் கொள்ளுங்கள்
  2. புளூடூத், வைஃபை போன்றவற்றை தேவையற்ற நேரங்களில் ஆஃப் செய்தே வைத்திருங்கள்.
  3. மிக மிக அவசியமான ஆப்ஸ் மட்டும் உங்களிடம் இருக்கட்டும். அதுவும் அங்கீகரிக்கப்பட்ட இடங்களிலிருந்து மட்டும் தரவிறக்கம் செய்யுங்கள்.
  4. சந்தேகத்துக்கு இடமான எந்த ஒரு லிங்கையோ, அட்டாச்மெண்டையோ கிளிக்காதீர்கள். 
  5. போனுக்கு கடின பாஸ்வேர்ட் போட்டு மூடி வையுங்கள். ஆப்ஸ்களைப் பயன்படுத்தியபின் முறையாய் எக்ஸிட் செய்யுங்கள். 
  6. பொது வைஃபைகளில் இணையாதீர்கள். அப்படியே இணைய வேண்டிய கட்டாயமான சூழல் வந்தாலும் பண பரிவர்த்தனைகள் நடத்தாதீர்கள். ஆட்டோ லாகின் வசதியை ஆன் செய்யாதீர்கள். 
  7. என்கிரிப்ஷன் வசதி இருக்கின்ற மொபைலெனில் அதைப் பயன்படுத்துங்கள். மொபைலின் ஓஎஸ் அப்டேட்களை உடனுக்குடன் நிறுவுங்கள். 
  8. ஒரு நல்ல ஆன் டி வைரஸ் மென்பொருளை பயன்படுத்துங்கள். தொலைவிலிருந்தே மொபைலில் உள்ளவற்றை அழிக்கும் ‘ரிமோட் வைப்’ ஆப்ஷனைப் பயன்படுத்துங்கள். 
  9. பழைய போனை முடிந்தமட்டும் விற்காமல் இருங்கள், அப்படி விற்கவேண்டிய சூழலெனில் மெமரி கார்ட், சிம்கார்ட், இண்டர்னல் மெமரி அனைத்தையும் ஃபார்மேட் செய்யுங்கள். அழிக்கப்பட்ட படங்களையும், தகவல்களையும் தேவையானால்  மீண்டெடுக்கலாம் என்பதை நினைவில் கொள்ளுங்கள்.
  10. ஜியோடேகிங் ஆப்ஷனை ஆஃப் செய்யுங்கள். செக்யூரிடி செட்டிங்ஸை எப்போதுமே அதிகபட்டமாக வையுங்கள்.

*

சேவியர்

தினத்தந்தி

டிஜிடல் வாலெட் நில்.. கவனி.. பயன்படுத்து ( Daily Thanthi )

Image result for digital wallet

நமக்கு முந்தைய தலைமுறை சட்டைப்பையில் ஒரு சின்ன நோட்புக்கும், ஒரு பேனாவும் சொருகி வைத்துக் கொண்டு அலைந்தது. அந்த புத்தகம் தான் அவர்களுடைய ஒட்டு மொத்த கணக்கு வழக்குகளுக்குமான ஆதாரம். அதில் தான் விலாசங்களும், தொலை பேசி எண்களும், கடன் பாக்கிகளும் எழுதப்பட்டிருக்கும்.

இன்றைக்கு அது டிஜிடல் மயமாகிவிட்டது. நமது கையில் இருக்கும் ஸ்மார்ட்போன்கள் தான் நமது நடமாடும் தகவல் பெட்டகம். தொலை பேசி எண்களானாலும் சரி, தகவல்களானாலும் சரி, வங்கிக் கணக்கு விஷயங்களானாலும் சரி எல்லாமே அந்த கையடக்க பெட்டிக்குள் டிஜிடல் வடிவத்தில் இளைப்பாறுகின்றன.

டிஜிடல் பரிவர்த்தனை பாதுகாப்பானதா ? எனும் கேள்வி இன்றைக்கு மலையேறிவிட்டது. அதிலிருக்கும் ஆபத்துகளை அங்கீகரித்துக் கொண்டு அடுத்த கட்டத்தை நோக்கி மக்கள் முன்னேறிவிட்டார்கள். அது தருகின்ற வசதிக்காக, சில சவால்களை எதிர்கொள்ளவும் அவர்கள் தயாராக இருக்கின்றனர்.

உதாரணமாக நீண்ட நெடிய கியூவில் சில மணி நேரங்கள் காத்திருப்பதை விட ஒரு சின்ன ஆபத்து வரலாம் எனும் எச்சரிக்கை உணர்வுடன் ஆன்லைனில் பில் கட்டுவதையே மக்கள் இன்று விரும்புகின்றனர். தியேட்டரில் கவுண்டர் முன்னால் அதிகாலையிலேயே நின்று மண்டை உடைய, இரத்தம் சொட்டச் சொட்ட முதல் காட்சி டிக்கெட் வாங்கியதெல்லாம் வரலாறுகளாகிவிட்டன. இன்று ஏதோ ஒரு ஆப் தான் நமக்கு டிக்கெட்களை வசதியாய் வாங்கித் தருகிறது.

வணிகம் எப்போதும் மக்களுடைய வசதிக்கு ஏற்ப கடைகளை விரித்துக் கொண்டே இருக்கும். இன்றைக்கு மக்களின் டிஜிடல் பயன்பாட்டை முன்னிறுத்தி தான் ஏகப்பட்ட புதிய பிஸினஸ் முறைகள் கிளர்ந்தெழுந்து கொண்டிருக்கின்றன. டிஜிடலைத் தொடாத எந்த தொழிலும் இனிமேல் வெற்றி பெற முடியாது என்பது எழுதப்படாத விதி. அது உணவகம், மருத்துவம் போன்ற அடிப்படை விஷயங்களானாலும் கூட.

டிஜிடல் வாலெட்கள் இன்றைக்கு வசீகர அம்சமாக மாறியிருப்பதற்கும், புதிது புதிதாய் முளைத்தெழும்புவதற்கும் அது தான் காரணம். உதாரணமாக பேடிஎம், மொபிவிக், பேயு, கூகிள் பே, ஆப்பிள் பே, ஓலா மணி இத்யாதி இத்யாதி என ஏகப்பட்ட வாலெட் சேவைகள் இன்றைக்கு களத்தில் குதித்திருக்கின்றன. அவற்றில் சில, மிக வெற்றிகரமாக காலூன்றியும் இருக்கின்றன.

பயனர்களுக்கு எதைப் பயன்படுத்தலாம் ? எது நல்லது ? எது ஆபத்தில்லாதது எனும் கேள்விகள் எழுவது சகஜம். குறிப்பாக சில நிறுவனங்கள் ஏகப்பட்ட தள்ளுபடிகளை அள்ளி வீசுகின்றன, ஏகப்பட்ட ‘கேஷ் பேக்’ ஆஃபர்களை கொட்டித் தருகின்றன. ‘ஆயிரம் ரூபாய்க்குப் பொருள் வாங்கினேன். பொருளும் நல்லாயிருக்கு முன்னூறு ரூபா கேஷ்பேக்கா வந்துடுச்சு’ என மக்கள் பேசுவதை அடிக்கடி கேட்கமுடிகிறது.

இவ்ளோ கம்மியான விலைக்கு பொருளை விற்றால் எப்படி நிறுவனத்துக்குக் கட்டுப்படியாகிறது எனும் கேள்வி கூட சில வேளைகளில் நமக்கு எழுவதுண்டு. ஒரு விஷயத்தை புரிந்து கொள்ள வேண்டும். லாபம் எனும் விஷயம் இல்லாமல் எந்த நிறுவனமும் அதன் சுண்டு விரலைக் கூட பயனர்களை நோக்கி நீட்டுவதில்லை. பெரும்பாலான டிஜிடல் வாலெட் நிறுவனங்களும் அப்படித் தான்.

இவை பயனர்களுக்கும், விற்பனையாளர்களுக்கும் இடையே ஒரு பாலம் போல இருக்கின்றன. பயனர்களின் தேவையை, விற்பனையாளர்களிடமிருந்து வாங்கி தங்கள் மூலமாக பரிவர்த்தனை செய்கின்றன. இந்த நிறுவனங்களில் லாபம் பல வகைகளில் வருகின்றன. ஒன்று, விற்பனையாளர்களிடமிருந்து ஒரு தொகையை கமிஷனாகப் பெறுகின்றன. சில சேவைகளுக்கு பயனர்களிடமிருந்தே கட்டணத்தைப் பெறுகின்றன.

இன்னொன்று தங்கள் மூலமாக நடைபெறுகின்ற பரிவர்த்தனைகளான பல கோடி ரூபாய்களை ஒரு குறிப்பிட்ட காலம் தங்களுடைய கட்டுப்பாட்டில் வைத்திருந்து பல இடங்களில் முதலீடு செய்கின்றன.

உதாரணமாக, உங்களுக்கு 300 ரூபாய் பணம் திரும்ப வருகிறதெனில் அது உங்கள் பாக்கெட்டில் பணமாக வருவதில்லை. அது பேடிஎம் மணியாகவோ, ஓலா மணியாகவோ ஏதோ ஒரு டிஜிடல் வடிவத்தில் தான் இருக்கும். உண்மையில் அந்த பணம் நீங்கள் பயன்படுத்தும் வரை அவர்களுடைய கட்டுப்பாட்டில் தான் இருக்கும். ஒரு கோடி பேருக்கு 300 ரூபாய் கிடைத்தால் அந்த முன்னூறு கோடிரூபாயும் உண்மையில் அவர்களிடம் தான் இருக்கும்.

இந்த பணத்தை வைத்திருக்கின்ற வங்கியும் நிறுவனத்துக்கு வட்டி கொடுக்கும், அந்த பணத்தை முதலீடு செய்யும்போதும் கணிசமான லாபம் கிடைக்கும், அந்த பரிவர்த்தனைகளுக்கும் நல்ல கட்டணம் கிடைக்கும், இவையெல்லாம் போக விளம்பரங்களை தளங்களில் வெளியிடுவதன் மூலமும் பணம் கிடைக்கும்.

இந்த நிறுவனங்களைப் பயன்படுத்துவதில் ஏதேனும் ஆபத்து உண்டா ? என்றால் சில ஆபத்துகள் உண்டு என்பதே பதில். உதாரணமாக, இவை உங்களுக்கும் உங்களுடைய வங்கிக்கும் இடையேயான பாலமாக இருக்கின்றன. உங்களுடைய முக்கியமான தகவல்கள் இந்த இடைநிறுவனத்திற்குக் கிடைக்கிறது. அவற்றை அவை தவறாகப் பயன்படுத்துவதில்லை, காரணம் நீங்கள் அவர்களுடைய கஸ்டமர். ஆனால் அவர்களிடமிருந்து அவை திருடப்படலாம், ஹேக்கர்களால் கடத்திச் செல்லப்படலாம் எனும் ஆபத்து உண்டு.

எனினும், இன்றைய நவீன தொழில்நுட்பங்கள் இத்தகைய நிறுவனங்களின் பாதுகாப்பையும் என்கிரிப்ஷன் டெக்னாலஜி மூலமாக உறுதி செய்கின்றன. இதன்மூலம் தகவல்கள் திருடப்படுவது குறையும். ஆயிரம் தான் இருந்தாலும், டிஜிடல் பயன்பாட்டுக்கே உரிய ஆபத்துகள் இவற்றிலும் உண்டு

டிஜிடலை முழுமையாய் ஒதுக்கி விடவே முடியாது எனும் காலகட்டத்தில் நாம் வாழ்கிறோம். விரும்பியோ, விரும்பாமலோ அந்த சூழல் உருவாகியிருக்கிறது.

இத்தகைய சூழலில் பாதுகாப்பாய் இருக்க இந்த அடிப்படை விஷயங்களை மனதில் கொள்ளுங்கள்.

1. கஷ்டம் பார்க்காமல் மிகவும் கடினமான பாஸ்வேர்ட் பயன்படுத்துங்கள். அதை அடிக்கடி மாற்றுங்கள்.

2. உங்கள் ஸ்மார்ட்போன் எப்போதும் லாக் செய்யப்பட்ட நிலையிலேயே இருக்குமாறு பார்த்துக் கொள்ளுங்கள்.

3. பொது வைஃபைகளில் அதை இணைக்காதீர்கள். வீட்டை விட்டு வெளியே வந்தால் வைஃபையை அணைத்தே வையுங்கள்.

4. புதிதாக வருகின்ற பாதுகாப்பு அப்டேட்களை உதாசீனம் செய்யாதீர்கள்.

5. எந்த ஆப்பைப் பயன்படுத்தினாலும் அதை பயன்படுத்தியபின் அதை விட்டு முழுமையாக வெளியே வாருங்கள்.

6. அடிக்கடி உங்களுடைய கணக்கு வழக்குகளைப் பார்த்து ஏதேனும் சந்தேகப்படும்படியான பரிவர்த்தனை நடந்திருக்கிறதா என கவனியுங்கள்.

7. பாதுகாப்பற்ற ஆப்களை உங்கள் ஸ்மார்ட்போனில் தரவிறக்கம் செய்யாதீர்கள்.

8. சிறப்பு வைரஸ் பாதுகாப்பு மென்பொருட்களைப் பயன்படுத்துங்கள்.

9. சந்தேகத்துக்கிடமான தளங்களில் ஆன்லைன் பரிவர்த்தனை செய்யாதீர்கள்.

10. உங்கள் பாஸ்வேர்ட், பயனர் பெயர், மின்னஞ்சல் பாஸ்வேர்ட் போன்ற அனைத்தையும் பாதுகாப்பாகவே வைத்திருங்கள்

*

சேவியர்
Daily Thanthi

நில் நிதானி கணினி

Related image

முன்பெல்லாம் கணினியைப் படித்தோம், இன்று கணினியில் படிக்கிறோம். கணினி படிப்பைக் குறித்த பார்வை இன்று இப்படி விரிவடைந்திருக்கிறது. கணினி என்பது இனிமேல் ஒரு தனிப் பாடமல்ல, எந்தப் பாடத்தையும் இணைக்கும் பாலம் என்பதையே புதிய தொழில்நுட்பக் கல்வி நமக்கு எடுத்துக் கூறுகிறது.

சார்லஸ் பேபேஜ் பத்தொன்பதாம் நூற்றாண்டில் கணினியைக் கண்டுபிடித்தபோது அது இத்தகைய விஸ்வரூப வளர்ச்சியடையும் என எதிர்பார்த்திருக்க வாய்ப்பில்லை. கூட்டல் கழித்தல் போடுகின்ற ஒரு கேல்குலேட்டர் போல தான் அதன் முதல் பிரசவம் இருந்தது. அது படிப்படையாக வளர்ச்சியடைந்து, ஆயிரத்து தொள்ளாயிரத்து முப்பத்து ஏழில் முதல் தலைமுறை கணினி உருவானது.எலக்ட்ரானிக் நியூமரிகல் இன்டிகிரேட்டர் அன்ட் கம்ப்யூட்டர் என்பது தான் அப்போதைய பெயர்.

பெயரைப் போலவே அது அளவிலும் மிகப்பெரியதாக இருந்தது. சுமார் பதினெட்டாயிரம் வேக்யூம் டியூப்கள் ஒரு கணினியில் இருந்தன. அதை பாதுகாப்பாக வைக்க சுமார் முக்கால் கிரவுண்ட் நிலம் தேவைப்பட்டது ! அதன் எடை சுமார் முப்பதாயிரம் கிலோ என்றால் பார்த்துக் கொள்ளுங்கள். இன்றைய கணினிகளோடு ஒப்பிடுகையில் வளர்ச்சி வியப்பூட்டுகிறது.

நமது அன்றாட வாழ்க்கையை இன்றைய கணினி யுகம் தலைகீழாய்ப் புரட்டிப் போட்டுவிட்டது என்று சொல்லலாம். குறிப்பாக இணையம் வந்தபின்பு கணினி தொழில்நுட்பம் கரைபுரண்ட காட்டாறுபோல திமிறிப் பாய்ந்து விட்டது. யாரும் எதிர்பார்க்காத அளவுக்கு உலகத்தை ஒற்றை புள்ளியில் கொண்டு வந்து சேர்த்து விட்டது.

திரைகடல் ஓடியும் திரவியம் தேடு என்பதெல்லாம் பழைய கதையாகி, வலைகடல் ஓடி திரவியம் தேடு எனும் புது மொழியில் இன்றைய தொழில்நுட்ப உலகம் பயணிக்கிறது.

‘ஊருக்கு போனதும் கடுதாசி போடுப்பா’ என்று யாரும் இன்றைக்கு சொல்வதில்லை. பயணம் செய்ய ஆரம்பித்த நொடி முதல் ஒவ்வொரு நிமிடமும் நாம் எங்கே இருக்கிறோம் என்பதை ஜிபிஎஸ் டிராக் செய்கிறது. அதை வீட்டிலிருந்தபடியே அம்மாக்கள் கண்டு நிம்மதிப் பெருமூச்சு விடுகிறார்கள்.

இன்லென்ட் என்றால் என்ன ? தபால் நிலையம் என்பது பால் விற்கும் இடைமா ? என்றெல்லாம் கேள்வி கேட்கக்கூடிய புதிய தலைமுறையை இன்றைய கணினி யுகம் உருவாக்கியிருக்கிறது.

பழைய கால திரைப்படங்களில் கிளைமேக்ஸ் காட்சியில் கதாநாயகியை அவளது தந்தை ரயிலிலோ, விமானத்திலோ ஏற்றிக் கொண்டு சென்றுவிடுவார். காதலர்கள் பிரிந்து விடுவார்கள். கண்ணைக் கசக்கிக் கொண்டே பார்வையாளர்களும் பிரிந்து விடுவார்கள். அப்படி ஒரு கிளைமேக்ஸ் வைத்தால் இன்று சிரிப்பார்கள். உலகின் எந்த மூலையில் இருந்தாலும் முகம் பார்த்துப் பேசும் தொழில்நுட்பங்கள் நமது கையடக்கக் கருவிகளில் வந்துவிட்டன.

சமூக வலைத்தளங்களின் வரவுக்குப் பின்பு உலகின் நட்பு வட்டாரங்களெல்லாம் டிஜிடல் குட்டிச் சுவற்றில் வந்தமர்ந்து விட்டன. அரட்டைகளும், பரிமாற்றங்களும் சாதாரண சங்கதிகளாகிவிட்டன. பள்ளிக்கூட நண்பர்கள், கல்லூரி நண்பர்கள், குடும்ப உறுப்பினர்கள் என உறவுகளின் இழைகள் அனைத்தையும் எப்போது வேண்டுமானாலும் தொடர்பில் கொண்டிருக்கக் கூடிய ஒரு சூழலை கணினி யுகம் நமக்கு உருவாக்கித் தந்திருக்கிறது.

கடந்த தலைமுறைக்கும், இந்த தலைமுறைக்கும் இடையேயான மிகப்பெரிய இடைவெளியாய் இந்த தொழில்நுட்பப் புரட்சியைச் சொல்லலாம். எந்த முன்பதிவுக்கும் அலுவலகம் சென்று வரிசையில் நிற்கத் தேவையில்லை, எந்த பில் கட்டவும் அரசு அலுவலகங்களில் செல்லத் தேவையில்லை, பணத் தேவைக்காய் வங்கிகளில் டோக்கன் வாங்கி நொந்து கொள்ளத் தேவையில்லை, கடிதம் அனுப்ப ஸ்டாம்ப் தேடித் திரியத் தேவையில்லை, ஏன் சாப்பிடுவதற்குக் கூட சமைக்கத் தேவையில்லை எனும் நிலமையை கணினி யுகம் உருவாக்கித் தந்திருக்கிறது.

கேமரா, ரேடியோ, டேப்ரிக்கார்டர், டிவிடி பிளேயர், தபால் நிலையம், வங்கி என சர்வத்தையும் உள்ளடக்கியபடி கணினி நுட்பத்தின் வசீகரமாய் போன்கள் கரங்களில் இருக்கின்றன. இனியும் இவை அடையப் போகின்ற எல்லைகளை நினைத்தால் பிரமிப்பாய் இருக்கிறது.

கணினி யுகம் அழிந்து விடும், கணினி தொழில்நுட்பம் முடிந்து விடும் என்றெல்லாம் ஒவ்வொரு காலகட்டத்திலும் ஊகங்கள் வெளியாவதுண்டு. ஆனால் இதை மட்டும் மனதில் பச்சை குத்திக் கொள்ளுங்கள், “கணினியுகம் என்றைக்குமே அழிந்து விடாது. கூடு விட்டுக் கூடுபாயும் நுட்பம் போல ஒரு தொழில்நுட்பத்திலிருந்து இன்னொரு தொழில்நுட்பம் நோக்கி அது பாய்ந்து கொண்டே இருக்கும்” அவ்வளவு தான் வித்தியாசம்.

உதாரணமாக கணினி முதலில் வந்தபோது அது டைப் செய்யவும், தகவல்களை டிஜிடலாய் சேமிக்கவும் தான் பயன்பட்டது. பின்னர் ஒரு அலுவலகத்தை டிஜிடல் மயமாக்க உதவியது. அது பின்னர் உலக வலையுடன் இணைந்து வலைத்தளங்களின் வளர்ச்சிக்கு அடிகோலியது. பின்னர் வங்கிகளையும், நிறுவனங்களையும் இணைத்தது. பின்னர் மொபைல் தொழில்நுட்பத்துக்குத் தாவியது. வலைத்தளங்களை விட்டு விட்டு ஆப்களை தயாரிக்க நிறுவனங்கள் களமிறங்கின. இப்போது மொபைல்களையும் தாண்டி அணியும் தொழில்நுட்பத்தை நோக்கி நுட்பம் நாலுகால் பாய்ச்சலில் ஓடுகிறது.

ஆர்டிபிஷியல் இன்டலிஜென்ட் எனப்படும் செயற்கை அறிவு தொழில்நுட்பம் இன்றைக்கு மிகப்பிரபலம். கருவிகள் தாங்களாகவே முடிவெடுத்துச் செயல்படும் வகையில் வடிவமைக்கப்படுகின்றன. அத்துடன் மெஷின் லேர்ணிங் தொழில்நுட்பம் இணைந்துவிட்டது. சமீப காலமாக தொழில்நுட்ப உலகை ஆக்கிரமித்திருக்கும் பிக்டேட்டா, கிளவுட் கம்ப்யூட்டிங், ஆகுமென்டட் ரியாலிடி, இன்டர்நெட் ஆஃப் திங்க்ஸ் பிளாக் செயின் போன்றவையெல்லாம் கைகோர்த்து இணைந்து பயணிக்கின்றன.

ஜிம்மி… போய் பேப்பர் எடுத்துட்டு வா என்றது பழைய காலம். “அலெக்ஸா.. இன்னிக்கு என்ன நியூஸ்” என கேட்பது இந்தக் காலம். வீட்டின் வரவேற்பறைகளில் ஜம்மென அமர்ந்திருக்கும் கூகிள் ஹோம்களோ, அமேசான் அலெக்ஸாக்களோ நாம் கேட்கும் கேள்விகளுக்கெல்லாம் அட்சர சுத்தமாய்ப் பதில் சொல்கின்றன. நமக்குத் தேவையான உதவிகளைச் செய்கின்றன. ஆலோசனைகளைச் சொல்கின்றன. இனிமையான பாடலை இசைத்து மனதை இலகுவாக்குகின்றன.

தொழில்நுட்ப உலகம் நம்மை கணினியின் கரங்களில் ஒப்படைத்து விட்டது. கணினியையும், டிஜிடலையும் அவரச அவரசமாய் அரவணைத்துக் கொள்ளும் இந்த சூழலில் நாம் செய்ய வேண்டிய முக்கியமான இரண்டு விஷயங்கள் உண்டு.

ஒன்று, உறவுகளையும் நேசத்தையும் என்றும் டிஜிடல் இழைகளில் கட்ட முடியாது. நேரடியான உரையாடலையும், அன்பின் சந்திப்புகளையும், கரம் கோர்த்த ஆறுதலையும் எந்த கணினியும் இடம் பெயரச் செய்ய முடியாது. அத்தகைய மனிதத்தின் மதிப்பீடுகளை கணினியின் கரங்களுக்கு விற்று விடாதிருப்போம்

இரண்டு, இந்த டிஜிடல் வெளி ஆபத்துகளை உள்ளடக்கியது. எல்லாமே மறைந்திருப்பதைப் போலத் தோற்றமளிக்கும். ஆனால் வெளிப்படையாய் விழித்திருக்கும். இதில் நமது ரகசியத் தகவல்களையோ, படங்களையோ, செய்திகளையோ பகிராதிருப்போம். வெறுப்பின் உரையாடல்களையோ, வன்மத்தின் விவாதங்களையோ செய்யாதிருப்போம்.

இன்று உலகக் கணினி கல்வி தினம். கணினியை கல்வியாய்க் கற்போம், அன்பை உயிருக்குள் வைப்போம்.

*

சேவியர்.

daily thanthi

Data Science 8 : தகவல் அறிவியல் 8

எதிர்காலத்தில் தகவல் அறிவியல்

Image result for data science

எந்த ஒரு தொழில்நுட்பமும் கல்வெட்டு போல நிலைத்து நிற்பதில்லை. நாட்கள் செல்லச் செல்ல அந்த நுட்பம் தனது முக்கியத்துவம் இழந்து விடுகிறது. அப்போது இன்னொரு தொழில்நுட்பம் அந்த இடத்தை ஆக்கிரமித்துக்  கொள்ளும். அதுவும் இன்றைய டிஜிடல் யுகத்தில் தொழில்நுட்பத்தின் மாற்றங்கள் எக்ஸ்பிரஸ் வேகத்தில் தான் நிகழ்கின்றன.

தகவல் அறிவியல் தொழில்நுட்பமும் அப்படித் தான் இன்று இருப்பதைப் போலவே எல்லா நாளும் இருக்கப் போவதில்லை. மாற்றங்களை நிச்சயமாகச் சந்திக்கப் போகிறது, புதிய புதிய வடிவங்களை எடுக்கப் போகிறது. புதிய புதிய தொழில்நுட்பங்களோடு தன்னை இணைத்துக் கொள்ளப் போகிறது.

ஆர்டிஃபிஷியல் இன்டலிஜென்ஸ் எனப்படும் செயற்கை அறிவு அதில் முக்கியமான ஒன்று. அது கண்டிப்பாக இன்னும் ஆழமாக தகவல் அறிவியல் துறைக்குள் நுழையும் என்பதில் சந்தேகமில்லை. அப்போது அல்காரிதங்களும், மென்பொருட்களும் தன்னிலே “ஸ்மார்ட்” ஆக மாறி தகவல்களை பயன்படுத்தத் துவங்கிவிடும். மனித உதவி தேவையில்லாமலேயே பின்னர் ‘பிரடிக்டிவ்’ அலசல்கள் நடக்க வாய்ப்புகள் அதிகம்.

ஆர்டிபிஷியல் இன்டெலிஜென்டின் வரவு தகவல் அறிவியலில் ஏற்படுத்துகின்ற விளைவுகளில் ஒரு எதிர் விளைவும் உண்டு. எப்போது செயற்கை அறிவு முழுமையாக தகவல் அறிவியலில் நுழைகிறதோ அப்போது மனித உழைப்புக்கு அங்கே வேலை குறைகிறது. ஆட்டோமேஷன் அந்த இடத்தை வந்தடைகிறது. இதனால் அந்த காலகட்டத்தில் வேலை வாய்ப்புகள் குறையும். ஆனால் அதுவரை தகவல் அறிவியலார்களுக்கான தேவை அதிகரித்துக் கொண்டே இருக்கும்.

அதே போல மெஷின் லேர்னிங் எனப்படும் தொழில்நுட்பமும் இன்னும் அதிகமாக தகவல் அறிவியலில் இணைந்து கொள்ளும். ஏற்கனவே மெஷின் லேர்னிங் நுட்பம் டேட்டா சயின்ஸோடு இணைந்து தான் பயணிக்கிறது. இனிமேல்  இன்னும் அதிகமாக அந்த பிணைப்பு இருக்கும்.

உதாரணமாக ஒரு இயந்திரம் தனது தகவலை இன்னொரு இயந்திரத்துக்கு தானாகவே அனுப்பும், ஒரு கருவி வேறு பல கருவிகளிலிருந்து வருகின்ற தகவல்களை தானாகவே சேகரித்து அலசலை துவங்கும். சென்சார்களின் தகவல்கள் அங்கும் இங்கும் தானாகவே கூடு விட்டுக் கூடு பாய்ந்து தனது பணிகளைச் செய்யும். என இந்த மெஷின் லேர்னிங் நுட்பம் தகவல் அறிவியலில் வெகு ஆழமாய் செல்லும் என்பதில் சந்தேகமே இல்லை.

மருத்துவத் துறையில் தகவல் அறிவியலின் பயன் இன்னும் பல மடங்கு அதிகரிக்கப் போகிறது. குறிப்பாக நியூரல் நெட்வர்க் எனும் நரம்பியல் துறையில் தகவல் அறிவியலின் பயன்பாடு வெகுவாக அதிகரிக்கும் என மருத்துவ அறிக்கைகளும், ஆய்வுகளும் தெரிவிக்கின்றன.  மருத்துவம் ஏற்கனவே தகவல் அறிவியலை ஆய்வுகளிலும், மருத்துவமனைகளிலும் பயன்படுத்தி வருகிறது. அது இன்னும் பலமடங்கு அதிகரிக்கும்.

இன்டர்நெட் ஆஃப் திங்க்ஸ் எனும் தொழில்நுட்பம் பற்றி கேள்விப்பட்டிருப்பீர்கள். இப்போது கணினி துறையில் படிப்பவர்களுக்கு இது ஒரு கட்டாயப் பாடமாகவும் இருக்கிறது. எப்படி இணையத்தில் தகவல்களை சேமிக்கிறோமோ, அப்படி உலகில் நாம் பயன்படுத்தும் பல்வேறு பொருட்களையும் இணையத்தோடு இணைப்பது தான் இதன் அடிப்படை சிந்தனை. உதாரணமாக உங்கள் வீட்டு கேஸ் ஸடவ்வை நீங்கள் இணையத்தோடு இணைக்கலாம். அது ஒழுங்காக வேலை செய்கிறதா என்பதைக் கவனிக்கலாம்.

இவற்றையெல்லாம் சென்சார்கள் கவனித்துக் கொள்கின்றன. டிஜிடல் தகவல்களை அவை கணினிகளுக்கோ, அல்லது அது போன்ற கருவிகளுக்கோ அனுப்பி இணைய உலகோடுள்ள உறவை உயிர்ப்பித்துக் கொள்கின்றன. இன்றைக்கு சுமார் 170 பில்லியன் எனுமளவில் இருக்கும் இன்டர்நெட் ஆஃப் திங்க்ஸ் பிஸினஸ் இன்னும் நான்கு ஆண்டுகளில் சுமார் 560 பில்லியன் எனுமளவுக்கு எகிறும் என்கின்றன ஆய்வுகள்.

அதே போல பிக் டேட்டா எனும் தொழில்நுட்பமும் தகவல் அறிவியலின் ஒரு பாகம் தான். பிக் டேட்டா என்பது உங்களுக்குத்  தெரிந்த விஷயம் தான். கொட்டிக் கிடக்கின்ற கணக்கற்ற தகவல்களை எப்படி பயனுள்ள தகவல்களாக மாற்றுகிறோம் ? எப்படி அவற்றைக் கொண்டு தொழிலை வளர்ச்சிப் பாதையில் அழைத்துச் செல்கிறோம் என்பது தான் அதன் அடிப்படை. முழுக்க முழுக்க தகவல்களின் அடிப்படையில் இயங்குவதால் இது தொடர்ந்து தகவல் அறிவியலில் ஒரு முக்கியமான பாகமாக இருக்கும் !

வெறும் எண்களையும், டிஜிடல் எழுத்துகளையும் வைத்து தான் இன்றைக்கு தகவல் அறிவியல் அசத்திக் கொண்டிருக்கிறது. மற்றெந்த வகை தகவல்களாய் இருந்தாலும் அவற்றை முதலில் டிஜிடல் எண்களாகவோ, எழுத்துகளாகவோ மாற்றினால் தான் பயன்பாட்டுக்குக் கொண்டு வர முடியும் எனும் சூழல் இருக்கிறது. இந்த நிலை மாறும் !  இனி வரும் காலங்களில் தகவல்களை டிஜிடல் எண்களாக மாற்றாமல் நேரடியாகவே பயன்படுத்தக் கூடிய நுட்பங்கள் உருவாகும்.

அப்படிப்பட்ட மாற்றம் வரும்போது தகவல் அறிவியலில் இன்னும் வியப்பூட்டும் விஷயங்கள் நடக்கும். ஆடியோக்கள், வீடியோக்கள், புகைப்படங்கள், லைவ் கேமராக்கள் போன்றவை எல்லாமே மிகப்பெரிய நேரடியான உள்ளீடு தகவல்களாக பயன்படும். தகவல் அறிவியலின் மிகப்பெரிய புரட்சி அது என சொல்லலாம்.

அத்துடன் ‘நேட்டிவ் லேங்குவேஜ்’ எனப்படும் மொழிகடந்த தகவல் அறிவியலும் உருவாகிவிட்டால் இதன் வீச்சு கணிக்க முடியாத அளவுக்கு இருக்கும்.

ஹைப்பர் பெர்சனலைசேஷன் எனப்படும் தனிமனிதனை மையப்படுத்தி செய்கின்ற தொழில்களுக்கு தகவல் அறிவியல் தான் மிகப்பெரிய துணையாய் இருக்கப் போகிறது. விற்பனையாளருக்கும், வாடிக்கையாளருக்கும் இடையேயான தொடர்பை இறுக்கிப் பிடித்து விற்பனையை உறுதி செய்வதில் இந்த பெர்சனலைசேஷன் சிந்தனை தேவையானதாய் இருக்கிறது.

ஆகுமென்டட் ரியாலிடி எனும் தொழில்நுட்பத்தில் ஏற்படுகின்ற மாற்றங்களும் தகவல் அறிவியலின் வளர்ச்சியைக் கொண்டு வரும். ஆகுமென்டர் ரியாலிடி இன்றைக்கு ‘கேம்ஸ்’ துறையில் கொண்டு வந்திருக்கின்ற மாற்றங்கள் எக்கச்சக்கம். அப்படியே அந்த நுட்பத்தை ஸ்மார்ட் போனில் மாற்றுகின்ற நடைமுறையும் இப்போது வரத் துவங்கியிருக்கிறது. ஆகுமென்டட் ரியாலிடி வளர வளர, டேட்டா சயின்ஸும் வளரும்.

பிகேவியரல் அனாலிசிஸ் எனப்படும், ஒரு மனிதனுடைய குணாதிசயங்களை அலசுகின்ற, உளவியல் சார்ந்த தகவல் அறிவியலும் இப்போது வளர்ந்து வருகிறது. பயனாளர்களை உளவியல் ரீதியாக அணுகும் முறை இது என்றும் சொல்லலாம். எந்த அளவுக்கு ஒரு நபரைத் தெரிந்து வைத்திருக்கிறோமோ, அந்த அளவுக்கு அவருடைய தேவைகளை அறிந்து கொள்ள முடியும் எனும் அடிப்படை விஷயம் தான் இங்கே கையாளப்படுகிறது.

தகவல் அறிவியலில் வளர்ச்சியும், ஆர்டிபிஷியல் இன்டெலிஜென்ட் வளர்ச்சியும் இயந்திரங்களையும், கருவிகளையும் ஸ்மார்ட் ஆக மாற்றிக் கொண்டிருக்கின்றன. இனிமேல் அந்த கருவிகளெல்லாம் அறிவைத் தாண்டி ஞானம் உடையவையாக மாறும் என்பதே தொழில்நுட்பம் தருகின்ற தொலை நோக்குப் பார்வை. நமது பிள்ளைகளுக்கு நாம் அறிவைக் கொடுக்கும் முன்பே நல்ல சிந்தனைகளையும், பகுத்தறிவையும் கொடுக்கிறோம் இல்லையா ? அதே போல நமது  இயந்திரங்களும் ஞானம் கொண்டவையாய், சுய சிந்தனை கொண்டவையாய் மாறும் என்பதே தகவல் அறிவியலின் சிந்தனை.

சுருக்கமாகச் சொல்லவேண்டுமெனில், தகவல் அறிவியலின் வீச்சும் பயன்பாடும் அடுத்த ஐந்து பத்து ஆண்டுகளுக்கு நிற்கப் போவதில்லை. வடிவம் மாறி, நுட்பம் மாறி பயணித்துக் கொண்டே தான் இருக்கப் போகிறது. எனவே ஆர்வமும், திறமையும் உடையவர்கள் தயங்காமல் இந்தத் துறையை அரவணைத்துக் கொள்ளலாம்

( முற்றும் )

Data Science 7 :

Image result for data science

 

அமெரிக்காவுக்கு மட்டுமே இந்த ஆண்டு இறுதிக்குள் இரண்டு இலட்சம் டேட்டா சயின்ஸ் பொறியாளர்கள் தேவைப்படுவார்கள் என்கிறது மெக்கன்சி ஆய்வு. அடுத்த பத்து ஆண்டுகளுக்கு தொழில் நுட்ப உலகை வசீகரிக்கப் போகும் வேலை இந்த தகவல் அறிவியல் தான் கூகிள் நிறுவன தலைமை பொருளாதார அதிகாரி ஹான் வாரியன். தகவல் அறிவியல் எனும் துறை இப்போதே பெரும்பாலான நிறுவனங்களின் முதுகெலும்பாகத் தான் இருக்கிறது. அப்படி வசீகரிக்கும் நிறுவனங்களில் மூன்று நிறுவனங்களைப் பற்றி நாம் கடைசியில் பார்ப்போம் !

‘இந்த தகவலை எல்லாம் வெச்சு என்ன செய்ய போறோம்” என்கிற மனநிலை ஒரு காலத்தில் இருந்தது. இப்போது அது தலைகீழாக மாறிவிட்டது. எந்த தகவலை வைத்தும் என்ன வேண்டுமானாலும் செய்யலாம் எனும் சிந்தனை உருவாகிவிட்டது. தகவல் என்பது பொன்முட்டையிடும் வாத்தாக மாறிவிட்டது. தகவல் என்பது பணம் காய்க்கும் மரமாகிவிட்டது. அதனால் தான் எல்லா மென்பொருட்களும், நிறுவனங்களும் தகவல் சேகரிப்பில் ஆர்வம் காட்டுகின்றன. அது பல வேளைகளில் தனி மனித சுதந்திரத்துக்கு வேட்டு வைப்பதாகவும் அமைந்து விடுகிறது என்பது தனிக்கதை.

எனவே இப்போதெல்லாம் நிறுவனங்கள் தங்கள் அடிப்படை சிந்தனையாக எழுதிக் கொள்ளும் விஷயம் இது தான், “தகவல்கள் எல்லாமே ஏதோ ஒரு வகையில் தேவையானவை”. ஒரு தகவலை சாதாரணமான ஒரு எண்ணாகவோ, எழுத்தாகவோ பார்க்காமல் அதன் பின்னணியில் இயங்குகின்ற விஷயங்களை ஊகித்து அறிவதிலும், கணித்து கண்டுபிடிப்பதிலும் இருக்கிறது தகவல் அறிவியலின் முதல் வெற்றி.

தகவல்களுக்கு எடை உண்டு ! தகவல்கள் காற்றைப் போல அங்கும் இங்கும் அலைந்து திரிந்தாலும் அதை சரியான வகையில் கட்டுப்படுத்தி கட்டி வைப்பவர்களுக்கு அது செல்வத்தை அள்ளித் தருகிறது. காற்றிலிருந்தும் தகவலை சேகரிப்பது தகவல் அறிவியலின் தேவை. அதாவது, யாருக்கும் தேவையில்லை என நினைக்கும் விஷயங்கள் ஒரு நிறுவனத்தின் வளர்ச்சியையே ஒட்டு மொத்தமாய்ப் புரட்டிப் போட முடியும்.

இப்போது இன்னொரு சிந்தனை வேண்டும். “நம்மிடம் இருக்கின்ற பிரச்சினை இன்னது.. இதை எப்படி நம்மிடம் இருக்கின்ற தகவலோடு இணைத்து முடிச்சுப் போடுவது ? இதற்குத் தான் மென்பொருட்களும், அல்காரிதங்களும் உதவிக்கு வருகின்றன. ஆனால் ஒரு சாதாரண நபராக ஒரு பிரச்சினையையும், அதை எப்படி இந்தத் தகவல் தீர்த்து வைக்கலாம் எனும் சிந்தனையும் இருக்க வேண்டியது அவசியம்.

இப்போது அடுத்த நிலை ! தகவலைப் புரிந்து கொண்டாயிற்று. அதை எப்படி பிரச்சினையோடு இணைத்து முடிவை நோக்கி நகர்வது என்பதையும் அறிந்தாயிற்று. அதைச் செயல்படுத்தக்கூடிய கட்டமைப்பு நிறுவனத்துக்கு இருக்கிறதா ? என்பதைப் பார்க்க வேண்டும். வண்டி நுழையாத தெருவுக்குள் வீட்டை கட்டி வைத்தால், பென்ஸ் கார் வாங்கினாலும் பயனில்லை அல்லவா ? எனவே செயல்படுத்தப் பட வேண்டிய கட்டமைப்பை உருவாக்குவதும், சரியான நேரத்தில் அதை செயல்படுத்துவதும் அவசியம்.

எதிர்காலத்தில் இந்த தகவல் அறிவியல் என்பது , ‘ரியல் டைம் டேட்டா’ அதாவது தகவல்கள் வர வர அதை வைத்து ஆட்டோமெடிக்காக அலசி முடிவுகள் எடுக்கும் முறை வந்து விடும். இப்போதைக்கு இருக்கின்ற தகவல்களைக் குவித்து, அதை அலசி தான் முடிவுகளை எடுக்கிறோம். அதன் பின் வருகின்ற அதிகபடியான தகவல்கள் ஆட்டோமெடிக்காக பயன்படுத்தப்படும் சூழல் உருவாகும்.

இப்போது தகவல் அறிவியல் துறையில் கோலோச்சிக் கொண்டிருக்கும் டாப் 3 நிறுவனங்களைப் பற்றி பார்க்கலாம்.

1. கூகிள் !

நம்மை ரகசியக் கண் கொண்டு பார்த்துக் கொண்டே இருக்கும் நிறுவனம் என நீங்கள் கூகிளை சொல்லலாம். ஜிமெயிலில் நீங்கள் அனுப்புகின்ற ஒவ்வொரு மெயிலும் வாசிக்கப்படலாம், பிக் டேட்டா அனாலிசிஸ் செய்யப்படலாம், அந்தத் தகவல்களை பிஸினஸ் தேவைக்காய் பயன்படுத்தலாம்.

உதாரணமாக, நீங்கள் ஒரு விமான டிக்கெட் புக் செய்கிறீர்கள். அதை கூகிள் மெயிலுக்கு அனுப்புகிறீர்கள் என வைத்துக் கொள்ளுங்கள். அது அந்தத் தகவல்களையெல்லாம் படித்து விட்டு, அங்கே அந்த நாளில் உங்களுக்கு ஹோட்டல் வேண்டுமா, கார் வேண்டுமா, வேறு ஏதாவது வசதிகள் வேண்டுமா என டிஜிடல் நச்சரிப்பை ஆரம்பிக்கும்.

எதற்கெடுத்தாலும் நாம் கூகிளைத் தான் அழைத்து, ‘தேடுதல்’ செய்கிறோம் இல்லையா ? அந்த தகவல்களெல்லாம் அவர்களுடைய சர்வரைக் கடந்து தான் செல்கின்றன. அவற்றில் எவையெல்லாம் தேவைப்படுமோ அவற்றையெல்லாம் கூகிள் சேமித்துக் கொள்கிறது. இன்னும் சொல்லப்போனால், தனது நிறுவனத்தில் பணிசெய்யும் ஊழியர்களுக்கு என்ன கொடுத்தால் குஷியாவார்கள் என்பதையும் இந்த தகவல் அறிவியல் கண்டறிந்து சொல்கிறது.

நீங்கள் யூடியூபில் பார்க்கின்ற வீடியோக்கள் அடிப்படையில் உங்களுக்கு புதிய வீடியோக்களை அறிமுகம் செய்கிறது. அதன்பின் இப்படிப்பட்ட வீடியோ பார்ப்பவர்கள் வேறென்ன பார்க்கலாம் என்பதைக் கணிக்கிறது. எத்தனை முறை பார்க்கிறார்கள் என்பதை வைத்து அவர்களை எடை போடுகிறது. எந்த நேரத்தில் எந்த வீடியோவைப் பார்ப்பவர்கள் என்ன குணாதிசயம் கொண்டவர்கள் என்பதை அல்காரிதம் மூலம் சேமிக்கிறது. அதன் அடிப்படையில் விளம்பரங்களோ, வசீகரங்களோ தந்து வலையில் வீழ்த்துகிறது.

2. அமேசான் !

அமேசான் நிறுவனத்தைப் பற்றி சொல்லவேண்டாம். ஆன்லைன் ஷாப்பிங் செய்த எல்லோருக்குமே அந்த அனுபவம் நிச்சயம் இருக்கும். ஒரு பொருளை வாங்க அந்தத் தளத்துக்குப் போனாலே உங்களை வரவேற்று உங்களுக்குத் தேவையானவற்றைத் தந்து உங்களை ஈர்த்துக் கொண்டே இருக்கும்.

உங்களுடைய தேடுதல் பேட்டர்ன், உங்களுடைய பர்சேஸ் பேட்டர்ன் போன்றவற்றையெல்லாம் வைத்து நீங்கள் ஒரு பொருளை வாங்குவீர்களா, மாட்டீர்களா என்பதை அது கணிக்கும். உங்களுடைய வாங்கும் திறமைக்குத் தக்க பொருட்களை மட்டுமே அது உங்களுக்கு பரிந்துரை செய்யும். மாருதி கார் வாங்கும் அளவுக்கு வசதி மட்டுமே உடையவர்களுக்கு அது ஆடி காரை பரிந்துரை செய்யாது. அந்த அளவுக்கு அதை அறிவுசார் மென்பொருளாய் மாறியிருக்கிறது. அதன் காரணஅது ம் ஆர்டிபிஷியல் இன்டலிஜென்ஸ் கலந்த பிக் டேட்டா என்பதில் சந்தேகமில்லை.

அது இன்னும் ஒரு படி மேலே போய், நீங்கள் ஒரு பொருளை வாங்குவீர்களா இல்லையா என்பதைக் கணித்து, வாங்குவீர்கள் என மென்பொருளின் அல்காரிதம் சொன்னால் அந்தப் பொருளை அடுத்திருக்கும் ஒரு கடைக்கோ, கோடவுனுக்கோ அது அனுப்பவும் செய்கிறது. இப்படி தனது வளர்ச்சியின் முதுகெலும்பாய் தகவல் அறிவியலைத் தான் கட்டி வைத்திருக்கிறது.

3, ஃபேஸ் புக் !

பேஸ்புக் தகவல் அறிவியலில் ஒரு மிகப்பெரிய உயரத்தை எட்டிய கம்பெனி. இந்த நிறுவனத்தின் பாசிடிவ் விஷயம் என்னவென்றால், அவர்களிடம் எக்கச்சக்க தகவல்கள் இருக்கின்றன என்பது தான். ஒன்றிரண்டு அல்ல, அவர்களிடம் சுமார் 220 கோடி பேருடைய தகவல்கள் இருக்கின்றன. எல்லாமே தனிப்பட்ட தகவல்கள். இவற்றை வைத்துக் கொண்டு உங்களுடைய தேவைகளையெல்லாம் அது அறிந்து கொள்ளும்.

அப்படியே உங்களோடு தொடர்பில் இருப்பவர்களைப் பார்த்து, யாரையெல்லாம் வசீகரிக்கலாம். என்னென்ன பொருட்களை விற்கலாம். என்பதையெல்லாம் கணக்கு போடும். விளம்பரங்களின் மூலம் மிகப்பெரிய லாபத்தை அடைகின்ற நிறுவனங்களில் ஒன்று பேஸ்புக் என்பதில் சந்தேகமேயில்லை.

இவையெல்லாம் நமக்குத் தெரிந்த பெரிய கம்பெனிகள். அதற்காக அவை மட்டும் தான் இந்த தகவல் அறிவியல் துறையில் கோலோச்சும் நிறுவனங்கள் என்பதில்லை. சின்னச் சின்ன நிறுவனங்கள் கூட தகவல் அறிவியலை தங்களுடைய பிஸினஸ் வளர்ச்சிக்குப் பயன்படுத்துகின்றன.

“சரி பண்றவன் பண்ணிட்டு போறான்”, என நிறுவனங்கள் அலட்சியமாய் இருந்து விடவும் முடியாது. பொம்மலாட்டக் குதிரையை ரேஸ் டிராக்கில் விட்டது போல ஆபத்தாகிவிடும். விரைவிலேயே பிஸினஸை மூட்டை கட்டி வைப்பதைத் தவிர வேறு வழி இல்லை என்றாகிவிடும்.

தகவல் அறிவியலின் சிந்தனை கொஞ்சம் பழையதாய் இருந்தாலும், இன்றைய தொழில்நுட்பம் அதை மிகப்பெரிய உயரத்துக்கு எடுத்துச் சென்றிருக்கிறது. அதனால் தான் இன்றைக்கு தகவல் அறிவியல் பொறியாளர்களின் தேவை முன்பெப்போதும் இல்லாத அளவுக்கு எகிறியிருக்கிறது.

Data Science 5 : தகவல் அறிவியல் 5

Image result for data science

கடந்த வாரங்களில் தகவல் அறிவியல் என்றால் என்ன என்பதைப் பற்றியும், அதன் பயன்கள் பற்றியும், அந்தத் துறையில் உள்ள பல்வேறு வேலை வாய்ப்பு விஷயங்கள் பற்றியும் பார்த்தோம். இந்த வாரம் தகவல் அறிவியல் துறைக்குள் நுழைந்து அங்கே அப்படி என்ன தான் வேலை செய்கிறார்கள் என்பதை எட்டிப் பார்க்கப் போகிறோம் !

அப்படி தகவல் அறிவியல் துறையில் என்ன வேலை தான் செய்கிறார்கள் ?

1. பிரச்சினையை புரிதல் !

தகவல் அறிவியலின் ஆகப் பெரிய விஷயமே ஒரு நிறுவனத்தின் பிரச்சினை என்ன என்பதைப் புரிந்து கொள்வது. பிரச்சினை என்ன என்பதைப் புரிந்து கொள்வது என்பது இரண்டு நிலை கொண்டது. ஒன்று ‘இது தான் என்னோட பிரச்சினை’ என முன்வைப்பது. இரண்டாவது, ‘இந்த பிரச்சினை இல்லாமல் எனக்கு இப்படிப்பட்ட ஒரு நிலை வேண்டும்’ என்பது !

ஒரு பிரச்சினையை அக்கு வேறு ஆணி வேறாகப் புரிந்து கொள்வது தகவல் அறிவியலில் மிக முக்கியம். அதற்கு ஏகப்பட்ட கேள்விகளைக் கேட்க வேண்டும். கேள்விகள் பிரச்சினைகளை அதிகப்படுத்தி, அதிலுள்ள அடிப்பட்ட விஷயங்கள் வரை வெளிக்கொணரும். எந்த அளவுக்கு பிரச்சினையை பிரச்சினையைப் புரிந்து கொள்கிறோமோ, அந்த அளவுக்கு தெளிவான தீர்வுகள் கிடைக்கும். பிரச்சினையைப் புரிந்து கொள்ளாமல் களத்தில் இறங்குவது தவகல் அறிவியல் துறையைப் பொறுத்தவரை மிகப்பெரிய பிழை.

உதாரணமாக, “நிறைய கஸ்டமர்களை ஈர்க்க வேண்டும்” என்பது ஒரு வரி தேவையாக இருக்கலாம். அதை வைத்துக் கொண்டு தகவல் அறிவியலில் எதுவும் செய்ய முடியாது. நீங்கள் என்ன செய்கிறீர்கள், எப்படிப்பட்ட கஸ்டமர்கள் வேண்டும், யாரெல்லாம் போட்டியாளர்கள்,அவர்களிடம் எவ்வளவு கஸ்டம்ர்கள் இருக்கிறார்கள், உங்கள் கஸ்டமர்களின் விமர்சனங்கள் என்ன ? குறைகள் என்ன ? எவ்வளவு நாட்கள் சராசரியாக உங்களோடு இருக்கிறார்கள் என தொடங்கி நூற்றுக்கணக்கான கேள்விகளை வரிசையாக எழுப்பினால் உங்களுக்கு கொஞ்சம் கொஞ்சமாக விஷயம் புரியத் துவங்கும்.

எந்த அளவுக்கு கேள்விகளைக் கேட்கிறீர்கள், எந்த அளவுக்கு தொடர்புடைய கேள்விகளைக் கேட்கிறீர்கள் என்பதை வைத்து உங்களுடைய முடிவுகளுக்கு தெளிவு கிடைக்கும். சில கேள்விகள் தான் மாற்றங்களைக் கொண்டு வரும். நிறுவனமே யோசிக்காத விஷயங்களை யோசிக்கத் துவங்குவதும் அப்போது தான். பிரச்சினையை புரிந்து கொள்வதற்கான ‘பிரெயின் ஸ்டாமிங்’ என இந்த விவாதத்தை அழைப்பதுண்டு.

2. தகவல் சேகரிப்பு

பெயரைக் கேட்டாலே புரிஞ்சிருக்குமே ! இருக்கின்ற தகவல்களையெல்லாம் சேகரிப்பது தான் இந்தக் கட்டம். ஆனால் அது நாம் நினைப்பது போல எளிதல்ல. தகவல்கள் எப்போதும் ஒரு நாலு ஃபைல்களில் இருப்பதில்லை. தகவல்கள் எங்கே இருக்கின்றன என்பதைக் கண்டுபிடிக்கவே நிறைய தகவல்கள் தேவைப்படும். அந்த தகவல்களைக் கண்டுபிடித்தபின் அதைச் சேகரிக்க வேண்டும்.

முதலில் வகைப்படுத்தப்பட்ட தகவல்கள் என்னென்ன இருக்கின்றன என்பதைக் கண்டுபிடித்து அவற்றை சேகரிக்க வேண்டும். இது எளிதான பணி. அதிக பயனளிக்கக் கூடிய தகவலும் இது தான். ஆனால் இது மட்டுமே முழுமையான தகவல் அல்ல. உதாரணமாக அலுவலக டேட்டாபேஸை எடுத்து அதிலுள்ள தகவல்களை இழுத்தெடுப்பது ! நிறைய பயனுள்ள தகவல்கள் கிடைக்கும்.

பின்பு நிறுவனம் சார்ந்த மற்ற இடங்களில் இருக்கின்ற தகவல்களை சேகரிக்க வேண்டும். உதாரணமாக அது ஒரு வலைத்தளமாக இருக்கலாம். நிறுவனத்தின் இன்ட்ரா நெட் எனப்படும் பாதுகாப்பான தனி வலைத்தளமாக இருக்கலாம். அவற்றையெல்லாம் சேகரிப்பது கொஞ்சம் கஷ்டமான பணி.

அடுத்தது அலுவலகத்திலுள்ள தகவல்களில் வகைப்படுத்தப்படாத தகவல்களைச் சேகரிப்பது. தலைவலியான வேலை என இதைச் சொல்லலாம். வகைப்படுத்தாத தகவல் எப்படி வேண்டுமானாலும் இருக்கலாம். ஒரு வீடியோவாகவோ, ஆடியோவாகவோ, ஒரு கிறுக்கல் கையெழுத்தாகவோ, ஒரு வாய்ச்சொல்லாகவோ எப்படி வேண்டுமானாலும் இருக்கலாம். அவையும் சேகரிக்கப்பட வேண்டும். அப்போது தான் முழுமையான ஒரு தீர்வுக்குள் செல்ல முடியும்.

தகவல்களைச் சேகரிக்கும் போது, முதல் கட்டத்தில் நாம் ஏகப்பட்ட கேள்விகளைக் கேட்டோமல்லவா ? அந்த அத்தனை கேள்விகளுக்குமான விடைகள் வந்திருக்கின்றனவா என்பதை பரிசீலனை செய்ய வேண்டும். புதிதாக கேள்விகள் கேட்க வேண்டிய தேவையிருந்தால் கேட்கலாம். இந்த கட்டம் மிக முக்கியமான கட்டம். இதில் தவற விடுகின்ற முக்கியமான தகவல்கள் நிறுவனத்தின் முடிவுகளை பெரிய அளவில் பாதிக்க வாய்ப்பு உண்டு.

3. தகவல் செயல்முறை

தகவல் அறிவியலின் முதுகெலும்பு என்பது தகவல் செயல்முறை அதாவது டேட்டா புராசசிங். பிரச்சினையைப் புரிந்து கொள்வதும், தகவல்களை சேகரிப்பதும் எந்த அளவுக்கு சிறப்பாக நடந்திருக்கிறது என்பதை வைத்து தான் இந்த செயல்முறைப் பகுதி வெற்றியடையுமா தோல்வியடையுமா என்பதைச் சொல்ல முடியும்.

தகவல் செயல்முறைக்கு முன்பு இருக்கின்ற ஒரு வேலை தகவல்களை தூசு தட்டி துடைத்து எடுப்பதும். தேவையற்ற தகவல்களை உடைத்து எறிவதும் தான். அந்த வேலைக்காகத் தான் பெரும்பாலான நேரத்தை தகவல் அறிவியலார்கள் செலவிடுவார்கள். சுமார் 70 முதல் 80 சதவீதம் நேரம் தேவையற்ற தகவல்களை நீக்குவதில் செலவாகும் என்கிறது ஒரு ஆய்வு.

தேவையற்ற ஒரு தகவல், முடிவில் மிகப்பெரிய மாற்றத்தை உருவாக்கி விடக்கூடும். எனவே தான் தேவையற்ற தகவல்களை அகற்ற வேண்டியது அவசியாகிறது. எல்லா பாடத்துக்கும் தோற்றுப் போகும் ஒரு மாணவனுக்கு, கணிதத்தில் 400 மதிப்பெண் என தவறாகப் பதிவாகியிருந்தால் மொத்த சதவீதத்தில் அவன் பெயர் முன்னணியில் வருமில்லையா ? அதே போல நினைத்துக் கொள்ளுங்கள்.

இந்த இடத்தில் மென்பொருட்கள் உதவிக்கு வரும். இருக்கின்ற தகவல்களை நாம் அப்படியே எதுவும் செய்து விட முடியாது. அதை அலச, அதை வைத்து உருப்படியாய் ஏதாவது செய்ய கணினியின் உதவி மிக மிக அவசியம். பைத்தான் , ஆர் போன்ற மென்பொருட்கள் இந்த இடத்தில் மிகப்பெரிய உதவியாய் இருக்கும்.

4. தகவல் ஆராய்ச்சி

இப்போது கைவசம் இருப்பவை நல்ல தகவல்கள். முறைப்படுத்தப்பட்ட தகவல்கள். இவற்றை வைத்துக் கொண்டு எப்படியெல்லாம் வித்தை காட்டலாம் என்பது தான் தகவல் அறிவியலின் ஒட்டு மொத்த விஷயம்.

இந்த தகவல்களை அலசி, ஆராய்ந்து, தொடர்புகளைக் கண்டறிந்து அதன்’பேட்டர்ன்’ அதாவது முறைகளை அறிந்து, அதைக் கொண்டு நிறுவனத்துக்குத் தேவையான தீர்வுகளை உருவாக்கும் இடம் இது தான்.

இங்கே எப்படி தகவலை நாம் காட்சிப்படுத்திப் பார்க்கிறோம், மனதுக்குள் படமாக விரித்துப் பார்க்கிறோம் என்பது மிக முக்கியம். அது தான் நிறுவனத்திற்குத் தேவையான தீர்வுகளை நோக்கி வழிநடத்தும்.

இந்த அலசலில் கிடைக்கின்ற தகவல்களை, பேட்டர்ன்களை வைத்து தான் ஆழமான அலசல் செய்ய முடியும். ஆழமன அலசலுக்குள் நுழைவதற்கு முன் தகவல்களை எப்படியெல்லாம் பயன்படுத்தலாம் என்பது குறித்த ஒரு பார்வை இருக்க வேண்டும். இந்த கட்டம் அதைத் தான் தரும்.

5. ஆழமான அலசல்

இந்த கட்டத்தில் தான் கண்டறிந்த தகவல்களை வைத்துக் கொண்டு நிறுவனம் எதிர்பார்க்கின்ற மாடலை உருவாக்கும் வேலை நடைபெறும். இந்த தகவல்களை எப்படிப் பயன்படுத்தினால் எப்படிப்பட்ட பயன்கள் கிடைக்கும் என்பதைக் கணிக்கும் ‘பிரடிக்டிவ் மாடல்’ உருவாவது இப்போது தான்.

இந்த இடத்தில் மீண்டும் சில கேள்விகளை எழுப்ப வேண்டும் ! நான் என்ன மாடலை கணிக்கப் போகிறேன். எனது நோக்கம் என்ன ? அது தான் நிறுவனம் எதிர்பார்க்கின்ற விஷயமா ? நிறுவனத்தின் நோக்கத்தோடும், எதிர்பார்ப்போடும் நான் ஒத்துப் போகிறேனா ? என்பதையெல்லாம் கேள்விகள் மூலம் உறுதி செய்து கொள்ள வேண்டியது முக்கியம்.

ஒரு மாடலை மட்டும் உருவாக்கி நிறுவனத்துக்கு அளிப்பது சரியான முறையல்ல. அது முழுமையான, சரியான, பக்காவான ஒரு தீர்வைத் தருமென்பதில்லை. எனவே பல மாடல்களை உருவாக்கி அதில் எது சிறந்ததாக இருக்கிறதோ, அதைப் பயன்படுத்துவதே சரியான வழி.

அல்காரிதங்கள், மெஷின் லேர்னிங் கான்செப்ட் போன்றவற்றையெல்லாம் பயன்படுத்தும் சரியான இடம் இது தான்.

எவ்வளவு தெளிவான, அழகான மாடலிஅ உருவாக்குகிறோம் என்பதல்ல முக்கியம். அந்த மாடல் நமக்குத் தேவையான ஒரு தீர்வைத் தருமா என்பதே கேள்வி. அதற்குத் தேவையான முயற்சிகளை எடுப்பதே இங்கே முக்கியமான விஷயம்.

5. அறிக்கை தயாரித்தல்

ரிப்போர்ட் ஜெனரேஷன் என்பது எந்த ஒரு பணியிலும் கிட்டத்தட்ட கடைசியில் வருகின்ற ஒரு வேலை. அது தான் அந்த ஒட்டு மொத்தப் பணிக்கும் ஒரு மரியாதையைக் கொண்டு வரும். ராப்பகலா கண்ணு முழிச்சு படிச்சேன், ஆனா பரீட்சைக்கு எதுவும் எழுதல என்றால் எப்படி இருக்கும். அதே போல தான், என்ன தான் முழு உழைப்பையும் போட்டு மாடல் உருவாக்கினாலும், அதை சரியான முறையில் காட்டவில்லையேல் பயனில்லை.

இந்த ஏரியாவை பலரும் அலட்சியமாக நினைப்பதுண்டு. ஆனால் இது மிக முக்கியமான ஒரு கட்டம் என்பதைப் புரிந்து கொள்ள வேண்டும்.

பார்த்தவுடன் பளிச் என புரிகின்ற படங்கள் மூலமாகவோ, புள்ளி விவரங்கள் மூலமாகவோ, இதை எளிமையாக விளக்குவது பயனளிக்கும். டைனமிக் ரிப்போர்ட்டிங் எனப்படும் தகவல்களை மாற்றுவதற்கு ஏற்ப மாறுகின்ற ஆன்லைன் ரிப்போர்டிங் இங்கே ரொம்ப வலிமையானது.

இவை தான் தகவல் அறிவியல் வேலையில் நடக்கின்ற பணிகள்.

( தொடர்வோம் )

தகவல் அறிவியல் – 4

Image result for data science

தகவல் அறிவியல் துறையில் வேலை வாய்ப்புகள் அதிகமாய் இருக்கிறது என்பதையும்,  கணிதம், பட்டப்படிப்பு, மென்பொருள் போன்றவற்றைப் படித்தவர்களுக்கு அங்கே வேலை வாய்ப்புகளும் அதிகமாய் இருக்கின்றன என்பதையும் கடந்த வாரம் அலசினோம். அப்படி இந்த துறையில் எப்படிப்பட்ட வேலைகள் இருக்கின்றன என்பதைப் பற்றிய ஒரு அறிமுகத்தைப் பார்போம்.

தகவல் அறிவியல் துறையில் பல்வேறு வேலைகள் இருக்கின்றன. நிறுவனத்தின் தேவைக்கும் தன்மைக்கும் ஏற்ப அவர்கள் அவற்றுக்கு பெயரிட்டு அழைப்பதும் உண்டு. உதாரணமாக சில நிறுவனங்கள் தகவல் விஞ்ஞானத்தை, மெஷின் லேர்னிங் என்றும் அழைப்பதுண்டு. பொதுவாக எப்படிப்பட்ட வேலைகள் இந்த துறையில் உண்டு என்பதை பார்ப்போம்.

மேஜேஜ்மென்ட் இன்ஃபர்மேஷன் சிஸ்டம்ஸ் ரிப்போர்டிங் எக்சிகியூட்டிவ் ( MIS Reporting Executive ) என ஒரு பணி இருக்கிறது. தகவல் அறிவியலைப் பொறுத்தவரை இது ஒரு மிக முக்கியமான பணி. வணிகத் தேவை என்ன என்பதை சரியாகப் புரிவதும், தொழில்நுட்பத்தில் அதை எப்படி புகுத்துவது என்பதையும் இவர்கள் தான் முடிவு செய்வார்கள். அதாவது இவர்கள் கொடுக்கின்ற அறிக்கைகளின் அடிப்படையில் தான் பெரும்பாலான பிசினஸ் முடிவுகள் எடுக்கப்படும்.

இவர்களுடைய பணி, நிறுவனத்துக்குத் தேவையான அறிக்கைகளை பல்வேறு வகைகளில் உருவாக்குவது. நூற்றுக்கணக்கான பக்கங்களில் எழுதி வைக்கவேண்டிய தகவல்களை ஒரு சின்ன படத்தின் மூலம் காட்டி விடும் வித்தை இவர்களின் சிந்தனைக்கு உரியது.

உதாரணமாக, விற்பனைத் தகவல்கள் என்னென்ன ? என்னென்ன பொருட்கள் கைவசம் இருக்கின்றன ? எப்படிப்பட்ட விமர்சனங்கள் வந்திருக்கின்றன ? போன்ற  பல்வேறு தகவல்களை இவர்கள் அலசுவார்கள். அதன் அடிப்படையில் அவர்கள் உருவாக்கும் அறிக்கைகள் முக்கியமான தொழில் முடிவுகள் எடுக்க வசதியாக இருக்கும்.

கணினி துறை அல்லது பொறியியலில் பட்டப்படிப்பு இருப்பவர்கள் இந்தத் துறையில் நுழைவது அவர்களுக்கு எளிதாக இருக்கும். “எப்படிப்பட்ட தகவல்களைக் கொடுத்தால் பிஸினஸ் வளரும்” என்கின்ற ஒரு பரந்து பட்ட பார்வை இருக்க வேண்டியது அவசியம். காரணம், இவர்கள் கொடுக்கின்ற தகவல்களே பிஸினஸை அடுத்த நிலைக்கு கொண்டு செல்லவும், எப்படிப்பட்ட திசையில் பயணிக்க வேண்டும் என்பதை முடிவு செய்யவும், எப்படிப்பட்ட மாற்றங்களைக் கொண்டு வரவேண்டும் என்பதைத் தீர்மானிக்கவும் உதவுகின்றன.

பிஸினஸ் அனலிஸ்ட் ; இன்னொரு முக்கியமான பணி. இதை வணிக ஆய்வாளர் பணி என்று சொல்லலாமா ? அல்லது தொழில் ஆய்வாளர் என்று சொல்லலாமா தெரியவில்லை. இப்போதைக்கு பிசினஸ் அனலிஸ்ட் என்றே வைத்துக் கொள்வோம்.

ஒரு நிறுவனத்தின் தேவையை துவக்கத்திலிருந்தே கவனிப்பது இவர்களுடைய வேலை. ஒரு பிஸினஸ் வளர்ச்சியடைய என்னென்ன தடைகள் இருக்கின்றன. என்னென்ன இடைவெளிகள் இருக்கின்றன என்பதைக் கண்டறிவது இவர்களுடைய வேலையின் முக்கியமான அம்சம்.

தகவல்களை அலசி ஆராய்பவர்களைத் தகவல் ஆய்வாளர் என்று சொல்வோம். அதே போல பிஸினஸை அலசி ஆராய்பவர்களே இந்த பிஸினஸ் அனலிஸ்ட் என அழைக்கப்படுகின்றனர்.

பிஸினஸ் அட்மினிஸ்ட்ரேஷன் (எம்.பி.ஏ) பிரிவில் ஒரு பட்டப்படிப்பு இருப்பது இந்த வேலைக்கு ரொம்ப நல்லது. கூடவே தகவல்களோடு விளையாடும் ஆர்வம் இருக்க வேண்டும். பிஸினஸை எப்படியெல்லாம் வலுப்படுத்தலாம் எனும் பார்வை இருக்க வேண்டியதும் அவசியம்.

பிஸினஸின் தேவையை சரிவரப் புரிந்து அதிலுள்ள குறைகளைக் களைந்து தொழில்நுட்பத்தின் மூலம் அதை வலுப்படுத்தும் பணியே இந்த பிஸினஸ் அனலிஸ்ட் பணி.

டேட்டா அனலிஸ்ட்

தகவல் அறிவியலில் மிக முக்கியமான பணிகளில் ஒன்று டேட்டா அனலிஸ்ட் வேலை. தகவல்களைத் திரட்டுவது, திரட்டிய தகவல்களை வகைப்படுத்துவது இரண்டும் இவர்களுடைய கைவேலைகள். இவர்களும் டேட்டா விஞ்ஞானிகள் அதாவது டேட்டா சயின்டிஸ்ட் இருவரும் வேறு வேறு.

டேட்டா அனலிஸ்ட் என்பவர் அவருக்கு ரொம்ப ஜூனியர் என்று வேண்டுமானால் வைத்துக் கொள்ளலாம். ஆனால் மிக முக்கியமான அடிப்படைப் பணிகள் செய்வது இவர்கள் தான்.

டேட்டா அனலிஸ்ட் என்பவர் ஒரு சில முக்கியமான மென்பொருட்களைப் பற்றித் தெரிந்திருக்க வேண்டும். குறிப்பாக ஆர், பைத்தான், எச்.டி.எம்.எல், எஸ்.க்யூ.எல், சி ++, ஜாவா போன்ற அனைத்து மென்பொருட்களின் கலவையாய் உங்களுடைய மென்பொருள் பரிச்சயம் இருப்பது மிக சிறப்பு.

தகவல்களை சேர்ப்பது, சேமிப்பது இவற்றோடு இவர்களுடைய பணி முடிந்து விடுவதில்லை. எப்படி அதை பயன்படுத்துவது என்பதையும் இவர்கள் யோசிக்க வேண்டும். ஹடூப் போன்ற மென்பொருட்களைக் கற்பது பயன்கொடுக்கும்.

நிறுவனத்தின் பல்வேறு நிலைகளிலுமுள்ள தலைவர்கள், வெவ்வேறு தகவல் தேவைகளோடு அணுகுவது இவர்களைத் தான். இவர்களும் அவர்களுடைய தேவைகளை நிறைவேற்றும் வகையில் தங்களுடைய மூளையையும், கையிலுள்ள தகவலையும் கசக்குவார்கள்.

எப்படி தகவலை வகைப்படுத்துவது, அதை எப்படி பயனுள்ள வகையில் மாற்றுவது, அல்காரிதங்களை/வழிமுறைகளை எழுதுவது, என்பதையெல்லாம் கவனிப்பது இவர்கள் தான்.

  1. ஸ்டாட்டிஸ்டிஷியன் / புள்ளிவிவர ஆய்வாளர்

ஸ்டாட்டிஸ்டிக் விஷயங்களைச் சொல்லும் இவரைப் புள்ளி விவரப் புலி என்று சொல்லலாமா ? தகவல்களைச் சேர்த்து, வகைப்படுத்தி, பயன்படுத்துவத்தோடு மட்டுமல்லாமல், அதன் அடிப்படையில் முடிவுகளையும் எடுப்பது இவர்களுடைய வேலை.

மார்க்கெட் ரிசர்ட், போக்குவரத்து, கல்வி, விளையாட்டு, என எல்லா இடங்களிலும் இவர்களுடைய தேவை உண்டு. இந்த வேலைக்குள் நுழையவேண்டுமென்றால் பட்டப்படிப்பு அவசியம். அதிலும் குறிப்பாக  ஸ்டாடிஸ்டிக்ஸ் அல்லது கணிதவியலில் பட்டம் இருந்தால் ரொம்ப நல்லது.

இவர்களும் ஆர் போன்ற ஏதோ ஒரு மென்பொருளின் மீது அதிக பரிச்சயம் கொண்டிருக்க வேண்டியது அவசியம். இவர்களுடைய பணிக்கென பல மென்பொருட்கள் உள்ளன MATLAB, SAS, Python, Stata, Pig, Hive, SQL, Perl போன்றவை புள்ளிவிவரவியலாளர் அல்லது ஸ்டாட்டிஸ்டிஷியன் பணிக்கு உதவுவதற்காக இருக்கின்ற மென்பொருட்கள். இவற்றில் சிலவற்றைக் கற்றுக்கொள்வது பயனளிக்கும்.

தகவல்களை அலசி அதில் ஒரு பேட்டர்ன் அதாவது முறையைக் கண்டுபிடிப்பது, தகவல்களுக்கு இடையே உள்ள தொடர்பைக் கண்டுபிடிப்பது, ஒரு டிரென்ட் கண்டுபிடிப்பது போன்றவற்றையெல்லாம் இவர்கள் கவனிப்பார்கள்.

5

டேட்டா சயின்டிஸ்ட்

இன்றைக்கு இருக்கக் கூடிய தகவல் அறிவியல் வேலைகளில் ஹாட் வேலை என்றால் இது தான். இதற்கு கொஞ்சம் அனுபவம் இருக்க வேண்டும். எல்லா நிறுவனங்களிலும் டேட்டா சயின்டிஸ்ட் வேலை தேவை இருக்கும். ஒவ்வொரு நிறுவனத்துக்கும் கொஞ்சம் கொஞ்சம் வித்தியாசமான திறமைகளில் டேட்டா சயின்டிஸ்ட் தேவைப்படுவார்கள்.

மென்பொருட்களின் மீதான பரிச்சயம் இதற்கு மிக மிக அவசியம்.  R, SAS, Python, SQL, MatLab, Hive, Pig, மற்றும் Spark போன்றவை இதற்குத் தேவையான மென்பொருட்கள் !

ஒரு நல்ல தகவல் விஞ்ஞானியின் வேலை தகவல்களோடு முடிந்து விடுவதில்லை. அந்த தகவல்களுக்கும் நிறுவனத்துக்கும் இடையேயான பிணைப்பைக் கண்டறியும். அந்த தொடர்பை வைத்துக் கொண்டு எப்படியெல்லாம் பிஸினஸை வளர்த்தலாம் என்பதை அலசும்.

இந்த பணிக்கு ஆர்வமும், பொறுமையும் மிக மிக அவசியம். நல்ல தெளிவான சிந்தனையும், திறமையும் இருந்தால் இந்தத் துறையில் கலக்கலாம்.

ஒரு டேட்டா சயின்டிஸ்ட் என்பவர் சுருக்கமாகச் சொல்லவேண்டுமெனில் ஒரு டேட்டா அனலிஸ்ச்ட், ஒரு பொறியாளர், ஒரு பிஸினஸ் அனலிஸ்ட் போன்ற பலவற்றின் கலவையாக இருப்பார்.

6

டேட்டா எஞ்சினியர்

பெரும்பாலும் பிக்டேட்டா சார்ந்த பணிகளைக் கவனிப்பதற்கு டேட்டா எஞ்சினியர்கள் தேவைப்படுவார்கள். இவர்களை டேட்டா ஆர்கிடெக்ட் என்றும் அழைப்பார்கள்.

தகவல் பொறியாளர்களுக்கு கணினி பிரிவில் ஒரு பட்டப்படிப்பு அவசியம். கூடவே Pig, Hadoop, MapReduce, Hive, MySQL, Cassandra, MongoDB, NoSQL போன்றவற்றில் பரிச்சயம் இருப்பது தேவையானது. அதே போல மென்பொருட்களான R, Python, Ruby, C++, Perl, Java, SAS, SPSS, and Matlab போன்றவற்றில் நல்ல பரிச்சயம் இருக்க வேண்டியதும் மிக மிக அவசியம்.

தகவல்களை வகைப்படுத்துவது, அதை டெஸ்ட் செய்வது, அதை நிறுவனத்தின் தேவைக்கு ஏற்ப அறிக்கையாய், படங்களாய் சமர்ப்பிப்பது இவையே இவர்களுடைய முக்கியமான வேலை.

இவை தவிர, பிக்டேட்டா பொறியாளர், மெஷின் லேர்னிங் பொறியாளர் என பலர் இந்த தகவல் அறிவியல் துறையின் பட்டியலில் வருவார்கள்.

மேலே குறிப்பிட்டுள்ளவை தகவல் அறிவியல் துறையிலுள்ள சில முக்கியமான வேலைகள். இவற்றைத் தவிரவும் பல வேலைகள் தகவல் அறிவியல் துறையில் உண்டு. இந்தப் பணிகளுக்குத் தேவையான திறமைகளை வளர்த்துக் கொண்டால் தகவல் அறிவியல் துறையில் நுழைவதில் சிக்கல் இருக்காது.

Data Science 3 : தகவல் அறிவியல் ‍ 3

Image result for data science

தகவல் அறிவியலின் பரபர வளர்ச்சி இன்றைக்கு இளைஞர்களை வெகுவாக‌ வசீகரித்திருக்கிறது. அதை நோக்கி பலர் தங்களுடைய பார்வையைத் திருப்பியிருக்கின்றனர். இதையே வாய்ப்பாக வைத்துக் கொண்டு பலர் ஃபாஸ்ட் புட் போல‌ பயிற்சி நிலையங்களை உருவாக்கி தகவல் அறிவியல் கற்றுத் தருகிறேன் என வலை விரிக்கத் துவங்கியிருக்கின்றனர். பயிற்சி நிலையம் சின்னதாக இருக்கிறதா ? பெரியதாக இருக்கிறதா என்பதல்ல பிரச்சினை. சரியான விதத்தில், சரியானவர்களால், சரியானவைகளைக் கற்றுத் தருகிறார்களா என்பதே முக்கியம்.

தகவல் அறிவியல் மீதான வசீகரம் இருப்பது நல்லது தான். நீச்சல் தெரியாமல் குளத்தில் குதிப்பதைப் போலவோ, நீச்சலே பிடிக்காமல் குளத்தில் குதிப்பதைப் போலவோ டேட்டா சயின்ஸ் துறையில் நுழைவது காலவிரயம் ! யாரெல்லாம் தகவல் அறிவியலைக் கற்றுக் கொள்ளலாம் ?. அல்லது டேட்டா சயின்ஸைக் கற்றுக் கொள்ள  என்னென்ன திறமைகள் இருக்க வேண்டும் ? என்பதைப் பற்றிய ஒரு அடிப்படைப் புரிதல் நமக்கு இருக்க வேண்டும்.

இன்றைக்கு தகவல் அறிவியலைக் குறித்து பேசும் பலரும் பல விதமான தகவல்களைத் தருகின்றனர். இதில் எது சரி, எது தவறு என்பதைப் புரிந்து கொள்வதில் பலருக்கும் குழப்பம். ஹடூப், மெஷின் லேர்னிங், அனாலிடிக்ஸ், சயின்டிஸ்ட் போன்ற வார்த்தைகள் தகவல் அறிவியல் துறையில் நுழைய விரும்பும் இளைஞர்களை குழப்பக் கூடும். எனவே தகவல் அறிவியல் குறித்து இதுவரை மற்றவர்கள் சொன்ன விஷயங்களை கொஞ்ச நேரம் ஒதுக்கி வையுங்கள். தகவல் அறிவியலுக்குள் நுழைய அடிப்படையாக என்னென்ன தேவை என்பதை மிக மிகச் சுருக்கமாகப் பார்த்து விடுவோம்.

முதலாவது, தகவல் அறிவியல் என்பது எண்களோடு விளையாடும் வேலை. புள்ளி விவரங்கள், கூட்டல், கழித்தல், அல்காரிதம், கேல்குலஸ், நிகழ்தகவு போன்ற விஷயங்கள் தகவல் அறிவியலின் முதுகெலும்பாக இயங்கக் கூடியவை. இவை எல்லாமே கணிதவியலின் அடிப்படை விஷயங்கள். எனவே, தகவல் அறிவியல் கற்றுக் கொள்ள விரும்புபவர்களுக்கு முதலில் இருக்க வேண்டிய தகுதி, கணிதவியலில் அறிவு.

அதற்காக கணிதவியலில் இளங்கலைப் பட்டமோ, முதுகலைப் பட்டமோ இருந்தால் தான் தகவல் அறிவியலில் நுழைய முடியும் என்றில்லை. கணிதத்தின் மீது ஆர்வமும், அடிப்படை அறிவும், கற்றுக் கொள்ளும் விருப்பமும் இருந்தால் போதும். கணிதம் என்றாலே காத தூரம் ஓடுபவர்கள் தகவல் அறிவியல் பக்கம் வராமல் இருப்பது நல்லது அப்படிப்பட்டவர்களுக்கு தேவையற்ற மன அழுத்தங்களை தகவல் அறிவியல் தரலாம்

தகவல் அறிவியல் துறைக்கு பல்வேறு நிலையிலுள்ள மக்களும் வருகின்றனர். இப்போது தான் படித்து முடித்த மாணவர்கள் முதல் பி.ஹைச்.டி முடித்த அறிவர்கள் வரை இதில் அடக்கம். அதனால் சிலர், “பி.ஹைச்.டி படித்தால் தான் இதெல்லாம் புரியும் போல !”, என தவறாய் நினைப்பதுண்டு. அந்த நினைப்புகளையெல்லாம் முளையிலேயே கிள்ளி எறியுங்கள்.

இரண்டாவது தேவை, கணினி அறிவு. மென்பொருள் எழுதத் தெரிந்திருக்க வேண்டும் என்பது அடிப்படைத் தேவை. அட்வான்ஸ் மென்பொருட்கள் தெரிந்திருக்க வேண்டியதில்லை. அவற்றைப் படிப்படியாகக் கற்றுக் கொள்ளலாம். ஆனால் அடிப்படை மென்பொருள் அறிவு கண்டிப்பாகத் தேவை. தகவல்களை அல்காரிதங்களின் மூலமாய் தேவையான தகவல்களாக மாற்றுவதற்கு மென்பொருள் அறிவு அவசியம்.

பைத்தான். ஆர் போன்ற மென்பொருட்கள் தெரிந்திருந்தால் மிக எளிது. இல்லாவிட்டாலும் பிரச்சினையில்லை. அடிப்படை மென்பொருட்களான சி, சி++, ஜாவா போன்ற மென்பொருட்களில் நல்ல பரிச்சயம் இருந்தாலே போதும். மென்பொருள் பற்றிய பரிச்சயம் அறவே இல்லை என்பவர்களால் தகவல் அறிவியல் துறையில் நுழைய முடியாது. எனவே கொஞ்சம் புரோகிராமிங் பக்கம் பார்வையை செலுத்துவது அவசியம்.

அதிலும், டேட்டா பேஸ் எனப்படும் தகவல் சேமிப்பு மென்பொருட்கள் பற்றிய அறிவு நிச்சயம் இருக்கவேண்டும். எப்படியெல்லாம் தகவல்களை சேமிக்கலாம், அதை எந்தெந்த வகையில் எடுக்கலாம், எப்படியெல்லாம் வகைப்படுத்தலாம், என்னென்ன கேள்விகள் மூலம் தகவல்களைப் பிரித்தெடுக்கலாம் என்பதையெல்லாம் கற்றுக் கொள்ள எஸ்.க்யூ.எல் அடிப்படை அறிவு இருப்பது தேவையானது ! இங்கும் கவனிக்க வேண்டிய விஷயம், இதிலெல்லாம் சூப்பர் டூப்பர் ஆட்களாய் இருக்க வேண்டிய அவசியம் இல்லை என்பது தான். ஆனால் நன்றாகத் தெரிந்திருக்க வேண்டும் என்பது கட்டாயம்.

டொமைன் ஸ்கில்ஸ் எனப்படும் கள அறிவு தகவல் அறிவியல் துறையில் முக்கியமானது. ஆனால் இதை துவக்கத்திலேயே படித்து விட முடியாது. நாம் எந்த துறையில் தகவல் அறிவியல் பணி செய்யப் போகிறோமோ அந்தத் துறை சார்ந்த விஷயங்களைக் கற்றுக் கொள்வது தான் சரியானது. உதாரணமாக மருத்துவத் துறையில் தான் தகவல் அறிவியல் வேலை செய்யப் போகிறீர்கள் என்றால், “ஹெல்த்கேர்’ டொமைன் பற்றி நன்றாகத் தெரிந்து வைத்திருப்பது அவசியம்.

தகவல் அறிவியல் கொண்டு வருகின்ற முடிவுகளை அலசவும், எப்படிப்பட்ட முடிவுகள் பயன்படும் என்பதை முடிவு செய்யவும் டொமைன் ஸ்கில்ஸ் தேவை. மருந்துகளின் தேவைகள் பற்றிய புள்ளிவிவரத்தை அதைப்பற்றி எதுவுமே தெரியாதவர்கள் படித்தால் புரியாது இல்லையா ? அது தான் அடிப்படை விஷயம்.

வங்கித் துறை சார்ந்த தகவல் அறிவியல் எனில் பேங்கிங் டொமைன் கற்றுக் கொள்ள வேண்டும். காப்பீடு துறை சார்ந்த டேட்டா சயின்ஸ் பணியெனில் ‘இன்சூரன்ஸ் டொமைன்’ கற்றுக் கொள்ள வேண்டும். வணிகம் சார்ந்த ஏரியா எனில் ‘ரிடெயில் டொமைன்’ தெரிந்திருக்க வேண்டும். இப்படி தேவையான ஒன்றைத் தெரிந்து கொள்ளலாம். டொமைன் ஸ்கில்ஸ் எனப்படுவதை ஒரே நாளிலோ, ஒரு படிப்பின் மூலமாகவோ கற்றுக் கொள்ள முடியாது. அடிப்படை அறிவைப் பெற்றுக் கொண்டு பின்னர் படிப்படியாக அதை வளப்படுத்திக் கொள்ளலாம்.

தகவலை விஷுவலைஸ் செய்து பார்ப்பது, அதாவது கற்பனை செய்து பார்ப்பது என்பது இந்த படிப்புக்கு தேவையானது. ஒரு துப்பறிவாளன் கையில் கிடைக்கும் ஒரு சின்ன பொருள் ஒரு பெரிய குற்றத்தைத் துப்பு துலக்க உதவுவது போல, தகவல் அறிவியலாளனின் கையில் கிடைக்கின்ற தகவல்கள் மிகப்பெரிய மாற்றத்துக்குரிய விடையைத் தர முடியும். அதற்கு, ‘இந்த தகவலை வைத்து என்ன செய்யலாம்’ என கற்பனை செய்து பார்க்கும் விஷுவலைசிங் திறமை அவசியம்.

அடிப்படையாக ஒரு பட்டப்படிப்பு இருப்பது ரொம்ப நல்லது. கணிதம், அறிவியல், காமர்ஸ் போன்ற பட்டப்படிப்பு இருந்தால் சிறப்பு !  பட்டப்படிப்பு இந்தத் துறையில் உங்களை முழுமையாக ஈடுபடுத்திக் கொள்ளும் ஊக்கத்தைத் தரும். ஒருவேளை வேறு நிறுவனங்களில், துறைகளில் வேலைபார்த்த அனுபவம் உடையவர்கள் பட்டப்படிப்பு இல்லாமலும் இந்த துறையில் நுழையலாம்.

கம்யூனிகேஷன் ஸ்கில்ஸ் எனப்படும் உரையாடல் திறனும் இந்த துறைக்கு ரொம்பவே கை கொடுக்கும். தகவல்கள் எப்போதும் நமக்கு எளிதில் கிடைத்து விடுவதில்லை. அதற்கு நமது உரையாடல்கள் தேவைப்படும். அதே போல, நாம் உருவாக்குகின்ற பணிகளை மிகத் திறமையாக அடுத்தவர்களுக்கு எடுத்துரைக்கவும் கம்யூனிகேஷன் திறமை மிக அவசியம்.

எல்லாவற்றுக்கும் மேலாக இருக்க வேண்டிய இரண்டு முக்கியமான விஷயங்கள் உற்சாகமும், புதுமையை விரும்பும் மனமும். தகவல்களை எப்படியெல்லாம் பயன்படுத்தலாம், எப்படியெல்லாம் அலசலாம், எப்படிப்பட்ட வகைகளில் வகைப்படுத்தலாம் என்பதெல்லாம் புதுமையை விரும்புபவர்களால் மட்டுமே முடிவு செய்ய முடியும். நூல் கண்டு போல சுற்றிப் பிணைந்து கிடக்கின்ற தகவல்களை சிக்கலில்லாமல் பிரித்தெடுக்க, தேவையற்ற தகவல்களை வெட்டி எறிய உற்சாக மனம் ரொம்ப முக்கியம். அடிப்படையாக, பிசினஸை எப்படியெல்லாம் வளப்படுத்தலாம், வலுப்படுத்தலாம் எனும் சிந்தனை ஓடிக்கொண்டே இருக்க வேண்டும். இவையெல்லாம் தான் ஒருவரை தகவல் அறிவியலில் சிறப்புற வைக்கும்.

சுருக்கமாக கணிதத்தில் பரிச்சயமும் ஆர்வமும் இருக்கிறதா ? ஓரளவு மென்பொருள் பரிச்சயம் இருக்கிறதா ? புதுமை செய்யும் ஆர்வம் இருக்கிறதா ? தகவல்களோடு விளையாடும் பொறுமை இருக்கிறதா ? எனில் நீங்கள் தைரியமாக இதில் காலெடுத்து வைக்கலாம்.

( தொடர்வோம் )